GINA (MIZO FICTION RELIGIOUS HORROR STORY) WARNING - 18+ Written by : Aaron Malsawmdawngzuala CHAPTER - 2

 GINA

(MIZO  FICTION RELIGIOUS HORROR STORY)

WARNING - 18+

Written by : Aaron Malsawmdawngzuala

CHAPTER - 2

***********************

Tukthuan eikham hnu chuan Gina-i pawh tih tur a hre lo kher mai, inah chuan a vei nulh nulh reng a. A bialpa Mama lah an in lamah hna a thawk daih bawk si a, ni khat lek a hmuh loh pawhin a lung a leng nghal der zel a. A thiannu Te-i te inah chuan len a tum a, a han phone lawk phawt a.

Te-i pawh chuan lo leng ngei ngei turin a lo hrilh zawk hlauh mai, tichuan a scooty la chhuakin ava leng ta a. An inkawm a, an titi dun nasa kher mai. Gina-i chuan nui suk chung hian, "Enteh Te-i, nizana ka room-a sava rawn thlawk lut tih vel ka sawi kha ila hria em?" tiin a han zawt a. "Hria e, tinge chu chu?" tiin a lo zawt let vat a.

"Tukverh ah khan a rawn fu a, chuan thli a rawn thleh thut a. Tukverh kawngkhar khan a vuak chilh a, a rawn tla lut tawp a. A thi tawh a nih ngei ringin ka la kang a, mahse a lo la thi lova. Ka hum nghet deuh a, ka thlah leh chiah khan a dam daih mawle." a han ti a. Te-i chuan a fiamthu a nih ringin, "Awiii...i van bawn em em." tiin a lo nuih mai a.

"Tunlai chu ka awmdan hi a mak lutuk, tu emaw hian min bia ang tlatin ka hria." Gina-i chuan a han ti leh a. "Engtin nge i awm a?" tiin a lo zawt a. "Ihmaw...hmeichhe aw ania, TIDAMTU I NI...tiin min hrilh chhen zel." a han ti leh a. Te-i chu a nui huk a, "Tunge chunu chu ni anga? I fiamthu nge i ti tak tak?" tiin a zawt a.

Gina-i hmel chu a serious ta hle mai, "Te-i..ka fiamthu lo. Nimin zinga driver kha nikhawhrelovin a awm a, a thi hnuang bawk. A hliam en khan a dam chhuah pawh a rinawm loh, tiang vela hliam nasa chu a ni. Mahse ka bengah hian aw hian driver chu va khawih turin min hrilh a, ka va khawih chiah khan a dam nghal a, a rawn harh nghal." a han ti a.

Te-i chu a ngawi vang vanga , "Chuan sava pawh chu i khawih chiah chuan a dam ta nghal tihna em ni?" tiin a han zawt leh a. "Aw ni e...kha sava pawh kha a thla ruh a tliak a, chuan a zawi vek bawk. Mahse ka khawih chiah khan a rawn tho kang leh a, chuan a thlawk chhuak nghal bawk." tiin a lo chhang leh a.

An ngawi dun vang vang a, chutah Te-i chu a nui ta tiah tiah mai. "Bawihte, zanah i mu tlem anih kha. I tha veleh mai ang, thlamuang deuh khan awm rawh." a ti ta daih mai. Gina-i pawh chu a nui suk a, "Nia, ka ngaihbel mai mai pawh a ni mahna." a ti ve mai a. Sana an han en a, tlai dar 4 a lo pel der tawh mai.

"Ka'n haw tawh ange, a tlai tawh emai." tiin Gina-i chu a ding a, "Pawn thleng ka lo thlah ang che." tiin Te-i chuan a zui ve nghal a. Te-i chu a bai deuh suih suih a, kawngka bul thleng chu a thlah a. A kal hma chuan Gina-i chuan, "Tinge a? Ka rawn len tirh pawh khan i bai suih suih tawh, i ke ana em ni?" tiin a zawt a.

"Nia..niminah ka nau nen kan inbuan fiam a. Ka ke hi a tina deuh a, mahse chutia na chu a nilo." tiin a lo chhang a. Gina-i chuan a tihdam theih ngei a ring a, mahse Te-i chuan a awih dawnlo tih a hre bawk si. "Khawi lai kha nge na a?" tiin a han zawt a. "Hei..helai hi, ka ngal ruh hi a tur ve deuh ut ut a." tiin Te-i chuan a kawh hmuh a.

Gina-i chuan a thiannu chawn chu hlimin a khawih ta a, "Tinge a? I sawh te anilo maw?" a han ti kual vel a. "Ni lo..ka tina ve palh hrim hrim aniang." tia Te-i'n a sawi lai chuan Gina-i chuan a thiannu ke chu a chul a chul a, a maimitchhing vang vang bawk. A han ding kang leh a, "Anih chuan ka kal phawt ange." tiin an inthlah liam ta a.

Gina-i kal veleh chuan Te-i pawh chu a room lamah chuan ngaihtuah miah lo hian a tlan chho nghal a, roomah chuan lutin a phone chu a khawih mial mial a. "Bawihi, chaw rawn chhum rawh." tia a nu koh ri chu a hria a. A tho a, room atang chuan a chhuak a. Inhnuai lamah chuan a tlan thla lehnghal a, chutah a ding chat mai.

Gina-i haw hnua, pangngai deuha a kal thei te, chak taka a room lama a tlan chho thei nghal ngawt mai te chu mak a inti hnuhnawh leh kher mai. "Ahh...ka ke hi, ana tawh miah lo." tiin a ke te chu a khawih a, a chawn na lai te chu a han hmet kual vel a. Mahse engmah a lo na tawh reng reng lo mai, "Ehe..avan mak em em." a ti nuah nuah ringawt a.

************************

Mama hnathawk zo pawh chu a inbual a, a chau tawh bawk nen, shower tuiin a phuh seng seng chu nuam a ti kher mai. A maimitchhing a, a zai rut rut a. Sahbawn chu a han inhnawih phuan suah suah a, tichuan sahbawn dahna ah chuan a dah leh mai a. Tichuan a han intleuh fai a, a ke lampang sil tum chuan sahbawn chu a han ban leh a.

Mahse a lo awm tawh miah lo, a han enchiang nghal vat a. Mahse sahbawn dahna chu a lo ruak vek mai, "Ehe..khawnge ka dah hman a?" tiin a han zawng kual chiam a. Chutah a kut velama a thil hum chu a en a, sahbawm a hman zawh tak chiah kha a lo hum reng mai a nih chu. Mak ti tak hian a en vang vang a, "Engtik laiin nge ka lak leh hman a?" tiin a phun nuah nuah mai.

Mahse tlangval haihawt ve tak mai a ni a, a ngaih chu ti tha luiin a inbual chhunzawm leh mai a. Tichuan a inbual zo va, shower te chu a off a. Towel vengin bathroom chu a chhuah san a, a room lam a pan mek lai chuan bathroom shower chu a rawn in on leh ta tlat mai. A ding chat a, "Enge maw awmzia ni?" tih nuah nuah pah chuan bathroom lamah chuan ava let leh a.

Kawngka a hawng chiah chu shower chu a lo in off thlap a, mak a ti kher mai. Kawngka chu kharin a kalh tha leh mai a, "Ka bengchhe ri bak va ni suh." tih pah chuan a beng chu a kawm ang nawk nawk a. Tichuan a room lam panin a inthlak mawlh mawlh a, a messege tone a rawn ri ral ral mai.

A han en chuan Gina-i a lo ni, "Duat, zanin chu lo leng rawh aw...ka ngai emai che." tih hi a lo ni a. A khi deuh sak a, "Tehreng mai, ka lo leng dawnnia." tiin a reply a. Mama hi a hmingpum chu Malsawmtluanga a ni a, kum 25-a upa a ni. Gina-i, Te-i leh Zuali te hi 23 vek an ni a, Henry-a leh Remkima erawh kum 24 an ni thung.

**********************

Zanah chuan Mama pawh chu Gina-i te inah chuan ava leng ta ngei a, choka lamah chuan an awmdun a. Gina-i nu leh pa leh a nau kum 15 mi, Baby-i te chuan TV an en thung a. Chutia an inkawm mawlh mawlh lai chuan Gina-i pa, Pu Ringa chu a thaw a rawn hah thut mai. A awm chu a dawm a, a thaw ta hrawk hrawk mai.

Pu Ringa hi lung tha lo nei sa a ni hrim hrim a, a hrisel lo hle bawk. Zuk leh hmuan lama a insum theih loh em vang a ni pakhat bawk a, zu erawh a in ngai hauh lo thung. Pi Marovi chu a mangang hle mai, "Bawihi pa, enge awmzia? I tha em?" tiin a bawihsawm nghal a. Mahse Pu Ringa chuan a chhang thei lo, a mitmeng pawh a dik lo tan.

Gina-i leh Mama te pawh chu an va tlan phei ve nghal a, "Pa..pa, ngati nge? Engtin nge i awm?" tiin Gina-i pawh chu a mangang kher mai, "Damdawiinah kal pui vat angai a nih kha." tiin Mama chuan Pu Ringa chu pawm a han tum a. Mahse Gina-i chuan a lo dang a, "Lawk..ka ti dam thei." a ti ta mai a.

Mama chuan mak ti tak hian, "Enga? Engtin maw?" a lo ti hu mai. Chutiang bawkin Pi Marovi leh a fanu te zawk, Baby-i te pawh chuan Gina-i chu an en hu ringawt a. "Ka ti tak tak, ka ti dam thei alawm." tiin a pa chu muangchang chuan thutthlengah chuan a nam thlu riai riai a. "Gina, enge maw i tih le?" tiin Mama chuan a zawt a.

"Bawihi..enge i hriat a? I pa kha a thalo ania, damdawiin panpui vat zawk teh ang." anu chuan a lo ti ve bawk a. Mahse Gina-i chuan a chhang lo ve ve, a pa chu a en a. A awm zawnah chuan a kut nghatin, "Pa...min ring em?" a han ti te te a. Apa chuan thei leh theilo hian a lu a lo bu nghat a, tichuan Gina-i chu a maimitchhing leh ta.

A pa awm chu a han hup vang vang a, chutah Pu Ringa chu a rawn thaw hrawk mai. A rawn thu chhuak hlawl a, "Ehe..ka..ka dam vek." a ti ta mai a. Mama chuan Gina-i chu a en a, mak a ti kher mai. An vai mai chuan Gina-i chu an en thup mai a, "Bawihi..engtin nge i tih? Enge awmzia?" tiin apa chuan a zawt a.

"Gina...tunah khan, tunah khan i ti dam tak tak em ni?" tiin anu pawh chuan  alo zawt ve nghal a, mak an ti tlang a ni. Gina-i chu a nui a, "Ka thei..ka thei tak tak." tiin ama kut chu a en a, a lawm hmel kher mai. Pu Ringa chuan a fanu Gina-i kut chu a vuan a, "Bawihi, engtin nge i tih theih? Enge awmzia?" tiin a zawt leh a.

Tichuan Gina-i chuan a hmel hmuh theih sihloh, hmeichhe pakhatina a biak thin thute, driver a tihdam thute leh a room-a sava a tihdam thute chu a hrilh ta vek a. Mak an ti hlawm ngei mai, "Pathian hnathawh a ni, ka fanu. Pathianin hmanruaah a hmang che a ni, ka va han lawm tak em." tiin Pu Ringa chu a tap zawih zawih mai.

Gina-i tih loh hi chu a nu leh pa leh a nau, Baby te hi sakhaw mi tak an ni a. A nu leh pa te phei hi chu kohhran bel tak, inkhawm ngai pawimawh tak leh mi hlim diktak an ni bawk. Chutia an fanu in tihdam theihna a nei te chu Pathian hnathawh a nih ringin an lawm hle mai a, chumi zan la la chuan Pathian hnena lawmthu sawina tawngtai an nei nghal bawk.

Mahse la ring ve thei chiah lo chu Mama a ni, mak a la ti tawp thei lo. Pu Ringa te nupa erawh chuan Pathian pek angah ngaiin an lawm hle a, an hlim em em bawk. "Bawihi..anih chuan ka kawng na te pawh hi han hmet chhin teh, i tihdam theih ka beisei tlat a ni." a han ti ve leh a. Gina-i chuan a nu kawng chu a han zut kual leh a, a maimitchhing leh vang vang mai.

Tichuan a rawn meng leh a, "Nu...tikhan han ding chhin la, han zimar kual vel teh le." a han ti a. Anu chu a ding a, a kawng te chu a han ti sawi vel a. Mak tih hmel tak hian, "AWi...engmah ana tawh lo, a dam vek tawh." tiin a lawm kher mai. Pu Ringa chuan chunglam a hawi chho va, "Lalpa, kan lawm e...i chhiahhlawh te min hmang tangkai a, kan lawm e." tiin a maimitchhing vang vang mai.

Mama awm chu a nuam ta hauh lo, "KA haw tawh phawt ange.." a rawn ti chhuak hlawl mai. Pu Ringa chuan ava pan a, "Mama..i chhungte bulah te lo sawi ve rawh aw. Na nei te an awm anih chuan min rawn pan rawh se, zanin chu Lalpa malsawmna kan dawng tak meuh meuh a nih hi." a han ti a.

"Bawihi, va thlah rawh." Pi Marovi chuan a lo ti ve bawk a, Gina-i chuan Mama bike awmna thleng chu ava thlah a. Mama chuan a han en vang vang a, "Engtin nge i tih theih? Nimina min hrilh kha a tak tak tihna em ni?" tiin a zawt a. Gina-i chu a nui suk a, "Ka hre biklo..mahse zanin atang khan ka hre thiam tawh. Ni e, Pathian chuan min lo hmang tangkai ngei a nih hi." tiin a chhang a.

Mahse Mama chuan a awih thei ngang lo, "Gina, PAthian atanga chhuak a ni tih engtin nge i hriat theih? I nu leh pa sawi vang mai khan Pathian hnathawh a ni kherlo thei ania, Pathian atanga chhuak a ni tih fiahna engmah a awm lo." a han ti leh a. Mahse Gina-i chuan Mama hmui chu a hup a, "I Pathian fiah suh....Duat, PAthian pawi i sawi palh hlauh ange." tiin a lo chhang a.

Chuti fakau va Gina-i mizia a danglam ta mai chu mak a ti hle mai a, beer pawh in ve mai thei, mipat hmeichhiatna pawh a hman pui fo tawh, a bialnu Gina-i, chuti taka Pathian lam a hawi ta thut mai te chuan a ngaih a ti tha lo rum rum mai. Inah chuan a haw a, a chhungte pawh chu engmah a hrilh lem lo.

************************

A tukah chuan Gina-i chanchin chu veng pumah chuan a darh nghal a, abik takin mi hlim nu ho ah a thawk na nghal hle mai. Na nei ni a insawi te chuan an pan a, chutih lai karin tlangval thenkhat, an awihloh lutuk vanga na nei anga insawi a, Gina-i khawih nih chak ve hrim hrim te chu an tel ve bawk.

Mahse Gina-i chuan na engmah an neih veloh thute, an awih loh lutuk vanga fiah duh vanga rawn pan ve mai mai an nih thute chu a sawi ta hmiah hmiah mai. An mualpho phah hle bawk, dawt sawi nia puh han tum ngawt lah se puitling leh naupang tam tak, an natna dam phah an tam bawk si. Mama pawh chuan a bialnu Gina-i an pan sup sup tihte leh, damlo te an dam phah zel tihte chu a lo hre ve zel bawk.

Hun a liam zel a, Gina-i pawh a lar tulh tulh mai. Social media hrang hrangah chuan Gina-i thlalak chu a khat nuk mai a, Pathian atanga chhuak angah ngaiin Zoram pum ngaihven a ni ta der mai. Media ho beng pawh a thleng rang hle a, LIVE te hial a pe chhuakin Gina-i'n damlo a tihdam lai te chu video a viral ta sup sup mai.

Mahse a ni telin Gina-i chuan a thiante chu a hlat tulh tulh a, inkawm ho naah pawh a tel ve hman ta reng reng lo mai. Pu Ringa pawhin tihdam rawngbawlna inkhawm huai hawt te chu a rilruk ta hial mai a, a chhungte bulah pawh a sawi chhuak nghe nghe. Chumi buatsaih tur pawh chuan an Kohhran Pastor te pawh an be nghal bawk a, neih ngei tumin ruahmanna an siam nghal bawk.

Mahse Mama tan erawh lunglenna thlentu mai a ni si, Gina-i nen chuan an inbe khat ta hle a. Len pawh a leng tawh ngai lo, a chhan chu a len apiangin Gina-i chuan kiss takngial pawh a duh tawh ngai loh vang a ni. A sakhaw mi tawh em em mai a, a mizia chu a inthlak hlawk a ni ber mai. Chubakah Mama chuan biak pawh a be ve hman ngai lo, a len chang pawhin damlote'n an rawn pan sek zel bawk si.

************************

VAwikhat chu Mama, Te-i, Henry-a, Remkima leh Zuali te chu an thiannu, Gina-i tello chuan an inhmukhawm a, a chhan pawh Gina-i hman veloh vang a ni. Remkima te inah chuan an lengkhawm a, a room ah chuan awm hovin an titi a. An thiannu Gina-i chanchin chu an sawi a, lawmpui tho mahse an thian zingah a tel ve theih tak loh avang chuan an ngai hle bawk.

"A chhungten a thil tihtheihna an hriat chhuah zan khan, khami ni khan Gina-i hi a rawn leng a. A sawi ngei a, mahse ka lo awihsak duh lova. Mahse ka ke na kha a haw dawn khan a khawih a, a haw hnu lawk khan a dam hmak. Mahse a thil sawi vang a nih kha rin ngaihna pawh ka hre chuang lo, a dam ve satliah turah ka lo ngai mai a." tiin TE-i chuan Gina-i laka damna a chan ve tawh thute chu a han sawi a.

"A mak ka ti, ka tawng hi a malsawm lo anih chuan min lo ngaidam ula..Pathian pawh hian heti zozai mihring zingah tinge Gina-i ber kher hi a thlan le?" Henry-a chuan a han ti nuah nuah a. "Chu ai zawng chuan mak ka tih chu Gina-i mize inthlak lutuk hi a ni." Zuali chuan a lo ti ve bawk a.

"Nia..mahse a awm ve tho alawm. Pathian kohna te pawh a ni thei asin, a thil tih thinte a bansan a hun tawh tihna pawh a ni thei a." Remkima chuan a lo ti ve leh a. Chutah thinrim tak hian Mama chu a ding thut a, "Chupawh nise..eng vangin nge kan thian ho hi min kalsan kher a ngaih?" a ti vin hlur mai.

"Bro..insum rawh, nge ti vak vak nge?" tiin Henry-a chuan a lo khap vat a. Mahse Mama chu a thinrim laklawh tlat, "A awmzia ka hre lo a ni keichu, Pathianin hmangin tihdam theihna a lo pe pawh a ni mahna, mahse engvangin nge kei hian ka lo tuar bik kher angaihna? Min hmu duh tawh lova, an ina ka len chang pawhin Pathian thu hlir a  sawi a, kiss tak ngial pawh a duh tawh lo." tiin Remkima chu a en a.

"REmkim, eng maw i sawi kha? A thil tih thinte ban san a hun tawh i tia mi? Eng thil sual nge a tih vak a? Keini hi kawm tlak loh kan ni tihna em ni? Enge kan sual viau na? Keichu ka hrethiam velo....hetiang thil vel hi e, ka awih ve chuang lo." tiin room atang chuan a chhuak daih mai a. A bike lam panin a chuang a, a tlan haw ta daih mai.

*****************************

Tihdam Rawngbawlna inkhawm an neih hun tur chu a hnai zel a, Pu Ringa te nupa pawh an phur tawh khawp mai. An veng Presbyterian Biak Inah chuan nei turin an ruat fel vek tawh a, mahse a dawn tepah chuan Gina-i chuan ngaihdan dang a nei ta tlat mai. Amah be thintu aw chuan Farkhuh Tlangah chu inkhawm chu nei turin a ti ta tlat mai a, Gina-i pawh chuan a chhungte bulah chuan a sawi chhuak a.

A nu leh pate lah chuan Pathian hnen atanga a thu dawnah an lo ngai nghet nghal hmiah a, chawp chilh deuh chuan inkhawmna hmun tur chu an sawn leh ta a ni. Mama te thianho pawh inkhawm naa tel ve ngei chu an duh a, an misa em em vang ni hauh lovin, an thiannu Gina-i tawiawm tura kal an ni mah zawk.

Tichuan a hun a lo thleng ta, mahse Mama erawh a phur lo kher mai. Tichuan kum 138 liam ta a dawithiam pitar, Zachhingi an hal hlumna hmunah ngei mai chuan stage lian lem lo tak chu an siam a, mipui thutna tur an rem bawk a. Far thing in a hliah khup bawk nen, boruak chu a nuam angreng khawp mai.

Mipui pawh an tam hle a, thutna changlo chu a tam zawk an ni. Programe chu an tan ta, tantu chuan tawngtaina te a han hmang te te a. Tichuan Pu Ringa chuan a fanu Gina-i thil tihtheihna a neih tan dan te, an hriat tan dan te chu a han sawi a. Gina-i chu tlar hma berah a nu leh a nau te nen an thu a, Mama te erawh a sirah dingin thutna chang lo pawl an ni.

Apa thusawi lai chuan Gina-i chu a hawi kual a, nuam tilo tih hriat taka Mama lo ding tum bur mai chu ava hmu a. Anu chu hrilh ru zeuhvin, "Ka lo let leh vat ang.." tiin a thawh san a, Mama bulah chuan ava kal a. A thian dangte ho chuan tha takin an lo bia a, mahse Mama erawh chuan biak pawh a lo be ve duh lo.

Gina-i chuan inthlahrung tak hian, "Thiante u, khawngaihin Mama hi biak hran lawk ka duh a..pawi intih loh chuan.." a han ti zawi sap a. Chutia a han inthlahrung ta lutuk leh zaidam taka a han tawng vel te pawh chu a thiante chuan mak an ti kher mai, mahse engmah sawi lo chuan an kalsawn ve mai bawk a.

Gina-i chuan Mama chu ava pan a, "Ngati nge? I va hlim lo awm ve?" tiin a han zawt a. "Ka tha alawm." tiin a lo chhang hmuk mai. "Ka hria alawm, i lungawilo a ni tiraw?" tiin a han zawt leh a. Mama chu a thaw deuh hak a, "Gina, ka lawmpui lutuk che. Mahse tinge kei hi min hlat em em kher a? Tinge ka message te hi i seen ngai miah loh va?" tiin a ang nghal bawrh bawrh mai.

Zaidam tak hian Gina-i chuan, "Aww..message ka dawng hnem thei lutuk a. Ka buai em alawm, Lal Isua Krista chhandamna chang ve duh tamtak an awm a, tidamna beiseiin min rawn be ve thin hlawm a. Pianthar phah tam tak an awm hial asin, tinge i thinrim mai le?" tiin a lo zawt leh daih mai.

"Chupawh nise...tinge helai hmun kher hi i thlan a? Heite chu nangpawn i hriat kha, Pathian duhloh zawng kan tihna hmun a nih hi. Kan ruihna hmun a nih hi, tinge helai hi i thlan nachhan?" tiin Mama chuan a han zawt leh a. "Helai hmun hi ti thianghlim turin Pathianin min hrilh a ni, i hrethiam lo a ni, Mam." tiin a lo chhang leh a.

Mama chu a lungawi lo tulh tulh mai, "KA thei tawh lo, Gina...inthen i duh anih chuan inthen law law mai ang. He i thil tihtheihna avang hian ka thinrim a nilo, i mizia a danglam tawh lutuk. Min be ngai silova, kan inhmu khat si. I la hria em? Exam zawh ah chuan nitin kan inhmu dawnnia i tih kha..mahse tunah chuan ka bialnu ber pawh ka hmu ve thei mang tawh lo che chu a nih hi." a han ti leh pung pung a.

Gina-i chu a nui sak a, Mama kutah chuan ava vuan a. A mitah tak chuan enin, "Duat...ka hmangaih che alawm, keipawhin ka ngai thei lutuk che. Ka bialpa mai nilovin ka thianpa pawh i la ni tel reng, midangte pawh saw ka ngai thei lutuk. Mahse hrethiam ta che, PAthianin min hmang duh a nih hi. Ka vanneih zia te hi hre zawk ta che, heng zawng zawng hi kan pahnih tan vek a ni. Hun a lo liam zel anga, kan inneih thlengin Lalpan mal min sawm zel dawn alawm. Tihdam theihna ka neih te pawh hi ka tan chauh anilo, kan pahnih tan a ni. I nupui ka nih hunah chuan i hrehawm ngai lovang, eng na pawh nei la, ka tidam zel dawn che alawm." tiin a kutah chuan a fawh sak a.

Chutah zet zawng, Mama pawh a lungawi ve deuh ta. A nui sak a, "Min la hmangaih tak tak maw?" tiin a han zawt leh a. Gina-i chuan a lu lo bu nghat in, "Aw Mama, ka nunna tluk zetin ka hmangaih che." tiin a lo chhang let a. Tichuan a kalsan a, a thutna ngaiah chuan ava thu veleh ta a. Tichuan tihdam rawngbawlna chu Gina-i chuan a nei tan ta, thu te chu a han sawi leh te te phawt a.

Tichuan ahmasa ber atan naupang pakhat, tawngthei lo hi anu hian a rawn hruai a. Gina i hmaah tak chuan an ding dun a, "Enge in natna?" tiin Gina-i chuan a zawt a. Naupang nu chuan, "Ka fapa hi kum 6 a ni tawh a, mahse ala tawng thei lo a ni. Doctor te pawh kan pan pui tawh a, tihngaihna an hre bik lo." tiin a lo chhang a.

Gina-i chu a han thu hniam a, naupang chu a en a. A nuih sen sen a, "Pathian i ring em?" tiin a han zawt a. Naupang chuan a lu a lo bu nghat a, "Lal Isua hi kan sual te chhandamtu, kan ai awha a nunna hlantu a ni tih hi i pawm em?" tiin a zawt leh a, a lu a lo bu leh nghat mai. Tichuan Gina-i chuan a lu chungah chuan kut a nghat a, "Lalpa, tunah hian kan mamawh a che. He naupang, i fapa, i duat tak mai hian harsatna a tawk mek a, a tawng thei lo a ni. Mahse Lalpa, he naupang pawisawi lo hian nang hi a lal leh chhandamtu ah a pawm che a, i thu a ring a, i tanpuina a mamawh a ni." tiin a tawngtai a.

Mipui te chu an lo Hallelui nasa khawp mai, Mama pawh chuan a lo en ve reng a. Gina-i chu tawngtai chhunzawm zelin, "Lalpa, tunah hian he naupang hian a mamawh che a ni...kan ngen a che. Kei i chhiahhlawh hi min hmang tangkai leh ta che, he naupang hian a aw rawl tawpa nangmah a fak theih nan che tawng tir rawh..kan ngen ache." a han ti leh a, tichuan a meng ta a.

Naupang lu chu a thlah a, "Bawiha...han tawng teh le..." a ti a. Mahse naupang chu a la tawng mai ngam lo, tawng tum chuan  a han maimitchhing vang vang a. "Hlau suh...tawng rawh, AMEN han ti teh le.." Gina-i chuan a han ti leh a. Chutah chiang fek fawk hian chu naupang tawngthei lo chuan ring tak hian, "AMEN.." a rawn ti ta lauh lauh mai.

Mipuite chu lawmin an au va, "Halleluiah...Lalpa chu fakin awm rawh se.." tiin an au va, chu naupang nu pawh chu lawm avangin a tap zawih zawih mai. Mama pawh chuan Gina-i rawngbawlna chu enin a lo hlim khawp mai, midang natna nei ho pawh chuan Gina-i atang chuan damna chu an chang ta zel a.

**************************

Darkar 2 hnu ah chuan inkhawm chu an bang ta a, mipui pawh an hlim hle mai. Chu hmun atang chuan kawngpui lam panin inkhawm bang ho chu an chhuk sup sup hlawm mai, Mama te thian ho chuan kawngpui chu an thleng a. An thiannu Gina-i chu biak tumin an lo nghak a, Gina-i te pawh chu a nu leh pa te nen an rawn chhuk mek a.

"A hmuhnawm tawp vawiin inkhawm zet chu...Gina-i thian nih pawh a nuam e." tiin Zuali chu a nui sak a. "Nia tiraw? A ropui khawp mai, ka inhlan ve hman tep a ni." tiin Henry-a chu a khi suk a. Mahse Mama ber chuan, "Henry, tinge fiamthu nan i hman a? A malsawm lo emai, i thiannu anih saw..fiamthu nan hmang suh." tiin a lo khak hlak mai.

Chutia an dinkhawm lai chuan inkhawm zinga pa pakhat chuan Te-i chu a nek palh a, TE-i bag chu a tla palh hlauh mai. A bang chu a lo inhawng bawk si nen, a lipstick pakhat chu lamlianah chuan a lir phei ta daih mai. Te-i chuan chhar tumin lamlian chu ava pan a, mahse chak tak maiin kawng dinglam leh veilamah chuan car an rawn tlan ve ve tih a hre hauh lo.

Lipstick chhar tur chuan a kun hniam a, Mama chuan motor rawn tlan chu a lo hmu vat a. "Te-i..kha..motor." a ti hman tawk. Veilam atanga rawn tlan zawk chuan Te-i chu a su ta pawp mai a, a leng lawp mai. Chutah Te-i taksa chuan lei a thlen hma hma chuan dinglam atanga rawn tlan motor chuan a rawn su leh siah mai a.

Te-i chu a vir nawk a, lamlianah chuan a tla ri thlawp mai. Rang takin Mama chu ava tlan nghal a, "Nilo..nilo, TE-i..harh rawh, min chhang rawh..." tiin a sawi vak vak a, mahse Te-i chu a che eih tawh lo. A keruh te chu a tliak tih chiang tak hian a a thlep vek a, a ruh a rawn lawr hial bawk.

Te-i bialpa, Remkima chu che chang lo hian a ding reng ringawt a. Chet ngaihna pawh a hre lo, a mumang ni mai hian a hria. Zuali pawh chu a tap nghal pur mai, mipui ho chuan an bawr tuau tuau a. Gina-i pawh chuan chiang takin thil thleng chu a lo hmu ve vek a, rang takin lamlian lam chu a zuk pan ve nghal a.

Remkima chu tlan pheiin ava thingthi nghal a, "Nilo..Te-i...duat, harh rawh. Bawihte, khawngaihin min chhang teh." tiin a tap hawm hawm mai. "Damdawiinah kal pui ang u..hmanhmawh ru." tiin Zuali chu a au chel chul mai a. Mahse Mama chuan Te-i chu a thi tawh tih a hria, "Nilo..a thi tawh." a ti zawi sap a.

"Nilo..ka phal lo, harh rawh duat...ka phallo." tiin a bialnu ruang chu Remkima chuan a pawm vawng vawng mai. Gina-i chu a rawn thleng a, "Gina..khawngaihin tidam rawh...tidam leh rawh." tiin Zuali chuan a lo ngen lawm lawm a. Gina-i chuan Te-i awm chu khawihin, "Te-i...min kalsan suh." tiin a mittui a tla zawih zawih a.

Mahse TE-i chu a harh thei tlat lo, an veng Pastor chuan zawi sap hian, "Lal Isua lo chuan mitthi a kai tho thei lo, a thi tawh...a pawi khawp mai." a lo ti a, Gina-i te thian ho chu an tap nasa kher mai. Chutih lai chuan Henry-a chuan mipui kara pitar pakhat, vun chuar em em mai leh hmelchhe zet, sam thur bum mai, saruak veka lo ding ve reng chu a hmu thut mai.

Mak ti tak chuan a en reng a, mahse mipui ho vei nuai nuai karah chuan a bo leh daih mai. Mak a ti lutuk chu a mit a nuai a, "Ka mitvai em mawni le?" tiin a phun nuah nuah a. Mipui karah chuan chu pitar chu hmuh leh beiseiin a zawng kual leh a, mahse a hmu tawh hauh lo. Gina-i chu a va en leh a, mak a ti kher mai.

Gina-i taksa ah chuan engemaw ni dum vek, meikhu dum ang mai hi a lo leng chum chum mai a. MAhse midang chuan an hmu ve pawhin a lang lo, Henry-a chauh chuan a hmu a ni. Mahse reiloteah a reh leh mai a, a inhrethiam lo kher mai. Tichuan Te-i ruang chu motorah chuan an phur ta a, Te-i chu an mangtha a ngai ta.

*********************************

Te-i ruang chu tlaivar pui a ni a, mahse Gina-i ber erawh chhun lama an programe neih avang chuan a chau em em a, dar 10 vel thleng bak a awm ve thei lo. Tichuan a haw a, a mu nghal a. Te-i a boral ta mai chu hrehawm a ti em em a, a inhnit feih feih reng bawk. An inkawm ho lai te chu a mitthla a, reiloteah chuan a muhil ve ta mai a.

Mumang mak tak a nei leh ta tlat mai, hmanlai in, dap veka sak bulah hian a lo ding a. Inchhung atang chuan hmeichhe aw a hre bawk a, tawng mak tak hian engemawni hi a chham mual mual bawk. Chu hmeichhe aw chu a hriat hnu a ni tlat, a benga ri fo thin, tidamtu a ni tih hrilh thin tu aw ngei kha a ni.

Chu in lam chu  a pan hnai a, kawngka pawh chu thingfak hian a lo in do a. Thing fak chu a la sawn a, inchhungah chuan a lut ta. A thil hmuh chuan a barakhaih chiang ngei mai, naupang ruang hlir mai hi ding lam leh vei lamah chuan a lo inkhai fur hlawm mai a. A laiah tak chuan kha pitar, a mumanga a hmuh ngei mai kha a lo ding bawk.

A hmaah chuan dawkan niawm tak hi a awm bawk a, chutah chuan mihring ril leh kut bung te, ke bung te an lo in chhap darh nuai mai. Gina-i chuan ava pan phei zel a, chu pitar chuan van lam hawiin a kut a phar a, eng enge mawni chu a chham zuah zuah reng mai. Chutah pitar chuan a kuta a thil hum chu a han ti lang ta a, chu chu a th(r)i locket, Mama'n a birthday present-a  a pek ang chiah chiah kha a ni.

Chutah a mumang ram atang chuan Gina-i chu a harh chhuak zawk mai a, a au vak vak mai. Rang takin a nu leh pate chu an rawn lut a, light an on nghal bawk a. An fanu chu va thut chilhin an bawihsawm nghal a, "Bawihi...enge ni? Enge ni a?" tiin Pu Ringa chuan a zawt a. Mahse Gina-i chuan a chhang mai lo, a han hawi kual vak vak a.

A mumang mai mai a ni tih a hriat chuan a thaw huai mai, "Ihh...ka..ka mumang mawle, mangchhia ka nei a." a ti bah nuai mai. "Enge i hmuh a?" tiin apa chuan a zawt leh a. "Aa..ka hrelo, mangchhia mai mai a lawm." tiin a lo chhang leh mai a. Pi Marovi chuan a lu ah chuan a chul a, "Muhil leh tawh rawh....engkim a tha vek alawm." a lo ti a.

Tichuan an chhuahsan leh mai a, Gina-i chuan a mumang chu a hrethiam lo kher mai. "Tinge khatiang kha ka hmuh a? Chuan..tunge kha pitar kha? Ahma pawn ka hmu tawh...ka thi locket ang chiah chiah kha la nei zui, enge awmzia?" a ti nuah nuah mai. Sana chu a han en chuan zinglam dar 1 a lo ri tawh a, reiloteah chuan  a muhil ve leh mai bawk.

******************************

TO BE CONTINUE