GINA (MIZO FICTION RELIGIOUS HORROR STORY) WARNING - 18+ Written by : Aaron Malsawmdawngzuala CHAPTER - 1

 GINA

(MIZO  FICTION RELIGIOUS HORROR STORY)

WARNING - 18+

Written by : Aaron Malsawmdawngzuala

CHAPTER - 1

********************

(Fiction kan tih hian phuahchawp tihna a ni deuh ber a, thil awm tak tak nilo, thil thleng tak tak nilo, phuahchawp liau liau tihna a ni. Chuvang chuan ka story ah te pawh hian MIZO FICTION STORY ka ti deuh kher zel a, hei hi a chhan chu phuahchawp a nih vang leh thil thleng tak tak a nilo tih ka sawi chianna a ni. Fiction a nih tawh chuan engkim a leng a, thil awm theilo te, awm tura kan rin ngailoh leh thil awihawm loh lutuk te pawh Fiction story ah chuan a awm thei vek a, a huam vek a ni tih chhiar hma in min lo hriat sak dawn nia.)

*************************

(1880)

Mizote Kristian kan nih hma a ni a, milem leh ramhuai te hnena kan inthawi thin hunlai kha a ni. Farkhuh Tlang Khua hi khaw lian lem lo tak niin a mi cheng te pawh an tam lo hle a, mahse boruak a ralmuangin khaw mipuite pawh an in pawh tlang hle a ni. He khuaah hian damlote ti dam thei nia insawi, Pi ZAchhingi a awm a, khaw mipuite doctor ber a ni tihna a nih chu.

A bik takin naupang damlo te chu Pi Zachhingi hneah chuan nu leh paten an panpui nasa a, an dampui thin reng bawk. Mahse chung naupang te chu an dam hnu atanga reilo teah chin hriat lohvin an bo daih zel mai a, mahse a chhan erawh an hrechhuak thei lo. Tin, Pi ZAchhingi hian puitling damlo te erawh a ti dam ve thei hauh lo thung.

Pi Zachhingi chu an Pathian biak lo chauh zel a, an khaw tan chuan mi hlu tak, tidamtu a ni. Mahse chutia a naupang tihdam apiangte a hnu lawka chin hriat lohva an bo hmak thin mai te, an bo hma pawha an mize danglam ta em em thin maite chuan upa thenkhatte ngaih a ti tha ta tlat lo mai.

A tawpah chuan an khaw Lal hnenah upa te chuan an thlen a, tichuan Pi Zanchhingi chu enthlak ruk an tum ta a ni. ZAnkhat chu pasaltha thenkhatte chuan an enthla ta reng bawk a, an rinhlelh zualna chhan pawh Pi Zachhingi hian zanlai a pelh hnuah a in chu tlawh pawh a phal ngailoh vang a ni.

Chutah chuan Pi Zachhingi chuan naupang te chu thatin ramhuai hnena inthawi nan a lo hmang thin tih an hre chhuak a, pasalthate chuan luhchilhin an man ta a ni. Pi Zachhingi chu thi tura a chungthu rel a ni a, dawithiam pitar angah ngaiin khaw mipui zawng zawng hmuh ah hal hlum an tum ta a ni.

Tichuan a thih ni turah chuan khaw mipuite chu an pung khawm a, thingkung ah Pi ZAchhingi chu phuarbeh a ni a. Tichuan a nung chung chuan an hal ta a, mahse Pi Zachhingi chuan a thih hma chuan thusawi a nei tlat. "He khuaah hian ka lo let leh ang, engtik ni ah emaw chuan ka lo let leh khawp ang. He khua hi ralmuangin awm suh se, phuba la turin ka lo let leh ang." tiin khaw mipuite chu anchhia a lawh a ni.

Pi ZAchhingi a thih hnu chuan a vap zingah chuan engemaw thil mum, lunghlu ang maia tle vet vet mai hi naupang pakhat chuan a chhar a. Chu thil mum rawng chu a pawl(blue) a ni a, chu mipa naupang chuan ho a ti angreng kher mai. Thil hlu tak a ni em tih pawh a hrethiam velo, tichuan Pi Zachhingi an hal hlumna bulah chuan lei a hai vak a, chu thil chu a phum ta a ni.

**********************

(2018)

Exam zawh ni a ni bawk a, Mama te thianza ho pawh haw mai chu an tum hmel loh hle. An thianza ho hi 6 an ni a, amah Mama hi a upa ber bawk. Midang ho chu Remkima, Te-i, Zualbawihi, Regina Lalawmpuii leh Henry-a te an ni. An paruk hian inngaizawng vek an ni a, Mama leh Regina te hi an inngaizawng a, Henry-a leh Zualbawihi an inngaizawng bawk a, Remkima leh Te-i te hi an inngaizawng bawk.

Thian inkhawmngeih tak an ni a, an paruk chuan an chhuak ho fo thin. An vai hian college zirlai vek an ni a, kumtawp exam an zo chu an thaw a veng huai mai. Lenna tur sawiin an han titi khawm a, mahse khawi hmun berah nge an len dawn an hre thei mai lo. An titi khawm nak nak lai chuan Henry-a chuan, "Farkhuh Tlang ah khan han kal ang u, far hmun tawp ania, a nuam lutuk." a rawn tichhuak mauh mai.

"Khawiah nge a awm a, a hla em?" tiin Mama chuan a lo zawt vat a. "Hla em em love, mahse a kalkawng erawh a thui ve deuh." tiin Henry-a chuan a chhang a. "Ka la hre ngai lo reng reng, i kal tawh ami?" tiin Gina-i chuan a lo zawt ve bawk a, Gina-i tia kan sawi hi REgina-i kha a ni a, a hming lamtawiin a thiante hian Gina tiin an ko mai thin.

"Kei chu ka kal tawh, a nuam lutuk." Te-i chuan a han ti a. "Anih chuan han kal ila, a tlai hma hian." tiin Gina-i chu a phur kher mai. Tichuan an thian za ho chuan an lirthei ah theuh chuan an chuang a, mipa pathum te chuan an bike theuh ah chuan an bialnu te chu phurin Farkhuh Tlang lam pan chuan an kal ta a ni.

*************************

Reiloteah a hmun chu an thleng thuai a, "Heta tang hian ke-a chhoh angai, a la hla angreng." tiin Te-i chuan tlang lam chu a kawk chho va. Tichuan an lirthei te chu mipa ho chuan an han dah tha a, tichuan ke-in an chho ta ngat ngat a. Rei fe an chhoh hnu chuan far kung hi a lo awm chho tan a, an chho zel a, a tam tulh tulh mai.

"Farkhuh Tlang diktak chu a lo ni a nih dawn hi, far kung a tam emai." tiin Mama chu a khi suk a, an titi chho bawrh bawrh hlawm a. A tawpah chuan a zawl lai chu an thleng te, far kung sang tak tak te chu a ding thup mai. A hmun a dai nuamin a mawi phian lehnghal a, music video shoot nan pawh an hmang fo thin a ni awm e.

An thian za ho chuan an thu khawm a, beer in pahin an titi nak nak hlawm a. An titi fe hnuah chuan hmeichhe ho chuan, "Ka ru, thla la ang u." tiin an kal hrang a, a mipa pathum te chu an la thu reng thung a. Henry-a chuan Mama chu a han en a, "Naktuk lawk hi Gina-i birthday a ni tawh a, enge i pek dawn a?" tiin a han zawt a.

Mama chu a ner deuh sak a, "Pawisa neih loh lai hi a ni ziah mai, henu birthday hi chu." a han ti nuah nuah a, a thiante pahnih chu an lo nui nasa mai. "I thil pek te hi a mak thei si, nikumah lah Manchester United jersey i pe a. Mahni bialnu te jersey present ka vawikhat hriatna, engemaw a lawm zawng tur te pe ve ta che." Remkima chuan a lo ti ve bawk a.

"A ho emai, jersey ka pek pawh khan a lawm ve zia chu." tiin Mama chu a han nui leh huah huah a. "Thla lo la ve rawh u, beer in tur a awm tawh chuan loh kha." tiin Gina-i chuan mipa ho chu a rawn sawm a, tichuan thla chu an la ta a. Nuam an ti tlang khawp mai, darkar fe an awm hnuah chuan khua a thim dawn ta.

Haw mai an tum ta a, midang zawng chu an kal tawh a. Mama erawh an thil inna ruak leh an tih hnawk vel chu a han thiam fai a. Chutia a then fai lai chuan engemaw zung(root) niawm tak, leia lo lawr tet mai hi a hmu a. Engah vak chuan a ngai lem lo, kalsan mai a tum a. Mahse a thiante chuan thla an lo la la kawi vel mai mai tih a hmuh chuan a let leh a, chu thlai zung lo lawr tet mai chu a han pawt a.

Lei chu a nem tha bawk a, a pawn chhuak zel a. Chutah a pawt chhuak ta vek mai, mahse a rin aiin a ho kher mai. Thlai zung satliah mai mai hi  alo ni a, a khi suk ringawt. Mahse thawh mai a han tum chu lei khua laiah chuan engemaw pawl(blue) tle vet vet hi a hmu a, a mit a la leh ta tlat mai. Chulai hmun, Mama awmna lai tak chu kum 138 kal ta a, dawithiam Pi Zachhingi an hal hlumna hmun ngei kha a ni.

A bula hmawlh chu la in a han chhun khuar leh deuh va, chu thil pawl tle vet vet mai chu a la chhuak thei ta. Lunghlu ni awm a mawi a ni a, mahse lunghlu chu a ni si lo. A bial a ni a, marble ai chuan a lian deuh hret ang. A chhung te chu a tle ang sep sep a, mawi tak a ni. A bialnu Gina-i birthday present a tan tiin Mama chuan a ak nghal hmak a, tichuan a thiante nen chuan an haw ta a ni.

**************************

A tuk zanah chuan Mama te thian ho chu Gina-i birthday lawmin an chhuak ho leh a, an round leh chiam mai. Rei fe an len ho hnu chuan an haw darh leh ta a, Mama chuan a thilpek chu a la pe mai lo. Gina-i pawh a bialpa, a hmangaih em em Mama bula awm chu nuam ti viau mahse thilpek a la pe ve miah lo mai chu mak a ti ru hle.

A mood pawh a fuh lutuk lem lo, mahse a ti lang duh hauh lo thung. Tichuan Gina-i te inkawtah chuan an ding a, "Anih ka lut dawnnia, mangtha aw.." tiin Gina-i chu kal mai a han tum a. Mahse Mama chuan a banah chuan a lo vuan a, "Lawk aw Gina, thilpek ka la pe ve hleinem che." a han tih chuan Gina-i chu a lawm kher mai.

Mama chuan a ipte a han zen a, tichuan kha tlereuh pawl ngei mai kha a la chhuak a, thi(necklace)-ah a lo siam chu niin. Amah ngei chuan Gina-i chu a awrh tir bawk a, Gina-i lawm lutuk chu a hnuk a ulh hial mai. A thi chu a en a, "Awii..a mawi lutuk, a to awm sia, pawisa i seng hnem ngawt ang...tiang em em a ngai lo asin." tiin a inhnit feih feih a.

Intithei tak chuan Mama chu a han khi vel suk a, "Engmah a nih loh kha...Happy Birthday bawihte, ka hmangaih che." tiin Gina-i hmuiah chuan a han fawp vang vang a. "Keipawn ka hmangaih che, muttui le," tiin a lo chhang let a. Gina-i'n inchhung a luh thleng chuan a en zui a, tichuan a haw ve leh ta a ni.

**************************

Zanlai dar 12 a pelh chiah chuan Gina-i thi chu a rawn eng pawl vut mai a, mahse Gina-i erawh a mutthilh avang chuan engmah a hre lo. A khum bula dawhkanah chuan a dah a, a mutna ah chuan a awrh em bik lo. Tichuan a room kil thum atang chuan pitar pakhat, ruak veka awm hi a rawn phei thut mai.

Gina-i muhil lai chu a en vang vang a, a zu kun hniam a. Chu pitar chu a hmelchhe em em a, a vun te chu a chuar nuk bawk. Gina-i hmai zawnah tak chuan a zu kun hniam a, chiang em em mai hian a melh kur mai. A vun te chu a dang vek a, a bal em em bawk. A taksa thenkhat te chu a kang sawr vek bawk a, a zang a kul em em bawk.

Chutah Gina-i chu a rawn harh thut mai a, a hma zawna pitar hmelchhe zet mai, hmai kang sawr vek mai a hmu thut chu a phu nasa kher mai. Au a han tum a, mahse a au thei tlat lo. Gina-i chuan a ka a ang vak vaka , chu pitar pawh chuan a ka a ang ve bawk. Chutah le..pitar ka atang chuan tui hnang, dum nguk mai chu a rawn chhuak ta mai a.

Gina-i ka chhungah chuan a lut ve leh a, chutih lai chuan a th(r)i chu a eng nasa tulh tulh mai. Chutah chu pitar chuan a duhtawk mai lo, Gina-i hrawkah chuan a rek bawk a, a ka chhunga tui hnag dum nguk mai pawh chu Gina-i ka chhungah chuan a la lut char char bawk. Gina-i chuan chet ngaihna reng a hre lo, a khur chawr chawr ringawt mai a ni.

Chutah thil enge maw hi a ri bur mai a, motor horn a ri nghal chuah chuah bawk. Gina-i chu a harh kawk mai, a thu chhuak hlawl mai a. A han hawikual a, khua a lo var der tawh. A mumang a ni hlauh chu a thaw huai mai, mahse pawn lama thil ri bur chuan a ngaih a ti tha lo kher mai. Mihring phun ri nuai nuai a hre bawk a, rang takin a khum atang chuan a zuang tho nghal a.

Pawn ava chhuah chuan an in bul thingkung chu taxi pakhat hian a su hi a lo ni a, mipui pawh an lo pungkhawm chak hman khawp mai. TAxi driver chu thi hnuang hian a motor chhungah chuan nikhaw hrelovin a awm reng a, thenkhatin thla an lo la sup sup bawk. Gina-i chuan ava pan phei ve a, veng mite chu an mangang kher mai.

Thenkhatin, "Damdawiin ah kal pui vat angai a nih kha." an lo ti a. Thenkhat lahin, "Rui chungin a khalh a ni chiang mai." an lo ti bawk. Driver chu patling ho chuan lakchhuah an han tum a, mahse kawngka chu a hawn theih tlat loh mai. Chubakah a seat belt chu ala hreng reng mai bawk si a, ala tang tlat zui.

Gina-i'n chutia driver, thi hnuang maia a steering a lo bawh vung mai a hmuh chuan a rap kher mai. Lehlam a hawi nghal a, chutih lai chuan a nu leh pate pawh an rawn tlan chhuak ve bawk. Motor kawngkhar hawn tum chuan an han bei ngial a, mahse a tang tlat mai. Tukverh atangin la chhuak dawn mahse a leng der silo, a seat belt lah ala hreng bawk si.

Thenkhat chuan driver chu sawi vak vakin, "Tlangval..harh teh..harh teh." tiin an au va, mahse a harh thei der bawk silo. Gina-i rap lutuk chu in lamah let leh mai a tum ta a, mahse tu emawni, hmeichhe aw hian a bia angin a hre tlat mai. "Va khawih rawh...hliam tuar mek saw va khawih rawh." tiin tum emawni hian a hrilh angin a hre tlat a.

A han hawi kual a, tuman an be der mai silo. Driver chu ava en vang vang a, tichuan ava pan hnai ta a. Apa, Pu Ringa chuan lo hmu in, "Bawihi, inah lo va lut rawh." a lo ti vat a. Mahse Gina-i chu a kal phei lui zel a, "REgina, enge i tih dawn?" tiin anu, Pi Marovi pawh chuan a lo zawt ve bawk.

Chutah Gina-i chu pa ho karah chuan ava inrawlh a, driver hmaiah chuan ava khawih ta a. Pa pakhat chuan, "Mami, i hmelhriat em ni?" tiin a lo zawt a, mahse Gina-i chuan a chhang lo. Driver biang chu a chul a chul a, chutah a rawn harh kawk mai. Gina-i ber zawk pawh chu a phu zawk a, a tawlh hnung nghal.

"Khaw...khawnge ka awm? Enge thleng?" driver chuan a ti hu mai a, mipuiin an lo en thup a hmuh te chuan a hrilhhai hle mai. A motor hma lo khu vut vut chu a hmu leh a, "Ehe..ka accident a nimaw?" a ti hu mai. A hmai te chu a tuai a, "Ka va thi nasa ve.." a la ti nuah nuah zui. Awlsam tak hian a seat belt chu a phelh a, motor atang chuan a rawn chhuak a.

Khati khawpa lu thi nasa, hliam na tak tuar anga lang si, Gina-i'n a khawih veleh a na miah lo ang maia a awm lehnghal chu mipuite chuan mak an ti kher mai. Mahse Gina-i'n a khawih vang a nih erawh an ringhlel lem lo thung, driver chuan a motor chu a han en a. A ner nung a, "Ava chi loh e aw.." a ti vawng vawng mai.

Gina-i nu leh pa, Pu Ring aleh Pi Marovi te nupa erawh chuan mak ti ve tho mahse, an fanu Gina-i'n a khawih veleh a chu driver rawn harh kawk mai chu mak an ti zual bik kher mai. Patling pakhat chuan, "I tha maw, tlangval?" tiin a han zawt a. Driver chu a hawi hu a, "Keimah maw..aw, ka tha alawm, engtin nge ka awm a?" a la ti zui.

"Nikhawhrelovin i awm a, kha i thisen a chhuak nasa si..damdawiinah kal vat rawh." tiin patling chuan a chhang a. Driver chuan mak tih hmel zet hian, "Nikhawhrelovin ka awm maw? Engmah ka na bawk silova...ka tha alawm." a ti leh mai a. "I lu te kha a thi nasa si, i lu te kha ana lo ami?" tiin Pu Ringa chuan a rawn zawt ve a.

Driver chuan a rawmawl a phawrh a, a thi te chu a hru fai a. "Engmah pem ka neih pawh ka hrelo, ka tha alawm." tiin a chhang leh mai a. Gina-i chuan mak a ti kher mai, inchhung lamah a tlan lut nghal a. A nu leh pate chuan an rawn zui lut nghal a, "I hmelhriat em ni a?" tiin apa chuan a han zawt veleh a.

"Aih..ni chuang lo." tiin Gina-i chuan a lo chhang a. "Mahse a biangah te khan i va khawih vel sia, enge awmzia?" tiin anu chuan a lo zawt ve leh bawk a. Gina-i chu a ngawi vang vang a, "Nia, ihh..ka hmelhriat, kan class ami nen an in ang lutuk a. Chuvang mai mai chu mawle, ka hmelhriat a nilo." tiin dawt a sawi ta ringawt a.

Zawhna an zawh belh leh hlau niawm tak chuan a room ah chuan a lut tlang nghal daih a, dawhkana a th(r)i chu a han en vang vang a, "Avan mawi tak." tiin a nui sak a. Th(r)i chu la in a awrh leh a, a message tone a rawn ri ral ral mai. A phone chu la in message chu a han en a, a bialpa Mama a lo ni.

"Duat, vawiin chu lunch ei chhuak dun ila, kan pahnih chauhvin, i hman angem?" tih hi a lo ni a, Gina-i chu a nui var var mai. "Tehreng mai, ka hman chiang." tiin a reply a. A thawh hlim atangin ahmai pawh ala phih lo tih chua hrechhuak zawk a, bathroom lam pan chuan a kal nghal a. A hmai a phih lai chuan hmeichhe aw a hre leh ta tlat mai, "Tidamtu i ni...tihdamna i nei." tih ri a ni.

A phu zuk a, a hawi kual nghal. Mahse bathroom ah chuan amah chauhvin a awm bawk si a, mak a ti kher mai. A bengchhe ri a nih ringin, "Nizan ka mumang vang vek, tukinah accident a awm lehnghal bawk a, huiham..." tiin a hmai chu a phih zawm leh mawlh mawlh a. Tichuan tukthuan te chu eiin engmah a tawng zui lo, a nu leh pa te pawh chuan engmah ngaihthat lohna an nei zui lem lo aniang chu.

*************************

Chhunah chuan Gina-i chu a bialpa Mama nen chuan restaurant ah an chawl dun a, Mama chu a titi tui ngei mai. Mahse Gina-i erawh chuan a ngaithla hauh lo, zan hmasa lama a mumang chu a ngaihtuah let a, a thil ei lai pawh chu a ei tui lo kher mai. Mama chuan a en vang vanga , "Duat, tinge a? I damlo em ni?" tiin a zawt a.

"Dam e, ngati nge?"

"Aaa..i nawmloh hmel lutuk a."

"Engmah a nilo, ka tha alawm."

"Kan haw tawh mai dawn em ni?"

"Aih ala nuam alawm, i bulah ka la awm chak."

"Ti daih ila, tukina in inbula accident kha..driver kha engtin mah a awm ta lo em ni?"

Gina-i chuan tui a han in khawlh khawlh a, "Umm..amak lutuk, a thi hnuang bawk sia. Mahse engmah nalo ang maiin a rawn harh leh a, a vei vut vut lenghal." tiin a chhang a. "A mak hleinem, a lu a sawh anga, nikhawhrelvin a awm zuai a nih dawn chu." Mama chuan a lo ti mai a. "Mahse, a thi hnuang bawk sia." a lo ti leh a.

"Aww...a thi ve nimai lawm, na vak lo pawhin vun a pawp tawh hi chuan thisen hi a chhuak hnem duh ve hrim hrim a, a vannei hle a nih chu." a lo ti sam leh et mai. Gina-i chuan a th(r)i chu a han en leh vang vang a, "Hei hi khawia i lei nge a? A nalh e, lunghlu a ang si.." tiin a nui var var mai.

"Sawi chi nang...tak tak a, ka pawisa khawl a ka lei ve anih kha, i tan liau liau ka inkhawl char char alawm." tiin Mama chuan dawt a han phuah kual vel a, Gina-i chu a hlim ngei mai. "Ka lawm lutuk, i thil min pek tawh ah chuan ka la lawm ber ang." tiin a nuih sak a. "A hrim hrimin, tinge engmah i ei that peih loh va? I nuamsam vak lo em ni? Sawi hreh suh.." tiin Mama chuan a han zawt leh a.

Gina-i chu a ngawi vang vang a, "Ihmaw Mam....nizanah mumang mak deuh mai ka nei a, ui ka hlauh zia chu." a han ti nuah nuah a. "Engthil nge i hmuh a?" tiin a lo zawt vat a. "Ihmaw..pitar hmelchhe deuh, mit dum run mai hian ka mulai hi min lo melh run a. Chuan a ka atangin tuihnang dum vek hi a rawn chhuak a, ka ka chhungah a rawn chhak lut a. Ka au thei silova, ka t(r)e thei bawk silova, a hrehawm rap." a han ti a.

Mama chu a lo nui huk a, "I maimizial a nih chu...keipawh ka nei thin alawm." tiin a lo chhang leh mai a. "Nia, a ni maithei. Mahse maw..tukin khan hmeichhe aw hian min be tlatin ka hria a, ka bengah hian a rawn ri leh thin a...amak lutuk." a han ti chuan Mama thil ei lai pawh a tawp chat mai.

"Enge awmzia?"

"Ihh..i awih lo maithei amaw, keipawhin ka ngaihbel pawh a ni maithei. Tukin khan driver kha motorr chhungah khan a tang a, patling ho pawh khan motor kha hawn an tum a, mahse an thei miah lo. Chuan ka rap lutuk kha ka en ve thei tawh thlawt lova, in lamah phei leh ka tum a.." a tih lai chuan a han chawl deuh dat a.

"Chuan enge thleng zel?"

"Chuan..hmeichhe aw chu ka hria a, ka bengah hian a rawn ri chiang alawm. Driver chu va khawih turin min ti a, vawikhat mai pawh min hrilh lo. Chuan ka va kal phei a, a biangah khan ka va khawih chiah a...tichuan a rawn harh a. Engmah kha na a nei leh bawk silo nen, a mak tawpa nimai."

"Thildang ala awm em?"

"Aw...tukin hmai ka phih lai khan maw, chu hmeichhenu aw bawk chu ka hre leh a."

"Anih enge a sawi leh?"

"Tidamtu i ni...a ti in ka hria, ka bengchhe ri pawh a ni maithei..aaa..ka hrethiam biklo, aw(voice) kha chu ka hre chiang alawm.

Mama chu a nui huah huah a, "I mumang a rapthlak em a nih kha, kha vang vek kha a nih kha. Hlauthawng suh, i bengchhe ri a nih chu." a lo ti daih mai. Gina-i pawh chu za lo tak chuan a khi suk a, "Nia, a ni mahna." a ti zawi sap a. Chumi ni pawh chuan Gina-i chu a rilru a nuam thei der lo mai a, a mumang leh a aw hriat thinte chu a rilru ah a awm reng mai.

*****************************

ZAn a ni a, Gina-i te nu leh pa chuan TV an en a. Gina-i erawh chu a roomah awmin a phone a khawih mial mial a, chutih lai chuan a room tukverh ah chuan chawngzawng hi a rawn fu a. Gina-i chuan a en reng a, engah vak a ngai lo. Thla te a lak sak a, an thian ho whatsapp group ah te chuan a post a.

Chutih lai chuan thil a rawn tleh deuh thut a, tukverh kawngka chu na em em mai hian a pahnihin a rawn invaw chawrh mai. Tukverh chuan chawngzawng chu a vuak chilh a, Gina-i room chhungah chuan a let thla tawp mai. Gina-i chuan ava pan nghal a, "AWiii...ka khawngaih lutuk." tiin a la kang a.

Mahse a lo la thi lo, a lo la thaw tek tek a. Chutah Gina-i chuan zing lama kha hmeichhe aw a hriat thin ina tidamtu a nih thu a hrilh te chu a hrechhuak a, tichuan chawngzawng thi lek lek, hliam tuar mek chu a han en leh a. Tukverh bulah chuan ava kal hnai a, "Tidamtu ka nih tak tak chuan he sava hi ka tidam thei ngei tur a ni." tiin ama hriat tham leh chuan a phun sap a.

Tichuan a maimitchhing a, sava chu a han chul hliau hliau va. Chutah sava chu a rawn hram leh ta, a che deuh hrut hrut a. Gina-i chu a meng vat a, chu chawnzawng chu a kutah chuan a lo ding kang reng tawh mai. A thla a zap a, tukverh atang chuan a thlawk chhuak ta daih mai. Gina-i pawh chuan mak a inti takzet, mahse a lawm rilru bawk si.

A kutte chu a en a, "Thiltih theihna ka nei em ni? Enge awmzia hi?" tiin a inbe mawlh mawlh mai a, "Engemaw ka chungah hian thleng ta le?" a han ti a, mahse a han inngaihtuah chiang leh a. "Nilo, thil thleng palh ve mai mai a ni." a han ti hnuhnawh leh a. A khumah chuan a thu a, phone chu a khawih chhunzawm leh mawlh mawlh a.

**************************

Gina-i chu a lo muhil sek hman a, a phone chu a rawn ri ral ral mai. A harh kawk a, a room banga sana chu a han melh zeuh va, dar 10 a lo ri tawh. Tichuan phone chu a han en leh a, a thiannu Te-i a lo ni. "Hello, enge ni ta Te-i?" tiin a han zawt a. "Group ah kan mention vak vak che kha, tinge engmah i seen theih loh va?" a rawn ti hlur mai.

"Awiii..ka lo muhil daih a, enge ni ta a?"

"Group kha en rawh, news group ah pawh an post nasa."

"Eng chu maw?"

"Ruang an chhar kha, a thlalak nen an rawn post a. Khapa kha tukina in inbula accident, driver kha a ni an tia."

Gina-i chu a thu chhuak hlawl mai, "Enga? Driver kha maw? A thi amaw?" a ti hu mai a. "Aw..han enchiang ve teh, ka dah ania." tiin Te-i chuan phone chu a dah a. Rang takin Gina-i chuan a whatsapp a lut nghal a, news group ah te chuan a han lut kual a. Tichuan ruang chhar thu chu a hmu fuh ta, thlalak pawh a lo awm ngei e.

Thlalak chu a han enchiang a, zinga rawn accident, taxi driver ngei kha a ni. An thian ho group ah te chuan a han lut kual leh a, an lo mention nasa mai. "Avan mak em em...tukin kha chuan a that hmel hle sia." tiin a phun nuah nuah a. A hlauh deuh vang chuan a ngaihtuah chhunzawm ngam ta lo, a th(r)i chu a phelhin dawhkanah a dah a, tichuan a muhil zui veleh mai bawk.

*************************

Mama chu zanlaiah chuan a harh zawk mai a, mahse a room ah reng reng a lo awm lo. Kha far hmun, an exam zawh nia an kalnaah khan a lo awm reng mai. ZAn a ni a, a thim angreng hle bawk. Mahse thing kung sang tak tak kara thla eng tak chuan a awmna hmun chu a rawn chhun eng pha a, a han hawi kual vak vak a.

Amah chauh chuan a lo awm a, tichuan kha thil mum, Gina-i a pek ngei mai a chharna, thlai zung niawm tak rawn lawr a hmuna atang ngei chuan rannung an rawn vak chhuak sup sup mai. Mama chuan a hlau kher mai, "Tinge hetah hian ka awm a? Enge awmzia?" tiin a au vak vak a, mahse boruak chu a reh hian a reh diak mai.

Chutah lei khar tereuhte, kha thilmum a hai chhuahna atang ngei mai chuan mihring kut hi a rawn lang thut mai. Mama chu a phu zawk a, "Nilo..ka duh lo." tiin a tawlh hnung nghal. Chu kut chuan lei chu a hai buan buan a, chutah mihring lu hi a rawn lawr leh a. A rawn bawk vak chhuak a, a taksa pum chu a rawn chhuak ta mai a.

Pitar zang kul em em mai hi a ni a, saruak vekin ala awm zui bawk. A lian em em mai lehnghal a, a la khur bauh bauh zui. Mama hlau lutuk chu tlanchhiat a tum a, lehlam a hawi a. Mahse a hnungah chuan chu pitar chu a lo awm leh daih tawh, "Tunge i nih? Kal bo rawh." tiin a han hau ve ngawt a.

Tlanchhiat a tumna lam apiangah chuan chu pitar chu a lo awm zel mai a, a mangang kher mai. A tawpah chuan a thingthi hnawk a, a maimitchhing tawp a. "Kal bo rawh..min tibuai suh..ka bo rawh." tiin a phun mawlh mawlh a. Chutah a han meng leh a, a room ah a lo awm leh daih tawh. Khum ah pawh a lo mu tawh lo, khum bulah chuan a lo thu tawm reng mai.

"Ehe..ka mumang vek em ni?" tiin a inzawt a, light erawh dim light chiah a eng thung. Chutah a tukverh rawn in kik ri karh karh chuan a ti phu leh zawk mai, "Tunge? Tunge ni?" a han ti vak vak a. Mahse chhanna a dawng lo, hlau rilru deuh tak chuan ava pan a. Tukverh parda zar chu a han hlip kiang a, mak a ti kher mai.

A tukverh zawnah chuan a bialnu, Gina-i a lo ding reng mai. "Ehe..Gina, enge i rawn tih a?" tiin a zawt a. Mahse Gina-i chuan a chhang lo, huat hmel em em hian a lo melh run mai. Tukverh chu Mama chuan a han hawng a, "Enge i lo tih dawn ka tih chu?" tiin a han zawt leh a. Gina-i chuan khur dar dar hian, "Engvangin nge dawt min hrilh?" a ti khur khur mai.

"Eng dawt maw?" tiin a lo zawt vat a. Gina-i chuan a th(r)i chu a pawt thla a, "He thil hi min leisak a nilo, i chhar mai mai a nih hi. Engvangin nge dawt min hrilh kher?" tih pah chuan th(r) chuan a vawm a, mahse a vawm fuh lo. Mama khum hnuaiah chuan a vawm lut daih mai, "Hey..bengchheng suh, ka sawi fiah dawn lawm." tiin Mama chuan khap daih a han tum a.

Mahse Gina-i erawh chu a thinrim zual sauh amaw tih mai tur a ni, "I insawifiahna ka ngaithla peih lo, dawt hlir ani min hrilh thin ni..ka hua che." a ti hrep hrep mai. Mama chu a han thaw hak a, "Amak e aw..ka sawifiah dawn alawm." tih pah chuan khum hnuaia th(r)i chu a chhar leh a. "Kan lenna ah khan ka chhar a, chuan ka silfai a.." tih paha tukverh lam ava melh leh chu a ding chat mai.

Gina-i reng reng a ni tawh lo, kha pitar, a hma lawka a hmuh kha a lo ding run mai a nih chu. A ka chu zau takin a ang vak a, rannung tamtak hi a room chhungah chuan an rawn thlawk nuai nuai mai. Mama hlau lutuk chu a au vak vak a, "Ka duhlo..nilo, Paa..Pa..min chhan ru, nu..ka hlau ania." tiin a mangang kher mai.

********************

Mama chu a harh kawk mai a, a thlanin a bual huk vek mai. A thu chhuak a, a han hawi kual chu khua a lo var der tawh mai. A mumang vek a ni tih a hriat meuh chuan a thaw huai mai, "Khai...eng ang mumang nge ni ngai?" tiin a khi suk a. "Min leisak a nilo, i chhar mai mai a nih hi." tia Gina-i'n a mumanga a sawi chu a hrechhuak zawk mai.

"Ehe..henu hian thudik a hre tak tak reuh amawnile?" tih pah chuan a phone chu a en nghal a. Vanneihthlak takin, "Good Morning, duat..ka hmangaih che.” tih message zawk a dawng hlauh mai. A thaw leh huai mai, “Khai khai khai...khatiang mumang kha chu ka mang duh tawh miah lo ania.” tiin amah chuan a nui khi vur vur a.

************************

TO BE CONTINUE