BEAUTIFUL NIGHTMARE (MIZO FICTION FANTASY STORY) [Inspired by SuperMe] Written by : Aaron Malsawmdawngzuala CHAPTER - 3

 BEAUTIFUL NIGHTMARE

(MIZO FICTION FANTASY STORY)

[Inspired by SuperMe]

Written by : Aaron Malsawmdawngzuala

CHAPTER - 3

********************

Chumi zan chuan Rsa rilru chu a hlim veng veng mai, a pian tirh ata vawikhatna atan sum tam tham takin mi a tanpui ve ta mai chu mak a inti zawk hial. Chu hotel nuam tak, khum zau tak mai leh room chhung changkang leh nuam em em maiah chuan amah chauh chuan a mu a, a zai ri ret ret bawk.

Reilo teah chuan a muhil ta mai a, mahse thawm a hre leh ta tlat mai. A hma ang bawkin pen thawm a hre leh ta a, rang takin a thu chhuak vat a. A mumang a ni nge nilo tiin a han insik vel a, mahse a harh thei si lo. Staff thenkhat emaw, mikhual dang thleng ve an nih mai ringin a mu han mu leh a.

Mahse kawngka chu a rawn inkik ta karh karh mai, a phu nasa lutuk chu a meng kawk a. A sana, rangkachak atanga siam, man to em em mai chu a han en a. Zinglam dar 2 a lo pel duai tawh a, "Tun ang hunah tunge maw ni dawn le?" tih nuah nuah pah chuan a tho va. KAwngka lam chu va panin, "Tunge aw?" a han ti a.

Mahse chhanna a dawng lo, "Tunge ni?" a han ti leh a. Mahse chhanna ala dawng chuang lo, fimkhur tak chuan kawngka chu a hawng a. Mahse tumah a hmu lo, room atang chuan a chhuak a. A han hawi kual a, a reh hian a reh diak mai. Chutah a room opposite chiah a room atang chuan thawm a hre leh ta tlat mai, a ding chat a.

A han ngaithla chiang deuh va, patling nui ri ni tlat hian a hria a. Nui thawm chu a ring telh telh a, chutah a hriat hnu a ni tih a chiang ta. Tudang nilovin, zandanga a lo hriat fo thin, apa boral tawh, Pu Rova nui ri ngei a ni. Rang takin a room ah chuan luh leh a tum a, mahse a hawng thei ta hauh lo mai.

Kawngkhar chu a pawt vak vak a, mahse a inhawng thei der mai silo. Tichuan thawm a hriatna room kawngka chu a bang chawpin a rawn chim rup mai. Chutah apa, Pu Rova chu a hmu ta. "ZAnin chu i thi tawh dawn chiang alawm, thatchhepa." tiin a rawn vin leh ta chhur chhur mai. Rsa chu a tlanchhe nghal a, a ngaite ang bawkin apa chuan a um leh ta.

Mahse tun tum chu apa chuan eng hmanrua mah a keng tawh lo, Rsa pawh chuan mak a ti angreng kher mai. Mahse a tlanchhe zel a, inhnuai lam panna step-a chhuk a tum chu step reng reng a lo awm lo. Tlanchhiatna tur a nei tawh bawk silo, apa lah chu chak em em hian a rawn tlan phei tawh bawk si.

Chutah Pu Rova chuan a rawn bawh thut a, tukverh keh chhuai khawp chuan a rawn su ta mai. Chhawng 7 na a awm a nih avang chuan an tlak dunna chu a sang hle a, Rsa mangang leh hlau lutuk chu a au thla ruai ruai mai. Mahse mak tak maiin engemawni dup deuh ah hian a tla a, a mit a han meng chu khumah a lo awm reng mai.

A awmna hmun chu a han enchiang a, room zim te ah hian a lo mu reng mai a. Khum atang chuan a tho vat a, a awmna hmun chu vawikhat mah ala hmu ngai bik lo. Tichuan pawn lamah chuan tawng ri a hre ta tlat mai, tukverh ah chuan a dak a. Vai pahnih, dulkiar zet mai, coat suit ha ve ve te chu an lo ti ti mek a.

Sap tawnga an tawng avang chuan an thil sawi pawh a hrethiam a, "Hei hi cheng nuai 100 a ni a, nuai 50 ve ve in ka sem hrang a ni. I duh chuan i check thei ang, a kim vek ang." vai pakhat zawk chuan a ti a. Pakhat zawk chuan suitcase var lian tak mai pek pah chuan, "Ka ring che alawm, kha le i thil chu.." tiin a chhang a.

Vaipa pakhat zawk chuan, "Min man chhuak a ni emaw, nangmah zawk an manchhuak che a nih pawhin...i intiam tawh angin ka hming hi i sawi tur a nilo ania, Ajay." a han ti leh a. Vai pakaht zawk, Ajay-a chu a nui suk a, "Ka hria alawm, Rohit...ka phatsan ngai lo che tih i hriat kha." tiin a lo chhang a, Rohit-a zawk chu a kal ta a.

Tichuan Ajay-a chu inah chuan a rawn lut leh a, Rsa chuan a hrethiam lo kher mai. Ajay-a chuan a awmna room lam a rawn pan mek tih a hria a, rang takin khum hnuaiah chuan a biru a. Ajay-a chu room ah chuan a rawn lut a, Rsa chuan a ke chauh chu a hmu thei. Khumah chuan suitcase pahnih chu a dah a, a chhung chu hawngin pawisa te chu a han check vel a.

Tichuan a chhuak leh ta daih mai, chuveleh rang zet chuan Rsa pawh khum hnuai atang chuan a chhuak a. Khumah chuan suitcase pahnih chu a lo la awm a, Rsa chuan a hawng ve chhin ta a. Sum tam tham zet lo khat hnur mai a hmuh chuan rang takin a khar leh vat a, suitcase pahnih chu a keng kang a.

Chutah kawngka a rawn ri leh thut mai, bihrukna hman a awm tawh lo. Ajay-a leh midang 5 vel chu an rawn lut a, Rsa chu an hmu ta. Silai in an tin nghal thap a, "Tunge i nih?" tiin kah an tum ta mai. Rsa tihngaihna hrelo chu a maimitchhing a, "Ka mumang mai mai a ni." tiin a au leh vak a. Chutah engemawni hian Rsa chu a pawt thut a, tukverh atang chuan a leng chhuak lawp mai.

******************************

A han harh leh meuh chuan a hotel thlenna, a khumah ngei chuan a lo awm leh daih tawh a, khua pawh a lo var leh daih tawh. A ke bulah chuan suitcase pahnih, a mumangah a hmuh ngei mai chu a lo awm a. Phur tak chuan a la vat a, a pahnih chuan a han hawng chhin a. Pawisa tam zet mai hi a lo khat nuk mai, a hlim lutuk chu a au lo chauh.

Chenna tur in pawh nei lo, mi rethei, thiam thil neilo leh kutdawh mai hmabak tawh Rsa chu a ni tel chuan a hausa ta telh telh mai chu ania, a incheina ringawt pawh nuai fe fe man a ni ta. A phone te chu a cover atan rangkachak atanga siam phone cover ngat a hmang a, a nun chu nuam tak hi a ni ringawt.

Guwahati ah chuan sumdawnna tan law law mai chu a duh rum rum hman hial a, mahse a taimakna in a tlin dawn lo tih a hriat avang chuan a theih anga rei chu a pawisa chen leh phawt a duh a, Mizoram lama haw erawh chu a tum tho a ni. Chu a pawisa dawn thar te pawh chu bank ah chuan a dah leh vek a, lungawi tak chuan chumi ni chu hun a hmang leh ta.

Zan khat leka nuai chuang fe hlawh chhuak thei ta na na na chu Uber hmanga vah kual mai chu a duhtawk ta lo, tin hotel-a awm reng pawh chu a duh tawk tawh bik lo. Chumi ni chuan flat thar lei tur a dap nghal a, a thian hmehriat thenkhatte chu a inpuih tir a. Mahse sum tam tak a nei tih erawh a sawi duh hauh lo, a thiltihtheihna chu a zep ve tlat a.

A tawpah chuan flat nuam em em mai, Airport Road ami, fal angreng tak mai leh changkang zet mai chu a pumin a lei ta rup mai. A leina te bulah chuan a neih zawng zawnga lei angte chuan a han insawi vel a, tichuan inchhung bungrua te chu a lei lehnghal vek bawk a. Nikhat thil thu lekin cheng nuai 40 man vel flat ropui leh lian lutuk, swimming pool leh park pawh awm tel thlap chu a nei leh ta der mai.

Chumai ala ni lo, hnathawktu tur te, awmpui turte chu a la tel nghal thlap bawk a. Company lian tak nei angin a insawi a, RS Industry tiin a company phuahchawp chu a hming a vuah nge nge a ni. Mahse vai nula ringawt nawmchen pui chu a ning ta deuh va, chumi zan chuan a inngaihtuah ve nasa hle mai.

Sum tam tak neiin a nun nuam hle mahse, a rilru ah chuan hmeichhe pakhat chiah a awm thung. Chu chu tudang nilovin kha dawrnghaktu, Khasi nula Lydia-i kha a ni. Sum a neih tan tirh vel kha chuan a theihnghilh nghal hmak a, hmeichhia pawh a hrang hrang a tawmpui a. Mahse tumah chu a inngaihzawn pui duh biklo, a rilru ah chuan Lydia-i chu rawn thar leh ta tlat mai.

*******************

A sum tamtak te chu hmang tangkai lehin driving license te a nei thar a, car thar a lei bawk. A flat awmna te chu a chei tha a, zantin mai chuan a mumang vang chuan rangkachak, silver leh lunghlu man to tak tak te chu a nei chhunzawm zel bawk. Sum nei tam na na na chu amah pawh a fing ve zel a, tlereuh hlutna te pawh a hre chho tial tial bawk.

A vanneihna chu a kal tluang kher mai, chung a thil hlu neih te pawh chu a man zat ang dik tak chuan a hralh ta zel a. Tlak hniam chu sawi loh, a hausa tulh tulh zawk a ni ber mai. Tlai khat a private car nalh tak maia a haw pah chuan Lydia-i chu a hmu ta thut mai, rang takin kawngsirah motor chu a tiding vat a.

Lydia-i lungngaih hmel taka lo kal hnak hnak chu ava umzui a, "Lydia, lo ding teh." tiin a au va. Lydia-i chu a ding a, a rawn hawi let a. Chutia Rsa, ahma a cher chhe em em leh mitkhur pawh thuk vek thin, hun reilote chhunga chuti taka a lo changkang ta mai a hmuh chuan mak a ti em em a.

"Rs...nangmah maw?" a ti hu mai. Rsa chu a nui a, "Aw keimah ni e...kan va inhmu khat ve a.." a lo ti a. "I danglam hle mai, ka hai mai dawn che alawm le." tiin Lydia-i chu a nui sen sen a. "Lydia, hun i neih chuan coffee kan indun lawk dawn em ni?" tiin a sawm a, Lydia-i chuan a lo remti ve mai bawk.

Coffe shop ah chuan an chawl dun a, "I sumdawnna enge a an? I tluang zel amaw?" tiin Rsa chuan a han zawt a. "Tluang chiah lo...ka boss hian min vau reng a, min ban vat a tum thu a sawi reng bawk sia." a ti zawi sap a. Rsa chuan a khawngaih hle mai, "Engati nge? Chubakah khapa khan tinge a vin vak vak zel che a?" tiin a zawt leh a.

"Englo..ka pa hi a thi tawh a, ka pa thawhna thin ania. Ka pa ai ka nghak thin ta a, college pawh ka kal tawh loh phah a ni. Ka nu lah a damlo nasa si a, ka chawm a ngai si. Sum thawkchhuak tu ber ka pa lahin min boral san tawh bawk si a, chuvang chuan sum thawhchhuah a ngai si a, dawr kha ka nghak thin ta a ni." tiin Lydia-i chuan a chhang a.

"Lydia..chutianga thawh reng te chu a hrehawm dawn emai. Hna dang zawng daih la, hna te chu a tam alawm."

"Hna zawn chhungin ka nu hi a thi mai ang, tihtheih dang ka nei silo a ni."

"Anih leh kha dawr neitupa khan tinge khati fakauva a hauh thin che a?"

"Zep lo chuan....min beisei a, min sual a tum a. Mahse ka duh lova, ka hnial ziah a. A tir chuan min duhsakin min duat lutuk, mahse khatia ami sawmna ka hnial ziah tak avang khan a thinrim a, banah min vau ta reng thin a ni."

A thu hriat chuan Rsa thin a khei ta zak mai, "Bang rawh...bang nghal rawh. Chutiang bula thawh reng te chu, a him pawh a him lo emai." a ti nghal khur khur mai. "Mahse...eng hna nge ka thawh chuan anga? Sum kan nei bawk silo, engtin nge ka nu ka chawm ang?" tiin a lo zawt let a. "I nu nen chauh chuan em ni in awm?" tiin Rsa chuan a han zawt leh a.

"Ka nau in a awmpui."

"I nau chu mipa nge hmeichhia?"

"Mipa ania, mahse school kallai ania, class 6 zirlai ania."

"Unau engzat nge in nih?"

"Pahnih..kei leh ka nau Robin-a..chu chauh chu kan ni."

"Anih inu leh inau te chu Guwahati ah hian an awm ve tihna em ni?"

"Aih..Shillong ah, pawisa hi ka thawn thin a."

"Ehe..anih chuan nangmahin in i luah tihna maw?"

"Um..ka boss hian ka inluah tur pawh min ngaihtuah sak vek. ZAntin min beiseiin a lo kal ziah thin a, mahse ka hnar zel a. Tichuan hlawh min pe tlem tan a, min tiduhdah em em bawk. Tih theih ka nei silova, tihian ka tuar tlawk tlawk mai a ni."

Rsa chu a ngawi vang vang a, "I pawisa hlawh te chu i thawn thin tihna em ni?" tiin a han zawt leh a, "Aw...mahse a tlem tham si a, ka nu pawhin that lam a pan thei lo. A nihna takah chuan damdawiina dah a ngai hial tawh a, mahse damdawiin awm man kan nei silova." tiin a lo chhang leh a.

"A tha e, i boss chu tunge a hming?"

"Engatan nge i tih?"

"Min hrilh phawt la, chuan engkim ka sawifiah ang."

"Nikhil-a ania, ngati nge min zawh a?"

"A in awmna ah min hruai rawh."

"Maw? Engatan maw?"

"Engmah min zawt suh...i vanneihna kawng ka hawn sak dawn che a nih hi."

Lydia-i chuan engmah a sawi ta bik lo, coffe shop chu an chhuahsan a. Rsa chu a zui zel a, tichuan a car nalh tak mai, Bugati VEyron, nuai 110 man chuang zet mai Lydia-i'n a hmuh chuan nalh a ti ngang mai. Mahse mak tak maiin Rsa car a ni tih a hria chu  a ka hau mai a, "Hei hi i ta maw?" a ti hu mai.

"Aw ni e, ngati nge?"

"Khawi ami nge?"

Rsa chu a nui a, "Aww..car zawrhna ami mawle..khawi ami vak nge ni anga?" tiin a lo zawt let a. "Aa..eng nilove...a nalh kher mai." tiin a chhang ta ringawt a. Car chhungah chuan an lut a, a chhungah te chuan LCD monitor a lo awm thlap mai a, changkang tak a ni. "Engti turin nge kan kal dawn?" tiin a zawt leh a.

Rsa chuan thawk a han la te te a, "Ihmaw Lydia...RS Company ah hian General Manager ka nia, a neitu ka ni tihna a nih chu. Keimahin flat pakhat tawp ka luah mek a, ka inah hna min thawh sak zawk la, a nuam i ti zawk ang. Mahse i thu thu ni rawh se, ka ti lui lo che ania." a ti a. Lydia-i chuan mak a ti kher mai, "GM maw i nih a?" a ti hu mai a.

"Aw ni e, ngatinge...mak i va tih hmel ve?"

"Nia...ka lo hrechiang lo che a nih chu."

"Anih ka zawhna chu min chhang tawh la?"

"Nia..ka duh zawk alawm. Rem i tih chuan.."

Rsa chu a nui sak mai, Lydia-i chuan chutiang company a awm lo tih reng a hre si lo. Rsa chu a en vang vang a, a ngaisang thar ta em em a. Kutdawh amaw tia cheng 10 a lo pe te kha a zak leh hnuhnawh khawp mai, reiloteah chuan dawr neitupa Nikhil-a inah chuan an thleng ta a. Rsa chuan  akik karh karh a, Nikhil-a chuan a lo hawng a.

Rsa chu a han en vang vanga , "Tunge i nih aw..ka pu?" tiin zah takin a bia a. Rsa hnungah chuan Lydia-i a lo awm ve reng chu mak a ti kher mai, "Ehe, Lydia...nangpawh maw?" a ti hu mai a. Rsa chuan rum zet hian Nikhila chu a melh a, "Naktuk atang chuan Lydia-i hi i tan a thawk tawh dawn lo, ka tan a thawk tawh ang." a ti chang fak fak mai a.

Hrilhhai zet hian Nikhila chuan, "Mahse...ka pu, ani lo chu tumah dawr min nghahsaktu tur ka nei hleinem." a lo ti a. "Chung te chu i buaina alawm." tiin Rsa chuan Lydia-i chu a kai lawk a, a kal ta daih mai. Nikhila chuan ko letin, "Hey....tunge ni a i inhriat a? Millionaire pawh ni mah la ka hnathawk te khatia i rawn lak ngawt kha thil dik a ni bik lo ania." a ti ve ta pang pang mai.

Rsa chu ava hawi let a, "Lydia-i duhthlanna ngei a ni a, nanga sawisel theih a ni lo." tiin a chhanglet a. "A duhthlanna pawh ni mahse, police hnenah ka report khawp ang che." a lo ti leh khur khur mai. Rsa chuan a kawr awmah chuan thamin, "I duh chuan hrilh la, keipawn Lydia-i mutpuiah i sawm thin thu te, nupui nei lai reng chunga nula dang i beisei thute hi ka sawi ve vek ang." a ti ta siah siah mai.

Nikhila chu a ngawi chiang kher mai, "Rs, thlah rawh..kal vat ang." hlauhthawn hmel tak hian Lydia-i chuan  a lo ti a. Rsa chuan a thlah a, an kal ta a. Motor-a an chuan pah chuan Rsa chuan, "I nu pawh phone la, hna thar i hmuh thu hrilh rawh. Thlakhatah sing chuang fe i hlawh dawn ania, lungngai reng reng suh." tiin a hnem mawlh mawlh a.

Reiloteah chuan Rsa flat chu an thleng ta a, Lydia-i chuan lian a ti in hmuhnawm a ti ngang mai. Gate lian tak a awm thlap a, security guard an lo awm thlap bawk. Rsa chuan Lydia-i bulah chuan hnathawk ho leh guard ho te chu a company hnuaia thawk te vek angin a sawi a, mahse a nihna takah chuan pawisa hlawh tir a a chhawr mai mai te an ni.

Lydia-i chu a room turah chuan a hruai lut thlap mai a, intifaitu room mai mai atan chuan pui tak a ni. "Hetiang em em ah chuan ka awm thiam dawn em maw ni le?" inthlahrung tak chuan Lydia-i chuan a han ti zawi sap a. "Ngati nge? Hei aia lian pawh ala awm asin, i duh zawk angem?" Rsa chuan a lo la ti ta deuh deuh va.

Rang tak hian Lydia-i chuan, "Aih, angai lo. Hei hi ka duh, hei hi a tha e." alo ti vat a. "Tikhan intifai la, i room sirah sawn bathroom a awm nghal ania. Chuan vawiin chu i rawn kal hmasakna ber a ni bawk a, i duh chuan ka bulah chaw min kilpui la, zanin chu i awm hahdam mai mai dawn nia." a han ti leh a.

Lydia-i lawm bawk si, inthlahrung bawk si chu a hnuk a ulh hial a. "Nia..kan kildun dawnnia." tiin a chhang a, Rsa chuan a kalsan ta a. Rsa chu a khumah chuan a thu a, sum tam tham tak a han neih meuh chuan mi tanpui chu a hreh loh zia a inhrechiang telh telh zel a, mahse a chapona leh duhamna erawh ala nasa hle thung.

*************************

Zanriah chu Lydia-i nen chuan an eidun ta a, an titi tui kher mai. Lydia-i inthlahrung hmel chu Rsa chuan a hmu thiam renga, "Lydia en teh, ka inah hna i thawk a ni mai a. Inthlahrung kher suh aw, i thianpa tho ka la nih hi." a han ti a. Lydia-i chu a nui sen sen a, "Nia, ka lawm lutuk." tiin a lo chhang a.

An inkawm rei telh telh a, Lydia-i chuan a nu chanchin vel chu a sawi leh a. Rsa chuan a khawngaih takzet, chumi zan la la chuan anu in enkawlna man tur chu cheng nuai 5 lai mah a pe nghal bawk a. Lydia-i chuan hnial eng ang mahse Rsa chuan a la let duh der silo, lawm tak leh inthlahrung tak chung si chuan a pawm ta a.

Zan a rei ta, dar 12 a ri tep tawh. Mut zai an rel ve ta a, Rsa chuan Lydia-i chu a room thleng chuan a thlah a. Tichuan a mu ve ta a, a mitthla ah chuan :Lydia-i nui sen sen bak thildang a leng mawlh lo. Amah chuan a khi leh deuh vur vur thin a, a aw mawi tak mai te chu a bengah chuan a cham reng mai.

A muhil leh ta a, mumang a nei leh ta. A khawsak a sang chho telh telh a, a mumang pawh a changkang telh telh mai. Tun tum zet zawng, Birmingham United Jewelry Store ah a awm ta daih mai. A awmzia chu England ah daih a lo awm tihna a nih chu, a han hawi kual nghal a. Rangkachak leh tlereuh tam tak chuan a hual vel a ni ber mai, a meng bial kawk kawk a.

Tichuan apa chu a nghak leh ta ngat ngat a, a tawpah chuan pen ri dup dup thawm a hre tan ta. Manequinn tamtak intlar phei chu an darh chhuai a, apa chu hreipui, rangkachak atanga siam keng hian a rawn chhuak ta a. Tum danga a mumang ang lo takin apa chu a lian hle mai a, ft 12 dawn vel laia sang a ni.

Tichuan hreipui chuan chhuat chu a rawn chek phei vak vak a, tlereuh chi hran hrangte chu a glass bawm chawmpin a vai darh vek mai a, dawr chhung chu a hnawk nuai mai. Rsa chu a tlanchhe leh ta a, an inum leh tan ta. Rsa chu bang phenah te, an thil zawrh phenah te chuan a biru kual a.

Mahse apa chuan a rawn hmu zel mai si a, a chek fuh teuh thei kher mai. A tawpah chuan Rsa chuan a theih ang ang in tlereuh hrang hrang, th(r)i, zungbun, ngun leh bengbeh chi hrang hrang, en reng reng pawha a man a to dawn tih hriat tak mai te chu a tlanchhiat pah chuan a la khawm ta a.

Tichuan inchung lamah a tlan chho va, apa chuan a rawn um zel a. Inchung lamah phei chuan tlereuh chu a lo thahnem ngang mai, a theih anga tam chu a la khawma, a coat hak lai ipteah chuan a khah hian a khat hnur tawh mai. A la hnem tawk ta maw tih ah chuan Rsa chuan ring zet hian, "Ka mumang mai mai a ni." a ti vak a.

Mahse a sawi zawh rual rual chuan apa chuan a rawn nawr leng lawp a, inchung atang chuan a tla ta. Apa chuan a coat hak lai chu a pawt hman a, a thler vek mai. A lunghlu leh thildang ah lai te chu a tla nuai mai a, a ui lutuk chu a au vak vak mai. Chhuat a thlen rual rual chuan a hrah nghal a, a thu chhuak hlawl mai.

A kut a han en a, eng tlereuh mah a awm ta lo. A thinrim lutuk chu a lu a dawm vawng vawng a, a au vak vak mai. "Hrep tak chuan le...min man hman khanglang chu le.." a ti vak vak a. Muthilh that leh ngat chu a tum ta a, mahse a thei mai lo tlat. Muthilh a tum nasat poh leh a harh tulh tulh zawk si.

A tihngaihna hrelo chuan zu a in vak a, ruih chu a rui ngei e. Mahse ala muhil thei chuang lo, zu chu in bleh vak dawn se a rui buai anga, a lu te a hai tur chu a peih chiah bik bawk silo. A tawpah chuan a chhiahhlawhte zinga pakhat chu mutduhna damdawi zawng turin a tir ta tawp a, reiloteah chuan a rawn thleng ve leh vat a.

Mutduhna damdawi chu mum hnih lai a ei a, bag ruak pawm chung chuan khumah chuan mu in a maimitchhing nghal vang vang mai. REiloteah chuan a muhil ta ngei a, a mumang pawh chu a intan leh nghal. Dawr chhungah tho chuan a lo la awm a, mahse a mumang hmasa ang chiah chiah khan dawr chu a lo hnawk nuai mai.

Apa chu a zawng kual a, mahse a hmu ta tlat lo. Tichuan a theih anga tam chu a la khawm leh a, inchung lamah chhovin a tam thei ang ber chu la in a bag ah chuan a thun leh ta char char mai. Chutah apa chu a rawn lang leh ta, "Tlaktlai lo pa...ka that dawn che." a rawn ti leh ta khur khur mai.

Tlanchhiat pah chuan Rsa chuan tlreuh ho chu a khawm zel tho va, a bag pawh a khat hnuk tawh mai. A thiam tawh bawk a, apa laka han tlankual vel te, han bum kual vel te pawh a hnehsawh tawh khawp mai. Tichuan bang phenah a biru a, "Ka mumang mai mai a ni." tiin a au leh vak a.

*************************

A harh leh chuan bag chu a lo la pawm ngei a, a rit em em bawk. Bag chu rang takin a hawng a, tlereuh hlir hian a lo khat hnuk mai. A lawm lutuk chu a au vak vak a, "Mi hausa ka ni...khawvela mi hausa ber ka nih hi." tiin a nui khek vak vak mai. Tichuan tlereuh zawng zawng chu khumah bunin thla a han lakpui vel a, a hlim takzet a ni.

Tichuan a tlereuh zawng zawngte chu pawisa ah a chantir leh vek a, bank ah a dah leh vek bawk. Mutduhna damdawi chu a hmang tangkai chho ta zel a, a flat pawh a chei tha zel bawk a. Sum chu ngah fia fia tawh tak a ni ringawt, Guwahati-a a awm chu ala kham hlawl lo a ni. Nitin mai chuan a hausakna a pung thur thur reng a, mahse a theih tawp chuan a inzep tang tang thung.

Vawikhat chu bank ah a pawisa deposit tuma a kal lai chuan bank kawtah chuan vaipa pahnih lo inbe mawlh mawlh hi a hmu a, a ding chat mai. Rang tak chuan a motor phenah chuan a biru a, a chhan pawh chu vai pahnihte chu a mumanga a hmuh, cheng nuai 100 lai a laksak, Ajay-a leh Rohit-a te kha an ni.

Rsa chuan mak a ti em em a, "Atak takah an awm maw?" a ti hu mai. Mahse a ngaihtuah chiang a, pawisa leh thil hlu dang pawh ataka a neih theih zel chuan a mumanga mihring a hmuh te pawh atakah an awm dawn chiang sa tih chu a hrethiam nghal a. Guwahati-a awm reng chu a him dawn lovin a hria a, tichuan Mizoram lama haw mai chu a tum ta a.

Lydia-i bulah chuan Mizoram lama haw a ngaih thu a hrilh a, Mizoram lama zui tur leh hnathawh chhunzawm turin a sawm nghal bawk. Lydia-i chuan, "Shillongah ka haw ve phawt anga, ka nu pawh ka hmu ve chak tawh a. Tichuan ka nu operation neih zawh thleng chu kan ina awm min phalsak la, chuan ka rawn zawm veleh nghal ang che." tiin a chhang a.

Rsa pawh chuan a phalsak ta a, tichuan a flat chu to takin a hralh chhawng leh ta a. Mizoram lamah chuan haw in hotel ah a thleng leh phawt a, a car nalh tak te pawh chu a hralh leh daih a. A chhan pawh Mizo chu kan la tlem si a, amah anga sum ngah leh lutuk chu an hriat chhuah a hlauh vang a ni.

Company din tak tak mai chu a duh leh ta rum rum a, tichuan veng dang daih, an veng atanga hla takah chuan in a lei leh ta rup mai. In tha tawk ve tak mai a ni a, kar 2 chhung vel chu chei that nan hun a han hmang leh phawt a. Tichuan a in chu sakzawm leh tur hisap chuan a luah ve tan ta a, thian tamtak a siam leh phawt a.

A sum chu fimkhur taka hmangin sumdawnna a han buaipui chho leh a, mi hausa hmelhriat tam tak a neih phah a. Tichuan company tan ve tawp mai chu a tum ta, a tawp a tawpah chuan Restaurant changkang tak mai a hawng ta a, tihtur tul ang ang te chu a sum hmang chuan a ti fel nghal zung zung bawk.

A chhungte erawhin an lo hre ve nge hre ve lo chu a hre hauh lo, mahse a ngaihtuah tawh bik lo. Hun a kal zel a, a restaurant pawh a hlawk tial tial a. A lar tulh tulh bawk a, a hmunhma pawh a zauh telh telh a. A mumang pawh ala hmang tangkai reng a, sum pawh a neih belh zel bawk. A restaurant hming atan chuan BEAUTIFUL NIGHTMARE tih a vuah nghe nghe a, a chhan pawh a mumang vang chauhva hetiang dinhmun thleng thei a nih vang a ni.

**************************

TO BE CONTINUE