BEAUTIFUL NIGHTMARE (MIZO FICTION FANTASY STORY) [Inspired by SuperMe] Written by : Aaron Malsawmdawngzuala CHAPTER - 2

 BEAUTIFUL NIGHTMARE

(MIZO FICTION FANTASY STORY)

[Inspired by SuperMe]

Written by : Aaron Malsawmdawngzuala

CHAPTER - 2

********************

Rsa chu pawisa hlawhna tur zawng chuan a chhuak leh ta a, dawr dang dangah chuan kal kualin an hmunhma vel te a tihfai sak a. Chutia nilenga mi dawr tifaia a inhlawh kual hnu chuan tlai lam dar 3 a lo ri leh der tawh mai, vanneihthlak takin hemi ni hi chuan pawisa pawh a thawk chhuak tam ve fu mai.

A ril a tam em avang chuan a pawisa hlawh chhuah hmang chuan thingpui dawrah chawlin a ei teuh mai a, a thil ei mumal lohna a rei tawh bawk nen, puar takin a ei ve thei ta. Tichuan bus-a haw mai lovin pawisa save nan tiin ke chuan a haw leh ta a, mahse Lydia-i dawr zawnah chuan a ding leh ta chat mai.

Lydia-i chuan a thawmhnaw zawrh lai te chu a lo thlep fel mek a, Rsa chuan a thlir leh ta dauh dauh mai. Customer an awmloh lai tak chuan ava lut a, "I dam maw?" ava ti a. Mahse a hmuihmul leh khabe hmul buk chhup te, a sam kir bup mai te chu a meh fai vek tawh avang chuan Lydia chuan a lo hre mai lo.

"Tunge i nih a?" a lo ti hu mai. Rsa chu a  nui a, "Nimin lawk pawn kan inhmuh kha." tiin a lo chhang a. Mahse Lydia-i chuan ala hre tlat lo, "Niminah maw? Ka va hre si lo che ve, tunge i nih?" tiin a lo zawt leh a. Rsa chu a thu a, "Lydia, keimah Rsa...niminah pawh kutdawh amaw min ti a, cheng 10 min pek kha." tiin a chhang leh a.

Chutah Lydia-i chuan mak a ti kher mai, "Ehee...ka hai dawn che alawm. I inmet fai ta lutuk a, ka lo hre tawh hleinem che." tiin nelawm tak chuan  a nui sen sen a. "I buai viau em? Ka tibuai che em?" tiin inla polite tak chuan Rsa chuan a han zawt leh vel a. "Buai love...lo leng thu ve hrih rawh." tiin a lo chhang a.

Eng eng emaw sawiin an titi dun nual a, minute 10 vel hnuah chuan Lydia-i dawr nghah lai neitu bawk chu a lo lut leh ta. Lydia-i chu rum zet hian a rawn en a, "Tlangval i lo kawm mai mai amaw? Dawr nghak tha ta che...hlawh duh ve tho si." tiin a rawn hau hrep mai. Rsa inthlahrung chuan, "Ka kal phawt ange." tiin a chhuah san ta a.

A kal pah chuan a hawilet a, dawr neitu chuan Lydia-i chu a vin nasa kher mai. Hlauh hmel em em hian a lu a bu nghat nghat ringawt a, a tah a chhuah hmel hle mai. Rsa chuan a khawngaih em em a, mahse khawngaih viau turin ani pawh eng vak a ni bik silo. Tih theih nei silo chuan a en reng ringawt a, tichuan a inluah lam panin a haw leh ta a ni.

********************

A inluah a thleng chiah chu a ding chat mai, pawnah chuan a thawmhnaw zawng zawng leh bungbel tlem azawng chu a lo awm hnawk nuai mai. A va tlan hnai vat a, kawngka chu tala hian a lo in kalh a. A bulah chuan lehkha them hi a lo awm bawk a, rang takin a la vat a. A han chhiar chu a landlord hnen atanga a dawn a ni, inluah man a pek har em avangin a hnawtchhuak tihna a nih chu.

Rsa chu a thinrim em em a, kawngka te chu a chum bur bur mai. A mangang bawk si chu a tap pur mai a, "Khawnge ka awm tak ang?" tiin a hawi kual a, khawlaia riah mai a ngai tur chu a huphurh takzet a ni. Mahse tih theih dang a nei chuang lo, pawisa nei miau hek lo le. A thawmhnaw leh bungbel neih ang ang te chu la khawmin a bawr hle mai, a inkhai chhuak ta hnak hnak a.

REiloteah chuan a mut a rawn chhuak leh ta em em mai a, mahse a muhil ngam bawk silo. Dawr pakhat kawtah chuan a in nghat ta ringawt a, a blanket neih ang ang te chu phah in a tlu zal a. Tumah pan tur a nei bawk si lo, chhungte tumah a nei tawh bawk si lo. Chumai nilovin a mumangah lah a pa thlarau chuan thah tumin a veh reng mai bawk si, a tan chuan khawvel chu hremhmun hi a ni ringawt.

A beidawng em em a, inthah duhna rilru chu a pu leh tan ta. A awmna bul dawr chu a han en a, a lian angreng khawp mai. Inchung panna step hi a bulah chuan a awm bawk a, a han maimitchhing vang vang phawt a. "Hetianga ka awm reng chuan ka la thi vat dawn tho tho, ka thatchhiat man chu ka tel mek a nih hi." tiin a phun sap a.

Tichuan a ding a, step lam pan chuan a phei ta a. Stepah chuan chhovin a inhnit feih feih reng mai, tichuan inchung zawl chu a thleng ta. Tlaia a thil ei bak kha engmah a la ei silova, zan a rei leh tawh bawk nen a ril pawh a tam leh tawh kher mai. A hmawrah chuan a ding ta vang mai a, hnuailam a zu melh a.

Tlak hlumna tur khawpa sang chu a ni ngei e, mahse a hun a thlen meuh chuan a ngam leh chiah bik chuang lo. Thih tawp mai chu a hreh em em bawk si, mahse chutia a awm reng a nih chuan riltamin a thi dawn tho tho bawk si. Duhthlan tur dang a nei silo, a mangang leh rilru hah chu a tap a tap ringawt mai.

A maimitchhing leh a, "Lalpa, khawngaih takin i hnenah min la ang che aw...ka nu leh ka chhungte chungah ngaihdam ka dil bawk e." tiin a phun leh sap a. Tichuan zuan thlak chu a tum ta a, mahse a zuang tur chiah chu kawngpuia pani puri zuar pakhat chuan a rawn au vak a, "Hey...enge tih i tum a?" tiin a rawn zawn a.

Rsa chu a meng a, vaipa chu a zu hmu a. Chhan ngaihna a hre mai lo, "Lo chhuk teh..hetah hian.." tiin vaipa chuan a rawn au leh a, Rsa chu a zu chhuk ve mai bawk. Vaipa chuan ava pan vat a, "Enge tih i tum a, inthah i tum em ni?" tiin a zawt leh a, mahse Rsa chu a ngawi reng a. "Hindi i thiam lo em ni?" tiin a zawt leh a.

"Thiam e." tih ringawt chuan a chhang a. Vaipa chuan a en vang vang a, "Nang hi khawlaiah ka hmu fo che alawm, enge i tih thin a?" tiin a zawt leh a. MAhse Rsa chuan a chhang chuang lo, vaipa chuan a suitcase leh bungbel vel dawr bula lo hnawk nuai mai chu ava en a. "I chhungten an hnawt chhuak che em ni?" tiin a zawt leh a.

A melh ngai melh reng chung chuan, "Chhungte ka nei lo." tiin Rsa chuan a chhang a. "Anih leh awmna tur in i nei lo em ni?" tiin a zawt leh a. "Aw..ka inluahna neitu in min hnawt chhuak a." tiin a chhang a. "Ngati nge? Intihbuaina in nei em ni?" tiin vaipa chuan a lo zawt leh a.

"PAwisa ka nei lova...inluah man ka pe thei lova."

"Ava pawi ve...i ril te a tam em?"

"Tam lutuk....mumal taka chaw ka eilohna pawh a rei tawh mai."

VAipa chuan a panu puri chu a siamsak mawlh mawlh a, Rsa chu a eitir ta a. Vai hmusit em em thintu, mi chapo tak ni thin Rsa chuan chutia a hmuhsit em em vai pani puri zuar mai mai ina a tanpui ta mai chu a insit em em a, mahse chapo thei a ni tawh bik silo. A thil eilai te chuan a tap pur mai a, a inhnit feih feih reng mai.

"Thianpa..i mit te kha ava bui nasa ve. I mu tlem ani ngei ang, ngati nge a?"

"Ka muhil ngam lo a ni."

"NGati maw?"

"Mumang hlauhawm deuh ka nei thin a."

"Engtia mumang hlauhawm maw? Enge i hmuh thin a?"

"Ka pa..ka pa hi a thi tawh a. Ka mumangah ka hmu ziah a, min thah tumin min um thin a ni."

"Mumang mai mai a nih chu....a hlauhawm hleinem."

"Nilo..i hrethiam lo a ni."

"Anih leh min hrilhfiah la."

Rsa chuan chu vaipa bulah chuan a mumang rapthlak zia te, a tak ang chiaha na a tawrh thin dan zawng zawngte chu a hrilh ta vek a. A chanchin share tur tumah thian nei ta lo chuan chu vaipa bulah chuan a hindi thiam ang tawk chuan a chhungkaw neihchhun a kalsan dan te, a bialnu Preeti in a hnawhchhuah dante zawng zawng chu a hrilh ta vek a.

Vawipa chu a ngawi vang vang a , "Enteh thianpa, chutiang vang ringawt a mut ngam loh tawp mai chu thildik a ni lo. Tihian ti teh, hahdam takin mut tum la. I pa chu a lo lan leh hunah ring takin KA MUMANG MAI MAI A NI tiin au vak la, chuan engkim a tha leh vek mai ang." tiin a hrilh a, a kalsan ta a.

*************************

Kha vaipa thil sawi avang ringawt khan Rsa chu a thla a muang hauh lo, a la mu ngam chuang lo. DAwr kawtah chuan dawr kawngka bang nghengin a thu meng kar mai a, a mutthluk leh chu a hlau takzet zawk. A mut a chhuah em avang chuan a lo chhing leh sek zel a, mahse apa nui ri  a hriat veleh chuan a inti harh nghal vat zel a.

Chutiang chuan darkar khat dawn chu a awm tawh, a kut te chu a han seh leh vak thin. A harh theih nan tiin amah leh amah chu a insik vak vak a, mahse reiloteah a mut chu a chhuak zel mai si. Chutia intih harh tuma a thut men kar lai chuan pen ri a hre ta tlat mai, thawm lo chhuahna lam chu ava en vat a.

A thim laia mipa pakhat lo kal phei chu a hmu a, chemte a hum tih a hmu thei bawk. Chupa chuan a lo pan hnai zel a, street light zawn a rawn thlen chuan a hmel a lang thei ta. Tudang nilovin apa, Pu Rova bawk a ni. Rsa chuan a muhil tih a inhre chhuak nghal a, "Nilo..harh rawh, harh rawh.." tiin amah chu a inbe nghal mawlh mawlh mai.

Apa chu a lo hnai zel a, "Kan inhmu leh ta maw, thatchhe pa." tiin a rawn nui phei leh ta uar uar mai. Rsa chu a ding vat a, "Min rawn hnaih suh...kal bo vat rawh." tiin apa chu a vin vak vak a. Mahse apa chuan a nuihsawh a, "VE khanglang che chuan, khawnge..zirtirna ka han pe hlak teh ang che." tiin a rawn tlan phei ta mai a.

Chuveleh rang zet chuan Rsa chu a tlanchhe ve leh ta nghal a, an inum leh ta tiah tiah mai. Pu Rova lah chu a tlan chak em em mai a, chemte chuan a rawn vei thawi leh ta fua fua mai. RSa lahin tha a nei tlem tawh bawk si, a tlan chak vak thei si lo. Thui fe an inum hnu chuan a tlu thal tawp mai, thawh leh nghal a tum a.

Mahse apa chuan a awmah a thut bet nghal a, chemte chuan a tin ta mai. Rapthlak tak hian a nui huah huah a, "Nang ang mihring hi chu dam tlak pawh i nilo, he khawvel ah hian in tan hmun a awm ve lo." tih pah chuan chemte chu a lek kang ta vu mai. Rsa hlau lutuk chuan, "Nilo, ka pa...min that lo hram rawh." tiin a ngen lawm lawm a.

Mahse apa chuan a ngaihsak lo kher mai, a vit ngei dawn niin Rsa chuan a hria a. Thih ala hlau tho bawk si, han tang deuh dawn se apa tha chu a hneh lo rapthlak mai bawk si a. Chutih lai tak chuan vaipa, pani puri zuar thil sawi kha a hre chhuak ta zawk mai. Pu Rova chuan a vih dawn lai tak chuan ring tak hian, "KA MUMANG MAI MAI A NI." tiin a au vak a.

A vit hman teuh kher mai, mahse Pu Rova chu a tawp chat mai. Phawk hru hian Rsa mitah tak chuan a en a, chemte chu a thlauh va. A khur cher cher a, zawi zawi chuan a ral ta riai riai mai. Rsa mak ti lutuk chuan a en reng a, apa chu a khu rum rum a. Tichuan vawi leh kahtah mei vap ah a chang thut a, boruakah chuan a leng nuai nuai mai.

**********************

Rsa chu a meng a, dawr bulah chuan a lo la mu reng a. Khua a lo var der tawh mai, a thaw huai mai a. Mahse a bulah chuan engemaw a hmu tlat mai, chu chu a mumanga apa in thah a tumna chemte ngei mai kha a ni. RAng takin a la vat a, ala mawi em em mai lehnghal. Chu mai ala nilo, a vawnna fawng chu rangkachak hlang vek a ni.

A tlet hian a tle vet vet mai a, Rsa chuan nalh a ti ngang mai. Mahse mak a ti em em thung a, "Ahma pawh khan guard tiang kha a ni tawh bawk a...tunah he chemte hi a ni leh a. Enge awmzia, engtin nge atakah a thlen theih?" tiin a inzawt mawlh mawlh a. Chemte chu a han en leh thin, aman chu a tlawm dawn lo tih pawh a hria.

Tichuan a tho vat a, AK Azad Road lam chu a pan nghal a. Mahse a awmna atanga a hlat em avang chuan bus a phar a, tichuan chemte chu a bag ah chuan a dah tha a. Minute 10 vel hnuah chuan a thleng ta, chu a chemte chu pawisa a thleng a tum a ni. DAwr hrang hrang a melh kual hnu chuan Antique Boutique dawr chu a hmu ta.

Rang takin a lut a, dawr nghaktu chu ava pan nghal a. "Enge i duh le?" tiin dawr nghaktu vai putar chuan a lo zawt a. Rsa chu a han meng kual zeuh zeuh phawt a, tichuan a chemte chu a phawrh zal zal a. DAwhkanah chuan dah in, "Hei hi pawisa nena thleng ka duh, engzat man vel nge ni ang?" tiin a zawt ta a.

Vaipa chuan chemte chu a han en a, chemte a hmuh tawh zawng zawngah chuan a man to ber ala ni hial ang. Mahse Rsa chu bum tumin chu chemte, cheng nuai 30 man vel lai mai chu ngaihnep hmel tak chuan a han en a. A aw a han thian kharh kharh a, "Cheng nuai 1 vel chu a tlin ve mai dawn hi." a lo ti a.

Rsa chuan chu chemte, rangkachak diktak tih hriat taka cheimawi chu cheng nuai 1 lek chu a nilo tih a hre ve ran a. Nuih suk pah chuan, "Nuai khat lek chu a nilo tih ka hre ve ania aw.." a ti ve ta ngat a. VAipa chu a ngawi vang vang a, "Nuai 3 aw...abak chuan a sang thei lovang." tiin a lo hrilh leh a.

Rsa chu a thinrim der miai, "A pawilo mai." tiin chemte chu a la a, kal a tum ta mai a. VAipa chuan a ko ding a, "Lo let leh lawk teh." a ti a, Rsa pawh chu ava let ve leh mai a. VAipa chuan Rsa chu a han melh vang vang a, "Engzat nge i duh?" tiin a zawt ta a. Rsa chuan a han inngaihtuah vang vang a, "Cheng nuai 10 ai chuan a tlem thei lo hrim hrim." a ti ve leh a.

"Nuai 8 sing 6 in ti ang aw?"

"Aih ka duh lo...a aia tam ka duh."

"Anih leh nuai 10 aw.."

"Aih, chu aia tam ka duh."

Vaipa chu a ngawi vang vang a, "Umm...nuai 11 ni rawh se, abak chu ka san thei tawh lo." tiin a chhang ta a. Rsa pawh chuan a remti ta a, pawisa chu an inpe ta a. Rsa chu a hlim kher mai, ti fuh inti tak chuan pawisa chu la in a chhuahsan ta a. Mahse chu vaipa zawk chuan a bum tih a inhre hauh lo, a chhan chu kha chemte kha nuai 30-40 vel laia to a ni.

*********************

Rsa chu a hlim kher mai, a bag ah lai khan hnur pawisa a nei ta mai chu mak a ti zawk hial a. A hlim lutuk chu a nui vur vur reng mai a, engtia han hman tan tur nge pawh a hre lo. A hmasa ber atan phone dawrah lutin phone thar a lei nghal a, tichuan Uber ngatin a thawmhnaw dahna lam, dawr bulah chuan a let leh bawk.

A thawmhnaw neih ang ang te chu kutdawh ho hnenah a sem ral vek a, a bungbel vel pawh kawngsira thingpui dawr kai ho bulah a pe vek bawk. Thawk leh khata cheng nuai 11 lai mai a nei ta mai chu a hlim em em a, cheng 100 lek pawh harsa taka nei hram hram thin khan nikhat thil thua cheng nuai 11 lai mai a han nei ta mai chu a awm thiam lo a ni ber mai.

A hlawhthlin lawm nan tiin a bazar nghal a, air bag thar a lei a, thawmhnaw thar a lei teuh bawk. Tichuan chenna tur ber a la neih loh avang chuan inluah tur zawn chu a tum leh a, mahse a pawisa neih zat ngaihtuahin mi in luah mai mai chu a tum leh ta lo. Guwahati-a hotel changkang ve ber, Radisson Blu Hotel lam chu a pan ta zawk a.

Room to ber mai, suite room ngat chu a han book bawk a. Tichuan room chhung chu a lut a, room changkang taka a awm lohna a rei tawh bawk nen, a hlim lutuk chu khumah chuan a tal vak vak mai. A bag chu a han hawng a, pawisa chu la tam tak a ni. Tlai chaw pawh chu hotel restaurant changkang takah chuan a ei a, a eitur chah pawh a to hlawm narawh e.

"Enge ka tih leh ang? Engtin nge pawisa hi ka neih belh leh theih ang?" tiin a inzawt mawlh mawlh a, awmngaihna a hre hlawl lo a ni ber. Tichuan intercom atang chuan reception ho chu a phone a, zu changkang ber ber chi chu a han chah leh a. A nun chu a hlim takzet tawh, chutih rual rual chuan a rilruah duhamna chu a rawn awm lehnghal a.

Rui phel phual chuan a phone chu a han hmet nuap nuap a, a bialnu hlui Preeti chu a rilru ah a rawn lang zawk mai. A number a la hre ran mai bawk a, va insawitheih khum chu a chak ta tlat a. A number chu dial in a call ta nge nge a, "Hello.." a rawn ti dek dek chu, "Hello Preeti..min la hria em?" a ti nghal a.

"Tunge ni?"

"Keimah..i bialpa hlui i hnawl tak kha ka nih hi."

"Tu maw? Iva zak lo ve..tunge i nih a?"

"KA zak lo amaw? Nia ka zaklo alawm, zaklo tur khawpin ka dinhmun hian zir miau hek." tiin a nui vak vak a, chutia mizo tawng ngata a tawng ta chu Preeti chuan tunge a nih a hre nghal vat a, "Lalremsang..nangmah em ni?" tiin a zawt ta nge nge a. Chuveleh intithei tak hian Rsa chuan, "Ni e...nang hian min hnawtchhuak vel tiraw? REthei taka ka nun hmang turin anchhia te min lawh vel a, tunah hian khawnge ka awm i hria em? Radisson Blu Hotel ngatah asin ka awm, pawisa pawh i neih let fe ka nei tih hria ang che." a ti ta vak vak mai.

"I rui animaw? Vawikhat mah min rawn be tawh suh, zakthei lo lutuk." tiin Preeti chuan a rawn vin hrep mai. "Haha..ni e, heibak chu biak che ka tum tawh hleinem. Ka hausak zia rawn hrilh tur che in ka lo phone mai mai che ania, chupawh iphone ngatin mawle. I la inchhir khawp ang, mangtha le." tiin phone chu a dah hmak mai.

Rsa chu a nui vur vur a, "Mai mai chuan le....super hero ka nih hi....power ka nei tih hi tuman in hre lo." tiin a chapo ar ar kher mai. A ruih em avang chuan a mut a chhuak tan ta a, mut mai tum chuan a han maimitchhing ngawt a. Mahse apa nui ri a hre leh ta thut mai, rang tak chuan a harh leh vat a.

"Nilo...ka mumang, ala tawp lo." tiin a phun nuah nuah a. A muhil leh ngam ta lo, "Hrep taka...ka mumang tal chu reh tawh se ka va ti em.." tiin a lu a dawm vawng vawng mai. Mahse thil hriat chhuah zawk a nei, a hausak thutna chhan chu engdang vang nilovin a mumang hlauhawm tak vang liau liau kha a ni.

"Ka mumang kha...ka mumang atang khan engemaw dang ka nei leh thei ngei ang." tiin a phun leh sap a, tichuan mutthilh chu a tum ta. A ruih em avang chuan reilote hnuah chuan a muhil ta mai a, mahse thawm a hre tlat mai. A room pawn lam atang chuan pen ri a hria a, rang takin a tho chhuak nghal a.

Muang chang chuan kawngka lam chu  a pan a, fimkhur tak chuan chhe te chu  ahan hawng a. A han bih dek dek a, chutah apa bawk chu ava hmu leh ta. Ngunhnam hriam hmel em em mai hi a lo hum a, amah hnungchhawn zawng chuan a lo kal chhut chhut mai. Rsa chu ava chhuak a, muang chang chuan apa chu a zui zel a.

Chutah a rawn hawi thut mai le, apa chuan rum tak hian a rawn melh khur mai. "Khatah khan animaw i lo awm a, thatchhepa." tih leh tlan a rual ta mai a. Rsa hlau lutuk chu a tlan chhe nghal a, apa chuan a um leh ta. Zan danga a mumang ang bawkin an in um leh ta ngat ngat a, apa chuan a sat thawi leh ta fua fua mai.

Corridor ah chuan in umin step ah te chuan an inum thla thul, hmun tin maiah chuan apa chu a awm amaw tih tur hian khawi khawi emaw atang hian a rawn lang leh thut thut zel a. A tawp a tawpah chuan a man leh ta a, chhuatah chuan a thut bet ta ran mai. Pu Rova chuan ngunhnam chu lek kangin vih a tum a, mahse Rsa chuan ring zet hian, "Ka mumang mai mai a ni." a ti leh ta vak a.

**************************

Rsa chu a harh leh ta a, a meng kawk mai. Tichuan amah chuan ngunhnam chu a lo hum reng bawk, rang takin a tho chhuak vat a. Ngunhnam chu a han en a, a nalhin a tle var mai. A vawn fung chu rangkachak hlang bawk  ani a, a laiah chuan lunghlu te reuh te te hi a in vuah fur bawk.

Rsa chu a nui var var a, "Hei chu a tlawm zawk zawk dawnlo kher mai, ka  phut hnem tawh viau ang." tiin a bag ah chuan a thun leh a. Tukthuan tuihnai tak te chu a han ei leh te te a, tichuan Antique Boutique lam pan chuan Uber ngat hmangin a kal leh ta a. DAwr nghaktu vaipa chuan Rsa bawk a lo hmu leh chu a hlauthawng hman hle a, achhan pawh a bum tih a hrechhuak amaw a tih vang a ni.

Mahse Rsa chuan ngunhnam chu a rawn phawrh chhuak ta mai a, "Hei hi chu keiman ka inchhiar dawn...i duhlo anih chuan dawr dang ka pan mai ang." a han ti nghal zung zung a. "Engzatin nge i hralh phal a?" tiin vaipa chuan a lo zawt a. Rsa chu a ngawih vang vang hnuah chuan, "Cheng nuai 50." tiin a chhang ta a.

A man zat chu a hre dik leh ta lo, chu ngunhnam chu US dollar pawhin engemaw zah fe a ni tih chu vaipa chuan a hre ran mai a, mahse cheng nuai 50 lek a phut ta chu a lawm rilru kher mai. Tichuan pawisa chu an inpe leh a, a chhuahsan leh ta a. Tunah zet zawng, Rsa chu hausa tak hi a ni tawh.

Ahma a cheng nuai 11 a neih pawh kha a la hman zawh loh chu sawi lo, nuai 1 pawh ala hmang zo lo kha a nia. Mahse a tuk lawkah nuai 50 zet mai a nei leh ta chu nuam a ti em em a, "Mizoramah awm phei ila chu ka hausa ber dawn nih hi." tiin a hlim kher mai. Tichuan bank ah kalin account a hawng thar a, a pawisa zawng zawng chu a dah lut ta a.

*****************************

Hun a liam zel a, Rsa chu a hausa tulh tulh mai. Thawmhnaw changkang tak tak a lei teuh teuh va, ruihtheihthil chi hrang hrang a lei bawk a. A nun chu nuam tak a ni ringawt, hmeichhia pawh a hotel thlenna ah chuan a hruai lut hnem thei khawp mai. Party naah zantin a kal a, sum a ngah bawk nen, hmelhriat pawh a ngah tawh khawp mai.

Mahse mak tak maiin mumang a nei tawh ngai miah lova, a neih pawhin apa hmel chu  ahmu tawh ngai lo. Mi pangngai ang bawkin a mumang pawh pangngai tak hlir a ni tawh a, a ngaih a tha lo hial zawk. Mahse a sum neih erawh ala tam em em a, hman sen loh ala nei a ni. A tawp a tawpah chuan Mizoram lama haw a, sumdawnna tan chhoh a tum ta a.

Mahse Guwahati a zalen taka nun hman a, a sum hman chur chur mai chu ala kham chiah lo. Thla khat vel chu la cham a tum ta a, sum nei tam hle mahse a che fimkhur ve hle tho va, mi nazawng bulah a sum neih zat te chu a hrilh duh mai mai bik lo. Tichuan zan khat Uber-a  ahaw lam chuan vaipa, inthah a tum laia lo dangtu ngei mai kha ava hmu fuh hlauh mai.

"Driver ding teh...hetah hian ka lo chhuk mai ang." tiin Uber driver chu a din tir a, motor atang chuan a chhuk ta a. Chu vaipa chu kawngsirah hian a lo thu a, a mit chu a lo duk chur mai. Rsa chuan ava pan a, "I dam maw?" tiin ava bia a. Vaipa chuan a lo en a, mak a ti kher mai. Chutia Rsa, thawmhnaw changkang tak nena a lo ding tluan zar mai a hmuh chuan a awihlo hial zawk.

"Ehe...nang hi..." tih chiah a sawi thei. Rsa chu a nui suk a, "Um keimah...minla hria maw?" a lo ti a. Vaipa chuan a en hu a, "Mahse..ngati nge? I va nalh ta ve...enge awmzia?" tiin a lo zawt a. Rsa chu abulah chuan ava thu a, "Ka thianpa a awm ve a, Guwahati ah hian. Company lian deuh mai a nei a, chutah chuan min thawh tir ve hlauh anih hi." tiin dawt a sawi ta daih a.

"I vannei hle mai, ka lawmpui lutuk che." vaipa chuan a lo ti a. Rsa chuan vaipa mit duk chur mai chu a han enchiang a, "Ehe...ngati nge i mit kha? Kut an thlak che em ni?" tiin a zawt a. "Aw..tlangval pahnih mawle...ka pani puri hi an ei teuh a, mahse pawisa min pe leh duh si lova. Ka thinrim a, mahse min sawp let zek anih hi." tiin za lo tak chuan a khi suk a.

Rsa chuan a khawngaih hle mai, a wallet phawrhin a awm zawng zawng chu a la chhuak a. A wallet-a a cash-a a pawisa kawl zat chu singkhat vel a ni, "Kha hei hi la rawh." tiin vaipa chu a pe ta mai a. "Ehe..i fiamthu em ni? Ava tam em em ve, pawisa tak tak ani chiah amaw?" a lo ti nghal chul mai.

Rsa chu a nui a, "Um ni e...kha chiah kha ka kawl rih a, kan inhmuh leh hunah a dang ka pe leh ang che." a la ti ta deuh deuh va. "Mahse ngati nge min pek?" tiin vaipa chuan a zawt leh a. "Nangmah vang liau liauvin ka mumang hlauhawm tak te kha control dan ka thiam tawh a, aa..ka sawi thiam lo, nangmah vang a ni tawp mai." a han ti a.

VAipa chu a ngawi deuh vang vang a, "Ka la thei lovang...a inthlarhunawm emai." tiin a lo hnar a. Mahse Rsa chuan la turin a hnawn chhen a, a tawp a tawpah chuan a la ve ta. "Ka lawm e, ka lawm takzet." tiin vaipa chu a tap lek lek mai. "Keipawh ka lawm e, ka kalsan phawt mai ang che." tiin Rsa chuan a thelnna hotel lam chu a pan leh ta a.

*************************************

TO BE CONTINUE