BEAUTIFUL NIGHTMARE (MIZO FICTION FANTASY STORY) [Inspired by SuperMe] Written by : Aaron Malsawmdawngzuala CHAPTER - 1

 BEAUTIFUL NIGHTMARE

(MIZO FICTION FANTASY STORY)

[Inspired by SuperMe]

Written by : Aaron Malsawmdawngzuala

CHAPTER - 1

************************

(Fantasy story a nih hi chuan thil thleng thei lo tur chiang sa, kan suangtuahna te, ni thei ta se mak kan tih tur lutuk ho ang chi, khatiang thawnthu kha a ni. Chuvang chuan a hmasa in he thawnthu hi a mak i ti maithei a, a awihawm loh pawh i ti maithei. Fantasy story ah chuan thil thleng thei lo, awihawm loh leh lem tak tak te pawh a leng vek tih hre hmasa ila a tha awm e.)

********************

Lalremsanga chu in lam panin bus ah a haw mek a, a mit bui luk te leh a hmel ngui bar mai en chuan a chau tih a hriat ngawih ngawih. Ni e, Remsanga hi hun rei tak chhung chu a mu mang tawh lo a ni. Tunah hian kum 30-na a hmang mek a, tlangval a la ni bawk. Amah hi mi thatchhe ve tak, ngaihsam em em leh mahni hma hun ngaihtuah lo zet mai hi a ni a.

Zirna lamah chuan pawl 12 chu a pass ve ngei a, mahse a zirzawm peih ta lo a ni. A rawn rawlthar chhoh atangin zu leh drugs lamah a tlan nasa ve em em a, chhungte hlau lo tawp ang chi kha a ni. An chhungkua lah khawsa thei zawk zawk an lo ni bik lo nen, anu leh pate pawh an mangang thei hle.

Chutih lai karin Mizorama sumdawng pakhat, hnamdang vainu chu ala ngaizawng leh ta nghal a. Mak tak maiin chu vainu, Preeti-i lah chuan Remsanga chu a hmangaih phian lehnghal a. Mahse Remsanga chhungte chuan an duh lo hle a, a chhan pawh Preeti-i chu hnamdang a nih vang chu thuhran ni se, an fapa innghahna tlak lo lutuk chu nakinah a la kalsan tho tho an hlauh vang a ni mah zawk.

Preeti-i hi assamese a ni a, sumdawnna avangin Mizoramah in a rawn luah a. Remsanga(Rsa) hian eng tin tin emaw a lo bem thlu ve khiah mai a, Preeti ber lah chuan ala serious em em mai a. REiloteah phei chuan a ta neih tih tih nghal mai a, amah lah a lo khawsa thei angreng bawk nen.

Hun a lo kal zel a, Remsanga pawh a kum a tam ve telh telh a. Mahse hna a nei thei chuang lo, amah pawhin zawn a tum hek lo. Anu leh pa te chuan tihngaihna thlawt an hre tawh lova, a thih hma chu tiin chawm hram hram chu an tum ta tawp ni awm tak a ni. Preeti-i pawh chuan a duh engkim a leisak a, a duh em avang chuan Rsa tan chuan a sum te chu a ui ngai hauh lo.

Preeti haw  a lo hun dawn ta a, Rsa chuan zui ve mai a duh a. Preeti lah chuan a lo welcome nasa mai a, Guwahati ah flat a luah mek thu te, amah chauhva a chen thute chu a hrilh ta zel a. Tichuan Rsa pawh chuan a chhungte bulah chuan Preeti chu neih a dil ta mai a, chutah an pahnih a Guwahati-a indan a duh thu chu ala sawi ta deuh deuh va.

Apa chuan a lo remti awkawng lo mai, inhnial pawh an inhnial nasa khawp mai. Mahse sawi tak ang khan engmah nilo, mi thatchhia Rsa chu a tlawm duh bik hauh lova, a tawp a tawpah chuan apa chuan a duh duh a awm turin a hnawtchhuak ta nge nge a ni. Rsa leh Preeti te chu Guwahati lamah chuan an inzui thla a, Rsa chuan nuam a ti kher mai.

Inneih pawh an innei leh ta lem chuang lova, Preeti flat ah chuan an chengdun a. Rsa chuan a bialnu sum chu a duh tawkin a chen a, mahse Preeti chu a phun ngai lo. Rsa nun chu hlim tak hi a ni ringawt, engmah hna thawh pawh ngai lovin a duh duh a lei a, zu leh ruihtheihthil dang pawh a hniang hnar thei khawp mai.

Mahse a vanneihna chu reilo te ah a rawn tawp ta hmak mai a, apa chu thisen cancer avangin a boral tih thu a hre ta tlat mai. In lama apa ruang rawn hmuh ve takngial pawh chu anu chuan a phal tlat lova, a tui thlar ta hmak a ni. Chutih lai karin buaina dang a tawk leh tlat, chupawh ama thiamloh vang tho a ni.

Preeti office a kal hlan hian Rsa hi nilengin inah a lo awm thin a, a awmloh hlanin enge a tih thin tih reng reng hrelovin Preeti chuan ngaihtha takin a kalsan mai thin. Mahse nikhat chu Preeti chu a haw hma hlauh mai, kawngka chu a lo inkalh loh avang chuan ngawi reng chuan a lut tlang mai a.

Chutah room a lut chiah chu Rsa chuan KS pakhat a lo tawmpui lai chu ava phawk ta a, Preeti thinrim chuan Rsa nena an inkar chu a ti tawp ta nghal a. Chumai duhtawk lovin a hnawtchhuak bawk a, pawisa tlem pe in a flat atang chuan a chhuah tir ta vang vang mai a ni. Tichuan Rsa chuan belh tur dang reng a nei tawh lo, a chhungte chu a be ngam tawh bik der bawk silo.

A pawisa tlem neih chhun chuan in chhe tak mai, slum area ami chu a luah a. Hna thawh tur a zawng kual a, mahse a zei loh em avang leh hnathawk ngai bawk silo chu tuman an chhawr tha peih der lo. PAwisa  anei tlem tulh tulh a, zu chu sawi loh, tui thianghlim in tur tak ngial pawh a nei tawh mang lo.

Eng enge maw inhlawhna tur zawng chuan a chhuak ve ziah thova, a vanneih ni chuan chhe te te chu a hlawhchhuak ve thin. Inluah man lah a pek lohna  rei tawh a, kutdawh chauh a hmabak tawh. Mahse chutah chuan a vanduaina chu ala tawp mai lo, a rilru hah leh beidawng bawk si chuan mumang mak tak a neih tir thin a.

Chu a mumangah chuan apa, thisen cancer avanga thi ta, Pu Rova chu zantin mai chuan a hmu ta ziah mai a. Thah a lo tum ziah thin lehnghal a, an in um vak vak zel a. A tawpah a man ziah a, mahse a thah hma hian a harh chhuak ziah bawk. A reh ve mai dawn maw a ti a, mahse a nasa tulh tulh mai si.

A mumang chu a zan telin a rei telh telh a, Pu Rova chuan a that hman teuh thin khawp mai. Zing a tho hi a sil vek zel a, a ke te pawh tlan tak tak ang maiin a rawl vek zel bawk. A ngaih a tha lo em em a, a hlau thin hle bawk. Sum engmah nei bawk silo chu a ril te a tam thei em em a, eitur tha a eilohna a rei tawh nen, mahni ram pawh nilovah chuan kut a dawh lek lek tawh chu a ni der mai.

A mumang avang chuan mut pawh a mu tha ngam tawh ngai lova, harh renga awm a tum hram hram thin. Chaw a ei mumal ngai loh avang chuan a chau thei em em a, tha pawh a nei tlem tawlh tawlh bawk. Eng tin tin emaw eitur chu a hmu ve zel a, a inchhungte chu a tawpin a rimchhe em em a.

A inluahna neitu lah chuan ba a thing reng bawk a, hnawhchhuah ah a vau reng bawk. A rilru a hah em avang chuan depression pawh a nei nasa em em a, inthah a tum fo tawh bawk. Mahse a rilru dawih lutuk avang chuan a ngam ngai lova, retheihna chu a tuar tlawk tlawk mai a ni. Bus chu a ding a, muang chang chuan a chhuk a.

A inluah chhe te mai awmna lam pan chuan  amelh ngai melh reng chung chuan beidawn hmel zet hian a kal hnak hnak a, a mut a chhuak em em a. Hemi ni pawh hian a inhlawh a, a haw lam busin a haw tihna a nih chu. A thleng tep tih ah chuan mak tak mai hian van chu chhum dum hian a rawn khuh ta khup mai a, khawlai chu a thim khuih mai.

Mak a ti lutuk chu a ding chat a, van lam a hawi chho nghal a. Vanah chuan chhum chu a lo chhah tum mai a, a dum hian a dum khup mai lehnghal. Chutah kawl a phe zuai zuai a, a awmna vel chu a rawn thim telh telh mai. Tichuang hnunglam atang chuan apa, Pu Rova aw ngei mai chuan, "Thatchhe pa...i thu awihloh man chu ila tel zel animaw?" a rawn ti ta mai a.

Rang takin a hawi let vat a, apa chu a lo ding khur mai. Chemte hriam hmel zet hi a keng bawk a, "Thi law law rawh...mi hman tlak loh i nih kha." tiin a vin hrep mai a. Rsa hlau lutuk chu a tlanchhe nghal a, apa chuan a um zui nghal a. A rawn vai thawi thuak thuak zel a, Rsa chu a t(r)e nasa ngang mai.

Tichuan mi inhnuai ah chuan tlanlutin thingzai an dahkhawm karah chuan a biru ta hram a, chutih lai pawh chuan kawl a la phe zawk zawk mai a, khua chu a la dur khup mai. Apa chuan a zawng a, thingzai kar atang chuan a bih thla a. Apa hawi kual lai chu hlau tak hian a en a, a thlan a tla zawih zawih mai.

Mahse thawk leh khatah apa chu a bo ta daih mai a, a kalsawn tawh a nih ringin a thaw huai mai. Chutah a hnung atang chuan apa aw bawk chuan, "Laktlak loh pa, hetah ani awm ilo awm a?" a rawn ti thut mai a, a hlau lutuk chu a au vak a. Rang takin inhnuai atang chuan a tlan chhuak a, lung a rap pial a, a tlu bawk thlawp mai.

Chutah a hma zawn takah chuan apa chu a lo ding khur mai a, "Ka hruai ve dawn che...i thi ve tur a ni." tiin chemte chuan a tin ta mai a, a hlau lutuk chu a mit a hup tawp. Mahse a reh ta vung vung mai, vai tawng ri nuai nuai a hre bawk. Muang chang chuan a kut chu la thla in a han meng a, khua pawh a lo eng tha leh vek tawh.

VAi thenkhat khawlaia kal ho chuan mak tih hmel tak hian an lo en thup mai a, an phun sap sap hlawm mai. Zak angreng tak chung chuan a tho va, van lam chu a han hawi chho leh a. A lo pawl ram mai a, chhum pawh tlemte bak a awm lo. Kawnga a kal lai reng chuan a muhil hman zuai a ni tih a hrethiam ta a, a mangang lutuk chu a tah a chhuak takzet.

*************************

ZAnah chuan Rsa chu a khumah chuan a thu meng kar mai a, a muhil ngam tawh ngang lo a ni. Thila  ei mumal tawh loh avang leh a mut tlem thin em avang chuan a cher em em a, a ruh chu a vunin a tuam a ni ber tawh. Hmuihmul ziahna tur tak ngial pawh a neih loh avang chuan a lu leh a sam chu a buk hian a buk chhup mai a, a vun te chu a dum tulh tulh bawk.

Anu bula ngaihdam dila haw mai chu a duh rilru takzet a, mahse anu chuan a be duh tawh der silo. Tumah hmelhriat a nei lova, hnamdang vek an ni bawk si. A awmna lai ber kher lah chu mizo ho awm tlemna hmun a lo ni bawk si, a mizo pui ngei tawn chu a chak thei hle a, mahse a hmu zo der silo.

Muhil miah lova awm chu a thei bik silo, a hriatloh hlan chuan a lo muthlu leh ta a. Ramhnuaiah hian a lo awm a, sihal u chuah chuah ri hi a hre bawk a. A han meng chiah chu a lo thim mup mai a, a hlau kher mai. "Nilo..harh rawh...harh rawh.." tiin a inbeng vak vak a, mahse engmah awmzia a awm si lo.

Chutah apa nui ri uar uar mai chu a hre leh tan ta, a tap nghal der mai. "Ka pa, min ngaidam hram rawh. Nilo...min that suh, ka duh tawh lo..min ngaidam rawh." tiin a ngen lawm lawm a. Apa lah chu a rawn inlan mai duh lo, ramhnuai chhung khawk rum rum chuan a nui vak vak a. "Ka fapa i ni hi ka zak khawp mai Lalremsang, mi mawl, mi laktlak loh i nih kha i hria em?" a ti chhur chhur mai a.

"Aw ka hria ka pa, ka tihpalh. Hna ka thawk tha tawh ang, hna te ka zawng ve tawh ang. Ka inthlak danglam anga, ka theihtawp ka chhuah tawh ang." tiin a tap hawm hawm mai a. Chutah thingkung kara phe zawk chu a hmu a, a phu nasa kher mai. "Thi tlak i ni...i pa thu hnialin kha vainu kha i zui a ni lawm ni?" tiin apa chuan a rawn vin leh khur khur mai.

"Ka tihpalh ka pa, min kalsan tawh. Tunah chuan tumah ka nei tawh lo, khawngaihin min ngaidam rawh, min tina lo hram rawh." tiin Rsa chuan a ngen leh a. "Ruihtheih thil i thlang zawk a, vawitam ka hauh che pawhin i ngaithla duh ngai lo. Tunah chuan i thih ve a hun tawh, keimah nilovin nangmah zawk hi thi tur i ni." a rawn ti leh ta chhur chhur mai.

Chutah hrepui hriam zet mai hi a thingkung nghen laiah chuan a rawn bur vu mai a, a phu nasa kher mai. A lu a chek fuh lo chiah chiah a, rang takin a tawlh sawn nghal a. Ava hawi phei chu apa chuan hreipui nen chuan a lo nuih vur vur mai, "I thi dawn, thatchhepa...i thi dawn." tiin a khek vak vak mai a.

Rsa hlau lutuk chu a tlan chhe nghal a, tichuan apa chuan hreipui keng chung chuan a um leh ta chiam mai. Rsa chu a chauh em avang chuan a tlan hleithei lova, apa lah chu hah thei lo ang mai hian a tlan chak em em mai bawk si. A hreipui chu a rawn vai leh fua thin a, a chek fuh teuh thei khawp mai.

An in um leh ngat ngat a, chutah Pu Rova chuan a hreipui chu ava vawm ta a. Rsa hnungah chuan a ri thum dawt mai a, vanneihthlak takin a hriam lo lam zawk  a ni hlauh mai. Rsa chu a bawk leh thlawp mai a, rang takin a hnunglam chu a hawi nghal a. A hnungtawlh nghal a, "Nilo, ka pa...ka pa...khawngaihin ti suh." tiin a ngen lawm lawm a.

Apa lah chuan a rawn pan hnai zel a, "Hna thawk peih bawk silo, zu heh si...eitur lah a tui tui i duh lehnghal a, tunah chuan i tawrh ve a hun tawh." tih pah chuan hreipui chu a chhar a. "Ka pa, nilo..ti lul suh." tiin a hmai a hup tawp a. Apa chu a nui vak vak a, hreipui chu a lek kang ta vu mai.

***************************

Rsa chu a harh chhuak leh ta a, a khumah chuan a lo awm a. A hnung chu na a ti kher mai, "Tinge le? Ka mumangah min sawisak ang chiah hian atakah pawh ka na zel mai chu ania, enge maw awmzia le?" tih nuah nuah pah chuan a tho chhuak a, a zi mar al al mai. Beisei bo zet chung chuan a thawmhnaw neichhun chu a han ha leh a, tichuan inhlawhna zawng tur chuan a chhuak leh ta a.

Nileng mai chuan a zawng kual leh a, mahse cheng 50-100 vel bak a hlawh chhuak leh ta chuang lo. A ril a tam em avang chuan chhangthawp leh frooti cheng 10 man chu a lei a, kawngsirah chuan thu in a ei tuam tuam a. A melh ngai chu a melh vung vung a, a mut chu a chhuak leh ta tan khawp mai.

Intih harh a tum hram hram a, a chang leh a inbeng leh vak vak thin. Chutia intih harh tuma a inben leh deuh thuai thuai lai chuan ahma zawna thawmhnaw dawr, lian lutuk lova nula pakhat, khasi nula ni awm tak mai chu ava hmu fuh a. A inbeng lai pawh chu a tawp chat mai, a en ta ngawih ngawih mai a.

Chu nula chu a ngo vur mai a, mahse hmeichhe te lam a ni. A mitmeng chu a fiah kak mai a, a nui sen sen reng bawk. Hmeltha a ti em em a, a thil eilai pawh chu a ngaihsak thei lo hial a. Chu nula chuan a customer te chu tha takin a bia a, Rsa chuan a thlir ngawih ngawih reng mai a, a chilthli a tla lo chauh.

Chutia a thlir reng lai chuan a dawr neitu niawm tak hi a rawn kal a, nula chu vai tawng chuan a vin hrep mai a. Nula chuan a hlauh hmel em em a, ngaihdam a dil nghal mawlh mawlh a. DAWr neitupa chuan a tin uai uai bawk a, Rsa chuan ala thlir reng a. Tichuan dawr neitupa chu a kalsawn a, nula chu a tah a chhuah hmel kher mai.

Tlai lam a nih tawh avang chuan nula pawh chu a indah fel mawlh mawlh a, a inhnit deuh hlap hlap bawk. A thil tih fel pah chuan a mittui chu a hru leh zeuh zel a, a hmel tha in a vun te chu nung sar mahse a incheidan atang chuan mi hausa lutuk chu a ni bik lemlo tih chu a hriat hle thung.

Tichuan dawr chu a khar a, kawng chu a rawn cross a. Rsa chuan a lo la en reng a, alam pan chuan nula chu a lo kal phei a. Rsa chu a rawn en a, ani lah chu a lo phu zuk lehnghal. A lai lek lek a, a han nuih leh hnuhnawh vel a. Chunu pawh chuan a rawn nuih let ve ta mai a, Rsa chu a lawm kher mai.

Mahse a zawn a rawn thleng a, Rsa thutna bula lehkhakhawng bawmah chuan cheng 10 hi a rawn thlak ta mai a. A kal tlang leh nghal daih a, Rsa chu a zak kher mai. Lehkhakhawng bawm pawh chu kawng sira lo awm sa a ni a, kha nula khan kutdawh amaw a ti tihna a nih chu. A zak lutuk chu a tho vat a, cheng 10 chu la in nula chu ava zui a.

Mizo nge a nih a, hnamdang zawk tih a hriat siloh avang chuan, "Hey.." ava ti ringawt a. Chu nula chu a lo hawi let a, "Are you mizo?" a han ti ringawt a. Mahse chu nula chuan mizo a nih loh thu leh khasi zawk a nih thu chu  alo hrilh a. "Ihmaw..kutdawh ka nilo ania. Kha i pawisa hi la let rawh, kawngsirah khan ka lo thu mai mai alawm." tiin Rsa chuan a han hrilh fiah a.

Nula chu a inthiamlo kher mai, "Awi..ka van zak tak. A zialo emai, ka tihpalh aw.." tiin thupha a chawi nghal mawlh mawlh a. Rsa chuan  anuih a, "A ho lutuk..a pawi hleinem. Midang pawn min hai fo thin alawm, mahse kutdawh chu ka ni bik miah lo ania." nelawm tak chuan a han ti leh a.

"Tunge i hming ni a?" tiin nula chuan a zawt a. Rsa chuan a hming hrilhin, "Nang tunge i hming ve?" tiin a zawt let ve a. "Lydia-i ka nia, Guwahati ah hian inhlawhin ka awm a." tiin a lo chhang a. "Anih chu...i fel hle mai." Rsa chuan a han ti ringawt a. Lydia-i chuan Rsa chu a han en vang vang a, "Nang eng ti turin nge hetah i awm a?" tiin a han zawt veleh a.

Inthlahrung tak hian, "Ihh..hna ka zawng a." a ti zawi sap mai. "E anih chu...enghna nge i zawn a, i hmu tawh em?" tiin a lo zawt veleh a. Rsa chuan hreh hmel tak hian, "La hmu lo." a ti chuai raih mai. "Anih Rs, ka kal phawt ange aw.." tiin Lydia-i chuan a kalsan a, Rsa chuan chhan pawh  a chhanglet tawh lo.

Tichuan a in lam pan chuan a haw leh ta a, pawisa a ui em avang chuan bus pawhin a haw ngam tawh lo. Ke chuan a haw ta ngat ngat a, a hah lehpek hle mai. In a thlen chuan khumah a bawk thlawp a, a thawi huai mai. A maimitchhing vang vang a, apa nui ri a hre thut mai chu a thu chhuak rang kher mai.

"Nilo..ka muhil lo..ka harh, ka harh..ka muhil lo." tiin a inbe nghal mawlh mawlh a, a hmai chu a beng vak vak a. A han thaw leh huai a, engmah thil danglam a lo awm lo chu a lawm ngei mai. A inbual khat em avang chuan amah chu a rimchhe em em bawk a, mahse a tawrh a ngai bawk si.

***************************

A inluahna atang hian tuikhur hi a hla lutuk lova, mahse chhoh leh lampang a thui thin em avang chuan inbual tura chhuk chu a thulh leh thin a ni. Mahse chumi tlai chuan ama chu amah pawh chuan a tuar thei ngang tawh lova, tichuan a bucket neichhun leh tuisuah no chu la in tuikhur lam pan chuan a chhuk thla ta hnak hnak a.

Rei fe a chhuk hnu chuan a thleng a, vaipa pahnih hi an lo insu mek a. Tichuan be lem chuang lo chuan a inphelh mawlh mawlh a, sahbawn takngial pawh a nei lo. A sira insuk sahbawn hman ban lo awm chu a hmang ta tawp a, "Inbual harh ila...ka muhil lo mai ang." tiin a inbe mawlh mawlh a.

Tui chuan a inleih a, a hahdam sawng sawng mai. Chutia a inbual lai chuan nichin lawka a bula vai pahnih te kha a hmu zo ta reng reng lo mai a, a hawi kual vak vak hnu pawh chuan an awm ta reng reng lo mai. Chutah tuikhur atang chuan apa nui ri chu a hre leh ta, "Nilo..ka harh...ka harh reng alawm..ngati nge chu thawm chu ka hriat?" tiin a tap nghal pur mai.

Chutah le, tuikhur atang chuan apa chu a rawn chhuak ta mai a. "LAktlak loh pa, inbual takngial pawh i phu lo. Tikha rimchhe tak khan awm la, i inhmeh tawk chauh." tiin a rawn vin leh ta vak vak mai. Rsa hlau lutuk chu tlanchhiat a tum a, mahse sahbawn chu rap pialin tukhum vaw chawrh chuan a tlu a.

A lu chu na a ti kher mai, a hai chhawk lehnghal. "Ana...ana lutuk." tih bak a sawi thei lo, a khawhmuh te chu  athim nghal rup mai. Mahse a pa chu a lo lang leh thut a, "THo rawh...thahtchhepa..ka that dawn che." tiin a samah chuan a kek tho lawp a, tuikhurah chuan  a hnim tak mai a nih chu.

Rsa chu a tal vak vak a, theitawp chuan tal chhuah a tum a. Mahse apa chuan a man nghet lutuk tlat, "I pa hi chu tlangval lai atanga hna thawk thang ka nih hi i hria em? Nang ve kha...hna pawh thawk ngai lo, min hneh hi ring reng reng suh." tiin a nuihsawh vak vak lehnghal a.

Rsa thaw chu a chham dawn takngial, a hnarah te, a ka chhungah te chuan tui chu a lut ta a. A thaw thei ta lo, tui chu a hak tan ta. Mahse mak tak maiin apa chu a bo leh thut a, rang takin tui atang chuan a chhuak vat a. Leiah chuan a bawk leh thlawp mai a, tui chu a hak bawrh bawrh mai.

A khuh vak vak a, a mit a han meng chu engkim a lo pangngai leh vek tawh. A bula vai pahnih te pawh kha an lo la awm reng a, mak tih hmel deuh hian an lo en dun hu mai. Hlauh hmel tak hian an mahni tawng chuan an inbe dun mawlh mawlh a, chutah rang zet hian an thawmhnaw leh thildang chu la in an la tlanchhe daih zui.

**************************

Zan a lo ni a, tlai chaw eitur a neih loh avang chuan Rsa chu a ril a tam kher mai. Nepnawi vel mai mai ei tur pawhin a leina tur pawisa a nei der mai silo, a pum chu a ri ruih ruih reng mai.A tukhum chu na  a ti em em a, a han khawih chhin chu a lo la vung zui. "Tinge hetia ka awm? Tinge hetiang thil hi ka chungah a thlen bik?" tiin a tap ringawt mai.

A mut a chhuak bawk si, a muhil ngam si lo.  A ril a tam takzet, mahse eitur engmah a nei bawk silo. A neih chhun, tui thianghlim tak ni lemlo chu a in a in ringawt mai a. A taksa a chauhvin tha a nei tlem tawh em em mai a, inthah mai chu a tum leh ut ut tawh. Eng ang pawhin harh reng tum mahse, a tawp a tawpah chuan a lo muthlu leh ta nge nge a.

Mahse mak tak maiin tun tum chu convinient store ah a lo awm tlat mai, eitur dahna lane ah chuan a lo ding reng mai a. A han hawi kual a, apa chu a awm hnai em tih a zawng nghal vat a. Mahse a hmu mai lo tlat, dawr chhungah chuan mi 4-5 vel an lo awm ve bawk. An thil lei tur te chu an lo en kual hlawm a, Rsa chu hmu awm pawhin an lang lo.

A ril a tam tawh bawk nen, chutia chips chi hrang hrang a han hmu chu a chil a put nghal hle mai. Mahse han ei ngawt dawn se CCTV a invuah fur mai bawk si, a pum chu a rawn ri leh ruih ruih a. A tawp a tawpah chuan, "Ummm..mumang mai mai a ni tho." tiin apple pakhat chu a la a, a keih hmawk mai.

Tui ti tak chuan a ei chhunzawm zel a, chutia hun rei tak chhung a ei tawh loh, apple fresh tha tak mai a han ei ta mai chu tui a ti vawng vawng kher mai, reiloteah chuan a ei zo vat a. A dang chu la leh nghalin a han keih leh hmawk hmawk a, chutah security guard pakhat hi a lo kal a. A tiang kenlai chuan Rsa chawnah chuan a rawn hlap pawp mai a, "Engvangin nge i lo ei ve rikngawt a?" tiin a rawn hau hrep mai.

Rsa chu a thingthi nghal a, scurity guard mizo tawnga a rawn tawng chu mak a ti takzet. Chutah apa aw ala ang em em zui, rang takin a hawilet nghal a. Mak a ti kher mai, chu security guard chu apa bawk a lo ni. Security guard form a lo ha a, "I ei duh te chuan hna thawk la, lei ve mai ta che." tiin a hau leh tan ta.

Rsa chu a tlan chhe leh nghal a, apa chuan a um leh ta ngat ngat mai. Tlan chhiat pah chuan dawr chhung bungraw hrang hrang chu la in apa vawm nan chuan a hmang a, thil zawrh lai ho chu a tlu ta rem rum mai. An in um zel a, dawr chhung a zau thawkhat bawk nen, blanket ah dahna phenah chuan a biru thei ta a.

Apa chuan zawng kualin, "Ka man tho tho ang che...lo chhuak vat mai rawh. Anih loh chuan ka vaw hlum dawn che ania, thatchhepa." a ti khur khur reng mai a, a phen atang chuan Rsa chuan a en thla reng a. Chutah a zawna elevator lo inhawng chu ava hmu a, a chhung atang chuan mi pathum vel hi an rawn chhuak a.

An kal liam hnu pawh chuan elevator chu ala in hawng reng mai, Rsa chuan va pan a tum ta a. Apa chu ava bih thla leh a, alo la zawng kual nasa mai. Chu chu remchangah la in ava tlan thut a, elevator lam chu ava pan ta. A chhungah chuan a lut a, ground floor button chu a hmet nghal a.

Mahse a in khar thei ta reng reng lo mai, a hmeh vak vak hnu pawh chuan a inkhar thei reng reng lo mai a. Chutah apa chuan a rawn hmu ta, a rawn tlan phei ta mai. Tlanchhuah leh dawn chuan a man hman ngei dawn bawk si, mahse elevator kawngkhat chu a inkhar thei reng reng bawk silo.

A mangang kher mai, "Nilo..khawngaihin..khawngaihin inkhar hram teh..." tiin a thlan a tlan zawih zawih mai a, chutah apa chu lo hnai zelin a tiang chuan rawn vawm a, a hnarah tak ala vawm fuh zui. A thi nghal zawih zawih a, mahse tiang chu hum nghet sauh sauh chung chuan apa lo tlan phei chu a lo tin ran mai.

A rawn thleng dawn tihah chuan tiang chu a han lek kang a, mahse a awmna lift chhuah chu a rawn keh thut mai. Chutah chhuat chu a tla ta daih mai a, Rsa pawh chu a tiang hum reng chung chuan a tla thla ta. Apa lah chuan a nui tiah tiah lehnghal a, Rsa chu a t(r)e thla vawn vawn mai.

***********************

A harh chiah chu a lo au chhuak tak tak a, khum atang chuan a let thla tawp mai. A thaw nghal hrawk hrawk a, "Nilo...a ninawm zozai emai, ka peih tawh lo." tiin a tap zui nghal a, Mahse engemaw hum a nei tlat mai, mak ti tak chuan a thu chhuak a. A thil hum a han en chu a meng phawk nasa kher mai, apa in a mumanga a vawmna, guard tiang chu a lo la hum reng mai.

Mak ti tak chuan a en reng a, "Ehe...hei hi, engtin nge ka kawl theih?" tiin a inzawt mawlh mawlh a, mak a ti kher mai. Tiang chu a han en chiang a, mi themthaim takin uluk taka a siam tih a hriat em em a, a tle deuh sar bawk. A hrilhhai em em a, chet mai nachang pawh a hre lawk lo.

A khum bulah dawhkan chungah chuan a dah a, "Enge awmzia? Khawi atangin emaw ka la zawk em mawnile? Engtin nge hetah a awm tak tak theih?" tiin a inbe mual mual a. Mahse khawi atang maha chu guard tiang a lak chu a hre bawk silo, a en deuh ngawih ngawih ringawt mai a.

A phone lah a hralh daih tawh avang chuan dar zat enna tur sana pawh a nei lo, mahse tukverh a ahan dah chhuah chuan ala hma hle tih chu a hria. Zing boruak thianghlim dawn tur a awm tak mialin tiin a chhuak a, kawhlaiah chuan mi pawh an lo la tlem hle mai. Rsa in luahna lai hi thingthlang a ni a, sawi tawh ang khan slum area bul deuh lawk a ni kan tih tawh kha.

A tiang chu kengchhuak in a han tei kual mai mai a, a rilru ah chuan zawhna hlir chu ala awm a. Chutih lai chuan vaipa pakhat, hmuihmul sei deuh nei hian cycle hi a rawn khalha, Rsa zawnah chuan a rawn ding chat mai. Rsa hian a bo lo tawk velin Hindi a thiam ve a, mahse Assamese tawng erawh chu a thiam lo thung.

VAipa chuan assamese tawng chuan a bia a, mahse a thiam loh thu leh Hindi tlem azawng a thiam thu chuan a lo chhang a. Vaipa chuan Hindi chuan a be ta a, "Khami tiang kha khawia i neih nge?" tiin a zawt a. "Ihh..englo, ka pa min pek a nih hi." tiin a chhang ta ringawt a. Vaipa chuan a en vang vanga , "Ka lo leichhawng teh ang." a ti ta mai a.

Rsa chuan tiang chu a han en vang vanga, a tan hman tangkaina vak tur a awm lo tih chu a hria. A ngawi vang vang a, "Engzatin nge i lei anga?" tiin a han zawt ve leh phawt a. "Cheng 2000 in i phal em?" a ti ta mai a. Rsa chu a phur kher mai, mahse a aia chhiar to chu a duh ve ta tlat a. "Cheng 2500 lo chuan ka phal lo." a ti ve ta ngat a.

"Um..pawilo, ka lo lei ang..tunah a pawi em?"

"Tunah pawisa i nei ami?"

"Nei e, ka lo lei nghal ang."

"Awle..pawisa chu min pe phawt la."

Vaipa chuan cheng 2500 chu a phawrh a, "Kha le.." tiin a pe a. Tifuh inti tak chuan Rsa chuan tiang chu a pe a, pawisa chu a la a. A haw pah chuan eitur eng eng emaw a lei haw nghal a, tichuan second hand lane ah thawmhnaw cheng 30-50 man vel lek lek chu a lei haw nghal nual bawk.

Hmul ziahna te leiin a khabe hmul buk chhup maite chu a han met fai a, hazam panin a lu a meh tir bawk. A han inmeh fai tak vurah chuan a hmel pawh chu a danglam ta hle a, amah pawh ahma ai chuan a lang thar ve vuk mai. Mahse 2500 lek chu ani inrenthiam lo tihtakah chawhma chhung lek chuan a hmang zo leh ta vek mai a, a khumah chuan thu in hun rei tak chhung a zuk tawh loh, meizial chu a zu khu hlat hlat a.

******************************

TO BE CONTINUE