GINA (MIZO FICTION RELIGIOUS HORROR STORY) WARNING - 18+ Written by : Aaron Malsawmdawngzuala CHAPTER - 6 LAST

 GINA

(MIZO  FICTION RELIGIOUS HORROR STORY)

WARNING - 18+

Written by : Aaron Malsawmdawngzuala

CHAPTER - 6

LAST

*********************

DAmdawiin Chaplain, Pu Nghaka chu a room ah thu in tukverh lam chu a hawi vauh vauh a. A hma zan lawka a thil tawn chuan a la ti thlabar hle a, a ngaihtuahna a kal thui khawp mai. A tei kual a tei kual a, "Chhuah thawven ka ngai a nih hi." tiin a motor chahbi chu a la a, tichuan kalna tur ber pawh hre lo chuan a in khalh chhuak ta tawp a.

A tlan kual hrep hnu chuan DAmdawiin lamah chuan a kal leh ta a, Hospotal Biak In chhungah chuan a lut a. Pulpit hmaah chuan thingthi in a tawngtai a, Gina-i tan a dil sak bawk. Tichuan a tawng tai zo chu a meng a, chhuah leh a tum chiah chu thawm a hre ta tlat mai, chupawh pulpit atanga rawn ri chhuak a ni.

Rang takin a hawi let nghal a, mahse engmah a hmu lo. Tichuan kal leh mai a han tum a, a ngaite ang bawk chuan thawm a hre leh ta. Cross lo intar chu a en vang vanga , a che det det hian a hria a. Muang chang chuan ava pan hnai leh a, cross chu a che nasa tulh tulh mai. Mak ti tak chuan a en tlawk tlawk ringawt a, chutah cross chu a letling zawng hian a rawn awm ta thut mai a nih chu.

A hlau lutuk chu a phu dawrh thei hial a, chutah mipui ri nuai nuai thawm ang tak hi a hre chhunzawm leh a. biakin sir, tukverh leh lam ve ve a han hawi chu mak a ti kher mai. Tukverh zawnah chuan kawr fual sen ha, hmel pawh nei mumal lo tamtak hi an lo ding tlar thap mai. Mit, hnar, hmui leh beng engmah an nei lo, an hmai chu a mam thla purh vek mai.

Pu Nghaka chuan a hlau ve ta, rang tak chuan a inher vat a, kawngka pui lam pan chuan a tlan phei a. Mahse a thlen dawn tep ah chuan kawngka pui chu a mah hian a rawn inkhar ta hmak mai. Kawngka chu hawn tumin a sawi vak vak a, mahse chet pawh a che eih lo. Chutah hmeichhe tap ri ruih ruih mai chu a hre leh ta a, a hlau tawh ngang mai.

Chung hmai neilo ho lah chu an ri mur mur a, a then chu ventilation atang te chuan an rawn lut a. Pu Nghaka chuan pulpit lam ava en a, a thil hmuh chuan a va ti phu chiang kher em. Pitar vun dang vek mai, hmelchhe zet mai hian a lo melh khur mai a nih chu. Chuveleh hmai neilo ho chu an rawn lut kim ta, pu Nghaka chu an hual thup mai.

Chu pitar chuan ava pan phei ta mai a, chutih lai chuan hmai neilo ho chu an thingthi thap a, an kun ngal hlawm mai. Pitar lah chu a kal thui zel a, a lian tulh tulh a, a sang tulh tulh bawk. Pu Nghaka chuan tlanchhiatna tur reng a nei tawh lo, a ding khur tlawk tlawk ringawt tawh a. A bul a thlen meuh chuan chu pitar chu mihring pian pawh a ni tawh hauh lo, ramhuai lian leh sang tak ang mai hian a ding run mai.

A huaisenna zawng zawng sawm khawmin Pu Nghaka chuan chu ramhuai chu a han melh a, "Hei hi PAthian in a ni a, i awm vena tur a nilo." a ti hman tawk, chu ramhuai chuan Pu Nghaka chu a rek ta chiam mai a. Chuveleh hmai neilo ho chu an phu nghal mur mur a, an bengchheng hlawm kher mai.

Ramhuai chuan Pu Ngahka chu a rek na tulh tulh lehnghal a, a hmai chu a sen vek tawh. Biak In chhung chu a khawk hian a khawk rum rum tawh mai a, chung hmai neilo ho chu Biak In chhung ah chuan an sapa tal chiam hlawm mai. Ramhuai chuan chhuatah chuan a bawh tlu a, a aia na chuan a rek leh ta vak mai.

Chutih lai chuan damdawiin sweeper pakhat chuan Chapel chu a rawn kal pel a, mahse a ding chat a. A han en chian chuan kawngka tlem lo inhawng chu a hmu a, "Ehe, tunge lut le? Chowkidar hian a kalh theihnghilh tihna em ni?" tiin a inzawt nuah nuah a. Ava pan hnaia, kawngka chu a hawng a.

A phu zuk mai, "Nilo..Pu Nghak." tiin a tlan lut nghal a. Pu Ngahka chu chhuatah chuan a lo let reng mai, sweeper chuan a sawi vak vaka . "Pu Nghak..i harh em?" tiin a be mawlh mawlh a, mahse Pu Nghaka chuan a chhang thei lo. A vawt vek a, thawk pawh a thaw tawh lo hrim hrim bawk.

*************************

Gina-i te chuan in an thleng a, an han indah fel zung zung a. "Gina, thenawm te ka zu hrilh ve ange aw.." tiin Pi MArovi chuan a chhuahsan a, Gina-i chu Baby bulah chuan kalin choka ah chuan an titi a, an nui dun har har a. Sitting room atang chuan ngawi reng hian Mama chuan a lo en reng a, thingpui a in mek bawk.

Gina-i chuan Mama chu ava melh a, Mama lah chu a lo phu deuh zuk lehnghal. Za lo deuh chuan a nui lui suk a, Gina-i chu a bulah chuan ava thu a. "Min va ngai lo ve a, nang hi..tunlai hi i danglam riau." tiin a han kuah a. "Naa..a awihawm loh emai." tih ringawt chuan a lo chhang a. "E taka, karleh Monday ah hian tihdam rawngbawlna ka nei leh dawn asin." a han ti leh a.

Mama chu a hlauthawng nghal kher mai, "Khawi hmunah?" a lo ti nghat vat a. "A ngaiah, Farkhuh Tlangah tho khan. Khalai hmun kha ka tan chuan a pawimawh takzet a ni." tiin a lo chhang leh a. Inthlahrung tak hian Mama chuan, "Duat, damdawiin atangin i lo chhuak ve chiah bawk sia. Chawl rih la, kan pahnihin hun kan hmang tlem e. Min ngaihsak ve tawh hrih la, please.." a han ti a.

Gina-i chuan a biangah chul sakin, "Ka ngaihsak che alawm, ka hmangaih ber i ni miau va. Mahse tunah rih chuan Pathian faka zai te, lam te leh inkhawm chak ve em em te, damlohna avanga thei velo te hi ka ngaihtuah phawt an ngai alawm. Nangte chu ka pasal tur i nia, damchhungin ka ngaihsak dawn che alawm." tiin a chhang a.

"Chupawh nise, la indim deuh la." Mama chuan a han ti leh hram a. "Duat, Pathian min kohna a nih hi....i lo hnial mai dawn em ni?" tiin Gina-i chuan a zawt let a. Mama chuan a chhang lo, a thaw huai ringawt. Chutih lai chuan kawngka  a rawn ri rak a, "Min va han ti zak ve aw...Lal Gina." tiin Henry-a chu a rawn nui lut huah huah a.

"Enge?" Gina-i chuan a lo ti hu mai. "Damdawiinah ka kal a, mahse inlo chhuak daih tawh sia. Ka zah zia chu...min rawn hrilh ve tur che u alawm." tiin a lo chhang leh a. Gina-i chuan Mama chu a  en a, "I hrilh lo ami?" a han ti a. "Hrilh e, nizanah ka hrilh alawm. MAhse, a lo kal ve dawn tih ka hre hleinem." tiin a lo chhang a.

"Engpawh nise ka va inbual ve tawh ange aw...tikhan lo thu ru." tiin Gina-i chuan bathroom lamah chuan a luhsan ta daih a. "Damdawiinah chuan ilo han chho amaw?" tiin Mama chuan a han zawt veleh a. "Aw..chho e, ka lo chhuk chiah a, ka rawn tlang nghal." tiin a lo chhang a. Mama chu a han hawi kual zeuh zeuh va, "ENteh bro....nizanah Hospital Chaplain khan heart attack a nei thut a, chuan Gina-i'n a ti dam ania." a han ti a.

Chuveleh phawk hru hian Henry-a chuan, "Chaplain maw?" a ti hu mai. "Aw ni e, chaplain..engemaw kan tih angai ania." tiin a lo chhang vat a. "Ngawi teh..ka hmu..Pu Nghaka anilawm ni?" a han ti leh a. "Aw ni e, khawiah maw i hmuh?" tiin Mama chuan a lo zawt leh vat a.

"Aww..damdawiinah aniang chu mawle..Chapel ah a lut lai chiah ka hmu." a ti leh a. "Ehe..keichu ka ngaih atha lo. Thil engemaw thleng dawn ang tlat hian ka hria, engtin nge kan tih ang?" Mama chuan a han ti leh a. "Kan han chho mai dawn em ni, kan chhan thei mial mahna." Henry-a chuan a lo ti ve bawk a.

"Ni e, tunah han kal nghal ang."

"Mahse Mama, Gina-i hrilh ve phawt ila."

"A ngai lo, min ringhlel ang. SAw..Baby saw hrilh mai ang, chhuanlam kan siam mai dawnnia." tiin choka a hmun lo phiat mek, Baby chu Mama chuan a kawk a. An pahnih chuan an va kal ta a, "Baby..kal lawk na tur kan nei a. Zanah kan lo leng dawnnia, i u lo hrilh mai rawh aw.." Henry-a chuan a han ti a.

"Awle." tiin Baby chuan a lo chhang mai a, tichuan kawngka lam pan chuan an kal ta a. An thlen dawn tep ah chuan an ding dun chat mai, kawngka bulah chuan Gina-i chu bath-rope ha in a lo ding reng mai. "Ehe Duat, engtik laiin nge ilo chhuah leh hman a?" tiin Mama chuan a han zawt a. Mahse Gina-i chuan an pahnih chuan a han melh khur a, "Khawnge in kal dawn?" a ti hlur mai.

Mama tihngaihna hrelo, hlau rilru deuh bawk si chuan Henry-a chu a nghawk zauh va, "Sawi ta che." a han ti ringawt a. Henry-a chuan sawi tur a hre mai bik lo, "Ih...thil print angai a, min lo kalpui se ka ti mawle.." tiin dawt a sawi ta ringawt a. Gina-i lah chuan, "Nangmahin i kal thei ve mai lo em ni?" a lo ti leh hmuk mai.

"Duat, ka va kal pui lawk ang. Zanah ka lo leng anga, thil te te ka lo ken ang che." tiin a han nuih tlawn vel a. Chutah Gina-i chuan Mama chu ava pan hnai a, "Engthil emaw chu thup i nei tiraw, Mam?" a ti ta mai a. Mama chu a zam kher mai, "Eng..engmaw? A awihawm loh, engmah ka thup lo." a ti bah nuai mai.

Mahse Gina-i chu a khi suk a, "Tu emaw hmeichhe dang star i nei anilo maw?" a ti ta daih mai. An thiandun chuan an thaw huai a, "Nei lo..i ti awm ang lo emai." tiin Mama chu za lo tak chuan a han nui lui leh vel a. "Umm...va kal phawt mai teh u. Zanah chuan lo leng ang che aw, Mama.." tiin a thlah liam dun thei ta hram a.

**********************

REilo teah chuan DAmdawiin chu an thleng a, Chapel lam pan chuan an tlan dun nghal a. Mahse an va thlen meuh chuan CHapel bulah chuan mipui an lo tam ngei mai, Mama te thiandun chu an hrilhhai kher mai. Chutah Pu Nghaka ruang chu an rawn zawn chhuak ta mai a, Henry-a leh Mama chu an inmelh hu ringawt.

Mipui zinga lo ding ve pakhat bulah chuan, "Engati nge a?" tiin Mama chuan a han zawt a. "Heart Attack bawk anih hmel, a chahthlakna a la rei lo an ti bawk." tiin a lo chhang a. Pawi ti tak chuan an let leh a, "Kan tlai a ni...avan pawi tak." Mama chuan a ti vawng vawng mai. "Ehe..tlai a ni ta der mai. MAma..FAther kha va hmu ang." Henry-a chuan a han ti a.

"Nia, a tha alawm." tiin a lo chhang a, an va kal ta a. REiloteah chuan an thleng a, "In va rei ve, ka lo nghak char char che u asin." Father chuan a lo ti a. "Nia, Father, sawi tur a tam.." Mama chuan a lo ti ve bawk a. "Um thu ula, han sawi teh u." tiin Father chuan a lo chhang a, an thukhawm ta a.

"Nichin lawk khan damdawiin chaplain a thi." Mama chuan a han ti a, Father chu a meng phawk nasa ngei mai. "Chaplain maw...engvang nge?" tiin a zawt a. "Nizanah heart attack vangin a thi tep a ni awm a, Gina-i'n a ti dam a...tukinah Gina-i'n min hrilh leh a, Biak In chhung ngeiah a thi a nih hmel." tiin a chhang leh a.

"A chak em a ni, he thlarau sual hi. Aradia hi dawithiam chak tak a ni tihna pawh a nilo, witchball chhunga a thlarau man ber hi sawi tak ang khan Celtic PAthian, thihna Pathian a ni miau va. Biak In chhung ngeiah pawh a awm thei ania, a rapthlak hle mai." FAther chuan a han ti nuah nuah a.

"E chuan maw..FAther, Gina-i chuan karleh Monday ah tihdam rawngbawlna inkhawm neih leh a tum a, mipui pawh sawm hnem a tum hmel khawp mai." MAma bawk chuan a han ti leh a. Chutah Father chu a hlauthawng ta hle mai, "Ehe...a chi dawn loh tawp mai." a han ti vang vang a. "Ngati nge, Father?" tiin Henry-a chuan a lo zawt vat.

Father chu a ngawi vang vang a, "Gina-i tihdam te zingah, tu tunge in hriatchian zingah thi tawh?" tiin a han zawt phawt a. "A hmasa berah chuan taxi driver kha ania, chuan Te-i a ni leh a, chuan tunah Chaplain hi a ni leh mai." tiin Mama chuan a lo chhang a. "Pathum chauh chu maw?" tiin a lo zawt leh a.

"Aw...chumite pathum chauh chu..ka hriat chian ho chu, midang an thih awm ka hre lo." tiin Mama chuan a lo chhang leh a. Chutah Henry-a chuan phawk hru hian Mama chu a melh a, "Ehe, pathum chauh an ni tak tak. Lehkhabu ah kha chuan a tihdam apiangte chu reilote hnuah an thi zel kha a ni a, mahse tihdam tamtak a nei a, apa pawh a tel a. Mahse, pathum chiah an thi." a ti nuah nuah mai.

"Rin dan ka nei, ka rin dik ngei pawh ka beisei." Father chuan a lo ti leh a. "Enge i rin dan chu ni a?" tiin Mama chuan a lo zawt leh vat a. "SAwi tak ang khan tuna in thiannu Gina-i anga in ngaih saw Gina-i nilovin, a taksa Aradia thlarauvin a hmang ka tih tawh kha. Aradia-i hian chu tihdam rawngbawlna ah chuan a tam thei ang ber tihdama, chumite chu a ruala thah vek a tum tihna a ni thei." a ti ta mai a.

"Father, enge kan tih ang? Engtin nge kan tih dawn?" tiin Mama chuan  a han zawt leh a. Father chu a ngawi vang vang a, a sawi hreh hmel hle mai. A thaw deuh hak a, "Exorcism kan perform mai angai dawn a ni." a ti ta mai a. "Ex..exorcism a? Chu chu...chu chu ramhuai hnawhchhuah ang kha em ni?" tiin Henry-a chuan a lo zawt veleh a.

"Aw ni e." tiin a lo chhang a. "Video ah te pawh ka lo hmu a, i ti ve thin tiraw? A theih mai ang tiraw?" Henry-a chuan a lo ti leh a. ZAwi sap hian Father chuan, "Ka huphurh a ni...a hautak bawk. He CEltic Thihna PAthian hi a chak em em a, kan hneh angem ka sawi thei lo. Kan chak loh theina chance a tam zawk, chutiang khawpa thlarau sual chak chu a ni." tiin a chhang a.

Mama chu a mittui a tla nghal der mai, "Father, ka nunna hi a hlan mai theih em?" a han ti tham tiak a. Thinrim tak hian Henry-a chuan, "I mawl ami? Chutiang rawn sawi suh." tiin a vin hrep mai. "MAhse Gina-i hi kan chhanchhuak thei a nih chuan engkim a tawp vek ang, witch ball pawh hi Gina-i thlah kal zel teh kum 138 hnuah lo chhar ve leh pawh nise, hna a thawk thei tawh lovang." Father chuan a han ti leh a.

"Enge awmzia?" tiin Mama chuan a lo zawt nghal a. "Kan sawifiah ange...He ball neitu hmasa ber Aradia kha hal hlum a ni a, tichuan a thlarau chu a thlah kal zel te kawchhungah a lut zel ta a. Mahse tumah kha an kawchhung atang khan Aradia-i kha hnawh chhuah a nilo, a awmzia chu Aradia-i hian mihring damlai taksa ve tho a mamawh a, a taksa hman te kha an thi a nih chuan kum 138 chhung a nghak leh mai thin. Mahse Gina-i hi kan chhanchhuak a nih chuan Aradia thlarau kha kan man ve thei tawh dawn thung a, ball chhungah chuan dahin lo chhuak leh thei tawh lo turin thu ka pe dawn a ni." a han ti charh charh a.

"Anih chuan...Aradia chu ball chhungah chuan a tang hlen tawh dawn tihna em ni?" tiin Henry-a chuan a lo zawt veleh a. "Aw...mahse beih chu a hautak ve fu ang. Tin, Gina-i hi Aradia thlahte zinga a hnuhnung ber a ni a, Aradia-i neihchhun tak meuh meuh a ni. Chuvang chuan Gina-i hi kan chhanchhuah angai, Aradia hi kan thangah kan awh tir angai a ni." tiin a chhang leh a.

Mittui tla zawih zawih chung hian Mama chuan, "Father, min pui hram rawh. Ka hmangaih ber a ni asin, khawngaihin min pui rawh." tiin a ngen lawm lawm a. Father chuan phur lo tih hriat tak hian, "Awle, kan tum dawnnia." tiin a chhang ta a. Tichuan chumi zana chet chhuah nghal chu an tum a, plan an siam ta a.

*************************

Zan a lo ni a, Gina-i te inah chuan Mama chu ava leng ta ngei a, an chhungkua pawh an lo awm kim thap mai. An titi khawm a, an nui leh dar dar hlawm a. Mahse Pu Ringa erawh office toilet a a thil hmuh avang chuan a ngaih ala tha zan lova, a tawng tlem hle bawk. An biak pawh chuan a rul tawk lek bakin a chhang lova, mahse a awmdanah chuan a tilang em em lo thung.

Mama chuan a aw a han thian kharh kharh a, "E taka...zakthei lo min ti viau maithei a. Catholic Father pakhatin Gina-i hi hmuh a dun a, a chanchin te a lo hria a, a ngaisang lutuk a." a han ti a, Gina-i chuan mak a tih hmel kher mai. "Father a? Khawi ami? Tunge a hming?" a lo ti nghal vat a.

"Adam West." tiin a lo chhang a. "E...veng thenawma Catholic School-a an Father saw em ni?" tiin Pu Ringa chuan a lo zawt ve bawk a. "Aw ni e, Gina-i hi a ngaisang lutuk a." Mama chuan a lo ti leh a. Gina-i ngaihdan chu a nih loh hmel kher mai, mahse a nu leh pa erawh an phur angreng hle a.

"Awi..kan fanu chu kohhran dang te pawhin an lo ngaisang anih chu...PAthian malsawmna hi kan dawng mawlh mawlh mai anih hi, tunlai chu." tiin Pi Marovi chu a hlim kher mai. Mama chuan inthlahrung tak hian, "Zak theilo pawh min ti maithei a, zanina lo leng lut ve tur hian ka sawm nghe nghe asin." a han ti leh a.

Gina-i chu a sa phat mai, mahse a tawngchhuah hma chuan door bell a rawn ri a. "Chu chu a ni tawh ngei ang." tiin phur tak chuan Mama chuan ava hawng a, a chetdan chu Pu Ringa te nupa chuan mak an ti angreng hle bawk. Father Adam chu a rawn lut ta, Gina-i chu a rawn melh hmasa ber a.

"Good Evening, Father..." tiin Gina-i chuan a lo nuih sen sen mai. "Good Evening, Gina...a taka ka hmu thei che chu ka lawm hle mai." tiin Father chuan a chibai a. Gina-i chuan Adam-a chu a chhungte a han hmelhriat tir a, "Hawh u..choka lamah sawn va inkawm ang u." tiin Mama chuan Gina-i leh FAther chu a hruai phei a.

Father chuan tihdam theihna a neih tan dan te chu a zawt a, tha tak chuan Gina-i chuan a chhang ve zel bawk. Chutah Father chuan Mama chu a han signal zeuh va, Mama pawh a lo bu nghat mai. Gina-i chu a han en a, "Eng Bible changin nge hneh deuh ber che..ka sawi awmzia chu, eng bung leh chang nge i duh ber?" tiin a han zawt a.

Gina-i chu a nui tawi ta tak mai, "Aaa..ihh, ka duh vek, Pathian thu vek ania..duh bik pawh ka nei lo." a ti ta ringawt mai a. "SAm number 23, chang khat atanga chang 4...Lalpa chu min vêngtu a ni a, ka tlachham lo vang. Ani chuan hlobet hring dup hmunahte min chawlhtîr a, chawlhna tui kamahte chuan min hruai ṭhîn. Ka nun a tiharh thar leh a, a hming avângin kawng dikah min kalpui ṭhîn. A ni, thihna hlim kawrruam zawh mah ila, ka hlau lo vang, nangin min awmpui si a, i talhtum leh i vêntiangin min thlamuan ṭhîn...kei chu hei hi ka chang duh ber ania, ka beidawn leh mangan chang pawh a min hnemtu ber a ni." Father chuan a han ti leh a.

Za lo tak chuan Gina-i chu a nui lui sak a, "Keipawh a nia lawm, ka duh lutuk alawm." tiin a lo chhang ve leh mai a. Father chu a han thu tha leh sauh sauh va, "Anih leh maw, eng bung leh chang nge ka hre ta mai lo....'Huai takin ṭang rawh ka tih che kha hre reng rawh, hlau suh la, zâm hek suh; kei, Lalpa hian i kalna apiangah ka awmpui zêl che a ni,' a ti a....tih kha eng bung leh chang nge khah?" tiin a zawt a.

Gina-i chu a tum ta hmak mai, "Engvangin nge min zawh kher a?" a ti ta hmuk mai a. Father lah chuan zaidam tak hian, "Aww..PAthian mi hman tak i ni a, Bible pawh i chhiar fo ang chu.." a lo ti sam et mai. Gina-i chuan Mama chu a en a, "He Father hi engvanga rawn hruai nge i nih? Engvangin nge hetia thil min zawh vak vak a?" a ti khur khur mai.

Mama lah chuan, "Aww...chhang mai la, a harsa viau ami?" a lo ti daih mai. Gina-i chu thinrim tak hian a ding a, "Min fiah i tum em ni? Mawhh..min ringhlel em ni?" tiin Father chu a vin ta hrep hrep mai. Sap tawng thiam ve lo, Pi Marovi te nupa chuan mak an ti kher mai. Choka lamah chuan an va phei ve a, "Ngati nge, in aw key ava ring ve?" tiin a rawn zawt a.

Mama chu a nui suk a, "Engmah buaina a awm lo, Nu Maro..hei Father hian Bible chang a zawt mai chauh ania, mahse Gina-i hian engmah a hre lo chu a nih hmel hle mai." mei nei tak chuan a han ti deuh kher a. Father chu a ding a, "Ngati nge Gina? Pathian mi hman i ni anilawm ni? Ngati nge Bible chungchang sawi vang maia i thinrim chiam a?" tiin a zawt veleh a.

Gina-i chu a sa tawh khawp mai, "Min hmu duh anih chuan tha tak khan min titi pui mai rawh, khatia min fiah vel kha a ngailo." a ti leh hrep mai a. Mama chuan Gina-i chu a en vang vang a, "Gina, i thiltihtheihna hi Pathian atanga chhuak a ni tak tak amaw?" tiin a zawt a. Gina-i chu a thinrim kher mai, "Mama..nang pawh hian min lo ringhlel amaw?" tiin rum tak chuan a melh a.

"Ringhlel love...a nilo tih ka hria alawm." tiin a lo chhang let a. Pu Ringa chu lo inrawlh vatin, "Mama..enge maw i tih le? Chuan he Father hian enge a duh a? Nang hian kan fanu, i hmangaih em em hi i ringhlel tihna em ni?" a rawn ti vin ve ta thak mai. "In hrethiam lo a ni, PA Ring. Zanin hian thudik engkim kan puangchhuak vek dawn, henu hi Gina-i  anilo. Dawithiam pitar, Aradia  anih hi." tiin Gina-i chu a kawk a.

Gina-i chuan a melh hraw a, "Malsawmtluang...engmaw i sawi a? I nupui tur angin ka lo inngai ve a, mahse nang chuan dawithiam pitar, ramhuai angah maw min lo ngaih a?" a ti khur khur mai. Mama chuan ava pan hnai a, "Kha i th(r)i kha min lo pe rawh...kha kha i dawi thil ber pawh a ni ani lawm ni?" a ti ve sak sak mai.

Pi Marovi ngaihdan a ni ta lo, "A tawk e...chhuak rawh u. Mama..he Father nen hian chhuak nghal rawh u. Anih loh chuan police ka ko dawn ania, buaina kan duh lo." a ti ta hmak mai. Mahse kawngka chu a rawn ri rak a, Zuali leh Henry-a an lo lang hlawl mai. "Tumah khawiah mah in kal lovang, zanin hian engkim a tawp vek ang." Henry-a chuan a rawn ti lut a.

Gina-i chuan Zuali chu enin, "Zuali, nangpawh maw?" a ti hu mai. "Henry-a hian thudik engkim min hrilh vek tawh, nang hi kan thiannu Gina-i inilo tih pawh kan hria." tiin Zuali chuan a lo chhang a. "In a zo tawh anih hi....enge maw in tih le?" tiin Gina-i chu a mangang ta khawp mai. Chutah REmkima a lo lut leh a, "Ni e, kan a zo tawh. Kan kim vek, Gina-i..kan thiannu rawn hruai let leh turin kan lo kal a ni." tiin kawngka chu chhunglam a tang chuan a kalh hmak mai.

Henry-a chuan Exorcism Book a keng a, th(r)i mum, a hmawra cross awm, puithiam ten ramhuai hnawhchhuah nana an hman thin hi a rawn keng lut a. Zuali chuan holy water a keng bawk a, Remkima chuan hrui hrawl zet mai hi a rawn keng lut bawk. Gina-i chuan a nu leh pa te chu enin, "Nu..Pa..heng ho hi kan hmelma pa Setana rawn tirh te an nih hi...chhuah tir rawh u, min tihnat an tum anih hi." tiin a han tap der vel a.

Mahse Mama chuan lo chhangin, "I lem chan kha duhtawk rawh...engkim ka hrilhfiah ang che u. Gina-i thiltihtheihna kha Pathian pek a nilo, dawithiam Aradia-i pek a ni. Chuan Gina-i taksa chhungah hian Aradia thalrau hi a awm mek bawk. A chiang vek alawm, heti khawpa PAthianina a hman, tihdamtheihna nei hial leh a testimony ngaithla chaka mipui tamtak pungkhawm hat khawpa mi piangthar leh nula thianghlim Mari ang maia kan ngaih hian Bible chang engmah hriat a nei lo. A chhan chu Gina-i khan Bible a chhiar ngai lova, engmah a hrelo. Chu chu sawi loh, kum zabi 16 vela dawithiam phei chuan engmah a hre dawn lo hrim hrim." a ti ta phiar phiar mai.

Pi MArovi chuan an pa chu enin, "Tinge i din ngawih reng? Engemaw tal sawi ve ta che. I inchhung ngeiah buaina an rawn siam hi..i fanu tihnat an tum a nih hi...tinge engmah i sawi ve loh?" tiin a vin hrep mai. Pu Ringa chu aa ngawi vung vung a, "Pitar...sam thur vek..taksa dang vek. A vun atangin tuihnang dum a rawn chhuak a, a vun a chuar hle bawk..ka hmu, office toilet ah ka hmu a ni." a rawn ti chhuak hlawl mai.

"Aw Pa Ring, kha kha Aradia-i thlarau a ni. NAngpawh in ilo hmu ve animaw? Kha kha tuna Gina-i kawchhunga awm mek, Dawithiam Aradia-i ngei chu a ni." Mama chuan a lo ti nghal zung zung a. Pu Ringa chuan a nupui chu a en a, "An sawi hi a dik a ni, Nu-i...engvangin nge PAthian mi hman ber, a rawngbawltu leh tidamtu ber chuan Bible chang pakhat lek pawh a hriat loh?" a ti ve ta a.

Gina-i chuan ring zet hian, "In vai hian i a zo tawh a nih hi...in mit ngeiin in hmuh kha. Pathian hming lamin ka au va, Lal Isua hming ka lam bawk. Ramhuai ni ila khatiang kha ka thei dawn em ni?" a ti vak vak mai. "A chhan chu dawithiam pitar chak tak i nih vang a ni...Biak In chhung ngeia Hospital Chaplain that thei kha i ni miau alawm." tiin Mama chuan a lo chhanglet hrep a.

Chutah Gina-i chuan gas bula chemte chu ava chuh thut a, a nau Baby chu man betin a hrawkah a tin ta ran mai. "Gina..enge maw i tih le? I nau a nih kha, thlah vat rawh." tiin Pi Marovi chua t(r)e tuar tuar a. Gina-i chu a rawn hawi chhuak a, a mit chu a var hian a var pup mai. Chutah zet zawng, Pi Marovi pawh chuan a awih ve ta.

Gina-i chuan Father chu a en a, latin tawng chuan a rak ta chiam chiam mai. FAther chuan latin tawng tho chuan a chhanglet a, mahse midang chuan engmah a awmzia an hre ve lo. Baby hrawka chemte a tin reng chung chuan Gina-i chu a kal kual a. Chutia Father nena an inbia lai chuan muang chang leh fimkhur tak hian Pu Ringa chu Gina-i hnunglamah chuan a tawlh phei a.

Chutah chemte chu ava chuh thut mai, rang takin Baby chu a tlanchhe nghal a, a nu ava kuah thlawp mai. Mahse Gina-i chuan apa darah chuan a vit tlum thawih mai a, sitting room lamah chuan dawhkan delh phelh phawk khawp chuan a theh leng dawrh mai. Chemte chu Pu Ringa darah chuan a bur va mai a, Zuali leh Baby te nufa chuan an va buaipui nghal a.

Chuveleh mipa pathum, Henry-a, Mama leh Remkima te chuan Gina-i chu man beh an tum a, mahse an hneh lo kher mai. A mal te te chuan a theh leng dawr dawr hlawm mai a, inchhung te chu a hnawk nuai mai. Father chuan lehkhabu chu la in a chhiar ta a, chuveleh Gina-i pawh a tawp chat mai.

FAther chu ava melh a, ring tak tak hian Father chuan a chham zel a. Na tih hmel tak chuan Gina-i chuan a lu a dawm a, a rak vak vak mai. Henry-a chu lo tho lehin va manbeh leh a tum a, mahse bang ri dawt khawp chuan a lo nam leng leh dawrh mai a. Father chuan tui thianghlim chuan a theh thet thet a, Gina-i sa ti lutuk chu a khur cher cher mai a, a taksa te chu a khu vut vut mai.

Chu chu remchangah la in mipa ho chuan an theihtawp chhuahin an manbet leh a, an man nghet thei ta hram a. "Thutthlengah khan thuttir ula, nghet takin phuar bet rawh u." a ti a, a sawi ang chuan an ti ta a. "Vuan bet tho rawh u aw...a tal nasa dawn nia." tiin Father chuan a hrilh leh a, an vuanbet ta thap hlawm a.

FAther chu Gina-i hmaah tak chuan a ding a, lehkhabu chu a chhiar chhunzawm leh ta. Gina-i chu a tal nasa kher mai, a chak em em mai lehnghal. A vun te chu a rawn dang tial tial a, a hmaiah leh a mal ah te, a ke ah te leh a ban ah te chuan thisen zal niawm tak hi maimawm ril ang mai hian a inzam ruah mai a.

FAther chuan holy water chuan a theh leh thin a, a khu vut vut zel mai. Chutah a zal deuh ta maw tihah chuan Father chuan a pan hnai a, a th(r)i mum hmawra cross chu la in Gina-i chalah chuan a hmeh hnan vak a. A ri sur sur a, a khu vut vut mai. Gina-i chuan na a ti hle a, a tap vak vak mai.

"Tunge i nih?" tiin FAther chuan a zawt a..Gina-i chuan rum tak hian a melh a, "Thlawk bo rawh." tiin chil a lo chhak khum a. FAther chuan tui chuan a theh leh a, "Tunge i nih sawi rawh." tiin a vin leh hrep a. Tap chung hian Gina-i chuan, "Aradia....Druids dawithiam Aradia ka ni e." tiin a chhang ta a.

"Engvangin nge he nula hi i tihbuai? Chhuahsan rawh....chhuahsan nghal rawh. He nula hian i chungah tihsual engmah a nei lo, chhuahsan rawh." tiin a vin vak vak a. Mahse Gina-i chu a tlawm duh hauh lo, "Ka chhungkua a ni a, ka neihchhun a ni. Ka thlahte zinga mi a ni a, ka ta a ni tawh." a lo ti leh khur khur mai.

FAther chu thinrim takin a han vei kual a, chutah ring tak tak chuan a chham leh ta a. Gina-i chu na tiin a tap vak vak a, amah vuan mek tu Mama chu a en a. Zawi zawiin a hmel a rawn pangngai tan ta a, "Mama...ka duh tawh lo. Ana ania, min chhan rawh..khawngaihin.." tiin a tap vak vak a.

Mahse Father chuan, "Mama..enge a sawi chu ka hre lo. Mahse ngaithla suh, lem a chang mai mai a nih kha. Vuan bet zel rawh, inbum tir suh." a lo ti nghal vat mai. Mama chu a mittui a tla a, a maimitchhing ta ringawt mai. FAther chuan a chham chhunzawm zel a, "Chhuak turin thu ka pe a che..he taksa hi chhuahsan rawh." tiin a au vak vak a.

Chutah Gina-i chu a khur cher cher a, a rawn hawichhuak leh thut mai. A mitmu chu a var pup a, a hmai chu a dang mai pawh a ni tawh lo, a duk hian a duk khat vel mai. Chutah aw rapthlak zet hian, "GINA chu a thi tawh." a ti ta chhur chhur mai. Tichuan an phuarna hrui hrawl tak mai te pawh chu a tal chat vek a, amah vuantu mipa pathum te chu a paih leng leh dawr dawr mai.

FAther chuan tui chuan theh leh a tum a, mahse Gina-i chuan a kut chu lo manin a chawi kang lawp mai a. TV delh tlu rum rum khawp chuan a paih leng dawr mai a, FAther ber chu nikhawhrelovin a awm ta reng mai. Mama chu tho lehin Gina-i chu a kuahbet a, bangah chuan a nambet a.

"Gina..Gina..i awm tih ka hria ania. Khawngaihin inhneh tir suh, khawngaihin..lo kir leh rawh." tiin a au vak vak a, mahse awlsam tak hian Gina-i chuan a leh thal nghal a. Chhuatah chuan bawhbetin a rek ta vak mai, thei leh thei lo hian Mama chuan, "Gina...ka hmangaih che." a han ti tawk tawk a.

Gina-i mit meng var pup chu a rawn danglam zeuh mai a, chu chu Mama chuan a lo hmu chiang ngang mai. "Gi....Gina, kha i taksa chhungah khan nangmah diktak ala awm tih ka hria. Lo let leh rawh, ka ngai tawh lutuk che asin. Gina, ka thiamloh vek a ni. Ni e, dawt ka sawi alawm. Kha th(r)i kha ka lei a nilo, ka chhar a ni. Kha th(r)i vang khan heti hian i awm ta a nih hi, ka thiamloh a ni. Min ngaidam rawh, ka hmangaih che, ka hmangaih lutuk che." a han ti leh a.

Mak tak maiin Gina-i chuan a thlah a, a ding a. A hmel chu a rawn ziaawm telh telh a, a lu chu na tih hmel tak hian a dawm vawng vawng mai. "Nilo...enge awmzia...min kalsan rawh." tiin a lu chu a thing vak vak a. Chutah a bengah chuan kha hmeichhe aw ngei mai kha a rawn ri leh ta, "Gina...tidamtu i ni. HEng mite hian an itsik vang che a nih hi, tihnat che an tum a ni." a rawn ti leh ta mai a.

Gina-i chuan Mama chu a en a, "Nilo...min hmangaih a ni. Min hmangaihtu..ka chhungkua leh ka thiante an ni asin." tiin a phun sap a. MAhse AW chuan, "Inbum tir suh, that vek rawh....an vaiin that rawh, a nih loh chuan nangpawh i thi ve ang." a ti ta mai a. Chutah Gina-i chuan a lu a dawm a, a khur cher cher mai.

Chunglam enin a ka chu zau tak hian a ang vak a, chutah le..meikhu dum kuk mai chu a ka atang chuan a rawn chhuak ta teuh mai le. Light te chu a phe zawk zawk mai a, inchhung chu a nghing dur dur bawk. Chutah Gina-i chu a zawi hnawk a, chhuatah chuan a let der mai. Midang zawng chuan inchung chu an han en a, Aradia-i ngei mai chu ceiling ah chuan a bet tawi mai.

Baby leh Zuali chu hlauvin an khur a, an mit an hup nghal bawk. A ran zuang thla a, rum tak hian Mama chu a melh a. Latin tawng bawk chuan, "Nangmah vang vek a ni...min chhuah zalentu i ni a, tunah min hneh i tum leh vel amaw?" a ti khur khur mai, mahse Mama chuan engmah a hre thiam lo.

A kut a phar chhuak a, "Thihna PAthian ka nih hi..Samhain Celtic Pathian hnenah ka thlarau hi ka hlan tawh tih hria ang che...i thih a hun ta e." tiin Mama lam chu ava pan ta mai a. Mama chu a hliam tawrh avang leh a chauh tawh em avang chuan chet pawh a che sawn thei tawh lo, hlau tak chuan a lo en reng ringawt a.

Aradia chuan a khawih fuh hman tep a, mahse Gina-i chu a rawn harh thut mai. Mama hmaa tak chuan ava thingthi a, Aradia-i chuan Gina-i zawk chu a khawih fuh ta. Chutah Gina-i chu a zawi hnawk a, a thal tawp mai. Mama chuan kuah in, "Nilo...harh rawh Gina...nilo, min kalsan suh." tiin a sawi vak vak a.

Mahse a harh thei lo mai nilovin a mar pawha awm tawh lova, thawk pawh a thaw tawh lo. Mama chu a tap zawih zawih a, rum tak hian Aradia-i chu a en a. Khur zawih zawih chung chuan, "I chhungkua, i thlahte zinga hnuhnung ber, i thisen zawmpui awmchhun, i chhungkaw neihchhun chu nangmah ngei hian i that a ni. Tunah chuan tumah chhungkua i nei tawh lo, hremhmunah kal rawh." tiin zam hauh lo chuan Mama chuan anchhia a lawh a.

Chutah Aradia-i chu a khur cher cher a, a taksa chu a khu vut vut mai. A a vak vak a, tawng hriat mang loh chuan eng engmaw chu a chham mual mual bawk. A taksa chu muangchang chuan meivap ah a chang zel a, a tawpah chuan a khu ral ta vek mai. Boruak atang chuan witchball chu a rawn tla nawlh a, rang takin Father chu rawn tho chhuakin ball chu a rawn chhar nghal a.

Mahse Gina-i erawh ala harh thei lo, a thi a ang tawh ber zawk. Light te pawh a rawn eng pangngai vek tawh a, inchhung chu a reh diak mai. Pi MArovi chu a rawn tlan phei a, "Bawihte...avan pawi tak em..a ni theilo." tiin a fanu ruang chu kuah in a tap zawih zawih mai. Mama chu a kun reng a, tah pawh a tap hleithei lo.

Pu Ringa pawh a hliam dawm chungin a fanu Baby chuan a rawn kuah phei a, Gina-i ruang chu an en thap mai. Mama chuan mittui tla zawih zawih chung chuan chunglam a en a, a maimitchhing a. "Lalpa, ka mamawh engkim min pe a, ka duhzawng engkim min pe thin bawk. Mahse lawmthu hrilh nachang che ka hre ngai lova, i hmaah kunin ka tawngtai ve ngai hek lo. I Biakbuk thianghlim chhungah ka ke ka pen lut ve ngai lova, i duhloh zawng tamtak ka ti thin bawk. Mahse Lalpa, kei hian engmah ka dil ve ngai lo che. Tun hunah hian ka mamawh che a ni, khawngaihin ka hmangaih Gina-i hi min pe let hram rawh." tiin a tap ta zawih zawih mai.

Mak tak mai hian Gina-i chu a rawn khuh ta kharh kharh mai, "Awiii Bawihte, ka van lawm tak." tiin Pi Marovi chu a hlim hle a. Midang pawh chu an lawm hle a, Mama chuan zah pawh dawn lovin a hmuiah a fawp vawng vawng mai. Gina-i chu muang chang hian a rawn meng a, "Nu..Isua ka hmu asin." tiin a nui sen sen mai.

"Animaw Bawihte, Isua chuan enge a sawi a?" tiin anu chuan a lo zawt a. "Hmangaihna vangin hnehna i chang ta a ni, let leh la, chanchintha hril zel ang che...min ti." tiin a chhang a. Mama chu a hlim kher mai, "Ka lawm e, Lalpa..ka lawm takzet." tiin ama hriat tham lek chuan a phun sap a, tichuan an vai chuan lawmthu sawi tawngtaina an nei nghal bawk.

*************************

1 WEEK LATER

Lecturn hmaah chuan Gina-i chu dingin thu a sawi mawlh mawlh a, "Kha tihdamtheihna ka neih kha Pathian atanga chhuak amaw tiin mithianghlim, sualna nei lo ang maiin ka inngai a. Mahse a hun takah Pathian chuan min chhanchhuak ta a ni, min hmangaihtu ka chhungkua, ka nu leh pa leh ka thiante chungah ka lawm takzet. Setana hian mihring te chu a hneh thei na meuh mai, mahse hmangaihna diktak erawh tuman an hneh thei lo." tiin a testimony chu a sawi a, mipui chuan an ngaithla tui hlawm khawp mai.

Inkhawm chu an bang a, Gina-i chu an chibai sup sup mai. A thusawi a that thu te sawiin an fak luam hlawm a, hlim tak hian a sirah chuan Mama chuan nuisang chung hian a lo thlir reng a. A hnu deuhah chuan Gina-i chu a rawn kal a, "Ka sawi tha ve tho tiraw?" tiin a rawn nui sen sen a. "Tha lutuk...kha bak bak." tiin Mama chuan a lo nuih let sak mai.

REmkima, Zuali leh Henry-a te pawh an lo kal ve a. "Awii Regina Lalawmpui, i thusawi kha e, ka ngaithla tui lutuk hi ka muthlu tep a ni." tiin Zuali chu a rawn nui hak hak a. "I sawi tha khawp mai." tiin Remkima pawh chuan a rawn chibai ve bawk. "In lamah tihtur ka nei sia, keini chu Zuali nen kan kal phawt ange." tiin an kalsan ta a, Remkima pawn a zui haw ve nghal bawk.

Mama leh Gina-i chu an in en a, an nui leh ringawt a. Chutih lai chuan naupang tawngthei lo, Gina-in a tihdam tak kha anu nen an lo kal a. "I sawi tha khawp mai, Gina." tiin anu chuan a rawn chibai a. Gina-i chuan naupang chu a en a, "Chuan..ani hi.." a tih lai chuan anu chuan, "Um...a tawngthei leh tawh lo. Mahse ka lawm zawk, ramhuai thiltihtheihna hmanga a tawng ai chuan, tihian a rilru in Pathian fak se a tha zawk." tiin a lo chhang vat a.

Gina-i chu a nui sak a, "Ka lawm lutuk e." a ti zawi sap a. "Thla kan lo lakpui thei che angem..saw ka thiante pawh sawn an lakpui duh che a." tiin naupang nu chuan a sawm leh a, Gina-i chuan thla chu a lakpui ta a. Chutih lai chuan Mama phone chu a rawn ri a, Father Adam West a lo ni.

"Hello Father, enge ni ta?"

"Hei..ka zin dawn a, enge in an tiin ka rawn be mai mai che. Gina chu a tha maw?"

"Aw tha e, a hlim khawp mai."

"A that nasat chu...nang i tha em?"

"Ka tha e, Father...engkim kha Pathian remruat a ni zawk ni mai hian ka hria. Bible ka chhiar tam phah a, inkhawm lah ka hmaih ngai lo. Ka hlim tak zet a ni, piang thar tur hian camp luh kher alo ngai lo a nih hi...haha."

"A lawmawm a nih chu."

"E chuan maw Father, witchball kha engtin nge i tih dawn tak?"

"Ka kawl mek a, museum ah kan dah ang ka ring."

"Awle...anih phawt le."

Gina-i chu a rawn let leh a, "Kan haw thei e." tiin an haw dun ta a. Gina-i te inbul ah chuan an ding kawi leh rih a, "Duat, thu lawmawm deuh hrilh tur che ka nei a." Gina-i chuan a han ti a. "Enge ni?" tiin a lo zawt vat a. "Ihmaw...ihh.." a han ti te te a. "SAwi vat la..ka hre chak tawh ania." Mama chuan a lo ti chhen mai.

"Ihh...ka hmangaih che a." tiin Gina-i chu a nui vak vak a. "Umm...a lawmawm em a nih chu." tiin Mama pawh chu a nui a, "Naktukah inhmu leh ang aw." Gina-i chuan a han ti leh a. "Um..nitin kan inhmu ang." tiin Mama chuan a lo nuih sak a. An han infawp leh vawng vawgn a, tichuan an inthlah liam ta a ni.

*****************************

A TAWP TA