GINA (MIZO FICTION RELIGIOUS HORROR STORY) WARNING - 18+ Written by : Aaron Malsawmdawngzuala CHAPTER - 4

 GINA

(MIZO  FICTION RELIGIOUS HORROR STORY)

WARNING - 18+

Written by : Aaron Malsawmdawngzuala

CHAPTER - 4

*************************

Pi Marovi chu a harh a, Gina-i chuan a sam a lo chul heuh heuh mai. Chutia Gina-i dam tha taka a hmu leh ta mai chu mak a ti angreng hle a, "Ehe BAwihte, i harh tha tawh maw?" a han ti a. Gina-i chu a lo nui sen sen a, "Umm ka tha alawm, ka tha vek tawh." tiin a lo chhang a. Anu chuan doctor te chu a hrilh nghal a, an ni pawh chuan mak an ti khawp mai.

Na nei miah lo ang mai hian Gina-i chu a harh tha em em a, a khawsik pawh pakhat mah a awm tawh lo. "Nimin kha chuan a lungphu a chawl mai ang tih tur khawp khan a khawsik kha a sang viau si a, heti em em a a rawn tha chak hi chu a mak angreng khawp mai." tiin Doctor pawh chuan a sawi hial a.

Gina-i chu a nui sak a, "Pathianin min awmpui tlat alawm, engmah na ka nei tawh lo." tiin a lo chhang a. Pi Marovi pawh chuan chhuah nghal mai chu a dil a, mahse doctor chuan enthlak leh deuh phawt chu a duh a. Zan khat tal riak leh phawt turin a ti a, Gina-i pawh chuan a hnial hran ta lem lo.

Gina-i te chhungkua hrim hrim hi damlohna avanga damdawiina an awm hian damdawiin chaw hi an ei ve ngai lova, in atangin an in ken sak thlap thlap thin. Dar 8 a rik dawn hnaih chuan Pu Ringa office kal tur pawh chu a rawn peng a, Gina-i chu a tukthuan tur a rawn pe a. Ani pawh chuan chutia a fanu lo harh tha em em mai chu mak a ti hle a, a lawm hle bawk.

******************************

Chaw eikham atang chuan Henry-a leh Mama te chu an inhmu lehnghal a, Mama chuan a mumang te chu a han hrilh zung zung a. "A hrim hrim in khawilaiah tak maw chu thil chu i chhar a?" tiin Henry-a chuan a han zawt a. "Kan in exam zawh ni kha ania, kan ban veleh wine shop-ah beer kan lak nghal kha..i la hria em?" Mama chuan a han ti a.

"Aw hria e."

"Khami ni khan ania, Farkhuh Tlang an tih ah khan kan han kal kha...inkhawm kan neihna hmunah ngei khan. Tah khan in kal hnu khan an sulhnu bawlhhlawh vel kha ka ti fai a, chuan thlai zung niawm tak hi a rawn lawr a. Chu chu ka pawt chhin mai mai a, mahse a lo thui phian a. A fei em em bawk, ka pawt zel a, a tawpah kha thil mum kha ka pawt chhuak a ni." tiin a chhang a.

Henry-a chu a ngawi vang vang a, "Kha thil kha dawi thil eng emaw tak pawh a ni maithei asin, keipawh ka ngaihtuah chiang a, khami th(r)i i pek atang chiah khan Gina-i khan tihdam theihna a nei a, chuan a mizia a dang em em bawk." a han ti a. "Engtin nge kan tih ang? Kha th(r)i kha kan laksak ngei angai a ni." Mama chuan a han ti ve leh a.

Mahse Henry-a chuan, "Ngawi teh, kha th(r)i vang pawh kha a ni lo maithei bawk, Father Adam-a chu rawn phawt teh ang." a lo ti a. "Engtin nge kan tih dawn? Kan va pan tawp mai dawn em ni?" tiin a lo zawt vat a. "Th(r)i chu engtin emaw kawl sak lawk dan ngaihtuah la, tichuan Father bulah chuan kan va entir dawnnia." tiin a chhang a.

**************************

Remkima nu leh pa leh a unau te zawng zawng chu huana feh turin an chhuak vek a, ani erawh Te-i boral chu a la tuar em a, a kal ve peih ta lo a ni. Inah chuan amahin a awm a, a mittui chu a hru chhen mai. Chutia a hmangaih berin a kalsan ta mai chu a tuar thiam thei ngang lova, thih ve mai te chu a duh rum rum hial a ni.

Chhun dar 12 a ri dawn tawh a, Remkima pawh mut reng chu a kham deuh ta. Inbual tur chuan a thawmhnaw chu a phelh mawlh mawlh a, tichuan towel chiah vengin bathroom lam chu a pan ta a. Shower a on dawn chiah tih ah chuan inchhung lam atang chuan thawm a hre tlat mai, "Tunge aw?" a han ti nghal vat a.

Mahse chhanna a dawng lo, chutah bathroom kawngka chu a rawn in kik ta kauh kauh mai. "Tunge ni?" a han ti leh a, mahse tuman an la chhang chuang lo. A ngaih tha lo chuan a towel chu veng tha leh in kawngka lam chu ava pan a, kawngka chu a hawng a. Mak a ti kher mai, Gina-i chu kawngka bulah chuan a lo ding reng mai.

"Ehe..Gina, damdawiinah i awm amaw ka tia?" a han ti hu a, mahse Gina-i chuan bathroom chhungah chuan a nam lut a. Amah pawh chu lutin kawngka a kalh tha nghal sawk sawk mai, "Gina, enge maw i tih le?" tiin Remkima chuan a hrethiam lo kher mai. Gina-i chuan a thawmhnaw chu a phelh ve ta sawk sawk mai a, "Ehe..enge i tih a?" tiin Remkima chuan mak a ti tawlh tlawh mai.

Bengchheng lo tur chuan Gina-i chuan zai zir hian a hrilh a, tichuan saruak vekin a awm ta. Remkima mipatna chuan Gina-i taksa chu a hmuh hmaih hauh lo, chutah Gina-i bawk chuan a kiss ta mai a. A tir chuan a hriatthiam loh em avangin Remkima chuan a nam sawn a, mahse a hmeichhia zawkin a rawn tih hmasak zel avang chuan a insum thei ta bik lo.

A bialnu, a hmangaih em em Te-i boral zo chiah mahse, a thil tih lai chu thil tha lo tak a ni tih hre chung siin tawp san mai chu  a phal bik lo. An duhtawk chuan an inzut dun a, Remkima pawn nuam a ti kher mai. Chutah an hma a bathroom darthlalang lian tak mai lam chu ava hawi a, nuam a tawl pui mek chu Gina-i awzawng a ni lo mai.

Darthlalang atang chuan Gina-i amaw a tih chu pitar bal zet mai, vun chiar tak leh dum run mai hi a lo ni a. Remkima phu nasa lutuk chu a au vak a, a tawlh sawn nghal a. Gina-i chu a en a, "Enge awmzia? Tunge i nih?" a ti hlawp hlawp mai. Chutah Gina-i chu rapthlak tak hian a nui vak vak a, a taksa chu a rawn chuar tan ta a.

Darthlalanga a hmuh ang chiah, pitar bal zet leh mitmu dum run mai chu a hmaah chuan a ding ta ran mai. Remkima hlau lutuk chu tlanchhiat a tum a, mahse a che thei ta reng reng lo. Chutah pitar chuan a zuan thlu nghal a, Remkima awm chungah chuan a thu ta ran mai. Chutah a beng pahnih chu a tham a, a lu chu bathroom chhuat chang tak maiah chuan a sawh tir ta pawp mai.

Remkima na tui lutuk chu a hai chhawk a, a hnar atang chuan thisen a rawn chhuak hial a. Mahse pitar chuan ala duh tawk mai lo, a aia na chuan Remkima lu chu a han tauh tir leh a, a thum leh dawt mai. Tichuan Remkima chu muang chang chuan a chhing diar diar a, nikhaw hrelovin a awm ta der mai.

***********************

Henry-a leh Mama te chu tuma hriat loh chuan Gina-i te inah chuan an va kal a, kawngka chu an han kik a. Baby chuan lo hawngin, "E..nangni in nimaw? Lo lut ru." a lo ti a. Mama chuan en pawh a en tha ngam lo, tichuan inchhungah chuan an lut ta a. Inthlahrung tak hian Henry-a chuan, "ENglo..ihh, Baby..i u in min rawn tir a, a th(r)i kha la turin min tia, kan lo kan a nih hi." tiin dawt a han sawi a.

"E...awle, ka va la ang." tiin Baby chu a u roomah chuan a lut a, reilo teah chuan a rawn chhuak leh mai a. "Kha le." tih pah chuan Henry-a chu a pe a, "A lawmawm e, kan kal leh nghal mai ang." tiin an chhuak lehnghal a, ngaih tha tak chuan Baby chuan kawngka chu a kalh tha ve leh mai bawk.

Tichuan an pahnih chuan Father Adam-a te school lam chu an pan a, Henry-a hian an hmuh duh thu te chu a thianpa, catholic school-a thawk kal tlang chuan an hrilh lawk vek tawh a ni. Reiloteah chuan an thleng a, Father Adama chu a lo awm ngei a. "Nangni hi em ni...Teacher sawi te chu?" tiin a zawt a, heta Father leh Mama te thian dun hi sap tawng vekin an inbia a ni.

"Aw ni e...kan pahnih hian kan hmu duh che a." tiin Henry-a chuan a lo chhang a. Inchhungah chuan sister pahnih leh bother pakhat an lo awm ve bawk. "Ka room ah min rawn zui rawh u." tiin Father chuan a room lam a pan nghal a, Henry-a te thiandun chuan an zui lut ve nghal a. Room chhungah chuan Father Adama senior, Father ve tho, John Paul chu a lo mu a.

Father Adam hi kum 50-a upa a ni a, John hi kum 76-a upa a ni bawk. Room chhungah chuan an thu khawm a, "Enge in duh le?" tiin Adam-a chuan a han zawt a. Tichuan Henry-a te thiandun chuan Gina-i chungchang chu an sawi ta a, an mumang leh an thil tawn zawng zawngte chu an hrilh a.

Adam-a chuan a lu a bu nghat nghat a, "Ka lo hre ve alawm, Gina-i chungchang kha chu. TV ah te ka lo en thin a, a ropui ka lo ti khawp asin. Mahse in sawi chu thudik a nih chuan a tha dawn lo tawp mai, thlarau sual a inrawlh te pawh a ni maithei a ni." a lo ti charh charh mai. Tichuan Mama chuan th(r)i chu a phawrh ta a, tichuan Farkhuh tlanga a chhar a nih thu te chu a han sawifiah leh zung zung a.

Chutah Adam-a senior, John-a chu a rawn thu chhuak a. "Eng tlang maw?" a rawn ti thut mai. "Farkhuh tlang." tiin Mama chuan a lo chhang leh vat a. John-a chu a han ngawi vang vang a, "Paper ah han ziak teh." a han ti leh a, a chhan chu mizo tawng an thiam loh vang a ni. Mama chuan chiang tak hian paper ah chuan a ziak a, John-a chu a hmuh tir leh a.

John chuan chiang tak hian a han en a, "A alphabet te hi...he thumal hi ka hre tawh tlat a ni." a ti nuah nuah mai. "Khawi atangin maw?" tiin Adam-a pawh chuan a lo zawt ve bawk a, mahse apa chuan a chhang lo. A han ngawi leh vang vang a, "Adam, Mizo History Book, English-a lehlin kha va la teh...lehkhabu zawng zawng kha." a han ti a.

Tichuan Adam-a chuan a rawn dahkhawm a, thei leh thei lo chuan John-a chu a tho tuah tuah a. Dawhkan bulah chuan va thu in lehkhabu chu a han keu tan a, minute 10 dawn lai mai chu hun a hmang a. A tawp a tawpah chuan, "Heta hi, ka hmu ta e." tiin Mizo History Lehkhabu pakhat a phek 100-na chu a han kawk a.

Henry-a te chuan a Heading chu an han en a, "An Old Witch named Zachhingi, burned alive in the year 1880 by the Farkhuh Tlang Village people." tih hi a lo inziak a, mizo tawng chuan a awmzia chu, "DAwithiam Pi ZAchhingi chu kum 1880 khan FArkhuh Tlang Khaw mipuite chuan a nung chungin an hal hlum." tihna a ni.

"Kum 1880 khan he khuaah hian Pi ZAchhingi tih chu a awm thin a, dawithiam a ni. Nu leh pate chuan an fate damlo chu an pan pui thin a, tichuan he dawithiam pitar hian a lo khawih dam mai thin. Mahse chung naupang te chu an dam hnu reiloteah an bo ta zel a, an ruang tak ngial pawh hmuh tur a awm ngai lo. Tichuan an khaw upa te chuan Pi Zachhingi chu an ringhlel a, a chhan chu Pi ZAchhingi hian zanlai a pelh tawh hnuah a in chu tlawh pawh a phal thin loh vang a ni. Tichuan Lal leh khawnbawl upa te chu thu hovin ro an rel ta a, zankhat chu an enthla ta a ni. Tichuan chung naupang thisen te hmang chuan a lo inthawi thin tih leh an taksa te chu ramhuai te ei atan a hlan thin tih an man chhuak ta a, a nung chungin an hal hlum ta a ni. Pi Zachhingi hian a thawi lai hian tereuh mum, pawl nalh tak mai chu a be mawlh bawlh thin a." tiin John chuan a han chhiar ta a.

Henry-a leh Mama chu mak ti tak hian an in melh hu ringawt mai, "Mahse..chungte chu mizo thawnthu mai mai ava ang ve...chutiang ang deuh chu thawnthu tam tam pawh a awm alawm." Henry-a chuan a han ti a. Adam-a chu lo tawng chhuak ve in, "Thawnthu mai chauh chu a nilo tih chu a chiang reng alawm hei, he ball chhungah hian Pi Zachhingi thlarau chu ala awm a ni ngei ang." a lo ti ve bawk a.

John-a chuan an cook, ei siamtu, mizo pa ngei mai, Pu Thuama chu a room ah chuan a ko lut ve leh a. Pu Thuama bulah chuan John-a chuan a han sawi fiah leh a, Pu Thuama pawh chuan mak a ti kher mai. "Keipawn Farkhuh Tlang thawnthu te chu ka hre ve alawm, kan naupan lai pawhin ka pi hian min hrilh thin, ka la hre reng." a ti ta mai a.

"I hriat ang ang han sawi teh, ka pu." Mama chuan a lo ti vat. Tichuan Pu Thuama chuan a sawifiah ta, Farkhuh Tlang an tih lai bik te khi chu Pi Zachhingi an hal hlumna lai chauh kha a ni a, a khua ang zawng chuan a lo zau khawp mai. Farkhuh Tlang khaw chin chu tlang hnuai zawng zawng pawh a lo huam vek a, Gina-i te awmna veng pawh chu a lo tel reng chu niin.

Anchhia a lawh thu te erawh lehkhabu ah inziak tel lo mahse Pu Thuama chuan a lo hre kar mai a, a chhan pawh api in a hrilh thin vang a ni. Pu Thuama pi, pi leh chhawngte chu khatih hunlai khan an la dam a, thawnthu chu an lo inhrilh chhawn ve zel te pawh a ni mahna le, tu hriat va ni suh.

FAther John-a chuan th(r)i chu la kangin a han enchiang a, "Hei hi....hei hi witch ball a ni." a han ti sap a. "Witch ball a? Enge awmzia?" tiin Mama chuan a lo zawt leh vat a. "Kum zabi 17 hunlai khan hetiang ball hi England mipuite chuan thlarau sual hnawh kian nan an in bulah te an khai thin a, mahse dawithiamte chuan ramhuai biak nan an hmang thin thung." tiin a chhang a.

An ngawi thap mai, John-a chuan lehkhabu dang chu a han keu leh a. Tichuan chu witch ball ang chiah chiah lem chu a hmu ta a, a ziarang te pawh a in ang thlap. Chutah Roman (Latin) tawnga inziak chu a han chhiar a, Henry-a leh Mama te erawhin a awmzia an hre ve hauh lo thung. Chutah le, FAther John-a hmel chu hlauhna hlir hian a rawn khat ta mai.

"Father, ngati nge? Enge awmzia han sawi teh..khawngaihin?" tiin Mama chuan a ngen a, mahse John-a chuan a sawi hreh kher mai. Muangchang hian, "He witch ball hi kum 1604 lai vela hman thin a ni a, Samhain thlarau a awm a ni." a ti ta mai a. Mahse Mama te thiandun chuan an hrethiam lo kher mai, "Samhain a? Chu chu tunge?" a lo ti hu mai.

"Samhain hi mihring a nilova, festival a ni. A awmzia chu Celtic Thihna Pathian (The Celtic God of Death) tihna a ni a, Pagan Holiday a ni. Druids hnam ho chuan he festival hi October 31st apiangin an nei thin a, tah chuan mihring nunna hlanna, human sacrification neih thin a ni bawk. Chu chu an Pathian, SAmhain, Thihna Pathian tan an hlan thin a ni. Chutianga nunna hlan thin ho chu an duhvang nilovin, tihluihna hmangin upa te leh Lal ten an thlang thin a ni. Thil ruk hmang, pawngsual chingte leh tualthah chingte chu man khawmin an nunna chu laksakin Sahain hnenah chuan an hlan thin niin a inziak a, hei hi thudik a ni nge nilo erawh hriat a ni lo thung. Druids ho rindan chuan heng an nunna an hlan ho thlarau te chu Samhain Pathian chuan a lo hrem thin a, na a tawrh tir thin a ni. An na tawrh te chu Samhain hian a duhtawk hunah chauh a tawp tir thin a, tichuan paradise ah a thawn chho chauh zel an ti a ni." a han ti a.

Tichuan lehkhabu hnunglam chu a en a, "A ziaktu hi British Colonel leh Military Suveyor, Charles Vallancy a ni." a han tih zawm nghal a. "Ka la man lo, enge a awmzia ni neih nuai?" tiin Henry-a chuan a lo zawt chiang leh a. "Druids ho hnam te chu hun a liam a, an changkang ve zel a. Tichuan vawikhat chu an Pathian, Samhain chu festival hun chhung nilovah an zinga mi, pitar pakhat chuan biak a tum a. Chu pitar chu dawithiam a lo ni a, tichuan Samhain Pathian thlarau chu ko chhuakin witch ball ah a khung ta a ni. Tichuan thil tihtheihna tam tak a nei a, tihdam theihna hial a nei ta a. Mahse chu pitar thil tih chu an hrechhuak ta a, a chhan chu festival an neih leh tumin Samhain chuan an biakna chu a chhan let theih loh vang a ni. Tichuan pitar chu an man a, witch ball chu laksak an tum a. Mahse an hmu zo lova, pitar chu an that ta a ni. Pitar taksa an hal ral hma chuan a serh chhunga chu ball chu a lo thukru hi a lo ni a, tichuan Lal te chuan thil hlui dahkhawm naah an dah ta a ni." a ti leh a.

Mama leh Henry-a chuan mak an ti kher mai, "Anih leh chu chu Pi Zachhingi hian engtin nge a lo neih daih theih? Druids ho chu eng tribe nge an nih reng reng?" tiin Henry-a chuan a han zawt leh a. "Celtic hnam an ni, Indo-European." tiin a lo chhang leh a. "Chu..enge awmzia? Celtic hnam leh mizo daih daih...a awm ang lo lutuk." a lo ti leh pung pung mai.

"Engtin nge a neih chu ka hre bik lo, mahse thil ni thei chu a ni."

"Enge a nih theih na?"

"Kha dawithiam pitar, samhain thlarau mantu ber hi..hei hian a thih hma khan Druids tribe ho zawng zawngte chu anchhia a lawh a, a thlah kal zel te zinga tu emaw ber chuan chu witch ball chu a nei let leh ngei anga, tichuan mihring a suat tur thu a sawi a ni. SAmhain hi thihna Pathian a nih angin mihringte chu a tihlum thin a, mahse tihdam theihna a nei bawk. Tichuan kum a lo vei zel a, druids ho pawh an kiam zel a. VAwikhat chu Museum vengtu pakhat chuan chu witch ball chu a ru chhuak a, chu a ru tupa chu kha dawithiam pitar thlah kal zel te zinga mi a ni. Tichuan chupa pawh chu a thi leh a, tichuan chu witch ball chu eng tin tin emaw kha pitar thlah kal zel te khan an nei leh zel a, a hnuhnung ber-a an hriat chu 1742 kuma Ireland rama nupa, rukru a an puh avanga tlanchhe ta, an chanchin an hriat zawm tak loh te kha an ni." John-a chuan a han ti leh a.

"Father, a dang ala inziak em?" tiin Mama chuan a han zawt leh a, "Khawiah nge a awm tak zel chu hriat a ni tawh lo, thil hlu tak tak, hmuhchhuah tak lohte zingah pawh ziah lan a ni fo thin a nih hi. Zirchianna hnuhnung berah chuan he witch ball hi a nei hmasa bertu hming kha Aradia a ni a, a thlah kal zel te chauhvin kha thiltihtheihna kha an nei ve thei a ni. A awmzia chu kha witch ball kha midang, Aradia thlah ni velo ten an lo nei a nih pawhin engmah a thawk ve dawn lova, thiltihtheihna pawh an nei ve dawn lo tihna a nih chu." tiin a chhang leh a.

Mama chu a meng phawk nasa ngei mai, "A awmzia chu...Aradia-i thlah kal zel te zingah chuan Gina-i hi a tel ve tihna animaw?" a han ti nuah nuah a. John-a chuan lehkhabu chu a han enchiang leh a, "Hetah hi thildang a inziak, kum 138 dan zelah he witch ball hian neitu(owner) a chhar fuh zel tiin an ziak bawk." a han ti leh a.

Father Adam-a chu a rawn tawng chhuak ve leh a, "Anih chuan witch ball-a Samhain thalrau Aradia-in a man kum kha 1640 a ni a, kum 138 a liam leh chuan kum 1742 a ni. Chu chu Ireland-a nupa te, chinhriat lohva an bo kum a ni a, kum 138 a liam leh a nih chuan 1880 chiah chiah a ni. Chu chu Pi Zachhingi an hal hlum kum a ni, chuan tun kum hi 2018 a ni a, tunah Gina-i hun a thleng ve leh tihna a ni." a lo ti ve bawk a.

Henry-a chuan Mama chu a en a, "Ireland-a nupa te khan fa an nei anga, tichuan chumi thlah kal zel te zingah chuan Pi ZAchhingi kha a tel ve a ni ngei ang. Tichuan Pi Zachhingi thlah kal zel zingah Gina-i hi a tel ve leh a ni tihna a nih chu, a chiang vek alawm." a han ti a. Mama chu a mangang kher mai, "Father, khawngaih takin min pui rawh...Gina-i hi min chhanchhuah sak hram rawh." a ti ta lawm lawm mai.

MAhse FAther John-a chu a kun ta tlat mai, "Tihna PAthian hi keini mihring tena hneh theih chi  anilo, a chak lutuk. A chhan chu thina Pathian a ni miau va, kan bei rei thei chuang lovang." tiin a chhang ta tlat mai. Mama chu a tap lek lek mai, "Engtin nge ka tih ang? Mawhh...tuin nge min pui ta ang, beiseina nen ka rawn pan ve che u a, tihian maw min lo chhan dawn?" a han ti a.

"A pawi khawp mai, kawng awmchhun chu Gina-i thih hi a nimai. Gina-i hi a boral a nih chuan engkim a tawp anga, kum 138 hnuah a intan leh chauh ang." tiin a lo chhang a. Mama chu thinrim tak chuan a ding a, "I hmangaih em em..i nunna ai pawha i hmangaih, i khawvel zawng zawng chu thih tir i phal bik dawn em ni?" tiin a vin ta khur khur mai.

"Mama...a zia lo emai, inbeng dai teh." tiin Henry-a chuan a lo khap vat a. Father John-a chuan th(r)i chu a la kang a, "Hei pawh hi dah bo rawh u, hmun hla takah paih ang che u." a han ti a. "Anih chuan Gina-i chu a him thei dawn tihna em ni?" Henry-a chuan a lo ti vat. "Nilove, sawi tak ang khan he thalrau sual hi bei tur chuan tu puithiam mahin an hneh lovang. Isua hming pawh a hlau lova, Bible pawh a hlau hek lo." tiin a lo chhang a.

Chuveleh Mama chuan th(r)i chu a laksak a, "Keiman ka kawl ang, min pui thei lo a nih chuan he th(r)i hi in kawl nachhan tur a awm bik lo, keiman ka kawl ang." tiin a mittui chu a hru a, a chhuak ta daih mai. "Father, min hrethiam dawnnia. Chuan vawiina kan inhmuh te leh kan thil sawi te hi, khawiah mah a chhuak lovang tih ka tiam a che." tih pah chuan a chhuak ve nghal a, Father Adam chuan an thiandun chuan khawngaih hmel tak hian a en zui vawng vawng mai.

************************

Pawnah chuan an chhuak a, Mama chuan a bike lam chu ava pan a. A thinrim lutuk chu a bike seat chu a chum vak vak ringawt mai, "Bro..insum hram hram rawh." tiin a lo hnem a. Mama chu a mittui a tla zawih zawih a, "Ka thiam loh a ni...ka thiam loh vek." a han ti a. "Enge i thiam loh a nih na?" tiin Henry-a chuan a kuah a.

"Keimah vang alawm, kha thlarau sual kha keiman ka chhuah zalen a ni. Kha witch ball kha...keima pawh chhuah ngei a ni a, Gina-i awrh tir tu pawh keimah ngei ka ni." tiin a tap lek lek mai. "I thiamloh a ni hleinem, thil thleng tur engmah kan hre lawk bik hleinem." tiin Henry-a chuan a hnem hram hram a.

Chutih lai chuan a phone a rawn ri a, Zuali a lo ni. Henry-a chuan pick up in, "Hello, Zuali..enge ni ta?" tiin a han zawt a. "Henry, Remkima a tlu sual a. A lu a sawh a, a hliam nasa lutuk. Tunah damdawiinah kan tlan chhoh pui mek, lo chho ve nghal rawh u." a rawn ti ta mai a. "Ehe..engtin nge? Engtin nge a tluk? Khawiah nge a tluk?" Henr-a chuan a ti nghal chel chul mai.

"An bathroom ah, a tlu sual a. A lu a kak thuk lutuk, lo tlan vat ru." a rawn ti leh a, phone chu a dah nghal bawk. "Enge ni a?" tiin Mama chuan a lo zawt a. "Remkima a tlu sual a ni awm e, an bathroom ah..damdawiin an pan pui mek. Kal ve nghal ang, hmanhmawhin.." tiin a lo chhang a. An kal tur chiah chu Mama chuan, "Ngawi lawk teh." tiin thil a hre chhuak thut mai.

"Enge ni a?"

"Henry...kha witch ball neitu apiagten mi an tihdama, a tihdama te an thih zel kha ila hria em? Father sawi kha?" tiin a han zawt a. "Aw..chuan enge?" alo ti hu mai. "Gina-i tihdam hmasak ber kha an inkawta accident, taxi driver kha a ni. Mahse a hnu lawkah a ruang an chhar a, chuan Te-i pawh khan a ke na Gina-i'n a tihdam sak thu a sawi bawk a, Te-i pawh a thi leh bawk." a han ti leh te te a.

"Enge i sawi tum tak ni a?" tiin Henry-a chuan a lo vin hlur tawh mai. "Tukin khan Gina-i nu, Nu Marovi khan Gina-i a harh that thu a sawi a. Anih chuan Gina-i chu damdawiinah tunah ala awm, zanin a riak leh phawt dawn. A damdawiin awmna thovah Remkima chu an kal pui, a nih chuan tihdam a tum ngei ang." a han ti a.

Henry-a chuan a hrethiam ta, "Anih chuan REmkima chu a tidam ngei anga...a ni theilo, kan dan angai...kal vat ang." a ti nghal a. "Pa Ringa pawh...Pa Ringa pawh kha a tih dam kha...mahse ala thi ve si lova." a han ti leh a. "Chutiang ngaihtuah a hun lo, kal vat zawk teh ang." Henry-a chuan a lo ti chul mai.

****************************

Zuali leh Remkima nu leh pa leh a chhungte chuan damdawiin chu an thleng a, Remkima chu doctor te chuan operation room ah an zawn lut nghal a. An nghak ta ngat ngat mai, an hlauthawng in an rilru a nuam lo hle mai a. Chutih lai chuan OT bula Gina-i leh anu rawn kal phei chu Zuali chuan a hmu a, "Gina...enge i rawn tih a? I dam tha tawh em ni?" tiin a lo zawt vat a.

"Aw..tukin khan ka dam tha tawh alawm. Chanchin ka lo hria a, enge Remkima chu a an?" tiin a rawn zawt ve nghal a. "A lu a kak nasa lutuk a, a tlu sual a ni ngei ang." tiin a lo chhang a. "Tunge hmu hmasa ber a?" tiin Pi Marovi chuan a lo zawt ve a. "Keimah, a lung a leng dawn si a tiin va len ka tum a, mahse inchhungah tumah an lo awm silova. Bathroom kawngka a lo inhawng a, ka va hmu ta alawm mawle." tiin Zuali bawk chuan a lo chhang let a.

Chutih lai chuan doctor chu a rawn chhuak a, "Doctor, ka fapa chu enge a an?" tiin Remkima nu chuan a lo zawt nghal a. "Thisen a hloh hnem lutuk, thisen a mamawh a ni." a ti ta mai a. Chutah doctor bawk chuan Gina-i chu a hmu a, "Nang hi..Gina-i kha i ni em?" tiin a zawt a. "Aw ni e." tiin a lo chhang a.

Chuveleh doctor chuan chibai nghalin, "I rawlbawlna te kan lo en thin a, kan hlawkpui lutuk asin. Gina Bawihi, khawngaihin kan patient saw tihdam han tum chhin teh, i thei ngei ngei ang." a ti ta mai a, mahse midang pawh chuan doctor thusawi chu an lo tawm pui khawp mai. "Awle, ka'n tum chhin ange." tiin a chhang ta a.

Chutih lai chuan Mama leh Henry-a te pawh damdawiin an rawn thleng ve ta, rang takin a chhungah chuan an lut a. Remkima chu OT ah a awm mek a ni tih an hre leh a, rang mangkhengin an tlan chho veleh nghal a. Mahse security guard duty chuan a lo dang leh rih a, an han insawi fel leh rih a.

Gina-i chuan Remkima, nikhawhrelova lo mu reng mai chu ava pan a. A awmah chuan a kut a nghat a, "Lalpa, i thil tihtheina rawn lan tir rawh, kan mamawh che." tiin a han maimitchhing leh ta vang vang a. A awm chu a nem na telh telh a, ventilator indicator chu a rawn ri tut tut a, a lung phu chu a rawn pangngai chho tan a.

************************

Mama leh Henry-a chuan OT chu an thleng a, theatre kawngka chu a lo inhawng huau mai. A chhungah chuan an va lut a, engkim a pawi hman ta. Doctor leh nurse te chu ban pharin, "Halleluiah Amen." tiin an lo au rual a, Remkima pawh khumah chuan a lo thu fel at mai. A mit chhingin a lo tawngtai ve mek bawk a, Mama te thiandun chu in enin an beidawng ta hle mai.

Ngawi reng chuan an chhuak a, OT kawta thutna lo awmah chuan an thu a. "Ava han pawi tak..engtin nge kan tih tak ang?" Mama chuan a ti zawi sap mai. "Engemaw tak chu kan tih a ngai a ni, hetiang ringawt chuan a dik dawn lo." Henry-a chuan a lo ti ve bawk a. "Thianpa, hna kan nei." Mama chuan a ti ta a.

"Eng hna maw?"

"Remkima leh Pa Ringa hi an thih mai lohna turin kan ven angai a ni...reiloteah an thi mai dawn."

"Ni e..mahse midang zawng zawng te kha engtin nge ni ta ang? Gina-i'n a tihdam tawh zawng zawngte kha, mi 200 chuang fe an ni bawk si a."

"Nia, mahse kan veng seng vek lo. Mahse nunna pahnih tal kan chhanhim thei anih chuan tumah chhanchhuah loh ai chuan a tha zawk tho tho alawm."

"Anih enge i plan ni reng reng a?"

"Zaninah Gina-i te in kawtah ka awm char char anga, Pa Ringa ka veng dawn a ni. Chuan nang, Remkima te in kawtah i awm thung ang. Gina-i hi zanin ala riak dawn a, chuvang chuan inah a awm dawn lo. Remkima erawh hi chu a chhuah nghal mai hmel a, duhleh an inah pawh riak nghal la." a han ti a.

Henry-a pawh chuan  alu a lo bu nghat a, "Ni e, a tha alawm...abak tih theih kan nei tlem bawk si." a lo ti zawi sap mai. Chutih lai chuan midang ho chu OT atang chuan an rawn chhuak a, "Ehe..engtik lai khan nge in lo thlen a?" tiin Zuali chuan a rawn zawt hmasa ber a. "Kan rawn thleng ve deuh chiah, kha..in thawm kan lo hria a, a ropui khawp mai." tiin HEnry-a chu a han nui lui sak a.

"Nia, Gina-i a lo awm hlauh va. A ropui tak tak...Pathian hi chu a tha a ni." Remkima nu chuan a lo ti vawng vawng mai. Gina-i chuan Mama chu a kuah nghal thlawp a, "Ka ngai tawh lutuk che." a han ti vawng vawng a. Mama chuan a kuah let a, "Keipawn ka ngai che alawm...i tha tawh takzet maw?" tiin a lo zawt let ve a.

"Umm..ka tha alawm, naktuk ah ka chhuak tawh dawn." tiin Gina-i chuan a chhang a. Remkima pawh chu chumi ni la la chuan discharged nghal a ni a, in lamah an haw leh ta nghal a ni. Tichuan Mama leh Henry-a chuan an plan ang ngei chuan thil kal pui chu an tum ta a, mahni in lam pan theuvin an haw leh ta a ni.

*********************************

TO BE CONTINUE