ONCE UPON A TIME IN MIZORAM (A mizo zombie horror story) Written by : Aaron Malsawmdawngzuala Episode - 8 : God Hates Us

ONCE UPON A TIME IN MIZORAM

(A mizo zombie horror story)

Written by : Aaron Malsawmdawngzuala

Episode - 8 : God Hates Us

*****************************************

Tiau chhum chhah zet mai chuan ramhnuai chu a rawn tuam mup mup a. Sawmtea te chu hnim buk phenah chuan thâwm dim takin an biru a, mithi tho leh rualte chuan an bul lawk hnim hnah te chu rawn su phei hlawk hlawkin an kal pel zêl a. Siama chu a thlan fîm a tla zawih zawih a, a kuta sehna hliam thîp em em mai chu midang hmuh loh nân a hup bet tlat a.

Minute khat dâwn an biruk leh hnuah chuan, khâng mithi rualte kha tiau chhum zîngah chuan an liam bo ta hlawm a. "In ṭha hlawm maw?" tiin  Pu Tea chu a thaw hlawp hlawp a. A silai chu a lek kâng deuh va, mahse a bân erawh ala khûr deuh dar dar mai. Awmpuia chuan a taksa chu a han dap kual vêl a, "Keichu ka ṭha." a ti zawi sap a. 

Sawmtea leh Valtea te pawh chu an inendik ve nghal a. Chutah Valtea chuan Pu Tea chu en vang vangin, "Pa Te... i nupui leh fate... an la dam asin." a rawn ti chhuak hlawl mai a. Pu Tea chu a phu deuh zawk a, a meng phâwk nasa hlê. "In inhmu em ni? Khawnge tunah an awm?" a ti nghal chuk chuk a. 

Valtea chuan a chil a han lem dawk a, a hmelah chuan inthlahrunna a rawn lang a, "Zova te inah khân heng sakawlh ho hian an lo hual mêk a, ka va chhanchhuak a ni. Sawmtea te thlam lam pan hian thlanmual aṭângin rawn hruai ka tum a, mahse an rawn pung chak lutuk a. Zawmthang ruam lam pan tûrin ka tir thla hlawm a... mahse Tluanga kha..." tiin a chawl dat a. 

Pu Tea mangang leh hlauthawng lutuk chuan Valtea dârah chuan a va ṭhâm titih ta mai a, "Tinge Tluanga chu? Khawnge a awm?" a lo ti leh khur khur a. Valtea chuan sawi hreh hmel tak hian, "Tluanga nên khân an rawn pung chak lutuk kha kan lo dang a, mahse kan inhloh ta a ni. Pi Kungi, Muani te nufa leh Fela te kha chu helam ruam hi rawn kal tûrin ka hrilh a... mahse Tluanga kha, khawnge a awm ka hre lo." a ti chuai raih mai a.

Pu Tea chu leiah chuan a ṭhu hnawk a. Hlauhthawn hmel zet hian, "A nih chuan helam hi an rawn pan ngei ang, han lêt leh ang u!" a ti nghal ruai a. Mahse Valtea chuan a lo dang vat a, kalkawngah buaina an tâwk a nih loh chuan an rawn thlen daih tawh ang. Mahse keimah zawk ka la rawn thleng hmasa tho va, an la rawn thleng lo a ni ngei ang." a lo ti leh a. 

Boruak chu a rit zual sauh a, an hamhaih tlang hlawm kher mai. Sawmtea erawh chuan Pu Tea te inbia chu a lo ngaihsak lo. Siama awmdan chu a en reng a, a ringhleh ta tlat mai. Siama chu a sîr deuhvah chuan midang hnung chhawn zâwngin a ding tlat a, a hliam lai chu a lo dawm vawng vawng mai.

"Siama, i ṭha em?" tiin Awmpuia chuan a va pan hnai a. Siama chu muangchangin a rawn hawi lêt a, a hmel chu a dâng var pup tawh a. Inthlahrung tak hian, "Min kalsan mai rawh u... hetah hian min hnutchhiah rawh u." a rawn ti ta mai a. Pu Tea te pawh chu an rawn hawi thap a. Siama chuan a jacket chu a hlip a, a kuta hliam chu a hmuh ta hlawm a. 

A hmuamhma chu a lo duk nasa tawh hlê a, a kiu (elbow) thleng dâwn chuan thisen zam dum nguk mai chu a rawn inzam phei nuai tawh. Sawmtea chu a va kal hnai a, Siama hliam a han hmu chiang chu a ner sak mai. "An seh hman che em ni? Tinge engmah i sawi loh?" a ti vin nghal khur khur a. 

Siama mittui chu a rawn parawl nghal a, "I duh chuan tunah hian min sât hlum nghal mai rawh... ka awm dân tûr i hria. A nih loh chuan min kalsan rawh u." a lo ti khur leh dar dar a. Sawmtea chuan Siama bân duk chur mai chu a vuan a, "Kan tan chhum mai a ngai ang." a ti ta mai a.

"Eng a? Siama kut hi kan tan ang maw?" Valtea chuan a lo ti hu a. Sawmtea chuan a hrei (axe) chu a lek chhuak a, "Hêng mithi tho leh ho hi an thluak chiah a nung tawh. An sehna aṭâng hian a tur (virus) hian an thluak a han fan chho tih kan hria. Kan tlai hma he tur hian Siama thluak a thlen hma in a ban hi kan tan chhum tûr a ni, a nih loh chuan a tlai ang." a ti ta hmak mai a.

Siama chuan a inseh-ruha, a khua rawn sik dawn ṭan tih pawh a hria. A huiasenna zawng zawng sawm khawmin, "A tlai hma hian ti mai teh u... kan nih nih kan ni mai ang." a ti chang fak a. Valtea chuan engmah sawi tawh lovin a rawmawl (handkerchief) chu a phawrh a, Siama bân rêkah chuan nghet em em hian a tawn ta a. 

Sawmtea chuan a hrei chu a han lek kâng a, Siama bân chu a han tin ta rân mai. Midang chuan Siama chu an lo vuan bet tlat bawk a. "Siama, i inring em?" tiin Sawmtea chuan a zâwt leh a. Siama chu a maimitchhing a, "Ka rilru ka thlâk hma leh... ka seh hlum ve vek hma che u hian... TI VAT MAI TEH!" tiin a tap lek lek mai.

Sawmtea chuan a thawk a han la hak a, "Khat... hnih... thum!". A hrei hriam zet chuan Siama bân chu a sât bung hmawk mai! Thisen chu a chik zawr zawr a, Siama na ti lutuk chu a ṭe chel chul mai a, rang takin Valtea chuan a hmui a lo hup sak vat a Siama chu a tal vak vak a, a mittui leh thlan tui chu a luang zawih zawih a, tei lote hnuah chuan a zal ta riai riai mai.

*********************************************

Muanpuia, Tluanga, Pi Zari, leh a fanu Hlimpuii te chu tiau chhum chhah zet kârah chuan huan thlam panin an kal mêk a. Ramhnuai chu a thîm ruih a, hnim hnah aṭânga tui rawn far fep fep leh an chapal ina chirhdiak a rap ri thâwm chauh chu hriat tûr a awm a. An vai chuan an chau tawh hlê a, an hmel chu a ngui ruai tawh hlawm bawk.

"Nu Zar, in thlam chu kan thleng ṭêp tawh em?" Tluanga chuan thaw hlawp hlawp chung chuan a han zâwt a. Pi Zari chuan a awm chu dawm vang vangin, "Kan hlat lutuk tawh lo, mahse la kal deuh chu a ngai ang." tiin a lo chhâng a. Hlimpuii chuan beiseina tlêm nei chung hian, "Tluanga, U Valtea chu khawnge a awm i hre mial lo maw?" tiin a lo zawt ve leh a. 

Tluanga chuan a lû a thing a, "Ka hre lo... thlanmualah khân khâng mithi tho leh rual khân min rawn bawr nasa lutuk a, kan inhloh ta daih a nih kha." tiin beidawn hmel tak hian a chhâng a. Chutih lai tak chuan Pi Zari chu a ding chat a. Huan kalkawng mawng lam, ramhnuai thîm zîng aṭâng chuan mihring na tuar aw râwl ring zet hi a rawn a hre ta tlat mai le! 

Chu thâwm chu Siama, Sawmtea'n a bân a tansak avânga na ti lutuk au thâwm ngei kha a ni. "In lo hre ve em?" Pi Zari chuan a ti khur dar dar a. Midang ho chu an inen hu a, "Eng thâwm nge i hriat a?" tiin Hlimpuii chuan a lo zâwt vat a. Pi Zari chu a ngawi vang vang a, "Na tuar thâwm... mihring na tuar râwl a ni! Khu lam aṭâng khuan a ni," tiin ramhnuai thûk lai chu a kâwk a.

Tluanga chuan a beng chhe ri mai mai angah ngaihin, "Khaw chhûng lam thâwm a nih chu, an buai nuai nuai alawm. Thlam lam chu pan zêl phawt ang u." a lo ti daih thung a. Mahse Pi Zari chu ala ding tlat mai, "Nilo, khaw chhûng lam chu khi lam a ni a, mahse thâwm lo chhuahna erawh khu lam, ramhnuai thûk lam daih khu a ni. Kan awmna atang hi chuan khaw chhûng thâwm hriat phâk rual a ni tawh lo." a ti ve tlat a. Hlimpuii hmel chu a rawn danglam nghal vek a, thlabâr takin a nu kut a vuan a. "A nih chuan ka u Sawmtea te an ni maithei asin! Kal vat ang u!" a ti nghal chuk chuk a. Tichuan, tiau chhum chhah zet kârah chuan an vai chuan an inzui thla leh ta hlawk hlawk a.

******************************************************

Sikul office chhûng thîm ruih mai, chalk leh lehkhabu hlui rim nam deuh chem chem chhûngah chuan Puii, Marema, Zauva, Bawihpuii leh Chaka te chu an ṭhu ngawi ṭhap hlawm a. Khaw chhûng aṭânga an awmna a hlat deuh avâng chuan thawm chu a reh tlawk tlawk mai a. Marema chuan a thal (bow) chu dawhkanah nghatin, a thalmu chu muangchangin a han chhiar mual mual a. 

A hmel chu a thutak hlê mai, "Sawm pathum... sawm pathum chiah ka nei ta. Zauva, nang engzat nge i la neih?" tiin a ṭhianpa chu a han zâwt a. Zauva chuan a thal bâwm chu a han thlêk ve leh a, "Pasarih chiah." tiin tawi deuh tak hian a lo chhâng a. Thalmu sawmhnih (20) chauh an nei ta. 

Marema chuan a khabe a han dawm vang vang a, "Hriamhrei kan duh belh ngei a ngai dâwn a nih hi. Ṭanpuina kan hmuh hmel bawk si lo, khaw dâng va pan dâwnin khaw chhûng kan tawn tlang a ngai bawk si. Hetah hian kan tâng reng a nih chuan nakin lawkah riltamin kan thi mai dâwn." a han ti thûm chhak a.

Zauva pawh chu rawn ṭawng ve in, "Ni e, eitur kan dap a ngai a ni. Hetah hian kan him rih maithei, mahse kan dam khawchhuah zêl nân chuan helai hmun hi kan chhuahsan a ngai tho tho dâwn." a lo ti ve bawk a. Puii chuan beidawn hmel zet hian office bang chu a en rêng a. "Mahse engtin? Khawi aṭângin nge eitur chu kan va hmuh ang? Helai hnaiah chuan thingkûng leh hnim lo chu engmah a awm si lo. Khaw chhûngah kan luh leh a ngai dâwn a nih chuan thil thleng tur kan hriat kha. Eitur chu lo zu la thei pawh ni ila, damin hetah hian kan lêt leh thei kher ang em? Khâng hringei (zombies) ho tam tak khan min umzui dawn tho asin." a lo ti tham ṭiak a.

Chaka chu a ngawi vang vang a, chutah muangchangin a rawn ding chhuak ta a. "Tihngaihna dang a awm chuang lo, khaw chhûngah chuan kan luh ngei a ngai a ni." a rawn ti thut a. Bawihpuii chuan a lo en hu a, "Eng thil nge i tih dâwn?" a lo ti vat a. Chaka chuan thâwk a han la hawk a, a jacket hma chu a han siam ṭha a. 

"Mipa pathum hi kan zu kal ang a, hmeichhe pahnih hetah lo awm rawh u. Pu Hmuaka te dawr-ah kan lût hmasa ber dâwn nia. In hriat kha, kan khuaah chuan an ni dawr saw a lian bera, thil an zuar chikim bera. Keiin eitur ka lo la khawm ang a, Marema leh Zauva'n min lo vêng thung ang." a ti ta mai a.

Bawihpuii chu a rawn ṭhu ngil nghal zawt a, a hlauthawng takzet. "I mawl em ni, Chaka? Helai hmun pawh hi kan thleng tawk tawk a ni a, khâng sakawlh ho kha engzat nge an nih i hmu a ni  lo'm ni?" a lo ti nghal hlur a. Mahse Chaka chuan zaidam tak hian Bawihpuii kut chu a va vuan a. "Tihngaihna dang a awm chuang lo, Bawihpui. Heta kan biru reng a nih chuan kan thi dâwn tho tho. Kan lo lêt leh ngei ang, ka tiam a che," a ti dam thlup a.

Zauva pawh chu a rawn ding ve a, "Mahse hmeichhe pahnih chauh kalsan te chu a chi dâwn em ni?" a lo ti ve leh a. Chuveleh Marema chuan a thal chu a han ban a, a dârah a pu ta rân mai. "Chaka sawi kha a dik. Amah hi kan lo ven theih chuan, hmanhmawh takin ipah kan  thil mamawh a lo thun zung zung thei dâwn a. Kan hlawhtling emaw, hlawhtling lo emaw... kan beih a ngai a ni." a lo ti ve leh a.

Chaka chuan office kil lam, ek-in (toilet) lam chu a pan a, buara ip pahnih hi a rawn keng  chhuak a, "Hetah hian kan thun dâwn nia. Kan chet chhuah nghal vat loh chuan khua a thîm leh thuai dâwn." a han ti leh a. Tichuan chhuah chu an tum ta a. Marema chuan kawngka bul an thlen chuan a ding a, Puii leh Bawihpuii te chu chiang takin a en a. "Kawngka hi chhûng lam aṭângin lo kalh tlat ang che u. Lo chhuak miah suh u aw... chuan kan rawn lêt leh hma chu thâwm rêng rêng lo nei lo bawk ula." tiin a chah a.

Puii leh Bawihpuii chuan an pahnih chauh a office thîm ruih mai chhûnga lo tawm reng chu hlau hle mah se, tihngaihna dang a awm si lo. Mipa pathumte chuan muangchangin kawngka chu an hawng a, tiau chhum chhah zet mai chuan in chhûng chu a rawn chîm nghal chiai mai. Tichuan khaw chhûng, mithi tho leh ten ro an relna hmun lam pan chuan tiau chhum zîngah chuan an liam thla ta a.

*********************************************************

Ramhnuai thîm ruih mai, tiau chhum chhah zet kârah chuan Sawmtea, Pu Tea, Awmpuia leh Valtea te chu thâwm dim takin thing kûng phênah an ṭhu khawm ṭhap a. Thlamuanna rêng a awm lo, thihna rim leh boruak thâng huam chauh chu hriat tûr a awm tawh a ni. Siama erawh thisen a hloh hnem tawh êm avângin nikhaw hre lovin a zal reng a, a hmêl chu a dâng lep mai

A bân hliam, Sawmtea’n a tan chhum sak tak kha an tuam bur a, thisen a rawn hnam leh ṭiam ṭiam ṭhîn a. "Siama chemte kha thlamah khân kan hnutchhiah daih lehnghal a..." Sawmtea chuan beidawn hmel tak hian a han ti nuah nuah a. Hriamhrei pakhat lek tlâkchham pawh chu he mângchhia kârah hian chuan mahni inawh hlum tluk a ni ngei ang.

Siama bula ṭhu mêk Awmpuia chuan a ṭhianpa Siama, thihna kâra la dam tawk tawk chu a en vang vang a. "Kan thil tih khân awmzia a nei dâwn niin ka hria. Hri hian a thluak hi fan hman nise chu mithi tho leh ho ang khân a awm daih tawh ang, mahse hei..ala pangngai reng." tiin beiseina tlêm nen a han nui deuh suk a.

Pu Tea chu a lû a lo bu nghat nghat a, "A nih hi... tur kha a thluak thlen hma kan tan hnan hman a ni ngei ang. Mahse, Siama hi enkawl vat a nih loh chuan a hliam hian a nunna a la zâwk thei tlat." a lo ti thum ve chhak a. Valtea chuan an chhak lawk, ramhnuai pik zet leh kawng chhuk thla zet mai chu a thlîr vang vang a, "Heta ṭâng hian khaw dang kan thleng thei mai lo'ng maw? Ke-a kan kal zêl chuan hmun him kan hmu hrim hrim ang." a rawn ti chhuak hlawl a.

Sawmtea chuan a lû a lo thing a, "A theih loh. Zawmthâng ruam tawp hi chu khâm sâng zet a ni a, chhuahna tûr a awm lo. Khaw dang kan kal dawn anih chuan khaw chhûng khi kan pal tlang a ngai tho dâwn. Tin, Siama tan hian Sub-centre a damdawi kan va lâk loh chuan a thi mai ang." tiin a lo chhâng a.

Valtea chu a za lo takin a khi suk a, "Khawchhûng luh leh i ti em ni? Hri-kai pahnih thum lek pawh beih fe an ngaih laiin, khawchhûngah sâwn sâwm-thum sâwm-nga aia tam an awm tawh dâwn asin. Han kalpui pawh ni ila, Pi Hliri ber pawh mithi tho leh a lo ni ve reng tawh maithei asin?" a ti vin ta hlur mai a.

Pu Tea chu a rawn inrawlh vat a, "Inhnialin awmzia a nei lo, eng pawh chu nise...Siama hliam chauh nilovin, nakin zel atan pawh damdawi leh thildang chu kan mamawh dawn hrim hrim. A pawimawh hmasa ber chu tawm hulna tur in emaw, thlam emaw kan mamawh a, abak chu tih dan dan a awm mai ang." a rawn ti dam thlup a. 

Awmpuia chuan a en hu a, "Ramhnuaiah hian kan khawsak chhunzawm mai angai tawh dawn i tihna em ni? Engtin nge ei leh in te kan hmuh theih ang? Khawchhung chu sawi loh, ramhnuaiah pawh an rawn thleng nual tawh ania...Pu Te, tihdan dang kan ngaihtuah angai ang, hetiang ringawt chuan kan dam rei lovang." beidawn hmel tak hian a lo ti a. 

Chutah Siama chu a rawn harh a, "Khawnge kan awm?" a rawn ti hu mai. Valtea chuan a lo buaipui vat a, "Kan him rih, i ban chu ala na em?" tiin a zawt a. Siama chuan a ban bung chu a en a, a mittui a parawl nghal kuang mai. A chil a lem dawk a, "Ka tha e, nat chu a la na khawp mai. Mahse ka dam chhuak ang, ka dam chhuak em em ang." tiin a insehruh a.

Chutih lai tak chuan thâwm an hre leh ta tlat mai. Tiau chhum zîng aṭâng chuan mithi-rûm thâwm leh hnim hnah pal buan buan thâwm an hre ta. "Sawmte, saw!" Awmpuia chuan a kâwk a. An hma lamah hrikai pali, hmel rapawm zet zet mai hian an rawn pan mêk a. Chutah, an hnung lamah pahnih an rawn inlar ve leh thut bawk a!

Mângchhia chu a rawn inṭan leh ta. An chung lawk hnim buk aṭâng chuan a dang sâwm (10) dâwn lai chu ngûr chhur chhur chungin an rawn dawk chhuak ve leh sup sup bawk a. Sawmtea te chu hmun tin aṭângin hual an ni ta ber mai. "Siama na tuar thawm khân a hip khawm hlawm a ni ngei ang! Kan that seng dâwn lo, tlânchhiat mai a ngai!" Pu Tea chuan a ti ṭhawt a. 

A silai chu hum nghetin, a hma zâwna rawn lang hmasa ber chu a chal ah tak a lo kâp dur mai a, chu mithi chu a thal nghal der a. Sawmtea pawh chuan a dawt chiah a lo tlan mek chu a hrei (axe) chuan a lo chek thal ve leh tawp a. "Tiah hian! Thlang lamah hian!" Valtea chuan kawng chhuk zet mai chu a kâwk a. Tichuan ramhnuai thîm khup mai lam pan chuan an tlân chhe ta chiam mai a. An hnungah mithi rual tam tak chuan an rawn ûm zui hlawk hlawk bawk.

***************************************************

Marema, Zauva, leh Chaka te chu fîmkhur takin khaw chhûngah chuan an lût leh ta a. Tiau chhum chu a la chhah hlê nâ a, ni rawn tlang sâng ve deuh tawh chuan boruak chu a ti êng ve deuh a. Kawtthlêr lamah chuan hri kai ho chu an lo vei nuai nuai hlawm a, mahse an inhlat hlawm hlê thung. 

Ṭhenkhat chu in chhûngah an tâng a, ṭhenkhat erawh che châng miah lovin an ding reng a. Mihring pangngai che zia an nei tawh lo, an dâng lûp a, an ṭihbaiawm takzet. In hnung lam, chirhdiak leh hnim pik kârah chuan ramhnuai hrûl zawh zêlin Pu Hmuaka dawr lam chu an pan phei zel a. 

Marema chu a han dâk dê dê a, "Pu Hmuaka dawr bulah sâwn pathum an awm a, kawngka pawh a inhawng huau mai. Mahse saw lai kan thleng dawn a nih chuan kan hma deuh lawkah  sawn hringei paruk laiin kan kawng an dal dâwn. Min hmuh vaih chuan thâwm an siam ang a, midang an rawn kal khawm ve nghal sup sup dâwn." a han ti sa sa a.

Chaka, kum 23 mi, zirzâng ve tak leh fing tak chuan a ngaihtuahna a han hmang deuh va, "Ti hian ti teh ang u. Thalmu sawm hnih (20) kan nei a, saw mite paruk saw thâwm dim takin kan kap hlum vek thei ang. Thal thâwm chu a ring vak dawn lova, an rawn ngaihven dâwn chuang lo. Pakhat te tein kan kâp ang a, tichuan Pu Hmuaka dawr bula mite pathum pawh saw kan veh hnai leh dâwn nia. Thalmu chu an ruang aṭângin kan la lêt leh vek thei dâwn a, kan thalmu zât chu a la ngai reng dâwn tihna a nih chu. Chu chuan kan kîr leh lamah pawh min pui em em ang." a han ti zat zat a.

Zauva chuan a lû a lo bu nghat a, a thal chu a han kau a. "A nih chuan keiin ka han kâp hmasa ang e." tih pah chuan a han dâk ve leh a, mithi pakhat tukhumah tak chuan a va kâp tlang zawk mai! Chu mithi chu a thal nghal tawp a, mahse thâwm a chhuah loh avângin a bula mite chuan an hre lo. 

Marema chuan a dawt chiah chu a mi chu a mit-ah tak a va kâp ve leh a. Tichuan an inkah chhawk zêl a, rei lo têah paruk te chu an thal ta phung mai. Fîmkhur takin an va kal hnai a, mithi ruang lû aṭâng chuan an thalmu te chu an phawi leh vek a. Pu Hmuaka dawr chu an va hnaih a, in pakhat hnung lam aṭâng chuan an veh leh ta rân mai. 

Marema leh Zauva chuan hri kai pathum te chu an han hlum leh a, dawr chu an va thleng ta.  Chaka chu an inkârah kal tîrin, thâwm dim takin dawr chhûngah chuan an lût ta ṭhem ṭhem a. Dawr chhûng chu a reh hian a reh tlawk tlawk a, Pu Hmuaka ṭhutna ṭhinah pawh chuan tumah an lo ṭhu lo. 

Chaka chuan hmanhmawh takin a hmuh hmasak apiang, chhang te, nepnawi chi hrang hrang leh buhfai thleng chuan a buara ipah chuan a thun nghal bawrh bawrh a. Chutih lai tak chuan, an hnung lam aṭângin silai in-load ri 'hlak' thâwm an hre ta tlat mai! Rang lutukin an hawi lêt nghal a, Pu Hmuaka chu silai kengin an hnungah chuan a lo ding rân mai a.

"Pu... Pu Hmuak... kan..." Chaka'n a tih dêk dêk lai chuan Pu Hmuaka chuan a silai chu lek kang thutin a rawn tin ta mai a. Chaka chuan rang takin a kut a phar nghal a, Zauva leh Marema pawhin an thal chuan an tin lêt ve nghal a. Pu Hmuaka chuan thinrim tak hian, "Ka dawrah ka thu lovin in rawn lût a, in la rawk zui a maw?" a ti khur khur mai a.

Zauva chuan a thal kau chu thlah chuang lovin, "Pu Hmuak, kan dinhmun i hria. Kan khua a thil thleng mêk hi i hmu a ni lo'm ni? Hetia intih hi a ngai miah lo asin." a han ti a. Mahse Pu Hmuaka, pa chapo leh uikawm tak chuan vin zet hian, "Nanga mi zilh ka ngai lo! Hei hi ka dawr a ni a, ka in a ni bawk. Ka thil neih hi tûman min ṭawmpui lovang. In in ah va awm ve mai rawh u." a ti khur khur a.

Marema chuan zaidâm tak hian, "Pu Hmuak, Sikul tlangah kan awm mêk a, eitur kan mamawh êm a ni. Nangpawh kan bulah i lo awm ve thei reng alawm, intihbuai hi a ṭûl lo." a han ti ve leh a. Mahse Pu Hmuaka chuan a lû a thing tlat a, "Sikul tlangah chuan ngawi rengin han chho leh rawh u. In thil lâk kha kalsan vek bawk ula, a nih loh chuan silai hi ka hmet puak ang a, mithi rual an rawn lût khawm dâwn a nia. Tu emaw ber chu in thi bawk ang." a ti ta hmiah mai.

Chaka chuan, "Aw le, kan dah ang e," tiin muangchangin a kut chu a dah thla a. Marema leh Zauva pawh chuan an thal chu an dah hniam ve ta a. Tichuan muangchangin an rawn kal a, Pu Hmuaka chu pawnah chuan a chhuak hmasa a. Pu Hmuaka chuan a silaiin a la tin reng a, "Lo chhuak vat rawh u, phâkar han tum vaih teh u, ka kap—" a sawi zo hman lo!

Tiau chhum kâr aṭângin hri kai pakhat a rawn zuang chhuak thut a, Pu Hmuaka chu a zuan thlu ta tawp mai! Pu Hmuaka hlau lutuk chuan a silai chu a hmet puak palh ta hlauh a, silaimu chuan Chaka dul ah tak a va fuh ta mai le! Chaka chu a thal nghal tawp a. Zauva chuan hmanhmawh takin dawr kawngka chu a va kalh hmak a. 

Pu Hmuaka chu mithi ho chuan an bawh rawn a, a hnar te chu an seh thlawn hlawk mai. A au râwl chu a râpthlak takzet. In chhûngah chuan Zauva chuan Chaka dul hliam chu a kawrlum hlipin a nam bet nghal a. Chaka chu a ṭawng hlei thei tawh lo, a thaw hlawi hlawi a. Marema chuan ṭap chungin a be mawlh mawlh a, "Chaka, min chhâng teh! I ṭha dâwn, i ṭha chhuak leh dâwn ania." a ti lawm lawm a. 

Mahse Chaka chu a khuh vak vak a, a kâ aṭâng chuan thisen a rawn phuh chhuak ṭhawt ṭhawt mai. Chaka chuan thei leh thei lo hian, "Bawih... Bawihpuii leh Puii te kha... vêng... vêng-him hram rawh u..." a ti ṭawk ṭawk a, a zawi ta hnawk mai a. "Chaka... Chaka! Chaka, min chhâng teh!" tiin Marema chuan a sawi nawk nawk a, mahse a chhang thei tawh lo, Chaka chu a thi tawh. An ṭhianpa an chân ta mai chu Marema leh Zauva te chu an thinrimin an lungchhia a, an mittui luang kârah chuan an insehruh tlawk tlawk mai a ni.

*********************************************************

Tiau chhum chhah zet mai chuan ramhnuai chu a rawn tuam mup mup a, hlam hnih hlam thum aia hla chu hmuh a harsa hlê tawh. Renga leh Chhuanga te chu Jeep awmna lam zawng chuan fîmkhur takin an inzui phei zêl a. Chutah Chhuanga chu a ding thut a, a hawi kual nghal vut vut a. 

Renga chuan hrilhhai takin a en hu a, "Tinge i din a?" a han ti hu a. Chhuanga chuan an awmna lai vêl chu thlêk kualin, "Ngawiteh, helai aṭâng hian kan kal tlatin ka hria... Jeep hi kan lo dah hla tawp lo a nih dâwn hi." a ti nuah nuah a. Renga chu a rawn phâwk hrû mai, "A nih chuan heta ṭâng hian kawngpui a hnai tawh i tihna em ni?" a lo ti vat a.

Chhuanga chuan a lû a bu nghat a, "Aw... ka hre mai, helaiah hian a ni ngei alawm. Kan chhukthlâk lai pawh khân helai hi kan pal tlang a ni. Khi lai kawng chho khi han zawh leh ila, kan thleng hnai tawh viau ang." tiin an chung lawk, ramhnuai kawng chho pik zet mai chu a kâwk a. 

Renga hmelah chuan beiseina thar a rawn lang a, a lawm kher mai. Mahse an hlimna chu a rei lo hlê. An hnung lam awih deuh aṭâng chuan mithi rûm thâwm thâwm an hre ta tlat mai. Tiau chhum zîng mup mai aṭâng chuan hri kai pakhat, râpthlak zeta rawn vak chho hlawk hlawk hi an hmu ta a. 

Chhuanga chu a ding khawng nghal at a, "Sanga... Sanga?" a ti tham ṭiak mai. A ram riahpui, a ṭhian ṭha ber Sanga ngei kha a lo ni. Renga chuan a chemte chu a phawrh nghal a, "Chahbi kan laksak a ngai! Chhuanga, rawn chhuk la min rawn pui rawh!" a han ti a. A chempui bil leh tuiek zet chu a hum nghet sauh sauh a. 

"Pathian hian min hua a nih hi, he khawvêl hi anchhia a lawh a nih hi." tiin a phun zawi sap a. A mittui chu hru thuakin, Sanga lam pan chuan a chhuk thla ve nghal a. Sanga chu a rawn vak thleng ta, a rawn ding ur ur mai a. Renga chuan a chem chuan a han vawm pawp a, mahse Sanga beng a hlawi thuak ringawt a, a vawm fu ta tlat lo. 

Sanga chu a thle deuh sawk a, chutah sakawlh rilṭam tak ang mai hian Renga chu a rawn zuan thut mai a, a bawhbet ta rûn mai. Chhuanga chuan a lû ah tak rawn sah a han tum ve a, mahse a ni pawh chuan a sat sual ve ta tlat mai. A chem lah a lo bil bawk nên, Sanga lû ah chuan a ri fawk ringawt a, a chem lah chu a thlauh zui daih lehnghal. 

Renga chuan Sanga hrawkah chuan a lo rek bet ve ngar ngar a, "Chahbi! Chahbi kha la rawh... hmanhmawh rawh!" tiin a indang ṭâng ṭâng a. Chhuanga chuan rang takin Sanga ipte chu a zen a, Jeep chahbi chu a la thei ta hram a. Renga chuan a tha zawng zawng sâwm khawmin Sanga chu a lehthal a, a rek bet ta rân mai.

"Chhuanga, kawngpuiah khian han tlân chho rawh! Ṭanpuina han zawng rawh! Jeep chu va zawng hmu la, ṭanpuina nên kan khuaah hian rawn lêt leh ngei ngei ang che!" Renga chuan a ti lawm lawm a. Chhuanga chuan a hreh kher mai, "Mahse, Renga... nang..." a tih lai chuan vin zet hian Renga chuan, "Mahse mahse tih a hun lo! Tlân vat rawh!" a ti ṭhawt a. Chhuanga chu hreh tak chungin kawngpui pawhna lam pan chuan a tlân chho ta hlawk hlawk a. Renga pawh chuan Sanga a rehna chu a thlah a, ramhnuai lamah a tlân let leh a, Sanga chuan a ûm zui bawk.

**************************************

END OF EPISODE 8