SHADOW (A CHINESE ACTION FICTION STORY) Written by : Aaron Malsawmdawngzuala CHAPTER - 6

 SHADOW

(A CHINESE ACTION FICTION STORY)

Written by : Aaron Malsawmdawngzuala

CHAPTER -  6

***********************************************

Zan a ni a, Mei Ling-i chu amah chauhvin kawngpuiah chuan a kal mek a. Mei Ling-i hi a pawisa khawl zawng zawng nen nun bul tan thar turin Xiaogang khua atangin Wuhan Province ah a insawn a, in a luah mek a ni. A hun kal tawh, thim leh rapthlak tak mai te, a rila rah a fapa ngei a hralh ta mai te chu engkim theihnghilh a, mi thar anga nun hman a tum ve mek a ni.

Restaurant-ah te a inhlawh thin a, chumi zan chuan a haw mek a, rin aiin a tlai phian tawh lehnghal. Tin, he khawpui, Wuhan city hi Dr. Liang-a leh Jin-a te awm mekna a ni bawk. Chutia Mei Ling-i amah chauhva a inluah lam a pan mek lai chuan a hnung lam atang chuan pen thawm a hria a, tu emawni chuan a zui mek a ni tih a hria.

Mahse a kal lui zel a, a thla a muang lo kher mai. Chutah a zui mektu chu a rawn hnai zel a, zu rim a la nam huam huam zui. A thaw hruk hruk ri atang chuan mipa ngei a ni tih pawh a hre thei a, a kal chak tawlh tawlh mai. Rei fe hnuah chuan a zuitu pa chuan, "Zan khat atan engzat nge?" a rawn ti thut mai.

Mei Ling-i chu a ding a, a han leh hawi a. Putar ve tawh tak pakhat, rui em em mai hi a lo ni a. Mei Ling-i chuan rum takin chu putar zurui chu a melh a, "KS ka ni lo." tiin a chhang deuh hmuk a. Chupa chuan Mei-i chu a han en vang vang a, a nui ta tiah tiah mai. Ngeiawm tak hian, "A ve khanglang chuan, ka hria che ania. Mei Ling, i hming a ni tiraw?" a ti ta mai a.

Mei Ling-i pawh chu a phu zawk mai, a thin phu pawh a rang nghal dup dup kher mai. Chutah putar bawk chuan, "Xiaogang khua ah i awm lai khan KS ah chuan i lar ber ang, tu a te pawh khan an hria che alawm. I man pawh a tlawm zawk zawk lo i naupan deuh lai phei kha chuan, mahse tunah pawh pawi tihna ka la nei chuang lo ania, i la duhawm tho ka ti." tiin hmuhsit hmel tak chuan a lo tawngkhum leh a.

Mei Ling-i chu a zak kher mai, a thinrim hle bawk. A insehruh teuh mai a, "Ka danglam tawh, KS ka ni tawh lo." tiin a chhang leh a, mahse putar chuan a ngaipawimawh tawh lo. A va pan a, Mei Ling-i kawngah chuan vuan thutin fawh a tum ta mai a nih chu. Mei Ling-i chuan lo dangin, "Kal bo rawh, i zak lawm ni?" tiin a lo nam vak vak a.

Putar lah chuan hnai set sawtah hian, "Mi hur chu mi hur in ni reng dawn tho tho." tih pah chuan mawi lo tak tak chuan a taksa chu a khawih sak vel a, Mei Ling-i chu a au nasa mai. Mahse zan a rei deuh tawh avang leh an awmna lai tak chu mi vei vah tam lohna lai tak a lo ni bawk nen, han pui mai tu tur an awm lo tlat.

Mahse chutia an inchai buai lai chuan hnunglam atang hian tu emawni hian putara sam chu a rawn tham thut a, lamlianah chuan a theh tlu thuai mai. Chupa chu Jin-a a lo ni a, a kut pawh bandage a tuam ala ni bawk. Thinrim hmel tak hian putar chu a en a, "Kal bo rawh, khawih tawh hlek suh." a ti vin khur khur a.

Putar lah chu lo rui pawr tawh nen, "Ehee, naupang te te si. I lo buai vena tur a awm lo, mai mai chuan." tiin a ding tuah tuah a. Jin-a chu va hnek a tum a, mahse a lo bum awlsam lutuk tlat. A kut na lo lam chuan putar zuruia dulah chuan a hnek sak pawp a, putara pawh a pum dawmin a kun nghal ngawih ngawih mai.

Chutah Jin-a chuan a han tlawh thal leh thuai a, putara chu tho tur a awm tawh lo. Jin-a chu Mei Ling-i bulah chuan ava kal vat a, "Ka pi, i tha em?" tiin a zawt a, Mei Ling-i chuan Jin-a chu a en vang vang a. A lu bu nghatin, "Aw, ka tha e." tiin a chhang zawi sap a. An pahnih chuan an ding ngawi dun vang vang a, nufa an ni tih reng an inhre der mai si lo.

"A khawih na hman che em?" tiin Jin-a chuan anu chu a han zawt leh a. Mei Ling-i chuan a lu thingin, "Aih, ka tha e. Ka lawm lutuk e, tlangval." tiin lawmthu a hrilh nghal mawlh mawlh a. Jin-a pawh chuan a lu chu bu nghat nghatin, "A nih chuan a that chu, fimkhur deuhvin i haw dawnnia." tiin a kalsan ta a.

Mei Ling-i chuan Jin-a chu a en zui vawng vawng mai a, engtin emaw tak hian a awm tlatin a inhria a. Mahse va biak chhunzawm chu a tum chuang lo, lehlam hawiin a kal ve mai bawk a. Jin-a chu a ding a, ava hawilet leh a. Ani pawh chuan engtin emaw tlat a awm ang hian a inhria a, mahse eng tak nge a nih a hrethiam bawk si lo.

Mei-i kal liam mek chu a thlir vawng vawng a, mahse a lu chu thing harhin hma lam chu a pan leh ta zawk a. Mei Ling-i kal mek pawh chu a han ding leh deuh dat a, a va hawi let leh hram a. Mahse Jin-a erawh a lo kal liam tawh, "Tu nge maw a nih le?" tiin a phun zawi sap a, a inluah lam pan chuan a kal leh ta a.

************************************************

Ware house thim reih ruih mai chhungah chuan Yilong-a leh a pawlte chu an awm mek a, a lai takah chuan Lan-i chu thir hamnga siam thutthlengah chuan phuar beh mek a ni bawk. A chau tawh em em a, a tui a hal hle bawk. A kut an phuarna tight lutuk chu na a ti tawh em em bawk a, Yilong-a leh a pawlte lah chuan a hual thap mai bawk si.

Yilong-a chuan a va pan hnai a, a ka an hnawhna chu a lak chhuah sak a. Lan-i chu a thaw hrawk hrawk mai, "Min.. min chhuah rawh u." tiin a chil a lem dawk a. Yilong-a chuan a han en vang vang a, "Tunge i hming?" tiin a zawt a. Lan-i chuan zawi sap hian, "Lan." tih ringawt hian a chhang a.

Yilong-a chu a han khi suk a, "Lan? Hming mawi tak a ni. Khai le, khawnge kum 22 liam ta a naute bo kha sawi rawh le. Eng nge a chungchangah hriat i neih, a vaiin sawi rawh le?" tiin a han zawt leh a. Lan-i chuan a lu a thing a, "Engmah ka hre ve lo." tiin a chhang a. Chutah Yilong-a chu a han ding ngil deuh at a, a kut chu a han begn ri thak a. Chutah ware house kawngka chu a rawn ri rak mai, hmeichhe pakhat hi a rawn lut a.

Savun atanga siam hrui ang tak, chhah tha zet mai hi a rawn hum phei bawk a. Yilong-a bulah chuan a rawn ding a, "Lan, henu hi a hming chu Zhen-i a ni a. KEi aiin a thinchhe zawk a, a zaidam zawk zawk lo ania. SAwi rawh le, kha naute kha khawnge a awm? A nih loh chuan Zhen-i hian a hlap hrep mai dawn che ania, dawt sawi duh suh. Kan thawhpui hlui, keimah leh police laka kum tamtak lo tlan bo tawh, Guang-a kha hmanni ah kan man a. A sawi vek, kha naute kha in temple hnaih lawkah khan monk pakhat hnenah a hlan a ni. Kha naute kha in temple ah sawn a seilian tih a chiang, nang pawhin tugne a nih hi hria. Kha naute phiangsen kha, a nu hming pawh Mei Ling a ni. Kha KS lepchiah lutuk nu vang khan police ten min zawng reng a, ka bihruk reng a ngai a. Kum tin deuh thaw min report a, kha naute vang khan ka buai hnem tawh. Sawi rawh, ka dawhtheihna in a tlin lovang nge?" a ti ta siah siah mai a.

Lan-i chu a meng phawk nasa kher mai, mahse Jin-a himna atan tiin thudik sawi chu a la sawi duh chuang lo. A insehruh a, "I sawi awmzia pakhat mah ka hre lo, tunge Guang-a pawh chu ka hre lo. DAwt a hrilh che u pawh a ni thei asin, zawt chiang leh ula a ni mai alawm." tiin a la chhang fan a.

Chutah Yilong-a chu a nui huah huah a, "ZAwt chiang leh rawh a? Lan Bawihte, Guang-a te chu kan that daih tawh alawm. Amah anga tawp ve i duh lo a nih chuan sawi mai rawh, anih loh chuan na i tuar ang." tiin a han vau leh khur khur a. Lan-i chu a ngawi vang vang a, "Engpawh chu nise, ka sawi tawh ang khan engmah ka hre ve lo. Kum 22 liam ta a thil thleng a ni a, kei chu tunah kum 18 chauh alawm ka nih. Kan temple neitu tunu ka ni a, engmah ka hre lo tak tak." a la ti talh mai.

Liu-a chu a rawn pen chhuak a, "A nih chuan engvangin nge tukina temple-a kan rawn kal khan, naute chungchang kan sawi veleh a khati fakauva i lo hlauh thawn a? Hriat chu i nei chiang alawm, i hmel atang khan ka hre vek." tiin a rawn zawt ve a. Lan-i chuan a lo melh hraw a, "A chhan chu kan temple ah sawn mihrang tumah an lo kal ve ngai lo, pawnlam mi ka hmu che u kha ka hlauthawng a chuvang chauh chuan tiang khan ka awm a nih kha." tiin a lo chhang leh vat a.

Yilong-a chu a insum thei tawh lo, "Min bum theih i inring a nimaw?" tiin a kut chu a hum ruh sauh sauh va. Zhen-i chu a signal zeuh va, chutah Zhen-i chu a rawn pen chhuak ta. Lan-i lam chu a pan a, chutah na em em mai hian a hrui ken lai chuan Lan-i hmaiah tak chuan a hlap ta siah mai.

Lan-i chu a hawi sawk a, a biang lehlam chu a kak duai mai a. Thisena  rawn luang zawih zawih bawk, na a ti lutuk chu a tap lek lek a. A mittui a rawn luang thla nghal a, a rilru na bawk si leh a hliam chu thip a ti bawk si nen a hmui chu a pen fan fan mai. Yilong-a chuan a rawn pan hnai leh a, "Sawi tawh rawh le, khawnge naute chu a awm?" tiin a han zawt leh a.

Lan-i chu a inhnit hlawp hlawp a, "Kha naute kha...Guang-a hnen atanga latu kha, a hming chu MAster Xu-a a ni a, kha naute kha kan temple ah sawn a enkawl seilian a ni." tiin a chhang ta nge nge a. Yilong-a pawh chu a phur thar ngei mai, "Chuan, sawi zel rawh." a han ti vin leh hlur a.

Lan-i chu a han thaw deuh kawk kawk a, "Naute... naute a ni tawh lo, kum 22 lai a ni tawh. A hming chu Jin Wei a ni a, kan temple-ah sawn monk zirlai pakhat a ni." a han ti leh hluam hluam a. Yilong-a chuan kut kuankuah meuhvin a lo ngaithla a, midang ho pawh chu an ngawi thap mai.

Lan-i chuan a sawi chhunzawm zel a, "Zirlai fel tak leh rinawm tak a ni a, temple-a chengte pawhin kan ngaina. Mahse zan hnih, zan hnih kalta khan..." tiin a han thu kun lap a, "ZAn hnih kal ta khan bumin a awm a, kan relic roh tak pakhat, Golden Lotus Amulet chu a thawmhnaw bawmah hmuh chhuah a ni a. A hma zan khan ruk bo a ni a, Jin-a ruk angah chuan an ngai ta vek a ni. Mahse a ruk a ni lo, a thianpa Ren-a ruk zawk a ni." tiin zawi muang chuan a rawn dak chhuak a.

Mittui tling teuh chung hian, "Tuman an awih duh lova, ka pu chein tuman an awih duh lo. A insawifiah nasa, mahse an awih duh lo. A rilru a na em em a, chuvang chuan nizan khan temple atangin a tlan chhuak ta a ni. Chuan nangni khan tukin khan in rawn zawng ve leh chiah a, khavang khan ka lo hlauthawng a ni. Kha naute chungchang in rawn sawi kha Jin-a ngei a ni tih ka hria a, mahse tunah chuan a bo mek si a nih hi." tiin Lan-i bawk chuan a han sawi chhunzawm leh a.

Yilong-a chuan a lu chu bu nghauh nghauhvin a pawlte chu a han melh kual a, a khi deuh var var a. Tichuan Lan-i chu a en leh a, "A va tha em, tunah chuan hma kan sawn leh ta sawt e. Jin-a chu hetah a rawn kal angai dawn, chumi atan chuan nangmah hi kan hmang tangkai dawn che." a ti khur khur mai.

Lan-i chu a thaw deuh halh halh a, a rilru a hah hmel takzet. Jin-a chu khawnge a awm a hre der mai si lo, "Tunah chuan...Jin-a chu kan nghak tawh ang." tiin Yilong-a chu a han khi leh suk a. Lan-i chu a beidawng tak zet, Jin-a chu a ngaihtuah em em a. Yilong-a leh a hote lah chuan an lo zawng mek ve bawk tih a hriat belh leh bawk nen, a mangang takzet a ni.

************************************************

ZAn dar 11 leh a chanve vel a ni a, Jin-a pawh chu Dr. Liang-a te in lam pan chuan a haw leh ta a. Clinic chhung chu ava lut a, Dr. Liang-a chu a dawhkan bulah chuan lo thu in a lo buai hmel hle mai, Jin-a a rawn lut chu a lo en nghal a. Mak tih hmel tak hian, "I tlan bo ta emaw ka tia, khawnge i awm bo vang vang a?" tiin a han zawt a.

Jin-a chu a khi suk a, "ZAn boruak ka han hip lawk mawle, ka kal kual mai mai." tiin a lo chhang mai a. Chutah chiang tak hian Dr. Liang-a chuan a han en a, "Jin, serum kha... Azuri DAwn serum kha eng nge i thuthlukna ni ta?" tiin a zawt deuh thut mai. Jin-a chuan a chhang mai lo, a han ngawi deuh vang vang phawt a.

Chutah thaw deuh hakin, "Ka la chiang lo, ka rilru ka la siam fel thei lo." tiin a lo chhang a. Dr. Liang-a chuan a lu a han bu nghauh nghauh va, "Min lo zui lawk teh." tih pah chuan a thutna atang chuan a tho va, clinic chhung atang chuan a chhuak daih mai.Jin-a chuan mak a ti in a hrethiam lo angreng hle a, mahse engmah sawi lem lo chuan a zui ve mai bawk a.

Hallway phei ah chuan Dr. Liang-a chuan a kal pui zel a, tichuan room pakhat ah chuan a luh pui a. Jin-a chuan a che vel chu a lo en reng a, chutah Dr. Liang-a chuan thing atanga siam wardrobe lian tak pakhat hi ava hawng a. Tichuan pakage pakhat hi a rawn la chhuak a, a chhunga mi chu a phawrh a.

Ninja outfit hi a lo ni a, khumah chuan a han phah zar a. Jin-a chuan hratthiam loh hmel tak hian, "Hei hi eng nge?" tiin a zawt hu mai. Liang-a chuan a chhang mai lo, chu ninja uniform chu a han en vang vang a. Grey color niin a rawng pawh a tak tha hle a, a ouan te chu a chha in a khawng em em a.

Chutah zawi muang hian Dr. Liang-a chuan, "He uniform hi kum 33 vela upa a ni tawh a, kum 17 ka nih laia ka pa min siam sak a ni. Ka pa kha designer lar tak leh hausa ve tak a ni thin a, he uniform pawh hi special taka a siam niin a puan hman te hi a tovin a vang em em a. Kan chhungkua hi martial arts tradition ngaipawimawh tak kan ni a, ka pa pawh khan kei hi martial artist thiam tak ni turin min duh a ni." tiin a chhang a.'

A han chawl deuh dat a, "Naupang te ka nih lai khan martial arts school ah ka pa khan min kal tir char char zel a, tichuan ka lo thang lian zel a. Kum 17 ka nih khan kan khua a martial arts school tha berah min luhtir kha a duh a, tichuan ka lut ta reng bawk a. He ninja uniform hi min thui sak ta a, ka training ka zawh hunah, ka graduate huna ka hak turin min thui sak a ni." tiin a sawi zawm leh a.

Chutah a hnuk chu a rawn ulh deuh va, "Mahse ka graduate hma zan chiah khan ka pa chu heart attack vangin a thi a, he uniform, aman special taka min thui sak, ka training zawh hun nghakhlel taka, ka hak hun hmu chak em em si khan....ka ha lai pawh a hmu hman ta miah lo a ni. Chuvang chuan ka la ha chhin eih lova, tihian kum tamtak ka kawl tha ta tawp mai a ni." tiin Jin-a chu a han en a.

"Tichuan martial arts pawh chu ka zir chhunzawm mai nilovin, ka bansan hmak a. Ka hmang tangkai zui lo, ka pa thih hnu khan medicine lamah ka kal ta daih a, i hmuh ang hian doctor ka ni ta zawk a nih hi. Mahse he uniform hi, hei hi chu ka tan a pawimawh takzet a ni." tiin a han sawi chhunzawm leh a.

Jin-a chuan a chhang lo, an ngawi dun vang vang a. Room chu second 10 vel chhung chu a reh diak mai, "Tinge chu chu min hrilh chhan?" tiin Jin-a chuan a han zawt ta nge nge a. Dr. Liang-a chuan a mittui chu a han hru zeuh va, "Ngaithla teh, Jin. Kha Azuri Dawn serum kha i hmang a nih ngat chuan, Yilong-a beih nan i hmang ang nga. Chuan he uniform hi i ha bawk ang nga, tuman tunge i nih an hre dawn lo. He uniform hi i ta tur a nih hi, a siamna hmanrua, a puan leh fabric zawng zawng te hi kum tamtak ni tawh mahse a unique teh mai ania." tih pah chuan ninja hmaikawr chu a han lek kang a.

Jin-a hmuh tur chuan a han dah lang a, "Tin, zanah chauh i che dawn alawm. Zan thimah pawh lungngaihna tur a awm lo, he hmaikawr hian night vision a chhawm a. I tan chet a awlsam dawn lutuk, hei vang hi alawm hetah ka hruai che a, he thil hi ka hmuh tir che." tiin a han hrilh fiah leh a.

Jin-a rilru chu a insual buai takzet, a ngawi reng ringawt a. Chutah a han vei kual thauh thauh va, "Ka la chiang thei lo, doctor. Ti hian ti teh ang, darkar khat min lo nghak rawh. Tichuan ka thuthlukna chu ka hrilh ang che, pawnah ka va inngaihtuah ang nge." tiin kal chhuah a tum a. Mahse Dr. Liang-a chuan lo ko dingin, "Jin, hun rei tak chhung ka tan tu emaw tak lo lang turin, ka fanu phuba min laksak turin Pathian hnenah ka dil thin. Tunah i lo lang a, a chhanna chu nangmah hi a ni tih inhria ang che." a han ti chang deuh fak a. Jin-a chuan a chhang tawh lo, pawn lamah chuan a chhuahsan ta a.

*************************************************

Jin-a chu khawlaiah chuan a kal hnak hnak a, a rilru chu a insual nasa hle mai. Dr. Liang-a thusawi chu a bengah chuan a ri nawn sek a, Yilong-a laka phuba lak ve ngawt lah thil dik niin a hre si lo. Mahse amah enkawl damtu Dr. Liang-a laka a tih theih awmchhun niin a hre ve bawk si, thuthlukna siam har a ti takzet.

Park pakhat lo awm lam chu ava pan a, thutna lo awmah chuan a han thu a. A rilru ah chuan Temple a lo lang a, Master Xu-a a mitthla ah a rawn lang nghal. Fa ang mai a enkawl seiliantu, train tu leh duhsak em em tu a tlan bo san ringawt mai te chu a inchhir hnuhnawh leh viau va, mahse tlanchhuah mai loh chu tih tur dang a hre bawk si lo kha a ni a.

Lan-i pawh a rilru ah a rawn lang leh nghal zawk mai, Jin-a pawh hian a lo duh ru ve reng thin a, unaunu anga a en avang leh an inthianthatna a chhiat a hlauh vang chauh va a duh thu hrilh lo mai zawk a ni. Chutia a inngaihtuah mek lai chuan a awmna atanga hla vak lo, ramhnuai lam pana mipa 10 rual vel phei mek chu ava hmu a.

A tir chuan engah vak a ngai lo, mahse an inchei dan a en chuan a ngaih a tha ta zan lo mai. Coat suit dum an ha vek a, an kal te reng reng chu an hmanhmawh hmel em em bawk. Jin-a chu a ding a, chung mipa rual kal mek te chu a han en zui vang vang a. Thil dik lo eng emaw chu a awm tih a chiang nghal a, a zui ru ve ta ringawt mai.

Patling ho pawh chu ramhnuai lamah chuan an kal zel a, an la tawng miah lo zui. Jin-a chuan a zui ru ve zel a, a tawpah chuan hmun zawl deuh hi an thleng a. Chutah ware house lian lem lo tak mai, chul rup tawh hi a lo awm a. Chung patling rual ho chu warehouse chhungah chuan an inzui lut sap sap hlawm a, Jin-a ngaih chu a tha lo tulh tulh mai.

Ti chuan ware house hnung lam chu a pan a, tukverh atang chuan a han dak ru dek dek a. A thil hmuh chuan a ti phu chiang kher mai, Lan-i chu ava hmu ta. A awmzia chu Yilong-a hi hmun hrang hrangah a biru kual kan tih tawh kha, tun tum chu Wuhan khawpuiah a lo biru ve thung tihna a ni.

A meng kawk a, "Lan?" tiin a ka hau mai. Lan-i lah chu a chauh hmel em em a, a muhil mek bawk. A hmaia hliam awm chu Jin-a chuan a hmu thei bawk a, a rilru a na takzet. Thinrim tak hian, "Engtin nge? Eng nge awmzia? Lan-i, engtin nge Lan-i hetah a awm theih?" tiin a phun zawi sap a.

Chutah mipa lo awm ho zinga pakhat chuan, "Boss Yilong-a a lo thleng tep a, he nula hi a damlo hlauh ang nge. A harh chhuah hunah a lo tal deuh a nih pawhin dim ang che u, Boss Yilong-a khan hliam tawrh belh tir tawh suh u a ti a nia." tiin a thiante chu a hrilh a. Chutah Jin-a chu a meng leh ta kawk mai, Yilong-a hming an lam rik a hre ta chiah chu a thinrimna chu a rawn sosang nghal em em a.

Ware house chhungah chuan va luh mai a tum a, mahse second thought a hmang hman hlauh. A lu a bu nghat nghat a, "Lan... lo tuar hram hram rawh aw.. khawngaihin, ka lo let leh vat ang." tiin a tlan nghal vat a. A tlan pah chuan Dr. Liang-a'n Yilong-a chungchang a hrilh te chu a bengah chuan a ri nawn awn awn mai.

*************************************

Dr. Liang-a chu a clinic ah chuan thu in hna a lo la thawk mawlh mawlh a, dawhkan vela paper chu a rem tha vel mek a. Chutah Jin-a chu a rawn lut thut mai, "Ehe Jin, i va arwn let hma ve? I inngaihtuah chiang tawh em ni, eng nge i thuthlukna ni ta?" tiin a lo zawt vat a. Jin-a chu thinrim hmel tak hian a thaw halh halh a, "Ka rilru ka siam fel tawh, serum chu ka duh e." a ti ta mai a.

Dr. Liang-a mak ti lutuk chu a meng kawk mai, Jin-a lam chu ava pan a. Mak tih hmel tak hian, "Eng nge awmzia, Jin? I ti tak tak amaw?" tiin a han zawt leh a. Jin-a chuan thinrim hmel tak hian, "Kum 20 kal ta a i fanu thattu Yilong-a hi, i hmelma chauh ni lovin ka hmelma pawh a ni ve tawh." tiin a lo chhang leh a.

Dr. Liang-a chuan a hrethiam lo tulh tulh mai, "Eng nge awmzia? Han sawi chiang deuh teh.." tiin a zawt nawn leh a. Jin-a chu a han thaw hak a, "Nichin khan park ah ka thu a, ka inngaihtuah mek a. Mahse ral khat atang khan patling rual, coat suit dum ha sawm rual vel ka hmu a. Ramhnuai lam an pan a, ka ngaih tha zan lovin ka zui ru ve ngawt a. MAhse ka zui ru fuh khawp mai, ware house chhungah an lut lai ka hmu a. Tukverh atangin ka en ru a, tah chuan Lan-i ka hmu a ni. Chuan an titi ka ngaithla ru a, Yilong-a hming an sawi ri a. Yilong-a mi leh sate an ni, Yilong hian Lan-i a kidnap a ni." tiin a chhang leh a.

Dr. Liang-a chu a meng phawk nasa kher mai, "Lan-i? Temple ami, i sawi kha maw?" tiin a lo zawt leh hu a. Jin-a chuan a lu a bu nghat a, "Aw ni e, ka thiannu, ka hmangaih Lan-i kha Yilong-a hian a kidnap a ni." tiin a lo chhang leh a. Dr. Liang-a chu a han inngaihtuah vang vang a, "Engtin nge temple atangin an ruk chhuah theih? Temple an va luh chhuah hmiah tihna em mawni le?" a han ti nuah nuah a.

Jin-a chuan a kut chu a han hum ruh sauh sauh va, "Engtin nge ka hre lova, ka ngaipawimawh hek lo. Serum kha ka duh, Yilong-a hi ka that dawn, chu chu a ni mai." a ti khur khur a. Chuveleh Dr. Liang-a chu a tho thut a, cabinet chu va hawngin Azuri Dawn serum chu ava la chhuak ta a.

Jin-a pek pah chuan, "Kha le, Jin. I in pawp dawn nia, mahse i taksa ah effect a nei nghal maithei bawk. I in tawh a nih chuan i taksa chhung atang khan engtin mah a lak let leh theih tawh dawn lo ania, chu chu i hre reng dawn nia." a han ti a. Jin-a chuan chhang miah lo chuan serum chu a la a, a in zo nghal vek mai.

Serum chu a kha em em a, a vawt deuh ruih bawk. Chutah a taksa chu a rawn lum pup pup a, a ban ruh tliak an tuam mek pawh chu chawp leh chilh hian a rawn dam nghal vek mai. Amah chu a chak sawt hian a inhria a, a danglam takzet. Jin-a chu a kun deuh ngal a, "Jin, i tha em?" tiin doctor Liang-a chuan a lo zawt a, mahse a chhang mai lo. A ban ruh tuamna bandage chu a han phelh a, "Ehe, ka ban ruh tliak kha a dam vek mawle." tiin mak a ti kher mai.

Dr. Liang-a chu a lo nui sak a, "A thawk e, ka damdawi chu a thawk e. Jin, mihring pangngai aia chak i ni ta." tiin a lawm kher mai. Chuveleh clinic atanga chhuah pah chuan, "Nichin-a ka hruaina che room ah khan min rawn zui rawh." tih leh kal a rual nghal a, Jin-a pawh chuan a zui ve nghal bawk.

Room chhung chu an thleng a, Dr. Liang-a chuan ninja uniform chu a la chhuak a. Jin-a pek pah chuan, "A hun a thleng ta e, Jin. Ka sawi ang khan he uniform hi uniform satliah a ni lo ania, ka pa in special taka min siam ngat a nih hi. Kum 33 chuang a upa ni tawh mahse, a la hmel hem eih lo ania. I ta a ni tawh e, Jin." tiin a pe a.

Jin-a chuan ninja uniform chu a han ha nghal sawk sawk a, Dr. Liang-a chuan hmuhnawm ti tak hian a lo en a. Nui sang chung hian, "I inhmeh kher mai, i ta tur diktak zawk a lo nih hi." tiin a chhuan hmel em em a. Chutah drawer a hawng a, a chhungah chuan ngunhnam pahnih sei tak mai, a kawm nena puan a intuam thlap hi a lo awm a.

Dr. Liang-a chuan a la chhuak a, Jin-a hma ah chuan a kawm chu a phawr a. A hriam hmel em em mai lehnghal, "Kha kha, kha ngunhnam kha a tak tak em ni?" tiin Jin-a chuan a lo zawt vat a. Dr. Liang-a chuan a lu bu nghatin, "Aw ni e, ka pa hman thin a nih hi. Kumtinin ka tat hriam ziah a, a tuiek mai loh nan tiin a enkawl uluk asin. Ka tarmawi vel mai mai thin a, mahse zanin atangin a hmanna tur diktak ah i hmang tawh ang. Jin, Lan-i tan chauh nilo, ka fanu tan pawh phuba min laksak thei dawn ta." tiin a lawm lutuk chu a hnuk a ulh hial mai.

Jin-a chuan ngunhnam chu a la a, a hnung lamah chuan a pai nghal a. Dr. Liang-a chuan Jin-a darah chuan a vuan a, "Anih leh Jin, eng nge i super hero hming ni ang?" uang deuh tak chung chuan a han zawt a. Jin-a chu a ngawi vang vang a, "Mi tanpui ngaite, mahni invenghim zo lo khawp a mi chak lo te tan an hlimthla nih ka duh, an mahni pui turin. Chuvang chuan mi ina min hriat dan tur chu... SHADOW a ni ang." tiin a chhang a.

Chu veleh Jin-a chu room tukverh ah chuan rang lutukin a va lawn kai a, a zuang chhuak ta daih mai. Dr. Liang-a pawh ava tlan phei a, Jin-a ramhnuai kara a tlan phei mek leh, awlsam taka thingkung a a pakai phei zawt zawt a hmuh chuan a khi suk a. "Yilong, tunah chuan phuba ka la ve thei dawn ta. Ka fanu neichhun min laksak a, mahse fapa thar min pe ta zawk a nih hi." tiin tukverh ah chuan a dak chhuah vauh vauh a.

******************************************

TO BE CONTINUE