SHADOW (A CHINESE ACTION FICTION STORY) Written by : Aaron Malsawmdawngzuala CHAPTER - 5

 SHADOW

(A CHINESE ACTION FICTION STORY)

Written by : Aaron Malsawmdawngzuala

CHAPTER -  5

*********************************************

Jin-a pawh chu a rawn harh chhuak zawk mai, a awmna hmun chu en kual nghalin a hawi hru hru mai a. Clinic pakhat chhungah a lo awm reng mai, a kut ruh tliak ni ngei a a hriat pawh chu tuam khawng a lo ni a, a lu chu a na takzet. Han thawh chhuah mai a tum a, mahse a taksa chu a sil em em a.

A che hleithei der lo mai, "Khawnge, khawnge ka awm? Eng nge awmzia, engtin nge hetah ka awm theih?" tin a phun nuah nuah chung chuan amah leh amah chu zawhna a inzawt mawlh mawlh a. Chutih lai tak chuan kawngka chu a rawn ri rak a, a hma zan lawka su tupa, doctor chu a rawn lut a.

A bula rawn kal pah chuan, "Good morning, i lo harh tawh maw? Eng nge i an a, ala na viau em?" tiin a rawn be nghal mawlh mawlh mai. Jin-a chuan a hrethiam lo takzet, a lo en hu ringawt mai a. Mahse zawhna zawh a tum lem lo, "Ka kal a ngai." tih ringawt chuan a chhang a.

Mahse chet a han tum a, a taksa a sil em avang chuan a che thei mai lo. Doctor chu a bulah chuan a rawn thu a, "Dr. Liang-a ka nia, nizana sutu che kha keimah ka nia. Kawng kawi laiah i rawn lang thut sia, a break ka lo rap hman tawh lo nen ka su ta mai che a nih kha. Ka tihpalh lutuk ania, min ngaidam dawn nia." inthlahrung tak chuan a han ti a.

Jin-a chuan a chhang mai lo, doctor chu a en vung vung ringawt a. thawk a han la deuh hak a, "A pawi lo, mahse ka kal a ngai." tih ringawt chuan a lo chhang leh a. Dr. Liang-a chuan zaidam tak hian, "I hmanhmawh viau pawh a ni maithei e, mahse tunah chuan han che vut vut chi ila ni rih lo ania. I ban ruh a tliak a, i kawng i sawh khaw lo bawk a. I hliam a dam nan hun i la mamawh ania, i chet vut vut chuan rei i daih lovang." a han ti dam dap a.

Chet tum chuan Jin-a chu a han insiam rem a, mahse a taksa na lutuk avang chuan a then chawk chawk mai. Si deuh hlarh hlarh pah chuan, "Hun ka nei lo alawm." a han ti leh hmuk a. Dr. Liang-a chuan a han thut hnaih sauh sauh va, "I hmanhmawh a ni maithei e, mahse hetia i chet luih vak vak chuan i taksa kha i tihnat belh thei ania. A thuhrimin, khawiah nge kal i tum reng reng a?" tiin a han zawt a.

Jin-a chuan a rilru ah chuan a tlanchhuah chhan te, relic a ruk anga puh a nih thute, a tlanchhuahna lamah hreh chung chung a Lan-i a kalsan thute chu sawi chhuah vek a chak kher mai. MAhse engmah a sawi duh mai bik lo, "Chutiang i tan a pawimawh lo." a ti leh hmuk mai, temple lama monk hovin an rawn zawn hmuh chu a hlau ber a ni.

Dr. Liang-a chu a han thaw hak a, "Ka chelh lui lovang che, mahse tunah rih chuan khawiah mah kal thei ila ni rih lo. I taksa khan chawlh hahdam ala mamawh lutuk ringawt, ngatan mah ngai lo angin awm mahla i taksa khan a peih rei dawn lo ania. Tunah kal mah la, thui i thleng dawn lo hrim hrim." a han ti leh a.

Jin-a chu a che hleithei lo reng bawk, doctor thusawi chu a zawm mai angai tih pawh a inhria. A taksa chu a chaklo takzet a, a taksa pum deuhthaw chu a na em em ringawt mai a ni. Chutah Dr. Liang-a bawk chuan, "Ni reilote tal chu chawl hahdam hram rawh, a nih loh chuan i thi mai ang. Ka pui ang che, a sutu che ka nia ka mawhphurhna alawm. Zawhna tamtak ka zawt dawn lo che, i hriselna kha ka ngaipawimawh a, chuzawng chu a nimai." a han ti dam leh dap a.

Jin-a chu a han ngawi vang vang a, "Ni khat, ni khat chiah ka awm anga, ka chhuak nghal ang." tiin a han chhang leh a. Dr. Liang-a chuan a lu a lo bu nghat nghat a, "A tha e, ka rawn kal leh ang. Chawl hahdam la, muhil hrih teh. Naktukah chuan i zia mai ang, tunah chuan i hliam te hi ala na deuh dawn a, i mut tam angai." tiin a tho deuh thut a.

A chhuah hma chuan rawn hawi let lehin, "I rilru i thlak a, hetah ila awm reng duh a nih pawhin buaina a awm lo ania. Khawi hmun atanga lo kal pawh ni la, enkawl che hi ka hna a ni." tiin a han nuih deuh suk a, a chhuahsan ta a. Jin-a chuan engtia han awm zel tur nge pawh a hre rih lo, khumah chuan mu lehin a inngaihtuah nasa kher mai.

*******************************************

Chawhma dar 11 vel a ni a, car dum nalh tak mai tlan mek chhungah chuan Yilong-a leh Liu-a te chu seat hnunglamah thu dunin an titi mek a. Yilong-a chu a han thaw deuh hak a, "Temple-ah chuan in va kal ta kha nia, ang nge chanchin ni ta?" tiin a han zawt a. Liu-a chuan Yilong-a lam chu ava hawi a, "KA rindan ang vel a ni, kum 22 kal ta a naute bo chungchang kan va sawi chiah khan a hmel a danglam vek. Engmah chu an sawi tha duh lo, mahse an hmel ah khan thil thup an nei tih ka chiang." tiin a lo chhang a.

Yilong-a chuan Liu-a mitah tak chuan a han en kar a, "Eng chungchang nge an sawi hrim hrim a?" tiin a han zawt leh a. Liu-a chu a han thu tha sauh sauh va, "Eng vak an sawi tha duh lo, mahse naute chungchang ka sawi chiah kha chuan an in en hrek hrek hlawm tih chu ka hria. Sawi tura min tih ang khan Guang-a police ten an man thu leh trafficking an neih thu a inpuan vel kha ka sawi ta vek a, mahse min chhang tha duh lo, chubakah eng emaw chu thup an nei tih an hmel atang khan ka hre thei." tiin a lo chhang leh a.

Yilong-a chuan a seat hnung chu a han ngheng deuh ar ar a, "Thup chu an nei ngei ang, eng emaw hriat chu an nei a nih chu." a han ti nuah nuah a. Liu-a pawh chuan a lu lo bu nghatin, "Ni chiah e, mahse chhanna mumal hriat a har khawp mai. Engmah chutiang kan hre lo tih hlirin min chhang a, mahse an hmel atang kha chuan hriat chu an nei ngei a ni." tiin a lo chhang leh a.

Yilong-a chu a melh ngai melh run chung chuan a han inngaihtuah vang vang a, "Chutia an thup ve khanglang a nih chuan, an thup nachhan nen lam kan hriatchhuah a ngai tihna a nih chu. Kha naute kha, ala dam a nih chuan.....saw temple nen sawn inzawmna an nei dawn tih ka chiang. Kan enthlak ruk a, kan hel deuh reng a ngai tihna a nih chu." a han ti chang deuh fak a.

Liu-a chuan a en hu a, "Anih leh kha naupang kha lo la dam pawh nise, lo thawn bo emaw, lo thi daih tawh ni ta se?" tiin a han zawt deuh hu a. Yilong-a chuan chiang deuh fek fawk hian, "Anih chuan tihluihna hmangin kan t(r)awng tir anga a nimai lawm, chutia kum hei leh chen an lo thukru a, an lo vneghim a nih te chuan, inrawlhna an nei ve tihna ania. Chuvang chuan ksaw temple saw, kan enthlak ruk reng angai tihna a nimai." tiin a chhang a.

Liu-a chu a han ngawi vang vang a, "Anih leh information engmah dawn chhunzawm ta lo ila, anmahni atang sawn? Ka sawi awmzia chu, engmah la sawi duh chuang si lo ta ang se?" tiin a han zawt leh hram a. Yilong-a chuan a melh ngai chu a han melh vung vung a, "Pressure kan tihsan deuh angai animai, an ngawih reng chuan a pawi dawn khawp a ni tih kan hriat tir ang. A t(r)ul anih phawt chuan, kawng dang kan dap leh mai ang." tiin a lo chhang leh a.

Mahse Liu-a erawh zawhna ala nei tlat, "Anih leh kha naute kha, lo la dam se. Puitling a ni tawh ngei anga, hmun dangah lo thawn bo tawh ta ang se engtin nge niang?" tiin a han zawt leh a. Yilong-a chuan Liu-a chu enin a han khi deuh suk a, "Kawng dang dapin kan zawng hmu em em ang, chumi tur chuan dawhtheihna kan neih angai. Kha naupang kha an lo thawn bo a nih tak tak chuan, monk ho hian warning pe tur emaw, venghim turin temple saw an chhuahsan nual dawn tih ka chiang." a han ti leh a.

Liu-a chuan a lu chu a han bu leh nghat nghat a, "Awle boss, ka hrethiam e. Hma ka lo la char char ang nga, saw temple saw ka lo enthla chhunzawm dawn ania." tiin a chhang a. Yilong-a chu a han khi leh suk a, "A tha e, chuan hei hi hre reng rawh...kan fimkhur a ngai ania. SAw monk ho sawn anmahni kan chhui mek a ni tih hi an hre chhuak tur a ni lo, an fing lutuk ringawt." a han ti leh a.

*****************************************************

MAster Chen-a chu a room chhungah chuan a melh ngai melh reng hian a thu ngawi vung vung a, a rilru a hah hmel kher mai. Chutih lai tak chuan kawngka chu a rawn inkik karh karh a, "Lo lut rawh." tiin MAster Chen-a chuan a lo chhawn vat a. Mahse a rin loh lutukin Lan-i a rawn lut tlat mai, a la thinrim hmel em em zui.

A hma takah chuan Lan-i chu ava ding a, "Pu, kan inbiak a ngai." a han ti deuh thawr a. Mahse Master Chen-a chuan zawi sap hian, "Ka buai rih lutuk, ka hman lo." a lo ti hmuk mai. Lan-i chuan chiang fek fawk hian, "Biak che ka duh, Jin-a chungchangah biak che ka duh." a han ti leh a.

Master Chen-a chu a rawn dak chhuak a, "Ka hria, a bo. A tlan bo, ka hria. A tlanbona lamah, security monk ho a khawih hliam nual bawk, ka hria alawm." a lo ti vin hlur mai. Lan-i chu a khi lui sak a, "Chulam sawi ka tum lo." a han ti dek dek a. Master Chen-a chuan vin lek lek hian, "Nizan a tlanchhuah pah khan thi lek lekin a unaute ngei, a zirtirtute ngei a sawisa asin." a han ti deuh lung lung a.

Mahse Lan-i chuan a aia vin hian, "Anih leh chu chu engvanga ti ta mai nge a nih i ngaihtuah ve em? Nangma tih tir a nih hi, a duh lo chungin a tih angai a nih hi. Pu, Jin-a kha a rilru a na takzet asin. Relic kha a ruk a nilo, mahse duhthlan tur i pe lova, a tlanchhuak ta a nih hi." a ti ve ta siah siah mai.

MAster Chen-a chu a sa zawk mai a, "Lan, Jin-a hian a ru lo tih chiang taka proof-na tuman kan nei lo. Report ka dawn angin amah hi rinhlelh ber a ni a, thuneitu ka nihna angin ka hna ka thawk mai chauh a ni." tiin a chhang a. Lan-i chu a lungawilo kher mai, "Ka hna ka thawk a? I rin zo lo a nih kha, ani chuan a ring takzet thin che kha ania. Eng nge alakah i phut a, a tihsual ni miah lovah inpuan luih tir i tum tihna em ni?" tiin a vin leh hrep mai.

Master Chen-a chu a tho thut a, "Aw ka hna ka thawk, he temple tan hian kum 60 chuang hna ka thawk tawh. Mimal induhsakna avang mai mai hian ka tunu ngei pawh ni mahla, i inrawlh a thiang lo. He temple-a chengte venhim hi ka hna a ni a, a awlsam lo asin." tiin a vin ve ta khur khur mai.

Mahse Lan-i chu a zam chuang eih lo, "Mimal induhsakna a? Hei hi mimal induhsakna lam a ni lo, Pu. Thudik sawi ka tum zawk a nih hi, Jin-a kha i tan a rinawmin a chhawr tlak takzet tih pawh i hria. Mahse a mamawh hunah che i awm ve lo, a thusawi awih lovin Ren-a thusawi zawk i awih a. He temple tana a thil tha tih zawng zawng te kha haiderin Ren-a, ka mi rin loh ber mai thusawi i ring zawk a nih kha." tiin a lo hnial let leh hram a.

Master Chen-a chu a han ngawi vang vang a, "Zirlaite zinga ka mi rin ber Ren-a thusawi kha ka ngaihthlak angai, ani khan engtikah mah dawt min hrilh hauh lovang." a han ti zawi deuh sap a. Lan-i chuan a mittui chu a khap per deuh sawk mai, "Mahse Jin-a thusawi kha chu i ngaithla ve duh lo a nih kha, insawifiahna hun pawh i pe duh lo. Ren-a'n a thil hmuh a rawn sawi a, chawp leh chilhin i lo ring nghal tawp a. MAhse ruk ru duh tur khawpa misual a ni lo Jin-a hi, nangpawn i hrechiang ber ang chu." tiin a lo chhang leh a.

Master Chen-a chu a han thaw deuh halh halh a, "Ni e, Jin-a kha chu ka hrechiang alawm. Ka enkawl seilian a, he temple ah ngei hian... mahse nizan khan monk tamtakte kha thi lek lekin a sawisa hlawm asin. Lan, thisen a chhuah a ni. Chu chu ka ngawihbo pui theiin i ring em ni, tunah a la tlanchhuak zui a nih hi?" tiin a han zawt let ve a.

Lan-i chuan a chhang mai lo, a han ngawi vang vang phawt a. Chutah chiang fek fawk hian, "Tihnat a duh hrim hrim angah i ngai thei amaw? Hetiang thil hi a thlen tir duh vang hrim hrim a nih i ring amaw? Pu, dawta puh a ni asin. Mahse nang chuan puih a hnekin i hrem a, a ringhlel nghal em em a nih kha." a lo ti leh hram a.

Master Chen-a pawh chu a mittui a rawn hnam ve sak mai, "Rilru nuam taka hetiang thil ti hi ka ni bik lo, Bawihte. He temple enkawl hi ka hna a ni a, report a luh avanga che chhuak mai chauh alawm ka nih." tiin a chhang zawi sap mai. "Chu tak chu i diklohna chu a ni, Pu. Kha information i dawn kha a famkim tawk lo, Jin-a hi eng ang mi nge a nih a, engtiang chiah a he temple tana lo thawh hlawk tawh nge a ni tih pawh ngaihtuah hmasa lovin Ren-a thusawi i awih nghal a, mahse tunah chuan siam that theih a ni tawh lo. Khawnge a awm tuman kan hre lo, tumah rin tur leh belh tur nei lovin amahin ramhnuaiah a awm mek asin." tiin Lan-i chu tap chung chuan a han ang leh bawrh bawrh a.

Beidawn hmel tak hian Master Chen-a pawh chu a han thaw hak a, "Ka tih tur ni a ka hriat, temple tana tha tur ni a ka hriat ka ti mai chauh a ni. Buaina hi ka duh bik lo, mahse buaina tam zawk a thlen hi ka hlau a ni." a han ti tham tiak a. "Mahse eng nge i thil tih hian hlawkna a neih han en teh, Pu? He temple in dan kan neih te, thuchhuah kan siamte hi a pawimawh lutuk tih ka hria. Mahse Jin-a hi chu zirlai dangte ang a ni lo, kan tan, mi zawng zawng tan hian a pawimawh bik asin. Kan chhungkaw zing ami a ni ve tho va, nangpawhin i fapa ang maiin i enkawl seilian a nih kha. Mahse tuna a chunga i thil tih avang hian a rawn let duh tawh lo hial maithei ania, i lakah hian a lungawi lo takzet asin, Pu." Lan-i chuan a lo ti leh a.

Master Chen-a chu a kun ta ngal mai, "Ka zawng hmu ang nga, hetah hian ka hruai let leh em em ang. Engkim ka siam tha ang nga, thudik chu ka hailang em em ang." a han ti zawi leh deuh sap a. "Hruai let satliang ringawt kha a ni lo ania, ani chuan  aduh ber chu amah i rinna leh a thusawi i ngaihtlak sak kha a duh ber zawk." tiin Lan-i chuan a lo leh chhang vat a.

"Ka tih tur chu ka hria alawm, BAwihte. Ka zawng hmu leh em em ang, mahse a harsa khawp ang."

"Nie, a harsa dawn. Mahse chu chu kan tih theih awmchhun a ni a, keiman ka rin ang hian nang pawhin i rin angai. Pu, Jin-a hi misual a ni lo. Tunah phei chuan...a ril a tam awm si a. A kalna pawh a hre mang miah lovang, ka ngaihtuah takzet  a ni."

Master Chen-a chuan a tunu kutah chuan a vuan a, "Lungngai suh, Bawihte. Ka tiam a che, kan zawng hmu em em ang." tiin a chhang a. Tichuan Lan-i chu room atang chuan a chhuak a, Master Chen-a pawh chu a rilru a hah kher mai. Lan-i thusawi chu a han ngaituah chiang a, khatia Jin-a misual anga a ngai ta mai chu a inchhir ve rum rum mai.

********************************************

Chhun a ni a, Jin-a pawh clinic chhungah chuan a la mu reng a. A rilru a insual nasa kher mai, eng tin nge a awm chunzawm zel ang tih chu a ngaihtuah nasa em em a. Chutih lai chuan kawngka a rawn inhawng a, Dr. Liang-a chu a rawn lut a. Eitur a rawn dah lut a, "I harh maw kha? I ril a tam tawh awm si a, hei eitur ka lo ken che a." zaidam tak chuan a rawn ti a.

Jin-a chu khum atang chuan a tho chhuak a, a bula thutthlengah chuan a thu a. A taksa chu a la sil thum mai, a kut pawh ala intuam khawng bur reng a. A lu ah chuan bandage tuam sak a ni bawk a, eitur pawh chu a ei ta lem chuang lo. A lu na lutuk chu a han dawm vang vang a, "Khawnge ka awmna hi ni reng reng?" tiin a han zawt a.

Dawhkana eitur dah pah chuan, "Ka clinic ah ka tih kha, hei hi ka in a ni nghal bawk a. Nizan vang khan tihpalh nawn leh aw, ka su ta mai si che a, a pawi ka ti takzet." tiin Dr. Lianga chuan a lo chhang a. Jin-a chu a han ngawi vang vang a, "Tinge damdawiinah min hruai zawk loh va?" a ti hu mai.

Dr. Liang-a chu a khi suk a, "Khami kawng atang kha chuan a hla em alawm, i serious tawh si a, hun a uiawm dawn sia. HEtah ka inah ka hruai thei tho che a, chuvang chuan doctor ka ni ve tho bawk a, ka hruai ta mai che a nih hi." tiin a lo chhang leh a. Jin-a pawh chu a han thaw deuh hluai a, "KA lawm e, Dr. Liang. Engtin nge ka rulh let ang che ka hrelo, mahse ka lawm takzet ania." a han ti ve a.

"Lawmthu sawi a ngai lo, kha eitur hi ei rawh. I nawm deuh tawh chuan a tha a nih chu, indim nasa rawh aw." tiin Dr. Liang-a chuan a lo chhang leh a. Jin-a chuan eitur chu a han ei a, mahse a ei tlem kher mai. Jin-a chu a han ngawi deuh vang vang a, "Ka hming chu Jin Wei ania, Golden Lotus Temple-ah sawn ka cheng thin a." a rawn ti chhuak deuh thut mai.

Dr. Lianga chuan a en deuh hu a, "Sawlai hmun saw ka in, kum tamtak, ka pian tirh atang tawh a ka chenna a ni a. Ka hlim a, ka lungawi tawk hle thin bawk. Mahse nizan hmasa lawk khan kan temple roh em em mai, relic pakhat chu ruk bo a ni a. Tah chuan kei hi, min... min puh a ni." tiin Jin-a bawk chuan a han sawi chhunzawm a.

Dr. Liang-a pawh chuan ngun takin a thusawi chu a lo ngaithla a, Jin-a chu a han thaw leh deuh hak a. Thinrim hmel tak hian a kut chu hum in, "Ka thiantha ber anga ka ngaih, REn-a... ama ruk kha a ni. Relic a ruk zawh khan ka room ah, ka muthilh hlanin a lo kal a, ka thawmhnaw bawmah a rawn dah a ni. Ka ruk anga a lan theih nan, tichuan mi zawng zawng, ka mentor te, monk dangte thlengin keima ruk angah an ngaih phah ta vek a. KA insawifiahna tuman min ngaihthlak sak duh lo, chuvang chuan ka ran tlan chhuak ta tawp mai a ni. Thudik hai lan a nih hma chu saw temple ah sawn ka let tawh lovang, Ren-a saw amah ngei a inpuang tur a ni." tiin Jin-a chuan a sawi chhunzawm zel a.

A chawl deuh dat a, "Mahse... ka let leh ngei chu a ngai. Eng ber nge ka tih dawn ka hre lo, mahse Lan-i, Lan-i tan ka let leh chu a ngai a ni. Mahse tunah rih chuan, misual anga min ngaitute bulah sawn ka let thei rih alo a ni." a han ti leh a. Dr, Liang-a chuan a lu a lo bu nghat nghat a, "I rilru a hah dawn hle mai, Jin. Inphatsanna, inbumna tih te hi chu a na alawm. Mahse nangmah chauh i ni lo ania, keipawhin ka tawng ve tawh alawm." tiin a lo hnem a.

Jin-a chuan a han melh deuh hu a, "Eng nge i sawi awmzia?" tiin a lo zawt nghal vat a. Dr Lianga chu a han thu tha sauh sauh va, "Kum 20 kal ta khan ka fanu ka chan a, a hming chu Xinyi a ni a. Kum 16 chauh va upa a ni, ka tan chuan ka khawvel neih chhun, ka engkim a ni. Mahse tum khat chu kidnap a ni a, khatih lai khan kan ramah hian human trafficking a hluar hle a. Chuta an mastermind ber chu Yilong-a a ni a, drug lord, mafia hlauhawm tak leh jail bang pawh zut fo a ni. Mahse sum a nei ngah em a, politician thian a ngah bawk si nen, a chhuak leh thei mai zel a. Ka fanu chu a school bang an lo kidnap a, hralh an tum a ni. Mahse tlanchhuah a tumna lamah an kaphlum a, Yilomg-a tih tir, a order pek a ni." tiin a fanu a chan dan chu a sawi ve ta a.

"Kum eng emaw zah chhung Yilong-a lakah hian phuba lak ka tum tawh a, mahse keia hneh chi zia zang a ni lo. Venghimtu a ngah si a, mi hausa lian tak tak te nen an thawk ho thin bawk si. Tih ngaihna a awm lo ka tan, ka fanu phuba ka laksak thei lo hi hrehawm ka ti thin khawp asin." tiin Dr. Liang-a bawk chuan a han sawi chhunzawm leh a.

Jin-a pawh chuan pawi tih hmel tak hian, "A zia lo hle mai, i tan a na hle dawn a nih chu. Mahse chu chu tinge min hrilh chhan, keimah nen eng nge inzawmna tur a neih a?" tiin a han zawt a. Dr. Liang-a chu a tho va, cabinet pakhat chu hawngin damdawi bur te tak te hi a rawn lek kang a.

Jin-a chu a hmuh a, "Hei hi serum a ni a, ka siam chhuah a ni. Scientist ka ni a, hemi siam chhuah nan hian kum tam tak ka hmang bawk. A hming chu Azuri Dawn a ni a, he serum hian mihringah chakna, tuan ranna leh chet ranna te a thlen thei a ni. Formula ang deuh a nimai, mihring pangngai a let fe a chakna pe theitu damdawi a nih hi." tiin a hrilh a.

Jin-a chuan a hrethiam lo kher mai, "Eng nge awmzia, ka van hrethiam lo?" a ti hu mai a. Jin-a bulah chuan ava thu hnai a, "Xinyi thih hnu khan Yilong-a hi keimah chauh chuan ka bei thei dawn lo, phuba ka la thei dawn lo tih ka hria a. KA medical knowledge leh ka thiamna dangte hmang tangkaiin hei hi ka siam chhuak a, advance bio chemistry leh ingridients vang tak tak te ka la khawm a, ka siam chhuak ta a ni. Mahse ka siam chhuah meuh chuan ka upa tawh lutuk, ka taksa ah ka risk ngam tawh lova, ti hian ka kawl ta tawp mai a nih hi. He serum hian min ti chak thei, mahse taksa hrisel pangngai ah lo chuan a risky lutuk thung." tiin a han hrilh fiah leh a.

Jin-a chuan damdawi chu a han en vang vang a, "Chuan.. hei hi ei turin min duh tihna em ni?" tiin a han zawt leh a. Dr. Liang-a chu a han thaw hak a, "A hamngthiamtu tur, a eitu tur diktak hi an awm ka ring thin a, ka lo ngaichang char char thin alawm. Yilong-a te ang mi hlauhawm lutuk, thil tithei bawk si bei tur chuan he damdawi hi ei ngei ngei angai. Chu chu nangmah hi i ni thei asin, Jin. Ka phuba min lasak thei ang nga, nang pawhin i hmang tangkai thei bawk dawn asin." tiin a chhang a.

Jin-a chu a rilru a insual nasa kher mai, "Ka... ka hrethiam lo, Dr. Liang. Helai hmunah hian tumah bei tur a lo kal ka ni lova, hmelma siam tura lo kal ka ni lo bawk. Thudik hailan a nih hunah temple-a let leh ka tum a, chuzawng chu a nimai. Tualthah hmang nih ka duh lova, hmelma thar siam pawh ka duh hek lo." tiin a lo chhang daih mai.

Dr. Liang-a pawh chu a khi suk a, "Tualthah hmang ni turin ka ti reng reng lo che, mahse rorelna dik hailan dawn chuan chak taka kan awm angai. Yilong-a hian a thil tih man hi hmu ngei se ka duh a, ka fanu a thah avang hian phuba lak ngei ka la duh fan a ni. MAhse keimah chauh chuan ka ti thei dawn lo tih ka hria a, nang hi Pathianin min pe ni ang mai hian ka hria. I danglam tih ka chiang, midang ang mai mai i ni lo tih hi ka hria a ni. Mahse ka nawr lui lovang che, Jin." zaidam tak chuan a han ti leh a.

Jin-a chuan a chhang lo, a ngawi vung vung ringawt a. Chutah Dr. Liang-a bawk chuan, "Inngaihtuahna hun i nei alawm, hmanhmawh suh. A risky viau tih chu ka hria alawm, mashe taksa chak tha tak i nei a. Nangmah ah chuan hlauhawm a awm ka ring lo, i tan vek ania." tiin a tho va, a chhuahsan ta a.

*************************************************

Tlai lam a ni a, khua pawh a thim deuh tan tawh. Lan-i chu temple atanga hla ve deuh tak, mahse anmahni ram chin ni tho si, fal ve takah chuan amah chauh chuan a tei kual a. Jin-a chu a ngai tak zet a, a ngaihtuah takzet bawk. Chutih lai chuan temple ram chin, luh tan tirhna bula duty mek, monk pahnih te chu tranquilizer silai hmangin tute emaw hian an rawn kap thut mai a.

An che hman lo, nikhawhrelovin an let nghal ve ve a. A kaptute chu an rawn chhuak a, mipa hlir 10 vel, coat suit dum vek a inthuamte an ni. Chumite chuan monk pahnih, nikhawhrelova mu mek te chu an rawn pan hnai a. An han en vang vang a, an zinga pakhat chuan ral khat atanga Lan-i lo kal mek chu ava hmu a, bengchheng lo turin a thiante chu a hrilh a.

Lan-i chu a rawn thleng a, mahse khang mite kha hmuh tur an lo awm tawh miah lo, monk pahnih lo let der a hmuh chuan ava tlan phei a. A sawi dun vak vak a, mahse an harh thei der lo mai. A ngaih a tha lo nghal em em a, a han hawi kual vel a. Mahse tumah midang awm a hmu bawk si lo, tanpuina koh vat a ngai a ni tih hria in temple lama let leh a tum a.

A tlan nghal char char a, mahse rei pawh a tlan hman lo. Chung mipa sawm rual vel zet chu an rawn lang leh ta thut mai a, Lan-i pawh a ding nghal chat mai. An hual bet nghal der mai a, "Tute nge in nih?" tiin a zawt hlawm a, mahse tumah chuan an chhang lo. Rum em em hian Lan-i chu an melh khur hlawm mai, "Tute nge in nih ka tih chu?" tiin a han vin leh deuh thak a.

Mahse tumah chuan an la chhang chuang lo, tlan a han tum ngawt a. Mahse an lo hual bet hman leh zel bawk si, tumah erawh chuan an khawih bik chuang lo. A tlanchhiatna lai tur chu an lo dang zel a, chutah a hnunglam atang chuan pen thawm a hria a. A va leh hawi vat a, patling pakhat, lukhum parh khum, coat suit ha hi a rawn phei a.

A hnungah chuan mipa rual 6 velin an rawn zui bawk a, chupa chu tudang nilovin Yilong-a ngei kha a ni. Lan-i chu a rawn pan a, a hma takah chuan a ding a. Lan-i chuan a hlau kher mai, tlanchhiat a han tum leh a. Mahse mipa ho chuan an man bet a, Yilong-a hma takah chuan an thingthit tir ta ran mai.

Yilong-a chuan Lan-i chu a han en vang vang a, "Tu nge i nih, eng vanga hetia min ti ringawt nge i nih?" tiin Lan-i chuan a lo zawt leh a. Ring leng lawng hian Yilong-a chuan, "Liu, henu hi i hmu tel ve em?" tiin a han zawt a. Chutah a hnung atang chuan Liu-a chu a rawn kal phei a, Lan-i chu a han en vang vang a.

Lan-i chuan tunge a nih a lo hrechiang ngang mai, a chhan pawh zing lamah naute bo chhungte anga rawn insawi kha a nih vang a ni. Liu-a chuan a lu a han bu nghauh va, "Aw, henu hi ka hmu ve ngei alawm. Tukina temple-a kan kal khan, naute chhungte anga kan insawi khan a hmel kha ka lo notice ru reng alawm. A mangan hmel em em a, eng emaw chu hriat a nei ngei ngei ang." tiin a lo chhang a.

Lan-i chuan rum zet hian Liu-a chu a melh a, "Nang hi....engvang nge? Engvanga hetia ti nge in nih?" tiin a vin hrep mai. Yilong-a chu rawn inrawlhin, "Nang zawk hian naute chungchang chu hriat i nei em ni? Temple ah sawn ala awm em?" tiin a han zawt ve ta khur khur mai a. Mahse Lan-i chuan a chhang lo, a ngawi reng ringawt a.

Chutah Yilong-a chuan Liu-a chu a han en leh a, "Eng dang nge ila hriat?" tiin a zawt leh a. "Tukin kha MAster Chen-a bulah khan naute chungchang kha ka sawi a, an vai mai khan an hmel a dik lo ka tih tawh kha. Mahse henu hi, a mangan hmelin a hmel kha a danglam fal a ni." tiin a lo chhang leh a.

Chuveleh Lan-i chuan, "Eng tin nge kum 22 kal ta a naute bo chu keiin ka lo hriat theih ang? Kum 18 lek ka nih hi, chungte chu ka pian hma daih a thil thleng a nih chu." a lo ti vin leh hlar a. Rum zet hian Yilong-a chuan a melh a, "Ngawi hmak rawh, nakinah i la tawng dawn tho tho." tiin a han zi mar vel talh talh a.

Nui deuh sak chung hian, "Ti hi chuan henu hi a awm hnai bawk a, temple va luhchilh vel a ngaih dawn loh hi. A hmui tuam sak ula, van lamah rawn hruai rawh u." tiin a kal ta daih a, Liu-a chuan a zui ve nghal bawk. Lan-i chu a ding a, tlan a tum leh a. Mahse a ngai te ang bawkin mipa ho chuan an lo man bet nghal a, au a tum a, mahse a ka an hup sak nghal bawk.

An motor dahna thleng chuan an zawn phei a, Lan-i chu a au thei der mai si lo. A rilru chuan Jin-a a au mawlh mawlh a, mahse Jin-a erawh a awm hla lutuk tlat. Yilong-a leh a hote chu motor chhungah chuan an lut a, Lan-i pawh chu a seat hnunglamah a kut phuarh betin an thut tir ve bawk a.

******************************************

TO BE CONTINUE