SHADOW (A CHINESE ACTION FICTION STORY) Written by : Aaron Malsawmdawngzuala CHAPTER - 3

 SHADOW

(A CHINESE ACTION FICTION STORY)

Written by : Aaron Malsawmdawngzuala

CHAPTER -  3

***************************************************

Zan rei tawh tak mai a ni a, Ren-a chu ama room ah chuan mu in a inlet a inlet a, a muhil thei thlawt lo. A rilru ah chuan Jin-a ringawt chu a awm a, a ngei mai pawh a ni tawh lo, a huat hian a haw hluah hluah hi a ni ber mai. Zingkar lama mi zawng zawng hriat leh hmuh laia Master Xu-a'n a hauh laite, a zah zia te chu a ngaihtuah let a.

A thinrim lutuk chu a insawh a insawh mai a, "Golden Boy hi a ni ringawt, duhsak bik hlawm lutuk mai." tiin a phun nuah nuah a. A lung phu pawh a ri dup dup a, amah chu a sa huam huam thei hialin a inhria. A muhil thei thlawt lo, a tum ve ngial pawhin a mitthla ah chuan Jin-a vanga mualpho taka hauh a tawh lai bawk chu a rawn lang leh thin a.

Eng tin emaw tak, Jin-a chu mualpho taka siam ve chu a duh a ni. A mutna matress chu a chum ri leh bur thin a, eng thil ber nge a tih ang a hre si lo. A inngaihtuah vang vang hnuah chuan eng emaw ni tak chu a hre chhuak ta, a tho nghal nalh a. Nui deuh sak chung hian, "Engkimah a ber amaw inti suh, zanin hian chu chu a tawp ang." tiin a phun sap a.

A room atang chuan a chhuak a, midang harh hlau tak chung si chuan temple corridor ah chuan a phei dan dan a. Jin-a laka a thinrimna chuan a bual a tawh hi a ni ber, thawm dim tak chuan a phei zel a. Store room lam pan chuan a phei ta daih mai, a tum ber chu, store-room chhunga mi, an temple tana hlu em em mai leh MAster Chen-a pawhin a roh em em, Golden Lotus Amulet chu ruk chhuah a tum a ni.

Store room chahbi dahna pawh a hre vek a, tichuan fimkhur tak chuan store room chu a hawng a. Tichuan a chhungah chuan a lut a, thil hlu tak tak, man to hmel tak tak chu a lo awm teuh mai. Chutah a lai taka awm, Golden Lotus Amulet chu a va melh nghal chat a. A va pan zel a, amulet hma takah chuan a ding a.

Thawk a han la te te a, "Jin, tunah chuan Golden Boy nilovin, rukru i ni tawh zawk dawn." tiin a nui var var a. Tichuan amulet chu a la a, a mutkawr hak lai hnuaiah chuan a fun tha mawlh mawlh a. Store room chu a chhuahsan a, tala in a kalh leh thlap a. Tichuan thawm dim tak leh fimkhur tak chung si chuan Jin-a room lam chu ava pan leh ta tham tham mai, kawngka chu zawi muang chuan a hawng a.

Jin-a chu a lo mutui ngang mai, a lo hnar ang suk suk a. Thawm dim thei ang ber chuan Jin-a thawmhnaw dahna lam chu a pan a, tichuan amulet chu a thawmhnaw kar, thuk thei ang berah chuan a hnawh lut a. A chhuah hma chuan Jin-a muhil lai chu chiang tak hian a en a, "Naktuk ah chuan i chak lovang." tiin a phun sup a, a chhuahsan ta a.

**************************************************

Corridor lamah chuan let leh in ama room lam chu Ren-a chuan a pan phei leh mek a, chutah a hma zawna Lan-i lo phei mek a hmuh chuan a phu nasa kher mai. A ding chat a, Lan-i pawh chuan a rawn hmu ve nghal. Ren-a che lai lutuk chu a thin a phu nghal dup dup mai, "Ehe, Ren? Tun ang zanrei tawh ah, eng nge i tih a?" tiin Lan-i chuan a rawn zawt ta reng bawk a.

Ren-a chuan sawi mai tur a hre lo, "Lan, nang ni nimaw? Ihh, englo, ka mu thei lova. Nangpawh i mu thei lo em ni?" a ti bah nuai mai. Lan-i chuan rinhlelh hmel tak hian a en vang vang a, "Jin-a room atanga i rawn chhuak lai kha ka hmu a, eng nge iva tih a?" tiin a lo zawt leh ta mai a.

Ren-a chuan a hlauthawng tawh takzet, mahse a han nui lui deuh suk a. A lu thak lo pui chu a hiat nauh nauh va, "Nia...ka va, ka va check zuai mawle. A training naah a hah thei sia, a damloh ka hlau mawle." tiin dawt a han sawi leh zung zung a. Lan-i chu a ngawi vang vang a, "A nih chu, zan a rei tawh sia....keipawh ka room lamah ka va phei tawh ang e, nangpawh mu tawh rawh." tiin a chhang mai a.

Ren-a chuan a lu a bu nghauh va, "Nangpawh le, ka kal aw.." tiin a kal nghal thurh a, a la hmanhmawh em em zui. Lan-i ngaih chu a tha chiah lo, Ren-a phei mek chu a en zui vawng vawng a. Jin-a room chu ava en leh a, ngaih tha chiah lo mahse a room lam pan chuan a phei ve ta zawk a.

Ren-a pawh a room ah chuan a lut a, khumah chuan thu in a thaw halh halh mai. A hlauhthawn em avang chuan a thlan a tla bawrh bawrh a, "Min hrechhuak lovang, min ringhlel lovang." tiin amah leh amah chu a inhnem mawlh mawlh a. A chil a lem dawk a, "Tuman an hre lovang, chuan.. Jin-a ruk amaw an ti vek ang." a han ti zawi leh sap a.

**********************************************

A tuk zingah chuan hma takah Master Chen chuan temple chhunga cheng zawng zawng, zirlaite, monk te, hmeichhia leh naupang thleng chuan a kai tho vek a. Temple kawtzawlah chuan an ding thap hlawm mai, Master Chen chu a rawn pen chhuak a. A hmel en chuan a lawm lo tih a hriat hle, a meng rum em em mai a.

Ring tak hian, "Tukin zingah kan cleaner pakhat hnen atangin thu lawmawm loh tak mai ka dawng a, kan Temple tana hlu tak mai, kan rohlu, kan relic pakhat, Golden Lotus Amulet chu ruk bo a ni." a ti ta mai a. Mipui ho chuan mak an ti takzet, an phun ri nghal sap sap hlawm a.

Master Chen-a chuan sawi zawm zelin, "He relic hi kan tan a hlu em em a, eng ang a man to pawh nise kan hralh phal lo a ni.A ru botu chu tunah rawn inpuang rawh u, a nih loh chuan in room ka check vek ang." a ti ta khur khur mai a. Mipui ho chu an reh thiap mai, an inen hru hru hlawm ringawt mai a.

Chutah Ren-a chu a rawn pen chhuak a, "Master, nzian khan...zan rei tawh lam khan... Zun ram thiar turin pawn bathroom lam ka pan a. Tah chuan Jin-a store room a pan mek lai hi ka hmu a ni, a ru e chu ka ti lo, a mu thei lo a chhuak thawveng pawh a ni thei tho va.." a rawn ti ta zuah zuah mai.

Mipui chuan Jin-a chu an en ta thup mai a, ani lah a lo hrethiam lo nasa mai. Phawk hru hian Ren-a lam chu ava hawi nghal a, "Eng a? Nilo, a awihawm loh lutuk. Dawt a nih chu, nizan te chuan ka mu hma lutuk. Ka chauh deuh avangin hma takah ka mu a, ka room ka chhuahsan tawh lo hrim hrim." a ti nghal deuh chiam chiam mai.

Ren-a lah chuan confi zet hian, "Rukru ah ka puh che a ni lo, Jin. Hetianga kan amulet ber a lo bo takah chuan nizana ka thil hmuh te kha MAster Chen-a bulah ka sawi mai chauh a ni." a lo ti sam et mai. Chutah amah bawk chuan, "MAster, khami hnu khan ka mu leh mai a. MAhse ka ngaih a tha chiah lova, a roomah pawh ka va kal nghe nghe alawm." MAster Chen-a en chung chuan a han sawi zawm nghal zat a.

A tu a te mai pawh chuan mak an ti em em a, Jin-a chu an en thup mai. Chutah Ren-a bawk chuan, "Min awih loh chuan Lan-i hi in zawt thei ang, Lan-i nen hian zanlaiah chuan kan intawk nghe nghe alawm. Min hmu alawm, Jin-a room atanga ka rawn chhuah lai pawh a hmu vek ang chu." a han ti leh zuah zuah a.

Jin-a chuan Lan-i chu a en a, "Lan, tak tak em ni? Nizanah ka roomah Ren-a a rawn kal maw?" tiin a zawt a. Lan-i chuan hreh hmel tak hian, "Aw, i room bulah kha chuan ka hmu ngei alawm." tiin a lo chhang a. Jin-a chu a lungawi lo kher mai, "Thi atthlak tak a ni, Master. Tukina ka thawh hma kha chu nizanah pawnah ka chhuak lo hrim hrim, Ren-a hian dawt a sawi a ni." a ti ve ta siah siah mai a.

REn-a lah chu a lo pawr ve nghal a, "Dawt ka sawi lo, i theihnghilh tawh aniang chu mawle.." a lo ti ve pung pung mai. MAster Chen chuan a ban a phar a, "A tawk, ngawi rawh u. Jin-a room chu kan dap ang, chutah chuan thudik chu a lo lang mahna." a rawn ti leh lauh lauh mai a.

Jin-a pawh chuan a lo phal khawp mai, "Tehreng mai, dap ta che u." a han ti ve ngat a. Tichuan Jin-a room chu an dap ta a, Lan-i pawh chuan nuam lo a ti kher mai. An zawn mek lai chuan Master Xu-a chuan Master Chen-a chu va bia in, "Master, keichuan Jin-a ruk a nih hi ka ring thei lo. Chubakah engtin nge Ren-a hian a puh nghal chat theih reng reng? Mi rinawm tak a ni a, rukruk hmang chu a ni lo tawp ang." tiin a hrilh a.

Master Chen-a chuan a hma zawn en reng pah chuan, "Anih Ren-a sawn dawt a sawi i tihna em ni?" a lo ti hmuk mai. Master Xu-a chuan inthiam loh hmel tak hian, "Aih, chutiang lam ni love.." a ti dek dek chu Master Chen-a chuan, "Anih chuan lo nghak phawt rawh, thudik chu a lo lang chhuak mai ang." a lo ti leh hmak mai.

Master Xu-a pawh chu a ngawi ta a, Jin-a room chu an dap chhunzawm zel a. Pawna lo awm mek, Jin-a chuan lungawi lo tak hian Ren-a chu ava pan a. Thinrim tak hian, "Tinge dawt i sawi, Ren? Nizan ah Store room lamah ka kal lo, engthil nge maw i hriat le?" tiin a vin deuh khur khur a.

Ren-a lah chuan dam dap hian, "DAwt ka sawi lo, Jin. Keipawn i ruk ka ring bik lo, nizan khan ka hmu chiang che em a ni, i hre tawh lo aniang." ngeiawm tak si hian a lo ti let deuh zek mai a. Jin-a chu a thinrim kher mai, "Engmah ka ru lo, rukruk hmang ka nih loh zia chu i hria." a han ti leh khur khur a.

Ren-a chuan ngaihsam hmel tak hian, "Kan la hria ang chu." a lo ti leh hmuk a. Chutah monk pakhat chuan, "Master Chen, kan hmu e." a rawn ti ta lauh lauh mai. Mipui mak ti chu Jin-a room lam chu an en thup a, chutah monk ho chu an rawn chhuak a. A hmasa ber ami chuan Relic chu a rawn khai chhuak ta va va mai, Jin-a leh Lan-i chuan phawk em em hian an lo en hu a.

Monk chuan MAster Chen-a chu relic rawn pek pah chuan, "Jin-a thawmhnaw karah kan hmu a ni, MAster." tiin a rawn sawi leh a. Mipui chuan mak an ti ngang mai, Ren-a erawh a lo khi suk suk a. Master Xu-a chuan mak a ti lutuk chu a ka hau mai a, "Nilo, thil theih a ni lo. Jin-a hian a ru lo tawp ang, ka awih lo." a ti nghal chiam chiam mai a.

Lan-i pawh chuan Jin-a chu a en hu a, "Nilo Jin...eng nge awmzia?" a ti chung mai a. Jin-a chuan mak ti tak hian Relic chu a en a, "Aih, ka ru lo. Ka dah a ni lo, tu emaw in ka ruk ang turin a dah a ni." a ti nghal chul mai a. Ren-a lah chuan ngeiawm tak hian, "I room chhungah hmuh a ni bawk sia lawm, Jin." a lo ti leh deuh kher a.

MAster Chen chuan Jin-a chu a rawn pan hnai a, "He Golden Lotus Amulet hi i room ah hmuh a ni, Jin." a han ti chak fak a. Jin-a chuan mangang tak hian, "Ni lo, ka ruk a nilo, Master." a ti lawm lawm a. Master chuan chhang lovin mipui lam chu a en a, "Jin-a tih loh chu in kal thei e." a ti ta hmak mai a.

Mipui chu an kal darh nghal sup sup a, Ren-a leh Lan-i erawh an la kal mai lo. Lan-i chuan Jin-a chu a en ngawih ngawih a, "Jin, ka room ah lo kal rawh." tiin a lut hmak a. Hreh tak chung chuan Jin-a chuan a zui lut a, Master Xu-a pawh chu a room lamah a kal ve ta daih a, REn-a pawh chu a kal sawn a, Lan-i erawh a la ding ngawi reng.

*********************************************

Master Chen-a chu a room chhungah chuan Jin-a nen chuan an awm a, Jin-a chu a hma takah chuan a ding a. A ni erawh a thu thung, Jin-a chu chiang takin a en a. Thaw deuh hakin, "Jin, tun chiah ka zawt tawh ang che. Eng vanga ru chhuak nge i nih?" tiin a zawt leh a. Jin-a chuan zawi sap hian, "Ka ruk a ni lo, Master." a ti tham tiak a.

"Hlauthawng suh, inpuang mai rawh. A chhan sawi bawk la, ka ngaidam ang che." Master Chen-a chuan a han ti chak leh fak a. Jin-a chuan zah tak chung si chuan Master Chen-a chu a en a, "Master, ka ti tak tak. Tu emaw chuan min puh a ni, ka ruk ang turin kha relic kha ka room ah a dah a ni." tiin a lo chhang leh a.

"I ruk angin an bum che angah i ngai amaw? Jin, Lan-i pawhin Ren-a'n a rawn enfiah lai che pawh a hmuh ve che kha, an sawi vek kha. Chuan tunah, i roomah kan hmu leh chu a nih hi."

"Ka tho chhuak lo hrim hrim, nizan kher kher kha chu zanlaiah pawh ka harh lo. Ka muhil tui lutuk, Ren-a hian min bum a tum a ni."

"Lan-i pawhin Ren-a a hmu a, Ren-a thil sawi zawng zawng nen engkim a inmil vek. Zep suh, Jin."

Jin-a chu a lungawilo takzet, a kal hma deuh hret a. Master Chen-a chu a mitah tak a en a, "Master, ka ruk a nilo tih i hmingchhalin ka sawi ngam e. Kha relic kha eng atan nge ka tih reng reng ang nga? Rukna chhan tur pawh ka nei hleinem, khawngaihin min ring rawh." a han ti leh a.

MAster Chen-a chu a han inngaihtuah vang vang a, "A tawk rih e, Jin. Keipawhin chutin i ruk mai duh ka ring bik hleinem, mahse thudik a lan chhuah hma chu room ruak lamah sawn i awm char char rih a ngai dawn a ni. Kan phalna lo chuan lo chhuak suh ang che, a chiang em?" a han ti vin deuh thak a.

Jin-a pawh chu a beidawng takzet, "Awle, Master." tiin a chhang ta tawp a. Master Chen chuan a ban vai pah chuan, "I kal thei e." a han ti leh a. Jin-a chu a chhuak a, room ruak lam pan chuan a kal hnak hnak a. Master Chen-a room bulah chuan MAster Xu-a chu a lo ding reng a, an thusawi chu a lo ngaithla ru vek a ni.

********************************************************

Ren-a chu tual zawlah chuan a mah chauh chuan a lo practice a, a tiang ken lai chu a lo vai vir vut vut mai. Master Xu-a chu a awmna lamah chuan a rawn kal a, Ren-a practice lai chu a en vang vang a. Jin-a ruk a ni lo tih chu fiahna engmah awmlo mahse a hrethiam nghal vek a, Ren-a chu a ringhlel takzet.

A va kal hnai zel a, "Ren?" tiin ava bia a. Ren-a pawh chuan a thil tih lai chu a tawp san a, "Master Xu, eng nge ni ta?" tiin chibai a lo buk deuh thlap a. Master Xu-a chuan a han melh vang vang a, "Kan inbiak lawk angai." a ti ta mai a. Ren-a chuan a hlauthawng nghal hle mai, "Master Chen-a bulah ka sawi tur ang chu ka sawi zo vek tawh." tiin a lo chhang hmak a, a kut chu a humruh nasa mai.

Master Xu chuan a pan hnai zel a, "A nih chuan han sawi leh teh, eng thil chiah maw nizanah chuan i hmuh a?" tiin a zawt deuh khur khur mai. Ren-a chu a zam ru angreng hle a, a tawlh hnung deuh hret hret bawk a. A aw te chu han thian vel kharh kharh phawtin, "Ih, ka muhil thei lova. Boruak thianghlim dawng turin pawnah ka chhuak zuai a, zun ram thiar pahin ka tia. Jin-a kha a room atanga a chhuak lai ka hmu a, store room lam ka a pan nghal a ni. A tir chuan a kal kual vel mai mai turah ka ngai a, mahse zingah khan Master Chen khan relic a bo thu a sawi takah chuan tiin ka thil hmuh ka sawi chhuak ve mai a lawm." a han ti khur deuh dar dar a.

Rinhlelh hmel tak hian Master Xu chuan en lehin, "Chumi hnuah a room ah i va lut tiraW? Tinge i va luh?" tiin a zawt leh a. Ren-a chu a ngawi vang vang a, "Ka.. ka mu thei lo ka ti tawh kha. A lo let leh tawh em tih check ka duh a, ka va lut a. A lo awm a, a lo muhil mek a, chuzawng chu a ni mai." a ti bah leh deuh nuai a.

MAster Xu-a chu za lo tak chuan a khi lui sak a, "I va check nachhan chu eng ber nge? A lo let leh tawh em tih i ngaihtuah vang nge, i rinhlelh vang zawk?" tiin a zawt leh hram a. Ren-a chu a thinrim hlur tawh mai, "Rukru ah ka puh pawh a nih loh kha, ka thil hmuh ka sawi mai alawm. Thil rinhlelh awm ni a kan hriat chu kan report tur alawm, a ni lo em ni?" tiin a lo zawt let ve sak mai.

MAster Xu-a chuan a melh ta khur mai, "I thil hmuh i report kha chu a pawi lo, mahse i thianpa, i unaupa room-a, a muthlilh hlana va luh ruk kha chu thildang daih a ni. Ren, eng chiah nge Jin-a roomah chuan i va tih, eng nge i va zawn?" tiin a zawt leh ta mai a. Ren-a chu a sa ve ta phat mai, "Ka lut ru lo, engmah ka khawih lo bawk. Ka va en a, a lo muhil a. Chuzawng chu a nimai, thil tha ka ti a, chu chu ka diklo em ni?" a ti vin deuh khur khur tawh mai a.

Zaidam tak hian MAster Xu-a chuan, "I va en ringawt chu pawi love, eng emaw i va hmu a, i va zawng te a nih loh chuan.." ngeiawm tak hian a lo ti ve deuh kher a. Chu chuan Ren chu a ti thinrim zual kher mai, "Relic kha ka ruk chhuah angah i ngai em ni, Jin-a ruk ang turin ka va dah niin i ngai em ni? Thudik alawm ka sawi, thudik tak ka sawi." a ti chiam chiam tawh mai a.

"Thudik maw? Thudik nge thudim ang thei tura i phuhchawp zawk?"

"KA insawifiah vak ngaiin ka hre lo, i duh leh Jin-a zawk chu va zawt rawh. Tinge relic kha a ruk, tinge dawt a sawi tih va zawt la a nih chu."

"A chhan chu a ruk a ni lo tih hi kei a nausen tirh atanga enkawl seiliantu hian ka chiang  a ni, chuan nang hian thildang eng emaw chu zep then i nei bawk."

Ren-a chu a thinrim takzet, a so hian a so bulh bulh mai. MAster Xu-a lah chuan zawhna dang a zawt zel bawk si, a buai dawn tlat hian a inhria a. A thaw halh halh a, "Min ring turin ka phut lui lo che, ka thil hmuh ka sawi mai chauh a ni. Ka tihtur ni a ka hriat ka ti a, min rin leh rin loh chu i thu a ni e." tiin chibai a buk a, a kal ta daih a.

*********************************************************

Room pakhat, zau angreng tak mai, office chhung niawm takah chuan Yilong-a chu dawhkana kut nghatin a thu ngawi vung vung a, a hma ah chuan a nau Liu-a chu a awm ve bawk. Pawn lam atanga ni eng rawn lut chuan Yilong-a room-a tlereuh leh thildang te chu a chhun eng vat vat hlawm a, amah Yilong-a ber erawh a inngaihtuah muk hmel kher mai.

Temple panna hmu chhuaktu, a lo hawna pawh la rei lo, Liu-a chuan a en vung vung a. Chutia Yilong-a a tawng miah lo mai chu mak a ti angreng hle a, "Kha naute, kum 22 chhungzet min tibuaitu kha, engtik ah chuan nge kan va hmuh dawn?" tiin a han zawt deuh tawp a.

Yilong-a chuan a chhang mai lo, whiskey no khat chu a han thli ri karh karh a. Ice cube pahnih lian tha nelh nawlh chu thlak ri hlakin, "Naktukah, naktukah kan kal ang." tih pah chuan a han tlak pap a. Liu-a chuan a lo en hu mai, "Lo haw vat rawh kha i ti sia, vawiinah kan che chhuak turah ka lo ngai a. Tinge naktuk i tih leh daih a? A chhan ka hre thei ang em, Boss?" tiin a lo zawt nghal vat a.

Yilong-a chuan a whisky no chu dawhkanah chuan a han nghat ri chawrh a, "Tunah chuan ka dinhmun a derthawng leh rih tlat, he khawpui, kan bihrukna khawpuiah ngei pawh hian min lo zawng leh tawh a. Police te hi an hneawm tan ta khawp mai, chuvang chuan naktuk ah kan chet mai a ngai ang." tiin a chhang a.

Liu-a chu a han thaw hak a, "Plice ho hi an pung chak si a, kan plan an ti fail thei tlat. Eng tin emaw kan tih a ngai a ni, ram danga kan naute hi kan chah chhuak rup tawh mai dawn em ni?" tiin a lo zawt a. Yilong-a chuan a lu a thing a, "Ni love, chutiang a ngai lo. Kan plan angin kan kal ang, naktuk hi kan tan a rem ber." tiin a chhang leh a.

Liu-a chuan a lu a lo bu nghat a, "Awle, ka hrethiam e. Boss, naktuk atan engkim ka lo ruahman lawk vek ang." a lo ti leh vat a. Yilong-a chuan a cigar chu phawrhin a han zu khu hluah hluah a, "Kan naute pawh hrilh tha la, va kal tam huk kha a ngai lo ania. Kei phei chu a tul a nih chuan ka lo tel lo hial maithei, kan fimkhur a ngai takzet, i hrethiam em?" a han ti leh a.

Liu-a chuan a lu lo bu leh nghatin, "Awle Boss, ka hrethiam e." tiin a chhang a. Kal mai a tum a, mahse Yilong-a bawk chuan a lo ko ding a. A thutna atang chuan a rawn tho va, "Liu, hei hi hre reng bawk ang che. Kan hmelmate hi police chauh an nilo, midang, hmelma thar an lo awm zel dawn tih hria ang che." a han ti leh a.

Liu-a chuan chibai buk pahin, "Awle Boss, ka lo fimkhur viau ang." tiin a chhang a, room atang chuan a chhuahsan ta a. Yilong-a chuan tukverh lam chu hawiin a dak vauh vauh a, "Naupang, tunah chuan i lian tawh viau ang tiraw? Mahse ka zawng hmu khawp ang che, nang leh kei, a tu emaw zawk zawk hi kan thih a ngai ang." tiin a khi deuh suk a.

************************************************

Chhun dar 12 a ri a, Jin-a chu chaw pawh ala ei lo. Room ruakah chuan ala awm reng a, ngawi reng hian a melh ngai melh rengin chhuatah chuan a thu a. Kawngka a rawn ri rak a, ava hawi nghal vat a. Master Xu-a a lo ni a, a bulah chuan a rawn phei a. Jin-a hma takah chuan dingin, "Jin, i ril a tam tawh em?" tiin a han zawt te te phawt a.

Mahse Jin-a chuan a lu lo thingin, "Engmah ka ei dawn lo, thudik a lan chhuah hma chu engmah ka ei in ka in lovang." a ti deuh hmak mai. Master Xu-a chu a han thaw deuh hak a, "Ka hria alawm, Jin. I tih a nilo, i ruk a ni lo tih chu ka hre vek alawm. He temple chhunga chengte zingah hian tuman ring lo che mahse, keiman ka ring che. Keimah ka hria, i ruk a nilo." tiin a han hnem a.

Jin-a chu za lo tak chuan a nui lui sak a, "Ni love, MAster. Kha relic kha ka ruk a ni lo tih nang aia hrechiangtu an awm. Chu chu Ren-a kha a ni, nizan khan ka chhuak lo hrim hrim. Chuan a rutu ka hre bawk, amah REn-a ngei kha a ni, ka roomah a rawn dah a ni." tiin a lo chhang daih mai.

MAster Xu-a pawh chuan a lu a lo bu nghat nghat a, "Ka hria alawm, Jin. Ka kutah dah rawh, ka lo sawi fel sak dawn che nia. Theih tawp ka lo chhuah ang, lungngai reng reng suh." a han ti dam dap a. Jin-a chuan lungawi loh hmel tak hian, "NGati nge Master Chen khan kei nilova, Ren-a thusawi zawk kha a rin tlat le?" a han ti nuah nuah a.

Master Xu-a chu a han thaw hak a, "Ni e, Ren-a nen hian ka student ngainat ber in ni a. A bik takin nangmah ah phei hi chuan hmasawnna nitin ka hmu ziah a, Ren-a hnenah pawh hian nangmah entawn turin ka hrilh hnem thin khawp asin. Mahse Ren-a hi chuan MAster CHen-a tih lawm hi a tum em em thin a, a hna berah hian a ngai a ni tawp mai. A tlawn em em a, tih lawm loh a hlau ngawih ngawih thin. Master Chen-a ngei pawh hian a duhsak thu leh a ngainat thu hi ka bulah a sawi fo va, chuvang te pawh chu a ni mahna." tiin a lo chhang a.

Jin-a chu a lungawi lo zual kher mai, "Chuvang ringawt chuan... MAster Chen-a'n a duhsak avang ringawt chuan a thusawi a awih a, kei hetah misual angah ngaihin, mualpho takin ka awm bik ang maw?" tiin a thinrim hmel kher mai. MAster Xu-a chuan a darah a vuan a, "I thinrimna chu ka hriatthiam pui khawp mai che, Jin. KA kutah dah la, Master Chen-a chu ka lo be leh dawnnia." zaidam tak chuan a han ti a.

Jin-a chu a han inngaihtuah vang vang a, "Master, inpuang duh miah lo ta ila, eng hremna nge ka hmachhawn ngai?" tiin a zawt ta thut mai. Master Xu-a pawh chuan mak a ti angreng hle a, "I inpuang duh lo a nih chuan hremna chu i hmachhawn ngei ang, Golden Lotus Amulet kher a lo ni bawk nen, kan temple a kan neih hlut ber leh roh ber a ni a, hremna chu a serious khawp ang. Monastery-a i nihna leh dinhmun hi a tla hniam ang nga, hna an thawh tir teuh maithei bawk che. Chuan temple atanga hnawhchhuah hial i ni thei bawk, a serious lutuk." tiin a chhang a.

Jin-a chuan a lu a bu nghauh nghauh mai, "A tha e, ni rawh se. Engpawh ka chungah thleng se, eng hremna pawh hmachhawn dawn ila. Ka thil tihsual ni lovah hian ka inpuang dawn lo reng reng, dawt ka sawi ve ngai lo. Monk diktak ni tura train ka ni a, ka la ni ngei bawk ang. Master, ka chungchang thu an rel hunah pawh min lo tan hauh suh ang che. Thudik chu ala lang chhuak ang, engmah kan tih a ngai lo." tiin a insehruh nasa mai a.

MAster Xu-a pawh chu a tho va, "Um, a tha e. Mi huaisen tak Jin-a ngei mai kha ila ni reng e, i duhthlanna chu ka zahsak ang che." tiin kal mai a tum a. MAhse a ding leh deuh dat a, "Hre reng rawh, Jin. I chungah engpawh thleng se, i zinkawng hi a bul tanna chauh a ni dawn ania." a han ti leh hram a, tichuan a chhuahsan ta a.

Jin-a chu a la thu reng a, "Thudik chu a la lang chhuak khawp ang, eng hremna pawh hmu dawn mah ila. Ka thil tihsual pawh nilovah hian ka inpuang lul lovang." tiin a inbe mawlh mawlh a. A tho thut a, "Ren, i thil tih man hi i hmu dawn khawp mai." tiin a insehruh nasa mai.

A awmna room chu a han enkual a, "Master Xu-a khan a sawi dik a ni...ka kawng zawh tur hi a bul tanna chauh a ni." tiin tukverh lam ava pan a. Pawnah chuan dakchhuakin ramhnuai zau em em mai chu a han en vang vang a, "Min ring duh lo a nih chuan min ringlo tawp hlawm rawh se, misual angah chuan min ngai mawlh hlawm teh se. Na tawrh hi ka hreh hleinem, thudik din pui zel hi ka duh zawk." tiin a kut chu a hum ruh sauh sauh va.

A melh ngai chu a melh leh vang vang a, "Helai hmunah hian monk ni turin ka awm a, mahse ka thawh hahna zawng zawngte, ka training zawng zawng te kha Ren-a'n dawt a min puh avang mai hian a thlawn bik dawn lo. Min hnawtchhuak ang maw? Ni e, an thu thu alawm. Khawvel dangah ka kal a hun tawh te pawh a ni mahna, thudik chu a la lang chhuak khawp ang." tiin a han phun leh sap a.

********************************************* 

TO BE CONTINUE