SHADOW (A CHINESE ACTION FICTION STORY) Written by : Aaron Malsawmdawngzuala CHAPTER - 7

 SHADOW

(A CHINESE ACTION FICTION STORY)

Written by : Aaron Malsawmdawngzuala

CHAPTER -  7

*************************************************

Zan tlai tawh tak a ni a, temple pawh chu a reh diak mai. Mahse Master Chen-a leh Master Xu-a te chu an muhil theih meuh lo. Master Chen-a room ah chuan an thu dun a, Lan-i bo ta daih mai chu an ngaihtuah em em a. Rilru hah hmel tak hian Master Chen-a chu a indawm kun ngawih ngawih a, "Vawi tam tak Temple huan atanga hla lutuk ah kal tawh suh tiin ka hrilh mawlh mawlh thin asin mawle, tunah a awmna chin kan hre der mai bawk si lova." tiin a mangang kher mai.

Beidawn hmel tak hian Master Xu-a pawh chuan, "Monk kan tirh chhuah ho pawh khan zantir atang khan an zawng tawh, tunah pawh ramhnuai velah hian an la zawng kual mek. Jin-a kan zawnna pawh a la rei loh tehreng nen, tunah Lan-i a bo leh a. Tun thlengin thu lawmawm kan la dawng bawk si lo, tukina lo kal pahnihte kha keichu ka ringhlel riau mai." a lo ti ve nuah nuah bawk.

Master Chen-a chu a han thaw hluai a, "Tukina kha mite pahnih lo kal khan naute bo, kum 22 liam ta a mi an sawi khan Jin-a chungchang an sawi tih pawh ka hre vek. Master Xu, Jin-a hi an zawng mek ve tho a ni. Ka rindan chuan Jin-a chhungte tak tak an ni teuh lo mai, Jin-a hi khawilam naute nge tih pawh kan hre chiang miah lova, kan enkawl ta tawp kha a ni a. VAwiin tlai a Lan-i a len chhuah khan, an rawn man a ni ngei ngei ang khamite khan.." tiin a ngaihtuah thui nasa kher mai.

MAster Xu-a pawh chuan a lu a lo bu nghat a, "Keipawh chu chu ka rindan chiah a ni, temple hi rawn beih an tum ang nga, Jin-a rawn zawn nan...mahse i sawi ang khan an rawn luh tak tak hma in Lan-i hi an lo hmu ang nga, Jin-a chungchang an hriat theih nan leh Jin-a'n anmahni ava pan theih nan tiin an kidnap a nih kha ring." a lo ti ve bawk a.

An ngawih dun vang vang hnu ah chuan Master Xu-a bawk chuan, "A nih leh Ren-a hi engtin nge kan tih dawn? Jin-a a tlan bo hnu atang phei kha chuan tumah hi a be mang lova, Lan-i a bo leh a, zawn ve pawh a tum chuang lo reng reng?" tiin a zawt a. "Nakinah kan buaipui dawn nia, ka lo bia a nge. Tunah chuan Lan-i kan buaipui a ngai zawk, kan thu lawmawm hriat hnuhnun ber lah kan security monk pahnihte an harh chhuah tawh thu ringawt a nia, a mangan thlak hle mai." tiin a lo chhang a.

MAster Chen-a bawk chuan, "Hei hi ka hlauh lawk reng kha ania, MAster Xu. Jin-a nautet laia i rawn hawn rikngawt khan buaina a thlen hi ka hlau reng a ni, tunah chuan kan dinhmun hi heti hi a ni ta mai si a. Jin-a a tlan bova, a tuk ah tihian Lan-i a bo leh ringawt a. Kan ralmuan thin tehreng nen, tunah zawng eng nge kan tih ang tih pawh sawi thiam a har a nih hi." tiin lungngaih hmel tak hian tukverh lam chu a hawi vauh vauh a.

Master Xu-a lam chu ava en leh a, "Ka tisual a ni, ka thiam loh a ni, Master Xu. Jin-a khan a ruk a nih loh zia a sawi lawm lawm a, mahse Ren-a'n a puh avang mai khan a thusawi kha ka ngaihthlak sak duh lova. Vawiin chhun lawk pawh khan Lan-i pawh ka lakah a lungawi lova, ka harhchhuak tlai mah mah a ni." Master Chen-a bawk chuan tiin a inchhir hmel takzet.

Master Xu-a chuan a darah a vuan a, "Kan inchhirna hian eng mah a siam tha dawn lo, Master. Tunah la la hian ka insiam ang nga, khawpui hnai berah ka va kal a nge. Miin an lo hmu mial maithei asin, a thawmhnaw hak hnuhnung ber pawh kan hriat kha." tiin a hrilh a. MAster Chen-a chuan phawk hru hian a en a, "Tun ang hunah hian maw? Ava hlauhawm duh awm ve, Master Xu...i fimkhur hle a ngai ang." a lo ti nghal vat a.

Master Xu-a chuan a lu a bu nghauh va, a ding a. "Naktuk zing ah khaw var hunah ka lo let leh ang, ka hmu emaw hmu lo emaw. Ka hmu lo a nih chuan ngaihtuahna thar nen kan zawng leh dawn nia, kan tawp san mai mai lovang." tiin a hrilh leh a. MAster Xu-a chu chhuah a tum a, "Eng kan ti ta nge le, Master Xu? He temple hi kan in, kan chenna ral muang tak kha a ni thin si a. Eng thil nge maw kan tih sual le?" a ti vawng vawng mai.

Master Xu-a pawh chu a ding a, a rawn hawi let leh a. Master Chen-a pawh chu a rawn tho va, "MAster Xu, i kum a upa tawh si a, fimkhur viau ang che." tiin a chah a. Master Xu-a chuan a lu chu a lo bu leh nghat a, "Tehreng mai, Master. Inring tawk rawh, kan hmu ve ve ang." tiin a chhuahsan ta a.

********************************************

Zing lam dar 1 a ri tawh a, Jin-a pawh chu a Azuri Dawn serum chakna thar nen, a uniform thar nen chuan park chu rang takin ava thleng a. Ramhnuai lam, ware house a hmuhna lamah chuan chak takin a tlan phei leh a, thim hle mahse a hmaikawr a night vision tarmit chuan a hma zawn chu a ti lang chiang em em tho va.

A taksa ah Azuri Dawn damdawi a awm tawh bawk nen, mihring pangngai theih piah lam daih a chak chuan a tlan zel a, a rang par par khawp mai. Rei lo te ah chuan ware house chu ava thleng ta. Fimkhur tak chuan a va pan a, tukverh atang bawk chuan a han bihthla leh a. Yilong-a naute chu an lo la awm a, Lan-i pawh thutthlengah chuan phuar beh a lo la ni reng bawk.

A lo la harh miah lova, Yilong-a naute chu an lo titi khawm nasa ngei mai. Yilong-a rei zia thu hlir chu an sawi a, an phun nang nang hlawm a. Chutah an zinga pakhat chuan phone call a dawng a, rei lote a biak hnuah chuan a dah a. A thiante chu va panin, "Boss Yilong-a a lo kal dawn lova, Liu-a zawk a lo kal dawn a nih chu. Nula hi Yilong-a apartment ah kan hruai a ngai, tunah a ti ania." tiin a hrilh hlawm a.

Jin-a chuan a lo hre pha vek a, "Yilong-a mai mai chuh, i lo kal ve dawn lo amaw? A tha e, lo kal suh. Keimah ngei hian ka rawn pan ang che, ka that dawn khawp che." tiin a insehruh nasa mai a. Chutah ware house lam chu ava pan a, kawngka chu a tlawh chhe thuai mai. Ava tlan lut nghal a, misual ho chuan an lo en thap a.

An zinga pakhat chuan vin zet hian, "Tu phiangsen nge i nih a?" tiin a lo vin khur khur a. Mahse Jin-a chuan a chhang lo, a mal te te chuan a en phei diat diat a. Chutah pakhat chu ran tlanin rawn beih a tum a, mahse rang lutuk mai hian Jin-a chuan a lo tlawh thal tawp mai a. An thawm avang chuan Lan-i pawh chu a rawn harh a, Jin-a chu tunge a nih hre lo mahse chutia Yilong-a naute a rawn bei ringawt mai a hmuh chuan mak tiin a ka hau mai.

Midang zawng pawh chuan Jin-a chu an rawn bei nghal a, mahse a mal te te in a lo thal hmiah hmiah mai. A ngunhnam pawh chu a hmang chuang lem lo, a kut lawng chuan a vai thal hmiah hmiah hlawm a. Rei pawh an bei hman lo chu a ni ber e, second 30 chhung vel lekah chuan misual ho chu an thal fai ta der mai.

Rang takin Jin-a chu Lan-i chu ava pan nghal a, a hmaikawr chu a phelh a. Lan-i'n Jin-a hmel a hmu chiah chu mak a ti kher mai, a lawm bawk si. Phawk hru hian a en a, "Jin, nangmah maw? Mahse..engtin?" a ti bah nuai mai. Jin-a chuan hrui chu phelhsak mek pahin, "Nakinah ka hrilhfiah vek ang che, tunah rih chuan helai hmun atang hian kan chhuah a ngai." tiin a lo chhang a.

Mahse a phelh zo hman lo, pawn lam atang chuan motor ri an hria a. Jin-a chu a hmaikawr vuah in a ding nghal vat mai, chutah Yilong-a naute dang eng emaw zat chu an rawn tlan lut leh ta. Jin-a chuan posi a lo la sauh sauh va, "Jin..fimkhur rawh." Lan-i chuan mangan hmel tak hian a lo ti tham tiak mai.

Tichuan Jin-a chuan misual dang lo kal belh ho chu a han bei leh ta a, a hma ang bawk chuan a thal fai leh ta vek mai. MAhse a inrinloh lai chuan tu emaw hian a hnung lam atang chuan a rawn kick ve pawp mai a, Jin-a pawh chhuatah chuan a thal nghal tual mai. Chupa chu Liu-a kha a lo ni a, ala confi hmel em em zui.

Jin-a chu rawn din chhuah leh a tum a, mahse Liu-a chuan chhuat laia iron rod pakhat chu la in Jin-a lu ah tak mai chuan a hlap ri chawrh mai a. Jin-a chu a vir nawk a, chhuatah chuan a thal leh ta tawp mai le. Ring tak hian Lan-i chuan, "Jin..nilo." a lo ti vak a. Chuveleh Liu-a chuan mak ti tak hian Lan-i chu ava en a, a khi ta suk mai.

Jin-a chu en leh in, "Aww... nang hi maw Jin Wei chu? A va fuh cher cher ve, Boss Yilong-a'n zawn che a harsa dawn a ti zo chiah a, i rawn inpe zawk a nih hi. A tha e, in pahnihin Yilong-a bulah chuan ka hruai thei dawn che u a nih hi." a han ti vel ham ham a. Misual chhuata tlu mek te pawh chu an lo tho leh taih taih hlawm a, "Nula hi la ula, van ah khan hruai rawh u. Yilong-a apartment ah va dah ula, hepa hi chu keiman ka rawn hruai ang." Liu-a bawk chuan a han ti leh a.

Misual ho chuan Lan-i chu an an phelh a, an pawm nawlh a. Jin-a chu a rawn tho tawk tawk a, "Lan.. Lan.." a ti thei chang chang a. Iron rod la hum reng Liu-a chuan Jin-a lo tho mek chu a lu ah bawk a hlap leh ta siah mai, Jin-a chu a thal leh tawp a. Lan-i mangang chuan Jin-a chu a au lawm lawm a, mahse misual ho chuan an pu chhuak ta daih a.

Liu-a leh Jin-a chauh chu ware house chhungah chuan an awm ta, "Tho rawh, hei ka hmanrua pawh ka paih e." tiin rod chu a paih a. Jin-a chuan a lu a dawm vawng vawng a, a hliam chu na a ti takzet. Thei leh thei lo hian a rawn tho leh a, mahse a lu chu a hai muai muai mai.

Liu-a chu ava tlan phei a, Jin-a chu a va hnek leh ta siah siah mai. Lo dang thei zeuh zeuh mahse Jin-a chu a lu a la hai em em a, chuvang chuan a bei let tha thei lo. Liu-a lah a lo chak ve angreng phian bawk si nen, Jin-a chuan a hneh tha meuh lo a ni. Liu-a chuan a sawisa a ni tawh deuh ber mai, "Khazawng kha maw temple ah chuan in zir a, i va nep ve. Yilong-a tan chuan engmah i ni lo, ka tan pawn engmah i ni lo." tih pah chuan a han khawih chhunzawm leh hrep a.

Jin-a chu a chau takzet, chhuatah chuan a mu reng ta mai a. Mahse a mitthla ah chuan Master Xu-a'n training a pe lai chu a rawn lang zuai zuai mai, "Tha chakna ringawt hi a tawk zo lo ania, Jin. Inbeihna reng reng ah chuan thluak fim tak put a ngai a, hahdam takin awm la. Focus la, chu chuan hnehna a chan tir ang che." ti a a hrilh thin lai te chu a bengah chuan a rawn ri nawn awn awn mai.

Chutah le, Azuri Dawn serum chu a rawn thawk leh tan ta, chawp leh chilhin Jin-a hliam zawng zawng leh na zawng zawng chu a rawn reh leh ta diak mai. AWlsam tak hian a rawn tho va, Liu-a chu a en ta ran mai. Liu-a chu a khi suk a, "Aw khatiang tur kha, khai le... i han inbei tak tak teh ang." tih pah chuan ava tlan phei a.

Jin-a chu a va khawih leh siah siah a, mahse Jin-a chu na ti awm ang pawhin a lo awm lo. a lo dawh vel mai mai a, Liu-a pawh chuan mak a ti kher mai. Chutah a che ve tan ta, Liu-a chu a duhtawk chuan a theh thal ta mai a. Liu-a pawh a hlauthawng tan, a han bei leh ngat ngat a. Mahse Jin-a chu a rawn chak thar thut amaw tih mai tur a ni, a hneh ta ngang lo.

A mangang chuan a pistol a phawrh a, Jin-a chu a va kap ta siah siah mai. Mahse rang lutukin, pistol a phawrh rual rual chuan Jin-a chuan a ngun hnam pakhat zawk chu a phawrh ve a. Liu-a silaimu rawn thlawk phei chu a ngunhnam hmang chuan a lo dang thei zel mai a, silaimu zawh thak thleng chuan a lo indang thei ta mai a nih chu.

Liu-a chuan mak a ti takzet, a thinrim bawk si nen. A au vak a, silai kawm chu ava vawm ringawt a. Jin-a chuan a lo beng per nghal a, Liu-a chu rawn tlan pheiin a rawn bei leh ta. Mahse Jin-a chuan na em em hian a pumah a lo tlawh sak a, Liu-a chu a leng dawrh mai. Bang a deng dawt a, chhuata hmai sawh ri chawrh khawp chuan a tla thum dup mai.

A chau tawh hle a, thisen pawh a hloh hnem tawh takzet. Chuveleh Jin-a chuan a rawn pan a, a ngunhnam chuan a tin ta vang mai. Rum zeta melh chung hian, "Hawiah nge Yilong-a a awm?" tiin a zawt a. Liu-a chuan a chhang thei mai lo, a thaw hrawk hrawk a. Jin-a bawk chuan a aia vin hian, "Khawiah nge Yilong-a aparment chu a awm?" tiin a han zawt leh a.

Liu-a chu ala rawn nui hram a, "Ka sawi lovang, engtik ah mah Yilong-a hi ka phatsan dawn lo." tih pah chuan Jin-a ngunhnam hriam tak mai chu a vuan a, ama dulah chuan a vit tlum pawk mai. Thisen a rawn phuh chhuak thawt thawt a, a thi der mai. Jin-a chu a thinrim takzet, ngunhnam chu a phawi a.

A thinrim lutuk chu a khur dar dar thei hial a, "Mai mai chuan.... engtin nge ka zawn hmuh tak ang?" tiin a a hawi kual ruai mai a. Yilong-a awmna, a apartment chu khawiah nge a awm a hre ve der mai si lo. Ring tak hian a au vak a, "Yilong, tuman min dang lovang. Ka zawng hmu che ang nga, ka that tho tho ang che." tiin a vin khur khur a, ware house chu a chhuahsan ve ta a ni.

*********************************************

Ware house atang chuan Jin-a chu a chhuak a, kalna tur ber pawh a hre der mai si lo. A hawi kual ruai a, khawi lamah nge a zawn hmasak ber dawn tiin a inngaihtuah buai nasa mai. Lan-i a ngaihtuah tawh bawk si, a thinrim tawh bawk si chu a insawh vak vak ringawt mai a. A lu a dawm vawng vawng a, "Ka tihpalh, Lan." tiin a phun zawi sap a.

Chutah MAster Xu-a'n a train lai a, "Focus rawh, Jin. I thluak kha hmang la, i zawhna chhanna chu i bul hnai atangin zawng thin rawh. Rilru fim tak leh chi aina tel hauh lova i ngaihtuah a nih chuan, thudik chuan a rawn pan mai ang che." tia a hrilh lai chu a hrechhuak leh ta zawk mai.

Thawk a han la hrawk a, a maimitchhing vang vang a. Tichuan second 10 hnu velah chuan a rawn meng kawk a, a bul hnai vel chu a en kual nghal a. A hma a van an parkna bul, khuar deuh lai ah chuan eng emawni tle vet vet hi a hmu a. Rang takin a va pan a, a han en chu leiah chuan cigar zuk bung, a t(r)awnna lo tle vat vat hi a lo ni.

Cigar bung chu a chhar a, a han enchiang a. A hmawra an t(r)awnna lehkha sin te ah chuan Silver Dragon tih hi silver rawng ngei mai hian a lo inziak a, Dragon lemziak, silver rawng vek a lo awm bawk. Jin-a chuan a han chhiar a, "Silver Dragon? Ngawi teh, ka hre tawh a ni." tiin a han inngaihtuah leh vang vang a.

Chutah a hre chhuak ta, zan tir lama Mei Ling-i, a hringtunu ngei mai zurui lak atanga a chhan zawh hnu, a haw lam khan kawngsirah pa hausak hmel deuh pahnih hi kawngsirah an lo ding a. Pakhat zawk chuan cigar a phawrh a, a thianpa chuan mak tih hmel tak hian, "Ehe, khawi ami nge a? Silver Dragon company cigar ngat, dawr ah lei tur a awm ngai mang lo asin?" tiin a zawt hu a.

Chupa chu nui suk in, "Ka chah a nih hi, a to rem rem teh ania." tiin intihtheih hmel tak hian a lo chhang a. Jin-a chu a harh chhuak zawk mai, a lu a bu nghat nghat a. "Silver Dragon company... company maw?" a han ti nuah nuah a, ware house chhungah chuan ava tlan lut leh nghal a.

Liu-a raung, chhuat laia lo mu reng mai chu ava pan a. A hma ah chuan thingthi in a ipte chu a check sak a, ipte awm zawng zawng a dap chhuah kim vek hnu chuan Liu-a coat chhunglamah chuan paper hi a dap fuh ta tlat mai. Rang takin a la chhuak vat a, a han keu pharh chiah chu map a lo ni reng mai.

A chung berah chuan Silver Dragon Company tih hi a lo inziak a, map ah chuan hmun hrang hrang, khawpui hrang hrang hi a lo awm teuh mai a. Khawpui thenkhat, pen hmanga inthai bial bik hi a lo awm thluah thluah bawk. Jin-a chuan hmun pakhat,thai bial nawn zing deuh bik chu a han en a.

Wuhan City a lo ni tlat mai, "Wuhan City, Dr. Liang-a khan kan awmna hi Wuhan City a ti tak e." tiin beiseina pawh a nei deuh tan ta. Tichuan chiang leh zual chuan a han bih hnai leh deuh va, chutah chuan apartment 46B, Jinfeng Tower, Nanshan Avenue, Wuhan City tih, tetak te a lo in tick keuh chu a hmu a.

A lu a bu ta nghat nghat mai, "Tah hian animaw i lo bihruk a, Yilong? Ka rawn kal dawn, ka rawn kal khawp ang." tiin map chu a thlep tha a. A uniform ipte ah chuan a ak tha a, a hmaikawr chu a vuah leh ta. Ware house chu a chhuah san leh ta a, chu ramhnuai thim ruih mai chu rang takin a chhuahsan ta a ni.

***************************************************

Apartment chhungah chuan Yilong-a leh a naute chu an awm a, Lan-i pawh phuar beh reng ala ni. A naute thenkhat chu Liu-a a rei tawh em avang chuan va ngaihven turin a tir hlawm a, mahse chanchin update a awm mai loh avang chuan a ngaih chu a tha chiah tawh bik lo. Lan-i rawn hruaitute atangin Jin-a chu Liu-a chuan rawn hruai tur anga a insawi thu a lo hre ve laklawh tawh bawk si nen, sana chu a en a en ringawt mai a.

Lan-i chu a chau tawh takzet, "Ka tui... ka tui a hal." a rawn ti chhuak tawk tawk a. Yilong-a chuan ava en a, a va pan hnai a. A hma takah chuan dingin a han khi suk a, "I pasaltha Jin-a chu i la beisei reng em ni a? A lo kal tak tak i ring em ni? Lan, i ngai hero leh lutuk a nih kha. Hei hi chu khawvel tak tak a nih hi, movie ah chauh mifel te chu an chak thin. Liu-a bulah a awm anih phei chuan, a thi daih tawh ang." tiin deuh sawh vak vak a.

Lan-i chu muang chang hian a rawn hawi chhuak a, "A lo kal dawn, a lo kal em em ang. I rin ang mai mai kha a ni lo, Jin-a hi ka hre chiang a ni. A lo thlen hunah chuan i tan engkim a tawp tawh ang a, pawisawi lo nunna i lo lak tawh zawng zawng man chu a hmuh tir ngei ang che." tiin a lo chhanglet vek sak mai.

Chutah Yilong-a chu a nui ta huah huah mai, "Wow, i huaisen ve reuh hle mai. Mipa patling ve thawkhat, mahni tawk a inla pa ve em em thinte pawh hian an nunna zuah turin tap purin khawngaihna min dil thin asin. Nang erawh i ropui e, changtupa i lo la nghak fan fan mai chu ania. Mahse bawihte, thil pakhat ka hrilh ang che. Hei hi ka khawvel, ka ta a nih hi. Eng ang pawhin min beitu hi awm mahse, a tawpah chuan an tlawm leh nge nge thin. Saw i hero, Jin-a... naupang mai sawn engtikah mah kei hi min hneh lovang." tiin ngeiawm tak chuan a han chhanglet ve a.

Chutah a phone chu a rawn ri ral ral a, a pick up nghal a. Vin zet hian, "Aw, sawi rawh.." a han ti nghal hlur a. Phone ami chuan hlauhthawn hmel tak hian, "Boss, ware house chu kan thleng a. Liu-a... Liu-a a thi. A ruang chiah kan hmu, Jin-a erawh kan hmu lo." a rawn ti ta mai a. Yilong-a chu a meng phawk nasa kher mai, "Liu-a a thi maw?" a ti hu mai a.

Phone ami chuan, "Aw Boss, a dulah hriam hrei hmanga vihna hnuhma a awm." tiin a rawn chhang leh a. Yilong-a chu a mangang kher mai, "A nih leh map kha, aman a kawl daih ania. A alawm em, han check teh u?" a han ti leh chiam chiam a. Second 10 vel hnu ah chuan, "Aih, map pawh a awm lo." tiin a rawn chhang let leh a.

Phone chu a paih darh vek a, "Mai mai chuan le...chu naupang chuh.. " tiin a han insawh vak vak a. Chutah a hnunglam atang chuan hmeichhe nui ri huk hi a hria a, ava hawi let chu Lan-i a lo ni. Lan--i chu nui sang hian a rawn dak chhuak a, "Ka sawi kha...a lo kal mek a nih hmel. Chuan maw, keimah min chhan tur chauhvin a lo kal dawn lo, nangmah that tur che in a lo kal dawn." ngeiawm tak chuan a rawn ti ve a.

Yilong-a rilru chu a hah ve tan ta hle mai, tukverh lam hawi chuan a han dak vel a. Jin-a chu a lo kal tak tak dawn tih a hre ve ta meuh chu a awm a nuam bik tawh lo kher mai, mahse dawihzep nih a duh bik thak lo thung. Lan-i bawk chuan nui chung tho hian, "I hlau a ni tiraw, Pu Yilong? A lo thleng tep tawh ang, lo nghak tawp rawh." a rawn ti leh deuh kher a.

Chutah thinrim tak hian Yilong-a chuan ava pan a, "Hei hi thawnthu phuahchawp vel mai mai angah i ngai em ni a? Jin-a chu lo kalin min rawn that ang maw? Naupang, i rinphak bak aia tam hi hlauhawm lakah ka damchhuak tawh asin. Lo kal pawh nise, he building hi nung damin a chhuak chuang lovang. MASTERMIND... THE MASTERMIND ka nih hi, police te pawn min man theih loh laiin nanga thianpa Jin-a mai mai hian min hneh lul lovang." tiin a vin khur khur mai.

MAhse LAn-i chuan a chhang tawh lo, a nui suk suk duh chauh ringawt. Chutah Yilong-a chuan a naute, apartment chhunga lo awm ve te ho chu a han en kual a. Ring tak hian, "Inring rawh ru, Jin-a chu a lo kal dawn. Engmah tihsual palh kan nei tur a ni lo, building luhna zawng zawng ah duty awm vek bawk ula, khar vek bawk ang che u. Pawn lamah khan duty belh bawk ula, tumah an lut chhuak tur a ni lo, ka thu lo chuan, a chiang em?" a han ti lauh lauh va.

A naute pawh chu an che nghal sap sap hlawm a, chutah an zinga pakhat chu a rawn pen chhuak a. Inthlahrung hmel tak hian, "Boss, Jin-a hi a lo kal tak tak a nih chuan Lan-i hi hmun dangah..." a sawi zo hman lo. Yilong-a chuan vin zet hian, "Ngawi hmak la, ka sawi ang chuan ti mai rawh. Ani naupang mai mai kha ka hlau lo, rawn kal mawlh rawh se, a dam chhuak lovang." tiin a lo hau hrep mai.

Chupa pawh chu a kal nghal vat a, Lan-i lam chu Yilong-a chuan ava en leh a. Lan-i lah chuan a lo la nuih reng a, "I va hlauthawng ve, MAstermind. Inring nasa rawh, a rawn kal thut dawn ania." tiin a lo elh sen leh a. Yilong-a chu a nui lui sak a, "Lo kal rawh se, ka inring khawp alawm." tiin a phun zawi sap a.

**************************************************

Building pawn lamah chuan security pahnih an awm a, kawngka bul chu an veng a. Kawngpui lam atang chuan motor tlan thawm, an mahni awmna lam pana rawn tlan mek ni awm tak thawm chu an hria a. Pakhat zawk chuan, "Kan van(motor) ri a va ang ve?" a han ti nuah nuah a.

A sawi zawh rual rual chuan phone call a dawng a, "Um a nih chiah hi." ti a khik suk pah chuan a pick up a. Phone a mi chuan, "Kan lo thleng, gate lo hawng rawh." tiin a rawn hrilh a. Chupa chuan a ipte atang chuan remote a la chhuak a, a han hmet chiah chu gate chu a rawn inhawng ri tuah tuah mai.

Van chu a rawn tlan lut a, mahse security pahnih lo en mek te chu mak tih hmel tak hian an in en ta hru mai. Pakhat zawk chuan, "Saw saw eng nge?" tih pah chuan a pistol chu a phawrh a, a thianpa pawh chuan a phawrh ve nghal. Van chungah chuan tu emaw hi a lo thu ve reng a, ninja inthuamin a la inthuam zui.

Mahse van chuan thingkung thla lian tak mai, leia lo lang ruah mai chu a tlan pel a. A eng lai a rawn thleng leh chiah chu kha a chunga lo chuang ve reng kha a bo leh daih mai, mak an ti lutuk chu an va tlan phei a. Pistol chuan van chu an tin reng a, a chhung atang chuan Yilong-a naute chu an rawn chhuk a.

Driver ber chuan hrethiam lo tak hian, "Eng nge a? In mawl a mi? Tinge khatia min tin a?" tiin security pahnihte chu a lo zawt nghal a. Pakhat zawk chuan, "Van chungah khan, tu emaw kan hmu alawm. Mahse a bo leh daih, kan ti tak tak." tiin a lo hrilh fiah nghal a. An in en hu hu hlawm mai, "In hmu sual a nih chu, awm se chu a thawm te pawh kan hria ang chu mawle." tiin a lo chhang a.

Mahse security pahnihte chuan an hmu chiang si, an inhnial deuh fe hnuah chuan an haider thei hram a. Driver chuan vin deuh tak hian, "Liu-a ruang kha Boss Yilong-a'n rawn zawn lut ru a tia, ti vat ang u." tiin midang ho chu a hrilh a. Tichuan ruang chu an zawn lut a, security pahnih bawk te chu an bang leh ta.

"Ka hmu chiang alawm, nangpawn i hmu tiraw?"

"Ka hmuh ve vang alawm pistol ka phawrh ve reng ni."

Chutia an inbiak lai chuan pakhat zawk chuan gate bul kil lama mi pakhat lo ding chu ava hmu leh ta, a hma bawk a, van chunga lo thu an hmuh tho kha a nih hmel. Ring deuh tak hian, "Saw...saw ta saw.." tiin a au vak a, a thianpa pawh chu ava hawi ve nghal a. An pistol chu phawrh leh in an va pan a, "Lo lut ru an awm, repeat... lo lut ru an awm." tiin a walkie talkie hmang chuan pakhat zawk chu a tawng phei pah mawlh mawlh a.

Chu thla mak tak mai chu an va pan a, mahse an va thlen hnaih hma chuan muang chang hian bang sir, thim laiah chuan a phei a. A thim em avang chuan an hmu thei lo, a bo leh ta daih mai. Security guard pakhat zawk chuan flash light a on a, a han en kual nghal a. Mahse tumah an hmu lo, "Khawiah nge i awm? Rawn inlan ta che..." tiin a han vin khur khur a.

Pakhat leh zawk pawh chuan, "Khawnge maw a kal hman le?" a lo ti ve nuah nuah bawk a. An hmuh mai loh avang chuan let leh an tum a, an inzui phei a. Chuta thim zing atang chuann ngunhnam pakhat, hriam em em mai hi a rawn thlawk fua mai. An pahnih awm zawnah tak chuan a rawn inkhawh tlang pawp mai a, thisen a per chuai mai.

An thal dun tawp a, an thi nghal chiang hle bawk. Thim zing atang chuan Jin-a chu a rawn chhuak a, chumite pahnih taksa atang chuan ngunhnam chu dim basak lo chuan a han phawi ri hrawk a. Building chu a han en chiang a, fimkhur tak chuan a han kal hual vel a. Chutah electric box, bang a lo awm chu ava hmu ta.

A va pan a, a chhung chu a hawng a. A lu a bu nghat nghat mai, thawk a han la te te a. Chutah  a chhunga wire ho chu a vuan a, a pawt chat ta vek mai. A t(r)ek chuai chuai a, current pawh chuan Jin-a chu a man khur cher cher mai le. Second 15 dawn chu current chuan a shock vak vak a, leiah chuan a thingthi hnawk mai.

Chutih rual chuan building chhawng hnuailam, ground floor atanga second floor vel thleng chu a thim ta hmak mai a. Yilong-a apartment tak erawh a thim ve lo thung, Jin-a pawh Azuri Dawn Serum chuan a taksa chu a rawn ti dam leh nghal vek a. A ding a, "Game to khel tak tak ila." tih pah chuan building lam chu pan lehin chahbi hmang chuan a chhung chu a lut ta a.

*******************************************

TO BE CONTINUE