SHADOW (A CHINESE ACTION FICTION STORY) Written by : Aaron Malsawmdawngzuala CHAPTER - 4

 SHADOW

(A CHINESE ACTION FICTION STORY)

Written by : Aaron Malsawmdawngzuala

CHAPTER -  4

****************************************

Tlai lam a lo ni leh ta a, Jin-a pawh chu room ruakah chuan a la awm reng a. Kawngka a rawn ri leh rak a, Master Chen-a chu a rawn lut a. Jin-a hma takah chuan a ding a, "Jin, tun chiah ka zawt tawh ang che. Engvanga relic kha ruk tum nge i nih? Engvanga inpuang duh miah lo nge i nih?" tiin a rawn zawt ve leh a.

Jin-a chuan muang chang chuan Master Chen-a chu a rawn melh chho va, "Master Chen, ka ruk a ni lo. Vawi tam ka sawi tawh, engmah ka ru lo." tih bawk chuan a lo chhang leh a. Master Chen-a chu a maimitchhing vang vang a, "A nih chuan tinge nangmah hi rinhlelh ber i nih si? A bo hma lawk pawhin store room lam i pan lai hmutu che an awm a, chahbi dahna hria pawh nangmah i ni, eng nge awmzia ni ta ang?" tiin a han zawt leh a.

Jin-a chuan a lu a thing a, "Ka hrethiam bik lo, mi tu emaw chuan a thangah min tal awh tir a tum a ni." tiin a lo chhang leh a. Thinrim hmel tak hian MAster Chen-a chu a han thaw hak a, "A tawk e, Jin. I chhuanlam pawh kan ngaithla hnem tawk tawh e, i ruk a nih chuan i inpuang mai tur a ni. Dawt i sawi khan a chhanhim dawn lo che, thudik sawi la kan ngaidam ang che." a han ti vin leh deuh thak a.

Jin-a chuan a melh let ve sak mai, "Thudik chu ka sawi hnem tawh lutuk, mahse tuman min awih sak lo chu a nih hi." tiin a chhang leh a. Rum fe hian MAster Chen-a chuan Jin-a chu a melh a, a hma zawn takah chuan a rawn thu ve a. Chiang fek fawk hian, "HElai hmun enkawl hi ka tan a awlsam i ring em? Ka enkawl seilian che a, hma pawh i sawn chak hle tih ka hria. Mahse tuna i thil tih hi, a finfiahna a tha tawk a ni. Ka zirlaite zinga ka chhuan ber leh ka rin ber, Ren-a'n a thil hmuh a sawi a, dawt sawi ah i puh tihna em ni?" tiin a zawt leh khur khur mai.

Jin-a chu a lungawi lo takzet, "Anih leh Ren-a chu engvanga ring bik nge i nih? Engvanga kei min ring lova, Ren-a zawk ring nge i nih? Eng nge a chhan, i lawm loh hlau reng rengin a tlawn thin che a, chuvanga duhsak leh ring zawk em ni i nih?" tiin a lo zawt let ve ta siah siah mai a.

Master Chen-a chu a sa phat mai, mahse a thinrimna chu thunun a tum hram hram a. Chutah zaidam tak hian, "Ren-a hi he temple tan hian mi tangkai leh taima tak a ni a, ka rinna hlawh chhuak tur hian a bei nasa asin. HE temple hi a hmangaih takzet a, chuvang chuan ka rin lohna chhan tur ka hre lo." tiin a chhang a.

Jin-a chu a khi lui suk a, "Chuvang chuan maw i rin bik a? He temple ah hian kum tamtak ka awm ve tawh, khawvel dang engmah ka hmu ngai lo, he temple lo hi chu... HE temple tan hian tha takin hna ka thawk ve a, training pawh ka hlah ngai lo. Mahse kei aiin Ren-a chu i ring zawk amaw? Tinge mi rinloh bik? Tihsual vawi khat pawh ka nei tawh em? Tigne ka thusawi hi i awih ve miah loh?" tiin a hnuk te chu a ulh deuh hial a.

Master Chen-a chuan thawk a han la te te a, "Ngaithla teh, Jin. Duhsak bik leh bik loh lam pawh a ni lo, thil dik leh dik lo zawk a ni ka sawi. Kha relic kha i ru lo tak tak anih chuan eng thil nge i hriat, eng tak nge thudik chu puang chhuak ve mai la." zaidam tak chuan a han ti leh hram hram a.

Mahse Jin-a chu a thinrim tulh tulh zawk mai, "Thudik ka hriat chu ka sawi tawh, mahse i awih lo chu a nih hi." a lo ti leh hmuk mai. MAster Chen-a pawh chuan a kham ta hle mai, a ding a. Chutah chiang fek fawk hian, "A tha e, i inpuang duh loh a nih chuan hremna chu i hmachhawn ngei ang. Zaninah senior monk te nen i chungchang kan sawi ho ang nga, chumi hma zawng chu i quarter lamah i phei leh thei ang. Mahse kan hrilh hma che chu i room i chhuahsan tur a ni lo, a chiang em?" a han ti vin deuh thak a.

Jin-a chuan en miah lo hian, "Ka hrethiam e, Master." tiin a lo chhang zawi sap a. MAster Chen-a pawh chuan chhuahsan a tum a, mahse a ding leh deuh dat a. Jin-a chu ava melh leh a, "A tlai hma hian thuthlukna siam vat rawh, he temple atanga hnawhchhuah hial i ni thei ania." a han ti leh hram a. Mahse Jin-a chuan a chhang lo, MAster Chen-a chu a chhuak ta a.

Jin-a chu a thinrim kher mai, chutia an temple neitu Master Chen-a berin amah aia Ren-a, dawt a puhtu a ring zawk chu fair lo a ti takzet. A kut chu hum ruh sauh sauhvin, "Hnawh chhuah maw? A ngai love, Master. Keimah, keimahin ka chhuak khawp ang." tiin a insehruh nasa mai.

****************************************

Ren-a chu amah chauh chuan Temple bula huan ah chuan a thu a, a hma zawna tui luang chu a en reng a. Amah vanga Jin-a an hrem ta mai chu nuam chu a ti bik chiah lo, kum 20 chuang zet a lo kawm tawh leh a lo training pui tawh a ni a. Inthiamlohna a awm ve deuh pawh a ni mahna, mahse a luhlulna leh a thikthuchhiatna chuan a thiamlo zawk a ni tih chu a pawm tir duh lo hi a ni ber mai.

Hla vak lo atang chuan Lan-i chuan a lo en reng a, relic rutu zawk chu a nih a ring em em bawk. A va pan hnai a, "Ren?" tiin ava ko va. Ren-a chuan a lo melh deuh hru a, "Eng nge i duh?" a lo ti hmuk mai. Lan-i chu a han thaw deuh hluai phawt a, "Relic chungchang kha sawi dun ka duh a ni." tiin a chhang a.

Chutah thinrim hmel tak chuan Ren-a chu a ding hluai a, "Chutiang atan hun ka nei lo." tiin kal a tum a. Mahse Lan-i chuan a lo ti ding vat a, "Ka ngaihtuah chiang a, Jin-a hian engtikah mah kan temple tana thil pawimawh tak hi a ru chhuak lul lovang tih ka hria. Lo ru pawh nise eng atan nge a tih chuan ang? MAhse nang hi, Ren... nang hian eng emaw chu hriat i nei, thup then chu i nei chiang a ni." a ti ta mai a.

Ren-a chu a sa phat mai, "Chu... min ringhlel tihna em ni?" tiin Lan-i chu a melh rum kher mai. Mahse Lan-i chuan a lo hlau bik thak lo, "Tumah ka ringhlel lo, mahse eng emaw dik lo chu a awm chiang a ni. Tukina ka pu in relic a bo thu a sawi atang khan, i danglam. Nangmah hi i danglam a ni, Ren... eng emaw zep ruk chu i nei alawm." tiin a lo chhang leh a.

Ren-a chu a thinrim kher mai, "I thil sawi awmzia ka hre lo." a han ti leh khur khur a. Mit khap miah lo hian Lan-i chuan Ren-a chu a en kal mai a, "I hria, i hrechiang khawp mai. Ren, hman atang tawhin Jin-a hi i er em em thin a. Amah aia chak zawk, ropui zawk nih i tum thin. I chetdan te, i awmdan te atang hian ka hrethiam vek. Ka pu, MAster Chen-a mit hmuh a tha ber nih i duh a, Jin-a aia a duhsak zawk che i beisei vang a ni tih pawh ka hai lo. Mahse Jin-a chuan tiang lam khan a ngai ve lo che, a unaupa, a thianpa ngawih ngawih angin a en zawk che asin." a ti ta siah siah mai a.

Ren-a chu a ngawi vang vang a, chutah Lan-i chu ava pan hnai a. Thinrim avanga aw khur deuh dar dar chung hian, "Nilo, Lan. Jin-a te chu keia va el chi a ni lo. Ani te chu hman atang tawhin he temple tan hi chuan Golden Boy alawm a nih, mi zawng zawngin an duhsak alawm. A phu loh malsawmna a dawng nitin alawm, a dik em?" a ti khur khur mai.

"I ngaihdan kha a dik hlawl lo, Ren. Hei hi intihsiakna a ni lo, thudik puanchhuahna lam zawk a ni. Mahse thudik chu i hria, i puang chhuak ngam lo zawk a ni."

"Fing viau angah i inngai em ni a, Lan? Eng vak nge i hriat ve a? Mi lo judge zung zung bak thiam i nei lo, engmah hi i hrethiam lo."

"Ka hrethiam, ka hrethiam lutuk zawk. MAster Chen-a mit hmuh a tha ber nih i duh avanga i tlawn vel huam huam hi chu ka hrethiam, mahse relic i ru chhuak a, i unaupa Jin-a i puh daih zawk hi chu ka hrethiam thei lo a ni."

Ren-a chu a meng kawk mai, a thin chu a phu dup dup a. Za lo tak chuan a han nui lui sak a, "Awle awle, ka hrethiam alawm. Jin-a hi chu i t(r)an ziah, i duh em vang a ni tih pawh ka hria. I ngaizawng alawm, chuvang mai mai a nih kha i t(r)an." a han ti chu Lan-i pawh a hawi hru mai.

"Engmaw i sawi a?" a ti hu mai a. Ren-a lah chuan vin deuh tak hian, "Ka hre vek, hrelo der suh. I duh alawm, i hmangaih a ni tiraw? Chuvang chuan i chhan hle a nih kha, a duhsak bik em em bawk. Mahse engmah awmzia a nei dawn lo, Lan. Jin-a hian hremna a hmu dawn tho tho, tih theih pakhat mah i nei lo." a ti leh khur khur mai a.

Lan-i chu a han ngawi vang vang a, "Ka duh avanga chhan ka ni lo, pawisawi lo a nih vang zawka chhan ka ni. Chu chu nangpawn i hrechiang khawp ang, Ren." tiin a chhang zawi sap a. Ren-a chu a khi lui leh sak a, "Lo inrawlh ve suh, Lan. I inchhir hma ngei hian, duhtawk rawh." chiang fek fawk chuan a han ti leh a.

Lan-i chuan a chhang tawh lo, Ren-a chu en pawh a en lo. Ren-a erawh chu a nui ang vur vur a, engmah sawi tawh bik lem lo chuan Lan-i chu a kalsan a. Lan-i erawh a ding ngawi reng a, Ren-a'n a tawngkhum dan chu a haw em em a, a rilru a na takzet. Jin-a chunga thil thleng tur a hre lawk bawk si lo nen, a rilru chu a hah hle mai.

****************************************

Zan a ni a, Jin-a chu a room ah chuan a thu ngawi reng a. A melh ngai a melh vang vang a, thuthlukna han siam mai pawh chu harsa a ti viau. Kum 22 chhung zet a lo seilenna, thian tam tak a lo siam ve tawhna temple a tlan bo san mai tur chu a hreh ve takzet. Mahse misual ang maia hrem a ni ta mai erawh a lungawi mawlh si lo, a chhuah ngei chu a ngai a ni.

A tho deuh thut a, tichuan a thawmhnaw chu a pack tha mawlh mawlh a. A room pawn lamah chuan security monk pahnih an duty tih chu a hre reng a, mahse ruahmanna  anei lawk sa diam tawh thung. BAg chu a han ak tha mawlh mawlh a, tichuan a room kawngka chu zawite chuan a hawng a.

Monk pahnihte chuan meditation an lo nei mek a, Jin-a chu fimkhur tak chuan a room atang chuan a chhuak a. Chutah monk pahnihte chu an rawn meng ta kuau mai, an rawn ding nghal vat a. Pakhat zawk chuan, "Jin, Master Chen-a thu lovin engvangin nge..." a sawi zo hman lo.

Jin-a chuan a hmaiah chuan rang lutuk tak mai hian a hnek siah mai a, a thal tawp mai. Pakhat zawk chu rawn tlan pheiin a rawn zuang vak a, mahse Jin-a chuan rang tak hian a awmah tak mai chuan a lo hnek leh siah mai. A thal ve nghal tawp a, an che tha thei ta der lo mai.

Inthiamloh hmel tak hian Jin-a chuan, "Min ngaidam rawh u, unaupate u. Mahse, ka tih a ngai si a nih hi." tiin a tlan thut a, temple huan lam pan chuan a phei nghal a. A tlan zel a, temple area tawp lamah monk tamtak duty an la awm dawn tih pawh chu a hre lawk vek. Chumi hre reng chung a tlan chhuak lui chu a ni, re fe a tlan hnu chuan duty ho chuan an rawn phawk ta nge nge a.

An tam phian lehnghal, mahse Jin-a chuan a hlau eih lo. Pakhat chu rawn pheiin Jin-a chu rawn khawih a tum a, mahse Jin-a chuan lo bumin a kiu chuan a tukhumah a nghawk pawp a. Lei a hmai phum thawh khawp chuan a tlu bawk thlawp mai, midang pawh chuan an rawn bei nghal a.

Mahse nitin mai darkar 6 chuang training nei thin, ni khat te pawh chawlh nei ngai lo leh fit tha em em mai, Jin-a chuan a lo hnehsawn hlawm kher mai a. An thal tual tual hlawm mai, an insualna lamah chuan a bag ah lai pawh chu a thlauh phah nghe nghe a. Mahse an insual rei telh telh a, monk ho chu an rawn tam tual tual mai.

Nileng deuh thaw a engmah ei lo a nih avang chuan Jin-a pawh a duh angin a che thei bik lo, monk ho lah chu an kutthlak a na em em mai bawk si. Mahse theihtawp chhuah chuan Jin-a chuan a bei zel a, harsa ti tak chung chuan a thal fai ta deuh vek mai. A tlan chhuak thei dawn niin a inhre tawh, mahse a hnunglam atang chuan monk pakhat chuan a rawn chum hnang lek lek mai a.

Jin-a chu leiah chuan a bawk thlawp mai, a han hawilet a. Monk pakhat, lian tak leh experience nei ngah tawh tak mai a lo ni a. A palian em em a, a sek em em mai lehnghal. Jin-a chu a inperh tho nghal a, Monk chu va hnek a tum a. Mahse awlsam tak hian a lo indang a, Jin-a chu leiah chuan a paih thal lehnghal tawp mai.

Jin-a chu thawh mai a tum a, mahse a lu chu a hai takzet. Chu monk paliana lah chuan a rawn pan leh ta chhur chhur mai a, hla vak lo atanga monk dang tamtak rawn tlan thawm chu a hre thei bawk. Monk paliana chuan Jina chu a tham tho lawp a, hnek leh chu a tum a. Mahse a tukhum chu a rawn ri deuh pawp mai, Jin-a pawh chu a thlah nghal a.

A lu atang chuan thisen a rawn chik zawr zawr a, a thal ta tual mai le. A hnungah chuan Lan-i chu thingtum nen a lo ding reng a, "Lan? Nang maw?" tiin Jin-a chu a ka hau mai. Lan-i chu rawn pheiin Jin-a tlu mek chu a va buaipui nghal a, "I tha em?" tiin a zawt a. Jin-a chu a tho vat a, "Eng nge hetah i rawn tih a?" tiin a lo zawt let daih mai.

"I chhuak ru lai kha ka hmu vek alawm, hetiang thil hi i tih duh mai kha ka ring reng a ni. Jin, khawiah nge i kal chuan ang nga?"

"He temple hi ka chhuahsan a ngai a ni, Lan. Ka awm thei tawh lo, rukru a min ngai tute bulah hian ka cheng reng thei lovang."

"Mahse keiman ka ring che alawm, MAster Xu-a pawn a ring che alawm. Thudik chu kan puang chhuak thei ang, hetia tlan bo kher a ngai lo asin."

"Chutiang lam a ni lo, Lan. Master Chen-a berin min ring lova, monk dang ho pawhin min ring lo bawk. Ren-a hian a thil tih dikloh amah ngeiin a puan chhuah hma chu ka hmingchhe reng dawn tho tho, awmzia a awm lo."

Lan-i chuan tap lek lek hian, "Nileh MAster Xu-a hi eng tin nge ni ang, i ngaihtuah ve lo em ni? I kalsan tawp ang maw? A ngaihtuah em che hi, i tan chuan engkim a ni i tih kha?" a han ti leh lawm lawm a. Jin-a chuan hrehawm tih hmel tak hian, "Master Xu-a'n ka tana thil a tih zawng zawng te kha ka theihnghilh bik hleinem, mahse tunah chuan ka kal angai. Ka lo let leh dawn, mahse Ren-a'n thudik a puan hunah chauh ka lo let leh ang." tiin a lo chhang ve leh a.

Lan-i chuan beidawn hmel tak hian a en vang vang a, "Eng nge i tih ang? Khawnge i kal ang?" tiin a han zawt leh a. Jin-a chuan sawi mai tur a hre lo, "Ka kal zel ang, ka hre bik lo. Pawi sawilo ka ni tih hi helai hmunah hi chuan ka lan chhuah tir thei lo, khawvel dang ka hmuh ve chu a hun tak tak tawh a ni ang e." tiin a chhang a.

Lan-i chuan kaltir a phal thlawt lo, a tah chhuak lutuk chu a hmui a pet fan fan a. Zawi sap hian, "Anih chuan min hruai ve rawh, i bulah ka lo kal ve duh." a ti tham tiak mai. Mahse Jin-a chuan a lu thingin, "Aih...a rem lo." a lo ti daih mai. Tap tuau chung hian LAn-i chuan, "Engvangin maw? I tel lova helai hmuna awm reng ka duh hleinem, puih che ka duh alawm." a lo ti nghal vat a.

Jin-a chuan Lan-i kutah chuan a vuan a, "Min pui hnem tawk tawh alawm, Lan. Ka ruala lo kal ve chu a chi loh, a hlauhawm lutuk. Khawiah ber nge ka kal dawn pawh ka hre bik lo, mahse ka dam chhuak em em ang. Ka lo let leh ang, ka tiam a che. Thudik an hriat hunah, i tan ka lo let leh ngei ngei ang." tiin a hnem a.

Lan-i chuan mittui tling teuh chung hian, "Lo let leh ngei ang che, i thutiam hi hlen ngei ang che." tiin a inhnit feih feih a. Jin-a chu a nui lui sak a, "Tehreng mai, Lan. Ka tiam ache, ka lo let leh ang." tiin a kut chu a thlah ta a. Monk dang ho pawh an rawn thleng hnai tawh tih an thawm atang chuan a hriat theih a, Jin-a chu a kal a hun ta.

A bag tla chu a chhar a, a ak a. Lan-i pawh chu a tawlh hnung a, "Mangtha le, Jin." tiin hreh tak chung chuan a thlah ta a. Jin-a pawh chu a tlan chhunzawm ve leh ta a, Lan-i chuan tap chung chuan a en zui vawng vawng mai. Monk dangte chu an rawn thleng chu a ni der mai, an hmuh loh theih ang ber turin Lan-i pawh chuan temple lam chu a pan leh ta a.

*********************************************

Jin-a chu a tlan zel a, a kalna lam tur ber pawh a hre lo. Ramhnuai a ni bawk si, a thim em em mai bawk si nen. A hnunglam atanga hla vak lova monk ho rawn tlan thawm chu a hre thei reng bawk a, a hah tawh kher mai. Mahse a tlan zel a ngai bawk si, hnimbuk tak tak te chu a pal phei buan buan a.

Mahse vanduai thlak takin lung pakhat chu a rap hrual palh hlauh mai a, a balance chu hlohvin a thal ta tual mai a. Chutah a bul lawk chu hmun awih ve tak mai lo niin a inveng hman tawh bawk si lo, a lum ta mai a. A lum thla tual tual a, a lo thui phian lehnghal a. REi deuh fe a lum hnu chuan khawkar kawng pakhatah a lum chhuak hlawl mai, kopang atang chuan lamlianah a rawn tla ri dup mai a.

A ban ruh chu a tliak tih a hre thei, na a ti takzet. A ke ah pawh hliam a nei nual a, amah lah chu a thi phung tawh mai. Thei leh thei lo hian dinchhuah chu a han tum leh a, rum tuah tuah chung chuan a tho chhuak thei hram a. MAhse a vanduaina chu a kal tluang rih tlat, kawng kawi lai takah kher a lo awm bawk nen.

Motor chak tak lo tlan ri chu a hria a, mahse a hliam zawng zawng nen a ban ruh tliak nen a lo inveng hman tawh lo. Chu motor rawn tlan mek chuan a rawn su leng leh ta lawp mai a, lamlianah chuan a lum phei leh ta tual tual mai. Nikhaw hrelovin a awm nghal der mai a, thisen chu lamlianah chuan a luang kawi nuai thei hial.

Motor pawh chu a ding ve nghal bawk, driver seat atang chuan kum upa lam deuh tawh, doctor form ha hi a rawn chhuak a. A duty haw lam a lo ni nghe nghe a, Jin-a let reng a hmuh chuan a hlauthawng kher mai. "Khai awww...ava zialo tak." tiin Jin-a lam pan chuan a tlan phei nghal dawr dawr a.

Jin-a bulah chuan a va thingthi nghal a, "Tlagval, i tha em? I harh em?" tiin a be mawlh mawlh a, a sawi vak vak bawk. Mahse Jin-a chuan a chhang thei lo, a mut ngai chuan a mu reng a. Doctor chuan a mar te chu a han check a, "Awle, a mar chu ala awm e." tiin a thaw deuh huai mai.

A han ding a, motor dang lo phar mai chu a tum a. Mahse chutiang zan rei tawh ah chuan motor chu an vang takzet, nghah chi a ni tawh bawk si lo. Jin-a chu a en leh vang vang a, "Doctor alawm maw ka nih le." tiin a infuih mawlh mawlh a. Thei leh thei lo hian Jin-a chu a han pu ve thawr a, a motor lam pan chuan a phei pui a.

Motor seat hnunglamah chuan a mut tir a, Jin-a chu na tiin a rum tuah tuah mai. Mahse a la harh chuang lo, "Tlangval, tuar hram hram rawh aw...doctor ka nia, ka inah ka hruai ang che. I tha leh vek mai ang, lungngai suh." tiin a thlamuan mawlh mawlh a. Tichuan motor chu a start a, chak tak chuan a tlan leh ta a.

*******************************************

A tuk zingah chuan Jin-a bo thu leh tlanchhuah thu chu puan a ni ta a, mipui ho pawh an phun sap sap hlawm mai. A tu a te pawh chu an ngaih a tha lo em em a, chung zinga ngaih tha lo ber chu Ren-a a ni. Master Chen-a chu tual zawlah chuan a vei thauh thauh reng a, a rilru ah chuan Jin-a bak a awm thei mawlh lo.

Jin-a zawng tur chuan monk rual ho chu an inpuahchah mek a, Master Xu-a phei chu a awm hle hle thei tawh meuh lo a ni. Rilru hah hmel tak a Master Chen-a vei kual mek chu ava pan a, "MAster Chen, Jin-a zawng tur hian a hmanhmawh thei ang ber a kan kal vat a ngai in ka hria. He ramhnuai hi a zau ve thawkhat a, a la awm hla miah lovang." a han ti a.

Master Chen-a pawh chuan a lu a lo bu nghauh nghauh mai, chutih lai tak chuan temple gate bula mipa pahnih, coat suit nena rawn ri zaih mai, hmel la upa em em lo te chu ava hmuh chuan a ding chat mai. Master Xu-a pawh chuan ava en ve a, "Ehe, pawnlam mi an lo kal amaw?" a ti hu mai.

Master Chen-a nen chuan an va phei a, monk dang hote pawh chuan an lo thlir thup mai a. Monk security te chuan an lo dang vat a, mahse chumite pahnih chu an polite phian mai. Pakhat zawk chu Liu-a, Yilong-a nau kha niin pakhat leh zawk chu Yilong-a thawhpuite zinga mi tho a ni.

An hma takah chuan Master Chen-a leh Master Xu-a te chu an va ding a, "Puih theihna che u ka nei em, thiante u?" tiin Master Chen-a chuan a han zawt a. Liu-a zawk chu rawn pen chhuakin zah hmel tak chuan chibai a han buk te te phawt a, "Good Morning, Master Chen. Liu-a ka nia, ka thianpa nen hian kum tam tak kal ta a thil thleng daih tawh chungchang zawh duh che kan nei a ni." a han ti deuh thlap a.

MAster Chen-a chuan a chhang lo, MAster Xu-a nen chuan an inen hu ringawt mai. Chutah Liu-a bawk chuan, "Kum 22 kal ta khan nausen pakhat chu trafficker thenkhat ten an ru bo va, chu naute chu a bo ta daih a. He temple nen hian inzawmna a nei niin kan hria a, kan lo kal a ni." a han ti dam leh dap a.

Temple-a lo awm, monk te leh hmeichhia te pawh chu an thil tih lai chawlh san meuhvin chumite pahnih chu an rawn en a. Lan-i leh Ren-a te pawh chu an rawn kal hnai a, Master Chen erawh a ngawi reng thung. Liu-a te thiandun chu a han en dun vang vang a, "Chutiang engmah kan va hre lo ve, helai hmun hi chu hmun ralmuang tak a ni a, suahsualna nen a inkaihhnawih ve lo." tiin a lo chhang daih mai.

Liu-a chuan a lu a lo bu deuh nghauh nghauh va, "Um, a dik ngei ang. Mahse information thar kan dawn hnuhnun ber ah kha chuan he temple nen hian a inkaihhnawih hmel tlat a ni. Khatih hunlaia naute ru chhuaktu zinga pakhat, a hming Guang-a chu tunhnai lawk khan man a ni a. Police ten an han dawp khan thil tam tak a sawi a, chumi a sawite zingah chuan he temple hi a tel ve tlat a ni." a han ti leh a.

MAster Chen-a chu a han thaw deuh hak a, "Anih tute nge in nih ve le?" tiin a zawt a. Liu-a chu a han nui vel suk a, "Kha naute kha, a chhungte kan nia. Kum tamtak kan zawng tawh a, a bo mai nilovin a thih hial kan ring tawh zawk. Mahse he temple a lo lan takah chuan, beiseina neiin kan rawn pan tawp mai che u a ni." tiin a lo chhang leh a.

Mahse Master Chen-a chuan a lu a lo thing leh tlat mai, "Trafficking tih vel te nen kan inkhaihnawih lo tlat mai, he temple ah hian kum 60 chuang ka awm tawh a. Chutiang engmah kan hre lo, chu in mi sawi, Guang-a chuan eng pawh chu lo sawi se, thuneitute chuan rawn buaipui zawk rawh se." a lo ti leh daih mai a.

Liu-a thianpa chu rawn pen chhuak ve leh in, "Master Chen, inrinhlelhna lam engmah a awm lo ania. Hei hi chhungkaw thil a ni a, kan tan hian a pawimawh asin. Kha naute kha, ala dam a nih chuan puitling a ni tawh ngei ang nga. Kan naute an ruk bo kha a lo ni a nih chuan, chu tluka kan tana thu lawmawm a awm dawn lo asin." a rawn ti ve a.

"Ni e, Master Chen. Chubakah Guang-a khan monk pakhat hnenah a pek thu a sawi a, he temple ami monk ngei a nih kan ring bawk a. A lo ni a, in lo enkawl seilian a nih phei chuan hmuh kan duh takzet a ni." tiin Liu-a chuan a rawn tuihnih ve leh bawk a. MAster CHen-a chuan a chhang lo, chu an mi sawi chu Jin-a, a hma zan lawka tlan chhuak ta kha a ni tih a hre ran mai bawk si.

Master Xu-a chu a rawn tawng chhuak ve thung a, "Tinge? Tinge tunah chauh? Kum tam tak liam tawh hnuah chauh naute chu in ngaihven reng reng a?" tiin a zawt deuh khur khur mai. Liu-a chu a han khi leh deuh suk a, "Engmah chanchin ka hre mai bik si lova, kum tam tak chhung kan zawng ve bawk alawm. Mahse a chin kan hre miau si lo nen, kan beidawng lek lek tawh zawk a. Mahse Guang-a an man khan, a inpuanna avangin case pawh re-open kan dil leh nghe nghe alawm." tiin a chhang leh a.

Master Chen-a chuan Liu-a chu a tawng dan leh a chezia zawng zawng nen a lo en ngun khawp mai, a mi rin zawng a ni ta hauh lo. Jin-a zawng tura inpuahchah mek, monk thekhat ho pawh chu chet chhunzawm nachang pawh hrelovin Liu-a te thiandun thusawi chu an lo ngaithla uluk nasa mai a.

Ren-a pawh chuan an sawi naute chu Jin-a ngei a ni tih a chiang hle a, a chhan chu Master Chen-a'n Jin-a chu Master Xu-a'n ramhnuaia a chhar a ni tih a lo hrilh tawh vang a ni. Chutiang bawkin Lan-i pawh chuan a pu, MAster Chen-a zarah Liu-a te sawi naute chu a hmangaih leh duh em em Jin-a ngei a ni tih a lo hre ve chat bawk.

Anmahni chauh a ni lo, Jin-a naute a nih laia temple-a lo awm tawh puitling deuh ho chuan Liu-a te sawi naute chu, Jin-a, tlanbo hlim hlawl, zawn an tum mek chu a ni tih an hre ve ran bawk a, mahse tu a te mah chu an tawng chhuak lo. Master Chen-a chu a han thaw leh deuh hak a, "Kan lo ngaihtuah ang e, mahse ka thusawi ah khan keichu ka chiang khawp mai. Eng naute mah, pawnlam mi kan enkawl lo. Chubakah he temple ah hi chuan intihduhdahna leh inhuatna a awm ve lo, hmun ralmuang tak a ni. Chutianga in sawi ang naute kan enkawl seilen an lo awm a nih chuan ka lo zawng chhuak ang, mahse tunah rih chuan min kalsan phawt mai teh u." tiin a chhang a.

Liu-a chuan inla polite fahran hian chibai chu a han buk leh te te a, "I hun hlu tak min pek avangin kan lawm e, Master Chen. I thu kan lo ngaichang ang e, kan tan a pawimawh zia hi min lo hriat sak hram dawn nia." a han ti vel luam a. Tichuan a thianpa nen chuan an kal ta a, an kal liam thleng chuan an en a, temple chu a reh thuap mai.

Chutah monk ho chu Master Chen-a chuan a va en a, "Jin-a zawng turin inpuahchah vat rawh u." a han ti vin deuh hlur a. MAster Xu-a bulah chuan va pheiin, "Jin-a hi kan hmuh ngei ngei angai, kha mite kha ka ring hlawl lo. A dinhmun a hlauhawm takzet, a rang lama kan chet vat a ngai." a han ti zawi sap a.

***************************************

TO BE CONTINUE