SHADOW (A CHINESE ACTION FICTION STORY) Written by : Aaron Malsawmdawngzuala CHAPTER - 1

 SHADOW

(A CHINESE ACTION FICTION STORY)

Written by : Aaron Malsawmdawngzuala

CHAPTER - 1

******************************************

Kum 2002, March thla a ni a. China rama thingtlang khaw pakhat, Xiaogang ah chuan nu pakhat la naupang tak mai, MEi Ling chu a inluah tereuhte, bal leh tawp em em mai ah chuan a fapa, thla 2 mi lek chu a awi mek a. Naute lah chu a tap nasa em em a, a tlei hleithei meuh lo.

Mei Ling hi kum 19 chauh a la ni a, nawchizuar a ni. Tum loh deuh maiin fa a nei hlauh mai a, a sumdawnna pawh a ti buai hle. Hmeichhe inzuar thin ni mahse rilru chhe tak pu a ni bik lem lova, a duh vanga hetiang sumdawnna ti pawh a ni bik hek lo. A fapa pawh chu a sumdawnna atan hnawk hle mahse a hmangaih ve em em a, han tihral mai chu a phal bik ngang lo a ni.

Chutia a awih mek lai chuan a thiannu, KS ve tho Qin-i nena Brothel (KS awkhawmna in) an inkawm tum a, a thil sawi chu a ngaihtuah chhuak zawk mai. "Mei, ka sawi tawh kha. Midang keimahni ang tho pawh hian fa an neih palhin chutah chuan an dah mai thin alawm, pawisa pawh i hlawh teuh thei dawn asin. Inngaihtuah chiang rawh, i fapa hian nun nuam tak a hmang thei zawk dawn asin." tiin a hirlh mawlh mawlh a.

Mei Ling chu a ngawi reng a, "Nangmah pawh tunah i inchawm thei tawk tawk ania, i la naupang bawk si. I fapa hi hetia i enkawl luih talh chuan a dam chhuak zo lovang, lo dam chhuak pawh nise a than lenna tur atan i duh dawn em ni?" tiin Qin-i bawk chuan a han ti leh a.

Mittui far zawih zawih chung hian Mei Ling chuan, "Ka hrethiam lo, ka hmangaih ve bawk si a. A tana tha ber tur ka duh, mahse ka hmu tawh dawn miah lo tihna a nia." a han ti zawi sap a. Qin-i chuan a kutah a vawn sak a, "In pahnih tana tha zawk tur a nih chu, naute chu hralh mai rawh." tiin a thlem leh a.

*******************************************

A ngaihtuahna atang chuan a harh zawk mai, chumi ni chu a fapa a hralh ni tur chiah chu a ni. Qin-i thil sawi hi Orphanage pakhat, nu leh paten naute an duh loh emaw, fahrah hrim hrim te enkawlna anga sawi a ni a, Qin-i ngei pawh hian chutin a hre chiang bik lo. A hming pawh Chauyang Orphanage tiin an sawi a, mahse a awm tak tak em tih erawh a hre hauh lo.

A inluahna neitupa lah chuan luah an a pek that loh avang chuan hnawh chhuah ah a vau reng mai bawk si nen, duhthlan tur dang a nei thlawt lo a ni. Chutah kawngka rawn kik ri karh karh chu a hria a, a phu zawk mai. Naute pawm reng chung chuan a va hawng a, mipa pahnih, coat suit dum ha ve ve hi an lo ni a.

Mei Ling chuan a lo en hu a, "Tute nge in nih?" tiin a zawt a. Pakhat zawk chuan, "Tute nge kan nih i hria." a ti thum deuh chhur chhur mai. Mei Ling chuan a fapa rawn la tu turte an ni tih a hrethiam nghal a, a thin a phu nghal dup dup mai. A fapa chu a han en vang vang a, "In sawi ang khan ti ngei ngei ru aw, khawngaihin lo enkawl tha ang che u." a han ti khur deuh dar dar a.

Pakhat leh zawk chu rawn pen hnai in, "Kan hria alawm, mahse naute kha kan lak phawt angai tih i hriat kha." a han ti ve leh hmuk a. Mei Ling chuan a fapa chu mittui tla zawih zawih chung chuan a en a, "Min ngaidam rawh, Bawiha." tiin a rilru chuan ngaihdam a dil mawlh mawlh a.

Chumite pahnih chu a va pan hnai a, "Min tiam rawh u, tha takin in enkawl ang tih min tiam rawh u." a han ti zawi leh sap a. Pakhat zawk chuan naute chu lak sak pah chuan, "Buaina i siam zui te a nih ngawt loh chuan engkim a tha a nimai." a ti leh hmuk a. Tichuan pakhat zawk chuan pawisa tam tham tak a pe a, chhuah an tum ta.

An chhuah hma chuan pakhat zawk chu rawn hawi let in, "I tan leh i fapa tan vek a ni tih hria la, hahdam takin awm ang che." a han ti leh hram a, tichuan an chhuahsan ta a. Mei Ling chuan a en zui vawng vawng a, a mittui a tla zawih zawih mai. Chumite pahnih chuan motor ah naute chu an luh pui a, an tlan liam ta a.

*****************************************************

Darkar li meuh an tlan tawh a, ni pawh a tla dawn tawh a. Khang mi pahnih, Mei Ling-i naute la tute pawh chu khawkar kawng reh tak mai ah chuan an tlan mek zel a. Motor dang tlan pawh a vang kher mai, kawngpui sir vel pawh chu ngaw hmun vek a ni. Driver zawk chuan hma lam en vauh vauh pah chuan, "He kawngpui chu a reh tha bawk a, buaina kan tawk lo turah i ngai phawt teh ang..khawpui kan lut tep tawh bawk a." a han ti nuah nuah a.

A thianpa, naute pawm tu zawk chuan, "He lai velah hian police an patrol thin tih thawm ka hria a nia, min man vaih chuan kan chhe vek a ni mai." rilru nawm loh hmel tak chuan a lo ti thung a. Driver chuan a lu a bu nghat a, "A nih chuan kal risk chi loh a nih chu, a hma ang khan ramhnuai kawng atang hian kan kal leh mai dawn nia." tiin motor chu a turn a, ngaw hmun lam ah chuan an tlan lut daih mai.

An tlan thui zel a, khua chu a thim lek lek tawh. Ramhnuai chhung a lo ni bawk nen, a thim hian a thim ruih mai a. Chutah an tlan zel lai chuan police flashlight ni awm tak an hmu tlat mai, "Ehe, check point a awm a mi a?" naute pawm tu zawk chuan a han ti hu a. Driver pawh chu a han tlan muang deuh va, an hma lawk a police eng emaw zah lo vei kual mek chu ava hmu ta.

A meng kawk a, "Ramhnuai kawngah zawk an patrol a ni ngei ang, nge ni a main road ah pawh, an inthen hrang tihna em mawni le?" tiin a mangang kher mai. Motor chu an tiding a, police te erawh chuan an la hmu chiah lo, an lo titi nak nak hlawm ringawt a. Naute pawmtu zawk chu a han thaw hak a, "In-turn leh la, zan reiah kan chhuak zawk mai dawn nia, thawm kha dim la aw.." tiin a thianpa chu a hrilh a.

Driver pawh chuan motor chu a ti nung a, in-turn a tum ta a. MAhse a thei ta hauh lo, chirh diakah an motor ke chu a lo tang reng mai chu ni in. Tukverh ah chuan a dah chhuak a, "Khai a, chirhdiakah a ke a tang ania." a ti ta chul mai. Police thenkhat chuan an rawn hmu ta, muang chang chuan an va pan a.

"Tlan vat ang, han tum hram hram teh...saw an lo kal a nia." tiin a thianpa zawk chu a lo au chel chul bawk a. Driver chuan vin zet hian, "A theih loh a nih hi..." tih pah chuan tlan a han tum leh a, a ke chu chirhdiakah chuan a inphiat vak vak ringawt mai a. Police te lah chu an rawn thleng hnai zel mai si, "Chhuak rawh, naute kha la la...kan tlanchhiat mai a ngai dawn." tiin Driver chu a chhuk a.

A pistol pai chu phawrhin police ho lamah chuan a va kap ta siah siah mai a, pahnih vel chu a kap fuh nghe nghe. Naute pawmtu zawk pawh chu a rawn chhuk ve a, a tlan chhe nghal a. Driver pawh chuan zuiin an ramhnuai dur khup hnuaiah chuan an inkap ta vak vak mai a, rei fe an tlan hnu chuan driver zawk chu a ke ah an kap fuh ta tlat mai.

A bawk thlawp a, a thianpa chuan rawn chhan a tum a. Mahse driver chuan, "Tlan rawh, tlan vat rawh." a lo ti chiam chiam a, hreh tak leh hlauthawng tak chung chuan a tlan chhe ta ve ringawt mai a. Driver chuan police ho chu bawk reng chung chuan a kap leh vak vak a, mahse tumah a kap fu lo.

Police ho chuan an rawn kap ve leh a, a chalah tak chuan an kap a. A thi chiang kher mai, mahse naute pawmtu zawk erawh chu a tlan chhe thui hman lutuk tawh tlat. Police Officer ber chuan Driver ruang chu a han en vang vang a, "Pakhat zawk kha a tlan chhuak tur a ni lo, zawng leh nghal rawh u." a han ti vin thak a.

***************************************************

Chutih lai chuan naute pawmtu zawk pawh chu a lo tlan hla tawh hle a, naute lah chu a tap nasa mai si a. Police ho chuan a tap ri atangin an rawn zawn hmuh mai a hlau bawk si, han thah em chu a duh bik si lo. Tichuan ramhnuai pilril lam chu a pan pui zel a, khawiah ber nge a awm pawh a hre tawh lo.

Chutia a tlan zel lai chuan a hma takah chuan Chinese monk pakhat, la naupan hmel tak mai, Xu-a chu a lo ding reng mai a. A ding chat a, "Tunge i nih? Eng vanga naute pawm chunga tlan chhe chiam nge i nih?" tiin Xu-a chuan a lo zawt nghal a. A tih ngaihna hre lo chu a ngawi reng a, naute chu a pawm khur zawih zawih ringawt mai.

Xu-a chuan a va pan hnai a, "Min chhang rawh, engthil nge kha naute chungah khan tih i tum?" a han ti vin leh thak a. Tap lek lek hian Xu-a chu va panin, "Kha la rawh, ka tel peih tawh lo." tiin naute chu a va hlan chhawng ringawt mai. Xu-a pawh chuan a lo pawm nghal vat a, "Eng thil nge i tih a? Hey..eng nge awmzia?" a lo ti hu mai.

Mahse a sawi zawh hma hma chuan a tlan chhe leh ta daih a, naute lah chu a tap nasa em em mai lehnghal. Xu-a pawh chuan chupa chu umzui a tum lem lo, naute chu a han en vang vang a. Naute chu mak tak mai hian a tap bang a, Xu-a chu a en ta vauh vauh mai a. Xu-a chuan chu naute chu a ngaina nghal em em bawk, an temple lam ah chuan a haw pui ta daih a.

Xu-a chuan an temple, ramhnuaia awm tho, GOLDEN LOTUS TEMPLE a va thleng chu an master, Chen-a chuan chutia Xu-a naute a rawn pawm haw ta mai chu mak a ti em em a. Rang takin ava pan a, "Xu, eng nge awmzia? Kha kha tu naute nge?" tiin a lo zawt nghal vat a.

Xu-a chuan naute awih hlarh hlarh pah chuan, "Master Chen, ramhnuai ah ka hmu a ni. Mipa pakhat hian a rawn pawm a, tuten emaw an um a ni ngei ang ka ring. Tichuan kan intawk a, he naute hi min pe a, a tlanchhe leh daih a ni." tiin a han chhang a. MAster Chen chuan naute chu a han en vang vang a, "Xu, a hlauhawm ania. Tu fa nge pawh kan hre si lo, eng harsatna nge kan tan a rawn put luh dawn a hriat miah loh a nia." a lo ti leh a.

Xu-a chu a ngawi vang vang a, "KA kalsan ngawt thei lovang, MAster. Min hmuh chiah khan a tap bang hmak a, ka duty niin ka hria. Reilote chhung tal pawh he naute hi enkawl ka duh a ni, kan tihtur ni bawkin ka hria." a han ti leh a. Master Chen chuan naute chu a han en leh vang vang a, thlamuan hmel tak hian a lo muhil siai siai mai.

Chutia naute pawisawi lo tak mai, Xu-a bana ngaih ngam taka a muhil siai siai mai chu MAster Chen chuan a khawngaih hle mai a. A han thaw deuh hak a, "Thinlung tha tak leh hmangaihna ngah tak i nei a ni, Xu. MAhse he naute hi a tul hun chhung chauh kan enkawl ang, eng ang mi nge, tu in nge rawn zawng dawn kan hre bawk si lo." a han ti dam dap a.

Xu-a pawh chu a lawm kher mai, "Ka lawm e, MAster. He naute hi chu ka mawhphurhna ni rawh se, tha takin ka enkawl ang." tiin a chhang a. MAster Chen pawh chuan a lu a bu nghauh nghauh va, "Awle, mahse khawchhung lam atang hian an rawn zawng maithei a. Chutiangah chuan kan lo inpuah chah a ngai khawp ang, he khawvel hi chu a him lo tih i hriat kha." a lo ti leh a.

*********************************************

22 YEARS LATER

Golden Lotus Temple, nalh tak mai leh lian em em mai chu ni chuan a em eng phut mai a, a bula tual zawl ah chuan mipa pahnih chu sparring nei tur chuan an inhmachhawn mek a. Naupang thenkhatte chuan an lo en deuh thup bawk a, midang erawh an buai buai in an lo buai thung.

Pakhat zawk chu Ren Zhangyu niin kum 25 mi a ni a, sam sei hnuang mai niin kawr a ha lova. A pian pawh a sek tha in a mawi tawk em em a, thing atanga siam tiang, an practise na a an hman thin chu a hum ran a. A zuang deuh thauh thauh va, a in ready tawh hmel kher mai. Ft 5'9 vel a sang niin a lian angreng hle a, mahse a hmel enin a la naupang hle tih a hriat thung.

A hmachhawn tur chu Jin Wei a ni a, kum 22 mi a ni thung. A ni erawh a sam chu a tawi pangngai a ni a, a hmel pawh a zahpuiawm loh hle. REn-a ang bawkin tiang chu a keng ve bawk a, a kawr chu a han phelh ve a. Ani pawh pian zahpuiawmloh tak, a tawk chiah a sek hi a ni a.

An inveh ta tham tham mai le, tichuan an han invai nual a. Mahse a tu amah chu chak zawk ala awm thei lo, an hmanhmawh lo dun hle bawk. Ren-a chuan nuih suk pah hian, "I che rang sawt hle mai, Jin. Mahse rei i daih ang em, en chhin ang hmiang?" tiin a han fiam vel a. Chutah Jin chu ava bei leh thut a, mahse a lo bum zeuh va.

A tiang ken lai chuan Ren-a hnungah chuan a nawr sawk a, Ren-a pawh a tlu teuh kher mai. Rang takin a rawn inher leh nghal vat a, "Speed ringawt hi a pawimawh ber lo, Ren..mahni inthunun hi a pawimawh zawk." tiin Jin chuan a han nuih sak a. Chutah rang zet zet hian Ren chuan a han attack leh a, mahse Jin erawh chuan attack let lovin a lo indang char char ringawt a.

Ren-a chuan thaw deuh hluam hluam chung hian, "T(r)ang lo lui vel suh, Jin. Min bei ve pawp pawp ta che, insum reng reng suh." a han ti vel a. Jin chu a khi suk mai, chutah le, a rawn che ve tan ta. Ren-a ai chuan a rang daih zawk, a lo indang hman mang ta lo tlat thung mai.

Rei lo te hnuah chuan Jin chuan Ren-a tiang chu a vuak thlak sak ta daih mai a, Ren-a pawh a tawlhnung nghal. A nui deuh huah huah a, "Awle awle, i chak e. I ti dik e, mahni inthunun a lo pawimawh khawp mai." tiin a ban chu a han phar uang vel a. Jin pawh chu rawn nui chhuakin, "I che tha e, unaupa." tiin an inkuah a.

Temple sir atang chuan Jin-a che tla vel chu nula, la naupang tak, kum 18 leka naupang, Lan-i chuan star hmel tak hian a lo en dauh dauh va. Lan-i hi a hmingpum chu Lan Yumei a ni a, Golden Lotus Temple a an master ber, Master Chen-a tunu a ni. An naupan lai atang tawhin Jin-a hi a star ru thei em em a, mahse Jin-a erawh chuan a thiannu ang bakin a en ngai lo thung.

Ren-a chuan temple kawt Lan-i lo ding, Jin-a a lo en reng lai chu a hmu fuh a. A khi suk a, "Khi te, khi te, tu emaw chuan a en leh ta dauh dauh mai che." tiin Jin chu a han chhaih vel a. Jin chu ava hawi phei ve a, Lan-i chu ava hmu ve ta a. Chuveleh LAn-i lai lutuk chu a phu zuk a, pangpar tui a pek chhunzawm leh nghat zat a.

Jin-a pawh chu a khi suk a, "Kan farnu a nih khi hre reng rawh, eng nge maw min chhaih ziah le..." tih nuah nuah pah chuan a kawr chu ava la a, a inha tha mawlh mawlh a. Ren-a chuan rum zet hian Jin-a hawisawn hlan chuan a melh khur a, "Ni e, mahse ani chuan chutiangin a en ve lo che, keimah zawk hi u angin min en a, nang chu a ni ve lo...eng nge a chhan?" ama hriat tham leh chuan a ti zawi sap mai.

Ren-a hian Lan-i hi a star ru ve em em thung a, mahse Lan-i chuan unaupa ang bakin a ngai lo. Hun rei tak chhung Jin chu a atchilh khat tlat tih a hre vek a, chuvang chuan a thik ru em em thin a ni. Chutih lai chuan MAster Xu-a chu a rawn kal a, REn-a leh Jin-a te chu room a lo lut turin a hrilh a.

*********************************************

MAster Xu chu Jin-a leh Ren-a te hma takah chuan a ding a, "In ti tha e, in pahnihin, hma in sawn khawp mai. Mahse hei hi hre reng rawh u, in thiamna te, in combat skills ah chauh hian innghat suh ang che u. A pawimawh ber zawk chu in chheh vel a thil thleng te hi in hriatthiam a ngai a ni, in rilru zawng zawng nen in training thin tur a ni." tiin a han hrilh a.

Jin-a chu a han gnawi vang vang a, "Master, hmundang, khawchhung lam ah te hian khawvel hi eng ang nge a nih ve ang le?" tiin a han zawt deuh thut a. Xu-a pawh chu a nui deuh suk mai, "Jin, he khawvel ah hian thil thleng thei lo pawh hi a awm lo va. A mawi rual rual in a hlauhawm a ni, mahse hadamna hmun pawh a ni tel thei bawk. I hun a lo thlen hunah chuan, a tul hun te a lo thleng a nih chuan i la tem ve mial mahna." tiin a chhang a.

Jin-a chuan a lu a bu nghat a, "Ka hrethiam e, Master." tiin a chhang a. Xu-a chuan Jin-a darah chuan a vuan a, "Tunah rih chuan i training ah hian i rilru i pe hle tur a ni, i zawhna te chu a hunah chuan chhan in a awm mai ang." a han ti leh a. Ren chuan Jin-a darah chuan a han beng thak a, "Hawh le, va tan leh tawh ang hmiang." tiin a tho va.

Jin pawh chu a tho ve a, "Nakin deuh vah ka rawn enpui ang che u, taima tak leh tha tak khan va practise leh teh u khai." Xu chuan zaidam tak chuan a lo ti ve bawk a, tichuan an pahnih chuan an chhuak ta a. Tual zawl lam chu an pan a, "Khai le, master rawn kal hma chu round khat chu han inbei leh i la." tih pah chuan Ren-a chuan a tiang chu a chhar a.

Jin-a pawh chuan a tiang chu chhar ve a tum a, chutih lai tak chuan Lan-i chu a rawn phei a. Nui sen sen hian, "Jin, lo ding lawk teh." a rawn ti a, Jin pawh chu a lo ding ve mai a. Ren-a pawh chu ava hawi a, a thik lehpek khawp mai. Chutah a thikna ti zual tur chuan Lan-i chuan bag ah hian eitur a rawn keng a, "Jin, hei eitur ka lo ken che a." tiin amah chauh chu a la rawn pe zui.

Jin-a chuan bag chu la in a chhunga awm chu a han en a, chhang tuihnai tak tak hi a lo awm teuh mai. Nui chung hian, "Ka lawm e, hetia min rawn pek kher a ngai lo asin mawle." tiin a lo chhang a. Lan-i chu a lai lek lek mai, "Engmah a nih loh kha, i training hah awm si a...chhunah engmah i la ei awm si lova ka tia..." tiin a han insawi vel nghawng nghawng a.

Jin-a chuan Lani-i lu ah chuan a han tuai vut vut a, "I fel hle mai, LAn... ka lawm lutuk e." a han ti leh a, Lani-i chu a lai takzet. Nui sen sen chung chuan a lu a han kun zeuh va, "Tui deuhvin i ei dawn nia, ka kal ang e." tiin a kal ta a. Ren erawh a nuih a za lem lo khawp mai, "Ni e, Jin-a hi chu i duhsak bik alawm." tiin a phun zawi sap a.

Jin-a chuan a eitur chu chhuatah chuan a dah mai a, a tiang chu la in Ren-a bulah chuan ava phei a. Ren-a hmel hlim lo tak chu ava hmuh chuan mak a ti deuh va, "I tha maw, Ren? Tinge a, thinrimna nei i va ang ve?" tiin a zawt a. Ren-a chu za lo tak chuan a lo nui lui sak a, "Ka tha alawm, engmah a ni lo." a lo ti deuh hmuk mai.

Jin-a chuan mak a ti angreng kher mai, "Engpawh nise, saw....Lan-i'n eitur min rawn pe a, ei phawt ang, hawh, lo kal rawh." tiin bag chu a la a. Chhang pakhat chu la chhuakin a ei a, "Umm, a tui hle mai. Ei ve chhin teh, REn?" tiin va pek a tum a. Tum deuh hmuk chung hian Ren chuan, "Aih, ka ril a tam lo. Tikhan lo ei la, i ei zawhah training ground ah kan inhmu dawn nia." tiin a kalsan daih mai.

Jin chuan a en vung vung a, "Eng thil nge maw a hriat thut chu le?" a ti nuah nuah a, chhang chu a han ei leh a. Tui a ti takzet, a ei pah chuan a inngaihtuah vauh vauh a. Kum 22 lai mai chu, chu temple ah chuan a lo khawsa ve tawh a. Social Media tel lo, phone tel lo, TV pawh tel lo chuan a hun a hmang mek chu a ni a, khawpui lama mihring nun dan te chu hriat ve a chak thin hle a ni.

**********************************************************

Zan a ni a, Golden Lotus Temple bula huan, mawi tak mai chu thla eng tak hnuaiah chuan a lang tle sar sar mai. A bul vela thingkung ah te chuan lantern a inkhai fur bawk a, tui luang ri leh rannung hram ri chu zan a rei deuh tawh bawk nen, a ring angreng kher mai. Jin-a pawh chu huan ah chuan a tei kual vel mai mai a, chhun lamah a lo training hah deuh bawk nen boruak thianghlim han dawn ve chu a chak pawh a ni mahna.

Thui vak lo a kal hnu chuan lungpui bula Lan-i, ngawi renga lo thu hi ava hmu a. A bulah chuan lantern hi a lo inhung bawk a, "Ehe, hetah daih daih eng nge maw a tih le?" tih nuah nuah pah chuan Jin-a chuan ava pan phei a. Lan-i bul ava thlen chuan a aw a han thian kharh a, "Lan, i tha maw?" tiin ava zawt a.

Lan-i chu a lo phu deuh zuk a, "E.. Jin, nang i ni maW? Boruak a nuam em a, mahniin ka lo thu mai mai mawle." tiin a lo chhang vat a. A bulah chuan ava thu ve a, "A nih tak chu mawle, keipawh vawiin lam training ka hah deuh va, han chhuah thawven mai mai ka tum a. KA hmu hlauh che chu ka va lawm tak, mahni chauh va awm ai ngawt chuan.." tiin a han nuih vel suk a.

Lan-i pawh a lai leh lek lek tawh mai, "He huan hi chu zanah hian a mawi bik ania aw..i ti ve em?" a han ti zawi sap a. Jin chuan a lu a lo bu nghut a, "A dik alawm, zanlaiah hian ka kal fo thin alawm." tiin a lo chhang a. An ngawi dun vang vang a, "Ka pu hian a sawi fo thin, helai huan hi chu a rilru tih thawven nan ber a hmang thin a. Ka rilru a hah chang te, a tawt up up chang te hian helai huanah hian mahniin ka kal thin a, min hahdam tir sawng sawng zel a ti thin." tiin a han nui suk a.

Jin chu a han thaw deuh hluai a, "MAster Chen maw? Ni e, ka bulah pawh a sawi fo thin alawm. Chuvang ania keipawh hetah hian ka kal fo thin ni, temple a cheng zawng zawngte hi a enkawl vek chu a ni sia, a buai ve thei ngawt ang." tiin a lo chhang ve leh a. "A buai thin reng alawm, chuan engkimah Master Xu hi a rawn ziah thin bawk a. Master Xu pawh hi i mentor ania, i tan apawimawh ang chiah hian keipawh ka tan hian a pawimawh lutuk asin, ka pa ang mai hian ka en thin." Lan-i chuan a han ti ve leh a.

"Ni e, MAster Xu hi chu ka tan chuan engkim hi a ni ringawt. A tel lo chuan tun a ka thiam thil te hi ka nei thei miah lovang, min enkawl seilian hi ka lawm tak tak a ni."

"Master Xu leh ka pu, Master Chen hi chu he temple tan hian an tangkai a ni, tiraw? Kan hlim loh hlauvin theih tawp an chhuah a, an kum a upat tawh ang hu hian an enkawl rei thei zawk ngawt mai."

Jin-a chu a han ngawi leh vang vang a, "Khawvel a cheng midangte hian eng nge an tih ve thin ang le? Keichu reilote tal pawh han fan kual ve hi ka chak thin a ni, helai hmun hi a nuam lo ka tihna nilovin hmun dang a mihringte awmdan hi ka hre ve chak, ka hmu ve chak thin." a han ti nuah nuah a.

Lan-i chu a lo nui suk a, "Thil tam tak thleng thei a nia lawm, he khawvel hi chu. Master Chen hian i hun a thlen hunah chuan a fan kual pui ve em em ang che, keipawh chutin ka la kal hla lutuk bik lo...khawpui lamah vawi khat min hruai ve tawh a, chuzawng chu a ni mai." tiin a lo chhang a.

Jin chu a han thaw hak a, "Ka lawm e, Lan... titi pui tur i lo awm hlauh va." tiin a han nuih suk a. Lan-i pawh a lo lai lehpek kher mai, en pawh a en tha ngam lo. A duh thu sawina hun remchang tak a ni tih a hria, mahse a ngam hlawl lo a ni. A lo duh let ve em tih a hre bawk si lo, an ngawi dun leh vang vang a.

*************************************************************

Chutia an ngawih dun reng lai chuan an hnung lam atang chuan thawm an hria a, an va hawi phei chu Ren-a a lo ni. An bulah chuan a rawn kal a, "Nangni pahnih chu, eng nge hetah in lo sawi dun vel a?" a rawn ti deuh kher a. "Lo kal rawh, lo thu ve rawh. Hei kan lo titi mai mai a, a hmun hi a nuam bawk sia." Lan-i chuan a lo ti vat a.

Ren-a chu a han nui deuh var var a, "A nih chu mawle, hla deuh atang khan ka rawn hmu che u a..ka rawn kal ve tawp mai, ka tibuai che u em?" a han ti leh deuh kher a. Jin-a chuan a lo pawt thu hnawk a, "Lo thu mai mai teh, lo titi ve rawh." nui chung chuan a han ti a. Thut pah chuan Ren-a chuan, "Anih te chuan thu ve ila... ka sil em em mai lehnghal." a han ti deuh nuah nuah a.

An pathum chuan thu in an ngawi deuh vang vang hlawm a, "Ren, he temple atanga i chhuah hunah eng nge tih chhunawm zel i tum?" tiin Lan-i chuan a rawn zawt deuh thut mai. Ren-a pawh chu a han inngaihtuah vang vang a, "Ka hre rih mai lo, tunah chuan ka training ah hian rilru ka pe hrih em a ni. Chubakah a lungngaih thlak hleinem, he khawvelah te hi chuan thil thleng thei tam tak, thil tih theih tamtak a awm alawm, Master Xu sawi ang khan." tiin a lo chhang a.

"Dik chiah, Master sawi kha keipawh ka ring. Mahse, engtin nge midang ho hi an nun ve thin ang le tih bawk hi a ni keichu ka ngaihtuah thin ni." Jin chuan a lo ti ve leh a. Ren-a chu a han thaw hak a, "A hunah chuan kan hre ve mai turah ngai ang, keipawn ka ngaihtuah thin alawm." a lo ti ve leh a.

An titi deuh nual hnu chuan Lan-i chu a tho thut a, "KA let leh tawh mai ang e, keichu. Ka pu in min lo zawng leh chiam palh ang, tikhan lo la titi rawh u." tiin kalsan a tum a. Jin-a pawh chu a ding ve a, "Anih muttui le, Lan. Zanin chu ka lawm hle mai, titi pui tur i lo awm hlauh va." a han ti a.

Lan-i chu a nui deuh suk a, "Nangpawh muttui le, Jin. Naktukah kan inhmu dawnnia, eitur ka lo siam leh ang che." tiin a kalsan ta a. Ren-a chu a rawn ding ve a, an pahnih chuan Lan-i kal liam lai chu an en dun vawng vawng a. Ren-a chuan a han nghawk zeuh va, "Enteh, unaupa. Lan-i hi chuan a ngaihven ve chiang che alawm, ka hriat loh ring suh." a han ti deuh su su a.

Jin-a chuan a lo melh hu a, "Eng nge i sawi awmzia?" tiin a lo zawt vat a. Ren-a chu a han thaw hak a, "A ngaihtuah theih em che hi, thian ang chauh chuan a en lo che alawm. A duh che tih a chiang reng, a hel a hel che hi hrethiam ve ta che." tiin a chhang a. Za lo tih hriat tak hian Jin-a chu a nui lui sak a, "Lan-i hi chu ka thian tha tak mai chauh ania, ka nau angin ka en. A bak a awm lo, chuan ani pawhin chutiang bak chuan min en lovang." a lo ti daih mai a.

REn-a chu a han thaw leh deuh hak a, "Chutiang ngawt a ni lo, thiana. I hrethiam lo mai mai a nih kha, Lani-i hian hman atang khan a duh tawh che tih hi ka hai lo." a ti leh a. Chutah Jin-a chuan a melh deuh hraw a, "Tikhan sawi suh, Ren. Lan-i hi ka nau, ka thiannu kan MAster Chen-a tunu a ni a...abak engmah a awm lo." a ti vin deuh ta hlur mai.

Ren-a pawh chuan a sawi chhunawm ta lem lo, "Awle, awle...kan sawi tawh lo ang." a lo ti ve mai bawk a. Jin-a chu a han thaw deuh halh halh a, "Haw ang, ka mut a chhuak." a ti leh hmuk a, a kal daih mai. Ren-a chuan a en zui vang vang a, "I vannei bik khawp mai." tiin a phun zawi sap a.

Ren-a pawh chu a kal ve ta a, mahse thingkung pakhat phen atang chuan Lan-i chuan an thusawi chu a lo ngaithla ru vek a. Chutia a duh ruk em em, kum eng emaw zat a lo vei ruk em em Jin-a'n a duh ve miah lo tih a hriat chuan na a ti hle a, a beidawng takzet. T(r)an a lak nasat ve tehreng nen, awmzia a awm miah lo mai tur chu a rilru pawh a na ve hle mai.

***********************************************

TO BE CONTINUE