SHADOW (A CHINESE ACTION FICTION STORY) Written by : Aaron Malsawmdawngzuala CHAPTER - 2

 SHADOW

(A CHINESE ACTION FICTION STORY)

Written by : Aaron Malsawmdawngzuala

CHAPTER -  2

******************************************

Basement thim ruih mai, dim light pakhat in chhi eng ve chang chang hnuaiah chuan mipa pakhat hi thi hnuang hian a thu kun reng a, a kut leh ke te chu a thutna chair ah chuan phuarbeh tlat a ni. He pa hi kum 22 kal ta a, Jin Wei, naute mai chauh a la nih lai a ruk chhuaktute zing ami pakhat, a dam chhuak zawk, Guang-a kha a ni.

A chauh hmel hle a, a mit te chu a bui luk mai. Chutah a thutna zawn kawnga chu a rawn ri rak a, pa pakhat hi a rawn kal phei a. A hnungah chuan mi panga velin an rawn zui bawk, chupa chu smart tak hian a inchei a, kum 40-45 vel inkar ni awm tak a ni. A hming chu Zhao Yilong niin THE MASTERMIND ti a hriat lar a ni bawk, naute, nausen piang hlim leh naupang te ruk bo va, an taksa bung hrang hrang hralh thinte zinga a bul tumtu ber a ni.

Guang-a hma takah chuan a han ding a, "Kum tam a liam ta, Guang. Tunah chuan ka hmu ta che, kum 20 chuang police-i'n min zawn nachhan, min phatsantu ngei mai chu ka hmu ta che." tiin a han nui huah huah a. Guang-a chuan hlauh hmel tak hian a lo en a, "KA phatsan lo che, Boss. MEi Ling, kha nawhchi zuar nu vang vek kha alawm. Kum engemaw zah a liam hnu khan a hrechhuak a, ka phauhchawp, Chao Yang Orphanage tih kha a lo zawng tak tak a. A awm tak tak lo tih a hriat hnu khan police hnenah a complain a, kha mi hnu khan police te chuan min zawng char char alawm." tiin a insawifiah nasa mai.

Yilong-a chu a mengrum kher mai, "I dawt sawi avangin police in an zawn phah che a, mahse nang chu Mei Ling dahthat ai chuan tlanchhiat i thlang zawk amaw? Kum 22 hnuah pawh, tun thlenga police in an zawn theih nachhan che chu Mei Ling la dam vang a ni, he tiang chen chen a rei hian Mei Ling chu engtin nge a nunna i la zuah theih zawk? I that daih thei alawm, nung dama i la awm tir vang a nih hi tun thlenga police in min zawn, i hria em?" tiin a vin hrep mai.

Guang-a chuan mangan hmel tak leh hlauh hmel tak hian, "Ka tum ve alawm, Boss. Ka hming chu a hre lo, mahse a fapa kan va laksak ni khan ka hmel hi a hmu chiang lutuk tlat. Police ten ka lem an ziak a, ka thianpa nen khan. Tichuan ka thianpa kha chu a lem an ziah atang khan a boral tawh tih an hre thei nghal mai a, kei ve erawh min zawng nghal char char a ni. Tlanchhe reng rengin hun ka hmang a, ka hmel lan dan te a theih ang angin ka thlak a, mahse tun thlengin min la zawng chu a nih hi." tiin a chhang leh a.

Thinrim tak hian Yilong chuan Guang-a kawr awmah chuan a tham a, "I dawihzep vang a ni, Guang. Mipa diktak anga mahni buaina hmachhawn ai chuan ui dawihzep ang maiin i tlanchhia a, min phatsan a ni. Nangmah vang hian kum 4, kum 4 chhung jail bang ka zut a asin. Tun thleng pawhin ka tlanchhiat ala ngai a, province dang dang ah ka insawn angaih phah asin." a ti leh khur khur mai.

Guang-a chua  tap pur tawh, "Ka tihpalh, ka tum a ni bik lo asin. KA tlan bo hlen theih mai ka ring a, hetiang em em a rei hian police te hian min zawn ka ring bik lo alawm." a han ti khur dar dar a. Yilong-a chu ding ngil deuh atin a han ngawi vang vang a, "Anih leh, kha naute kha... khawnge a awm?" tiin a han zawt leh a.

Guang-a chuan a chhang mai lo, a chil a lem dawk a. Hlauthawng tih hriat tak hian, "Ka.. ka tlanchhia a, police khan min um a. A tap reng bawk si a, tih ngaihna ka hre lova. Chuan... ihhh, monk pakhat kha ka tlanchhiatna ramhnuaiah khan ka tawk thut a, chuan..ka, ka pe ta ringawt alawm. A hming pawh ka hre lo, ka pe tawp a, ka tlanchhe leh nghal a ni." a ti bah deuh nuai a.

Chutah phawk hru hian Yilong chuan Guang-a chu a melh a, "Eng maw i sawi a? Monk pakhat, hriat chian pawh ni lo hnenah naute chu i hlan ringawt amaw? Kum 22 a liam tawh, tunah chuan kha naute kha puitling a ni ngei tawh ang. Amah kha tun thleng hian an la zawng mek asin, case close daih tawh chu a ni thei teh meuh mai. MAhse nangmah vangin ka sumdawnna hailan a ni a, ka tan hian buaina a la tling asin." a ti leh ta khur khur mai.

Guang-a hlauthawng bawk si chu a thlan zawih zawih tawh mai, "Tihdan dang ka hre lo a ni, Boss.  A khat tawkin Mei Ling-i khan complaint kha a theh lut chhen bawk si a, case re-open a chawl der si lo. Khatia police-in min lo chapchar thut kha ka ring pha bik lo a ni, thlamuangin ka awm ngai bik lo asin." a han ti leh lawm lawm a.

Yilong chuan a chhang lo, a bula mi, a naute zinga mi Liu-a chu a han signal zeuh va. Chutah Liu-a chuan wire hraw tak mai hi a rawn phawrh a, Guang-a chu ava pan ta mai. Guang-a hlau lutuk chu a lo meng phawk nasa mai a, "Nilo, Boss. Ka phatsan lo che, khawngaihin min ring rawh." a ti nghal chel chul mai a.

Yilong-a chu ngeiawm tak chuan a han nui deuh huk a, "Ka ring ang che maw? Hna chhete pakhat ka pek che pawh i hlen chhuak thei lo chu a nih hi. Mei Ling-i i dahtha thei lova, a fapa lah midang hnenah i pe tawp a, chuan tun thlengin nangmah vangin police ten min zawn phah bawk chu a nih hi." tih pah chuan Liu-a chu a signal leh zeuh va.

Liu-a chuan wire chu Guang-a hrawkah chuan a vet nghal mawlh mawlh mai, "Nilo, khawngaihin.." tiin Guang-a chu a tap zawih zawih a. Mahse Yilong-a chuan a chhang tawh lo, Liu-a chuan Guang-a chu wire hmang chuan a rek thut a, a tal vak vak mai. Reilote hnuah chuan a thi ta der mai a, Yilong-a chuan a en vang vang a.

Nui deuh sak in, "I buaina i chingfel thei lo bawk a, tikhan ka chinfel sak ta che a nih kha." a han ti thum chhur chhur a. Chutah Liu-a chu ava pan a, "Monk chu kan zawn hmuh angai a ni, a nih loh chuan police ten min zawn hmuh khalh mai ang. A rang lamin che ang che u, a nih loh chuan buaina dang kan la tawk thei ania." tiin thu a han pe a.

******************************************************

A tuk zing a lo ni a, zing dar 5 a pel vel chauh a ni. Golden Lotus Temple nalh tak mai chu ni zung chuan a rawn chhun eng tle sar sar mai a, sava hram chuah chuah ri pawh chu a hriat theih bawk. A bul vel a lui luang te pawh chu an thiang kak mai a, zingkar hma tak la ni mahse Temple kawtzawl a thawm erawh a tha thak thak kher mai.

Monk tam tak te leh zirlai tam tak te chu an insawi zawi mek hlawm a, a thenin martial arts an practise laiin a thenin meditiation an lo ti thung a. Kum upa lam deuh hovin Tai Chi an lo practise ve thung bawk a, hmeichhe thenkhatte erawh chuan tual an lo phiat fai thung a. Mitin mai chu an buai buaiin an buai hlawm a, a tu a te mah chu an inngaihsak hlawm lem lo.

Jin-a pawh thlan tla hluam chuan martial arts a lo practise ve mek bawk a, a lo zo dawn hnai tawh hial zawk a. Chutah Lan-i chuan a rawn pan a, basket pahnih, chawhmeh khat vek hi a rawn khai a, rit a tih hmel kher mai. Inthlahrung tak chung si hian, "Jin, khawngaihin choka lamah chawhmeh ho hi min khai luh pui thei angem? Tukthuan ami tur a ni sia, a rit lutuk a?" tiin a rawn zawt a.

An bul lawk a martial arts lo practise ve mek, Ren-a pawh chu a rawn hawi hru mai. Amah zawk pawh chu Lan-i chuan a sawm ve thei reng a, mahse kal pel ngatin Jin-a kher ava sawm zawk chu a thik leh pek khawp mai. Jin-a chuan nui sang hian, "Tehreng mai, tikhan lo dah la, ka zo tep, ka lo pui ang che." tiin a lo chhang vat a.

REn-a chuan Jin-a chu ava pan a, "Jin, kan sparr a hun leh tawh ania. Hun i khawh ral mai mai zel a, nang chu...hawh ti vat zawk teh ang." a rawn ti deuh tut tut mai. Jin-a chuan a thlan a han hru thuak thuak a, "Ka hman tep, Ren. HEi Lan-i hian puih a mamawh a, ka rei lovang." tiin Lan-i lam chu ava pan a.

Chutah vin lek lek hian, "Lan-i lam buaipui a hun lo, kan training hi a pawimawh zawk. Midang puih ngai tih vel mai mai, midang pawh an sawm thei reng. Kan mawhphurhna a ni lo, kan mawhphurhna zawk chu he kan training hi a ni tih hre ta che." a ti deuh ta hlur mai a. Jin-a pawh chuan mak a ti angreng hle mai, LAn-i pawh chu a inthlahrun zual phah hle a.

Mahse Jin-a chuan zaidam tak hian, "A rei dawn hleinem, minute khat pawh a ni nang. Chawhmeh hi hmeichhe tan chuan a rit lutuk a, ka va zawn luh pui lawk ang nga, ka rawn let leh vat dawn alawm." tiin a chhang leh mai a. Tichuan Lan-i nen chuan choka lam chu an pan a, "Chhuanlam siam thiam ropui si." tiin Ren-a chu ama hriat tham lek chuan a phun nuah nuah mai.

Choka atang chuan Lan-i leh Jin-a te chu an rawn chhuak leh a, kawtah chuan titi in an nui dun har har a. An hlim dun hmel kher mai, mahse Ren-a chuan a rawn hmu fuh leh ta tlat mai. A insum hram hram a, a thik takzet a ni. Mahse Jin-a chu a rei ta mah mah nge ni, a va en leh a.

Lan-i chuan nel hmel tak hian Jin-a darah chuan a han khawih vel a, chu chuan Ren-a thikna pawh a ti zual kher mai. A insum thei tawh thlawt lo, a tiang ken lai chu chhuatah chuan a paih pawp a, a va pan ta mai a.An bulah chuan a va ding a, "Hei hi maw reilote chu? Practise aia pawimawh chu hmeichhe bula lo titi mai mai hi maw ni a? Tinge hetia i awm a, Jin?" tiin a rawn hau ta hrep mai.

Jin-a chuan chutia a rawn thinrim thut mai chu a hrethiam lo hle a, "Eng thil nge maw i hriat le, Ren? Kan unaunu Lan-i hi ka pui mai chauh a nih hi, chutah chuan eng nge thinrimna tur awm a?" tiin a lo zawt let ve nghal a. Ren-a chuan thinrim hmel tak hian, "Tiagn hian ahma pawhin i awm ziah, Lan-i a lo kal tawh chuan i thil training pawh i ngaihsak tawh ngai lo. He temple ah hian dan kan nei a, chu chu i duh duh huna i bawhchhiat theih a ni lo tih hria ang che." a ti leh ta khur khur mai.

Lan-i chuan hrehawm a lo ti kher mai, "Ren, eng nge maw i hriat le? Min pui turin ka dil a, min pui mai chauh alawm." a lo ti ve bawk a. Ren-a chuan rum tak hian Lan-i chu a melh khur a, "I hrethiam ve lovang, he kan training hi a pawimawh zia i hrethiam ve lovang. Kan schedule hi kan zawm thlap thlap a ngai, hetia lo titi a lo nuih dun vel hi a rem lo." a lo tih khum leh hmak mai a.

Jin-a pawh chu a lungawi vak tawh bik lo kher mai, "Ren, hmeichhe awmnem zawkin min puihna a rawn ngen a. Ka pui mai a ni, ka duty ka hlen lohna pakhat mah ka hre lo." a ti ve tak hmak mai a. Chutah vin deuh tak hian Ren-a chuan, "Min chhang let ve amaw? Nang aia senior monk tur ka nih hi i hria em? Nang aia upa ka nih hi, chhuanlam siam reng reng suh." a ti leh ta zek mai a.

Lan-i pawh a rawn tawng chhuak ve leh a, "Ren, thinrim viau na tur engmah a awm lo. Kan lo titi zuai a nih kha, a rawn kal dawn reng alawm." tiin Jin-a thlavang chu a rawn hauh ve a. Mahse Ren chuan a lo melh hru a, "Lan, lo ngawi rawh. Engmah i hrethiam ve lo ka tih kha, chubakah nangpawh midang a inpuih tir thei reng a, tinge Jin-a kher i rawn pan?" a lo ti let leh hrep mai.

An thawm a rin deuh em avang chuan midang ho pawh chuan an en thup mai a, chutah master Xu chu a rawn chhuak a. Thinrim hmel tak hian, "In va au ring ve, eng thil nge thleng a?" a rawn ti vin thak mai. Ren-a chuan rang zet hian, "Jin-a hi ka lo zilh hau mek a nih hi, Master. A practice lai mek kalsan meuhvin Lan-i a buaipui zawk a...a lo va pui vel a, a training a ngaihsak loh avangin ka lo hau a nih hi." a lo ti nghal zuah zuah mai.

Midang ho pawh chu an reh thuap hlawm a, Mast Xu chuan Jin-a leh Lan-i te dingdun chu a en vang vang a. Tichuan Ren-a lam chu ava hawi leh a, "Jin-a hian kan Master Chen-a tunu, Lan-i hi puih a ngai a, a pui mai chauh a ni. Ren, thil ho lam takah hian mi chunga ngaihdan lo siam thawt thawt hi ti lo turin ka zirtir thin che u tih i hriat kha." a ti ta daih mai a.

Ren-a pawh chu a ka hau mai, "Mas.. Master, thil ho mai mai atang hian alawm kan mizia a hriat thin. Chhuanlam a siam zel a, midang tan pawh a fair hleinem." a lo ti leh nghal chiam chiam a. Master Xu chu a han thaw hak a, "Ni reng e, thil ho mai mai ah i buai reng a, i mizia i ti lang chiah reng a ni. Monk chuan a monk puite a zah tur a ni, hmeichhe zahna a lan tir tur a ni bawk." tiin a lo chhang let leh hmak mai.

Ren-a pawh a tawng zui ngam ta lo, a ngawi reng a. Master Xu bawk chuan, "Thil tul lo takah buaina i chawk chhuak a, MAster Chen-a'n a la hre lo zawk mah mah a. A tunu puih ngaia awm, Jin-a'n ava pui zuai a. Chu chu i lo ngaithei lo amaw? Ngaihdam dil rawh, tunah...midang training zawng zawng i tihbuai vek hi hre rawh, ngaihdam dil rawh." a ti vin deuh khur khur mai.

Kun reng chung hian Ren-a chuan, "Ka tihpalh, Jin. Min ngaidam rawh...engl, ka...ka..." a tih lai chuan MAster Xu bawk chuan, "A tawk e, a thleng leh tawh tur a ni lo. Jin, nangpawh Lan-i i pui zawh tawh chuan i training chhunzawm ang che, Ren.. nangpawh chhunzawm leh rawh le." a ti a, a kal ta a.

Lungawilo tih hriat tak chuan Ren-a pawh chu a kal ve a, a thinrim hmel kher mai. Lan-i chuan inthlahrung tak hian, "A pawi ka ti khawp mai, Jin...keimah vang vek a ni." a han ti tham tiak a. Jin-a chu a lo nui suk a, "A ho lutuk, i thiam loh a ni hleinem. Chubakah Ren-a hi tunlai chu a mizia a mak lutuk, nimin atang khan." tiin a lo chhang a.

Ren-a chu a mah chuan practise leh in a kutthlak pawh a na thak thak hle mai, a tiang chu a vai ri fua fua mai a. A thin chu a rim takzet, Jin-a vanga mi zawng zawng hmuh lai a Master Xu-a'n a hau ta mai chu a zak em em a. Mualphona lian takah ngaiin Lan-i lahin Jin-a chu a hnaih telh telh mai bawk si nen, a thinrim lutuk leh Jin-a a haw lutuk chu a khur dar dar thei hial a.

**********************************************

Chhun dar 12 a ni a, Yilong-a nau te zinga mi, a mi rin ber Liu-a pawh kum 22 kal ta a, Guang-a'n naute a tlanchhiat puina hmun, Xiaogang khua atanga hla lutuk lo, khaw kar kawngah chuan a lo thleng der tawh mai. A motor atang chuan a chhuak a, tablet lian tak chu a bag ah lai atang chuan a phawrh a.

Map chu a han hmet chhuak a, a awmna lai vel chu a han en a. Map ah chuan a awmna atanga hla vak lovah chuan temple ni awm tak, Lotus symbol sign lo inziak chu a hmu fuh ta tlat mai. A han zoom hnai deuh va, ramhnuai lama awm a ni tih pawh a hre thei nghal a, GOLDEN LOTUS TEMPLE tih a lo inziak kuau mai. Rang takin a phone a phawrh a, Yilong-a chu a call nghal a.

Yilong-a pawh chuan a rawn chhang nghal vat a, "Hello, Liu? Eng nge kan chanchin le?" tiin a rawn zawt a. "Boss, temple pakhat ka hmu a. A hming chu Golden Lotus Temple a ni, Xiaogang khua atangin darkar li vel tlan chiah chiah a ni bawk. Ramhnuai lamah a awm lehnghal a, Guang-a sawi dan kha chuan helai ngaw hmunah hian monk kha a hmu a. A nih chuan chu monk pawh chu he temple-a cheng a nih hmel, map en hi chuan monk temple dang chu a awm tawh lo hrim hrim." tiin a lo chhang vat a.

Yilong-a pawh chu a meng nghal hru mai, "Eng maw? Darkar 4 tlan maw ni a? Guang-a khan khalai ngaw hmunah khan monk chu a hmu a nih chuan chu temple ngei chu a nih dawn chu, a dang hriat i la nei em?" tiin a lo zawt leh nghal vat a. "Aih, map atang a ka hmuh chauh ala nia. Ka la kal lo, lamlianah ka la awm mek zawk. Guang-a sawina lai hmunah tak ka awm a, hei bak hi chu kha monk khan chenna dang a nei dawn lo hrim hrim." tiin a lo chhang leh a.

Yilong-a chu a han inngaihtuah vang vang a, "Awle, a tha e. Fimkhur taka kan chet a ngai dawn a nih chu, police ho lah hian min la zawng reng bawk si nen. Ngaithla teh, Liu. Tunah Guangzhou lamah lo let leh vat zawk teh, zantir lamah lo thlen tum ang che. Engtin nge temple chu kan luhchilh ang, engtin nge plan mjumal tak kan siam ang tihte kan sawi ho phawt loh chuan va luh risk chi a ni lo, min man vaih chuan kan chhe vek a nimai." tiin a lo hrilh leh a.

Liu-a pawh chuan a lu bu nghatin, "Awle, ka lo let leh nghal ang. Guangzhou ka lo thlen hunah eng nge ti hmasa ber tura min duh?" tiin a han zawt leh a. "Temple chungchang hriat belh tum rawh, a pawimawh lai zawng zawng nen. A layout te, a security measures te, a chhunga cheng mihring hovin eng nge an tih thin, eng ang mi nge an nih tih zawng zawng te. Monk ho chu eng ang monk nge an nih tihte, va visit an awm thin tawh em tihte nen hriat vek tum ang che." tiin a rawn hrilh leh a.

"Awle, Boss. Kal pui emaw, hmanrua te ka pai duh ang em?"

"Pai lawk kha a pawi miah lo, tupawh mai hian min ringhlel tawh mai si a. Tihsual kan nei tur a ni lo, hmanrua i pai a nih pawhin fimkhur ang che."

"KA hrethiam e, Boss. Tunah ka lo let nghal e, zan tirah chuan lo thlen ka tum dawn nia." tiin Liu chuan a chhang leh a, phone chu an dah ta a. Liu- pawh chu motor ah chuan a let leh a, tichuan Guangzhou khawpui lam pan chuan a tlan leh ta a. Guangzhou khawpui hi Xiaogang khua atanga hla vak lo a ni a, tuna Yilong-a bihrukna hmun ber a ni.

********************************************************

TLai a ni a, ni tla tur chu a mawi ngang mai. Ni zung chuan temple pawh a rawn chhun eng leh phut mai a. Temple tual zawl bul vela thingkung te pawh chu ni chuan a chhun eng mawi zual sawt amaw tih mai tur a ni, tual zawlah chuan Jin-a chu a vei kual vut vut a, Ren-a a zawng mek a ni.

Rei fe a zawn hnu chuan kil khat a, lungawi loh hmel taka a lo thu ngawi reng chu ava hmu ta a. A va pan a, "Ren?" tiin a han ko va. Mahse Ren-a chuan a chhang lo, en pawh a lo en lo. Jin-a chuan ava pan hnai a, "Ren, thil kan sawi dun angai." a han ti leh a. Mahse Ren chuan en miah lo hian, "Ka buai, mahni a awm ka duh." a lo tih khum hmuk mai.

Jin-a chu a khi suk a, a bulah chuan va thu ve in, "A ni maw? I buai viau nimaw? Vawiinah pawh sparring hman lo khawpin i buai a, nilengin min be lova. En pawh min en hman lo a nimaw? Ren, hei leh chen kan train dun tawh. Kei aia upa i ni a, thil tam tak min zirtir tih pawh ka hria. Tinge tukina thil hote vang mai khan i la thinrim a? A tawk tawh viau lawm ni?" tiin a han zawt a.

Ren-a chu a lo thaw deuh hluai a, "Eng nge chu chu i lo ngaihven em em? KA peih lo a ni ve mai alawm, nitin a in-sparr dun ziah a, inkhawih nat hlau deuh chunga train reng hi ka ning tawh te pawh a ni thei a..eng nge hriat i neih vak a?" a lo ti let hrep mai. Jin-a chu a gnawi vang vang phawt a, "Chutiang lam a ni lo, Ren. Nitin phur takin kan train dun ziah, mahse tukin a kan boruak atang khan ka lakah i lungawi lo a ni. Tiang hian nidangah i awm ngai lo, eng thil tak nge ka laka i lungawi lohna chu min hrilh la?" tiin zaidam tak chuan a lo zawt let a.

Ren-a chu a khi lui sak a, "Engmah tihsual i nei hlei nem, Jin. Nang te chu helai hmunah te hi chuan rangkachak ang mai alawm i nih, tupawhin an ngaisang che alawm. Master Xu chu sawi loh, Master Chen-a pawhin a fak hluak hluak bik zel che a. Engkimah, i dik vek angin an sawi bik zel a. Ka kham tawh, i famkim bik lutuk anga an sawi che hi ka kham tawh pawh a ni mahna." a lo ti leh hlak mai.

Mak ti tak hian Jin chuan Ren-a chu a en hu mai a, "Eng a? Ka famkim ber angin ka inngai a, chu tiang chuan maw min lo ngaih a? Nilo ve, thiana. A chhan chu engpawh nise, ka famkim ka inti bik ngai hauh lo asin. Min han hrilh teh, eng ber nge i thinrimna chhan diktak chu han sawi mai teh." tiin a lo zawt nawn ve leh sak mai.

Chutah Ren-a chu a ding thut mai a, a kut chu a hum ruh ngei mai. Jin-a chu rum tak hian a melh a, "I hre duh amaw? Ka thinrim chhan chu i hre duh amaw? Naupang, ka thusawi kha i hre reng. Mahse LAn-i i buaipui zawk anih kha, keichuan thildang ngaihtuah lo la, i training ah chauh rilru pe turin ka duh che a, ka zilh hau mai che a ni. I tan Lan-i hi a pawimawh lo, ka pawimawh zawk. Ani chu tibuaitu mai chauh che a ni, practice turin ka ti che a, mahse midangin an puih theih reng laiin LAn-i puih i thlang zawk a nih kha." a ti ta chiam chiam mai a.

Muang chang chuan Jin-a pawh chu a rawn tho ve a, "Ren, Lan-i khan ka puihna min dil a. Kan master ber, Master Chen-a tunu a ni a. Ka puih a ngai alawm, chuzawng chu a nimai." zaidam tak chuan a han ti leh a. Mahse Ren-a chu a pawr laklawk tlat, "Ni lo, Jin. Tiang khan chhuanlam i siam ziah, nidangah pawh. He temple-a awm te hian hman atang tawhin an ngaina bik em em che a, fak hlawh ber i ni fo. Ni e, a dik alawm. Engkim hi i thiam chak em em a, skills i nei tha fal bawk a, keipawh hian ka hneh lo fo che. Mahse kei ve hi min en teh, tuma ngaihsak ka ni ve ngai lo. Chu chu nuam i ti tiraw? Kei aia naupang, nang zawk ina fak i hlawh hi nuam i ti tiraw?" a ti leh siah siah mai.

Chutah zet zawng Jin-a pawh a lungawi tawh bik lo khawp mai, "Chu chu i ngaihdan maw lo ni a? Midangin an ngaihsak ve lo che a, chu chu nuam ka lo ti ang maw? Ren, ka u i ni asin. Ka thian tha tak i ni bawk, kum 10 chuang kan lo train dun tawh....unau inhmangaih tak kan ni emaw ka lo ti thin asin." tiin a aw key chu a han san ve deuh va.

Ren-a thinrim a zual kher mai, "Theih tawp ka chhuah chung pawhin, that ka chhuah ve chung pawhin tuman min fak ve ngai lo. Nangmah chiah, an duhsak em em bik zel ringawt che a, mahse engmah fakna leh duhsakna ka dawng let ve ngai lo." tiin a ha chu a thial ri bawp bawp hial mai.

Jin-a chu a ngawi vang vang a, "I hmelma ka ni lo, Ren. He temple ah hian zirlai tha ber te zinga mi i ni a, chu chu nang pawhin i hria. Chutianga pawimawh lo bik leh duhsak loh bik ang a i inngai a nih chuan min hrilh thin ta che. Master Chen-a pawh sawi pui mai thin la, mahse khatiang rilru diko pu ang kha chuan min chhuah tawh suh." a han ti chang fak a.

Ren-a chuan a chhang let mai lo, a ngawi vung vung a. Muang chang chuan a kut kuang kuang in a han thaw hak a, "Ni e, ka lo thinchhe mah mah pawh a ni theie . Jin, keimah a awm ka duh, min kalsan rih phawt mai teh." a han ti zawi sap a. Jin-a pawh chuan a darah a beng thak thak a, "Awle, mahse i rilru hahna te sawi pui tur i duh chuan ka awm reng a nia." tiin a kalsan a, Ren-a chuan a en zui vawng vawng mai.

**************************************

Xiaogang khua ah chuan Mei Ling, Jin-a hringtunu chu ala khawsa reng a. KS a ni tawh lova, a fapa a hralh atang khan a rilru a hah em em a. Tum khat Chao Yang Orphanage, Guang-a'n a phuahchawp chu a awm tak tak amaw a tih avanga a zawn tum a, a awm tak tak lo tih a hriat hnu leh Yilong-a chanchin zawng zawng te a hriat hnu phei kha chuan inchhir reng in a nun a hmang tawh a ni.

A in luah tereuhte, zim tak leh thim ruih maiah chuan a thiannu, a KS pui ni thin Qin-i nen chuan an awm dun a. Lungngaih hmel tak hian Mei Ling chuan, "Tiang hun ang ah hian alawm, zanlai ah hian ka fapa, a hming pawh ka phuah hman loh. Ka nun khaw loh vanga ka hralh tak, ka fapa ngei mai kha ka ngaihtuah thin. A la dam angem, la dam ta se min ngaidam thei ang em tih thleng hian ka ngaihtuah nasa thin a sin, Qin." tiin a mittui chu a han hru zauh va.

A han inhnit deuh feih feih a, "A hming tak ngial pawh ka phuah hman lo a nia, eng ang nu nge maw ka nih le? Ka dawihzep a ni, Qin... hmeichhe nep tak ka ni. Tunah hian a la dam angem le? La dam chu nise a puitling ve tawh ngei awm si a, ka va han hmu chak tak em." a ti vawng vawng mai.

Qin-a chuan inthiam loh hmel tak hian Mei-i kutah chuan a vuan a, "Keima thiam loh vek a ni, Mei. Ka lo hrechiang tawk lova, an sawi dan kha chuan a that hmel phian sia. DAwt a nih ka lo ring lova, a pawi ka ti takzet." tiin ngaihdam chu a han dil leh a. Mahse Mei Ling chuan a lu a thing a, "Aih, i thiam loh pakhat mah a awm lo. Keima duhthlanna alawm, ka nep lutuk vang vek. Ka hlauthawng a, ka chawm zawh ka inring lova. Nun tha zawk aneih ringin tikhan naupang pawisawi lo suat thin ho bulah ka hralh ta mai chu ania, mahse tunah chuan ti hian ka tuar ta a nih hi." tiin a mittui chu a tla leh zawih zawih mai.

Inchhir tak hian Qin-i pawh chuan, "Ka tihpalh takzet a ni, Mei. Hun hi koh kir theih se, kha i bula ka thil sawi te kha ka sawi miah lo tur hi ania. I chungah hetiang thil hi a thlen ka phal reng reng lo asin, mahse ka lo dawn thui lo em a ni." a lo ti ve vawng vawng mai. Mei Ling-i pawh a tap hnem thin bawk a ni ngei ang, a mit chu a sen vek mai a.

"KAn pahnih hian kan survive a ngai tih kan hria a, chumi vang chuan kum la naupang tak si khan thuthlukna kan han siamve ngawt kha ania. Ka fapa, ka rila rah ngei mai chu misual ho lakah ka hralh ta mai kha ania. LA damin zawng hmu pawh ni ila, ka chanchin a hriat hunah chuan min ngaidam thei miah lovang." tap chung chuan Mei-i chuan a han ti leh a.

Qin-a chu a thaw hak a, "I danglam tawh a, nun thar bul tan i ngai, Mei. Ka pui ang che, tun tum chu ka ti tak tak ania." tiin a han hnem a. Za lo tak chuan Mei-i chu a khi suk a, "KS ka ni tawh lo pawh a ni mahna, mahse kumkhua in kha hmeichhia la naupang tak nawhchi zuar thin, kum 19 mi lek, mahni fapa enkawl zawh loh vanga hralh ti a an hriat kha ka ni reng tawh dawn a ni hi." a ti chuai raih a. 

*********************************************

TO BE CONTINUE