SHADOW (A CHINESE ACTION FICTION STORY) Written by : Aaron Malsawmdawngzuala CHAPTER - 8 (LAST)
SHADOW
(A CHINESE ACTION FICTION STORY)
Written by : Aaron Malsawmdawngzuala
CHAPTER - 8
(LAST)
*******************************************
Chutia light a thim tak daih ah chuan Ground floor atanga 3rd floor duty ho pawh chu an chiai nghal hle a, an phun nghal sap sap mai. Ground floor-a duty mek te pawh chu an hawi hu hu hlawm mai a, "Engtin nge a rawn thim ringawt theih a?" an zinga pakhat chuan a han ti hu a.
A bula mi chuan mak tih hmel tak hian, "Kan check vek sia current box vel pawh a hma kha chuan, hetia thim tur tawp hi chu a ni lo." a lo ti ve bawk a. Pakhat leh chuan a phone a phawrh a, "Boss Yilong-a ka han phone ang e, ti ringawt hi chuan a dik thei lo." tiin a call ta a.
Yilong-a chuan phone chu a lo chhang vat a, "Hello, a lo thleng tawh em ni?" a tlo ti nghal chul mai. Phone a mi chuan, "Nilo e, Boss. Light hi a rawn thim vek ringawt a, awmzia kan hre lo khawp mai." tiin a rawn chhang daih mai. Phawk hru hian Yilong-a chu a meng a, "Engtin? Engtin nge a nih theih? In check lawk lo em ni?" tiin a vin nghal khur khur mai.
Guard chuan a chhan leh hma chuan a bula mi chuan a rawn nghawk sawk a, "Saw kawngka a inhawng, tu emawni a lo lut a nia." tiin a lo hrilh a. A va hmu ve nghal a, "Boss, tu emaw ni a lo lut ania." tiin Yilong-a chu a hrilh ve nghal bawk. Yilong-a chuan Jin-a a lo thleng tawh tih a hrethiam nghal a, "That rawh u, tunah..sat sawm vek rawh u." a ti vin vak vak mai a.
Jin-a pawh chu a rawn tlan lut a, guard ho chu a rawn khawih nghal hmiah hmiah mai. Guard ho chuan lo bei let ve eng ang mahse a thim em em bawk si nen, engmah an hmu fiah ve hleithei tlat lo. Jin-a erawh a hmaikawra night vision a neih avang chuan engkim chu chiang takin a hmu thei thung a, misual ho chu rei lo te ah chuan a that thei ta vek mai a.
Thisen pawh a per nasa chuai chuai kher mai, Jin-a pawh chu a thaw deuh halh halh a. Chutah inchung step atanga pen thawm, rawn tlan thla hlawk hlawk ri a hriat avang chuan a thim zual lai deuhvah chuan a biru nghal vat a. First floor lama duty, ground floor chung chiah a mi te an lo ni.
********************************************************
Yilong-a chu a mangang kher mai, a vei kual a vei kual a. A phone a rawn ri leh a, "Hello?" tiin a chhang nghal vat a. Phone a mi chuan, "Boss, 3rd floor ami te kan nia. Nichin deuh khan light a thim thut a, a rawn eng har angreng si a. 2nd floor ami te kan zawt a, an ni pawh a lo thim ve tho a ni awm e." tiin a hrawn hrilh a.
Yilong-a thinrim bawk si leh mangang tawh bawk si chuan, "Ground floor ah Jin-a a awm, in lo la inhrilh kual nang nge? In va han nep tak, zu kal vat rawh u." tiin a lo vin tuar tuar mai a. Phone chu a dah nghal hmak bawk, Yilong-a hian a hma khan phone a paih chhia kan tih tawh kha.
Mahse phone tam tak a nei a, a sumdawnna avang leh a thil tih thin avang hrim hrim hian phone hi engtik lai pawhin 10 chuang a kawl reng zel a ni. Chutia mangang taka a vei kual reng lai chuan Lan-i chu a rawn khi leh suk a, "A lo thleng tawh, he building chhungah hian a awm mek." tiin a lo nuih sawh leh vel a.
Yilong-a chuan chhang mai lo chuan a bula Liu-a ruang, nunna nei tawh lo mu mek chu a en vang vang a. Thinrim hmel tak hian, "Lo kal mawlh rawh se, Liu-a min thah sak bawk a. Keiman, ka kut ngei hian ka that ve ang." a han ti khur dar dar a. Chutah a phone chu a rawn ri leh a, rang tak chuan a chhang leh nghal vat a.
Phone ami chuan, "Boss, first floor-a duty te kan nia. Nichin lawk khan light a thim a, kan buaipui tura kan kal dawn lai takin inhnuai ground floor lam atangin thawm kan hria a. Kan zuk chhuk vat a, a lo thim ve vek tho va. Chuan duty ho hi an thi vek a ni, thisen nen an inchiah piah nuai mai." a rawn ti ve leh ta mai a.
Yilong-a thinrim tawh lutuk chuan ring zet hian, "Zawng reng ta che u, vatin... min rawn phone reng lo khan.." a sawi zo hman lo. Phone atang chuan thawm ri bur bur a hria a, "Hello, hello? Ka tawng in hre thei em...Hello?" tiin Yilong-a chu a au hian a au vak vak tawh mai a.
Mahse line chu amah in a rawn in-cut hmak mai, "Hrep tak chuan." tiin vin hlur hian Yilong-a chuan phone chu a dah a. Lan-i lah chu a lo nui chhuak hial a, "Pu Yilong, Pu Mastermind... Jin-a chu tunah chuan second floor vel a rawn thleng chho tawh ngei ang." tiin a lo deuh sawh leh vak vak a.
Lan-i chuan a rawn nuih leh sak a, "I hlau tawh em ti khan? I hlau a ni tiraw? Jin-a hi i rin ang a ni lo ka tih tawh kha, mi chak tak a ni. A that dawn che, chuan kei hi min rawn chhanchhuak bawk ang." tiin a han vin ve khur khur a. Yilong-a chuan a rawmawlh a phawrh a, "NGawi hmak rawh." tiin Lan-i ka chu a hnawh sak a.
************************************************
2nd floor a duty mek te chuan chung lam atang chuan thawm an hria a, an pistol chu an phawrh nghal a. Mahse an rawn thleng chiah chu 3rd floor lam duty te an lo ni reng mai, "Eng nge hetah in rawn tih dawn a?" tiin 2nd floor duty zinga pakhat chuan a lo zawt a. 3rd floor duty leader chuan thaw deuh hlawp hlawp chung hian, "Ground floor ah Jin-a a awm, Boss Yilong-a'n min rawn hrilh zo chiah." tiin a lo chhang vat a.
Mahse chutia an tawng lai chuan 2nd floor step tawn tirh ah chuan tu emaw hi a rawn lang hlawl mai a, Jin-a a lo ni. "Saw ta saw...man nghal ang u." tiin guard pakhat chu a han au deuh lauh lauh va. Tichuan va beih tum chuan an va tlan a, mahse an flashlight chauh chu eng an nei bawk si.
Jin-a lah chuan a night vision hmang chuan a lo hmu chiang em em hlawm mai bawk si a, dim baksak lo chuan a han dahtha leh ta diat diat hlawm a. Silai pawh chu an kap risk pawp pawp a, Jin-a chu kap fu chuang miah lo chuan anmahni pawl pui te chu an kap thal tawp tawp hlawm mai a.
REi pawh a ngai lo, minute khat vel a ral hnu chuan 2nd floor guard leh 3rd floor guard ho chu an thi nghal vek a, thisen pawh chhuatah chuan a baw nuai mai a. Jin-a chu a han thaw deuh halh halh a, tichuan inchung lam chu a han melh chho leh ta ran a. Tichuan step ah chuan a chho leh a, a ngunhnam ah pawh chuan thisen a kai nuai tawh mai a.
3rd-floor a han thleng a, Yilong-a naute, apartment atanga rawn chhuk ho te nen chuan an intawk leh ta. Jin-a chuan a han bei leh tak tak hlawm mai a, silai a puak leh ta dur dur mai. Mahse Jin-a chu vawikhat pawh a fu leh ta chuang lo, thisen per chhawk chhawk khawp chuan a han sawisa leh tak tak hlawm a.
A chung chiah, 4th floor atang chuan Yilong-a chuan a hnuai lama thawm chu a lo hre pha reng a. A confi tawh lo chiang kher mai, a thlan a tla bawrh bawrh a. A hlauthawng takzet, rang takin pawhdawh pakhat chu a hawng a. Pistol a lo awm a, a la nghal vat a. A mu te chu a han check a, "Lo kal mawlh teh, ka that chiang khawp ang che." a ti khur dar dar mai.
*************************************************
Chutih lai chuan Jin-a pawh chuan misual ho chu a lo thal fai leh deuh vek tawh a, mahse guard zinga pakhat erawh a lo biru thei hman hram a. Inchung step lamah chuan hlauthawng em em hian a tlan chho nghal a, Jin-a chuan ava hmu hman a. Mahse va umzui a tum lem lo, a kalna tur pawh a hre lawk sa vek.
Muang chang chuan a va phei a, step ah chuan a chho ve leh ta a. Chu guard pawh chu corridor lamah chuan a tlan phei hlawp hlawp a, Yilong-a apartment ah chuan lutin kawngka a kal nghal a. Yilong-a pawh a lo phu zuk a, a pistol ken lai chuan a lo tin nghal. MAhse a naute zing ami a ni tih a hmuh veleh chuan a la thla a, "Eng thil nge thleng a?" tiin a lo vin nghal hlur mai.
Guard chuan thaw hluam hluam chung hian, "Jin... Jin-a a lo thleng. Min rawn umzui mek, a that vek, midang zawng zawng pawh a that vek." tiin a hlauthawng lutuk chu a tap lek lek mai. Yilong-a chuan Lan-i chu a kawk a, "He nula hi phelh vat teh...rang takin." tiin thu a han pe a.
Guard pawh chuan Lan-i an phuarna chu a phelh nghal sawk sawk a, chutah kawngka chu a kalhna bung hmawk khawp chuan a rawn inhawng thuai a. Jin-a chu a rawn lut ta, chuveleh Yilong-a chuan Lan-i chu a man thut a, silai chuan a bekah a tin ta ran mai. Guard chuan Jin-a chu lo beih a tum a, mahse Jin-a chuan rang lutuk tak mai hian a lo hnek siah mai a.
A leng lawp a, nikhaw hrelovin a awm zui nghal. Yilong-a chuan ring tak hian, "Lo kal hnai suh, ka kap a ni mai. Ka ti tak tak ania, Jin." tiin a lo vau nghal khur khur a. Jin-a pawh chu a ding ve mai bawk, "Chhuah rawh, mipa takin inbei ang hmiang." Jin-a chuan a han ti chang deuh fak a.
Yilong-a chuan Lan-i chu a han man bet nghet zual deuh va, "I hmaikawr, i hmaikhawr kha phelh phawt rawh. I hmel ka hmu duh, Jin-a chu eng ang hmel pu chiah nge a nih a, hetiang khawpa kum 22 chhung teh meuh min tibuaitu hi tunge a hmel ka hre duh a ni." a han ti leh khur khur a.
Jin-a chuan a hre thiam lo kher mai, mahse a hmaikawr pawh chu a phelh ve mai bawk a. Yilong-a chu rum zet a en chung hian, "Eng a? Eng nge i sawi awmzia? Kum 22 chhung ka tibuai che amaw?" tiin a zawt deuh hu mai a. Yilong-a chu a nui ta huah huah mai a, "Khai aww, engmah i hre ve lo reng ang chu tiraw? Jin Wei, tunge i nih hi i hre reng reng lo a nih hi." tiin a nuih vak vak a.
Jin-a chuan a hrethiam lo reng bawk, mak ti tak chuan Yilong-a chu a en reng a. Chutah Yilong-a chuan sawi chhunzawm leh in, "Tunge i nih chu ka hrilh ang che, faharh mai mai i nih kha. Temple ah sawn i pian tirh atangin i awm angah i ngai ami? A teuh lo mai, khawngaihna avanga enkawl mai mai i nih kha. Jin, i nu in nausen mai i la nih lai khan ka hnenah a hralh che asin." a ti ta siah siah mai a.
Jin-a chu a meng kawk kawk mai, "Eng....eng maw i sawi a?" tiin mak a ti em em a. Yilong-a lah chuan ring tak hian, "Ni e, i nu khan eng atan mah a ti lo che. KS a ni a, kum 19 a nih lai khan nang hi a nei che a ni. I pa i hre duh em, tunge i pa i hre duh em? Ka hre bik lo, i nu takngial pawh khan a hre lovang. A chhan chu mipa tamtak, drug addict, police officer, sumdawng hausa leh zurui mai mai te, amah pawisa petu apiang a mutpui kual vel mai mai thin a, tu fa ber nge i nih a hre bik hleinem." tiin a han nuih sawh leh vel a.
Jin-a thinlung chu chemte a vih sawk ang mai hian a na em em a, a nihna diktak, a lo pianchhuah dan diktak a hre ve ta chiah mai chu hrehawm a ti takzet, a rilru a na hle bawk. Yilong-a lah chuan a la duh tawk hauh lo, "Monk pakhatin kan lak atangin a ru bo che a, tichuan saw temple ah sawn a enkawl seilian mai mai che a ni. Eng angin nge i lo inngaih vel a? Hero angah i inngai em ni, changtupa viau angah i inngai em ni? Engmah i ni lo, mahni hringtunu meuh pawh ina a duh loh hnu, a hralh hnu, fahrah mai mai i nih kha hre rawh." a ti leh hrep mai a.
Jin-a chu a rilru na em em a, sawi mai tur pawh a hre lo. A ding ngawi reng a, a mittui a tla zawih zawih thei hial. Yilong-a bawk chuan, "Zanin hian min rawn pan a, i tisual let der a ni. KA that che ang nga, chumi zawh ah Lan-i hi ka that leh bawk ang. Tichuan kha mihur, i nu KS lepchiah tak kha, kum 22 chhung teh meuh min tibuai a, khaw hrang hrang a min bihruk kual tirtu i nu, Mei Ling-i kha ka that bawk ang." a han ti leh khur khur a.
Chutah zet zawng, Jin-a rilru natna chu thinrimna in a rawn thlak ta. A mittui chu hru hulin Yilong-a chu a rawn melh ta run mai, a mitmeng te chu a sen rum thei hial a. Muang chang chuan ava pan ta, "Hey, lo kal hnai suh. Ka kap a nimai, Lan-i hi ka that a ni mai." tiin a han vau leh chiam chiam a.
Mahse Jin-a chuan a ngaipawimawh tawh lo, ava kal zel a. Yilong-a chu a mangang leh tan ta, "Lo kal hnai tawh suh ka tih chu, ka kap tak tak dawn ania." a han ti leh vak vak a. MAhse Jin-a chuan a rawn pan lui zel a, a tih ngaihna hre tawh lo chuan Jin-a lamah chuan silai chu a va hmet puak ta.
Jin-a darah tak chuan a fuh a, a thal tawp mai. Chuveleh Lan-i chuan a theih patawpa na hian Yilong-a kut chu a lo seh sak vak mai a. Yilong-a na ti lutuk chuan silai chu a thlauh phah a, "Hrep tak chuan le..nang hi.." tih pah chuan Lan-i chu a beng pawp mai a, Lan-i pawh chhuatah chuan a thal tawp mai.
Yilong-a chuan rang takin a pistol thlauh chu a chhar nghal vat a, mahse Jin-a lam ava en chuan Jin-a chu a lo awm tawh hauh lo mai. A hawi kual ruai mai a, chutah bang kil thim zing atang chuan Jin-a chu a rawn zuang thut a. Yilong-a ban, pistol a kenna lam chu a rawn sat bung ta hmawk mai a nih chu.
Yilong-a na ti lutuk chu a au vak a, chutah Jin-a chuan a kawr awmah a tham a. Chiang tak hian a en a, "Ka hming chu Jin Wei a ni a, ka pa min phuah sak a ni. Ka pa hming chu Master Xu a ni, chuan nang...nang chu..i thih a hun e." tih pah chuan glass wall lamah chuan a theh phei a.
Glass wall keh vek khawp chuan Yilong-a chu a tla thla ta vang vang mai a, chhawng 4 vel lai atanga tla a nih avang chuan Yilong-a tan chuan dam ngaihna a awm tawh lo. Thisen nena inchiahpiah nuai chuan lamlianah chuan a let der mai a, Jin-a chuan chhawng li-na atang chuan a rawn en thla vang vang a.
Lan-i chu a rawn tho va, "Jin..." tiin a rawn kuah nghal a. Jin-a pawh chuan a lo kuah let ve a, "Jin, kha hliam i tuar a nia." tiin Jin-a dar a hliam, Yilong-a'n a kahna chu a han ensak a. MAhse Jin-a chuan lo nuih sakin, "A na lo, Lan. Hlau tawh suh, engkim a tawp tawh e." tiin a lo chhang a.
An pahnih chuan Yilong-a ruang, lamliana let reng chu an en dun vang vang a. Zawi sap hian Lan-i chuan, "Chuan...tunah engtin nge kan awm ang?" a han ti tham tiak a. Jin-a chu a han thaw deuh hak a, "Ka nu, ka nu diktak Mei Ling-i chu ka zawng dawn a ni." tiin a chhang a. Reilote hnuah chuan police an lo thleng a, Yilong-a leh a anute ruang thisen nena inchiah piah nuai chu an hmu a, mahse Jin-a leh Lan-i erawh hmuh tur an awm tawh hauh lo thung.
*********************************************************
Zing dar 5 leh a chanve a ni a, khua pawh a var tha thawkhat tawh khawp mai. Master Xu-a chu zan khua a Lan-i a zawn hnu ah a beidawng chu Temple lam a pan leh mek a, chutia a ramhnuai lam a luh dawn chiah chuan a hma zawn kawng kawi lai takah chuan tawng thawm a hre ta tlat mai a.
A han ding deuh dat a, a beng chu a chhi uluk kher mai. A chhan pawh chu aw, mipa leh hmeichhe aw chu kum tam tak chhung a lo hriat fo tawh hnu a nih vang a ni. A han ding vang vang a, chutah kawng kawi atang chuan Lan-i leh Jin-a te an rawn lang ta thut mai a. Master Xu-a chuan mak a ti takzet, "Ehe, Lan...Jin, eng nge awmzia?" a ti hu mai a.
Lan-i leh Jin-a te pawh chuan an rawn hmu ve a, an ding dat mai. Lan-i chuan zawi sap hian, "Jin, saw enteh.." tiin Master Xu-a dinna lam chu ava kawk a. Jin-a pawh chuan Master Xu-a chu a en vung vung a, "Master.." a ti thawp sat a. Rang takin an va pan nghal a, Master Xu-a pawh chu a rawn tlan phei ve a.
Jin-a chuan engmah sawi lo chuan Master Xu-a chu a kuah nghal thlawp mai, ani pawh chuan a lo kuah let a. Mak ti tak hian, "Jin..Lan, eng nge thil awmzia?" tiin Lan-i chu ava en a, "Lan, tinge i hmai kha?" tiin a zawt bawk a. Jin-a chuan zaidam tak hian, "Nakinah ka hrilh ang che, thawnthu thui tak a ni." tiin a lo chhang a.
Master Xu-a chuan Jin-a inthuamna, ninja form chu a en vung vung mai. A hrethiam lo takzet, "Engtin nge in inhmuh reng reng a?" tiin a han zawt leh a. Lan-i pawh chuan a rawn kuah ve a, "Nimin zinga lo kal te kha, suit dum nena lo kal te kha, an pahnih khan Yilong-a mi leh sate zinga mi an nia." tiin a chhang a.
Master Xu-a erawh a bo tulh tulh mai, "Yilong-a a? tunge chu chu?" a lo ti leh hu mai a. Jin-a chu lo inrawlhin, "Master, kum 22 liam ta a, ramhnuaia i awm laia mi pakhatin naute a pek che kha, kha kha keimah ka ni tih ka hre tawh alawm. Chuan kha naute petu che kha, Yilong-anaute zing ami a ni a. Ka nu in min hralh a, khamite kha a leitute zing ami an ni." tiin a lo chhang a.
Master Xu-a chuan a hrethiam deuh tan a, "A nih leh i nu tak tak chu i hre tawh tihna em ni?" tiin a han zawt leh a. Jin-a chuan a lu a thing a, "Aih, a hmel pawh ka la hmu lo. Mahse ka zawng anga, ka hmu ngei bawk ang. Zawhna tam tak ka nei, ka zawn hmuh ngei ngei a ngai a ni." tiin a lo chhang leh a.
Chuveleh LAn-i chuan, "Ka lo kal ve dawn." a lo ti nghal vat a. Mahse Jin-a chuan a lu a thing leh a, "Ni lo ve, Lan. Nang chu temple-ah i kir leh angai, an ngaihtuah hlawm tawh ngawt ang che." tiin a chhang daih mai. Master Xu-a chuan Jin-a darah chuan vuanin, "Jin, nangpawh lo haw ve rawh. Kan ngaihtuah lutuk che alawm, nangpawh. Master Chen-a pawhin relic kha i ruk a ni lo tih a hre tawh a, engkim i siam tha law law vek teh ang u." tiin a lo thlem ve bawk a.
Jin-a chu a ngawi vang vang a, "Ren-a kha a inpuang tawh em ni?" tiin a zawt daih mai. Master Xu-a chu a han thaw hak a, "Aih, inpuang love." tiin a chhang a. Jin-a chuan a lu a bu nghauh nghauh va, "Anih chuan ka lo la let thei lo, Master. Ka tlan chhuah zan pawh khan Lan-i bulah hian ka sawi tawh a, Ren-a a inpuan hma chu ka lo let dawn lo." tiin a chhang leh ta tlat mai.
Master Xu-a chuan Jin-a chu a han en vang vang a, "Anih leh Jin, i thawmhnaw kha khawi ami nge a? Ninja uniform a ni leh nghal a, khawi atanga i neih nge?" tiin a han zawt ve thung a. Jin-a chu a nui sak a, "Dr. Liang-a ta a nih hi, ka tlanchhuah tirh khan aman engkimah min buaipui vek a. Ka hliam te, ka hriselna te...engkim a nimai...ka sawi vek seng rih lo." tiin a lo chhang leh a.
Master Xu-a chuan a lu a han bu ve ta nghat nghat a, "Engpawh chu nise, Jin. Khawngaih takin temple lamah chuan rawn let leh la, i nu chu nangmah chauh nilovin, kan vaiin kan zawng em em ang." tiin a han thlem leh a. Jin-a chu a ngawi leh ta vang vang a, "Awle." tiin a chhang ve ta nge nge a.
***********************************************************
Jin-a, Master Xu-a leh Lan-i te chuan temple chu an rawn lut ta a, temple-a lo awm ho chuan an hmu a, mak an ti kher mai. An en thap hlawm mai a, thenkhat an lo lawm em em bawk a. Zawhna lah an dawng hnem nghal malh malh khawp mai, Master Xu-a chuan a han chhang nghal char char hlawm a.
MAster Chen-a beng pawh a thleng vat a, rang lutukin a room atang chuan a rawn chhuak a. Lan-i'n a hmuh ve leh chuan, "Pu.." tiin tap chungin ava kuah nghal thlawp mai. Master Chen-a chuan tap lek lek hian, "Awww Lalpa, ka va han lawm tak em. I damlai hmel ka hmuh tawh pawh ka lo ring lova, ka va han lawm tak em." a ti mawlh mawlh a.
Jin-a chu ava en leh a, inthiamloh hmel tak hian ava pan a. Jin-a bulah chuan va dingin, "Ka tihpalh a ni, Jin. Min ngaidam hram dawn nia, ka rin loh che avang khan min ngaidam dawnnia." tiin a ngen mawlh mawlh bawk a. Jin-a chu a lo nui sak a, "A pawi lo, Master. Ka hrethiam alawm, ka tlanchhuah avangin min ngaidam zawk dawnnia." tiin a lo chhang a.
Master Chen-a chuan hnunglam chu ava hawi a, "Jin, tu emawin a be duh che a." tih pah chuan a kut chuan mipui lo ding thup zinga mi chu ava hui a. Ren-a chu a rawn chhuak a, a inthiamloh hmel kher mai. Jin-a hma takah chuan a rawn ding a, a mitah chuan a en tha ngam lo hial zawk.
Aw khur dar dar chung hian, "Ji.... Jin, min ngaidam hram rawh. Ka thiam loh a ni, keimah vek ania relic ru tu kha, ka tihpalh takzet a ni." tiin a ngen nghal mawlh mawlh a. Jin-a'n a chhan hma chuan, "I awmloh hlan khan ka bulah Ren-a hi a inpuang a ni." tiin Master Chen-a chu a lo inrawlh zeuh bawk a. Jin-a chuan Ren-a chu en vang vangin a han nuih sak a, "Ren, Lan-i ka chhanchhuah theih nan hian min puih nasat zia i hria em?" tiin a lo zawt ta daih mai.
Ren-a mak ti lutuk chuan a en hu mai a, "Eng maw? Eng nge awmzia? Temple-ah ka awm char char a, engtin nge ka puih daih theih ang che?" tiin a zawt a. Jin-a chuan Ren-a darah chuan a vuan a, "Kan naupan lai khan ziak leh chhiar min zirtir nasat theih zia kha i hria em? Khavang khan Lan-i awmna hi map hmangin ka chhui chhuak a, min lo zirtir lo la chu ka chhanchhuak thei miah lovang." tiin a chhang a.
Ren-a chu a ngawi reng a, "Ka tihpalh a ni, Jin." a han ti nawn leh a. Jin-a chuan zaidam tak hian, "Tih sual te chu kan nei vek alawm, unaupa...ka ngaidam che." tiin a chhang a, an pahnih chuan an inkuah a. Mipui ho pawh chu an lo hlim kher mai, tichuan Master Xu-a chuan Jin-a leh Lan-i te chungchang chu a han hrilh tan ta hlawm a.
**********************************************
ONE WEEK LATER
Mei Ling-i pawh chu Wuhan khawpuiah chuan a la cheng ve reng a, restaurant pakhatah thawkin a inchawm ve tawk tawk a ni. Zan khat chu MEi Ling-i chu a haw tlai bik a, staff dang zawng zawng chuan an haw san vek tawh. Dawhkan vel chu ti faiin a hru hliau hliau va, chutih lai chuan kawngka rawn inhawng ri hi a hria a.
Hawi let chuang lem lo hian, "Kan inkhar tawh a, naktuk lamah lo kal leh mai rawh." tiin a lo hrilh nghal a. Mahse dawr chhunga lo lut chuan chiang fek fawk hian, "Mei Ling-i i ni em?" tiin a rawn zawt daih mai. Mei Ling-i pawh chu a phu deuh zuk a, rang takin a hawi let nghal vat a.
A hma zawna ding chu Jin-a a lo ni reng mai, phawk deuh hru hian Mei Ling-i chuan a en a. A han inngaihtuah vang vang a, "Aw ni e, chuan nang hi... kar hmasa a zurui lak a min chhantu kha i ni tiraw? Engtin nge ka hming i hriat a? Lo thu rawh, thingpui i in duh em?" tiin a lo duhsak nghal kher mai.
Mahse Jin-a erawh a thutak hmel hle a, "Aw ka ni alawm, chuan anih nang hi mahni rila rah, mahni fa ngei human trafficker te laka hralh tu kha i ni tiraw?" a han ti chiah mai chu Mei Ling-i chu a meng phawk nasa kher mai. Mak ti tak hian Jin-a chu a en a, "Tu... tu nge i nih?" a ti tham tiak a.
Jin-a chu a thinrim hmel em em a, "Kha naute, thla 2 leka upa...i hralh tak ngei mai kha ka ni. I duh loh hnu, min enkawl zawh loh i hlauh avanga i hralh tak ngei kha ka ni." a ti leh ta siah siah mai. Mei Ling-i chu a mittui a rawn tla nghal zawih zawih a, sawi tur reng a hre lo. Chutah Jin-a bawk chuan ring tak leh fiah tak hian, "I FAPA KA NIH HI." a ti ta mai a.
Mei Ling-i chu a zawi hnawk mai, "Maw...ka, ka fapa kha, nangmah hi maw?" a to hu mai a, amah chu a khur der der bawk. Jin-a pawh chu a mittui a tla a, "Aw...ka hming chu Jin Wei a ni. Chupawh i phuah a ni lo, min enkawltute min phuahsak a ni. Khang trafficker ho lak atang khan monk hovin min la hrang lo phei se chu, naute ka nih lai khan ka thi daih tawh ang." a han ti zawm leh nghal zat a.
Mei Ling-i chu a rawn tap chhuak hawm hawm mai a, "Ka fapa, i ni tak tak em?" tiin rawn pan a tum a. MAhse Jin-a chu a lo tawlh hnung a, "Aih, min khawih hlek suh. Helai hmunah hian nang nena inrem tura lo kal ka ni lo, zawhna ka neih vang zawk a ni. Eng nge a chhan? Mawh? Eng atan mah min ngai lo si tinge min neih?" tiin a vin ta vak vak mai a.
"Min hmangaihna i nei miah lo em ni? Engtin nge hetiang hian i tih theih? Tunge ka nu diktak tih hre lovin, nu hmangaihna tel lovin kum 22 chhung teh meuh ka awm asin." tiin a han vin chhunzawm leh a. Chutah Mei Ling-i chuan a mittui chu a hru hul a, a hmel pawh chu a rawn thinrim ve deuh tan ta.
A fapa chu a en kal a, "I duhtawk thei tawh em? Anih chuan Jin, min lo ngaithla ve tawh rawh aw.." a han ti ve ta ngat a. Jin-a pawh chu a ngawi ve mai bawk, "Xiaogang khua ah ka awm thin a, ka pai lai che khan kum 19 chauh ka la ni. Ka rethei em em a, sum thawhchhuah pawh ka tan a harsa takzet. Fahrah ve tho ka ni a, ka nu leh paten min duh lova, min tlanbo san ve ve a ni. Tichuan mi hause thenkhat ten min bum a, hna tha tak angin an sawi a. Mahse tihluihna hmangin ka taksa min zawrh tir ta a ni. Chutih lai chuan kum 15 chauh ka la ni bawk, mahse tih theih dang ka nei lo a ni Jin." tiin a han hrilh ve tan ta a.
Jin-a pawh chuan ngawi reng hian a lo ngaithla a, "Kum 19 ka tling a, ka inhralh vena a tam zawk hi chu ka manager ten min laksak vek zel. Tichuan ka rai ta a, ka thiante khan ti tla turin min hrilh nasa thin. Mahse ka hmangaih vang che leh ka rila rah i nih vangin ka duh lova. Ka hring chhuak ngei bawk che, amaherawh chu ka vanduai leh ta a. Sum ka hmuh zawng zawng deuh thaw chu laksak ka ni ta zel a, a tawpah phei chuan chan a lawi pawh ka nei tawh lo." tiin a han chawl dat a.
A inhnit feih feih a, "Ka thiante chuan Sunrise Orphanage tih fahrah ho dahna HOME a awm an ti a, chutah chuan fa nei enkawlna nei leh silo emaw, fahrah hrim hrim an dahna niin an sawi a. Ka harsat em avang leh pawisa ka nei loh avangin ka thiante chuan dah ve mai tur che in min hrilh a. A tir chuan ka phal bik lo che asin, mahse i lo len hunah, miin an hmusit che ang nga, i nu chu KS tiin an deuhsawh che ang nga, chu chu ka hmu ngam lo a ni. Home a i awm chuan nun tha zawk i nei ang a, i puitlin hunah pawh i nuamsa zawk ang tiin hreh chung chungin ka kalsan ta che a nih kha. Mahse a hnu ah Human Trafficking Group an ni tih ka hre ve leh a, mahse a tlai tawh lutuk. Kumtin ka zawng che, khang mite ho kha ka report ziah bawk. Duh lo che leh hmangaih lo che ila maw, Jin... dawt pawh lo ni teh reng se, ka zawng lovang che. Jin, ka hmangaih tak tak che alawm. Kum tam tak liam hnua ka hmu ve thei ta che pawh hi ka lawm takzet, mahse kei i nu a chhal tlak pawh ni lo hian ka phu tawh lo che tih ka inhria. I thu thu a ni e, i duh chuan i kal thei tawh ang." a han ti a, a kun ta ngal mai.
Jin-a chuan ava pan a, anu chu ava kuah thlawp mai. Hnuk ulh teuh chung hian, "Kum 22 chhung nu tel lovin ka sei lian a, tunah chuan ka kalsan phal tawh bik hleinem che. Nu, i fapa ka awm alawm. Ka enkawl tawh ang che, ka bulah kumkhua in i awm tawh ang." tiin a hrilh a. Mei Ling-i pawh chuan a lo kuah let a, "Ka fapa... min ngaidam hram rawh." tiin tap chungin a chalah chuan a fawp vawng vawng a.
***************************************************************
THE END
Comments