THIRTY AND FLIRTY Written by : Aaron Malsawmdawngzuala (ROMANCE - THRILLER - COMEDY) (LAST) Chapter - 13

 THIRTY AND FLIRTY

Written by : Aaron Malsawmdawngzuala

(ROMANCE - THRILLER - COMEDY)

(LAST)

Chapter - 13

*******************

Ni 2-3 vel a liam leh a, Puipuii nen chuan han hlim viau kan tum nangin buaina dang kan tawk leh ta tlat mai. Chu chu engdang nilovin, Tluangi Airport-a ka thlah ni a Puipuii bula mipa lo ding ve, Sangtea kha a ni9. A awmzia takah chuan Tluangi nena kan nih tak daih avang khan Puipuii khan a rilru na tih dam nan Sangtea kha a lo zui ve hman a lo ni.

Amah Puipuii ber pawn zep nei miah lovin min hrilh vek a, Tluangi vang bawk a ni tihna a nih chu. Sangtea lah tlangval fel pangngai ve tak a lo ni bawk nen, kei aiin ala upa zui. Tluangi nen kan inngaizawng turah ala ngai char char a, loh theih lohvin Puipuii nen chuan an inbiak chhunzawm ta thin a nih chu.

Puipuii pawhin hrehawm a ti em em a, mahse thudik sawi dawnin engtiangin nge kan sawi tak ang tih kan hre si lo. Tluangi pawh kan office-ah chuan a rawn thawk tan ta a, loh theih lohvin nitin kan inhmuh a ngai bawk nen. Buaina kan tawh belh zel mai chu ania, ning tawh tak ka ni.

Puipuii nen pawh chuan engtiangin nge kan awm zel ang tihte chu kan sawi ve nasa thin a, mahse ani pawhin chutia han then tawp mai chu nuam lo a ti ve deuh tho bawk si nen. Kar khat em pawh an la inngaizawng dawn amawni tih mai tur ania, Tluangi khan ka chungchang te leh a bialpa ka nih thute chu Sangtea awm lai hian a lo sawi vak vak thin a ni awm e.

Ka va han haw ngawih ngawih tak em, mahse tunah hau hrep emaw, han t(r)im deuh hrep ta ila awmzia a awm tawh der mai si lo. Tluangi ang em em a mi rilru chhia leh tenawm hi ka la hre lo, a hne hian ka hne hluah hluah hi a ni ber mai. Puipuii nen pawn a ruka inhmuh ziah a ngai tawh a, Tluangi erawh a hlau tawh lo mai nilovin Tluangi hian Puipuii hi a hlauvin a tlawn ngawih ngawih tawh zawk.

Puipuii hi hmana ka hriat thin nen khan a hmel leh a pian te, a inchei dan te leh a sam te thleng pawhin danglam viau tawh mahse a engmah thlak danglam ka phal chuang lo. Puipuii a nihna a bo chuang lova, chuvang chuan a hma a Puipuii tho kha ala ni a, inthlak danglam ka phal ngai chuang lo.

**************************

Hun a liam zel a, kar khat chu a ral leh ta der mai. Rin ai tak chuan Tluangi chu office ah chuan a tangkai phian a, a saptawng pawh a nalh zaih zaih khawp mai. Mahse ka be tha peih thlawt chuang lo, a hmel hrim hrim pawh hi ka hmu hne takzet. Amah pawh a hlim lo tih ka hria, mahse pawi ka ti lo, hlim hi a phu bik lo.

Kan inbe khat em em a, office thil a nih lem loh phei chuan kan inbe ngai lo hrim hrim. Mahse anu erawh Puipuii nu ve tho a ni a, a nu tak tak ni ve lo mahse tet te atanga lo enkawl seiliantu a nih ve avang chuan ka ngaihsak ve reng tho va, a damlo inenkawlna zawng zawngte pawh keiman ka tum sak vek tho.

Lalnuntluangi min tihbuai nasat zia hi ka han sawi belh leh lawk teh ang, fake certificate a siam tir pa vaipa khan a rawn vau a nih chu mawle. Chung zawng zawng te pawh chu thinrim tun chungin ka chinfel sak vek a, pawisa pawh ka chawi hnem khawp mai.

Puipuii'n khawngaih hram tura min ngen vang mai mai chauh a ni, ni lo se chuan duh leh man daih mahse pawi tihna pakhat mah ka nei lo. Ka rilru thatna hi a lo chhuak ve leh thin a, chubakah kan office ah a lo thawk ve bawk si nen khatiang illegal thil lama buaina a tawh phei chuan kan company tan pawh mualphona a ni ve thei tlat.

Sangtea lah chuan Puipuii chu a duh em em mai lehnghal a, mi lah chu a nel phian lehnghal a. Ka va han thik thei turu buru tak, "Tluangi nen in tha zel maw?" tiin min zawt ve sek thin leh nghal. Ka tuar hram hram hrih zawk, engtin nge kan awm zel dawn pawh ka hre thiam tawh bik love a.

************************

Zan khat chu kan HR Manager U Patea birthday a ni a, zanah office hall-a lawm chu a duh deuh tlat a. "Sen so vel pawh ka tum vek ang, Sir...min phalsak hram teh." a tih tlat avang chuan thawhpuipa na na na chu a thlawnin ka hman tir a, chutah chuan kan staff te zawng zawng a sawm bawk a.

Ka han phur lem lo khawp a, a chhan pawh loh theih lohvin Tluangi nen bawk kan kal leh a ngaih dawn vang a ni. Idea ka nei thut a, Sangtea leh Puipuii te chu ka sawm ve ta a. An awmdun lai chu hmu hreh viau mah ila a hmel ka hmuh theih tal chuan pawi ka ti lo, ka hrilh erawh kha chuan a phur lo nasa mai.

Kan han inhnial deuh barh barh hial kha, mahse ani pawhin min ngai ve tho va, chuvang chuan a tawp a tawpah chuan a rem ti ve ta chauh a ni. A hun a lo thleng a, peih lo tak chung chuan Tluangi nen chuan zanah chuan kan inphur phei a. Ala inchei sexy ve phian zui a, ka beng tep a ni.

Ngawi reng chuan car ah chuan kan inphur phei a, kan ngawi dun char char a. Minute 10 dawn lai kan tlan hnu chuan, "U BRandon..ka lawm e aw.." a rawn ti deuh thut mai. Kei lah chuan tum hmuk hian, "Engvangin maw?" ka lo ti deuh hlur a. Za lo taka nuih suk pah hian, "Engkim vangin." a ti zawi sap a.

Ka chhan peih vel lo, ka la ngawi reng a. Chutah amah bawk chuan, "I chungah khatiang khawp khan ka sual a, dawt tam tak ka hrilh che a. Mahse chuti chung pawh chuan ka lakah that ila chhuah a, hna hial te min pe a, ka lawm lutuk tak tak ania." a han ti leh a.

"Lawmthu chu kei nilovin Puipuii bulah sawi rawh...amah vang chauh a la lut che ka nih hi." ka han ti ve deuh hmak a. Tah chhuah hmel tak hian a lu a bu nghat nghat a, "Umm ka hria alawm, engpawh chu nise ka lawm e." tiin min chhang zawi leh sap mai.

Kan ngawi dun leh vang vang a, "Ka la hrechhuak dawn tho tho tih pawh i hre reng ang ka ring, mahse tinge khatia dawt min hrilh a, lem i la chan ngam zawk a?" tia ka han zawt deuh thut chu a phu zuk mai a, min en deuh hraw mai. A chil a lem dawk a, "Aa.ihh..ka hre bik lo. Ka insum thei lo a ni, ka inthia lo takzet." tiin a han inhnit feih feih a.

Chu ringawt pawh chuan ka thin a tirim thar leh thei a nih chu, "I inthiam lo amaw? FAke certificate i siam tir zawng zawngte kha ngaihtuah teh, chutah pawh i thianpa nilovin Puipuii thianpa zawk a ni leh nghal." ka han ti vin tuar a, min hlauh hmel kher mai.

En pawh min en ngam lo, "Ka hria alawm, mahse ka duh em vang che leh ka hmangaih em vang che khan ka hma hun ngaihtuah lek lovin ka lo duham a, tunah ka tuar mek chu a nih hi." a han ti vel a nih chu. Ka beng thal pawp dawn mawni, "Heh, i vannei khawp alawm hei, i tuar tawp loh hi. Hna tha tak i nei a, i unaunu Puipuii bawkin alawm tuar tunah pawh." tiin ngeiawm tak chuan ka han nui lui leh deuh sak a.

"Nilo, ihmaw..school kan kal lai atang khan keipawh hian ka duh ve lutuk tho che a. MAhse Puipuii zawk i duh tih ka hriat khan ka thinrim em em a, ka la na lutuk a. Ni e, ka rilru a chhe em a ni. DAwta ka puh che u pawh khan ka inthiamlo leh angreng lutuk a, mahse siamthat theih a ni tawh si lo."

"Eee..a lo nih tak chu. I buaina siam zozai te pawh i hrethiam ve tawh a, Puipuii mizia zawng zawng pawh i thlak vek chu a nih hi."

"Khami hnu a Puipuii awmdan ka hmuh khan ka inthiam lo takzet alawm, ka dik lo a ni tih ka hria. Chuvang chuan a nun a khawlo ta pawh kha ka dem lo, ka nu leh paten an hauh pawhin ka chhan hram hram thin. Vawi tam intihhlum a tum a, mahse ka dang zel thin."

"A nih chuan tinge kum 15 liam hnua kan inhmuh leh hian amah anga i insawi si?"

"A chhan chu min haw dawn lutuk tih ka hria a, chuvang chuan ka insawi ngam lo a ni. Chubakah khatia nangmah i ni tih ka hriat khan ka hmangaihna che hi a lo la reh lo tih ka hrechhuak thar a, ka suahsualna leh ka duhamna zawng zawng kha a rawn let leh ta ni mai hian ka hria."

Ka han nui lui leh deuh sak a, "Hmangaihna a? Hmangaihna chu sawi ve lo mai teh, nang khan hmangaihna i nei hlawl lo." ka han ti vin deuh hlur mai chu a ngawi chiang teh asin. Min chhang tawh miah lo, kei pawh chuan ka be chhunzawm tawh lem lo. Office chu kan thleng a, kan inzui lut ta a.

***************************

Hall ah chuan kan tlang chho va, birthday boy ber U Patea pawh an nu leh afate zawng zawng nen an lo kim thap mai. Kan mizo milar zaithiam te, model te leh influencers te ho pawh an kim the thaw hlawm khawp mai. Mahse a then kha chu tute nge an nih pawh ka hre lo, chicks pawh an tam phian.

U Patea hi chu a vak zau ve hrim hrim a, milar hmelhriat pawh a ngah khawp mai. Puipuii erawh ka la hmu lo, Tlaungi ai khan a chhuak hmasa bawk sia. Ka zawng kual deuh nghal char char a, mahse ka hmu mai si lo chu ka mangang tan titih nghal deuh der mai.

Minute 10 chiah tan nan hun a awm tawh a, mahse Puipuii leh Sangtea te chu an lo la thleng thei reng reng lo mai. Ka hlauthawng angreng khawp mai, Sangtea hian lo chet engemaw pui a tum mai ang a tihte thleng chuan ka ngaihtuah a. Ka phur lo takzet, mi ho lah chuan min rawn be peih khawp mai lehnghal a.

Tan dawn tep ah chuan kan host chu a rawn ding a, bul a rawn tan ta. Tichuan lawmthu sawi leh a khuhhawnna a ni mai ang chu, thu tlem sawi tur chuan min la rawn sawm zui. General Manager ber ka lo ni ve bawk nen, peih lo chung chung chuan thu chu ka han sawi ve luam a.

Ka la sawi tui phian zui, thu ka sawi lai tak chuan Puipuii leh Sangtea te pawh chu an rawn thleng ve thei ta a. Ka thu sawi ka buai hman tep alawm mawle, ka sawi zawh hnu chuan ka va be dun luam a, Sangtea lah chuan a kuah deuh sek lehnghal, kuttum ka hum hman teuh asin aw.

Tichuan zaithiam hrang hrang te chu an zai a, nuam an ti tlang khawp mai. Dawhkan pakhat kil ve in Tluangi nen chuan kan thu dun a, mahse kan inbe miah lo. Kan awmna atanga pen 20 vel daih a hla ah chuan Puipuii leh Sangtea te chu an awmdun ve thung a.

Puipuii nen chuan ral khat atang chuan kan inmelh leh zeuh zeuh thin a, Tluangi chuan lo hrethiam vel mahse kan hlau lo, mahse Sangtea ngai a tha lovang tih chu kan hlau ve bawk si. Party boruak a nuam tulh tulh a, kei erawh boring ka ti tulh tulh thung.

Puipuii chu ka va melh leh a, a phone phawrh chhuakin a mitko a rawn san zeuh mai. Rang takin ka phone ka phawrh ve nghal a, a message a rawn thleng nghal. "Pawnah chhuak ru ang." tih hi min rawn thawn a. Ka lo nui sak mai, "Tunah maw?" tiin ka  zawt nghal a.

"Aw tunah...ka ning, i bulah ka awm chak tawh lutuk."

"Umm..kan chhuak ru dawnnia, mahse Sangtea kha.."

"A ho lutuk, a hre dawn hleinem."

"Awle, ka chhuak hmasa phawt anga, i lo chhuak ve dawnnia."

Phone chu kan dah a, beer no khat ka hma dawhkana awm chu ka han tlak leh pawp a. Ka tho va, "Khawnge i kal dawn?" tiin Tluangi chuan min lo zawt a. Ka chhang lo tep a ni, "Ka inthiar dawn." tiin ka kalsan nghal daih a. Pawnah chuan ka chhuak a, reiloteah chuan Puipuii pawh chu a rawn chhuak ve nghal.

CCTV-in a cover phak lohna chinah chuan kan phei nghal a, inthlahlel tak chuan kan inkuah vawng vawng mai. Duat takin kan infawp bawk a, "Ka ngai tawh lutuk che." a han ti zawi sap a. "Kei pawn ka ngai tawh lutuk che, hawh...leng chhuak daih ang." ka han ti a.

Min en chhoh pah chuan, "Khawiah nge kan kal anga?" tiin min zawt hu mai. Ka han ngaihtuah vang vang a, "Ka hre bik lo, engin nge i lo kal hrim hrim?" tiin ka han zawt let a. "Sangtea motor a chhia a, kan scooty in kan rawn inphur phei a." tiin min chhang a.

"Car in nge kan kal ang, scooty in?"

"Kan scooty in kal zawk ang, car chu a lum si ka rui palh ang."

"Awle, anih chuan kal ang aw?"

"Um..kal ila."

Birthday function kalsan meuh chuan a scooty chuan kan inphur ta a, kan phone pawh kan off dun hmak. Kan inphur a, kan han zai vel thul. Kan kal thui hman teh asin aw, ka round a, a ngaiah pawh vawi engzah nge kan kual. Kan inkham thei hlawl lo a ni, ka hmelhriat te inah beer ka han lak belh keuh va.

Kan indun a, khawi khawi ah emaw kan chawl kawi leh zeuh thin bawk a. Kei hi chu ka dose a san vang hrim hrim hian ka rui har ve em bawk a, mahse ani erawh beer cane khat a in zo meuh chu a kai khawp mai. A titi tui bawk sia, ka va han lawm reuh tak, a cute bawk si.

Chiang taka a hmel ka han en vang vang phei hi chuan kan naupan laia a hmel bawk kha a ni ka mitthlaah rawn awm ni, class 10 kan nih lai ang mai khan ka in-feel thei hian ka hria. Danglam tawh viau mahse, amah ngei kha a ni tih hi ka chiang tulh tulh mai zawng a nih hi.

***************************

KA sana bun lai ka han en a, dar 12 a lo ri dawn der mai. La hlim viau mah ila kan let leh tawh a ngai tlat, ka phone ka en phei chuan U Patea miss call pawh 5 lai a lo awm a, Tluangi miss call a lo la awm ve hram zui. Puipuii chu a phone chu on lo law law turin ka ti a, tichuan kan office lam pan chuan kan in phur phei leh ta a.

Office lamah chuan kan let leh a, vanneihthlak takin kan ti dawn nge, pawn velah chuan midang party-na a tel ve tho chu an lo awm nual mai. Thenkhat an lo titi a, thenkhat meizial an lo zu khu luih luih bawk. "Va lut hmasa rawh." tiin Puipuii chu ka luh hmasak tir a.

A luh hnu deuh fe ah chuan ka va lut ve a, mahse khawnge i kal tih vela min zawttu an lo awm lo hlauh chu ka lawm ngei mai. Puipuii chu ka zawng kual a, Sangtea nen chuan an lo inbe lai ka va hmu chu ka thaw huai mai, mahse chutih rual rual chuan thikna hlirin ka khat leh tlat pek a nih chu.

Chutia ka thlir reng lai chuan ka hnug lam atang chuan Tluangi chuan min rawn ko va, "Lungngai suh....ka sawi fel vek tawh." a rawn ti ringawt a. Kei lah chuan tum hmuk hian, "Engmaw i sawi fel?" ka lo ti hlur a. "SAngtea bulah, chhuanlam ka lo siam sak vek tawh che u." tiin min chhang a.

Lawmthu sawi chu khawi lam, chhan pawh ka chhang lo. Function pawh a zo ta a, kan haw darh ta a. Phur lo tak chung chuan Tluangi chu ka thlah leh a, Puipuii pawh Sangtea nen chuan an inphur haw leh ta a. Tluangi nena kan inphurh haw chhung zawng khan kan inbe lo hrim hrim, ka be chak zawk zawk lo bawk nen.

Puipuii te ai chuan kan thleng hmasa zawk ni ngei tur a ni, an scooty a lo la awm lo tlat. An in step chhukna bulah chuan motor chu ka park tha a, "Anih....mangtha phawt aw.." Tluangi chuan a han ti zawi sap a. Ka chhang peih vel lo, ka lu ka lo bu nghut ringawt.

Motor atang chuan a chhuak a, an in pan chuan a chhuk thla a. En pawh ka en zui peih lem lo, ka bialnu pawh ni tak tak hlei lo. A haw hnu chuan haw ve mai ka tum a, mahse ka ngaih ala tha tawk lo tlat. An in chhukna step atanga hla vak lovah chuan ka motor chu ka tiding a, ka lo nghak ta ran a.

Minute 5 vel hnuah chuan an rawn thleng ve mai a, an inthlah dun lai hmuh chu en rei a har ngei mai. Sangtea chuan han muah zeuh chu a tum ve ngei a, mahse Puipuii chuan  alo duh miah lo. Ka lawm rual rualin Sangtea chuan a ringhlel ang tih chu ka hlau angreng phian a, tichuan Puipuii chu a chhuk ta a.

Va umzui a, va biak leh ka tum tehreng nen. Sangtea ding rei lutuk chu ka haw ngei mai, a hnu ah chuan ke in a haw ta tuih tuih a. Puipuii biak tuma va chhuk leh chu a tlai tawh awm sia, chubakah inchhungah a lut hman vek tawh dawn bawk nen. Han call chhuah leh em chu ka ti deuh va, kei pawh chuan ka haw san ve ta a ni.

*******************************

A tuk chu Saturday a ni a, office pawh chawlh a ni ve leh ta. Ka nawmsam loh em avang chuan inah ka awm mai mai a, ka nupui hlui Rinhlui a lo la leng zui. Mahse engmah boruak kan nei tawh lova, kan inhaw tawh lem lo bawk. Ka nu enge a an tiin a rawn tlawh ve a, keipawh chuan tha takin ka lo bia a.

Minute 10 vel bak a rawn leng lo, a haw lehnghal daih. Ka room ah chuan ka mu hahdam a, zan hmasa lam ka lo lem ve deuh sek bawk nen, ka lu chu a na ve deuh bur mai. Phone khawih a youtube video vel ka en mai mai lai chuan ka room kawngka chu ka nu chuan a rawn chum ri dut dut a, "Bawiha, lo chhuak teh..hei inleng i nei?" a rawn ti lauh lauh mai.

"Tu chu nge maw ni ang le, chhun chhunah.." tih nuah nuah pah chuan peih lo tak chuan ka tho chhuak a, ka la en tui angreng a sin le. Room atanga ka chhuak chiah chu ka rin loh lutuk in Lalnuntluangi chu kan kawngka zawnah chuan a lo ding reng a nih chu, office-ah pawh tih tawk mah nak alaia.

Nitin ka hmu pawh ka hne tawh ania, office chawlh ve hunah tal hi chuan ka hmu peih lo asin le. Ka nu chu awm lo se chuan ka vin hrep anga, ka hnar haw nghal ang. Engtak chu rawn beisei leh nimaw, "Lo leng rawh...hawh ka room ah lo lut rawh." tiin ka room ah chuan ka luhsan leh daih a.

Ka luh hnu lawk chuan a rawn lut ve a, khumah chuan thu in meizial ka tan nghal a. Ka bul ah chuan muangchang leh inthlahrun hmel tak hian a rawn thu ve a, "Enge i duh a?" ka lo ti leh hlur mai. Thawk a han la te te a, a zam hmel kher mai. Ka va en a, "Enge i duh ka tih chu?" ka han ti leh a.

A hmui a pet fan fan a, "Ihh...engkim ka siam tha vek tawh." a ti ringawt a. Ka hrethiam lo kher mai, "Engmaw i siam that? Kan project kal lai mek kha em ni i sawi?" tiin ka han zawt nghal a, ka bo takzet. A lu a thing a, "Nilo..keimah vanga Puipuii nena tun thleng pawh a inla inkawp thei lo leh a ruk hlir a in inhmuh a ngai hi keimah hian hrehawm ka ti." tiin min chhang leh daih mai.

Ka bo tulh tulh mai, "Chuan...enge awmzia? Eng ber chu nge sawi i tum a?" tiin ka han zawt nawn leh a. A thaw deuh hak a, "Sangtea bulah engkim thudik ka hrilh vek alawm....Puipuii nena inchungchang zawng zawng. Engkim ka hrilh fiah vek, tukin khan..." tiin min chhang leh a.

Ka ngawi vang vang a, "Anih leh engtin nge a tih?" ka han ti leh a. A khi suk a, "A tirah chuan a hrethiam lova, a thinrim lek lek a. MAhse engkim ka hrilhfiah vek hnuah leh a bul ber chu keima thiam loh vek a ni tih ka hrilh hnuah a hrethiam ve tawh a, Puipuii pawh a thlah tawh." tiin min chhang leh a.

Ka hahdam sawt hian ka hria, ka lawm bawk si mahse engtia han react tur nge ka hre lo. Ka ngawi vang vang a, han chhan dan tur pawh ka hre lo. Chutah amah bawk chuan, "Min ngaidam thei dawn lo mah la, hei tal hi chu in pahnih tana ka tihtheih awmchhun ania, ka tih tur ni ngei bawkin ka hria." a han ti zawi leh sap a.

Mahse ka la chhang chuang lo, ka la ngawi reng. A inhnit feih feih a, "Chumi hrilh tur che a lo kal chu ka nia, i ngaihdamna ka phut miah lo, phut ngam tur pawh ka ni lo. Mahse keimah vang vek a ni a, chuvang chuan in hlim loh reng hi ka duh bik lo a ni." tiin thawk a han la leh te te a.

"Tun ah chuan a ruka in inhmuh pawh a ngai tawh lo anga, keipawh in pahnih inkarah hian rawn tlak zeh ka tum tawh lovang.  Vawi khat mah ka ti buai leh tawh lovang che u tih ka tiam a che, mahse a theih hram chuan min ngaidam dawnnia. Ka unaunu neih chhun Puipuii hi hlim takin awm se ka duh, keipawh..." a sawi zawm hleithei lo.

A tap leh dawn thin a, a insum ve nasa tih chu ka hmu thei. A hmui hnuailam chu a han pet leh fan fan a, "Keipawh i office-a hnathawk ve pangngai angin min en tawh la, i hmelma nih ka duh tawh lo. Mahse duhthlang thei chu ka ni lo tih chu ka hria, a theih hram chuan min ngaidam dawnnia." tiin a han sawi chhunzawm leh a.

Mahse han chhan mai dan tur ka la hre chuang lo, ka la ngawi reng tho. A ding deuh hluai a, "U Brandon, a theih hram chuan min ngaidam la, chu chauh chu ka ngen a che. Ka sawi duh chu ka sawi zo tawh e, ka kal phawt ange." tiin kal a tum a. A kutah chuan ka vuan a, "Ka ngaihdamna i phut vang em ni hetiang thil hi i tih?" tiin ka han ding ve a.

A lu a thing a, "Nilo, engkim kha ka thiam loh vek ania. Siamthat dan kawng ka hriat awm chhun a nia, ka tih tur dik tak ka ti chuan ka hre ve bawk." tiin min chhang a. Thawk ka han la te te a, a mitah tak chuan ka en a. Zaidam tak chuan, "Ka lawm e, Tluangi...chuan, ka ngaidam bawk che." tiin ka chhang a.

Mak tih hmel tak hian min en a, M...Maw? Min..min ngaidam maw?" a ti bah nuai mai. Ka lu ka lo bu nghat a, "Umm..ka ngaidam che, chuan..ka lawm e aw.." tiin ka chhang a. A lawm lutuk chu a mittui a tling teuh mai, "Tak tak em?" tiin ka kutah chuan nghet takin a vuan a.

"AW Tluangi, ka ngaidam che...ka ngaidam che alawm." tiin ka han chhang leh a. A hmai hup meuhvin a tap zawih zawih mai, "U BRandon, ka lawm..ka lawm takzet. Ngaihdam tlak ka nih loh teh lul nen...ka lawm e aw.." tiin a tap ri hawm hawm mai. Keipawh zep thu a awm lo, a chungah hian ka lawm ve vawikhatna a ni hial awm e.

Tap hluam hluam chung chuan, "In pahnihin, in nun zawng zawng ka ti chhe vek a, in intawn leh hnuah pawh buaina ka siam leh a..mahse min la ngaidam thei a, ka..ka lawm lutuk." tiin a tawng tha hlei thei lo hial a. Ka kuah a, "Tap tawh suh le...ka nu in  ahre phak ang." ka han ti chu a tap bang hmak mai.

A mittui hruk pah chuan, "Umm..ka tap tawh dawn lo." a han ti deuh tuau a. Chiang tak chuan ka en a, tun tum zet chu Tluangi hmel pawh hmuh  ahrehawm lutuk tawh love. ZAidam tak hian, "Monday ah hma deuh ah lo kal ang che, tlai suh aw...hna kan nghah kha.." nui sak chung chuan ka han ti a.

A lu a bu nghat nghat a, "Umm..ka tlai miah lovang, Sir. Anih..ka kal phawt mai ange." tiin min chhang a. Kawngka thleng thlah chu ka chak viau nangin ka thlah ta lo mai, ka room atang chuan min chhuah san ta a. Ka hahdam huai mai, ka lawm bawk si, awm ngaihna ka hre hlawl lo nimai hian ka hria.

*******************************

TLuangi haw hnu chuan Puipuii chu ka phone nghal vat a, ala la thei lawk lo zui. Message tam tak ka thawn a, "Tluangi thil tih kha i hre ve em? Enge awmzia?" tiin ka thawn teuh a, mahse a seen miah lo. Va len mai te chu ka duh rum rum, ka chauhna zawng zawng pawh a reh vek nimai hian ka hria.

Minute 20 vel hnu chuan ka phone chu a rawn ri ral ral mai, Puipuii a nih ringin phur tak chuan ka han en vat a. Mahse ka rin loh lutukin Sangtea zawk a lo ni a, ka va chhang huphurh reuh tak em. Hreh tak chung chuan ka pick up a, "Hello, Sangte..enge ni ta?" ka han ti a.

"Bro, inah i awm em? I buai em, enge i tih?"

"Awm e, hei..engvakmah ka ti lo."

"Tluangi lo kal kha ka hmu a, engkim a hrilh ang che tiraw?"

"AW...hrilh e."

"Hei..in veng park ah khan ka awm a, kan titi lawk dawn mawni le?"

"AWle, ka lo kal ang."

Huphurh rilru viau mah ila, a thinrim em lovang chu. Insual buai buai a ngaih loh hram ka beisei, insiam phawt mai teh ang. Tluangi pawh khan a hrethiam a, a thinrim lo a tih ve ngei kha maw. Mahse henu hi chu tun lawk pawh khan a chungah han lawm viau mah ila, rin chu a la harsa deuh aniang nge.

*************************

PArk chu ka va thleng a, view nuam lai ber bula thutthleng ah chuan  alo thu a. Ka va pan a, a bul hnai a ka va thlen pawh chuan en pawh min lo en lo, a hma zawn chu a thlir reng a. Kei pawh chuan ka be lem lo, a bulah chuan ngawi reng chuan ka va thu ve a.

Kan han ngawi dun vang vang phawt a, kan in en lo hrim hrim. Second 15 vel hnuah chuan a hma zawn melh reng chung si chuan a han thaw deuh hak a, "I hmangaih tak tak em?" a han ti ringawt a. Ka nui suk a, "Umm..hmangaih e. Kum 15 chhung kan inhmu lova, khatih chhung zawng pawh khan ka thinlungah hian ala thi lo." tiin ka chhang a.

A lu a bu deuh nghat nghat a, "Aa..kei hi chu maw..upa ve viau tawh mah ila ka rilru hi ala no em em a. Ngihzawng te hi ka la la serious thei reuh lutuk a. Puipuii-ah pawh hian ka rilru zawng zawng ka lo pe hman a, awmdan pawh ka thiam hrih lo." a han ti zawi sap mai chu a nuam lo duh kher mai.

"Bro, ka hnena lo kal tir chu i phal takzet maw?"

"Heh..in thawnthu zawng zawng a bul atanga a tawp thlengin ka hre vek tawh a...a ngaihnawm khawp mai, chuan ka feel ngawih ngawih che."

"Ka zawhna ila chhang lo."

A ding deuh hluai a, keipawh chu ka ding ve a. Min en a, "A tir kha chuan ka hrethiam lo alawm, zep lo chuan. Kum 18 vel lek chu la ni ila kan insual nasa ngawt ang, mahse...puitling kan ni tawh a, hmangaihna diktak hre rual chu kan ni ve tawh alawm tiraw?" tiin a han nui suk a.

Ka inthlahrung ngei mai, "Min ngaidam dawnnia, mahse Puipuii hi ka hmangaih a ni, Sangte." tiin ka chhang a. Ka darah chuan min beng thak thak a, "Ka thlah tawh...nichin lawk khan kan inhmu a, ka thlah fel tawh e. Hlim reng ang che u, duat hle ang che." tih pah chuan ka chhan let ve hma hma chuan min kalsan daih mai.

A kal hnu deuh lawkah chuan ka phone a rawn ri a, ka hmangaih Puipuii a lo ni. Rang takin ka la nghal a, "Hey...thu lawmawm kha i hre ve tawh em?" a rawn ti deuh chiam mai. Kei lah ka lo uang, "Eng thu lawmawm maw..hei ka tho ve chiah a.." ka lo ti fiam a.

Vin deuh hlur hian, "Hmelpawng, i hria i hria...Tluangi pawh a lo kal tih ka hria, Sangtea pawn ka hmu dawn a ti che..enge dawt i sawi?" a rawn ti vin deuh hlur a. Ka nui nasa mai, "Anih chuan i hre ve em tinge i rawn tih kher, ka hria tih i hriat lawk te chuan.." ka han ti leh deuh kher a.

"I bengchheng, khawnge tunah i awm?"

"Hetah...kan veng park ah."

"Tunah lo kal nghal rawh, inhmu ang."

"Leh ngawt zela, khawiah maw?"

"Khawiah vak nge niang, kan spot ah."

"Tlangah khan maw?"

"Aw aw aw, hei tlang pan chhohna step bulah ka nghak che."

"AWle ka lo kal nghal."

**************************

Hmanhmawh fahran chuan ka carah chuan ka lut nghal a, tlang lam pan chuan ka phei nghal vang vang a. Ka phur bawk aniang, ka motor pawh ka khalh nui vur vur mai. Rei lo teah chuan ka thleng a, step bulah chuan a lo vei kual sek tawh mai. Min hmu chiah chu a nui sen sen a, ava han hmeltha chung chuang tak em.

Car atang chuan ka chhuak a, ka va thlan phei nghal. Nghet tak chuan kan inkuah a, ka pawm lawp a, ka han vir vel a, romantic ve riau alawm. Duat tak chuan kan infawp vawng vawng a, "Ka lawm zia hi, tunah chuan a ruka inhmuh a ngai tawh lo." tiin a han nui sen sen a.

"Hawh ka paw chho ang che." tih leh puak ka rual nghal a, tlang chhip thleng chuan ka pawn chho va, kan uang chho dun nasa mai. A zawl lai, kan sopt ngei maiah chuan kan thleng ta. Thut pawh kan thu hman tawh lo, kan hlim dun lutuk chu kan inkuah leh vawng vawng mai.

"Dear-a...ka va han hlim tak. Tunah chuan uaina tur a awm tawh lo, engkim a fel vek tawh." tiin a han nui sen sen a. "Nia tiraw? Mahse i lakah thil duh pakhat ka la nei." ka han ti a, mak tih hmel tak hian min en hu mai. Hriatthiam loh hmel tak chuan, "Eng chu maw?" a han ti hu a.

Ka kekawr vel chu ka han indap a, "Ka keng lo a nih hi....aa..pawi lo mai." tih pah chuan a hma zawn takah chuan ka thingthi a. A kutah chua ka vuan a, "Puipui, pasal atan min nei duh angem?" ka han ti a. A mittui a tling nghal teuh mai, mahse min chhang miah lo.

A ngawi reng a, "Tinge min chhan loh? Min la nei duh chuang lo ami? Buaina dang ala awm ami?" tiin ka han zawt leh a. A han ngawi deuh vang vang a, "Mahse...kum 30 i pel tawh a, nupui then tawh i ni bawk a, i ex lah ka unaunu a ni bawk nen...tuna inla tlangval deuh a min propose hi i inhmeh lo e." tiin a han nui suk a.

Kei lah chuan ka dar san zeuh pah chuan, "Enge ni vak...30 and flirty a ni mai alawm." tiin ka han khi suk a. Ani pawh chu a nui sen sen a, "Umm..TIAM TLAT E...kan ti ang." tiin min chhang a. Kan inpawm vawng vawng a, duat tak chuan kan inkiss bawk a.

A tawp a tawpah chuan Puipuii nen chuan...nilo, Puipuii diktak zawk nen chuan kum 15 zet kan beidawn hnuah leh kan intawn leh hnu pawh a buaina hrang hrang kan pal tlang hnuah chuan kan innei ve thei dawn ta. Abak sawi vak ngaihna pawh ka hre lo, kan hlim a ni tawp mai, kan hlim.

************************************

THE END