KEIMI 2 : WHEN THE WOLF COMES OUT [MIZO FICTION SUPERNATURAL STORY] Written by : Aaron Malsawmdawngzuala Chapter - 5

 KEIMI 2 : WHEN THE WOLF COMES OUT

[MIZO FICTION SUPERNATURAL STORY]

Written by : Aaron Malsawmdawngzuala

Chapter - 5

****************************

DAniel-a te venga mi tho, Sena zan leng haw chu chak takin a bike chuan a tlan a. Dar 11 a pel tawh a, khawlai pawh a reh vung vung tawh kher mai. Chutia a tlan mek lai chuan a hma zawn ah chuan chinghnia ni awm tak, lian zet mai hian kawng a rawn cross thut mai a.

Sena phu nasa lutuk chu a kawi zawk a, a thal tawp mai. Mahse vanneihthlak takin a na lutuk lo hlauh, rang tak chuan a tho leh a. Kawngsirah chuan chu ramsa chu a tlan phei a, hnim kara a zuang lut lai chu Sena chuan a hmu fuh hman a. Mak a ti kher mai, "Eng thil nge ni ngai? A va han lian em em ve.." a ti vawng vawng mai a.

A bike lam chu a pan leh a, tih nun a tum chu a nung thei ta hauh lo mai. A han kick thin a, mahse a nung thei chuang reng reng lo. Chutah le, chu chinghnia chu kawngsir hnim kar atang chuan muang chang hian a rawn chhuak ta mai a. Sena hlau lutuk chuan a bike chu a han kick vak vak a, mahse a nung thei der mai si lo.

Chinghnia chuan a rawn pan hnai zel a, a tih ngaihna hre tawh lo chu a tlan chhe ta tawp mai a. Chutah a la rawn umzui ta zel mai a, Sena mangang chu a au vak vak a. Mahse an awmna lai chu in awm tlemna lai tak a ni bawk si a, zan a rei tawh nen tuman a au thawm chu an hre lo.

Step a hmuh hmasakna berah chuan a tlan thla tawp a, a lum titih hial a. A zawl lai a thlen veleh chuan a tlan leh nghal char char a, mahse a inchhuih palh ta hlauh mai. A nghal ruh chu a ri deuh thawk a, na a ti kher mai. Thawh leh nghal mai a tum a, mahse a thei ta tlat lo mai.

Chinghnia lah chu a rawn thleng chawpchilh ve nghal a, a rawn pan leh ta. A chilthli te chu a luang duah duah a, Sena chuan a hlau kher mai. Khur zawih zawih hian, "Nilo..min tina suh, khawngaihin min tina suh." tiin tap chung chuan a ngen a. Mahse chu chinghnia chuan tihnat a tum hmel kher mai, a ding leh ta ur ur mai a.

Sena hlau lutuk chu a maimitchhing tawp a, chinghnia chuan a zuan ta vak a. Mahse khawi emaw sir atang chuan sakei ni awm tak, dum hlang vek leh lian zet mai hian chinghnia chu a rawn zuan ve thut mai a. Sena a han meng chu a hma zawnah chuan zawhte ang tak, dum vek ni si hi a lo ding run mai a.

Chinghnia pawh chuan mak ti tak hian a en a, chu keite dum chuan a melh ran mai. Sena mak ti lutuk chu a ka hau mai a, chutah chu keite chu mihring ang mai hian a rawn ding ur ur a, Sena chu a melh a. "Police phone rawh." tiin a rawn tawng chhuak a. Sena chuan mak a ti zual kher mai, "I...i tawngthei maw?" a ti bah nuai mai a.

Chutah chinghnia chu a rawn tlan a, mahse keite chuan a lo beilet leh nghal a. An insual ta buai buai mai a, Sena pawh chuan police chu a phone nghal a. Chinghnia chuan a hneh tha ta hauh lo mai, keite chuan a ham nasa mai a, a seh bawk a. A tawpah chuan a tlanchhe ta nge nge a, Sena chu a thaw huai mai.

Mahse chu keite dum chu a kal bo lehnghal daih a, Sena chuan biak pawh a be hman lo. Keite chu a tuan a rang em em a, khamah pawh a tlan lawn rang thei bik khawp mai. A chhip a thlen veleh chuan a hawi kual a, chutah zawi muang chuan mihring ah a inti chang a.

Mihring a nih fel meuh chuan tudang nilovin Duhzuali kha a lo ni reng mai, a nui suk a. A han zi mar kual vel a, a taksa te chu a han en a. Keimi a nih ve tak avang chuan nuam a tiin a hlim kher mai, tichuan chu ramhnuai chu a chhuahsan ta a. Kil khat atang chuan Zorina chuan a lo en reng tih erawh a hre hauh lo, "Hmelma dang bawk maw? Keimi engzat chiah nge maw awm le?" tih nuah nuah pah chuan meizial chu a pak khu hlat hlat a.

***************************

Daniel-a leh MElody te chu inngheng rial hian an thu dun a, "I pa chu a lo van let har tawh em em.." DAniel-a chuan  a han ti nuah nuah a. Melody pawh chuan, "Nia..ka rin aiin a lo let har ka ti." a lo ti ve bawk a. Daniel-a chuan a sana chu a han bih zeuh va, "Dar 11 leh a chanve a ri mai dawn, ka haw san mai ang che...chhunglam atang hian in hi kalh mai rawh." a han ti a.

"Nia, a tlai tawh bawk sia. A lo haw ve tep tawh ang, hawh..ka lo thlah ang che." tiin MElody chu a tho va, Daniel-a nen chuan pawnah chuan an inzui chhuak a. An inthlah dawn lai tak chuan Daniel-a phone chu a rawn ri a, Pu Chhuma a lo ni a. Mak ti tak hian, "Ehe, i pa chu...hei min rawn call." Daniel-a chuan a ti hu mai a.

Melody pawh chuan mak a ti angreng kher mai, "Tinge nangmah daih a rawn phone che le?" a lo ti ve bawk a. Phone chu Daniel-a chuan a pick up a, "Hello, Pu Chhum? Enge ni ta, ilo la haw bawk silova?" tiin a han zawt nghal a. Pu Chhuma chuan, "Daniel, i duh leh Melody kha lo hruai la, location ka rawn thawn che a, in lo kal lawk dawn em ni?" a rawn ti a.

"Tinge pa? Eng buaina nge i tawh a?" tiin Melody chu a lo mangang nghal hle mai. "Buaina tih ah...hei call kan dawng a. Lo kal phawt mai teh u, hmanhmawhin." tiin Pu Chhuma chuan phone chu a dah nghal daih mai a. DAniel-a leh Melody pawh chu Melody scooty hmang chuan Pu Chhuma location sawi ah chuan an va kal nghal a, reilote ah chuan an thleng a.

KAwngsirah chuan police motor leh Pu Chhuma motor a lo awm a, a bulah chuan police pali vel hian Sena chu thil an lo zawt fiah mek a. Pu Chhuma chuan DAniel-a te a hmuh veleh chuan a va pan a, "Pa, engthil nge ni a?" tiin Melody chuan a zawt leh nghal a.

"Englo ania, sakawlh kha saw tlangval sawn a hmu a ni awm a." tiin Pu Chhuma chuan a chhang a. DAniel-a chuan Sena chu a va thlek leh thin a, "Sawpa saw..kan veng ami a nih saw...Sena a niin ka hria." a han ti nuah nuah a. "Ni e, a hming pawh kan lo zawt tawh alawm." tiin Pu Chhuma chuan a lo chhang leh a.

"Anih tinge kan pahnih hian min koh ve chhan?" tiin Melody chuan a han zawt leh a. "Inah nangmah chauh a i awm ka duh lo alawm." tiin apa chuan a chhang a. "Hliam a nei em?" tiin DAniel-a chuan a han zawt leh a. "A mah leh amah a tlukna hliam chu a nei a, mahse sakawlh kha chuan a khawih na lo." tiin a lo chhang leh a.

Pu Chhuma bawk chuan, "Melody, motor ah sawn lo va awm la. DAniel-a hi ka'n titi pui lawk ang e, kan haw vat dawn nia." zaidam tak chuan a han ti a. Melody chu tum bur chuan a phei a, motorah chuan a lut a. Pu Chhuma chu a thaw hak a, "DAniel, nangmah lo keimi dang an awm." a ti ta mai a.

Daniel-a chu a meng phawk nasa mai, "Enga? Keimah lo..keimi dang an awm maw?" a ti hu mai a. Pu Chhuma chuan a lu bu nghatin, "AW...Sena sawn a sawi alawm. Min rawn chhan e a tih kha, sakei lian deuh, dum vek ania, a tawng thei bawk a ti." tiin a chhang a.

"A nih chuan, kan lamah a tang tihna a ni mai lo maw? Zorina a lo beilet tihna ania, Sena a chhan bawk a.."

"Aaa..kha chu ka hre lo. Mahse tunge a nih kan chhuichhuah angai, chuan hmeichhe aw a ni a ti bawk."

"Hmeichhia maw? Keimi hmeichhia tihna maw?"

"Aw a ni mai aniang chu....tunge kan hriat chhuah vat angai a ni."

**************************

Zing dar hnih a ri a, Daniel-a chuan mumang mak tak mai hi a nei a. Thingtlang em em mai, in zawng zawng pawh dap veka sak, ramhnuai ruih mai ah hian a lo awm a. Mahse mihring erawh tumah an awm lo, a han hawi kual a, a reh em em mai a. Chutia hrilhhai taka a awm lai chuan hnung lam atang chuan tu emaw ni hian, "I dam maw, DAniel?" a rawn ti thut mai.

Daniel-a chu a phu zuk a, rang takin a hawilet nghal vat a. Keichala a lo ni reng mai a, "Nang bawk maw?" Daniel-a chuan a han ti vin hlur a. Keichala chu a khi sak a, "Aw ni e..helai hmun hi kan khua, Keimi khua a nih hi." tiin a chhang a. DAniel-a chua vin lek lek hian, "Engvangin nge helai hmunah hian min hruai?" a han ti khur khur a.

"Thil awmzia hrilh fiah tur che in ka hruai che a ni, DAniel. I hmelma kha chinghne-mi kha...Zorina kha, a thusawi zawng zawng kha a dik a ni. Ka thisen, ka thlah kal zelte zinga mi a ni." a ti ta mai a. DAniela chuan mak a ti kher mai, "A awmzia chu nang hian i unaupa bumin Lal nih i duh vangin, i tuithlar amaw?" tiin a zawt a.

Keichala chu a han thaw deuh hak a, "Nilove, kha chu a dik lo. Zeros-a khan Zorina kha a hmuhtir ngei a, chinghne-mi nihna petu erawh a ni lo. Mahse Pu Vana kawrkilh hmang khan Zorina kha ka thlahte zinga mi, la dam zinga mi a ni tih a hre thei a, tichuan nangmah beih nan khan a rilru kha a lo thunun lawk a ni. HRangkunga kha ka nau a ni a, ka hmangaihin ka duat hle bawk. Kan khaw mipuite khan kei hi Lal atan min thlang a, mahse min itsik a. Sakei nilovin chinghne-mi zawk nih a duh a, min hnial ta fo va. A tawpah chuan zanlaiah min thah a tum a, mahse kan manchhuak leh ta si a ni. Kan khua atanga hnawhchhuah mai nilovin, thah ve hial kha khaw mipuite khan an duh a. Mahse lamtang engemaw zat aa lo nei ve hman tawh bawk si a, tichuan an vai chuan kan hnawtchhuak a. A duh ang ngeiin chinghne-mi nihna chu kawrkilh hmang khan ka pe ve ta hlawm a ni. Kum engemaw zah a ral leh hnu khan Zeros-a ten min rawn run a, a bak chu i hriat tawh kha." a han ti dap dap mai a.

Daniel-a chu a ngawi vang vang a, "Tinge a tir khan min hrilh loh? Chuan....tinge i zep then a?" tiin a han zawt leh a. "DAniel, ka fapa thlarau hi tunah chuan i thlarau a ni tawh. I thisen ah khan sakei thisen a tel tawh, chuvang chuan mibik i ni a, phuba la theitu tur atana thlan i ni. Engkim i hriat vek a tul ka tih loh vang a ni, mahse Zeros-a khan engkim a lo hre hman vek bawk si a.." a tih lai chuan, "Engtin nge Zeros-a...London vampire daih daihin a lo hriat theih?" tiin DAniel-a chuan a lo pawt chat a.

"Zeros-a hi mifing tak a ni a, phakar leh thluak hmang thiam tak a ni. Nangmah pawh khan fuihpawrh che a tum kha ila hria em? I rilru a hneh theih nan tiin ka chungchang engkim kha, a bul atangin a lo chhui vek a ni. Zorina erawh a bum theihna chhan chu chinghne-mi a nihna kha rei tak hman loh a nih tawh vang leh amah a inhriat loh vang a ni. Kawrkilh hmang vek khan Zeros-a khan Zorina chu fuihpawrhin a rilru a thunun a, keimi reng reng that chimit vek turin a hrilh a ni." tiin Keichala chuan a chhang leh a.

DAniel-a chu a ngawi leh vang vang a, "I puih ka ngai, min puih ka ngai a ni. Ka hneh thei lovang, keimah chauh chuan ka hneh thei lovang." a han ti zawi sap a. MAhse Keichala chuan a lu a thing a, "Nilove Daniel, Zorina hi i hmelma a ni lo. I chhungkua, i thisen zawmpui a nih hi. Dawi atin a awm a, i hrilhfiah angai." a ti ta daih mai.

Hrethiam lo tak chuan, "MAhse, min thah a tum alawm. Pawisawi lo, mihring engemaw zat a that tawh. Ka dan loh chuan a that zel mai ang, chu chu ka thlen tir dawn lo." a han ti leh a. "Nia i dang ang, mahse i that tur a ni lo. Engkim hrilh fiah la, ka tupa a la ni ve reng tho va, ka thisen...ka chhungkua, ka hmangaih a ni. A tul a nih chuan tina rawh, mahse a taksa nilovin a thinlung zawk hneh tum ang che." tiin Keichala chuan a chhang leh a.

Tichuan lehlam hawiin a kal ta daih mai, "Zorina hian chhungte tam tak a nei ve anga, thisen zawmpui tam tak...chung ho pawh chu chinghne-mi vek an ni tihna em ni?" tiin DAniel-a chuan a han au zui a. Keichala chu a ding a, "Chinghne-mi an nihna an hriat loh chhung chuan mihring pangngai an ni reng dawn, i hriat tir loh angai." tiin a chhang a.

****************************

DAniel-a chu a harh zawk mai a, a phone chu a lo ri ral ral a. A han en chuan Duhzuali a lo ni a, "Hello..." a han ti tham tiak a. "Daniel, tinge nizan ka call i lak miah loh va? Min rawn call let leh ka ring a, i reh leh ta char char bawk sia." a rawn ti nghal deuh chiam chiam a.

"E..nia, aaa...inleng ka nei a, oh...ka leng zawk mawle...ka lo theihnghilh leh daih alawm."

"Hmm...i van induh tak."

"Ka induh a ni hleinem, i tha zel em?"

"Aw..ka dam vek tawh. A hrim hrimin i tho ve chiah em ni a? THo tawh rawh, dar 7 a pel tawh ania."

"I sawi takah chuan...nia, hna kal ka ngai, keipawh hi.."

"E taka, khawnge i thawh khah?"

"REstaurant ah."

"Enge a hming?"

 "Omega restaurant. NGatinge min zawh a?"

"Englo, inhmuh ka duh a. Thil titi pui che ka duh a, a rem thei angem?"

"Ka hrelo le, theih awm tak. Chhun lamah, dar 1 velah kan awl thin a, darkar khat vel..tah chuan i lo kal dawn nia."

"Awle, kan inbe leh dawnnia."

Phone chu an dah a, "Eng chungchangah nge maw min biak duhna a neih le?" Daniel-a chuan a ti nuah nuah a. A mumang te chu a ngaihtuah let a, a rilru a buaiin a hah kher mai. A tho chhuak a, fai takin a inbual a. A hna lam pan chuan ke in a kal leh ta hnak hnak a, mahse a in bul lawkah chuan a rukin Zorina'n a lo thlir reng tih erawh a hre hauh lo.

**************************

Tui khur lian lem lo tak bulah hian mipa pakhat, kum 30 mi vel ni awm tak, hmaifang chhe lem lo tak mai chu dingin meizial a zu khu hlat hlat a. A bul vel pawh a reh in chhun pachang a ni bawk a, tumah miidang hmuh tur an awm lo. A hnu deuh lawkah chuan motor pakhat hi tuikhur bulah chuan a rawn ding a, putar lam, kum 60 bawr vel niawm tak hi a rawn chhuak a.

A hawi kual zeuh zeuh va, suitcase pakhat khaiin tlangval bulah chuan ava kal hnai a. Zawite hian, "Ka lo keng ania.." a han ti su su a. Chu tlangval chu a khi suk a, "Tawng zawi vak duh suh, tumah an awm lo." tih pah chuan suitcase chu a la a. Motor lamah chuan an inzui phei leh a, chu tlangval chuan a motor chhunga suitcase pahnih chu a la ve bawk a.

Putar chu pe in, "I duh chuan i chhiar kher dawnnia." a han ti a. Mahse putar chuan, "A ngai love...ka ring che alawm." tiin a khi suk a. Motor ah chuan luhpuiin a kal ta daih a, tlangval pawh chu ama motor chhungah chuan a lut ve a. Suitcase chu a han hawng a, silai lian tha tak leh nalh em em mai hi a lo awm a.

A nui sak a, "A tawp a tawpah chuan ka hmu ta e, ka nei ta." tiin a chul vel a. Mahse he tlangval hi mizo a ni lova, Mumbai mafia zinga mi niin a hming chu Kunal Roy a ni. Tin, putar pawh kha mizo nilovin Japanese businessman a ni a, a hming erawh hriat a ni lo thung.

Kunal-a chuan suitcase chu a chhin leh a, tichuan chak takin a tlan a. A phone phawrhin tu emaw hi a phone a, "Aw boss, ka nei tawh e. Lungngai suh, North-East ah ka awm daih alawm...Mizoramah, tuman min man lovang." tiin phone chu a dah a, a simcard chu phawrhchhuakin a tichhe nghal bawk a.

*****************************

Lunch a ei zo chu pawnah hawi thawveng turin Daniel-a chu a chhuak a, "Duhzuali chu avan rawn thleng har reuh tak." tih nuah nuah pah chuan a hawi a hawi a. A bula thutthlenga lo thu, pitar ina a phone a news a ngaihthlak mek chu DAniel-a chuan a lo ngaithla ve reng a.

"August ni 21, 2022-a Japanese Scientist rual tena an siam, space gun, a hming Glowbracer tia an vuah ruk bo tak kha tun thlengin a rutu hi man chhuah hleih theih ala ni lova, nizan khan Japan sawrkar te chuan India leh US govt te nen meeting an nei a, Japan chauh nilo, khawvel pum tan hian a hlauhawm hle thu sawiin hma pawh chak thei ang bera lak zel an tum thu an sawi." tiin news ah chuan an rawn puang a.

Awih loh hmel tak hian Daniel-a chuan, "Space-gun aaaa ni...khawi lama space gun mah an siam chhuak tak tak lovang nge." tiin a lo khi suk a. REilote hnuah chuan Duhzuali pawh chu a rawn thleng ve ta, "Min lo nghak rei tawh em?" inthiam loh hmel tak chuan a rawn ti nghal a.

"Rei love, lunch ka lo ei zo chiah a." tiin DAniel-a chuan a lo chhang a. Customer an neih rih lem loh avang chuan restaurant chhungah chuan DAniel-a chuan a hruai lut a, dawhkan pakhat kilin an titi a. "Traffic a zam nasa lutuk a, ka rawn tlai deuh alawm mawle." Duhzuali chuan a han ti leh a.

"Eng thilah nge min biak duh a?"

"Aaa..englo ania, damdawiina min rawn kan bak kha chu kan inhmu leh ta miah silova.."

"Chuan..."

"Ihh..englo, thil mak deuh ka zawt ang che aw?"

"Eng mak deuh maw?"

Duhzuali chu a han hawi kual deuh zuk zuk a, "Hei...ihh, mihring ni tho si, mahse thiltihtheihna nei, mi danglam bik hi an awm tak tak i ring em?" a han ti zawi deuh sup a. DAniel-a chu a nui huk mai, "Enge awmzia? Super hero i tihna em ni?" tiin a zawt let daih a.

Duhzuali chu a nui deuh vur vur a, "Aw ni e, tiang deuh chu. Ihh..power nei tak tak ang hi...an awm i ring em?" a lo ti leh a. DAniel-a chuan ner deuh nung pah hian, "Ring lo mai nilovin chutiang a takah an awm thei lo tih te chu chiang sa alawm." a lo ti deuh hmuk a.

Duhzuali chuan DAniel-a chu chiang tak hian a en a, "I chiang chiah maw?" a han ti leh a. Daniel-a chuan mak a ti angreng kher mai, "Eng tak nge sawi i tum le?" tiin a han zawt let ve leh a. Duhzuali chu a khi sak a, "A chhan chu maw, keimah hi super hero chu ka nia lawm." a ti ta mai a.

DAniel-a chu a nui chhuak teuh ngei mai, "Duhzual, i fiamthu ami? I sawi tum chu min hrilh law law la, pehhel kual lovin.." a han ti chu Duhzuali chu a meng rum ta thut mai. DAwhkana fork pakhat chu a la a, a kutzung chalah chuan awlsam tak hian fork vawnna lam chu hrui ang mai hian a vet kual ta mai a nih chu.

Thir hlang, sak lutuk mai chu ti taka awlsama a vet kual thei mai chu Daniel-a chuan mak a ti em em mai a, a meng bial kawk kawk mai. Fork chu ava laksak vat a, "Engtin nge i tih theih?" tih pah chuan a boss-in a rawn hmuh hlauvin a thukru nghal vat a. Duhsaki chu a khi suk a, "Amak i ti tiraw? Nangpawn i thei ve tho ang chu..tinge mak i tih vak?" a la ti ta deuh deuh va.

DAniel-a chuan a han en vang vang a, "Keipawn ka thei ang maw? Duhzual, engthil nge sawi i tum min hrilh rawh." a ti chang ve ta fak mai a. DAwhkan chu bawhin Daniel-a chu a va hnaih deuh hret a, "Keimi...Keimi i ni tih ka hria. Chuan keipawh keimi ka ni ve tawh, nangma min pek a ni." a ti ta mai a.

DAniel-a chu a meng bial leh kawk mai a, "Nilo..a ni thei lo." a ti zawi sap a. A mumang chu ngaihtuah letin, "I thisen ah hian sakei thisen a tel ve tawh, nang hi keimi i ni kumkhua tawh ang." tia Keichala'n a hrilh lai chu a bengah chuan a rawn ri nawn awn awn mai.

A hrethiam ta, Duhzuali kha thisen a pe a, chuvang chuan ani pawh keimi a ni ve tih a hrethiam ta. "A nih chuan, a nih chuan nizana Sena chhantu kha...kha kha nangmah tihna em ni?" tiin a han zawt leh a. Duhzuali lah chuan a lu a lo bu nghauh va, "Ni e..kha werewolf kha tunge ni reng reng a?" tiin a la rawn zawt let zui a.

Daniel-a chuan a sawi hman teuh kher mai, a ka a ang zuau hman. Mahse sawi loh phawt chu tha in a hria a, "Ka hre lo." tiin a chhang ta daih a. "Engtin nge keimi ka ni tih i hriat?" tiin a han zawt leh a. "Ka hrilh ang che..mahse chumi hmain...enge i hming atan i phuah ve?" tiin a zawt leh ta daih mai.

Daniel-a chuan hriatthiam loh hmel tak hian, "Enga? Engtia hming phuah maw?" a lo ti hu mai. Duhzuali lah chuan, "Aww..ava mak tak. HEii..super hero name ang hi..keimi i nia, engtin nge i nick name i phuah?" a han ti leh chung chung a. DAniel-a chu a hawi a nasa mai, "Ele..Daniel-a a ni tawp mai." a ti leh hu mai a.

Duhzuali chu a ner nung mai, "Awii..ava han ho tak. Ka lo phuahsak dawn che ami? Mr. Tiger...Tiger King..Tiger-man...enge nalh i tih?" a han ti leh zuah zuah a. DAniel-a chuan chhan pawh a chhang tawh lo, a en tawp ringawt. Chutah amah bawk chuan, "Huiham...nei ve lo mai rawh. Mahse keichu keimi min ti ve miah suh ang che, hming special tawk ka nei, ka inphuah tawh." a han ti leh a.

"Engmaw? Enge chu chu?"

Intihtheih hmel tak hian a han hawi vah a, "Cat Lady...a nalh zia chu..i ti ve em?" a la ti hawr hawr zui. DAniel-a chuan a ei lo kher mai, "Enga? Cat LAdy a? ZAwhte amaw i inti em ni?" a han ti deuh thlawt a. "Tinge a nalh lo a mi?" a lo la ti tuau zui. "Nalh lo pawh ka tilo a, mahse cat te chu zawhte tihna ania?" DAniel-a chuan a lo ti leh hu a.

"Chupawh nise...zawhte ka ni chuang hleinem."

"Ni love, sakei i nih kha...tinge zawhte i intih si?"

"A unique em chu, a nalh bawk si. Chubakah maw..keimi a ka chan chuan sakei ai mah chuan zawhte ka ang lutuk."

"Tinge zawhte i an daih a?"

"Ka dum vek a, ka nalh rap a nimai. Bakah sakei pawh, sanghar pawh, sakei baknei, keite leh keipui pawh nise, cat family vek ania, a in ang vek alawm."

Daniel-a chu a han thaw deuh hak a, "Umm a tha e, cat lady chu ni mawlh teh. Mahse Duhzual, engmah sawi chhuak suh ang che. Mi tumah in kan nihna diktak hi an hre tur a nilo, chu chu min tiam rawh." a han ti a. "Lungngai suh..inzep te, mize thup te chu ka thiam zawng tak alawm." a lo ti leh ham ham mai.

"Chuan...engtin maw keimi ka ni tih chu i hriat a."

"Ka hrilh fiah vek ang che, a thui lutuk. Ihh..ka accident tuk zanah khan mumang ka nei a. Tah chuan in kangah hian ka lo awm a, ka lo tang mek a. ZAwhte tam tak hi an rawn kal a, min rawn hual thup a. MAhse ka harh leh nghal vat a, ka muhil leh thei tawh silo chu bathroom ah ka va inphih fai law law a, tah chuan ka kuttin te rawn seiin ngho te ka rawn nei a..."

"Chuan keimi ah chuan i chang tihna mi?"

"Aih...a tawp leh vek a. Ka mitvai leh engemaw vel mai mai a nih ringin ka ngaih ka ti tha lui a. Ka mu leh a, ka muhil thei ve mai a. Chuan nizan khan ka rawn call che a, ihh..nizan kha chu ka rawn call mai mai che, hehe. Chuan ihh..ka rawn call hnu che khan ka khua a sik vak a, hma deuhvah ka mut phah a. Tichuan ka mumangah chuan keimi pakhat kha hmu a, a hming chu Keichala a intia. Chuchuan engkim min hrilh fiah vek a, nangma nihna tak tak thlengin min hrilh vek a, i bulah ka nihna sawi turin min ti a, ka rawn insawi a nih hi. Chuan ala zo lo..ihh, ka mumang atanga ka harh khan ka taksa chu a rawn na vak a, ka kuttin te, ka ke tin te a rawn sei leh a. Ka taksa a rawn hmul vak a, tichuan keimi ah ka chang ve ta a ni. Ka room tukverh atangin ka zuang chhuak a, ramhnuai lamah ka tlan thla nghal a. Chinghne awmna kha ka hre nghal tawp, amak lutuk. Keichala khan min hrilh ni berin ka hria, keimah kha ka confi tawp a nimai." tiin Duhzuali chuan a sawi tui ngei mai.

Daniel-a chu a khi suk a, "Keichala bawk maw?" a han ti zawi deuh sup a. "Keimi-a i chang pawh ka la hmu lo ania, nakinah ka hmu ve duh ania aw.." Duhzuali chuan a lo ti leh zuah zuah a. DAniel-a chuan chhan ngaihna pawh a hre lo, "Keipawn ka hmuh tir ve ang che." Duhzuali bawk chuan a han ti leh a.

"Ka hna tan leh a hun tawh dawn a, kan inbe leh dawnnia." DAniel-a chuan a ti a. "Awle, keipawh ka kal ange...min rawn be ngei ngei ang che." tiin Duhzuali pawh chu a kal ta a. Daniel-a chuan a lu a dawm vawng vawng a, "Huiham...damdawiin pangngai ah khan lo kal pui law law ila, ka thisen kher pek a ngai lo nimai tur." a ti bul bul mai.

*****************************

Melody class bang chu a scooty lam a pan phei a, mahse ava thleng chu a scooty ke hnung a lo thep vek mai. Thinrim tak hian, "Tu mimawl lo tih nge mawni le? Engtin nge ka haw tak ang?" a ti nghal nuah nuah a, a mangang ru kher mai. Chutih lai chuan a bulah hian bullet bike pakhat hi a rawn ding a, "Ehe..Melody i ni em?" a kalhtupa chuan a rawn ti a.

Melody chuan a han en a, tunge a nih a hre ve tlat lo. "AW ni e, min hria em ni?" a ti hu a. Chupa chuan chibai pah hian, "Zorina ka nia, Zorinkima. DAniel-a thianpa...in thlalak hi ka hmu dun thin a, i chanchin a sawi ziah alawm." tiin a lo chhang a. Chupa chu tudang nilovin, chinghne-mi..Zorina ngei kha a ni.

Melody chu a nui a, "A nih chu...min la hrilh ve miah lova." a lo ti ve mai a. Zorina chuan scooty ke thep chu a en a, "Ting a? Engtia thep nge?" tiin a han zawt a. Ani chuan, "Ka hre bik lo, class ka bang kha ti hian a lo thep ringawt a." tiin a lo chhang a. Zorina chuan inla polite tak hian, "Aww..a ke thlawn ila, kan va siam tir mai dawn lawm." a lo ti vel a.

Inthlahrung tak hian, "Workshop a awm hla lutuk, kawnghnuaiah daih khan a awm." Melody chuan a han ti zawi sap a. "A ho emai, ka bike a awm alawm. DAniel-a pawh va hmuh ka tum hrim hrim a, kan kal rual nghal mai dawnnia." Zorina chuan a lo ti leh a.

"Umm...ka lawm ngawt ang." tiin Melody chuan a wrench pai vel te chu  aphawrh a, Zorina chuan scooty ke thep chu a thlawn pui a. Tichuan a bike hmang chuan an inphur a, an tlan dun ta a. A nihna takah chuan Melody scooty ke kha Zorina hawlh thep hi a ni a, a plan lawk vek a ni.

*****************************

DAniel-a pawh a haw ve ta, in a thlen hma chuan a ding chat mai. Tala chu a lo chhe tlat, rang lutuk chuan ava tlan phei nghal a. Inchhungah chuan lutin a han hawi kual a, mahse bungraw chhia vel engmah a awm lem lo. A room ah chuan a lut leh nghal a, chutah a lukham bula melody nena an thlalak lo awm a hmuh chuan a thin a phu nghal dup dup mai.

A la kang a, Melody lu chu pentui sen hian a lo inthai bial kuau mai a. Ama hmel zawnah chuan X tih a lo inziak bawk a, a bulah chuan lehkha them a lo awm bawk. Lehkha chu la kangin a han chhiar a, "CHHAS I NEI HMELTHA KHAWP MAI, PU SAKEI....A THIH I DUH LO A NIH CHUAN MIN RAWN ZAWNG RAWH." tih hi a lo inziak a.

DAniel-a chu a hlauthawng kher mai, "Nilo..nilo MElody." tiin a phone chu a phawrh nghal a. Melody chu a call a, mahse a ring quit thak thak mai. A call nawn leh a, mahse a ring quit zel. VAwi 10 vel a call naah phei chuan a tlang thei tawh lo, a mangang tawh takzet.

Pawnah chuan a chhuak a, a hawi kual a. Mahse a reh em em mai si, chutah a phone chu a rawn ri a. A han en chu Melody ngei a lo ni, rang lutukin a la nghal a. "Hello, Hello..Melody..." a ti nghal chiam chiam a. MAhse Melody chuan a rawn chhang lo, mipa aw daih a ni.

Tu aw nge a ni tih pawh a hria, Zorina aw ngei a ni. "Daniel..Daniel...tinge i va mangang awm ve a?" tiin a rawn nui huah huah a. Thinrim tak hian DAniel-a chuan, "Hey ZAwnga, khawnge Melody a awm? Khawiah nge i awm, ka lo kal ang tunah.." a ti khur khur a.

"Ni love...zanah zawk le. Zana chet kha a nuam alawm, tunah chuan i chhaste nen hian hun nuam tak kan han hmang ve rih phawt ange."

"Zorin, i chak dawn lo. Khawiah nge i awm sawi rawh..ka lo kal nghal ang."

"Amak tut tut emai, zanah ka tih kha. Chuan lungngai suh, keimi i ni tih hi ka hrilh miah lovang, a hriat i duh pawh ka ring lo. Umm...anih, bye phawt aw.." tiin phone chu a dah ta daih mai. DAniel-a chuan thinrim tak hian, "ZAwnga...i hre khawp ang, han ti na vaih teh." tiin  a inhrosa khur khur mai.

*********************

TO BE CONTINUE