KEIMI 2 : WHEN THE WOLF COMES OUT [MIZO FICTION SUPERNATURAL STORY] Written by : Aaron Malsawmdawngzuala Chapter - 2

 KEIMI 2 : WHEN THE WOLF COMES OUT

[MIZO FICTION SUPERNATURAL STORY]

Written by : Aaron Malsawmdawngzuala

Chapter - 2

*************************

Crime scene-ah chuan Pu Chhuma chu ava phei ve a, DAniel-a erawh delivery ti turin a chhuak thung a. Pu Rama nupui Pi Thangi chu a lo ang nasa ngang mai, "Tikhan in awih tawh em? Ka pasal chu hei...dawt anga in ngaih, sakawlh chuan a sehhlum der mai chu a nih hi." tiin mipui ho chu a lo an khum nasa mai.

Pu Chhuma a thlen veleh chuan SI Sawmtea chu a rawn kal nghal a, "Sir, a lan dan chuan ramsa seh hlum chu a ang viau va. Mahse a bul hnai velah hian eng ramsa ke hniak mah hmuh tur a awm lo." tiin chanchin chu a hrilh nghal zung zung a. Pu Chhuma chuan a han en kual ve thuak thuak a, kawmthlang lawka kham chu a en a.

A lo sang khawp mai lehnghal a, tichuan a bul vel chu  a en kual leh a. A thaw deuh hak a, "Ke hniak pakhat mah hmuh tur a awm lova, lamlian lam hi pan pawh nise a diak laiah hian lan awm tak ania." tih pah chuan kham chu a kawk a, "Helai kham atang hian a rawn lawn te a nih ngawt loh chuan ramhnuai lama tlanchhiatna tur a nei lo." a han ti leh nuah nuah a.

News reporter Zorina leh a nau chu camera nen an rawn thleng ve ta, Pi Thangin a hmu chiah chu a thinrim kher mai. A va pan a, "Nang mihring kha, ti hian i awih tawh em? Hei...mualpho taka i siam kha, hei hi thudik chu a ni. Tikhan i awih tawh em?" tiin a vin vak vak mai a.

Mahse police te leh thenawm nu ho chuan an lo dang hram hram a, Zorina lah chu a la zam lo nasa mai. Rum tak hian a melh a, "Anih i pasal chu a thi lai i hmu em ni? A sakawlh sawi nilovin khawi emaw a sihal seh hlum te pawh a ni thei a..." a la rawn ti ta deuh deuh va.

Pu Chhuma ngaihdan chu a ni ta vak lo, "Nang kha...hetah inhnialna rawn chawk chhuak suh, kal rawh." tiin a vin khur khur a. Zorina lah chuan ngeiawm tak hian, "Enge kei hi ka thiam loh a awm na? Keite chuan chanchin ngaihven tur leh ka hna a nih angin hna ka thawk mai alawm, inhnialna ka chawk chhuak lo." tiin a lo la hnial let zui a.

Pu Chhuma chuan chiang fek fawk hian, "Police te kan awm a, kan enfiah mek a nih hi. Sawlamah lo va phei la, min tibuai zawngin awm hlek suh." a ti vin leh thak mai a. Zorina chu a khi suk a, "Heh...khi pitar khian min rawn hnial ringawt anih kha.." ala ti ta deuh deuh va.

"I tawng hnem khawp mai, saw lamah lo va kal rawh." ring deuh taka Pu Chhuma'n a han vin leh tak hrep hnu chuan a kal ve ta a, mahse a hmel ah chuan zamna chhe te mah a la awm chuang lo. A nau Kimkima lah chuan engkim mai chu camera chuan a lo record hman vek a, crime-scene sir lamah chuan camrea on-in Zorina chuan, "Welcome to my channel." ring tak tak chuan  ala ti vak vak zui a, mipui ho chuan an en duh kher mai.

*************************

"Daniel, scooty hi installment a pek tur pawh in la mai rawh ka tih chu, delivery ti turin ke in scooty hmang turin i rawn kal a, zan rei tak tak ah i haw ve thei chauh va, chutah pawh scooty rawn dah leh a ngai a, ke bawkin i haw leh a, i hun leh i tha a heh lutuk ang." tiin Pu Zira chuan Daniel-a chu a hrilh a.

DAniel-a erawh chu a khi suk a, "Nilove, adang mamawh ka ngah thei sia. Ke a ka haw hi chu ka chau ngai lo, a ho lutuk." tiin a chhang a. Delivery ti tur chuan in enge maw zat chu a han kal kual leh a, a thil deliver hi cake a ni a, Pu Zira hian a scooty a hman tir thin a ni.

A haw lam chu nula pakhat hian a hnung lam atang chuan muang chang hian scotty a rawn khal phei bauh bauh va, Daniel-a chu ava hawi let a. Chu nula hnungah chuan chak lutuk tak mai hian bike hi a rawn tlan fua mai a, DAniel-a chuan a en reng a. Chu bike chuan a rawn lehpel a, a hnaih em avang chuan nula chu a buai ta mai a.

Lamlianah chuan a thal tawp mai a, helmet a lo khum bawk si lo nen. Lamlian ah chuan a lu chu a tauh ta pawp mai a, nikhaw hrelovin a awm der mai. Chupa lah chuan din a tum lo, a la tlan tlang daih zui a. Daniel-a pawn tihngaihna mai a hre lo, chupa lah chuan DAniel-a pawh chu a rawn su lek lek mai.

Daniel-a thinrim chuan a ngur khum vak  a, a ha pawh a rawn hriam hman. Mahse nula chu a ngaihtuah deuh avang chuan  a umzui duh ta lova, nula lam pan chuan ava tlan phei a. Lamlianah chuan thisen a lo kawi nuai mai a, chu nula lah chu a hmel en pawhin ala naupang tih a hriat em em a.

A hnar atang chuan thisen a chhuak a, a lu a pawp bawk. Thisen pawh a lu pawp atang chuan a lo la luang chhuak reng a, Daniel-a chuan a hup ping nghal a. Chu nula chu a sawi vak vak a, "Thiannu, thiannu...i harh em?" tiin a be mawlh mawlh a, mahse chu nula chuan a chhang thei tawh lo.

Daniel-a mangang chu a hawi kual a, "Engtin nge niang...enge ka tih ang?" tiin a phi ruai mai. Chunu scooty lah chu a chhe hneh em em mai si a, khalh chi zia zang a ni tawh lo. Daniela chuan chu nula lu a hliam chu a la hup reng a, a ziaawm deuh hnu chuan a rawmawl phawrhin thisen te chu a hru fai a.

Tihdan tur a han ngaihtuah vang vang a, motor lah a vang bawk si. ZAn a lo rei ve tawh bawk si nen, taxi hman tur emaw, police emaw call a, lo nghah leh chhung a chu a rei dawna a hriat avang chuan nula chu a pawm nawlh a. Keimi ah inti changin hospital lam a pan pui ta a, mahse kawngsir thim lai zelah chuan a kal a.

*********************************

Hospital chu reiloteah a thleng a, gate bul ah chuan mihringah inti changin chu nula chu a pua a. Gate vengtute pawh chuan an lo luh tir nghal vat a, tichuan casualty ah an tlan luh pui a. Vanneihthlak takin a hun takah operation an nei thei hlauh mai, Daniel-a chuan a nghak ngat ngat a.

Chutah hmanhmawh em em hian nurse pakhat chu a rawn chhuak a, "Thisen a mamawh, a blood group hi O negative a ni a, mahse thisen stock sa kan nei tawh lo. In chhungte emaw blood group O negative nei an awm chuan a tlai hma hian phone vat rawh. Thisen a hloh hnem lutuk a, a chau chhe mai ang." a rawn ti ta chung chung mai.

"Enga? Thisen stock sa a awm lo a?"

"Tlangval, hei hi private hospital a nih hi.."

DAniel-a chuan a han ngaihtuah a, chutah a blood group chu O negative ve tho a ni tih a hre chhuak ta thut a. "Keimah hi O negative, ka lo pe ang." a ti nghal vat a. Tichuan chu nula, a hmelhriat ngai pawh ni lo chu a thisen a pe ta a. Mahse Daniel-a'n a ngaihtuah hauh loh chu a thisen ah khan sakei thisen a bet tel ve tawh tih hi a ni.

Chu nula pawh chu a tha chhuak thei ta, mahse a la harh lo. A thluak a khawih pawi pha lo hlauh va, a lu vun a lo pawp thuk deuh leh thisen a hloh hnem deuh chauh mai hi a lo ni a, ruh tliak leh thildang serious engmah a awm lo hlauh. Nurse chuan Daniel-a chu pawisa chawi zat tur vel te chu a hrilh a, a tam tham em em mai lehnghal.

Tihngaihna vak a hre si lo, a hmelhriat a nih loh thute chu a sawi a. Pu Chhuma phone-in Pu Chhuma chuan a rawn chinfel sak thei a, Daniel-a pawh a haw ve leh thei ta hram a ni. Pu Chhuma rilru pawh a hah thuah hnih khawp mai, DAniel-a keimi a ni tih a hre bawk, sakawlh lah a awm tak tak a nih ta hmel ropui bawk si a.

****************************

A tuk zingah chuan DAniel-a chu a phone ri chuan a ti harh a, number hriat loh atangin a ni. A mit nuai pah chuan, "Hello?" tiin a han ham bui bui a. Phone ami chu hmeichhe aw a lo ni a, "Hello Daniel Lalhriathlua i ni em aw?" tiin a rawn zawt a. Hrethiam lo tak hian, "Aw ni e, enge ni?" tiin a zawt let hu mai a.

"Ka hming chu Lalduhzuali a nia, nizana accident...damdawi in thlenga i hruai kha, keimah ka nia." a rawn ti chu Daniel-a pawh a harh kawk mai. A thu chhuak nghal a, "Ehe..nangmah maw? I tha em? I harh thei chu ava lawmawm ve..enge i an?" a ti nghal chiam chiam a.

"Ka tha alawm, lawmthu hrilh che ka duh a. Mahse phone atang ringawt chuan a tawk lo deuh ka tia, hei..ka nu leh pate pawhin an hmu duh che a."

"Aaa...ka tih tur ania, kha te chu....i dam chhuak a, i tha bawk a, a lawmawm a ni mai."

"Kan hmu duh hrim hrim che alawm, khawngaihin i lo kal thei angem?"

DAniel-a chuan sana a han en a, dar 6 leh a chanve vel a lo ri tawh a. A hma zanah a chau deuh nge ni, zing walk turin a tho lo tlat. A han ngawi vang vang a, "Umm...mahse dar 10 ah hnaah ka kal vat a ngai dawn a, ka awm rei thei lovang." tiin a chhang a.

"Aw a pawi lo, reilote a nimai. I lo kal hrim hrim kha kan duh a, lam i ngaih pawh in taxi rawn hmang la, kan lo pe mai ang."

"Aa..chutiang a ngai hleinem, ka lo kal ange...damdawiinah tho ami i la awm?"

"Aw...i lo thlen dawnah min lo call dawn nia."

Phone chu an dah a, "A dam chhuak thei hlauh chu ava tih zia em." tiin a phun sap a. A inbual fai ser sawr hnuah chuan a insiam mawlh mawlh a, damdawiin lam pan chuan ke-bawk chuan a kal leh ta ngat ngat a. Keimi ah inti chang kher lo mahse Daniel-a hi sakei ang chiahin duhtawka chakin a tlan thei a, a rim hriatna pawh a tha hle bawk.

**************************

Pu Chhuma pawh zing kar atang chuan a buai leh cher cher khawp mai, Daniel-a'n a puih nula, Lalduhzuali chungchangah khan a chhungte a han hre chawp leh nen, hnuchhui mek a nei bawk, Daniel-a nu leh pate tual thihna case lah ala zo bawk si lo nen, a mu mang ngai lo a ni ber.

Hmasawnna lah a awm mang ngai bawk si lo nen, a beidawng ve thin khawp mai. Zorina video chu a viral leh ta chiam mai a, Pu Rama thih zan la la khan a channel lamah a lo upload leh hman thawt thawt chu niin. Mahse tan tu a nei mang tawh hauh lo, thenkhat chuan rawn support viau mahse thihna hial a thlen tawh avang leh ramsa seh hlum ni a ngaih a nih tawh bawk si avang chuan ngeitu a ngah zawk tawh hle a.

Zing dar 7 rik hma chuan Police Station-ah a awm leh der tawh mai, a office kawngka chu an rawn kik karh karh a. "Lo lut rawh." tiin a lo chhawn vat a, SI Sawmtea a lo ni. A dawhkanah chuan file pakhat rawn dah in, "Sir, doctor a lo kal a." a han ti zawi sap a.

A sawi zawh rual chuan Doctor chu a rawn lut a, "Post mortem result kan peih fel nghal a, ka pu." a rawn ti a. "Aw...animaw...ava lawmawm ve, in bei hma kher mai." tiin file chu a han en kual vel a. "Hamna hnuhma a awm a, ramsa chu a ni ngei a ni. A ang ber chu uikawlh deuh seh hlum emaw, sihal emaw niin a lang." tiin doctor chuan a han sawi chhunzawm leh a.

Pu Chhuma chuan doctor chu a han en deuh hu a, "Tinge sihal emaw ui..tinge anni khre? Sanghar emaw, savawm emaw pawh a ni thei tho va." fiamthu ti tak deuh chuan a han ti a, a khi deuh suk bawk a. Doctor chuan a lu thingin, "Nilo Sir, savawm chu nise a hmai a tum ngei ngei anga, chubakah savawm hamna a ang lo. SAnghar lam chi hrim hrim pawh a ni lo, kan expert neih ve chhun te chuan sihal emaw, chinghnia emaw a ang an ti." tiin a chhang leh a.

Pu Chhuma chu a han ngawi vang vang a, "Engtia hma han lak chi nge maw ni dawn le awww?" a han ti vawng vawng a. Sawmtea chu lo inrawlh vat in, "Sir, hmanrawn chikim nan a zawn a zawn mai chu a ni lo maw le te ka ti.." a lo ti ve a. MAhse doctor chuan, "Nilove ka pu, ramsa kawlh tak a nih chuan chutia police ina lo zawn chi a ni lovang. An veng tlangval te pawn chempui nen zuk chang mahse a chi vak chuang lo, tiangah chuan professional dik tak ho kan chet tir a ngai ang." a lo ti ve daih thung a.

*******************************

Daniel-a chuan hospital chu ava thleng a, Duhzuali te nen chuan an inhmu a. Duhzuali nu leh pate chuan lawmthu an hrilh mawlh mawlh a, chhungkaw khawsa thei tak an lo ni lehnghal a. Pawisa te pek an tum a, mahse Daneil-a chuan a la duh hauh lo. Duhzuali berin a tihluih tlat si avang chuan a la ta a, mahse an pek tum zat zawng zawng erawh chu a la duh chuang hauh lo.

Duhzuali chuan DAniel-a chu a  ngaisangin a vawikhat hmuhna atang chuan a ngaizawng nghal em em mai lehnghal a, DAniel-a pawh chuan nel tak chuan a be ve mai a. Mahse ngaihzawng ang chuan a en hauh lo thung, a chhan chu Melody ala hmangaih reng vang a ni.

A then nachhan pawh a duh tawh loh vang ni hauh lovin, mihring pangngai a nih ve tawh loh vang zawk a ni. Keimi a ni a, a keimi nihna avangin a nu leh pa te a chan phah a. A hmelma tawn vawikhatna pawh khatiang khawpa mi hlauhawm kha an ni a, chuvang chuan Melody chu dinhmun derthawnga dah a duh loh vangin a kalsan ta tawp zawk a ni.

Duhzuali chuan Daniel-a a kal haw leh hma chuan thla te a lakpui a, Daniel-a pawh chuan a lo duh ve mai bawk. Pawn thleng chuan an inthlah a, Daniel-a pawh chu a haw ve ta a. In a haw veleh chuan chaw a ei sawk sawk a, hnathawk turin a chhuak ve leh ta a ni.

Duhzuali chuan Daniel-a chu a vei zui em em a, amah chuan a nui leh ver ver thin a. Hmeltha a tiin pa a han ti hliah hliah khawp a, a mitthlaah chuan a cham nghal vawng vawng mai. MAhse DAniel-a thisen chuan a taksa chu engtiang takin nge a khawih danglam dawn tih a hre hauh lo, a hma hun engmah a hre der mai si lo.

*******************************

Chhun dar 12 a ri tep tawh a, office chhunga Pu Chhuma leh SI Sawmtea an titi mawlh mawlh lai chuan kawngka chu a rawn inkik leh karh karh a. Pu Chhuma chuan lo lut turin a hrilh a, constable pakhat hi a rawn lut a. "Sir, ruang dang hmuh leh a ni." a rawn ti ta mai a.

Pu Chhuma leh Sawmtea chu an in en hu mai, "Khawi lai hmunah?" tiin a zawt let nghal a. "MFC Builidng bula zunin hnungah khan, mipa ruang an tia...tun lawk khan report kan dawng." tiin constable chuan a chhang a. Pu Chhuma chu a han ner sak a, "Ava buaithlak thin em...eng ramsa phiangsen nge maw a nih le?" a ti nuah nuah a.

Chutah a lu a bu nghat a, "Umm...motor lo va start ula, Chuan...Sawmte nang...kan doctor te i lo phone bawk dawn ania." tiin a lukhum chu a han khum tha te te a. Hna thawk tur chuan a chhuak leh ta a, reloteah an thleng a. Crime-scene vel chu a han en a, ruang chu hmuh a hrehawm kher mai.

A bul lawk chu kham a ni lehnghal a, building hma lam lah lamlian larsar lai a ni bawk si. Chutia ramsa hlauhawm tak ni si chu engtin nge, khawi atangin nge a lo kal thin ang tih chu Pu Chhuma rilru tibuaitu ber a ni. Chutah kham lam chu a hawi thla leh a, a sang em em mai lehnghal.

Sawmtea chu a en a, "Enteh Sawmte, building sir vel hi han en la. Sang tak takah a inhung thuah a ni a, mihring pawh nise, ramsa pawh nise, an suchhia a nih ngawt loh chuan lawn liam ngaihna a awm lo. Chuan building hma lam lah nise, kawngpui an a nia, in tam tak a awm bawk." a han ti te te phawt a.

Hriatthiam loh hmel tak hian Sawmtea chuan, "Enge sawi i tum ber ni a, Sir?" tiin a lo zawt hu mai. Pu Chhuma chuan kham chu a kawk leh a, "Kham atanga a rawn lawn chho thei te a nih ngawt loh chuan, rawn kalna tur dang a nei lo. A hma a Pu Rama thih naah pawh khan, kham atanga a rawn lawn ngei ngei a ngai." tiin a chhang a.

Sawmtea chuan a lu chu a hiat nauh nauh va, "A thih hun niawm ang kha nizan dar 10 hnulam vel niin doctor te sawn an sawi a, zan a rei ve deuh tawh bawk nen. Building hma lam atang sawn a chhuak ve mai anga, tuman an hmu lo aniang. CCTV footage check dawn lah in a awm bawk silova, tuma hmuh hma in a pit bo leh hman aniang." a lo ti ve nuah nuah bawk a.

MAhse Pu Chhuma chuan a lu a thing a, "Aih...chutiang ngawt a ni thei lo. Helai vengah hian zan dar 11 pelh hnuah pawh mi an la tei huat huat thin, kha ramsa kawlh kha an hmu em em ang, dar 10 vel chauh ala nih phei chuan." tiin ruang chu a han en leh a.

Kum 20-25 vel bak a nih ala rinawm loh, ft 5'7 vela sang a ni a. Ngo lam, sam buk lam niin a hmeltha vak bik lem lo bawk. A dul chu a kaw deuh hung a, a ril pawh a chhuak pur a. A tir kha chuan puanin an khuh a, mahse mipui an hnawh kian hnuah an la sawn leh chauh a ni.

Ruang hmu hmasa bertu te chu Pu Chhuma chuan  a han kawm chiang leh a, midang dang chu zawhna a zawt a, mahse amah chu tunge a nih chiah an hre thei mai lo. Pu Chhuma chu a han inngaihtuah vang vang a, chutah a rilru ah Daniel-a a rawn lang hlawl mai.

*******************************

DAniel-a chuan restaurant pawn lam tukverh chu a hrufai mawlh mawlh a, a bul lawkah chuan police motor chu a rawn ding a. Mak ti tak hian a en hu a, Pu Chhuma chu motor atang chuan a rawn chhuak a. Daniel-a chuan a thil tih lai chu tawp san meuhvin Pu Chhuma chu a en a, "Enge maw a rawn tih dawn le?" tiin ama hriat tham leh chuan a phun sap a.

Pu Chhuma chuan a rawn pan hnai a, "Daniel, kan inbiak lawk angai." a rawn ti a. Daniel-a chuan hrethiam lo tak hian, "Engthilah maw?" tiin a lo zawt let hu mai a. Pu Chhuma chu a han thaw hak a, "In pu khawnge, ka lo sawifel sak ang che. A pawimawh tlat, kan inbiak angai." tiin a chhang a.

Tichuan restaurant neitu chu Pu Chhuma chuan a han hrilh fiah a, tichuan Pu Chhuma nen chuan chu restaurant ah vek chuan inhma tawnin an thu dun a. Pu Chhuma chu a han hawi kual zeuh zeuh va, "Enteh Daniel, keimi ah i chan khan...khamah i duh duh danin, emaw..ih..hei, awlsam deuhvin i lawn pawp pawp thei em?" zawi deuh tak chuan a han ti su su a.

Daniel-a chu  a hawi a kher mai, "Maw? Ihh..aw, thei e. Mahse, tinge min zawh?" a han ti leh hu a. Pu Chhuma chuan a aw a han thian deuh kharh a, "Tunah hian ruang dang hmuh a ni leh tawh a, Pu Rama thihdan ang tho kha a ni. Hliam zawng zawng nen, a inang vek." a han ti leh a.

Daniel-a pawh chuan mak a ti kher mai, "Anih chuan tinge khama lawn chungchang vel chu min zawh a?" tiin a han zawt leh a. "A chhan chu Pu Rama ruang awmna bulah khan kham a awm a, a bak chu ramhnuai atanga rawn kalna tur kawng a awm lo. Chutiang bawkin tuna kan ruang hmuh saw, MFC building hnungah a ni a. Zunin hnung atanga kham atang lo saw chuan ramhnuai pilril atanga rawn kal ngaihna a awm lo, hmundang chu khawlai, a langsar lai vek a ni." tiin a chhang a.

DAniel-a chu a ngawi vang vang a, "Anih chuan min ringhlel tihna em ni?" tiin a han zawt leh a. "Ni love, ni lul love. Ka sawi tum zawk chu....nangmah ang hi midang an awm ve a nih ka ring." a han ti chu Daniel-a chu  a ner sak mai. "Ni love, Pu Chhum. Keichuan mihring sa ka ei ngai lova, mi ka that ngai lo. Ka sawi tawh kha, keimi nihna ringawt ka nei a, sakei ka ni lo." a han ti zung zung a.

Pu Chhuma pawh chuan han sawi mai tur a hre bik vak lo, "Aa..nangmah ang lo takin a sual zawngin a che pawh a ni thei tho mai. Engpawh chu nise, min puih ka ngai a ni." a han ti leh a. "Engti zawngin maw?" tiin Daniel-a chuan a lo zawt leh a. A chhan hma chuan Pu Chhuma phone chu a  rawn ri a, "Aw Hello Sawmte, engmaw? Ruang kha tunge a nih in hre tawh amaw? Awle, ka lo kal e." tiin phone chu a dah a.

DAniel-a chu a han en leh a, "Nangmah ang hian mihring ni bawk, ramsa ni bawk hi an lo awm ngei a nih chuan, nang hian min puih ngei a ngai ang." a han ti leh a. Daniel-a chuan a chhang lo, "Ka kal phawt ange." tiin a kalsan ta a. Daniel-a chuan a enzui vung vung a, a hna chu a thawh zawm leh nghal a.

******************************

Duhzuali pawh in lam pan chuan an haw ve ta a, Daniel-a chu text nghal vak vak chu a chak a. Mahse a ning nghal vat mai ang tih a hlau ve deuh bawk si nen, a insum hram hram rih a. In an thleng a, motor atanga a chhuk chiah chu an zawhte dum chuan a rawn pan nghal a.

Mahse Duhzuali a en chiah chu a ding chat a, "Awii...bawihte min lo ngai tawh em.." tih pah chuan pawm a tum a. Mahse zawhte chuan a lo duh hauh lo mai, a ring a ti san vak a. A hmul a ti ding ur ur a, a th(r)en khum ta vak mai. Duhzuali pawh chuan mak a ti kher mai, "Ehe..tinge khatia min tih a?" a ti hu mai a.

Zawhte lah chu a tlan daih leh nghal, "A van mak em em..enge maw a hriat le?" a ti nuah nuah a. Mahse han ngaihthat loh na em em chu a nei chuang lo, inah chuan an lut a. Apa chuan, "Bawihte, tunah na i la nei em. I taksa te kha a sil ur lo maw...mu hahdam leh nghal la." duat tak chuan a han ti a.

Duhzuali chu a lu pawh bandage in a la intuam bur a, a han khawih chhin a. A han zi mar vel a, "Aahh...engmah na ka neih pawh ka hre tawh lo." tiin mak a inti kher mai. Anu chu a lo khi suk a, "A vanneihthlak khawp mai, kha..thisen mamawh hian khawp kha i nia, mahse hei vawiinah kan chhuak thei nghal amai chu ania, nikhaw hrelo khawpin i awm bawk si nen, a mak ka ti letling zawk e a." a lo ti ve bawk a.

"Nia, doctor te pawh khan mak an tia lawm. A bp nen, engkim an check khan a dam leh phian bawk sia. Thisen pek hnu khan i rawn tha deuh thut an ti in ka hria, i la nawm loh ka rin tehreng nen." tiin apa chuan a lo sawi chhunzawm ve bawk a. "Ti daih ila, kha tlangval kha a fel ngawt mai. Ke ngatin a han paw thleng thak che ania, a lakah bat tam tak kan neiin ka hria." anu chuan a lo ti ve leh a.

Apa pawh chuan lo sawi chhunzawm ve leh nghal in, "Nia, tlangval Pathian t(r)ih mi tak a niin ka ring, kan tawngtaina Pathianin a chhan rual rualin, khapa kha awm lo se chu a chhe ber pawh kan tawng thei reng ania. Chaw eiah te la sawm ila a tha ang, amah hrim hrim kha hriat chian ka duh." tiin a lo tuihnih veleh a.

Chutia Daniel-a chungchang a nu leh paten an han sawi vel leh, an han fak chiam te chuan a ruk tak chuan Duhzuali chu a ti hlim ngei mai, a sirah chuan lehlam hawiin a lo thu nui vur vur mai. Duhzuali hi fanu mal a ni a, a nu leh pate hian an duat hlum lo chauh a ni.

"Thlah leh ngai hi chu lo leng tawh lo se a tha ang, kha...tlema tlemah kan chan lo chauh che ania." tiin anu chu a han ri deuh hlur a. Duhzuali hi a hma zan khan a thiannu rawn leng chu anmahni scooty bawkin a thlah a, a haw lam kha a accident ta a ni. Daniel-a kha chu awm lo se, a hmunah khan a thi ngei ang.

**********************************

Tlai a lo ni a, Daniel-a pawh a bang ve leh tawh a. Ke chuan a haw leh hnak hnak a, tlai dar 4 a pel tawh. Chhun lama Pu Chhuma thusawi te chu a bengah chuan a ri nawn mawlh mawlh a, a awm a ti nuam chiah bik lo. Amah anga mihring ni bawk, ramsa ni bawk chu an awm ve tak tak a ring deuh hial a.

A lo inngaihtuah muk deuh nge ni, tu emaw nen chuan an insu palh a. A phu nasa kher mai, "Ka tihpalh..ka tihpalh lutuk." tiin thupha a chawi nghal mawlh mawlh a. A han hawi chhuak chiah chu a ngawi nghal hmak mai, a bialnu hlui Melody a lo ni reng mai a.

DAniel-a chuan a en reng ringawt a, han biak mai dan tur pawh a hre lo. Chutiang bawkin Melody pawh chuan a en reng a, "DA..Daniel..nang maw?" a ti hu mai a. Daniel-a chu  a lai lek lek zawk hial a, "Ee..Melo..nangmah i ni maw? Ihh...i dam maw?" a han ti bah nuai a.

Melody chuan rum tak hian a melh a, "Tinge ka number i delete?" a han ti vin deuh hlur a. Daniel-a chuan a chhang lo, chhan ngaihna pawh a hre lo. Melody bawk chuan, "Tinge i reh hmak kher a, min then i duh chuan tha takin i sawi mai thei lo em ni?" a han ti vin leh hlur a.

"Ka..ka tihpalh. Englo ania, ihh.."

"Aw...sawi rawh, enge englo?"

"Ih..ka tihpalh takzet. Ka rilru hi a buai vek a, chuvang chu mawle."

"Ka hria, i tawrh nat dan tur pawh ka hria. Mahse tinge ka nu thihnaah pawh i lo kal loh? Chuan tinge min rehsan hmak kher a? Min hua ami?"

Daniel-a chuan han chhan mai ngaihna pawh a hre lo, "I na tih ka hria, i khua a har tih pawh ka hria. Mahse chumi hnem tur che chuan kei hi ka awm alawm, min duh tawh lo ami?" tiin Melody bawk chuan a han zawt leh a. Daniel-a chu a thaw hak a, "Nakinah kan inhmu leh dawnnia, ka hmanhmawh tlat." tiin a kalsan daih mai.

Melody pawh chuan a au zui tawh lem lo, a kal liam thleng chuan a en zui vang vang ringawt a. A mittui a tla zawih zawih mai, "Misualpa." a ti deuh tuau a. Melody leh Daniel-a te hi an veng hi a inhlat ve angreng a, Melody nu thih hnu atanga an vawikhat inhmuh lehna chauh a ni.

*********************************

DAniel-a chu inah a haw a, rang a bawl leh nghal sawk sawk a. A zawh meuh chuan dar 8 a ri der tawh, tlai takah chuan chaw chu a ei a. A ei zawh hnu chuan thleng te chu a silfai leh a, inchhung vel a phiah fai lai chuan kawngka chu a rawn inkik dat dat a. "Lo lut rawh." tiin a lo chhawn vat a.

A inluah mek neitu pa, Pu Peka a lo ni. "Chaw i ei kham ve chiah elaw?" a rawn ti lut nghal a. Zah tak hian DAniel-a chuan, "E..Pu Pek, nang i ni maw? Lo lut rawh, lo thu rawh." tiin a lo be nghal mawlh mawlh a. Mahse Pu Peka chuan, "Ngawi teh, thu hman pawh ka ni lo." tiin a lo chhang daih mai.

"Engthilah nge i lo luh ve mial a?"

"Inluah man hi, han sawi vak hi nuam ka ti bik lo ania. Mahse, hei thla a tharna pawh kar 2 dawn a ni leh tawh a. I pe tlai thei sia, thla hmasa lah kha ka tlawm tawh bawk che a."

"Nia Pu Pek, tunlai chu hlawh kan la tha mumal lova. Min lo hrethiam leh hram phawt mai la, kar leh ah ka pe vek ang che."

"Luah duh, ngam sang tak tak hi an kat ve nuk ania. Ka khawngaih che a, ka luah tir hram hram che a nih hi."

"Nia, ka hria alawm. Ka lo buaipui vat vat ange, min hrethiam hram teh."

"Ka huat vang che a sawi ka ni lo ania, umm..ka kal phawt mai ange."

Pu Peka chu a chhuak leh nghal a, Daniel-a chu a thaw huai mai. Thutthlengah chuan a thu hnawk a, "Tuna Duhzuali te pawisa min pek hi scooty lei nana khawl ka duh bawk sia, hlawh lah kan la tlem bawk nen. Umm...pe leh phawt mai teh ang." tiin a phun nuah nuah a.

**************************

TO BE CONTINUE