KEIMI 2 : WHEN THE WOLF COMES OUT [MIZO FICTION SUPERNATURAL STORY] Written by : Aaron Malsawmdawngzuala Chapter - 3

 KEIMI 2 : WHEN THE WOLF COMES OUT

[MIZO FICTION SUPERNATURAL STORY]

Written by : Aaron Malsawmdawngzuala

Chapter - 3

***********************

Duhzuali chuan mu chungin a phone a khawih mual mual a, Daniel-a number chu a han hmet chhuak a. Call mai chu a duh rum rum a, mahse a inthlahrung ve deuh bawk si. Va biak hmasak chu a zak ve bawk si nen, mut pawh mu tha thei lo chuan a let a let ringawt mai a.

A chang leh a bawk khup a, a chang leh a thu chhuak thul. Video vel en mai mai a tum pawh chuan a rilru ah a lut thei chuang lo. Text tumin a han type hman zuai a, mahse a clear leh vel zel. Khumah chuan a han thu ngawi vang vang a, Daniel-a chu a mitthla ah chuan a rawn lang leh a.

A suangtuahna rama a chen lai mek chuan a khum bula bang ah chuan maimawm lian tak hi chak mangkheng hian a rawn vak a, Duhzuali chuan en miah lo chuan bangah chuan a nam chilh siah mai. Amah pawh chu a suangtuahna ram atang chuan rawn harh chhuak ni awm tak hian a phu deuh zuk a.

Muangchang hian bang chu a en a, engemaw rannung lian ve tak chu a nem pherh a ni tih a hria. Mahse khatia thildang daih a ngaihtuah laia bang a va ben thut theih dan kha amah pawh a inhrethiam lo, a kut a han la sawn chiah chu maimawm lian ve tak mai chu a lo nem pherh vek chu niin.

A au vak a, khum atang chuan a chhuk nghal a. A nu leh pate chu rawn tlan lutin, "Engthil nge ni vak vak?" tiin an rawn zawt a. Ten hmel tak hian maimawm lo pherh nuai tawh, chhuata let reng chu a kawk a. "Maimawm..awii ka hlau lutuk." a ti khur dar dar a.

A pa chu a ner suk a, "Aww..hei i vuak hlum tawh hi...enge i la hlauh va?" a lo ti a. Duhzuali chuan a kut chu hmuh in, "Hei...ka nem pherh vek alawm." tiin a uak deuh tuar tuar a. "Va sil rawh...tinge i kuta i nem reng reng a, i slipper in vuak hlum mai tur alawm. A lo seh thei che asin, fimkhur lo leh lutuk mai." tiin a nu chuan a lo zilh ve mawlh mawlh bawk a.

Mahse Duhzuali chuan a chhang tawh lo, room atang chuan a chhuak a. An silhmunah chuan a kut chu sahbon nen fai takin a sil a, "Engtik laiin nge kha maimawm kha a rawn vah chhoh ka hre miah silova, ka kutin ka lo nem bet lehnghal a, enge maw ka hriat ni?" a ti nuah nuah a.

*******************************

Chumi zan la la chuan Daniel-a chuan Duhzuali te pawisa, lawmthu sawi nana an pek chu inluah man atan Pu Peka chu an inah kalin a pe nghal a. A haw leh lam chu kawngsira waiting shed ah chuan tlangval pathum, rui zeta zu in pah a lo nui khek vak vak te chu a hmu a.

Ngawi reng chuan a kal pel mai a, zurui zinga pakhat rui pawr tawh si chuan a melh rum ni tlat hian a lo hre pek a, "Hey, nang naupang kha ding teh." tiin a vin tuar a. DAniel-a pawh chu a ding ve mai bawk a, "Enge ni ta?" tiin a hawi let a. Chu tlangval zurui chuan a va pan phei a, "Amak e aw...lo kal mai mai teh." tiin a thiante chuan an lo hau bawk a.

Mahse a pawr laklawh tlat, "Min melh rum ve khanglang elaw tunah khan?" tiin kawngpui chu an sawi emaw tih mai tur hian a kal pai nasa ngang mai. Daniel-a chu a thaw hak a, "Melh rum love...ka rawn hawi lo hrim hrim." tiin zaidam tak chuan a chhang a.

Chupa chuan  a han melh vang vang a, "Min cho mi?" a khan ti khur khur a. Daniel-a chu a khi suk ringawt, "Cho love, ka hmanhmawh deuh va, ka kal mai ange." tiin kal leh mai a tum a. Chu zurui ngaihdan chu a ni ta lo, DAniel-a kawr hnungah chuan a pawt vak a.

A khuai her sawk a, "Ve khanglang che chuan.." tih pah chuan DAniel-a hmaiah chuan a hnek ta siah mai, mahse amah zawk chu a t(r)e deuh that a, "Ana lutuk." tiin a kut chu a dawm vawng vawng mai. DAniel-a lah chu a lu a che sawn zeuh ringawt a, na ti awm ang pawhin a lang lo.

A thiante pahnih chu rawn tlan pheiin, "Ava buaithlak e aw...rawn phei mai mai teh." tiin pakhat zawk chuan an thianpa rui zet chu a pawt phei a. Inthiam loh hmel tak hian pakhat zawk chuan, "Thianpa, a rui lutuk a, lo hrethiam hram rawh aw...kan tihpalh a ni." tiin Daniel-a bulah chuan ngaihdam a lo dil ve bawk a.

Daniel-a chu a thinrim hman tep a, mahse a insum thei hram a. Za lo tak chuan a khi suk a, "A pawi love." tiin a kal leh mai a. Mahse chu zurui tlangval pawr zet chuan a la duh tawk lo, "I hmel ka chhinchhiah ania aw, Hmela. I nu leh pate awm lai pawh nise ka beng hreh miah lo che ania, min cho sual viau ang." tiin a la rawn ang pung pung mai.

Daniel-a chu a ding chat mai a, a nu leh pa a sawi tel kher chu a ngaihdan a ni lo kher mai. A mit chu a rawn sen rum mai a, "Engmaw i sawi kha?" tiin muang chang chuan a hawi let a. Chupa lah chuan, "Aw..aw..i nu leh pa pawh kha ka ben tel nghal loh." a la rawn ti ta deuh deuh va.

DAniel-a chu a insum zo ta lo, a va pan phei ve ta. "Amak e aw..ngaiw mai mai rawh." tiin pakhat chuan a lo khap leh a. A thianpa pakhat leh zawk chuan Daniel-a chu va panin, "Thianpa, kal mai mai rawh. Kan lo buaipui mai ang, a rui lutuk a..." a sawi zawh hma hma chuan DAniel-a chuan a lo vai pawp a, kawngsirah chuan a lum phei pawp pawp mai.

PAkhat leh zawk chu a rawn tlan phei a, "Ehe..Zawnga...ka thianpa kut i thlak amaw?" tiin hnek a tum a. Mahse Daniel-a chuan  akutah a lo man sak a, a hmer ta vak mai. Chu tlangval na ti lutuk chuan, "Min thlah rawh...ana...ana lutuk." tiin a au tuar tuar a.

DAniel-a chuan hnungzang ri dawt khawp chuan a keuh thal tawp a, tichuan a zurui pawr ber chu a va pan ta. Mahse a lo pawr tawh lo nasa mai, mak ti tak leh hlauh hmel tak hian Daniel-a chu enin a ding khur zawih zawih mai a. Hnai takah va kal chilhin a mitah tak chuan a en a, "Engmaw i sawi kha...ka nu leh pa chungchang kha han sawi leh teh, i ngam chuan..." Daniel-a chuan a ti ta khur khur mai.

Chupa chuan tawlh hnun hret hret pah chuan, "Ihh..ka..ka fiamthu a nih kha. Ka rui lutuk a, ka..ka ti tawh lovang." a ti chel chul mai a. Daniel-a chuan rum zet hian a melh a, "I va ruih tawh hmel silo ve..." tih pah chuan a sakei mitmeng sen rum mai chuan a en a.

Chupa hlau lutuk chu a tawlh dawr a, "Nilo..ram...ramhuai." tiin a tlanchhe chiam mai. DAniel-a chuan hnung lam a hawi leh a, a thiante pahnih pawh chu an tlanchhe ve nghal bawk. Daniel-a chu a thaw huai a, "Ka va han kham tak, heng ho hi chu..." tih nuah nuah pah chuan a haw ve thei ta hram a ni.

***********************************

Zanlai dar 1 a pel tawh a, Duhzuali chuan mumang mak tak mai hi a nei a. A mumangah chuan in kang hluah hlauh chhungah hian a lo awm a, amah lah chu tawnzau leh boxer bak a lo la inbel lo lehnghal a, ke lawngin a awm bawk. A hlau lutuk chu a hawi kual ruai a, mei alh lah chu a nasa em em mai lehnghal.

Chutak bang kil tin atang chuan zawhte dum lian tak, ha hriam em em mai te chu an rawn chhuak khawm ta mai a. Amah chu an en thap a, zawi muang hian an pan hnai zel a. Zawhte 50 chuang vel lai an ni ang, meialh pawh chuan engtin mah a kang miah lo bawk a.

Duhzuali chuan mak a tiin a hlau kher mai, ah hual thap lehnghal a. An rawn pan hnai zel a, "Nilo....kal bo ru. Kal bo rawh u....min rawn khawih hlek suh." tiin a han vin vak vak hlawm a, mahse engatan mah an ngai lo. A mangang bawk si chu, "Min pui ru." tiin a au ta vak vak ringawt mai a.

Mahse chhantu reng a nei lo, chung zawhte te chuan an hual zim telh telh a. Chutah an bawr rawn ta luai luai mai a, Duhzuali hlau lutuk chu a au vak vak a. A mumang atang chuan  a harh chhuak hlawl mai a, a meng kawk mai. A thaw hlawp hlawp a, a thlan a tla zawih zawih bawk.

Mumang a ni tih a hriat chuan a thaw huai mai a, a lukham te chu a lo huh vek a. A awm dawm meuhvin, "Awi..eng ang mumang nge ni ngai?" tiin a phun ri sup a. A ziaawm deuh hnu chuan a tho chhuak a, bathroom ah chuan a lut a. Zun ram a thiar zawh chuan darthlalangah in en in a mit te chu a han nuai a, a hmai a phih nghal bawk a.

A phih zo a hawi chhuak leh, darthlalanga a han inhmu chiah chu a phu nasa kher mai. A mit chu zawhte mit ang mai hian a lo hring nghulh mai a, a a ha a lo hriam hle bawk. A kuttin te chu a han en a, a lo hriam nasa mai. A mumang tho ala nih te a ring hial a, a mit te chu a han nuai leh thin.

Chutah a lu a rawn na vak a, a dawm vawng vawng mai. A beng a kiu vawng vawng a, mahse mak tak maiin thawk leh khatah a rawn reh vek mai. Muangchang chuan a meng a, darthlalangah chuan a han in en leh a. Engkim chu a lo pangngai vek tawh, a kuttin te chu a en leh a.

A lo pangngai leh vek tawh a, a hmel pawh a pangngai leh vek tawh. A thaw huai a, "Ka lu kha ka sawh khawlo deuh tak tak em mawni le?" tiin a phun sup a. A khumah chuan a let leh a, ngaih tha chiah lo chuan mutthilh chu a han tum leh a. A mut hma chuan a phone chu a phawrh a, Daniel-a nena damdawiina thla an lak dunna chu a han en a.

A nui suk a, "Naktukah chuan ka be hmasa tawh mai ang, mi biak a tum lo emai." tiin a han khi var var a, tichuan a phone chu dah in a mu ta a. REilo teah chuan a muhil thei ve mai a, minute 1 pawh a la ral lo tih ah chuan harh chuang silo chuan a rawn rum chhuak leh nghut nghut thin a.

A tal deuh sek bawk a, a lu te chu lehlam lehlam ah chuan a thle tawn deuh sek mai. A phu leh uih uih thin bawk a, a behsheet chu a kut pahnih chuan nghet tak hian a th(r)am a. A khur deuh der der reng bawk a, a phun leh deuh sup thin bawk. A che nasa tawlh tawlh a, chutah a rawn meng ta kuau mai a, a mitmeng chu a hring nghulh mai.

**********************************

Daniel-a chu zanlai ah chuan a harh kawk mai a, rang takin a khum atang chuan a zuang tho nghal. Rang takin a room light chu a on a, a hawi kual nghal vak vak a. Mahse tumah an awm lo, a thaw deuh halh halh bawk a. Engemaw tak thil dik lo a awm tih chu a hria, mahse engtin nge a hriat erawh a hre lo thung.

Ngaihthat lohna riau a neih avang chuan a tho chhuak a, pawnah te chuan a chhuak a. A hnar chu a han len a, a hlauh ang chiahin ramsa dang rim a hre thei a. A bul hnai velah ngei chuan a ni tih a hre bawk, a in chu a kalh sawk sawk a. A kawr phelhin a in hnung lam te chu a en kual a, mahse tumah a hmu bawk si lo.

Pu Rama sawi sakawlh kha, a awm tak tak a nih chu a ring nghet bur tawh. Fimkhur tak chuan kawthlang awih lampang step ah chuan a chhuk thla a, boruak chu a han hnim leh vang vang a. Chutah step mawng thim laiah thawm a hre ta, thla lah chu a eng bial kulh mai lehnghal a.

Thla ina a en phak chin laiah chuan ramsa ke ni awm tak, lian em em mai chu a rawn pen chhuak ta. Daniel-a chu a inring ran ran tawh kher mai, mit khap miah lo chuan a en reng a. Chutah Pu Rama sawi thin ngei mai, kha sakawlh lian leh rapthlak tak mai kha a rawn chhuak ta mai a nih chu.

Daniel-a chuan mak a ti em em mai a, tawng ngaihna pawh a hre lo. Chutah chu sakawlh chu a rawn tlan chho va, DAniel-a banah chuan seh in step ah chuan a tlan chhoh pui ta mai a. Step chang tak ah chuan DAniel-a chu a intauh chho bawrh bawrh a, kawngpui a thlen pui a, chu sakawlh chuan a vawrh leng lawp mai.

DAneil-a chu lamlianah chuan a tla ri thlawp a, a taksa chu na a ti kher mai. Mahse a thawh hma hma chuan chu sakawlh chu a rawn tlan phei leh a, a rawn tlan hnai telh telh a. A ke pali a rawn tlan chu a rawn thlen hnaih meuh chuan mihring ang mai hian a ke pahnih chauh chuan a rawn tlan tawh a.

Daniel-a chu a ding tha hman ve chauh tih ah chuan a rawn zuan vak a, lamlianah chuan a nam bet a. DAniel-a chuan theih tawpin a lo beilet ve a, mahse a hneh ngang lo. Sakawlh chuan a rek a, a thawh pui a. Boruak ah chuan a vawm hian a vawm kang leh ta vak mai a, a la hram vak vak zui bawk a.

Mahse Daniel-a chu leiah chuan a rawn t(r)um leh chat a, a nging deuh dut mai. Keimi ah a lo chang ve der tawh a, rum em em hian a rawn hawi chhuak a. Sakawlh chu a han thlek vang vang a, "Nilo, werewolf...chinghne mihring maw?" a ti nuah nuah mai. Chutah chu sakawlh chu a rawn tlan leh a, Keimi pawh chu a va tlan phei ve a.

Sang taka zuang dunin an inth(r)am nghal chawt a, lamlianah chuan an tla thum dun leh dup mai. An insual ta chiam mai a, an inhnehtawk thawkhat viau lehnghal. An lum phei dun tup tup a, a tawpah phei chuan bawlhhlawh paihna khamah chuan an lum thla dun ta daih mai.

Kham lah chu a sang phian lehnghal a, an lumthla thui dun vang vang khawp mai. A mawng an thlen meuh chuan mau hmunah an chhuak hlawl mai a. Chinghne-mi(werewolf) zawk chu a tho chhuak lehnghal a, mahse Keimi erawh a hliam nasa hle thung.

Muang chang chuan a rawn tho chhuak ve a, "Tunge i nih? Khawi atanga lo kal nge i nih?" tiin a han vin vak vak a. MAhse chinghne-mi chuan a chhang lo, van lam hawiin a u ruih ruih ringawt. Keimi chuan a lu a bu nghat a, "A tha e...i tawng ve thei lo a nimaw? A pawi love, tunge i nih ka hre tho tho ang." tih pah chuan a han hahum khum ve vak a.

Tichuan an insual leh ta a, an inpaih leng lawp lawp mai. Thingkung te chu tliak tep tep khawpin a ri leh rawp rawp thin a, mau tamtak an ti tliak remrum bawk a. An thawm a tha dun kher mai, Keimi chu a chan tha zawkah tangin a bul hnaia thing zar bung te leh lung lian tak tak te chu a hmang tangkai hle a.

Mahse a chan a tha rei hauh lo, a chhan chu chinghne-mi chuan tlawm mai a tum tlat lo. Chubakah na tak taka a khawih pawh chuan reilo teah a rawn tho leh nghal mai zel bawk si a, Keimi pawh chuan mak a ti angreng kher mai. Chutah Keimi thinrim leh ning tawh bawk si chuan a bula thingkung la lian vak lo chu a zung chawp nen a phawi lawk a, Chinghne-mi hmaah chuan a va khawh pawp mai a.

Mahse chu Chinghnia chuan lo bumin a thle zeuh va, thing mawng lam zawkah chuan a lo man chat mai. A va thlawh let ta daih mai a, Keimi awm takah chuan a ri dawt mai a, th(r)elret kung lian tak mai khi thawt khawp chuan a den chilh dawt mai. Na a ti em em a, a tho chhuak leh mai thei lo hial a.

Mahse a han hawi chhuak leh chu kha chinghnia kha a lo awm tawh miah lo, a han hawi kual nghal a. Mahse a thawm takngial pawh hriat tur a awm lo, hnunglam a han en a. Kham ah chuan a lo lawn chho mek a, a lo thleng sang hman tawh em em lehnghal.

ZAwi zawiin mihringah a chang nimai hian a hmu lehnghal a, amah pawh chu mihringah inti chang ve nghalin Daniel-a a rawn ni leh ta a. Chu chinghne kawlh sen lian tak mai chu kham ah chuan a lawn chhuak ta a, a thlen chho fel meuh chuan mihringah a chang daih tawh.

DAniel-a chuan a en zui vang vang a, mak a ti kher mai. A lu thak lo pui chu hiah nauh nauh pah chuan, "Mihring ve tho maw? Mahse..mahse engtin nge khatia werewolf a nih bik daih le? Enge ka lakah a duh? Tunge a nih ang?" tiin a inzawt mawlh mawlh a.

A tho chhuak a, a taksa chu a sil th(r)em th(r)um mai. A lawn chhohna tur kham sang tak mai chu a han en chho vang vang a, "Chu ui hmelchhe phaka mai mai chuh...ka va han lawn chho peih lo tak. A chak phian lehnghal a, kan la intawng leh khawp ang." tih pah chuan keimi ah intichang lehin khamah chuan a lawn chho ve ta a.

*************************

A tuk zingah chuan duty tur chuan Pu Chhuma chu a insiam mawlh mawlh a, a chaw eitur chu Melody chuan a lo siamsak mek bawk a. A siam zawh hnu chuan Pu Chhuma chuan hmanhmawh hmel tak chuan a ei zung zung a. A eilai chu Melody chuan a lo en reng a, "Pa..thil zawh che ka duh." a han ti a.

"Enge ni min zawt la?"

"Daniel-a nen in inhmu fo thin ang tiraw?"

Pu Chhuma chaw eilai chu a han tawp deuh dat a, "Aw hmu thin e, a nu leh pate case kha khar a la ni lo hrim hrim alawm." tiin a chhang a. Melody chu a ngawi vang vang a, "KA hmu ve duh, sawi duh ka ngah lutuk." a han ti zawp sap a. Pu Chhuma chu a thaw deuh hak a, "Bawihte, a dinhmun saw hrethiam ta che. A nun saw a hlim lo, ti sawn a duh ang saw amahin awm tir mai mai rawh." tiin zaidam tak chuan a hrilh fiah a.

"Keipawh ka hlim bik chuang hleinem, nangpawn engtin emaw tal lo sawi la...tiang ringawt te chuan, a hrehawm ka ti alawm."

"Engchu maw ka hrilh anga?"

"Ka hrelo, tinge hetia min kalsan tawp nachhan hi lo zawt rawh."

"Bawihte, i tana tha zawk tura kalsan che pawh a ni maithei asin."

"Enge a nihna ngawt tur? A pawi sawi ka nei em ni?"

Pu Chhuma chuan han chhan mai dan pawh a thiam lo, a chhan chu Daniel-a'n a fanu Melody a kalsan nachhan chu keimi a ni a, dinhmun hlauhawm a awm tir a duh loh vang a ni tih chu a hre ve kar bawk si. A chaw ei thleng seng pah chuan, "Ka kal ania, ka tlai dawn." a ti ta daih a.

Roomah chuan a lut a, a bag te chu la in a rawn chhuak leh a. Kawngka zawnah chuan a ding deuh dat a, "NAkinah engkim i la hrethiam ve mahna, Pathian hian kan tana tha lo turin engmah a ti bik lovang." a han ti zawi sap a, a chhuak ta a. Melody chu a tap pur tawh mai, mahse tihtheih dang a nei chuang der bik si lo.

******************************

Pu Chhuma a motor-a a tlan mek lai chu DAniel-a hnathawk kal tur chuan a hmu a. A han au vak a, mahse a hre thei si lo. Pu Chhuma lah a tlan chak rapthlak mai si a, "Pu Chhum..lo ding teh." tiin a au vak vak a. Mahse a hre pha lo a niang chu, a tlan tlang zel a.

Daniel-a chuan kawng sir atang chuan a um ta tawp a, Pu Chhuma lah chu kawng hnuai lam atangin a la kal zui. DAniel-a chuan a um zel a, kawngsira kopang ah chuan tlan lawnin a um zel a. Keimi-a intih chan ngawt chi lah ni hek lo, mihring ni chunga tlan vak vak chu a hah ve tawh tho bawk si nen.

Kawng sir atang chuan a zuang vak ta ringawt a, Pu Chhuma motor hmaah tak chuan a ding chat a. Pu Chhuma lah a speed lo laklawh bawk si nen, a break chiang tha hman lo. Daniel-a chu a su thal tawp mai a, "Ekhai aw..." tih pah chuan motr atang chuan a chhuk nghal a.

"Ehe..DAniel, enge maw i tih le? I na em?" tiin a be mawlh mawlh a. Daniel-a chu rum tuah tuah chung chuan a rawn tho va, "KA kut hi...a tliak aniang." tiin a dawm vawng vawng a. Pu Chhuma'n a han en sak chu a meng phawk nasa mai, Daniel-a kut veilam zawk chu a ruh a lo kawi sawi nasa mai a.

"Khai leh...a tliak a nih kha. Lo chuang vat rawh, damdawiin kal angai." a ti chung chung mai a. Mahse Daniel-a chuan a lu thingin, "A ngai lo, tihian a dam a nimai." tih pah chuan a han herh ri thawk a, a pangngai leh nghal vek mai. Ka hau hian Pu Chhuma chuan a en vung vung a, "Engtin...engtin nge i theih zawk a?" a ti hu mai.

Daniel-a chu a ner suk a, "Engtin nge ka theih i rin?" tiin a lo zawt let a. Pu Chhuma chu a khi suk a, "Keimi i ni tak tiraw?" a han ti fiam a. Motor ah chuan an inzui lut a, "Engthil nge min hrilh duh i neih a? Min rawn phone mai tur ania, tinge khatia mi rawn um chiam chiam a?" tiin a han zawt a.

"Nizanah...ka hmu a ni."

"Engmaw i hmuh?"

"Kha sakawlh kha.."

"SAkawlh? Pu Rama sawi sakawlh kha maw?"

"Aw ni e."

Pu Chhuma chu a thu tha sauh sauh va, "Khawiah nge i hmuh? Khawi hmunah?" tiin a zawt leh nghal a. "Kan inbul step, tuikhur panthlakna ah khan ania. Thawm ka hria a, ka zuk en kha a rawn inlan a. Pu Rama sawi dan nen khan a in ang, chinghnia a ni." tiin Daniel-a chuan a chhang a.

"Chinghnia a? Mizoramah chinghnia an la awm ami?

"Chinghne-mihring, Pu Chhum. Keimah ang chiahin, mihringa a chang lai pawh ka hmu a ni."

"Anih tunah khawnge a awm? I man lo em ni?"

"Chutia man theih chi pawh a ni lo, a chak lutuk."

"In inbei ami?"

"Aw inbei e, khamah min la zuan thlak pui zui a. Ka inhliam nual alawm, chuan he chinghnia hian tunge ka nih a hre chiang a ni."

Pu Chhuma chuan mak tih hmel tak hian, "Timaw? Engvangin maw?" tiin a lo zawt leh a. "A chhan chu min that mai lova, step bula ka hmuh pawh khan keimi ah ka la inti chang lo, mihring pangngai ka la ni. Mahse a hmelma huat ber ang mai khan min sawisa hrep phawt a, chubakah a rim hriatna a hmang tangkai ve tho vang ka ring." tiin  chhang a.

Pu Chhuma chu a ngawi vang vang a, "A tha e, vawiinah tlauthihna case kha kan khawih leh dawn a. I hna ah va kal phawt la, ka mamawh che chuan ka rawn hrilh leh dawn che nia." a han ti a. Daniel-a pawh chu hna kal turin motor atang chuan a chhuak a, Pu Chhuma pawh Station lamah chuan a inkhalh phei ve leh ta a.

***********************************

Duhzuali chu office kal tur chuan a insiam mawlh mawlh a, apa te office ah hian a thawk ve a ni. Chutia a insiam mek lai chuan an zawhte dum chu roomah chuan a rawn lut a, Duhzuali chu a rawn en kar mai. Duhzuali pawh chuan va ban tumin, "Nang hi min va ngai lo ve...lo kal teh." tia a han kun chu a hma ang bawkin a lo ngiau khum vak a.

Duhzuali pawh a tawp chat mai, "Engthil nge maw i hriat le, niminah pawh tikhan min ti tawh bawk." tiin a hau hrep a. Zawhte chuan a en a, a ngiau vak vak a. Duhzuali chu a khi suk a, "Ka danglam amaw? Enge ka danglamna?" a han ti ringawt a. Zawhte chuan a lo ngur khum leh a, "I zak lo emai, ka duat tawh lovang che." a han ti leh a.

A bag chu la in room atang chuan chhuah a tum chiah chu engemaw hrechhuak zawk ni awm tak hian a ding leh chat mai a, "Nilo..engtin nge kan zawhte thusawi kha ka hriatthiam theih?" a ti ta nuah nuah mai. A hawi let leh a, zawhte chuan a lo la melh kar mai.

A han ngaihtuah vung vung a, "A miau ringawt kha a ni sia, mahse tinge ka hriatthiam. Sawi kha a nei chiang alawm, engemaw awmzia le?" a rilru chuan a inbe mawlh mawlh a. ZAwhte chu ava pan hnai leh a, a lo ngiau khum leh vak a. Mahse enge awmzia a hre leh tawh chuang hauh lo, a nui suk ringawt.

A mumanga zawhte tam takin an lo hual thup a hmuh te chu a han ngaihtuah let a, "Huiham, movie en tlem deuh ka ngai a ni." tiin a thaw hak a. A scooty a chhiat avang chuan apa rual chuan a kal ta a, mahse a awm chu ala nuam thei chiah lo. Apa chuan a nghawk zeuh va, a phu zuk mai.

"Tinge, i va inngaihtuah muk nasa ve?"

"Inngaihtuah hran love."

"Office i kal lehnghal ringawt a, nizan lawkah lu vun pawp khawpin i accident a. Keichu i ngaih a sam mah mah ka ti deuh, indim ve phawt la tha tur ania."

"Ka tha alawm, engtin mah ka awm tawh lo."

A pa chu a khi suk a, "Tiang khawpa fanu tuarchhel kan nei hi a lawmawm angreng." tiin a han nui huah huah a. Duhzuali pawh chu a lo nui ve mai bawk a, mahse a rilru ah chuan a mumag leh nichin lawka zawhte miau mai mai a hrethiam thut mai chu ala ngaihtuah reng a.

**************************

Chhun a ni a, lunch a ei zo chu DAniel-a pawh a thawhna restaurant kawtah chuan thu in khawlaia mi kal chu a lo thlir mai mai a. A bulah chuan mipa pakhat hi a rawn thu a, "Daniel, Lalhriathlua i ni em?" a rawn ti a. Daniel-a'n a han en chu a hriathnu a ni tlat, reporter Zorina kha a ni.

A en vang vang a, "Aw ni e, engatan nge min tih a?" a han ti deuh hmuk a. Zorina chuan a batch chu hmuh in, "Kei hi Zorina ka nia, youtuber ka nia. Thla 2 vel liam ta a i nu leh pa thihna chungchang ah khan kawm che ka duh a, hun i nei thei angem?" tiin a rawn dil ta mai a.

A ngeiawm zia leh a confi zia te, Pu Rama khatiang taka a ti zak te kha a ngaihtuah let a, Daniel-a chuan a lo phur pui teh chiam lo kher mai. A khi suk a, "Hna thawk lai ka ni sia, i ti lo phawt mai teh ang." tiin a lo chhang daih mai a. Mahse Zorina chuan, "Tunah tut tut ka ti hleinem, i hman hunah a nimai alawm." tiin a la sawm t(r)alh mai a.

DAniel-a chu a ding deuh hluai a, "Tlai dar 4 velah bak ka bang dawn lo, chubakah case kal lai a nia, kawm leh interview neih tih vel hi ka duh vak lo." tiin a chhang leh a. Zorina chu a rawn ding ve leh a, "A rei dawn lo, chuan a thlawn dawn lo bawk." a la ti hram a.

DAniel-a chu a khi leh suk a, "Ti lo mai ang, ka'n thawk leh tawh ange." tiin a luhsan ta daih a. Mahse Zorina chu a tlawm duh hauh lo, restaurant kawtah chuan a tei kual char char a. Tlai dar 3:30 velah chuan Daniel-a te pawh chu an bang ta a, a phone a han check a.

Pu Chhuma miss call emaw, message engmah chu a lo awm lo. Mak a ti angreng hle a, pawna a chhuak chu Zorina chuan a lo la nghak reng mai. NGawi reng chuan  a kal pel a, a hlauh ang ngei ngei chuan a rawn umzui leh hram a. "Thianpa, ka duh lo ka tih chu...khawngaihin min kalsan mai rawh." tiin Daniel-a chuan a han hrilh leh a.

"Hun tlem te tal min pe la, kan sumdawnna neih chhun te a ni ve a. A thlawn dawn lo, chubakah a rei lovang." tiin a thlem lui zel a, Daniel-a chuan a ning deuh ta. A ding a, "A tha e, minute 10 aw.." a ti ve ta nge nge a. Zorina chu a lawm kher mai, "Ka lawm e, mahse ka camera man hi a lo la thleng lova." a han ti chu Daniel-a chuan a lu a dawm tawp.

Inthiamlo tak hian Zorina chuan, "Mahse a pawi lo, i voice chauh kan record mai dawnnia." tih pah chuan a voice recorder chu a phawrh a. A han hawi kual vel a, "Helai chu a lun emai, mipui an bengchheng bawk sia. Khu lai kawnghnuai khu a reh, bike ka keng a, zu inphur thla lawk ila." a han ti leh a.

Daniel-a chuan peih lo hle mahse a zar buai reng mai si a, chuvang chuan a remti ta a. Zorina bike chuan an inphur thla a, kawnghnuai reh lai ah chuan interview nei tur chuan an inphur thla ta a. An thleng chiah chu an tan nghal a, muang changa kal dun pah chuan an inkawm zel a.

A tir chuan pangngai takin a zawt a, a tawpah chuan Pu Rama sawi, kha sakawlh chungchang bawkah chuan a luhpui leh ta. A mizia a hriat tawh avang leh a ngeiawm zia a hriat tawh avang chuan Daniel-a chuan a chhang tha vak duh lo, a awih loh thu hlir chuan a chhang a.

Zorina chu a ding a, mahse Daniel-a erawh chu a kal chhunzawm reng a. Chutah chiang fek fawk hian, "Anih leh Daniel, chu sakawlh chu chinghnia lo ni ta se, chinghnia mai nilovin, chinghne mihring ni ta se..." a han ti chu Daniel-a pawh a ding chat mai.

Mahse engmah ala sawi lo, "Tunah hian, i hmaah hian chu sakawlh, chu chinghne lian tak mai chu rawn chhuak ta hlawl mai se...engtin nge i tih ang?" a han ti leh a. Daniel-a chuan a kut a hum ruh nhghal, chutah ramsa rim dang a hre leh ta. A hriat tawh hnu a la ni zui, a hma zawn lawka a hriat ngei mai kha.

Muangchang chuan a hawi let a, Zorina mit chu a lo pawl ram mai. Chutah werewolf lian lutuk ah chuan a inti chang ta mai a, Daniel-a chu a chhuk en ta run mai. Mi ina an lo sawi thin, kha sakawlh kha Zorina ngei mai chu a lo ni tih a hrethiam ta a. DAniel-a chuan a chil a lem dawk a, "Nangmah hi maw?" a ti zawi sup ringawt.

********************************

TO BE CONTINUE