THIRTY AND FLIRTY Written by : Aaron Malsawmdawngzuala (ROMANCE - THRILLER - COMEDY) Chapter - 12

 THIRTY AND FLIRTY

Written by : Aaron Malsawmdawngzuala

(ROMANCE - THRILLER - COMEDY)

Chapter - 12

******************

Ka phone ka phawrh a, kan pute chu ka phone nghal. Ka hnungah chuan Puipuii chuan min rawn zui a, "Nilo..U Brandon, khawngaihin ngaithla teh." a rawn ti chiam chiam a. Kan supervisor chuan a rawn la a, "Hello Sir..enge ni ta?" tiin min rawn zawt a. Puipuii pawh chu a ngawi a, "Interview kha cancel rawh u, a lo kal leh dawn lo a nih chu." tiin phone chu ka dah deuh hmak a.

Lehlam ka hawi a, Puipuii chuan mittui tla phung hian min lo en a. Mahse Tluangi erawh chu inchhungah chuan a din dan ngaiin a la ding reng, "U Brandon, khawngaihin interview chu cancel sak suh, dawt a hrilh che tih chu ka hria, mahse pawisa a thawh chhuah a ngai tak tak alawm." tiin Puipuii chuan min ngen a.

Ka hrethiam lo nge, ka la thinrim lutuk vang pawh ka hre lo. Vin deuh lek lek hian, "SAw nu saw maw...fake certificate hmanga kan office-a thawh a rawn tum a, chutah nangmah angin ala insawi zui a..a teuh lo, sawnu saw ka tan engmah a ni lo." ka ti deuh hlur mai.

Mahse Puipuii chuan ka kutah rawn vuanin, "Nilo, i hrethiam lo a ni. A sawi thenkhat kha chu a dik vek alawm, keimah vanga a inzawrh angai a, keimah vanga pawisa a thawh chhuah angai bawk alawm. Ka tan tal pawn, khawngaihin....ngaidam rawh, keipawh ka thiam lo alawm." tiin min ngen lui tlat a.

Ka lu ka thing a, "Ka thei lo, engmah hi ka hrethiam lo. Ka lu hi a puakkeh mai dawn, Puipui...tinge maw? Tinge nang pawn min bum?" tiin ka zawt a, keipawh chu ka hnuk a ulh tun tawh mai. Tap tuau chung hian Puipuii chuan, "Kan inthen atang khan..kan inkalsan atang khan ka nun zawng zawng ka hloh vek a ni, Brandon." tiin min chhang ta mai a.

Hrethiam lo tak chuan ka en a, "Enge i sawi awmzia? Engtia nun hloh maw?" ka ti hu a. A inhnit feih feih a, "Ka nun zawng zawng ka hloh vek, ruihtheih thil ka ti a, damdawi thlengin. Ka tleirawl chhuak te kha maw, khawvelah ka tlan nasa lutuk. Lehkha thiam lo leh hna nei lo zawk chu kei hi ka ni, Tluangi sawi kha a dik...ani zawk saw zir chhuak chu a ni. Kei chu he chhungkaw tan hian buaina ka ni ringawt, mi tenawm tak ka nih hi, U Brandon.." tiin a tap ta hawm hawm mai a.

Chhan mai dan tur pawh ka hre lo, ka buai vek a ni ber mai. Chutah amah bawk chuan, "Tluangi'n kan chungah khatiang thil a ti kha a inchhir em em a, keimah kha khami hnu khan lehkha pawh ka zir tha thei lova, ka a vek tawh a ni. Psychiatrist min pan pui hial a, mahse awmzia a awm chuang lo. Ka nun zawng zawng ka ti chhe vek, tuna ka mizia i hmuh dan pawh hi a dik chiah alawm." a han ti zawi leh sap a.

Ka sa pup pup mai, "Chuan..enge? Chupawh chu lo ni se, tinge dawt min la hrilh cheu. Tinge Tluangi hi nangmah anga a insawi kher, tinge nang pawn thudik min hlirh mai loh?" tiin ka han vin leh hlur a. "A chhan chu ka hlau a ni, khati khawp khan i rilru ka tina tawh a, tihnat nawn leh che ka duh lo a ni." tiin min chhang daih mai.

"Enge ka rilru i tihnat na? Tunge i nih sawi la, min hmangaih a nih tak tak chuan tinge dawt min hrilh, tinge ka mihring huat ber Tluangi anga i insawi kher?"

"Ka nun hi a bawlhhlawh tawh lutuk, hmana Puipuii i hriat ang kha ka ni tawh lo. Ka engkim a danglam tawh, ka mizia nen...chuvang chuan i tan hian ka tling tawh lo a ni."

"Chutiang chhuanlam ka ngaithla peih lo, engpawh chu nise...saw mihringnu sawn kan office ah eng hna mah chelh tur a nei lo, a thawk lo bawk ang."

"I thinrim tih ka hria, ni e...a ti sual, mahse a dinhmun saw ngaihtuah ve ta che..U BRandon."

Ka thinrim lutuk chuan vin zet hian, "Nanga pawh chu...kan pahnih inkar tichhe vektu leh dawt a min lo hek tu saw engvangin nge i la tan cheu va...i unaunu tak tak pawh a nih loh saw...a thu thu in a dah thin che a nih kha, i theihnghilh ta em ni?" ka ti vak a. Chutah Puipuii chuan ring leng lawng hian, "A chhan chu ka nunna a chhan a ni, ani saw awm lo se chuan ka thi daih tawh ang." a ti chu keipawh ka ngawi hmak mai.

"Engmaw? Enge awmzia?"

"Aw ni e, Brandon...nangmah ka ngaih em che avang khan ka a zo vek a ni. Move on chu ka tum ve nasa, mahse ka thei ngang lo a ni. Lehkha ka zir thei lova, ihmaw...pawl 10 pawh kha ka pass lo asin. A tir ber chuan ka thian kawm te ka thlak a, tichuan damdawi in chi ang kha ka ti ve tan a. Tichuan ka kaisang chho zel a, zu in te ka ching a. Inchiu thlengin, mipa tam tak ka kawp a..mahse ka hlim chuang lo. Ka theihnghilh thei ngang lo che a ni, vawitam intihhlum ka tum a. Mahse Tluangi hian min dang a, ka chungah a sual tawh ngai lo...min pui hram hram zawk thin."

Ka ngawi reng a, "Tluangi pawh hian a thil tih kha a inchhir thu min hrilh a, ngaihdam min dil fo thin asin." a han ti leh a. Mahse kei lah ka la lungawi thei thlawt lo, "Chupawh nise, amah vang tho alawm. A rilru chhiat vang a nih kha, nangpawn enge i ngaihdam rikngawt?" ka lo la ti hlur mai.

Puipuii chuan hnuai lam a melh a, "A thil tih sual chu engpawh lo ni se, ka nunna vawi tam tak a chhanhim a ni." a ti zawi sap mai. Han sawi leh mai tur pawh ka hre tawh lo, ka ngawi reng ringawt. "Amah vang chauh a vawiin ni thlenga nungdama awm ka la nih hi, a inchhir thu min hrilh bawk a. U Brandon, ngaihtuah chiang rawh. Kei hian a thil tih avang khan ngaidam lo pawh ni ila enge awmzia awm chuang ang, kan inhmu tawh ngai dawn lo angah ka ngai a, beiseina engmah ka nei tawh hleinem." Puipuii bawk chuan a han ti leh a.

Mahse kei erawh chu ka la ngawi reng tho, sawi tur ka hre hlawl lo a ni. Kutsuih meuh chuan min dil leh a, "Khawlo leh hurherh zawk chu keimah ka ni, lehkha ka thiam lova, engmah ka ni tawh lo. Fa lak mai ni si hi, ka chhungte ka ti rethei a, tunah phei chuan min chawmtu awm chhun chu Tluangi chauh hi a ni asin." a han ti zawi leh sap a.

Ka ngawih leh deuh vang vang hnuah chuan, "Anih leh eng ti turin nge min duh?" tiin ka zawt a. Ka mitah chuan chiang takin a en a, "Min hmangaih tak tak a, ka hlimna tur leh ka lawmna tur i duh a nih chuan Tluangi hi in office ah chuan thawh tir rawh, chu chauh chu ka dil che a ni." tiin min chhang a.

Ka va han phur lo ber kher em, ka hreh takzet. Ka han thaw deuh hak a, "I nunhlui chu engpawh nise, innei ang. Chuan ka chawm vek ang che u, henu hi hna ka pek a tulna ka hre lo." ka la ti t(r)alh a. Mahse Puipuii chuan  alu thingin, "Hei lo pawh hi buaina kan la ngah asin, pasal nei thei ka la ni lo." tiin min chhang daih mai.

"Engati maw?"

"Tunah chuan engkim ka hrilh thei rih lo che...Tluangi hi khawngaih hram rawh."

"Tinge Tluangi pawh chu la tura min duh em em a? Kan office-a thawk tur phei chuan mi dawheh lutuk hi ka duh reng reng hleinem."

"Chutiangin sawi lul suh....khawngaihin.."

"Ka thei lo, Puipui...min hrethiam rawh."

A ngawi vang vang a, "Um..anih chuan a pawi lo. Hna dang chu a hmu veleh thei mai ang." a ti zawi sap a. Chu ringawt pawh chuan ka thin a ti rim, "Nangmah zawk hi ka la ang che, ani ngaihtuah buai a ngai ve lo." ka han ti leh hlur a. Tap tep hian min en a, "Kei chuan ka thei lo, thiam thil engmah ka nei lo." a ti tham tiak a.

Ka rilru a buai ngei mai, thil awmzia ka la hriat kim loh vang te pawh a ni mahna. Ka han inngaihtuah vang vang a, engvang phiansena he thuthlukna hi siam nge ka nih pawh ka hre lo. Inchhungah chuan ka va lut leh a, Tluangi chu a ding ngai chuan mittui tla zawih zawih hian a lo la ding ngawi reng a.

Ka hmaah chuan ka va ding a, "I duh leh in scooty-in i lo kal dawnnia, ka rual chuan i lo kal lovang. Interview turin inbuatsaih rawh, tha takin chhang ang che." tiin ka chhuahsan leh a, Puipuii pawh be zui tawh lem lo chuan ka chhuak tlang nghal daih a. Eng rilru nge ka put tak pawh hi ka hre tawh bik lo, ka buai zo vek hi a ni ber mai.

*************************

Office lam pan chuan ka let leh a, ka thluak hi a puak dar dawn ni mai hian ka hria. Kan pute chu phone lehin interview chu nei leh si tur chuan ka hrilh a, rilru thlak zing chu min ti ve khawp ang le. Office chu ka thleng a, ka room ah ka lut tlang nghal a. Interview naah pawh chuan ka tel ve peih ta lo, Tluangi hmel kha ka hmu peih thlawt lo a ni.

Puipuii message pawh tam tak a awm ngei ang, ka phone a vibrate zing emai. Mahse engmah ka enin ka chhiar peih lo, ka dawhkan bawh meuh chuan ka zawi hnawk mai. Hlim chhung a rei lo bik thei lutuk hi vanduai ka inti ngawih ngawih, ka hlim ve dawn tan chauh amaw tih apiang hian buaina ka tawk bik ziah mai.

Tluangi pawh chu Puipuii ang nilovin, amah nihna diktak nen chuan a rawn interview a ni awm a. Kan pute chuan an lo duh hlawm hle mai, phur fahran lo chuan keipawh chuan ka lo pawmpui ve bawk. Ni e, mahni thutiama ding nghet mi nih kha ka tum leh ka duh ber thin a ni bawk a, rawn thawk mawlh teh se.

Eng tak ang zel ang maw, kan la hre chawp ve zel mai aniang chu. Ka phone chu ka han en a, Puipuii chuan inhmuh vat a duh thu chu min rawn hrilh chiam mai. Zan dar 9 vela inhmu tur chuan ruahmanna kan siam ta a, mahse ka phur rual rual chuan engkim chu a mak zozai tawh em avang chuan ka helhhawlh teh chiam lo.

Tluangi pawh chu kan la dawn ngei tih kan chiang ta a, meeting kan zawh hnu chuan result chu ni thum hnua tlangzarh thei turin kan rel fel bawk a. Hna ho te te pawh midang kutah chuan ka dah zel tawh, a chhan chu thildang engmah ka ngaihtuah thei tawh lo a ni.

Ka buai zo vek hi a ni ber mai, ka tawp up up mai hian ka hria. Eng eng thuthlukna nge ka siam tak pawh ka hre zozai tawh lo, engkim mai chu ka mumang ni mai se ka ti ngawih ngawih. Kha leh chen kha Puipuii nena intawng leh tur khan Pathian hnenah dilin ka tawngtai nasa, mahse hetiang zawnga intawng leh tur chuan ka dil tel lo asin le.

*****************************

Zanah chuan Puipuii nen chuan kan inhmu ta nge nge a, an in zawn ka va thlen te chuan Puipuii lo ding mek ka hmu te chu a dik tawh lo riau te hian ka hria. Mahse amah zawk chu Puipuii tak tak zawk chu a ni si, a sawi ang deuh khan a inchei dan zawng zawng te nen chuan Puipuii ka hriat thin kha a ang tawh hlawl lo.

Midang hlak hi a ni tawh, a zawnah chuan ka va ding a. Ngawi reng chuan motor chhungah chuan a rawn lut a, kei pawh chuan ka lo be lem lo. Kan tlan leh a, kan ngawi dun char char. Minute 10 vel hnuah chuan, "Khawiah nge min hruai i tum?" a rawn ti chhuak hlawl mai.

"Tlangah khan..." tih ringawt chuan ka lo chhang deuh hmuk a. Min en deuh hu a, "Kan inhmuhna thin tlangah khan maw?" tiin min zawt leh a. Ka lu ka lo bu nghut ringawt, a nui suk a. A han thaw leh deuh hak a, "Tluangi kha keimah amaw tiin i hruai fo tawh ang tiraw?" a ti zawi deuh sap a.

ZA lo tak chuan kei pawh chu ka khi suk a, "Hruai tawh e, nangmah amaw ka ti miau alawm." tiin ka chhang a. A ngawi reng a, "Hmun danga kal i duh em ni?" tiin ka han zawt leh a. A lu chu thingin, "Aih, tlangah khan kal ang. Ka lung a leng alawm, hmun dang chu ka peih lo." tiin min chhang a. 

Ka chhang let tawh lem lo, kan tlan zel a. SAwi tur a vang duh khawp mai, awkward rem rem tak a ni. Ka rilru chuan kan tlan chhung zawng chuan zawhna tam tak a zawt mawlh mawlh, mahse a takah hian ka sawi chhuak thiam lo nge ni, han t(r)awng mai ngaihna pawh ka hre lo.

****************************

Tlang bul chu kan thleng ta a, motor atang chuan kan chhuak ve ve a. Step chhohna chu Puipuii chuan a han en chho vang vang a, "A ngaihawm lutuk." a ti zawp sap a, a nui sen sen mai. Tluangi naupan lai nen an in ang viau va, a sap pawh a kirin a tawi bawk a, a incheina zawng zawng nen chuan Puipuii ka hriat thin kha a ni tawh mawlh lo.

Mahse thudik ka hriat atang leh Puipuii tak tak zawk a ni tih ka chian hnu hian ka en ngun pauh leh ka Puipuii ngei kha a ni tih hi ka fiah tulh tulh ni mai hian ka hria, a incheina leh a mizia inthlak mahse, ka thinlung hian ala hre tlat a ni. A kutah chuan ka vuan a, "Kan chho dawn mi niang?" tiin ka han zawt a.

Nuih suk pah hian a lu a lo bu nghat mai, "Awle, kal ila." tiin min chhang a. Step ah chuan inkai chungin kan inzui chho ta a. Kan chhoh chhung zawng chuan kan inbe miah lo, reilo teah chuan a zawl nuam lai chu kan thleng ta a. Puipuii chu a han hawi kual a, "A van la danglam lo em em." a ti nuah nuah a.

Engtin nge kal fo tawh ang maia, a hma khan Tluangi khan tuna Puipuii sawi ang chiah khan a han sawi vel theih zawk le tihte chu ka ngaihtuah chhuak thul, engkim mai hi a buai zo vek tawh a nih hi. Kan thutna thin chu a pan chat a, "AWi heilai pawh hi, ava lunglen thlak ve." Puipuii bawk chuan a han ti leh a.

Hrilh lawk miah lo pawn kan thut dun thinna lai a hriat chat danah te chuan ka Puipuii ngei kha a ni tih a chiang leh zual, "Hawh, thu ang." tiin min pawt thu a. Mahse mood fuh em em anga awm chu a har takzet, a lo fuh em em bawk si lo nen. Amah Puipuii nilova Tluangi zawk, ka mi huat em em mai ka secretary a ni tur chu ka peih hlawl lo a ni.

Nghet tak hian min kuah a, "Thudik hi hria la chu ka duh lutuk, mahse ka inzahpui tawh em avang leh i hriat nih ve hi ka phu hian ka hriat tawh loh vangin Tluangi anga ka awm mai a ngai a ni." a han ti zawi deuh sap a. Mahse ka chhang lo, "Min hmuh dan pawh a dang vek tawh ang tiraw?" tiin amah bawk chuan min han zawt a.

Ka khi suk a, "DAnglam nge damglam lo pawh ka hre tawh lo ve a, engkim mai hi a buai chuar nuai mai a nih hi." tiin ka chhang ringawt. Ka kutah chuan nget tak hian a vuan a, "Ka hrethiam che alawm, mahse dawt sawi kha ka duh em em bik pawh a ni lo asin." tiin a inhnit leh nghal feih feih mai.

"Anih engtik khan nge ka nihna diktak hi i hriat?"

"Ele, Tluangi'n min hrilh."

"Engtikah?"

"BAngalore-a a awm hnua a rawn haw khan nangmah ang deuh in a dawr thu che leh, engmah a taksa khawih lova pawisa tam tham tak i pek thu te kha min hrilh a. Chumi hnu thlakhat vel, in inhmuh a, keimah amaw i tih hnu khan min hrilh leh a, coffee shop-a ka rawn kal kha kan inhloh hnua ka vawikhat hmuhna che."

"NGati nge tah khan i insawi mai loh?"

"Chhan a awm alawm."

"Enge awmzia?"

"Tluangi anga ka awm a ngaihna kha...chhan a awm a lawm."

"Nia, a chhan chu min hrilh ta che."

A thaw deuh hak a, "Diary kha...i hming ka ziahna kha...khata tang khan tiraw Tluangi kha keimah amaw i tih kha?" tiin min han zawt phawt a. Kei lah chuan, "Nangmah amaw ka ti che pawh a ni lo, nangmah ang khan a insawi miau alawm. Chubakah i diary kha  abag chhungah a lo dah ve bawk sia, amah lah khan Puipuii ka ni a ti miau sia." tiin ka chhang a.

"Nia, khami zan khan ka bag zawk a lo keng a. Bag in ang hi kan nei nual a, chubakah kan inhman tawm thin bawk a. Khami zan khan en chiang mang hlei lovin ka bag zawk a lo la a, tah khan ka diary kha ka lo dah bawk si alawm." tiin min chhang a. "Anih tinge nangmah anga a insawi kher a..tinge dawt min hrilh kher?" tiin ka han zawt leh a.

"A chhan chu kan naupan laia kan inngaihzawn kha, khata tang daih khan ani pawh khan a duh ve reng tawh che a ni. Mahse nangman keimah zawk min duh si a, chuvang chuan min thik a. Min pawh hran dan kawng kha a zawng char char a, ka nu leh pate bulah dawtin min hek phah ta a nih kha." tiin min chhang a.

"Kha chu thuhran ni se, khami zan a rawn haw hnu khan min hmu tih chu a hrilh che tihna em ni?"

"Aih, a tuk zingah min hrilh."

"Engtin nge i awm?"

"A tir chuan ka awih lova, mahse a sawi a sawi sia. Ka buai vek alawm, awih har ka ti bawk sia. A hnu khan ka zawt chik ta deuh va, tichuan Tluangi nilovin keimah ang zawka a insawi thu min hrilh ta a ni."

"Chuan i lo pawm tawp amaw? A tuk lawkah amah Tluangi angin i rawn inlan leh a. Tinge thudik min hrilh mai loh...chu chu ka hrethiam thei lo a ni, Puipui."

A kun deuh ngal a, "U Brandon, a chhan chu min vau vang a ni." a ti ta mai a. KA sap phat mai, "A vau che maw? A la vau ngam cheu che amaw? Tinge anih i t(r)an viau si, kan office-a thawk tur pawn nangman i sawi vang chauhvin ka la lut dawn chu a nih hi...Puipui, enge awmzia ni nei nuai?" tiin ka vin lek lek mai.

TAp teuh chung chuan Puipuii chuan min en a, "A hmangaih ve vang che a ni, U Brandon. Kan inkalsan hnu khan ka sawi tak ang khan ka nun zawng zawng ka hloh vek a, kum naupangte in home-a dah ngai khawp ten ka awm a. Class 10 pawh ka zir chhuak lo ka tih kha, lehkha thiam lo mi mawl mai ka ni tawh. Ka lehkhathawn che te pawh kha ka hrilh ve vek a, khatia amah vanga ka buai ta vek kha amah pawh inthiam lo reng rengin hun a hmang chho alawm." tiin min chhang a.

Kei lah Tluangi ngei laklawh chuan, "I sawi zing tawh, a inchhir ang chu...inchhir awm reng pawh ania lawm." ka lo ti leh hlur mai. Puipuii chuan a mittui chu a hru a, "Ni e, a inchhir reng alawm. A tir chuan ka ngaidam a, ka lungawi bikin i ring em ni? A inchhir thu a sawi hnu ngat phei kha chuan ka be duh lo char char a, min buaipui a tum pawhin ka duh ngai lo. A hnuah phei chuan ka haw tulh tulh a, amah vang vek a ni tih ka hrilh che a, lehkha pawh ka thawn thlap tih te thleng chuan ka hrilh a, hrehawm a ti lutuk." tiin a han inhnit leh feih feih phawt a.

Chutah sawi zawm lehin, "Mahse ka lakah khan that a chhuah char char a, kei lah ka sual  tulh tulh zel bawk nen. Sum ka heh em em a, a pawisa khawl thlengin ka ruksak thin. Chupawh ruihtheihthil tih nan vek ka hmang, thian duk dak lo hlir ka kawm bawk a. Ka nu leh pate pawhin fa lak mah ni ila tihngaihna min hre tawh lo, tichuan home-ah min dah ta a. Home-ah pawh chuan damdawi ti chak lutuk ka chiri thin a, buaina te ka siam thul. Ka tlanchhuak fo bawk a, mahse min man leh zel a. Chutah chuan Tluangi hian min la chhuak mai turin ka nu leh pate chu a ngen ta a, Tluangi chu ka tan a inpumpek ta tawp a ni." a han ti leh a.

"Chuan, enge thleng zel?"

"Ka la fel thei chuang lo, a ruka chhuah te ka ching a. Ka buai nasa tulh tulh a, thenawm khawveng ten an hriat pun zel an hlauh avang chuan ka chhungte pawh an fimkhur lutuk. VEng dangah te kan insawn leh thul a, mahse mipa drugs addict thleng thleng chuan zui ka chin zel takah chuan camp ah te ka lut a. Diktak chuan ka rilru ah hian i thi thei lova, nangmah ngaiin ka rum vawng vawng thin asin."

"Nih leh inthah i tum kha, enge awmzia?"

"Umm nia, drugs bawiha ka tan ngheh zual hnu phei kha chuan doctor hial te min panpui thin a, chhe te te chuan ka ziaawm a. Mahse ka sim rei thei lo, a zunzam khan min phuar tlat tawh a ni."

"Chutih hunlai vel chuan kum engzat vel nge i nih?"

"Kum 23 vel ani maithei, ka sual zawm char char alawm. Tichuan sim ka tum ve nasa a, mahse ka thei si lo. Ka nun beidawng lutuk kha vawi tam tak intihhlum ka tum a, invih te, inawhhlum te leh tukverh atanga zuan thlak te ka tum thul. Mahse ka nunna chhantu chu Tluangi vek ala ni, buai chung chung leh lehkha zir hram hram chung khan min ngaihtuah char char alawm."

"Anih leh i pa boral chungchang vel kha?"

"Kha phei kah chu ka hre mumal vak lo, a hnua min hrilh leh dan chuan a eiruk kha an man a, tichuan jail ah a tang a. A tanna ah an lo sawisak rawn a, a nunna a chan. Chuzawng chu ka hria, court vel chungchang pawh enge ka hre mumal lo, a hnuah ka ngaihtuah zui lo bawk a. Camp ah te, Home-a te leh damdawiinah te ka awm reng a, chuvang chuan engmah ka hre ve mang lo."

"A hnuah i zawt chiang leh lo ami?"

"Ka hre chiang duh lo law law zawk."

"Ngati maw?"

"Hriat loh ka duh zawk...ka depressed nasa tawh nen, buai nawn leh ka peih tawh lo."

Mittui tla teuh chunga a sawi mawlh mawlh chu ka en reng a, a dinhmun chu ka ngaihtuah a, ka khawngaih takzet. Ka puitlin zawk vang pawh lo ni tehreng se, kha chu thudangah dah ila. A nun zawng zawng hloh vek khawp leh a tleirawl lai nun te pawh khawlo taka a lo hmanna chhan chu keimah vang vek ni tlat hian ka hria a, a ni reng bawk ang.

Min lo hmangaih ve hle a ni tih ka hriat rual rual chuan kei ai mah chuan a hmangaihna a lo nasa zawk daih a ni tih ka hria a, ka hlim rualin ka lungngai a, ka khawngaih bawk. A kutah chuan ka vuan ve a, "Anih leh tinge Tluangi anga i awmna chhan...chu chiah chu min chhang leh rawh, enge a chhan?" tiin ka han zawt leh a.

A hmel atang chuan a sawi hreh hmel kher mai, "A chhan chu...a chhan chu TLuangi khan min vau ka tih kha...amah anga awm turin min tih vang a ni." tiin min chhang a. Ka sa leh phat mai, "Ka rin ang vel a ni...chu chu tinge i lo remtih a? A enkawl che, i tan a awm a, i intihlum tur pawh a chhan che tih ka hria. A tawk, ka hre peih tawh lo. Mahse i nihna zawng zawng a laksak che leh, keimah min hmangaih ve avanga hetia a ti hi dikna a nei lo." ka han ti leh khur khur a. 

“Ka hria alawm, keipawhin ka haw lutuk alawm. Mahse ka sawi ang khan engkim min tihsak vek a, min ngaihtuah a, min enkawl bawk a. Ihmaw, fake certificate a siamna pawh chu keima thianpa zawk alawm.”

“Enga? Nangmah zawkin i tih tir tihna em ni?”

“Nilo, ka puihna min dil a ni. Pawisa kan neih loh avangin surgery ka neihna tur a tuak ngat ngat a, a tawpah loh theih lohvin a inzawrh a ngaih phah a. Keimah vang, keimah vanga a tih vek a ni.”

“Anih leh in nihna in inthleng hi enge awmzia, ka hre duh.”

“Nia, ka hmuh a, amah a ni tih ka hriat khan ka insum zo thei leh ta lova. Min haw em em si a, chuvang chuan nangmah angin ka lang ta tawp mai a ni a tia. A tir chuan ka pawm bik lo, ka hmu leh chak ngawih ngawih che. Kan inhnial ta chiam a, chutah chiah chuan min vau ta a ni.”

“Engtin nge a vau che?”

“I nihna zawng zawng te, i thil tih thin te. Mipa dang dang i kawp kual chungchang te hi ka hrilh vek ang, engkim ka hrilh ang tiin min vau a ni.”

Chhan pawh ka chhang thei lo, engpawh chu nise Tluangi chu ka haw laklawh tawh tlat. A sawi mawi pauh leh ka haw tulh tulh zawk nimai hian ka hria, "Coffee shop-a ka hmuh che khan, ka insum nasa asin. Mahse lem ka chan char char a ngai bawk si a, bathroom-a ka luhna chhan pawh kha ka t(R)ah duh vang a nih kha." Puipuii bawk chuan a han ti leh a.

Ka kuah a, a hmuiah chuan dim tak hian ka fawp a. A biangah chuan chulin, "I sam hi engtika i tih kir nge?" ka han ti daih chu amah pawh a nui huk mai. A mittui hruk pah chuan, "Teh deuh thut che chuan, a rei tawh mai. Kum 18 vel ka nih khan ka ziat kawlh lek lek a, khata tang khan a sei ka duh tawh lo, ka tan zel a, chuan ka tikir ziah bawk." tiin min chhang a.

Amah bawk chuan, "Ka inhmeh lo i ti ami?" tiin min han en deuh hu a. KA lo nui sak a, "Umm...i inhmeh lutuk. Eng tiang pawhin insiam danglam mahla, ka duh ber zel thovang che." tiin kan infawp leh a. Kan ngawih dun leh vang vang hnu chuan, "Anih hmanni khan, tinge thingpui dawra kan inhmuh khan ka bulah i rawn thut ve a?" tiin ka han zawt leh a.

A nui suk a, "Ka haw lam khan ka scooty park-na zawnah khan i lo thu a, ka hmu reng che a. I thil ei lai te kha ka en reng alawm, ka rawn be chak che sia, mahse Tluangi zawk amaw min ti bawk sia, min haw dawn em a. Mahse ka insum thei thlawt lova, i bula awm ka thlahlel lutuk khan ka rawn pan ta tawp che a ni." a han ti zawi sap a. 

Thawk a han la hak a, "In awmdun ka hmuh te khan thikna hlirin ka khat a, a hrehawm ka ti lutuk. Mahse Tluangi chuan min vau tlat si avang chuan tihian kan nihna kan inthleng ta mai a ni, hriatchhuah hun i la nei dawn tho tih ka hriat vang aniang, ka insawi loh ni.." tiin a han khi deuh suk a.

Mahse engvak mah ka sawi thui pui duh lo, ka la hriat loh pawh tam tak a la awm teuh ang tih pawh ka ring. Engpawh chu nise zankhatna atan chuan a tawk viau in ka hria, engmah ka zawt zui duh tawh lo. Rei vak lo kan titi leh a, chumi hnu chuan kan haw ve thei ta hram a ni.

*****************************

TO BE CONTINUE