KEIMI 2 : WHEN THE WOLF COMES OUT [MIZO FICTION SUPERNATURAL STORY] Written by : Aaron Malsawmdawngzuala Chapter - 4

 KEIMI 2 : WHEN THE WOLF COMES OUT

[MIZO FICTION SUPERNATURAL STORY]

Written by : Aaron Malsawmdawngzuala

Chapter - 4

*******************************

Chutia Daniel-a'n mak ti taka a en reng lai chuan chu chinghnia chu a rawn tawng chhuak ta, "Ngatinge? Mak i va ti awm ve? KA zawnna che a rei tawh lutuk, he ni hi ka nghahna a rei tawh khawp mai." a ti chhur chhur mai a. Daniel-a erawh keimi ah ala inti chang ve mai lo, "Enge i duh? Chuan tunge i nih a, engtin nge chinghnia ah i chan theih?" tiin a zawt a.

Chinghne-mi chu a nui huah huah a, "Nangpawh sakeiah i inti chang thei a nih chuan, keipawh engvangin nge chinghnia ah ka chan theih loh bik teh lul ang ni?" tih pah chuan Daniel-a chu a rek ta thut mai, a rek kang vak a. Hnai takah hian a melh a, "Kei hi Keichala thlah kal zel te zinga mi tho kha ka ni, ka hmelma diktak chu nangmah hi i ni." a ti leh khur khur mai.

DAniel-a chu a thaw tha hlei thei tawh lo, chutah lei khuar dawk khawp chuan rek chung reng chuan a deng dawt mai a. Chutah mihringah a inti chang a, Zorina a rawn ni leh a. DAniel-a chuan thei leh thei lo hian, "Zo..Zorin, min thlah rawh. I hrethiam lo a nih kha, keihi kha Keichala nen khan inzawmna kan nei lo." a ti tawk tawk a.

Zorina chu a nui sak a, a tham tho lawp a. Vin zet hian, "Dawt sawi kual vel kha a ngai lo, vawiin ngei hian kei hian ka that dawn che. Mahse ka thah hma che in engkim thudik i hre vek tur a ni, nang hi ka nuai bo che anga, keimi tumah an awm tawh lovang." tiin a paih leng leh dawr mai.

Thingkung lian tak deng khi thawt khawp chuan Daniel-a chu a ri leh dawp mai a, a ka atang chuan thisen a rawn chhuak a. A chau tak zet, Zorina lah chuan a la rawn pan phei zel a. A kut chu a han hmet ri rap rap a, "A tir chuan ka hre bik lo, chinghnia ka ni tih hi. Thla khat liam ta atang chauh khan a ni, mahse chu chu tunah chuan a pawimawh rih lo." tiin a rawn nui phei vel a.

DAniel-a chuan a chhang lo, a hliam a nat em avang chuan a rum nghut nghut ringawt a. A bulah chuan Zorina chu va kut hniamin, "Pu Vana kawrkilh kha khawnge a awm?" tiin a rawn zawt ta mai a. DAniel-a chu a meng kawk mai, "Eng a? Kawr..kawrkilh maw?" a ti hu mai a.

Thinrim tak hian Zorina chuan, "Aw..ka sawi i hria. Khawiah nge, sawi rawh." tih pah chuan a kuttin chu a ti hriam a, Daniel-a hmai kak duai khawp chuan a ham thle sawk mai. DAniel-a chu a au vak a, thisen a far zawih zawih mai. A na ti lutuk chu a khur dar dar a, "Ka...ka paih..ka paih bo tawh." a ti tham tiak a.

Zonrina chu a thinrimin a sa kher mai, a ding hluai a. A han thaw deuh halh halh a, "Keichala kha ka pu ve tho a ni a, nangpawn i hmu tawh ngei ang tiraw? Keimi nihna petu che kha a ni miau va, mahse kha keimi putar khan engkim a  hrilh lo che. A tupa hnuhnung ber i ni a, mahse hrilh kim loh che a nei." a han ti leh charh charh a.

Daniel-a chuan a hrethiam lo kher mai, "Zorin, engmah i sawi awmzia ka hre lo. Chuan kawrkilh kha ka paih bo tak tak, ka nei tawh lo." a han tih chuan rum zet hian Zorina chuan a melh a. "I hrethiam lovang, kha i pu Keichala khan British ho laka an tlachhiat khan, keimi chauh an awm angin a sawi tiraw? Ni love, chinghne-mi pawh an awm a ni." a ti leh ta mai a.

DAniel-a chuan mak a ti tawlh tawlh mai, "Keichala kha an khaw Lal a ni lo, mipui dang tam tak alam tangah siamin Lal nih a duh a, a unaupa Hrangkunga ngei pawh do duh hialin mipuite chu a hmin thei ta a. Chutah chuan keimi leh chinghne-mi angin an inthen hrang ta a ni. Mahse chinghne-mi te chu an tlem zawk avangin an khua atanga hnawh chhuak an ni a, tichuan ramhnuaiah awmhmun khuarin khaw dang an din ve ta a ni. Chu chu engtin nge ka hriat i hre duh em? London vampire Lalpa, kum sang tamtak ami tawh, Zeros-a'n min hrilh a ni." tih pah chuan DAniel-a chu a pet leh pawp mai a.

A leng leh dawr mai a, a hliam nasa tawh kher mai. Thei leh thei lo hian a rawn ding chhuak leh a, "Zorin...Zeros-a khan i rilru kha a control a ni, kha vampire kha misual a ni. A thil sawi zawng zawng kha dawt vek a ni, tunah chuan a  thi tawh. Pu Vana kawrkilh a kawl lai khan a dawi che a ni ngei ang, khawngiahin min ngaithla teh." a han ti leh a.

Zorina chu rawn tlan phei thutin Daniel-a chu a rawn hnek leng leh dawr mai a, "Ni e, i that tawh. Nangma thah ngei a ni lawm ni, i keimi nihna hmang ngei kha.." a ti vin vak vak mai a. DAniel-a chu a rawn tho chhuak leh hram hram a, "Ka thah a ni lo, Belzebula thah zawk a ni." tiin a chhang a.

Zorina chuan a hrethiam lo kher mai, "Belzebula a? Tunge chu chu...ramhuai maw?" a ti ta hu mai a. Thaw hluam hluan hian DAniel-a chuan, "Aw...tunge a nih pawh i hre lo ania. Tikhan i chiang em? DAwt a phuahchawp mai mai anih kha, Zeros-a khan...werewolf ni turin a dawi che a, anchhia a lawh che a ni." tiin hrilh fiah a han tum a.

Zorina chu a hawi a hu mai a, "Ni lo, engkim kha a tak ang chiahin min hmuh tir vek. Ka pu diktak zawk chu Hrangkunga kha a ni a, ani pawh kha a damlai hmel thlengin min hmuh tir. Kan hmel pawh a in ang chiah chiah a, a tupa chhuan hnuhnung ber chu kei ngei hi ka ni." a han ti nuah nuah a.

"Ni love, kawrkilh thiltihtheihna hmang vek khan a siam chawp a nih kha. A bum che a ni, ka pui thei che ania. Engkim ka hrilh fiah ang che, min ring hram rawh." Daniel-a chuan  a han ti leh a. Mahse Zorina chuan rum zet hian a melh leh ta khur mai, "Khatiang khan min thlem i tum dawn tih pawh hi ka hre lawk vek, Zeros-a khan engkim min hrilh lawk vek a ni." a ti leh ta daih mai.

Daniel-a chu a rek leh a, thingkung ah chuan a rek bet a. Hnai takah enin, "Yotuber anga ka lanna chhan te, khatia lar ka khelh vak nachhan te kha i hre duh em? Nangmah ka zawn hmuh theih nan che a ni, chinghnia ah inti changin mi ka that zeuh zeuh anga, tichuan keimah bawkin ka awih loh thu ka sawi leh anga. A tawpah chuan kei hi nang hian min la rawn zawn ka ring a, mahse keimah zawkin ka zawng hmu zawk ta che a nih hi." tiin a chawi kang leh lawp a.

A awmna atanga ft 40 vel dawnah chuan a vawm leng leh dawr ta mai a, Daniel-a chu  atla thum leh ta dut mai. Zorina chuan ring tak hian, "Tunah chuan tawng hun a tawp ta, ka thah che a hun e." tih pah chuan chinghne lian em em mai ah chuan a inti chang a, Daniel-a pan phei chuan a va tlan phei ta a.

DAniel-a chuan rum zet hian a lo melh reng a, "A tha e, khawih harh deuh i ngai a nih hi." tiin a rawn tho chhuak leh a. Keimi ah chuan a inti chang ve ta, Chinghne-mi chu a rawn zuang vak a, Keimi chuan a bekah tak chiang em em hian a lo hnek a, a sirah chuan a lum phei ta tup tup mai.

Keimi chu thinrim tak hian  a meng sen rum mai a, ring zet hian a hahum khum ve ta vak vak mai a. Chinghnia pawh chu rawn tho leh in a rawn ngur ve chhur chhur mai, "Keichala chu i haw viau a nih chuan hremhmunah zu zawng rawh, kei chu a tan chuan mi hran hlak ka ni. A thlah kal zelte zinga mi pawh ka ni ve lo, keimi nihna hi a tupa ka nih vang nilovin a pek a min pek a ni." tiin Keimi chuan a vin vak vak a.

Chinghnia pawh chu a rawn ding kang ve a, "In putu a inhuatna leh chhungkaw buaina in lo nei a nih chuan ngatan mah ka ngai lo, mahse khatia i dawt sawi hmang kha chuan min bum lul lovang. Ramsa tam tak, eng anga lian hmaah pawh zam ngai lo, sa pel thiam chinghnia ka nih hi." tiin a inhrosa khur khur a.

Keimi chuan zam hauh lo hian rum zet hian a lo melh let a, "Chuan kei hi, ramsa azawnga huaisen ber leh hlauh nei lo, sakei ka ni. Keichala i hua a, thah i tum a nih chuan hetah chuan a awm lo. Mahse sakei hrim hrim i hua a nih chuan, buaina lian tak kan nei tihna a nimai." tiin a chhang ve ta sak sak mai a.

Thinrim takin chinghnia chuan a va pan phei a, an insual leh ta. Mahse keimi chan a tha zawk zel tlat mai, an inhneh tawk viau thin a, mahse keimi thinrim chu chinghne-mi chuan a ngam chiah lo niin a lang. Chutah silai puak dur dur ri chu an hria a, police siren ri an hre tel bawk.

Motor ri in a chhunzawm nghal a, an insual pawh chu an tawp nghal a. An pahnih chuan mihring ah an inti chang ve ve a, "Ala tawp lo ania, Daniel. Kan inhmu leh ang, kan inhmu leh hmasak ber ni chu i thihni a ni tawh ang." tiin a tlan thut a, chinghnia ah inti changin khamah chuan a lawn chho leh ta daih mai.

A kal hnu lawk chuan motor chu Daniel-a zawnah a rawn thleng a, Pu Chhuma chu motor atang chuan a rawn chhuk a. DAniel-a chuan mak a ti kher mai, "Pu Chhum? Nang maw? Enge..engtin nge hetah ka awm tih i hriat a?" tiin a zawt hu mai a. Pu Chhuma chuan a pistol phawrh nghalin, "Khawnge, khawnge sakawlh kha a awm?" a ti nghal chiam chiam a.

DAniel-a chu a thaw hak a, "A kal tawh....i rawn thlen hma chiah khan a kal." tiin a chhang a. Pu Chhuma lah chu  ahawi kual a, "A kal hla em? A awm hla lo tawp ang, in insual em ni? Kha..i hliam nasa si, khawnge a kal bo hman?" a ti leh chiam chiam a. DAniel-a chuan an sira kham sang tak chu a kawk a, "Tah khian a lawn chho, a kal bo tawh." tiin a chhang leh a.

Pu Chhuma pawh chuan a pistol chu a dahthla ve ta a, "I hliam nasa em, damdawiin pan a ngai a ngem?" tiin a han zawt leh a. Daniel-a chuan a lu a thing a, "Ngai love, ka hliam hi chu reilote ah a dam leh vat zel alawm. Pu Chhum, engtin nge hetah ka awm tih i hriat a?" tiin a zawt let daih mai.

Pu Chhuma chuan a phone a phawrh a, "I phone location ka track vek alawm." a ti ta mai a. Daniel-a chu a ner sak a, "Enga? Min chhui ru amaw? Enge tihsual ka neih a?" a ti hu mai a. "Tihsual i nei lo, mahse mihring pangngai nilovin sakei i ni tel tawh bawk sia, ka fapa ang chiah in ka en che a, ka ven che angai alawm." tiin a chhang a.

Daniel-a chu a lawm rilru khawp mai, mahse engmah chu a sawi lem chuang lo. Inthiam loh hmel tak hian Pu Chhuma chuan, "Enteh Daniel, ka ngaihtuah takzet che a ni. Chuan he sakawlh hi mihring, nangmah ang chiah a ramsa a inti chang thei niin a lang bawk si a.." a tih lai chuan DAniel-a chuan, "A ni alawm." a rawn ti a.

Pu Chhuma chuan Daniel-a chu a melh hraw a, "Enga? A ni maw? Engtin nge i hriat? Tunge a nih? Chuan...engtin nge in intawn, tunge a nih ka hre ve angem? tiin a han zawt leh chiam chiam a. DAniel-a chu a thaw hak a, "Aw..i hre lutuk ang. Ka hrilh ang che, engkim ka hrilh vek ang che." tiin a chhang a.

***************************

Zorina chu restaurant pakhatah chuan a lut a, bathroom ah chuan a lut tlang nghal a. Tumah an lo awm lo hlauh mai, darthlalang hmaah chuan dingin a in en vang vang a. Thinrim hmel tak hian, "ZAwnga mai mai chuh....kan intawng leh khawp ang. Ka rin aiin a chak zek lehnghal a, engemaw tak tihdan ngaihtuah a ngai a ni." a han ti nuah nuah a.

A hmai chu a phih a, chutih lai chuan tlangval pahnih hi an rawn lut a. An rawn nui dun nasa mai, tlem chuan an kai deuh chhap niin a lang. Zorina chu a inhru hul a, chhuah leh mai a tum a. Tlangval pakhat zawk chuan, "Thianpa, lighter i kawl mial em?" tiin a rawn zawt a.

Zorina chu a hawi let a, "Khi khi inhmu thiam lo em ni?" tih pah chuan banga NO SMOKING tih inziak chu a kawk a. Tlangval pahnihte chu an in en a, an nui tiah tiah mai. Pakhat zawk chuan, "Ka nei lo ti ve mai la, khatia inlak meizial zuk loh vel kher kha a ngai em ni?" fiamthu chuan  a han ti a.

Pakhat leh zawk chuan, "Heta hnathawk i nih chuan sorry aw...kan thiam loh liau liau a ni." tiin an han nui dun leh tiah tiah a. Zorina mood fu lo sa chu a thinrim kher mai, "Zu e, a heh ber ber te zinga mi ka ni ang chu. Lighter pawh ka nei, mahse in hmang lovang. Meizuk phallohna hmun ania, in zu lovang." a ti ta khur khur mai a.

Chu tlangval pahnihte pawh chu an ngaihdan a ni vak ta bik lo, "Enteh Hmelpawng, enge ni a i inhriat a? I va pawr ve a, kan khawih hma che hian chhuak vat rawh." tiin  pakhat zawk chuan han vau khar khar a. "I hmel enin i la naupan hmel bawk a, kan ngaidam hram ang che." ngaihnep hmel tak hian a lo ti ve bawk a.

Chutah Zorina chuan an pahnih chuan ava pan phei a, "Anih chuan han che ula, in ngam chuan han che ta che u." tih khur khur pah chuan a mitmeng chu a rawn pawl ta ram mai a, chumite pahnih chu an ngawi chiang kher mai. Engmah sawi lo chuan hlauh hmel tak hian an tawlh hnung hret hret a, bathroom atang chuan an tlan chhuak titih a.

**************************************

Motor chhungah chuan Pu Chhuma leh Daniel-a chu an thu dun a, ramhnuaiah chuan an la awm reng a. Daniel-a chuan Chinghnia chu tudang nilovin Youtuber lar ve tak, reporter ni bawk, Zorina ngei mai kha a nih thute chu hrilhin, Keichala thlah anga a insawi dan te chu a hrilh vek a.

Pu Chhuma chu a ngawi vang vang a, "Thudik a ni ve thei tho asin, Keichala khan engkim i hriat ve a tul lo a ti pawh a ni mahna. MAhse engmah chu ka hre ve chuang lo nangin, Keichala thlah zinga mi i ni ve angin a ngai te pawh a ni thei tho mai." a han ti nuah nuah a.

"Nilo, Pu Chhum. Zeros-a kha a phakar zia ka hrechiang a, keimi ka nih hnuah ka hmelma hmasa ber a nia, ka hrechiang alawm. Pu Vana kawrkilh thiltihtheihna kha a hmang thiam bik em a, kum sang tamtaka upa  ani tawh bawk nen, fing tak a ni. Zorina hi mi naran ve mai chauh a ni ang, Zeros-a khan a dawt phuah chawpin a bawl kual mai mai a ni." tiin Daniel-a chuan a chhang a.

"Zeros-a kha a thi tawh a, i that tawh bawk sia."

"Ka thah a ni lo ka tih tawh kha, Belzebula thah a ni."

"A that lai i hmu em ni?"

"Aa..a thi tih ah, lei karah khan a hnuk lut a. A that ni turah ka ngai tawp, a lo la dam reng maithei bawk a..ka hre lo."

"Enteh DAniel, Zorina chu khawi ami nge a nih a, tunge a chhungte, khawi atanga lo kal nge a nih tih ka lo hria ang. Information engkim ka hrilh zel che anga, ka mamawh hunah ka rawn hriattir dawn che nia."

"Awle."

Pu Chhuma chuan a motor chu a start a, "In thleng ka thlah dawn che nia." a ti a, tichuan an kal ta a. An tlan chhung chuan an ngawi dun deuh char char a, "Pu Chhum..ihh..Melody a dam em?" DAniel-a chuan a rawn ti deuh thut a. "Aw...a dam alawm." tiin Pu Chhuma chuan a lo chhang mai a.

Inthlahrun hmel tak hian, "Anih...ka chungchang a sawi thin em? Ka sawi awmzia chu, ka hming a lam ri ngai em?" tiin DAniel-a chuan a han zawt let a. Pu Chhuma chu a khi sak a, "A ngai thin khawp mai che, mahse i duh tawh miau si lova tiraw?" a han ti deuh kher a,

"Nilo, ka duh tawh lo a ni hleinem."

"Anih engvangin nge i kalsan si?"

"Pu Chhum, chungte chu a chhan i hriatthiam ve ka lo ring asin."

"Ka hrethiam lo chu a  nih hi.."

"Keimi ka ni tih i hria a, hmelma ka nei reng dawn. Tunah pawh ka nei der chu anih hi, a dinhmun hlauhawm a dah ka duh lo a ni."

Pu Chhuma chuan a aw a han thian kharh kharh a, "Ni e, ka hrethiam alawm. MAhse Daniel, thil pakhat ka hrilh ang che. Ka fanu Melody hi dinhmun hlauhawm ah engtik lai pawhin a ding reng alawm, a chhan chu police ka ni a. Dikna ka duh a, thil tidik lo tu te chu mi hausa leh politician pawh nise ka do zel thin. Chuvang chuan i pian ve hma daih atang leh Melody pawh a pian hma daih atang khan hmelma tam tak ka nei tawh." a han ti charh charh a.

A ngawi deuh vang vang phawt a, "Ka fanu Melody a lo piang a, a hma aiin hmelma ka nei tam. A chhan chu he kan ram zimte, state chawmhlawm Mizoram zimte ah pawh hian kum tinin misual an pung zel a. Mi lian leh mi chal lang apiangin sualna an tipung a, ka fanu hmanga min vautu hi tam tak an awm mek asin." a han ti leh a.

Daniel-a chuan a chil a lem dawk a, "Anih enge min hrilh i tum ber chu ni a?" tiin a han zawt a. Zaidam tak hian Pu Chhuma chuan, "Keimi i ni tih ka hria a, hmelma tunah i nei mek bawk. Mahse tuna i hmelma hi keimah nen tho kan bei mek a, kan tandun phawt chuan ka fanu venghim tur chuan nang leh kei hi kan tha tawk a ni." tiin a chhang a.

DAniel-a chu a lawm ru kher mai, "Anih chuan...Melody tan hian ka hlauhawm loh i ti tak tak maw?" tiin a han zawt leh a. Pu Chhuma chuan a lu lo bu nghat in, "Aw tehreng mai, DAniel. Ka fanu venghim tur hian i tling tawk a, ka hmelmate min beihpui tur hian i tling tawk bawk a ni. Ka fanu hi i bula a awm chuan, ka thla a muang daih zawk ang." tiin a chhang a.

DAniel-a chu a ngawi vang vang a, "Ka venghim ang, kei hian Melody hi ka venghim ngei ang." tiin a chhang a. "Awle a tha e, zaninah i lo leng thei angem?" tiin Pu Chhuma chuan a han zawt lehnghal a. DAniel-a chuan a en hru a, "Zaninah maw?" a ti hu mai.

"Aw zaninah, amah pawh ka lo hrilh lawk ang." tiin a lo chhang a. Daniel-a chuan a lu  a bu nghat a. Daniel-a in awmna chu an thleng a, "Anih phawt le." tia Daniel-a chhuah tum chu Pu Chhuma chuan, "Law aw..DAniel, thil pakhat leh chiah." a han ti a. Daniel-a pawh chu chhuak mai lo chuan, "Aw enge ni?" a lo ti vat a.

Pu Chhuma chu a han thaw hak a, "Engpawh nise, a tul fe te a nih loh chuan ka fanu hian Keimi i ni tih hi a hre tur a ni lo. Chu chu nangpawh i inthup thiam angai ang, i chiang em?" a han ti chang fak mai a. Daniel-a chuan a lu a bu nghat a, "Awle ka hria e." tiin a chhang a, a chhuak ta a.

*********************************

Zan a lo ni a, Melody chuan tum bur hian thleng a sil mek a. Pu Chhuma chuan sitting room atang chuan a han en vung vung a, "BAwihi, zanin chu inleng kan nei dawn nia aw.." a han ti a. Melody lah chuan, "Nei dawn a ni mai lawm." a lo ti hmuk mai. Pu Chhuma chuan nuih deuh vur vur pah chuan, "Englo ania, ka thianpa fapa ania." a han ti chu  Melody thlengsil lai pawh a tawp chat mai.

Apa chu ava melh a, "Tlangval maw?" a ti hu mai a. Pu Chhuma chuan nuih insum hram hram chung hian, "Aw ni e, aa...hmeltha a ti deuh che ani awm a. Englo ania, a rawn rim ve dawn che a nih chu." a han ti kual leh vel a. Melody chu a ngaihdan a ni lo nasa mai, "Engvangin nge min rawn rim anga? Ka peih teuh lo mai, ka leng chhuak daih dawn." a ti vin hlur mai a.

"Amak thin e aw...mizo nulate chu tlangvalin an rim thin a ni ngai. Thil sual pawh a ni hleinem, inngaizawng rawh u ka tihna pawh a nilova, i pasal tur ka tihna pawh a ni lo. Ka thianpa fapa a ni ve a, rawn len min dil miau sia, ka phal ta mai a nih kha." Pu Chhuma chuan a han ti leh a.

Melody chuan a thleng sil te chu a dim tawh lo kher mai, "Chupawh nise, inleng ka nei peih lo. Enge chutia i lo phal a, nangpawh? I ti awm ang lo lutuk, tu mipa mah ka duh lo." a lo ti vin leh hlur a. Nui deuh put put chung chuan, "A lo thleng tep tawh ang, hial ana." Pu Chhuma chuan a la ti ta deuh deuh va.

Melody chuan thleng a sil zo va, "Pa, i mawl thei emai. Ka duh lo tak tak ania, inleng neih ka peih lo." tiin a tap lek lek tawh mai. Chutih lai tak chuan kawngka a rawn in kik ta karh karh mai a, "Ehe amah a ni tawh ngei ngei ang." tiin Pu Chhuma chuan kawngka lam chu a pan a.

A hna bih dek dek a, Daniel-a a ni tih a hmuh chuan a khi suk mai. Melody chu ava en leh a, "A ni tak tak, a lo thleng ania." a han ti zawi sup a. Melody chu a mengrum kher mai, "Ninawm." tih pah chuan verandah ah chuan a chhuak a. Lehlam a hawi hmak mai a, Pu Chhuma chuan kawngka chu a hawng a.

DAneil-a chu a rawn lut a, "Ehe..i lo thleng tawh maw..saw, sawta saw..verandah ah sawn a awm. Va kal rawh, keipawh dawrah ka'n kal lawk ange, lo inkawm ru." tiin a chhuahsan daih mai. Lehlam hawi reng chung chuan Melody chu a lo ner nasa mai a, "Ka va han hne tak." a han ti zawi sup a.

Inthlahrung tak chuan DAniel-a chu ava phei a, verandah ah chuan ava chhuak ve a. Melody hnungah chuan a ding a, "I dam maw?" a han ti zawi sap a. Melody chuan a aw chu a lo hrechiang ngang mai, mak ti tak hian a meng hru a. Hnunglam chu a hawi nghal vat, a hma ah chuan Daniel-a a lo ding reng mai a hmu chu a ding khawng reng ringawt a.

"DA..DAniel, nangmah maw?" a ti hu mai. Daniel-a lah chuan a lo hrethiam lo kher mai a, "Aw...aw ni e, i pa khan a hrilh lawk lo che em ni?" a ti bah nuai mai a. Melody hlim lutuk chu a mittui a tla a, "DAniel, i..i lo kal amaw?" tiin a tap tuau mai a. Daniel-a pawh a hrilh hai hle mai, "Aw..hei ka lo kal chu a nih hi." a han ti leh hu a.

Melody chuan va panin a kuah thlawp mai, "Suala, ka ngaih zia che hi i hre lo. Tinge min kalsan mawh? Min kalsan tawh suh aw..,khawngaihin." tiin a tap ta hawm hawm mai a. Daniel-a pawh chuan a kuah let a, "Ka tihpalh, ka kalsan tawh dawn lo che." tiin a sam ah chuan a chul sak a.

An inkuah vang vang hnu chuan, "A awmzia chu..ka pa khan dawt min hrilh animaw? Min fiam a ni maw?" Melody chuan a rawn ti chhuak deuh hlawl mai a. "Eng dawt maw?" hrethiam lo tak chuan DAniel-a chuan a lo ti leh hu mai. Melody chu a nui vur vur a, "Engmah...engmah a ni leh lo." tiin DAniel-a chu a fawp vawng vawng a, ani pawh chuan a lo chhanglet rang kher mai.

********************************

Tlang chhip ah chuan Zorina chu a ding vang vang a, a mitthla chuan Zeros-a'n a mumang engkim a hmuh tir lai te, Keichala'n a unaupa, HRangkunga a bum lai te, a tak ang chiaha a hmuh laite chu a rawn lang chuai chuai a. A thinrim hmel kher mai, "Keimi...Daniel-a chauh lo pawh, keimi dang an awm anih chuan ka that vek ang." a han ti khur khur a.

A maimitchhing vang vang a, "He keimi hi i that a nih phawt chuan nangmah thlahtu i pu Hrangkunga chuan van atangin a lo en reng che anga, a chhuang ngawt ang che." tia Zeros-a'n a hrilh lai te chu a bengah chuan a ri nawn awn awn a. Thla lah chu a bial kulh mai a, a eng tha em em bawk.

Zeros-a khan a tir atang khan Pu Vana kawrkilh hmanga Keimi a beih khan a lu th(r)uai chhum a tum kha a nia, mahse a thei tlat lo. Khata tang khan keimi chu zuam chi a ni lo tih a hria a, lehlamah Belzebula hoten an lo bei ve chhen bawk nen. A naute pathum, Lazarus, Magnus leh Silas-a te lah a ring pumhlum ngam chiah bawk si lo nen.

Chuvang chuan Pu Vana kawrkilh hmang khan Zorina hi a lo hmang tangkai daih tawh hi a lo ni awm a, Zorina rilru leh ngaihtuahna zawng zawng chu a thunun vek a lo ni. Mahse Zeros-a chu Belzelbula khan hremhmunah a hnuk lut kha a ni a, Zorina ngaihtuahna leh rilru zawng zawng erawh a ngai rengin ala awm a, tihtawp mai theih a ni tawh hrih lo a ni.

Zorina chu muang chang chuan a rawn meng leh a, a ha chu a rawn hriam telh telh mai. A beng te chu rawn zumin a hmaiah chuan hmul a rawn awm tuah tuah a. A hnungzang atang chuan mei(tail) sei tak hi a rawn chhuak bawk a. Amah chu a lian telh telh a, chinghne-mihring ah chuan a chang leh ta.

Ring takin thla bial kulh mai en reng pah chuan a u ruih ruih mai a, a khawk hian a khawk nasa rum rum kher mai. A mitmeg pawl ram mai chuan a hnuaia ramngaw pilril leh thim em em mai chu a en kual a, "Zaninah hian mihring pakhat ka that leh anga, tichuan kha keimi tenawm tak khan min rawn zawng leh em em ang." a ti khur khur a.

***********************************

DAniel-a leh Melody chu verahdah ah chuan an la ding dun reng a, "Tlem te talin min ngai ve thin em?" tiin Melody chuan a han nghawk zeuh va. Daniel-a chu a khi suk a, "Ka ngai thei lutuk che alawm, ka stress nasa lutuk a. Min hriatthiam hram ka beisei, ka la hmangaih reng che alawm." tiin a chhang a.

Melody chu a lo ner sak a, "Ka awih lo emai, ka message te, call zawng zawngte pawh engmah i chhang duh lova. I number i thlak nge min block pawh ka hre lo, i reh hmak a. I sual lutuk, tinge hetia min tih?" titau deuh reuh chung chuan a han ti a, a tum deuh bur bawk a.

Inthlahrung tak hian Daniel-a chuan, "Ka duh vang pawh a ni bik hleinem..chubakah, hei...i bulah ka awm leh tawh alawm. Engkim a pangngai angin a awm leh tawh ang, ka kalsan tawh lovang che." zaidam tak chuan a han ti a. Rum deuh tak hian Melody chuan a melh a, "Bialpa dang te pawh ka lo nei hman daih thei asin, Mawla." a han ti vin hlur a.

DAniel-a lah chuan, "Ehe..i nei a mi? Duh dang i nei tihna mi?" a lo la ti hu zui. Melody chuan a lu ah chuan a kuk fawk a, "Nei lo nei lo, ka lo nei thut thei ka tihna a nih chu, MAwla." tiin a han vin leh deuh hrep a. An han nui dun leh rih thin, chutih lai chuan DAniel-a phone chu a rawn ri a.

A han en a, Melody pawh chuan a lo bih ve nghal vat a. Mahse hmeichhe hming a lo inziak ta tlat mai chu a mengrum kher mai, "Tunge Duhzuali chu?" a ti deuh hlur a. Daniel-a chu a khi suk a, "Ka thiannu ania." a han ti zawi sap a. Melody chuan nelawm loh tak hian, "Eheu, hmeichhe thian ka nei ngai lo i ti thin amaw tia? Min kalsan chhan chu ava chiang ta ve.." a ti deuh kher a.

"Nilo, teuh lo mai. I ngaih ang kha a nilo, Duhzuali hi chu hman zan lawka ka hmelhriat ania. A accident a, chu chu damdawiinah ka hruai a. Chuvang alawm, kan inhriat mai mai ni." tiin DAniel-a chu a insawifiah nghal zung zung a. Melody pawh chu a nui suk a, "Um ka ring che alawm. Chhang ta che khaaa, a la ring char char kha." a han ti a.

Mahse a chhan hma chuan a tawp daih mai, "Call let mai rawh." Melody bawk chuan  ahan ti leh a. DAniel-a chu a ner suk a, "NGai lo, nakinah ka zawt mai ang. Thik suh aw, ka thiannu tak tak. I duh chuan ka hmuh tir ang che, hmaichhanah ngei pawh ka ngam." a han ti leh a.

Melody chu  a nui vur vur a, "A ngai hleinem, ka ring che alawm." tiin a chhang a. "Tak tak maw?" Daniel-a chuan a lo ti leh a. A lu bu nghat nghat in, "Um tak tak, ka ring che alawm." tiin Daniel-a hmuiah chuan a han fawp zeuh va. Daniel-a pawh chuan a lo chhang let a, lungchim tak chuan an infawp vawng vawng a.

*********************

TO BE CONTINUE