KEIMI 2 : WHEN THE WOLF COMES OUT [MIZO FICTION SUPERNATURAL STORY] Written by : Aaron Malsawmdawngzuala Chapter - 1

 KEIMI 2 : WHEN THE WOLF COMES OUT

[MIZO FICTION SUPERNATURAL STORY]

Written by : Aaron Malsawmdawngzuala

Chapter - 1

***************************

(He thawnthu hi Keimi zawh hnu, Sichangneii leh Onoskelis te buai lai vela thil thleng a ni.)

Pa pakhat lui kal haw chu a duh aiin a tlai deuh va, khua a thim vek tawh hnuah pawh a motor dahna kawngpui a la thleng thei tlat lo. A torch light lah chu a lo chhe ve deuh tawh nge ni, a thim leh ang zuk zuk a. A SAngha man ho lah a thahnem angreng si a, a lo rit ve deuh bawk nen.

A hah tawh hle mai a, "A va han chhe tak, tinge maw a tha zawk kha ka lo ken mai loh le aww..." tiin a phun nuah nuah a. A kal zel a, a thleng dawn tep tih ah chuan a hnunglam atang chuan thawm a hre tlat mai. A ding chat a, rang takin hnung lam a hawi nghal a.

A light ken chuan  ahan en kual a, mahse engmah a hmu lo. Thehlei emaw, rul vel a nih ringin a ngaih chu a tha leh mai a, kal leh a tum chiah chu a ngai ang bawkin thawm chu a hre leh ta. A hawi let leh vat a, light chuan hnimbuk kar vel chu  ahan en kual leh a.

Chutah hnim kar atanga mitmu pahnih, pawl ram mai a en fuh thut chu a phu chiang kher mai. Ramsa kawlh engemaw tak chu a ni tih a chiang, mahse eng ramsa ber nge a nih chu  a chiang lo. Chutah a light chu a la thim leh daih zui a, a mangang kher mai. A beng vak vak a, a rawn eng leh zeuh zeuh thin a.

Hnim kar atang chuan chu ramsa chu a rawn chhuak ta a, a la ngur chhur chhur lehnghal a. Chu pa chuan a hlau kher mai, a light lah chu scond khat lek pawh  atha zo lo, a eng zeuh va, a thim leh nghal zel. Chu sakawlh chuan a rawn pan hnai zel a, a tawp a tawpah chuan a beng tha thei ta.

Mahse a en that theih meuh chuan chu sakawlh chu a lo awm hnai tawh ngang mai, a hma zawn pen 5 vel ah chuan a lo ding run tawh mai a. A hlau ngang mai, sihal ti dawn ila a ni bawk si lo. Chinghnia ti dawn ila, khatiang em em a chinghne lian kha a awm thei dawn em ni?

Mihring ang tak hian a ke pahnih chauh chuan a rawn ding ta ur ur mai a, ft 11 vel laia sang a ni. A hmul hian  ahmul thur mai bawk si a, chupa hlau lutuk chu a au chhuak thei lo hial a. Chutah chiang kek kawk hian chu sakawlh chuan a en a, a au khum ta vak mai.

Ramhnuai chu  a khawk rum rum thei hial a, a chil thli te chu chupa hmaiah chuan a per thlawp thlawp mai. A hlau lutuk chu a au ve vak a, a tlanchhe ta chiam a. A light chhe tak leh t(r)awng tak a ken ve chhun pawh chu a thlauh bo daih leh nghal, kawng hmu tha thei bawk si lo chu a hma zawnah chuan a tlan risk pawp pawp mai a.

Chu sakawlh lian tak mai chuan a rawn umzui ve zel a, thingkung te chu a su tliak rawp rawp mai. Vanneihthlak takin a bihruk san thei ta hlauh va, chu ramsa hlauhawm tak chu a hawi kual ruai a, a hram vak vak mai. A ring em em mai a, chupa chu him tawh mahse a la khur zawih zawih thei.

Chhum lah chu a zing nasa em em mai a, thla pawh a rawn eng ruih mai. He patling hi a hming chu Ramliana a ni, chutia thla a rawn en tak deuh thut avang chuan chu sakawlh chuan a hmu leh mai ang tih chu a hlau hle a. Vanneihthlak takin  ahmu lo hlauh, a bihrukna thingkung phen atang chuan Pu Rama chuan a han bihthla dek dek a.

Chu sakawlh chu muang chang chuan ramhnuai thim lamah chuan a kal zel a, mak tak maiin a te tulh tulh mai. Pu Rama chuan a en vang vang a, a mit te a han nuai thul. Mahse chu sakawlh chu a te zel a, a tawpah phei chuan mihring tiat chauh a ni a, mihringah a chang ni berin a lang.

A thaw huai a, a bihrukna atang chuan a chhuak a. A thlan te chu a hru a, "Engthil phiangsen nge maw ka hmuh kha le, eng ang ramsa nge ni ngai?" a ti nauh nauh va. Inveng rilru tak chung chuan fimkhur takin kawngpui lam chu a pan chho leh ta a, a motor awmna chu thlengin tluang takin a haw ve thei ta hlauh a ni.

*********************************

Zing dar 5 chauh a la ri a, DAniel Lalhriathlua chu exer la in a lo tlan leh thauh thauh tawh a. Anu leh pa a chan tawh a, amah chauhvin inluah in chhungte dang a nei si lo chu in a luah a. College pawh a kal chhunzawm tawh lo, a nu leh pa thih atangin thla khat chu a liam tawh.

A bialnu Melody nen pawh an inbe tawh ngai lova, an inthen tawh a ni ber ang chu. Melody pawhin a rawn be tawh ngai bik lem lova, an inhmu tawh ngai hek lo. Restaurant ah thawkin nilengin a inhawlh thin a, zan lamah delivery boy a ni thung thin a, chutiang chuan a nung ve tawk tawk a ni.

Chhungte a nei lo han tih khan nei lo tawp chu a ni lova, apa nau, a patea te chuan an bula cheng ve tura lak phei mai an duh a, mahse Daniel-a hian a duh tlat lo a ni. Mi ngawichawi a lo ni sa bawk nen, a nu leh pate thih atang phei chuan tumah a be lo ti ila a dik lo hran lovang.

Thenkhat amah hre ngai lo tan phei chuan tawng theilo amaw tih hial tur khawpa ngawichawi a ni a, a tul te ah lo chuan a ka a ang mang ngai lo. A hna chu hahthlak hle mahse, mihring chauh nilovin sakei a ni tel bawk a, a chau ve ngai lem lo. A duh chuan keimi a nihna hmang hian sum tam tak chu a ru chhuak teuh thei ang, mahse thil dik lo do tlat mi Daniel Lalhriathlua kha a ni tlat.

A hma a zing walk apianga a chhohna thin, tlangah chuan a tlan chho leh a. Kham hmawrah chuan dingin zing nichhuak chu a en vang vang a, a nu leh pate ngaiin a mittui chu a tla zawih zawih mai. A hoodie ipte chu a zen a, chutah Pu Vana kawrkilh, lunghlu ang mai a pawl vat vat chu a rawn phawrh chhuak a.

Nghet takin a hum a, mittui tla zawih zawih chuan a en vang vang a. Chu kawrkilh chu hlu hle mahse, thiltihtheihna tam tak nei mahse, atan chuan chhiatna thlentu mai chauh  a ni si. A nu leh pa a chan phah a, a in pawh a kan ral vek phah kha a ni a. A nu leh pate thihna chhan a ni a, a ko let leh thei si lo.

A hma thla khat chhung zawng zawng pawh khan Daniel-a hian kawrkilh hi a hmang eih lova, hmanna tur pawh a hre lova,  a hman thiam leh thiam loh hre turin Keichala a tihbo tih loh kha chu ala hman leh ta miah lo. A kawl mawl ve tawp a ni ber mai, hralh pawh  a tum chuang hek lo.

Hnuai lam chu a zuk bih a, kham tawp a kawr lian lem lo, tui lo luang thla hum hum chu a en a. Kawrkilh chu a lek kang a, a paih ta daih mai. KAwrkilh chu a tla thla vang vang a, kawrah chuan tla lutin tui chuan a len thla nghal vang vang a. DAniel-a chuan a mittui chu a hru zeuh va, tichuan in lam panin a haw leh ta a ni.

****************************

Inah chuan a thleng a, fai takin a inbual a. Rawng a bawl pah chuan youtube ah zingkar news chu a ngaithla a, pa pakhat an lo kawmna chuan a beng a verh zawk mai. A thil tih lai dah meuh chuan a phone chu a han en a, reporter hmeichhe pakhat hian pa pakhat hi a lo kawm mek a, "Anih Pu Ram, chu ramsa chuan a khawihna hman che em?" tiin Reporter chuan a han zawt a.

"Engtin mah chuan min khawih fuh lo, min khawih fu vaih chu nise ka sawm vek ang."

"Eng ang vela lian nge i tih khah?"

"Mihring ai chuan a letin a lian zawk, a lo berah ft 12 dawn a nih ka ring. Ke pali chu a nei ngei a, mahse mihring ang mai hian a ke hnung pahnih hmang khan a ding a, a ke hma kha chu ban ka vai ang deuh hian min um lai pawh khan a vai ve."

"Enge a ang i tih ber, eng ramsa nge ang i tih ber?"

"Sihal a ang ka ti ber, amah khan a hmui a zum a, hmul hlirin a khat bawk."

DAniel-a chuan mak  a ti kher mai, ngaihthlak pawh ngaihtlak chhunzawm tawh lo chuan a phone chu a dah a. A han ngaihtuah vang vang a, "Keimah lo keimi dang an awm em mawni le?" a ti nuah nuah a. Rawng chu a bawl zova, chaw a eikham hnu chuan a hna thawk tur chuan a chhuak leh nghal a.

******************************

Pu Rama sakawlh hmuh thu chu an veng chhung mai nilo, Mizoram pumah chuan nikhat thil thu lekah a darh ta chiam mai a. Tlangval thenkhat inla huaisen deuh phei chuan a zawn a zawn an tum hial a, thenkhat erawh chuan an awih lo hle bawk. Mahse Pu Rama te ang pa zaidam leh tangkai bawk si, patling ve meuh ina a sawi chu han awih loh chi ngawt lah a ni bawk si lo.

Thenkhat, amah hrechiang lo phei chuan lar duh vang ti ten an lo sawisel thul a. Mizoram news channel hrang hrang chuan Pu Rama chu an kawm a, thenkhatin fiamthu thawh nan an lo hmang bawk. Pu Rama hian a thil hmuh kha a puang zar pawh a ni bik lova, khami zan khan an thenawmpa a hrilh laiin an thenawmpa nupuiin a lo hre pha ve hlauh mai a, a lo sawi darh zawk a ni.

Reporter zinga pakhat, tlangval sang tha tak leh hmel pawh zahpuiawm lemloh tak mai, Zorina chuan Pu Rama te in chu a va thleng ve ta. A camera man, a cousin ni bawk Kimkima nen chuan an inzui lut a. Pu Rama chu an han kawm ve ta a, midang ho zawhna tho chu a zawt ve a.

Mahse a zawh thui zel hnu chuan, "Anih mihringah a chang i ti ta...a chang lai pawh chu i hmu vek tihna em ni? Nge ni a, movies vel i en hnem lutuk a i ngaihruat vel mai mai zawk?" tia a han zawt chiah chu a hma zan lawka thi lo chauh va a lo tlanchhiatna zawng zawng ngaihtuah letin Pu Rama chu a sa zak mai.

Zorina chu a han en ren rawn a, "Eng movies maw? Kei kum 50 chuang tawh hian chutiang film mai mai chu ka la en i ring em ni? He ka thil sawi zawng zawng hi dawt vek niin i ngai em ni?" a ti deuh ta khur khur mai a. Zorina lah chu a lo khi suk a, "Nilove...aaaa, mihring ngaihah chuan thil ni thei pawh niin a lang miau lova, zep lo chuan a awihawm loh ve deuh alawm." a la ti ta deuh deuh va.

Pu Rama hmel chu a nelawm loh tawh khawp mai, "Thil ni thei niin a lan loh vang rengin alawm keipawh hian mak ka tih reng, ka thil hmuh chungchanga min rawn kawm duh a nih chuan a pawi ka ti lo, mahse i awihloh thu min rawn hrilh tur a i lo kal a nih chuan interview hi ka peih lo. Vawiinah pawh hneawm khawpin ka lo hmachhawn tawh, ka ning tawh lutuk." tiin a vin deuh ta hrep mai a.

Zorina lah chuan confi tawkin camera lam chu a en a, "Awle, hei boruak a dik dawn lo tlat mai. Mite thil sawi ringawt hi awih loh tur tih pawh a lang chiang nghal awm e, kan duhtawk phawt mai anga.." a tih lai chuan vin zet hian Pu Rama chuan, "Chhuak rawh u..chhuak nghal rawh u." a ti ta hrep mai.

A ding hluai a, Zorina pawh chu a ding ve a. Thinrim tak hian Pu Rama chuan, "A mimal a huatna min nei em ni a? Tu phiangsen nge maw i nih le? I duh phawt chuan zaninah zu kal la, zu zawng ve rawh. A kalkawng pawh ka hrilh ang che, ka sangha man zozai te pawh ka thlauh teuh a, i hmu nual ang." a ti leh ta piap piap mai a.

Zorina chuan a hlauh loh hmel kher mai, "Ka awih lo pawh ka tih loh kha, ka pu. Keipawh nizan chu dinasaur kan inbulah ka hmu teuh a, mahse i awi lovang nang chuan.." ala ti zui. Pu Rama thinrim chuan Zorina te unau chu a nam chhuak deuh rawk rawk mai.

A nam chhuah pah chuan camera lah chu an la on reng a, "Awle khati zawng kha a ni e, he thuthang hi dawt niin lar duh vang mai mai tih kha in lo hre bawk dawn nia." tiin confi takin Zorina chuan a la sawi ham ham mai. "VAwikhat mah lo kal tawh suh ang che u, chuan he thu hi thudik a ni tih in hriat hunah chuan ngaihdam min la rawn dil ang." tiin Pu Rama chuan a an khum leh hrep a, kawngka chu a khar ri bur mai.

Kimkima chuan a u Zorina chu a han en deuh hu a, "Khavang khan kan lar phah dawn mi? Mi hian rilru chhia tiin min dem vak ange, Pu Rama thusawi kha an lo awih zawk ange?" a han ti nuah nuah a. Zorina chu a nui sak a, "Lar khel ve ve te chu, intih mualpho tawn angai alawm. Lo ngai reng rawh, min hawtu an tam pauh leh view a tam animai." tiin a lo chhang a, an kal leh ta a.

***********************************

Tlai thim thet thet a ni a, Daniela pawh a haw mek a. PAwisa nei lo leh a scooty t(r)awng tak neih ve chhun pawh a chhiat vek tawh avang chuan ke in a haw hnak hnak zel mai a ni. In a thlen chuan rawng a bawl nghal sawk sawk a, youtube ah chuan a ngai te ang bawkin news a ngaithla pah leh a.

Pu Rama sakawlh hmuh chungchang tho chu an rawn puang leh a, mahse Daniela tak pawh hian a awih chiah lem lo. Chutah Zorina kawmna chu a rawn auto play a, Zorina'n ngeiawm tak taka a zawh vel chuan a beng a verh leh ta zak mai. A thiltih lai dah chuan a han en leh a, Pu Rama thinrim rawn ang chho vel te chuan a nuih a tiza letling zawk a.

Darkar hnih liam ta chauh a upload a ni a, view nuai an tling nghal dawn der mai. A caption ah, RAMSA DANGDAI TAK HMU TU PU RAMA'N DAWT A SAWI EM NI tih ala hmang zui a, comment lah chu a tam em em mai lehnghal. Khik suk pah chuan, "Ava sual kher kher tak e aw..." a han ti nuah nuah a.

Eirawng a bawl zo va, chaw a ei zawh hnu chuan a tihdan ngai te bawkin khumah a mu a, hla a ngaithla a. A nu leh pa te chu a mitthla ah a hmu a, a mittui a tla zawih zawih mai. Kawngka rawn kik ri karh karh chuan a ti phu zawk mai a, a hla play chu a off a.

KAwngka ava hawng chu a rinloh lutukin a bialnu hlui Melody pa, Police Officer Pu Chhuma a lo ni reng mai. Inthlahrun hmel tak hian Pu Chhuma chuan, "Daniel, biak lawk che ka va duh ve.." a han ti a. Daniel-a chuan en pawh en lo hian, "Engthilah maw?" a lo ti hmuk a.

Pu Chhuma chu a thaw halh a, "Englo..i nu leh pate thihna chungchangah khan.." a ti dek dek chu Daniel-a chuan, "Nilo..Pu Chhum..duhtawk tawh rawh. Thla khat a liam tawh a, a tirah pawh tute nge that tih ah ka buai lo ka tih tawh kha. Ramsa sehhlum anga in ngai a nih chuan eng ramsa emaw berin a sehhlum a nimai." a lo ti leh hmak mai.

Pu Chhuma chuan a lu a bu nghat nghat a, "Ni e, a dik alawm. A tir khan jail tang tlanchhuak ta, Dustin Malsawmzuala a nih ka ring a, mahse post mortem atang khan sehna hnuhma a lang a, ramsa beihna a ang mah zawk. KA rawn biak duhna chhan che chu....tukinah Venglaia mi, Pu Rama'n a thil hmuh a sawi kha, kha kha tak tak a nih chuan i nu leh pate thattu pawh chu sakawlh chu a lo ni maithei asin." zaidam tak chuan a han ti leh a.

Daniel-a chu a khi suk a, "Nilove Pu Chhum...keichuan kha thil kha ka awih ve vak hleinem." tiin a lu a thing a. Pu Chhuma chu a han thaw hak a, "Pu Rama khu ka mi hriat chian em em mai a ni a, dikna duh mi, Pathian tih mi diktak a ni. Ani teh lul khuan dawt a sawi lovang, Daniel..Police ka ni a, i nu leh pate case kha ka kut a ni a, ka hna ka ti mai chauh a ni." a han ti leh a.

"Ka hria alawm, mahse kha case kha chu a tawp daih tawh amaw ka lo tia."

"La tawp love, Daniel. Ka hrilh tawh che kha, mihring emaw, ramsa emaw pawh nise, he case hi ka kut a ni."

"Anih enge min hrilh tum ber chu?"

"Kei chuan venhim che ka duh a ni, i nu leh pate thihna case hi ka chhui chhuah hma loh chuan ka awm mai mai thei lovang."

DAniel-a chu a ngawi vang vang a, "Pu Chhum...ka nu leh pa thattu te kha ramsa an nilova, tute nge an nih chu ka hria a ni." a han ti chiah chu Pu Chhuma pawh a meng kawk mai. RAng zet hian, "Engtin maw? I hria maw? Tute nge an nih?" a ti nghal chul mai.

"Sawi mah ila i awih chuang lovang." Daniel-a chuan a han ti chuai raih a. Pu Chhuma lah chu a za cheng tawh mai, "Ramsa seh an nilo tihna em ni? Mihring thil tih maw? Dustin Malsawmzuala a inrawlh em?" a ti leh chul mai a. Vin deuh thak hian Daniel-a chuan, "Nilo, Pu Chhum...min ngaithla rawh." a han ti deuh vak a.

Pu Chhuma pawh chu a ngawi a, "Ihh...heta ka sawi chuan i awih dawn lo...khawi emaw...hmun fianrial deuh vah kan kal a ngai." tiin DAniela bawk chuan a han sawi zawm a. Mahse Pu Chhuma chuan a hrethiam chiah lo, "Enge i sawi awmzia? Tinge hmun fian rial kher a ngaina?" tiin a zawt hu mai.

"Aaa...i awih zawk nan...ka hrilhfiah law law ang che." tiin Daniela chuan a chhang a. Pu Chhuma pawh chu a ngawi vang vang a, "Awle, i tih tlat te chuan le." a ti ve mai a. Tichuan an inphur chhuak a, tlema ramhnuai deuh lam pan chuan an inkhalh phei ta a. Rei lo te ah chuan an thleng vat a, a reh tha khawp mai.

DAniel-a chu a han hawi kual vel a, "Tumah an awm lo, Daniel...enge min hmuh tir i tum chu sawi vat mai teh, ka ngaih i ti tha lo rum rum ania." Pu Chhuma chuan a han ti a. Daniel-a chu a han maimitchhing vang vang a, mahse a rawn meng leh nghal vat. A kawr chu a en a, "Hei chu ka kawr lei thar ania, a chi loh." tiin a phelh a.

Kawr ha lo chuan a awm ta tung mai a, Pu Chhuma ngaih chu a tha tawh lo kher mai. Daniel-a chu rum tak hian a en a, "Daniel, eng thil nge maw tih i tum le?" tiin a vin deuh khur khur tawh a. Daniel-a chu a pen hnung zel a, "Pu Chhum...hlau lo la, chiai suh ang che aw....engtin mah ka ti na dawn lo che ania." a han ti chu rang lutukin Pu Chhuma chuan a pistol a phawrh nghal.

Daniel-a chu a tin a, "DAniel, tun bak chu ka sawi tawh lovang. Engthil atthlak mah ti suh, self defence hmangin kap hliam che pawh ni ila thiam lohna ka nei dawn hlek lo ania." tiin a vau nghal khur khur a. Daniel-a chuan a ban a phar a, "Engmah i hrethiam lo, Pu Chhum. Kei hi mihring pangngai ka nilo, keimi ka ni." a ti ta mai a.

Pu Chhuma chu a hawi a nasa mai a, "Enga? Kei..keimi a?" a ti hu mai. Ban la phar reng chung si chuan Daniel-a chuan, "AW...keimi ka ni. Ka sawi vek chuan i awih dawn lova, ihh...ka nu leh pate kha London Vampire ho thah a ni a, ka thlarau min laksak duh vang a ni." a han ti leh a.

Pu Chhuma chuan Daniel-a chu a en vang vang a, a nu leh pa a chan chu a rilru a buai phah ngei a nih a ring nghet bur a. Zaidam tak hian, "Daniel, puih i ngai a ni. Engmah thil atthlak ti lo la, ka pui ang che." a han ti chu DAniela chu a lawm hauh lo. Thinrim tak hian, "Nilo..Pu Chhum, mi a ka ni lo. I awih dawn lo tih ka hria, chuvanga helai hmuna hruai che ka ni." a han ti vin tuar a.

Pu Chhuma lah chuan, "I nu leh pate i chan kha i laknat lutuk vangin depression i nei a nih kha, DAniel. Min ring rawh, ka pui thei che." a lo la ti tang tang a. Daniel-a chuan a kham ta, "Awle...tawlh hnug rawh. Keimi ka ni chu i awih lo amaw? Lo en rawh, chiai suh ang che." tih pah chuan a tawlh hnung a.

Pu Chhuma chuan a silai ken chu a hum nghet sauh sauh va, "Daniel, last warning...anih loh chuan..." a sawi zo hman lo. Daniel-a chu keimi ah chuan a inti chang ta mai a, ft 9 vela sang, sakei ni bawk, mihring ni bawka a han chang mai chu Pu Chhuma chuan a en tlawk tlawk ringawt a.

A ngawi chiang kher mai, a pistol ken lai chuan a tin a. Khur zawih zawih hian, "Ni...nilo, kal bo rawh." tih pah chuan  a kap ta siah siah mai a. Mahse keimi chuan ngatan mah a ngai lo, a che eih lo bawk. Silaimu te chu keimi taksa ah chuan a tlum zo ve lo, leiah chuan per vek khawpin a tla hlawm tel tel riingawt mai a ni.

Pu Chhuma silaimu zawng zawng pawh a zo vek tawh a, mahse keimi lah chu eng tin mah a awm der mai si lo. Rang lutukin mihringah a intichang nghal a, Daniel-a a ni leh ta. Mahse mihringa a chang chiah chu a awm chu a lo sen vual tut mai a, na tih hmel tak hian a tuai vut vut a.

Ner nung nung chung chuan, "Enge khatia min kah vak kher a?" a la ti nuah nuah zui. Pu Chhuma chuan tawng ngaihna pawh a hre lo, "Nang...nang hi...sa..sakeiah i chang elaw?" a ti bah nuai mai. A kawr hak that mawlh mawlh pah chuan, "Ti khan i awih tawh em?" tiin Daniel-a chuan a zawt let a.

Mahse Pu Chhuma chu ala pangngai thei lo, "Engtin nge..engthil ne thleng ta kha?" tiin a la khur dar dar mai. Zaidam tak hian Daniel-a chuan, "Pu Chhum, khavang kha alawm chiai suh ka tihna chhan, i awih dawn silova, tikhan ka ti ta mai a ni." tiin keimi ah a chan theihna chhan te, Pu Vana kawrkilh chungchang thleng chuan engkim chu a hrilh ta vek a.

*******************************

Zorina thil post chu  alar hle a, thenkhat chuan Zorina chu an fak hle mai. A huaisen an tiin Pu Rama thusawi ringlo pawl ho phei chuan deuhsawh nan an hmang nasa khawp mai. Chumi zan ringawt pawh chuan Pu Rama chu a mualpho phah hle a, chutih rual chuan Zorina haw tu pawh an awm ve nuk bawk.

ZAn khat thil thu hleka chuti taka a mualpho ta mai chu Pu Rama pawh a zakin a ngaihdan a ni lo hle mai a, a ang taewp hlei thei lo a ni ber mai. An nu pawhin a ning ta  deuh aniang, a mut san hmak. A muthma pawna zung tura a chhuah pah chuan, "Kha reporter ve kha, enge maw a pawi ka sawi ni? Khati teh fakauva mi tih mualpho chu le...ala hre ve khawp ang." tiin ala phun nuah nuah a.

An zunin lam a pan pah chuan a thinrim chu a la inhrosa nasa mai, a zun mek lai chuan pawn lamah chuan thawm a hre ta tlat mai a. Mahse annu a nih ringin, "Thangi, Lalthang...i zung ve dawn mi? Nge i inthiar dawn?" tiin a han au lauh lauh va. Mahse tumah chuan an chhang lo, a han zung zo te te phawt a.

Tichuan zun in atang chuan a chhuak a, mahse tumah a hmu hauh lo mai. In lam pana let leh a tum chiah chu an huan pan thlakna step bula tu emaw lo ding reng chu a hmu a, a la palen hmel em em lehnghal a. A thim em avang chuan a hmel pawh  ahmu thei lova, a thla(shadow) erawh lang chiang tak a ni.

Lut ta mai lo chuan Pu Rama chuan a han enchiang deuh va, "Tunge ni? Khatah khan tunge awm?" tih pah chuan a va pan phei a. Chu thla chu a hmu chiang tawlh tlawh a, a lian tial tial bawk. A hlau deuh chu a ding chat a, chutah chu thla chu zawi muangin a bawk khup a.

Thla(moon) in a en phak na laia chuan a rawn bawkvak phei ta, a lan chian meuh chuan a hma zan lawka a hmuh, chinghne lian tak ang maia hmul buk chhup bawk kha a lo ni. A dum hian a dum hmul thur mai a, a ngo hriam tak atang chuan a chil thli a fan zawih zawih bawk.

Pu Rama hlau lutuk chu au a tum a, mahse a au hma hma chuan rang zet hian chu sakawlh chuan a va zuan a, a hrawkah chuan a seh a, thisen a per chuai chuai mai. SAkawlh chuan  ala duh tawk mai lo,  a dulah te, a ke ah te leh a banah te chuan a ham rang nasa mai a.

A ngur chhur chhur bawk a, a duh tawk hnuah chuan van lam a hawi chho vang vang a, a u ta ruih ruih mai. A thawm chu hria in Pu Rama nupui Pi Thangi chu a harh zawk mai a, "Ehe...sihal em ni? Nge ui zawk....ava han hram hnai em em ve?" tih rilru nauh nauh pah chuan a khum atang chuan a tho chhuak a.

A pasal lah a lo lamu ve bawk si lo, "Ani pawh chu a lo la mut loh le...engemaw a tih em em ni." tiin a han phun chhunzawm nuah nuah a. Room atang chuan a chhuak a, TV lah a lo en tawh bawk si lo. Kawngka pui tlema lo inhawng chu a hmu a, "A la inthiar reng amawni le?" tia phun leh nuah nuah chung chuan kawngka lam chu a pan phei zel a.

Pawnah chuan ava chhuak a, a rak nasa kher mai. A pasal ruang, thisen nena inchiahpiah nuai a awm chu a va hmu ta mai a nih chu. A thingthi hnawk a, "Nilo....a ni thei lo.." tiin a tap vak vak a, thenawmte pawn a thawm hria in an rawn chhuak khawm a, ruang chu an buaipui nghal bawk a, mahse kha sakawlh erawh kha chu hmuh tur a awm tawh lo.

*****************************

Daniel-a in luah ah chuan Daniel-a leh Pu Chhuma chu an thu dun a, "DAniel, ka la awih thei chuang lo. Tumaw Pu Vana chu ni a? Chuan...Zeros-a..Lodon vampire...enge awmzia ni nei nuai?" tiin a hawi a hru tawh mai. Daniel-a chu a thaw hak a, "Kha vang kha alawm khalai hmun fianrial a, engkim awih tir tur che a keimi ah ka intih chan law law ni..tinge ila awih loh cheu va?" tiin a lo zawt let hlur a.

"Ka hre bik lo, ka mumang vek ang mai hian ka la hria."

"Ka duh phawt chuan keimi ah ka inti chang leh thei ania...i la awih loh cheu chuan.."

"A tul lo, a ngai lo. Vawikhat kha a tawk, ka hmu duh tawh lo."

"Enteh Pu Chhum, ka nu leh pate thattu chu Zeros-a a ni a, mahse hremhmunah ka thawn kir tawh. I awih mai lovang tih chu ka hria, mahse kha bak khan ka hrilh fiah thiam lo che."

Pu Chhuma chu a han inngaihtuah vang vang a, "Han awih lo ngawt dawn ila, sakeiah i chang thut bawk sia. Engemaw ruih ka neih ka hre bawk si lo, ka thil hmuh kha ka la awih thei lo a ni." a han ti nuah nuah a. Daniel-a lah chuan, "Ka duh chuan keimi ah ka inti chang.." a tih lai chuan vin lek lek hian Pu Chhuma chuan, "A ngai lo ka tih tawh kha...aw..keimi ah i inti chang thei...a tawk." a lo ti hlur tawh mai.

Inthlahrung tak chuan Daniel-a chuan, "Ka tihpalh." a han ti zawi sap a. "Engtin nge hremhmunah chuan i thawn liam? Khawi hremhmun nge i sawi? Bible-a meidil kan tih hi em ni?" tiin Pu Chhuma chuan a zawt leh a. Daniel-a chu a ner deuh nung a, "Ka hrethiam chiah bik lo kha chu...han sawi zau ka duh viau nangin, hei deliver tur pathum ka nei a, ka kal a ngai tawh a ni, Pu Chhum." inthlahrung tak chuan a han ti a.

Pu Chhuma'n a chhan hma chiah chuan a phone a rawn ri a, "Hello Officer Chhuma...engmaw? Enga? Pu Rama maw? Awle ka lo kal nghal e." tiin phone chu a dah leh nghal a. HRiat chak hmel tak hian Daniel-a chuan, "Enge ni a? Pu Rama chungchang bawk em ni?" tiin a lo zawt nghal a.

Pawi tih hmel tak hian Pu Chhuma chuan a lu a bu nghauh va, "Aw ni e...thah a ni." a ti ta mai a. DAniel-a chu a meng phawk nasa mai, "Enga? Thah a? Pu Rama an that amaw?" a ti hu mai. "AW...ramsa sehna hnuhma bawk a ni....i nu leh pate hliam ang chiah kha a nih hmel." tiin Pu Chhuma chuan a chhang a.

************************

TO BE CONTINUE