KEIMI 2 : WHEN THE WOLF COMES OUT [MIZO FICTION SUPERNATURAL STORY] Written by : Aaron Malsawmdawngzuala Chapter - 6 (LAST)

 KEIMI 2 : WHEN THE WOLF COMES OUT

[MIZO FICTION SUPERNATURAL STORY]

Written by : Aaron Malsawmdawngzuala

Chapter - 6

(LAST)

********************

Hotel pakhatah chuan Kunal-a chu a thleng a, a silai ruk pawh chu a la kawl reng a. Room a lut chiah chu rang takin a intifai nghal sawk sawk a, a inthlak zawh hnu chuan suit case chu khumah a dah a. A han hawng leh a, silai chu a han en leh vang vang a. Khawvel pupuia silai man to ber a kawl mek tih a inhria a, a hlimin a lawm ngei mai.

Silai bulah chuan damdawi niawm tak, tuiril hi a awm a. Chu chu a mu(ammo) a ni a, pakhat chiah a awm bawk. Japanese putar, rawn petu pa khan, "A mu hi khawih miah lo la, i duh duh dana lo sawngbawl ve tum suh ang che, chhiatna namen lo a thlen thei ania." tia a sawi chu a hrechhuak a.

Mahse khawih chhin a chak ta tlat mai, a en ta vang vang mai a. Suitcase chhunga awm tho, lehkha them chu a la chhuak a. Instruction vel chu chhiar a han tum a, mahse Japanese tawng deuh hlira a lo inziah avang chuan a hrethiam thak lo. A mu chu a la chhuak a, tuiril hring(green) niin a tle deuh vat vat mai.

Silai chu a la chhuak leh a, a mu thunna tur awm ang chu a han en kual a.  A vawnna hnuaiah chuan a mu thunna tur leng tawk chiah chiah hi kua a lo awm a, a thun chhin ta. A thun chiah chu silai chu a rawn eng vet vet a, a ri vu vu mai. A hlauhthawn deuh avang chuan a la chhuak leh a, suit case ah chuan a thun fel leh a.

Chutih lai chuan a phone a rawn ri a, a boss a lo ni. "Hello, Boss..hotel ah ka awm a. Ka rawn hrilh dawn chiah che a, silai chu ka la kawl e." tiin a han insawi fiah nghal zung zung a. "A tha e, a rang thei ang berin ka naute hruai haw tur che in ka rawn tir ang." tiin a boss chuan a rawn chhang a.

***************************

Melody chu a harh hlawl mai a, mahse a awmna chu a lo thim reih ruih hle mai. Room nuam lem lo takah hian khumah a lo mu a, a kut leh ke te chu phuar beh vek a lo ni. A ka chu puanchhia a hnawh a lo ni bawk a, a hlauthawngin a mangang hle mai. A tal vak vak a, mahse a phuarna hrui chu a nghet lutuk tlat.

Chutih lai chuan room kawngka chu a rawn ri rawk a, Zorina leh a nau Kimkima an rawn lut a. Melody chuan rum tak hian a en a, a tal vak vak ringawt mai. Zorina chu a han nui deuh suk a, "I lo harh thei maw..thiannu? I ril te a tam em, hei...zan a ni mai dawn sia." a han ti deuh ham ham a.

Mahse Melody chu a ka hnawh a nih tlat avang chuan engmah a sawi ve thei lo, "A mak i ti viau ang tiraw? Tunge ka nih a, engvanga hetiang thil hi i chunga ti nge ka nih min zawt ngei ang tiraw?" Zorina bawk chuan a han ti leh vel a. Kimkima erawh ngawi rengin a kilah chuan a lo ding reng a, nuam a ti chiah lo tih a hmel atang chuan a hriat hle bawk.

Zorina bawk chuan sawi zawm leh in, "Ka hrilh fiah ang che, Bawihte...i bialpa Daniel-a kha maw...ka hmelma a nih kha." a ti ta mai a. Melody chuan mak a tiin a meng phawk nasa kher mai, "Nia, mak i ti dawn tih pawh ka hria alawm. MAhse nang hi loh theih lohvin ka hman tangkai che angai a ni, min hrethiam dawn nia." Zorina bawk chuan a han ti leh a.

A sana a han en zeuh va, "Ka thang kam ka zuk en lawk ange aw..." tih pah chuan Kimkima lam chu a va pan a. A darah chuan a beng thak thak a, "Lo veng ang che, chuan he hmeichhia mai mai bum theih hian lo awm suh ang che." tiin a han vau lawk khur khur a.

Kimkima chuan a lu a bu nghat a, "Awle ka hria e." a ti khur dar dar a. Zorina chhuah a tum chu Kimkima chuan ava um zui a, "LAwk aw, U Zorin." a han ti a, Zorina pawh chu a ding a. Kimkima chuan a chil a han lem dawk a, "Ihh...chinghnia ka ni ve tak tak em?" a han ti zawi sap a.

Melody chuan an inbiak lai chu lo en reng mahse an tawng zawih em avang chuan an sawi ri a hre pha lo, "Ni e, mahse ila hmang ve thiam lo. Kan thlah zawng zawng chu chinghne-mi vek kan ni, chu chu hre rawh." tiin Zorina chuan a chhang a. Kimkima chuan inthlahrun hmel tak hian, "Mahse..nizanah pawh chan ve ka tum a, ka thei miah lo." a han ti zawi sap a.

Zorina chu a thaw hak a, "I la hmang thiam ve lo a nih kha, ka thusawi awih phawt la, nakinah ka zirtir ang che." tiin a chhang a. Kimkima pawh chuan a zawh chhunzawm tawh lem lo, Zorina chu a kal ta a. Kimkima chu a maimitchhing vang vang a, "A sawi dik, ka u khan a sawi dik a ni." a han ti zawi leh sap a.

*****************************

Hotel intercom a hman theih mai loh avang chuan complain turin Kunal-a chu lobby lamah a chhuk thla a, mahse a thlen hma deuh chuan a tawp chat mai. Receptionist ho leh police lo inbe mek chu a hmu a, chung police ho lah chu vai deuh vek an ni leh nghal.

A hlauthawng chu a let chho leh vat a, a room ah chuan a inkalh khum nghal. A vei kual a vei kual a, "Engtin nge? Engtin nge min rawn zawn hmuh theih?" tiin a inbe mawlh mawlh a. Tlan chhuah mai ngaihna a hre bawk si lo, "Keimah vanga lo kal an ni em? Mumbai police an ni ngei chuan ka hre bawk si." a han ti leh nuah nuah a.

Chutih lai tak chuan a room kawngka chu a rawn inkik ta karh karh mai le, a hawng ngam lo nasa mai. Tihdan tur a ngaihtuah char char a, kawngka chu an rawn kik na tulh tulh bawk si. A thlan a tla zawih zawih tawh a, tukverh chu hawngin a han dak thla a.

3rd floor ah daih a awm bawk sia, a sang ropui bawk si nen. Han zuanthlak mai chi a ni lo, chutah glowbracer silai chu a humhim a ngai bawk si. Chutah le, "Kunal Roy...khatah khan i awm tih kan hria ania. Police kan nih hi, kan hual vek tawh che, rawn inpe mai rawh." an rawn la ti zui.

Chutah zet zawng, amah man tura rawn kal an ni tih chu a chiang ta. Chubakah Kunal-a hi sawi tawh ang khan mafia hlauhawm lutuk a ni a, smugling vanga vawi tam tak jail-a lut chhuak reng a ni bawk a. A tlan chhuah loh leh a pawl te puihna hmangin a chhuak thul, tiang khawpa WANTED chu a ni.

A tawpah chuan police te chuan kawngka chu an ti chhe ta nge nge a, an lut ta huk mai. Pistol nen chuan room ah chuan lutin an tin kual nghal a, mahse Kunal-a hmel reng reng hmuh tur a awm lo. An zawng kual a, bathroom ah te chuan lutin an en chhuak vek a.

Mahse an hmu tlat lo, a thawmhnaw dahna suitcase erawh ala awm a, mahse kha silai kha a awm miah lo bawk. Kunal-a tukverh atanga chhuak in silai suitcase nen chuan hnuai lamah fimkhur takin a lo lawn thla mek chu niin, vanneihthlak takin a him hlauh a ni.

***********************

Melody chu phuar hlawm reng a la ni a, khumah chuan ala mu reng bawk. Baseball bat hum ran chung chuan Kimkima chuan ala veng reng a, a zam hle a ni tih chu Melody chuan a hmuh hmaih hauh lo. An ngawih dun reng hnu chuan, "Ka u leh i bialpa buaina chu engpawh lo nise, ka u hi tihbuai mai mai chi a nilo." Kimkima chuan a rawn ti chhuak deuh hlawl mai.

Mahse Melody chuan a chhang lo, chhang tur pawhin a ka chu an la hnawh tlat vang a ni. Kimkima bawk chuan, "Ihmaw..ka u hi maw, i awih lo maithei a...chinghnia ah a inti chang thei a ni. Ka mit hmuhh lai ngei pawhin a intichang, keipawh chinghne-mi ve tho ka nia, mahse tlem a la practice nasat deuh ka ngai a." a han ti leh a.

A tho deuh thut a, "I bialpa Daniel-a kha, sakei ah a intichang thei a tia. A tir chuan ka awih lova, mahse ahnuah amah chinghnia-ah a intichang a. Chuan kan thlahte zawng zawng, chinghne thisen kan nei tih hre map lova kan lo liam zung zung kha, keimi ho vang vek ania. Tunah hian phuba a la dawn a ni, ka u hian.." a han ti leh nuah nuah a.

Melody chuan mak pawh  ati vak lo, a chhan chu Zorina te unau hi damlohna engemaw nei, rilru buai an nih chu a ring nghet bur zawk a ni. MAhse DAniel-a ber kher chutia an hmelmak erawh mak a ti angreng hle a, sawi duh nei niawm tak chuan a han tal deuh vak vak a.

Kimkima chuan ava pan hnai a, "Sawi duh i nei em ni?" tiin a han zawt a. Melody chuan a lu a lo bu nghat mai, Kimkima chuan a ka hnawhna chu a phelh sak ta a. Chuveleh Melody chuan, "Tunge i hming?" tiin a zawt nghal a. "Kimkima ka nia." tiin tha tak chuan a lo chhang ve mai bawk.

"Kimkim, min chhuah rawh. Chinghne-mi...keimi tih vel kha i ngaihtuahna mai mai a ni. I u hian a bum che, dawt a hrilh che a nih kha." tiin fuih pawrh a tum nghal a. Mahse Kimkima chu chuti mai a bum awlsam a lo ni bik hauh lo, "Ka u khan tiang hian i sawi dawn tih min hrilh lawk vek alawm." a lo ti daih mai.

MElody chuan a chil a han lem dawk a, "Ngaithla rawh, i u hian a bum che a ni. Chinghne mi i ni lo, ani pawh a ni lo. Chuan DAniel-a pawh ka hre ngai lo, hei hi inhriatthiamloh vang mai mai a ni. Tunge ka nih pawh i hre reng reng ami?" tiin a han zawt a.

Kimkima chu a ngawi vang vang a, "Aih, ka vawikhat hmuhna che." tiin a chhang a. "Anih chuan tinge min man? Min hre si lova, Daniel-a pawh ka hre ngai lo bawk." Melody chuan a lo ti leh a. Kimkima chuan a melh ngai a melh vung vung a, "Ka u..ka u in ti turin min ti. Keini hi Hrangkunga thlah kal zel, chinghne thisen kai kan ni." tiin a han thaw deuh halh halh a.

A rilru chu a buai deuh tan tih chu Melody chuan a man thiam ta, "Enteh Kimkim, i u kha tunge a hming khah?" a han ti kual leh te te a. "Zorina a nia." tiin Kimkima lah chuan tha tak hian a lo chhang leh mai a. "Aw...Zorina...Zorina hian a bum che." a han ti leh a.

"Min bum lovang, min hmangaih alawm."

"I u chauh hi chinghne-mi a ni, nang chu i ni ve lo."

"Engtin nge i hriat? Engmah i hre lo, ngawi hmak rawh."

"Ka hria, ka hre vek alawm. I u hian min man a, min thah a duh a ni. I u hi serial killer a ni a, nang chu a hmang tangkai mai mai che a ni."

"Anih chuan..kei hi chinghnia ah ka inti chang ve thei lo amaw?"

"Thei lo, amah chauh khan a thei. Dawt a hrilh che a nih kha, a bum che ka tih chu.."

"I hre lo, ka u pawhin i inti chang ve thei reng a, mahse ila hmang thiam lo mai mai min ti alawm."

"Anih chuan han intih chan tum teh...i theih miah loh kha...diktak chuan maw, i chan ve a hlau zawk..amah aia ropui i nih a hlau zawk."

Kimkima mitmeng chu a dik lo tan ta a, Melody chuan a lo hmuh hmaih lo nasa mai. A thil plan chu a fuh chho dawn niin a hria a, "Kimkim, min ngaithla teh. Hmanni lawkah ka nu ka chan a, ka pa chauh hi ka neih chhun a ni tawh. Khawngaihin min chhuah rawh, anih loh chuan i u hian kan pahnihin min that duh mai ang." a han ti leh a.

Kimkima chu a ding hluai a, "Nilo..ka u aia ka rin zawk nachhan tur che hi ka hre lo. I nu i chan a, i lungngaih pui viau amaw? Kei hian ka u lo chu enkawltu tur dang ka nei tawh lo asin, chutah ka pian pui unau pawh a ni lo lehnghal. Tun thleng hian ka nu leh pa diktak te hi tute nge an nih pawh ka hre lo asin, ka u Zorina hian min hmangaih a, engtikah mah min thah a duh ngai lovang." tiin a vin ta hrep mai a.

Chutia a nu leh pa pawh tunge a hriat loh thu a sawi chuan idea tha tak mai Melody chuan a ngaihtuah chhuak ta, "Ni reng e, Kimkim...i cousin a ni lo. Zorina hi i tan chuan  mihrang a ni, chuvang chuan a hmang tangkai che a ni." a han ti leh a. Kimkima chuan rum taka melh chung chuan, "Engtin nge i hriat?" a han ti leh khur khur a.

"Zorina chu chinghne-mi a ni a, a sawi ang chiah khan an thlahte zawng zawng chu an ni vek. Mahse nang chu an thisen zawmpui i ni ve lo, chuvang chuan dawt a hrilh che a ni. Anmahni angin a sawi che a, an thlah zingah tel tak tak ta la chinghnia i ni ve thei nghal ang chu.." tiin MElody chuan a han fuih pawrh leh a.

Kimkima pawh a ngawi ta vang vang mai, "Ka ni...ka ni ve lo maw?" a ti zawi sap mai a. Rang zet hian, "Aw...hman tangkai char char che a tum alawm, hriatthiam tum ta che. Enteh Kimkim, misual i ni ve lo. Khawngaihin min chhuah la, ka pui thei che." Melody chuan a lo ti leh vat a.

A va pan hnai a, "Awle, ka chhuah ang che. Min pui thei tak tak ang maw?" a ti ta nge nge a. Melody chu a lawm rilru kher mai, "Aw..ka pui em em ang che. Misual i ni lo tih ka hria alawm, i chungah engmah a thleng lo anga, police pawh ka hrilh hek lovang." tiin a lo chhang leh vat a.

"Anih...anih ka u chu engtin nge a awm dawn?"

"A tha mai ang...min chhuah phawt rawh."

Kimkima chuan a hreh hle mai, mahse Melody an phuarna chu a phelh ta nge nge a. A phelh zo chiah tih ah chuan rang lutuk hian MElody chuan a kuai thut a, chhuatah chuan a bin thal pawp mai. Kimkima rawn tho leh chu baseball bat chu Melody chuan a la vat a, a lu ah chuan a hlap pawp mai.

Kimkima chu a thal tawp mai a, nikhawhrelovin a awm nghal der mai a. Melody chuan a phone chu a zawng kual nghal a, mahse ala hmu mai lo zui. Zorina a lo let leh vat a hlauh avang chuan inchhung chu a chhuahsan ta tawp a, pawna a han chhuak chiah chu ramhnuai pil ril takah a lo awm reng mai.

****************************** 

Zorina chuan a thang kam chu a han en kual a, tha  ati ngang hlawm mai. A lu a bu nghat nghat a, "Umm...Daniel, i theih phawt chuan i unaunu zawhte dum nen khan min rawn bei ta che u." tiin a han khi suk a. Chutah a hnar chu a han len a, sakei rim a hre ta tlat mai le.

A nui var var a, "I awm hnai tih ka hria, lo kal rawh...rawn chhan mawlh rawh, i bialnu hi.." tiin in lam chu a pan leh ta a. A va thleng a, kawngka pui lo inhawng huau mai a hmuh chuan  a hlauthawng ngei mai. RAng lutukin inchhungah chuan a lut nghal a, Melody an phuarna bedroom kawngka pawh chu a lo inhawng huau mai.

A lu a dawm vang vang a, "Ka hlauh ang ngei ngeiin maw..." tih pah chuan a tlan lut leh nghal a. A nau Kimkima lo let reng a hmu chu a phu chiang kher mai, chhuatah chuan thisen a kawi nuai bawk. "Kima..Kimkim..BAwiha, harh teh.." tiin a sawi vak vak a.

Mahse a harh thei thak lo, Kimkima chu a thaw tawh lo hrim hrim. A mar a han zawng a, a hmu zo lo. Melody chuan a lo vaw hlum der chu niin, a thinrim lutuk chu a au hian a au vak vak a. Chinghne lian em em maiah chuan a intichang nghal a, tukverh keh rawp khawp chuan a zuang chhuak nghal.

Melody chu a zawng kual nghal a, a thinrim lutuk chu a mitmeng pawh a sen vek thei hial a. "Ka va han seh hlum dawn chiang che em...Hmeli, i chak dawn lo. Nangpawh ka that che anga, i bialpa DAniel-a pawh ka that ang." tiin a inhrosa vak vak mai. A hnar chu a han len leh vat vat a, mihring rim hnai takah a hre tlat.

***********************

DAniel-a pawh keimi ah intichangin ramhnuaiah chuan a tlan kual a, Melody chu a zawng ve mek a ni. Khua a thim tan der tawh bawk si a, a mangang tawh hle mai. A hnar chu a han len ve vang vang a, mahse mihring rim emaw, Zorina rim reng reng a hre thei der mai si lo.

A kal zel a, reilote hnuah chuan hrui niawm tak hi a pal zeuh mai. Enge maw ri chat hmawk hi a hria a, chutah a chunglam a han hawi chu saphai lian em em mai hi a zawnah chuan a rawn tla ta mai a. A taksa chu a zial nghal a, a buai hman teuh kher mai.

Mahse awlsam zet hian a tal chhuak a, saphai chu bung 3 velah a chhuah a, a that chiang kher mai. Thinrim tak chuan a hahum vak vak a, "Thang i lo kam vel amaw, i awm hlat tawh dawn loh tawp chu." a han ti zawi sap a. Mihringah intichangin a phone a phawrh a, Pu Chhuma chu a call a.

"Hello, Pu Chhum...location ka rawn thawn che a, ka GPS hi ka off lo anga, in rawn chhui zel dawnnia. Mahse thang a kam nual a nih hmel a, fimkhur hle ang che u." a ti a. Pu Chhuma pawh chuan, "AWle DAniel, kan lo kal nghal e." tiin a lo chhang a. Phone chu a dah a, keimi ah intichangin a tlan leh nghal char char a.

A tlan liam hnu deuh lawk chuan Melody chu a rawn thleng ve hlawl mai, saphai ruang a hmu chu a phu nasa em em mai lehnghal a. A uak tuar tuar mai, kal leh mai a tum chu a hnungah chuan Zorina a lo ding reng mai a. A ding chat mai, "Ka nau i lo vaw hlum amaw?" tiin Zorina chu a insehruh nasa mai a.

Melody chuan a chil a lem dawk a, "Enteh..Zo..Zorin. I rilru a buai vang a nih kha, i nau kha tihpalh vang mai chauh a vua ka ni, a thi tih pawh ka hre lo. Zorin, eng chinghne-mi mah i nilo, i suangtuahna mai mai a ni. Daniel-a pawh tunge a nih ka hre lo, kahwngaihin min kal tir rawh." tiin a ngen a.

Mahse Zorina chuan a lu a thing a, "Nilove...ka that dawn che. Chuan i hre diklo zawk..kei hi chinghne-mi diktak chu ka ni. Daniel-a bialnu i ni tih pawh ka hria, chuan i bialpa hi mihring pangngai a ni lo, sakei a ni, keimi a ni." a ti leh khur khur a. Melody tawng leh hma hma chuan chinghnia-ah a inti chang ta mai a, Melody chuan a hlau kher mai.

A ding khur zawih zawih a, tawng nachang pawh a hre lo. Ft 12 dawna sang chu chinghne-mi chuan a melh khur tawh mai si a, Melody chuan zun a cheh lo chauh. TLanchhiat mai nachang pawh a hre lo, a thlan a tla zawih zawih mai. Chutah chinghnia chu rawn tawng chhuakin, "Ka that phawt che anga, chumi zawhah i bialpa.." tih pah chuan a rawn zuan thut a.

Melody chu a tlanchhe nghal a, chu werewolf lian zet nen chuan an inum ta ngat ngat mai. Mahse Melody chu a tlanchhe rei thei lo, a inchhuih a, ala tlu zui. Werewolf chuan a rawn din chilh a, Melody tan chuan tlanchhiatna tur reng a awm tawh lo. A thi ngei dawnin a inhre tawh a, a maimitchhing tawp.

Werewolf chuan Melody chu zuk th(r)am a tum a, mahse hnunglam atang chuan tu emaw hian a mei(tail) ah chuan a lo pawt tlat mai. Chutah a vir lawp a, thingkung lian tak delh tlu rawp khawp chuan a theh leng dawr mai. Melody-in mak ti tak chuan a lo en reng a, Duhzuali, Cat LAdy ngei mai kha a lo ni.

Melody chu ava pan a, "Tlanchhe rawh." a ti vak a, Meody pawh chu rang takin a tlanchhe nghal. Werewolf chu a rawn tho leh a, "Nang bawk maw...tun tum chu ka chhuah tawh dawn lo che." tiin a rawn pan phei ve nghal a. An insual ta chiam mai le, mahse a hma zan ang ngawt chuan Cat LAdy pawh a che tha thei tawh bik lo.

*****************************

Chutih lai mek chuan Kunal-a pawh chu ramhnuai ah vek chuan a lo tlan chhe mek a, police te chuan an umzui a. Kha japanese putar, space gun rawn petu kha a haw leh lam tur an lo man chhuak a, Kunal-a awmna a lo puan vek a lo ni. Suitcase chu ala khai reng a, a mangang kher mai.

A ralthuam neih chhun a pistol lah hotel ah a theihnghilh daih bawk si, chu a space gun kawl lai lah chu hmang ringawt turin a hrechiang bawk si lo. Ramhnuai lah chu a thim hian a thim khup mai si a, a tlan risk deuh pawp pawp a ni ber mai. A inchhui tlu leh deuh khut khut thin bawk a, a hah tawh takzet.

Chutah police te chuan an rawn hnaihchilh zel tih an thawm atang chuan a hria a, uisathiam nen an nih avang chuan an man ngei dawn niin a inngai vek tawh. A han ngawi vang vang a, a insehruh a. Rum taka meng chung hian a hawi chhuak a, "Nangni kutah mai mai hian ka thi dawn lo." a ti khur khur a.

Suitcase-a silai, Glowbracer space gun chu a phawrh chhuak ta mai a. A mu, tuiril niawm tak chu a thun bawk. Police ho lah chu an lo hnai zel a, an torch light eng phe zuai zuai pawh a hmuh theih tawh. Kunal-a chuan silai chu a lek kang a, police ho lo pheina lam chu a tin ta ran mai.

An rawn thleng hnai zel a, thawm pawh a ring tulh tulh mai. Kunal-a chuan silai chu a hum nghet sauh sauh va, "Kan nih nih kan ni anga nimai lawm." tiin a khi suk a. Silai chu a trigger a han hmet a, mahse engtin mah a awm lo. Police rual leh uisathiamte chu an rawn lang tan ta, a mangang kher mai.

A han enchiang a, on-na tur niawm tak hmeh tur hi a lo awm a, a han hmel chhin a. Chutah le, silai chu a rawn eng ta vet vet mai a, a rawn ri tut tut mai. Kunal-a chu a phu zawk a, a tawlh hnung dawr mai a. Vanduai thlak takin lungte a rap pial a, a tlu dawn ta mai.

Silai chu a vawrh vak a, chumi pah chuan van lam hawi zawng chuan a kap palh ta. Lazer beam na tak mai chu a kap chhuak a, thawm pawh a ring tha kher mai. Van lamah chuan chu lazer beam chu a chho vang vang a, police te pawh chuan an lo hmu ve reng a.

Mahse kunal-a tak erawh chu lehlam khamah a tla daih a, a thi chiang kher mai. Ral khat atang pawh chuan chu lazer chu a hmuh theih a, mahse second 1 vel bak hmuh theih a ni lo. VAn lamah chuan a ral daih a, boruak pawh a reh leh diak mai. Police ho chu an va thleng a, mahse space gun chiah chu an hmu tawh.

****************************

Werewolf leh Catlady pawh an lo la inbei nasa hle a, mahse chu keite, a hma zana che thei zet chuan chinghne thinrim chu a hneh tawh lo kher mai. A duhtawkin a sawp a, a tawpah phei chuan mihringah a chan phah hial a. Sakei ni tawh lovin Duhzuali, mihring pangngai chauh a ni tawh.

A chau kher mai, a cho loh val a tawng tlat. Werewolf chuan a va pan hnai leh a, Duhzuali chuan a lo melh tawk tawk a. Werewolf chuan a rek a, "A pawi khawp mai, nangmah hi i thih hmasak ber a ngai ta a nih hi." tiin a rek na tulh tulh a. Duhzuali pawh a dang vek tawh, a thaw tha hleithei tawh lo.

Mahse lungpui lian em em mai hi a thlawk phei fua a, chinghne luah tak chuan a rawn darh chuai mai. RAng takin Duhzuali chu a thlah nghal a, hnunglam ava hawi chu chak mang kheng hian keimi chu a rawn tlan phei a. Chinghne-mi chuan thinrim tak hian, "Lo kal mawlh rawh...nangmah ber hi alawm ka nghah chu." a ti khur khur mai.

Chutah Duhzuali chu a rek kang leh a, keimi lo tlan phei vawm nan chuan a hmang ta mai a. MAhse keimi chuan a lo pawm nalh a, leiah chuan tha tak leh dim tak hian a mut a. Werewolf lo tlan phei chuan keimi chu a rawn tham a, a chawi lawp mai. Boruakah chuan sang takah a vawm a, mahse keimi chu a rawn t(r)um leh chat a.

Rum tak hian werewolf chu en in, "Khawiah nge Melody?" a ti vin vak a. Werewolf chuan, "I hriat duh chuan min hmachhawn phawt angai ang." tih pah chuan a va pan phei leh a. Keimi chu a lo khi sak a, "Anih chuan le." tiin a kuttin hriam tak chuan a lo ham hrep mai.

An insual leh ta buan buan mai a, keimi thinrim tawh lutuk chu werewolf chuan a hneh bik chiah lo. A chan tha zawkah keimi chu a tang char char a, minute 10 dawn an insual hnu chuan leiah chuan keimi chuan a rek bet ta. Ring tak hian, "Sawi rawh..khawiah nge Melody a awm?" tiin a vin hrep hrep a.

Mahse werewolf chuan  a chhang lo, theihtawp chhuah chuan keimi kut chu laksawn a tum a. A theih mai loh avang chuan a kutah chuan a seh sak ta chiam mai, keimi na ti lutuk chuan a thlah ta nge nge a. Werewolf chu rawn tho lehin keimi chu a hnek leng lawp mai, a chan a tha ve leh thung ta.

A sawp titih thei der mai lehnghal a, keimi pawh a hliam nasa tawh khawp mai. Mahse werewolf chuan hrui niawm tak hi a pal chat a, chutah hnim buk kar atang chuan ama thang siam ngei, thil zum tak mai chu a rawn per chhuak a. A awmah chuan a bur chat mai a, a tawp chiang ngei mai.

Zawi zawiin mihringah a rawn chang nghal a, Zorina a ni leh ta. Chuveleh keimi pawh chu mihringah a intichang ve leh nghal a, Daniel-a a ni leh ta. Zorina chu a pui nghal vat a, a lo la thi lo hlauh. A kawr a phelh a, Zorina thisen chhuak mek chu a hup pin sak a.

Zorina chuan mak a ti kher mai, a en ngawih ngawih ringawt a. "Zorin, khawngaihin...min kalsan suh aw..tuar hram hram rawh..i tha leh vat mai ang." tiin Daniel-a chuan a be mawlh mawlh a. Zorina chu khi suk a, "Eng..engtin nge min la puih theih zawk a? Thah che ka tum mek a nih hi...Daniel, tinge min thah law law loh?" theih leh thei lo hian a ti tawk tawk a.

Daniel-a chu a thaw hak a, "A chhan chu misual i ni lo, ka hmelma i ni lo. Chuan..Keichala khan that lo tur che in min ti a ni." tiin a chhang a. "Kei..Keichala a?" Zorina chuan a lo ti hu mai. "Aw ni e, chuan thah che hi ka tum lo hrim hrim bawk." tiin Daniel-a chuan a lo chhang leh a.

"Anih chuan...ka pu..Hrangkunga zawk kha a dik lo tihna em ni?"

"Zorin, kha chu engmah ka hre lo. Kei hi Keichala thlah te zinga mi ka ni ve lo bawk, i hresual a ni."

"Ni lo si, engtin nge keimi i nih theih?"

"Zeros-a khan a bum che a, i rilru kha a thunun tlat a ni. Keichala khan keimi nihna min pe a, an thlahte zinga mi ka ni ve hauh lo." tiin Zorina chu thudik engkim a hrilh ta vek a, Zorina chuan chhan ngaihna pawh a hre lo. A ngawi reng ringawt, "Zorin, khawnge Melody?" tiin Daniel-a bawk chuan a han zawt leh a.

Zorina chuan mittui tla zawih zawih chung hian, "Ka hre lo, a tlanchhuak. Ramhnuai khawi lai ah emaw hian a awm ang, ka hre bik lo." a ti chuai raih mai. Chutih lai chuan khua a rawn var deuh tan tawh bawk a, ramhnuai thim lutuk pawh chu a rawn zia deuh tan a.

"Va zawng rawh..keichu tihian thi turin min kalsan rawh. Ka phu a ni, ka phu ngawih ngawih." Zorina bawk chuan a han ti leh a. MAhse DAniel-a chuan a lu thingin, "Nilove...engtin mah i awm lovang. Chinghnia i nih kha hre reng rawh, hetiang hliam vang mai mai hian i thi tur a ni lo." tiin a la fuih tang tang a.

Chutah Zorina chuan a bula thing zum chu a ban thut a, "Nilo...ka tuar peih tawh lo, ka inthat mai ang." tiin a hrawkah chuan vih a tum ta mai. MAhse DAniel-a chuan a lo dang a, "I mawl em ni? Ti suh,...ka pui thei che alawm, Zorin." tiin a kut chu  aman beh sak a.

An inchei ta chiam mai a, "Daniel, min thih tir rawh. Ka tan a nuam zawk, tualthattu ka nih hi." tiin Zorina chuan invih hlum chu ala tum ngar ngar a. Mahse Daniel-a chuan a dang tang tang a, chutih lai tak chuan Pu Chhuma te an rawn thleng thut mai. Melody pawh an bulah chuan a lo awm ve a, Zorina chu silai in an rawn tin nghal thap mai.

"Zorin, che suh....anih loh chuan kan kap ang che." Pu Chhuma chuan a han ti vin tuar a. Daniel-a chuan rang zet hian, "Pu Chhum...ni lo."  a ti hman tawk. Chu chu remchangah la in Zorina chuan Daniel-a chu a thing zum ken lai chuan a banah a thai lui ta ngat a, chuveleh police ho chuan an kah rawn ta chiam mai.

Lehlam khamah chuan a tla thla a, a mawnga lui ah chuan a tla ri burh mai. Daniel-a chuan a zuk bih nghal a, tui chuan a len bo nghal vang vang a. Pawi a ti takzet, "Nilo..Zorin." a ti zawi sap a. Melody chu tlan pheiin Daniel-a nen chuan an inkuah nghal vawng vawng a, Pu Chhuma chu ava phei a.

"Daniel, i tha maw?" tiin a rawn zawt a. Daniel-a chuan a lo a lo bu nghauh va, "A hun takah kan rawn thleng hlauh a nih kha." Pu Chhuma bawk chuan a han ti leh a. Daniel-a chu za lo tak chuan a khi suka , "Nia, in rawn thleng timing khawp mai." a ti zawi sap a.

Police ho chuan buaipui tur dang chu an buaipui lehnghal sawk sawk hlawm a, khua pawh a eng tha tawh khawp mai. MElody chuan Daniel-a chu a han en vang vang a, "Keimi i ni tak tak maw?" tiin a han zawt a. Daniel-a chuan khik suk pah hian, "I awih lo ami?" tiin a lo zawt let a.

"AWih chiah lova, mahse Zorina chinghnia-a a intihchan kha chuan ka awih ve deuh."

"Ni e..keimi ka nia lawm."

"Tinge a hma khan min hrilh mai loh?"

"A chhan chu min hlau anga, chuan nangma tan pawh a hlauhawm thei tih ka hriat vang a ni."

"Ka hlau lo che....ka hmangaih che alawm, Daniel."

Chutia an romantic dawn lai tak chuan Duhzuali chu a lu tuai vut vut chung chuan a rawn phei a, "DAniel, i tha em? Chuan..henu hi i hria em ni?" tiin Melody chu a rawn kawk a. Daniel-a chuan mak ti tak hian, "Enga? Melody hi i hria maw?" a ti hu mai. MElody pawh chuan Duhzuali chu a han en vang vang a, "Ka hre ngai lo." a lo ti ve bawk a.

Duhzuali chu a thaw hak a, "Aww...ka chhan che kha, kha chinghne lakah khan.." a tih takah chuan Melody chuan a hrethiam ta. "Keimi ve tho i ni tihna em ni?" tiin a zawt a. Daniel-a chuan nui chung hian, "Aih..catlady a nih hi...tak tak a, Duhzuali, ka sawi thin kha a nih hi. Duhzual, hei hi ka thiannu Melody a nih hi...inchibai rawh u." a han ti a.

Melody lah chuan, "Bialnu...bialnu zawk." a lo ti vat a. Duhzuali chu a ner sak a, "Bialnu a? Bialnu i nei amaw?" a ti hu mai. Daniel-a chuan a chhang lo, a nui suk ringawt. "Aw a bialnu ka nia, chuan nang...keimi i ni ve sia, a cousin ami i nih?" a lo la ti zui.

"Awww..nakinah kan sawi dawnnia, hei..police an tam si, kan tawng te an lo hre pha riau riau ange." DAniel-a chuan a ti vat a. Duhzuali lah chu a tum bur a, "Ka kal phawt ange." tiin a kal daih a, "DAniel-a bialnu a ni tih hria ila, lo chhan malek tur ania." tiin a la phun phei nuah nuah zui.

**************************

Kunal-a kah chhuah, lazer beem chuan khawvel pawn, space chu a thleng tawh. Light year speed vela chak a nih avang chuan khawvel atanga km billion 4 vel chu a han thleng chho thei hman a, kan khawvel, kan chen mekna aia let li vel zeta lian, Neptune planet chu a han fuh chat mai.

Mahse chu planet ah chuan sakawlh pakhat a cheng a, planet pumpui chu a in a ni tawp. Chu chu sakeibaknei pianzia ang nei a ni a, a hming chu AERA a ni. Planet pumpui, khawvel aia a let li a lian, ama chenna tawp a nih chuan chu sakawlh chu khawvel ai chuan a lian tihna chu a ni phawt a.

Chu laser beam chuan a rawn fuh takah chuan AERA muhil lai pawh a kai tho chiang ngei mai, khawvel atanga rawn kal a ni tih pawh a hre thei nghal. A thinrim ta em em mai a, a ding ta ur ur mai. Chutah a hahum vak vak a, a khawk hian a khawk rum rum mai a. Khawvel lam pana kal tur leh, amah rawn beitu chu tunge a nih tih hre tur chuan a inpuah chah ta a.

***************************

THE END

*****************************

COMING SOON