WILD ZONE : SEASON 1 (Episode - 20) Written by : Aaron Malsawmdawngzuala EXPECT THE UNEXPECTED - 4

 WILD ZONE : SEASON 1

(Episode - 20)

Written by : Aaron Malsawmdawngzuala

EXPECT THE UNEXPECTED - 4

*********************

Station ah chuan kan let leh ta vek a, NAthana, kei, Opa, Lawyer Bena leh Kimtei te chu kan thu tum bur hlawm mai. Kan reh deuh thap a, "Eng evidence nge i neih reng reng a?" tiin Bena chuan Nathana chu a han zawt leh a. Nathana chu a han thaw deuh hak a, "Hei hi chu justice thlen tir hram ka duh vangin ka ti fo thin, ahma pawn.." tih ringawt chuan a chhang a.

Hriat thiamloh hmel tak chuan Opa chuan, "Engchu maw i tih thin? Enge i sawi awmzia chu?" a lo ti hu mai. "Evidence nei angin ka insawi thin....tichuan ka zawng chawp leh thin." tiin NAthana chuan a chhang a. "Anih tunah evidence tha tak chu i hmu leh dawn tihna em ni?" Kimtei chuan a lo ti hlur mai.

Chutih lai tak chuan DSP chu a rawn lut a, "Pu Nathan...chanchin ka lo hria a, tun lawk khan ka rawn thleng chiah." a rawn ti deuh hluam hluam a. Kan bulah chuan rawn thu ve in DSP bawk chuan, "Eng evidence nge i neih a?" tiin Nathana chu a rawn zawt ve leh a. Nathana chu a ngawi vang vang a, "DSP Sir, crime scene thlalak zawng zawng ka duh a ni." tiin a chhang daih mai.

"Chu chu enge a tangkaina? Thlalak zawng zawng nen engkim tih fel a, chhui vek a ni tawh a. Crime scene thlalak ho chuan engtin nge min puih leh deuh thut theih ang?" tiin BEna chuan a lo zawt vat a. "Cathy thih tukah pawh Sub Inspector Mawia pawn evidence dang a hmu chhuak thei alawm...engvangin nge kan theih ve loh teh lul ang?" NAthana chuan a han ti a.

"Anih chuan thlalak atang chuan engtia chhuichhuah leh nge i tum a?" tiin Opa chuan a lo zawt ve leh a. "Thlalak chu nei phawt ila, tichuan in inlamah kan phei ang." tiin Nathana chuan a chhang a. DSP chuan crime scene thlalak zawng zawng chu Nathana a pe a, tichuan kei, Kimtei leh Opa leh Nathana te chu Opa te in lam pan chuan kan kal leh ta a.

*************************

In chu kan thleng a, Nathana chuan Cathy thihna room, an nupa bedroom lam chu a va pan nghal a. A han en kual a, thlalak chu a phawrh bawk a. Bang te chu a melh kual a, a inngaihtuah uluk hmel kher mai. "Crime scene kha an khawih danglam hma lutuk a, police ho khan...khawih che miah lova dah tur a nia, thil chhui a ti hahthlak zo vek." tiin ka lo phun deuh nuah nuah a.

Chuveleh NAthana chuan min rawn melh thut a, "Anih chuan..engvangin nge kan siam chawp leh mai loh ang?" a rawn ti chu ka bo hle mai. "Enge i sawi awmzia? Engtia siam chawpin maw?" ka ti hu mai. NAthana chuan Opa bulah chuan, "Rawng sen i nei em?" tiin a han zawt a. "Aw..nei..nei e? Tinge?" tiin Opa chuan a lo zawt let a.

"Lo la rawh...vatin." Nathana chuan a han ti leh a, Opa chuan rawng sen chu a bur chawpin a rawn keng phei a. Nathana chuan rawng sen chu khumah chuan a leih ta mai a, "Engemaw i tih le?" tiin Opa chuan a lo vin vak mai. "Lungngai suh, a thar ka lei sak leh vek ang che." tiin Nathana chuan a chhang a.

"Chupawh nise..tinge khatia i leih ngawt a?" tiin Opa chuan a zawt leh a, a lungawiloh hmel kher mai. "Crime scene kha kan siam chawp leh dawn...min lo nghak lawk rawh u." tiin NAthana chuan a chhang a, thlalak chu en zel in thisen te chu chhuatah chuan a hah tat pherh nuai a, bangah te chuan a tat bawk a.

Lehkhabu te chu a ti tlu remrum a, tualthahna thlen zana room chhung hnawk ang chiah chiah chuan NAthana chuan a han siam leh a. Minute 5 dawn a buaipui hnu chuan a zo ta a, kan han en chu tualthah zana crime scene ang chiah chiah a ni. Banga amah ngeiina a tah chawp, thisen kai chu NAthana chuan a kawk a.

"A vih hnuah saw bangah sawn a kut a nem a, a beihlet dan diktak hi kan hriat angai a ni." a han ti a. Chutah min rawn en a, "Lo kal lawk teh Bella.." tiin alamah chuan min pawt phei a, "Cathy lo ni ta la...kei tualthattu...ka bei chhin ang che aw.." a ti ta mai a. "Enge awmzia? Ka lo tang tak tak dawn mi?" tiin ka lo zawt hu mai.

"Aw...keipawn thah tum tak tak ang chein ka tha ka hmang ve bawk ang. Engtiang chiahin nge a lan dan i en teh ang, i inring em?" tiin min zawt leh a. "Aw inring e." tiin ka chhang a, tichuan a luah chuan na vak lo chuan a khawng a, chhuatah chuan ka tlu a. Ka lu chu dawmin ka han tho kang leh dawn a, ka thawh kan pah chuan bang chu ka nem a.

Chuveleh NAthana chuan, "Aw..a dik chiah, a lu a thisen kha a khawih a, tichuan tuna i thawh ang chiah khan a tho leh a ni. Kha, i vawnna lai pawh kha Cathy vawnna lai chiah chiah a ni." a han ti a. Min rawn pan a, chemte a min vit ang chuan ka dulah chuan a rawn vit der leh a, vawi hnih vel min vit a.

Chhuatah min bawh tlu nghal a, min la rek tak tak zui. "Tal deuh rawh, i tha neih zawng zawngin..." a han ti zauh va, tichuan ka tal ta vak vak a. NAthana pawh chuan min rekna telh telh a, ban tur ka zawng a, ka dap kual vak vak a. Mahse NAthana chuan min thlah a, a tho kang a.

Ka thaw hawk mai, rang takin min kai tho leh nghal a. "Ana em?" a han ti sap a, "Aih na love.." tiin ka lo chhang a. Nathana chuan mak tih hmel tak hian Opa chu a en a, "I nupui hi a chak ve hrim hrim ami?" tiin a han zawt a. Hrilhhai hmel zet hian, "Chak han tih ah..ni e, hmeichhe dang ai chuan a chak deuh maithei, a nulian ve angreng a." tiin Opa chuan a lo chhang a.

"NGatinge a, Sir?" tiin ka lo zawt ve bawk a. "Amak ka ti..tualthattu hi mipa a nih chuan mipa zawi leh nep ve tak a ni ngei ang." tiin min chhang a. "NGati maw?" tiin Kimtei chuan a lo zawt a. "Tunah khan inhmu a, Bella-i khan chet ngaihna a hre lo. A luah hliam a tuar tawh a, a dulah vawi hnih vih a ni tawh bawk. Tichuan reh hlum a tum leh a, mahse post mortem result ah kha chuan Cathy khan a leh thal emaw, a la tho thei kha a mak ka ti." a ti leh nuah nuah mai.

Chuveleh Kimtei chuan, "Anih te chuan...tualthattu chu mipa nilovin hmeichhia tihna a ni mai lawm." a lo ti ve leh a. "Mahse tunge ni ta ang? Han rinhlelh tur in nei em, hmeichhia ah?" tiin Nathana chuan a han zawt a. "Keichu a ngai ang tho, rinhlelh tur ka hre chuang lo, hmeichhia ngat phei chu.." Opa chuan a lo ti vat.

"Keipawh chutiang tho...ka hre bik lo." Kimtei chuan a lo ti veleh a. NAthana chu a ngawi leh vang vang a, "Op, nangmah hian hmeichhia ngaizawngtu i lo nei zawk te hi a ni lo maw?" tiin a han zawt leh a. "Ka va hre lo ve...ka pu, chutia hmeichhia a lerh zawng leh a ngaizawng ang zawnga min betu tumah an awm lo." tiin Opa chuan a chhang a.

"Umm..engpawh nise, chhe te chuan hma kan sawn e. Tualthattu hi mipa nep tak a nih loh pawhin hmeichhia a ni ngei ang. Mipa chak pangngai tak tan chuan khatiang hmeichhe awmnem hliam tuar lehnghal harsa taka thah thu a awm lo." Nathana chuan a han ti a. Tichuan inchhung chu kan tifai leh a, Nathana nen chuan kan haw ta a.

**********************

Zanriah ka ei kham, TV ka en lai chuan ka phone a rawn ri a. Ka han en chuan Nathana a lo ni a, "Aw Hello, Sir?" tiin ka chhang nghal vat a. "Hei ka haw chiah a, lo phei rawh...news a awm ania." a rawn ti a. "Awle..ka rawn phei nghal." tiin phone chu ka dah a. RAng takin ka insiam a, Nathana te in lam chu ka pan nghal a.

REiloteah chuan ka thleng thuai a, inchhungah chuan ka lut tlang nghal a. Sitting roomah chuan Nathana chu a lo thu a, "Lo phei rawh helamah." tiin min hmuh veleh chuan min lo ko nghal a. Ka va phei ve a, abulah chuan ka thu a. "Eng news nge awm a?" tiin ka zawt nghal a. A ipte atang chuan phone saranga intuam hi a rawn phawrh a, "Hei.." a han ti ringawt a.

Hrethiam lo tak chuan, "Phone maw? Tu phone nge?" ka lo ti hu mai. "CAthy phone." tiin min chhang ta mai a. "Enga? Cathy phone a?" ka ti deuh vak a. "Aw ni e...Cathy phone ngei a ni." tiin min chhang leh a. "Engtin nge Cathy phone a ni tih i hriat? Khawi atanga i neih nge?" tiin ka han zawt leh a.

"Kimtei atangin."

"Kimtei a? Johnny-a nupui Kimtei maw?"

"Aw ni e, tlaiah khan kan inah hian a rawn kal a."

"Enge a rawn tih a? Chuan engtin nge a neih?"

"A sawi dan chuan vawiin tlaia kan haw hnu lawk khan a purse a theihnghilh avangin a let leh a, mahse inah chuan Opa chu a lo awm lova. A purse a zawnna lamah bawm pakhat a hmu a, chutah chuan Cathy phone hi a hmu ta a ni." tiin NAthana chuan min chhang ta mai a. Mak ti tak hian, "Anih chuan...Cathy phone chu Opa'n a lo kawl reng tihna maw?" ka han ti leh hu a.

"Alan dan chuan a nih hmel...mahse Kimtei pawn fimkhur takin sarangin a tuam thlap a, a kutlawngin a khawih miah lo. A awmzia chu he phone ah hian fingerprint ala awm tihna ania, Opa hi tualthattu diktak zawk a nih a rinthu te nen a rawn sawi deuh chiam lenghal a." tiin min chhang leh a.

Ka ngawi vang vang a, "Anih enge i rindan?" tiin ka han zawt ve thung a. "Opa kan v ahmuh angai, tichuan a chiang mai ang." tiin min chhang a. "Anih tunah kan kal dawn mi?" tiin ka zawt leh a. "Umm...i scooty in kan kal mai dawnnia." tiin min chhang a. Tichuan ka scooty hmang chuan Opa te in chu kan pan dun ta a, ama scooty a nih loh vang nge, a dim lo thei khawp mai.

**************************

Opa te in chu kan thleng a, kawngka chu kan han kik a. Opa chuan rawn hawngin, "Lo lut ru.." a rawn ti a. Inchhungah chuan kan lut a, a mitmeng atang chuan engemaw zawn chu a nei tih a chiang. "Min lo nghak lawk ru aw, lo thu ru." tiin a room ah chuan a lut a. Nathana nen chuan kan zui ve zel a, thawmhnaw te chu a hai deuh vak vak a.

"Zawn nei iva ang ve...enge i zawn a?" tiin NAthana chuan a han zawt a. Opa chu za lo tih hriat tak hian a nui suk a, "KA englo mawle..thil hote ania..vawiin tlai ka haw khan ka hmu miah lova." a ti nuah nuah a. Nathana chuan a ipte atang chuan Cathy phone chu a rawn phawrh chhuak a, "Hei hi a ni em?" tiin a han keng lang a.

Opa chu a rawn hawi a, a phu deuh zuk mai. A ding ngil nghal zawt a, "Nang...nangni hian engtin nge?" a ti bah nuai mai a. Nathana chu a nui huk a, "I chhuah dawn chuan kawngka te kalh ve thin tur alawm, i va fimkhur love." a han ti leh a. Opa chu a ngawi vang vang a, "Engtin nge in neih theih?" tiin Nathana chu a zawt a.

"Chu chu a pawimawh lo, engtin nge CAthy phone hi i neih min hrilh zawk rawh." tiin a chhang a. Zawi muang chuan Opa chu khumah thu in a han thaw deuh hak a, "Ni e, ka a rua ka kawl a ni." tiin a inpuang ta nge nge a. Nathana nen chuan kan va pan phei a, "Engvang nge? Engtin nge i kawl theih?" tiin Nathana chuan a han zawt leh a.

"Pu Nathan, ka nupui kha ka thah tihna a ni lo. A phone ka kawl mai chauh a ni...police te hriat loh khan ka la ru a ni." tiin a chhang a. "Khawi laiah nge a lo awm?" tiin ka lo zawt ve a. Kan shoe rack-a pheikhawh chhungah...a dah ziah thin alawm." tiin min chhang a. Nathana nen chuan kan in en hu mai, "Pheikhawk chhungah chuan a dah thin amaw?" tiin Nathana chuan a han zawt ve leh a.

"Dah thin e, a dan ve ania..mahse tualthattu ka ni e tihna a nilova, ka hria e tihna pawh a ni lo."

"Anih engvanga thukru nge i nih?"

"Thlalak vang a ni."

"Eng thlalak?"

"Kan nu hian thlalak sexy ve tak tak a la teuh thin a, chu chu midangin an hmuh ka duh loh avangin a phone ka hmuh khan ka la ta a ni."

Nathana chu a ngawi vang vang a, "Anih phone hi check ta ila, dawt i sawi nge sawi lo kan hre leh dawn ania." a han ti leh a. Opa chu a khi suk a, "Kha phoe-ah khan ka fingerprint bak a awm lovang, chuan a pattern pawh ka hre vek. Dawt ka sawi lo, in awih loh chuan lo la ula, ka nupui thlalak pawh chu min rin theihna tur a nih phawt chuan ka hmuh tir ve ang che u." tiin a chhang a.

Nathana chuan phone chu sarang atang chuan a phawrh chhuak ta nge nge a, Opa chu a pe a. Opa chuan phone chu a unlock a, thlalak chu a hmet chhuak a. Nathana nen chuan min entir a, a sawi ang ngeiin a nupui thlalak sexy tak tak a lo awm a. NAthana chuan phone chu off-in a han hum vang vang a, "Message leh call log vel i check vek tawh em?" tiin a han zawt leh a.

"Aw check vek tawh, call log ah chuan keimah deuh hlir a awm a, whatsapp message ah pawh Johnny-a nen an inbe lo hrim hrim." tiin Opa chuan a chhang leh a. Nathana chuan phone chu a han en kual ve thuak thuak a, "A tha e, kan ring ang che." a ti ta nge nge a. "Ka lawm e." Opa chuan a lo ti zawi sap mai.

"Mahse phone hi chu kan kawl angai, kan tan a tangkai dawn tlat." Nathana bawk chuan a han ti leh a. "Tehreng mai, ka pu...in kawl dawnnia." Opa chuan a lo ti ve bawk a. "Awle, kan kal phawt ange, ni 2 chiah hun kan nei a, chumi hma chuan Johnny-a hi innocent a ni tih evidence kan hmuh chhuah hman ngei ngei a ngai a ni...chuvang chuan nang pawh biak reng theihin lo awm la, lo chhuak bo suh ang che." tiin Nathana chuan a chah mawlh mawlh a, in chu kan chhuahsan leh ta a.

****************************

Pawn kan chhuak chiah tih chuan tu emawni hi kan motor bul lawkah chuan a lo ding run mai a, patling lam a ni. Mahse zan a lo ni bawk nen, a dinna lai a thim bawk em avang chuan a hmel chu hmuh chian theih a ni chiah lo. Kan va kal hnai a, min hmuh veleh chuan chak deuh hian a kal daih a.

NAthana chuan a en zui vang vang a, "Tu chu nge maw ni le? Opa te in hi a rawn en tiraw?" tiin min zawt a. "Aw..kan kal hnai kha a kal daih a, tu chu nge mawni le?" ka lo ti ve bawk a. "Kan zui ru chhin dawn mi?" Nathana chuan a han ti a. Ka chhan hma chuan NAthana phone chu a rawn ri a, DSP a lo ni.

"Hello DSP Sir, enge ni ta?" tiin Nathana chuan a han zawt nghal a. "Thu thar kan hre tlat mai, Sir Nathan." a rawn ti a. KAn phur dun nghal hle mai, "Eng thu thar nge ni?" tiin a zawt leh nghal a. "Johnny-a hi dawr pakhat, MT-Mart tih dawr ah Cathy te ina a kal hma khan a kal tih a sawi leh a ni." tiin a rawn chhang a.

"Enga? Chu chu amah a inpuang chawp leh tihna em ni?"

"Inpuang han tih ah....interrogation ka neih pui leh zuai a, chutah chuan a sawi a ni."

"Tinge a hma khan a sawi si loh le?"

"Nia, keipawh chu chu mak ka ti deuh va."

"Awle..tunah chuan an inhawng tawh awm silova, naktuk lamah a hma thei ang berin mart ah chuan kan kal dawn nia."

Nathana chuan phone chu a dah a, "Tunah dar 9 a ri tawh a, mart hi dar engzat thleng nge an inhawn thin i hria em?" tiin min zawt a. "Dar 7 leh a chanve vel thleng hi a ni tlangpui." tiin ka lo chhang a. "An inkhar hma, dar 6 leh tlem velah a kal a nih hmel..engpawh nise, i duh chuan haw tawh rawh Bella, i chau awm si." a han ti a.

"Ka la chau hleinem, Sir." tiin ka lo chhang vat a. "Keiman ka lo buaipui chhunzawm ang, lungngai suh...kan inthleng min thlah la, tichuan i haw tlang nghal dawn nia." a ti tlat avang chuan ka inthlahrung lui vel peih ta lo. Ka scooty bawk chuan kan inphur leh a, an in zawnah a chhuk a, keipawh chu ka haw tlang ve nghal a.

************************

A tukah chuan hma takah ka tho va, ka inbual nghal bawk a. Rawng te chu ka han bawl zung zung a, ka nu ka thawh khalh ve tlats. Chaw ka ei kham ka insiam zo meuh chu dar 8 leh a chanve a lo ri dawn reng mai, ka scooty chu la chhuakin Nathana apartment lam pan chuan ka inkhalh phei leh ta a.

Pawnah min lo nghak der tawh mai, "Ka motor-in kal mai ang ka lo ti dawn a, mahse petrol a lo tlem lutuk a. I scooty in kal mai ang, petrol kan la haw dawn nia." a lo ti nghal zuah zuah a, hnuchhui tura kal, enge kan tawn dawn pawh hriat loh, awlsam deuh a, petrol kan lei haw dawnnia a han ti hi chu khawiah emaw kan leng mai mai dawn te hi a ang thin.

Tichuan ka scooty bawk chuan MT-MArt dawr lam pan chuan kan kal ta a, kan va thlen chuan Opa leh Kimtei leh DSP te pawh an lo thleng ve deuh chiah a. Dawr chhungah chuan lutin CCTV footage chu kan check a, Cathy thih zan ami footage chu duty chuan a han play a. "Dar ruk leh a chanve bawr vel ah han forward teh." NAthana chuan a han ti a.

Dar 6:25 ah chuan Johnny-a chu a rawn lang ta a, "Awle khi...tah khian stop rawh." a ti a. Tichuan kan en zel a, Johnny-a chuan sikret man to chi chu a lei a, a chhuak leh mai a. "A sawi dik, sikret lei turin ka kal a ti." DSP chuan a lo ti vat a. Kan en zel a, a hnu lawkah chuan mipakhat hi a rawn lut a.

Nathana chuan a han enchiang a, "Bella, enteh hepa hi..en chiang teh." a ti nuah nuah a. Ka han enchiang deuh va, ahma zan lawka kan motor bula lo ding kha a ang hle mai. "A ni tiraw?" Nathana chuan a han ti ringawt a. "Aw..a niin ka hria." tiin ka lo chhang a. Chupa chuan chemte a lei ta mai a, a chhuak leh nghal vat.

"Khapa kha aniang, kha pa kha a ni ngei ngei ang." Kimtei chuan a lo ti nghal a. Pawnlam CCTV chu kan en leh nghal a, a car number chu kan chhinchhiah thei hlauh mai. "Hepa hi man theihna warrant a ngai, hei hi police hnenah submit ila, kan dawp thei ngei ngei ang." NAthana chuan a han ti nghal a.

Mahse DSP chuan, "Nilo...chemte a lei a ni mai a, chutin a statement kan va la thei ngawt lo. A nih loh chuan min khinglet mai ang, a chi loh lutuk." a lo ti tlat mai. "Enge maw i sawi le, DSP...hei tluka clue tha hi kan hmu leh tawh lovang, chemte a lei mai a ni lova, a hmel te kha ilo hmu ve lo ami, a hlauthawng hmel te kha i hmu ve lo ami?" Nathana chuan a han ti deuh hlur a.

"Chemte lei satliah ve mai ka ni ti ta se, chubakah innocent angin a insawi thei bawk a, kawng awmchhun chu tu emaw ber hian Johnny-a tan testify a neih sak a ngai ang." tiin DSP chuan a chhang leh a. "Keiman ka neih sak ang....engpawh thleng se, a thianpa hian ka neih sak ang." Opa chuan a lo ti vat a.

Tichuan kan haw darh a, a tuka testify theih turin court chuan ruahmanna a siam a. Tichuan a tuk tuk leh nilovin, a tuk lawkah chuan court chu neih a ni dawn ta. Hma takah Nathana chuan min haw tir a, ani erawh khawnge a kal dawn pawh sawi lovin taxi ah min chuan san daih mai. Keipawh chu ka haw a, chawhnu pum chu ka mu char char.

****************************

A tuk thleng pawh chuan Nathana chuan Good Morning takngial pawh a rawn ti lo, ka ngaih a ti tha lo hial zawk. Court chu ka va thleng a, mipui pawh an lo tam tawh khawp mai. NAthana chuan min hmuh veleh chuan min rawn pan a, a hlauhthawn hmel angreng phian lehnghal. Ka beng bulah chuan, "Opa kan hmu miah lo, a lo la thleng thei miah lo ania." a rawn ti sur sur mai.

"I phone lo ami?" tiin ka lo zawt a, "Phone chu ka tum a, mahse a tlang thei lo." tiin min chhang a. DSP pawh chu lo kalin, "Testify hi a neih loh chuan kha chemte lei pa kha man theihna dan kan nei dawn lova, Johnny-a hian thiam loh a chang thei dawn ania." a rawn ti ve bawk a. Sana ka en a, court tan nan minute 2 chiah a awm tawh.

Loh theih lohvin court chu tan a ni ta a, mahse Opa ber a awm loh avang chuan Lawyer Francis-a chu a dak ta zat zat mai. BEna lah chuan sawi tur dang hre hek lo, mi in an kidnap anih a rin thute chu a sawi kual vel mai mai a. Kimtei hmel pawh a dik lo, pawn lam chu a en deuh sek a.

Nathana chuan constable pakhat chu Opa ina kal turin a tir a, chumi chhung chuan Bena chuan a la hnial ve tang tang a. Reiloteah constable chuan a rawn phone a, a in a inkalh thu leh a motor pawh a awm loh thu chu a rawn sawi ta mai a. Kan mangang ta khawp mai, Kimtei thutna lam ka han en chu a lo awm tawh miah lo.

"Sir, Kimtei a awm tawh lo." tiin ka hrilh a. Nathana pawh chu a va hawi ve a, "Opa..Opa zawng turin a chhuak a ni ngei ang." Nathana chuana ti a. "Kan va kal mai dawn em ni?" ka han ti a. "A chi loh...BEna chauh a awm dawn asin." tiin min chhang a, a dik bawk si. Hlauthawng rilru tak chuan kan thudun reng a, eng tin tin emaw court thu chu tih tawp a nih mai loh nan kan hnial ve tang tang a.

**************************

DArkar khat dawn a liam leh hnu chuan call kan dawng ta, Kimtei call a ni. Nathana chu a ding a, "Ka'n be lawk ange." a ti a, a chhuak ta daih mai. A hnu lawkah chuan a rawn lut leh a, "Your Honour...tun lawk khan Johnny-a nupui Kimtei call ka dawng a, Opa te inah awmin tanpuina a mamawh thu a rawn sawi a ni." a rawn ti ta mai a.

Chu veleh hlauthawng tak chuan Johnny-a chu witness box atang chuan rawn tlan chhuah a tum a, "Nilo..Kimte..duhtak." tiin a tap nghal pur a. Mahse police ho chuan an lo dang a, tichuan judge chuan court chu break rih a, Opa te in lam pan chu min phalsak ta a. Police unit 2 hruaiin kan kal ta a, "Sir, enge thleng reng reng a?" tiin kan tlan pah chuan ka zawt a.

"Hlauhthawn hmel deuhvin tanpui a ngaih thu a rawn sawi a, kawngka inchum vak vak ri ka hre bawk a. Chuan...Opa'n min thah a tum a ti." tiin min chhang a. Mak ka ti kher mai, "Opa'n maw? Mahse a awm lo kha a ti bawk sia, constable khan.." ka lo ti a. "Nia, mahse a rawn sawi miau sia lawm." tiin NAthana chuan min chhang a.

Tichuan kan thleng ta, Nathana chuan hma hruaiin kawngka chu a tlawh chhe nghal a. Room lam kan va pan nghal a, a lo inhawng huau mai. Thawm lah chu a reh diak leh nghal, muangchang chuan room lam chu kan va pan a. "Kimte...Kimte, i awm em?" tiin NAthana chuan a ko va, mahse chhanna a awm lo.

Room chhung kan va lut ta a, kan thil hmuh chuan min barakhaih kher mai. Khumah chuan kha chemte lei pa ngei mai kha a lo mu a, a thi tih a chiang hle bawk. Thisen a kai hnuang bawk a, Kimtei chu a dul  pawp atanga thisen lo luang chhuak zawih zawih in chhuatah chuan a lo mu ve bawk a.

Mahse ala thi lo, a la khap fuk fuk mai. Opa erawh bang kilah chuan che miah lo hian a melh ngai hi a lo melh reng a, a mittui a tla zawih zawih bawk. Chuveleh Opa lam chu police ho chuan an silai ken chuan an tin thap mai a, mahse Nathana chuan kap lo turin a hrilh hlawm a. Police te chuan Opa chu an va man a, mahse a lo tang eih lo.

"Bella, Kimtei saw...ala dam ania, va buaipui rawh." tiin Nathana chuan min tir a, Kimtei chu ka va buaipui a. Police dangte puihna hmang chuan Kimtei chu damdawiinah kan dah a, a nunna kan chhan hman hlauh mai. Chemte leipa erawh kha chu a thi nghal a, a hming chu Ropuia a lo ni tih te kan hre leh zel a.

Kimtei sawi dan chuan Cathy nu leh pate hian an fanu hmingin ro an dah a, chu chu Opa hian hria in a nupui chu dahthat a, sum chu a vaia hui a tum vangin Pu Ropuia puihna hmang hian an that dun a, mahse Pu Ropuia hian a phatsan avangin a that ve leh a, chu chu va nangchingin Kimtei chu a lo khawih ve leh niin a sawi.

Opa erawh kut an thlak hrep hnuah pawh tawngkam khat pawh a a tawng duh loh avang chuan tih ngaihna an hre bik lova, tualthah thubuai siam sak niin jail ah a tang ve bawk a ni. Nathana nen pawhin Opa chu kan be tawng thei miah lova, keichuan engemaw tak thuruk hi ala awm ka ring tlat.

********************

A tukah chuan chawhma chhung zawng chu engmah ti lovin ka mu mai mai a, Nathana pawh a reh vang vang mai. Ka nu a feh avangin keimahin ka awm a, Dika leng turin ka sawm a, an lo la in Home Quanrantine zui. Khua a har duh reuh ngei mai, thutthlenga ka mu chu ka lo chhing diar diar hman a.

Kawngka kik ri chuan min ti harh zawk mai, ka va hawng chu Nathana a lo ni reng mai a. "Ehe Sir, enge i rawn tih dawn a?" tiin ka lo zawt a. "Min lo zui rawh...damdawiinah kal ang." a ti deuh thut a. "NGatimaw? Enge kan tih dawn?" tiin ka lo zawt a. "Kimtei han kan teh ang, engemaw sawi pui ka duh." tiin min chhang a.

Ka zawt zui peih lem lo, "Awle, ka'n insiam ange." tiin roomah chuan ka lut a. KA insiam zung zung a, min lo la tur sek zui. Tichuan kan chhuak dun leh ta a, zawhna ka zawh pawh chuan min chhang tha duh miah lo. Hospital chu kan thleng a, Kimtei ward-ah chuan kan va lut a. Johnny-a chuan a lo awmpui a, "Ehe lo leng ru, detective." tiin Johnny-a chu a lo polite khawp mai.

NAthana chuan Kimtei chu a han en vang vang a, "Enge i an?" tiin a han zawt a. "Ka tha tawh e, na pawh ka nei vak lem lo." tiin a lo chhang a. Nathana chu a khi suk a, "Nia..mahni leh mahni invih hi chuan kan vit thuk ngam lem lo tlangpui ania...a awm ve tho mai." a ti ta mai a, keipawh chuan ka hrethiam lo kher mai.

Kimtei chuan mak tih hmel tak hian, "Enge awmzia? Keimah leh keimah ka invit amaw?" a ti hu mai. "I hre zawk ang chu...chuan tunah hian tualthattu dik tak chu a damloh avangin khumah a mu mek a, ka be mek bawk." a han ti leh a, ka bo tulh tulh mai. Johnny-a chuan thinrim tak hian, "Ka pu, enge i sawi awmzia hi ni a?" a lo ti ve hlur a.

Nathana chu a thaw hak a, "Kei nilovin..ani zawk sawn sawi rawh se." tiin kawngka chu ava melh a, "Lo lut ru le." a han tih zawm nghal a. Chutah Opa chu a rawn lut ta mai a, a bulah chuan DSP leh hmeichhe police pahnih an lo awm ve bawk. Kimtei chuan mak ti tak hian Opa chu a en a, "OP..nang maw? Enge awmzia hi?" a ti hlur tawh mai.

"Nimin khan court ah khan ka rawn kal lo, a chhan chu thildang pawimawh tih tur ka neih vang a ni. Police te berin kan mi rinhlelh neih ve chhun, Pu Ropuia pawh zawhna an zawt duh si lova, keiman ka kidnap ta tawp a ni." a ti ta mai a. "Chuvang chuan em ni i lo kal loh?" tiin ka lo zawt nghal a.

"Aw ni e, tichuan keichuan khumah ka phuar bet a, a taksa ah chuan ka vua a, ka hlap a. Inpuang turin ka ti a, mahse a inpuang duh chuang lo. Chutih lai chuan kawngka kik ri ka hria a, ka va hawng a. Kimtei hi a lo ni a, ka rin em avangin ka luh tir a. Pu Ropuia pawh chu a hmu a, kal tir turin min ti a. Mahse Pu Ropuia chuan Kimtei pasal Johnny-a leh a nupui chu a ruka an inhmuh thin thu a sawi ta a. Mahse Kimtei hian dawt vek tiin a tang tlat a, min chhuah la, engkim ka hrilh ang che a tih avang chuan ka chhuah ta a ni. Mahse Kimtei chuan a pasal testify tur chuan min ti tlat a, ka duh siloh avang chuan Pu Ropuia a tawng thui zel a hlau va, ka inrin loh laiin Pu Ropuia chu tuboh chuan a chhu a, a that ta a ni." tiin min chhang a.

Johnny-a chuan mak a ti kher mai, "Op..i..i..i ti tak tak em?" a ti bah deuh nuai a, a mittui a tla phung bawk. "DAwt ka sawi lo thianpa...thudik a ni. Khatia a thah lai khan Pu Nathana phone ka tum lai a ni a, ka va tlan phei khan room kawngka chu a khar a. Ka chum vak vak a, amah zawk chuan Pu Nathana chu min phone khalh ta daih a ni. Mahse kawngka chu ka ti chhe thei a, engmah ka sawi hma in amah leh a mah chu tuboh hnunglam hriam chuan a dulah a invit a, tichuan ka tih anga a lan theih nan dawt a phuah chawp kual vek a ni." a ti leh a.

Nathana chuan lo sawi zawmin, "Kimte, nang hi ka ring hlawl lo che. A tir pawh khan ka ring lem lo che, a chhan chu hemi room chhunga tualthahna thlen dan tur Bella-i nen kan tihchhin lai pawh kha, en pawh i rawn en tha ngam lova, i hlauthawng hmel kha ka hmuh hmaih hauh lo asin. Nimina kan ina i rawn len a, i haw hnu khan nu pakhat nena in inbia kha ka hmu reng che u a. In thil sawi pawh ka hria, tualthahna thlen zan khan hla i zir lo hrim hrim. I kal hnu khan i thiannu kha ka va be leh a, i kal lo hrim hrim a ni tih min hrilh a ni. I hlauhthawn em em na chhan ber pawh i pasal zawk an puh hi chu thudang nise, Cathy phone i la hauh si lo, mahse a bo kha a ni tiraw?" a han ti ve leh sak sak a.

Kimtei chu a ngawi ta reng mai, "Kimte..thudik a ni em, sawi rawh?" tiin Johnny-a chuan a vin vak vak a. Mahse Kimtei chuan hnuailam a melh tlat mai, "Tualthattu hi Opa ni se chu a nupui kha a that awlsam viau ang, mahse hmeichhe awmnem zawk na na na chuan i bei tang tang zawng a nih kha tiraw?" Nathana chuan a lo ti leh a.

Johnny-a chuan a lu a dawm vawng vawng a, "Nangmah vangin jail ka tan phah teuh zia hi i hria em? Police custody ah ka awm reng a, engvangin nge tual i thah...mawh?" tiin a nupui chu a vin hrep mai. Kimtei chu a ding hluai a, a rawn hawi chhuak ve ta. Rum zet hian a pasal chu a melh a, "Nangpawh enge i nih bik? Pu Ropuia nupui nen pawh in khawsa fo a ni lawm ni?" a ti let ve hrep a, Johnny-a chu a ngawi chiang kher mai.

Kimtei chuan Nathana chu a en a, "I sawi dik e, Cathy kha ka thah a ni." a ti ta nge nge a. Nathana chu a nui sak a, "Anih chuan i tualthahna thawnthu ngaihnawm tak chu min han hrilh hlawm ta che." a han ti a. "Johnny-a leh Pu Ropuia nupui te hi a rukin an inhmu thin tih leh an khawsa dun thin tih hi ka hre hauh lo. MAhse a mizia a dang a, min hne tan riau va. Khami zan khan ka ringhlel a, ka zui ru a. Taxi hmangin ka zui ru char char a ni, tichuan Opa te inah khan a kal kha Cathy nen an inngaizawng ru ngei anih ka ring ta a. Johnny-a chu ka chang char char a, a lo haw veleh chuan Cathy te inah chuan ka lut ve ta a ni." a han ti te te a.

Sawi zawm lehin, "Tichuan kan inhnial buai a, CAthy chuan an inngaihzawn loh thu leh a jacket lam tur chauh va lo kal a nih thu chu min hrilh a. Mahse ka ring lova, ka dawp zel a. A tawpah chuan kan in ankhum chho tan ta a, tawnkam na tak taka min chhang chu ka thinin a tuar ta lova, hnunglam atang chuan Opa baseball bat chu la in ka chhu thlu ta a. Mahse a rawn tho leh a, choka lamah va pheiin chemte ka va la leh a. A rawn tho chhuak chu vawihnih lai a dulah ka vit a, mahse min la beilet zel a. A tuarchhel em em bawk, rehhlum ka tum a. Mahse min leh thal a, khum lam a pan lai chuan a hnungah ka vit leh a, tichuan ka chhuahsan ta a ni." tiin a inpuang ta zel a.

"Mahse finger print kha kan hmu silova..engtin nge i tih?" tiin ka zawt leh a. "Khami zan khan kutkawr lum ka bun sa hrim hrim a, ka kutkawr pawh ka hal ral nghal vek a ni. Ka thah zawh pawh khan ka hlauthawng ve lutuk a, tuikhur lamah ka tlan thla a, tichuan thisen kai zawng zawng chu silfaiin kein ka haw leh a. In ka thlen hma khan ka pasal police ten an hnuk chhuak lai ka hmu a, an ringhlel a ni tih ka hrethiam ta a. Tichuan kan huan lam atangin kan in hnunglamah chuan tuma hmuh lohvin ka lut ru a, tichuan ka thawmhnaw te thlakin ka chhuak leh a ni. A chhan chu kan inbulah leh thenawmah te khan mi an tam em a, chuvang chu a ni." tiin min chhang a.

"Umm..chuvang chu animaw...tlai taka i lo thlen chauh ni?" NAthana chuan a han ti a. Kimtei chu a tap a, "Ka thil tih kha  adik lo tih ka hria a, awmze neilovin Cathy kha ka that der a ni tih ka hriat phei kha chuan ka inchhir em em a, ka pasal lakah ka inthiam thei thawt lo a ni." a han ti leh a.

Nathana chu lo inrawlhin, "Thudik chu hei hi a ni...Johnny-a leh Pu Ropuia nupui hi a rukin an inngaizawng a, an inhmu lai leh an inkiss lai chu Cathy hian a lo hmu a. Chu chu Johnny-a chuan  a hriat avangin khami zan khan titi pui turin Johnny-a kha a leng a ni. Mahse nang chuan Cathy zawk i lo ringhlel a, tichuan i thiannu ngei chu i that ta a ni. Kimte, tual i thah avangin man i ni e." a ti a, Kimtei chu an man ta a.

Opa hi zan hmasa lamah Nathana'n a lo titi pui a, tichuan a tawng ve duh ta chauh a ni awm e. Engmah hi mi hi a hrilh ve ngai lova, tihian a finna hi a hnuah min han hriattir leh vel a, ka ngei reuh ania, he detective hi chu. Cathy nu leh pa chu fake evidence siam chawp avangin thla 3 chhung lung in an tan mai bakah cheng nuai engemaw zat an chawi bawk a.

SI Mawia pawh thamna a lak avangin suspend a ni bawk a, Johnny-a erawh man ringawtna chhan tur a awm lem lo, chuvang chuan an thiandunin, Opa nen erawh chhuah zalen an ni ta a, thian an nih chhunzawm zel erawh ka ring tawh lem lo. Tikhan Nathan Malsawmkima nen chuan kum khat lai kan thawk dun ta der mai, eng tak tawng leh zel ang maw!

*****************************

END OF SEASON-1