EVERYTHING FOR DAISY (MIZO FICTION HORROR/SPLATTER STORY) Chapter - 4 (LAST) Written by : Aaron Malsawmdawngzuala

 EVERYTHING FOR DAISY

(MIZO FICTION HORROR/SPLATTER STORY)

Chapter - 4

(LAST)

Written by : Aaron Malsawmdawngzuala

*********************

Inspector chu a tlanchhe chak ngei mai, mahse khawilam nge a pan tih pawh a hre lo. Khatiang khawpa mihirng lian leh hmel rapthlak kha ala hmu ngai miau lova, Police Inspector lai ni mahse zun a cheh lo chauh a ni. A pistol erawh ala hum ve ran thova, mahse mu 3 chiah a awm tawh thung.

A torch light kenlai lah chu Jerry-a inah khan a kalsan daih mai si a, thim zingah chuan a tlan risk pawp pawp a ni ber mai. A chau lutuk chu thinglung pakhat hnuaiah chuan a bawk deuh thlawp a, "Enge ka hmuh? Engthil nge kha kha?" tiin a thaw hluam hluam a, a tap lo chauh. A awm chu dawmin a thinphu te chu a han nghah muang phawt a.

Tichuan a maimitchhing vang vang a, ngaihtuahna fim tak nena tlanchhuah dawn a zawn a ngai tih pawh a hria. A rilru chuan inbia in, "Thawm nei miah lova fimkhur taka ka bikruk chuan khua ka nghak var thei mai ang, thawm dim takin.." tiin a infuih mawlh mawlh a. A huaisenna zawng zawng sawm khawm chuan a han ding riai riai a, a kal tur lehlam a hawi chuan chu a ding ngil nghal zawt mai.

A hmaah chuan light a rawn eng thut a, Jerry-a chu a lo ding vung mai a nih chu. A hlau lutuk chuan a pistol chuan a tin nghal a, mahse Jerry-a chu rawn tlan thutin a kut chu a rawn man sak a. A hnute zawnah chuan silai dawt chu chuktuahin amah leh amah chu a inkah tir ta mai a. Inspector na ti lutuk chu a au vak a, a tlu nghal tawp mai.

Pistol chu a thlauh nghal a, Jerry-a chuan a lo la vat. Inspector chu a che hleithei tawh lo, "Khawngaihin, khawngaihin min that suh..i duh duh ka pe ang che. Engzat nge i duh? Ka pe ang che..khawngaihin min tina lo hram rawh." tiin a tap nghal pur mai a. Mahse JErry-a chuan a chhang lo, a zu kun hniam a.

Inspector hlau lutuk chu a maimitchhing tawp a. Mahse boruak chu a reh vang vang mai, hlau tak chung si chuan a han meng riai riai a. Mahse Jerry-a chu a lo awm tawh lo, a thaw huai mai. A han ding chhuak a, Jerry-a chu a light nen chuan ram hnuai thim lam pan chuan a kal mek chu ava hmu a.

Chutia a nunna a zuah bik ta hlauh chu a lawm em em a, thingkung chu nghengin a thaw deuh huai a. A han maimitchhing leh vang vang a, "Ka va han lawm tak em.." tiin a han phun sup a. A meng leh chiah chu hreite a rawn thlawk phei fua a, a charlah tak chuan a bur chat mai. Jerry-a chu rawn kal phei leh in Inspector chala hreite bur vu mai chu a phawi a, tichuan ruang chu a in thleng chuan a hnuk phei leh ta a.

********************

Daisy chuan a melh ngai melh reng hian banga Jerry-a thisena JERRY tih inziak chu a en vung vung a, a tah nasat em avang chuan a mit chu a bui vek bawk. Amah pawh chu a bal tawhin a rimchhe em em a, a ril pawh a tam leh tawh khawp mai. Chutah kawngka lam chu a rawn ri leh ta ruk ruk mai, Jerry-a chu a rawn chawthleng nen chuan a rawn lut leh ta a.

Daisy chuan rum taka melh hian, "Engvangin nge i thah? Mawh..tinge kei hi hetah min dah bik? Min that ve law law mai ta che...tinge hetia min awm tir reng? Ka lakah hian enge i duh?" tiin a vin hrep hrep mai a. Mahse Jerry-a chuan a ngaihsak lem loh hmel khawp mai, bathroom lampangah chuan pheiin bathroom te chu ava tifai a.

Daisy pawh chuan tihngaihna a hre bik lo, a ril a tam tawh em avang chuan chaw chu a bar mawlh mawlh a. Jerry-a chuan room chhung chu a tifai zo va, a chhuahsan leh daih mai. Daisy pawh chuan chaw chu a ei zova, a vawt a ti angreng hle bawk. Chutah JErry-a chu a rawn lut leh a, ngawi reng chuan thleng chu a rawn seng sak a.

A kal leh tur chu Daisy chuan, "Jerry, lo ding lawk teh." tiin a au ding a. Chutia Jerry-a'n a hmingin a vawikhatna atan a ko ve ta tih a hriat chuan a meng kawk mai a, lehlam a rawn hawi vat a. "Inbual ka duh...a hrehawm ka ti ve tawh ania." DAisy chuan a han ti leh a. Rang takin Jerry-a chu a chhuak nghal a, DAisy chuan mak a ti angreng kher mai.

Reiloteah chuan towel fai lem lo tak leh bucket tuia khat vek hi a rawn keng lut a, bathroomah chuan ava dah a. A rawn chhuak leh a, towel leh insuk sahbawn hi a rawn pe a. Tichuan a chhuak leh a, kawngka chu a kalh leh daih mai. Insuk sahbawn ema han inbual chu a hreh angreng khawp mai, mahse sahbawn dang a awm si lo.

Tichuan DAisy chu a inbual fai ta a, chutia  ainbual lai chuan Jerry-a chu a rawn lut tih a thawm atang chuan a hria a. Mahse reiloteah chuan a chhuak leh daih a, DAisy pawh chu a inbual chhunzawm leh mai a. A inbual zo chu fimkhur tak chuan parda chu a keu va, mahse tumah an lo awm lo.

Towel chuan intuamin a chhuak a, a mutna puan phah chungah chuan thawmhnaw hi a lo awm a. A va pan hnai a, a han enchian chuan a thiannu Rinrini kawr leh Stacy kekawr bul a lo ni a. A hnuk a ulh nghal a, a thiante thawmhnaw chu pawmin a tap zawih zawih mai. Mahse engmah hak tur dang awm chuang hek lo, a thiante thawmhnaw chu a ha ta a.

A inthlak zo deuh chiah tih ah chuan Jerry-a chu a rawn lut leh a, Daisy thawmhnaw bal chu a rawn la a. A chhuah hma chuan, "Jerry, a vawt ka ti..puan lum ka sin ve duh tawh." a han ti leh a. Jerry-a chu a chhuak leh mai a, a hnu lawkah rawn lut lehin mattress, rizai leh lukham hi a rawn pawm tun mai.

Daisy chu a phah sak thlap a, thildang duh a la nei nge nei lo tih zawt niawm tak chuan Daisy mitah tak chuan enin a ding vung vung a. Mahse DAisy chuan engmah a sawi tawh lo, Jerry-a chu a chhuak leh ta a. Daisy chuan Jerry-a awmdan vel chu a han ngaihtuah let vang vang a, a sawi apiang a tihsak chu mak a ti angreng hle.

**************************

A tuk zing thleng pawh chuan police pahnihte chu an chanchin hriat tur a awm tak lovah chuan David-a leh Daisy pa te pawh an mangang ta hle mai, a khat tawk chuan police stationah chuan an kal sek tawh mai a. Mahse police te lah chuan Daisy thianho bo ai mah chuan an police pui pathumte bo ta thut mai chu an lo buaipui daih zawk.

DAvid-a chuan khang police bo ta te nen khan an inhmu tih leh kal phallohna hmunah khan a thiante zawng turin an kal tih chu a hre reng a, mahse Inspector berin sawi lo tura a tih avang chuan engmah a sawi ngam der mai silo. Chubakah chung police bo ta te hmu hnuhnung ber tu a nih avang chuan buaina dang a tawh a hlau va, rilru hah tak chung chuan a zep reng ringawt a.

An rawn haw ni tura an sawi ah pawh zan dar 10 a rik tawh hnu pawh a an la rawn haw mai nilo, police dang pathum lai an bo tel ve avang chuan Daisy nu, Pi Siami chuan awmngaihna pawh a hre tawh lo, a tap a tap tawh mai. An nupa chuan an inhauh phah leh thin a, DAisy te thian ho bo thu chu a darh leh deuh nghal ringawt bawk.

*****************************

Zan dar 11 a ri tawh a, mahse dar zat leh khua a eng nge a thim tih pawh hrelo ta na na na chu DAisy chu a la harh tha khawp mai. Hun khawhral nan tiin chhuata tile awmzat te chu a han chhiar khauh khauh va, chutih lai chuan Jerry-a chu a rawn lut leh thut mai. Tui um 3 vel hi a rawn dah a, mamawh dang a neih takin ti niawm tak chuan Daisy hmaah chuan a han ding leh vang a.

"Jerry, lehkha puan leh pen tal min pe thei angem? Hetia awm reng chu a boring emai, engemaw tal hun khawhralna tur ka duh a ni." a han ti leh a. Daisy chuan a sawi apiang a pe zel tih chu a hrethiam a, engtin emaw tak hman tangkai a tum a ni. Jerry-a chu a chhuak lehnghal a, reiloteah lo lut lehin paper tam zet mai hi a rawn keng teuh mai a.

DAisy hmaah chuan a dah a, pen chu a pe bawk. DAisy chuan paper chu la in thil lem a ziak nghal a. Chutah a mit chu a nuai nauh nauh va, "Ana lutuk..engemawni a lut.." tiin a t(r)e ta vak vak mai. Jerry-a chu a mangang em em a, a va kun hniam a. Chuveleh a mitah tak chuan Daisy chuan a pen ken lai chuan a chhun siah mai.

Jerry-a na ti lutuk chu a thu hnawk a, chuveleh a kawnghren-a chahbi inkhai chu Daisy chuan ava phih thla nghal. Mahse Jerry-a chuan a va buaipui thei lo, a mitah chuan pen chu a la bur vu mai. Daisy chuan chahbi tamzet mai chu khawi ber nge a chain phelhna tiin a zawng nghal a, mahse a vuah luh apiang mai chu a lo inmil lo zel si.

A hmanhmawh tawh nen, a tap pur tawh mai a. Jerry-a lah chu a rum vawng vawng mai a, a mita pen bur vu mai chu phawi chhuah a tum mek a. DAisy chuan a vuah dik hleithei lo, "Nilo...nilo, hei chu dik tawh hram rawh, khawngaihin.." tiin a phun mawlh mawlh a, a thlan a tla zawih zawih mai.

Jerry-a chuan muangchang chuan pen chu a mit atang chuan a phawi chhuang a, thisen a luang zawih zawih mai. Daisy chu a va pan leh ta, ani lah chahbi a lo la zawng hmu zo si lo. A samah chuan ava kek a, a theh thlu thuai mai. Chahbi pawh chu a thlauh nghal a, Jerry-a chuan chhar vatin rum zet hian a mit thi phung chuan a melh run mai a, a lungawiloh hmel tak zet.

"Nilo..min chhuah rawh...ZAwnga, min chhuah nghal rawh." tiin Daisy chu a rak hian a rak vak vak mai a. Mahse Jerry-a chu a tho thut a, a chhuahsan daih mai. "Min chhuah rawh...Hmelchhepa, enge ka lak atang hian i duh?" tiin Daisy chuan a au zui lawm lawm a. Chutah kawngka chu Jerry-a chuan a khar ri bur a, light chu a off thim leh ta hmak mai.

A hma ang bawk khan a thum hian a thim leh vek mai a, DAisy chu a au vak vak ringawt. Mahse awmzia a nei der mai silo, Jerry-a chuan a hrem ngei a ni tih pawh a hrethiam. A thu hnawk a, "Nu..Pa..ka ngai che u..David, khawngaihin min chhanchhuak hram teh u." tiin a tap hawm hawm ringawt mai.

***********************

Hun a kal zel a, Daisy bo atangin ni 7 lai a liam leh ta. A khawtlang ang zawngte pawh chuan an zawng a, mahse ni 7 chhung tehmeuh an zawn hnu pawh a an la hmuh tak siloh avang chuan Daisy mai nilovin a thiante dang zawng zawng leh police pathumte chu thi anga puan an ni ta a ni. Daisy nu Pi Siami rilru chu a na hle a, mahse David-a leh Pu Fakawma te erawh an la beidawng hauh lo.

A ruk chuan DAisy chu an zawng zel thova, mahse kha kal phallohna erawh kha chu an kal tlang lui bik lo. Chumai nilovin DAvid-a chuan a la sawi chhuak ngam chiah lo, mahse a rilru ah chuan a awm reng thung. Thla khat dawn a liam leh a, Daisy nu pawh chuan a fanu chu thi tawh ah a pawm deuh der titih tawh niin a lang, a sawi chhuak tawh ngai lo.

Mahse David-a erawh inthiamlohna hlirin a khat a, dawihzep a inti hle bawk. A bialnu ngaihtuah viau anga lang si, an awm a rinna ngeiah pawh a zawng ngam lo leh police te takngial pawh a hrilh ngam lo chu nep a inti thar leh hle mai a. A bialnu chu a ngaihtuah tak tak lova, amah zawkin buaina a tawh ve a hlauh vang zawk niin a inngai a.

Zan tam a mu thei tawh lo, lehkha pawh a zir hleithei tawh lo. A rilruah chuan DAsiy chu ala awm reng a, zantin mai chuan zu te a inphah a. Hun lah chuan chawlh a tum si lo, thla hnih a liam leh ta der mai. An exam a lo hun a, mahse lehkha a zir ngai chuang lo. Exam pawh exam lo chuan a drop out ta ringawt a, a chhungte pawn tih ngaihna dang an hre tawh lo.

************************

Daisy pawh Jerry-a chuan a la khung bo tluang zel a, hmun thimah chuan a la dah reng. Thla thum lai mai khaw eng a hmu tawh lova, a ngaihtuahna chu a fim mang tawh lo. Amah chu a a deuh huih tawh a, mahse rilru buai em erawh ala ni lo. Thla khat chhungin Jerry-a chuan vawi 2-3 tal a hrem ziah thin a, ni 5 te, ni 6 te a zawnin eng hmu miah lovin a awm tir thin a, nilengin Daisy Bell kha chu a play thin bawk.

DAisy-i'n a hriat miah loh chu a chaw ei turah hian Jerry-a hian mutduhna damdawi a telh ta zeuh zeuh va, a chhan pawh hrem a duh vang a nih tho rualin, a lo beilet leh mai ang tih a hlauh vang pawh a ni tho. A chaw eikham apiangin DAisy chu a muhil thin a, chumi hlan chuan Jerry-a chuan a pindan chhung chu a tihfai sak thin a ni.

A chhungte kianga hun a hman leh pawh a beisei tawh lo, a vanduaina chu a pawm tawp tawh hi a ni ber. Vawitam tlanchhuah a tum tawh a, mahse a hlawhchham zel si. Jerry-a'n a man chhuak ziah a, a hrem ziah lehnghal. A hremna lah tawrh hrehawm tak mai a nih zel avang chuan tlanchhuah pawh a tum ngai tawh lo.

Mahse nikhat chu Jerry-a'n light a on sak lai chuan a kut chu a a thlunna chain chu a han en vang vang a, chhu chhe lova, a kut phawi tawp dan chu a ngaihtuah ta. Phawi a han tum chhin a, mahse a la tawt deuh tlat. A han ngaihtuah leh vang vang a, tun aia tlema a cher leh deuh chuan a phawi maitheih a inring ta.

Chumi tlaiah chuan Jerry-a chuan chaw chu a rawn dah leh ta ngei mai, tichuan a chhuah veleh chuan Daisy chuan a chaw zawng zawng chu ekinah chuan a paih ta vek a. Mahse engemaw thil var dip hi a hmu tlat, a han tem chhin a, a lo kha em em mai lehnghal. Tichuan a hrethiam ta, chaw a eikham veleh a a mit chhuah em em thinna chhan chu a hre ta.

Jerry-a chuan mutduhna damdawi hmangin a lo hrai ru reng thin tih a hriat chuan a thinrim em em a, tlanchhuah a duhna chuan a rawn kap leh ta a. A chaw thleng ruak chu a hma zawnah chuan a dah a, Herry-a'n kawngka a rawn hawng tih a hriat veleh chuan a muhil der ta daih a. Jerry-a chu a rawn lut a, thleng chu a rawn seng sak a.

Pindan chhung zawng zawng chu a phiat fai a, damdawi eng eng emawni chuan a kap kual nual bawk. Tichuan a chhuak lehnghal a, DAisy chu a rawn meng leh ta a. A tho kang a, mahse chutia han hmanhmawh vut vut erawh a tum lo bur thung. A chhan pawh a rawn man leh vat mai a hlauh vang a ni.

***********************

Thla khat a liam leh a, Daisy bo atangin thla li lai a liam ta. Pu Fakawma leh David-a pawh chu biak pawh an inbe tawh ngai ta biklo, a chhan pawh DAvid-a chu a beidawng tawh a, Pu Fakawma chu a hmu ngam tawh lo a ni. Mahse Pu Fakawma erawh chuan a fanu chu hmuh let ala tum fan a, a ruang tal pawh hmuh a duh a ni.

Tlai khat chu DAvid-a leng haw chuan kawng sira Pu Fakawma te nupa lo inbia chu a hmu a. An hmuh a hlauh avang chuan let leh a tum a, mahse an thil sawi a hre phak chiah chu a ding chat mai. "Kan fanu tak tak a ni lo tih kan zep tlat avang hian Pathian hian min hrem  anih dawn hi.." tia lunngaih hmel taka Pu Fakawma phun ri sap ri chuan a beng a verh hle mai.

Mi in phenah chuan biru in a ngaithla ta zel a, "Thudik kan hrilh loh vang a nilo, kan fanu alawm...kan fanu tura kan lak ania, kan fanu alawm. Mahse tunah chuan a bo tawh, a thi tawh..sawi angai tawh lo." mittui tla phung chuan Pi Siami chuan a lo ti deuh hlur mai. Chutia DAisy an fa tak tak a nih loh thu a hriat chuan mak a ti kher mai, rang takin in lamah a tlan haw nghal a.

A khumah chuan thuin a inngaihtuah vang vang mai, Pu Fakawman fahrah run atanga an lak thu a sawi te chuan a rilru a kap hle mai. Chumai ala nilo, ahma in an fapa a thi tawh tih a sawi leh te chuan a rilru a tibuai takzet a, hriat chian a chak ta et et mai. Tihdan tur a han ngaihtuah vang vanga, a tawp a tawpah chuan a ngaihtuah chhuak ta.

Rang takin a insiam a, a bike a la chhuak nghal a. Chak taka tlanin a thianpa LAwma te in zawnah chuan a ding a, kawngka chu a han kik nghal a. Lawma chuan lo hawngin a thianpa, khawlaiah pawh a hmuh ngai zen zen tawh loh, khabe hmu nei ngai miah lo, chutia buk chhup maia a lo ding a han hmu chu mak a ti kher mai.

"Ehe, David, i va vang ve..enge i lotih ve dawn mial a?" tiin a lo zawt a. "Lawma, i puih ka ngai a ni." tiin DAvid-a chuan a lo chhang a. "Engthil ah maw?" tiin a lo zawt let leh a. "Ka lo lut anga, kan sawi dawnnia." DAvid-a chuan a han ti a. Inchhungah chuan a lut a, an thiandun chuan an thu a.

"Engthilah nge ni a?"

"Ihh...MARY LAND CHILDREN'S HOME ah sawn i la thawk em?"

"Aw la thawk e, ngati nge? I try ve duh deuh em ni?"

"Chutiang pawh a ni chuang lo, thil min tisak la ka mamawh a ni."

"Tehreng mai thianpa, lungngai reng reng suh, ka lo sawipui ang che, i tling nghal ang, staff indaihloh lai tak ania, ka lo sawi lut nghal ang che."

"Chutiang lam anilo, thianpa...an record hlui te ka en duh alawm."

"Ehe, engatan?"

"Tunah chuan ka sawi thei lo, min pui phawt la..a thlawn lovang."

Lawma pawh chuan a remti ta a, engmah a zawt zui ta bik lo. An pahnih chuan Home-ah chuan an kal a, Lawma chuan dawt eng eng emaw sawiin register hlui ho chu a la khawm thei hram a, DAvid-a chuan a en ta. Kum 2000-a fa an lak ho hming zingah chuan DAisy LAwmsangkimi chu a hmu ta hlauh mai le.

Kum 1998, April ni 6 a piang niin a la tutue pawh Pu Lalfakawma leh Pi Lalsiamthangi te an ni ngei bawk. Inah chuan a haw leh a, Lawma pawh pawisa pe in engmah chu a hrilh ta chuang lem lo. Pu Fakawma chu a phone nghal a, inhmu turin a sawm a. An inhmu ta ngei bawk, "Engthil nge ni a, DAvid? I reh vang vang mai sia, ava pawimawh awm ve, min rawn koh ve teh hlawl a?" tiin Pu Fakzawma chuan a han zawt a.

"Ni e, a pawimawh khawp mai. Pa Fak, tinge Daisy hi thudik tak in hrilh duh miah lohva?" tiin a han zawt ta thut mai,a Pu Faka chu a meng nghal kawk mai. "Eng..eng thudik maw?" a ti bah deuh nuai a, a zam angreng hle bawk. "I hrethiam der tih ka hria, ka sawi awmzia i hria." DAvid-a chuan a han ti leh khur khur a.

"Enge sawi i tum a?" Pu Faka chuan a lo ti leh a. "Pa Fak, tinge DAisy hi in fa tak tak a nilo tih i hrilh loh?" a han ti leh a. Pu Fakawma mak ti lutuk chu a meng bial kawk mai, "Engtin nge nang hian i lo hriat ve?" tiin a zawt nghal a. "Chutiang a pawimawh lo, Pa Fak..engtin nge DAisy hi inlak sawi rawh?" a han ti leh a.

Pu Faka chu a thaw hak a, "Ni e, kan fa hmasa ber chu mipa niin a hming chu Jerry Zonunsanga a ni a. Mahse a tawng thei lova, mi ang chiah lo a ni bawk. Kan nu chuan fa dang a nei thei ta miah lo mai a, Jerry-a chu kan innghahna awmchhun a ni. Mahse doctor tamtak kan pan pui hnu pawhin kum 4 a nih thleng pawh chuan a tawng thei ta miah lo mai a, kan nu pawh a mangang takzet. Tichuan Jerry-a kum 8 a tlin khan fa kan la ta tawp a, kum 1 mi lek Daisy Lawmsangkimi chu kan la ta a, ala nautet em avangin a nu leh pa kan nilo tih pawh khatih hunlai khan ala hrethiam lo a ni." tiin a chhang ta a.

"Anih leh Jerry-a chu...a thi tih pawh ka hria, engtia thi nge?" tiin DAvid-a chuan a han zawt leh a. "Daisy hi Jerry-a khan a duat thei em em a, a chhuang hle bawk. Inleng te lakah pawh a uikawm hle a, DAisy chu a rohlu angin a ngai a ni. Mahse Daisy kum 2 a nih khan tum khat chu nasa takin kan kawmthlang kudam a kang a, tihpalh thil tak meuh meuhvin ka fapa Jerry-a chuan mei a lo chhuah palh a ni. Tichuan Jerry-a chu a kang hlum ta a, a ruang pawh hmuhtlak awm lo khawpin a kang hlum ta a ni." tiin a chhang leh a.

David-a chu a ngawi vang vang a, "Pa Fak, keipawhin engemawni chu ka zep  ani."  a han ti sap a. "Eng thukruk maw?" mak tih hmel tak chuan Pu Fakawma chuan a lo ti vat. Tichuan a thil lo zep ngar ngar chu a hrilh ta a, Pu Faka pawh chuan a hau deuh hrep nghe nghe. "Pa Fak, keichu zanin hian ka kal leh dawn a ni. Daisy chu ala dam emaw, dam lo emaw...ka thil tihsual kha ka siamtha leh ang. Engpawh tawk dawn ila, kha kaltlang an phallohnaah khan zanin hian ka kal dawn a ni." a ti ta mai a.

"I mawl em ni? Police te hrilh lo chuan nangmahin kal reng reng suh..hmun hlauhawm tak pawh a lo ni thei asin." tiin Pu Faka chuan a lo khap vat a. Mahse DAvid-a chuan, "Hmun hlauhawm tak a ni tih chu ka hria, chuvang chuan ka finfiah dawn a ni. Thudik kha a tir khan zep lo ta ila, Daisy te chu thuhran nise, khang police pathumte pawh kha an nunna kan chhan hman ngei ang." a ti leh tlat mai.

Pu Faka chu a ngawi deuh vang vang a, "Ka lo kal ve ang...kan pahnihin kan kal ang." a ti ve ta a. DAvid-a chu a lawm angreng kher mai, "A tha e, ka patea silai ka rawnr u chhuak anga, kan finfiah ngei dawnnia." tiin DAvid-a pawh a phur zual ve deuh. Tichuan plan an siam dun a, zan dar 8-a chhuak tur chuan an inthlah liam ta a ni.

***********************

DAisy chuan chaw chu a nghei lui hram hram zel a, cher pawh a cher tawh khawp mai. A ban thlunna chain pawh chu a thawl deuh tial tial a, mahse Jerry-a hmuh lai chuan tawt pangngai tak anga a lan theih nan a ban chu a thukru zeuh zeuh thin bawk. A chang chuan a ril a tam theih em avangin a chawhmeh thenkhat te chu a silfai thin a, damdawi a ei tel ang tih a hlauh avangin tui tilo chung chungin chaw, tui a sil te chu a ei hram hram zel.

Zan a lo ni leh ta a, DAisy pawh a nungchang a that em avang chuan Jeery-a chuan a hrem tawh ngai lo. Hun khawhral nan tiin pen leh lehkhapuan ah chuan a chhungte a ngaih thute, DAvid-a a ngaih tawh zia leh a awmna hmun hrehawm a tih zia te, chumi hmuna a lo kal ve kher kher chu a inchhir zia te a ziak thin a.

A then erawh thlawhna lemah te siamin a thlawh kual thin a, a chang chuan a rilru hah leh mangang lutuk chu hallucination pawh a nei fo thin. A mumangah chuan a nu leh pa leh David-a chu zantin a hmu thin bawk a, a ngai takzet a ni. Chumi zan pawh chuan eng eng emaw a ziah lai chuan JErry-a chu a rawn lut a, rang takin a muhil der leh nghal vat a.

Jerry-a chuan pindan chhung chu a rawn tifai leh a, chutih lai chuan a theih tawp chuan a kut thlunna chu tal chhuah a tum a, mahse thawm dim thei ang ber chuan a che a. A tawp a tawpah chuan a tal thlawn ta, a lawm takzet. Mahse ala che mai ngam lo, chain chu thukru in la inthlung ang tak chuan a awm zel a.

Fimkhur tak leh thawm dim tak chuan chain hrui chu a la khawm zel a, a kutah chuan a vet a. Jerry-a chuan a ti fel zova, Daisy lam chu ava en a. Lehlam a lo hawi daih mai, a tir khan lehlam a hawi si lova, a mu nghet viau tura a ngaih laia chutia a lo inher thei mai chu a ringhlel ta deuh va.

A va pan hnai zel a, chutah DAisy chu lo hawi thutin a chai chuan Jerry-a hmaiah chuan a hlap pawp mai a, thisen a per chhawk mai. Jerry-a na ti lutuk chu a hmai chu a dawm nghal a, chutah a theih patawp chuan Daisy chuan a hnungzangah te leh a rem rem laiah chuan a chain chuan a hlap ta nghek nghek mai a.

Jerry-a chu a thingthi hnawk mai, Chhuatnawhna chu DAisy chuan a la leh a, tliak hmawk khawp chuan Jerry-a lu ah chuan a hlap leh chawrh mai. Chhuatah chuan a lu dawn vawng vawng chung chuan JErry-a chu a bawk run a, a rum tuah tuah mai. Chuveleh Daisy chu kawngka lo inhawng saah chuan a tlanchhuak nghal a, inchung lam sep chhohna hi a lo awm a.

A han chhuak chho chu kumdam a han thleng hlawl mai, chhuat kawngka chu  akhar a, a kalh hmak mai. Tichuan kudam atang chuan a chhuak a, inchhung chu a enkual a. A mitthla ah chuan chu inchhunga Jerry-a nena an inbeih lai te, a thiante ruang a hmuh lai te chu a ngaihtuah chhuak a. A lu a rawn na vak a, chutia inchhung light eng deuh ruih maite chuan ani khaw eng hmuh lohna rei tawh lutuk tak chuan men a har takzet.

Mahse chhuat kawngka rawn inchum ri bur bur a hriat chuan Jerry-a a ni tih a hria a, a harh chhuak leh vat a. Tichuan dawhkana hreite chu la in pawnah a tlan chhuak ta ringawt mai a, panna tur ber pawh hre lo chuan thim zingah chuan a tlan phei pawp pawp ringawt a. A chau lutuk chu a bawk thlawp a, a thaw hlawi hlawi mai.

*****************************

Jerry-a pawh chuan kawngka inkalhna chu a tichhe thei ta a, thinrim zet hian a rawn rum chhuak nghur nghur mai a. Inchhung chu a melh kual a, mahse kawngka lo inhawng leh a dawhkana hreite a lo awm tawh miah loh avang chuan DAisy chu a tlanchhuak tih a hrethiam nghal a. A chempui chu la in pawnah chuan a chhuak ve ta nghal a, DAisy chu ramhnuai thim tak karah chuan a zawng a.

DAisy chuan thawm a hria a, rang takin a tho nghal. Jerry-a a nih ringin a tlanchhe leh ta a, chutah tu emaw nen hian an insu a, a thal tawp mai. A hreite chu chuh nghalin sah a han tum a, mahse pitar a lo ni tlat. "Tunge i nih a? Tinge khatia min tin...min tina suh khawngaihin." tiin pitar chuan a lo hlauh hmel hle mai.

DAisy chuan bengchheng lo turin a hrilh a, "Thawm neih suh, ka pi...bengchheng suh." tiin a hmui  a hupsak nghal a. Mahse pitar chuan hriatthiam loh hmel tak hian, "Nilo...min tina suh." tiin a lo tal vak vak mai. A aia nghet lehzual chuan DAisy chuan a man bet a, "BEngchheng suh...mi tu emawni in min thah a tum a, i bengchheng a nih chuan a that ve mai ang che." tiin a beng bulah chuan a han phun sur sur a.

Pitar pawh chu a ngawi ve ta, chuveleh light eng phe ve ve chu an hmu a. Thingkung phenah chuan Daisy chuan pitar chu a bihruk pui nghal a, a han dak de de a. A rin ang ngeiin Jerry-a  alo ni a, light chu en kualin Daisy chu a lo zawng nasa mai. DAisy chuan thing lian tha nelh nawlh tak hi a chhar a, pitar chu a pe a.

"Ka hnungah hian lo awm rawh, sawpa saw ania min thah tumtu chu...kha khan ilo in veng dawnnia." a ti a, pitar pawh chuan khur dar dar chung chuan a la ve mai bawk. Daisy chuan Jerry-a chetla chu ava en leh a, chutah a tukhum a rawn ri dawt mai. A hai nghal chhuih a, thei leh thei lo hian lehlam chu ava hawi a.

Pitar chuan a thingtum ken lai chuan a lo vua chu niin, a lo la nuih vur vur zui. Daisy chu a thal tawp a, nikhawhrelovin a awm zui nghal bawk. Ring tak hian chu pitar chuan, "Bawiha, lo kal rawh le..hei le, i duatlai Daisy chu ka man e." a han ti lauh lauh va, Jerry-a chu rawn pheiin Daisy a rawn hmu chu a lawm hle mai, pitar chu a kuah nghal chung chung a.

**************************

Kal tlang phallohna an kal tlang zel hnu, km 3 lai mai an kal hnu chuan Jerry-a in chu DAvid-a leh Pu Fakawma te chuan an rawn hmu ve ta. "Ehe..in a awm amaw?" DAvid-a chuan a ti hu mai. "Tah sawn a awm a ni ngei ang." tih leh Pu Faka chu tlan a tum nghal mai a. Mahse DAvid-a chuan lo dangin, "Nilo Pa Fak, thang pawh a lo ni thei, chubakah saw inah sawn eng ang mite nge cheng pawh kan hre lo, fimkhur takin i kal zawk teh ang." a lo ti vat a.

Tichuan apa silai a ruk chu DAvid-a chuan a hum ran a, Jerry-a in lam pan chuan an kal ta a. Kawngka zawn an thleng a, DAvid-a chuan kawngka chu a han tin ran a. Pu Faka chuan a han kik karh karh a, "AWm in awm em?" a han ti a. Mahse chhanna an dawng lo, a reh thiap mai. Kawngka chu hawn an han tum a, a lo inkalh hauh lo mai.

Inchhungah chuan an lut a, mahse tumah an hmu lo. Thutthleng pakhata kawr lo inbang chuan Pu Faka mit a la hle mai, "Nilo..saw kawr saw.." tih pah chuan a va pan phei a. A han en vang vang a, "Hei chu bawihtei kawr a nih hi." a ti ta mai a. DAvid-a pawh chuan a han en ve a, DAisy kawr ngei a ni tih chu a hre ve bawk.

Chuveleh Pu Faka chuan, "DAisy..BAwihte..khawnge i awm?" tiin a fanu chu a au ta chiam mai. "Nilo bengchheng suh...Pa Fak." tiin DAvid-a chuan a lo khap a. Mahse Pu Faka chuan a ngaithla lo, pindan chhungte chu a en a. Chutah khuma a fanu nautet lai thlalak chu a hmu ta, a en a, a mittui a tla zawih zawih mai.

David-a lam chu ava hawi a, "Hei..hei hi DAisy nautet lai thlalak a ni...engtin nge hetah a awm theih?" a han ti vin hlur ringawt a. Chutah pawn lamah chuan pen thawm a hre ta tlat mai, "Pa Fak, chu thawm a awm ania..bengchheng suh." David-a chuan a ti vat a. Thawm dim thei ang ber chuan tukverh lam chu an va en a, Jerry-an Daisy a lo pu vu vu mai chu an hmu ta.

"Nilo..ka fanu..ka fanu Daisy..a ni thei lo." tih leh chhuah a tum a, mahse DAvid-a chuan a lo dang leh. "Pa Fak, ngun takin ngaihtuah rawh. Sawtia kan va beih nghal chuan kan che fuh lovang, khawngaihin ka thusawi ngaithla rawh.." a han ti a. Jerry-a lah chu a rawn hnai zel a, mahse kha pitar erawh kha chu a awm tawh hauh lo.

***********************

JErry-a chuan inchhung chu a rawn lut a, Daisy chu thutthleng ah chuan a mut a. Chain-a a hlapna hliam te chu a han en a, damdawite chu a hnawih a. Tichuan Daisy chu pu leh nawlh mai a, kudam lam pan chuan a phei leh ta. Kawngka a hawng chiah chu kudam chhungah chuan David-a leh Pu Faka te chu an lo awm reng mai.

David-a chuan Jerry-a dar veilamah chuan a kap a, Jerry-a chu a eu dawrh mai. Daisy chu a thlauhva, chhuatah chuan a tla thla tawp mai. Chuveleh Pu Faka chuan a chemte hum lai chuan Jerry-a hnuteah chuan a rawn vit ve leh a, Jerry-a chu Pu Faka chuan bangah a nam bet a. Mahse awmsa tak hian a samah lo thamin a theh leng dawrh mai.

Pu Faka chuan bang lehlam chu a deng dawt a, a hnang nghal awl awl mai. DAvid-a chuan a hnungzangah chuan a lo kap leh a, Jerry-a na ti lutuk chu a thingthi hnawk a. DAvid-a chu va pheiin Jerry-a hma takah chuan ava ding a. "Zawng sen..thi rawh." tiin a vin vak vak a, Jerry-a chalah chuan pistol hmawr chu a chuktuah a.

Mahse a pistol leh a kut chu Jerry-a chuan lo man thutin David-a kut chu a elh sak thut mai a, Jerry-a pawh a au vak mai. A rek kang a, pindan bang chim rup khawp chuan a ve theh phei a. Chutah a hnung atang chuan chemte hian a dar lehlamah chuan Pu Faka chuan a rawn vit leh a, Jerry-a na ti chu a t(r)e ring kher mai.

 Pu Faka chuan chemte chu a phawi ri hrawk a, a chhipa vih a tum chu a lo man sak leh a. Pu Faka darah chuan a vit tlum ve ta pawk mai a, mahse chutia Pu Faka hmel a hmu chiang chiah chu a tawlh hnung nghal dawr mai. Pu Faka chuan a dar hliam chu dawm vang vang pahin, "Tunge i nih? Enge ka fanu lakah hian i duh a?" a ti khur khur a.

Mahse Jerry-a chuan a chhang lo, Pu Faka chu a en reng a, a mittui a rawn tla hial mai. A chhan pawh Pu Faka chu tu dang nilovin, amah Jerry-a pa ngei a ni. Mahse Pu Faka erawh chuan a hre lo, Jerry-a chu a kang hlum daih tawh turah a ngai. Chutah thei leh thei lo hian DAvid-a chu a rawn tho leh a, Jerry-a chu hnunglam atang chuan a rawn zuan a.

A rek bet ta tlat mai, Jerry-a chuan paih thlak a tum a, mahse David-a chuan a thlah duh bik tawh thak lo. "Pa Fak..ka pistol kha...zawng rawh, ka pistol khan kap rawh." tiin DAvid-a chu a au vak vak a, chuveleh Pu Faka chuan a zawng hmu ta. Jerry-a chu a tin nghal a, mahse a tal nasat em avang chuan a tin fuh thei mai hrih lo.

Mahse David-a chuan, "Kap rawh." tiin a lo tur sek a, a tawpah chuan a kap ta. Mahse Jerry-a a lo awm sawn hlauh, David-a ke zawka chuan a kap ta a. David-a na ti lutuk chu a t(r)e thawt a, Jerry-a chu a thlah nghal. Chuveleh Jerry-a chuan David-a chu a chawi lawp a, Pu Faka lamah chuan ava vawm phei ta mai.

David-a chuan Pu Faka chu ava bawhthlu rawk rawk a, ani lah chuan pistol chu a lo thlauh leh daih mai. Jerry-a chuan hliam a tuar nasa tawh takzet, a thisen pawh a chhuah hnem tawh em avang chuan a chau ve deuh ta. Muang chang chuan a tho kang a, Daisy chu a va pawm kang leh a.

Kawngka lam pan chuan a bai phei suih suih mai, mahse DAvid-a chuan chhuata chemte chu banin chau chung chung chuan a va bawkvak phei leh a. Jerry-a chawnah chuan a va vit tlum leh pawk mai, Jerry-a pawh a thingthi nghal hnawk a, Daisy chu chhuatah chuan a thlauh leh ta. Pu Faka pawh rawn thawh leh a tum a, mahse a chauh em avang chuan a che hleithei tawh lo.

Jerry-a chuan rum zet hian DAvid-a chu a melh a, David-a chemte hum lai chu a laksak nghal a. Chhuatah chuan chemte chu a paih thuai a, DAvid-a chua  rek kang ta vu mai. DAvid-a lah chuan a kawr awmah chuan thei leh thei lo hiam a lo tham ve a, chu chu Jerry-a ti thinrim zualtu mai chauh a ni.

Bang deng dawt khawp chuan a theh phei a, mahse DAvid-a chuan Jerry-a kawr chu a pawt thler vek mai. Chutah a hnungzanga DAISY tih lo inziak chu Pu Faka chuan a hmu ta. "Je..Jerry..Jerry." tiin Jerry-a chu a en reng a. Chutah Jerry-a pawh muangchang hian a lo hawi a, apa nen chuan an inmelht a ran mai.

"Bawih..Bawiha, Jerry..ka fapa, i lo la dam reng amaw?" tiin muangchang chuan Pu Faka chu a rawn tho chhuak a, mahse Jerry-a chuan huat hmel tak hian apa chu a en a. A rum nghut nghut mai, "Nilo BAwiha, ka tihpalh. Ka thiamloh a ni lo, ka ngai thei lutuk che asin." a han ti leh a. Mahse Jerry-a thinrim chuan thleng te chu a paih darh a, dawhkan te chu a chum bur bur mai.

Pu Faka chu a tap a, "Ka hria alawm, ka lakah i thinrim tih chu. Mahse chhan che ka duh a, ka chhan hman ta lo che a ni. Ka tihpalh Jerry, min ngaidam rawh." a han ti leh a. Mahse Jerry-a thinrim chu a la rum chhur chhur mai, "Bawiha, lo haw rawh..hetah hian i bihruk a ngai tawh lo. Daisy chu i nau a ni a, a ni reng bawk ang. Ka kut hi rawn vuan rawh, engtin mah ka tina dawn lo che." zaidam tak chuan Pu Faka chuan a han ti leh a.

Jerry-a pawh a nem deuh ta, muangchang chuan ava pan phei a. "Lo kal rawh, i pa hi min rawn kuah rawh ka fapa, ka ngai thei lutuk che asin." tiin Pu Faka chuan a ban a lo phar chhuak a. Jerry-a chuan a pan zel a, a thleng tep tawh tihah chuan Daisy'n, "Pa.." a rawn ti tham tiak chu an hria a.

Kawngka bul an han en chuan kha pitar, Daisy vaw thlutu khan Daisy chu a hrawkah chemte hian a lo tin reng. Kil khat atang chuan hliam tuar mek David-a pawh chuan chu pitar chu ava en ve a, a hriathnu ngei a ni. Kha pitar, thing lo phur a hmuh leh a biak ngei kha a ni. "Jerry, i naupan laia thah tumtu che kha i ring leh ang maw, pen khat pawh han pen leh teh, Daisy hi ka that nghal ang." a ti khur khur mai.

Pu Faka chuan chu pitar a hmu chu mak a ti kher mai, "Puii...Puii..nang maw?" a ti hu mai. Pitar chuan, "Aw ni e, keimah...keimah i nupui Laltlanpuii ngei kha ka ni e..min la hre ve a, a lawmawm e." a ti ta mai a, Daisy leh DAvid-a chuan mak an ti takzet. "Nupui a? A nupui maw i nih a?" Daisy chuan a ti hu mai.

Pi Puii chu a nui suk a, "Ni e, Daisy...nang hi falak i ni, falak i nih kha i hria em?" a ti leh ta siah siah mai. "Nilo..engmah awih suh, bawihte...dawt vek a nih kha." Pu Faka chuan a lo ti vat a. Chutah vin zet hian Pi Puii chuan, "DAwt a? Dawt maw ni a? Ngaithla rawh Daisy, Jerry-a hi i pa fa diktak zawk a ni a, nangchu falak mai mai i ni. I awih loh chuan i pa saw zawt rawh, i pa, hmeichhe dang vanga tualthah hreh miah lo saw." a ti leh ta mai.

Pu Faka chuan mittui tla phung chung chuan, "Nilo, dawt vek a ni." a la ti hram a. Thinrim tak hian Pi Puii chuan, "A tha e, i hrilh dawn lo a nih chuan ka'n sawi ange. I pa leh kei hi nupa kan ni a, tichuan kan fapa neichhun chu Jerry-a hi a ni. MAhse Jerry-a hi tawngtheilo leh rilru kimlo a ni a, chuvang chuan i pa hian fa dang neih leh vat a duh a. Mahse ka rai thei tawh silova, chuvang chuan Jerry-a chu mental care-a dah a, fa lak mai a duh thu a sawi a. Mahse ka phal lova, fa chu kan la ta thova. Jerry-a hian kan fa lak thar, Daisy chu a duat em em a. Vawikhat chu kan inleng pakhatin Daisy bianga a lo fawh avang chuan ani rilru kimlo leh thikthu chhia chuan a lo seh palh a. Chuta tang chuan Jerry-a hi a en hrang em em a, a ti duhdah thin hle bawk. Hun a kal zel a, kum 3 i nih khan i pa hian ngaihzawng dang a nei tih ka hre chhuak a, chu chu tuna i nu anga i ngaih, Siami saw a ni. Kei aiin a naupang zawk a, a taksa pawh a mawi zawk. Chuvang chuan min then a tum a, mahse ka luhlul em avang chuan Jerry-a nen hian min dahthat a tum ta a ni. Tihpalh anga a lan theih nan tiin kudamah chuan gas a ti leak lui a, a chhunga thil la tur chuan Jerry-a chu a tir ta a. Zawn pui tur leh bati zu chhi eng turin min tir thla ve a, mahse ka thlen hma chuan Jerry-a chuan mei a lo chhi alh hman a. Kudam chu a puak ta a, mahse Jerry-a chu a lo la thi lova, a hmai a lo kang vek thung. Tichuan Jerry-a ka buaipui lai chuan min thah tumin a rawn kal leh a, Jerry-a chu pawmin ka tlanchhiat pui ta a ni." a ti leh ta siah siah mai.

Daisy chuan mak a ti em em a, apa chu a en tlawk tlawk ringawt. "Daisy Bell hla kha  angaina viau thin a, a chhan chu Jerry-a hian Daisy hi a hmangaih em vangin chu hla chu tun thleng hian a ngainat phah ta a ni. Ramhnuaiah kan tlan bova, min zawng turin mi a ruai char char bawk. Mahse helai hmunah hian kum 15 chuang zet chu kan khawsa a, phuba lak nan tiin DAisy chu man kan tum ta ran ran a ni. Kan awmna china rawn kal apiang chu kan that zel a, an sa kan lo ei mai zel. Kal tlang phallohna tih pawh kha an phallohna chhan chu keini nufa vang a ni, kum tamtak atang khan khalai kha an ping tawh a, a lo kallui chu an bo zel..keimahni nufa thil tih vek a ni." tiin Pi Puii chuan a han sawi chhunzawm leh a, Pu Faka chu a meng bial kawk kawk ringawt mai.

"Pa...thudik a ni em?" tiin DAisy chuan mittui tla phung chuan a zawt a. Mahse Pu Faka chu a ngawi reng, "A hnunga Daisy tih inziak avang hian Jerry-a a ni tih i hria tiraw? Ni e, a atchilh em avangin kan veng tlangval ten an bawl a, a hnungah blade-in an ziah sak a, ani chuan a lo pawm mai a nih kha. Khami vanga i thinrim te, kut i thlak nasat zia te kha ila hria em?" tiin Pi Puii chu a lo ang leh tun tun mai.

Chutih lai chuan David-a chuan a pistol thlauh chu a lo chhar a, midang chuan an lo hmu hauh lo A mu chu a en a, pakhat chiah a lo awm tawh. Chutah a tho thut a, Jerry-a awm zawnah tak chuan a kap a, a thal tawp mai. Pi Puii chu a au vak a, chu chu remchangah la in Daisy chuan a kut a lo seh sak ve bawk.

Chemte chu a thlah a, chhuatah chuan a tla ri nghal bawl mai. Chuveleh DAisy chuan a chuh vat a, Pi Puii chu a vit ve nghal. Rum tak hian a mitah a en a, "I thusawi zawng zawng kha ka ring e, thudik vek pawh lo ni mahse, nangni nufa phuba lak nan mai mai kei hi min hmang tangkai a, intisual let der a ni." tih pah chuan a vit nawn mawlh mawlh mai, Pi Puii pawh chu a thi ta.

David-a chu va tlan pheiin Daisy nen chuan an inkuah nghal a, "David, ka van lawm tak em." tiin Daisy chu a tap zawih zawih mai. "Tap suh Duat, i him tawh alawm." tiin Daivd-a chuan a samah chuan a chul sak hliau hliau va. "Bawihte, Daisy.." tiin Pu Faka chu a rawn phei ve a, mahse Daisy chuan a kut a lo phar a.

"Nilo, tinge dawt min hrilh? Ka pa angah ka lo ngai che a, mahse tualthattu maw i lo nih a?" Daisy chuan a ti daih mai. Chutah Pu Faka tawng hma hma chuan Jerry-a chu a rawn thu chhuak leh hlawl mai a, Pu Faka chu a rawn rek thut mai. A luah chuan vuanin a tham vak a, a ring ruh chu a herh tliak hmawk mai a, Pu Faka chu a thi chiang kher mai.

DAisy chu a au vak a, chuveleh a chemte ken lai chu David-a chuan chhuhsak vatin Jerry-a hrawkah chuan a va vit tlum thawih mai a. Thisen a luang zawih zawih a, Jerry-a chu a khur cher cher mai. David-a chuan chemte chu a phawi ri leh hrawk a, Daisy chuan  alo laksak nghal vat. Jerry-a chuan thei leh thei lo hian Daisy chu a melh tawk tawk a, Dai..Dai..DAISY." tiin a vawikhatna atan a rawn ti t(r)ial ruai mai.

DAisy chuan tap chung leh mittui tla zawih zawih chung chuan, "Mangtha le, ka u duhtak." tiin a chhipah chuan a chemte ken lai chuan a vit tlum thawih mai a, Jerry-a chu a thal tawp a, reiloteah chuan a thi ta. DAisy chuan apa ruang chu a kuah a, a tap zawih zawih mai. Tichuan muang chang chuan an inkuah chhuak a, ramhnuai lam chu an pan leh ta.

**********************

Zankhua deuh thaw a an kal hnu chuan kal tlang phalohna lai kha an thleng ta a, kawngpui an hnaih deuh tawh tih an hriat chuan an thaw huai mai. Darkar 1 vel an kal leh hnu chuan kawngpui chu an thleng ta a, an chau tawh takzet. DAvid-a motor ken pawh chu a lo la awm reng a, mahse khalh chi zia zang a nilo.

A phone chu a han phawrh a, signal a lo awm hlauh mai, police an call nghal vat. Car chhungah chuan an thu hahchawl a, DAisy chuan a hun tawn rapthlak tak te chu police ho nghah pah chuan David-a chu a hrilh a, chutia an pahnih tala an him thei leh an damchhuak thei chu an lawm hle bawk.

Rei loteah police an lo thleng a, damdawiin an pan pui dun ta nghal a ni. Motor-a an chuan lai chuan engemaw ngaihtuah chhuah zawk hi DAvid-a chuan a nei a, "Ngawiteh Daisy, thil dik lo a awm." a rawn ti chhuak hlawl mai. "Enge la awm cheu va?" tiin DAisy chu a lo ner deuh nung a. "Pi Puii leh Jerry-a te nufa kha an tlan bo kha ania, mahse engtin nge kha in kha an sak theih?" a ti ta mai a.

Daisy pawh chu a rawn meng kawk mai, "Enge i sawi tum tak chu ni a?" tiin a lo zawt let vat a. "Han ngaihtuah teh, kum 9 mi lek naupang leh nutling pakhat, kum 20 dawn ramhnuaiah an khawsa a. MAhse in te, nangmah kidnap-na tur pindan thuhruk te, an pahnih chauhvin engtin nge an ngaihtuah theih?" a han ti leh a.

Daisy pawh chu a inngaihtuah vang vang a, "I sawi awmzia chu...an pahnih chauh chuan an ni lo i tihna em ni?" tiin a han zawt leh a. "Puitu an awm ang, an awm lo thei lo. Chubakah engmah kha a chiang lo, ka ngaih a la tha chuang lo." tiin David-a chuan a lo chhang a. Chutah an tlan mek lai chuan kawngsirah hian tu emawni hi a lo ding a, an tlan pelh pah chuan Daisy te pahnih chuan an han en chiang a. Jerry-a hmel ang tak mai, hmai ser vek leh puam tulh mai hi a lo ding run mai. An pahnih chuan a lo en a, a nui sak a. Daisy leh David-a chuan mak ti tak chuan an en zui vawng vawng a, mahse an tlan pel ta tho va.

**************************

THE END