EVERYTHING FOR DAISY (MIZO FICTION HORROR/SPLATTER STORY) Chapter - 1 Written by : Aaron Malsawmdawngzuala

 EVERYTHING FOR DAISY

(MIZO FICTION HORROR/SPLATTER STORY)

Chapter - 1

Written by : Aaron Malsawmdawngzuala

***********************

College ban hun a ni a, zirlaite pawh college kawtah chuan an vei kual sap sap hlawm mai. BA Second year zirlai mek, Stacy chu a thiannu Rinrini nen chuan class room atang chuan an rawn titi chhuak nak nak a. College ground lampang chu an va pan a, two wheeler dahkhawmna bulah chuan an bialpate pahnih, Isaka leh Peka te chuan meizial an lo zu a.

Peka hi Stacy bialpa zawk niin Isaka hi Rinrini bialpa a ni. Isaka leh Peka hi an bialnu te ai hian an college ah hian an senior zawk a, an pahnih hian an class a in ang a ni. Hmeichhe pahnih an va thlen chuan, "Nizan ah ka pa nen kan inhnial deuh nak nak a, mahse a phal ve mai." tiin Stacy zawk chuan nuih suk pah chuan a han ti a.

Nuih huk pah chuan Peka chuan, "I pa hi chu awww...a strict ve ngawt mai, rawn len lahin a meng ve reng zel a, a inthlahrunawm thei si." a lo ti ve bawk a. "Kei ka pa in Isaka a duhsak tehreng nen, a in an loh theih mange." tiin Rinrini chu a lo fiamthu ve bawk a. Isaka chuan a sana en in, "An rawn va chhuak ve har ve, Daisy te nupa hi.." a han ti nuah nuah a.

An sawi lai mek chuan kum 24 a upa, hmeichhe sang tha tak leh pian nalh em em mai, college mipa te pawhina an star rawn em em, Daisy Lawmsangkimi chu a bialpa, mipa te thik rawn DAvid-a te chu an rawn phei ve ta a. "Eheu, thil engemaw in va ti zuai te a ni lo maw...in va rei dun bik ve.." tiin Peka chuan a lo fiam a.

"Over suh aw...Lalpek, min zunpui lawk anih kha.." Daisy chuan a lo ti hlur a. Nui put put chung chuan Rinrini chuan, "Zun pahin..thildang in ti zuai tihna nimaw?" a lo ti ve leh a. "In benchheng emai, naktuk chu in hman tlang tak tak maw?" David-a chuan a han ti a. "Zep lo chuan ka peih vak lo e...ramhnuai ber kher chu.." Daisy chuan a ti nang nang mai.

"I mawl ami? Kan chhuah ho khat tawh em hi...tihian ti bik ziah suh." tiin Stacy chuan a lo vin nghal hrep mai. "Dik chiah mai, kan thil tih ho naah i tel peih lo bik ziah mai, tun tum tal chu peih ve hram teh, i thiante hi min hlat sawt lutuk." tiin Rinrini chuan a lo tuihnih ve bawk a. "In bula awm te chu ka chak lutuk thova, mahse kan chhuahna tur ber kher hi..peihawmloh em alawm." tiin Daisy chuan a chhang a.

"Amak e awww....inpa in nuam a ti nang, a third-wheel lutuk anga sin." tiin Peka chu a han nui deuh sung a. "Awle awle..ka kal dawn lo pawh ka tih loh kha. Khatin min hauh rawn nghal luai luai teh suh u...haw vat ila, keiphei chuan ka pa pawh ka la dil lo." Daisy chuan a han ti leh a. DAvid-a chuan a en deuh hu a, "Naa..i la dil lo maw? NAktuk mai a nih tawh a, a phal lo leh vel ange aw.." tiin a hlauthawng rilru hle mai.

"Phal ang...a phal em em ang, lungngai suh." tiin Daisy chuan a lo chhang a. "Anih chuan vawiin tlai chu haw tlai lo hlawm ila, chhungte bula mark tih that angai tehmai ania...kei phei chu ka pa a strict si." Stacy chuan a lo ti ve leh a. Tichuan haw tur chuan an scooty theuh ah chuan an chuang a, Stacy, Rinrini, Peka leh Isaka te chu an kal a.

Daisy leh David-a te erawh an la kal ve lo, David-a chuan a bike chu tlawh nun  ahan tum a, a nung mai thei tlat lo. Chutia bike tih nun tuma an buai mek lai chuan an college thlang a kham sang ve tak, mahse awih lutuk lem lo atang chuan tu emawni hian DAisy chu uluk faharn hian a lo thlir ngawih ngawih mai a, a rum deuh nghut nghut bawk.

Reiloteah chuan bike chu a nung a, Daisy te pahnih chu an inphur liam ve ta a. An kal chiah chu DAisy lo enthlatu pawh chu kham lamah chuan a tlan thla leh ta daih a, a rum thla nghut nghut mai. DAisy te thian ho hian tent out neih an tum a, hmun nuam tak leh rem tak, fal bawk si an hre thar hi a ni awm a, chutah chuan ni thum lai holiday an neih chhung chuan intihlim tura kal an tum a ni.

*****************************

Chaw eikham ah chuan DAisy chuan a pa chu a dil ve ta a, mahse a tir chuan a tawng tha duh hauh lo. Mahse a sawi a sawi tak hnuah chuan, "Khawilai chiah maw in kal tumna chu ni a?" tiin a han zawt ve ta nge nge a. "Thingmawi khaw kalkawng lam an tia, khualbuk peng tih a lo inziak anga, tah chuan chhuk char char a nimai..ka la kal biklo." tiin Daisy chuan a chhang a.

Apa chu a han ngawi vang vang a, "Ngawiteh..tlaklam ram an tih kha a ni lo maw?" a han ti nuah nuah a. "Ka hre biklo..mawh paa..ka kal ve duh alawm." tiin Daisy chuan a han ngen leh a. "Kal tlang phal loh tih vel a awm tlatin ka hria, hmanni mibo an zawn pawh khan ka thianpa khan a sawi tlat a ni." apa chuan a lo ti leh a.

Mahse a han ngen a han ngen tak hnuah chuan apa chuan a phal sak ve ta nge nge a, a lawm kher mai. Chumi zan chuan group ah chuan a kal ve theih thu chu a han post a, mahse bad news a lo awm tlat mai. A bialpa ber, DAvid-a pa chu a thaw hah chhuakin damdawiin an chhohpui nghal hi a lo ni a, ICU ah hial dah luh a ngai a.

Harsa takin apa phalna a dil chhuak hram hram a, mahse a bialpa ber, a kal peih ve na chhan ber chuan damdawiinah apa chu a riah pui a ngai ta tlat mai. Cancel leh mai chu Daisy chuan a rawt a, mahse midang ho chuan an remti tlat lo. DAvid-a chuan Daisy chu a rawn phone a, an sawi dun a.

"I tello te chuan ka peih teuh lo mai, ka kal lo mai ang."

"A ngai lo, kal rawh..kan sawi hona a rei tawh bawk si. Ni 2 leh zan hnih lek alawm, a rei dawn hleinem."

"Ni 10 pawh nise i tel te chuan ka peih vek a, mahse i tello a nih chuan zan khat lek pawh ka riak peih hleinem..ka kal lo mai ang."

"Chutin an ti ngai lo, midangin an ngei phah ang che."

Daisy chuan a hnial zel a, mahse midang ho an lungawih loh a hlauh avang chuan kal ve tur chuan David-a chuan a thlem zel a, a tawpah chuan a duh ve ta nge nge a. Group ah pawh chuan a sawi ta a, a tuk dar 10 atanga chhuah tan tiin an rel fel ta a ni. "Lungngai suh, ka nau hmeichhia ka rawn hruai ve dawn alawm....i third wheel lutuk tur a veng deuh ang." tiin a han fiamthu zauh va.

A ruk tak chuan DAisy chuan a peih lo kher mai, mahse Stacy nau a tel ve dawn avang chuan a huphurna pawh tlem chuan a zia ve deuh. Fimkhur tur leh rui nawi em em lo tur chuan David-a chuan a han chah mawlh mawlh a, dar 12 vel thleng an inbiak hnu chuan an duh tawk ve thei ta hram a ni.

******************************

A tukah chuan Daisy pawh chu a insiam mawlh mawlh a, ei tur eng eng emaw a pai teuh bawk. Tichuan an in bul ah chuan midang ho chu a lo nghak a, reiloteah chuan van pakhat hi a lo kal a. DAisy dinna zawnah chiah chuan a rawn ding a, a chhung atang chuan Isaka chu rawn dak chhuakin, "I hman ve tawh maw?" a rawn ti a.

"Ka nghak char char zawk che u tih hre mai rawh...in kim vek tawh em?" tiin a lo zawt let a. "Aw...Rinrini kan sawm leh anga, chuzawng chu a ni tawh mai, chumi zawhah kan kal nghal vang vang thei." tiin Isaka chuan a lo chhang a. A hnung lamah chuan Daisy chu a lut a, mahse a hmelhriat miah loh mipa pakhat a lo chuang ve tlat mai.

Chuveleh Stacy chuan, "E taka DAisy, ka nau kha ka pa ten kal ve an phal leh lova..hei hi Kimtea a nih hi...David-a a hman silova, kan sawm ve a." a lo ti vat a. "Ka thianpa a nih kha...inchibai rawh u." Peka chuan a lo ti ve bawk a. DAisy chu a lungawi chiah lo kher mai, riak ho tur an ni lehnghal a, chutia Peka thianpa pakhat ve mai lo riak ve tur chu a huphurh angreng viau.

Chubakah a thiante pali lah inngaizawng an lo ni bawk nen, chutia DAvid-a hriat miah lova a thianten midang, mipa lehnghal an lo sawm ve ngawt chu a thinrim ru hle bawk. Mahse a lungawilohna tilang duh lovin a nui lui hram hram a, Kimtea chu a chibai ve mai bawk. Tichuan an tlan leh a, Rinrini an sawm leh a.

An tlan zel a, Kimtea lah chuan a be deuh chhen lehnghal a, a lo hnial tlang law law lo kha a inchhir tan ngei mai. Nuam a ti ve hlawl lo, mahse midang lah chuan nuam an ti a, tape play in an zai nasa kher mai. Kimtea chuan a beisei deuh a ni tih pawh a hrethiam reng a, a chhang tha peih ngang lo.

***********************

Darkar 2 dawn an tlan hnu chuan a motor khalhtu ber leh a awmna hre awmchhun, Isaka chuan motor chu a tiding a. "Ehe..helai hi maw...a van ramhnuai em em..." tiin Daisy chu a phun deuh nuah nuah a. "Aww..ramhnuaiah alawm ka riah dawn." tiin Kimtea chuan a lo nghawk zeuh va, DAisy chuan a melh no lo kher mai.

"Khu lai deuh ah khuan ke in kan chhuk anga, hmun zawl deuh a lo awm mai ang." tiin Isaka chuan an awmna bula kawng chhuk em em mai chu a kawk a. "Thosi a tam awm si...a peih awm loh ee.." tiin Daisy bawk chu a phun leh nang nang mai. "Amak e, phun reng suh...mood i ti off." tiin Stacy chuan a lo vin hlur mai.

"Thosi an awm vak lovang, a nuam lutuk...a hma pawhin kan tent out tawh a, kan zu thleng anga, i inchhir lovang." tiin Isaka chuan a lo chhang a. An mamawh ang ang te chu kengin an chhuk thla ta hlawm a, Isaka sawi ang ngeiin a lo hla lem lo khawp mai. Mahse an zu thleng thla chiah chu an ner nang hlawm a, a chhan chu midang tent out tur an lo awm ve vang a ni.

Thalai ve tho, mipa panga leh hmeichhe pasarih vel lai an lo ni a. "A va han fuh lo tak...engtin nge kan tih tak ang?" tiin Rinrini chu a tum bur mai a. "Va join ve tawp dawn lahin hmun rem zawng zawng an awh fai vek tawh bawk si, hmundang kan zawng mai dawn mi?" Peka chuan a lo ti ve bawk a.

"Hmun dang a awm ngawt dawn mi? Haw leh mai ang u, duhleh kan inah kan riak khawm mai dawn nia." Daisy chuan a lo ti leh hmanhmawh a. "Kha leh chen petrol hekin kan tlan tawh a, haw leh daih te chu awmzia a awm lo emai." tiin Stacy chuan a lo vin leh hlur mai. Isaka chu a han ngawi vang vang a, "Kal leh deuh hret ang u, a mawng lam deuh ah khuan hmun zawl ala awm em em ang." a han ti a.

"Kan kal thlawn ringawt ange...keichu ka peih miah lo a nia." Rinrini chuan a lo ti nuah nuah a. "Kal thlawn lovang, min lo zui ru." tiin Isaka chu a chhuk a, midang ho pawh chuan an zui ve leh mai bawk. An chhuk zel a, a tawpah kawng phei a lo awm a. An zavai chuan an ding a, "Saw lamah sawn kal leh deuh ang u..a awm awm emai, hei, kawng phei pawh a awm tawh alawm." ISaka bawk chuan a han ti leh a.

"Lal Isak, kawng kan bo ringawt ange aw...a chi miah lovang." Stacy chuan a han ti deuh khur khur a. "Dik chiah, kei phei chu mahniin haw leh dawn ta ila, kalkawng pawh ka hre leh tawh miah lo a nia." Daisy chuan a lo ti ve bawk. "Lungngai suh u, keiman ka la hria alawm." Kimtea chuan a lo ti a.

"Keipawn ka la hre vek, in mangang hma lutuk a nih kha....kal ang u." tiin Isaka chu a kal leh a, an zui leh ta a. Km chanve vel an kal leh hnu chuan NO TRESSPASSING tih inziak a lo awm tlat mai a, thirlen a lo inhung bawk. "Ehe..kawng a tawp der alawm, hei...ava ho tak." tiin Peka chu za lo deuh chuan a khi suk a.

"A awm tawh lo a nih hi...tih theih dang kan nei lo, haw leh mai ang u." tiin Daisy chu let leh mai a tum nghal tut tut a. Mahse Isaka chuan lo dangin, "Nilove...saw enteh u...saw lai ah sawn zawl nuam deuh deuh a tam saw.." a han ti a. "Kal tlang phalloh a nih hi...i mawl ami?" tiin DAisy chuan a vin hlur mai.

"A ho e, tuman min hre dawn hleinem." tiin Isaka chuan a chhang a. "Kal tlang phal loh an tihna chhan te hi i hre ngawt ngawt ami? Thil hlauhawm a awm te pawh a ni thei asin, keichu ka kal lui duh lo." tiin DAisy chuan a han ti leh hlur a. Isaka chu a nui nasa kher mai, "Eng thil hlauhawm nge awm se i tih a? Mi tute emaw ram a nianga, tlawh pawh ngai loh a ni bawk anga, chuvang chuan an tar mai mai aniang." a han ti a.

"Lut ang u, a ho emai....tumah an rawn kal peih lovang, hetianga hla ah.." Peka chuan a lo ti ve bawk. Daisy chuan a hma zana apa in kaltlang phal loh a awm tih a sawi vel te chu a hrechhuak zawk a, kal tlang luih chu a huphurh kher mai. "Keichu in tih dan dan animai." Kimtea chuan a lo ti ve bawk a.

"Mipa zawng chuan kan ngam a, hmeichhe ho enge in ngaihdan?" Isaka chuan a han ti leh a. Rinrini chuan Stacy chu a en a, "Kal law law mai dawn mi?" a han ti a. Stacy pawh chuan a lo remti ve ta a, "DAisy..nang?" tiin Rinrini bawk chuan a han zawt ve leh a. DAisy chu a ngawi vang vang a, "Umm..ni e, a tha alawm." a ti ve ta nge nge a.

***********************************

Thirlen chu an kan ta a, tichuan an kal leh zel a. A tawpah chuan hmun zawl nuam em em mai leh fai hun mai hi an hmu ta a, puan in kaih nan chuan hmun rem tak a ni. "Hei..kan hmu mai alawm, ava rem nuam tak em...lam pawh a rem dawn e." Isaka chuan a han ti ham ham a. "Lawk..chu..lui luang ri ang deuh ka hria, lui a awm hnai em mawnile?" Kimtea chuan a han ti a.

"Keipawn ka hria, a va hnai ve.." Peka chuan a lo ti ve bawk a. Lui luang ri an hriatna lamah chuan an kal a, an han hawi thla chu an hnuai lawkah chuan lui a lo awm reng a. An hlim dar dar hle mai, "Tih chi lutuk, vanram tla fual hi a ni ringawt." tiin Stacy chu hla pawh an play hma hma chuan a han lam nghal ringawt a.

"Helai hmun nuam lutuk vang hi a nih dawn hi...kaltlang an phal lohna chhan." tiin Kimtea chu a lo fiamthu ve bawk a. Tichuan an puan in te chu an kaih a, thing an fawm khawm nghal bawk. Mei te an chhem a, hmeichhe ho chuan chawhmeh chu an siam nghal bawk a. "Lei kim loh te kan nei em? Dawr awmna a hla fia fia teh mai ania, in check lawk maw?" Isaka chuan a han ti lauh lauh va.

"Nei lem lo aniang, dawr kal a ngai anih pawhin mipa kan awm alawm, a lungngaih thlak loh...kan tlawmngai tang tang mai aniang chu." inla fel tak chuan Kimtea chuan a lo ti leh a, DAisy chuan a lo ei lo kher mai. An zu leh beer pai te chu an phawrh a, nuam an ti lang hle mai. Mahse DAisy erawh nuam a ti lo, a rilru ah chuan a bialpa DAvid-a a awm reng mai.

A phone a han phawrh a, signal a lo tlem em em a. "Ehe..signal ava chau rau ve, tiang te chuan zan hnih hnih kan riak peih lovang." tiin a phun nuah nuah a. Midang ho pawh chuan an phone chu an han en ve a, "Hei, tlem a awm tho hi...lunngngai suh." Peka chuan a lo ti sam et a. DAisy chuan DAvid-a chu a phone a, mahse Kimtea a lo kal ve tih erawh a lungawiloh a hlauh avangin a hrilh duh ta lo.

Kimtea leh Isaka chuan thing tuah tur la belh turin ramhnuai lam chu an pan a, an titi phei dun mawlh mawlh a. "Bawiha, Daisy saw ava chhelo reih ve...min lo tihpui teh." Kimtea chuan a han ti sur sur a. "I ti awm ang lo emai, kan class ami David-a bialnu a nih saw...a chi nang." tiin Isaka chuan a lo chhang a.

"A ho e, a bialpa a tel ve chuan loh hi...zanhnih chhung tal te chu ka coach ve duh alawm."

"A va han lerh thlak tak, i duh leh nangman try la, a duh leh duh loh che a ni mai alawm."

"Naa..min sawi sak ve ang chu."

"Bialpa a nei, kan thianpa ve tho ania, lo kal ve tur a ni nghe nghe zawk mawle. A kal kal ve dawn tih ka sawi vang chauh a lo kal ve i nih hi aw..nangpawh hi, lerh lutuk."

"A bialpa lo kal loh hi khuanu remruat zawk a nih hi, chance te min han pe ve la...ka khuainuai thei awm emai."

"Amak e aw...i duh leh va try la, pawngsual te kha i lo tum ngawt ange..haha."

"Thianpa, ka best friend i nih kha...min tihsak ve mai la."

"Kan la ngaihtuah dawnnia, i ruih nawi dawn loh chuan a nimai."

Thing chu an la khawm a, tichuan an riahna tur hmunah chuan an let leh a. Khua pawh a thim hnai deuh tawh a, mahse Daisy chu David-a nen chuan an la in be char char a. Chutia phone a biak reng lai chuan ral khat atang chuan a hma a college bul kham atanga lo entu bawk chuan a lo en leh reng a, a rum leh nghut nghut mai.

*************************

Khua a thim a, chaw te chu an ei hova. Chaw eikhamah chuan meilum aiin an zu pai te chu an in a, Daisy tih loh chu an hlim tlangin an nui dar dar mai. "Daisy, hmeichhe hi muhrang ula, mipa ho kan mu hrang thung mai dawnnia." Isaka chuan a han ti a, mahse Peka chu a lo ner deuh sak a. A chhan pawh hetiang tluka bialnute nena han inmalis-na hun remchang hi a awm zen zen tawh dawn lo tih a hre reng, mahse Kimtea nena a hrana riahtir ve chi ngawt lah ni hek suh.

"Tui chen ka chak tehreng nen, khua a thim hma lutuk a..naktuk lamah cheng tawh mai ang, sangha man tur te pawh a awm maithei sin." Rinrini chuan a han ti a. An titi nak nak hlawm a, Peka chu a kai deuh mah mah a, a bialnu Stacy chuan a kuah phei a. Daisy, Rinrini, Isaka leh Kimtea te chu an la thu a.

Daisy chu DAvid-a nen chuan an intext reng a, a thiante titi pawh chu a uksak vak lem lo. Rinrini pawh chu a ham deuh bai bai a, "Keipawh ka va mu teh ang..DAisy, i peih hunah lo mu ve mai rawh aw.." tiin a kalsan ve ta a. DAisy pawh chu thawh mai a han tum a, "La tho ve ngawt suh, hei kan la titi dawn chauh alawm." tiin Isaka chuan a lo dang a.

Kimtea pawh chuan, "Dik chiah mai, i induh bik lutuk...kan pahnih chauhvin ngaihzawng hruai ve lo kan nih hi...min khawngaih ve ta che." tiin a lo nui deuh sung a, DAisy chuan a ei lo lehpek kher mai.  An titi leh a, mahse DAisy chuan Kimtea chu a be tha peih hlawl lo. Reilote hnuah chuan Kimtea chuan Isaka chu a han sik zeuh va, Isaka pawh chuan a hrethiam nghal.

"Ka va inthiar lawk teh ang, tikhan lo inkawm ru." tiin Isaka chu a tho thut a, Daisy-i tawng hma hma chuan a kal daih mai. Daisy chu a lungawilo ru kher mai, Isaka lah chu inthiar lovin a mu ve daih lehnghal. Kimtea chu DAisy bulah chuan a han tawlh hnai a, "Tinge ka biak dawn apiang che hian min hlat luih zel a?" a han ti vel a.

DAisy chuan rum zet hian a melh a, "Bialpa ka nei, min beisei i tum a nih chuan i ti fuh lo viau ang." a lo ti khur khur mai. Kimtea chu a nui sak a, "I bialpa a awm loh hi...zanin tal te chu i bialpa angin min ngai mai la." a han ti leh chu Daisy ngaihdan a ni tawh lo khawp mai. "Engtikah mah ka bialpa i ni ngai lovang." a ti leh hmuk a.

Kimtea lah a rui ve tawh bawk si, DAisy chu a kuah lui ta mai a. DAisy chuan a ban chu laksawn a tum a, mahse Kimtea chuan a bawh bet ta ran mai. Daisy chu au a tum a, mahse Kimtea chuan a hmuiah a hup bet. "HElaia ka lo kal ve nachhan i hria em? NAngmah vang a nih hi hre rawh, zanin chauh chu ka ta ah ka siam dawn khawp che." tiin a sual ta vak mai a.

Mipa tha nge nge DAisy chuan a hneh ngang lo, chutih lai chuan DAisy enthla thin tupa chuan thingkung phen atang chuan a lo en leh reng a. DAisy chuan Kimtea mitah chuan a kawm sak ta vak mai, Kimtea na ti lutuk chuan a thlah ta a. DAisy chua  tho va, "Hmela, ka sawi vek dawn midang bulah." tih pah chuan an riah buk lam chu a pan nghal a.

Kimtea erawh a mit thip lutuk chu a meng hlei thei lo, "ZAwngi mai mai chuh." tih pah chuan lui lam a zu pan thla a, a hmaite chu a zu phih a. A meng thei deuh ta, "Enge maw ni a a inhriat ve khanglang le?" tiin a phun zui nuah nuah a. DAisy chuan a thiante hrilh ava tum a, mahse an lo chatthla vek tawh a.

A lungawi lo kher mai, "Naktukah kan haw nghal chiang viau ang, a nih loh chuan DAvid-a bulah ka sawi vek dawn." tiin a phun vak vak a, an puan in chu zip phuiin thinrim leh lungawilo tak chung chuan a mu ve ta a. A lo kal ve ta kher kher chu a inchhir takzet, a thiante chu a hriat ngai pawh nilo, Kimtea an rawn hruai ve kher kher chu a dem takzet bawk.

************************

Kimtea chuan a hmai a phih zova, a han dak vang vang a. "Hmeichhia mai mai lehnghal, a hre dawn khawp alawm. Ka la khuai khem tho tho ang che, ve lutuk chuan.." a han ti nuah nuah a. An riahbuk lam pan a tum hnunglam a han hawi chiah chu a phu nasa kher mai, a hnungah chuan palian tak pakhat hi hreite(axe) hriam hmel zet nen hian a lo ding run mai.

Chupa hmai chu a kang nasa em em a, a puam tulh bawk. Hmel mumal pawh nei lo khawp chuan a hmai chu a puar pup mai a, mihring pawh a ang lo. A ban te chu a lianin a sam lah chu a sei kir buk chhup mai a, ft 6 leh inches 5 vel daiha sang a ni ngei ang. Kimtea hlau lutuk chu au a tum a, mahse a au hman lo.

Chu palian chuan a rek a, thawm a chhuah thei ta hauh lo. A rek kang a, chupawh a kut veilam chauhvin a ni. A kut dinglam chuan a hreite chu a han lek kang a, dimna nei hauh lo chuan Kimtea nakah tak chuan a chek sawk sawk mai. Kimtea na ti lutuk chu a tal vak vak a, mahse a rek nghet lutuk tlat, ala au chhuak thei chuang lo.

A hmai te chu a dang vek tawh a, a mit meng pawh a var pup tawh. A taksa phel tep khawp chuan paliana chuan a chek phei zel a, Kimtea ril te chu a uai hnuang tawh mai. A tuar zo tawh ngang lo, a zawi hnawk a, a thi ve ta. Mahse Paliana erawh chuan ala duh tawk mai lo, a taksa phel lo tawk chiah chiah chuan a chek a.

Tichuan Kintea ruang bung tep chu a phu nawlh a, ramhnuai pilril lamah chuan a phei pui daih mai. A kal pui zel a, rei ve a phei zel hnuah chuan in tereuhte pakhat hi a lo awm a. A chhungah chuan Kimtea ruang chu a pu lut a, ama chenna in ni ngei tur a ni. Silhmun te, ekin te leh room te pawh a lo awm hrang ve thlap.

Mahse inchhung chu a balin a hnawk em em a, a rimchhe em em bawk. Kimtea ruang chu dawhkanah chuan a nghat a, tichuan tape hlui zet mai, bal tak mai hi a rawn la chhuak a. Tichuan hla a play a, a hla play chu DAISY BELL tih hla a ni. Ruang bulah chuan a thu a, hla chu ngaithla in a maimitchhing vang vang mai.

Sap hla niin a hla thu awmzia chu "Daisy, Daisy...i chhanna chu min pe rawh. Nangmah hmangaih vang hian ka a zo takngial dawn, inneihna ropui tak leh lirthei man to tak ka nei ve pha lo, mahse nang leh kei atana siam, cycle ah hian mawi takin i chuang ngei ang." tih a ni. A ngaihthlak pah chuan a rum nghut nghut a, mihring pangngai a ni meuh lo.

******************************

Zing a lo ni a, Daisy chu a harh a. Mahse amah chauh chuan tent chhungah chuan a lo awm a, ava chhuak chu a thiante chu pawnah an lo awm daih tawh. Isaka'n a lo hmuh veleh chuan, "Ehe, i lo tho ve thei maw? Nizan i mutui em?" tiin a lo zawt a, mahse Daisy chuan chhang pawh a chhang lo.

"Taka Kimtea i lo hmu em? Tukin zing khan dar 6 ah ka tho a, mahse ka hmu miah lova." tiin Isaka bawk chuan a han zawt leh a. Chutah thinrim tak hian Daisy chuan, "Hmu mai mai lo, ka hmu peih lo bawk." a ti hlur mai. A thiante chuan an en thap a, "Tinge Daisy, lungawilohna i nei ami?" tiin Rinrini chuan a han zawt a.

"Nei e, ISak..nangmah vang vek i hria em?" a han ti leh hlur a. Isaka chuan hrilhhai tak hian, "Enge awmzia, enge keimah vang a nihna? Eng thil nge thleng a?" a lo ti hu mai. Tichuan DAisy chuan a hma zana Kimtea chet dan te, pawngsual a tum thu te chu a sawi ta vek a. Peka chu a sa kher mai, "Chutiang chuan a lo ti che amaw? Khawnga zawnga chu a awm?" tiin a hawi kual a, a au vak vak a.

Osaka pawh chu a inthiam chiah lo kher mai, "Khatin a che dawn tih ka hre hleinem, hre lawk ila chu ka rawn hruai miah lovang..a zia lo hle mai, Daisy.." tiin thupha a chawi nghal mawlh mawlh a. Rinrini pawh chuan DAisy chu a kuah a, "Avan pawi tak...avan zaklo em em Kimtea chu, lo haw teh se...ka'n vin hrep ange." a lo ti ve bawk a.

"Nia, lungngai suh...keiman ka lo hau ang." Isaka chuan a lo ti ve leh bawk a. "Lui lamah a awm te hi a ni lo maw?" Peka chuan a lo ti ve leh a. "Keichu haw ka duh...a nih loh chuan David-a bulah ka sawi vek dawn." tap tep hian DAisy chuan a han ti leh a. "A ngai lo, keimahni lakah a lungawi lo anga sin...Kimtea chu kan hau dawn lawm, David-a pawh ka chungah rilru dik lo a pu mai ang." tiin Isaka chuan a lo khap vat a.

"Anih chuan vawiinah haw ang u." Daisy chuan a han ti leh hlur a. "Engpawh nise, Kimtea chu lo let teh se, zirtirna ka lo pe hlak ange." tiin Peka chu ala pawr nasa mai. "Lalpek, insum rawh aw..nang kha, thinchhe viau suh." tiin Stacy chuan a lo khap ve bawk. Tichuan Kimtea chu an nghak a, hmeichhe ho chuan rawn an bawl pah bawk.

MAhse darkar 2 hnuah pawh a lo la let mai silo, "Chaw ei san mai ang u, a lo let ve leh mai ang." Isaka chuan a han ti leh a, tichuan chaw chu an eisan ta a. Mahse an chaw eikham hnu fe ah pawh chuan Kimtea chu a lo la let thei reng reng lo mai, an ngaih chu a tha ta chiah lo. "Buaina a tawk te hi a ni lo maw...haw san tawp lahin a dik bawk silo." Peka chuan a han ti nuah nuah a.

"Nia, chubakah a chungah engemaw lo thleng palh ta se, a chhungten keimahni vek ania min mawh puh dawn ni." Stacy chuan a lo ti ve bawk. "Daisy, nizan chuan i kalsan hnu chuan i hmu leh tawh lo em ni?" tiin Rinrini chuan a han zawt a. "Hmu lo, ka rawn mu nghal a..a lo phei thawm pawh ka hre tawh lo hrim hrim." tiin DAisy chuan a lo chhang a.

Darkar khat a liam leh meuh chuan an hlauthawng ta, call an tum lahin a tlang thei bawk si lo. Tichuan mipa pahnihte chuan zawn mai chu an duh ta a, mahse DAisy chuan haw mawlh chu a duh tawh thung. Mahse a thianten an ngen ngawih ngawih avang chuan a remti ta a, eitur tlem azawng paiin Kimtea zawng tur chuan an chhuak ta a.

**********************

TO BE CONTINUE