UNHOLY CONFESSIONS - II (Mizo Horror/Slasher Story) Written by : Aaron Malsawmdawngzuala WARNING : 18+ Chapter - 1

UNHOLY CONFESSIONS - II

(Mizo Horror/Slasher Story)

Written by : Aaron Malsawmdawngzuala

WARNING : 18+

Chapter - 1

************************

Zan dar 10 a pel tawh a, ruah a sur nasa hle bawk. Teruata zan leng haw pawh chu mi in kawtah chuan a tang rei tawh kher mai a, khawpui lah chu ala ri dur dur reng bawk si nen, a la ban mai hmel loh khawp mai. Teruata hi hemi zan hian a leng chhuak satliah a ni lova, thil pawimawh avanga chhuna chhuak kha a ni a, lirthei lah a keng si lo.

Video editing lam buaipui em em mai a ni a, chumi vanga chhuak chu a ni nghe nghe bawk. Taxi a awm mai ringin a han awm tlai ve ngawt a, mahse a beisei loh tak maiin ruah a rawn sur teuh mai si, "Ka bike kha lo keng hle hle ila chu ka do haw lui thei mai ang mawle.." tiin ama hriat tham lek chuan a phun nuah nuah mai.

Darkar khat chuang a ding tawh a, a chhungte phone ngawt dawn se tuman lirthei an khalh thiam loh mai bakah amah chiah chu an chhungkuaah chuan mipa a awm bawk si nen, tih ngaihna dang hre hek lo le, a sur ban hun chu a nghak ngar ngar ta mai a ni. Minute 15 vel a liam leh hnu chuan motor pakhat hi a rawn kal hlauh mai a, mahse taxi a nih loh avang chuan Teruata chuan lo phar din pawh a tum lem lo.

Mahse chu car chu Teruata dinna bulah tak chuan a rawn ding a, tukverh chu muang chang chuan a rawn slide thla a. Teruata chuan mak ti rilru tak chuan a lo en reng ringawt, driver seat atang chuan hoodie dum, a hma a SHADOW X tih inziak, face mask dum vuah hi a rawn dak chhuak a.

Teruata chu a rawn en vang vang a, "I lo chuang duh em?" tiin a rawn zawt a. "Ih..aw..khawi..khawilai nge i thlen dawn?" Teruata chuan a lo ti bah nuai mai. "Khawia awm nge i nih zawk?" tiin driver chuan a lo zawt let a. "Ramtharah a nia, kawng hnuai lamah." tiin a chhang a.

"Chulam chu ka pan dawn alawm, lo chuang rawh." Driver chuan a lo ti leh a. Teruata pawh chu a lawm rilru kher mai, "A va tih zia hlauh e..ka lawm lutuk aw.." tih pah chuan a chuang lut ve ta a. A hnung seat lamah zawk chuan a chuang a, "Video edit tur a tam lutuk a, chuvang chuan kan rei deuh mawle...lirthei ka keng lo khanglang alawm mawle, ruah lah a sur tam phian sia." tiin a han titi nghal deuh luam a.

Mahse driver chuan a chhang ve miah lo, a ngawi reng ringawt. Teruata bawk chuan, "Khawiah nge i kal hrim hrim a, tun ang zan zan ah?" tiin  ahan zawt leh a. Driver chuan a chhang lo, Teruata chu a hrilhhai angreng viau mai. "Thianpa, khawia awm nge i nih hrim hrim a?" tiin a han zawt leh a.

"I hre lo ang." a lo ti hmuk ringawt. Teruata chuan chhan ngaihna pawh a hre tawh lo, mak ti rilru tak chung chuan a ngawi ve ta a. Chutah a phone a rawn ri a, anu a lo ni. "Hello nu, ka rawn haw mek..hei ka thianpa in min rawn thlah a, motorin...min lo ngaihtuah suh." a han ti nghal zung zung a.

"Tu i thianpa maw?" tiin anu chuan a rawn zawt a. Zawite hian Teruata chuan, "Thianpa, tunge i hming? Engtin nge ka sawi ang?" a han ti su su a. Driver chuan zawi sap hian, "SHADOW X." tih ringawt chuan a lo chhang a. Teruata hrilh hai leh mak ti lutuk chuan, "Engtin maw? Eng X maw?" a ti deuh hu mai.

"SHADOW X." tih bawk chuan a rawn chhang leh a, Teruata chu a nui suk mai. "I kawr hma a inziak ang kha maw? Kha kha maw i hming?" tiin a han zawt leh a. Driver chuan a lu a lo bu nghut ringawt, "Tumaw i thianpa chu?" tiin anu chuan a rawn zawt leh a. "Aw..ihh..Shaodw X-a ania, kan inkoh fiam dan ania..hehe, ka rawn haw mek, ka dah ania." tiin Teruata chuan a dah ta a.

An veng an thleng ta, ruah pawh tlem chuan a han deuh tawh. "Thianpa, nichin khan tinge i hming pangngai min hrilh mai loh va?" tiin Teruata bawk chuan a han zawt leh a. "Kha bak kha hming ka nei hrih lo." tiin driver chuan a lo chhang leh a. Teruata chuan mak a ti tawh angreng kher mai, chu driver chu diklohna riau a nei tlat hian a hria a.

"Teruata ka nia, Vanlalruata...Teruat min ti mai dawnnia." a han ti leh a. Mahse chu driver, Shadow X nia insawi chuan a chhang leh pek ta lo. Teruata pawh chuan ngawih mai chu tha in a hria a, a be bik ta lem lo. Tichuan an veng kawnghnuai chu an thleng a, mahse X-a chuan kawng chung lam a pan pui daih mai.

"Hey, tinge khalamah i tlan chhoh, kawnghnuaiah ka tih kha.." tiin Teruata chuan a han vin deuh hlur a. Mahse X-a chuan a chhang chuang lo, a tlan chhoh pui zel a. "Thianpa...thianpa, kawnghnuaiah ka tih chu...ding rawh." a han ti leh vak vak a. Mahse X-a chuan din ala tum chuang lo, a tlan chho lui zel a.

Chutah Teruata ngaihdan a ni bik ta lo, X-a chu va th(r)am a tum a, a rawn tho chhuak chu X-a chuan speed a la thut a, chu kawng chho un tak maiah chuan a phit chho thut mai. Teruata pawh a thu let thla rang kher mai, chutih lai chuan X-a chuan a hoodie ipte atang chuan pen ni awm tak, sei zet mai hi a phawrh chhuak a.

Teruata lam chu va hawiin a thil ken chu a hmuam a, engemawni hi a phuh chhuak thawt mai. Teruata nghawngah chuan a bur chat mai a, "Ana...athip lutuk." tiin a ngawng chu a dawm nghal. Hling niawm tak, zum tereuhte mai hi a lo bur va mai a. A phawi nghal a, a han en chuan hriau ang tak mai hi a lo ni a, a thinrim kher mai.

"Zawnga, tunge i nih a..enge i duh?" tiin X-a chu a vin hrep mai a, mahse X-a chuan a hma zawn chu enin engmah thleng lo ang mai hian motor chu a khalh chhunzawm reng a. Chutah Teruata taksa pumpui chu a rawn zawi hnawk mai a, a lu a rawn hai chuai chuai bawk. A khaw hmuh chu a fiah lo tial tial a, second 5 vel hnuah chuan nikhaw hrelovin a awm ta der mai. 

********************************

Zing dar 5:30 a rik chuan Abawihi alarm chu a rawn ri ral ral a, muangchang chuan a rawn tho tual tual a. Peih loh hmel tak chuan a han zi mar talh talh a, a alarm chu off-in a ham deuh bai bai mai. Khum atang chuan a tho chhuak a, bathroom ah a lut tlang a. A inphih fai hnu chuan a room lamah chuan a let leh a, morning walk tur chuan a insiam nghal mawlh mawlh a.

A insiam pah chuan a phone chu a han khawih mual mual a, a nui deuh var var a. Tichuan a khum te chu a han siam leh te te a, a lukham vel a dah fel lai chuan thlalak pakhat a rawn tla chhuak nawlh mai. Thlalak chu a chhar a, Nghaka thlalak a lo ni. A han en vang vang a, a mitthlaah Nghaka nena an inngaizawn lai te chu a lo lang chuai chuai mai.

A thiannu anga a ngaih, a lo kawmngeih ve em em Mary dawt sawi awih a, Nghaka a lo then hmak te kha a han ngaihtuah let a, a mittui a tling teih mai. Zawite chuan thlalak chu a han fawp zeuh va, tichuan lukham hnuaiah bawk chuan a dah leh a. A pheikhawk chu bun tha lehin room chu a chhuah san a, walk turin in chu a chhuahsan leh ta a ni.

*******************************

Teruata chu thil chhu ri bur bur chuan a ti harh zawk mai a, a meng deuh kawk mai. Thutthlengah chuan nghet taka phuarbeh a lo ni a, a hmaah chuan X-a chuan engemawni hi a lo chhu ri bur bur a. A awmna te chu a han enkual a, pindan thim ruih mai, a bang pawh cement vek a lo ni.

A ruak deuh huai lehnghal a, a ngaihna a hre lo kher mai. X-a chu a va en a, a lo hnungchhawn tlat a. Vin zet hian, "Hey, Zawnga...tunge i nih a?" a han ti vak a. MAhse X-a chuan a thil chhut lai chu a la chhu reng a, a ngaihsak thak lo. "I beng a ngawng em ni? Engvanga hetia min phuar nge i nih? Min chhuah vat rawh...Zawnga, ka sawi chu i hria em?" tiin a han vin leh khur khur a.

Mahse X-a chu a la rawn hawi chuang lo, "Min chhuah rawh..anih loh vaih chuan.." Teruata'n a han ti chiah chu X-a pawh a thil chhut lai chu a tawp hmak a, rum zet hian Teruata chu a rawn melh a. A thil chhut lai chu a rawn lek chhuak a, thir tiang hrawl zet mai, a hmawr ling vut mai hi a lo ni a.

Muang chang chuan chu thir ling chu rawn ken phei pah chuan Teruata chu a rawn pan hnai a, "Anih loh chuan.....a nih loh chuan enge? Enge nang khan i tih vak anga? Mawhh?" a rawn ti ve ta khur khur mai. Teruata chu a zam leh rang kher mai, "Tu..tu..tunge..tunge i nih? Enge i pawi ka sawi?" a ti khur dar dar a.

"Ka pawi chu engmah i sawi lo, mahse midang pawi erawh i sawi thung a ni. Chuvang chuan ka hrem dawn che, kei hian ka hrem dawn che a ni." tiin X-a chuan a lo chhang a. Teruata chu a mittui a tla phung tawh mai, "Engthil mah ka ti sual lo, tunge i nih? Khawngaihin...khawngaihin min chhuah rawh.." tiin a tap tuau mai a.

A phuarbehna thutthleng chu X-a chuan kal hual pah chuan, "Teruat...ngatinge i thiamna te hi tangkaiah hmang lova, mi pawisawi zawng leh mi nun tichhe zawnga i hman?" tiin a han zawt leh a. Hlau tak chung chuan, "Eng...enge i sawi awmzia ka hre lo." tiin Teruata chu a khur dar dar a. ZA lo tak hian X-a chu a nui huk a, "I hre lo amaw? I hre dawn lawm, i hre mai ang." tiin Teruata hma takah chuan a ding a.

A thir ling ken chuan Teruata mal chu a dep ta mai, a ri sur sur lehnghal. Teruata sa ti lutuk chu a au vak vak a, "Nilo...a sa...a sa lutuk...a sa lutuk." tiin a tap vak vak mai a. Thirtiang chu X-a chuan a la sawn leh a, "Tikhan enge i tih sual i hre thei tawh em?" tiin a han vin vak a. Teruata chuan a la chhang thei mai lo, a mal kang chu enin a mittui a tla zawih zawih a.

Na a tih em avang chuan a khur tlawk tlawk a, a tawng hleithei lo. X-a chuan a lu a han bu nghauh nghauh va, "Umm...ala tawk lo deuh animaw?" tih pah chuan a malpui lehlamah chuan chu thirtiang ling vut mai chu a han dep leh ta a, "Nilo..ti tawh suh...ti tawh suh..asa lutuk." tiin Teruata chu a rak leh tuar tuar mai.

X-a chuan thirtiang chu a la sawn leh a, Teruata na ti lutuk te chu a hnap a tla pur thei hial a, a chil a fan duai duai bawk. Thinrim tak hian X-a chuan, "Na dang tawrh i duh tawh loh chuan i thil tih tha lo tak kha han inpuang teh le..a nih loh chuan i mitah ka dep tawh ang." tiin a vau leh khur khur mai.

"Ana...ana lutuk, min...min chhuah rawh.. khawngaihin...min chhuah rawh." Teruata chuan a ti tawk tawk a. "Inpuang phawt rawh...i thiam thil hmanga nu pakhat nun zawng zawng i tihchhiat vek kha, min hrilh vek rawh." X-a chuan a lo ti leh a. Teruata chu a tap zawih zawih mai, a thlan chuan a bual huh vek bawk.

A inhnit hlawp hlawp a, "Ka...ka thianpa nu ania..a hmeltha in ala itawm em em a. A pasal nen an inthen tawh lehnghal a, amah lah ala upa chhe lo bawk nen. Ka mit a la em em thin a, tichuan a rukin an bathroom ah spy camera ka vuah a." tiin a hliam na a ti lutuk chu a han then leh chawk chawk a.

"Chuan enge thleng zel...sawi zel rawh." X-a chuan a lo ti vin leh hlur mai. "Ti..tichuan, a inbual hun kha ka chang ta thin a. Ka computer atangin a inbual apiangin ka en a, ka record vek zel a ni. A tawp a tawpah chuan ca spy camera chu a huh nasat tawh em avangin a chhe ta a, tichuan ka va la ta chauh a ni." tiin Teruata chuan a sawi chhunzawm leh a.

X-a chuan thir tiang chu chhuatah chuan na em em hian a vawm pawp mai a, Teruata chu a phu nasa kher mai. Thinrim hmel tak hian X-a chuan a han melh leh a, "Mi tenawmpa, sawi zel rawh...chu chauh chu thil thleng a ni lo." a han ti leh hlur a. Tap pur chung chuan, "Ka...ka insum zo lovin chhuanlam siamin amah chauhva an ina a awm laiin ka bem a, mahse min lo hnawlin min vin hrep a, ka hmaiah min beng hial a. Chu chuan min ti thinrim a, a video chu ka ti leak out ta a ni." tiin a inpuang ta a.

X-a thinrim lutuk chu a mitmeng pawh a sen rum thei hial a, a inhum ruh nasa mai. Chutah Teruata samah chuan a tham a, "Ngaithla rawh, Hmela...Pi Rinpuii chunga i thiltih avang khan Police hial an inrawlh angai a, nang lah chuan i la vau chhunzawm zel lehnghal. Khami hnu pawh khan blackmail nan i hmang a, tichuan a rukin i mutpui ta thin a nih kha tiraw? Ani chuan a hnial ngam tawh lo che a, mahse chu chu duhtawk lovin a saruak thla i laksak leh a, vau nan i hman chhunzawm leh bawk a..." a sawi zawm hlethei lo, a thinrim lutuk chu a han vei kual leh a.

Chutah na em em hian Teruata hmaiah chuan a han hnek leh siah a, "Tunah Pi Rinpuii hi khawnge a awm i hria em? Mawhh..khawnge a awm? Sawi rawh...kut ka thlak leh hma che hian sawi rawh." tiin a han vin leh deuh thak a. Hreh hmel tak hian Teruata chuan, "Me...Men..MEntal Hospital ah.." a ti zawi sap mai.

"Ni e, Mental Hospital ah...a mualphona zozai te, a zahna zozai te kha a tuar thiam thei thlawt lova, a pasal nen an inthen avanga a rilru a hah tawh dawn tehreng nen, nanga hurherh vang mai maiin a rilru a buai phah asin. Biak tlak a ni tawh lova, mi a diktak a ni tawh. Nang lah chuan i thianpa Puipuia tawrh pui niawm fahranin i han hnem leh vel a, inchhirna pakhat mah i nei chuang lo. Thaw veng takin khawlaiah i la leng vel mai mai a, engmah thleng lo awm fahranin...hrehawm tihna i nei miah lovem ni?" tiin X-a chuan a vin leh hrep mai.

Mak ti tak hian Teruata chuan X-a chu a en a, "Tunge i nih? Engtin nge heng zawng zawng hi i hriat?" tiin a zawt khur dar dar a. X-a chuan rum zet a melh pah chuan, "Tunge ka nih a, engvanga kei kher hian hremna ka pek che...a chhan i hriat a pawimawh lo. Tunah chuan hrem che a hun ta, i thil tih man chu i hmu khawp ang." tiin a chhang a.

Chutah hlauh hmel tak hian Teruata chuan, "Mi...min hrem tawh kha, ka ke pahnih hi a na lutuk...khawngaihin min hrem tawh suh, ka duh tawh lo." tiin a tap nasa mai. "Ka duh tawh lo..ka duh tawh lo...chu thu chu a sawi ve fo thin ang tiraw Pi Rinpuii khan, khawngaihin ti tawh suh, ka duh tawh lo tiin...mahse i ti lui tho, engvang tehlulin nge ka tih luih bik lovang ni?" tiin X-a chuan a lo zawt let daih mai.

"Khawngaihin...khawngaihin min ngaidam hram rawh..khawngaihin..ka inchhir takzet a ni." tiin Teruata chuan ngaihdam a dil nghal mawlh mawlh a. X-a chu a ngawi vang vang a, "Ngaihdam chu ka bulah nilovin, i thianpa..i thianpa Puipuia bulah dil zawk rawh." tiin a lo chhang a. Teruata chuan a ngaihna a hre lo kher mai, chutah X-a chuan a ipte atang chuan phone chu a rawn phawrh a.

Teruata'n phone a hmu chiah chu, "Ka...ka phone, ka phone a nih kha...enge i tih dawn?" a lo ti nghal chul mai. "I thianpa ngaihdam i dil ang." tiin X-a chuan a lo chhang a. Hriatthiam loh hmel tak hian Teruata chuan, "Eng..engtin?" a lo ti leh hu mai. Mahse X-a chuan a chhang tawh lo, phone chu chhuatah chuan a dah a.

Tichuan banga current hrui lo invet chu a la lawk a, chu current wire chuan Teruata chu a phuar ta mai a. "Hey, enge i tih dawn...nilo, khawngaihin...min tina tawh suh." tiin Teruata chuan a lo ngen nasa ngang mai. Wire hmawr chu X-a chuan a chep chat a, inchung pawp, tui rawn farna bulah tak chuan a va dah a.

Lehlampang erawh plug ah a vuah lut a, tui far chu chhuatah chuan muang chang hian a rawn luang bawk. X-a chuan plug chu a on ta a, chu tui rawn luang thla meng chuan wire hmawr ava fuh a nih chuan current chuan a man ngei dawn a ni tih Teruata chuan a hrethiam ta. A tal vak vak a, "Nilo...ka duh lo, off rawh..khawngaihin off rawh." tiin a rak chel chul mai.

X-a chuan chhuat a phone chu a chhar leh a, Teruata hmaah chuan a ding vang mai. Phone chu a khawih mual mual a, "Puipuia ka phone anga, tichuan ngaihdam i dil tur a ni. A ngaidam che a nih chuan ka chhuah ang che, mahse a ngaidam lo che a nih erawh chuan sawlai tui far rawn luang thla mek sawn wire saw a tawk anga, current in a man hlum thak ang che." a han ti te te a.

Teruata chuan a lu thingin, "Nilo, ti suh..khawngaihin.." tiin a tap teuh tawh mai. "Puipuia bulah hian kidnap i nih thu leh police ko tura i ti a nih vaih chuan a ngaihdam che chu sawi loh, ka that nghal ang che. Inpuang rawh, a nih loh chuan i thi ang." tih pah chuan X-a chuan Puipuia chu a call ta a. Loud Speaker-ah dahin Teruata beng bulah chuan phone chu ava dah a, a ring ta.

A in-ring zel a, Teruata chuan tui luang chu a en reng a, a hlau takzet. A mittui a tla zawih zawih a, a thlain a bual huh vek bawk. Second 10 vel hnuah chuan a rawn la ta nge nge a, "Hello, Teruat...enge ni ta, zing kar kar ah?" tiin a rawn zawt a. "Pui..Puipui, thianpa.." tiin Teruata chu a tawng bah deuh nuai mai.

"Aw enge ni ta a? Tinge, i va hlauhthawn hmel ve?" tiin Puipuia chuan a rawt zawt leh a. Teruata chu a han tap leh rih a, "Thian..thianpa, ka tihpalh. Min ngaidam hram rawh, khawngaihin.." a han ti nghal ringawt a, Puipuia chuan a hrethiam lo kher mai. "Enge awmzia? Teruat, i tha maw?" a rawn ti leh vat a.

"Puipui, i lakah thil sual lian tak ka ti a ni."

"Engthil sual maw?"

"I..i nu kha...i nu.."

"Teruat, enge ka nu chungah chuan thleng a? Enge i thil sawi awmzia hi?"

"I nu kha...a video ti leakout tu leh spy camera..in bathroom chhunga dahtu kha keimah ka ni." tiin Teruata chu a inpuang ta nge nge a. Puipuia chu a reh ta vang vang mai, "Thianpa, min ngaidam hram rawh...ka tihpalh a ni." tiin Teruata bawk chuan a ngen leh a. Chutah thinrim avanga aw khur deuh dar dar chung chuan, "Teruat, khawngaihin dawt i sawi tih min hrilh rawh." Puipuia chuan a rawn ti zawi sap mai.

Tui luang lah chu a rawn luang hnai zel tawh mai si a, "Nilo..thudik alawm. Thianpa, khawngaihin min ngaidam rawh." tiin a ngen leh a, a hmanhmawh tawh takzet. Chutah vin zet hian Puipuia chuan, "Ngaihdam min rawn la dil ngam amaw? Zawnga, ka thianpa angin ka lo ngai thin che asin." a rawn ti hrep mai a, a tap nghal zawih zawih bawk.

"Nilo..ka tihpalh liau liau a ni. thianpa, ka thiamloh a ni. Min ngaidam rawh, anih loh chuan ka thi mai ang." tiin Teruata pawh chu a tap nasa tawh mai. "Thi rawh...thi mawlh rawh." tiin Puipuia chuan phone chu a dah ta daih mai. "Nilo...nilo, Puipui, khawngaihin.." tiin Teruata chu a rak chel chul mai a.

X-a chuan phone chu a vawm chhe nghal vek a, "A pawi ka ti khawp mai, GAME OVER." tih pah chuan rawmawl a phawrh a, Teruata ka(mouth) chhungah chuan a hnawh lut a, a chhuahsan ta daih mai. Tui chu a rawn luang hnai zel a, TEruata chu a tal vak vak a. Mahse a tal chhuak thei der si lo, a mangang takzet.

A tap vak vak a, a tal velna avang chuan a kut vun pawh a pilh vek tawh. Chutah tui far luang chuan wire hmawr chu a zu fuh ta, current a kal chhova, Teruata chu current chak tak mai chuan  a man ta. Current chuan a shock na takzet, a khu nghal rum rum a. Room chhung chu a phe zuai zuai a, bulb te pawh chu a t(r)ek chhuai chhuai bawk.

Teruata chu ala thi mai lo, a taksa te chu a rawn kang chho tan a. Inchhung chu current sawt nasa lutuk chuan a ti kang tan ta a, Teruata pawh a thi ta. Mahse a taksa erawh a la insawi reng thung a, a tawp a tawpah chuan in pumpui chu a kang ta hluah hluah mai. Pawn atang chuan X-a chuan a lo thlir reng a, chu in awmna hmun chu hmun fal tak niin ramhnuai ve tak a ni bawk.

*******************************

Zing dar 10 vel a ni a, Abawihi pawh college chawlh a nih avang chuan mu chungin TV a en mai mai a. A phone a rawn ri a, a thiannu Mimi a lo ni. "Hello, enge ni ta, induhnu?" tiin a han nui suk a. "Abawih, please-in thil min lo dah pui lawk teh." Mimi chuan a rawn ti a. "Eng thil maw?" tiin Abawihi chuan a lo zawt let ve nghal a.

"Deliver tur ka nei a, mahse hei ka scooty ke a thep daih a..dah vat a ngai tawh bawk sia."

"Chuan ka scooty i rawn beisei deuh tihna em ni?"

"Rawn hmansak ai che chuan lo kal ve zawk la, min lo dahpui teh."

"Huiham, a khalh chiah hi inthiam thin a..awle awle, khawiah nge i awm a?"

"Mama te workshop ah."

"Awle, ka lo kal dawnnia."

Abawihi chu a scooty chahbi la in a chhuak ve nghal a, workshop chu ava thleng a. Mimi pawh a lo thu tum bur mai, "Khawiah nge deliver tur ni reng reng a?" tiin Abawihi chuan a han zawt leh a. "Police Station ah.." tiin Mimi chuan  alo chhang a. "Ehe, Police Station ah daih..engthil nge ni reng reng a?" tiin a lo zawt leh a.

"Pheikhawk a niin ka hria, hawh..va kal zuai ang." tiin a rawn ding a. "A van tul lo tak, police station-a deliver kher." tiin Abawihi chu a lo phun deuh nuah nuah a. Scooty ah chuan inphurin Station lamah chuan an inkhalh phei ta a, vengdang Station a nih avangin an tlan rei deuh. Minute 20 dawn an tlan hnu chuan an thleng ve ta a, "Nangman va dah rawh aw.." Mimi chuan ala ti zui.

"Ka duh lo, i duh leh va dah rawh...nangma min rawn sawn chhuah ania, keimah bawkin ka dah leh ten..fair lo lutuk." tiin Abawihi chu a phun nang nang mai. "Ka ngam loh vang alawm...Police Station hi chu ka t(r)ih tlat." tiin Mimi chuan a lo chhang leh a. "I va han dawih tak, ka scooty kan hmang bawk a...a fair lo lutuk, va dah rawh." tiin Abawihi chuan a lo hnial leh a.

"I ngam zawk dawna ka hriat vang alawm ka rawn sawm chat che ni...Pu Lalrinawma va ti la a nimai." Mimi chuan a lo ti leh a. Tum bur chung chuan, "Khawi...phakar lutuk mai." tih pah chuan Abawihi chu ava lut ta a. "Pu Lalrinawma.." a va ti lut nghal ringawt a, mahse Lalrinawm ber, Police Inspector chuan nu pakhat hi a lo be mek a.

"Lawk aw, thiannu, min lo nghak lawk." tiin a lo dang a, Abawihi chu a zak rilru kher mai. Thutthlang ah chuan thu in a lo nghak a, chu nu chuan a fapa Teruata bo thu chu a lo report mawlh mawlh a. "A phone a thi anga, a la rawn be lo mai mai che hi a ni lo maw?" tiin Pu rinawma chuan a han zawt a.

"Aih, nizan ah pawh ka thianpa in min rawn thlah a tia. Dar 10 leh a chanve bawr vel kha ania, ruah kha a sur nasa sia. Mahse a rawn thleng har lutuk kha ka ngaih a tha lova, ka call leh a. Mahse vawi tam tak ka call hnuah pawh a in reject zel a, a lo haw ve mai turah ngai ang tiin ka mutsan a. Mahse hei, tukin thlengin a lo la haw lo chu a nih hi." tiin pitar chuan a chhang a.

"Anih leh a thianpa chu a hming a sawi em?"

"Aw sawi e...mahse a mak lutuk, hming pangngai pawh a nilo."

"Engtia hming pangngai nilo maw?"

"Shadow X-a a ti maiin ka hria."

An thusawi lo ngaithla ve rengtu Abawihi chu a rawn hawi chhuak rang kher mai, "Shadow X maw?" a ti zawi deuh sap a. Pu Rinawma chu a han khi deuh suk a, "Ka pi, engmaw i sawi kha? Shadow X i tia mi?" tiin awih loh hmel tak chuan a han zawt nawn leh deuh kher a. "Chu chu a sawi dan alawm, a fiamthu nge pawh ka hre lo." tiin Teruata nu, Pi Zuali chuan a chhang a.

Chutah kawngka bul atang chuan tu emaw ni hian, "Nu Zual..tukin zing khan Teruata'n min rawn phone a ni." a rawn ti a, Puipuia  alo ni. Abawihi pawh chu a ve hawi phei ve a, mahse Puipuia chu a hriat ngai mi a ni lo tlat. Pi Zuali chuan phawk hru hian, "Engmaw? Puia..ka fapa in a rawn bia che maw?" tiin a lo zawt nghal vat a.

"Aw bia e, mahse..ihh, a bo tih ka lo hre ve miah lova. Nichin deuh khan a lo la haw miah lo tih a nauvin min hrilh a, police station ah i kal tih min hrilh leh bawk a, call let ka tum a. Mahse a theih tawh loh, chuvang chuan ka rawn kal tawp a ni." tiin Puipuia chuan a chhang a. "Lo phei teh, Mama..hetah hian." tiin Pu Rinawma chuan a ko phei a.

Puipuia chu ava phei a, "Engthil nge a rawn sawi reng reng?" tiin a han zawt a. Puipuia chu a ngawi vang vang a, a hmel atang chuan a tah a chhuak takzet tih chu Abawihi chuan  alo hmu ru reng a, a ngaih a tha lo nghal kher mai. "Ihh...ngaihdam min rawn dil a, a aw atang chuan a hlauhthawn hmel takzet bawk." tiin a chhang a.

Abawihi chu a meng kawk mai, a thin chu a phu nghal dup dup a, a mitthlaah chuan a bialpa hlui Nghaka'n Shadow X a nih thu a inpuan lai te, mi a thah dah zawng zawngte chu a rawn lang nghal chuai chuai mai. Mahse Nghaka chu a thi daih tawh bawk si, mak a ti lutuk chu Puipuia chu a en tlawk tlawk ringawt a.

"Enga? Ngaihdam a rawn dil che maw? engthilah?" tiin Pi Zuali chuan a lo zawt vat a. Mahse Puipuia chuan thudik chu a sawi duh ta lo, "Ihh..ka hre bik lo, ngaihdam min rawn dil ringawt a, a bak engmah ka hre lo." tiin a chhang ta daih mai. Abawihi erawh chuan zep a nei tih a lo hmuthiam nghal,  a chhan pawh X-a chuan a victim te chu a inpuan tir thin tih a hre tlat.

Pu Rinawma chu a ngawi vang vang a, Abawihi chu ava hmu a. "E taka, Mami...enge ni ta?" tiin ava zawt a. Abawihi chu a phu deuh zuk mai, "E..aw..hei..hei hi." tiin bawm chu a han lek kang ringawt a. "Engthil nge kha kha?" Pu Rinawma chuan a lo ti deuh hu mai. "Ihh...i thil chah, englo..deliver..ka rawn deliver." a ti bah deuh nuai a.

"Aww...a nih tak chu mawle, ka lo inghah rei tir che em? Tihpalh aw, ka dawhkanah hian lo dah mai rawh." tiin Inspector chuan thupha a chawi nghal mawlh mawlh a. Abawihi chuan ava dah a, mahse chhuak mai lova la ngaihthlak chhunzawm chu a chak kher mai. Mahse Shadow-X-a chu tunge a nih a hrilh te a nih ngawt loh chuan lo awm ve rengna chi ni hek lo le, a chhuahsan ta a.

Mimi chuan a lo melh rum kher mai, "I va rei em em ve a, aman pek lawk vek ania, eng em em nge iva tih?" tiin a lo vin hlur mai. Za lo tih hriat tak hian Abawihi chu a nui suk a, "Englo, an buia deuh a...kal ang." tiin scooty ah chuan a chuang nghal a. A ngaih chu a tha lo kher mai, a rilruah chuan Puipuia thusawi ringawt mai chu a awm a, a bengah chuan a ri nawn tlut tlut mai.

*********************************

TO BE CONTINUE