EVERYTHING FOR DAISY (MIZO FICTION HORROR/SPLATTER STORY) Chapter - 3 Written by : Aaron Malsawmdawngzuala

 EVERYTHING FOR DAISY

(MIZO FICTION HORROR/SPLATTER STORY)

Chapter - 3

Written by : Aaron Malsawmdawngzuala

*********************

Zan dar 8 a pel tawh a, mahse DAisy chu ala biak tlang theih miah loh avang chuan DAisy pa, Pu Fakawma chu a mangang tawh em em a, a nupui Pi Siami pawh chu a ngaih a tha chiah tawh bik lo. An nupa chuan an han inhau leh thin, Pi Siami phei chuan police phone mai a tha in a hre ta hial a.

Mahse Pu Fakawma chuan, "Bawihtei thiante chhungte pawh kan phone ve phawt ang chu...chutia police hnena va thlen nghal ringawt ai chuan i phone hmasa phawt teh ang." tiin a lo dang a. Pi Siami pawh a tirah ngaih tha viau mahse, a fanu reh rei ta lutuk chu a hlauthawng ber ber zawk a ni leh a.

Tichuan Pu Fakawma chuan DAisy thiante chhungte chu a han phone kual a, mahse anni pawh chuan an chanchin engmah an hriat loh thu in an rawn hrilh ve tlat mai. Pu Fakawma te nupa an hlauthawngin an rilru a ha hle mai, "Police hnenah chuan i thlen mai teh ang." tiin Pi Siami lah chuan a tur sek mai a.

Chutih lai chuan an kawngka chu a rawn inkik ri karh karh a, "Lo lut rawh." tiin Pu Fakawma chuan a lo chhawn vat a. David-a chu a rawn lut hlawl mai, "Ehe David, enge i rawn tih dawn a?" tiin Pi Siami chuan a lo zawt a. "Nu Siam, Daisy hi tukin zing atang khan ka phone tlang thei tawh miah lova..inbe tlang thei mial em, an chanchin te in hre mial lo maw?" a rawn ti ve leh a.

"I be tlang thei bik lo maw? Keini pawhin kan be tlang thei miah lo." Pi Siami chuan a lo ti ve nghal a. "Nia DAvid, kan mangang khawp mai...engti nge kan tih dawn pawh kan hre lo a nih hi." Pu Fakawma pawh chuan a lo ti ve bawk a. "Pa Fak, police hnenah i report mai teh ang u." Davida chuan a han ti nghal chul a.

"Chumi hmain, an kalna hmun lai tak i hria em?" tiin Pu Faka chuan a han zawt a. Ka hre chiah lo, mahse Thingmawi khaw thlen hma, kawng peng tlak lamah an tia...a awmna tak chu ka hre lo, Isaka khan a hria a.." tiin DAvid-a chuan a lo chhang a. "Police hnena thlen hma in zanin hian kan zu kal mai dawn em ni? Zu enfiah ila...nge naktuk zingah zawk?" tiin Pu Faka chuan a han zawt leh a.

"Nilo...police hnenah chuan i thlen mai ang u, nangni lo zu kal ai chuan a hlawk zawk ang." Pi Siami chuan a lo ti leh chul mai. "Ni e, Pa Fak...Police hrilh ila, police te nen kan zawng ho zawk dawnnia." DAvid-a chuan a lo ti ve bawk a. Tichuan police Station lam chu an pan a, an fanu nilenga an biak tlang theih tawh loh thute chu an report a.

Mahse Police te chuan an biaktheih loh atangin darkar 24 a la liam loh chuan mibo angin an lo pawm thei tlat lo, Pu Fakawma te chu an lungawi lo hle a. "An ram riah tanna chu nimin a ni tawh, nimina an chhuak kha tun thlengin kan la be thei lo chu a nih hi." tiin Pi Siami chu a lo vin hlur a.

Mahse Inspector chuan, "An ramriah chu ni 5 kal ta pawh lo ni se, nizan thleng khan inla be thei a. Hei, he tlangval David-a sawi dan phei chuan nizanah zanrei thleng deuh tawh an inbia a tia, darkar 24 a la tling lo, inbiak theih loh atangin. Chuvang chuan kan pawm thei lo, induh chuan complaint theh lut ula, naktuk zing atangin kan lo buaipui ang." a ti tlat mai a, lungawi lo tak chuan an chhuak leh ta a.

**********************

Daisy chu a rawn harh a, a awmna lai chu a lo thim em em a. A lu chu na a ti em em a, zawimuang chuan a han thu chhuak a. A awmna pindan chu a vawt vur mai lehnghal a, amah lah chu kekawr bul leh tawnzau nen chauh a awm zui. Pheikhawk pawh a lo bun lo, kelawng chuan a lo awm a.

A awmna roomah chuan tukverh pakhatmah a la awm lo zui a, a laia light dim tak bak chu engmah eng dang a awm lo. A kut chain-a lo inthlung a hmuh chuan a hlauthawng kher mai, "Nilo...enge awmzia? Min pui ru...khawngaihin min pui ru." tiin a au nghal vak vak a. Mahse a khawk rum rum ringawt a, a mangang hle mai.

Chhuah tuma chain a han pawh vak vak lai chuan kawngka lam chu a rawn ri rawk rawk a, a tawp nghal chat. Chutah kha Paliana kha a rawn lut a, thleng rawn kengin thlengah chuan chaw leh chawmhmeh, tuihnai lem lo tak mai hi a awm bawk. Paliana hmel a han hmuh chuan Daisy chu a hlau em em a, bang kilah chuan a tawlh hnung nghal rawk rawk mai.

Paliana chuan ava pan hnai zel a, "Nilo...lo kal suh, tunge i nih? Min chhuah vat rawh.." a lo ti nghal chul a. Mahse Paliana chuan tihnat a tum hauh lo, muangchang chuan ava pan hnai zel a. Daisy ke bulah chuan thleng chu a dah a, tui um a dah tel bawk. Mahse Daisy chuan a hlau hle a, khur dar dar chung chuan a en reng ringawt.

Paliana chu a tho leh mai a, let leh a tum chu DAisy chuan a lo au ding a. "Tunge i nih? Mawhh..min chhuah vat rawh." a han ti vin leh tuar a. Paliana chu a rawn hawi let a, a hmai puam tulh mai leh kang ser nasa em em mai te chuan Daisy hlauhna chu a tizual takzet. Mahse chhang lo chuan kal leh mai a tum a, DAisy chu a thinrim ta.

A chaw rawn ken chu a thleng nen chuan a vai darh vek a, chhuatah chuan chaw te chu a darh nuai mai. Paliana chu a rilru a nat hmel em em a, muangchang chuan a rawn tifai a. "Enge ka lakah hian i duh? Tunge i nih ka tih chu?" tiin a han zawt leh a. Mahse ala chhang chuang lo, a tihfai zawh chuan a chhuahsan ta daih mai.

Daisy chuan a au vak vak a, mahse Paliana chuan engatan mah a ngai der silo. "Tinge...tinge hetia min man? Ka haw duh...khawngaihin min haw tir rawh." tiin a tap zawih zawih mai. A thawmhnaw te chu a han dap a, mahse kekawr bul leh tawnzau chiah a hak avang chuan ipte engmah a awm lo, "Khawnge ka phone?" tiin inchhung chu a en kual a.

Mahse a ruak vek mai bawk si, tui um chu la in a han hawng a. A chhungah chuan tui a lo awm hlauh mai, a in nghal khawlh khawlh a. Zep lo chuan a ril chu a tam takzet, mahse kha Paliana thilsiam tuihnai lo zet kha chu a ei duh mai bik lo. Chain chu han pawh chah leh a tum a, mahse patling rual tan pawh pawh chah mai chu a har viau ang le.

Chutih lai chuan Paliana chu a rawn lut leh ta a, chaw thleng bawk chu rawn keng lehin a thar a lo siam sak leh chu niin. Daisy hlau chu bang kil lamah chuan a thu phei lehnghal a, a khur leh ta dar dar mai. Paliana chuan a ke bulah bawk chuan a rawn dah leh a, mahse Daisy chuan a lo tlawh baw leh vek mai.

Paliana chu a lungawilo kher mai, DAisy chu a melh run run a. A hmel rapthlak leh ser khat vek atang chuan a mittui a rawn luang zawih zawih a, chhuat chu a tifai leh a. "Min chhuah rawh..min chhuah hma chu engmah ka ei lovang." tiin a vin vak vak a. Mahse PAliana chuan a la chhang chuang lo, DAisy chu a thinrim tawh takzet.

A tui um, thir atanga siam chu a la lawk a, PAliana rawn kun hniam lai chuan a hnarah a lo chhu siah mai a. PAliana pawh a dak awrh mai, a hnar chu a thi nghal zawih zawih bawk. Chuveleh lungawi lo tak chuan a tho thut a, tui bur chu laksak in chhuahsan leh a tum daih mai. Vin zet hian DAisy chuan, "Hey...tunge i nih ka tih chu..engvanga heta min dah nge i nih?" a han ti leh khur khur a.

Paliana chu a ding a, bang lam chu a pan a. NGawi reng chuan a hnar thi chuan bangah chuan lian tak hian JERRY tih hi a ziak a, Daisy chuan a hre thiam lo kher mai. "Jerry...Jerry-a chu i hming em ni?" tiin a han zawt leh a. Paliana chuan a lu a bu nghut ringawt, tichuan chu tualthattu rapthlak tak mai hming chu Jerry-a a ni tih a hre ta.

Jerry-a chuan a chhuahsan leh a, DAisy chuan a au zui vak vak mai. A mangang em em a, chhuah theih dan kawng chu a zawng ngial a, mahse a room awmna pil ril tak leh thim tak mai chu chutia awlsam taka chhuahsan theih a ni tlat lo. A hawi kual a, bang kila speaker ni awm tak, dum chu a han hmu a.

A en vang vang lai chuan hla a rawn inplay thut mai, a phu nasa em em mai lehnghal. Speaker atang chuan chher tak hian DAISY BELL chu a rawn in-play ta a, a hla chu chutia rapawm tak nilo mahse Daisy chuan a hlau kher mai. A tap vak vak ringawt a, mahse reiloteah hla chu a rawn tawp leh vat.

Tichuan kawngka chu a rawn ri leh rawk rawk a, Jerry-a chu thlenga chaw khat vek keng chung chuan a rawn lut leh ta a, tui um pawh plastic a rawn keng tawh thung. A hnar erawh a la thi phung tho, DAisy hmaah chuan chaw thleng chu a rawn hung leh a, DAisy chuan engmah a sawi tawh lo.

Jerry-a chuan a kalsan leh mai a, Daisy chu a beidawng tawh takzet. A ril a tam em em bawk a, chaw chu a en vang vang a. Sa a lo tel tlat mai, mahse chu sa chu ransa nilovin mihring sa, a thiante sa ngei a ni tih a hre hauh lo. A thiannu Rinrini thi lai kha chiang takin a hmu a, mahse Jerry-a chuan chutia chawhmeh atana a siam a ring bik chiah lo pawh a ni mahna.

Thleng chu zawimuang chuan a pawt hnai a, hreh rilru tak chung si chuan chaw chu tlem a han ei chhin a. Mahse a ril a lo tam tawh em vang nge, a rin ai chuan tui a ti zek mai. Tichuan tui chu a han in leh khawlh khawlh a, chaw chu a bar ta tun tun mai a. A ei zo ta vek mai a, a puar ve deuh ta.

Chuveleh Jerry-a chu a rawn lut leh a, a thleng te chu a rawn seng sak a. DAisy chuan a chetla chu a lo en reng a, "Enge ka lak atang hian i duh?" tiin a han zawt leh a. Mahse Jerry-a chuan ala chhang chuang lo, "I tawng thei lo em ni?" a han ti vin leh tuar a. JErry-a chuan muang chang hian Daisy chu a en a, a lu a bu nghut mai.

"Khawngaihin min chhuah rawh...engmah ka sawi lovang, tu bulah mah engmah ka sawi lovang, khawngaihin min chhuah hram rawh." tiin a han ngen leh a. MAhse JErry-a chuan a lu a thing a, Daisy chu a beidawng takzet tawh. Chhuah tur chuan a ngen mawlh mawlh a, mahse Jerry-a chuan a ngaihsak duh hauh lo.

Chutah Daisy chu a thinrim zual ta, "Zawnga, tu phiangsen nge maw i nih le? Tawng theilo mai mai lehnghal, kei hi min kidnap nachhan chu engpawh lo nise...ka hlau eih lo che, mihring pawh i nilo...ramhuai i nih kha, mihring pangngai pawh i ni pha lo." tiin a an khum ta hrep mai. Chutah zet zawng JErry-a rilru chu a na takzet, a rum ta nghut nghut mai.

Rang takin Daisy chu a chhuahsan a, light a off ta hmak mai le. Pindan chhung chu a thim hian a thim vek mai a, eng pakhat mah a awm lo. DAisy chuan a hlau kher mai, "Nilo...light on rawh, engmah ka hmu thei lo ania." tiin a au zui vak vak a, mahse Jerry-a chu a reh hmak tawh. "KA tihpalh, ka sawi tum pawh a nilo. Khawngaihin min ngaidam rawh, light tal hi on teh." tiin ngaihdam te chu a han dil leh a.

Mahse awmzia a awm tawh lo, Daisy mangang leh hlau bawk si chu a tap zawih zawih ringawt a. Chuta karah speaker atang chuan DAISY BELL hla bawk chu a rawn in-play leh a, DAisy hlauhna chu a tizual tak zet. Hla lah chu a in-play chhunzawm char char a, Daisy chu aw chhuah meuh hian a tap hawm hawm ringawt mai a ni.

****************************

A tuk ah chuan David-a leh Daisy pa, Pu Fakawma te pawh chuan FIR chu an thehlut leh a. Police te pawh chuan DAisy chu an zawng tan ta a, mahse an mumal hlawl lo. DAvid-a chu a mangang tawh takzet a, DAisy'n a kal peih loh thu a sawi laite a, kal hram hram tura a lo hrilh te chu a inthiam lo leh hnuhnawh kher mai.

"Vawiin hi an lo haw hun tur chu a ni tawh a, mahse engmah an chanchin kan la hre bawk si lo." tiin a inbe mual mual a, kar leh lawkah college an lut tan leh mai tawh dawn bawk si. Inah pawh chuan a awm hle hle thei lo, a khat tawk chuan DAisy te inah chuan a va kal leh thin a. Police kuta innghah rikngawt chu dik dawnin a hre tlat lo, an hmalakna lah a nep si.

A rilru ipik lutuk leh hlauthawng bawk si chuan apa car chahbi chu la in a inkhalh chhuak ve ta rawih mai a, chhun dar 1 vel a ni. Thingmawi khaw thlen hma a, kawngpeng a chhuk tur tih thleng kha chuan a kalkawng chu a hre ve a. Tichuan a tlan zel a, kawng peng chu a hmu ta ngei mai a, mahse ala chhuk ngam mai lo.

A han inngaihtuah vang vang phawt a, kawng chu a bo ve mai ang tihte chu a hlau leh rilru hnuhnawh khawp mai. Mahse a thiante leh a bialnu, Daisy chu a ngaihtuah em avang chuan a tlan thla ta nge nge a. Mahse motor luh theih lohna chin a lo awm a, a ding chat a. Chutih lai chuan pitar pakhat, em-a thing phur hi a hmu hlauh mai.

"Ka pi, min lo hrethiam lawk." tiin ava pan a. Chu pitar chuan a lo en deuh hu mai, "Enge ni ta, tlangval?" tiin a lo zawt a. "Helai vel ah hian em ni i awm?" tiin David-a chuan a han zawt a. "Khi lai deuh khi kan khua ania, hei thingphurh tur ka han zawng lawk a nih hi..enge ni ta a?" Pitar chuan a lo ti a.

"Englo ania, ka thiante ka zawng a."

"Engmaw? Ka thiante ka zawng e a?"

"Aw...ni 2 kalta khan helai hmun velah hian an riak khawm a, mahse tun thlengin tumah biak theih an la ni lova."

"Aww a nih tak chu...khu lai deuhah khu chuan hmun zawl nuam deuh mai chu a awm a, mahse ka rawn chho deuh chiah a, tu mihring mah ka hmu lo."

"Khawilai ah khuan maw a awm?"

"Chhuk leh deuh la, a lo awm mai ang."

"Anih leh khumi lo...hmun dang han riah khawmna rem a awm mial em?"

"Khu lai bak khu chu hmun zawl vak a awm lo, a mawng leh deuh ah khuan kal phallohna a awm a, luh thlang phal loh tih a intar ang."

DAvid-a ngaih chu a tha chiah lo kher mai, "Luh tlang pah lohna a? NGatinge luh tlang an pha lohna chhan?" tiin a han zawt leh kher a. "Ka hre chiah bik lo, keini pawh kan lut ngai lo. Hman deuh pawh khan pa pahnih an lut lui a, tun thlengin an ruang takngial pawh hmuh tur awm lovin an khuangcher bo hmak an tia." tiin pitar chuan a chhang a.

DAvid-a beng a verh ta zawk mai, chu luhtlang phal lohnaah chuan a thainte chu an lut tlang lui ve ngei a nih a ring ta tlat a. A chhan pawh ISaka leh PEka te ang, mi ngaihsam lutuk leh fimkhur lo lutuk chu an lut lui duh dawn tih a ring nghal chat. "Mahse...chu mi pahnih bote chu an zawng lo em ni?" tiin a han zawt leh a.

"ZAwng ve bawk e, mahse chu..an hmu silova, ni 7 chhung an zawng a, an tawpsan ta a ni." tiin a lo chhang leh a. DAvid-a chu a hlauthawng tawh kher mai, "Tlangval, ka hmanhmawh deuh sia, ka kal phawt ange." tiin pitar chuan a kalsan ta a, David-a pawh chu a chhuk ve leh ta zel a. Hmun zawl chu a zu thleng ngei bawk, mahse pitar sawi ang ngei khan tumah mihring hmuh tur an awm lo.

****************************

Daisy pawh chu thim zingah chuan ala awm reng a, DAISY BELL hla pawh chu a la in-play char char. A hne tawh em em a, zingah lah Jerry-a chuan chaw a rawn pe duh hauh lo lehnghal. A ril a tam leh tawh em em a, a thlauk te chu a buai vek hialin a hria. Darkar 9 vel thim zingah a awm char char avang chuan a chau hle a, tui in tur pawh a nei tawh lo.

Chutah hla play chu a rawn tawp ta hlauh mai, rang takin a mu chu a tho chhuak nghal a. Light dim tak mai chu a rawn in on leh ta a, mahse dim hle chung chuan thim thama a lo awm rei tawh vang nge ni, DAisy mit chu a rawn na zawk mai. Jerry-a chu a rawn lut leh a, eitur a rawn ken sak leh a.

Daisy chu a lawm rilru khawp mai, mahse chutia eng a han hmu thut chu ala a deuh huih a. Jerry-a chuan thleng chu a ke bulah bawk chuan a rawn dah leh a, eng sawi set set lo chuan a ei nghal buan buan a. Tui bur ruak chu Jerry-a chuan a la a, a chhuah pui daih mai. Mahse Daisy chuan a ngaihtuah tawh lo, chaw chu a bar chhunzawm mual mual a.

REoliteah Jerry-a chu a rawn lut leh a, tui um 5, khat vek hi a rawn keng a. DAisy bulah chuan a theh thla a, Daisy pawh chuan pakhat chu hawngin a in nghal bawrh bawrh mai. Jerry-a chhuah leh mai a tum chu lo ko dingin, "Hey...inthiar te duh ve ta ila, khawnge ka inthiar ang? Hetah hian ka inthiar tawp mai dawn em ni?" tiin a han zawt a.

Jerry-a chuan ngawi reng chuan Daisy awmna zawn sir, bang kil lam chu a pan a,  puan inzar hi a lo awm reng mai. A tir khan a thim em avang khan chutiang a awm tih pawh Daisy chuan a lo hre hauh lo, parda chu a keu va. Ek in hi a lo awm a, tui herh hawna a lo awm bawk a, mahse a tawp takzet thung.

Chain a thlunzawmna pipe kal zel chuan chu ekin pawh chu a lo zawm zel a, eng ang pawhin chhuah tum se, pipe inzawm zel avang chuan Jeery-a'n a thlunna chu chahbi tel lo chuan a phelh thei dawn chuang lo tih DAisy chuan a hrethiam nghal bawk. DAisy chuan a ei zova, a thleng seng sakin Jerry-a chu a chhuak ve lehnghal bawk.

Chu veleh Daisy chu a tho ve nghal vat a, a kut thlunna chain chu pawt phei ve zelin bathroom lam chu ava pan a, chhuahna tur a dap nghal a. Mahse tukverh pakhatmah a lo awm chuang lo, bathroom lam chu a lo tawp em em mai lehnghal. A mangan leh beidawng lutuk chu a thu hnawk a, a tap leh ta zawih zawih mai.

************************

David-a chuan hmun zawl lai tak, a hmaa a thiante riah tumna, midang an awm avanga hmun dang an pan leh zawkna ngei mai kha a zu thleng ta. A han hawi kual ruai a, mahse mihring chu sawi loh, hnuhma takngial pawh engmah a hmu der mai si lo. "Helai hi a nih hmel bawk sia, mahse tumah an awm chuang bawk si lo." tiin ama hriat tham lek chuan a phun nuah nuah a.

A rilruah chuan pitar sawi, kal phallohna hmun kha a awm reng a. A han inngaihtuah vang vang phawt a, zu kal ve zel ta se, kawng a bo ve mai chu a hlau ru deuh bawk si. Mahse a bialnu Daisy a ngaihtuah em a, chubakah chulai thleng thleng chu a thleng ve tawh a. Han haw leh mai chu a tlawmngai ve tlat, a chhuk leh ta zel a.

A kal zel hnu chuan NO TRESSPASSING lo intarna lai chu a thleng ta, a han hawi kual a, a hmun chu reh tak a ni. Luh mai chu a han tum a, mahse a ngam chiah bik lo. A ding vang vang a, sign board chu a en deuh vung vung ringawt. Kal phalloh tih inziak na na na chu kal tlang luih chu a duh bik chiah lo, chubakah buaina a tawh a hlau ve deuh bawk si.

Let leh a tum lai tak chuan tawng ri a hre ta tlat mai, a la hnai em em lehnghal. Hnunglam ava hawi chu a sir deuh lawk atang chuan police pathum hi an rawn chhuak hlawl mai a, David-a an hmu chu an en hu mai. An va pan hnai a, "Tunge i nih? Hetah enge i tih?" tiin Inspector chuan a han zawt a.

"Ka..ihh..ka thiante, ka thiante ka zawng a." DAvid-a chuan a ti bah deuh nuai mai. "Tu i thiante maw?" tiin a lo zawt let leh a. Mahse a chhan hma chuan police pakhat leh zawk chuan, "Ngawiteh, nang hi...nizana complaint rawn theh lut kha i ni tiraw?" tiin a han zawt a. "Aw ni e, keimah DAvid Lalhmangaihzuala." tiin a lo chhang vat a.

Inspector chuan rum zeta melh hian a han thaw hak a, "Engvangin nge i lo zawn ve? Helai hmunah hian engvanga rawn kal ve nge i nih? Tinge police te pawh hriat tir lova i lo zawn ve ngawt a? I chungah thil tha lo thleng ta se, i chhungkhat laina te chuan keini police bak min puh dawn miah lo, i ngaihtuah miah lo ami?" tiin a vin hrep mai.

"Tlangval, hei tunah kan zawng mek a, nangchuan tih ve tur i nei lo. Khawngaihin min hawsan rawh, anih loh chuan buaina tawk ta la, a mawh kan phur dawn miah lo ania." police pakhat chuan a lo ti ve leh a. David-a chu a ngawi vang vang a, "Ka bialnu, ka bialnu a tel ve a ni, ka pu. Nizan atang tawhin complaint kan theh lut a, mahse tukinah in zawng ve chauh va, engpawh a thleng hman theu asin." a han ti deuh hlur a.

Inspector chuan kal tlang phallohna chu a en a, "HElaiah kher hian tinge nangpawh i rawn kal a...helai hi an kal tlang i ring deuh em ni?" tiin a han zawt leh a. "Ka hre lo, mahse an kal chu ka  ring. Ka thian mipate pahnih kha ngaih sam ve tak mai an ni a, an kal tlang duh mai ka ring." tiin a han chhang a.

"Anih chuan kan lo en ange, lo han haw rawh. Chuan helaia kan inhmuh thu hi khawiah mah i sawi chhuak tur a ni lo, mipui hriat tam loh hi kan duh ber a ni." tiin Inspector chuan haw tur chuan a hrilh a, mahse a thiante hmu lova haw mai chu a hreh rilru hle mai. "Kan lo zawng ang, kan hna alawm, lo va haw rawh, tlangval." tiin police pakhat leh zawk chuan a lo ti ve bawk a. Ngawi reng chuan DAvid-a chu a let a, in lamah a inkhalh haw leh ta a ni.

**************************

Tlai dar 5 vel a ni a, khua pawh a thim thet thet tawh. Mahse DAisy erawh chuan khua a thim nge a eng pawh a hre lova, sana takngial pawh a bun loh avang leh phone pawh a kawl siloh avang chuan dar zat pawh a hre lo hrim hrim. A inthiar duh chuan batroom tawp tak chu a pan ve mai zel a, light chu Jerry-a chuan a rawn off thim leh mai ang tih chu a hlauh ber a ni.

Jerry-a chuan a chempui chu a tat hriam hliau hliau va, Daisy Bell hla chu a tape ah chuan ngaithla in a han suk pui ang dulh dulh a. Chutih lai chuan a beng fing var tak mai chuan thawm a hre leh ta tlat mai, rang takin tape chu a off nghal a. Tukverh ah chuan ava dakchhuak a, police pathum lo phei chu a hmu tlat mai.

Inspector chuan in chu a han en vang vanga , "Kal phallohna a ni a, mahse hetah in a awm bawk sia..engemaw awmzia ni?" a han ti nuah nuah a. A thianpa, constable Tetea chuan, "Helai hmun hrim hrim pawh hi ka hre ngai lo reng reng, ka vawikhat kalna a ni." a lo ti ve bawk a. Constable pakhat leh zawk, Mamawia pawh chuan, "Kal phallohna hmun hi chu ka hre ve nual tawh a, keipawh helai tak hi chu ka la hre miah lo." a lo ti ve leh a.

Inspector chuan a pistol chu a phawrh a, "Va kal chhin ang u." tiin hma a hruai a, a thiante pahnih pawh chuan an tiang phawrhin an zui ve nghal bawk. Kawngka chu an han kik karh karh a, "In awm em? AWm in awm em?" tiin Inspector chu a han au lauh lauh va. Mahse chhanna a dawng lo, a reh diak mai.

Kawngka chu hawn a han tum a, a lo inkalh miah lo. Fimkhur tak chuan an lut ta a, mahse tumah an lo awm lo. "AWm in awm em? Police kan nih hi.." Inspector chuan a han ti leh a. Mahse ala reh diak mai, "AWm an awm lo amawni le?" a han ti leh nuah nuah a. An pathum chuan inchhung chu an han check kual a, "Thleng te, thutthleng te, silhmun te leh pindan te, a awm kim ve thlap mai." Tetea chuan a lo ti ve bawk a.

"Kal phallohna hmun a ni a, mahse in a awm bawk si. Helaiah hian a rukin tu emawni tak chu a cheng a ni ngei ang, a thim ruih mai leh nghal a." tiin Mamawia pawh chuan a lo ti ve nuah nuah bawk. "Pindan ah sawn ka lut dawn." tih pah chuan Inspector chu a lut a, a thiante pahnih chuan an zui lut ve nghal bawk.

"Ehe, hei chu tape ani maw? Ava lunglen thlak ve.." tiin Inspector chu a han khi suk a, Jerry-a tape chu a la kang a. "Hei hi light a ni ngei ang." tiin chu room thim ruih mai bula plug chu Mamawia chuan a on a, mahse engmah a eng lo. Daisy awmna room, pilril tak maia speaker zawk chu a on a ni.

Chutia speaker a rawn ri tuah tuah mai chu DAisy chuan lo hria in a muhil lai chu a harh chiang ngang mai a, a thu chhuak hlawl mai. Chutah police ho titi thawm chu a hre ta, "A in on miah lo, eng switch ber nge maw ni dawn le?" tia Mamawia phun bul bul te a hriat chuan Jerry-a a ni lo tih a hrethiam nghal a.

"Min pui ru....khawngaihin min pui ru...khawngaihin." tiin a theih patawpa ring chuan a au tak vak vak mai a, mahse police ho chuan engmah an hre thei lo, a chhan chu DAisy chu leihnuaiah daih a awm a ni. An titi atang chuan police an ni ngei a ni tih a hria a, an thian ho zawng tura lo kal an ni tih a hrethiam nghal bawk.

Mahse a aw an hre thei der si lo, DAisy chu a mangang kher mai. A thlunna chain te chu han tal chah a tum leh rih a, mahse kumkhua pawhin tum mahse chu chain hrawl tak mai chu a ti chat mai nilo, a ti khem zo dawn lo hrim hrim. A thingthi a, a tap vak vak mai. Chuta karah Inspector chuan tape chu a play a, Daisy Bell hla bawk chu a play ri leh ta.

Daisy chuan a beng a hup a, "Nilo...nilo, kha hla kha play tawh suh u..khawngaihin off ru. Min rawn hruaichhuak hram teh u, ka hlau..ka hlau a ni." tiin chhuat chu a beng vak vak a, a mittui a tla zawih zawih mai. Chutih lai chuan kudam kawngka chu a rawn inhawng riai riai a, chempui lian leh hriam tha zet mai nen chuan Jerry-a chu thawm dim tak hian a rawn chhuak leh ta tham tham mai le.

Room kawngka bula lo ding, Mamawia chu a chempui chuan a lu chu a fik hmawk mai a, an thianpa lubung chu Inspector te hmaah chuan a rawn tla nawlh mai le. An au vak a, rang takin room kawngka lam chu an en a, Mamawia lu nei tawh lo, a hrawk hmawr atanga thisen lo chik tuar tuar an hmuh chuan an ding dun nghal zat a.

Mamawia chu a thingthi hnawk a, a bawk thlawp mai. Chutah Jerry-a, chempui nena lo ding run mai chu an hmu ta. Ft 6'5 vela sang, palian leh sek tung mai. Hmai kang sawr vek, sam kir chhup leh puam tulh mai an hmuh chuan an hlau ngei mai. Inspector chuan a silai chuan a tin a, "Tunge i nih? Lo kal hnai tawh suh, anih loh chuan ka kap ang che." hlau tak chung chuan a han ti khur dar dar a.

Tetea phei chuan silai nei ve hek lo, a tiang chu humin a lo ding khur zawih zawih mai. Jerry-a chuan muangchang chuan a va pan phei ta zel a, "Lo..lo kal hnai suh, ka kap hreh miah lo che ania." tiin Inspector chuan a vin leh vak a, a tap pur tawh mai. Chutih lai chuan thil thleng mek chu Daisy chuan speaker atang chuan a lo ngaithla ve reng a, Jerry-a'n ava luh chilh mek a ni tih chu a hrethiam ta.

"Kap rawh u..kap hlum rawh u..anih loh chuan tlanchhe rawh u." tiin a lo rak ve vak vak a, mahse awmzia a nei hauh si lo. Inspector chuan a han kap ta nge nge a, Jerry-a darah chuan a kap fuh a. MAhse a eu deuh zawk ringawt, na ti awm ang pawhin a lang lo. Inspector hlau lutuk chuan abula ding, Tetea chu Jerry-a lamah chuan a nam phei thut a, Jerry-a chuan a lo rek chat mai.

Chu chu remchangah la in Inspector chu a tlan chhuak ta daih mai a, "Nilo Sir, min kalsan suh...min chhan rawh." tiin Tetea chuan a au zui vak vak a. Chungte chu DAisy chuan a lo hre ve vek a, hrehawm a ti takzet. Inspector chu pawnah a tlan chhuak ta daih a, TEtea chuan chhantu tur a nei ta lo.

Bangah chuan Jerry-a chuan a rekbet a, rum zet hian a melh a. A hmel rapawm lutuk mai leh sawr tui hluam mai te chu TEtea chuan a rap em em a, "Min that suh, khawngaihin min chuah rawh." tiin a ngen lawm lawm a, a hlau lutuk chu zun a cheh hial mai. "Nilo..Jerry, chhuah rawh..chhuah hram rawh." tiin a awmhmun atang chuan DAisy pawh chu a lo au ve vak vak bawk.

Chutah le, Jerry-a chuan TEtea ka(mouth) chhung chu a zen a, a ha hnuai lam chu nghet tak hian a vuan a. Chutah a khabe uai hnawp khawp chuan a kuai ta vak mai a, thisek a chik tuar a, Tetea kamsir pawh a thler phei duai mai. Mahse ala thi lo, a na tuar ri te chu Daisy awmna room speaker atang chuan a kiu vawng vawng mai.

Jerry-a chuan ala duhtawk chuang lo, speaker in onna chu a off te te a. DAisy chuan engmah a hre thei ta lo, "Ka haw duh..ka haw duh." tiin a phun sap a, a tap zawih zawih mai. Jerry-a chuan na tuar mek, khabe uai hnawp khawpa a sawisak, Tetea chu a pindan atang chuan a hnukchhuak a.

Hook zum sei tak mai hi a kudam atang chuan a phawrh chhuak leh a, tichuan Tetea ka chhung ah chuan thil tlangin inchhung ceiling ah chuan a khai kang ta vu mai a. Hook chu a sei em avang chuan a hmawr zum chuan Tetea chhup chu a rawn vit tlang hial a, mahse ala thi chuang lo, ala khap fuk fuk mai.

Tichuan chawhtawlh hi a la a, a thawmhnaw a phelh ruah sak vek a. A duk chu zai hawngin a ril te chu a phawrh chhuak a, chawhtawlh chuan a thisen te chu a lo dawh a. Tetea chu a thi ta, chumi zawh hnu chuan Mamawia ruang ava la chhuak leh a, mahse kudamah a dah daih mai. A buaipui zawh hnu chuan a hreite zawk chu a la chhuak ve thung a, Inspector zawng tur chuan ramhnuai lam chu a pan leh ta a ni.

*****************************

TO BE CONTINUE