UNHOLY CONFESSIONS - II (Mizo Horror/Slasher Story) Written by : Aaron Malsawmdawngzuala WARNING : 18+ Chapter - 3

 UNHOLY CONFESSIONS - II

(Mizo Horror/Slasher Story)

Written by : Aaron Malsawmdawngzuala

WARNING : 18+

Chapter - 3

********************

A patea a hmuh loh thu leh a thiante in zawng zawng a kal chhuah deuh vek hnuah pawh a hmuh loh thu a sawi chuan Abawihi chhungte chu an mangang tan ta hle mai, Abawihi pu chuan police hnena thlen nghal mai chu a duh a, mahse Abawihi pi erawh chuan la nghak deuh turin a tih tlat avang chuan an la report hrih lo.

Abawihi chu a patea a hmuh zawh loh avang chuan mangang hle mahse a rilru kap tu ber erawh Puipuia tho ala ni a, a rilru ah chuan a awm reng mai. A phone number takngial pawh a lo dil hman bawk si lo nen, Shaodw X thar chu tunge a nih a, engvanga rawn che leh ta mai nge a nih tih chu hriat a chak takzet a ni.

A room ah chuan a lut a, a lukham hnuaia Nghaka thlalak chu a phawrh chhuak a. A han en vang vang a, "Nghaka, i lo la dam reng tihna em ni? Khawnge i awm? I la dam a nih chuan keimah tal min rawn hrilh tur alawm...khawnge i awm?" tiin ama hriat tham lek chuan a phun sap a, a tap zawih zawih mai.

Chutih lai tak chuan a phone a rawn ri thut a, a phu nasa kher mai. A han en a, number hriat loh a ni. Pick up vatin, "Hello, tunge aw?" a han ti a. Phone ami chuan, "Abawih, Nghaka chu a thi tawh...tuna mi hi chu mithar, keimah...Shaodw X thar zawk ka ni." a rawn ti ta mai a. Abawihi chu a meng bial nghal kawk kawk mai, a chhan pawh chupa aw chu robot voice, a hmaa Shaodw X-a'n a voice atana a hman nen khan a in an chiah chiah vang a ni.

A thlan a tla nghal zawih zawih a, "Tunge i nih? Sawi rawh..tunge i nih?" a han ti khur dar dar a. X-a chu a nui suk a, "Tunge ka nih i hre duh amaw? Khawiah nge i patea a awm i hre duh zawk lo em ni?" a rawn ti leh ta mai a. Abawihi chu a ding nghal zawk mai, "Enga? Ka patea maw? Khawiah nge a awm?" a ti nghal chul mai a.

"BEngchheng suh, i chhungte khan an hre pha ange...i hre duh a nih chuan ka thusawi hi ngun takin ngaithla ang che." X-a chuan a rawn ti leh a. Chutah Abawihi chu a hawi kual a, X-a'n room-ah a awm a ni tih engtin nge a hriat theih tihte, Nghaka thlalak a en lai khera Nghaka a nih loh thu a rawn hrilh chat danah chuan X-a chuan a enthla reng a ni tih a hrethiam nghal.

A hlauthawng nghal em em a, "Khawiah nge i awm? Nang..nang hian min enthla reng tihna em ni?" tiin a han zawt khur leh dar dar a. "Ngaithla rawh, tunah hian dar 7:30 a pel tawh a, dar 9 hmain ka location rawn thawn ah che hian i rawn thleng hman lo a nih chuan i patea hi a thi ngei ang, chutih rualin a thianpa, Sir Mama pawh." tiin X-a chuan a rawn vau ta mai a.

Abawihi chuan mak a ti kher mai, "Enga? Sir...Sir Mama a?" a ti deuh hu a. "Aw ni e, kha mi tenawm leh lerh tak mai, Sir Mama kha...i huat em em kha." tiin a rawn chhang leh a. Abawihi chu a mangang ta hle mai, "Nilo...ka huat vang ringawt khan that suh. Engmah tihsual a nei lo, ka patea nen khan chhuah rawh." tiin a sawi bah nuai mai.

Chutah X-a chu a rawn nui ta vak vak mai a, "Chutiang a ni lo, Abawih. Nanga huat vanga thah tum ka ni hleinem, thil a tihsual vang zawk alawm." a rawn ti leh a. "Anih enge ka patea chuan a tihsual, tu hnenah nge a inpuan ngai? Enge a thil tihsual, keimah a nih chuan ka ngaidam..khawngaihin chhuah rawh." tiin Abawihi chuan a ngen leh a.

"Eheu, Shaodow X-a bialnu hlui nge nge, thil awmzia i hre thui hle mai. Ka sawi ang khan...i patea te thian dun hi i chhan thei ania, location ka rawn thawn ah che khan lo kal la, police erawh rawn hruai suh ang che." tiin X-a chuan phone chu a dah hmak mai. Chutah a message a rawn ri nghal a, farm house awmna location chu a rawn thawn ta ngei bawk.

Abawihi chu a mangang takzet, a rilru a buai map map kher mai. Farm house ah chuan ava kal dawn nge police a hrilh zawk dawn tiin a inngaihtuah nasa hle a. Mahse X-a'n a awm dan zawng zawng a hriat vek danah police va hruai chu a chi dawn loh niin a hre bawk si, a chhungte hrilh ta se an awih angem, an phili ruai phah angem tihte thleng chuan a ngaihtuah nasa kher mai.

Chutah a room te chu check kualin spy camera a lo awm reng em tihte thleng chuan a han dap kual a, mahse engmah a hmu lo. Sana a en a, dar 8 a ri dawn der mai. A tlai a nih vaih chuan a patea leh Sir Mama te chu an thi ngei dawn si, a mangang lutuk chu khumah chuan a bawk thlawp ringawt a.

A tap zawih zawih mai, "Nilo...ka duh tawh lo. Hetiang thil hi a thlen leh ka duh tawh lo, ka hlau tawh a ni." tiin a tap hawm hawm mai a, mahse a tap ring ngam lo, a chhungte hriat a hlau bawk si. Tichuan a tap bang a, khum atang chuan thovin a mittui te chu a hru hul a. A scooty chahbi chu a la a, kawrlum ha in in atang chuan a chhuak ta nge nge a ni.

**************************

Tu emaw na tuar, rum ri tuah tuah chuan Abawihi patea, Zorema chu a ti harh zawk mai. A meng deuh kawk a, room thim leh vawt reih ruih mai, rim tui lemlo tak leh ruak deuh huau mai chhungah chuan a lo mu reng hi a lo ni. Rang takin a tho kang a, a hma zawnah chuan parda var pan tak mai, lang tlang lek lek thei hi a lo inzar bawk.

Chumi chhungah chuan mihring thla a hmu a, amah a hnungchhawn mek a ni tih leh a hmaah chuan khum a awm tih a hmu thei a, chu khumah chuan tu emaw hi a mu mek tih a hmu thei bawk. Amah chuan hliam a nei em tihte a han in en leh a, hliam engmah a nei lo hlauh. Mahse tawnzau leh boxer nen chiah a lo awm a, chapal takngial pawh a lo bun lo.

A hma zawn chu ava en leh a, khuma lo mu mek chuan na a tuar mek a ni tih a hrethiam ta. "Hey..tunge i nih? Tunge i nih ka tih chu?" tiin a han vin deuh vak a. Chutah muang chang chuan ding mek zawk chu a rawn hawi a, zawi muang hian parda chu a rawn hlim a. Shadow-X ngei a lo ni a, mahse a inthuam dan erawh a dang deuh.

Lukhum lum, a rawng dum hi a khum a. Mask dum nilovin, sugical mask, a rawng hring zawk chu a lo hreng bawk. Doctor coat a lo ha bawk a, T-shir var ha in a hmaah chuan lian tak hian SHADOW X tih a inziak bawk. Mak ti tak leh hlau rilru tak chung chuan Zorema chuan a en reng a, "Tunge i nih? Engvanga min man nge i nih?" tiin a han zawt leh a.

Shadow X chuan a surgical glove chu a phelh a, "I thianpa hliam tuar hi ka enkawl mek a nih hi..enge min lo tihbuai a?" tiin a vin let hrep mai. Mak tih hmel tak hian Zorema chuan, "Ka thianpa a?" a ti hu mai. "Niang chu...hei, i thianpa a ni lawm ni?" tiin parda chu a han hlim ta vek a, chutah khuma mu mek chu Zorema chuan ava hmu ta.

Tudang nilovin a thianpa Mama a lo ni reng mai, "Mama...nilo, Zawnga engtin nge i tih a? Chhuah nghal rawh, eng thil phiangsen nge i duh?" tiin Zorema chu a au vak vak a. X-a chu a nui huah huah a, "Au vak vak duh suh, helai hmun hi chu hmun special lutuk a nih hi." a lo la ti ham ham zui.

Chutah Mama chu thei leh thei lo hian a rawn hawi a, a thianpa Zorema a hmu chu a phu zawk mai. "Zo...Zorem, thianpa...khawngaihin min chhan rawh." a rawn ti tawk tawk a, ala tap pur lehnghal. "Mama..Mama.." tih pah chuan Zorema chu a tho chhuak vat a, va tlan phei a tum chu a hma zawnah tak chuan a bawk leh nghal thlawp mai.

A ke a han en a, a ke veilam chu chain hian a lo inthlung bet reng chu niin. Pawh chah mai a han tum a, mahse a nghet lutuk tlat. Chain lah a lianin a hrawl em em mai bawk si, mihring pangngai tha chuan chutia han pawh chah mai chi zia zang a ni lo. Rum takin X-a chu a han en leh a, "Zawnga, min phelh nghal rawh." tiin a han vin leh khur khur a.

Mahse X-a chuan a lu thingin, "Nilove...ni lul love Zorem, engvang ngawtin nge ka chhuah ang che? Nangni pahnih thil tih rapthlak leh tenawm zet kha ka hre ve vek asin, chutia ka chhuah mai che u i ring em ni?" tiin a lo zawt let daih mai. Zorema chuan mak ti tak hian X-a chu a en a, "Eng..eng thilsual nge kan tih?" a ti hu mai.

X-a chuan ava pan hnai a, "I hre tawh lo em ni? Nge i hrelo der zawk?" tiin a han zawt nawn leh a. "Engmah tih sual kan nei lo...nang hi tunge i nih zawk?" tiin Zorema chuan vin tak hian a lo zawt let ve leh hlur a. Chutah X-a chuan chiang fek fawk hian, "Rannung seh? Rannung seh vangin maw i nupui kha a thih a?" a han ti chiah chu Zorema chu a ngawi chiang kher mai.

X-a bawk chuan thinrim hmel tak hian, "Rannung seh nilovin chiu hlum zawk a ni lawm ni?" a han ti leh a. Zorema chuan X-a hmel chu a en tha ngam ta hauh lo, "Eng..enge i sawi awmzia ka...ka hre lo." a ti bah ta nuai mai. "Thianpa, khawngaihin min chhan rawh." tiin tap pur chung chuan Mama chu a lo rak ve chhen bawk.

"I nupui kha i thah a ni tiraw? A chhan pawh i uire vang a ni tiraw? A hre chhuak che a, a ka hup nan in chiu hlum a, rannung seh hlum anga a lan theih nan a sehna hmuamhma pawh in siam chawp a, doctor pawh pawisa in pe thlap. A dik em, ka sawi dik em?" X-a chuan a ti leh ta siah siah mai a, Zorema chu a hlauthawng tawh kher mai.

Hlau tak chung chuan X-a chu a melh a, "Chu...chutiang engmah ka hre lo. Ka..ka nupui kha ka hmangaih a, engtikah mah ka uire san lul lovang." a ti khur dar dar a. "Kei...kei chuan engmah ka hrelo, ana ania, khawngaihin min chhuah hram rawh ka pu?" tiin Mama chu a rawn rak ve leh chiam chiam a.

X-a chuan a kham deuh ta, "Nang chu lo ngawi phawt rawh, nakinah i inpuang dawnnia..tunah chuan i thianpa Zorema hi inpuang phawt rawh se." tiin Mama chu a va pan phei a, a ka ah chuan puan hnawh sakin tape hmangin a hmui chu  atuam phui hmak mai. Zorema lam chu ava pan leh a, "Le...daw kual vel lo khan inpuang tawh rawh le." ava ti leh a.

Mahse Zorema chuan a lu thingin, "I hre sual a ni, ka pu. Ka nupui kha chu rannung seh vang a nia lawm, ka thah a nilo." tiin a lo la pha nasa mai. X-a chu a thaw deuh hak a, "Huiham, a harsa zawng bawkin animaw kan chet leh dawn? A tha e, i inpuan vat loh chuan i thianpa hian a tuar zel ang." tiin Mama lam chu ava pan leh a.

Mama chuan a lo hlau kher mai, thei leh thei lo hian a lo tal vak vak a. Mahse a taksa hliam tam tak avang chuan a che tha hleithei bawk si lo, X-a chuan surgical knife chu a ban lawk a, dim hauh lo chuan Mama khup pilh, hnai tui hluam maiah chuan a vit ta sawk mai. Mama na ti lutuk chu a khur zawih zawih a, a mittui a rawn tla nghal.

X-a chuan Zorema lam chu ava hawi leh a, "I inpuang dawn em? Nge i thianpa hian a tuar leh dawn?" tiin ava vau leh a. Zorema chu a mangang takzet, "Nilo...khawih tawh suh. ENgmah kan ti sual lo, i hre sual zawk a ni." tiin a ngen lawm lawm a. Mahse X-a chuan a hre sual lo tih a chiang ngang mai, a bul dawhkana forcep chu a la a.

Mama kawr chua pawtthler vek a, forcep chuan Mama hnute hmut chu a chuktuah ta ran mai. Mama hlau lutuk chu a meng phar awn awn a, a ka a hnawh sak tlat a vang chuan a tawng chhuak thei silo chu a lu a thing vak vak ringawt mai. "Tun chiah ka zawt leh ang che, a nih loh chuan i thianpa hian hnute hmur a lehlam a nei tawh lovang. I la inpuang duh lo cheu a nih chuan a pahnihin ka hleh thlak sak anga, chutah pawh i la inpuang dduh lo a nih chuan ka sawisak chhunzawm zel ang." tiin X-a chuan Zorema chu a vau leh ta khur khur mai.

Mama hlau leh mangang chuan a thianpa Zorema chu ava en a, inpuang mai tur chuan a duh tih a mitmeng atang chuan Zorema pawh chuan a hai mawlh lo. Mahse a la inpuang duh chuang lo, "Nilo..ti tawh suh. Pawisa engzat nge i duh? Ka pe ang che....min chhuah rawh." tiin a lo ngen leh a.

X-a chuan thinrim hmel tak hian, "Nanga pawisa kha ngatan mah ka tilo, ka duh awmchhun chu i thil tihsual i puan mai chauh a ni." tiin a vin hrep mai. Zorema chu a ngawi reng a, chutah X-a chuan Mama hnute hmur chu forcep hmang chuan a han chep ta mai a, Mama na ti lutuk chu a rum nasa kher mai.

Thisen pawh a chik zawr zawr a, a tal vak vak mai. Chutah a hnute hmur lehlam ah chuan forcep bawk chu a han chuktuah leh ta ran a, "Le...inpuang tawh rawh le. I thianpa pawh hi i khawngaih ve em em lo em ni?" tiin X-a chuan inpuang tur chuan a han ti leh a. Zorema pawh a tap pur tawh mai, mahse ala luhlul cheu mai.

Rum tak hian X-a chu a en a, "I thil tih man hi i hmu khawp ang, hre rawh..Zawnga, ka that khawp ang che." a ti ta khur khur mai. Chutia inpuang ta mai lova, a lo la vau let chu Mama chuan pawi a tih hmel takzet, a mittui a tla zawih zawih a, hliam a tuar leh ngei dawn niin a hria. A hre dik ngei bawk, dim hauh lo chuan forcep hmang chuan Mama hnute hmur lehlam chu a chep leh ta vak mai a, thisen pawh a per leh chhawk chhawk mai.

Mama na tuar rum thawm chu Zorema tan chuan hriat a nuam lo takzet, Mama lah lo indang turin khum tlangah chuan a kut leh ke zawng zawng ziptide hmanga tawn beh tlat a ni bawk si, a thlan chuan a bual huh vek tawh. A tawp a tawpah chuan sawi duh nei niawm tak hian Mama chuan X-a chu a en a, a hmui chu a ti che vak vak a.

"Awle hei, i thianpa hian sawi duh a nei a ni ngei ang. Sawi duh i nei em ni, Sir Mam?" tiin ngeiawm tak chuan X-a chuan a han zawt a. Mama pawn a lu a lo bu nghal vat a, Zorema a lo hlauthawng kher mai. "Nilo..Mama...sawi suh, sawi hlek suh. Engmah tihsual kan nei lo, mawl reng reng suh ang che." tiin a lo vau nghal khur khur mai.

X-a chuan lapua la in Mama hnute hmur hliam ah chuan a deh sak a, tichuan a ka a tuamna chu a phelh sak ta. Chuveleh Mama chu a rawn thaw hrawk a, a khuh vak vak bawk. A na ti lutuk chu a then chawk chawk a, chutah rum zet hian Zorema chu ava melh a. Zorema lah chuan, "Mama...thil atthlak ti suh, engmah kan ti sual lo tih i hriat kha. I hlauh vang ringawt khan dawt sawi reng reng suh ang che, i hria em?" tiin a lo vin leh khur khur mai.

Mahse Mama chu a thinrim takzet, "I thianpa...i..i thianpa na tuar hi, hmuhnawm i lo ti hle animaw? Zawnga, i nupui kha a sum i duh vang leh hmeichhe dang i mutpui thin thu a sawi chhuah i hlauh vangin min kidnap tir a, lethal injection hmangin kan that a nih kha...i thiam loh vek a nih hi i hria em?" a ti ta phiar phiar mai le.

Zorema chu a thinrim takzet, "Engmaw i sawi? Nang khan min vin ve ngam amaw? School teacher i nih theihna chhan hi i hria em? Principal ka biak sak vang che a nih kha, dawt chuan min puh reng reng suh." tiin a lo vin let ve bawk. "Awle a tawk e, tunah chuan thudik chu puang tawh rawh le." X-a chuan a han ti vin deuh thak a.

Mama chu a hliam avang chuan a la then deuh chawk chawk reng a, a mittui a la tla phung bawk. A chil a lem dawk a, "Zorema nen sawn KS tam tak kan dawr thin a, hotel ah riah puiin chutiang chuan zantin deuh thaw kan awm thin. Mahse keimah ber hian KS ringawt han mutpui chu ka hne deuh ta a, Zorema u fanu, Abawihi saw ka it ta em em a. Amah Zorema ngei pawh hian a remti a, mahse Abawihi sawn min hlat em em a, min ngaina lo tih ka hria a, chuvang chuan hrai ruih dan kawng ka dap ta a ni. Mahse chutih lai chuan nikhat chu Zorema hian KS pakhat an inah a hruai lut a, annu chhuah hlan a ni. Mahse rin loh tak maiin annu chuan thil a theihnghilh avangin a rawn haw hma thut a, anni lah kawngka pui ber an lo kalh theihnghilh bawk si nen, an va in nang ching ta a ni. Tichuan annu chu a chhuak tau nghal a, Zorema hian min rawn phone a, annu chu kidnap turin min ti a, engkim min rawn hrilh ta a ni." tiin a inpuang ta nge nge a.

X-a chuan Zorema chu a va en a, thinrim hmel tak hian hnuailam a lo melh reng a. Mama chuan sawi zawm zelin, "A tir chuan ka duh mai bik lova, mahse a pawisa ka chen nasat zia te chu a rawn sawi chhuak a, min rawn vau titih nghal a. PAwisa tam tham tak min pek a intiam avang chuan a thusawi chu ka pawm a, annu chu zui ru in ka kidnap ta a ni." a han ti leh a.

"Anih leh doctor kha?" tiin X-a chuan a lo zawt leh vat a. "Doctor kha chu tunge a nih ka hre lo, Zorema hian ka thianpa a tia. A bak engmah ka hre ve lo, fake report vel siam turin thamna pawh tam tham tak a la ngei tih chiah ka hria, kha doctor kha chu...chuzawng chu ka hria." tiin Mama chuan a chhang a.

"Anih leh rannung seh kha engtin nge in siam chawp?"

"Lethal injection khan kan chiu a, rannung seh anga siam chawp tih vel kha chu keima tih a nih loh mai bakah ka awm ve tawh lo, kidnap zawng kha a nimai."

"Anih chuan rannung seh leh chhungte hnena fake report vel zawng zawng kha Zorema leh Doctor tih vek tihna em ni?"

"Aw anih ka ring, a bak engmah ka hre lo."

"Anih leh Doctor chu a hming tal i hria em?"

"AW hria e, Doctor Lalhmachhuana...Muanna Hospital ah a thawk tih chiah ka hria."

X-a chuan a lu a bu ta nghat nghat mai, Zorema erawh thinri tak chung chuan Mama chu a en reng a, a melh rum kher mai. X-a chuan Mama a phuarna zawng zawng chu a phelh ta mai a, "Hey, min chhuah ve rawh, vatin..min chhhuah ve rawh." a lo ti nghal chul mai. Mahse X-a chuan a chhang lo, a phelh zawh hnu chuan khup sai hlawk hlawk chung chuan Mama chu a rawn ding chhuak a.

"Thudik i sawi avangin nang chu i him ang, mahse i thianpa erawh saw chuan a zep tlat avangin hremna a hmu ang." X-a chuan a han ti leh a. Zorema chuan rum fe hian Mama chu enin, "Hey Mama, min chhan rawh. Min kalsan bik suh, ka pawisa tam tak i hman zozai te kha ngaihtuah rawh." a han ti leh nghal khur khur a.

Mahse Mama chuan chhan a tum loh hmel kher mai, "Na min tawrh tir a, i inpuan theih reng lai pawhin i ngawi reng a. Tunah chuan ka na tawrh te kha a nat zia i hre ve tawh ang, mangtha le..Zorem." tiin thi hnuang chung chuan lehlam a hawi san ta hmak mai. A thawmhnaw te chu X-a chuan pek pah hian, "Nangmah a in lam i pan erawh a ngai thung ang, nangmah in kawng indap chawp mai rawh." tiin a hrilh a.

"Hey Mama..nilo, Mama..khawngaihin lo let leh rawh." tiin Zorema chuan a au vak vak a, mahse Mama chu a hawi let duh thak lo. Pawnah chuan a chhuak a, mahse ramhnuai vek hi a lo ni. A thim em em bawk a, phone takngial pawh a nei der mai silo. "Ka haw thei em em ang, police hnenah ka report anga, a chak lo viau ang kha hmaituam pa kha.." tiin a phun bul bul a, Shadow-X a sawina a ni.

**********************

Chutih lai chuan X-a location rawn chhuiin Abawihi pawh a lo tlan zel a, a hla phian lehnghal. Scooty-a kal a nih avang chuan chutiang hmun reh reih ruih mai a a paltlang zel a ngai mai chu a hlau rilru hle a, mahse a patea nunna a chhan a ngai bawk si. Mittui tla phung chuan a tlan zel a, mahse farm house awm ang a la hmu tlat lo.

A tlan zel a, ramhnuai chhung chu a lut titih ta der mai. A scooty chu a ti ding a, "Police chu ka hrilh mai dawn em mawni le?" te a han ti hnuhnawh leh a. Kal zel chu a ngam tawh ngang lo a ni ber, mahse polcie a hrilh vaih chuan a patea nunna tan a derthawng dawn tih a hre bawk si. A rilru chu a hah takzet, a hawi kual a, hmun tin mai chu a thim vek mai bawk si.

A phone chu phawrhin X-a chu ava call a, mahse a lo la duh hauh lo. A in-ring quit thak thak zel mai a, "Hrep tak chuan....enge maw a lak duh loh le?" tiin a scooty seat chu a chum deuh bur bur a. A han inngaihtuah leh vang vang a, X-a thusawi kha awih tlang law law mai chu a thlang ta zawk a.

A scooty ah chuan chuang leh in a han ti nung a, ramhnuai thim lampang chu a pan phei leh ta zel a. Chutih lai chuan Abawihi awmna atanga hla vak lo ah chuan Mama chuan kalkawng a lo dap chawp ve mek bawk a, mahse light takngial pawh a neih loh avang chuan kal kawng chu a hmu tha hleithei tlat lo.

Chutah Abawihi scooty ri chu a hre ta, "Ehe..motor ri em ni chu chu?" tiin a hawi nghal hru hru a. A zawng kual nghal vak vak a, scooty ri a hriatna lam chu a pan zel a. Mahse pheikhawk chu sawi loh, chapal tak ngial pawh a bun si lo. Ke lawnga a awm a vang chuan a ke hnuai chu na  ati hle a, a hliam zawng zawng nen a tlan tha hleithei lo.

A tih ngaihna hre tawh lo chuan, "Min pui ru...khawngaihin min pui ru." tiin a au ta chiam chiam ringawt mai a. Mahse Abawihi erawh chuan a hre phak lo, a khat tawk chuan a sana chu a en chhen a. Dar 9 rik nan minute 10 pawh a awm tling tawh lo, mahse farm house lah chu a la hmu mai bawk si lo.

Mama lah chuan scooty rikna lam chu a pan phei zel a, "Min pui ru...awm in awm em?" tiin a au chhunzawm zel bawk. Chutah Abawihi tlanna zawn tak, a sir hnimbuk atang chuan a chhuak hlawl mai. Abawihi chuan Mama, thi hnuanga a hmu thut chu a phu nasa kher mai, a break pawh a hmet hman tawh lo.

MAma chu a su ta mai a, amah Abawihi ber pawh a t(r)e tuar mai. Mama chu a thal tawp a, a sir lehlam khamah chuan a tla ta mai a. Abawihi pawh a thal thuai mai, Mama lah chu a lum thla tup tup a, mahse a lo sang vak lo hlauh. Mahse a hliam a lo nasa tawh sa nen, a ban ruh veilam a ti tliak bawk nen, nikhawhrelo chuan a awm der mai.

Abawihi chu a tho vat a, kham lam chu a zu bih nghal. Light chuan a zu chhun a, mahse phone torch mai chauh a nih avang chuan kham mawng chu thui lo viau mahse a zu en pha tlat lo. A thim vek a, tumah a hmu thei chuang lo. "Kha...kha kha, U Mama a ni em?" tiin amah leh a mah chu a inzawt a.

"U Mam...U Mam.." tiin a han au vak vak ringawt a, mahse chhana erawh a dawng lo. A ding a, "Engthil nge ka chungah thleng ta hi? Nilo...enge ka tih ang? Engtin nge ka awm zel dawn?" tiin a mangang kher mai. Chutah a phone a rawn ri a, X-a message a lo ni. A han hawn ga, "I TLAI." tih ringawt hi a lo ni.

A call nghal a, mahse OUT OF SERVICE a inti tlat mai. A patea chu a ngaihtuah em avang chuan scooty ah chuan a chuang leh a, farm house chu a zawng kual leh ta. A rilru chuan a tawngtai phei mawlh mawlh a, "Min pui rawh..Lalpa, khawngaihin min pui rawh." tiin a phun mawlh mawlh a.

***************************

Police Station lamah pawh Inspector Rinawma te chuan ruang DNA chu tunge a nih an lo hre tawh a, an rin ang leh an hlauh ang ngeiin Teruata ruang a lo ni. Rinawma chu a vei kual a vei kual ringawt mai, "Tu phiangsen nge mawni dawn le? Mai mai chuan...he tualthattu hi mi namai lo tak chu a ni ngei ang." tiin a han phun nuah nuah a.

"Sir, tualthahna dang a thleng leh mai lo maw?" Constable Fela chuan a lo ti ve bawk a. "Ka rindan deuh ania, keipawh...hetah chauh hi chuan a tawp hauh lovang. Mi bo case a awm leh hmasak berah Teruata ang tho hian a victim dang leh a nih ngei ka ring." tiin Rinawma chuan a chhang a.

SI pakhat lo kalin, "Sir, Teruata chhungte pawh kan hrilh tawh e." a rawn ti a. "A tha e, ruang kha thawn phei ula..." a tih lai tak chuan Station ah chuan Puipuia a rawn lut hlawl mai. "Ehe nang hi..Puipuia kha i ni em?" tiin Rinawma chuan a lo zawt nghal a. Puipuia chu a thlan hluam mai, "Ka pu, thil hrilh duh che ka nei a ni." a rawn ti a.

"Lo thu phawt rawh...lo lut rawh." tiin Rinawma chuan a lo chhang a. Puipuia chu a rawn lut a, mahse a thu mai lo. "Ka pu, tukin khan zep then ka nei a ni." a han ti leh a. Pu Rinawma chuan a hratthiam loh hmel kher mai, "Zep then a? Engtia zep then maw?" tiin a lo zawt vat a. "Teruata...Teruata thih thu ka hriat khan, ruang in chhar kha Teruata a ni tih ka hriat veleh ka rawn kal nghal a ni." a han ti leh a.

"Chuan..han sawi zel teh."

"Teruata khan ngaihdam min dil ka tih kha...kha kha a chhan ka hria a ni."

"Enga? A chhan i hria maw?"

"Aw hria e, mahse kan chhungkaw tan leh keima tan pawh mualphona a nih avangin ka sawi ta lo mai chauh a ni."

"A nih chuan enge a chhan chu ni ta?"

Puipuia chuan hreh chung chung chuan Teruata'n anu a lo blackmail thin thute, a atna chhan pawh Teruata vang vek a nih thu zawng zawng te chu a hrilh fai ta vek a. Pu Rinawma pawh chu a hrilhhai takzet, engtia han chhan mai tur nge pawh hrelo chuan a han ngawi deuh vang vang phawt a.

"Chuan ka pu, thildang hrilh duh che ka nei bawk." Puipuia bawk chuan a han ti leh a. "Enge thil maw?" tiin a lo zawt leh nghal vat. "Zanin kan chaw eikham hnu deuh lawk khan dawrah ka kal a, chutah chuan tukina thil rawn deliver tunu, kha nula khan min rawn bia a. Shadow X chu tunge a nih a hriat thu a sawi a ni." a han ti leh a.

Pu Rinawma chu a meng bial kawk mai, "Enga? Sha...Shadow X? Tunge a nih a hria amaw?" a ti hu mai. "Aw..mahse mak ka tih deuh chu...a bialpa hlui a nih thu a sawi a, a thih tawh thu a sawi bawk. Zep ruk ka nei tih ka hmel atang leh a hma a Shaodw-X chet dan vel a lo hmuh tawh avang chuan a hre vek a ni." tiin Puipuia chuan a chhang leh a.

"Chunu chu tunah khawnge a awm?"

"Ka hrelo, biak chhunzawm chu ka duh lutuk a. Mahse ka nu a rawn zual thut a, damdawiinah ka kal angaih phah ta a ni."

Pu Rinawma chu a han ngawi leh vang vang a, "Anih tunah i nu chu enge a an?" tiin a han zawt a. "Tunah chuan a zia tawh e." tiin a lo chhang a. "Awle..engpawh nise, chunu chu kan hmuh angai. Puipui, min rawn zui rawh. Dawrah chuan va kal ila, khanu kha tunge a nih an lo hre mial maithei asin." Pu Rinawma chuan a han ti leh a. Tichuan Constable FEla nen, an pathum chuan Station chu an chhuahsan ta nghal a ni.

*******************

TO BE CONTINUE