UNHOLY CONFESSIONS - II (Mizo Horror/Slasher Story) Written by : Aaron Malsawmdawngzuala WARNING : 18+ Chapter - 2

 UNHOLY CONFESSIONS - II

(Mizo Horror/Slasher Story)

Written by : Aaron Malsawmdawngzuala

WARNING : 18+

Chapter - 2

**********************

Inspector Rinawma chuan Pupuia chu a han en vang vang a, "Ngaihdam a dilna chhan tur che awm ang pawh engmah i hre lo amaw?" tiin  ahan zawt leh a. Puipuia chuan a lu thingin, "Aw..ka hre lo tak tak. Engvanga ngaihdam min rawn dil nge a nih ka hrelo, a tir phei chuan a rawn uang emaw ka ti a.." tiin a lo chhang a.

"Engtia inthian nge in nih?"

"School kan kal lai atang tawh in, kum 15 dawn a ni tawh ang..ka thiantha ber a nia lawm."

"Engmah thildang a rawn sawi lo amaw...ngaihdam dil tih loh?"

"Aw..mahse a aw atang kha chuan a hlauhthawn hmel takzel."

"Awii..a chungah thil tha lo tak a thleng a ni ngei ngei ang. Puipui, thildang engmah i zawt lo em ni? A awmna hmun te...nangmah a rawn phone si che chuan tinge keimah hi min rawn phone ve miah loh?" tiin Teruata nu, Pi Zuali pawh chu a lo mangang kher mai. Inspector Rinawma chu a ngawi vang vang a, "Umm..thil engemaw tak chu a awm a ni ngei ang." a han ti nuah nuah a.

"Ka pu, khawngaihin ka fapa chu min zawn sak rawh u. Amah lo chu kan chhungkuaah mipa dang an awm bawk si lo, a chungah thil thalo a thlen ka hlau ania." Pi Zuali chuan a lo ti leh chul a. "Lungngai suh ka pi, kan theih tawp kan lo chhuah dawnnia. FIR thehlut la, vawiin atangin kan thawk chhuak nghal ang." tiin Pu Rinawma chuan a chhang a.

"Ni e, Nu Zual..lungngai reng reng suh. Kan hmu leh em em ang, khawiah mah a awm hla lovang." tiin Puipuia pawh chuan a lo hnem ve bawk. Tichuan Pi Zuali chuan FIR chu a ziak ta a, Teruata bo thu pawh chu reiloteah a lar chak leh ta khawp mai. Veng pum titi a ni nghal a, social media ah lah post hmasatu nih inchuh ni awm takin hmun hrang hrangah an share nghal chur chur bawk.

*************************

Abawihi chu inah chuan a haw leh a, a rilru ah chuan Puipuia ringawt chu a awm a. Dawt a sawi a nih pawh a ring nghet bur bawk, a chhan pawh Shadow X-a'n phuba a lak dan pawh chiang takin a hria. MAhse Puipuia erawh kha chuan ngaihdam a dilna chhan a sawi lang lova, zep a nei a ni tih pawh a chiang.

Hmuh a chak em em a, engemaw zawh fiah ngei chu a duh a ni. Abawihi hi Nghaka thih hnu reiloteah khan Alexa nen khan an inthen nghal daih a, veng dangah an chhungkua in an pem nghal daih bawk. Khata tang khan an inbe leh ngai tawh lova, Nghaka chungchang pawh tuma bulah a sawi lova, khami hmuna thil thleng pawh kha engmah thudik a sawi chhuak lo.

Shadow X thar a awm ngei a ni tih a chiang a, mahse tunge ni ta ang tih erawh a zawhna lian ber a ni thung. Nghaka chu a thi tawh ngei a, a thlanah pawh a kal fo. An vuinaah pawh a awm a, an phum lai zawng zawng te nen a hrechiangtu ber a ni. Nghaka chhungte erawh chuan Abawihi chu an ngei nge an haw em em zawk ni, tun thlengin an be duh hauh lo.

Chuvang chuan Abawihi ngei pawh hian NGhaka thlana kal pawh a inthlahrung thin a, a chhan pawh a chhung leh khatte an lo awm ang tih a hlauh thin vang a ni. Shadow X thar chu tunge ni ta ang tiin a han ngaihtuah vang vang a, mahse tu ber nge rinhlelh tur pawh a hre lo. Nghaka chu Shadow X a nih thu hretu leh a phuba lak dan te, a chhan te hretu ber chu amah chauh chu a ni si, midang zawng chu an thi vek tawh.

Roomah chuan a tei kual vut vut ringawt a, a rilru a hah kher mai. "Puipuia kha engtin emaw tak chuan ka biak ngei a ngai a ni." tiin ama hriat tham lek chuan a phun deuh nuah nuah a. Chutih lai tak chuan a room kawngka chu a rawn inkik dat dat a, "Abawih, lo chhuak lawk teh." a patea chuan a rawn ti a.

Room atang chuan ava chhuak a, "Enge ni? PAte?" tiin a han zawt a. "Bawihte, i naute school ban a hun tawh a, kei lah ka nuam lo em em bawk si nen. Khawngaihin va lam mai ta che, an teacher pawn min rawn phone tawh a....i peih hram thei angem?" tiin inthlahrung tak chuan a patea chuan a han zawt a.

"Aw thei e, ka va kal ange." tiin a chhang a, a scooty nen chuan a inkhalh chhuak nghal a. Abawihi patea hi nupui sun zo hlim deuh hlawl a ni a, a nupui pawh rannung seh vanga damdawiina thi a ni. A hming chu Zorema a ni a, Abawihi hi a duat em em a, Abawihi pa nau a ni. Naupang ho va hruai tura a tihte hi a fate an ni a, kum 4 mi leh kum 6 mi, mipa naupang ve ve te an ni.

School chu ava thleng a, a patea fate zirtirtu lerh zet mai, tlangval seenior ve tawh tak, Sir Mama chuan Abawihi lo thleng chu a va pan nghal vat a. "Ehe, Ka note BAwihi a lo thleng e. I patea a lo kal dawn maw ka tia, van angel zawk a rawn tir a nimaw?" tiin a lo nui vel huah huah a. Abawihi chuan a ei lo kher mai, "Hehe nia, a nuamsam lova." tiin a lo chhang ve mai a.

A nihna takah chuan Abawihi hian a ten em em a, hetia a lo tih vel huam huam thin avang hian a naute school bang hruai tura va kal pawh hi a hreh phah hle thin. Tin, Sir Mama hian Abawihi a hmuh hmasak ber atang khan a ngaizawng nghal em em a, CK pui a tum ngar ngar pawh a ni mahna.

A number pawh a nei thlap a, zantin a be thin. Mahse Abawihi erawh chuan a be tha vak ngai lem lo, a chhan pawh a mipa ten chi tak a nih vang a ni. "Nizan kha i muhil daih a mi a? Tinge min reply tawh miah lova, ka call che lahin i dah busy hmak hmak bawk si?" tiin Mama chuan a han zawt leh a.

A naute pahnih chu scooty ah chuan a lawn tir a, "Nia, ka mut kha a chhuak deuh mawle...kan kal phawt ange.." tiin scooty chu a ti nung nghal a, mahse Mama chuan chabi chu a rawn herh tawp sak nghal vat. Abawihi chu a han en hnai deuh va, "Tinge a? I patea nen pawh thian tha tak kan ni a, tinge ka hlatah i awm tlat a?" a han ti vel a.

Abawihi chuan a melh rum kher mai, "Khawngaihin kal sawn rawh, kan haw a ngai." a lo ti hmuk mai. Mama chu ngeiawm tak hian a han khi vei suk a, "I la hre dawn alawm, ka bawihte...i naute school zirtirtu ka nih hi, i la hre mai ang." tiin Abawihi hmaiah chuan a han piai zeuh va, Abawihi chu a thinrim takzet.

Chak takin a tlan nghal vang vang a, a thinrim lutuk chu a mittui a tla phung thei. Chutia Mama'n it hmel taka Abawihi tlan liam a en vawng vawng lai chuan school gate opposite a in pakhat bulah chuan mipa pakhat, hoodie dum vek ha, face mask dum vuah hian Mama chu a lo thlir reng mai.

Mama school lama a let leh tur chiah chuan chupa chu ava hmu ta a, a lo en reng avang chuan mak a ti angreng hle. A han en chiang deuh va, chupa chuan a kut a lo kuangkuah tlat a. Mama te ang tlangval thinchhia leh pawr ve satliah tan chuan chutia a lo en mai mai pawh chu a huat tawk a tling tlat, "Hey, enge min en vung vung a, buaina i nei ami?" tiin ava vin vak ringawt a.

Chutah chupa chuan a kut kuankuah chu a han phelh a, a kawr hma a chiang taka, SHADOW X tih lo inziak chu a lang tak kuau mai. Mama lah chu a pawr tulh tulh a, "Enge khatia min en vung vung a, enge i duh a?" a han ti leh a. Mahse X-a chuan a chhang lo, ngawi reng chuan a kalsan ta daih a. "Ava dawih e, a pawr ve deuh amawni.." tih nuah nuah pah chuan office lamah a let ve leh ta a. 

****************************

Abawihi patea, Pu Zorema chu inah chuan amah chauh chuan a awm a. Midang zawng an chhuah vek avang chuan zu te chu a han inru leh zauh zauh thin a, thutthleng seiah chuan mu in a phone a khawih mual mual mai. Door bell a rawn ri a, Abawihi leh a fate pahnih an nih ringin, "Ka kalh lo, lo lut mai ru." a han ti thla ringawt a.

Mahse a rawn ri nawn leh a, "A va mak e aw..." tih pah chuan peih lo tak chuan a tho va. Kawngka chu ava hawng a, mahse tumah an lo awm hauh lo. Mak a ti angreng kher mai, a lu thak lo pui hiah nauh nauh pah chuan a lut leh a. Thutthlengah chuan a mu leh a, a phone chu a khawih chhunzawm leh mai a.

Mahse second 2 vel lek hnuah chuan door bell chu a rawn ri leh ta, Zorema chuan a va hawng leh a. Mahse a ngai te ang bawkin tumah an lo awm lo, a ngaih a tha vak tawh lo. Kawngka chu khar leh in thutthleng lam ava pan leh a, mahse a thlen hma hma chuan door bell chu a rawn ri leh ta tlat mai.

"A va ninawm zozai tak em.." tia vin hlur chung chuan kawngka chu ava hawng leh a. A ngai te ang bawkin tumah hmuh tur an la awm chuang lo, pawnah chuan a chhuak a. In hnung lam thleng chuan a han en kual a, "Tunge maw i nih le?" tiin a han au vak vak a. Mahse tumah a hmu chuang hauh lo, inchhungah chuan a lut leh a.

"Tu phiansen nge ni...tul lo lutuk mai." tiin a phun nang nang a, thutthleng seiah bawk chuan a mu leh a. Phone chu a han khawih leh mual mual a, chutih lai tak chuan choka lama thelgn tla ri keh chuai chuan a ti phu nasa kher mai. A zuang tho nghal zawk a, choka lamah chuan ava tlan phei nghal.

Chhuatah chuan thleng chu a lo keh darh nuai mai a, mahse mihring erawh tumah hmuh tur an awm lo. A ngaih a tha tawh lo takzet, "Tunge awm? AWm in awm em ni?" tiin a han au leh vak ringawt a, mahse inchhung chu a reh hian a reh diak mai. "Thli thaw ti dawn ila, eng thil mah a thaw bawk si lo." tiin a mak ti lutuk chu a phun leh nuah nuah a.

Sitting room lam atanga thil tla ri chuan a ti phu leh zawk mai, mahse va pan nghal mai chu a tum tawh bik lo. Choka a chemte hriam tha zet mai chu a chuh vat a, tichuan muang chang chuan sitting room lam chu ava pan ta a. A va thleng a, tumah a hmu chuang lo. Mahse a thinrim takzet thung, a phone chu vawm keh tih hriat tak mai hian chhuatah a lo darh nuai mai.

A thingthi hnawk a, "Ka..ka phone...enge awmzia?" tiin a phone keh chu a chhar khawm a. Chutah a hnungah chuan X-a chu a rawn din ta run mai, tu emaw tak chu a hnungah chuan an ding reng a ni tih Zorema pawh chuan chhuata mipa thla lo lang atang chuan a hrethiam nghal. A thlan a tla nghal zawih zawih a, a hlau ru kher bawk.

Muangchang chuan a ding riai riai a, hnunglam hawi chu a hreh takzet. Mahse X-a chuan Zorema rawn leh hawi chu a nghak peih lo a niang nge, a rawmawl chloroform-a a chiah chu la chhuakin hnunglam atang chuan Zorema hmui chu a hup sak a. A tir chuan han tal deuh mahse a tal rei lo kher mai, nikhawhrelovin a awm ta der mai.

*************************

Abawihi pawh chu a rawn haw a, mahse inah chuan tumah a hmu lo. A patea fate chuan an pa, Zorema chu zawngin an au nghal vak vak a, mahse in chu a reh thuap mai. Roomah te chuan an zawng kual a, mahse Zorema hmel hmuh tur a awm hauh lo. "Ka nuam sam lo ti ve si...leng bo leh daih tho bawk si...ninawm lutuk." tiin Abawihi thinrim leh lungawilo chu a phun deuh nuah nuah a.

Naupang ho chu thingpui te siamsakin inchhung vel chu a tifai a, choka bawlhhlawh bawm a thleng keh chu a zu hmu ta. A thaw deuh hak a, "Huiham, thleng ala ti keh zui...patea hi chu awww...ava hahthlak tak." tiin a phun leh nang nang a. Call tumin a phone chu a phawrh a, mahse a call tlang thei hauh lo.

Vawi 3 vel a try hnu pawh chuan switch off a inti tlat bawk si, "Tute inah tak va chatthla leh ta pek maw?" tia vin deuh hlur chung chuan inchhung chu a tih fai zawm a. A zawh fel hnu chuan a inbual fai a, a naute chu lehkha a zirtir nghal bawk. A phone chu a rawn vibrate hlarh hlarh a, a han en chuan mesage a dawng a lo ni.

Mahse a messaage dawn ber kher chuan a mood fuh lo a ti zual hle mai, a naute zirtirtu, Sir Mama a lo ni. "Ka lo leng dawn....i patea a awm em?" tih hi a lo ni a, a thinrim kher mai. "Ninawm, lerh lutuk mai, tenawm si." tih pah chuan a dah hmak a, a reply peih hlawl lo. Mahse a rawn ri leh a, "Min chhan loh chuan ka rawn leng tak tak dawnnia..hei ka haw dawn chiah." tih hi a rawn thawn leh a.

Chhan loh chuan a rawn len tak tak a hlau bawk si, a patea awm bawk si lo nen. Thinrim bur chung chuan a message chu hreh tak chung chuan a hawng ta a, "Inah ka awm lo, ka bialpa nen kan chhuak dun." tiin dawt a sawi ta ringawt a. Reiloteah chuan Mama chuan rawn reply leh in, "KA awih lo...ka rawn kal anga, i leng chhuak nge chhuak lo chu kan hre mai ang." tiin a rawn thawn let leh a.

Abawihi thinrim lutuk chu a hmai a sen vek thei hial a, han chhuak ngawt dawn se a patea fate an awm bawk si. A chhungte dang lah an rawn la haw mai bawk si lo, "Ninawm..patea hi chu aww...amah vang cek." tiin dawhkan chu a han chum bur a. A tihngaihna hre lo chuan an in bul deuh lawk ami, Vala chu leng turin a sawm ta ringawt mai a ni.

******************************

MAma pawh chu phur takin a bike chu  ahan hru hliau hliau va, Abawihi pian nalh tak mai leh a vun no leh nung sarh mai te chuan a ngaihtuahna an luah khat hneh hle a, "Engtikah emaw chuan ka la hrai rui dawn chiang alawm." tiin amah hriat tham leh chuan a phun deuh sap a, a nui deuh vur vur reng mai.

Tichuan a bike chu a han ti nung a, a kal dawn chiah tihah chuan message a dawng tlat mai. A han en chuan a thianpa, Abawihi patea, Zorema number atangin a lo ni. "Kan ina i lo kal dawn chuan kawng hnuai atangin lo kal rawh aw, sign board bulah khan ka bike a chhia a, min rawn lam rawh." tih hi a lo ni a.

"Ava buaithlak tak." tiin Mama chu a phun nang nang a, "Rawn lam che pawh ni ila, engtin nge i bike chu ni dawn? I hnutchhiah tawp mai dawn em ni?" tiin a han reply a. "A stearing lock ila, dah tawp mai ang...tihngaihna a awm hrih lo. Lo kal vat rawh, vawiin tlai chu ka lo show ang che." tiin Zorema chuan a rawn thawn let leh a.

"Aw le a nih chuan ka rawn chhuak nghal e..lo awm rawh." tiin a thawn let ve leh a, tichuan a tlat ta a. Kawng hnuai lamah chuan tlanin a phei zel a, kawnghnuai hi mi kal zen zen lohna a ni a, a chhan pawh kawng a chhiat em vang leh thingkung a tam em avangin a thim deuh ruih bawk a ni. Mama chu a tlan zel a, mahse sign board a thlen hnu pawh chuan Zorema hmel reng reng a hmu hauh lo.

Chumai nilovin bike lo ding takngial pawh a hmu lova, ahma zan lawkah ruah a lo sur bawk nen, kawng lah chu a chiau pur lehnghal. A bike chu a tiding a, a han hawi kual a. Mahse a thianpa chu a hmu hauh si lo, a phone phawrhin a han call thul. Mahse a ring quit thak thak zel mai bawk si, tihngaihna a hre lo kher mai.

Minute 5 dawn lai a zawn kual hnuah pawh chuan a la hmu chuang lo, a pheikhawk pawh a berh vek tawh. "Mi  afiam vel mai mai hi a nilo maw, he mihring pa hi?" tia phun nuah nuah chung chuan a bike ah chuan a chuang leh a. "Ka haw san dawn..ninawm. Tiang te chuan Abawihi pawh ka rim ngam tawh nang, huiham..haw tlang phawt mai teh ang." tiin a bike chu a han ti nung leh a.

Chu kawng diak chiau pur maiah chuan kawi zawk zawk khawp chuan a tlan phei leh ta a, kawng kawi a thleng chiah chu scorpio dum hi chak em em hian a hma zawn takah chuan a rawn lang thut mai. MAma chuan a break hman tawh lo, chubakah chu scorpio chuan sut tum hrim hrim niawm tak chuan a tlan chak zual sauh lehnghal.

Chutah le, Mama chu a va su ta chawrh mai a. Mama pawh a bike seat a tang chuan a invawrh lawp mai a, leiah chuan a tla thum dut mai. Chuveleh Scorpio chu a ding a, a chung atang chuan Shadow X ngei mai chu a thuam famkim zawng zawng nen a rawn chhuak ta, Mama chu ava pan hnai a.

Mama chu a hnang awl awl a, a berh vek bawk. Thei leh thei lo hian X-a chu a va melh tawk tawk a, Abawihi a biak zawh a, kil khat atanga lo en reng tu kha  ani tih a hre nghal. "Tu...tu..tunge i nih?" a ti tawk tawk a, mahse X-a chuan a chhang lo. A ipte atang chuan insulin (syringe) hi a rawn phawrh a, a chhungah chuan damdawi niawm tak hi inhip sa vekin point 7 vel thleng a lo awm bawk.

"Enge i tih dawn?" tiin thei leh thei lo chuan Mama chuan a lo zawt leh a, mahse X-a erawh chuan ngatan mah a zawhna chu a ngai lo. Insulin chhin chu a han phawi a, syringe chu a han pen deuh fak fak a. "Ti suh...engtin mah min ti suh." tiin Mama chuan a lo vin nasa mai, mahse a la hnang nasa deuh bawk nen, a aw a chhuak hleithei lo.

Chutah hmangaihna tel hauh lo chuan Mama ban puam laiah chuan X-a chuan a vit sawk mai a, damdawi chu a hip lut nghal hrawih mai. REiloteah chuan Mama chu a zawi tial tial a, nikhawhrelovin a awm ta der mai. Chuveleh X-a chuan Mama chu a pu nawlh a, a motor hnunglamah chuan mut tirin a tlan leh ta daih mai.

*******************

Tlai lam a ni tawh a, Inspector Rinawma leh a naute pawh chuan an chhui an chhui hnu chuan Teruata thihna hmun, huan fal deuh taka in lo awm, lo kang bang nuai mai chu an zu thleng hlawl mai. Ram kal pakhat, Pu Zika nen chuan an inbe mek a, "Engtin chiah maw in kang hi i hmuh a?" tiin Rinawma chuan a han zawt a.

"Ka thang kam ka en dawn lai takin a nia, meikhu rim a nam riau khan ka hria a. Ram a kang em mawni le tiin ka hlauthawng hman khawp mai, ka thleng hnai zel a, tichuan he in lo khu rum rum hi ka va thleng ta a ni" tiin Pu Zika chuan a lo chhang a. Rinawma chuan Teruata ruang, ruhro deuh chiah bang tawh chu ava thlek vang vang a, "I va thlenin a lo kang tawh lo maw?" tiin a han zawt leh a.

"AW ka pu, mahse a lo la khu nasa khawp mai." tiin Pu Zika chuan a chhang leh a. "Chuan..anih leh kan lo kal i nghah chhung khan midang rawn hmu ve an awm em?" tiin Rinawma chuan a han zawt leh a. "Aih awm lo, ka hmuh tirh kha chuan mak ka ti lutuk a, a chhan chu helaiah in pangngai ve tak a awm ka hre ngai silova." tiin a lo chhang let leh a.

Pu Rinawma erawh chuan a chhang tawh lo, "Ruang ka hmuh tak avang hian a nia ka rawn call che u, hei...constable Fela hi ka thianpa a nia." Pu Zika bawk chuan a han ti leh a. Chutih lai chuan Forensic Doctor pakhat chu a lo kal a, "Sir, ruang chu a DNA kan la tawh a. Tunah chuan phur thlak theih a ni tawh ang, result pawh kan peih vat ang." a rawn ti a.

Rinawma chu ava kal hnai a, constable Fela chuan a zui ve bawk. Ruang chu a han en leh vang vang a, "A thawmhnaw takngial pawh engmah kang bang a awm lo mai chu ania, enge a chhan awm ang in lo ngaihtuah tawh em?" tiin Fela chu a han zawt a. "Current sawt vang ni berin a lang, Sir." tiin Fela chuan a lo chhang a.

Thing kang bang, dum vek lo bung rum te chu a han thlek kual leh a. "Thutthlengah thu chungin a kang hlum tihna em mawni dawn le...a bul hnaiah hian a tam hle mai, thutthleng thing atanga siam ni ngeiin a lang." a han ti deuh nuah nuah a. "Keipawh zawhna pakhat ka neih chu maw, Sir...current a sawt a nih chuan a insa seng hman lo a nih pawhin chhuah tum chuan buai ve awm tak, mahse tinge sitting room ah tak, chupawh current sawt tanna lai tur ni awm tak bulah, thu chunga a thih theih na chhan hi.." Kima chuan a lo ti ve bul bul bawk a.

Pu Rinawma chu nui sukin, "A muthlu te pawh a ni mahna." tiin kal mai a han tum a, mahse a hawi let tur chiah chu ruang bula hrui kang velo, kutzungte tiat leka sei, te tak te chu a zu hmu fuh ta tlat mai. A ding chat a, zu kunhniamin a zu chhar a. Hnai takah chuan a han en a, "Fela, hei hi eng hrui nge i hria em?" tiin a han zawt a.

Fela chuan a han en ve a, "Buara hrui a ni mai lo maw?" a lo ti mai a. Chhuat chu a han en leh a, mei vap taktak karah chuan la khawih miah loh leh la rah sawn miah loh, a nihna ang taka kang bang vap chu a zu hmu fuh leh ta. Thui lo te mah nise a inzial dan vel atang chuan hruihrual hralw ve tak a ni tih a hrethiam ta, mahse tawi te chauh a ni.

A chhan pawh an rah velnaah a kang bang dang chu an chhui darh hlawm tawh vang a ni, Pu Rinawma chuan thil awmzia awm ang tur chu a hrethiam nghal mai. A lu a han bu deuh nghat nghat a, "He mitthi hi kang hlum palh a nilo, thah a ni." a ti chang deuh fak mai. Fela chuan mak tih hmel tak hian, "Thah a? Engtin nge i hriat?" tiin a boss chu a en deuh hu mai.

"He hrui them hi buara hrui nilovin, hrui hrual a ni. Victim hi phuar beh a ni a, tualthattu hian current ti sawt luiin a duh thu ngeiin he in hi a hal a ni." a ti leh a. Fela chu a han ngawi deuh vang vang a, "Anih chuan tualthattu chuan a phuar bet phawt a, a kidnap phawt tihna a niang maw?" a lo ti ve leh a.

"Teruata ruang a ni nge ni lo hre phawt ila, tichuan a bak chu kan ngaihtuah leh dawnnia." tiin Pu Rinawma chuan a chhang a. Chutih lai chuan constable pakhat hi a lo kal a, "Ka pu, hei hi kan hmu a." tih pah chuan sarang hi a rawn lek kang a. A chhungah chuan phone kang chhe sawr vek, darh deuh nuai mai hi a lo awm a.

Pu Rinawma chuan a glove chu bun vatin sarang chu a hawng a, Sim card invuahna lai a lo kang tel lo hlauh mai. Sim card chu a phawi thei nghal hlauh bawk a, a nui var var mai. "Sim card ala chhe lo hlauh ve, tu number nge tih hriat tum nghal ang che u." tiin a naute chu a tir a, Station lamah an let leh ta a.

*********************************

Tlai dar 5 leh a chanve a pel a, chaw ei a hun dawn t ader mai. Mahse Zorema, Abawihi patea chu a lo la haw thei chuang tlat lo. Abawihi pi chu a ngaih a tha ta lova, "A call theih bawk siloh, a reh vang vang bawk si. BAwihte, a thiante inah va zawng kual mai teh. A ni em em tawh lo, a chatthla a nih chuan i pu te hi rawn hrilh mai rawh." tiin a tir ta ringawt a.

Ning chung chung chuan Abawihi chu a chhuak a, "Ninawm lutuk, fate ngaihsak nachang hre bawk si lo. a thianpa Mama lah lerh bawk, ka hne ngawih ngawih." tiin a phun nang nang a. A patea thiante in zawng zawng chu a lut chhuak deuh vek a, mahse a hmu chuang tlat lo. A ngaih chu a tha tawh bik chiah lo hle mai, haw a tum lai tak chuan dawr pakhata thil lo lei mek chuan a ti ding chat mai.

A han en chiang a, Puipuia ngei a lo ni. A biak chak em em mai a hmu hlauh chu a va tlan phei nghal vat a, Puipuia pawh chuan a thil lei tur pawh a lo lei fel zo chiah a. "Thianpa, lo ding lawk teh." tiin Abawihi chuan ava au ding tawp mai. Puipuia chuan a lo en deuh hu a, "AW enge ni ta?" tiin a lo zawt a.

"Ihh..englo, biak duhna che ka nei a." inthlahrung tak chuan Abawihi chuan a han ti bah deuh nuai a. Puipuia chuan a aia chiang leh zual chuan a han en a, "Nang hi, tukina Police Station-a delivery girl lo awm ve kha i ni tiraw?" tiin a lo zawt let daih mai. "Aw ni e, ihh..tukina i sawi, i thianpa bo kha.." tiin Abawihi chu a han chawl leh det a.

Puipuia chu a meng deuh kawk mai, "Enga? Ka thianpa bo, TEruata kha maw i sawi? I hmu em ni? A awmna i hria em ni?" a ti nghal chul mai. "Aih nilo, chulam a ni lo. Shadow X i tih kha, tunge a nih ka hria a ni." a han ti leh a, Puipuia chu a meng phawk tulh tulh mai. "Enge i sawi awmzia, thiannu? Han sawi chiang deuh teh, Shadow X chu tunge a nih a?" tiin a han zawt leh a.

"Shadow X chu ka hria a, mahse kum 3 kal ta khan a thi tawh a ni."

"Enga? Anih chuan tuna Shadow X hi tunge ni ta ang? A rawn tho leh tihna em ni? Engtin nge i hriat reng reng a?"

"Sawi fiah mai dan ka thiam lo, thawnthu thui tak a ni. Zawh duh che ka nei, thianpa..zep i nei tiraw? Police Station ah khan zep then i nei tiraw?"

"I sawi awmzia engmah ka hre lo, enge zep then tur awm a?"

"A chhan chu i hmelah khan ka hria a ni..Shadow X hian mi a thah hian a duh vang hrim hrim nilovin, an thil tihsual vangin a hrem a, chance a pe thin. Tiang chiah chuan i thianpa Teruata pawh khan Shadow X hian chance a pe ngei ngei tur a ni, ngaihdam a dil satliah ngawt lovang che. A chhan a sawi ngei ngei tur a ni, chu chu i zep a ni."

Puipuia chuan mak a ti kher mai, "Nang hi tunge i nih a? Shadow X chu tunge a nih?" tiin a han zawt nawn leh a. Abawihi chu a ngawi vang vang a, "KA bialpa hlui a ni a, Shadow X a ni tih an hriat avangin an man a, ka mit hmuh ah ngei an kaphlum a ni." tiin a chhang a. Puipuia pawh chu a ngawi vang vang mai, "Awle, a enga pawh chu nise...a thih tawh miau te chuan tuna mi hi tunge ni ta ang?" tiin a han zawt leh a.

"Ka hre bik lo, ka zawhna che kha min chhang ve tawh rawh...zep ruk i nei tiraw?" tiin Abawihi chuan a lo zawt let ve daih mai. Puipuia chuan hnuk ulh teuh hian a lu a bu nghut a, "Ni e, a dik alawm. Mahse ka thianpa Teruata inpuanna kha ka tan chuan a na em a, ka zep chhan pawh kan chhungkaw tan a mualpho thlak em vang a ni." tiin a mittui chu a tla hial a.

"Min hrilh rawh...min hrilh angai, tichuan ka pui thei ang che." Abawihi chuan a lo ti nghat vat a. Mahse Puipuia phone chu a rawn ri a, "Hello Puipui...i nu thawk a buai thut a, hospital ah lo tlan vat rawh." a rawn ti ta mai a. Phone chu a dah nghal a, "Nakinah..nakinah kan inhmu leh mai dawnnia, ka kal angai." tiin a tlansan ta daih mai.

Abawihi chuan hrilhhai zet hian a en zui vawng vawng a, "Engthil nge ni ang? Nghaka hi...Nghaka hi ala dam tihna em ni? Tunge Shadow X thar hi ni ang?" tiin a inbe mual mual a. Chutah a hma a thil thlen dan zawng zawng te chu a han ngaihtuah let a, "Kei hi..kei hi ka tel ve leh angem?" tiin a inzawt a, a hlauthawng kher mai.

*******************************

TO BE CONTINUE