EVERYTHING FOR DAISY (MIZO FICTION HORROR/SPLATTER STORY) Chapter - 2 Written by : Aaron Malsawmdawngzuala

 EVERYTHING FOR DAISY

(MIZO FICTION HORROR/SPLATTER STORY)

Chapter - 2

Written by : Aaron Malsawmdawngzuala

************************

In lamah chuan Daisy pa, Pu Fakawma chuan a fanu chu call a han tum thin a, mahse a call tlang thei tlat lo mai. A ngaihtuah rilru em em a, an thlen tirh a an inbiak kha chu an la inbe leh ta miah lo bawk si nen, a fanu a reh vang vang mai chuan a ti hlauthawng tan a. "Nu-i, Daisy hi ka phone tlang thei miah lo mai." a han ti a.

A nupui lah chuan, "An awmna laiah signal a chiang lo a ni mai alawm, i ngaihtuah leh lutuk a nih kha." a lo ti sam et mai. "Nizan khan biak ka tum a, busy a inti zel a....tukinah lah a reh hmak tho mai a, ka ngaih a tha lo riau ania keichu.." Pu Fakawma chuan a han ti leh nuah nuah a. "David-a kha a kal ve leh ta silova, an in-phone ve te pawh a niang chu." tiin an nu chuan a lo chhang leh a.

Mahse Daisy pa chu a awm hle hle thei lo, a fanu chungah chuan thil tha lo tak a thleng dawn tlat hian a hria a. "Khawimaw han phone ve chhin teh." tiin an nu chu a han tur leh tut tut a. "Ava mak cheng chung tak...a rawn call ve mai ang." a lo ti hlur mai. "I phone tlang thei mial maithei asin..han phone teh, enge an chanchin te pawh hriat a chakawm alawm." Pu Faka chuan a han ti leh a.

"I phone theih loh chuan engtin nge maw ka phone theih bik ang le?" tia phun nang nang pah chuan a nupui chuan a phone chu a phawrh a. A fanu chu a han call ve a, mahse a tlang thei bik chuang lo. "Ka tih reng kha....signal awm lohna laiah an awm ve te pawh aniang a, a rawn phone mai ang." Daisy nu chuan a han ti leh hlur a.

Pu Faka chu a ngaih a tha thei chuang lo, an inchung zawlah chuan a chho va. A hun kal tawh te a han ngaihtuah let a, a mitthlaah chuan fahrah run atanga DAisy an lak lai te chu a lo lang a. Daisy lah kum 24 ni tawhin a nu leh pate chu amah hringtu an ni lo tih lah a la hre der mai si lo, a fapa tak tak zawk lah in kum 9 lek a nihin a thihsan tawh bawk si a.

Daisy lakah chuan a inthiam lo em em thin a, a chhan pawh a tira a hrilh mai loh avangin han hrilh leh chu a hreh tawh em em a, DAisy pawh a lo upa ve tawh bawk si nen, a nu leh pa tak tak an ni lo tih a hriat chuan a kalsan mai ang tih a hlauh vangin a la zep reng a ni. Mahse chu a thu zep chuan a rilru a ti hrehawmin thlamuangin a awm tir thei lova, a chhan chu a hmangaih em vangin thudik pawh a hrilh ngam lo zawk a ni.

**************************

DAisy te thian ho pawh chuan rei fe chu an zawng ta, mahse Kimtea chu hmuh tur a awm chuang hauh lo. An chawl hahdam a, "Khawiah nge maw a lo kal hman thawt thawt le? Ka lo hruai ve kher kher chu awww....a chi loh ngei mai." Isaka chuan a han ti deuh hluam hluam a. "Ni reng ang chu." Daisy chuan a lo ti vin hlur mai.

"Hawh teh u, inthen hrang ila..tichuan kan hmu thei zawk ang." Peka chuan a han ti a. Mahse Daisy chuan, "Inthen hran a? A tul lo lutuk, hei tunah pawh Kimtea a bo mek a ni a...awm ho zel ang u." tiin a lo duh lo nasa mai. "Kan inthen hran angai alawm, DAsy. A nih loh chuan kan hmu thei lovang, kan kal ho zel chuan." Isaka chuan a lo ti ve bawk a.

"Kimtea hi engvanga kan bula awm lo nge a nih? A chungah engemaw tak a thleng pawh a ni thei asin, chuvang chuan keini leh zel lo inthen hran kha a tul lo." DAisy chuan a ti leh ta tlat mai. Peka ngaihdan chu a ni vak ta lo, "A hmeichhia berin enge maw thu i rel zuah zuah le?" a ti ta khur khur mai a.

"Khai thianpa...khatiang tur a ni ngai lo." tiin Isaka chuan a lo dang vak a. Mahse Peka chu a la lungawi lo, "Ka sawi dik alawm, a tir atang tawhin thu i rel zuah zuah a. Nuam lo i ti ang tih hlauvin kan pawm zel a, thureltu tur mipa chu kan awm ve bawk." tiin Daisy chu a hauh chhunzawm a.

DAisy chu a thinrim kher mai, "Ka peih lo chung min sawm a, nuam lo inti ang tih ka hlauh avangin  ka rawn kal ve a. Chutah David-a ber a lo kal thei lo lehnghal, hmelhriat loh in thianpa mize thing lutuk in rawn hruai leh nghal a, kal pah lohna ah min kal tlang luih tir bawk a. Enge ka thu ang zel a in awmna, nizan khan Kimtea khan min pawngsual thei reng asin..nangni lah in lo chat thla vek a...rintlak loh hlawm lutuk." tiin a ang ta bawrh bawrh mai a.

"Kimtea kha i chungah khatin a khawsa dawn tih kan hre lawk bik lo, mahse mipa in ro kan rel anih chuan hmeichhia chu lo ngawi ve mai mai teh u." Peka chuan a han ti leh deuh hrep a. DAisy chuan a kham ta hle mai, "A tha e, min rawn zui tawp suh u. Keimahin ka haw mai ang, hrep tak hlawm che u hian." tiin a kal daih mai.

Rinrini chuan a zui nghal a, "Thianpa, lo kal mai rawh..hrethiam rawh." tiin Isaka chuan Peka chu a han thlem a. Mahse Peka chu a lungawi bik lo, "Induh leh zui rawh u, hmeichhe thu thu in ka awm dawn bik lo reng reng." tiin a ding tlat mai. "Ka lo awmpui mai ang." Stacy chuan a lo ti zawi sap a.

"Awle, a tha e. Anih chuan keini pathum kan lo va kal hrang anga, signal awmna velah kan incall leh thei mai ang chu..helai hmunah hian kan inhmu khawm leh dawnnia. Hei tunah 3 a ri tawh dawn a,  kan ril te pawh a tam tawh ang. Darkar khat hnuah kan inhmu khawm anga, thil kan ei dawnnia." tiin Isaka chu a kal ta a, Peka leh Stacy pawh chu an kal hrang a.

*******************

Kimtea thattu, Paliana pawh chuan Kimtea sa a ei bang te chu pawnah chuan a paih a. Thleng te chu a sil a, Kimtea lu erawh dawhkan hnuaiah chuan a lo la let vu mai. A thleng rem fel pah chuan a chhui palh a, a chhar kang a. A han en vung vung a, kumdam lamah kal puiin a chhungah chuan a paih ta daih mai.

Tichuan a dawhkana thisen kai nuai mai te chu a hrufai a, a in zimte leh tawp tak mai te chu a han ti fel ve a. A zawh hnu chuan a pindan ah a lut a, a lukham hnuai chu zenin thlalak pakhat hi a rawn phawrh chhuak a, naute kum 2 vel lek mi thlalak a ni. Tichuan a tape hlui tak mai chu play leh in DAISY BELL hla chu a ngaithla leh ta a, thlalak chu a en ngawih ngawih mai.

Mahse a beng fing var tak mai chuan pawn lamah thawm a awm tih a hre pha tlat, a tape play chu a ti zawi vat a. A han ngaithla chiang leh deuh va, pen ri ni tlatin a hria. Tukverh ah chuan ava dak a, hla vak lova mipa leh hmeichhia rawn kal duh i a hmu a, tape chu a off nghal vat. Room chu a chhuahsan vat a, kumdamah chuan a lut nghal.

Chutih lai chuan Peka leh Stacy te pawh chuan Paliana in chu an pan mek zel a, "Kal phal lohnaah in a maw chu ania, tu in tak ni ang maw?" tiin Peka chu a phun deuh nuah nuah mai. "Va luh a chi angem le? A hrang te hi a lo ni mai lo maw?" Stacy chuan a han ti ve leh a. Peka chu a khi suk a, "Enge maw a hran ngawt ang le?" a lo ti deuh hmuk a.

"Aww...a hran vangin kal tlang phal loh an ti aniang chu.." Stacy chuan a han ti leh a. "A ho mai mai..hawh, tah sawn Kimtea chu a lo awm reng te a ni maithei asin, va lut ang." tiin Peka chu a kal a, Stacy chuan a zui ve mai bawk. An va pan hnai a, kawngka chu an han kik a. Mahse a reh thiap mai, vawi engemaw zah chu an han kik leh a.

Mahse chhanna an la dawn chuan loh avang chuan Peka chuan hawn a han tum chhin a, a lo inkalh miah lo mai. "Ehe...a inkalh miah lo." tih pah chuan a lut a, Stacy chuan a zui lut ve leh a. "In awm em? Awm in awm em?" tiin Peka chu a han au lauh lauh va, mahse a reh diak mai. Stachy chu a ner deuh nung a, "A rimchhe reuh tawp, thil hmuar rim a nam." a han ti nuah nuah a.

In chu an han en kual a, sil hmun te, choka te leh room te a lo awm vel thlap chu mak an ti ngei mai. "Kal tlang phal loh a ni bawk sia, mahse hetah cheng an awm bawk sia. Engemaw awmzia le?" tiin PEka chu a han phun bul bul a. "A chenga te pawh chu hmuh tur an awm chuan loh hi?" Stacy chuan a lo ti ve bawk.

"Saw room a awm." tih pah chuan Paliana room chu Peka chuan ava pan phei a. Tlem a lo inhawng sa a, fimkhur tak chuan a han bih duk duk a. Tumah an awm lo tih a hmuh takah chuan a hawng zau deuh va, "Tumah an awm lo, lo lut rawh." tiin Stacy chu a au va. Stacy pawh chu a rawn lut ve a, khuma Daisy nautetlai thlalak chu an hmu a.

Peka chuan a han la kang a, "Ehe..naupang an cheng ve animaw? An fanu thlalak amaw ni dawn le?" tiin an thiannu nautet lai thlalak a ni tih hre hauh lo chuan an han inzawt a. PEka chuan thlalak chu a dah a, "Thil pakhat ka hre chhuak thut, ding teh." tiin Stacy chu a pawt ding a. "Enge i tih dawn?" tiin a lo zawt hu mai.

Peka chuan rilru hmul a pu ta tlat, "Nizanah kan chatthla daih sia, tun hun hi a rem viau lo maw?" a han ti deuh sur sur a. "I mawl ami? Mi inah lehnghal, a neituten min rawn man anga sin, i hlau lo mi?" tiin Stacy chuan a lo hnial a. "Kawngka kha chhunglamah ka kalh daih alawm, chubakah an raw haw hma chuan kan ti zo hman hrim hrim." tiin a lo chhang leh a.

"Kan thianpa Kimtea a bo a, kan zawng mek a nih hi..chutiang thil lo ngaihtuah suh." tiin Stacy chu chhuah a tum a. Mahse a banah chuan lo man bet in khumah chuan a bawhthlu lui a, a thlem a thlem ta mai a. Chutia inngawizawng na na na, lo inbuan ve fo tawh chu Stacy pawh chuan a hnial rei lo kher mai.

Nuam taka hun an hman lai chuan kumdam atang chuan Paliana chu a rawn chhuak ta a, chempui hriam leh lian em em mai hi a la rawn keng chhuak zui. Mahse a pen thawm te chu Stacy leh Peka te chuan an hre pha lo, a chhan pawh an thawm a ring zawk tlat. Paliana chuan a room chu ava dak phawt a, ama khum ngei mai a mipat hmeichhiatna an lo hmang chu a ngaihdan a ni lo kher mai.

A chhan pawh Daisy nena an nupa khum atana a hual kha a ni tlat, chu mai a la ni lo. Daisy thlalak a neih chhun pawh chu chhuatah an lo ti tla a, a thinrim kher mai. A chempui hum ran chung chuan ava pan ta a. Stacy lah chu a chungah a bialpa a bawk khur mai a, amah lah a maimitchhing bawk.

Paliana'n an bul lawkah a en reng tih chu a hre hauh lo, chutah a rawn meng ta. Paliana hmel rapawm tak leh kang sawr vek mai te chu a han hmuh chuan a hlau em em a, a au vak mai. Chuveleh Paliana chuan Peka tukhum chu a chempui hmang chuan a han sat chawrh mai a, a mit leh mit inkarah chuan chem chu a tlum thla zawk mai.

Thisen chu a chik nghal tuar tuar a, Stacy hmaiah chuan a baw thla hawk hawk mai a. A au nasa em em a, a hlau hle bawk. Paliana chuan a kut khing khat chuan Peka chu a han theh leng lawp a, pindan kilah chuan a ri thlawp mai. Stacy chu tap chung chuan a tho vat a, mahse Paliana chuan a sam ah a tham a.

Saruak vekin a awm lenghal a, bangah chuan Paliana chuan a rek bet a. Chem chuan a tin ta ran mai, mahse a kapah tak mai chuan Stacy chuan a pet sak a. Na a ti lutuk chu a thlah a, a rum vawng vawng mai. Stacy chu room atang chuan engmah ha lo chuan a tlan chhuak a, kawngka lam a pan nghal.

Mahse a thlen hma chuan Palianah chuan a hnung lam atang chuan a chempui chuan a rawn vawm a, mahse a vawm fu lo hlauh. Khawngkharah chuan a bur chat mai a, Stacy hlau lutuk chu choka lamah chuan a tlan let leh daih mai. Chemte lo awm chu a ban vat a, chutih lai chuan Paliana chuan kawngkhar a a chemte chu a lo phawi mek a.

Lehlam a han hawi leh chu Stacy chu a lo bo daih mai, mak a ti lutuk chu a hawi kual a. Room te chu a en kual a, choka lam a enkual bawk a. Dawhkan hnuai zawng zawngte chu a en a, mahse a lo awm tawh hauh lo. Stacy chu kudam chhungah a biru hi a lo ni a, choka a a chemte lak pawh chu a la hum ve ran mai.

Thawm a chhuah a hlau si, a tah a chhuak bawk si chu a hmui a hup a, thlabar tak chuan chu kudam chep takah chuan a ding khur zawih zawih mai. Paliana chu a thawm atang chuan a la zawng mek a ni tih chu a hre thei a, a thaw lo char char tawp. Chutah engemaw nem duak, thil mum lian tak niawm tak hi a rap fuh a.

A zu en chuan an thianpa Kimtea lubung a lo ni reng mai, a lo dang vek tawh a, thovin an bawm nuai nuai bawk. Stacy hlau lutuk chu a au vak a, kudam atang chuan a chhuak nghal a. Mahse kawngka hma takah chuan Paliana chu a lo ding khur mai, Stacy chu a lo rek lehnghal a. A rek kang ta vu mai a, mahse Stacy chuan a chemte ken lai chuan a banah chuan a vit tlum thawih mai.

Paliana chu a rum nghut ringawt, Stacy chu choka lamah chuan a thleng leh bel delh tla ri rum rum khawp chuan a theh phei a, a ke ruh a la sawh khawlo zui. A na ti lutuk chu a hnang awl awl a, a che hleithei tawh lo. Paliana chuan a ban puam laia chemte bur va mai chu awlsam tak chuan a han phawi pawp a, a then ve deuh chak chak mai.

Tichuan kudamah chuan lutin buara lian tak mai hi a rawn la chhuak a, che hlei thei lova lo mu mek, Stacy chu a samah a tham tho lawp a. Thei leh thei lo hian Stacy chuan Paliana chu enin, "Tu..tunge i nih?" a ti tawk tawk a. Mahse Paliana chuan a chhang lo, buaraah chuan dim baksak lo chuan Stacy chu a thunlut daih mai.

Awlsam tak hian a pu leh nawlh a, bawm pakhat leh a tape chu keng telin ruang chu pawnah chuan a chhuahpui ta a. Thingkung lian pui pui bulah chuan a ding a, buara chhunga awm mek, Stacy chuan khawnge a awm pawh a hre tawh lo. A rilru erawh ala harhfim a, mahse a taksa chu a control thei tawh lo. Chutah Paliana chuan buara chu chawi kangin thingkung chu a vaw ta siah siah mai a, vawi hnih thum vel chu Stacy a rawn au ve hman.

Mahse a bak chu ruh tliak hmawk hmawk ri bak hriat tur a awm tawh lo, Stacy pawh chu a thi ve ta. Paliana chuan a duhtawk ta a, buara a tang chuan Stacu chu a la chhuak a. A ruh te chu a rawn lawr chhuak fer fur mai a, a taksa pawh a kawi nuai mai. Paliana chuan chemte chu a phawrh chhuak a, Stacy awmbawr chu a zai kak a.

A chhung ah zen lutin a lung leh a thin a rawn la chhuak a, tichuan bawmah hian a dah a. Hnimhnah chhar khawmin Stacy ruang chu a kuh a, a kalsan ta a.  Tape chu a play phei bawk a, HArry DAcre hla, DAisy Bell chu a ngaitha phei leh ta rut rut mai. Tichuan inah chuan a lut leh a, a chawhhmeh hawn chu a buaipui leh tan ta a.

*************************

DAisy te pathum pawh chu darkar fe a liam tawh avang chuan inhmuhkhawmna hmun tur an tih ah chuan an va let leh ta a, mahse Stacy leh Peka te chu an lo awm hauh lo. Isaka chuan a phone a han phawrh a, "Ava buaithlak tak, signal lah a awm thei bawk si lo." tiin a phun nang nang mai.

"Signal i nei em nang?" tiin Rinrini chuan Daisy chu a han zawt a. Daisy chuan a phone a en a, "Ka nei bik lo." a lo ti zawi sap a. "Ava buaithlak ve aw..engtin nge kan tih ang?" tiin Rinrini pawh chu a mangang tan ta hle mai. "An let tlang pawh a ni maithei asin, Kan riahna hmunah khan...han let ve tawp mai ang u." DAisy chuan a lo ti vat a.

Mahse Isaka chuan, "A chi loh...Kimtea pawh kan la hmu lova, chutin let tawp lovang u." a la ti tlat mai. "Khua a thim dawn tawh hi...kan bo mai anga sin." tiin Daisy chuan a vin deuh hlur tawh. "Chutiang tur a ni ngai lo, reilote kan zawng leh anga, chuan kan let tawh dawnnia." ISaka chuan a la ti tlat mai si.

Rinrini pawh chuan Daisy chu a han thlem ve leh a, tichuan phur lo tak chuan a kal ve leh ta a. Thui pawh kan kal hma chuan Isaka chuan engemaw ni, hrui inzam ang tak mai hi a pal chat a. Chutah an sir hnimbuk atang chuan thing tlawn, a hmawra thil zum tak tak invuah hi a rawn thlawk phei a, Isaka awmah tak chuan a rawn vit tlang pawp mai.

Isaka chu a thi chiang kher mai, hmeichhe pahnih chu hlauvin an au nghal vak vak a. An tlanchhe nghal bawk, a awmzia chu Paliana thangkam chu Isaka chuan a lo pal fuh palh tihna a ni. Daisy leh Rinrini te chu an tlan chhia a, khawi lam nge an pan pawh an hre tawh lo. Chutih lai karin an tlanchhiatna lamah chuan Daisy zawk chu a inchhui palh a, lehlam sir khamah chuan a lum ta daih mai.

Rinrini lah chuan a au zui vak vak ringawt a, mahse a awih ve reuh em avang chuan a zu chhuk ngam mai bik lo. Khua lah chu a thim titih tan tawh der mai si a, a tihngaihna hrelo chu a tlan chhunzawm leh ta ringawt mai. Daisy pawh chu a lum zel a, mahse thingkung vel a su lo hlauh va, engmah a insawhna lutuk lo hlauh.

A tawp a zu thleng chu engemaw nem nuak hi a su delh a, a thawk hrawk hrawk mai. A thin delh a han en chu a phu nasa kher mai, hnimhnah kara mihring mitmu, lo meng kuau mai a hmu chu a t(r)e vak a. A tawlh sawn nghal vat, a tap nghal zawih zawih bawk. Thovin an lo bawm nuai nuai a, a han in en chu a kawrah chuan thisen a lo kai nuai mai.

Ama thisen a ni bawk si lo, a thil delh chu ruang a ni tih a hrethiam nghal. Mahse hnimhnah in a inkhuh deuh nual avang chuan tu ruang nge tih a hre thei mai lo, hmawlh hi a chhar a. Muang chang chuan ava pan a, a hmawlh ken lai chuan hnimhnah ho chu a han thian fai a. Chutah saruak ngal ngatin a lo awm tih a han hre leh a, a rap kher mai.

Tichuan a han thian fai zo va, a zu enchiang chu a thingthi hnawk mai. A thiannu Stacy ruang ngei a lo ni a, a awm zawn lah chu a kaw huau leh nghal. A sirah chuan a va thlan phei a, thingkung vuanin a va luak nghek mai. "Ngati nge maw ka lo kal ve kher kher le..ka va inchhir tak em!" tia tap chung chuan tlanna lam tur pawh hre chuang lo chuan a hma zawnah chuan a tlan chhe leh ringawt a.

*************************

Khua chu a thim vek tawh a, a phone flashlight eng nep tak hmang chuan Rinrini chu a tlanchhe ve zel a. A mangang kher mai, signal lah chu a awm thei reng reng lo mai a. A tap pur tawh mai, "Nilo...Isak, a ni thei lo...khawngaihin min pui ru, inah haw ka duh." tiin thingkung phenah chuan thu in a tap zawih zawih mai.

Chutah pen ri a hre ta, a tap lai pawh chu a bang hmak. A hnung lam atanga ri a ni tlat, muangchang leh finkhur tak chuan thingkung phen atang chuan a han dak dek dek a. Light eng em em mai kenga mipa khat lo kal mek chu a hmu a. A thiante zinga mi nise a ti ngei mai, beisei rilru tak chuan a lo nghak a.

Mahse a rawn thleng hnai zel a, chempui a hum tih a hmuh chuan a thin a phu nghal dup dup mai. Chu mai bakah khatiang em em a palian kha an zingah an awm lo tih a hrechiang hle bawk, theihpatawp chuan a hmui hupin a han thaw lo char char a. Paliana thawm chu a rawn hnai zel a, mahse a zawn a rawn thleng dawn tihah chuan a reh daih mai.

Rinrini pawh chuan mak a ti angreng hle a, mahse a la hawi chhuak ngam mai lo. Rei fe a nghah leh hnuah chuan a han dak chhuak leh de de a, eng pakhat mah hmuh tur a lo awm tawh lo. Thawm a reh diak si avang chuan hmun dangah a kal ni a ngaiin a ding chhuak a, kal a tum chiah chu a hma zawnah chuan Paliana chu a rawn ding thut mai.

Rinrini hlau lutuk chu a au vak a, a tlanchhe nghal chiam a. Paliana chuan a rawn umzui ve zel a, a tlan chak em em mai lehnghal. Chutah a chempui ken lai chuan Rinrini chu ava vawm t, mahse a fuh lo hlauh mai. Rinrini hmazawn tak thingkungah chuan a bur chat mai a, a au tuar mai. Chem chu Rinrini chuan inven nan tiin phawi a han tum a, mahse a thei ta tlat lo.

A kut pahnih chuan vuanin theihtawp chuan a han tang leh a, mahse a thei chuang lo. Paliana lah chu a rawn kal hnai telh telh tawh mai si, a beidawng chu a tlanchhe chhunzawm leh ta a. Rawn um zel pah chuan Paliana chuan thingkunga a chempui bur va mai chu a kut khingkhat chuan awlsam takin a pawt phawi mai a.

Rinrini chu a tlan zel a, a tawpah chuan Paliana in chu ava thleng ve ta. RAng takin a va oan vat a, kawngka chu a chum vak vak a. "Min pui ru, khawngaihin min pui ru." tiin a t(r)e chel chul mai a, mahse tumah chuan an chhang lo. Lehlam a hawi a, Paliana chuan a la rawn pan zel mai si, a mangang kher mai.

Kawngka chu hawn a han tum a, a lo inkalh reng reng lo chu niin. KAwngka chu a chhunglam atang chuan a kalh nghal a, thutthleng leh thildang awm ang ang chuan a dang nghal zel bawk. Chutah a thawm hlawm hlawm a, bang kila a thianpa, Peka ruang, lu phel phawk mai ava hmu chu a au chhuak teuh kher mai.

A hmui a hup hman hram a, a mittui a tla nghal zawih zawih mai. Ruang chu en pawh a en tha ngam lo, choka lamah chuan muangchang chuan a tawlh phei a, mahse Paliana erawh chuan thawm a rawn nei tawh miah lo thung. Chemte pakhat lo awm chu a chuh nghal vat a, inchhung chu enkualin a tawlh phei zel a.

Chhuata thisen lo kai nuai mai te chuan a hlauhna a ti zual kher mai, mahse a dinna zawn chu choka tukverh zawn a ni tih a ngaihtuah tawh hauh lo. A hnungchhawn tlat avang leh a thil tawn mek avang chuan rilru fim pawh a pu thei tawh lo, a khur zawih zawih mai. Chutah tukverh chu a rawn keh chuai a, Paliana chuan a ban lian tak mai chu a rawn rawlh a.

Rinrini chu a rawn rek ta mai a, a chemte ken lai chu a la thlauh zui. A rek nghet telh telh a, chutah ttukverh thing tliak rum rum khawm chuan Rinrini chu pawnah chuan a pawt chhuak ta nge nge a. Thei leh thei lo hian Rinrini chu a ding kang a, mahse thing bung chuan Paliana chuan a lu ah a hlap pawp mai a, nikhawhrelovin a awm der mai.

***************************

Darkar fe a liam leh hnuah chuan DAisy kawng bo pawh chu a rawn thleng hlawl mai, in chu a rawn hmu ve ta. Muang chang chuan a pan hnai a, mahse a han ngaihtuah let a. Isaka kha ramsa thangin awkin a thi kha a ni a, Stacy ruang a hmu bawk. Tualthattu tu emaw tak chu an awm tih a chiang a, chu in pawh chu tualthattu chenna in a ni thei mai angem tiin a ngaihtuah chhuak zawk mai.

In chu hnaih loh a tha in a hre leh ta zawk a, mahse let leh a tum chiah chu inkawta pheikhawk khing pakhat lo let reng chuan a mit a la ta tlat mai. Thing bung lian tha ve nelh nawlh tak mai chu chharin a hun ran a, tichuan inlam chu ava pan ve ta a. Pheikhawk chu chharin a han en chiang a, a rin ang chiahin a thiannu Rinrini pheikhawk a ni.

Inchhungah chuan Rinrini chu a awm ngei a ring a, engpawh tawh huam chuan a huaisenna zawng zawng sawm khawmin a thingtum ken lai hun nghet sauh sauh chung chuan kawngkhar lam chu ava pan hnaia . Thawm chu a han ngaichang leh vang vang phawt a, mahse a reh thiap avang chuan kawngka chu a han hawng a.

A lo inkalh miah lo mai, a chhung a lut chiah chu a thil hmuh chuan a thing tum ken lai pawh chu a thlauh tir hial a. A thiannu Rinrini chu a letling zawngin saruak vek hian a lo inkhai a nih chu, mahse ala dam thung.

Inchunga thing lo inkham pheiah chuan hrui hrawl tak mai hian Rinrini ke chu puar beh a lo ni a, a hrui lah chu a la tawi em em zui. A lu atang chuan thisen chu a lo far kauh kauh va, chhuatah chuan a lo tling nuai tawh hial mai. Rinrini hmai pawh a lo dang vek tawh a, Daisy chuan ava pan vat a.

"Nilo..nilo Rinrin, enge awmzia? I tha em? Ka tawng i hre thei em?" tiin a be nghal mawlh mawlh a. Thei leh thei lo hian Rinrini chu rawn meng tawk tawk in, "DAi..DAisy.." a rawn ti tham tiak a. "Lungngai suh...ka la thla ang che..lo tuar hram rawh." tiin a hawi kual a, choka lamah chuan hmanrua a va zawng a.

Chemte a hmu hlauh mai, rang takin Rinrini chu ava pan leh a. "Engtin nge ka tih ang..awii..Lalpa, engtin nge ka tih ang." tiin a chiai nasa kher mai. Thutthleng pakhat chu a han la a, a lawn kai a. Rinrini ke phuarna hrui chu zai chah a han tum a, mahse a ban pha hleithei lo. Mahse a hrui chu a zai thei hlauh, a zai tlauh tlauh va.

Mahse a en phak siloh avang leh a harsat em avang chuan a sawt lo khawp mai, en thei bawk si lo chu a zai risk deuh nawk nawk hi a ni ber mai. Chutah Rinrini ke artui chu a la zai fuh zui a, a rawn rum that mai. A kuta thisen a rawn luan thlak avang chuan a thiannu ke chu a zai fuh palh tih a hria a, a han tawp leh rih.

"Rin, ka tihpalh...min pui hram teh u." tiin a tap vak vak a, hrui chu a zai chhunzawm leh a. Mahse Rinrini thawm chu a reh tial tial a, a lu kak atanga thisen far pawh a tam tial tial bawk. A hmai chu a dang var vek tawh a, Daisy lah chuan thei leh thei lo chuan kut kham hle tawh mahse, a zai lui ve tang tang a.

A tawp a tawpah chuan a zai chat ve ta, chhuatah chuan Rinrini chu a tla thla ri thlawp mai. Thutthleng chung atang chuan a chhuk thla vat a, Rinrini chu a zu buaipui nghal. "Rin, ka tawng i hre thei em? Harh teh, khawngaihin harh teh." tiin a sawi vak vak a. Mahse Rinrini chu a chhan hman ta lo, a lo thi fel der tawh.

A thiannu ruang chu kuahin a tap hawm hawm a, "Tinge helai hmunah hian kan lo kal, ava han pawi tak em." tiin a mittui chu a tla zawih zawih mai. Chutia a tah lai chuan kumdam kawngka hnuaia thisen rawn luang chhuak riai riai chu ava hmu a, a tap bang hmak mai. Chemte chu humin kudam lam chu ava pan a, a bul vel chu thisen hian a lo kawi nuai bawk.

A va pan hnai zel a, kudam chu a hawng ta. Chuveleh a chem chu a lek kang nghal a, mahse mipa ruang, saruak veka awm hi a rawn tlu chhuak a, lu ala nei lo zui. Chu chu Peka ruang kha niin Paliana chuan a lu a lo tan chhum law law hi a lo ni a, Daisy chu a bawh thlu teuh hle mai. DAisy chu a awm sawn vat a, a t(r)e vak bawk.

Chutah Kimtea lubung chu a la rawn lir chhuak tel zui, a phu nasa lutuk leh a rap lutuk chu a zuang deuh dawr a, a chemte a thlauh bawk. Chutah tlan chhiat tuma lehlam a hawi chu a hma ah chuan Paliana chu a lo ding khur mai, che pawh a che sawn hman lo. Puan var a hum lai mek hmang chuan Daisy hmui chu a hup thut a, Daisy chuan a mit a chhing diar diar a, a zawi ta hnawk mai.

Nikhawhrelovin a awm der mai a, Paliana chuan a pawm kang a. Tichuan kudamah chuan a luhpui a, chhuatah chuan Daisy chu a nghat a.  Chhuat chu a hawng a, inhnuai pan thlakna leihlawn hi a lo awm leh a. Daisy chu a pu leh nawlh a, a chhukthlak pui ta a ni. Tichuan pindan ruak, thim em em mai hi a lo ni a.

Daisy chu chhuatah chuan a mut a, light a on eng a. A dim em em a, a eng(yellow) deuh phut mai. Paliana chuan Daisy chu a en vang vang a, a lawm lutuk chu a nui huah huah a, mahse a nui ri chu rapthlak tak a ni. A kutah chuan chain in a hling a, banga thir pipe ah chuan a thlung bet ta tlat mai.

Paliana chuan a hmai te chu a chul sak a, a mittui te chu a tla hial mai a. Duat hmel tak hian a samah te chuan a khawih a, a inhnit deuh hlup hlup bawk. Tichuan muang chang chuan a chhoh san leh ta a, a pindanah chuan a lut tlang a. A tape chu play leh in Daisy Bell hla chu a play leh a, a suk pui dulh dulh bawk a.

******************************

TO BE CONTINUE