REBECCA (MIZO FICTION HORROR STORY) Written by : Aaron Malsawmdawngzuala WARNING : 18+ CHAPTER : `7 (LAST)

 REBECCA

(MIZO FICTION HORROR STORY)

Written by : Aaron Malsawmdawngzuala

WARNING : 18+

CHAPTER : `7

(LAST)

*********************************************

Zan a ni a, kan inah chuan mi an la awm nual mai. Pawnah lah an tha hnem khawp a, hnuchhuina chu beih chhunzawm mek zel a ni. Pu Siama pawh chu Isaka chuan eng eng emaw a zawh belh nual bawk a, kei erawh siiting room lamah ka thu ngawi reng a, an che tla chu ka thlir dauh dauh ringawt.

Thudik tak hriat ka duh a ni, Rebecca-i hi tu chiah nge a nih hriat ka duh a ni. Ka mumangah khan enge a thil duh ka zawt a, THUDIK tih bakin min chhang der mai si lo. Engemaw thuruk inthup chu a awm chiang a, chu chu ka hai lan a ngai a ni. Ruang kha, a thawmhnaw atang ringawt pawh khan Rebecca-i a ni tih ka man thiam nghal mai a.

Mahse Rebecca-i hming ka lam ka lam chuan mak an ti anga, a dik lo zawngin min ringhlel ang tih ka hlau ve bawk si. Rebecca-i ber lah chu a reh daih mai a, ka fanu Mary pawh a khat tawk chuan a hmuh leh hmuh loh ka zawt reng bawk a. MAhse a hmuh loh thu hlirin min la chhang a, hlau viau thin mah ila tun dinhmunah erawh chuan ka mamawh takzet a ni.

"Bawihte, tikhan lo awm lawk rawh aw, lo kal sawn miah suh aw." tiin Mary chu ka thawh san a, bathroom lam pan chuan ka kal a. BAthroom chhungah chuan lutin ka inkalh hnan daih a, a ding vang vang a. Maimitchhing vang vangin, "Rebecca, i awm takzet a nih chuan rawn inlan la, thudik min hrilh rawh." tiin ka han phun nuah nuah a.

Mahse engmah thawm a awm lo, inchhung lama thawm bak engmah hriat ka nei lo. KA han ngawi vang vang a, "I puihna ka mamawh a ni, enge i chungah thleng? Eng thudik nge ka puan chhuah i duh, khawngaihin min hrilh rawh.. enge i duh?" ka han ti leh a, mahse a la reh vung vung mai.

Boruak chu ka biak chhunzawm zel a, "Kan in bula ruang saw, nangma ruang tihna em ni? Rebecca, engkim min hrilh rawh. I duh chu sawi la, ka tihsak ang che." ka han ti leh a, ka han meng a. Mahse engmah ka hmu lo, a la reh vung vung mai. Ka tah te chu a chhuak rum rum zawk, "Ka fanu Mary hi i thiannu ang tak tak a i ngai a nih chuan rawn inlan hram teh, ka pui em em ang che." tiin ka han phun leh mawlh mawlh a.

MAhse engmah a thleng chuang lo, ka beidawng chu ka han thaw deuh hluai a. Bathroom atang chuan ka chhuak a, sitting room lam chu ka pan phei leh nghal a. Mahse ka fanu Mary chu a lo awm tawh hauh lo mai, rang takin ka tlan phei a. Ka hawi kual a, "MAry... Mary.. khawnge Mary kha?" tiin ka au nghal chiam chiam a.

DAisy chu rawn kalin, "Enge a, MAhlim? Enge ni vak vak?" tiin min rawn zawt nghal a. Ka mangang nghal ringawt, "Khawnge, khawnge Mary?" tiin ka tap deuh nghal tuau a. DAisy chu a thaw haka , "Roomah a lut, a mak vak vak thin... i hlauthawng hma thei lutuk." tiin min la hau zek zui.

Mahse ka chhang tawh lem lo, room ah chuan ka lut ve nghal a. Mary chu tukverh bulah chuan a lo ding ngawi reng a, min hnungchhawn zawng hian a lo ding a. Room kawngka chu ka khar a, "BAWihte, enge i tih a?" tiin ka zawt a. MAhse min chhang miah lo, a la ding ngawi reng a.

Muang chang chuan ka va pan hnai a, "Mary, ka biak che chu i hre lo em ni?" ka han ti leh a. Chutah muang chang chuan a rawn hawi a, "Anu.. Rebecca-i'n min lo zui rawh u a ti." a ti ta mai a. Rang takin ka va pan a, "Engmaw, engmaw bawihte? Rebecca-i a, tunah hetah a awm a mi?" ka ti nghal chung chung mai.

Mary chuan a lu a lo bu nghauh va, "Aw... saw, pawnah sawn a awm." tiin pawn chu a kawk a. Tukverhah chuan ka dak chhuak nghal, mahse ka zawn ngial pawhin ka hmu zo ve hauh lo. Mary bawk chuan, "Pawnah lo chhuak rawh u a ti." a ti leh a. A thu sawi hi a dik a nih chuan Rebecca-i chuan engemaw min kawhhmuh a tum a ni ngei ang, zui ngei chu a ngaiin ka hria.

**************************************************

Mary nen chuan room atang chuan kan chhuak a, midang ho an buai em avang chuan tu vak mah chuan min lo en lem lo. Pawnah chuan Mary chu ka kai chhuak a, "Khawnge, khawnge a awm, Rebecca-i chu?" tiin ka fanu chu ka zawt leh a. Mary chu a han hawi kual leh deuh hru hru a, "Saw...saw ta saw a awm." tiin thingkung bul chu a kawk a.

Ka va en a, mahse ka hmu ve lo. Ka va pan ta tho va, "Anu, a kal sawn...zui zel ang." Mary chuan a ti leh a. MAry zawk chuan min hruai a, ka zui ve zel a. Kan in bul velah hian mihring an tam hrim hrim a, ruang laih chhuahna hmun ber a nih vang pawh a ni mahna.

Kan in luhna bula mipui lo awm teuh bulah chuan MAry chu a ding chat a, boruak chu a han en vang vang a. Tichuan mipui ho lam chu a en leh a, "Anu... REbecca-i'n saw pa saw a kawk char char." tiin mipakhat chu a kawk a. Chupa hmel ka va en chu ka phu deuh zuk mai, ka hmuh tawh hnu a ni tlat.

Kha pa, nimin tlaia kan in lo thlek du du tu ngei kha a ni. Rebecca-i hming ka lam ve leh a, hmel danglam vek kha, hlauh hmel em em kha, kha pa ngei kha a ni. Kan in chu en in mipui karah chuan a lo dak ve nasa mai a, mahse va pan a, va biak nghal ngawt chu a dik lo deuhva ka hriat avang chuan Mary chu kaiin ka let leh a.

Isaka bulah chuan ka va kal a, "Isak, min lo zui lawk teh." tiin midang a biak lai chu ka ko hrang tawp a. Min zui ve mai bawk, pawnah chuan ka hruai chhuak a, Mary erawh inchhungah ka awm tir thung. Isaka bulah chuan chupa chu ka kawh hmuh a, "Saw pa saw alawm, nimina kan in lo thlek du du tu chu... engemaw hriat a neih ka ring tlat." ka han ti a.

Isaka chuan a han en vang vang a, "Umm... a chiang reng alawm. A hma a he ina thil thleng, kan hriat ve loh hriat a nei a ni. Niminah pawh a rawn thlek du du tawh a, tunah ruang kan lai chhuak tih thawm a hre ve ang a, a rawn thli thlai ve tih a chiang reng alawm." a han ti nuah nuah a.

"Engtin nge kan tih dawn?" tia ka han zawh leh chuan a thaw deuh hak a, "Umm.. engpawh nise, i va be phawt teh ang." tiin min chhang a. KAn va pan hnai a, "Ka pu, nangmah kha... kan lo be lawk che." tiin Isaka chu a han au lauh lauh va, chupa chuan min lo hmu a.

Chutah hlauh hmel em em hian a meng phawk hru a, a tlan ta thut mai. Isaka chuan ring tak hian, "Hey... nangkha... hey.." tiin a um nghal a, keipawh chuan ka um ve nghal. Mahse mipa zawk nge nge, an tlan chak dun em avang chuan ka um pha ve mawlh lo a ni e.

An thawm a rin em avang chuan midang ho pawh chu an rawn hawi thup mai a, police dangte chuan lo hre ve bawkin an rawn um ve bawk a. Kei erawh ka tlan ve hman tawh lo, ka ding ta tawp a. Reiloteah chuan an umpha vat a, police ho chuan chupa chu an man thei ta.

******************************************************

Police Station ah chuan kei, Pu Siama, Inspector Isaka leh police dangte chu kan awm kim thap a. Kan mi man pa chu a thu kun ngul a, kan en thap mai. Ka fanu Mary erawh thenawm khawveng te leh DAisy ten in lamah an lo awm pui thung a, "Tunge i hming?" tiin Isaka chuan a han zawt a.

ZAwi sap hian, "Lalhmingliana..." a ti tham tiak mai. Isaka chuan rum zet hian a en a, "Engvanga tlan chhia nge i nih?" tiin a han zawt leh a. Mahse a kun reng a, a chhang miah lo. Chutah vin zet hian Isaka bawk chuan, "Min chhang rawh, engvanga tlanchhia nge i nih?" tiin a han zawt nawn leh a.

Hmingliana chu a phu deuh zuk a, "Ihh.. ihh, ka.. ka hlau a ni, ka hlauh vang a ni." a han ti bah deuh nuai a, a tap tuau lehnghal. Isaka nen chuan kan in en hu ringawt, "Engmaw, eng chu maw i hlauh va?" tiin ka lo zawt ve a. Hmingliana chu a thaw deuh halh halh a, a thlan a tla buah buah mai.

"Min... man ka hlau, min tihnat ka hlau a ni." a ti leh ringawt a, kan hrethiam lo kher mai. Hnai set sawtah chuan Isaka chuan Hmingliana chu a han en run a, "Chaing deuhvin sawi rawh, Mahlimi te inah sawn a hma in engthil chiah nge lo thleng tawh a, ruang kha tu ruang nge, sawi vek rawh." a han ti leh khur khur a.

Hmingliana chuan a chil a lem dawk a, "He khuaah hian hna vangin ka awm a, Champhai khua ami daih ka ni. Pi Thangi pasal Pu Kunga kha ka thawhpui a ni thin bawk, an fanu kha a hming chu REbecaa-i a ni a, kum 8 vela upa a ni." a han ti khur deuh dar dar a.

"Anih chuan ruang kan laih chhuah saw, tu ruang nge, REbecca-i ruang chu a ni em?" tiin Isaka chuan a zawt leh nghal a. Hmingliana chuan a lu a bu nghat nghat mai, "Tu thah nge?" ka lo ti vat a. Hmingliana chuan hlauh hmel tak hian Isaka leh police dang ho chu a melh kual zek zek hlawm a, "Thuruk inthup chu kei hian ka hria a  ni, ka hrilh ang che u." a ti zawi sap a.

*******************************************

HMINGLIANA THUSAWI -

HE khua ah hian sawi tak ang khan hna vangin ka awm a, Pu Kunga nen hian kan thawk dun a ni. Kan inkawm ngeih hle a, chutiang bawkin Pi Thangi pawh hian min ngaina takzet a. An inah hian ka leng lut fo va, an fanu REbecca-i pawhin min nel hle bawk.

Kum thum kal ta kha a ni a, an fanu REbecca-i hi thian kawm mang ngai lo a ni a. Kei lah tlangval senior ka ni a, fa ka la nei ve bawk si lo nen. Rebecca-i hi mi ngawichawi leh tawng tlem tak a ni a, keipawh ka len fe hnuah chauh min nel ve hram a ni. Amahin Pi Thangi hi nilengin inah awmin in nghaktu ber a ni a, tlaiah a fanu lamin a chhuak zeuh tih loh chu pawn a chhuak ngai mang lo.

Tum khat chu in kan sak lai a nih avangin kan pu chuan kar khat lai mai chawlh min pe a, Pi Thangi te inah hian chhun chawlh velah hian ka leng ziah a. A chhan chu kan pahnih hian thuruk kan nei a ni, Pi Thangi hian a rukin min ngaizawng a ni. Kei lah ka lo insum thei tawh bik si lo nen, insak lai nei tak tak tho mah ila chance remchang kan neih theih nan tiin chhuanlamah ka hmang a ni.

A nihna takah chuan insaknaah ka awm ve ngai em em lova, Pi Thangi nen hian an pa hna kal hlanin kan che khawlo dun ta fo mai a. Mahse tum khat chu ka rui over deuh va, chhuna kan kahwsa dun tur chu sitting room lama chet ka chak ta tlat mai a. Thangi chuan room lamah zawk duh viau mahse ka tih tlat avang chuan min hnial tak bik lo, sofa ah chuan kan duh ang tawk chuan kan che dun ta a.

Mahse rei vak lo hnuah chuan Thangi chuan min nem sawn vat a, puan chuan a inkhuh nghal sawk sawk a. Ka hrethiam lo kher mai, ka va hawi chhuak chu ka phu nasa takzet. A fanu Rebecca-i chuan kan che tla lai chu min lo hmu reng a, kan bulah chuan a lo ding reng a nih chu.

Kawngka ka lo kalh miah lo hi a lo ni a, chumi ni chu Mary te an lo bang hma hlauh bawk si nen. Inzep rual a ni lo, min man chiang lutuk tlat. Thangi chu a inha nghal sawk sawk a, "BAwihte, in.. in lo bang der animaw?" a ti bah nuai mai. KEipawh chu ka inha nghal sawk sawk a, REbecca-i chu a ding khur zawih zawih mai.

KA thin a phu dup dup a, chutah Rebecca-i chu a tlan thut mai a. Ring tak hian, "Apa bulah ka sawi vek dawn." ala ti zui, Thangi chuan a au zui vak vak a. Rang takin ka um a, kawngka lam a thlen hma chuan a banah chuan ka va man hman a. Ka hlauthawng bawk si chu ka buai zo vek, "Dign rawh, ngaithla teh Rebecca.. ka sawi fiah dawn alawm." tiin ka man bet a.

Chutah na em em hian ka banah chuan a seh vak a, hnung lam kawngka a chhuah tumin a tlan leh a. Mahse Thangi chuan a lo man ve thung a, "BAwihte... khawngaihin, i pa hrilh lo hram rawh." tiin tap chungin a ngen a. MAhs Rebecca-i chuan a mitah a kawm sak vak a, Thangi chuan a thlah a.

KA va pan leh a, a chhuah hma chuan ka man hman leh tho. Mahse dawhkana chemte chu a la a, ka malah min vit a. A na ka ti lutuk chu ka thinrim ka insum zo hman lo, ka thinrim lutuk chuan Rebecca-i chu ka kek vak a. Dawhkan tlang zum laiah tak chuan a lu chu ka tauh tir pawp mai, chhuatah chuan a let nghal der a.

Thangi chu rawn tlain a tap vak vak a, a fanu chu a sawi vak vak a. MAhse vanduaithlak takin Rebecca-i chu a lo thi tawh, ka that der tihna a nih chu. Tih ngaihna ka hre lo, ka buai takzet. Thangi lah chuan min chhuahchhal vak vak a, police hnena report ah thleng chuan min vau ta mai a.

Ka lungawi ta bik lo, i sawi chhuak a nih chuan keipawhin engkim ka sawi ve ang tiin ka vau let ve a, a ngam ta bik lo. Tichuan Rebecca-i ruang chu inhnuai thingzai dahkhawmnaah kan thukru ta ringawt a, chhuanlam siam dan tur te ka hrilh hnu chuan ka haw san ta daih a.

Ka rilru chu a nuam thei thlawt lova, ka hlauthawng reng bawk. Thangi chuan an pa bulah chuan Rebecca-i chu a thiante inah chaw a ei tur thu leh a thiante nu leh paten motora an rawn thlah thlap tur thu chu hrilhin dawt a sawi ta ringawt a, Pu Kunga pawh chuan a lo awih ve mai bawk.

Tichuan ka hrilh ang ngeiin chaw ei khamah chuan a thingpui in turah mut duhna chu a telh sak a, an pa chu a muhil a. Chuveleh min rawn hrilh a, ka va phei ta nghal a. Zan a ni bawk a, kudam chhungah chuan Rebecca-i ruang chu tuma hriat lohvin kan phum thei ta a ni.

Mahse damdawi kha thangi khan a lo pawlh tlem deuh ni tur a ni, kudam atanga kan chhuak chiah chu pawnah chuan Pu Kunga chu a lo ding reng mai. Thinrim tak hian, "Khatah khan enge in tih, Hminglian.. enge i rawn tih?" tih pah chuan kudam chhungah bawk chuan min rek lut leh nghal a.

Theih tawp chhuah chuan Thangi chuan min lo chhan ve bawk, chutah kan buai chho zel a. Kunga chuan a fanu kan phumna, lei nawi chu a hmuh chuan enge thil awmzia min zawt a, ka chhang ngam si lo. An nu chu a zawt ve leh a, a chhang ngam bik si lo. Tichuan Kunga chuan a hai ta vak a, chu chu remchangah la in suahdur chu la in Kunga chu ka vaw pawp a.

A thih hma chu ka vaw char char a, ka that leh ta der mai. Kungi chuan min ankhumin min hau vak vak a, mahse ka vau zui zel a. Tichuan chumi zan chuan Pu Kunga ruang chu hmundangah, ramhnuai lamah kan phum ta zawk a. Hetih lai hian he khua hi chhuahsan a, Pi Thangi te khaw lama Christmas hman an tum kha a ni a.

Chu chu remchangah hmangin Thangi bulah chuan chhuanlam siam tur ka hrilh leh a, an inhmun hi Pu Siama bulah khan an hralh lawk tawh hrim hrim bawk a ni. Tichuan Pu Siama bulah chuan chhuanlam a siam a, an pa leh a fanu te chu an khaw lamah an kal hmasak thu a sawiin dawn a phuah chawp a.

A hnu khan Thangi kha a reh ta hmak a, keipawh chu a reh tak hmakah chuan engkim a ti fel ta aniang chu tiin ka ngaih ka ti tha ve ngawt a. MAhse hun a kal zel a, keipawh chuan hemi khua hi ka chhuahsan ve ta a. Mahse kumin atang khan a zual bik, mumang tha lo deuh deuh ka nei tan a.

Chuvang chuan ka ngaih tha lo chu hetah hian ka rawn zin leh a, Thangi kha hetah hian a lo la awm mial mai lo maw tih te ngaihtuahin ka rawn thli thlai a, min lo man ta a nih kha. A bak engmah hriat ka nei lo, Thangi pawh a thi nge a dam, engmah ka hre tawh lo.

****************************************************

A sawi zawh hnu deuh lawk chuan Police pakhat hi a lo kal a, file chu Isaka a rawn pe a. "Sir, Pi Thangi te nupa chu tunge an nih tih kan hrechhuak tawh e. Pi Thangi hi kum thum kal ta khan rilru buai vangin mental assylum ah dah a ni a, a pindan chhungah a inawkhlum a ni. Chuan a pasal Pu Kunga erawh a khuangcher bo hmak a, ruang kan laih chhuah kha an fanu Rebecca-i ruang ni ngeiin Pi Thangi chhungte chuan an sawi a, a thawmhnaw atang zawng zawng nen... An sawi dan chuan an khuaa an haw hnu khan a rilru a buai chho tan a, a phone te a bo vek a, a pasal leh a fanu awmna an zawh lahin chhanna chang a hre lova, tichuan a a zui ta mai a ni awm e." a rawn ti a.

Isaka chu a maimitchhing vang vang a, "Anih leh engtin chiah nge Pi Thangi nen chuan  in inthlah a, in inbe zui miah lo em ni?" tiin a han zawt leh a. Hmingliana chuan a lu a lo bu nghauh va, "Aw...amah kha a reh hmak a, a chanchin pawh ka hriat chhunzawm ta lo a ni, a thi tih pawh ka lo hre lo reng reng." tiin a chhang a.

Isaka chu a thaw deuh hak a, "Hriat belh duh i la nei em?" tiin min en a. Ka lu a ka thing a, "Aih, engkim a chiang tawh. Helai hmun hi, he khua hi chhuahsan vat ka duh a ni." tiin ka chhang a. Hmingliana chu thiam loh chantir niin dam chhunga tang tur chuan man a ni ta a, keipawh kan in thleng chuan Isaka chuan min thlah leh a.

In ka lut chu Mary chuan min rawn panin min kuah a, a tap deuh pur lehnghal. "NGati nge bawihte, tinge i tah a?" tiin ka zawt a. Mittui tling teuh chung chuan, "Anu, Rebecca-i... Rebecca-i'n ka lo kal tawh dawn lo, ka bo a ngai tawh atia, min kalsan daih." tiin min chhang a.

A chalah chuan ka fawp a, "A kal a ngai tawh a nih chu, ka awm alawm, i nu ka awm hi." tiin ka kuah ngawih ngawih a. Mary chuan min kai a, "Roomah sawn i ta turin thil a ziak a, lo entir rawh a ti." tiin room lam chu min pan pui a. Roomah chuan kan lut a, dawhkanah chuan paper them hi a lo awm a.

KA la a, "Hei hi maw?" tiin ka fanu chu ka zawt a. A lu a lo bu nghat mai, paper chu ka en a. Chiang tak hian, "Ka lawm e." tih hi naupang hawrawp tih hriat tak hian a lo inziak a, ka nui suk ringawt. Daisy bulah chuan thil thleng awmzia chu ka hrilh a, tichuan a ni pawh chuan min hawsan ve ta a.

*******************************************************

Kan pute pawhin ka chunga thil thleng chu an lo hre ve zel a, min hrethiam khawp mai. Tichuan kum khat zet chu kan awm ta a, Rebecca-i thla pawh chu vawikhat mah kan hmu tawh ngai lo. Engkim a pangngai chho vek a, buaina pawh ka tawk tawh lo. Ruatfeli pawh a dam chho zel a, min rawn awmpui leh ngat nia mawle.

Kum khat a liam hnu chuan ka post pawh an sawn leh tawh a, Aizawlah ngei chuan ka awm leh thei ta. DAisy chuan min ngai thin khawp mai, mahse buaina tawk dawn tawh lo mah ila Lenhmui Khua kha chu ka awm peih tawh lo hrim hrim. Ka mumanga kan pa ka hmuh kha tun thlengin ka la hrethiam lo, kha kher kha chu.

A tukah khan dam lo an rawn zawn luh lah kha kan pa hmel ang takin ka hmu leh nghal a, kha thil khan awmzia a nei ve angem aw tiin ka la inngaihtuah thin. Mahse kha chu mang chhia mai mai angah ka ngai lui hmiah, damlo hmel pawh kha ka hmuh sual mai mai a niang ka ti tawh tawp.

REbecca-i a ngaih thu chu Mary chuan a la sawi reng zel tho va, keipawh ka thinrim phah em em chuang lo. Ka sawi hmaih pakhat bawk chu, thudik hai lan a nih zan la la khan Hmingliana khan Pu Kunga ruang an phumna chu a sawi chhuak a, an lai chhuak ve bawk a ni.

Hun a kal zel a, kum engemaw zat a liam leh a. Mahse pasal ka la nei chuang lo, ka fanu chu ka tul pui chhunzawm tawp mai a ni. Tunah chuan kum 15 lai a ni ve tawh a, keipawh pitar ka ni ringawt tawh. Mak tak maiin Mary hi a mizia inthlakin, thian tamtak kawm ve tawh mahse Rebecca-i hi a la theihnghilh miah lo.

A la sawi reng tho zel, pawl 10 lai a ni ve tawh bawk a. Mahse mak deuh mai chu, engtin chiah nge an inkawm a, engtiangin nge an awm thin tih chu chiang takin a sawi thei tawh chuang hauh lo. Hriat chu a la hrechiang takzet, mahse a hmel awmdan pawh a theihnghilh leh vek tawh thung a ni.

Engpawh chu nise chu chuan buaina min thlen lem lova, Mary pawh a nun a pangngai chho hle a. Hmeichhe tleirawl fel tak chu a ni ve in ka hria, exam naah lah a ti tha thin bawk a. Fanu chhuan tlak leh zahpuiawmloh tak chu a ni ve chuan ka hria, amahin room hrang pawh a nei ve tawh bawk.

Zan khat chu ka lung a leng riau mai a, kan pa ka ngai takzet. Tukverh ah chuan dak chhuakin ka inhnit feih feih reng a, la dam se chuan kan fanu len tawh zia leh nulat ve tawh zia te hi kan sawi dun tur a nia tiin ka inbe mawlh mawlh a. Chutih lai chuan ka fanu room atang chuan, ama aw ngei, Mary aw ngei mai chuan, "REbecca.. lo kal teh.." nui har har chung chuan a rawn ti thut mai a, ka phu nasa takzet.

*************************************************************

THE END