REBECCA (MIZO FICTION HORROR STORY) Written by : Aaron Malsawmdawngzuala WARNING : 18+ CHAPTER : `6

 REBECCA

(MIZO FICTION HORROR STORY)

Written by : Aaron Malsawmdawngzuala

WARNING : 18+

CHAPTER : `6

*************************************

Zan a ni a, sitting room ah chuan MAry nen chuan kan thu dun a. Mary chu amah in barbie inkhual lem mek a, REbecca-i chu a bulah a awm leh ang tih chu ka hlau ber. Mahse a awm hrih lo aniang, ngawi reng chuan a infiam mual mual a. Kei erawh ka phone khawihin DAisy nen kan intext mek thung a, min rawn ngaihtuah thei khawp mai.

Ka phone chu a rawn ri thut a, Dr. Sangtei a lo ni. Ka be peih vak lo kher mai, mahse phone chu ka pick up ta tho va. KA han thaw deuh hluai phawt a, "Aw Sangte, enge ni ta?" ka han ti a. "Enge i an zel, engmah chanchin i arwn sawi bawk si lova?" tiin min rawn zawt a.

Ka maimitchhing vang vang a, "Aaa.. nia, ka tha alawm. KA tha tawh khawp mai, ka ngaihtuah awm em em tawh lo ve." tiin ka chhang a. Ani lah chuan, "Ka sawi kha hre reng la, i ngaihtuahna mai mai a nih kha. REbecca-i hi a awm tak tak lo, a awm tak tak anga i ngaih ve vangin i fanu pawh khan a zawt mai mai che a nih kha." a rawn ti leh duah mai.

Ka khi suk ringawt, "Ni e, ka rilru a hah deuh va, ka lo inngaihtuah thui deuh a ni. Ka tha tawh e, ka ngaihtuahawm tawh loh ania." tiin ka chhang ta ringawt a. Ka be peih lo, awmzia a awm chuang lo. Biak apiangin thu ngai hlir a sawi a, ka tan awmzia a awm tak tak dawn chuang lo.

"I tan ka awm reng ania, lungngai reng reng suh. Ka hman a nih phawt chuan min mamawh hunah min rawn call la, ka lo kal nghal ang." tiin a la rawn inhuam nasa mai, atha ve reng reng e. "Awle, anih muttui phawt le." tiin phone chu ka dah hmak a, ka thaw deuh huai mai.

Ka mitthla ah chuan vawiin tlai a ka hmuh, ka in bula lo awm kha a lo lang zel mai a. Rebecca-i hming ka lam khan ti khawp khan a hmel kha a danglam thei ania, engemaw hriat chu a nei tih a chiang phawt. Thildang reng reng ka ngaihtuah thei lo, Pi Thangi a tihte pawh kha tuet nge hriat ka chak zek zek mai.

Pu Siama chu call a, kan inla lo leng tura sawm a, zawh mai chu ka chak rum rum a. Mahse naktuk lama zawh ah ka khek hram hram a, chiang taka thil hriat chian ka duh takzet a ni. Kan nufa chuan dar 9 vel thleng chu inbe miah lovin kan awmdun char char a, reilote hnuah chuan kan mu ve ta a.

************************************************

Zan laiah chuan ka harh zawk mai a, engin nge min ti harh pawh ka hre chuang lo. Ka mumangah enge ka hmuh ka hre bawk si lo, ka thu chhuak zawk mai a, harh chiang tak ka ni. Ka mutna bul chu ka en vat a, Mary chu lehlam hawiin a lo hnar suk suk mai a, ka thaw huai mai.

Room tukverh chu a lo inhawng a, parda chu thli in a lo chhem phe dawr dawr mai. Mak ka ti angreng hle a, a chhan chu kan mut hma khan tukverh zawng zawng kha ka kalh fel vek kha a ni si a. Mahse han hlauh em em vak ka tum lo, thil mak thleng awm chhun pawh a ni miau lova.

Khum atang chuan ka tho chhuak a, zan tir lama boruak a nawm tehreng nen chutia zanrei a nih tak avanga thli a thawk chiam mai chu keipawh chuan mak ka ti angreng hle mai. Tukverh chu khar ka tum a, pawn lam ka va dak chhuak zeuh chu ka ding ngil deuh zawt mai.

Pawna kudam hlui chhe tawh tak, a hma tlai a, rawng ka bawl laia Rebecca-i ka hmuhna hmun ngai chiah chiah ah chuan Rebecca-i tho chu a lo ding leh reng mai a nih chu. Rebecca-i ka han ti ngawt nang a, a hma a naupang ka hmuh thin tho kha a nih avangin Rebecca-i ni turah ka ngai tawp mai a ni.

Ka en vang vang a, chu hmeichhe naupang chuan min hnungchhawn tlat a. Ring tak chuan, "HEy... nang kha.. tunge i nih, enge kha tah khan i tih?" tiin ka han au vak vak a. Chutah zawi muang chuan a rawn hawi a, a hmel ka hmuh chiah chu ka meng phawk nasa kher mai.

A hmai chu a bal em em a, lei a lo kai nuai mai. A kawr hma pawh chu a bal mai pawh a ni lo, a berh hian a berh vek hi a ni mai. Inhlat viau mah ila, a hmel atang chuan a lungngai hle a ni tih ka va hmu thei tlat nia. Chutia pawna awm tir ringawt a, mut san leh daih mai chu thil dik niin ka hre si lo.

Enge ka hriat pawh ka hre lo, ka tlan deuh thut a. Room atang chuan tlan chhuakin pawn ah chuan ka va chhuak ve rawih a, kudam hlui awmna lam chu ka va pan ve nghal. Chu naupang pawh chu a lo la ding reng a, khawpui lah chu a ri dur dur reng bawk.

Thli pawh ala thaw vuk vuk a, a na angreng hle bawk. A bulah chuan ka va kal hnai a, hmeichhe naupang hmeltha leh pangngai tak a ni. A hmel chu ka hmu chiang tawh takzet, mahse a hma a ka hmeichhe naupang hmuh thin tho kha a ni tih chiang takin ka sawi thei bawk.

A hma ah tak chuan ka ding a, kan inen vung vung mai. Amah chu sawi tak ang khan a bal hle mai a, a thawmhnaw te chu a khak hian a khak vek. A mitttui a luang bawk, "Tunge i nih, i hming  min hrilh rawh.." ka han ti deuh tawp a. Ka mitah tak chuan min en kar a, mahse min chhang chuang lo.

"Tunge i hming?" tiin ka han zawt nawn leh a. Chutah fiah felfai tak hian, "Rebecca." a rawn ti ta mai a, ka chil ka lem dawk mai. Mahse hlauh reng ka tum tawh bik lo, "Enge i duh, enge hetah hian i tih? Engthil ti turin nge hetah hian i lo kal, enge i duh chu ni a?" tiin ka han vin telh telh a.

Chutah a lungngai hmel chu thinrimna in a rawn thlak a, mak tak maiin ruah chu thawk leh khatah a rawn sur deuh thut mai a, a tam em em mai lehnghal. A sam huh hnuang mai kar atang chuan min melh kar a, "THUDIK." tih ringawt chuan min chhang a, chutah ring em em hian t(r)ek a rawn tla ri bur mai.

************************************************************

Ka mumang ram atang chuan ka harh chhuak hlawl mai a, khum atang chuan ka va han tla teuh em. Ka mumang vek a lo ni, ka thaw huai mai. Mahse ka thla chu a muang rei lem lo, khum ka han en chu Mary a lo awm tawh reng reng lo. Sana ka en a, zing dar 5 a pel deuh chiah.

Khua pawh ala var kim lo bawk, khum atang chuan ka zuang tho nghal a. Ka hawi kual a, "Mary, bawihte? Mary.. khawnge i awm?" tiin ka au vak vak a, mahse ka hmu zo der mai si lo. Chutah tukverh lam chu ka va hawi a, ka ding chat mai. Mary chu ka va hmu ta, kudam hlui bulah bawk chuan a lo ding ve thung a nih chu.

Rang takin pawnah chuan ka tlan chhuak nghal a, Mary chu ka va pan nghal. Ka va thleng chu a lo ding ngawi reng a, kumdam sira leivung tlem lo awm chu a en vung vung a. KA va en ve a, engmah thil mak vak a awm bawk si lo. A darah chuan ka khawih a, "BAwihte... Mary?" tiin ka han bia a.

Mahse min chhang miah lo, en pawh min en lo.  A melh ngai chu ala melh vung vung mai, "Mar, i tha em?" tiin ka han sawi deuh vak vak a, a rawn phu zawk mai. Min en hu a, "Anu.. eng.. engtik lai khan nge i lo kal a?" a ti bah nuai mai. Mak ti tak hian ka en a, "Mary, tunah zing dar 5 a pel tawk a ni a. Engtik laiin nge i lo thawh hman a, tinge helai hmunah hian i kal?" tiin ka zawt let a.

A mit chu a nuai nauh nauh va, "Zingkarah khan, ihh.... Rebecca-i'n min rawn kai tho va,  tichuan pawnah chhuak turin min ti a. Hetah hian min hruai a, mahse amak lutuk, ding chung khat ka muhil leh daih." tiin min chhang a, ka hrethiam lo kher mai. Nimin tlaiah khan kha hmeichhe naupang kha helai hmunah hian ka hmu a, ka munangah ka hmu leh bawk.

Chupawh helai hmunah tho hian a ni, tunah zing tawh veleh Mary hetah a lo awm ve leh bawk a. Enge awmzia ni ta ang, awmzia chu a nei chiang alawm. "Inchhungah lut ang, hawh.. lo kal rawh." tiin Mary chu ka kai a, kudam bul chu ka han en leh vang vang a, mahse engmah thil danglam deuh ka hmu der mai bawk si lo.

***************************************************

Sunday chawhma chu kan nufa chuan kan inkhawm ve ngei a, ina haw tlang hmasa lo chuan ka in luahna neitu, Pu Siama te inah chuan kan nufa chuan kan peng kawi a. Eng eng emaw sawiin thingpui dawm ho pah chuan a fapa te nen chuan kan titi deuh luam a, chutah kan titi subject chu ka thlak ta.

Thingpui chu ka han lem leh sak a, "Taka Pu Siam, sawlai kan in bula, kudam hlui niawm tak saw enge ni a?" tiin ka han zawt a. A lo nui huk a, "E taka, saw saw maw? In rawn kal hma khan th(r)iah kan tum a, mahse rin ai khan in rawn kal hma leh ta sia, kan thiat ta lo law law a nih kha... tinge, a hnawk viau em ni?" a lo ti nghal zung zung mai.

Ka khi suk a, "AA... hnawk chu hnawk hran love, anih chuan kudam hlui chu a ni tihna em ni?" tiin ka zawt ve leh a. "Ummm a nih saw, nakinah kan thiat dawnnia." tiin min chhang sam leh et mai. Ka han thu tha te te a, "Anih leh Pu Siam, tute kudam thin nge?" tiin ka han zawt leh kher a.

"Aww a luah hmasa tute mawle, an kudam hlui a nih saw."

"Tute nge chumite chu i hria em?"

"Pi THangi te kha an nia, hei hi an inhmun a ni mah thin zawk mawle."

"Anih chuan nangman i lei tihna em ni?"

"AW.... chuan he in hi chu ka chei tha a, tichuan ka dah ruak reng a. NAngni nufa hian in rawn luah leh chiah a, luah lohvin a lo awm rei tawh nen, a lo hlui leh hman deuh tawh mai mai a nih kha."

Ka ngawi deuh vang vang a, "Engtia rei nge ni tawh, a rei tawh viau a nimaw?" tiin ka han zawt leh vel a. A han inngaihtuah vang vang a, "AW... kum 3 vel lai chu a ruak leh hman tawh ang, a khat tawkin kan pafa ho hian kan tidai leh zeuh zeuh zel a." tiin min chhang leh a.

ZAwhna dang han zawh zui leh vak vak chu nuam ka ti chiah bik lo, min rinhlelh ka hlau ve deuh bawk si nen. KA ngawi leh deuh vang vang a, "Tinge, engemaw buaina i tawk deuh em ni, Mahlim?" Pu Siama bawk chuan a rawn ti leh a, ka phu deuh zuk mai.

"Aw..maw, engmaw?" ka ti bah deuh nuai a. A khi suk a,"Aww.. min zawt nasa sia, inchhung velah engemaw harsatna i tawk em ni, thil chhia te a lo awm a ni lo maw?" tiin min zawt leh a. "Aaa... awm love, hriat ve mai mai atan a tha ka tia." tiin ka chhang a.

*******************************************

Tlai lamah chuan kan nufa chuan kan inzui haw hnak hnak a, in chu kan thleng a. Kudam hlui bawk chu ka va melh leh a, "Mary, inchhungah lo va lut rawh." tiin Mary chu ka luh tir a, kudam bulah chuan ka va kal leh a. Ka mumanga a kha hmeiche naupangin enge a duh ka zawh a, "THUDIK." tih ringawta min chhan te chu ka han ngaihtuah let leh a.

Engemaw thil inthup, thuruk inthup chu he inah hian a awm chiang a ni. Pu Siama han zawh vak kha nuam ka ti chiah bawk si lo, kan nufa thil tawn thin te chu sawi ta ila an awih lo nasa dawn ropui mai si a. Kudam bul velah chuan engemaw tak chu ka hmuhchhuah ka inring ta tlat a, a aia uluk zawk chuan ka han en chiang leh a.

VAwi thum vel lai chu kudam chu ka hel chhuak zak a, mahse eng thil danglam mah ka hmu chuang lo. Kudam chu a hlui tawh em em a, a bang te pawh a tla deuh vek tawh a, a awm chhun pawh a keh nuai tawh a ni. A chhung chu ka han bih a, maimawl ril a zam nuai a, a bal em em bawk.

Mahse a ruak vek thung, chhuatah chuan lei a awm nuai bawk a. Eng thil danglam mah ka hmu bawk si lo, ka beidawng lek lek chu a ni e. Kal ka tum a, mahse kudam sira leivung, rah bel vek tawh chu ka han en nawn leh a. Ka va kal hnai a, kudam bulah hian lei a tam hrim hrim bawk.

Thil engemaw danglam a awm tlat hian ka hria, leivung kudam sira mi chu ka han en chiang leh deuh va. A tam zawk chu rah bel vek tawh a ni a, mahse kudam sira lei leh a piah lawka lei te chu awm ho vek si, a rawng a in ang ta tlat lo mai a nih chu. Tichuan rang takin kudam chhung chu ka en leh a, engemaw huam lai te chauh chu lei rawng danglam a lo awm bawk.

Chu lei chu a rawn a tak bik a, lei hnuai ami a nih duh hmel em em bawk. Kudam chhuat pawh lei vek a ni a, mahse a rawng a in ang vek lo tlat. Ka ngaih chu a tha ta chiah lova, chu lei rawng in ang lo leh kudama lei lo awm ve, rawng in ang lo ve tho bawk si chuan awmzia a neih ka ring ta tlat mai.

Kudam chhungah chuan ka lut a, a lai takah chuan lei rawng tak chu a nasa bik a. PAwn lam angin rah bel em em a ni ve lo bawk, a lei chu a hnip angreng hle bawk tih a lang reng. Chu lei rawng tak bik awmna lai chu a hriat bik hle a, a awm sa tawp chu a nih a rinawm loh kher mai.

Inchhungah chuan ka lut a, ka inthlak sawk sawk a. Mary chu roomah chuan lo awm a, lo chhuak miah lo tur chuan ka hrilh a. Tichuan bawngtuthlawh leh suahdur ka la a, kudam lam pan chuan ka kal leh ta. Engvanga ti nge, eng thil nge ka tih pawh hi ka hre tawh lo. Kudam chhunga lei rawn danglam bik, rawng tak bik awmna lai chin chu bawngthuthlawh hmang chuan ka hai phut ta vak mai a.

Tichuan suahdur chuan ka lai ta nghek mai a, ka theihpatawp chuan ka han bei ve ngar ngar a. Hmeichhia lo nih bawk nen, mipa tha ka nei ve si lo. KA hah hma hawp mai, ka thil tih mek chu a atthlak ka tiin ka inchhir hman tep a ni. Mahse ft khat pawh ka lai tling hman dawn emawni, puan var rawn lawr tet mai chu ka hmu a.

Puan var chu ka han en vang vang a, ka pawt vak a. Mahse a thler duai mai, a puan chu a lo mawih ve deuh tawh ni ngei tur a ni. A aia thuk chuan ka han lai leh a, puan chu a aia thui deuh chuan a rawn lawr leh a. Mahse ka pawh veleh chuan a thler zel mai bawk si, tichuan ka lai thuk leh deuh deuh va.

Chutah le, suahdura lei ka han chhun leh chiah chu enge maw hi ka hawlh keh rawk hian ka hria. KA tawp chat a, a sir vel chu ka han hai thuak thuak a. Chutah mihring kut ruh, ruh ro vek hi ka hai lang ta a nih chu. Ka phu nasa lutuk leh ka rap lutuk chu ka au vak a, kudam atang chuan ka tlan chhuak nghal.

************************************************

(DARKAR KHAT HNUAH CHUAN)

Kan inbulah chuan police leh Pu Siama te pafa, tlangval dang engemaw zat leh veng miho thenkhat te chu an awm deuh nual a. Khatia mihring kut ruh ka hmuh khan Pu Siama ka call nghal a, tichuan police te hrilhin tihian mipui an rawn pungkhawm ta vak a ni.

Police te chuan kudam chhunga ruang chu an hai chhuak ta a, ruhro vek a lo ni tawh. Ka va en ve a, thawmhnaw erawh a lo la ha thung. KA hmuh rual rual chuan ka sa nghal pup pup mai, Mary erawh hmuh ve ka phal loh avangin inchhungah Daisy in a lo awmpui thung.

Chu ruang, ruhro ni vek tawh ina a kawr hak chu ka hmuh tawh hnu a ni tlat. Kha hmeichhe naupang, ka hmuh fo thin, Rebecca-i ni ngei tura ka rin, khanu hak thin ang chiah chiah kha a ni. Police Inspector chuan min rawn pan a, hei hi kan thawhpui tho, Isaka a ni.

Isaka chuan min han en vung vung a, "Engtin nge helai hi haina chang i hriat reng reng a, alan dan chuan ruang hi a awm a ni tih hre sa te pawh i ang alawm?" tiin min han zawt a, chhan mai dan tur chu vang tak a ni. Ka thil tawn te chu hrilh ta ila, engtikah mah a awih dawn der mai si lova.

"Aa.. zingtin leh tlai tin deuh thaw hian khulai tlak lam atang khuan ui hi an rawn chho ziah a, helai hi an hai vak vak thin a. tichuan vawiin tlai khan puan them hi an hai tel a, chuvang chuan ka han hai belh mawle, ka ngaih tha lovin...tikhan ka han ti ve ngawt pek a nih kha." tiin dawt ka sawi ta ringawt a.

Isaka chuan a lu a han bu nghauh nghauh va, "Ruang hi a inphum thuk lo hrim hrim bawk a, kum engemaw zat chu a awm tawh hmel." a han ti nuah nuah a. Pu Siama chu a rawn kal a, "Ka pu, kum thum vel kal ta khan hetah hian chhungkaw pakhat chu an cheng tawh a, hei hi an ram a ni thin a. Ka lei a, tichuan in hi chei tha in Mahlimi te hian an rawn luah ta a ni." tiin a rawn hrilh ve bawk.

Isaka chuan Pu Siama chu a en deuh hu a, "Tunah khawnge an awmk anmahni chu..i hre thei angem?" tiin a zawt nghal vat a. Pu Siama chu a han inngaihtuah vang vang a, "Tunah chuan Aizawl lamah an awm ka ring, an insawn leh a nih loh chuan... helai hi chu an inhmun neih kha ania, an phone number pawh ka nei thin a, mahse an thlak ta nge ni, an chanchin ka hre ta miah lo mai." tiin a chhang a.

ISaka chuan Pi Thangi te chu phone turin a ti a, Pu Siama pawh chuan call a han tum chhin a. MAhse a tlang thei hauh lo mai, number chu a thi tawh angin a awm tlat mai a. Isaka bawk chuan, "Enge an chanchin, an chhungkaw chanchin hrim hrim han sawi thuak thuak teh." a han ti leh a.

"Ka hriat dan chuan... keimah tak pawh hi hemi khuaah hian ka awmna a la rei lova. HElai hi kan veng awmna a lo ni lo bawk nen, Pi Thangi leh Pu Lura te nupa pawh kha an inhmun ka lei dawn hnaih vel chauh khan ka hria a. Kei hi sumdawng mi ka ni hrim hrim a, inhmun lei tur ka en lai tak kha a lo ni bawk nen. An inchhungah tak phei chuan ka lut mang lo, vawi hnih thum vel bak ka lut lovang. Kan indawr a, abaka han inkawm zui vakna kan nei lo, an bo hnuah pawh khan a pawimawh chin bak engmah kan sawi ngai lo." tiin Pu Siama chuan a chhang leh a.

Isaka chuan ruang chu a kawk a, "Anih leh saw ruang saw, tu ruang ber nge ni thei ta ang. naupang a nih hmel a, a thawmhnaw inbel atangin hmeichhia a nih ngei hmel bawk. Mipa nge hmeichhia a nih tih leh tunge a nih tih chu kan hre vat thei dawn tho va, mahse tu ruang nge a nih i rin reng reng, a ni thei awm ang tal han sawi teh." tiin a zawt leh a.

Pu Siama chuan a lu a hiat nauh nauh va, "HAn rin tur pawh ka nei lo, an awm loh hnuah khan kan hriat lohvin, tuma hriat lohvin helai hmunah hian a rukin tualthahna a lo thleng tawh pawh a ni thei tho asin, tichuan tah hian ngawi rengin an phum anga, chupawh chu thil thleng thei ve tho a ni." tiin a chhang leh a.

Mahse Isaka chuan a lu a thing a, "Aih, a theih loh. Kum 3 kal ta khan Pi Thangi te chhungkua chu helai hmun atang hian an insawn chhuak a, an chanchin engmah hriat tur a awm tawh lo. Helai ruang, kum engemaw zat lo awm tawh hi, tualthahna a ruka lo thleng, midang daih pawh lo nise. He khuaah hian kum 30 dawn chu ka awm ve tawh a, mibo engmah report leh chutiang khatiang tih vel a awm ka hre lo. Chuvang chuan Pi Thangi te chhungkua chu kan zawn angai, a pawimawh hmasa ber." a ti deuh tlat mai.

Chutah keichuan, "Anih leh Pi Thangi leh Pu Siama te chuan fa an nei em?" tiin Pu Siama chu ka zawt a. Pu Siama chuan min en deuh hu a, "E aw, taka.. nei e, fanu pakhat an nei." tiin min chhang a. "Tunge a hming, ala dam em?" tiin ka lo zawt leh nghal vat a.

Pu Siama chu a han ngawi leh vung vung a, "NGawi teh...mi bo in sawi takah chuan. Pi Thangi te nupa khan helai hmun an chhuahsan hma khan an fanu kha Aizawl lamah an haw tir hmasak thu kha min hrilh tak e, ka hrechhuak zawk mai. Khami hnu khan an fanu kha, helai hmun an chhuahsan hnu khan chin hriat lohvin a bo thut an ti bawk a, a bo hlen ta a ni awm e, chutiang thawm vel chu ka hre deuh ruai ruai mai.. ka hriatrengna hi a chak lo lutuk a.." a ti nuah nuah a.

A thusawi chuan ka beng a verh hle mai, "Tunge an fanu hming chu i hria em?" tiin ka lo zawt leh a. Pu Siama chu a han inngaihtuah leh vung vung a, "Sap hming kha a nei a, a hmingpum chu ka hre tawh lo. RE.. REbecca, aww... REbecca-i a niin ka hria, kum 8 vel a ni bawk." tiin min chhang ta mai a, ka meng phawk chiang kher mai.

**********************************************

Inchhungah chuan ka thu a, tukverh lam chu ka en reng a. Ka malchungah chuan Mary chu thu in phone a en mual mual a, kei erawh kudam an vuak thiah lai leh police ho che tla lai chu ka en reng a, raung erawh zir chian tur leh tu ruang nge a nih hrechiang tur leh zir chiang turin phur bo a ni tawh thung.

Mary hmel chu ka en a, a thla a muan hmel kher mai. Ka aw ka han thian deuh kharh a, "BAwihte, tunah hian kan bulah Rebecca-i chu a awm em?" tiin ka han zawt leh a. Mahse a lu lo thingin, "Tukina ka hmuh bak kha chu ka hmu leh tawh lo hrim hrim." tiin min chhang a.

KA thaw deuh hak a, ka biak chhunzawm tawh lem lo. Chutah DAisy chu kan awmna bulah chuan a rawn phei a, min rawn en deuh hu mai. A hmel atang chuan zawhna tam tak a nei tih ka hre thei bawk, "Enge mi sawi luai luai saw a awmzia?" a rawn ti deuh tawp a.

Kei lah chuan, "Engtia mi sawi maw?" ka lo ti deuh hmuk mai. A thaw hluai a, "Mahlim, enge thil awmzia hi? Rebecca-i maw... ava mak ve. Ani te kha chu i fanu Mary imaginary friend kha  a ni lawm ni, tuna ruang kan hmuh hi Rebecca-i ve tho maw?" tiin min zawt leh hu mai.

KA ngawi vang vang phawt a, "Enteh Daisy, engmah thuchiang ala awm lo. Pu Siama sawi dan kha chuan an fanu hming kha Rebecca-i ve tho ania, Aizawla an insawn hnuin a lo bo daih bawk nen. A rinhlelhawm ta em a, an sawi buai nuai bawk nen, i man chiah lo mai mai a nih kha." tiin ka lo chhang a.

Ka bulah chuan a rawn thu a, "Anih chuan thah a nih ngei hmel a, anu leh pate chuan an that anga, kudam ah sawn an phum ta mai tihna em mawni le?" a han ti leh nuah nuah a. Ka lo khi suk a, "Chupawh engmah hriat chian ala ni lo, polcie te hian hna han thawk se. An chhui chhuak em em ang, keini tan chuan heta lo thut a, an chhui chhuah hun nghah bak tih theih dang engmah kan nei ve hleinem." tiin ka lo chhang leh a.

DAisy pawh chuan min be chhunzawm lem lo, keipawh ka rilru a hah ruk em avang chuan thil dang reng ka ngaihtuah thei mawlh lo a ni e. Pawn lam chu ka va hawi leh a, Isaka leh police pakhat lo inbe mawlh mawlh chu ka en reng a. Daisy bulah chuan, "Thiani, Mary hi lo awmpui leh lawk teh aw.." tih pah chuan pawnah chuan ka chhuak a.

Isaka bulah chuan ka va phei a, "Isak, ka lo be lawk thei che angem, a falin?" tiin ka han zawt a. Ani pawh chuan a lo rem ti a, kan kal hrang ta deuh va. Isaka chuan min han en a, "Enge ni ta?" tiin min zawt a. Ka han thaw deuh hak phawt a, "Enteh, midang rinhlelh ka nei a ni." ka han ti chu a meng phawk hru mai.

"Eng a? Tu chu maw?" tiin min zawt nghal a. "Engtin nge ka sawi tan ang pawh ka hre lo, nimin tlai khan pa pakhat, pa tawi te mai, kum 45 vel ni awm tak hi tlaia kan nufa a kan haw khan kan in bulah hian a lo tei thuak thuak a. Tunge a nih ka va zawh chuan a hming tak chu min hrilh lova, mahse he ka inluah mek ah hian Pi Thangi te awm lai khan a len ziah thin thute a sawi a, Pi THangi te in tho amaw ala ti pawh a ni maithei a ni." tiin ka chhang a.

Isaka chu a han ngawi deuh vang vang a, "Anih tinge i rinhlelh chhan? A hmelhriat hlui emaw, an thianpa hlui te pawh a lo ni maithei a, tinge i rinhlelh kher a?" tiin min zawt let daih mai a, chhan dan tur a vang khawp mai. Rebecca-i hming chu ka lam ri leh teuh khawp mai, "AA... englo ania. Amah tak chu Champhai khua angin a insawi a, hna avanga hemi khua a lo awm zuai angin a insawi bawk a. Mahse engemaw hlauhna riau a nei tlat khan ka hria a, ka zawh thui zel lah khan min chhang tha lo tial tial a, a hnuah phei chuan a kal daih a... ka ngaih a ti tha lo deuh mawle.." tiin ka chhang leh ta tawp a.

A lu a bu nghauh nghauh va, "Engpawh chu nise, chupa chu hemi khuaah hian ala awm angem?" tiin min zawt leh a, "KA hre bik lo, nimin mai kha ania, ala awm mahna.." tiin ka chhang a. "Umm, chupawh chu kan bawh zui ang. Tunah chuan ruang kha tu ruang nge a ni tih hriat chhuah angai dawn a, a harsa viau thei a, a awlsam viau thei bawk. Pu Siama pawh zawhna la zawh tur ka ngah mai, nangpawh lo chhuak bo lo la, he case zawh hma hi chu biak reng theih a i awm angai dawn ania." tiin min hrilh a.

Police dangin an rawn koh avang chuan min kalsan a, ka bulah chuan DAisy chu a rawn kal leh a,  Mary chu a rawn kai phei bawk. Min rawn en leh hu a, "Enge in lo sawi a?" tiin min rawn zawt a. Ka thaw deuh hak a, "Daisy, zep miah lovin i rilru dik takin min chhang ang che aww.." ka han ti a.

Mak tih hmel tak hian min en a, "Eng thilah chuan maw?" a ti hu mai. A mitah tak chuan ka en a, "MAry imaginery friend hi a hming chu Rebecca-i a ni a, tuna ruang kan laih chhuah hi a hming Rebecca-i ve tho niin kan ring a, kan ring dik a nih chuan... lo ni tak tak ta se, ka fanu MAry imaginery friend nen hian thuhmun an nih i ring em?" tiin ka han zawt ve reng reng chhin a.

Min en vung vung a, chutah a rawn nui chhuak huk mai. A thaw deuh hluai a, "Mahlim, nangpawh hi thil hi i ngaihtuah nasa mah mah thin a ni. Inti hah lutuk suh, tunah phei chuan hei, i in bulah ruang an lai chhuak nawlh mai bawk si a. KA ngaihtuah teh mai che ania, tiang khan zeldin thui vak zel suh, inchhungah rawn lut phawt mai teh." tiin inchhungah chuan a lut daih a.

Ka thaw hak ringawt, thudik tak phei chu hrilh ila min awih lo nasa dawn mai si a. Rilru hahna hlir a thleng chhunzawm mawlh mawlh reng mai bawk nen, ka chau takzet zet tawh a ni. Mahse ka tlawm mai dawn lo, he kan nufa chunga thil thleng hi, enge awmzia, enge a bul ber, thudik chu enge a nih ka zawn chhuah hma chu ka fanu nen hian helai hmun hi chhuahsan ka tum lo bur a ni.

**********************************************

TO BE CONTINUE