REBECCA (MIZO FICTION HORROR STORY) Written by : Aaron Malsawmdawngzuala WARNING : 18+ CHAPTER : `5

 REBECCA

(MIZO FICTION HORROR STORY)

Written by : Aaron Malsawmdawngzuala

WARNING : 18+

CHAPTER : `5

***************************************

RUATFELI THIL TAWN :

Tlai ah khan an school bang kha ka va lam a, Rebecca-i chu a be phei leh mawlh mawlh a. Tichuan inah ka luhpui a, a tawng mawlh mawlh pawh chu engah vak ka ngai lem lo. Ka thawmhnaw suk te chu ka chingfel a, inchung lamah ka chho va. Min lo zui ve zel a, Rebecca-i a tih chu a be char char bawk.

Tichuan i rawn haw a, i rawn chho ve ngei bawk a. Mahse rei lo te ah i chhuk leh nghal a nih kha. Khatih lai khan bal bawm dang la turin Mary chu ka tir a, "Rebecca-i'n kal a phal lo.. amah khan zu la rawh se a ti." tiin min chhang a. A uang turah ka ngai a, "Zu la mai mai teh.. ka hmanhmawh ania." tiin ka vin deuh lek lek a.

Mahse a bula engmah awm lo chu a en vung vung a, tichuan min rawn en leh a. Inthlahrung tak si hian, "REbecca-i'n ka kal a phal lo, nangmah zu kal mai rawh." tiin min chhang leh a. Ka thinrim insum zo lo chuan, "Rebecca-i chhuanlam a ngai lo, awm pawh a awm tak tak lo. I kal peih loh vang a nih kha, u te thu i awih lo emai, i nu bulah ka sawi ngei ngei ang." tiin ka hau hrep a.

Tichuan lehlam ka hawi hmak a, puan chu ka seng chhunzawm leh a. Mary chuan zawi sap hian, "Ka kal peih loh vang a ni lo, Rebecca-i hi a awm tak tak.." a ti leh a. Ka nui lui vak vak a, "A nih chuan rawn inlan se, min rawn nam thla daih rawh se... a awm tak tak a nih chuan.." tiin hawi pawh ka hawilet duh lo.

Chutah Mary chuan ring tak hian, "Nilo, Rebecca.. ti suh." a ti vak a, ka lam pana rawn tlan phei ri dawt dawt thawm hi ka hre bawk. Lehlam ka hawi chiah a, MAry nen khan pen 10 vel dawn laiin kan inhlat ang. Mahse ka taksa ah hian min nam tu an awm a ni, hmuh theih si loh hian min nam a ni.

Tichuan ka tla a, ka lu ka sawh a. KA lu a hai em em a, ka hnang awl awl bawk. Tichuan zangthal zawngin ka mu a, min rawn buaipui lai khan inchung lam kha ka la melh reng a. Mary chuan min lo en reng a, kha tah tak khan hmeichhe naupang, kum 8 mi vel, Mary bulah khan a rawn ding a ni.

Mary kha a kutah a kai a, Mary khan a en let ve bawk. Mary hmel erawh hlauhthawnna in a khat tih ka hmu thei a, mahse kha naupang, REbecca-i ni ngei tur khan hmuhsit hmel takin min nuih a ni. Reilote hnuah amah zawk chu a kal sawn a, Mary erawh chuan min la en reng thung.

***************************************

Ruatfeli chu a tap deuh pur a, "Anih chumi hnu chuan Rebecca-i chu i hmu em?" tiin ka zawt a. Ruatfeli chuan a lu thingin, "Aih, hmu tawh lo. Mahse tukin ka harh chhuah hnu pawh khan ka mitthla ah a cham reng a, nizan ka mumangah pawh ka mang tel alawm." tiin min chhang a.

KA ngawi vang vang a, "Ruatfel, kei.. keipawn ka hmu a ni." ka han ti chu a meng phawk nasa kher mai. Min en hru a, "Tak tak maw, Rebecca-i i hmu ve maw?" a ti hu mai a, a thaw leh deuh halh halh mai. Ka lu a bu nghat nghat a, "Aw.. vawi khat aia tam ka hmu tawh, ka hmu fo tawh alawm." tiin ka chhang a.

Ruatfeli chuan mak tih hmel tak hian min en a, "Khawiah, engtik ah? Tinge a awm tak tak tih i sawi loh, mawhhh?" tiin a tap nghal tuau mai. A kutah chuan ka vuan a, "A thla ka hmu tawh a, hla deuh atangin ka hmu tawh bawk. Ka hmu tih pawh a inhria, Mary bulah pawh a sawi a ni." tiin ka chhang a.

A mangan hmel khawp mai, "Nu Mahlim, engtin nge kan tih ang? Kei chu ka hlau ania, engtia tih chi nge?" tiin a inhnit hlawp hlawp a. Ka lu ka bu nghat nghat a, "Rebecca-i hi thlahrang emaw, ramhuai emaw, thlarau emaw, mihring pangngai pawh nise...ka biak ngei angai." ka han ti chu Ruatfeli chuan min en leh ta hu mai.

"Engtin nge i biak anga?"

"Ka hre bik lo, mahse hetiagn renga awm chuan kan tan a hlauhawm thei. Mary tan pawh a hlauhawm, chuvang chuan kal bo tura ka ngen a ngai a ni."

"Chutiang... engtin nge i tih theih ang?"

Ka han ngaihtuah vang vang a, "MAry... ka fanu Mary thiannu alawm. Mary atangin kan be thei ang, kan tum dawn alawm." tiin ka chhang a. Mahse Ruatfeli chuan a lo duh lo kher mai, "Aih, ka be ve dawn lo. KA hlau, a hmel kha ka hmu ngam tawh lo.. chubakah Mary chu engtin nge i tih vak chuan anga, i dil dawn em ni?" tiin min zawt daih mai.

KA luhlulna leh ka huaisenna chu sawm khawmin ka insehruh a, "Ruatfel, i tel ve a ngai lo. Mary nu, anu ngei ka awm alawm. Ka la dam alawm, keiman Rebecca-i chu ka bia ang. Ka be khawp ang, tichuan min kal bo san ngei bawk tur a ni." ka han ti chang deuh fak fak a, Ruatfeli chuan min en reng ringawt.

*****************************************

Darkar reilote hnuah chuan Aizawl atangin chanchin kan hrilh hnuah Ruatfeli nu, ka Nu Rami chu a lo thleng a. Ruatfeli chu a awmpui chhunzawm nghal a, kei erawh MAry ka biak duh avangin chhun dar 1 velah chuan MAry chu in lam panin ka haw pui ta daih a.

In chu kan thleng a, room ah chuan Mary chu ka ko lut a. NGawi reng chuan khumah a thu ran mai, kei erawh ka huaisenna ka sawm khawm leh mek a ni. KA rilru a buai hle mai, engtia han tih chi nge maw ni dawn ni? Rebecca-i chu MAry kohchhuah tir tum ringawt chu a atthlak viau angem, a fuh ber angem ka hrethiam bawk si lo.

Pastor te hi koh mai chi zawk em, ramhuai thiltihtheihna lam te a ni mial angem? Nge Rebecca-i hi thlahrang a lo ni zawk, Mary hian ko chhuak tak tak ta se, rawn inlan tak tak ta se. Kei hi hlauvin ka khur chhe leh mai si angem, ka rilru a va han buai tak em. Mary lah chuan zawhna ka zawh hun nghakin min lo la en kar mai a, ka han thaw hak a.

A hma zawnah tak chuan ka ding a, ka en vang vang a. Hlauh hmel tak hian MAry chuan min en kar a, "BAwihte, khawnge Rebecca-i chu tunah a awm?" tiin ka zawt deuh tawp mai. Mary chuan ka hnunglam chu enin a han thlek deuh vak a, "Saw ta saw a ding." tiin wardrobe chu a kawk a.

Ka leh hawi nghal a, mahse tumah ka hmu ve lo. MAry chu ka en leh a, "Tumah an awm lo saw.... khawiah nge a awm sawi tha rawh." tiin ka vin deuh lek lek mai. Tah chhuah hmel tak hian, "A awm reng alawm, anu. I hmu ve thei lo a nih kha, dawt ka sawi lo." a ti tham tiak mai.

Mahse ka thinrim laklawh tawh tlat, "Mary, engvangin nge ka hmuh ve theih loh? NGati nge ka lak atang hian lak hran che a tum, tinge i nu aia REbecca-i hlir i buaipui tak a? MAwhh... i tan Rebecca-i hi engti fakauva pawimawh nge a nih a?" tiin ka vin ta hrep mai a.

Chutah room banga ka pasal Rempuia nena kan inneih thlalak chu a rawn tla keh chuai mai, ka va han phu nasa tak. Rang takin ka hawi let nghal a, ka ding zawk mai. Mak ka ti takzet, MAry chu ka en leh a. Mittui tling teuh chung hian, "KA tih a ni lo, Rebecca-i tih a nih kha." tiin a inhnit feih feih mai.

KA thin a phu dup dup a, room chu ka han melh kual a. Mahse tumah ka hmu ve der mai si lo, "Anih..tunah hian room chhungah hian ala awm em?" tiin Mary chu ka zawt leh a. Mary chuan ka piah lawk chu a melh a, "Aw.. tuna i thusawi pawh kha a hre vek." tiin min chhang a.

KA bul vel chu ka en a, mahse engmah ka hmu ve thei der mai si lo. Mary lah chuan ka vei lam a engmah awm lo chu a en vung vung a, min ti hlauthawng zual tak zet. Mahse ka luhlul chu ka chhuah ve tlat a, "Tunah khawilaiah tak nge a awm?" tiin ka zawt leh ngat a.

Mary chuan hreh hmel tak hian, "I bulah." a ti zawi sap mai. Ka bul hnai chu ka en a, engmah ka la hmu ve chuang lo. KA chil ka lem dawk a, "Mary, room atang hian chhuak rawh." ka ti a. Mary chuan mak tih hmel tak hian min en hu a, "Engmaw, ka ti maw?" a ti bah nuai mai.

Vin lek lek hian, "Chhuak rawh, mahse pawnah lo chhuak reng reng suh ang che. Chuan tunah hian Rebecca-i hi ka bulah ala awm a nih chuan room atanga chhuak ve lo tur hian hrilh rawh, biak duhna ka nei a ni." ka han ti leh a. Hreh hmel tak chuan MAry chu khum atang chuan a tho va, muangchang chuan a kal a.

A chhuah dawn tepah chuan ka veilama engmah awmlo bawk chu rawn en leh in, "Lo chhuak ve suh aw, Rebecca... anu in a be duh che." tiin kawngka chu a khar a. Kei erawh ka la ding ngawi reng, room chhung chu a reh hian a reh tlawk tlawk mai. Ka hawi kual a, ka zam takzet.

*************************************************

Thawk ka han la te te a, "Rebecca... i hming chu engpawh lo nise.. khawiah nge i awm, rawn inlan rawh." tiin ka au vak vak a. Mahse engmah thawm a awm lo, a la reh diak mai. Ka hawi kual a, "I va dawihzep ve, lo inlan ta che." tiin ka han cho leh a. Mahse thawm engmah ala awm chuang lo, chhanna ka la dawng lo tlat.

Ka thinrim tawlh tawlh mai, "Ka fanu hi ka lak atang hian ruk bo i lo tum ve em ni, engtikah mah ka thlen tir ngai lovang. Ka fanu hi ka ta a ni a, engtikah mah min lak sak lovang." tiin ka han ang leh bawrh bawrh a. Thawm engmah chu la awm chuang lo mahse boruak chu a rawn lum deuh pup hian ka hria, a danglam tan tlat.

Ka han nui lui vel sak a, "Min hneh thei turah i lo inngai vel ange, puitling ka nih hi. Nu ka nih hi, nang naupang mai mai khan ka fanu hi min laksak lul lovang tih hre rawh." ka han ti leh vak vak a. Chutah parda chu a rawn che ta zeuh mai, ka va hawi phei vat a.

Mahse a reh lehnghal daih a, thil danglam thleng dang engmah a awm leh tawh lo. Kei lah chu engtin emaw tak chuan ka phur chho tan a, "Kan nupa thlalak i ti keh a, khazawng kha em ni i theih? Naupang ila ni miau alawm, kei hian ka hlau chhe te eih lo che tih hre rawh." tiin ka han rak leh hrep a.

Chutah room kawngka chu amah chuan a inhawng phut mai a, ka phu nasa kher mai. Chet mai ngaihna pawh ka hre lo, ka ding ngawi vung vung ringawt. Chutah tu emaw chhuata tlu bawk thlawp ri hi ka hria a, ka fanu MAry t(r)ap ri ka hriat chhunzawm nghal bawk.

Rang takin room atang chuan ka tlan chhuak nghal a, Mary chu chhuatah chuan a lo tlu a. A lo tap bai bai mai, ka va tlan vat a. Kaih thawh pah chuan, "Bawihte, tinge.. enge awmzia? A na em?" tiin ka be nghal mawlh mawlh a. A kiu a lo pil lehnghal, "Engtin nge i tluk theih a?" tiin ka zawt leh a.

Inhnit hlap hlap chung hian, "Re... Rebecca-i, Rebecca-i'n min nam thlu." tiin min chhang ta mai a nih chu. Ka thin a rim rual rualin ka la hlau tho, a chhan chu he Rebecca-i, kan hmuh ve theih miah loh hi a awm tak tak a ni tih ka hre chiang em a ni. Ka hawi kual a, "Khawnge tunah, khawnge a awm?" tiin ka so bulh bulh mai.

Mary chu a hawi kual ve a, a hmu mai bik lo ni tur a ni. A zawng kual ve ruai a, chutah kawngka pui chu a ri bur a. KAn nufa chuan kan phu zawk mai, kan hawi rual nghal thawt a. Kawngka pui chu a inhawng ri bur a, chuveleh Mary chuan ava kawk nghal.

Thaw hlawp hlawp hian, "Anu.. saw, saw a tlan chhuak daih, pawnah.." a tih veleh chuan ka tho nghal a. KAwngka chu ka kalh a, chhunglam atang chuan ka kalh nghal daih a. MAry chu ka va kuah nghal a, "Tikhan ala awm em, mawh... BAWihte, Rebecca-i chu ala awm em?" tiin ka zawt leh a.

Tap tuau chung hian Mary chuan, "Aih, a awm tawh lo. PAwnah khan ala awm, inchhungah chuan a awm tawh lo." tiin min chhang a. Ka thaw huai mai, chhuatah chuan ka thu hnawk a. Ka fanu Mary chu kuah in ka pawm vawng vawng mai, ka chau hnawk thei nia mawle.

Mahse Mary chuan min rawn nghawk leh det det a, "Anu.... saw.. saw min lo en." tiin tukverh lam chu a kawk a. Choka bul tukverh lam ka va hawi chu ka va phu nasa tak em, Parda kan zar thla ah chuan hmeichhe naupang thla, a hma a ka hmuh thin ang tak mai chu a lo ding run mai a nih chu.

Ka ding nghal a, Mary chuan ka kawr hnung chu vuanin a biru nghal. Muang chang chuan choka lam chu ka va pan a, hmeichhe naupang thla chu ala ding reng. KA kal hnai zel a, ka kawr hnunga vuan reng chung chuan Mary chuan min rawn zui ve zel bawk a.

Choka chu ka thleng a, chemte pakhat ka hum nghal bawk. Tichuan tukverh lam chu zawi muang chuan kan nufa chuan kan pan hnai zel a, lungphu a rang duh khawp mai. Ka thlan fim a tla zawih zawih a, ka hlau ve tho bawk si. Tukverh chu kan hnaih zel a, hmeichhe naupang thla pawh ala ding reng, a la che sawn eih lo.

Tukverh zawnah tak chuan ka ding a, chemte chu ka hum nghet sauh sauh va. Ka zam ve angreng kher mai, ka ban chu ka lek chhuak a. Thawk ka han la te te a, chutah parda zar chu ka han hlim thut a. Chemte chu ka lek kang nghal bawk, mahse ka tawp nghal chat.

A chhan chu khawia hmeichhe naupang mah pawn lamah chuan ka hmu lo, a lo bo daih mai a nih chu. Mary chu ka en a, ani pawh chuan mak a lo tih ve hmel khawp mai. "MAry, khawnge a awm, i hmu thei em?" tiin ka zawt deuh tawp a. Mahse tun t(r)um chu a lu a thing ve ta tlat mai, "Aih, ka hmu lo." tiin min chhang ve tlat mai a nih chu.

Ka hlauthawng khawp mai, "I hmu lo maw, anih parda phena a thla kha i hmu ve tho tiraw?" tiin ka zawt leh a. A lu a lo bu nghauh nghauh va, "Aw...mahse parda i hlim chiah khan a bo daih." tiin min chhang leh a, kan hmuh dan a in ang ta reng mai. KAn ngawi dun reng ringawt a, ka thin lah chu a phu dup dup mai si.

Chutah kawngka a rawn inkik thut a, ka va han t(r)e chhuak teuh kher em. Ka phu nasa lutuk ringawt, kawngka pui lam chu ka va hawi nghal a. Ka va hawng ngam mai lo, rilru ah Rebecca-i bak a awm lo. Chemte chu ka han hum nghet leh sauh sauh va, "Tunge ni?" ka han ti vak a.

Mahse tuman min chhang lo, "Tunge ni ka tih chu?" ka han ti leh vak a. PAwn lam atang chuan DAisy aw ni ngeia ka hriat chuan, "Keimah DAisy, nga ti vak vak nge?" a rawn ti lauh lauh mai. KA thaw huai a, ka va hawn sak a. Daisy chu a lo ni tak tak a, mak tih hmel tak hian min lo en kur mai.

******************************************************

DAisy leh ka fanu MAry te chu sitting room ah chuan an awm a, DAisy chuan a phone a en pui a. Kei erawh chuan rawng ka lo bawl thung, Mary pawh chuan ngawi rengin a nu Daisy phone chu a en ve mial mial a. A khat tawkin Daisy chuan a mit sirin min arwn melh leh zeuh zeuh thin tih pawh ka hre reng, mahse ka hre lo lui tlat a.

A thaw hak a, "I tawng tha duh bawk si lo, i awmdan hi ngaih a tha lo riau mai. Enge i ngaihtuah a, harsatna dang i tawk leh ta em ni?" tiin sitting room atang chuan min rawn bia a. Ka lo nui lui sak a, "Kei te chu ka awmdan hrim hrim alawm, i ngaih ka ti tha lo deuh reng alawm." tiin ka lo chhang a.

Ani pawh chu a khi ve suk a, "Mahlim, tunlai hi i buai em vang nge ni.. i tla dawk dawk ania. I hmel te hi a dik tawh lo, dark circle i nei reng ang tluk a ni. I thu tawlh tawlh lehnghalin ka hria, tiang reng chuan i hriselna in a tuar dawn." a han ti leh a. Ka rawngbawl lai chu ka han chawl deuh dat a, "Anih engtin nge ka awm vak anga?" tiinka han zawt ve deuh kher a.

Daisy chu a han thaw deuh hak a, "I harsatna te hi a vaiin min hrilh ve la, puih theihna che ka nei maithei asin. Ngaih i ti tha lo zual telh telh alawm, a ni telin i danglam tulh tulh maiin ka hria." tiin min chhang a. KEi lah chuan, "Harsatna vak pawh ka nei hleinem, hei ka thil tawn mek chu i hriat hi... ka fanu in an classmate kut a lo thlak a, imaginery friend neiin a be reng bawk a, keipawh min ngaihsak duh tawh lo. Chutah kan nau Ruatfeli a lo inhliam bawk nen, rilru hah lo turah min ngai a mi?" ka han ti leh hram a.

"Awww chutiang lam ka sawi hleinem. Khate chu ka hre ve tho va, mahse thildang thup i la nei alawm. A vaiin min hrilh vek lo tih hi ka chiang, i awmdan atangin a hriat vek."

"Enge maw ka han thup vak ang le, ka mu tha lova, ka rilru a hah a, a chhan pawh i hria. Tiangte chu tupawn tawk se, ka awm ang hian an awm ve vek ang chu."

"Aih... thildang a awm chiang alawm, i awmdan leh i chetdan hi tunhnai deuh atang khan a inthlak thut alawm."

"Enge a inthlak bik vak na, engtin vak nge ka chet a?"

Daisy chuan min rawn melh deuh hraw a, "A tir berah chuan maw, damlo an rawn zawn luh khan.. i au vak a, hlauh nei ang maiin.. kha ta tang khan i awmdan a mak tulh tulh alawm. I melh ngai melhin i ngawi leh vung vung thin a, i mu tha ngai lo tih hriat takin dark circle i nei reng bawk. Chuan canteen ah khan, thil mak deuh hmu nei ang maiin pawn lamah khan i va kal phei a, ka auh vak vak che pawn i hre thei bawk si lo. Engemaw dik lo chu a awm alawm, i taksa a chauh mah mah tawh nge, engkim hi min hrilh ve la, i thiannu ka nia ka pui em em ang che." a han ti deuh duah a.

A sawi dik ve reng, chhan ngaihna ka hre lo. Rawng chu ka bawl chhunzawm mial mial a, ka chhang tawh lem lo. Daisy chu a han thaw leh hluai a, "Tunah phei chuan Ruatfeli a damlo lehnghal a, i chau zual dawn lutuk. Inngaihtuah chiang la, eng harsatna pawh lo tawk la, nangmah chauhva tawrh tlang tum lovin i thiannu ka awm ve reng tih hi hria la, ka pui hreh miah lo che ania." a han ti leh a, ka chhang zui ta chuang lova.

*********************************************

Daisy chu ala leng reng a, MAry nen chuan an inkawm hlim tawk fu mai. Keipawh chuan rawng chu ka bawl zo tep tawh a, tukverh lam ka va melh zeuh chu hmun dang ka hawi sawn tawh lo chiang kher mai. Pawna kudam hlui, bang keh rum leh chung pawh nei tawh lo, a chhung ruak vek bulah chuan kha hmeichhe naupang bawk kha a lo ding leh kur tawh a nih chu.

KA thin a phu leh nghal dup dup mai, ka thlan fim pawh a rawn tla leh tan nghal der tawh. A aia chiang zawk chuan ka han en a, tukverh ah chuan ka dak chhuak hial a. Ka mit vai a ni hauh lo, ka hmu chiang lutuk tlat. A hma a ka hmuh tho, kha hmeichhe naupang tho kha a ni.

Ka fanu in a sawi fo thin, Rebecca-i a tih thin kha a nih ngei pawh ka ring. Ka en vang vang a, ani pawh chuan min rawn melh ve reng bawk a. Ka hlauhna leh ka huaisenna a inzat vel ang ka ring, ka en lui ve ta reng a. Chu naupang chu a che sawn eih lo, "Rebecca..." tiin keima hriat tham lek chuan ka phun sap a.

Hnunglam, sitting room lam ka va hawi a. Daisy leh Mary chu an lo la inkawm hlim dun nasa mai, Mary pawh chuan hmu ve lo law law se ka duh. Tukverh lam chu ka va hawi leh a, chu hmeichhe naupang chu a lo la ding reng a, min lo la en reng bawk. Parda chu ka zar tha mawlh mawlh a, "Pawnah ka va chhuak lawk, lo awmpui rawh MAry kha.." tih leh pawn a chhuah chu ka rual nghal a.

MAhse kudam bul ka va thleng chu tumah ka hmu leh tawh lo, ha hmeichhe naupang kha a lo bo leh hman daih tawh. Ka hawi kual ruai a, han auh vak mai kha ka duh hial. Ka zawn kual ngial hnuah pawh chuan khawia hmeichhe naupang mah hmuh tur a awm lo, ka lu chu ka dawm vawng vawng ringawt.

Chutah ka darah chuan kut vawt thlur mai hian min rawn khawih thut a, ka va han phu nasa tehreng em. KA t(r)e thawt a, rang takin ka hawi let a. Daisy a lo ni reng mai, ka thaw huai a. A bulah chuan Mary a lo awm ve bawk, "Enge i tih a, tinge i tlan chhuah phut a?" tiin min zawt a, min en hu mai.

Chhuanlam han siam mai tur pawh ka hre lo, "Ihh.. englo ania, rul.. rul mawle, rul ang deuh ka hmu a, mahse ka lo hmuh sual alawm mawle." ka ti bah deuh nuai mai. Min en vang vang a, "Rul that tura chhuak si tinge engmah hmanrua pawh i ken si loh?" tiin rinhlelh hmel tak chuan min han zawt leh a.

Tih ngaihna ka hre lo chu ka nui suk ringawt, "Aa... helaia hmawlh vel hian ka thah theih mai ka ring mawle, tereuhte angin ka hmu a." tiin dawt awihawmloh lutuk tak mai chu ka han phuah kual leh ta ringawt a. A thaw hak a, "Hawh u, lut ang u." tiin kan inzui lut ta hlawm a.

*******************************************

DAisy haw hnu chuan in chu pawn lam atang chuan kan kalh a, kan nufa chuan chaw ei hma chuan dawrah kalin mamawh tur eng eng emaw chu kan lei kual a. A khat tawkin Mary bulah chuan Rebecca-i a awm leh awm loh chu ka zawt deuh sek a, a awmloh thu hlir chuan min la chhang a.

Ka zawh reng nachhan chu kan bul hnaiah a lo awm leh reng ang tih ka hlau a ni, mahse tun ang tawh pawh a tuma puihna ka la dil lo leh, mipa tak ngial pawh ka la hrilh miah lo chu keimah tak pawh huaisen ka inti ru ve khawp mai. Reilote hnuah chuan kan haw leh a, mahse in kan thlen hma chuan kan inkawta pa pakhat, bag ak hi a lo ding a. 

Kan in chu a lo thlek deuh du du mai, ka ngaih a tha vak lo. Mary chu kaiin ka kal chak pui deuh va, kan in bul kan thlen veleh chuan chupa chuan min rawn hmu a. A hmel en chuan kum 45-50 vel laia upa a nih duh hmel, pa tawi lam leh hang lampang a ni bawk.

Inthlahrun hmel tak hian, "Helai in hi in in em ni?" tiin min zawt a. "Aw ni e, enge ni ta?" tiin ka lo zawt let a. Min chhang mai lo chuan kan in chu a han thlek leh vung vung a, "Aa... hetah hian Pi THangi te kha an awm thin a. An in ala ni em le, inchhung hnai te an ni em?" tiin min zawt leh a.

Ka hrethiam lo kher mai, "Eng a? Pi Thangi a, chu chu tunge?" ka ti hu mai a. A khi deuh suk a, "Aa.. a rei tawh mai, hetah hian an awm thin a. Hemi khuaa ka awm lai hian ka leng ziah a, engtik laiin nge maw an lo chhuahsan daih ni... min hrethiam teh." tiin kal a tum nghal ringawt a.

Mahse ka ko ding a, "Ka pu, tunge Pi Thangi chu min hrilh teh. Helai hi kar hmasa vel atang chauh khan kan luah a, midangin a hma in an lo luah fo tawh tihna em ni?" tiin ka zawt leh a. A ngawi vang vang a, "Aa.. an luah fo tawh em chu ka hre lova... mahse Pi Thangi te nupa kha chuan an luah thin tih ka chiang, a bak engmah ka hre lo." tiin min chhang leh a.

"KA pu, a nih leh nangmah hi khawi khua nge?"

"Kei chu Champhai khua ka nia, hemi khuaah hian hna neiin ka awm thin a.. ngatan nge min zawh a?"

"Pi Thangi te nen chuan engtia inhmelhriat nge in nih?"

"Aa.. an pa nen kan thawk dun thin a... ka leng thin a, mahse kei kha t(r)ulna avangin kan khuaah ka haw leh ta daih a, khata tang khan ka kal leh ta miah lova."

"Tunah tinge i lo kal leh, eng ti turin nge i lo kal a... i rawn tlawh mai mai em ni?"

"Aw a nih hi, lo awmna thin te a lo ni bawk nen, Pi Thangi te pawh chu an la awm takin tiin ka rawn dak vel mai mai mawle, min hrethiam dawnnia."

Kal leh mai chu a tum a, "Leh lawk, ka pu. Pi Thangi pasal nen chuan eng hna nge in thawh thin a, chuan an phone number te i nei lo em ni?" tiin ka han zawt leh a. A ding deuh dat a, rawn hawiletin min nuih suk mai. A aw a han thian deuh kharh kharh a, "An number ka neih loh vang alawm hetah ka lo kal, chuan eng hna nge kan thawh tih thleng thleng chu ka hrilh che a tulna ka hre lo." min tih khum deuh hmak mai.

Ka ngawi vang vang a, "Anih leh hmeichhe naupang, Rebecca-i tih hming pu an cheng tawh em, hetah hian... chu chiah chu ka lo zawt leh che?" ka han ti leh hram a. Chutah a hmel chu a rawn danglam nghal vek, hlauhna namen lo ka hmu thei a ni. Phawk hru hian min en a, "RE..Rebecca-i a?" tiin a khur titih nghal hialin ka hria.

Keilah chuan, "Aw.. Rebecca-i, naupang kum 8-10 mi vel... cher lampang, i hre ngai em?" tiin ka zawt nawn leh a. A chil a lem dawk a, "Aih, ka kal dawn... zawhna min zawt tawh suh." tiin a kal nal nal mai a, ka ngaih a ti tha lo kher mai. Rebecca-i hming ka sawi veleh khan a hlauh hmel em em a, khapa khan engemaw tak chu hriat a nei chiang a ni.

"Ka pu, ka pu lo ding teh." tiin auh let ka tum a, mahse a ding duh tawh thak lo. A kal chak tulh tulh a, taxi lo tlan lai chu a phar a. A tlan ta nghal daih mai a, ka en zui vawng vawng ringawt. Enge awmzia ni ta ang, khapa kha tunge ni ta ang? A hming tal ka lo zawt lo kha ka va han a tak, engtin nge ka hmuh leh theih ang?

Rebecca-i hming ka lam khan a hmel kha a inthlak danglam nasa lutuk, a rapawm lek lek zawk. Ti em em a patling hlau hmel kha ka la hmu lo, a thlan kha a rawn tla nghal deuh bawrh bawrh mai khan ka hria. Engemaw tak chu a hria a ni, khapa kha ka hmuh leh ngei ngei a ngai a ni.

Tichuan he ka in luah mek hi Pi Thangi te nupa chuan an lo luah tawh thin tih a ania, mahse engtik hunlai vel kha nge ni ang, a rei tawh em? An la dam angem, khawnge tunah an awm tih lah engmah ka hre ve der mai bawk si lo. Rilru hah ava ti zual tak em, Rebecca-i hming ka lam rik a khati khawpa a hlau a nih chuan Rebecca-i hi a lo hmu ve tawh thin tihna a ni thei mai angem?

Kha pa kha zawn chhuah leh ka duh a ni, engemaw hriat a nei tlat a ni. Pu Sawma, ka inluah neitu kha midangin an lo luah tawh thin em, thil engemaw duhawm loh deuh he inah hian a lo thleng tawh em, engmah zawh nachang ka lo hre bawk si lo. HE ka in luah hi hman atangin a lo hrang tawh nge, he in hian thuruk mak tak a nei zawk?

**************************************

TO BE CONTINUE