REBECCA (MIZO FICTION HORROR STORY) Written by : Aaron Malsawmdawngzuala WARNING : 18+ CHAPTER : `1

 REBECCA

(MIZO FICTION HORROR STORY)

Written by : Aaron Malsawmdawngzuala

WARNING : 18+

CHAPTER : `1

***************************************

In lian lem lo tak, hlui ve angreng tawh tak leh kawt zawl nuam tak nei a ni a. Aizawl atanga darkar 4 meuh kan tlan vang vang hnuah chuan kan in thar luah tur chu kan thleng ve ta, luah loh rei tawh tih chu hriat viau mahse kei ang mahni a fanu mal chawm ve tawk tawk tan chuan a iai awm hran lutuk lem loh ve.

Sumo atang chuan ka fanu MAry nen chhuk a, Sumo driver chuan bungrua te chu min hlan thlak pui a. Chumi in ruak enkawltu, Pu Siama leh a fapa te pahnih chuan min lo hmuak a. In chu ka han en vang vang a, "Thlalak ami nen ava in ang lo ve.." han tih mai ka chak viau nangin, engmah ka sawi ta lem lo.

A kawtzawl zau dan erawh ka duhthusam chu a ni viau lawi a, Pu Siama fapa te pahnih chuan bungrua chu min thiar luh pui a. Gas Cylinder, tui hman tur, khum leh a t(r)ul dang ho te chu inchhungah chuan an lo chhawp lawk diam tawh hi a lo ni. Pawn lam atanga a lan dan aiin inchhung chu a lo zau phian a, mahse in nuam tak erawh a ni lem lo ka tih tawh kha.

Ka fanu MAry chu ka han en a, inchhung chu melh kualin a lung a dum vak lo tih pawh a hmel atang chuan ka hria. A t(r)ul ang ang te min tih fel pui zawh hnu chuan Pu Siama leh a fapa te chuan min chhuahsan ta a, kawngka bul thleng chuan ka thlah a.

Mary chu ka va en leh a, sitting room ah chuan a lo thu ngui bar mai. A bulah chuan ka va thu a, "Nuam i ti vak nange?" tiin ka han zawt a. Muang chang chuan min rawn melh a, "Kan venga ka thiante kha ka ngai e.." a ti nuah nuah mai. Ka khawngaih angreng khawp mai, mahse he khuaah hian kan awm a ngai miau sia le.

A samah chuan ka chul a, "BAwihte, kum khat bak kan awm angai hleinem. I nu hi hemi khuaah hian ka awm a ngai tlat sia, ka tellova Aizawl a i awm ka remti si lo alawm. HEtah school i kal anga, thian thar te chu i tawng leh vat mai dawn alawm." tiin ka hrilh fiah a.

Mahse MAry chuan min chhang lo, a thu ngawi reng a. Ka han thaw deuh hluai a, "I inbualna tur tui ka lo lum ang aw, i thawmhnaw lo va hlip la, ka bual dawn che nia." ka tih chuan thu awi tak chuan a tho ve mai a, room lam chu a pan a. Keipawh chu choka lam panin ka fanu inbualna tur tui chu ka lum sak a, youtube ah lutin thawnthu ngaihthlak pah chuan bungrua vel chu ka dah fel mawlh mawlh a.

****************************************

Mary hi ka pasal, REmpuia nena kan fanu neih chhun a ni a. Tunah chuan kum 6 lai a ni ve tawh, kum 3 lek a nih lai khan Rempuia hian min boral san a ni. MAry hian tunge apa hi a hrechiang hman lo hrim hrim, Rempuia'n min kalsan tirh phei kha chuan thih ve mai kha ka duh hial.

Pian tirh atanga Aizawla cheng ka ni a, ka hming chu LAlhlimpuii a ni. Kum 25 ka nih khan Rempuia fa ka pai a, kan inru a. Tichuan kan inkutsuih hnuah Mary hi a lo ping ta a ni, Mary pian atanga kum thum a ral hnu ah accident avangin ka pasal hian min boral san a.

KA thiante, ka chhungte leh ka laina hnaite chuan, "Ila naupang bawk a, pasal dang nei leh rawh." an ti fo mai, amaerawh chu Rempuia lo kha chu boral tawh mahse pasal dang neih leh hi ka tum tawh lo hrim hrim. Police nurse ka ni a, ka PAsal Rempuia kha Police Sub Inspector a ni thin bawk.

Kan intawn dan chu sawi kual duah lo mai ila, ka fanu Mary nen chiah hian kan khawsa a. Police Quarter-a awm char char thin kan ni a, ka pasal min thihsan hnu kum thumnaah he Khua, LEnhmui Khua (phuahchawp) ah hian kum khat chhung awm turin min sawn ta a ni.

Kum 31 lai chu ka lo ni ve ta a, keima tawkah chuan ka fanu hi ka enkawl tha ve viau chuan ka hria. Mary hi kum 6 chauh ni mahse, naupang thuawih tak a ni a. Ka thu a awih em em bakah amah hi naupang zakzum, thian kawm tam lo leh ngawichawi tak a ni hrim hrim a.

Quarter-a kan awm lai khan thenawmah hian ama rualpui naupang pathum vel an awm a, school khatah an lut ho vek bawk a, chung ho bak chu thian dang a kawm em em ka hre lo. KA u fanu, kum 19-a upa, Ruatfeli chu ka duty hlana in lo nghak tur leh min pui tura min rawn zui ve tur a ni a.

Chhungkaw lam buaina avangin naktuk lamah a lo phei ve thei chauh dawn a, ani hi chu school kal chi a ni vak lova, a awm awm a awm tawp chi, lehkhazir lama tih ngaihna awm thlawt lo, chhungkua a kan mang ti ang tu hi a ni tawp mai. Khawvel lamah a tlan em lova, a zia thove tiin kan en liam vel mai mai a ni ber.

Kan in luah atanga hla lo teah hian Police HEad Quarter a awm a, chu chu ka duty-na hmun tur chu a ni. Ke a han kal mai pawh a rem dawn em avanga he in pawh hi thlang ka ni a, ka thlang sual lem lo khawp chuan ka inhria. Mahse he in hi ahma in tuten nge lo luah tawh a, engvanga luah loh rei em em nge a nih erawh Pu SIama te khan engmah min hrilh lem lova, keipawn ka zawt lem lo bawk.

Ka pasal Rempuia kha ka sawi tawh ang khan Police Sub-Inspector a ni a, hna pawimawh avangin an case kal mek lai chhuizawm turin Assam ah a kal a ngai thut a, an rawn haw lehlamah accident tawkin amah chhiar telin police pali laiin nunna an chan nghe nghe a ni.

*****************************************

Zan a lo ni a, Mary chu sitting room ah thu in ama inkawmhlimna tur atana ka leisak liau liau, phone ah chuan games a khel mawlh mawlh a. KEi erawh kan pute bia in choka lamah chuan ka lo vei kual sek thung, amahin a hlim tawk viau ni a ka hriat avang chuan ka ngaihsak lutuk lem lo.

Darkar chanve dawn phone ka hman hnu chuan Mary chu ka va en leh a, tukverh lam hawi chuan min hnungchhawn zawngin a lo ding ngawi reng a. Phone chu ka dah a, ka va pan hnai a. Che miah lo chuan tukverh lam chu melin a mit a la khap miah lo zui, "Enge i en a, BAwihte?" tiin ka han zawt a.

Mahse min chhang miah lo, a darah chuan ka va khawih a. A phu nasa em em mai lehnghal, keimah zawk pawh ka phu ve dawrh nghe nghe. Min rawn en hu a, tukverh lam chu a en leh a. Mak a tih hmel angreng khawp mai, "Enge i en vung vung a?" tiin ka zawt nawn leh a.

Tukverh lam chu a kawk a, "Tah sawn hmeichhe naupang pakhat a ding reng a, a rawn kal hnai a. Min biak a tum lai takin min rawn ko va, a bo leh daih." tiin min chhang a. Sana ka han en a, dar 8 a la ri lo deuh. Ka khi suk a, "Thenawmte nau a niang, nakinah kan la leng dawnnia." tiin ka chhang a.

"Zan dar 8 a ri dawn tawh a, naupang mahni a zana tlat tir chu an ti awm ang lo mange aw.." tiin keima hriat tham lek chuan ka phun nuah nuah a, Mary pawh chuan phone chu a khawih chhunzawm veleh mai a. Reilote hnuah chuan Pu Siama a rawn leng a, thingpuite lum sakin kan titi nual a.

DAr 9:30 vel a rik meuh chuan a haw ve ta a, kan nufa pawh chuan mut zai kan rel ve ta. Ka phone chu mut hmunah chuan khawihin video eng eng emaw ka en kual vel mai mai a, Mary chu ka va en a. A lo la muhil lo, a lo inlet kual reng ringawt mai. "Bawihte, i mut a chhuak lo em ni?" tiin ka han zawt a.

ZAwi sap hian, "Anu, tinge zanah naupang an lenchhuah tir a, i phal ve ngai si lova?" tiin min zawt let daih mai. Ka khi leh deuh suk ringawt, "HElai hmun hi chu thingtlang ania, nangmah ni ang rual naupang te te ho pawh an leng nasa thei alawm." tiin ka chhang a.

"MAhse misualin an man anga sin, nangpawn misualin min man loh nan leng suh i tih thin kha.."

"An inbul hnaiah chauh an leng a, a pawi an ti lo aniang."

"HEtah chuan misual an awm ve lo tihna ami?"

"Misual chu khawi hmunah pawh an awm alawm, chuvang chuan zana chhuah loh a him ber."

A ngawi leh vang vang a, "Thawnthu min hrilh mai rawh, ka muhil thei lo." a han ti tham tiak a. Ka thiam ang ang chuan thawnthu phuahchawp tak mai chu ahmaa ka tih dan thin ang bawkin ka han hrilh leh a, reiloteah chuan a muhil ve mai bawk. Keipawh rei ka meng bik chuang lo, motor chuan rei lutuk avanga chauh nen, ka muthilh lai pawh ka hre lo.

********************************************

A tuk zing an ni a, duty erawh ka la tan dawn lo thung. MAry school luna tur vel buaipuiin school ah chuan ka kal pui a, admission te kan tih fel hnu chuan ka haw san ta a. Duty tur chu ka la ni hauh lo nangin Quarter-ah chuan ka kal ta tho va, nel lutuk lem loh hmelhriat sa pawh ka nei nual nghe nghe.

Ka duty na tur pawh a hrehawm lutuk dawn love, chubakah kum khat chiah a ni dawn tho bawk nen. Mahse post an lo sawn kual ve sek hi chu ka hne ve thin khawp mai, inthiar luh, inthiar chhuah tih reng hi ka ning ber. Chubakah hmeichhe awmnem zawk ka lo ni bawk nen, fanu kum 6 mi ka lo nei ve lehzel bawk nen.

Mipa tha ka mamawh ve thin si a, puih reng ngai, min puitute hlawh pek ve zel ngai bawk nen, a inthlahrunawm rual rualin kan pa kha chu la dam se chuan thil a awlsam deuh tur tiin ka inngaihtuah fo thin. Kan pa pension hi awm lo phei se chu kan harsa ve thin ngawt ang, mahse engkim hi Pathian remruat zel a ni e tiin ka infuih hram hram thin.

Chhunah chuan ka bazar a, bungbel leh mamawh dang chu ka lei belh nual a. Ka fanu inkhual lem nan tiin a toys tur ka lei sak nual bawk, tlai lamah kan nau, Ruatfeli a lo thleng dawn bawk a tiin arsa ka lei haw bawk a. Inah chuan ka thil lei vel chu ka dah a, tlai a lo ni a, ka fanu lam tur chuan school lam chu ka pan leh ta a.

Gate bulah chuan ka lo nghak a, school ban dar a rik veleh chuan naupang ho chu an arwn chhuak sap sap a. MAry'n min hmuh veleh chuan min rawn pan nghal a. TAxi pharin kan haw dun a, "Enge school thar chu a an, a nawm hmel dawn em?" tiin ka zawt a.

A thaw deuh hak a, "Nuam ve tho." tih ringawt chuan min chhang a. A hmel atang chuan nuam a ti vak lo tih chu ka hre thei mai, "Thian thar te i nei nghal em?" tiin ka han zawt leh a. Mahse a lu a thing a, "I kal rei telh telh anga, nuam i ti chho ve mai ang." ka han ti leh a, mahse min chhang miah lo.

A mak pawh ka ti hran lova, chutia ngaih tih thatlohna tur pawh a awm chuangin ka hre lo. A chhan chu sawi tawh ang khan ka fanu MAry hi anu ka nihna angin ka hrechiang a, min chhan miah loh te hi a nei fo. A tir chuan ka hau thin, mahse tawng tlem ve hrim hrim a ni ka tih tawh kha.

************************************

Tlai dar 5 velah chuan Ruatfeli pawh chu a rawn thleng ve ta, ka indah luh pui zung zung a. Zanriah te kan ei kham hnu chuan paper tihfel tur ka ngah em avangin chaw ei dawhkanah chuan hna ka thawk nghal mawlh mawlh a, Ruatfeli chuan MAry chu a lo infiam pui thung a.

Dar 8:30 a rik meuh chuan Ruatfeli chu a rawn phei a, "Nu Mahlim, Mary chu phone a khawih mual mual a, a muhil daih." a rawn ti a. Ka lo khi suk a, "A that chu, keipawh ka zo tep... thingpui min lo lum lawk la, i duh leh i mu ve nghal daih dawn nia." tiin ka chhang a.

Ruatfeli chuan thingpui lum pah chuan thil ho deuh deuh, a ngaihzawng chanchin te chu min hrilh ve siam siam a. KA hna ah ka rilru ka pek em avang chuan ka uksak lutuk lem lo, reilote ah chuan a mu ve nghal mai a. Kei erawh ka la buai ngat ngat khawp mai, ka awm a lo nuam chiah lo bawk nen.

Dar 10 a rik meuh chuan ka zo ve thei ta hram e, ka lu lah chu a na bur tawh lehnghal. Ka indah fel mek lai chuan kawngka a rawn inkik karh karh mai, sana ka en a. Dar 10 a pel tawh a, tun anga kawngka rawn kik chu tu tak ni ang maw, kawngka lam pan chuan ka va phei a.

"Tunge ni aw?" ka han ti hmasa a, mahse tuman min chhang lo. KAwngka chu ka han hawng a, tumah ka hmu lo. Pawnah chhuak meuhvin ka han hawi kual a, mahse mihring awm ang reng reng ka hmu der bawk si lo. Mak ka ti angreng khawp mai, tleirawl zurui leng haw, awm ngaihna hrelo rawn kik vel mai mai a nih ringin inchhungah chuan ka lut leh mai a.

Bathroom-ah chuan hmai ka phih a, pindan lam atang chuan thawm ka hre tlat mai. Mary'n min au lauh lauh ri hi ka hria a, bathroom atang chuan ka chhuak vat a. Room ka lut chiah chu ka ding chat mai, Mary chu tui em em hian a lo mu hnar suk suk a. Second 2 vel kal ta lawk kha chuan min au lauh lauh kha a ni a, muthilh leh na hman a awm lo hrim hrim.

MAhse Mary hi a tawngvai ve nasa thin a, chuvang chuan a tawngvai a nih ringin ka khi suk a. Keipawh chu mu tur chuan ka inbuatsaih a, naktuk mai atangin ka duty tawh dawn a, ka rilru chu a hah ru angreng khawp mai. Aizawl lamah kha chuan eng shift ah pawh duty mah ila, ka chhungte an awm avangin MAry hi ka ngaihtuah lutuk a ngai lo va.

Mahse tunah chuan Ruatfeli chauh a ni bawk si, a la a ve ropui si a. A taima em em lo lehnghal, a lo lerh ve khanglang bawk nen. Night chang te ka la nei ve anga, an pahnih chauh va ina lo awm tir chu ka zuam chiah lo a ni, mahse tih theih dang ka nei der mai si lo.

Mary lah a pi leh pute bula awm tir ka phal bik si lo, a future ka ngaihtuah ve tho bawk si. Kan in luah tharah hian room pahnih chiah a awm a, a zau zawkah MAry nen kan nufa in kan mu a, room zim lamah Ruatfeli chu a mu thung a ni. Pu Siama kha chuan he khua hi chu khaw ralmuang tak angin a sawi a, enge maw kan an zel dawn ni!

***************************************

A tuk ah chuan ka duty ve ta a, rin ai takin kan la awm awl phian zui. Staff te nen chuan kan titi char char hi a ni deuh ber mai, ka thawhpuinu, ka thian thar, Lenhmui khaw nula ah chuan a hmeltha ve ber ang tih tur a ni. A hming chu DAisy a ni a, kan inkawm ngeih phian lehnghal.

"I fapa chu kum engzat maw a nih ve tawh a?" ham deuh bui bui chung chuan DAisy chuan min zawt a. Ka han thaw deuh hak a, "Kum 6 a pum ve tawh, a fel ve tawh ania." tiin nui sang chung chuan ka lo chhang a. A ngawi deuh vung vung a, "Apa a ngaih thu emaw, apa chungchang engemaw tal a zawt thin che em?" tiin min zawt leh a.

Ka khi deuh suk ringawt, "A hre hman lo ang tluk a ni, mahse a sawi lang ve leh zeuh zel." tiin ka chhang leh a. A lu buk nghauh nghauh pah chuan, "I fel ve ngawt mai nang hi chu, tihian pasal dang nei miah lovin i fanu neihchhun i t(r)ul pui char char mai chu a nia." tiin min han fak deuh luam a.

"U Rempuia lo kha chu midang han neih leh hi ka tum tawh lo hrim hrim, ka hmangaih a, ka duh bawk a, ka engkim a ni tawp. Amah anga duh leh hmangaih kha ka neih leh theih pawh hi ka inring tawh lo, chuvang chuan tihian ka fanu Mary hi ka enkawl zel phawt anga, PAthianin rem a ti a nih chuan pasal dang te chu min la pe ve leh mahna."

"A ni khawp mai, mahse PA ti a koh tur a nei lo hi ka lainat tlat alawm. Chubakah nangmah chauh chuan a harsa ve ang, hmangaih leh duh ber tih kha chu thudang ni ta se, in nufa uap lum tur mipa in mamawh thuai tho vang."

Ka khi leh suk a, "Tunah chuan mamawh hrih love, chutiang buaipui tur chuan ka buai hrih em a ni." tiin ka chhang a, ani pawh chu a khi ve suk ringawt. Chutia kan titi lai chuan lunch ei a lo hun der mai, DAisy nen chuan canteen lamah chuan lunch ei turin kan inzui thla a.

KA pasal Rempuia kha chu ka sawi ang khan ka engkim a ni a, ka tan khan a awm reng thin. A bulah chuan ka hahdam a, ka him ngawih ngawih ni hian ka inhre thin. Amah ka tawng kha vannei ka inti takzet, vawikhat huat deuhna chu ka nei ve. Kan inneih hma, Mary ka pai lai kha a ni a.

KA rai thu ka hrilh khan pa nih ala zuam loh thu leh ti la tura min hrilh kha chuan ka haw ve hman lutuk, mahse a hnuah ngaihdam min dil leh vat a. Kha bak kha chu han huat em em na hi ka nei tawh lo, khatih hunlai pawh khan ka hrilh thut kha a chiai hman te pawh a ni mahna le.

*********************************************

Tlai dar 5 velah chuan ka haw a, khua pawh a lo thim tep tawh. Ruatfeli kha Mary lam turin ka tia, a lo lam em ang chu maw tih nuah nuah pah chuan in lam chu ka pan zel a, Mary te school hian school bus chu an nei ve tho va. Mahse keini tan erawh ke a han kal mai theih khawpa hnai a nih avangin kan buai viau te a nih loh chuan Ruatfeli a awm tho bawk a, bus a haw ve kher a ngai ka ti lem lo.

In chu ka thleng a, inkawtah chuan Mary chu amah in a lo inkhual lem nasa mai. A bulah mi an awm ve niawm tak chuan boruak chu a be mawlh mawlh lehnghal, ka va pan phei a. Min hmuh veleh chuan min lo kuah nghal a, "Enge min lo hawn, anu?" tiin min zawt nghal a.

Ka thil hawn chu pek pahin, "Khawnge i u Ruatfeli?" tiin ka zawt veleh thung a, inchhung lam kawk pah chuan, "Room ah a mu." tih ringawt chuan min chhang a. "Ava hahthlak thin e aw.." tih vawng vawng pah chuan inchhung chu luh ve ka tum a, Ruatfeli hi zawng, a tangkai hlawl lo a ni e.

Ka lut tur chiah chu Mary lam ka va hawi leh a, a toys awmna bul pan pah chuan a nui sang a. Ring tak hian, "Ka lo let leh tawh e." a ti ringawt a. Ka hawi kual a, tumah an awm bawk si lo, "Anu a nih kha." a ti leh a, boruak a be mawlh mawlh chu mak ka ti angreng kher mai.

Mahse naupang ania, amahin a inkhualtelem fo va, ngaihthatlohna pawh ka nei hran chuang lo. Inchhungah chuan ka lut a, Ruatfeli room ah chuan ka lut tlang nghal a. A lo mu hnar bawrh bawrh mai, a ka ala ang phuau leh nghal. A dulah chuan ka tlawh sawk a, "Harh rawh...MAry saw lo ngaihtuah ta che." ka han ti vin deuh thak a.

Phak tawk hian a rawn meng a, a la ham bui bui zui. A lu chu hiat nauh nauhvin, "Tinge a, khawnge a awm a?" a la ti hu zui. Ka sa ve deuh thak mai, "Ruatfel, hetiang tur hian ka ko phei lo che ania. Ka buai dawn em avangin nang i awm awl bawk a, hlawh ila nei dawn zui. Tiang mai mai hi chuan awm tawh lo teh, anih loh chuan Aizawl lamah i let thla leh daih ang." tiin ka an khum deuh hrep mai.

Mahse engtin mah min chhang lo, sam pheng tawk chuan a la thu tum bur mai. Room atang chuan ka chhuak a, ka inthlak sawk sawk a. Mary chu inchhungah chuan a lo awm leh der tawh, thutthlengah chuan barbie a lo khal mual mual a. KA va pan phei a, "Vawiin tlaiah tunge rawn hruai che?" tiin ka zawt a.

"Au Ruatfeli'n min rawn hruai." tiin min chhang a, barbie chu a khalh zawm leh nghal mawlh mawlh mai. Choka lamah chuan ka phei leh a, rawng te chu a lo bawl lawk ve thlap. Ka han hau nek kha ka inthiam lo hnuhnawh leh ang reng khawp mai, ka lo thinchhe ve hrim hrim bawk nen.

***************************************************

Ka mu chu ka harh thut a, ka phu nasa em em mai lehnghal. Engvanga harh nge ka nih pawh ka inhre bik lo, ka thaw hrawk hrawk a. KA han hawi kual chu kan inah reng reng ka lo awm tawh lo mai nilovin, pawnah ka lo mu reng chu niin. RAng takin ka tho chhuak nghal a, ka awmna hmun chu hmun reh tak mai, tlang niawm tak a ni.

Tumah midang hmuh tur an awm lo, a reh em em ringawt mai a ni. Mahse ka han inngaihtuah chiang a, ka awmna hmun chu ka hre tawh tlatin ka hria. Chutah ka hnunglam atang chuan mipa aw hian ka hmingin min rawn ko va, ka la phu nasa em em zui.

Chu mipa aw pawh chu ka hawi let hma hauh atangin tunge a nih ka hre thei nghal, muang chang chuan ka hawi let a. Ka mittui a sur nghal zung zung mai, min rawn kotu chu tudang nilovin ka pasal, kum thum kal taa min boral san tak, Rempuia, ka pasal hmangaih em em kha a ni.

Awmzia ka hre lo, hlauh chu sawi loh, mak ka ti a, ka tawt up up mai. Muangchang chuan ka va pan phei chhet chhet a, "Rem..Rempui, duhtak... nangmah i ni tak tak em?" tap tuau chung chuan ka ti tham tiak a. Min lo nuih suk a, "Mahlim, ka ngai thei lutuk che." tiin min chhang a.

Ka insum zo tawh lo, ka va tlan phei a. Ka kuah thlawp mai, "U REmpui, khawngaihin min kalsan tawh suh. I tello chuan ka khua a har emai, khawiah mah awm bo tawh suh aw.." tiin ka tap zawih zawih mai. Nghet takin ka kuah a, ka thlah phal tawh ngang lo a ni.

Ani pawh chuan min kuah let ve a, "Keipawn ka ngai thei lutuk che u, Bawihtei pawh ka ngai. Mahse lo let leh thei ka ni tawh lo, a chhan chu nang hian thil pawi tak i ti a ni." a ti ta mai a. Chutah Rempuia chu a hma a engrim mah nam lem lo kha, sazu thi uih rim a rawn nam thet thet ni mai hian ka hria.

"Enge i sawi awmzia." tiin ka thlah a, mahse min thlah ve duh ta hauh lo mai. Nghet takin min kuah a, "Ka kalsan tawh loh i duh a ni lawm ni, tinge min thlah nghal mai i tum leh si a, mi hurnu." tiin min vin ta khur khur mai a nih chu. KA hlauthawng tan, "U REmpui, min thlah teh...khawngaihin.." tiin ka tal vak vak a, amah pawh chu a rimchhe tawh takzet.

Mahse min la thlah duh chuang lo, "Ka nun zawng zawng hi nang hian hremhmunah i siam a ni, ka thi kha ka lawm zawk, i bulah ka awm tawh lova ka lawm zawk tih hre rawh." a aia vin chuan min ankhum leh ta hrep hrep mai a, a rim lah chu a na tawh em em mai lehnghal.

Luak a chhuak thei hial, "Min thlah rawh, nang hi tunge i nih a?" tiin ka tal vak vak a, ka tal chhuak thei ta. Ka hnung tawlh nghal dawrh a, Rempuia hmel ka va en chu ka pasal hmel pawh a ang tawh lo. A hmai chu a dum vek a, a pan ni awm tak hian a pilh hnang thluar mai.

A mitmu lehlam chu a rawn uai pur leh nghal a, a hmel chu a rapawm takzet. Ka hlau lutuk chu au vak ka tum a, mahse ka aw a chhuak thei thak lo. Tlan chhiat ka tum a, mahse ka khawng vek. Ka kehnuai chu lei nen a inchar tlat amaw tih mai tur a ni, ka che sawn thei eih lo.

Chutah Rempuia chuan min melh run a, "Zaktheilonu, ka thu chu awih la hlim takin kan awm dun tur ania. I hur lutuk vangin kan che sual a, Mary i pai lai khan ti tla rawh ka ti mawlh mawlh a ni lawm ni? Engvanga pai lui nge i nih, mawh...ZAwngi?" tiin min an khum leh ta chiam chiam mai.

Ka hlau lutuk chu ka thlan a tla buah buah tawh, a aw pawh chu Rempuia aw a ni tawh lo. A rapthlak lutuk, patling sawm rual vel a ruala tawng hi a ang ka ti ber, rapthlak tak a ni. Min rawn pan a, ka che sawn thei der si lo. Zau tak hian a ka chu a ang vak a, min rawn hnaih telh telh mai.

*****************************************

Ka mumang ram atang chuan ka harh zawk mai a, ka thlanin min lo bual huh vek chu niin. Ka thu chhuak hlawl a, ka thaw hrawk hrawk mai. "Eng ang mumang nge ni ngai, ava rapthlak veleh." tiin keima hrait tham lek chuan ka phun sap a. MAry pawh chu a rawn harh ve nghe nghe, "Anu tinge i au vak a?" tiin min zawt a.

KA thaw deuh hluai a, "Ka mumang vang mai mai mawle, engmah hlauh tur a awm lo." tiin ka lo chhang vat a. Min en vung vung a, "I mumangah chuan enge i hmuh a?" tiin min zawt leh a. KA nui lui sak a, "KA au chhuak palh a nih kha, BAwihte. Mu leh tawh rawh le, naktuk school i tlai palh ang." tiin ka chhang leh a.

A mu ve leh mai bawk a, reiloteah a hnar nghal suk suk mai. Kei erawh ka awm a nuam tawh hlawl lo, eng ang mumang nge ni ngai, ka thinphu pawh a la ziaawm hleithei lo. Muthilh leh ka tum a, mahse a har tawh takzet. Ka maimitchhin hlekin ka  mumang chu ka mitthlaah chuan a rawn lang zel mai si, engemaw awmzia ni ang aw tiin ka inngaihtuah nasa kher mai.

Khumah chuan ka let ka let ringawt a, sana ka en a, zing dar 2 a ri tawh. Ka thinphu lah chu ala ziaawm thei chuang lo reng reng, hrehawm tak a ni. KA tho chhuak ta nge nge a, hmai te ka va phih a. KA mumang khan awmzia a nei angem aw, nge mang tha lo mai mai zawk ni ang tiin ka la inzawt nasa mai.

Rempuia khan khatiang khawp khan min lo haw tak tak em maw ni le, a rim lah kha mumang mah nise a taka hnim ang mai hian a rimchhiat zia kha ka hnarah hian a la cham rengin ka hre hial. Mary ka pai lai khan ti tla tur chuan min ti ngei alawm, kha kha a thih hma zawng khan alo la ngaihtuah reng tihna em ni ang?

"Mihurnu, Zaktheilonu.." te kha min ti chiam chiam mai sia, a hmel lah kha a rapthlak em em bawk si. Kan awmna hmun kha ka hre chhuak chiah lehnghal, Rempuia nen kan inngaihzawn tan tirh laia kan inhmuh hmasak berna a ni, engtin nge a tak ang chiah khan ka hmuh theih?

Zep lo chuan ka hlau a ni, khatiang em em a mumang rapthlak kha ka la mang ngai lo. A tak a an em em bakah Rempuia ber kher, min tawngkhum dan zawng zawng nen. Ngai viau mah ila khatiang kha chuan ka hmu duh tawh lo, min lo hmangaih ve ngai miah lo zawk em maw ni aw?

Min nei kha a lo inchhir viau thin tak tak em mawni le, mahse min hmangaih ve viau kha chuan ka hre sia. A tawp a tawpah chuan ka ngaih ka ti tha lui a, "Ummm... mumang mai mai alawm." tiin ka phun sap a. Room lam chu ka pan leh a, zing dar 4 rik hma vel chuan ka muhil ve thei ta hram a.

********************************************

TO BE CONTINUE