REBECCA (MIZO FICTION HORROR STORY) Written by : Aaron Malsawmdawngzuala WARNING : 18+ CHAPTER : `3

 REBECCA

(MIZO FICTION HORROR STORY)

Written by : Aaron Malsawmdawngzuala

WARNING : 18+

CHAPTER : `3

**************************************

Zanlai dar 1 vel a ni tawh a, ka mut erawh a chhuak hlawl lo a ni. Ka fanu chungah hian thil tha lo a thleng ang tih ka hlau takzet, he a thiannu anga a sawi, Rebecca-i hi tu tak chu ni ang maw tiin ka inngaihtuah nasa khawp mai. Khumah chuan thu in tukverh lam chu ka en reng a, ruah lah chu a tla deuh cherh cherh bawk.

Mary mu mek chu ha han en a, a lo hnar suk suk mai. Ka ngaih a tha lo takzet, heti em em a, a tak ang maia a bia hi a mak ka ti thlawt. Chubakah a nung chang pawh a danglam vek a, a tawng duh ta em em bawk mai hian ka ngaih a ti tha lo zual. Engtin nge han enkawl tur pawh ka hrethiam lo, a tawpah chuan psychiatrist hmelhriat ka nei tih ka hrechhuak hlauh mai.

A hming chu Dr. Sangtei a ni a, hemi khua a mi tho niin naupang lam hi a enkawl ber thin a ni. Ka tho va, tukverh bulah chuan ka va phei a. Dr. Sangtei chu ka phone a, chanchin te chu ka hrilh a. Naktuk tlaia an ina lo kal nghal tur chuan min hrilh nghal a, phone chu kan dah ta a. Lehlam ka va hawi leh chu ka ding chat mai, Mary chu khumah chuan a lo awm tawh miah lo, "Nilo, Mary?" tiin ka va tlan phei nghal a.

Khum hnuai te chu ka bih a, a awm der mai si lo. Chutah choka lama engemaw ri rawk hi ka hria a, ka ding ngil nghal at mai. Thawm chu ka han ngaichang leh a, mahse a reh ta vang vang mai a. Muangchang chuan choka lam chu ka va pan a, "Mary, BAwihte...khawnge i awm?" tiin ka au vak vak bawk.

Mahse tumah chuan min chhang der si lo, ka va kal phei zel a. Choka dim light, fridge chunga mi lo eng de vet vet chu ka hmu a. Fridge kawngkhar pawh chu a lo inhawng huau bawk, a phenah chuan tu emaw an awm tih hriat tak hian a ri ruk ruk mai. KA aw ka han thian deuh kharh kharh a, "Mary, nangmah i ni em?" ka han ti leh a.

Fridge chu muang chang chuan a rawn inkhar a, Mary chu apple pahnih kengin a lo ding reng mai. Ka va pan a, "BAwihte, tinge i thawh a? Engatan nge apple kha i tih, i ril a tam em ni?" tiin ka zawt nghal mawlh mawlh a. Inthlahrun hmel tak hian, "Anu, Rebecca-i a ril a tam a. Chuvang chuan Apple ka laksak alawm, a sawi a sawi a." tiin MAry chuan min chhang a.

Ka rilru a va han ti hah tak em, "BAwihte, hawh mu ang. Apple kha dah la, mu ang le." tih pah chuan apple chu ka dah sak a. Tah chhuak aw deuh hian, "Mahse, Rebecca-i a ril a tam alawm." a ti leh tuau mai. Ka ngawi vang vang a, "Keiman ka lo pe mai ang, nakinah.. tunah chuan mu phawt ang." tiin room ah chuan ka hruai phei ta a.

*********************************************

A tuk ah chuan hna ka chawlh phah hial a, kan pu in min phalsak hlauh. Mary school ban veleh chuan Dr. Sangtei te in lam chu ka pan pui nghal a, kan kal phei pah pawh chuan a suangtuahna thian, Rebecca-i chu a be mawlh mawlh mai. Dr. Sangtei te in chu kan thleng a, Sangtei nen chuan kan titi a.

A awmdan mak ta lutuk te, school-a a chet dan te leh nizana a awmdan zawng zawng te chu ka hrilh vek a. Sangtei chuan ka fanu Mary chu a han en vang vang a, ani lah chu boruak bia in a lo hlim nasa mai. Sangtei chu a khi suk a, "Imaginary Friend a nei tih a chiang hle mai, hetiang hi chu a common alawm." a ti ringawt a.

"A hlauhawm loh tihna em ni?"

"Hlauhawm hran love, Mary te ang rual naupang chuan an nei thin vek alawm."

"Mahse a chetdan te hi, a biak dan zawng zawng te nen... a tak a ang ngawih ngawih alawm."

Dr. Sangtei chu a han thu tha deuh va, "Ni e, mahse i hriat tur chu... Rebecca-i hi a awm tak tak lova, i fanu in a siam chawp, a suangtuahna mai mai a ni. I fanu tan chuan a tak tak ang mai a ni ngei ang, mahse anmahni, a siamtu te tho hian a tak a nih loh zia chu an thang lian anga, an hre chiang telh telh mai ang." a han ti leh charh charh a.

Ka ngawi vang vang a, "Anih engtin nge ka tih ang, enge ti ila tha ang?" tiin ka zawt leh a. Sangtei chu a han thaw deuh hak a, "Thian a mamawh a ni, imaginary friend nei te reng reng hi chu a tlangpuiin an khawhrah vang te, thian an mamawh vangte leh thian siam an thiam loh vangte pawh a ni thei. Mal ngawih ngawih a naupan tet laia kan dah reng chuan imaginery friend te hi an nei leh nge nge thin a, mi a ang maiin a tak ang chiahin an be mual mual thin alawm. Chuvang chuan a bulah awm tam la, thian te kawm tam tir ve rawh." tiin min chhang a.

"Anih leh lungin min vawm tir a tih te kha, khangte kha enge awmzia?"

"A ngaihtuahna vek, ama rilru vek tho a ni. Mawimawii khan a imaginery friend, MAry tan chuan a thiantha ber kha a sawisel sak a, chumi hnuah a rubber a thial sawm sak vek bawk a. Mary kha a thinrim insum zo bik lovin lungin a vawm a, a imaginery friend Rebecca-i a puh mai chauh a ni."

"Ka van hrethiam chiah lo, han sawi zau deuh teh."

"Entirnan ka hmang ang che, mi i inhnialpui a. Dawtin a puh che a, i dikna ah i tang tlat a. MAhse kut a thlak ta che a, i thinrim insum zo lovin i thlak let ve ta a. Tuman kut thlak ve rawh an ti lo che, nangmah duhthu, i thinrimna vang a ni. Khatiang chiah khan Mary pawh kha a thinrim ve a, mahse ani erawh chuan a imaginery friend, Rebecca-i zawk kha a puh ta daih a ni. A puh chiah pawh a ni lo, a hrilh angin a inhria tihna a ni."

Ka ngawi leh deuh vang vang phawt a, "Mahse ka fanu chutiang mi a ni si lova, chubakah lunga vawm duh tur khawpa thinrimna an nei ve thei dawn em ni, kum ruk lek ala ni bawk si?" tiin ka han zawt leh a. Sangtei chu a nui suk a, "Puitling te ai mah hian naupangte hian anger issues an nei nasa zawk, nunkawng zawh tan mek an nih avang hian thil hrang hrang an tawng nasa a, an mood pawh a inthlak zung zung thin alawm." tiin min chhang leh mai a.

Ka thaw hak a, "Anih chuan engmah hlauhthawnawm a awm lo tihna animaw?" tiin ka han zawt leh a. Dr. Sangtei chuan a lu a lo bu nghauh nghauh va, "Umm, hmeichhe naupang pangngai tak a ni. Ka sawi ang khan thiante kawm tam se, a nih loh pawhin nangman awmpui tam la, infiam pui la, tichuan a zia chho mai ang." tiin min chhang leh a, kan haw ta a.

************************************************

In kan thleng a, Ruatfeli bulah chuan Mary chu kawm tam tur ten, a bula awm tam tur te chuan ka hrilh a. Mary ber erawh room ah a lo infiam leh daih tawh, keipawh chu ka inthlak ve nghal zung zung a. Eirawng te ka bawl a, chawhmeh ka chhuan mek lai chuan Mary chu rom atang chuan a rawn chhuak a.

Sitting room lam pan pah chuan, "Nu TV kan en dawn, Rebecca-i nen...min lo on sak teh." tiin a thu nghal deuh nalh a. Engmah sawi lem lo chuan plug ah chuan ka vih luh sak a, TV chu a rawn in on a. Ka va hawi phei a, remote control chu thutthleng dangah daih chuan a lo awm a, Mary erawh lehlamah a thu daih bawk si.

Ruatfeli hmarcha rawt lai chu ka va melh hrawk a, "Lalruatfel, TV hi remote atanga off hmasa lovin plug ah i off hnan siah mai ani maw, ka duh miah lo ania, khatiang kha, kei chu.." tiin ka han vin deuh nghal hrawk a. MAhse Ruatfeli chuan, "A teuh lo mai, tukinah ka en a, remote atangin ka off reng e a, a awihawm loh lutuk." tiin min chhang a, a t(r)an nat hmel em em lehnghal.

Chutah channel chu inthlakin cartoon channel chu a rawn inhmet chhuak leh ta mai a, remote lah chu a ngaiah chuan a la awm reng bawk si. MAry chu ka en a, hmuhnawm tih hmel tak hian TV chu a lo thlir dauh dauh mai. Mak ka ti takzet, "Mary.." ka han ti zawi sap a.

Mary chuan min rawn en a, "Enge, anu?" a lo ti vat a. Ka chil ka lem dawk a, "Engtin nge remote tel lova channel kha i thlak a?" tiin ka zawt a. Remote awmna lam chu ava hawi a, "Rebecca-i tih a nih kha." tiin min chhang ta mai a. Mak ka ti lutuk chu sawi mai tur pawh ka hre lo, remote awmna thutthleng chu ka en a.

Tumah an thu der mai si lo, Mary lah chuan thlamuan hmel tak hian TV chu a lo la en dauh dauh mai si. Muangchang chuan ka va pan a, thutthleng ruakah chuan ka va thu a. Remote chu ka va ban thut a, mahse engmah chu a thleng lem chuang lo. Ka thaw deuh hluai a, remote chu MAry ka va pe a.

Roomah chuan ka lut nghal a, khumah chuan thu in ka lu ka dawm vawng vawng mai. Engthil nge thleng zo chiah kha, ka mitvai ti dawn ila ka fanu ngeiin REbecca-i tih a ti miau bawk si. Chubakah TV channel inthlak leh amah a rawn in on lai kha ka hmu chiang em em mai bawk si.

Tunah chuan ka ngaih a tha lo satliah tawh lo, ka ngaih a tha lo tak zet zet tawh a ni. KA rilru a nuam thlawt lo, midang hrilh ila tuman min awih der dawn si lo. Ruatfeli lah hian engmah lungkham a nei bawk si lo, earphone a vuah reng ringawt a. KA rilru ava hah tak em, ka mumang ni leh thei zawk se ka ti ngei mai.

********************************************

ZAnriah kan kil ho va, ka chaw ei pawh a tui nek love. Ka rilru ah chuan vawiin tlaia TV amah a rawn in on ringawt leh, channel rawn inthlak ringawt kha ala awm reng a, MAry thilsawi, Rebecca-i tih a nih kha...a tih lai chu ka bengah chuan a ri nawn mawlh mawlh mai.

Mary lah hian chaw ei apiangin a bulah hian thutthleng ruak a dah ziah bawk a, chaw ei chhung zawngin, awm velo Rebecca-i chu a kawm mawlh mawlh zel. Tun t(r)um phei chu a kawm tui lutuk a, chaw ei nachang a hriat loh phah lek lek a. KEia mood fuh lo bawk si chuan, "Mary, i chaw kha ei rawh." ka han ti vin deuh hlak a.

Mary pawh chuan thuawih tak chuan a ei tha ve mai a, mahse awm ve lo Rebecca-i chu a biak chhunzawm char char tho. Ruatfeli chuan MAry chu a han en vang vang a, "Tumaw i thiannu hming chu, Rebecca-i maw?" tiin a han zawt a. MAry chuan a lu lo bu nghauh nghauhvin, "Um, hei heta hi... ka bula hi a thu." tiin a bula thutthleng ruak chu a kawk a.

Ruatfeli chu a khi suk a, "Animaw... ehe Rebecca, i va fel ve aww.. kan nau duat Mary te i lo kawm ve duh a. Chaw lo ei ziah rawh aw... i hmeltha si.." tiin a han be der ve vel a. Mahse ka ngaihdan a ni ta tlat lo, "Ruatfel... a tawk. Rebecca-i a awm tak tak lo, khati zawng kha chuan ti suh." ka ti deuh hlur a.

Ruatfeli pawh chu a ngawi nghal hmak a, a inthiamloh hmel khawp mai. Chutah kan chaw ei dawhkan chu a rawn insawi deuh hrut a, ka phu nasa em em mai lehnghal. KA thaw hrawk a, "Enge a, enge awmzia?" ka ti nghal chul mai. MAry chuan min en a, "Rebecca-i a nih kha, ka awm tak tak tiin a hrilh che a, a lungawilo a nih kha." tiin min rawn chhang ta mai a nih chu.

Ruatfeli lah chuan a lo awihloh hmel khawp mai, "NAngmah i khupin i ti che anih kha, dawhkan hnuai atangin.. a awihawm loh lutuk." tiin a lo khi suk a. Mary chuan a bula thutthleng ruak chu a en leh vang vang a, chutah Ruatfeli lam chu ava hawi leh a. "Au Ruatfel, Rebecca-i'n keima tih a nih kha, MAry tih a ni lo a ti." a ti leh a.

Ruatfeli chu a khi leh suk a, "A nih tak chu a.." a ti liam mai a, kei erawh sawi tur pawh ka hre lo, ka ngawi reng ringawt. Mary chuan boruak chu a be leh char char a, chaw ka ei chhunzawm thei tawh thlawt lo. Rilru hah nen, ka tawt up up mai. Ka tho va, ka va insilfai nghal a.

**********************************************

Zanah chuan home-work ti tur chuan MAry chu a inphawrh chhuak mek a, "Bawihte, eng home-work nge in neih?" tiin ka zawt a. Min en hauh lo hian, "Maths." tih ringawt chuan min chhang a. "Lo in ready rawh, ka rawn tih pui ang che." ka han ti leh a.

Mahse MAry chuan, "Aih, tihpui ka ngai lo. Rebecca-i'n min hrilh mai ang, a thiam hnu vek alawm." tiin min chhang leh ta mai a, ka thin a rim lek lek tawh zawk. Mahse ka inbengdai hram hram a, ka chhang let tawh lem lo. Tichuan ka phone ka phawrh a, DAisy nen chuan kan intext a.

Ka thil tawn mak tak te chu hrilh ka chak takzet, mahse min awih dawn der mai si lo. "Enge Mary a an?" tiin min la rawn zawt zui leh ta nghal a, "A tha zel a nimai." tih bakin chhan ngaihna pawh ka hre lo. Mahse dawt erawh ka va sawi chiang si em, ka fanu hi a tha mawlh lo, amah chauh nilovin keipawh hi ka chiang lo ta nge pawh ka inhre tawh lo.

Mary chu ka va en leh thin a, a ngai te ang bawkin boruak chu a lo la be mual mual a. A home-work tih lai chu Rebecaa-i chuan a tihpui mek ang mai hian, "Hetah hian two maw ka ziah ang, e aw... ti hian a dik em?" tiin a tawng nasa mai a. KA thla hi a muang hlawl lo a ni, ka mitthlaah chuan TV channel rawn inthlak ringawt mai kha a lang reng mai bawk si, ka hne tawh takzet.

Daisy chu ka text chhunzawm leh a, chutia kan intext mek lai chuan current a rawn thim thut mai. MAry chuan ring tak hian, "Naa... ka ti zo tep tawh asin mawle." a ti deuh bui bui a. KA phone flashlight chu ka on a, "BAwihte tikhan lo awm rawh, bati ka rawn la ang." tiin choka lamah chuan ka va phei a.

BAti chu la in roomah chuan ka let leh a, Mary dawhkan ah chuan dahin ka chhit en sak a. Ka phone a rawn ri a, Dr. Sangtei a lo ni. Tukverh lamah ka phei a, dah chhuah pah chuan ka bia a. "Hello Mahlim, enge in an zel?" tiin min rawn zawt a. Chhan mai ngaihna pawh ka hre lo, "Aa.. hei ala ngai reng. VAwiin tlai phei chu chaw eina chang hre lo khawpin a bia a, homework ti dun niawm takin tunah pawh hei a be nasa mai." tiin ka chhang a.

"Lungngai suh, thil normal vek angah ngai rawh. Ka sawi ang khan amah leh amah a inkawm tih kha hria la, awmpui tam la, be mawlh mawlh rawh. Thian a kawm tam deuh pawhin hau lola, kha kha a mamawh zawk tih hria ang che. Zawi muangin tikhan a ziaawm chho anga, Rebecca-i chu a theihnghilh vat mai ang." tiin min chhang a.

Kan inbiak deuh fe hnu chuan phone chu kan dah ta a, ka mu tlem thin bawk nen ka chau kher mai. Phone chu ka ak a, lehlam ka hawi chiah chu ka va han phu nasa tak. Ka ding ngil nghal at mai, ka tha a khur nghal thei hialin ka hria. Bati alh thla, bang lo langah chuan MAry thla chu chiang takin a hmuh theih a.

Mahse amah chauhvin a thu tlat lo, a bulah chuan amah aia lian deuh hret, hmeichhe naupang ve tho ni awm tak hi a thu ve tlat mai a nih chu. Mary chu a zu en a, a bulah chuan tumah chu an awm chuang lo. Mahse banga a thla(shadow) ah erawh a bula thu hmeichhe naupang chu lang chiang tak a ni, ka thin a phu nghal dup dup mai.

Hlauhna chuan ka thauvah min man a, chet mai nachang pawh ka hre lo. KA thlan fim a tla nghal zawih zawih a, chutah le... chu hmeichhe naupang thla chu muangchang chuan a rawn ding ta mai a. Mit khap miah lo hian ka en reng a, chutah ka lam a rawn hawi ni ang tlat hian ka hmu lehnghal.

Ka hlau lutuk chu au chhuah hial ka tum a, mahse ka aw a chhuak thei miah lo. KA thlan fimin min bual huh vek tawh, ka che sawn mai thei lo bawk. Chu hmeichhe naupang chuan muangchang hian a ban a phar a, a ban a la rawn vai zui. Ka ka(mouth) ka ang hlawi hlawi ringawt, ka mitvai a nilo, chiang takin ka hmu tlat a ni.

Mahse current a rawn eng leh thut a, ka che thei chiah. KA thaw nghal hrawk hrawk mai, ka thlan lah a tla nasa. Mary chuan ring tak hian, "YESSS.." a ti vak a, bati chu a chhem hlum nghal. Lehlam hawiin min rawn en a, "Ngati nge nu, khatia i awm a?" tiin min la rawn zawt zui.

"Aw..ihh, ka.. ka tha. Engmah a nilo, ka tha." ka ti bah nuai mai, ka taksa hi a chau nghulh thei hialin ka hria. Mary chuan a lehkhabu chu a khup a, "Ka zo ta, ka mu thei tawh e." tiin khumah chuan a tlan lawn nghal a. Kei erawh ka la che mai lo, ka lungphu a la dik hleithei lo.

**************************************

Reilote hnuah chuan MAry home work tih sa chu ka va check a, belh leh paih lo niin a ti dik vek lehnghal. Ka va en a, khumah chuan a lo mu fel than tawh. Ka aw ka han thian deuh kharh kharh a, "I thiannu nen chuan in inkawm tawh dawn lo ami, i mut san dawn ami?" tiin ka han zawt ve deuh ngat a.

Maimitchhing chung hian, "Aw...ka mut a chhuak emai, zanin chu. Ani pawh a mu tawh, khum hnuaiah." tiin min chhang awlsam et mai. KA ngawi vang vang a, tichuan khumah chuan ka lawn kai ve a. Chutah Mary chu a rawn meng a, "Anu light kha off daih teh." a rawn ti leh a.

"Engvang chuan maw?" tiin ka lo zawt let deuh kher a. "Rebecca-i hi engah(light) a mu thei vak lova, thim a ngaina zawk a." tiin Mary chuan min chhang a. Zep lo chuan ka off ngam chiah lo a ni e, "Ihh.. phone ka la khawih dawn a, nakinah ka off mai ang." ka ti ta ringawt a.

MAry pawh chuan min chhang tawh lem lo, a maimitchhing lehnghal a. Phone chu ka khawih a, khawih tur ber pawh ka hre lo, video ho deuh deuh chu ka enkual vak vak ringawt. Rilru ah a lut lo em em mai lehnghal, nichin lawka, current awm loh laia, banga hmeichhe naupang thla ka hmuh ringawt mai chuan min la tibuai.

Chutah MAry chu a rawn che leh tual tual a, "Anu, Rebecca-i'n ka ril a tam a tia. Apple kha a ei chak a, zanin chu pe ve tawh ila?" a rawn ti leh a. KA thaw deuh hluai ringawt, "Awle, ka lo pe dawnnia, mu tawh rawh." tih ringawt chuan ka chhang a, ani pawh chu a mu ve leh mai bawk.

Reiloteah chuan a hnar nghal bawrh bawrh a, mahse light off chu ka la duh lo bur. KA inngaihtuah vang vang a, enge ka hriat pawh ka hre lo. Apple chu lak a, khum hnuaia dah chu ka duh ta tlat mai a nih chu. Enge thleng reng reng ni, ka finfiah chak tlat pek a.

Khum atang chuan ka tho va, choka lam chu ka va pan nghal a. Fridge-a apple pakhat chu ka va la a, tichuan room ah chuan ka let leh a. Khum hnuai thim ruih mai chu ka en vang vang a, tu emaw an awm tlat hriatna ka nei leh t(r)an ta. Ava hrehawm tak, muang chang chuan ka pan hnai zel a.

Apple chu khum hnuaiah chuan ka lir lut a, thawm a awm nge awm lo tiin ka han nghak vang vang phawt a. MAhse boruak chu a reh hian a reh diak mai, sana ban vai ri a ring hle ringawt a, chubak thawm dang a awm lo. KA thaw deuh huai a, light pawh chu off ta lem lo chuan ka mu ve ta a.

**********************************************

Zing a lo ni a, ka harh deuh zawk mai. MAry chu a lo la mutui nasa mai a, Ruatfeli pawhin min lo thawh khalh tawh ni ngei tur a ni, choka lam chu a ri ruk ruk mai. Khum atang chuan ka tho va, ka han zi mar te te a. Chutah thil engemaw hriat chhuah zawk ka nei tlat mai, khumhnaia apple kha.

Rang takin ka zuang tho va, khumhnuai chu ka bih nghal a. MAhse khawia apple mah hmuh tur a lo awm tawh lo, ka zawn kual ngial pawhin ka hmu hauh lo. Mak ka ti kher mai, a lir bo aniang ti dawn ila lir bo turin room chhungah thli a thaw eih bawk si lo.

Ka ding a, ka inngaihtuah vung vung a. Chutah mak tak maiin ka hnar chu a rawn thi ringawt mai a nih chu, keimah pawhin mak ka ti takzet. Damlohna engmah ka nei si lova, chubakah ka pian tirh ata, khawih nat vang ni miah lova, ka hnar thi vawi khatna a ni.

Rang takin wardrobe lam chu ka pan a, lapua chu ka la chhuak nghal a. Ala thi duh phian lehnghal, lapua pawh ka hmang tam hman khawp mai. A thi a ziaawm hnu chuan lapua ka hman ho chu khum sira dust-bin tereuhteah chuan paih tumin ka va phei a, dust-bin ka han rap hawng chiah chu ka phu zuk mai.

Dust-bin chhungah chuan apple eina hnu, tlem te lo la bang chu ka hmu ta mai a. MAk ka ti takzet, ka en vung vung ringawt. Apple ei ban chu ka la chhuak a, lapua chu ka paih a. KA en vang vang a, ka hlauthawng leh t(r)an tawh khawp mai. Chutih lai chuan MAry chu a rawn harh a,  a rawn thu chhuak a.

A ham deuh bai bai mai, "Mary... hei hi i ei em ni?" tiin ka lo zawt nghal tawp a. A rawn hawi a, "Enge kha kha?" a la ti hu zui. KA thaw hak a, "Apple ei ban a nih hi, nizanah khan khumhnuaiah ka dah a, tihian zingah ka hmu a, i ei em ni?" tiin ka zawt leh a.

Mak tih hmel tak hian min en hu a, "Nizanah khum hnuaiah apple i dah maw?" tiin min zawt let daih mai. "Aw dah e, i ei a ni em, i ei nge ei lo?" tiin ka vin lek lek tawh mai. Mary chu a la khi suk zui a, "Aww Rebecca-i'n a ei aniang chu... i dahsak miau te chuan." tiin khum atang chuan a chhuk a.

Khum hnuai chu a bih a, "Ehe, Rebecca-i'n min thawh san tawh." tih leh room atanga chhuah chu a rual a. Ring tak hian, "REBECCA.... REBECCA.." tiin ala au phei lauh lauh zui a. Ka rilru a hah takzet, ka ngaih a tha lo mai pawh a ni tawh lo, ka fanu chungah hian thil thalo a thleng ang tih hi ka hlau takzet zet a ni.

******************************************************

Hna ka kal ve leh ta a, rilru chu a nuam lo duh kher mai. DAisy lah chuan min be reng lehnghal a, a rul tawk te te bakin ka chhang lo. A ngaih a tha chiah lo deuh aniang, "Tinge khatia rilru hah hmel deuh va i awm leh tak vung vung thin a, i mangan hmel thei.." tih pah chuan a han chek hlur a.

Za lo tak chuan ka khi lui sak a, "KA awm a nuam lo deuh alawm, tunlai chu ka mu mang ngai lo." tiin ka chhang a. Daisy chuan min han en vang vang a, "Tinge ka mu tha lo i tih ve ziah a, rilru hahna i nei ami, sawi la.." tiin min zawt a. MAhse ka lu ka thing ringawt, "Mary vang bawk em ni?" tiin Daisy bawk chuan min zawt leh a.

Chhan pawh ka chhang lo, "Enteh, naupang an nia. Naupangte chu an invel tap fo alawm, MAwimawii nu kha chu a nasa ve hrim hrim a nih kha. Lungngai suh, MAry kha a sual ta viau e tihna pawh a ni hleinem." tiin a thiam ang tawk chuan min han hnem ve a.

Ka thaw deuh hluai a, "Chulam ai mah chuan, a imaginery friend nei hian min tibuai a ni." ka tih chuan a nui huk mai. "Kha bawk kha maw, amah ang rual chuan an nei fur ang chu. A inkhual lem mai mai angah ngai rawh ka tih kha, thil tha lo a thlen phah pawh ni hlei lo." DAisy bawk chuan a ti leh nghal zuah zuah a.

"AA... Daisy, i hrethiam lo a ni. A ni telin a nasa tulh tulh a, a bula awm pawhin min ngaihsak lo. KEi ai mah chuan a imaginery friend, Rebecca-i hi a ngaihsak tawh zawkin ka hria."

DAisy chuan mak tih hmel tak hian min en deuh hu a, "Rebecca-i a? Tunge chu chu?" tiin min zawt hu a. ZA lo tak chuan ka khi suk a, "Ama koh dan alawm, a thainnu, a imaginery friend hi a hming Rebecca-i a ni e, a tia lawm." tiin ka chhang a. A nui deuh huah huah mai, "Awii... ka lawm chiang e. A hming te a lo phuah ngei ah, Rebecca-i... a nalh phian chu." tiin a ngaih hoh hmel kher mai.

KA dem bik lo, ani tan chuan a ho ve khawp ang. MAhse ka thil tawn te, ka thil hmuh te kha hmu ve se chu min nuih bik hauh lovang mawle. Mahse ka sawi a nih chuan min awih dawn si lo, mi a emaw min tih phah hial ang. Engtia awm zel tur nge pawh ka hre lo, ka rilru a ti hah takzet.

Ruatfeli bulah hian ka sawi mai dawn emawni aw tiin ka inngaihtuah a, mahse ani chu hrilh tlak a ni dawn bawk si lo. A mawl ve ropui mai si a, ka fiamthu amaw a ti a nih loh chuan, awih se chu a hlau chhe der mai dawn sia, min chhuahsan vang vang duh hial dawn tih hi ka hrechiang mai sia.

KA rilru a buai a ni, tumah hrilh ngamna ka nei bawk si lo. Dr. Sangtei phone mai teh ang ti ila a ngai te bak min hrilh leh dawn chuang si lo, ka rilru hah lutuk hi engdang mah ka ngaihtuah thei lo a ni e. REbecca-i hi a awm tak tak ka rinna chu ka rinlohna aiin a tam ta tulh tulh mai si a, zep lo chuan ka hlau a ni.

Tin, ka hlauh leh pakhat bawk chu.... Mary hian school lamah buaina te a thlen leh mai ang tih chu ka hlau ngawih ngawih. Chiang fek fawk a zawh chian a, Rebecca-i chu a awm tak tak loh thu te chu hrilh a, a t(r)ul chuan vin hrep mai te pawh ka duh hial tawh.

Mahse chu chu ti lo tura Dr. Sangtei min chah ber a ni bawk si, ka thil hmuh zawng zawng nena ngaihtuah phei chuan Rebecca-i hi a awm tak tak em mawni chu aw ka ti vawng vawng hial a ni. Nizan lawka ka hmuh, banga thla kha Rebecca-i, ka fanu imaginery friend chu a ni thei mai lo maw?

Chuan apple pawh kha, tu lo ei nge ni ta ang? KEi chuan ka ei lo phawt a, zan ka mut hma khan khum hnuaiah ka dah lut tih pawh chiang takin ka hria. Zingah khan a lo inei hek nasa mai si a, dust bin ah a lo in paih deuh thlap bawk a. Rebecca-i chuan a lo ei tak tak tihna em ni, nge kei hi ka a zo tawh zawk pawh ka hre lo e a.

**********************************************

Chhun chawlh a lo hun a, canteen ah chuan thilm ei turin ka chhuk a. DAisy nen chuan kan thu dun a, a bialpa bia in phone a hmang mawlh mawlh a. Kei erawh thildang ka ngaihtuah thei lo, a ngai te bawkin Mary bawk chu a ni ka ngaihtuah leh tawh ni.

Ka thil ei lai pawh chu ka ei tui lo kher mai, ka melh ngai chu melh vung vungin ka inngaihtuah nasa khawp mai a. Chutih lai tak chuan canteen kawt a lo ding, hmeichhe naupang pakhat, min hnungchhawn zawng a lo ding reng chu ka va hmu a. A tir chuan engah vak ka ngai lo, mahse ka va en nawn leh deuh kher a.

Ka thin a phu leh nghal dup dup mai, a chhan chu ka en mek, chu hmeichhe naupang chu nizan lawk a, bang a thla ka hmuh nen khan an in ang lutuk tlat. A pian zawng zawng te, a kawr hak zawng zawngte nen. Ka en reng a, che miah lo hian a ding char char a.

Canteen kawta midang kal vel te chuan an hmu miah lo nge ni, awm ve lo ang mai chuan an kal pel hmiah hmiah mai. Hmundang ka hawi thei tawh lo, chu naupang chu ka en reng a. Tuman biak emaw, ngaihsak an tum der mai si lo. An kal pel hmiah miah a, an chetdan en chuan an hmu ve thei lo a ang ber.

KA ngaih a tha thlawt lo, ka thutna atang chuan ka tho va. Chu hmeiche naupang dinna lam chu muangchang chuan ka va pan ta a, hnunglam ala hawi reng. Ka mitthla chuan a ham zana, bang a thla ka hmuh chu a rawn lang chuai chuai a, an inang takzet. KA va pan hnai zel a, ala che eih lo.

Mahse ka thlen dawn tepah chuan mak tak maiin mi pakhatin a rawn kal pel ve leh chiah chu a bo ta daih mai a nih chu, keipawh chu ka ding chat mai. Ka hawi kual a, ka zawng a, mahse hmeichhe naupang reng reng ka hmu tawh lo. Ka staff puite leh police dangte hlir an ni, mak ka ti takzet.

Ka ding ngawi ta vung vung ringawt a, hrilh a hai duh hle mai. Chutah hnung lam atang chuan tu emaw hian ka darah a rawn vuan thut mai, ka va han phu nasa tehreng em. Rang takin ka va hawi phei a, DAisy lek chu lo niin. Ka thaw huai a, "Min ti phu alawm, enge a?" ka lo la ti vin hlur zui.

Daisy chuan rum fe hian min melh a, "Enge te ala ti zamah zawk nia, henu hi. Enge khatia thil ei laia i thawh thut a, enge hetah daih daih i kal a?" tiin min vin let deuh hrep mai. KEipawh chu ka inngaihtuah harh a, chhan mai ngaihna pawh ka hre lo. Chutah Daisy bawk chuan, "MAwhh, enge i tih hetah?" tiin min zawt leh a.

Ka thaw hak a, "Ihh.. aa, hmel, hmelhriat ka hmu emaw ka tia.." ka tih bah deuh nuai mai. Ani lah chuan min han melh leh run a, "I hmelhriat vek alawm kan nih, uii... i hahthlak emai, lo phei teh." tiin min kalsan a, keipawh chuan ka va zui ve leh mai a. Mahse engmah ka eizawm thei tawh lo, ka engkim hi a nuam lo vek a ni ber mai.

*******************************************

TO BE CONTINUE