REBECCA (MIZO FICTION HORROR STORY) Written by : Aaron Malsawmdawngzuala WARNING : 18+ CHAPTER : `2

 REBECCA

(MIZO FICTION HORROR STORY)

Written by : Aaron Malsawmdawngzuala

WARNING : 18+

CHAPTER : `2

****************************************

A tuk zingah chuan MAry chu school kal turin ka siam mawlh mawlh a, Ruatfeli chuan chaw ei a lo siam mek a. Ka siam zawh hnu chuan Mary chu dawhkan lamah hruai pheiin, "Ei vat la, vawiin chu kal hma ka ngai ania... muang chang suh aw.." tiin ka hrilh a.

Ka insiam ve mawlh mawlh bawk, sitting room lama ka bag ka zawn mek lai chuan Mary chu ka va melh zeuh va. Boruak a lo be leh tawh, bawnghnute te chu lek kangin, "I in ve duh em?" te a ti a, a be mual mual mai. Ka khi suk ringawt, ka bag chu ka zawn chhunzawm leh a.

Ka hmu ta hlauh mai, tichuan chaw chu ka va ei ve a. MAry chu ka en vang vang a, "Nichin khan tunge i biak a?" tiin ka zawt a. A bula thutthleng ruak chu kawkin, "Hei hi...ka thiannu hi.." tiin min chhang a. Ruatfeli pawh chuan a lo en ve hu mai, "I bulah khan thu an awm maw?" tiin ka zawt leh ngat a.

A lu a bu nghauh nghauh ringawt, "Anih leh tunge a hming?" tiin ka zawt leh a. Boruak chu hrilhru ni awm tak hian a phun mual mual a, "Nakinah in hre mai ang a ti a nih chu, keipawn ka hre bik lo." tiin a khi vur vur mai. Nui chung hian, "A va sual e aw, min hrilh ve tur alawm." tiin ka fiam zui a.

Chaw chu a ei kham a, silhmunah chuan a thleng ruak chu a dah thlap bawk. "Bawihte, i lehkhabu te i bag ah va dah la, i pheikhawk kha nawt fai leh thuak thuak bawk ang che aw.." ka tih chuan room lamah a tlan lut nal nal a. Chuveleh Ruatfeli chu rawn thu hnai deuh hrutin, "Enteh Nu Mahlim, khatiang kha....engtin nge sap tawng khan an sawi kha aw... Engineer friend an ti amawni?" a ti nuah nuah mai.

KA chal ka dawm tawp, "AWiii Mawli, Imaginary Friend an tia lawm." tiin ka lo vin hlur mai. A la nui heu zui, "E aw ni tak, tiang kha a nei aniang." a han tih chhunzawm leh nghal a. KA thaw deuh hak a, "Naupang ah te chuan a thleng fo alawm, thian kawm ngai vak lo a ni tih i hriat kha. Ngaihthatlohna tur a awm lo, inkhualte lem rual lek alawm ala nih." tiin ka chhang a.

********************************************************

A second day ah pawh kan awm awl leh pek khawp mai, mahse ka rilru ah erawh nizana ka mumang kha ala awm reng thung. A rapthlak bawk em a ni, a tak a ang em em mai bawk si nen. Chutia ka innngaihtuah vung vung lai chuan kawngka chu a rawn inhawng ri rawk mai, tlangval pathum hian pa pakhat hi an rawn zawn lut a.

Chupa chu Pu Taia niin mi ang vak lo, phungzawl thin a ni. Daisy chuan mak ti tak hian, "Engati nge, engtizia nge a?" tiin a lo zawt a. Kan Doctor duty ve tho, Dr. Sanga pawh chu a office atang chuan a rawn chhuak ve nghal bawk a. Tlangval zinga pakhat chuan, "Saw lai kawtah sawn a vei kual a vei kual a, tihian a tlu ringawt a. A remchang hlauh ve kan tia, kan rawn zawn lut ta mai a nih hi." tiin a lo chhang a.

Chutah Pu Taia chu a rawn khur nasa zual sauh va, a tal ta vak vak mai. Dr. Sanga chuan a va man bet ve a, "A kutah khan vuan ula, hmehsak rawh u. Chuan tlangvalte u, khumah hian rawn mut ru." a han ti lauh lauh va. Khumah chuan kan mut a, ala khur nasa mai.

A tal deuh vak vak bawk a, a kut veilamah chuan ka man bet a. Chutah Pu Taia chuan ka lam a rawn hawi thut a, a hmel chu zawi zawiin ka hmu dang tial tial ta mai a nih chu. Chutah ka pasal Rempuia hmel bawk ka hmu leh tawh, mak ka ti lutuk chu awm ngiahna mai pawh ka hre lo.

KA thin a phu dut dut a, hlauhna in ka khat nghal. Chutah rum fe hian min melh a, "Nangmah vang a ni, nangmah vang vek a ni." a ti khur khur mai. KA hlau lutuk chu ka awmsawn nghal dawrh a, mahse Pu Taia hmel chu a rawn pangngai leh nghal vek. Dr. Sanga chuan min en hu a, "Tinge a, i hlau em ni?" tiin min zawt a.

"Ka tihpalh, doctor." tiin ka va vuan tha leh a. Nachhawkna in kan chiu va, a muhil ve thei ta hram a. Mahse ka awm a nuam lo takzet, ka hmu sual zawk nge pawh ka hre lo. KA hmu chiang em em mai bawk si, nizan ka muang vang kha em ni aw tiin ka inngaihtuah nasa mai a.

Ka thu deuh hnawk a, ka thinphu pawh ala ziaawm thei thlawt lo. Daisy chu ka bulah a rawn thu a, "Nichin kha tinge khatia i t(r)e deuh thut a, min ti phu chiang lutuk alawm?" tiin min rawn zawt a. Chhan mai dan tur pawh ka hre lo, "Pu Taia hmel kha, ka hmu dang thut a.." tiin ka chhang ringawt.

Ala nui huk zui, "I ti mak e a, Dr. Sanga kha a lungawi loh hmel ropui ania aw.." a han ti leh a. Ka khi suk ringawt, "Nizan ka mumang a rapthlak lutuk a, ka mut tlem phah vek alawm." tiin ka han ham deuh bui bui a. Ner nung pah hian, "A ho leh ngawt ang chu... ramhuai party ami i hmuh?" tiin ala nui huah huah zui.

**********************************

Tlai ah chuan ka duty zo ka haw ve leh ta a, nizan ka mumang leh vawiin ka thil tawn te chu ngaihtuah chhunzawmin ka kal muang kher mai. Ka hmuh sual angah ngaih luih ka tum a, mahse ka hmu chiang bawk si a ni. Chauh chu ka chau khawp mai, ka mu tlem bawk nen.

Chuvang chuan ka hmu sual palh angah ka ngai lui a, mahse ka hlauthawng tho. In chu ka thleng a, Ruatfeli chuan TV a lo en a, sofa ah a lo mu leh zawn zawn tawh. Hauh pawh ka hau peih lo, "Khawnge Mary?" tiin ka zawt a. Room lam chu kawkin, "A inkhualte lem leh tawh aniang." tih ringawt chuan min chhang a.

Room lam chu ka pan a, kawngka chu chhete hian a lo in hawng a. MAry tawng ri pawh chu ka hre pha vek thei, ka han kal muang deuh va. Inthiamloh hmel taka MAry'n, "Toys dang ka nei tawh lo alawm, hei chiah hi ka neih chhunte chu an nimai." a ti ri chu ka hria a.

KA ding deuh dat a, a aia chiang zawk chuan ka'n ngaithla leh a. Second 5 hnu velah chuan Mary bawk chuan, "Anu in pawisa ka nei lo a ti thin a.... chuvangin ka dil ngai tawh lo alawm." a ti leh a. A reh leh vang vang hnuah chuan, "Awle, zanah ka lo dil ang." Mary bawk chuan a rawn ti leh ta.

Kawngka ah chuan ka va bih a, MAry chu chhuatah chuan lo thu in a hmaah chuan a toys leh tea set vel chu a lo inchhawp nuai a, a bulah chuan thu ve an awm ni awm tak hian a en leh zeuh zeuh zel a, a biak chhunzawm mawlh mawlh bawk. KA va lut a, "BAwihte, enge i tih a?" ka va tih chuan a tho nghal a.

"Anu enge min lo hawn?" tiin min rawn kuah nghal, "Kha hei hi ka lo hawn che a...." tih pah chuan chips bawm khat ka hawn sak chu ka pe a. Lak pah chuan, "Naktukah chuan bawm hnih lo hawn tawh la, ka thiannu sawn a duh ve ang." tiin boruak chu a va kawk leh ta.

Ka thaw deuh hluai a, "Nia, kan hawn tawh dawnnia." tiin ka khi suk a. Mary chuan nui sang hian min en a, "Kan infiam leh tawh dawn aw, kan va ei dun ange.." tiin a tlan let leh a. Chhuatah chuan thu in, "Kha ei ve rawh, naktukah chuan i ta tur a lo hawn ve tawh dawn che." tiin boruak bawk chu a be leh a.

A inkhual lem mai mai a ni tih chu hre tho mah ila, a tak ang maia a bia a be ta mai chu mak ka ti ve deuh tan riau mai. Ka inthlak pah te chuan ka en reng a, a be mawlh mawlh mai. Chumi tlai zanriah kan kilnaah pawh chuan a be char char bawk, Ruatfeli nen chuan in enin kan khi dun leh suk suk ringaw thin a.

************************************************

Zan a lo ni a, dawhkanah chuan lehkha khawih fel tur vel chu ka khawih fel mek a, hna a tam reuh thin khawp mai. Ka bulah chuan MAry chuan home-work a ti ve mek bawk a, ka en deuh vang vang a. "Bawihte, khawnge i thiannu chu tunah a awm a?" tiin ka han zawt chhin a.

Min en miah lo hian, "Room ah a awm, min lo nghak mek." tiin min chhang sam et mai. Ka han ngawi leh deuh vang vang a, "Engti turin maw a lo nghah che?" tiin ka zawt leh a. "Home-work ka tih zawh veleh kan infiam leh dawnnia ka tia, min lo nghak mek." tiin min chhang leh a.

A confi reuh em em mai lehnghal, "Anih a hming chu tunge a nih ka hre thei tawh angem, nge nangmah pawh hi a  hrilh ve lo zawk che?" tiin ka zawt leh hram a. A chawl deuh dat a, "Kei chuan ka hria alawm, mahse tumah midang hriat ve a phal rih lo." tiin min chhang leh a, a ziah chhunzawm leh nghal mial mial mai.

Ka zawt chhunzawm tawh lem lo, ka hna chu ka khawih chhunzawm ve leh mial mial a. Minute 10 vel hnuah chuan ring deuh lenglawng hian, "Ka zo ta." tiin Mary chu a rawn au deuh thut mai. KA phu zuk nghe nghe, a lehkhabu chu a khup thuk a. Room lamah a keng phei nghal a, "Ka zo tawh e, inkawm ang le." a ti leh lauh lauh mai.

A nui ri har har chu choka atang pawh chuan ka hre pha a, a hlim hmel takzet. Ka ngaih chu a tha lutuk chiah tawh lo, a chhan chu a tak ang maia a sawi a sawi mai hi kum 6 mi lek mah nise, ngaihthatlohna tham chu a ni ve tawh chuan ka hria. Dar 9 a rik meuh chuan ka zo ve ta, mu tur chuan ka inbuatsaih a.

Ka hmai te ka phih zawh hnu chuan room lam chu ka pan a, ka hawng chiah chu Mary chu a lo la mu miah lo a nih chu. Boruak chu a lo la kawm nasa mai, "Ehe BAwihi, ila mu lo elaw, mu vat rawh. Naktukah thawh i hai ang, i tea set te kha khungkhawm la.." ka han tih chuan a ner deuh nung mai.

A bula boruak chu a en leh a, "Dah tawh phawt mai ang aw, naktukah kan inkawm leh dawnnia." tiin a tho va, a barbie leh toys dangte chu a khungkhawm a. Khumah chuan a lawn a, a tawngtai leh thlap a. MAhse a tawngtai zo chu mu mai lo chuan khumhnuai chu a bih a, "Tah khan i mu ziah a i hlau lo ami?" tiin boruak chu a zu be leh ta mai a.

Enge a chhan pawh ka hre lo, ka awm a nuam lo ruih thei. Mi rap riau a ni ber mai, mahse engmah ka sawi lo. MAry bawk chuan, "Awle, muttui aw.." tiin a mu tha ve mai a. A maimitchhing a, ka en vung vung ringawt mai. Ka aw ka han thian deuh kharh kharh a, "Bawih...Bawihte, ihh... i muhil nghal thei dawn mi? Thawnthu hrilh te i dum em?" ka han ti bah deuh nuai a.

Meng tawh chuang miah lo hian, "Aih, angai lo. Chu... ka thiannu in khum hnuai atangin a sawi mek." tiin min chhang leh ta mai a. Ka biak chhunzawm tawh lo, ka mu ve ta a. Mahse ka awm a nuam tlat lo, khum hnuaiah chuan tu emaw an awm tak tak ang hian ka hre tlat a nih chu.

Thenkhat tan chuan a atthlak viau maithei a, mahse ka hlau deuh tlat a ni, zep lo chuan. MAry chu ka va en leh a, a muttui tawh hmel khawp mai. Muthilh ve ka tum a, mahse ka thei thak lo. Khum hnuai mawlh mai chu ka rilru ah a awm reng mai, mut a chhuak thei mawlh lo a ni e.

KA ngaih tha ngang lo chu ka thu chhuak deuh hlawl a, khum hnuai chu bih a, han finfiah ngei a ngaiin ka hre tlat. A nih loh chuan ka muhil thei dawn chuang lo, engmah awm dawn lo mahse ka en hrim hrim angai ni mai hian ka hria. Mahse chutin ka en nghal ngawt ngam chuang lo, ngati nge maw ni, zanin chu ka dawih tlat a nih chu.

Thawk ka han la te te a, tichuan muang chang chuan khum atang chuan a kun thla a, khum hnuai chu ka zu bih ta. Engmah ka hmu lo, ka thaw huai mai. A dawih thlak ka tiin a atthlak ka ti bawk, "A va han nep theih ve mawle..." tiin keima hriat tham lek chuan ka phun deuh sup a.

Khuma ka han thu tha leh chiah chu Mary chuan khuma thu chung chuan min lo en reng a nih chu, ka hmu thut bawk si, ka phu nasa lutuk chu ka hik chhuak hman vek thei hialin ka hria. Ka awm ka dawm a, ka thaw hrawk hrawk mai. MAry lah chuan aw dam diai hian, "Enge i tih a, anu?" tiin min lo la zawt zui.

Ka lungphu a dik hlei thei lo, "AWii, BAWihte.. Min ti phu alawm, englo ania. I thiannu kha, a mu tha nge tha lo ka zu en fiah mawle." ka ti ringawt, engvanga sawi nge ka nih pawh ka hre tawh lo. Min nuih sen sen a, "Tah khan a mu duh zawk thin a, thim deuh ah hian a mu duh zawk a." tih pah chuan a mu tha leh than mai.

Ka han thaw deuh halh halh a, Mary pawh chu ka biak chhunzawm tawh lem lo. Muthilh tuma ka han maimitchhing ve chiah chu, "Anu, light kha off daih teh. Ka thiannu hian eng a ngaina lova, thim a duh zawk thin a." Mary bawk chuan a rawn ti leh ta mai a.

Mak ka ti tulh tulh mai, mahse engtin mah ka hnial lem lo. KEipawh light on chunga muthilh hi a har ka ti thin, light on chunga kan mut ziah nachhan chu Mary hian thim a hlauh thin em vang a ni. Chutia thim hlau em em thinin light off tura min ti ta mai pawh chu ka ngaihthat lohna a zual kher mai, mahse be tawh lem lo chuan light chu off in ka muhil ve thei mai.

**************************************************

A tukah chuan nileng mai chuan ka awm a nuam thei thlawt lo, ka fanu awmdan hian ka ngaih hi a ti tha chiah lo a ni. Tumah pawh ka be tui thei lo, ka ngaihtuahnaah thil dang a lut thei thlawt lo a ni. Chutia ka inngaihtuah vung cung lai chuan DAisy chuan ka darah a rawn vuan thut mai a, ka va han phu nasa tak.

Ka eu zawk a, "Min ti phu nasa lutuk, nge khatia i rawn vawn thut a?" tiin ka la hau deuh zek zui. Nui deuh suk chung hian, "Enge i ngaihtuah vung vung a, i awm a nawm loh hmel si?" tiin ka bulah chuan a rawn thu a. KA lo ner sak a, "Engmah a ni lo, mut ka kham lo deuh mawle." tiin ka lo chhang a.

"A ti leh ta, mut kham lo ti ziah mai. Ka awih lo, thildang a awm aniang."

"Aih, engmah a awm lo tak tak."

"Nimina i awm dan nen, mut kham loh vanga ngui hmel deuhva awm thu a awm lo, i rilru a hah hmel si. Min hrilh vat teh, engin nge i rilru ti hah a?"

Ka ngawi deuh vang vang a, "Englo, ka fanu Mary hi mawle." ka ti ta nge nge a. Daisy chuan min thut hnaih sauh sauh va, "Ngati nge, a nungchang a thlak deuh em ni?" tiin min zawt leh nghal a. Ka han thaw leh deuh hak phawt a, "Aa... a nungchang a thlak han tih ah, mi awm lo biak mual mual hi a ching a. KA sawi thiam dan ber chuan, imaginery friend a nei a ni." tiin ka chhang a.

A nui huk a, "Awii chungte chu, thil common lutuk alawm. Chubakah kum 6 lek ala nia, imaginery friend em em pawh a ni lovang, inkhual lem mai mai rual chauh alawm a la nih." tiin a ngaih hoh hmel kher mai. Ka lu a thing a, "Daisy, chutiang ngawt a ni lo." ka tih chuan min en deuh hu a.

"Anih han sawi chiang teh."

"A tak ang mai hian a bia a, nimina a thil eitur ka hawn sak pawhin naktukah chuan pahnih lei tawh rawh, ka thiannu ta ve tur nen tiin min hrilh a. A be mawlh mawlh zel a, hrilhru niawm tak te hian a awm a, ka ngaih a tha lo tlat a nih chu."

Daisy chuan a lu a han bu deuh nghauh nghauh va, "Anih chu, mahse lungngai suh. A thang lian zel anga, tiang hi chu a reh ve mai alawm." a ti sam leh et mai. Chutih lai chuan ka phone a rawn ri a, ka han en chu Mary te school Principal a lo ni reng mai. Phone chu la vat in, "Aw.. enge ni ta, Sir?" tiin ka zawt nghal a.

Chutah ka beisei loh lutukin Principal chuan, "Mahlim, school ah i lo kal angai tlat mai. I fanu Mary leh an class ami Mawimawii an insual a, Mary hian lungin a tukhumah a vawm a, a pawp a, Mawimawii nu te pawh an lo kal mek a, hmuh che an duh thu an sawi bawk a, hun i insiam thei angem?" a rawn ti ta mai a nih chu.

Ka thil hriat chu ka awih lo hial zawk, mi tihnat hreh em em ka fanu MAry, ka fanu a nih avanga ka tanna nilovin. Ka hrechiang ve tawk a, rannung takngial pawh a that duh ngai lo. Lunga mi vawm phei chu a tih duh ka ring lo hrim hrim, mak ka ti kher mai.

"Eng a? Mary'n maw? Tak tak em ni?" tiin ka han zawt hram a. Principal chuan zaidam tak hian, "AW ni e, midang tumah rawn kal tur an awm hmel si lova. Ka rawn phone tawp che a ni, khawngaihin i lo kal thei angem?" tiin min rawn zawt leh a. Ka chhang mai thei lo, ka rilru a hah takzet.

"AWle, kan pu ka han dil phawt ange.." ka ti a, ka thaw deuh halh halh mai. NGaihtha lo tih hriat tak chuan DAisy chuan, "Tinge a, engthil nge, Mary chungah thil tha lo a thleng em ni?" tiin a ni pawh chu a lo mangan ve hmel khawp mai. MAhse ka chhang hma chuan kan Commander chu a lo lut a, ka harsatna te chu ka hrilh a.

School lama ka kal chu a remti hlauh mai, keini duty hi chu kan awl ve thin hrim hrim bawk nen. DAisy chuan zawhna min lo zawt ve sek lehnghal, min ngaihtuah vang a ni tih cu hre tho mah ila ka rilru a hmanhmawh tawh lutuk tlat, chhan pawh chhang tha mang lo chuan pawnah ka tlan chhuak nghal vat a.

********************************************

School chu ka thleng a, Office ah chuan Principal chuan min lo ko lut nghal. Mawimawii nu leh pate chuan min lo thlen khalh tawh lehnghal a, Mawimawii nu hmel ka hmuh phei chuan ka huphurh nghal takzet. Hmel en reng reng pawh a, nu an cheh, thinchhia tih hriat reng reng.

Min lo melhrum nghal ren run khawp mai, a thiamlo zawk kan nih avang chuan ka inthlahrung ve bawk si. Principal chuan zaidam tak hian, "Lo thu rawh, Mahlim." tiin thutna chu min lo kawhhmuh a. Chutah ka thut fel hma hma chuan Mawimawii nu, Pi Rini chu a ding deuh thut a.

Rum taka min melh chung hian vin zetin, "Mahlimi, Mahlimi maw i hming? Eng tiang chiahin nge i fanu hi i enkawl a? Ka fanu a that lo chauh a nih hi, damdawi in panpui a ngaih hial hi i hria em?" min tih khum ta chiam chiam mai a nih chu. An pa chuan lo dangin, "Khaih khaih, nu-i... insum hram hram teh." tiin a lo khap a.

Principal pawh chuan, "Pi Rin, inbeng dai rawh... khatiang tur a ni ngai lo." tiin lo khap daih a tum ve bawk a, ka tan chuan a nuam duh lo khawp mai. Inthlahrung tak hian, "KA tihpalh a ni, tiang mi hi a ni ngai lo asin mawle..ka fanu hi.." ka ti dek dek chu a hma aia vin hian, "I va hrechiang lo ve, i enkawl ngai lo ami?" min tih khum leh ta hrep mai.

Ka ngawi hmak, ka rilru chu ana ve reng. PAsal tel lova theihtawpa enkawl ka ni a, kum thum lai chu riltam lovin ka phak ang tawkin ka enkawl ve alawm. Mahse a thiam lo zawk ka ni miau va, ka tawng pawr ve ngam der mai si lo. Ka chil ka lem dawk a, "In fanu enkawlna man chu ka lo tum vek ange, min ngaidam hram rawh u." zaidam tak, inseh ruh teuh chung chuan ka han ti a.

Pi Rini lah chuan min hmuhsit hmel tak hian, "Nanga pawisa kan mamawh lo, i fanu hi enkawl tha la a nimai." tih pah chuan a chhuak nghal hmak a, ava inthlahrunawm tak em. Pi Rini pasal chuan inthiamloh hmel tak hian min en a, "Min lo hrethiam hram dawn nia, Pi Mahlim..." tiin a zui chhuak ve nghal a.

KA thu ngawi reng a, Principal chuan a aw a han thian kharh kharh a. KEipawh chu ka han inhnit feuh hluam hluam a, ka tah kha a chhuak em a ni. ZAwi sap hian, "Engtin nge a thlen reng reng a, ka pu? An inhnial em ni, engtia intibuai nge an nih?" tiin ka zawt a.

"KA hmu ve chiah lova, chhuat a bawk meuhvin Mawimawii kha a tap zawih zawih e an tia. Engvanga ti nge i nih tiin Mary hi kan zawt a, mahse engmah a sawi duh bawk si lo nen." tiin Principal chuan min chhang a. KA ngawi vang vang a, "Khawnge MAry chu a awm?" tiin ka zawt a, "Class room ah a awm ang." tiin min chhang a.

**********************************************

Kan inbiak rem zawh hnu chuan MAry te class room lam ah chuan ka va phei a, class room bula thutthlengah chuan ka fanu chu amah chauh hian a lo thu ngawi reng a. A melh ngai a lo melh vung vung a, a ngui bur mai. Chutia ka han hmuh meuh chuan ka khawngaih em em a, a bulah chuan ka va thu a.

Mahse a la che eih chuang lo, "Bawihte, tinge thiante lunga i vawm a? Tumah lunga vawm loh tur, a tha lo ka tih kha.." tiin a samah chuan ka chul a. Mahse min chhang chuang lo, a melh ngai chu a melh vung vung ringawt. Ka rilru a ti hah khawp mai, "Hawh le, haw ang le.." ka han tih chuan min en hu a.

"Mahse Anu, kan la bang si lova?" a ti deuh hu mai. Ni e, kum 6 lek niin pawl 1 chauh la ni mahse a chetdan kha a pawi em a. Suspend ni chiah silo, ni deuhreuh tho siin, enkawl deuh phawt turin kar khat chhung school an chawlh tir a ni. Za lo tak chuan ka khi lui suk a, "Nangmah bik chu i bang thei alawm." tiin ka chhang a.

A tho nulh a, a kal vang vang mai. Ka zui ve zel a, kan in lam kan pan pah chuan ka hmaah kalin boruak chu a be leh ta mawlh mawlh mai. Mahse ka hau duh lo, ka ngaithla char char a. Mary chu a lungawi lo tih ka hre thei, "VAwm ka duh lo ka ti mawlh mawlh a, lung kha min chhar luih tir a kher a." tiin boruak chu a hau mawlh mawlh mai a.

Second 7 vel hnuah chuan amah bawk chuan, "KA hria alawm, mahse lunga vawm kha a tha lo alawm. Anu pawn a phal lo, ka duh tawh lo ania." a ti leh a, ngaih ava han ti tha lo tak em aw, ka fanu chu tiin ka rilru chuan ka inbe mawlh mawlh a, ka rilru hi a hah ngawih ngawih a ni.

**********************************************************

Zanriah ei lai te pawh chuan Mary chu a thu ngawi reng a, chaw ei reng a ngaihsak lo. KA en reng a, hnuailam a bih ngar ngar mai. A thaw leh deuh hluai thin a, a tum bur bawk. "Mary, chaw ei ta che.." ka han ti a, mittui tling teuh chung chuan min rawn en a, "Ka ril a tam lo." a ti tham tiak mai.

"Tlemte tal ei tum rawh, i lian thei nang khatiang te chuan...bawnghnute te kha in la." tiin ka thlem a. BAwnghnute chu tlem a in a, "Ka puar." tiin a tho daih mai. Roomah chuan a lut hmak a, Ruatfeli pawh chuan a lo en zui vung vung ringawt. Keipawh chu ka chaw ei a tui tawh bik lo khawp mai, bar 2 vel ka bar a, ka kham ve nghal daih a.

Room ah chuan ka va lut a, Mary chu khumah chuan a lo thu tum bar mai. A bulah chuan ka va thu a, "BAwihte, tinge khatia i awm a? Vawiin thil thleng vang kha em ni, ngati nge i thiannu kha khatia i vawm a?" tiin ka zawt nawn leh a. Tah chhuah hmel em em hian min en a, "Ka duh vanga ti ka ni lo, aman ti turin min ti alawm." tiin min chhang ta mai a.

Ka en deuh hru a, "Tu in maw?" tiin ka zawt nghal. Mary chuan wardrobe inhawng sa, a chhung thim vek chu a kawk a, "Saw sawn..ka thiannu sawn." a ti leh ta mai a. KA va en a, wardrobe chhung chu a thim vek, engmah a hmuh theih loh. MAry chu ka en leh a, "Tumah an awm lo saw, enge i sawi awmzia?" tiin ka zawt leh a.

Chutah a tap pur a, "A awm saw, a din reng saw... Mawimawii khan ka rubber min chhuhsak a, ka dil char char a. A tawpah min seh sawm sak vek a, chu chu ka thiannu hian lunga vawm turin min tia, ka kut a man bet a, min chhar luih tir a, chuan min vawm luih tir alawm." tiin room atang chuan tap chungin ala chhuak daih zui.

Ka thil hriat chu mak ka ti kher mai, enge awmzia ni ta ang? KA hrethiam lo, Mary thusawi kha awih tur nge awih loh tur, a thluak lam hi a chiang ta lo nge ni, enge awmzia ka hre lo a ni ber mai. Chutah wardrobe lam chu ka va en leh a, a thim vek mai si.

Ka ding a, ka va kal hnai deuh va. Mak tak maiin mihring mitmeng ni awm tak hi ka hmu tlatin ka hria, ka ngaih bel zawk nge pawh ka hre lo. Ka va pan hnai zel a, mihring mitmeng ni tlat hian ka hria, A la var deuh pup zui a, a lian hle bawk a, tlem chuan ka hlau ve deuh. Ka phone ka phawrh a, flash light on meuh chuan wardrobe chhung chu ka en chiang a.

Mahse  ka han en chiang chu thildang daih a lo ni, ka hawng zau deuh va. Engmah a lo ni lo hlauh, ka khi suk nghe nghe. Chutah Mary chu a rawn lut leh a, khumah chuan a rawn lawn kai a. A hawi kual a, "Khawnge a awm, khawnge ka thiannu kha a kal hman a, anu?" tiin min rawn zawt ta mai.

Ka thaw hak a, "Mary, tunge ka thiannu i tih ve chhen hi? A awm tak tak lo, i ngaihruatna mai mai a ni. Tumah midang an awm lo, tinge boruak i biak i biak a?" tiin tlem chuan ka han vin ve deuh va. Chutah bengchheng lo tur chuan zaizirin min la hrilh zui, "Tawng ring suh, anu... khatia miin an sawi khan a thinrim thei tehmai ania." ala ti zui a.

Keimah zawk chu ka thin a rim deuh hial mai, ka thaw halh a. Chutah Mary abwk chuan, "Vawiinah pawh school ah min zui zel a, ka be mawlh mawlh a. I sawi ang chiah khan boruak ka bia angin Mawimawii khan min chhaih reng a, kan inhniala . Chuan ka rubber kha min laksak a, ka thiannu kha a thinrim a nih kha, tikhan lungin min vawm luih tir phah ta a nih kha." a ti leh ta zet zet mai a.

Sawi ngaihna pawh ka hre lo, a tawngkam te chu mak ka ti takzet. Tiang khan a tawng zet zet ngai lo, ka mang a ang ta khawp mai. KA thaw leh deuh hak a, "Tunge a hming min hrilh tawh rawh, i thiannu chu tunge a hming?" tiin ka zawt ta a. A hawi kual a, "A awmloh lai hian ka hrilh ang che, ihmaw anu, a hming chu REBECCA-i a nia, kum 8 mi a ni." tiin min chhang ta mai a nih chu.

******************************************

TO BE CONTINUE