REBECCA (MIZO FICTION HORROR STORY) Written by : Aaron Malsawmdawngzuala WARNING : 18+ CHAPTER : `4

 REBECCA

(MIZO FICTION HORROR STORY)

Written by : Aaron Malsawmdawngzuala

WARNING : 18+

CHAPTER : `4

*********************************

Tlai ka haw chu inchhung chu a lo reh kher mai, "Bawihte, Mary?" tiin ka fanu chu ka au vak vak a. Mahse min chhang hauh lo, "Ruatfel, khawnge in awm a?" tiin ka han au leh vak vak a. Inchung lam atang chuan, "Puan pho ka seng." a rawn ti lauh lauh mai.

"Khawnge Mary a awm?" tiin ka zawt a. "Ka bulah hian a awm." tiin min rawn chhang leh a. Inchung zawlah chuan ka han chho ve a, a sawi ang ngeiin Ruatfeli chuan puan pho a lo seng mek a. A bulah chuan Mary chu amah in a lo inbe leh mawlh mawlh tawh a, ka phone a rawn ri a.

Ka han en chu Dr. Sanga a lo ni, inhnuaiah chuan chhukin phone chu ka chhang a. "Aw Hello, Sir.. enge ni ta?" tiin ka han zawt nghal a. "Mahlim, englo ania. Ka inthlahrung viau nangin, naktuk zan atang chuan i night a ngaih tawh hmel khawp mai. Engtin nge siamrem te i duh em, i fanu i ngaihtuah viau em?" tiin min rawn zawt a.

Theih hram se chu night loh ka duh khawp mai, mahse ka inthlahrung ve deuh tho bawk si. "Aa.. nia, theih loh tur pawh a awm chuang hleinem." ka ti bah deuh nuai a. "Keipawh ka inthlahrung khawp mai, mahse in nula kha a awm tho va, chuvang chuan kan han phut lui lo thei lo che a ni." Doctor chuan a rawn ti leh a.

Chutia kan inbia mek lai chuan inchung zawl atanga, "Nilo, Rebecaa... ti suh." ti vak ri hi ka hria a, MAry aw ngei a ni bawk. Chutah rang takin ka han hawi chho va, Ruatfeli chu au tuarin a thawmhnaw zar lai mek thenkhat nen chuan a rawn tla ri dup mai a.

Ruh tliak ri ni awm tak, ri tuar hi ka hre bawk. A sang ve thawkhat bawk si nen, Ruatfeli chu a ngawi nghal hmak mai. Phone chu ka dah vat a, "Ruatfel, Ruatfel.." tiin ka tlan phei nghal. A lu a lo la sawh zui a, tawng pawh a tawng hlei thei lo. A hnang deuh ni ngei tur a ni, a lu atang chuan thisen a rawn chhuak bawk a.

Ka mangang takzet, "Nilo, min pui ru... min pui hram teh u." tiin ka au tak vak vak ringawt mai a. Thenawmte pawh an rawn tlan chhuak a, Ruatfeli chu an rawn buaipui ve nghal a. KA chiai vek tawh, ka thlan a tla bawrh bawrh mai. Muangchang chuan ka han hawi chho va, inchung hmawrh tak chuan ka fanu Mary chu lo dingin hnuailam chu a rawn melh run mai a.

Awm ngaihna pawh ka hre lo, ani lah chuan mit khap miah lo hian min en reng a. Ruatfeli chu tlangval lo kal te chuan an pawm a, Pu Siama te chuan damdawiin an panpui a. Kan in lam chu ka va hawi leh a, pawnah chuan Mary chu a lo awm leh daih tawh.

Ka va pan a, inthiamlo leh hrehawm tih hmel tak hian min lo melh kur mai. KA thinrim bawk si chu ka insum nasa mai, "Engvangin nge i u kha i nam thlak a?" tiin ka zawt a, ka khur dar dar thei hial. Zawi sap hian, "Ka tih a ni lo." tiin Mary chuan min chhang a.

KA thaw hak a, "Anih chuan amahin a rawn tla tihna em ni?" tiin ka zawt leh a, ka vin lek lek tawh. MAry chuan hnuailam a melh a, "Aih, a namthla." tih ringawt chuan min chhang leh a. KA meng phawk hru mai, "Tu in, tu in maw nam thla?" tiin ka zawt leh a, ka aw key pawh a vin tawh khawp mai.

Mary chu a ngawi deuh vang vang phawt a, "REBECCA-i'n.." zawi si, chiang tak hian a ti tham tiak mai. SAwi tur pawh ka hre lo, ka mang hi a ang ngawih ngawih tawh. Rum tak hian ka melh a, "Tunah khawnge i thiannu REbecca-i chu a awm?" tiin ka zawt leh a.

Mary chu a hawi kual a, "Ka hmu lo, khawnge a kal ka hre lo." tiin min chhang a. KA ngawi vang vang a, "Inchhungah lut rawh." tih pah chuan inchhungah chuan ka luhsan a, min rawn zui lut ve mai bawk a. Damdawiina kal tur chuan ka insiam nghal sawk sawk a, Mary pawh chu ka siam ve bawk.

********************************************

Mary chu ka be chhunzawm eih lo, ngawi reng chuan taxi ah ka chuan pui a. Damdawiin lam chu kan pan a, Pu Siama leh a fate an lo awm hlauh chu a tihzia khawp mai. Engkim min lo tih fel sak vek a, Ruatfeli pawh chu ngaihtuah awm em em a ni lo hlauh ve.

Doctor chuan min lo ko vat a, "A ke ruh dinglam hi a tliak a, a tukhum a sawh avangin thisen a hloh hnem deuh bawk nen. Mahse a sawh pawi lo tawk chiah a, tunah chuan thisen pek a ni rih a. A ngaihtuahawm loh ania, naktuk zing lamah chuan a harh mai ang." tiin min hrilh a.

KA thaw huai mai, Pu Siama te pafa pawh chu lawmthu ka hrilh a. PAwisa pek ka tum a, an la duh thak lo lehnghal. An haw hnu chuan kil khata kun renga lo thu, ka fanu Mary chu ka va en a. A bulah chuan ka va thu a, "I ril a tam tawh em?" tiin ka zawt a.

A lu a bu nghut nghut ringawt, sana ka en a. Khua a lo thim tawh bawk nen, dar 7 a lo ri tep tawh mai. Damdawiin canteen ah chuan thil ka ei pui a, mahse min be miah lo, keipawh chuan ka be lem lo bawk. A ngui em em a, a inthiam loh hmel takzet. KA khawngaih hnuhnawh leh khawp mai, engtia han awm zel tur nge pawh ka hre hrih lo a ni.

Ka thiannu Daisy puihna ka dil tawp a, Ruatfeli chu lo riah pui mai turin ka ngen a. KAn pu hnenah thil awmzia kan sawi vek bawk a, ani pawh chuan a lo remti hlauh mai. Daisy chuan chumi zan chuan Ruatfeli chu a riah pui a, kei leh ka fanu Mary erawh in lamah kan haw ta thung a.

************************************************

Zanah chuan Mary chuan chaw ei dawhkanah homework a ti mawlh mawlh a, a bulah thu in ka en reng a. Naupang kum 6 mi chauh ala ni a, mahse tinge hetia a awm bik? Dr. Sangtei pawh ka phone peih tawh lo, ka beidawng tawh. Min chhandan a ngai reng dawn tho, chuvang chuan ka be peih vel tawh lo.

KA aw ka han thian deuh kharh kharh a, "Bawihte, tunah khan i bulah Rebecca-i a awm em?" tiin ka zawt deuh tawp mai. A thil ziah lai chu a tawp chat a, a bula thutthleng ruak chu a en vung vung a. Tichuan min rawn en leh in, "Aw, heta hi a thu." tiin boruak chu a kawk a.

KA maimitchhing vang vang mai, "Mary, Rebecca-i hi a awm tak tak lo. Nangma thil tih vek a ni, i suangtuahna thian mai mai chauh a ni." ka han ti chu mak tih hmel tak hian min en a. "A ni lo, hei ka bulah hian a tu ve reng alawm." tiin min chhang a. Ka khi lui sak a, "I ngaihtuahna vek a ni, MAry. A awm tak tak lo ka tih chu, chuvang chuan duhtawk tawh rawh." vin lek lek chuan ka han ti leh a.

Mahse Mary chuan a lu a thing a, "Aih, a awm. TV pawh kha ama on, chuan au Ruatfeli namthla tu pawh kha amah vek hi alawm." tiin boruak chu a kawk leh a. Ka insum thei ta lo, "Mary, ngawi hmak rawh. Rebecca-i hi i thiannu a ni lova, a awm tak tak lo bawk. I thil tih vek a ni, i nu thusawi chu awih mai rawh." tiin ka vin ta hrep mai.

A ngawi kar a, mahse a tap miah lo. Hnuai lam a melh a, zawi muang chuan a kun a. Keipawh chu ka inthiamlo lehnghal, "Bawihte, Rebecca-i tih tumah an awm lo he inchhungah hian. Tunah pawh hian nangmah leh keimah chiah kan awm, midang tumah an awm ve hleinem." tiin zaidam tak chuan ka han hrilh fiah leh a.

Chutah muang chang hian a rawn dak chhuak a, min rawn melh ta run mai. Chiang fek fawk hian, "Nu, Rebecca-i chu a awm tak tak tih nangpawn i hriat kha." a rawn ti ta mai a. Mak ka ti kher mai, "Engmaw, engmaw i sawi a?" ka ti deuh hu a. MAry chuan a aia chiang chuan min en a, "I hmu a ni lawm ni, hei aman a sawi mek alawm." a ti leh ta mai.

Thutthleng ruak chu ka han en ve ngawt a, mahse engmah a awm chuang der si lo. "Khawi.. khawiah maw ka hmuh?" ka ti bah deuh nuai a. Mary chuan thutthleng ruak chu a en leh vang vang phawt a, tichuan min rawn en leh a. "Nizan current a awm loh va, bati i chhit khan. Banga thla ah khan i hmuh kha, tichuan i duty-na canteen ah i hmuh bawk kha." a ti leh ta zet zet mai.

KA thin a phu nghal dup dup mai a, mak ka ti takzet. A thusawi chu a dik vek bawk si, ni e.. ka hmu chiang alawm. A nih chuan Rebecca-i hi a awm tak tak tihna em ni, ka awih thei lo. KA hmu sual angah ka ngai lui char char a, mahse tunah zet zawng... engemaw tak chu kan inah hian a awm a ni, nge kei hi ka a tawh zawk?

**************************************************

Sitting room ah chuan ka thu ngawi reng a, ka inngaihtuah nasa khawp mai. Ka bengah chuan ka fanu in, "Nangpawhin i hmuh kha..." a tih lai te chu a ri nawn mawlh mawlh a. Ka mitthlaah chuan kha thla, banga hmeichhe naupang thla ka hmuh leh canteen-a hmeichhe naupang kha hmuh kha a lang reng bawk.

TV pawh ka en chuang lo, ka melh ngai chu melhin ka thu reng a. Bed room lamah chuan Mary chu a awm thung a, a ngai te bawkin boruak chu a be leh mual mual tawh a. A thawm pawh a ring khawp mai, a nui uar uar mai a. Kei erawh tih tur ber pawh hre lovin, Ruatfeli ka ngaihtuah bawk si nen, ka thu ngawi vung vung ringawt mai a ni.

A khat tawk chuan Daisy chu ka text reng a, ala harh loh thu bawk min rawn hrilh leh thin. Chutah current a rawn thim thut a, inchhung zawng zawng chu a thim vek mai. Ka phone flashlight ka on a, "BAwihte.. tikhan lo awm rawh, bati ka rawn la dawn.." tih pah chuan choka lamah ka phei a.

Bati ka zawn vel lai chuan room atang chuan Mary nui kur kur ri chu ka hria a, mahse engah mah ka ngai lo lui char char a. Bati lah chu ka hmu hmai lo lehnghal, Mary chu a nui ri leh kur kur thin a, a hlim hmel khawp mai. Chutah le, MAry nui ri chauh ka hre ta hauh lo mai.

Hmeichhe naupang nui ri ve tho, mi pahnih nui ri ka hre tlat. An nui rual bawk a, pakhat zawk chu ka fanu Mary nui ri a ni lo tih chu chiang takin ka hre thei. Ka ding ngil nghal at mai, bati pawh chu ka zawn chhunzawm tawh lo. Flashlight nen chuan room lam ka pan nghal a, kawngka chu ka hawng nghal.

Mary chu min hnungchhawn zawngin a lo thu a, alo la nui kar kar mai. MAhse ka rap em em chu, Mary dar zawn atang khan hmeichhe naupang pakhat hi a rawn dak zuk a ni. Second 1 pawh a tling lovang, a hmel kha ka hmu hman thuak. A var dang pup lehnghal a, a hmui a duk vek bawk.

A rawn dak zuk a, min rawn en a. Mahse a pil leh nghal daih, rang takin Mary bulah chuan ka va tlan a. Mahse ka va thleng chu tumah dang ka hmu lo, amah Mary chauh chu a lo thu a. Flashlight chuan ka en kual vak vak a, mahse ka hmu zo tawh hauh lo. Mary chuan mak tih hmel tak hian min en a, "Khawnge bati chu?" tiin min lo zawt a.

Mary chu ka en a, "BAwihte, khawnge nichina mi kha...khawnge a awm?" ka ti nghal deuh khur khur mai. Mary chuan a hriatthiam loh hmel takzet, "Tumaw?" a ti hu mai a. Chutah current a rawn awm leh hlauh mai, wardrobe chhung te, khum hnuai te chu ka check kual a.

Mahse tumah ka hmu chuang lo, ka hlauthawng, thinrim tawh bawk si chu ka sa pup pup tawh. Mak tih hmel tak hian Mary bawk chuan, "Kei leh REbecca-i chiah kan awm, midang tumah an awm lo." a ti leh chu ka tawp chat mai. Mary chu ka en a, "Khawnge tunah, khawnge tunah Rebecca-i chu a awm?" tiin ka zawt a.

MAry chu a hawi kual a, "A bo leh daih tawh, a chhuak aniang." tiin min chhang leh a. Ka thu hniam a, "Ngaithla teh, BAwihte... nichin khan i bulah khan midang ka hmu, hmeichhe naupang dang an awm. Khawiah nge a awm, i biak mawlh mawlh kha...khawnge a awm?" tiin a mit taka en chung chuan ka zawt leh a.

"Khawiah maw...khawi ka bulah maw a thut?" tiin MAry chuan min zawt leh hu mai. Maimitchhing vang vangin ka han thaw hak a, "I hma zawnah, ka rawn luh veleh khan a rawn dak zuk alawm, ka hmu chiang a ni." tiin ka chhang a. Chutah Mary chu a khi suk a, "Aww.. Rebecca-i a nih kha. Ka hmaah a thu reng alawm, kan inkawm a." tiin min chhang leh ta mai a.

**********************************************

Room atang chuan ka chhuak a, pawnah ka chhuak tlang a. Thawk te ka han la te te phawt a, ka awmdan chu hrehawm tak a ni. Ka tawt up up mai, ka hmu chiang lutuk ringawt. Kha hmeichhe naupang kha, ka hmu chiang a ni. Ka mitvai a ni hauh lo, ka fanu ngei pawhin Rebecca-i a ti alawm.

Hei chu ka ngaihtuahna mai mai a ni tawh lo, engmah thildang chhuanlam siam tur ka nei tawh lo. Rebecca-i hi a awm tak tak ni ngeiin ka hria, engtin nge ka tih tak ang? Ka phone chu ka phawrh a, Dr. Sangtei chu ka call nghal a. Ala la thei lawk lo zui, vawi 3 vel ka call hnuah chuan a rawn la ta hram e.

"Hello, Mahlim..enge ni ta?" a rawn ti a, mahse ka chhang mai thei lo. Ka mitthlaah a rawn lang leh a, ka bengah chuan REBECCA.... REBECCA tih ringawt chu a ri nawn mawlh mawlh ni mai hian ka hria. KA tah a chhuak ngawih ngawih bawk, "Hello, Mahlim...tinge i ngawih reng a?" tiin Dr. Sangtei bawk chuan min rawn be leh a.

Tah chhuah avanga insum deuh chung si hian, "Sa.. Sangte, a tak tak a ni." ka ti thei tawk. A hrethiam lo kher mai, "Engmaw? Engmaw tak tak chu?" a rawn ti deuh hu mai a. Keilah ka sawi hleithei lo, "Re...REBECCA, Rebecca-i..." ka ti bah leh nuai mai.

"Hahdam rawh, Mahlim. Chiang deuhvin han sawi teh, enge thleng a?" tiin Dr. Sangtei chuan min rawn zawt leh a. Thawk ka han la te te a, "Ihh.. Rebecca-i, ka fanu.. MAry imaginery friend, Rebecca-i kha...a tak tak a ni. A awm tak tak, a awm tak tak." tiin ka inhnit hlawp hlawp a.

Sangtei chu a ngawi deuh vung vung a, "MAhlim, engthu nge maw i sawi le?" a rawn ti a. Kei lah chuan vin lek lek hian, "Nilo Sangte, ka chiang a ni. Rebecca-i hi a awm tak tak, ka fanu bulah hian engtik lai pawhin a awm a ni." ka ti deuh hlur tawh mai. Sangtei chu a rawn thaw hak a, "Engtin nge a awm tih i hriat theih?" tiin min rawn zawt leh a.

Chutah ring leng lawng hian, "A CHHAN CHU KA HMU A NI, KA MIT NGEI HIAN KA HMU A NI." ka han ti chu a ngawi hmak mai. Ka tap chhunzawm nghal, "Sangte, ka hmu a ni. KA rilru a hah, vawithum lai ka hmu ve tawh. A tak tak a ni, min awih lovang tih chu ka hria. Mahse Sangte, ka hmu tak tak alawm, min ring rawh." tiin ka insum zo ngang lo a ni, ka tap hawm hawm mai.

Sangtei chuan zaidam tak hian, "Hahdam rawh, Mahlim. Ka thusawi hi ngun takin ngaithla rawh aw, hahdam la." a rawn ti a. Keipawh chuan ka mittui ka hru a, mahse ka thin phu erawh ala pangngai thei thlawt lo. Chutah Dr. Sangtei bawk chuan, "I chau va, i mu tlem bawk a. I hnaah i buai a, i fanu vangin i buai tel ve zel bawk nen. Hahdam i mamawh a nih kha, engpawh nise naktuk tlaiah ka lo leng dawnnia." a rawn ti leh a.

KA thaw hluai a, "Ka hria, min ring lovang. Mahse Sangte, ka hmu alawm. Ka fanu bulah pawh ka zawt a, kha kha Rebecca-i chu tiin min chhang alawm. Chu chu han sawifiah teh, canteen ah pawh ka hmu a, khatih lai khan ka fanu a awm lo. Mahse engtin nge ka fanu khan a lo hriat theih, Rebecca-i'n a hrilh a ni. Bangah a thla ka hmu bawk a, engkim mai hi mumang ang vekin ka hria, ka buai zo tawh a nih hi." tiin ka tah chu a chhuak leh nghal ngawih ngawih mai.

Sangtei chu a ngawi deuh vang vang a, "Enteh Mahlim, kan mut tlem a, kan rilru a hah te hian thil hi kan hmusual fo alawm. KA sawi tak ang khan i fanu hian imaginery friend a nei a, a tak tak angin a ngai a. A hming pawh Rebecca-i tiin a phuah nghe nghe a, a tirah i ngai thutak lutuk a. Hna lamah i lo buai nen, i fanu lah school lamah te buaina a lo nei zel bawk nen. Kha khan Rebecca-i kha a awm ve tak tak angin a ngaih tir che a nih kha, i ngaihtuahna mai mai a ni. Rebecca-i i hmu amaw i tihte kha i mitvai mai mai a ni, sual let rawh. A tak a ni lo ti tlat la, nangmah kha hahdam rawh, thil ngaihtuah vak vak tawh suh." tiin min rawn hrilh leh a.

KA beidawng lutuk chu a chal ka dawm a, "Sangte, a tak alawm. Mi a ka ni lo, i hrethiam lo a ni. I tan chuan sawi mai chu a awlsam ang, mahse i tawng ve tlat lo a ni." ka han ti leh hram a. Sangtei chu a rawn thaw leh deuh hak a, "A nih chuan ti hian ti teh ang, Mary a mut hunah inchhungah khan nangmahin ding la. Rebecca-i chu ko chhuak la, i fanu kalsan tur leh lo tibuai lo turin hrilh rawh." a rawn ti ta mai a.

"Eng a? Enge awmzia? Engvangin maw?"

"Aww.. Rebecca-i a awm tak tak i ti ani lawm ni? A awm tak tak chuan ko chhuak la, inlan turin ti rawh. Ti chuan a lo lang nge lang lo kan hre mai ang chu, video in la bawk la."

"A nih lo chhuak duh lo ta se?"

"A nih chuan Rebecca-i chu a awm tak tak lo tihna a nimai, i ngaihtuahna, in nufa a in ngaihtuahna mai mai tihna a ni."

Ka chhang let tawh lo, ka ngawi reng ringawt. Phone chu ka dah a, in lam chu ka pan leh ta a. Roomah chuan ka lut a, Mary chu a lo muhil tui tawh khawp mai. Sana ka en a, dar 12 leh a chanve a lo pel der tawh mai. Mahse ka mut erawh a chhuak eih lo thung, a lum ka ti takzet, ka thlanin min bual huh dup bawk.

***********************************************

Room atang chuan ka chhuak a, Dr. Sangtei'n ti tura min tih chu tih ngei ngei ka duh deuh ta tlat a. Tichuan kawngka te chu ka kalh fel a, parda te chu ka zar tha vek a. Tichuan sitting room lai takah chuan ka ding a, inchhung chu ka en kual a. Tichuan ka phone ka phawrh a, video chu ka record ta a.

KA chil ka lem dawk a, ka zam khawp mai. Ka tha a khur nasa hle bawk, "REbecca, i awm tak tak a nih chuan ka hmaah hian rawn inlan rawh." ka han ti ve ngawt a, mahse a lo lang tak tak ang tih chu ka hlau angreng hle bawk si. A aia ring hian, "Lo chhuak rawh, Rebecca. Ka fanu hi kalbo san rawh, i awm tak tak anih chuan lo chhuak la, min rawn hmachhawn rawh." ka huaisenna zawng zawng sawm khawmin ka han ankhum leh chiam a.

Mahse boruak chu a reh ngei mai, pawn lama rannung hram ri bak thawm dang hriat tur a awm lo. Choka lamah te chuan ka en kual a, "Lo chhuak ta che, nangmah vang hian buaina tam tak ka tawk tih hre rawh." tiin ka an chhunzawm leh bawrh bawrh a. MAhse eng thawm mah hriat tur ala awm chuang lo, boruak chu a reh takzet.

Ka thaw hak a, ka duh tawk ta e. Ka maimitchhing vang vang a, "Rebecca-i a awm tak tak lo, ni e... ka ngaihtuahna mai mai a ni. Lalpa, khawngaihin min pui hram rawh." tiin keima hriattham lek chuan ka phun mawlh mawlh a, tichuan phone chu ka dah a. Room lamah chuan ka lut a, Mary chu a lo la hnar suk suk mai.

Ka va mu ve a, ka taksa pawh a chau ta hle mai. Ka hah vek thei nia mawle, ka lungphu rang lutuk pawh zawi zawi chuan a ziaawm ve telh telh a. KA rilru chuan ka infuih char char a, ngaihtuah tawh loh hram ka tum a ni. Ka tawngtai tlem vang te pawh a ni mahna, ka mut hma chuan nasa takin ka theihtawp chhuah chuan PAthian hnenah kan nufa tan leh Ruatfeli tan tiin ka tawngtai a.

Ka mu ve thei ta, ka rilru ah Ruatfeli a lo lang nghal a. KA ngaithuah takzet, a dam chian hunah ka chungah eng rilru nge a put tak ang? Min huat phah angem, Mary hi a huat phah angem? Ka inthiam lo bawk si nen, min haw em lovang chu maw tia inngaihtuah chung chuan ka lo muhil ve der mai.

****************************************

KA phone ri ral ral chuan min ti harh a, peih lo tak chuan ka meng tawk tawk a. Ka phone chu ka ban a, ka han en chu Daisy a lo ni. Rang takin ka thu chhuak a, ka harh deuh kawk hian ka hria. Phone chu ka pick up nghal a, "Aw Daisy, enge Ruatfeli a an?" ka ti nghal a.

"Aw... a chanchin rawn hrilh tur che in ka lo phone che a. HEi, tukin chu a harh ve a. Amah pawn ka tha atia, a ngaihtuahawm loh ania." tiin DAisy chuan min rawn chhang a. Ka thaw huai mai, "Ava han lawmawm ve aw, ka tawngtaina Pathianin a chhang a nih chu. Amah a awm em, ka lo be teh ang?" ka han ti leh a.

 

"Aaa thei tho va, mahse tunah chuan a inthiar a, a hmunah rawn kal zawk la. Engemaw hrilh duh che ka nei a tia, amah Ruatfeli hian.. vawiin chu inrinni a ni tho va, Mary te pawh school an chawl a. Lo kal la, chaw eikham velah... keipawh haw ka duh ve angreng tawh khawp mai." a rawn ti a.

"Awle awle, chaw eikham veleh ka rawn kal ang, ka rawn thlak dawn che nia." tiin ka chhang a, phone chu kan dah ta a. Ruatfeli a tha chhuak leh hlauh chu ka lawm khawp mai, mahse zep lo chuan ka hmu hreh ve deuh a ni. A namthlatu kha ka fanu a ni bawk si, kei lahin ka lo vin ka lo vin ve thin bawk nen.

Tleirawl rilru lian, luhlul rual an lo ni bawk nen. Min huat phah ang tih chu ka hlau rilru angreng khawp mai, Daisy khan a hmu duh che, thil hrilh tur che a nei a ti lehnghal a, engtak ni ang maw? A nu leh pate bulah phei chuan Mary nam thlak a nih ka sawi ngam lo, a chhan chu min huat phah ang tih ka hlau a ni.

Mary chu ka en a, a lo la mutui khawp mai. Khum atang chuan ka tho chhuak a, ka hmai te chu ka phih a. Rawng ka bawl sawk sawk a, rei vak lo hnuah chuan Mary pawh chu a rawn tho chhuak ve a. Rawng chu ka bawl zo va, chaw te kan ei kham hnu chuan Damdawiin lam pan chuan kan kal ve ta nghal a.

***************************************

Damdawiin chu kan thleng a, Daisy chu ward bulah chuan a lo awm a. Mary chu kaiin ka va pan nghal a, "Enge a an, a chhungah sawn a awm ami?" tiin ka zawt nghal a. Daisy chuan a lu a lo bu nghat a, "Aw, mahse doctor ten an be mek a. An lo chhuah veleh i lut dawnnia, a rei lovang." tiin min lo chhang a.

"Nizan a mu tha em?"

"Aw a harh eih lo, tukin khan a rawn harh chiah."

"Anih chu...a lawmawm e. A tlak dan vel i zawt em, thil thlen dan vel te?"

"ZAwt ve bawk e, mahse ka rap pial palh a tia."

Ka ngawi deuh vang vang a, "A nih leh ka chungchang emaw, Mary chungchang a sawi miah lo mi?" tiin ka zawt a, a chhan chu rah pial vanga tla a ni lo tlat. Daisy chuan min en deuh hu a, "Engtia sawiin maw?" tiin min zawt let daih mai. "Aa... kan chungchang hrim hrim?" ka han ti leh ringawt a.

"A rawn harh khan khawnge a ti che u a, chuan ka hrilh fiah a. Thil hrilh duh ka nei a, a ti che a. Ka rawn phone nghal che, a bak chu ka be vak lo, a lu a la hai deuh aniang, a ngui lutuk." tiin Daisy chuan min chhang leh a. REiloteah chuan doctor pawh chu a rawn chhuak ve nghal a, "Enge chanchin?" tin ka lo zawt vat a.

Doctor chu a han thaw hak a, "Englo ania, thil hlauhthawnawm chu ani lova. Mahse a lu a hliam hi dam deuh phawt se, kar khat vel chu a awm a ngai dawn. Chuan a ke ruh a tliak ka tih kha, kan tuam khawng vek tawh tho va. Kar khat hnuah a chhuak anga, thla 2 vel chu recover nan hun a mamawh ang." tiin min chhang a, min kalsan ta a.

Kei leh DAisy leh MAry chu ward chhungah chuan kan inzui lut a, Ruatfeli chu a lu an lo tuam bur a, a ke an lo cher khawng bawk. Ka khawngaih a, ka inthiamlovin ka inthlahrung hle bawk. KA va pan a, "Ruatfel, i ril a tam em, enge i an tawh?" tiin ka va zawt a.

Ruatfeli chuan Mary chu a lo en vung vung a, Mary pawh chuan a lo melh let ve kur bawk. Nui lui tih hriat tak hian a khi suk a, "Ka tha alawm, ka ziaawm tawh lutuk." tiin min lo chhang a. Khumah chuan ka thu a, "Min hrilh duh i nei em ni, min hrilh la?" ka ti leh a.

Ruatfeli chuan Daisy leh Mary chu a en tawn zak zak a, "Ihh... mimal thil lutuk ania. A fal in biak che ka duh a, chutia hlauhthawnawm pawh a ni hran lo ania." tiin a nui sen sen a. Daisy chu ka en a, "MAry hi pawnah ka lo va awmpui ange." tiin hrethiam tak chuan Mary chu a hruai chhuak nghal a.

KAwngka an khar rual rual chuan Ruatfeli chuan ka kut a rawn vuan nghal a, "Nu Mahlim, ka hlau lutuk." tiin a hmel chu hlauhna in a khat nghal vek nia mawle. KA hrethiam lo kher mai, "Enge awmzia, han sawi teh.." ka lo ti ve vat bawk. A thaw deuh hlawp hlawp a, "Ka hmu a ni, ka hmu chiang a ni." a ti leh a.

KA en hu ringawt, "Tumaw i hmuh, a hrim hrimin engtin nge i tlak, Mary khan a nam thla che em ni?" tiin ka zawt leh a. A lu a thing a, "Nilo, Mary thil tih a ni lo. Ka hmu a ni, leia ka tlak hnu khan." a ti leh chiam chiam a. Min ti hlauthawng vek tawh, "Tumaw i hmuh ka tih chu..." tiin ka han zawt nawn leh a.

A thaw halh halh a, a sawi mai thei lo. Chutah muang chang chuan min en a, "Mary...Mary bulah khan...leia ka tlak hnu khan.." a ngawi leh deuh dat a. A chil a lem dawk a, "A bulah khan ka hmu, min buaipui lai khan... a thiannu anga a sawi, REBECCA-I kha ka hmu a  ni." tiin min chhang ta mai a.

Ka thin a phu leh ta dup dup mai, "Eng....engmaw? Rebecca-i a?" ka ti hu mai a. Ruatfeli chuan a lu a lo bu nghat nghat a, "Aw.... Mary kha a awm hla lutuk, tu emaw chuan min rawn nam ngei alawm. MAhse min nam lai ka hmu lo, mahse MAry erawh kha chu a awm hla lutuk." tiin min chhang leh a.

Ka ngawi vang vang a, ka han ngaihtuah let leh a. Chutah enge maw hriat chhuah zawk ka nei, kan pu nena kan inbiak lai kha a ni a. Zana night tura min hrilh lai kha a ni, Ruatfeli a rawn tlak hma khan Mary khan thil sawi a nei, "Rebecca, nilo.. ti suh." a ti tak e.

A awmzia chu, a nih chuan... Rebecca-i nam thlak zawk a ni tak tak tihna em ni? Dr. Sangtei ni lovin, kemah zawk hi ka dik tihna em ni? REbecca-i chu keimah chauh nilovin, Ruatfeli pawn a hmu ve tawh amaw? "Nu Mahlim, ka hmu a ni, ka hmu chiang lutuk." tiin Ruatfeli chu a mittui a rawn tla zawih zawih mai a.

*********************************************

TO BE CONTINUE