USAGI : 2 (THE BUNNY RETURNS) ENGLISH : DARK BUNNY [MIZO HORROR/SLASHER FICTION STORY] Written by : Aaron Malsawmdawngzuala WARNING : 18+ CHAPTER : 4

 USAGI : 2 (THE BUNNY RETURNS)

ENGLISH : DARK BUNNY

[MIZO HORROR/SLASHER FICTION STORY]

Written by : Aaron Malsawmdawngzuala

WARNING : 18+

CHAPTER : 4

*******************************

Restaurant pakhat ah hian Esi leh Isaka te chu an chawl dun a, Isaka chu a titi mawlh mawlh a. Esi erawh chuan a ngaithla eih lo, a rilru chu hmundangah a awm daih thung. Isaka chuan a han en a, "Esi...Esi...ka thu sawi chu i hria em?" tiin a han zawt a. Mahse Esi chuan a chhang miah lo, a melh ngai a melh vung vung ringawt.

Ring deuh tak hian Isaka chuan, "Esther..." a han ti vak a. Esi chu a phu zuk mai, "E aw...engmaw?" a ti bah nuai mai a. Isaka chu a han thaw hak a, "Min lo ngaithla miah lo em ni a?" tiin a lungawi loh hmel kher mai. Esi chu a thu tha a, "Ka tihpalh lutuk, thildang ka rilru ah a lo lut zuai alawm mawle." tiin inthlahrung tak chuan thupha a chawi nghal a.

Isaka chu a han ngawi vang vang a, "Enge i lo ngaihtuah reng reng a?" tiin a han zawt a. Esi chu a khi suk a, "Engmah a ni lo...a ho lutuk. Chuan..engmaw i sawi lai kha?" tiin a rawn zawt let daih a. Isaka pawh za lo tak chuan a han nui huk a, "Aaa..theihnghilh rawh, tunlai hi i hlim loh hmel riau mai, enge i chungah thleng a? Buaina i nei em ni?" tiin a han zawt ve leh a.

Esi chuan a lu thingin, "Nei love." a ti deuh hmuk ringawt. Inbe miah lo chuan an han thu ngawi vang vang a, Isaka chuan a phone chu a phawrh a. Reilote hnuah chuan, "Ehe...he thil chuh!" a rawn ti chhuak hlawl mai. Esi pawh chu a lo meng phawk hru a, "Enge a?" a lo ti vat a.

Isaka chuan a phone chu chiang leh zual chuan a han bih a, "Tukin dar 4 leh minute 15 vel khan All Win High School building hlui hnungah ruang panga chhar a ni a, an vai hian mipa vek niin kum 20-25 vel  an ni. Tualthahna ni ngei a rin a ni a, police te sawi dan chuan nizan dar 8 bawr vela thil thleng a nih hmel. Ruang te hi an taksa a hliam nasa hlawm hle a, chemte-a vihna hnuhma tamtak an neih vek mai bakah pakhat phei chu a ban dinglam a bung tep a, a lu pawh hmuh tlak awm lo khawpin a chhe hneh a ni." tiin a rawn chhiar chhuak ta mai a.

Esi thin chu a phu nghal dup dup mai, "Khawi a mi nge i chhiar a?" tiin a zawt nghal a. Isaka chuan zawi te hian, "Facebook ami." tiin a chhang sap a. Esi ngaih chu a tha lo hle mai, "Mi panga lai maw? Tualthahna ah pawh ava rapthlak ve mawle.." a ti nuah nuah mai.

Za lo tak hian Isaka chu a han khi lui suk a, "A aia rapthlak kan tawn tawh kha..." a lo ti sam et a. Chutah Esi chuan Isaka chu a han melh hrawk a, "Isak..Rsa kha MED Hospital atang khan a tlan chhuak a, a thi nge a dam pawh hriat a ni lo. Chuan tuna tualthahna hi...hetiang em em a rapthlak hi chu Rsa bakin a ti duh hauh lovang." a ti khur dar dar mai.

Hriatthiam loh hmel tak chuan Isaka chuan, "I sawi awmzia chu...Rsa thil tih a nih i ring tihna maw?" a han ti deuh hu a. Esi chuan a chil a lem dawk a, "A ni lo tu mihringin nge hetiang khawpa rapthlak hian tual that duh ang?" tiin a lo zawt let a. Isaka chu a thaw deuh hak a, "Esi..Rsa chu a awm tawh lo. Midang tualthahna pawh a ni thei, tualthahna thleng apiang hi Rsa thil tih a ni vek kher lo." a ti deuh hlur mai.

Esi pawh chu a lungawi vak bik lo, "I hre ngawt ami? Isak, Rsa hi ala dam ka ring tlat a ni. Tunlai phei chu, amah ang deuh deuh kha hmu a...min ti hlau thar takzet asin." tiin a tap deuh nghal pur mai a. Isaka chu a han maimitchhing vang vang a, "Esi...i ngaihtuahna mai mai a nih kha." tih ringawt chuan a chhang a.

Esi chu a thinrim kher mai, chhan pawh a chhanglet peih tawh lo. Chutih lai chuan a phone a rawn ri a, an school Principal a lo ni. RAng takin a chhang a, "Aw Hello, Sir...aih buai love....ENGMAW?" a thutna atang chuan a ding nghal a, Isaka pawh a lo phu zuk mai.

Esi chuan phone a dah, "Isak..kan kal angai..kan kal vat angai." a ti nghal chel chul mai a. Hrethiam lo tak hian Isaka chuan, "Engthil nge ni a, ei man pawh kan la pe hleinem...tinge a?" a lo ti hu mai. Esi chu a thaw hlawp hlawp a, "Hlutei..Hlutei'n tawhsual a tawk." tih leh kal a rual nghal a, restaurant-a chawl ve dangte pawh chu an lo hawi thup mai.

Isaka chuan umzuiin, "Min lo nghak rawh, kan ei man te hi ka han pe ve phawt ange.." a ti lawm lawm a. MAhse Esi chu a kal zel a, "Motor ah ka lo nghak ang che, hmanhmawh la.." tih leh pawna chhuah a rual nghal a, Isaka pawh chuan an ei man te chu pe in a zui chhuak ve nghal a.

*************************************

Hlutei thihna crime scene ah chuan Inspector Awmpuia leh SI HMinga te chu an lo awm leh der tawh, forensic doctor te chuan ruang te chu an en dik mek a. AWmpuia chuan ruang hmu hmasa ber tu putar pakhat chu a lo kawm mek a, "Anih leh ka pu, ruang i hmuh lai vel chuan tumah midang an awm miah lo maw?" tiin AWmpuia chuan a han zawt a.

"Aw ka pu tumah an awm lo, a tir chuan buara chhunga bawlhhlawh an thun khawm amaw ka ti a, ka kal pel mai a. Mahse ka han enchian khan buara ah hian thisen a kai tlat in ka hria a, ka han enchiang a, ruang hi ka hmu ta a, ka lo phone nghal che u a ni." tiin a chhang a.

Chutih lai chuan forensic doctor pakhat hi a lo kal a, "Sir, hei hi victim hand bag ah kan hmu a ni." tiin paper them hi a rawn pe a. Awmpuia chuan a lo la vat a, a han enchiang a. Chutah chuan lian tak hian, "ESTHER.." tih hi hawrawp chhe tak hian a lo inziak a.

Awmpuia chuan a han en vang vang a, "Esther? Esther? Tu Estheri nge ni ang?" a ti nuah nuah mai. Reiloteah chuan Principal pawh chu a lo thleng a, Awmpuia chuan lehkha them chu a ak tha nghal vat a. Principal chu a rawn phei a, Awmpuia nen chuan an inkawm a. "Kan zirtirtute zingah chuan a zaidam ber ang, a fel lutuk bawk. Hetiang khawp a nghaisa a that duh tur khawp hmelma a neih ka ring lo, mi tha tak a ni." Principal chuan a han ti a.

AWmpuia chuan a lu a han bu nghauh nghauh va, "A thawhpuite zinga amah itsiktu an lo awm te hi a ni thei mai lo maw?" tiin a han zawt leh a. Principal chuan a lu thingin, "Aih...chutia dinhmun sang chelh pawh a ni hran lo. Itsik tur pawhin chuti teh lua a ni lo, kei pawh hian mak ka ti khawp mai." tiin a lo chhang a.

Chutih lai chuan Esi leh Isaka te pawh an rawn thleng ve ta, ruang chu Esi chuan a rawn hmu ve a. Ring tak hian, "Awii ka duh thei lo...Hlute, Hlu-i..ka duh lo." tiin va pan a tum a, Isaka leh police dangte chuan an lo pawt ding nghal a. Esi chu a tap vak vak mai, Principal pawh chu va kalin Esi chu ava buaipui ve nghal a.

Awmpuia chuan Esi chu a lo en vang vang a, a bula amah lo buaipui mektu Isaka hmel chu a han en leh a. A hriat tawh hnu ve ve an ni, a hma kum lawk a Rsa lak atanga him awmchhun pahnihte ngei kha an ni tih chu a hre nghal a. "ESTHER" tia an ko ri chu a hre bawk a, a ipte a lehkha them chu phawrh leh in a han en leh vang vang a.

******************************

(AFTER 2 HOURS)

Hlutei ruang pawh phurh phei a ni tawh a, mipui pungkhawm pawh a tam zawk chu an haw darh tawh. Esi leh Isaka te erawh an la awm a, school staff ho tlem an la awm bawk. Motor kawngka hawng chung chuan passenger seat lam zawkah chuan Esi chu ngawi reng hian a thu a, a mit pawh a bui luk mai.

A bulah chuan Isaka chuan awmpuiin a kut a vawn sak reng bawk a, chutih lai chuan AWmpuia chu an bulah chuan a rawn kal a. Isaka chuan a hmuh veleh chuan a ding nghal a, "I lo dam thin maw, Isak?" tiin ava chibai a. Isaka pawh chuan polite tak hian, "Ka dam a lawm, ka pu..." tiin a lo chhang a.

Awmpuia chuan Esi chu a zu melh ve a, "I tha em, Esther?" tiin a han zawt ve a. MAhse Esi chuan a chhang lo, a melh ngai chu a melh leh reng mai. AWmpuia chuan a aw a han thian kharh kharh a, "Khawngaihin in pahnih hian ka lo kawm fal lawk thei che u angem? A pawimawh khawp mai, a chhan tur awm ang pawh in hriatthiam mai ka ring." a han ti leh a.

Isaka chuan a lu a lo bu nghauh ngauh va, "Awle..ka pu, thei tehreng mai." tiin a lo chhang leh vat a. Awmpuia chu a han thaw hak a, "Min lo zui ru." tiin a kal a. Isaka chuan Esi chu a kai thova, "Hawh le..kal ang le." tiin dim tak chuan a phei pui a, Esi pawh chu ngawi rengin a kal ve mai bawk a.

A fal deuh laiah chuan Awmpuia chuan Esi te pahnih chu a kal hran pui a, "Tulathattu hi keichuan ka hria a ni." a han ti chu Isaka a rawn meng phawk nasa mai. Esi erawh a melh ngai melhin a la che miah lo, "Engmaw ka pu, tunge tualthattu chu?" tiin Isaka chuan a lo zawt vat a.

AWmpuia chu a han thaw hak a, "Kha hei hi enteh, Esi.." tih pah chuan paper them chu a pe a. Esi chuan a lo ban ve mai bawk a, a hming lo inziak a hmu chu a meng kawk mai. AWmpuia chu a en a, "Ni e, Rsa vek a ni. Rsa hi ala dam, ala thi reng reng lo." tiin AWmpuia chuan a lu a lo bu nghat nghat a.

Isaka chu a ner sak a, "Nilo..Rsa chu a thi tawh ang. Kum khat lai a liam tawh, tuna a rawn chet leh thutna tur a awm lo." a lo ti a. "Kum khat chhung a bo, mahse a thi tihna a ni lo. Police te hi Rsa bo lai khan kan awm mai mai bik hleinem, hmun tinah kan zawng ve reng tho asin." AWmpuia chuan a lo ti leh vat a.

Esi chuan khur dar dar chung hian, "Ka pu, hei hi..he lehkha them hi khawi a mi nge?" tiin a rawn zawt ve a. AWmpuia chuan zawi te hian, "Hlutei hand bag ah a lo awm." a ti sap a. Isaka erawh chuan ala awih thei lo, "Mahse engtin nge a nih theih? Finfiahna a awm em?" tiin a han zawt leh hram a.

AWmpuia chu a khi suk a, "Isak, nizan khan ALL WIN High SCHOOL building hlui hnungah ruang panga chhar a ni a, a sirah chemte chhar a ni bawk. Chu chemte a finger print leh Rsa finger print kan neih sa chu kan en mil a, a inang chiah chiah a ni." tiin a chhang a.

Esi chuan Isaka chu a han melh deuh hraw a, "Tikhan ka thusawi chu i awih tawh em?" a han ti deuh hlur a, Isaka pawh chuan chhan ngaihna vak pawh a hre tawh bik lo. Chutih lai chuan Esi nu leh pate chu an lo thleng a, Pi Chhingi chuan a fanu chu a rawn kuah nghal thlawp mai.

****************************

Tlangval senior zet tawh pakhat, Sena leng chu a haw mek a. Sena hi amah a inluah a ni a, thingtlang atanga Aizawla rawn awm a ni. A bialnu nen phone-in an inbe pah a, a rui angreng phian lehnghal. A inluah chu a thleng a, a lut a. KAWngka chu a la hawng huau zui a, thutthlengah chuan a han mu nghal a.

A be tui laklawh bawk si chu kawngka va khar lehna chang pawh a hre lo, "Lawk aw..ka zun a chhuak lutuk..ka'n zung pah ange..la dah chuang suh aw.." tiin bathroom lam a pan a, kawngka erawh ala khar ta chuang lo. Chutah Rsa chu inchhungah chuan a rawn lut ta, choka lam ava pan nghal chat.

Chemte a zawng kual nghal a, a chhan chu chemte a neih tawh loh vangin a thar a mamawh pawh a ni mahna. Pawhdawh te chu a hawng kual a, chutah chemte chu a hmu ta. Hriam tha tak leh sei tha tak a ni bawk a, a en vang vang a. Chutih lai chuan Sena chu bathroom atang chuan a rawn chhuak a, Rsa nen chuan an intawng fu ta.

Sena chu a phu zuk a, chutia palian tak mai leh sazupui hmaikawr vuah a choka a lo ding luau mai a hmu chu mak a ti kher mai. Chutah chemte ala keng zui, "Hey..tunge i nih a? I va tlangnel ve, enge i duh a?" tiin a han vin khur khur a. Mahse Rsa chuan a chhang lo, a en reng ringawt.

Sena bawk chuan, "Chemte kha dah rawh...tu phiangsen nge i nih a?" a han ti vin leh thak a. Mahse Rsa chuan ngawi reng hian a en reng ringawt a, "Eheu..min tihthaih te i tum ve khanglang elaw? Ka hlau miah lo che ania, chemte kha dah la chhuak vat rawh..anih loh chuan..." tih pah bathroom kawngka sira thirtiang lian lem lo tak lo intung chu a chuh nghal a.

Rsa chu a dinna ngaiah a la ding reng, "Ka vaw hlum hreh miah lo che ania, tunge i nih?" a han ti leh vak a. Rsa'n ala chhan chuan loh avang chuan ani lo rui pawr ve tawh bawk nen, Rsa bekah chuan thirtiang chuan a han hlap pawp mai a. Rsa pawh pen khat vel chuan a hnungtawlh ve deuh va, mahse na ti awm ang pawhin a lang lo.

Sena pawh chuan mak a ti kher mai, Rsa lah chu rawn hawi let leh in a ngai te ang bawk chuan a han melh leh khur a. Sena chuan theih patawp hian, "Zawnga lehh..thi rawh." tih pah chuan han hlap leh a tum a. MAhse Rsa chuan thirtiang chu a lo man chat mai, a kut lehlama a chemte hum chuan Sena dulah chuan a vit tlum ta pawk mai a.

Sena chu a ding ngil zawt mai, Rsa chuan dim lo tak chuan chemte chu a han phawi ri leh hrawk a. Sena chu a khur der der a, chhuatah chuan a pum dawm chung chuan a thingthi hnawk mai. Thisen chu a kawi nghal nuai bawk a, a thirtiagn ken lai chu a thlah a.

Rsa chuan a kut lehlamah chuan chemte a keng a, lehlamah chuan thirntiang a hum bawk. Chutah chemte zawk chuan Sena hrawkah chuan a vit leh ta hrawk mai, thisen chu a rawn baw chhuak leh hawk hawk a. Sena chu saisr zawng chuan a tlu hawk a, a ka atang chuan thisen a chhuak nasa ngei mai.

A hrawkah lah chemte chu a la bur va bawk a, mahse a la thi lo. Rsa chu a zu kunhniam a, chemte chu a han phawi ri leh hrawk a. Mahse Sena chu ala thi chuang lo, a la thaw hrawk hrawk a. Rsa chuan a la kalsan duh mai chuang lo, Thirtiang chu a han lek kang leh a, Sena beng kawrawng chhungah chuan a chhun hian a chhun tlum leh ta thawih mai a, a thuk bawk aniang, a beng lehlamah chuan a tlang a.

Chhuat thleng chuan a tlang thla vek mai, Sena chu a ang sawi bawih bawih a, a thi chiang ngei mai. Rsa chuan thirtiang chu phawi pawh a tum tawh chuang lo, chemte chu ban lehin pawnah a chhuak ta daih a. Sena ruang chu chhuatah chuan a let reng mai a, inchhung ah chuan thisen a kawi nuai bawk.

**********************************

Esi chu a nu lehpa leh Isaka te chuan inah an luh pui a, Esi chu a tap nasa bawk aniang, a chau takzet. Pu Ringa chuan, "Isak, ti hian lo awmpui la...lo kalsan suh aw. Kan lo haw har lovang, mithi in lamah kan hmel kan va lan ve zuai ange.." a han ti a. Mahse Esi chuan zawi sap hian, "A ngai lo, Pa..chhuak suh u, a him lo ania." a han ti tuau a.

Mahse Pi Chhingi chuan, "Engmah kan chungah a thleng lovang, motor-in kan kal dawn alawm. Kan rei dawn lo, in hi a chhunglamah lo kal ang che u." tiin a lo hnem ve bawk a. Esi chu a hlauthawngin a thla a muang lo kher mai, mahse a hnial zui ta bik lo.

An kal hma chuan Pu Ringa bawk chuan, "Lo awmpui rawh aw Isak, i nu Chhingi sawi tak ang khan kawngka hi a chhunglamah lo kalh tlat ula, kan rawn haw dawnah ka rawn phone mai ang che u." tiin a han chah leh a. Isaka pawh chuan, "Awle, Pa Ring...ka lo awmpui ang." tiin a chhang a, Esi nu leh pate chu an kal ta a.

Isaka leh Esi chu an thu dun a, Esi thla chu ala muang thei mawlh lo a ni. Isaka'n a biak pawh chuan a rul tawk te te bakin a chhang lo, Hlutei chu a ngaihtuah chhuak leh thin a, a inhnit leh feih feih thin. Reife hnuah chuan Isaka chu a han thaw deuh hluai a, "Ka va inthiar lawk ange aw..tikhan lo awm rawh aw.." a han ti a.

Esi chuan a lu a lo bu nghut ringawt, Isaka chuan a kalsan ta a. Esi chu a tap leh thin a, "Hlute, avan pawi tak. Keimah vang vek a ni, ka lo kalpui lo che a ni." tiin a mittui chu a tla zawih zawih mai. Chutih lai chuan choka lamah chuan thawm a hria a, Isaka a inthiar zo tawh a nih ringin a mittui te chu a hru hul a.

A aw te chu han thian kharh kharh in, "Isak, tui min lo lak nghal teh aw.." tiin a han au va. Mahse tuman an chhang ta hauh lo mai, "Isak..Saka?" a han ti leh a. Mahse chhangtu an la awm chuang lo. A ngaih tha vak lo chu a tho va, choka lamah chuan ava phei a.

Chutah le, choka lam atanga pawna chhuahna kawngka chu an lo khar ve reng reng lo tih ava hmu ta. A ding chat a, "Nilo..awi ka duh thei lo." tiin dawhkana chemte chu a chuh nghal vat a. KAwngka lam chu zawi muang chuan ava pan a, thawm lah chu a reh diak mai.

KAwngka chu ava thleng a, a han dak chhuak vel a. A hawi kual ngial pawh chuan tumah a hmu lo, tichuan kawngka chu a kalh tha nghal a. A let leh tur chiah chu tu emaw hi a su pawp mai, a la phu nasa em em zui. Mahse Isaka a lo ni hlauh va, "AWii..LAl Isak..min ti phu lutuk." tiin a thaw deuh nghal hrawk hrawk a.

Isaka chuan mak tih hmel tak hian, "Tinge min koh vak vak a, ka inthiar ka tih kha.." a han ti a. Esi chuan tap tuau hian, "Min ti hlauthawng hman alawm, choka lamah hian thawm ka hria a. Nangpawh lo eih ve mai tur ania, nge i ngawih reng?" tiin a hau deuh hrep a.

ISaka chu a nui huk a, "AW....hei ka awm tawh hi..Hlau tawh suh..hawh teh, phei...." a sawi zo hman lo. A awm zawnah chuan chemte hmawr a rawn lawr thut mai a, thisen a luangthla nghal zawih zawih bawk. Esi chu a au vak a, "Isak..awi ka duh lo." tiin a tawlh hnung nghal.

Chemte chu hnunglam atang chuan a rawn inphawi leh a, Isaka chu chhuatah chuan a let nghal tawp mai. Rsa chu a hnungah chuan a lo ding reng chu niin, Esi nen an han inhmu leh ta chu Esi pawh a ngawi hmak. Hlau tak chung chuan Rsa chu a en a, Rsa pawh chuan thlek meuh hian a lo en ve bawk.

Mahse Esi chuan chemte chu a la hum ve reng a, "R...RS...Rs.." a ti bah nuai mai a, a thlan a tla zawih zawih bawk. Chutah Rsa chuan a va pan ta mai, Esi chuan chaw ei dawhkan chu helin tlanchhiat a tum a. Mahse lehlam ah chuan Rsa chuan a lo tlan khalh hlauh mai, Esi chu a man ta.

A kek vak a, Esi chu a t(r)e nasa ngei mai. Chutah Rsa chuanEsi nak nem laiah chuan a vit leh ta siah mai a, mahse Esi chu a lo tal ve deuh avang chuan a vit tlum vek hman lo. Esi chuan a chemte ken lai chuan Rsa darah chuan a han vit ve ta siah mai a, Rsa pawh chuan Esi chu a nam thlu tawp mai.

Na a ti ve ngang a ni ngei ang, a dar chu a dawm ve vawng vawng mai a. Esi chu a rawn tho leh a, rum zet hian Rsa chu a melh a. Va vih leh a tum a. MAhse Rsa chuan a kut chu lo man sakin chemte chu a thin tlak sak a, a chemte ken chuan Esi chu a han vai pawp a.

Esi banah chuan a zai fuh ta a, Esi pawh a rak thawt mai. Chutah Rsa chuan a rawn rek leh nghal a, bangah chuan a reh chilh a. Esi chu a thaw tha thei ta der lo mai, Rsa hmai chu a theihtawp chuan nam vak vak ringawt a. Chutah a hmaikawr chu phelh sak a tum ta, Rsa erawh chuan a lo phal hauh lo mai.

A rehna chu a thlah a, Esi pawh a thaw hrawk hrawk mai. Rsa chuan Esi chu na em em hian a hmaiah a hnek siah mai a, Esi pawh a thal leh ta tawp mai. Rsa chuan chemte chu ala keng reng a, Esi chu ava pan leh ta. Esi zangthal zawnga chhuata tlu mek azu thut bet a, a chemte chu lek kangin vih a tum ta mai a.

Mahse Isaka chu rawn tho leh in Rsa chu a rawn bawh phei rawk rawk a, sitting room lamah chuan an lum phei dun tawp tawp mai. Rsa pawh chuan a chemte chu a thlauh ve ta, Esi pawh chu a rawn tho leh nghal vat. Isaka erawh a hliam a nat em avang leh thisen a hloh hnem tawh em avang chuan a tho ve thei lawk lo, a ka(mouth) atang chuan thisen a rawn chhuak leh thin a.

Rsa pawh a rawn tho leh vat, ISaka chu a tham kang lawp a. Sitting room glass dawhkan keh vek khawp chuan a den hian a deng hi a ni ber mai. Isaka chu a na tawh takzet, "Hey...Lalruatsang, keimah hi ani lawmni min thah hmasak tur chu? Lo kal ta che...min rawn that hmasa ta che." Esi chuan a rawn ti vak vak a.

Rsa chuan rum zet hian ava melh a, ava pan phei ta. Mahse chemte a nei tawh lo, Esi erawh chuan a lo rum leh ran tawh. Rsa a rawn thlen veleh chuan Esi chuan lo vih leh a tum a, mahse Rsa chuan a lo dang hman hlauh mai. An han inchei chiam a, awlsam tak chuan a laksak thei nghal mai.

Esi chu a theh thlu thuai a, chutah a malah ala vih sak zui. Esi na ti lutuk chu a tap vak vak ringawt mai a, Isaka lah a thi nge a dam pawh hriat a ni lo, a let reng mai. Rsa chuan Esi ke veilam, a hliam zawk chu a vuan a. Sitting room lamah a hnuk phei ta mai a, "Min pui ru...min tanpui ruu.." tiin Esi chu a au vak vak ringawt mai a.

Rsa lah chuan verandah lamah a hnuk chhuak a, a la rum nghut nghut zui leh ta nghal a. Mahse choka lam kawngka chu a rawn ri rak a, Rsa chuan Esi chu thah a lo tum vel mek tawh. Inspector Awmpuia a rawn lang thut mai, "Rs...che tawh suh." tiin pistol chuan a rawn tin a.

A hnungah chuan SI Hminga leh police dang panga vel an rawn lang ve nghal bawk. Mahse Rsa chu reilote bak a tawp lo, ngaihsak loh hmel tak chuan Esi chu a bei chhunzawm leh ta mai a. Duhthlan tur dang nei tawh hek lo, AWmpuia chuan a kap ta ringawt mai.

Rsa hnute zawnah chuan a fuh a, a pai khawt khawt mai. VErandah-a awm mek a ni bawk si, balcony atang chuan a tla thla ta daih mai a. Esi te balcony atanga lei hi ft 15 vel laia sang a ni a, mihring pangngai pawh a vanduai viau phei chuan tlak hlum theihna a ni.

AWmpuia chuan Esi chu a va pan nghal a, "Esther, i tha em?" tiin a zawt a, Esi chu a lo chau tawh hle mai. Chhan pawh a chhang tha thei lo, "Khaw..khawnge Isaka? Isaka...Isaka kha tanpui rawh u." a rawn ti tawk tawk a. Police dangte chuan Isaka chu an buaipui nghal a, SI Hminga erawh balcony atang chuan a zu dakthla nghal a.

MAhse mak tak maiin Rsa chu hmuh tur a lo awm tawh hauh lo, "Sir..Sir..RSa ka hmu lo, a awm miah lo." Hminga chuan a ti chel chul mai a. Awmpuai chu a thinrim kher mai, "Hrep tak chuan le...Hminga, ala tlan hla lovang. Tunah mi pahnih hruai la, zawng nghal rawh u." a han ti a.

Hminga pawh chuan, "Awle Sir." tia chhangin police dang pahnih nen an chhuak nghal a, Isaka chu midang la awm ho chuan an zawn chhuak nghal a. Esi pawh chu Awmpuia chuan a pawm chhuak a, an pahnih chuan damdawi in lam an panpui ta nghal a.

******************************

Esi chu a rawn harh thut mai, a che hrut a. A bulah chuan nurse pakhat hmeltha tak hi a lo awm a, "Ehe Esi, i lo harh tawh maw?" tiin a rawn bia a. Esi chu a han hawi kual a, ward chhungah a lo awm reng mai. Drip an lo khai a, amah chu a chau hle bawk. Hlauhthawn hmel tak hian, "Isaka..khawnge Isaka?" tiin thawh nghal ngawt chu a tum a.

Mahse a taksa chu a lo sil them thum mai a, a nak chu a rawn thip zawk bawk. Nurse chu rawn pheiin, "Esi..fimkhur rawh. I nak nem ah tak khan hliam i tuar ania, a th(r)uina kha a peh hlau ange.." tiin a rawn hrilh a. Esi na ti chu a th(r)en chawk chawk a, "Khaw..kahwnge Isaka...a tha em?" tiin a zawt nghal a.

Nurse chuan zaidam tak hian, "A tha e...a ngaihtuahawm loh. Zai nghal a ni a, tunah chuan biak theih a ni rih lo. Mahse a tha e, nangpawh i vannei khawp mai. Chemte kha a lut thuk vak lova, reiloteah i dam mai ang." tiin a chhang a. Chutih lai chuan Inspector AWmpuia leh Pi Chhingi te nupa chu an rawn lut a, "AWii..BAwihte, ka hlauhthawn hman zia hii.." tiin Pi Chhingi chu a rawn tap lut titih nghal a.

Esi pawh chuan a lo kuah thlawp a, "Nu..ka hlau, ka hlau lutuk." tiin a tap nghal hawm hawm mai. Pi Chhingi chuan duat taka chul hliau hliau pah chuan, "I tha maw? Na i la nei em, ka chan tawh dawn che amaw ka ti hman alawm." tiin ani pawh chu a tap ve nghal a.

Esi chuan thaw hlawp hlawp hian, "Nu..Pa...Rsa..Rsa ala dam. Rsa thiltih vek a ni, a lo kir leh a ni." tiin a mittui chu a tla zawih zawih mai. Zaidam tak hian apa chuan, "Bawihte, kan hria alawm. A pawi takzet, kan lo chhuahsan che a. Mahse hei tunah chuan kan awm tawh alawm, engmah hlau tawh suh." tiin a lo hnem ve bawk a.

Rei lo te hnuah chuan AWMpuia chuan, "Ka pi, in nupa khan min chhuahsan lawk thei angem, Nurse..nang pawh aw.." a han ti a. Pi Chhingi te nupa leh nurse chu an chhuak ta a, Awmpuia chu Esi bulah chuan ava thu a. Esi pawh tlem chuan a zia deuh tawh, "Esi..i zia deuh tawh em?" tiin a han zawt a.

"AW ka tha tawh e, ka nunna min chhanhim sak a, Isaka nen...i chungah ka lawm takzet."

"Ni e, ka rawn tlai hman tep a nih kha...hliam in lo tuar hrep hman a, a pawi ngawt mai."

"Nihleh engtin nge kan inah khan in rawn luh tawp theih a?"

"KA zui ru char char che alawm, a chhan chu i him lo miau a ni. I nu leh pate chhuak lai pawh kha ka hmu vek a, thawm a rik deuh tak bur bur ah khan kan rawn lut nghal a ni. MAhse kawngka chhunglamah in kalh daih bawk si a, kawngka hnung lam kan han zawng chawp leh a, keini pawh kan hna kan tlin lo deuh va, min hrethiam dawn nia."

"Chutin sawi suh, ka pu...kan nunna chhanhimtu alawm i nih. Chuan Isaka chu a tha tak tak maw..khawnge a awm?"

"Tunah chuan a biak theih hrih loh, nikhaw hrelovin a la awm a. Ngaihtuah suh, doctor pawhin a ngaihtuah awm loh a tih kha."

"A nih leh Rsa chu...in man ta em?"

AWmpuia chu a han thaw hak a, inthlahrung hmel tak hian, "An zawng mek a, engmah chinchang min la rawn hrilh lo." tiin a chhang a. Esi chu a maimitchhing vang vang mai, "A t(r)an tha leh a ni, tualthahna dang a t(r)an tha leh a ni." tiin a tap tuau mai. Chutih lai chuan Awmpuia phone chu a lo ri a, SI HMinga a lo ni.

"AW Hminga enge chanchin?" tiin a han zawt nghal a. Phone atang chuan Hminga chuan, "Sir, Esi te in atanga km 10 vel lai kan zawng a, kan dap kual tawh. Mahse kan hmu zo thlawt lo, engtin nge kan tih dawn?" a rawn ti a. Awmpuia chu a han thaw leh hluai a, "Station ah kan inhmu dawn nia, lo let phawt mai teh u." tiin a chhang a.

Phone chu an dah a, "Lo in enkawl tha la aw, naktukah ka rawn kan che anga, kan inawk zawk dawnnia. Ka kal phawt ange, hei police ten an veng reng che ania, thlamuang deuh khan awm tawh rawh." tiin AWmpuia chuan a chhuahsan ta a. A chhuah hnu deuh lawk chuan nurse chu a rawn lut leh a, "Na te i la nei em, nachhawkna pek leh i duh em?" tiin a rawn zawt a.

Esi chuan a lu lo thingin, "A ngai hrih love...ka tha alawm. Nurse, khawngaihin ka nu leh pate kha ka hmu leh thei angem?" tiin a han zawt a. Nurse pawh chuan, "Aw thei tehreng e, ka va ko ange." tiin kawngka lam chu a pan a. MAhse a ding chat a, Esi chu ava pan phei leh a.

Esi pawh chuan mak ti tak hian a lo en hu mai, "Esi..ihh, Rsa hi...ka hria a ni." a ti ta mai a. Esi chu a meng phawk nasa kher mai, "Enga? I hria maw?" a ti hu mai a. Inthlahrun hmel tak hian nurse chu a kun a, "Aw...ka hming chu Lalrempuii a ni a, Mental Hospital ah, Rsa awm thinna ah khan ka thawk thin a, Rsa hian ka nunna a chhanhim tawh a ni." a ti zawi sap a.

****************************

TO BE CONTINUE