USAGI : 2 (THE BUNNY RETURNS) ENGLISH : DARK BUNNY [MIZO HORROR/SLASHER FICTION STORY] Written by : Aaron Malsawmdawngzuala WARNING : 18+ CHAPTER : 2

 USAGI : 2 (THE BUNNY RETURNS)

ENGLISH : DARK BUNNY

[MIZO HORROR/SLASHER FICTION STORY]

Written by : Aaron Malsawmdawngzuala

WARNING : 18+

CHAPTER : 2

******************************

Tlai ban hun a lo ni a, Esi pawh chu ina haw tlang lo chuan a thiannu Hlutei hrih ang ngei chuan psychiatrist chu ava pan ta a. In lian ve pangnai tak leh nawm hmel tak hi a lo ni a, kawngka chu a han kik karh karh a. Chu psychiatrist hming chu Dr. Julie a ni a, kum 48 laia upa a ni tawh bawk.

Kawngka chu nula pakhat, la naupan hmel tak mai hian a rawn hawng a. Esi chuan inthkahrung tak hian, "Dr. Julie a awm em?" a han ti tham tiak a. Nula chuan a lu lo bu nghatin, "Aw awm e, lo lut rawh." tiin polite tak chuan a lo chhang a. Esi chu a lut ta a, "Helamah hian i phei anga, veilamah khan room pakaht a lo awm ang." tiin Dr. Julie awmna room chu nula chuan a han hrilh a.

Esi pawh chu a khi sak a, "Awle, ka lawm e." tiin Dr. Julie room lam chu a va pan ta a. A thlen dawn tep ah chuan hmeichhe pakhat ang bawrh bawrh ri chu a hre ta tlat mai, a ding chat a. A han ngaithla chiang a, "I hrethiam lo a ni, doctor. Kei hi tualthattu nunrawng Lalruatsanga unaunu ka nih hi. Tunah hian a la dam nge a thi tih pawh hriat a ni lo, zantin hian ka mumangah ka hmu thin asin." tiin chu hmeichhia chu a ang bawrh bawrh a.

Doctor Julie chuan zaidam tak hian, "BAwihi, thu la...ka sawi dawnnia. I damdawi te i ei tha lo an ti ania, nangmah enkawltute hian mi hrilh fo ania. I ei that loh chuan i dam thei lovang, i rilru ti hah tawh suh." tiin a hnem hram hram a. Chutah vin zet hian chu nula chuan, "Engvangin nge a hah lovang, ka thu hriat zawng zawng te kha dawt nise ka ti thin. Mahse a tak vek a lo ni bawk si, kei hi Rsa nau ka nih hi...tualthattu farnu ka nih hi...chu chuan min tina ber." tiin a han rak leh vak vak a.

Dr. Julie chu a thaw deuh hak a, "Bawihi, hahdam teh. Rsa chu kum khat teh meuh hmuh a ni tawh lova, a bo vang vang tawh. Khawiah emaw riltamin a thi tawh ngei ngei ang, engkim hi i pawm thiam a ngai." tiin a han hrilhfiah leh a. Mahse chu nula chu a thinrim tulh tulh amaw tih mai tur a ni, "A nih leh khawnge a ruang? Kha mihring kha, ka unaupa ni tur hian ka duh lo. tin, kei hi bum ka ni. Ka nun hi...engkim hi fiamthu vek a nih hi." a han ti leh pung pung a.

Dr. chu a thaw deuh hak a, "Enteh, i panic mai mai a nih kha. Ka damdawi chawh che kha tha takin ei la, i hahdam mai ang. Rsa hi he khawvelah a awm tawh lo, a thi tawh. Lungngai suh, i dam leh vat dawn alawm. I tan hian ka awm reng ania, i damdawi ei tha la ka duh ber." a han ti leh a.

Chu nula lah chu a tap pur tawh mai, "Tumah hian min hrethiam lo, damdawi ka mamawh lo. He mihring, ka unaupa anga in sawi...Lalruatsanga hi theihnghilh ka duh ber...ka rilru ah hian a awm reng mai, ka hua a ni." tiin a rak leh chiam chiam mai. Dr. Julie pawh chuan tihngaihna vak a hre lo, "Bawihi, i ngaihtuahna leh i suangtuahna mai mai a nih kha..." a han ti dek dek chu nula chuan, "Engmaw i sawi a?" tiin a vin hrep mai.

Dr. Julie pawh chu a ngawi nghal hmak, "Kei hi mi a angah min ngai tawh a nih hi....ka hrilh ang che, mi a ka ni lo." tiin nula bawk chuan a han an khum leh ta piap piap mai a. Dr. Julie pawh chuan tihngaihna vak a hre tawh bik lo a niang chu, a ngawi ta reng ringawt mai a.

Chutah nula bawk chuan, "Ka lo kal tawh ngai lvoang, min tanpui thei dawn chuang lo." a han ti leh khur khur a. Beidawn hmel tak hian Dr. Julie chuan, "I a ka ti reng reng lo, i la dam tha lo mai chauh a ni." a ha ti leh dek dek chu vin zet hian nula chuan, "A tawk e, ka mamawh lo che. I bula ka rawn kal apaing hian ka rilru hahna  a zual zawk, vawikhat mah ka rawn kal tawh ngai lovang." tiin a chhuak ta daih mai.

Kawngka bul atanga lo ngaithla reng tu Esi pawh chu a lo la ding ngawi reng a, chutah kawngka chu a rawn inhawng thut mai. Esi pawh a phu zuk a, kawngka atang chuan DEborah-i, Rsa nau chu a rawn chhuak ta mai a. Esi chuan a lo en vung vung a, Deborah-i pawh chuan Esi a hmu chu a ding chat mai.

Mahse engmah an sawi lo, second 10 vel chu engmah saiw lo chuan an in en vang vang a. Deborah-i tawng hma chuan Esi zawk chu a let leh daih mai, Deborah-i pawh chuan biak chhunzawm emaw, va um zui pawh a tum lem lo. Esi hnuk chu a ulh deuh tun mai a, a scooty ah chuangin in lamah a tlan haw nghal daih a.

********************************

Zan a lo ni a, SI Hminga leh constable Zuala te chu in lian tak, khawsak harsa lem lo tih hriat tak mai bulah chuan an motor chu an side tha a. Chumi in lam pan chuan an va kal a, kawngka chu an han kik karh karh a. Pa pakhat hian a lo hawng a, "Sir, thu lawmawm loh tak mai kan dawng a." SI Hminga chuan a han ti a.

Kawngka lo hawngtu, a in neitu chu tudang nilovin Rsa case lo chhui tawh tu, Inspector Awmpuia kha a ni. A han thaw hak a, Engthil nge ni a?" tiin a han zawt a. "Sairang kawng reng laiah tak sawn hmeichhe pakhat, a lu a hliam tuar hmuh a ni a....amah chu tunah station ah a awm mek." tiin SI Hminga chuan a chhang a.

"Eng a? Hliam a tuar maw? A rei tawh em? Engtika in hmuh nge?"

"La rei lo, sumo driver pakhatin a rawn report a....Aizawl lamah a rawn let pui leh hial alawm."

"Suamhmang beihna em ni? Eng thil chiah nge a tawh a?"

"A sawi dan chuan palian deuh pakhatin a thiante pahnih a that a ni awm e..amah chu a biru thei hram a..tun deuh lawk khan keini pawhin report kan dawng, ala rei lo."

"Palian deuh a? Ava mak awm ve....a hmel a hmu em?"

"A hmui rawmawlin a tuam a tia, tunah va pan ila nangmah ngeiinv a zawt fiah la a tha ang. Phone-a rawn hrilh che ka tum a, mahse ka day-off a lo ni bawk nen, kan inhnaih hnaih bawk a ka tia, in inah ka rawn phei ta mai a nih hi."

Inspector Awmpuia chu a ngawi vang vang a, "A hmui a tuam amaw? chuan palian tak ani bawk a maw?" a ti deuh nuah nuah mai. Chutah rang zet hian SI Hminga chuan, "Aw Sir, a sawi dan chuan a lo berah ft 6'3-5 vel hial a ni ang, a sang lutuk a ti." tiin a lo chhang leh vat a.

Inspector AWmpuia chu a meng deuh hrawk mai, Rsa chu a mithlaah a rawn lang nghal a. A han ngawih leh deuh vang vang hnu chuan, "Awle, ka insiam anga..station ah chuan kan kal dawnnia." tiin a pindan lam chu a pan a. Rang takin a insiam a, Station lam pan chuan a inkhalh phei ta nghal a.

**********************************

Rsa chuanna truck pawh chu a ding ta nge nge a, Rsa muhil lai pawh chu a harh zawk mai. A tho thut a, a awmna a han enkual chu Aizawl an thleng der tawh tih a hrethiam ta. Truck atang chuan rang takin a chhuk a, a kal bo nghal daih mai. Truck Driver chu a rawn chhuk ve a, "Khai le...kan thleng ta e, thianpa.." tiin a han au va.

Mahse Truck hnung a han en chu Rsa hmuh tur a lo awm tawh lo, a bungraw phurh ho chiah a lo awm tawh. Mak ti tak chuan, "Ehe...ava che rang em em ve mawle. Engtik lai khan nge maw a lo chhuk hmanhmawh ni..a thawm pawh ka hre miah si lova." tih nuah nuah pah chuan a lu thak lo pui chu a hiat nauh nauh va.

Rsa chuan panna lam tur ber pawh a hre chuang lo, a hmai kawr erawh a la ak tha reng thung. Mahse a ngai te ang bawkin a hmui chu a tuam tlat a, a hma zawnah chuan a kal phei zel a. Khawlaia mihring lo kal te chu a han en leh vung vung thin a, a awmzia chu Estheri, Isaka leh a nau Deborah-i te a zawng a ni.

Kum khat chuang kha a lo zawng ngat ngat tawh tihna a ni a, Esi leh Isaka kha chu thah ngei a tum. Mahse a nau Deborah-i erawh thah theihna hun a neih lai pawh khan a nau a ni tih a hriat chhuah avangin a that duh lo a nih kha, kawngsira mi lo thu te chu a han thlek leh deuh hu zel a.

Chutia a kal mek lai chuan building hlui ve tawh tak, lian ve pangngai tak bula tlangval ho zu lo in mek chu ava hmu a. Isaka a awm ve takin ti niawm fahran hian a va pan phei a, tlangval ho lah chu an lo rui pawr tawh nasa hlawm mai. Tawng an lo inchuh nak nak tawh hlawm a, panga vel an ni.

An zinga pakhat chuan Rsa lo kal phei chu a va hmu a, "Hey guys, enteh u saw pa saw...tunge in hriat zawng a ni em?" tiin a thiante chu a han hrilh a. An zinga lian ber, a boss deuh ber chuan men pawh meng tha mang lo chuan a va leh hawi a. Rsa chu ava hmu ve ta, "Aa...tu pawh nise, ho emai. NGaihtuah su, khawiah emaw a kal dawn pawh a ni ta ve ang." a lo ti sam et mai a.

Mahse Rsa chu a rawn kal hnai zel mai si a, a la rawn kal chak em em zui. Pakhat leh chuan, "Enteh u...kan lam panin a lo kal zel ania." a han ti leh a. Chutah zet zawng, an vai chuan an ding ta thap a. An boss ber chu ava kal hnai a, "Hey, enge i rawn tih dawn? Tunge i nih, i rawn duty ve deuh tihna ami?" tham lo tak chuan a han ti vel a.

RSa chu a ding a, rum zet hian chupa chu a en a. Chupa lah chuan a lo nuih tiah tiah mai, "Enteh u, min melhrum vel mawle.." tiin a thiante lam chu a va melh a. An zinga pakhat chu lo kal hnai ve leh in, "Hey Hmela, hei hi kan veng anih hi. Kan duh duh naah zu kan in ang, min rawn hau duh suh." tiin a rawn vin ve khur khur bawk a.

An boss bawk chuan, "Kan sawi chu i hria em? Kan hnek hrep mai ang che, kan dim dawn miah lo che ania." tiin a lo vau chhunzawm ve leh bawk a. MAhse Rsa chuan a chhang lo, che miah lo chuan a ding ngawi reng ringawt. Pakhat leh chuan ring deuh tak hian, "Kan biak che chu i hre lo ami? I beng a ngawng ami, nge i tawng thei lo zawk?" a rawn ti ve leh khur khur mai a.

Rsa chu a la ngawih reng tho avang chuan an boss ber chu a thinrim ta, "Ava inla ngeng ve mawle.." tih pah chuan Rsa chu a hnek siah mai. MAhse a thle deuh sawk ringawt, a taksa dang chu a che eih lo, pen khat pawhin a hnungtawlh lo. Midang ho chuan an boss chu lo thelh in, "Bro bro..hetah lo, kawngpui ami te sawn min hmu pha dawn tlat." tiin an lo dang a.

An boss ber chu a han ngawi vang vang a, rum zet hian Rsa chu a han melh leh a. A thaw deuh hak a, "A tha e, building hnungah sawn kan pahnihin kan in fair ang. Min lo zui rawh, ka sawp hrep dawn che nia." tiin building hnung lam chu a pan a, a thiante chuan an zui ve bawk.

Rsa pawh chuan ngawi reng hian a zui ve mai a, building hnung lam, a thim lai deuh ah chuan an va kal khawm ta a. Rsa chu a han ding leh vang a, "A rawn kal ngam tak tak ka ti...i va han na dawn em.." tiin boss ber chuan a han nuih vel a. Tichuan posi te chu la in, "Tan ang le...lo kal ta che." tiin a han zuang vel thauh thauh va.

Rsa chuan a en reng ringawt, chutah chu tlangval chuan a han hnek leh pawp mai a. A ngai te ang bawkin RSa chu a thle leh sawk ringawt a, a taksa dang chu a che eih lo hrim hrim. Vawi nga vel chu a biang ding lam leh vei lamah chuan a han hnek tawn siah siah a, mahse Rsa chu na ti awm ang pawhin a awm lo.

A din ngai chuan a la ding reng, "Min khawih let ve ta che....ZAwnga, kan sawp rawn hma che hian..." tiin a insualpui pa ber chuan a vin hian a vin vak vak a. Mahse RSa chuan a la chhang chuang lo, "Zawnga lehhh..." tih pah chuan an boss chuan hnek leh a han tum a.

RSa chuan a kut chu a lo man sak chat mai, chutah a la herh vak zui. A ruh chu a ri rawp a, a t(r)e nasa kher mai. Rsa chuan a duhtawk mai lo, chu tlangval ban chu a kut leh lam chuan a vuan a, a la ulh ri thawk zui. A ri pawh a ring ngei mai, chupa ban ruh chu tliak chiang tak a ni.

Chuveleh a thainte chuan rawn chhan an tum a, pakhat chuan thing bung la in Rsa hnungzangah chuan a rawn hlap pawp mai a, thing bung pawh chu a laiah tak a bun belh a. Mahse Rsa chu pen khat lek hian a tawlh hma hret ringawt, ava leh hawi a. An boss ber chu a thlah ta, a ban na a ti lutuk chu leiah chuan a vial tawp tawp mai a.

Thing bung a vawtu pawh chuan mak a ti kher mai, a bung lehlam a ken lai chuan vuak leh a han tum a. Mahse Rsa chuan lo man sak leh in a chhuhsak a, a hmawr zum, thing zum chu chupa mitah tak mai chuan a vit tlum thawih mai. A na ti lutuk chu a thal tawp a, thisen chu a mit atang chuan a rawn luang chhuak nghal zawih zawih mai.

Midang pathum te chuan an rawn chhan ve leh a, pakhat chuan a hnunglam atang chuan a rawn zuan a. A dang pahnih te chuan Rsa chu an lo hnek ve siah siah hlawm a, mahse RSa chuan awlsam takin a mah rawn zuan tu chu a chhip samah thamin a phih let dawr a.

Midang pahnih chu a va la delh zui, an pathum chuan an tlu ta vek mai. Pakhat chu a rawn ding chhuak a, rawn beih leh nghal a tum a. Rsa chuan chemte hraim tak mai chu a rawn phawrh ta, chupa dulah chuan a lo vit pawp mai. Chupa pawh chu a ding chat a, Rsa chuan a samah thamin chiang takin a en a.

Chemte chu phawiin a vit nawn leh siah siah mai a, midang pahnih chu rawn thovin Rsa chu an rawn dang nghal. MAhse an dang hneh lo, Rsa chuan a vih mek pa chu a thlah a, leiah chuan a tlu nghal thlawp a. Midang pahnihte chu a bei ve leh ta a, pakhat zawk chu a rek a, a che thei lo der nghal mai.

Pakhat zawk chu a kut lehlama chemte a ken lai hmang chuan a vit ve leh ta a, a thal ve leh tawp mai. A rek mek pa chu a han en leh ran ran a, chutah a chhip ah chuan chemte hriam tak, inches 7 lai a sei chuan a vit tlum leh thawih mai. Chemte hmawr chu chupa khabe hnuai atang chuan a rawn lawr thei hial a, thisen chu a baw zawih zawih mai.

Dim bak sak lo chuan a han phawi ri leh hrawk a, a reh lai chu a thlah ta a. A thi chiagn ngang mai, mahse thi ve lo pakhat ala awm, chu chu an boss ber kha a ni. A ban ruh tliak chu na tiin a lo la vial nasa mai a, a thiante zawng zawng Rsa'n a that lai chu mit hian a lo hmu vek bawk.

A tap pur mai a, Rsa chuan ava melh leh ta run mai. Hlau tak hian, "Nilo..min tina suh. Ka tihpalh, ka cho lo che...ka..ka fiamthu a nih kha. Khawngaihin, ka..ka tihpalh." tiin ngaihdam a dil mawlh mawlh a. Rsa erawh chuan a ngaihthlak sak lo, ava pan zel a.

"Tu..tunge i nih? Mawhh...khawngaihin min that ve suh, khawngaihin.." tiin a han ngen leh lawm lawm a. Rsa chuan na tak hian a awmah chuan a rap ta vak vak mai, a chang leh a chhuih bawk. Chupa chu a thi lo chauh tawh, mahse Rsa chuan ala kalsan mai lo.

Thi hnuang a let reng, chu tlangval khawngaihthlak tak mai chu thisen hian a bual huh vek tawh hi a ni ber mai. RSa chuan a bula lungtum lian tak, rit tak mai chu a pawm nawlh a. Chu tlangval lam chu a pan leh ta, a lu zawnah tak chuan lungtum chuan a han tin vang vang a.

Tlangval chuan thei leh thei lo hian, "Nilo....khaw...khawngaihin, ti suh.." a ti tawk tawk a, a aw pawh a chhuak tha hleithei tawh lo. RSa chuan lung chu zak kau meuh chuan a han chawi kang a, chutak chupa lu chu a deng ta chawrh mai a nih chu. A lu chu a darh hian a darh vek a ni ber mai, a thluak pawh a pherh vek.

An vai mai chuan a that kim ta, tichuan a sazupui hmaikawr chu a phawrh chhuak a. Chung tlangval panga te ruang chu a kalsan leh a, mahse a chemte erawh a theihnghilh hlauh mai. Khang tlangval te kha va thah a tum pawh a ni hran lo, Isaka a zawng mai chauh kha a ni a, mahse khatia an lo khawih avang khan a that ta vek zawk pawh a ni mahna le.

**********************************

Station ah chuan Cindy chu Inspector Awmpuia chuan thu a lo zawtfiah mek a, "Eng ang vela sang nge a nih...i rin dan hrim hrim in?" tiin AWmpuia chuan a han zawt a. Cindy chuan inhnit feih feih chung hian, "KA hre lo, a sang lutuk. A lian bawk sia, ft 6 leh inches 5 vel lai aniang...ft 7 pawh a tling maithei..ka hrelo." tiin a chhang zawi sap a.

Awmpuia chuan a lu a han bu nghat nghat a, "Umm..anih chuan a hmel i hmu lo kha i ti tiraw?" tiin a han zawt leh a. Cindy chuan a chil a lem dawk a, "Aw...rawmawlin a tuam a, ihh..a mit sirah ser a awm bawk...chuzawng chu a nimai." tiin a lo chhang leh a, a la hlau bawk aniang, a khur dar dar reng mai a.

"A hma in in hmu miah lo amaw? In motor hnungah a lo chuang ve tih in hre miah lo maw?"

"Aw...hre lo. Tumah khan kan hre lo, engtik lai khan nge a lo chuan ve kan hre lo hrim hrim. Kan biak in min chhang si lova, a ngawi reng zel bawk sia."

"Anih tak chu...khawiah nge kal in tum hrim hrim a?"

"Luiah kal kan tum a, pick-up kha ka bialpa Anthony-a ta ania...zana haw leh nghal kan tum kha ania."

"Anih khawilam nge a pan?"

"Ihh..motor..truck pakhat a lo tlan a, Aizawl lam panin...tah chuan a chuang, Aizawl ah hian tunah hian a awm ngei pawh ka ring."

Awmpuia chu a meng kawk mai, "Aizawlah hian a awm maw?" a ti hu mai a. Cindy chu a hnuk a rawn ulh tha leh a, "Aw, Aizawl lam a pan alawm." tiin a chhang a. AWmpuia chu a ngawi vang vang mai, "A chuanna truck chu a number i lo chhinchhiah em?" tiin a han zawt leh a.

Tap chung hian Cindy chuan, "Aih..engmah ka ngaihtuah hman tawh lo...engmah ka ngaihtuah hman tawh lo tak tak alawm.." tiin a inhnit hlawp hlawp mai. Chutih lai chuan Awmpuia phone chu a lo ri a, "Hello...in thleng tawh em ni?" tiin AWmpuia chuan phone a lak rual rual chuan a han zawt nghal a.

Phone ami chuan, "Aw Sir, hei...crime scene chu kan thleng tawh e. Cindy sawi hmang kha chuan a sir khamah hian ruang pahnih kha a paih niin a sawi a, kham atanga kan han dahthlak hian khulai khu chu Vawmbuh Mual vel a niin ka hria." tiin a rawn chhang a.

"Anih leh motor chu a awm maw?" tiin AWmpuia chuan a han zawt leh a. Phone ami chuan, "Aw..pick up a nia, motor darthlalang ah pawh thisen a kai nual mai." tiin a rawn chhang leh a. Awmpuia chuan phone chu  a dah a, "Rsa ngei a ni...RSa...tunah Aizawlah a awm mek bawk." tiin a bula ding, SI Hminga chu a han en vung vung a.

**********************************

Estheri chu a room tukverh bulah chuan thu in a inngaihtuah vung vung a, a melh ngai chu a melh reng a. Chutih lai chuan a phone a rawn ri thut mai, a phu nasa em em lehnghal. A phone chu a han en a, Hlutei a lo ni. Peih lo hmel tak hian a la a, "Aw, Hlute..enge ni?" a han ti a.

"Esi, psychiatrist chu i hmu em?"

"Aih Hlute, ka hmu ta lo mai."

"Aww...tinge, ka kal ang i tih vek kha..."

"Nia, mahse...ka awm a nuam lo lutuk a vawiin tlai kha chu...nidangah ni mai rawh se."

"Awle, ahh...i duh loh chuan i hmuh kher pawh a ngai chuang lo ania."

"Ka hre bik lo le...kan la hmu ang chu..."

REi vak lo an inbiak hnu chuan phone chu an dah ta a, Esi pawh a zirlai naupangte test tur question set tur chuan a han inbuatsaih a. Chutia lehkhabu a keu mawlh mawlh lai chuan tukverh lam a zu melh zeuh chu a thil tih lai a tawp hmak mai, mit khap lek lo chuan a en vung vung a.

An inkawt a, waiting shed bulah chuan mipa pakhat hi a lo ding run mai. A la sang em em zui a, a palian hle bawk. Esi hlau chu a khur nghal der mai a, a chhan chu chupa chuan sazupui hmaikawr a vuah tlat a ni. A ding a, a thaw nghal dep dep mai. Chutih lai tak chuan a room kawngka chu a rawn inkik dawt dawt a, Esi phu nasa lutuk chu a thlarau a thlawk chhuak lo chauh hi a ni ber mai.

A nu, Pi Chhingi lek chu lo niin. Ring leng lawng hian, "BAwihi...lo hawng lawk teh." a rawn ti a. Esi chuan kawngka lam chu a hawi zawk a, rang takin tukverh lam chu a hawi phei lehnghal. MAhse kha sazupui hmaikawr vuah pa kha a lo awm tawh hauh lo, Esi pawh chuan mak a ti kher mai.

Pi Chhingi lah chuan, "Bawihi...i muhil tawh em ni a?" tiin a rawn kik leh vak vak a. Esi chu a thaw hluai a, "Ka kalh lo, lo lut rawh." a han ti vin deuh hlur a. Pi Chhingi chu a rawn lut a, "HEi hi i mawza a ni em?" tih pah chuan mawza hi a rawn lek kang va a.

"Aw a nih kha...khumah khan lo dah mai rawh." tiin Esi chuan a lo chhang deuh hmuk a. Anu pawh chuan khumah a dah a, "Tukverh te kha khar raw, thosi a tam si." tiin a chhuahsan leh nghal a. Esi chu tukverh ah chuan a han dak leh vang vang a, tumah chu a hmu tawh lem lo. Parda a zar hmak a, tichuan a hna chu a chhunzawm leh ta a.

***********************************

A tuk zing dar 6 velah chuan AWmpuia phone chu a rawn ri ral ral a, a hma zan lawk khan a lo mengrei bawk nen. Peih lo tak chuan a phone chu a han en a, SI Hminga a lo ni. A han chek deuh hlur a, "HEllo, Hminga? Enge ni ta?" a han ti tham tiak a. "Sir, All Win High School building hlui hnungah ruang panga chhar a ni." tiin Hminga chuan a rawn chhang ta mai a.

AWmpuia pawh a harh kawk mai, "Enga? Ruang panga lai maw?" tiin a thu chhuak nghal a. "Aw ni e, Sir...rawng taka thah vek an ni. Pakhat phei chu a lu a sawm vek hi a ni ber mai, a then an ril te a chhuak hial bawk." a la rawn ti ta deuh deuh va. AWmpuia chuan a lu a han dawm vang vang a, "Mipa vek a mi?" tiin a han zawt leh a.

"Aw mipa vek an ni....kum 20-25 vel bak an nih ka ring lo."

"A nih tak chu....tah khan tutu nge awm tawh?"

"Kei leh Constable Muana kan ni hrih mai. Station lam chu ka phone tawh a, an rawn kal mek."

"A tha e, crime scene kha lo la khawih danglam lo ula...kei pawh ka rawn kal nghal dawn e."

"Awle Sir, kan lo ngaichang ang che."

Phone chu an dah a, Awmpuia chuan a kut chu a han hum ruh a. A lu bu nghat nghat in, "Tun tum chu ka chhuah tawh dawn lo che, Lalruatsang. Ka kut ngei hian ka man che anga, jail ah ka khung khawp ang che." tiin a insehruh nasa mai a. Rang takin a tho vat a, insiam vatin crime scene lam chu a pan ve ta nghal a.

*******************************

Esi pawh school lam pan in a inkhalh phei mek a, dawr pakhat bulah chuan a ding a. Chhun eitur eng eng emaw a lei zawh hnu chuan a scooty lamah a let leh a, mahse a ding chat mai. A scooty bulah chuan DEborah-i a lo ding reng mai a, Esi chuan a melh no lem lo kher mai.

Ngawi reng chuan a pan phei a, be miah lo chuan a scooty ah chuan lawn leh mai a tum a. MAhse Deborah-i chuan rawn pan hnai in, "U Es, ding lawk teh." a lo ti vat a, Esi pawh chu a ding ve mai bawk. Inthlahrun hmel tak hian, "Rsa kha ka u a ni tih ka hre bik lo, U Esther...ka ti tak tak." a han ti zawi sap a.

Esi chuan ava melh deuh hrawk a, "Rsa ka hre ngai lo, ka tan chuan a thi tawh. KA theihnghilh tawh, chuan nangnen pawh hian thian kan ni lo hrim hrim. Ka tlai dawn....min lo hrethiam mai teh." tiin scooty chu a start nung nghal a. MAhse Deborah-i chuan ring deuh tak hian, "I la theihnghilh lo...ala ti hlau che a ni. Ka hria, keipawh hian ka la hlau asin." a rawn ti leh a.

Esi chu ala kal mai lo, Deborah-i en miah lo chuan, "Chungte chu i buaina alawm, keichuan engkim ka theihnghilh tawh. Hma lam ka pan tawh, i unaupa Rsa chu a thi tawh." tiin a vin ve ta khur khur mai a. Esi chu scooty ah chuan a chuang ta a, mahse kal a tum chiah chu Deborah-i chuan a lo ko ding leh hram a.

"Anih chuan tinge nimin khan psychiatrist kha rawn hmuh i tum ve si?" a han ti chu Esi pawh chuan a scooty chu a off nghal hmak. A chhuk a, Deborah-i chu a melh rum a. Chiang fek fawk hian, "I lo buai angai lo, Rsa vanga hmuh tum pawh ka ni lo." a han ti khur khur a.

Deborah-i chu za lo tih hriat tak hian a khi suk a, "Chhuanlam siam duh suh...U Es, i la hlau. I thla  ala muang bik lo, kan in ang chiah." a tih khum ve deuh sak mai. Esi chuan a chhang lo, a leh hawi hmak a. Scooty ah chuan chuangin a tlansan ta daih mai, tap tep hian Deborah-i chuan a en zui vawng vawng ringawt a.

********************************

Esi chuan school chu a thleng a, garage ah chuan scooty chu a park tha a. A kal leh tur chiah chu a hnung lam atang chuan thawm a hre tlat mai, rang takin a leh hawi vat a. MAhse tumah a hmu lo, garage lah chu a thim ruih mai bawk si. Kal a tum leh a, mahse a ngai te ang bawk chuan thawm chu a hre leh ta.

Mak ti tak hian a han hawi kual a, a reh diak mai bawk si. Motor te chu a han enkual den den a, "Tu chu nge maw ni le?" tiin a phun nuah nuah a. Kal leh a tum, hma lam a hawi chiah chu a phu nasa ngei mai. A hma zawnah chuan mipakhat hi a lo ding khur mai a, "Awiii....Hmela, min ti phu nasa lutuk." tiin na lo te chuan a han beng a.

Chupa chu Isaka a ni, Isaka nen hian an inngaizawng tawh bawk. Isaka chuan a kuah a, "Ka rawn surprize che a nih hi, kan inhmu khat sia.." tiin a han nuih var var a. Esi chuan mak tih hmel tak hian, "Enge hetah te i rawn tih a?" tiin a zawt a. Isaka chu a han nui deuh put put a, "Eng nilove...saw lai lawkah sawn ka kal dawn a. In school ka tlan pel dawn sia ka tia, ka lo chang che alawm." tiin a chhang a.

Esi pawh chu a nui huk ringawt, "I va ho tak...nula i rim dawn te hi a ni zawk lo maw?" tiin a han fiam a. "Teuh lo mai....ka ngai em che a, hmuh hram che ka duh alawm." tiin Isaka chuan a lo chhang leh a. "Kal vat rawh...naupangin min hmu ange..." tiin Esi chuan a nam deuh rawk rawk a.

"AWle awle..ka kal dawn." tih pah hian Isaka chuan Esi hmuiah chuan ava fawp zeuh va. Esi pawh a khi suk ringawt, tichuan a kalsan ta a. Esi pawh chu scool compund ah chuan a lut ve ta a, mahse garage ah chuan tu emaw ni hian a lo thlir reng a. Sazupui hmaikawr a vuah a, tudang nilovin Rsa a ni.

********************************

TO BE CONTINUE