USAGI : 2 (THE BUNNY RETURNS) ENGLISH : DARK BUNNY [MIZO HORROR/SLASHER FICTION STORY] Written by : Aaron Malsawmdawngzuala WARNING : 18+ CHAPTER : 1

 USAGI : 2 (THE BUNNY RETURNS)

ENGLISH : DARK BUNNY

[MIZO HORROR/SLASHER FICTION STORY]

Written by : Aaron Malsawmdawngzuala

WARNING : 18+

CHAPTER : 1

*****************************

(Usagi part 2 hi part one aiin a rapthlak zawk a, a nunrawng zawk bawk. Part one lo ngaithla/chhiar tawh in awm chuan kha ai khan a la rapthlak leh zual dawn a. Chuvang chuan kum 18 i tling lo emaw, dawihzep chi i nih chuan ngaithla/chhiar lo ngam ang che.)

Operation room ah chuan doctor leh nurse te chuan damlo pakhat, hliam na tak nei hi an buaipui mek a. Chu damlo chu mipa niin hliam nasa tak a nei a, a taksa chu a thler deuh nei nuai hi a ni ber mai. Oxygen pek char char a ni bawk a, darkar engemaw zat an beih hnu chuan an zai zo ve thei ta.

Operation hlawhtling tak niin damlo pawh chu ngaihtuahawm a ni lova, nikhaw hrelovin a la awm thung a, engtikah nge a harh chhuah theih ang tih pawh chiang taka sawi fak theih a la ni lo bawk. An zai zawh atanga darkar 24 a ni a, a hma zana an zai hun ang chiah vel kha a ni.

Chu damlo pawh chu a la harh chhuak lo va, a la muhil reng a. Zan a rei tawh em avang chuan hospital chhung pawh chu a reh hian a reh diak tawh mai, damlopa awmna ward lam pan chuan nurse pakhat hi a kal phei mek a. Ward chhungah chuan a lut a, damlopa pawh chu a lo la mu reng.

A lu ah hliam a tuar nual bawk vang chuan a lu pawh chu bandge in an tuam bur mai a, a hmel pawh a hmuh hleihtheih loh hial a ni. Nurse chuan nakchhawkna ni awm tak chuan a venflon vuah lai ah chuan a thun lut a, tichuan lehlam hawiin thildang chu a tihsan leh mial mial a.

Inzaina bungrua vel a rem fel lai tak chuan chu damlo chu a rawn meng thut mai, zawi muang hian khum atang chuan a rawn tho kang ta mai a. MAhse nurse erawh chuan a hmu hauh lo, zawi te te chuan a zai ret ret a. Chutah damlopa chu khum atang chuan a rawn chhuk ta mai a, nurse lam chu a rawn hawi ta run mai.

He damlo hi tudang nilovin, tualthattu RSA, Lalruatsanga ngei kha a ni. Nurse lah chuan lehlam a la hawi reng a, Rsa chuan ava pan phei ta a. A thleng tep tih ah chuan nurse chu a rawn leh hawi a, Rsa a hmu thut chu a phu nasa kher mai. A au hman tep a, mahse rang takin Rsa chuan a hmui a hup sak nghal.

Bangah chuan a nam bet a, a rek ta vak mai. Nurse chu a tal vak vak a, mahse hmeichhe awm nem zawk tan chuan Rsa te ang palian lutuk chu hneh har tak chu a ni ve ang. Rsa chuan a rek na telh telh a, nurse pawh chu a hmai a dang vek tawh. A kut veilam chuan Rsa hmaiah chuan a va nam ve tawk tawk a, mahse awmzia a nei lo kher mai.

A kut dinglam chuan an sir a chhuar a surgery knife pakhat chu a ban fuh tep a, Rsa lah chuan a rek na telh telh mai si. A tawp a tawpah chuan ava ban fuh ta, Rsa hrawkah chuan vih a tum a, mahse Rsa chuan nurse la naupang tak mai chu thaw chham thak khawpa reh nan a kut khing hnih kher a lo mamawh hauh lo.

A kut leh lam chuan nurse thawchham tep kut chu a lo man chat a, lehlam chuan a la rek reng tho. Chutah Rsa chuan chu nurse hmeltha leh pawisawi lo tak mai chu amah leh amah a invih tir ta mai a nih chu, a hrawkah tak lehnghal. Thisen a rawn baw chhuak nghal zawih zawih a, a ka atang te chuan a rawn bawk chhuak bawk a.

Rsa pawh chuan a thlah ta, nurse chuan a hrawk chu a dawm nghal a. A tlu nghal hnawk a, a tluk pah chuan surgery knife leh forcep vel dahkhawmna chu a hui thla bawk a. Chhuatah chuan a tla a, zan a lo rei tawh bawk nen a ri pawh a ring tha khawp mai.

Security guard pakhat, Rsa ward awmna bul atanga hla vak lova lo duty mek chuan a hre pha a. Rang takin a va tlan phei nghal a, ward chhung ava lut chu a ding chat mai. Kil khata nurse pakhat, thisen nena inchiah piah nuaia lo thal reng mai chu ava hmu a, chhuatah te chuan thisen chu a kawi nei nuai mai.

Mak a ti bawk si, a hlau bawk si chu han chet mai nachang pawh a hre lo. Khum chu ava en leh a, Rsa a lo awm tawh hauh lo mai. Muang chang chaun nurse chu ava pan a, "Hey...nu..nula...enge awmzia?" tiin a khur zawih zawih a. Chutah kawngka phenah chuan Rsa chu a lo biru reng chu niin, guard chu hnung lam atang chuan a rek ta thut mai a.

A au hma hma chuan a hmui a hup sak ve nghal, chutah a ringruh ri th(r)awk khawp chuan a lut chu a han th(r)uai pawp a. Security guard chu a thla tawp mai, mahse ala thi lo. A che thei bawk si lo, "Tuu..Tu,..tunge?" tih bak a sawi thei lo. Rsa pawh chu a melh chho thei lo, a chhan chu a nghawng ruk chu a dik tawh lo.

A lu chu a ti che sawn thei lo, a aw pawh a chhuak tha hleithei lo hial mai. Chutah RSa chuan a thutchilh ran a, a samah chuan thamin chhuat chang tak leh ruh tak mai ah chuan a hmai sawh zawng chuan a tauh tir ta siah siah mai a. An awmna room pawh chu a ngawr dawt dawt thei hial a, vawi thum vel a sawh hnuah chuan a thi nghal.

Mahse RSa chuan ala duh tawk lo, a la sawh tir siah siah mai a. Security guard chu a hmel hmuh tlak a awm tawh mang lo, a mitmu te chu a rawn pawrh chhuat turh mai a. Rsa lah chuan a la duhtawk thei lo nge ni, a thluak lang leh sawm nuai khawp chuan a sawh tir chhunzawm ta chawrh chawrh mai.

A duhtawk meuh chuan Security guard lu chu a chanve zawng chu a sawm hi a ni deuh ber mai, Rsa chu a ding a. A thaw hrawk hrawk a, chutah a hnunglam atang chuan thawm a hria a. A va hawi phei chu nurse kha a lo la thi lo chu niin, kawngka lam ah a lo bawkvak phei tawk tawk a.

Mahse thawm a chhuah thei tawh der si lo, a hrawk atang chuan thisen chu a la rawn baw chhuak reng a. Rsa chuan a va pan leh ta, chhuata surgery knife lo let reng mai chu a chhar a. Nurse khawngaihthlak tak mai, lo bawkvak tawk tawk chu a hnungah chuan a thut ang ren rawn a.

Chutah dim baksak lo hian a hnungzangah chuan a vit ta siah siah mai, vawi 5 vel a vih hnuah chuan nurse chu a thi ta. Mahse a hma ang bawk chuan Rsa chuan ala duhtawk mai lo, a vit nawn leh ta mawlh mawlh mai a. Bangah te chuan thisen chu a kai thei hial a, hmuntinah mai chuan a per kual vek mai.

Rsa chuan a duhtawk meuh chuan vawi 20 lai a vit hman, nurse ruang chu a en vang vang a, a hnungzang vun chu a thler nuai mai. Tichuan chu ward chhung chu a chhuahsan ta a, ruang pahnih chu a kalsan ta a ni. Darkar 1 hnu velah chuan Inspector Awmpuia beng a thleng ve leh ta a, rang takin hospital, Rsa an dah na lam chu a pan nghal a.

***********************************

(ONE YEAR LATER)

Pi Chhungi chuan rawng a bawl mawlh mawlh a, "Ehe...dar 8 a ri mai dawn.." tiin a chawhmeh chhuan lai chu a off a, pindan lam a pan nghal a. Kawngkhar chu chum dat dat in, "Bawihte, Bawihi...tho tawh rawh..hei i tlai dawn ania. Dar 8 a ri tawh, chaw ei ka siam ania." a han ti lauh lauh va.

Mahse tumah chuan an rawn chhang lem lo, Pi Chhungi pawh chu let leh in chaw ei a siam nghal a. Chutah Pa ber, Pu Ringa chu a rawn tho ve a, "Khai a...thawh ka hai chu le...khawnge Mami hi...ala tho na nge?" tiin a rawn ham phei bui bui a. Chaw khawr pah chuan Pi Chhungi chuan, "Ka kaih thawh tawh kha, a lo tho mai ang." tiin a lo chhang a.

Room atang chuan Esther Lalnunmawii chu a rawn chhuak ta a, Pu Ringa leh Pi Chhungi te hi Estheri nu leh pate an ni. Esi chu nalh angreng tak hian a rawn chhuak a, "Ehe...i insiam nghal tihna em ni?" tiin anu chuan a lo zawt hu mai a. Esi chu a han ham deuh bai bai a, "Nizan ka mengrei lutuk a, ka muhil thei lova...min rawn kaih thawh khan ka inha nghal mawlh mawlh mai. Chaw eikhamah hmai ka phih anga, make up zuai anga, ka hman nghal a ni mai." tiin a han khi deuh suk a.

Pu Ringa pawh chuan hmai a phih mawlh mawlh a, "I awlsam reuh mange.." tiin a lo nui suk a. Esi chuan a kut te silin dawhkan chu a kil nghal a, chaw chu a bar nghal mawlh mawlh a. Anu chuan a han en vang vang a, "Ngati maw nizan chu i muthilh theih lova?" tiin a han zawt leh a.

Chawi ei mawlh mawlh pah chuan, "Ka mumang mawle...ka mumang a hlauhawm thei lutuk a." tiin a chhang mai a. Pu Ringa pawh chu a rawn thu ve a, "Enge i hmuh a, Justin Bieber-a a mi?" tiin a rawn chhaih deuh kher a. Esi chu a ner suka , "Keini ang kum ah hi chuan e, Pa...Justin Beiber..Justin Barbie tih vel mai mai ngaisang rual kan ni tawh lo." a lo ti deuh hmuk a.

"Eng mang tha lo nge maw i lo neih reng reng le?" tiin Pi Chhingi chuan a han zawt leh a. Pu Ringa chuan rang zet hian, "Aww...a ho lutuk, mang tha lo tih vel mai mai." a lo ti vat a. Pi Chhingi lah chuan, "Sawi mai se...a har hleinem." a han ti deuh hlur a. Esi chuan inthlahrung tak hian, "Ihh..englo, Rsa ka hmu thin a...nikuma kan.." a sawi zo hman lo.

Thinrim hmel tak hian, "Lalnunmawi, a tawk..sawi a tul lo." Pu Ringa chuan a rawn ti vin deuh thak mai. Esi pawh chu a ngawi hmak a, tui lo deuh chuan chaw chu a ei chhunzawm mial mial a. Anu chuan rum zet hian a pasal chu a han melh a, "I thinchhe kher kur thin lutuk." tiin a lo hau ve nghal bawk.

Mahse Pu Ringa chuan a chhang let lo, Esi chu a kham nghal hmak mai. A kut a sil fai a, a pindanah chuan a lut leh hmak a. MAke-up pawh inhnawih ta lo chuan a bag chu la in a chhuak nghal hmak a, kawrkhar pawh a khar ri deuh bur mai. Pi Chhingi chuan tum hmuk hian, "Khatia vin vak kher zel angai em mawnile...kha a thil tawn rapthlak tak kha ala theihnghilh thei lo a nih hi..vin kher zel angai lo." a han ti leh pung pung a.

A aia vin hian Pu Ringa chuan, "Chuvang reng alawm ka khap ni...nang lah hi...lo zawt lui chhen zel mai. A mumangah a hmu thin tih a hma pawhin a sawi a sawi tawh, zawt tawh suh tih mawlh mawlh pawh a i zawh luih talh ni.." tiin a lo hau let zek mai. Chhang ta lo chuan Pi Chhingi pawh chu a titau va, a kham ve nghal hmak mai.

*****************************

Esther-i hi kan sawi tak ang khan college zo fel hlim chiah a ni kan tih tawh kha, kha vanduaina a tawh pawh kha an exam zo chawlh hmang an ni tih pawh kan hriat tawh kha. Kum khat a liam leh meuh chuan private school pakhatah hna a hmu ve hlauh mai a, mahse thla hnih vel bak a la thawk lo thung.

School kawtah chuan a scooty, flyte sen ngei mai chu a han ti ding a. School compound chhung a luh hma chuan a scooty darthlalang a inen chung chuan a han in make-up ang thuak thuak a, tichuan a lut ta a. A thiannu thar, a thawhpui Miss Hlutei chuan a lo nuih nghal seih a.

"Tukin chu ka thlen khalh tlat mai che, ngati nge i va tlai ve?" tiin a lo zawt nghal a. A bula va thut pah chuan, "Nia..ka tho tlai lutuk a. Ka pa lahin min la vin hrep zui lehnghal a, ka mood a rawn fuh lo lutuk ringawt." tiin Esi chuan a chhang a. Hlu-i chu a khi suk a, "Tinge a hauh che a, i pa chuan?" tiin a lo zawt leh a.

"Aaa...ka sawi peih lo, a ho lutuk."

"A va buaithlak thin, engtin nge i mood kan on ang aw?"

"Hehe, eitur a nimai...tunah pawh hian ka ril a la tam lutuk...chaw ei lo ang tluk ka ni."

"Ehe..chu...chaw i ei pawh a phal na nge?"

"A teuh lo mai, chaw eilai kher hian min hau va...ka ei tui laklawh a sin le."

An han nui dun bawk bawk a, "Chaw ei a phal lo amaw ka lo ti mai a sin, lawks aw..." tih pah chuan a pawhdawh chu a hawng a, biscuit hi a rawn phawrh chhuak a. Esi pek pah chuan, "Kha...hei hi ei rawh. Nimin ami a nih kha....ka hawn theihnghilh a, ka nau tan ka hawn ang ka tia." Hlutei chuan a han ti a.

Esi chuan a lo la ve mai a, "Chaw ei pawh phal lo khawp a sual a ni hleinem, phal lo pawh ni se ka ei awm tho e.." tiin a han nui var var a. Chutia an titi lai chuan zirtirtu zing ami, Sir Erica chu a rawn tho deuih hluai a. "Tan a hun dawn der mai, dar kan vaw tawh mai dawn mi?" a rawn ti a.

Principal pawh chuan a lu a lo bu nghauh va, "A tha alawm, i tan ang u hmiang." tiin a tho va. Esi chu a lo ner nang a, "Naa..ka la ei tui asin le." a ti nuah nuah a. Hlutei chuan a lo nuih a, "Chhunah ka treat dawn che nia...Assembly i conduct dawn bawk si, ei tawh lo mai rawh aw.." tiin a han fiam zui a.

*********************************

Pick up pakhat hi dawr pakhat bulah hian a rawn ding a, a chhungah chuan mi pathum an chuang bawk. Pakhat chu hmeichhia a ni a, midang pahnih chu mipa an nui. Hmeichhia chu a laiah chuan a thu nghe nghe a, a awmzia chu an inhnawh a nih deuh ber mai chu.

A driver ber hming chu Anthony-a niin hmeichhe awmchhun chu a bialnu a ni nghe nghe a, a hming chu Cindy Lalthlamuani a ni. Passenger seat a thu chu Lalchhandama a ni a, Anthony-a thianpa a ni. Cindy-i chuan a bialpa chu a han en deuh hu a, "Tinge i din a?" tiin a zawt a.

Anthony-a chu a han thaw deuh huai a, "Kan kalna tur ala thui si....tui in tur kan nei tlem tawh lutuk. Dama, kha nang...va lei teh." tiin a thianpa chu a la tir zui. Peih loh hmel tak chuan Dama chu a ner deuh nung a, "I va ti peihawm loh ee....va lei ve mai teh." a lo ti vin hlur a.

"Ka pawisa ka thawh dawn hi mawle aw...duh leh eitur dang emaw, cold drinks vel i rawn lei dawn nia. Hei, kan zu ah pawh tui pawlh tur engmah kan neih tawh loh hi.." Anthony-a chuan a han ti leh a. Tum bur chung chuan Dama chu a chhuak a, chuveleh rawp hmel tak hian Cindy leh Anthony-a te chu an in fawp nghal tawn tawn mai.

Dawr chhungah chuan Dama chu a lut a, eitur tlem azawng leh tui chu a lei a. DAwr nghak tu in pawisa a kir dawn vel lai chuan Dama chu a han hawi kual a, dawr nghaktu thutna bul dawhkan sira sazupui hmaikawr a han hmu chu a en vang vang mai. Plastic khawng tak atanga siam a nih hmel a, chutin a cute teh chiam lo bawk.

Dama chuan dawr nghaktu chu ava melh zeuh va, lehlam a lo la hawi reng a. DAwr chhung chu a han en kual leh a, CCTV a awm lo tih a hmuh veleh chuan hmaikawr chu a la ru zeuh va. A jacket chhungah chuan a thukru nghal, dawr nghaktu chuan pawisa chu a kir a, Dama pawh rang tak chuan a chhuak nghal a.

Motor lam chu a pan a, mahse a ding deuh thut a. A jacket chhunglam chu zetin a sazupui hmaikawr ruk chu a han phawrh chhuak zal zal a, a aia chiang zawk hian a han en a. A lu bu nghauh nghauhvin, "A sial kher mai...a tlo hmel bawk si." tiin a ak leh mai a.

Mahse Dama chu dawr nghaktu chauh chuan a lo hmu hauh lo, dawr sir atang chuan tu emaw hian a lo en reng mai. Chupa chu tudang nilovin, Rsa a ni. A thawmhnaw hak erawh a dang tawh a, khawi atanga a neih nge erawh tuma hriat va ni suh. A hmai chu rawmawl chuan a tuam leh daih a, a mit chiah a lang thei.

Ngawi reng chuan Dama chu a zui a, motor lam chu a pan ve zel a. Dama chu motor chhungah chuan a lut a, a luh rual rual chuan a hnunglam, bungraw phurhna ah chuan Rsa chu a lawn ve nghal. Dama leh a thiante chuan an hre hauh lo, tichuan RSa phur reng chung chuan an tlan leh ta a.

****************************************

Lunch Break a ni a, a lo tiam tawh ang ngeiin Hlutei chuan Esi chu school canteen ah chuan a chawlh pui a, thil an ei dun mek a. Esi chuan a ei tui loh hmel kher mai, a melh ngai melh reng chuan a eitur chu a chawk a chawk ringawt a. Hlutei chuan mak tih hmel tak hian a han en vung vung a, "I va ei tui loh hmel ve....tinge a?" tiin a han zawt a.

Mahse Esi chuan hria awm ang pawhin a lang lo, a melh ngai melh reng chung chuan a eitur chu a la chawh chhunzawm reng a. Hlutei chuan mak a ti angreng kher mai, "Esi...a tui i ti lo ami?" tiin a han zawt leh a. Mahse Esi chuan a la chhang chuang lo, "Esi..Esi.." tiin Hlutei chuan a darah a va vuan a.

Chuveleh Esi chu a phu nasa kher mai, "Awi...min ti phu nasa lutuk." tiin a thaw nghal hlawp hlawp a. Hlutei pawh chu a phu ve nghe nghe bawk, "Ka biak mawlh mawlh che kha, tinge i va ei tui loh hmel ve ka tih kha.." Hlutei chuan a han ti nuah nuah a.

Esi chu za lo tak chuan a nui lui a, "Hehe..nia, ahh..ihh, nilo...a tui a lawm...a tui lutuk.." tih pah chuan a han ei hnuhnawh leh ang lawi a. Mahse Hlutei ngaih chu a tha tlat lo, "Rilru hahna i nei em ni? Min hrilh la...i thiannu ka awm hi.." zaidam tak chuan a han ti a.

Esi chuan a thil ei lai chu a dah a, a han thaw deuh huai a. A hmel atang chuan a hlim lo tih a hriat takzet bawk, "Englo ania, ka mumang kha ka lo ngaihtuah a..." tiin a chhang ta nge nge a. "Enge i mumang chu ni reng reng a?" tiin Hlutei chuan a zawt leh a.

"Nikuma thil thleng tho kha..." tih pah chuan a hnuk a ulh nghal titih der mai. Hlutei chuan a ha en leh hu a, "Eng nikuma thil thleng maw?" tiin a zawt leh hu mai. Beidawn hmel tak hian Esi chuan a thiannu chu muangchang hian a en a, "Rsa...RSa ka hmu a ni." tiin a chhang ta mai a.

Hlutei chu a inthiam lo kher mai, "Ka tihpalh lutuk aw...Esi..ka lo zawt lui vak vak che a." tiin thupha a chawi nghal mawlh mawlh mai. Esi chu a nui lui a, "A pawi lo, min zawt miau alawm. Ka pa pawh tukina a thinrim nachhan ania, mumang tha lo ka neih thu ka sawi a, ka nu in min zawt a..khami ka chhang kha min vin hrep a." tiin zaidam tak chuan a lo chhang a.

"Engtin nge i hmuh thin a?"

"Ka sawi thiam lo, zantin deuh thaw ka mang tawh. Kha a sazupui hmaikawr mawlh mai kha...tin, ka thiante mangang au thawm te kha ka bengah hian a la cham reng mai te hian ka hria."

"Nia..ka hrethiam lutuk che alawm. Mahse nghak deuh la, a reh ve leh mai ang."

"Kum khat lai a liam tawh....mahse ngaihzawngte then la na ang maiin RSa hi ka theihnghilh thei lo chu a nih hi. A chang te hian, zanah te hian ka tukverh bulah te hian a lo ding run ang te hian ka hmu tlat zel. A hrehawm ka ti lutuk, rei lote chhung chu ka theihnghilh ve mai, mahse tun hnai hian...tun hnai ah hian ka hlau thar tlat a ni."

Hlutei pawh chuan a khawngaih hle a, han hnem dan vak pawh a hre bik lo. An ngawi dun vang vang a, "Ka thiannu pakhat hmu la a tha ang...ihh, ngaihloh lamah lo ngai lo la. I a ka tihna a nilo ania, psychiatrist a nia...mi tamtakin an pan thin alawm." inthlahrung tak hian Hlutei chuan a han ti a.

Esi chu a ngawi vang vang a, "Esi, i a ka tihna kher a ni lo ania...ka tanpui theih dan che..ka hriat awmchhun ania, ngaihthlak dan lo thiam hram teh." Hlutei bawk chuan a han ti leh a. Esi pawh chuan a lu a han bu nghat nghat a, "Umm..ka hrethiam alawm." tiin a chhang ve mai bawk a.

*******************************

Anthony-a te thian ho pawh chu an tlan zel a, "Mawng ava kham ta ve....kan peg lawk dawn mi?" Dama chuan a han ti nuah nuah a. Anthony-a chu a lo khi suk a, "Nanga rukru zu chak, ngatan mah kan ngai lo." a lo ti deuh zek mai a, Cindy lah chu ala nui huah huah zui.

Rum zet hian Dama chuan a thianpa chu a melh a, "Ve a che....hmaikawr pakhat ka trick ve a ni mai a. I bialnu awmlai hian i pawisa rukna zawng zawng ka sawi mai tur ania aw, khatin mi ti ve khanglang suh." tiin a vin deuh hrep mai. Cindy chuan nui deuh put put chung hian, "Ehe..rukru ve tho elaw i lo nih a?" tih pah chuan a bialpa chu a han melh rum der vel a.

Anthony-a pawh chu a nuih aza nasa mai, "Ekhai Ekhai, a nih chuan i ding ang u hmiang. Kan thianpa Dama hian zu in a chak emai, kan spot mai aniang chu." a han ti deuh kher a. DAma lah chuan a thianpa chu a ei lo laklawh nge mawni, "I in chak ve tho kha...ngawi mai mai teh." a han ti leh hram a.

Anthony-a chuan kawng chu a han en phei vang vang a, "Saw laiah sawn aw...a rem ang, mahse rei lo ila." tiin kawng sirah chuan a ding a, an zu pai te chu la chhuakin kawng sirah chuan an inchhawp a. A hmeichhia ber chuan, "Khawimaw ka lo in hmasa ber teh ang." a la ti zui.

A han tlak deuh pap a, a ner deuh suk suk mai. Mipa pahnih te chuan an han thli ve nghal a, "AWii kawng ava kham duh veleh.." tih pah chuan a han zi mar vel a. Lehlam a hawi chiah chu a phu zuk a, a au nghal tuar mai. Anthony-a te thiandun pawh chu an phu nasa lutuk ringawt, an zu chu an la thlauh buak phah vek zui.

"Enge..enge ni?" tiin Anthony-a chu a zuang tho nghal a, Dama pawh chu a rawn tho ve nghal bawk. Motor an va hawi phei chu Rsa chu an Pick-up hnungah chuan hmaituam chung hian a lo ding run mai. Mak ti tak hian an en thap a, "Hey..tu phaingsen nge i nih a?" tiin Anthony-a chuan a han vin tuar a.

MAhse Rsa chuan a chhang lo, an pathum chuan a melh run mai. Cindy hlau lutuk chu Anthony-a phenah chuan a biru nghal a, "Enge kan motor ah khan i tih....rawn chhuk nghal rawh." tiin Anthony-a bawk chuan a han vin leh vak vak a. Mahse Rsa chuan a la chhang chuang lo, che eih lo hian a ding run reng ringawt.

Inla fing tak hian Dama chuan, "Insum teh Anthony, keiman kan dawr ange.." tiin a va pan hnai a. A aw a han thian vel phawt a, "Enteh thianpa, a rukin i lo chuang reng tihna em ni a hnungah khan?" tiin a han zawt a. A chhan mai loh avang chuan, "Kal duhna i nei ami? Hei....keini thian ho hi luiah kan kal dawn a....kan la thleng dawn lo ropui lehnghal. I kal duhna sawi la, kan drop tawp mai dawn che nia.." polite tak chuan a han ti vel a.

Mahse RSa chu a la ding ngawi reng ringawt, Anthony-a ngaihdan a ni ta lo. A pocket knife chu a phawrh a, "Lo chhuk rawh, lo chhuk nghal rawh." tiin a vin ta tuar tuar mai. Cindy chuan a lo pawt nghal a, "Anthony, insum rawh...khatin ti vak vak suh." tiin a lo khap a.

Dama pawh chuan, "Bro, insum deuh teh...kan be leh ange.." a lo ti ve bawk a. Mahse Anthony-a chu a kal thut a, pick up hnunglam ah chuan a phei a. Rsa chuan a lo en zui zel a, "Chhuk rawh...anih loh chuan ka rawn chho anga, ka vit hreh miah lo che ania." a han ti leh khur khur a.

RSa erawh a la ding ngawi reng tho, "A tha e...tun chiah ka hrilh tawh ang che. Rawn chhuk rawh, a nih loh chuan ka vit tak tak ang che." Anthony-a bawk chuan a han ti leh khur khur a, a thiante lo khapna pawh chu a ngaithla tawh lo. Rsa pawh chu muang chang chuan a rawn phei a, pick-up hnung atang chuan a chhuk ve mai bawk.

Anthony-a lah a lo intithei, "Kha kha nimai, ka kahwngaih che a lawm hle rawh." nuih deuh vur vur pah chuan a han ti hram a. Cindy chuan hlauh hmel tak hian, "Kal ang u...kal vat ang u." a ti chung chung tawh mai. Dama chuan ngaih that loh hmel deuh hian, "Hepa hi..tah hian kan dah ringawt dawn mi?" a lo ti a.

Vin zet hian Anthony-a chuan, "I mawl ami? Engatan nge khapa kha kan tih anga?" a lo ti hrep mai a. "Aww..mi anglo pawh a lo ni thei a. Hetah hnutchhiah tawp te chu a chi dawn mi, tawh sual a tawk thei asin?" Dama chuan a han ti leh a. Anthony-a chu a thaw deuh hak mai, Rsa chu a va en a.

Hnung chhawn zawng hian a lo ding leh run mai a, "Hey, nang pa kha?" a han ti deuh vak a. MAhse Rsa chu a rawn hawi lo, a la hnungchhawn reng a. Anthony-a bawk chuan, "Ka biak che chu i hria em? I beng a ngawng deuh ami a?" tiin a han vin leh vak a.

MAhse ala chhang chuang lo, a la rawn hawi let eih lo bawk. Anthony-a thinrim chu a insum zo lo leh ta, "Zawnga leh...i va ngeng ve mawle." tih pah chuan a va pan ta mai a. Cindy leh Dama hlauthawng chuan an lo khap a, mahse a ngaithla tawh lo. Rsa chu a kuai her sawk a, "Ka biak che chu i hre lo ami?" tih pah chuan a pocket knife chuan a tin leh ta a.

Chuveleh RSa chu rang zet hian a rawn leh hawi a, Anthony-a pocket knife ken lai chu chhuhsak thutin a dulah chuan a vih sak ta siah siah mai a. Cindy chu a au nghal vak vak a, rang takin motor chhungah chuan a lut nghal. Anthony-a chu a thal tawp a, a dul atang chuan thisen a rawn baw zawih zawih mai.

Dama chuan va puih tumin a va tlan phei a, mahse Rsa chuan a lo rek chat mai. A hnek thal tawp a, lamlianah chuan a bawhbet zui nghal bawk. Chutih lai chuan Cindy hlau lutuk chu a che ngam tawh lo, a thlan a tla zawih zawih a. Men pawh a meng ngam tawh lo, zun a cheh hial bawk.

Mahse thawm a reh tak diak ah chuan zawimuang hian a meng a, a thaw hlawp hlawp bawk. Side glass vel atang chuan a han en dek dek a, mahse a bialpa Anthony-a, thisen nena inchiah piah nuai a let reng bak a hmu thei lo. A mittui a tla zawih zawih a, "Nilo..Anthony...a ni thei lo." tiin thawm chhuah hlau tak chung si chuan a tap zawih zawih mai.

Chutah muang chang chuan a han che ve leh deuh va, tukverh chu roll thlak a tum, a ban chiah chu tukverh-a thisen per chhawk khawp chuan Dama chuan a rawn bawh thlawp mai. A ka atang chuan thisen a lo chhuak nasa khawp mai a, Cindy hlau lutuk chu a au ring kher mai.

RAng lutukin kawngka lehlama chhuah tum chuan driver seat lam zawk chu a va bawh phei rawk rawk a, a chhuak thei hram. A bawk thla tawp a, a tho leh chiah chu a hma ah tak mai chuan Rsa a lo ding run mai a nih chu. Cindy hlau lutuk chu a t(r)e vak a, mahse Rsa chuan a samah a tham a.

Motor hma ah a lu chu a tawrh tir pawp a, Cindy pawh a thal nghal tawp mai. Mahse hnugnlam atang chuan tu emaw hian a rawn zuan a, Dama a lo ni. Awlsam tak hian Rsa chuan a phih let dawrh mai a, lamlianah chuan Dama chu a ri thum dut mai. RSa chuan a rek bet a, a beng lehlam ve ve ah chuan a tham a.

Chutah a tukhum chuan lamlian char chu a tauh tir leh ta pawp pawp mai a, vawi 10 vel lai a tauh tir hnuah chuan Dama thluak chu lamlianah chuan a baw nuai mai. Rsa chu a tho va, motor lam ava en leh chu Cindy a lo awm tawh hauh lo. A zawng kual nghal a, mahse a hmu tlat lo.

Motor chhung chu a zawng leh a, mahse a lo awm chuang lo. Chutah kha sazupui hmaikawr, Dama'n a ruk ngei mai kha a hmu ta thung a. A la nghal vat a, motor atang chuan a chhuak lehnghal bawk. A en vang vang a, tichuan a vuah ta nge nge a. Van lam chu hawiin a maimitchhing vang vang mai, a thaw deuh hruk hruk bawk a.

Chutih lai chuan hliam na tak nei chung chuan motor lam pan hian Anthony-a chu a vak phei a, a lo la thi lo chu niin. PAssenger seat lam kawngka chu a lo inhawng sa hlauh va. Kawngka sira chemte hriam em em mai, ramdang atanga a chah ngat chu a phawrh ta a.

Motor phenah chuan a biru leh nghal a, chutih lai chuan Dama ruang chu Rsa chuan a lo buaipui mek thung a. A pu nawlh a, lehlam khamah chuan a theh thla daih mai. A let leh lam chu motor phen atang chuan Anthony-a chu thi hnuang hian a rawn chhuak thut a, Rsa chu rawn vih a tum a.

Mahse RSa erawh a lo inring hman tlat, Anthony-a kut chu a lo man chat mai. Theih tawp chhuahin Anthony-a chuan thah hram a tum a, mahse a hliam a na tawh bawk si nen, thisen a hloh hnem tawh bawk si. Rsa chu a hneh lo kher mai, chutah Rsa chuan a ban ruh chu a la herh tliah sak zui a, a uai hian a uai hnawp mai a nih chu.

Anthony-a na ti lutuk chu a au t(r)ial ruai ruai mai a, RSa chuan chemte chu chhuhsakin a hrawkah chuan a vih sak leh ta pawp mai. Anthony-a ka atang chuan thisen a rawn baw chhuak hawk hawk mai a, reiloteah a thi zui nghal. MAhse RSa chuan a la duh tawk lo, Anthony-a hrawk chu a zai chhunzawm ta mial mial mai.

A zai a zai a, a zai bung ta daih mai a. Anthony-a lu chu la kangin a en vang vang a, lehlam hninbuk ah chuan a theh phei a. Mahse chu hnimbuk phenah chuan Cindy chu a lo biru reng mai chu niin, chutia a bialpa ruang mai pawh nilo, a lu chauh a han hmu mai chu a au chhuak teuh ngei mai.

Mahse a ka chu amah chuan a hup a, a insum hram hram a. Rsa chuan Anthony-a ruang pawh chu khamah chuan a paih leh daih mai a, tichuan motor chhunga tui bottle ho zawng zawng chu a la a. Kawngpuia thisen luang nuai mai te leh Dama thluak them la awm te chu a tifai a, tichuan motor chhunglamah bawk chuan lut leh in a han hai hnawk chiam a.

Thawmhnaw fai a hmuh ho chu a la a, Anthony-a leh Dama ten a tui chen zawh a an inhak thlak na tura an ken pawh a ni mahna. A kawr a thisen kai nuai mai te chu a thlak a, a hmaikawr pawh phelhin jacket ah chuan a thukru daih a. Reiloteah chuan Truck lian tak pakhat hi a let zawng hian a rawn tlan a, Rsa chuan a lo phar ding ve mai bawk a.

Driver chu a rawn dak a, "Eheu..i motor a chhia a nimaw?" a rawn ti a. Rsa chuan a lu a bu nghut ringawt, "Puih i ngai ami? Khawnge kal i duh a?" driver chuan a rawn ti leh a. RSa chu a han hawi kual a, mel lung pakhat a AIZAWL - KM 30 tih lo inziak chu a kawk a.

Driver chu a khi suk a, "E..keipawh ka kal dawn lawm, bungraw dah a ngai a. Ka hmanhmawh bawk sia ka siampui hman tawh lovang che aa...i motor kha khata riah kha a pawi viau angem?" tiin a han zawt leh a. Rsa chuan a lu a lo thing leh ringawt. Driver pawh chuan zaizir chauh va a chhanglet ziah mai chu mak a ti angreng khawp mai, "Umm...a hnungah khan, bungraw zingah khan awm mai rawh aw.." tiin a han nui vel huah huah a.

Chutih lai chuan Cindy chuan a lo en reng a, "Nilo...kal suh ka pu...min chhan rawh." tiin tap chungin ama hriat tham lek chuan a phun zawi sap a, RSa'n a hriat phak a hlau bawk si, che lo chuan a en reng ringawt. RSa chu Truck hnungah chuan a lawn a, an tlan liam veleh chuan Cindy chu a rawn chhuak ve nghal bawk a.

Rang takin motor lam a pan a, a phone chu a la nghal. Mahse signal a la awm lo zui, signal zawng chuan a han kal kual leh a, a mangang kher mai. Motor lah a khalh thiam ve der mai bawk si lo, a awmna lah chu a hla em em mai bawk si. Signal zawng chuan a han kal kual a, a tap hawm hawm reng bawk a.

******************************************

TO BE CONTINUE