USAGI : 2 (THE BUNNY RETURNS) ENGLISH : DARK BUNNY [MIZO HORROR/SLASHER FICTION STORY] Written by : Aaron Malsawmdawngzuala WARNING : 18+ CHAPTER : 6 (LAST)

 USAGI : 2 (THE BUNNY RETURNS)

ENGLISH : DARK BUNNY

[MIZO HORROR/SLASHER FICTION STORY]

Written by : Aaron Malsawmdawngzuala

WARNING : 18+

CHAPTER : 6

(LAST)

********************************

Police te chu an rawn thleng a, Deborah-i chu a dinna ngaiah chuan a lo ding reng a. Deborah-i bulah tak chuan police te chuan an motor chu anr awn tiding a, Inspector AWmpuia leh SI Hminga te chu an rawn chhuak nghal a. Deborah-i chu va pan vatin, "Nula...i tha em? A khawihna hman che em?" tiin Awmpuia chuan a rawn zawt nghal vat a.

Deborah-i chuan a mittui chu hru in, "Aih..engtin mah min ti lo." tiin a lo chhang a. Awmpuia chu a thaw huai mai, "Deborah-i i ni tiraw?" tiin a han zawt leh a. Deborah-i chuan a lu chu lo bu nghutin, "Aw..ka nia lawm." tiin a lo chhang leh a. SI HMinga pawh chuan, "Khawi lamah nge a tlan?" tiin a lo zawt ve bawk.

Mahse Deborah-i chu a ngawi reng a, a lu a thing ringawt a. "I na lo tak tak amaw? I bula a ding lai kha chu kan rawn hmu hman a, a khawih na miah lo tak tak che amaw?" tiin Awmpuia chuan a han zawt leh a. Deborah-i chuan a lu a bu leh nghut ringawt a, "Hminga, saw lamah sawn va zawng ula, keiin Deborah-i hi ka va thlah ange." AWmpuia bawk chuan a han ti leh a.

Mahse Deborah-i chuan, "Aih, thlah ka ngai lo. Scooty ka lo keng a, keimahin ka haw thei alawm." a rawn ti daih mai. Awmpuia chu a han thaw hluai a, "Enteh Deborah, Rsa hian target pathum a nei a. Chu chu nang, Estheri leh Isaka te an ni. Estheri leh Isaka te erawh an him hram a, nang hi ka mawhphurna i ni. Rsa case hi ka kutah a awm a, ka venhim che i ngai." zaidam tak chuan a han ti a.

Deborah-i chuan a chhang lo, hnuailam melhin a ngawi reng a. Chutah Awmpuia bawk chuan, "Awle a tha e, i scooty chuan inkhalh haw la, i hnungah ka lo zui mai ang che." a han ti leh a, Deborah-i chuan a lu a bu leh nghut ringawt. Tichuan an inzui haw ta a, SI Hminga te erawh chuan Rsa chu an zawn chhunzawm leh nghal a.

****************************

A tuk zingah chuan Police Station ah chuan a hma zana Esi te ina duty, police la dam awmchhun pathum te chu inthlahrun hmel tak hian kun reng chung chuan an ding tlar thap mai. An hma ah chuan Inspector AWmpuia leh SI Hminga te pawh chu an ding ve bawk a, AWmpuia chuan chung police pathumte chu a hau mek a ni.

"Hna hahthlak tak pawh a ni lo, engtin nge in thiante pahnih in misual an beih laia engmah in lo hriat loh theih? Nunna pahnih kan chan ringawt asin, manna chance tha lutuk ah pawh....in va han laktlak loh em em ve. Pistol pawh ka pai tir che u a ni lawm ni, ti chung khan police ka ni e chu in la ti ve ngam chu ania, zak ngawih ngawih rawh u." tiin a vin hrep hrep hlawm mai a.

Police pathumte chuan an chhang ngam lo mai nilovin en pawh an en ngam lo, ngawi reng chuan an kun thap hlawm a. AWmpuia chu a han thaw leh hak a, "Kal teh u..in hmel pawh hi ka hmu peih lo. In hna ah let leh rawh u, ka thaw in tipik." tiin amah zawk chu pawnah chuan a chhuak daih a, SI Hminga chuan a zui chhuak ve nghal bawk.

Awmpuia chu a han maimitchhing vang vang a, "Sir, engtin nge hma kan lak zel dawn?" tiin SI HMinga chuan a rawn zawt a. AWmpuia chuan a ipte atang chuan meizial a pahwrh a, a han zu khu hluah hluah a. Si vang vang pah chuan, "Kan zawng ang, kan zawng zel ang. Kan hmuh hma chu kan zawng ang, kan man ngei bawk ang." tiin a chhang a.

Hminga chu a han ner deuh nung a, "Keichu puitu a neih hi ka ring nghet bur tawh, man a har dan em em hi..” a han ti nuah nuah a. AWmpuia chu a lo khi suk a, “Puitu a nei emaw nei lo emaw...ka man dawn. Puitu lo nei sawmsarih rawh se, a puitu nen lam ka man vek ang.” tiin a insehruh nasa ngei mai.

*****************************************

Esi muhil pawh a rawn harh ve ta a, “Good morning, BAwihte...nizan chu i mutui bawk aniang, i hnar ri suk suk alawm.” Pi Chhingi chuan a lo ti nghal a. Esi chu a hawi kual a, “Nu..khawnge ka pa? A lo thleng tawh em?” tiin a han zawt nghal a. “Aih la thleng lo, a lo kal mek..kan inbe zo chiah a.” tiin anu chuan a lo chhang a.

Esi lah chuan, “A tha maw? Nizanah thil thleng te a awm em?” tiin a han zawt leh a. Pi Chhingi chu a nui suk a, “Engmah a thleng lo, a tha alawm. Lungngai suh, engmah a thleng lo.” tiin a chhang leh a. Esi pawh chu a thaw huai mai, “A that nasat chu.” a ti zawi sap a.

Reilote hnuah chuan Pu Ringa chu a rawn thleng a, “Eee khai BAwihte, i lo tho tawh animaw?” tiin a rawn nui leu sang a. Esi bulah chuan thu in, “Nizan i mutui em? Na te ila nei em?” tiin a han zawt nghal a. Esi pawh chu a lo khi suk a, “Aih neilo ve..nizan chu ka mutui angreng.” tiin a lo chhang a.

“A that haluh chu, damdawi in chaw kha i ei peih lo thei sia ka tia, hei tiffin ka rawn pai che a.” tiin Pu Ringa chuan a tiffin pai chu a han phawrh a. Chutih lai chuan doctor a rawn lut a, “Kan nula hmeltha-i chu nizan a mutui bawk maw?” tiin a rawn nui lut deuh var var a.

Esi nu chuan, “A mutui aniang, a hnar suk suk alawm.” tiin a lo chhang a. Doctor chu Esi bulah chuan thu in, “I hliam te ala na viau em? Nizanah i khua te a sik em?” tiin a han zawt leh a. “Aih..sik love...ka chet deuh hian ala na a, chu chu nimai.” tiin Esi chuan a chhang a.

Doctor chuan a BP a han check sak a, “Umm, i BP pawh a tha e. Rin aiin hma i sawn chak hle mai, hetianga i dam zel anih chuan naktuk velah chuan i chhuak thei tawh mai ang.” tiin a hrilh a. Esi chu a ngawi vang vang a, “Doctor, Isaka chu a lo harh chhuak tawh em? Enge a an, a biak theih tawh em?” tiin a han zawt a.

Doctor chuan a lu a thing a, “Ala harh lo, mahse a tha lutuk ringawt. Engmah hlauhthawnna tur a awm lo, a biak theih vat ang.” tiin a chhang a. Pu Ringa chuan, “Tikhan lo inbe ru aw, Bawihte...i nu nen dawrah kan va kal lawk ange.” a han ti a. “Cold drinks lo lei nghal teh u, ka in chak.” tiin Esi chuan a lo chhang a.

***************************************

Hospital pawnah chuan Pu RInga te nupa chu an ding a, “I tha takzet maw? AWiii ka hlauhthawn hman zia chu...a hmel i hmu em?” tiin Pi Chhingi chuan an pa chu a han zawt nghal a. Pu RInga chuan a lu a thing a, “Hmaikawr a vuah a, a hmel ka hmu thei lo. Engapwh chu nise Esi hian hrelo se a tha ber, thisen pawh kan inkawtah a luang kawi nuai alawm.” tiin a chhang a.

“Tiang te chuan engtin nge inah pawh kan haw ngam tawh ang ni...i tan pawh a hlauhawm.”

“Nia...tlem a tlemah min that lo chauh alawm.”

“A hrim hrimin police te pawh chu an va duty tha lo awm ve...an hna an tlin thlawt lo a nih chu. Nang pawh riak tawh lo mai rawh, kan inah chuan...”

“Ka riah loh vin, khawi hmun dangah nge riak se min tih a?”

“Awww i thianpa Tlana te inah pawh riak mai rawh.”

“Nakinah kan sawi dawnnia, dawrah chuan i kal phawt teh ang. Chaw i la ei awm silo, Esi pawh a ril a tam tawh ang.”

Pu Ringa te nupa chu dawr lam pan chuan an inzui phei a, an bul lawkah chuan nurse Rempuii chuan an thusawi zawng zawng chu a lo ngaithla reng chu niin. Amah vang vek a thil thleng niin a ngai a, Rsa lo chhuah zalen tu, lo puitu ber a ni bawk si nen. A inchhir takzet a, mahse tih theih engmah a nei der mai si lo.

**********************************

Chhun dar 12 vel a ni a, Deborah-i chu a roomah chuan tukverh lam hawiin a thu ngawi reng a. A mitthlaah chuan a u Rsa hmel chu a rawn lang a, “U..khawnge i awm? In man tir miah suh aw....hmuh leh che ka va han duh tak em?” tiin a phun zawi sap a.

A u Rsa chu tualthattu, a mit hmuh lai ngeia Pi Sangkimi te nupa thattu, pawisawi lo tam tak thattu a ni tih chu a hria. Zan tam tak a mut theihloh phah a, a hlau hle thin bawk kha a ni a. Mahse tunah zet zawng, a u chu hmuh leh a chak ngawih ngawih tawh zawk a, hlauhna chhe te mah a nei tawh lo.

Tihnat ve a tum lo tih a hrechiang tawh bawk a, a hmaa a thingthit a, a hmaikawr a phelh phei kha chuan a u Rsa chuan a lo hmangaih hle a ni tih a ring nghet nghal bur bawk. Chutia a inngaihtuah vung vung lai chuan a phone a rawn ri a, a number hriat ngai loh a lo ni.

Phone chu a han la a, “Hello..Deborah-i a ni em aw?” phone a mi chuan a rawn ti a. “AW ni e, tunge ni?” tiin Deborah-i chuan a zawt let a. Phone ami chuan, “Inspecgtor Awmpuia ka nia, nizana thlahtu che kha...i number hi ka nei thei hram a, biak lawk che kan va duh ve.." a rawn ti a.

Deborah-i chuan nin hmel tak hian, "Engthil ah nge?" a lo ti hlur a. Inthlahrung deuh tak hian Awmpuia chuan, "Aa.a..nizan khan han inkawm chianna hun kha kan nei ta si lova, thu engemaw han zawh lawk che kan duh mawle. Police Station lamah i lo kal thei angem?" tiin a rawn zawt leh a.

Deborah-i chuan a peih loh hmel kher mai, "Vawiinah kher angai ami?" a han ti leh deuh hlur a. "AW...a theih hram chuan...a pawimawh si a, chuvang ania..hun ilo insiam hram thei angem?" tiin Awmpuia chuan a rawn zawt leh a. Deborah-i chu a han ner deuh nung a, "Awle...ka lo kal ang." tiin a chhang a, phone chu an dah ta a.

*************************************

Esi inthiar zo chu bathroom atang chuan a rawn bai chhuak auh auh va, a nu leh pate erawh in lamah an haw zuai a. Kawngka chu a rawn ri rak a, Esi'n ava en chuan Rempuii a lo ni. Rum zet hian Esi chuan melhin, "Nurse dang an awm ngang lo ami, tinge nang bawk i rawn luh leh a?" a lo ti nghal hlur mai a.

Inthlahrung tak chuan Rempuii chuan, "Esi..thil hrilh duh che ka nei a ni." a han ti zawi sap a. Esi chuan melh pawh a lo melh peih lo, "Engmah ka ngaithla peih lo, Rsa chungchang a nih ngat phei chuan ka hre duh lo." a lo tih khum leh hmuk mai. Rempuii chu a han inhnit deuh feih feih a, "Enteh Esi, ka thiamloh a ni tih ka hria." tiin a han chawl deuh dat a.

Chutah sawi chhunzawm leh in, "Khami zan khan Rsa kha lo pui lo ta ila chu hetiang thil hi i chungah a thleng miah lo tur ania, ka thiam loh vek a ni tih ka hria. Nitin mai hian ruang an hmuh belh zel mai bawk si nen, keimah vang vek a ni. Siamthat theih tawh loh mahse, ka tih ngei tur niin ka hria. Police ho hnenah ka inpuang ang, engkim ka sawi vek ang." a ti ta mai a.

Chuveleh Esi chu a meng phawk nasa mai, "Eng a? Police hnenah i inpuang dawn maw?" a ti hu mai. Rempuii chuan a lu a bu nghat nghat a, "Umm...ka tih ngei angai. Ka tih sual man chu ka hmuh ve angai, hremna chu engpawh nise ka tuar ang. Tunah hian ka duty shift a zo tawh a, ka haw pahin Police Station ah chuan ka tlang nghal ang." tiin a chhang leh a.

Esi chuan sawi tur pawh a hre lo, a ngawi reng ringawt. Rempuii bawk chuan, "A theih hram chuan min ngaidam dawnnia, chuan...i lo in enkawl tha dawnnia." tiin chhuah a tum a. A banah chuan Esi chuan a lo pawt a, REmpuii pawh chuan mak a ti kher mai.

Esi chuan chiang tak hian a en a, "Police te hnena thudik i va sawi avang khan Rsa hi an man phah dawn lo, tu tan mah hlawkna a awm lo bawk. Ka ngaihdam i duh a nih chuan engmah sawi lo khan ngawi hmak la, Police Station ah chuan va kal hlek suh ang che." tiin a hrilh a, Rempuii pawh chu a ngawi reng ringawt.

******************************

Police Station lamah chuan Deborah-i leh Inspector Awmpuia te chu an lo titi mek a, "A thu hrimin nizan khan, zan a rei tawh sia, enge i tih reng reng a?" tiin AWmpuia chuan a han zawt a. Deborah-i chuan kun ngul chung hian, "Ka han hawi thawveng mai mai mawle." tiin a chhang a.

Awmpuia chuan a lu a han bu nghauh nghauh va, "Umm..a nih tak chu. Englo ania, nizan khan Pu Ringa te inah police an duty a, duty te zinga mi pahnih Rsa hian a that a. Kan rawn zawnna lamah tikhan kan hmu ta che u kha ania, engtin nge tah khan in lo awmdun theih reng reng a, engtia intawng nge in nih reng reng a?" tiin a han zawt leh a.

Debrorah-i chu a han thaw hak a, "KA haw tur kha....a rawn lang thut a. MAhse engtin mah min ti lo, min khawih na lo hrim hrim." tiin a chhang leh a. Awmpuai chuan  Deborah-i chu a han melh vang vang a, "Amak ka tih chu amw, Deborah...thlamuan hmel tak khan a bulah khan i ding reng thei a, tinge tlanchhiat pawh i tum miah loh va?" tiin a han zawt leh a.

Chutah DEborah-i chuan rum fe hian Awmpuia chu a en a, "Engvangin nge ka tlanchhiat ang? Ka unaupa alawm, ka u ania engvangin nge ka hlauh teh lul ang ni?" a ti ta khur khur mai. AWmpuia chu a han thaw hluai a, "Deborah, i u hian tual a that hnem tawh lutuk." a han ti dek dek chu Deborah-i chu a ding hluai mai a, AWmpuia pawh a ngawi nghal hmak.

Chutah thinrim hmel tak hian, "Aw ka hria, mi tam tak a that. PAwisawi lo tam tak a that, mahse ka u ania, ka hlau lova, ka tlanchhe lo a ni mai. Thudik tak ka hrilh ang che, nizan khan ka haw tur kha tlangval zurui pahnihin min tibuai a. MAhse ka u khan min rawn chhan asin, engtin mah min ti na ve lo. KA himna tur i duh anih chuan Police Station-a lo kal tur hian min rawn ko chhen tawh lo la animai, in duh chuan Rsa chu zawng ula, man ula, that rawh u...ka buaina tur a awm lo." tiin a chhuak ta daih mai.

AWmpuia chu a maimitchhing vang vang a, "A va han buaithlak thin em ve awwww..." a ti vawng vawng mai. SI Hminga chuan Deborah-i chu a han en zui vawng vawng a, "Sir, Rsa hian puitu a neih kan ring a...a nau hi a nimai lo maw?" a han ti nuah nuah a.

AWmpuia chu a khi deuh suk a, "A ni mahna..engpawh nise saw nau saw enthlak ruk deuh angai a nih hi, i kutah ka dah aw...kei chu zanin ah Pu Ringa te inah ka duty ve tawh thung ang. Zanin hian a rawn che leh ngei dawnin ka hria, kan fimkhur tlan angai." tiin a chhang a.

************************************

Zan a lo ni ta, Pu Ringa te inah chuan AWmpuia chu a duty ve ta thung a. Pawn lamah chuan police paruk lai an awm ve bawk a, in hma lamah pathum, hnung lamah pathum, tiang chuan duty-na tur an insem a. AWmpuia chu a in ral ring tawh khawp mai, "Lalruatsang, zanin hian rawn kal ngei ang che, ka man dawn khawp che." tiin a phun sap a.

Esi pawh damdawi inah chuan ala awm reng a, a muhil thei lo. Sana chu a en deuh chhen a, engemaw thil tha lo, thil duhawm loh tak a lo thleng dawn ni hian a hre tlat a. A nu erawh a muhil tawh thung, a thla a muang thei mawlh lo. Isaka erawh a la harh chhuak lo thung a, Esi rilru chu a hah takzet.

Chutiang bawkin Deborah-i pawh chu a muhil thei reng reng lo mai, a khumah chuan thu in a melh ngai a melh vung vung a, a thla a muang hlawl lo. A u Rsa chu an man a, an thah a hlau ngawih ngawih a. Sana chu a han melh leh thin a, dar 11:30 a pel der tawh a.

Rempuii pawh a bang bik lo, a room tukverh bulah chuan thu in a inngaihtuah nasa ngang mai. Chhun lama Esi'n, "Ka ngaihdam i duh a nih chuan ngawi hmak ang che, engmah sawi angai lo." tia  a hrilh chu a bengah chuan a ri nawn mawlh mawlh a. Ani pawh chuan sana chu a han melh leh thin a, hlauhthawnna riau a nei tlat mai.

SI Hminga erawh Deborah-i te in atanga hla vak lovah chuan motor chhungah awmin Deborah-i te in chu a thli thlai reng a, Awmpuia nen chuan an inbe pawh reng bawk. Deborah-i scooty a la hmuh theih avang chuan a chhuak lo tih chu a chiang reng a, message thawnin Awmpuia bulah chuan a khat tawk chuan report a va pe reng a.

********************************

DAr 12 a ri ta, Esi, Awmpuia, Rempuii leh Deborah-i te chu an thla a muang sawt chu sawi loh, an hlauthawng tulh tulh amaw tih mai tur a ni. A tu a te mah chu an mut a chhuak hlawm lo reng reng, an harh tulh tulh zawk. Awmpuia lah chu a vei kual sek a, "Lalruatsang, i rawn inlar dawn anih chuan lo kal vat rawh...ka sawisa dawn khawp che." tiin a han phun leh sup thin a.

SI Hminga chu a zun a chhuah avang chuan motor atang chuan a chhuak a, a zung zo chu a let leh mai a. Motor chhungah chuan a han lut leh a, minute 2 vel chhung chu a han ngawi vang vang a. Chutah seat hnung lam atang chuan mihring thaw ri hruk hruk niawm tak thawm chu a hre ta thut mai, a motor front mirror chu a han melh a.

Chutah Rsa chu a sazupui hmaikawr nen a seat hnung lamah chuan a lo thu reng mai a nih chu, Hminga chu a phu chiang kher mai. Dash-board chu hawngin a silai chu lak chhuah a tum a, mahse Rsa chuan hnuglam atang chuan a samah a rawn tham a. A hrawkah chuan a zai thler nghal duai mai, thisen chu a rawn bawn chhuak nghal hawk hawk a.

Hminga chu a khur dar dar a, Rsa lah chuan Hminga hrawk chu a zai chhunzawm ta mawlh mawlh mai. Hminga chu a thi chiang kher mai, a lu chu a bung lo chauh. Rsa chuan a duhtawk thei ta a, motor atang chuan a chhuk a. Thawk a han la te te a, tichuan Esi te in lam panin a kal phei leh ta a ni.

Chutih lai chuan Esi te in lam atang chuan Awmpuia chuan Hminga chu biak pawh a lo tum mek a, a message a dawng har deuh chu mak a ti angreng kher mai. "Enge chanchin?" tiin ava text a, mahse minute 10 hnu velah pawh chuan a lo la reply thei reng reng lo mai.

A han call ta ngat a, mahse a ring quit thak a. VAwi 6 vel lai chu a han call nawn leh a, mahse Hminga chuan a la thei der lo. A ngaih a tha ta hauh lo mai, pawnah chuan a chhuak a. In hmalama lo duty pathum te bulah chuan ava phei a, an zinga mi Muana chu ava bia a.

"Muana, SI HMinga hi a phone a la thei miah lo mai a. Va en lawk ta che, Deborah-i te in bulah a awm ang." tiin a hrilh a. Muana pawh chuan, "Awle Sir, ka va kal ange." tiin a kal ta nghal a. Awmpuia chu inchhung lamah chuan a let leh a, a thin chu a phu dep dep tawh mai a, a ngaih a tha lo takzet.

***********************************

Muana chu a bike chuan a tlan zel a, kawng reh lai deuh a thlen chuan kawng sir hnim buk atang chuan Rsa chu a sazupui hmaikawr vuah chungin chemte nen a rawn zuang chhuak thut mai. Muana phu nasa lutuk chu lamlianah chuan a bike nen chuan an tleng phei a, a ke ruh a la tliak zui.

A la hnang titih zui leh nghal a, a thaw hrawk hrawk mai. Chutah Rsa chuan a rawn pan phei a, thei leh thei lo hian Muana chuan a pistol chu a phawrh a. Mahse kah chu sawi lo, tin pawh a tin tha hleithei lo. Rsa chuan Muana kut, pistol a humna zawk chu a rah sak a.

Muana na ti lutuk chu a then chawk chawk mai, Rsa chuan pistol chu lak sakin kawng sira khamah chuan a theh thla daih mai a. Chutah na em em mai hian Muana dulah chuan a chhir pawp mai, Muana na ti lutuk chu a vial ngawng ngawng a. Lamlianah chuan a bawk vang a, Rsa chu a bulah chuan a rawn thingthi a.

Chutah a chemte ken lai chuan Muana hnungzangah chuan dimna tel hauh lo chuan a vit ta siah siah mai, Muana chu a t(r)e chel chul mai a. Rsa chuan a la duhtawk mai lo, a hnungzang mai nilo, a tukhumah te chuan a vit siah siah mai. Muana phone chu a rawn ri a, mahse Rsa chuan a ngaihsak loh hmel kher mai.

Muana chu a thi chiang ta, mahse Rsa chuan a la vit mawlh mawlh mai a. A thluak te pawh a lang hian tawh, Muana lu vun chu Rsa chuan a la hik ta deuh deuh va, rapthlak tak a ni. Rsa chuan a duhtawk ve thei ta, Muana ruang chu a en vang vang a. Chutah a phone chu a rawn ri leh a, Rsa chuan a rap chhe vek a, tichuan Esi te in lam pan bawk chuan a kal leh ta.

******************************

Muana pawh chuan a phone a lak theih tak lovah chuan Awmpuia chu a mangang takzet tawh, pawnah chuan a chhuak leh a. Duty pahnih te bulah chuan va kalin, "Ka va chhuak ve lawk ange, tha takin lo duty ang che u. Nizan ang kha chuan thil thleng tawh suh se, ka lo let leh vat ang." tiin a kalsan ta a.

Mahse rei pawh a tlan lo, kawng lai taka Muana ruang lo let reng mai a hmuh chuan a ding chat a. Rang lutukin motor atang chuan a chhuak a, "Muana...a ni thei lo, Muana.." tiin ava tlan phei nghal. Mahse Muana chu a lo thi der tawh, a luvun a lo la inhik zui.

Awmpuia pawh chuan a en rei thei lo, a lu a dawm vawng vawng a. Ring tak hian, "LALRUATSANG..LALRUATSANG.." tiin a au vak vak ringawt mai a. Chutah thil a hre chhuak thut mai, "Hminga..nilo..Hminga kha.." tiin motor ah chuan a let phei leh a, a phi ruai tawh mai.

Chak takin a tlan leh a, Deborah-i te in chu a thleng thuai a. SI HMinga motor pawh a lo la awm ran a, rang lutukin motor atang chuan a chhuk a. Hminga motor lam chu a va pan a, "Hminga..Hminga..." tih pah chuan motor kawngka chu a han hawng nghal rawk a.

Chutah Hminga ruang chu tla chhuak tawp mai a, a lu lah chu a lo uai hnuang mai. Awmpuia pawh chuan a rap takzet, a tawlh hnung nghal a. En pawh a en tha hleithei lo, "Hminga...nilo, a pawi lutuk..ava han pawi ta em." a ti vawng vawng mai. AWm ngaihna pawh a hre lo, a thlan fim chu a tla zawih zawih bawk a.

**************************

An pu ber AWmpuia awm loh hlan chu remchangah la in Esi te in hma lama duty te pahnih, Rintea leh Mama te chuan an zu pai ruk chu an lo in mek a. Rintea chuan no khat chu a han tlak pap a, "Sehhmeh tel lo chuan in ava har ngat ngat ve.." tiin a han then chawk chawk a.

Mama chuan a lo nuih a, "E taka....motor ah acid ka dah asin, i duh em?" tiin a han zawt a. Rintea chuan rum zet hian a melh a, "I va sawi har ve...mawl lutuk mai, va la rawh." tiin a vin deuh zek a. Mama pawh chu a kal ve mai bawk, reiloteah chuan a rawn let leh a.

Mahse a rawn kal chhut chhut mai, mit khap miah lo chuan zawi muang hian a rawn pen deuh chut chut a. Rintea chuan a la nuih zui, "I van kai hma ve mawle.." tiin a lo chhaih a. Mahse Mama chu a ding thut a, a ka atang chuan thisen a rawn phuh chhuak ta th(r)awt mai.

Rintea pawh chu a ding nghal a, "Ehe...Mama..Mama? Enge awmzia?" a ti nghal chul mai a. Mama chu a thingthi hnawk a, "R..Rsa...RSa.." tih chiah a sawi thei, a bawk leh thlawp mai. A hnungah chuan chemte hi a lo bur va mai a, Rintea chu a hlauthawng kher mai.

A pistol chu a phawrh a, in hnung lama duty a thiante hrilh tur chuan tlan nghal a tum a. Mahse a hawi let chiah chu a hnungah chuan Rsa a lo ding run mai, a su pawp a. A pistol chu ala thlauh zui, au tumin a ka ang zuau a. Mahse Rsa chuan a hmui chu a hup sak a, nghet takin Rintea lu chu a vuan a.

Chutah a han th(r)uai pawp mai a, a ri tuar mai. Rintea ringruh chu a tliak chiang ngang mai a, leiah chuan a thal tawp a. A thi nghal bawk, Rsa chuan Mama ruang chu ava pan leh a. A hnungzanga chemte bur va mai chu a han pawt phawi a, tichuan in hnung lam chu a va pan leh ta.

***************************************

In hnung lama lo duty te pawh chuan zu an lo in ve tho va, an boss Awmpuia awm bo lai chu remchangah an lo la ve tho chu niin. An lo titi tui mah mah nge mawni, thawm an lo hre miah lo va. Rsa chuan ava pan phei a, an zinga mi Andrew-a chuan ava hmu hmasa ber a.

Ring tak hian, "Saw...saw Rsa, saw Rsa.." tiin a rak nghal chul mai a, a pistol a phawrh nghal bawk. An thianpa Tommy-a lah lo rui pawr tawh, kai mah mah chuan a tiang chu chuh vatin, "Khawnge ka va vaw hlum ange.." tiin ava tlan phei ta mai. Andrew-a chuan a dang hman lo, "Hey TOmmy..kal suh." a ti hman tawk a.

Tommy-a chuan Rsa bek ah chuan a han hlap pawp mai a, mahse Rsa chu a thle deuh sawk ringawt. Andrew-a chuan pistol chuan a tin a, "RS...i ban phar rawh.." a lo ti ve vak vak a. Andrew-a chauh hian pistol a nei a, midang pahnih, Tetea leh Tommya te hi chu constable an ni.

Tommya chuan vuak leh a tum a, mahse Rsa chuan a tiang chu lo man in Tommya dulah chuan rang zet hian vawi 5 vel a vit siah siah mai. Thisen chu a rawn baw chhuak nghak hawk hawk mai a, "Kap rawh...kap rawh, Sir.." tiin Tetea chu a lo rak chul mai a.

Andrew-a pawh chuan a kap ta ringawt mai a, mahse Rsa erawh chuan an thianpa Tommya ruang chu indan nan a lo hmang hmiah mai. Andrew-a pawh chuan a kap fu hleithei lo, a puakruk silai chu a mu zawng zawng a zo ta vek mai. Tetea mangang chuan a tiang chu chuh ve nghalin Rsa chu a va pan a, Andrew-a pawh chuan tiang chu a la ve ta ringawt a.

Rsa chu an veh dun ta them them mai, Tetea chuan vuak ve a han tum a. Mahse Rsa a lo che rang zawk tlat, a vuak hma hma chuan Tetea hrawkah chuan rang lutuk tak mai hian a vir tlum thawih mai, TEtea ka atang chuan chemte hmawr a rawn lawr thei hial a, thisen a hak nghal bawrh bawrh a.

Hnunglam atang chuan Andrew-a chuan Rsa chu a hnungzangah a lo hlap vak vak a, mahse Rsa chu na ti awm ang pawn a awm lo. CHemte chu a phawi ri leh hrawk a, Andrew-a chu ava melh ve ta ran mai. Andrew-a pawh chuan mak a ti takzet, "Eng ang mihring nge maw i nih le?" tih pah chuan vuak leh a han tum a.

Mahse Rsa chuan a tiang chu a lo man leh chat mai, a kut chu a herh sak vak a. A ri tuar mai a, Andrew-a chu a t(r)e ring kher mai. Chutah in pawn bang a perek lo lawr ah chuan Andrew-a lu chu a tauh tir pawp mai a, a tlum thawih mai. Tichuan a samah thamin a phawi leh a, a tauh tir leh a, a phawi leh a, a tauh tir leh pawp thin a.

Chutiang chuan vawi 15 vel zet a tauh tir a, Andrew-a pawh chu a thi ve ta. Rsa chuan kawngka chu a han chhuih nghal pawp a, a chhe nghal vek mai. Tichuan inchhungah chuan a lut ta, a han hawi kual a. Mahse tumah an awm lo, pindan zawng zawng chu a en kual vek a.

Mahse tumah a hmu lo, bathroom lam chu ava hawi leh a. Bathroom kawngka chu chhete hian a lo inhawng a, ava pan phei ta. Kawngka chu a han hawng thuai a, chutah a chhungah chuan Pu Ringa chu base ball bat nen a lo ding ran mai. A lo nuih sak a, "I lo thleng ta maw, Hmela." tiin Rsa hmaiah chuan a baseball bat ken lai chuan a han nawr ri fawk mai a.

Rsa pawh a hnungtawlh nghal a, a chemte ken lai a thlauh phah bawk a. Pu Ringa chu rawn chhuak in Rsa bekah chuan a hlap leh chawrh mai. Rsa chu a tlu teuh hle a, "I lo thleng har khawp mai zanin chu...ka lo nghak reng che asin." tiin Pu Ringa chuan a mal ah chuan a han hlap leh chawrh mai a.

Rsa pawh a thingthi hnawk a, Pu RInga chuan ala duhtawk lo. A hlap zui hrep hrep mai a, a tawp a tawpah chuan Rsa pawh chhuatah chuan a thal ve ta tual mai. A chau takzet, chutiang bawkin Pu RInga pawh a lo tar ve tawh nen, a thaw hlawi hlawi mai. Rsa chu a han en vang vang a, "Ka fanu atchilh viau mah la e, kei apa hian makpa atan ka duh lo che." tiin a han chhir zui leh hrep a.

Rsa pawh a che tha thei tawh bik lo, chhuatah chuan a vial ngawih ngawih a. Pu Ringa chu choka lamah ava phei a, chemte ava la a. A let leh a, "Nang hian ka fanu thah i tum amaw? A pa ka la dam chhung hi chuan i that thei lovang, Lalruatsang. Zanin hian engkim kan ti tawp ang, i thi dawn...ka tawrh tur chu engpawh ni rawh se, ka that dawn che." a ti ta khur khur mai a.

Rsa chu a tho tual tual a, Pu Ringa chuan chemte chuan vih a tum a. Mahse Rsa chu a rawn hawi chhuak thut a, Pu Ringa kut chu a lo man chat mai. Awlsam tak hian chemte chu a laksak a, Pu Ringa chu a bawh thlu ta rawk mai a. A awm ah chuan a vit ta siah siah mai a, Pu Ringa pawh chuan a daih rei lo kher mai, vawi nga vel lai ala vit zui.

Pu Ringa chu a thi ta a, Rsa chu a tho kang a. A chau takzet, a hliam pawh chu na a ti ve hle bawk. Hnunglam ah thawm a hre thut a, rang takin a hawi let a. AWmpuia chu kawngka bulah chuan a lo ding reng mai a, pistol hian a lo tin ran bawk. Zawi te hian, "Ka man ta che, Lalruatsang." tiin silai chu a hmet puak a.

Rsa darah chuan a fuh a, a thal tawp mai. Awmpuia chuan ava pan hnai a, "Ka sawi ang ngeiin ka kut ngei hian ka man dawn che, RS...man i ni e." tiin a pistol chuan a han tin leh a, Rsa chu a che tha thei tawh lo. Mahse Awmpuia awm zawnah chuan chemte hmawr zum tak mai hi a rawn lawr thut mai a, Awmpuia pawh a thingthi hnawk mai.

Chhuatah chuan a bawk thlawp a, a khur dar dar a. Reilote hnuah chuan a thi ta, amah rawn vit tu chu Rsa chuan a han en chho va. Dr. Manuna a lo ni reng mai, "Bawiha...haw tawh ang le..." tiin a kut chu a dah chhuak a. Rsa chuan a lo vuan a, Dr. Manuna chuan a kai tho va.

Pawnah chuan an inzui chhuak a, motorh ah an lut dun a. Rsa chuan a hmaikawr chu a phelh a, Dr. Manuna chu a han en vung vung a. Dr. Manuna chuan a lo nuih sak a, "Ka enkawl ang che ka tih kha....i doctor alawm ka nih." a han ti a. Rsa chuan a chhang lem lo, tichuan motor chu start in an tlan ta vang vang a.

*****************************************

THE END