USAGI : 2 (THE BUNNY RETURNS) ENGLISH : DARK BUNNY [MIZO HORROR/SLASHER FICTION STORY] Written by : Aaron Malsawmdawngzuala WARNING : 18+ CHAPTER : 3

 USAGI : 2 (THE BUNNY RETURNS)

ENGLISH : DARK BUNNY

[MIZO HORROR/SLASHER FICTION STORY]

Written by : Aaron Malsawmdawngzuala

WARNING : 18+

CHAPTER : 3

****************************

Crime scene ah chuan Inspector AWmpuia chu a awm tawh a, ruang te chu a han en dik a. A hmunah chuan police tha hnem tak an awm ve bawk a, forensic lam ho pawh an awm nual bawk. Awmpuia chu a han ngawi vang vang a, "Mizo ah tiang em em a rapthlak a tual thahna dang a awm ngai lo, Rsa bak va ni suh...a chiang reng mai." a han ti nuah nuah a.

SI Hminga chu a lo thaw hak a, "Mahse Sir, amah Rsa ber hi kan hmuh phawt loh chuan...kum khat lai mai kha a bo hmak kha ania. Tunah pawh amah chiang taka hmu tu leh Rsa a ni ngei e ti a report tu pawh tumah kan la hmu bawk si lo, Cindy thusawi kha Rsa ngei a ni tih finfiahna kan nei bawk si lo nen." a lo ti a.

Awmpuia chu a khi suk a, "Pathian hmel hi i la hmu lo, mahse a awm tih i ring. Vanram leh hremhmun hi a hmunah i la kal lo, i la hmu lo bawk. MAhse a awm ngei i ring, tiang vel chu a ni mai. Cindy thusawi kha...amah Rsa hi ala hriat chian ve loh vang pawh ni thei, mahse RSa thil tih ngei a ni tih chu a chiang mai alawm." a han ti ve leh a.

Chutih lai chuan forensic doctor pakhat hi a lo kal a, "Sir, hei hi sawlai kilah sawn chhar a ni." tiin sarang-a a rawn pe a, a chhungah chuan chemte, Rsa theihnghilh ngei mai kha a lo awm a. Awmpuia chu a nui deuh sak mai, "Hminga, hei hi lab ah va kal pui nghal la. A finger print la nghal la, Rsa finger print kan kawl lai nen khan a in-match em check nghal ang che." tiin Hminga chu a pe a.

"Awle, Sir.." tiin Hminga pawh chu a kal nghal a, "A rang lamin aw.." tiin Awmpuia chuan a han au zui hram a. Chutih lai chuan a phone a rawn ri leh a, constable Mala a lo ni. "Hello Mala, enge chanchin thar a awm em ni?" tiin a han zawt a. MAla chuan, "Aw Sir...Vawmbuh Mual ngei chu a lo ni e, hei ruang pahnih chu chhar a ni a, pakhat erawh a lu a bung." tiin a rawn chhang a.

Awmpuia chu a ner deuh nang mai, "Anih leh a lu chu in hmu em?" tiin a han zawt leh a. "Aw...ruang hi kan hmu hnuhnung zawk. Crime scene bul chiah a hnim buk karah hian a lo awm a, Cindy sawi dan hmangin Anthony-a lu chu a ni ngei ang. Helai hnimbuk kan hmuh pawh hi Cindy bihrukna chu a ni ngei ang, tunah chuan ruang kan hmu chiah, ka rawn hrilh nghal che." tiin Mala chuan a rawn chhang leh a.

"Awle, mitthi chhungte pawh kan biak fel tawh kha, helam chu ka lo buaipui thei mai ang. Ruang pahnihte kha a rang thei ang berin Aizawl lam rawn panpui vang vang ula, post mortem ala ngai dawn bawk tih kha hria ula, muangchang suh ang che u." AWmpuia chuan a han ti leh a, phone chu an dah ta a.

****************************

Estheri first period la zo chu Office chhungah chuan a lut a, a thiannu Hlutei chu a lo thu vang tawh a. A bula va thut pah chuan, "I van la rei awm lo ve, i lo awm daih tawh elaw?" tiin a han zawt nghal a. "Aw...test ka pe a, a tlem bawk a, an zo hma lutuk a, ka chhuak daih alawm. Nangpawh test i nei dawn ni lawm ni, niminah i sawi kha?" tiin Hlutei chuan a lo zawt let a.

Esi chu a han thaw deuh hak a, "Nia..chawhnu lamah ka pe ang. Class 6 ah ania, awii...keichu mut hi ka kham lo thei lutuk a, a hrehawm.." a han ti nuah nuah a. Hlutei chuan a han en vang vang a, "Mumang i nei leh em ni?" tiin a han zawt a. Esi chuan a lu thingin, "Aih..nizan tak chu ka mutui lutuk, enge ka mumang pawh ka hre leh tawh lo." tiin a han nui huk a.

"Anih chuan test question i set rei a nimaw, ava tam hmel ve...class 6 chiah amaw ka atia?"

"Class 6 chiah ni e, a tlem lutuk..ka set zo hma phian zawk."

"Anih chuan tinge mut i kham loh chhan...thildang i ti em ni?"

"Aih...thil ka ngaihtuah a, tunlai chu ka chiang lo keimah hi...ka nun ram a chau hi ni tawp mai."

"Enge sawi la...eng chungchang nge?"

Esi chuan a sawi hreh hmel kher mai, "Englo ania...ka mitvai chu ni ngeiin ka hria a. Nizan khan...dar 8 rik hma vel kha ni ta in ka hria. Tukverh a ka dak kha, kan inkawt lawkah hian mipakhat ding run hi ka hmu a. Mahse a thim em avangin ka hmu dum vek a, reilote ka hawi sawn hlek chhungin a lo bo leh daih a." tiin a chhang ta a.

Hlutei chu a han ngawi vang vang a, "I hmuh sual a nih i hring amaw...i va hmuh chian hmel si ve.." tiin a lo zawt leh a. Esi chu a ner deuh nang a, "AAA.a.a. ka hre tawh bik lo, ka hmu sual pawh a ni thei tho. Sawi tak ang khan thil ka hmusual nasa thin ka tih kha tunlai bik chu, ka hmusual leh te pawh a ni mahna.." a han ti zawi sap a.

Hlutei chu a thaw hak a, "I hmuh sual i ring tho bawk sia, zanah a ti mu leh thei chuang si lo che a. I rilru a tawt a nih kha, school lamah hian rilru pek hnem tum zawk la...chubakah lo hmu sual lo pawh ni la, mi lo ding mai mai te pawh a ni ve ang chu." tiin a han thlamuan a.

MAhse Esi chuan a lu a thing leh a, "Nilo...ka hmu sual lo a nih chuan mihring ding mai mai a ni thei lo." a ti ta tlat mai. Hlutei pawh chuan a en deuh hu a, "Tinge..enge i sawi awmzia?" tiin a zawt hu mai. "A chhan chu maw, Hlute...a lian lutuk. A palian si a, a sang bawk si. Rsa pian chiah chiah kha a ni, ka la theihnghilh thei lo." tiin a chhang a.

Hlutei chu a thaw huk a, "Rsa bawk maw? Theihnghilh tum rawh...khawi ramhnuaiah emaw a thi daih tawh ang." a ti deuh hmuk mai. Esi chuan Hlutei chu serious tih hriat tak hian a melh a, "Nizana ka hmuh pa chuan maw...hmaikawr a vuah." a ti chu Hlutei a meng phawk nasa ngei mai.

"Engmaw? Hmaikawr a vuah a? Engtin nge i hriat theih, a thim vek, a lang dum vek i ti bawk sia?" Hlutei chuan  a han ti leh hu a. Esi chu a han ngawi vang vang phawt a, "A thla atang khan ka hre thei alawm, sazupui beng pahnih..kang vu kha...ahma a Rsa vuah thin nen khan a in ang lutuk, tlemin a zum deuh zawk a ni mai." tiin a chhang leh a.

Hlutei pawh chuan a chahng let tawh lem lo, mak a tih ve hmel khawp mai. Chutih lai chuan Hlutei phone chu a rawn ri thut a, an la phu dun nasa em em zui. Hlutei chuan phone chu a la a, "Hello Nu RIn....aw....awle, dar 6 atanga dar 7 vel ni thei se a tha phian ang. Awle...awle ka lo kal dawnnia.." tiin phone chu a dah leh nghal a.

Esi chuan rang tak hian, "Tunge nu Rini chu...enge a?" a lo ti vat a. Hlutei chuan nin hmel tak hian, "Ka Nu RIni mawle, a fapa class 7 zirlai mathematics ah a weak lutuk a. Tuition pe turin min tia, ka ning ania. Chhungte an ni bawk si, a fapa saw luhlul deuh ni phei se chu ka peih teuh lo." a ti nuah nuah a.

**********************************

Chhun dar 12 leh a chanve vel a ni a, thingpui dawr ah chuan Awpa chu a chawl a. A ei zawh hnu chuan pawnah a chhuak a, meizial zu tura a ipte a dap vel mek lai chuan tu emaw a va hmu fuh thut mai. Chupa chuan a motor lam a lo pan mek a, rang takin Awmpuia chuan a va pan nghal a.

Chupa chuan a motor kawngka chu a lo hawng dawn chiah a, "Dr. Manuna i ni em?" Awpa chuan a rawn ti thut mai. Chupa chu Dr. Manuna, Rsa naupan lai a enkawltu ber kha a ni. Dr. Manuna chuan a han en hu a, "Aw ka nia law, tunge i nih a?" tiin a lo zawt let a.

A kut dah chhuah pah chuan, "Inspector Lalawmpuia ka nia.." a han ti a. Dr. Manuna pawh chuan a lo chibai ve mai bawk, "Anih tak chu...chuan engthil ah nge min biak duh a?" tiin a han zawt leh a. AWpa chu a han khi deuh suk a, "I lehkhabu ziah, kum engemaw zah kal ta a i ziah, USAGI tih kha ka lo chhiar ve a, a ngaihnawm khawp mai." tiin a chhang a.

Za lo tak chuan Dr. Manuna chu a han khi suk a, "Eee...a nih tak chu, ka lawm khawp mai." polite tak chuan a han ti a. Mahse AWpa nui hmel chu a rawn serious nghal thut a, "Kha Usagi ngei kha tunah hian a la dam a ni." a han ti chang deuh fak mai a. Dr. Manuna pawh chuan mak ti tak hian a en hu a, "Engmaw i sawi a?" a ti hu mai.

AWpa chuan a lu a bu nghat a, "AW ni e, ala dam...tunah hian tual a that leh tan mek a ni." a han ti leh deuh hmuk a. Dr. Manuna chu a thaw hak a, "Enteh ka pu, Ruatsanga chungchang ah min be duh a nih chuan sawi theih ka nei lo, ani nen khan inlaichinna pakhat mah kan nei lova, ka buaina a ni hek lo." tih pah chuan carah chuan luh a tum a.

Chutah ring deuh tak hian Awpa chuan, "Rsa nen hian inlaichinna kan nei bik lo, mahse tunah hian ka buaina ber a ni. Keimah chauh a ni lo, Mizoram pum tan hian buaina a ni." a han ti chu Dr. Manuna pawh chu a han ding leh dat a. Chutah AWpa bawk chuan, "Nikuma a tualthahna zozai te kha i hre ve vek, tunah hian a thawh hnihna atan a tan leh mek a, mi pasarih lai a that leh tawh asin....news ah te khan i lo hmu ve hial lo maw?" a han tih khum leh deuh kher a.

Dr. Manuna chu a mengrum tawh khawp mai, "KA lo hmu ve alawm, mahse RSa thah a ni tih proof-na i nei em ni? Mizoram chhungah hian RSa chauh hi tualthat thin a ni lo, hman atang tawhin inthahna, tualthihna a awm ve tawh..ram dang ang bawkin...Police Inspector i nih angin chungte pawh chu i hre ve ang chu." a ti let ve ta sak mai.

Za lo tih hriat tak hian Awpa chu a khi suk a, "Hre tehreng e, nang ai pawhin ka hre hnem daih ang chu...mahse a tualthahna te, a tualthah dante leh crime scene ka en khan RSa bak a ni dawn lo tih ka chiang. Kei hi Rsa case khawih mek tu ka nih hi....ka man ngei bawk ang." a han ti leh pung pung a.

Dr. Manuna chuan a ning tawh khawp mai, "Aw...man la, jail ah khung la...that rawh..tinge chu chu min hrilh kher? Rsa kha kum 9 a nih lai khan ka enkawl a, mahse ka bansan tawh. Tunah chuan puilting a ni tawh a, tual a that a ni emaw, engpawh lo nise, ka thiam lohna pakhat mah a awm lo." a ti khur khur mai a.

Awmpuia chu a khi leh suk a, "Ni e..a dik alawm. Chuan hei hi ka hrilh ang che, nang angin ka tlawm san ve mai mai lovang. NAng anga a laklawh a tlawm chi ka ni lo, chu mai a nilo...nang phei chu a chanve pawh i zo hleinem tiraw, i tan ve dawn chauh va, i tawp san nghal a nih kha." a han ti leh deuh kher a.

Dr. Manuna chu a thinrim ngei mai, "Tlangval, ka hrilh ang che. Doctor hna leh police hna hi a in ang lo tih hria ang che. Rsa'n tual a that hi ka thiam loh a ni lo, sawi tak ang khan kei chuan a naupan lai bakin ka enkawl lo....a nu in a thihsan hnu phei kha chuan keipawh in ka duhtawk tawh..chuvang chuan min kalsan vat la i tan a tha ang." a ti ve deuh ta hmak mai a.

Mahse Awmpuia chuan a hlauh loh hmel kher mai, "Aw...ni e. A tha e, i thiam loh ka ti reng reng lo. Mahse kei chu nang angin Rsa hi ka hmang tangkai lovang, ka hlawk nana hman tankai ka tum ve lo." a han ti leh deuh kher a. Vin zet hian Dr. Manuna chuan, "Enge ka hman tangkaina han sawi teh.." a ti vin khur khur tawh mai.

Awmpuia lah chuan a la nuih zui, "I hmang tangkai lo amaw? Kum 9 lek a nih laia tawp san tu, enkawl chhunzawm peih lo tu, mahni hna pawh tlin lo khan lehkhabu ka ziak e tiin RSa i hmang tangkai a, enkawl dam tih awm chuang si lo. Doctor Manun, ka tiam ache...i hma ngeiah hian Rsa hi ka rawn hruai ang, ka man ngei bawk ang." tiin rum zet hian a melh a.

Dr. Manuna pawh chuan a lo nuih sak a, "A tha e, i duh ang chuan ti rawh. Ka hun i khawh ral mai chauh an ni...Rsa chu man ngei ang che, good luck." tiin motor ah chuan a luh san a, a tlan ta daih mai. Rum zeta melh chung chuan Awmpuia chuan, "Doctor tenawm lutuk mai, ka khawih hrep dawn che amawni le.." tiin a phun zui nuah nuah a.

Chutih lai chuan a phone a rawn ri a, SI HMinga a lo ni. Rang takin a la nghal a, "Aw Hminga, enge chanchin?" tiin a zawt nghal a. Phone atang chuan SI Hminga chuan, "Sir, kan ring dik e. Rsa finger print kan neih sa leh chemte a finger print awm hi a inmil chiah chiah, Rsa chu a la dam ngei e, amah ngei a ni e." a rawn ti a.

Awmpuia chu a khi sak a, "A tha e, station ah lo awm rawh, ka lo kal nghal...kan inbe dawnnia." tiin phone chu a dah a. A lu a han bu nghauh nghauh va, "Lalruatsang, kan indona chu a intan ve tak tak tawh dawn e. A hma kha chuan in khua, Buleng khuaah i duh dan takin i che a, tunah chuan a theih tawh bik lovang. Tuna i awmna hi chu Buleng khua a ni lo, helai hi chu ka pian ka seilenna, Inspector Lalawmpuia pian leh murna, Aizawl ngei a nih hi. I him tawh lovang, ka man ngei ang che." tiin a insehruh nasa kher mai.

**********************************

Tlai school ban hun a lo ni a, Hlutei leh Esi te chu school garage lam panin an inzui mek a. School kawt an thlen chuan gate bulah chuan Isaka a lo ding reng mai a, "Ehe khupa khu...enge maw  a hriat ni vawiin chu?" Esi chuan a ti nuah nuah a. Hlutei pawh chuan a han en ve vang vang a, "Ehe khu chu...facebook-a i profile pic-a mi kha tiraw, i bialpa chu ami?" tiin a lo zawt nghal vat a.

Esi chu a khi suk a, "A nih ve khu....tukinah pawh min lo chang tawh. Min la ti phu em em zui, vawiin chu a hman hmel hle mai." tiin a thianu chu a en a, an han nui dun leh rih a. Gate chu an zu thleng a, "Nang ni enge maw i hriat le? Enge hetah i rawn tih a?" tiin Esi chuan a han zawt nghal a.

Isaka chu a lo khi deuh vur vur a, "Ele..ka lo nghak che. Haw rual ila ka lo tia, darkar khat vel in ban hun ka lo nghak alawm." tiin a lo chhang a. Esi chu a ner deuh nung a, "Amak thin...scooty ka keng ve tho alawm, vawiin hi tinge maw i dik lo riau..." tiin a han fiamthu nghal pah bawk a.

Isaka pawh chu a lo nui ve mai a, chutah Hlutei chu a han en vang vang a. A aw a han thian kharh kharh a, "Hei hi i thiannu em ni?" tiin a han zawt a. Esi chuan Hlutei chu enin, "E taka...Hlute, hei hi ka thianpa...Isaka a nih hi....Isak, hei hi Hlutei, ka thawhpui a nih hi." tiin a han inhmelhriat tir nghal a.

Isaka lah chuan, "Eheu..thianpa nge bialpa?" a'n lo ti hram a. Esi chuan rum deuh hian a melh a, "I ninawm...awmdan chintawk hi hre teh." a ti deuh hlur mai, isaka lah chu a nui huah huah a. Hlutei chibai pah chuan, "I dam maw? Esi hian a sawi ziah che a, in inkawm ngeih hmel khawp mai." inla zei tak chuan Isaka chuan a han ti vel a.

Hlutei pawh chu a lo nui seih a, "Nia, kan inkawm ngeih ve em alawm tiraw, Esi?" tiin a lo fiamthu ve bawk a. Esi chu a han thaw deuh hak a, "Huiham..engpawh nise haw phawt teh ang u." tih pah chuan a thiannu Hlutei chu a en a, "Chuan, engtin nge...ka rual chuan i lo haw dawn lo em ni?" tiin a han zawt nghal a.

Hlutei chu a han ngawi vang vang a, "Nia..ih..lo haw lo mai ang. Kan in a hla vak chuang lo, chubakah tuition chu ka pek lo chuan...sawi tak ang khan chhungte an ni ve bawk sia." tiin a chhang a. "I haw hunah meuh chuan khua a thim tawh ang, dar 6-7 i ti a ni lawm ni?" tiin a lo zawt let a.

"A ho lutuk, ala hma tho va...ke-in ka haw mai ang."

"I ti mak e a..duh leh i zawh veleh min lo phone la, ka lo lam ang che."

"A ngai lo, ka tibuai mai mai ang che...ka hlau hleinem, ke-in ka haw fo alawm. Chubakah kan in a hla lo, kea haw mai theih ania."

"Aww..in in awmna te chu ka hre ve tho alawm. Saw lai deuh ah sawn kawng reh deuh, thim deuh a awm kha....tawh sual tawh palh te a hlauhawm alawm. Taxi talin haw rawh...nih loh pawn min rawn call mai la."

"Awii Lal Es, i ninawm. Puitling ka nih ve tawh hi...min tihthaih i tum a mi? Kal vat zawk teh u, hei ka tlai dawn keipawh."

Esi chu a nui a, "Ka ngaihtuah che alawm, anih chuan kan kal phawt ange. Ka sawi kha aw...thlah i ngaih chuan min rawn phone la." a han ti leh hram a. Hlutei pawh chu a nui suk ringawt, "Awle awle, tluang deuhvin i kal dawnnia....mangtha phawt le." tiin an inthlah ta a.

*********************************

Station-ah chuan Inspector Awmpuia leh SI Hminga te chu an titi mek a, "Sir, Rsa thil tih a nih chu ring ve tho mah ila...tunah hian khawiah nge maw a awm reng reng ang le...kumkhat lai kha a bo hmak kha a ni a, a chanchin engmah hriat tur awm bawk si lo. Keichu ka hrethiam thei lo a ni, Rsa kher a ni angem tih hi ka buaina ber a ni." SI Hminga chuan a han ti nuah nuah a.

Inspector Awmpuia chuan a thingpui in lai chu a han lem khawlh a, "Amah lo chu ni htei dang an awm lo, eng ang pawhin lo bo rei tawh pawh nise. Khawiah emaw a tawm reng a nimai, kum khat chhung a biru a nimai. Amah a ni tih hi ka chiang map, amah ang em em a nunrawng hi Mizo ah an awm ka ring lo." tiin a chhang a.

SI Hminga chuan a lu chu a han hiat nauh nauh va, "Mahse Sir, Buleng khua a nikuma a tualthahna kha a lar ve viau va. Tu emaw hian ama style copy in tual a lo that ve te pawh a ni mahna, thil awm thei ve tho a ni." a lo ti leh a. Chutah AWmpuia chu a nui tiah tiah mai, "Hminga, i mawl ami? Enge midang an nih ngawt ang?" tiin a zawt let a.

Hminga chuan inthlahrung tak hian, "Ka sawi awmzia zawk chu maw....RSa hi a kum a kum chuang kan zawng tawh a, nang phei chuan i hah pui takzet tih pawh ka hria. Mahse kan hmu miah lo ania, Mizoram khaw kil khawr ber thlengin kan zawng kha ania. Kan zawng hnem thawkhat chuan ka hria, mahse kan hmu ta miah lo kha ania. Chuvang chuan kei chuan a dam hi ka ring tawh lo a ni, Sir...khawi ramhnuai pilril ah emaw riltama a thih daih tawh ka ring." a la ti fan a.

Inspector Awmpuia chuan a lu a thing a, "Nilove Hminga, tu mi mawl mahin Rsa style copy in tual an rawn that lovang. Lo awm tehreng pawh nise, tiang em em a rawnga mi that tur chuan Rsa ang rilru put angai." tiin a chhang a. "Mahse Sir, Rsa chu lo la dam pawh nise sawi tak ang khan kan zawng hrep tawh a, engtin nge amah chauhvin kum khat lai hliam na tak tuar chungin a dam khawchhuah theih ang le?" SI Hminga chuan a la rawn ti talh mai.

AWmpuia chuan thingpui chu a han in leh phawt a, "Ka hre bik lo, pui ru tu an lo awm pawh a ni mahna. Kum khat liam ta kha han thlir let leh ta ila, Rsa kan man tirh khan...kan damdawiin hruaina kha MED Hospital a ni a. Nurse pakhat leh Security guard pakhat a that a. Han ngaihtuah teh...zanlai reh lutuk, eng anga tlai pawh nise CCTV zawng zawng nen, amah kha chhui theih vek ala ni. Mahse CCTV atang chuan a kal phei lai chauh a lang a, a bak CCTV dangah engmah a lang lo, mahse a chhuak thei tho a nih kha.." a han ti a.

Hriatthiam loh hmel tak hian Hminga chuan, "Chuan engtin zel...enge i sawi tum ber?" a lo ti hu mai. AWmpuia chuan a aw a han thian leh te te phawt a, "A awmzia chu....Rsa hi mi a, mi rilru kim lo...tualthah hmang satliah a ni lo tih chu a hriat phawt a...a chhan chu security tight tha ve pangngai ah pawh damlo ni si khan rawng taka staff pahnih a thah hnuah chhui chhuah harsa takin a tlan chhuak thei tlat a ni." tiin a chhang a.

SI Hminga chu a han ngawi vang vang a, "A fing i tihna em ni?" tiin a han zawt leh a. AWmpuia chuan a lu a lo bu nghat mai, "Ni chiah e, mi a nileng chu a ni hauh lo. Thil pakhat awm leh thei chu....puitu a nei tihna a nimai. Khatiang khawp a CCTV zawng zawng nen, footage pawh vawi tam kan en. Mahse engtin nge a chhuah theih dan kha....amak ka ti. A bak chu...Rsa hian eng eng emaw hi chu a hre ve tihna a nimai." tiin a chhang leh a.

************************************

Zan dar 8 rik dawnah chuan Hlutei pawh chu a tuition pe a zo ve thei chiah a, pawn thleng chuan chu mipa naupang chuan a thlah a. "A lehpekah chuan nangmah in chawh ve tum tawh ang che, hei...zanin chu chaw pawh ka ei lo thak ania, ka haw hnuah pawh lo ennawn leh la aw..." tiin Hlutei chuan naupang chu a hrilh mawlh mawlh a.

Naupang pawh chuan, "Awle Miss..mangtha le." tiin a lo chhang a. Hlutei a kal dawn chiah chu, "MIss..thlah i ngai em?" naupang chuan ala rawn ti hram a. Hlutei pawh chu a khi suk ringawt, "Aaa..ngai lo mai rawn se aw.." tiin a kalsan ta a. Ke in a haw a, an in hi km chanve vela hla a ni.

A kal zel a, tlaia Esi sawi, a thim lai leh reh ruih lai chu a thleng ta. Dar 8 chauh la ri mahse, chulai hmunah chuan mihring vei vak an tam ngai lo hle a, motor tlan zeuh zeuh tih loh chu thawm dang a vang in a hmun chu a reh tha hle a ni. In pakhat lek pawh hmuh tur a awm lova, street light dim tak pahnih vel chu inhlat takah a awm a, chuzawng chu eng a ni bawk.

Hlutei chuan a hlau lem lo, a chhan chu zan dangah pawh chulai hmun chu a kal pel fo a ni. A phone chu a en pah a, a bialpa nen SMS in an intext mek a, a khi leh vun vun thin a. Chutih lai tak chuan tu emaw ni hi a su chawrh a, a thal tawp mai. Rang takin a tho va, "Uiii...fimkhur ta che, i kal na tur i en..." a sawi zo hman lo.

A mi sut pa a han en chiang chu a ngawi nghal hmak mai, palian em em mai hi a lo ni a. Ft 6'5 vel laia sang ni awm a ni, chutah hmaikawr a la vuah zui. Hlutei chu a khur nghal a, a hlau takzet. A hlauhna chhan ber pawh chupa chuan sazupui hmaikawr a vuah vang a ni a, Esi thil sawi te chu a bengah a rawn ri nawn awn awn mai.

A en rei ngam lo, chupa lah chuan ngawi reng hian ala melh run zui. Ni e, chupa chu tudang nilovin Rsa, Ruatsanga ngei kha a ni. Hlutei chuan a kal pel nghal vat a, chak tak hian a kal a. Rsa chu muang chang chuan a rawn inher a, Hlutei chu a zui ve ta mai a nih chu.

A rawn zui mek tih chu Hlutei chuan a hre ran mai si, kawng lah chu a reh em em mai bawk si. Motor rawn tlan lah an la awm miah lo zui, Hlutei hlau chu a thlan a tla nghal zawih zawih a. A phone chu a han en a, a lo la thlauh chhe deuh nge mawni, a screen chu a rang deuh nuai mai.

Engmah pawh chu a khawih tha hleithei lo, a keypad te chu a kal tha lo em em lehnghal a. A hlau laklawh bawk si nen, a chi ai hi a ni ber mai. A kal chak telh telh a, Rsa lah chuan a rawn zui chak ve telh telh zel bawk nen. A phone chu a han en leh thin, mahse a khawih that theih ta hauh lo, a thlauh chhia a ni ngei ang le.

A tih ngaihna hre lo, hlau bawk si chu a tlan ta ringawt mai a. Chutah Rsa chuan a rawn umzui ve ta, Hlutei hlau lutuk chu a tap pur mai a. Tlanchhiat pah chuan, "Min pui ru...khawngaihin..miin min thah an tum ania." tiin a rak ta vak vak ringawt mai a. Mahse chhantu tur an awm lo, Rsa lah chu a rawn tlan chak ve telh telh zel mai bawk si.

Hlutei chuan ring tak hian, "Min rawn um tawh suh...khawngaihin, ka hlau a nia." tap chung chuan a han ti a. Mahse Rsa chu a rawn tlan chak tulh tulh mai si, Hlutei chu a mangang takzet. An tlan zel a, reife an inum hnu chuan Hlutei chu a ding a. Hnunglam a hawi chu Rsa a hmu tawh hauh lo, a han hawi kual nghal vak vak a.

Mahse tumah a hmu lo, a thaw deuh huai a. A phone chu phawrhin a han en leh a, a lo thi hmak tawh mai. A ak tha a, a hlauh erawh ala reh lo. A tlanna avang chuan a hah takzet, a thaw hrawk hrawk a. A awm hahdam deuh hnu chuan a kal leh ta a, motor lo tlan lah chu an la awm chuang hauh lo.

A kal leh nghal a, a tawpna atan ti niawm fahran hian hnunglam chu a han hawi leh kher a. Street light hnuaih hian Rsa chu a lo ding khur mai a nih chu, ava hmu chiah chu a au vak ringawt. A sazupui hmaikawr nen bawk chuan a lo ding a, hmaiakwrah chuan thisen a kai nual bawk.

A tlanchhe leh nghal vat a, mahse Rsa chuan a kut lehlama a ken, lung lian tha nelh nawlh tak mai chuan ava vawm pawp mai. Hlutei tukhumah tak chuan a ri chawrh mai a, a hai nghal mup mai. Hlutei chu a bawk thlawp a, Rsa chuan ava pan nghal vat a. Hlutei chu thei leh thei lo hian a vak tawk tawk a, Rsa chuan a chhip samah a rawn tham nghal.

Chutah lamlianah chuan a hmai chu a han tauh tir pawp mai a, Hlutei hnar ruh chu a tliak sawi nghal bawih mai. Zangthal zawngin dim lo tak chuan a kuai her leh pawp a, a thutchilh ta ran mai. Thei leh thei lo hian Hlutei chuan, "Nilo...min..min tina suh, khawngaihin..thih..thih ka la duh lo." tap chung chuan a ti tawk tawk a.

Mahse Rsa chuan a chhang lo, kawngsir chu a enkual a. Chutah engemaw ni hi ava chhar a, chu chu perek lian chi tui ek sen ruam mai, kawi ngel ngul hi a lo ni. Chutah dim bak sak lo leh lainatna tel hauh lo chuan hlutei mit lehlam chu perek chuan a chhun ta nih chu.

Hlutei mitmu chu a keh a, ana ti lutuk au a tum chu Rsa chuan a hmuiah a hup nghal vat a. Perek chu a chanve pel thak khawp chuan a mitah chuan a hawlh lut a, thisen a rawn luang zawih zawih mai. Hlutei chu a tal vak vak a, mahse chhantu reng a nei si lo. PErek chu Rsa chuan a phawi a, Hlutei mit lehlamah chuan a thun leh ta a.

Tun tum phei chu a perek chu a hawlh tlum lut vek, Hlutei chu tal nasa tak a ni. Mahse a au thei lo, nghet takin Rsa chuan a hmui ah a hup bet tlat. Hlutei chu a khur ngar ngar a, rei fe hnuah chuan a khur chu a rawn muang telh telh a, a zawi telh telh bawk.

Mahse ala thi mai lo, a la che leh deuh det thin a. Rsa pawh chuan a lo la duhtawk hauh lo chu niin, che thei mang tawh lo Hlutei chu a pawm kang nawlh a, a kal pui ta lu lu mai. Chutah kawngsira buara lian tak, chirh kai hnuang mai chu a hmu a, ava pan a. Hlutei chu leiah chuan a han nghat leh phawt a, Hlutei pawh ala thi lo, a la rawn nghik leh feih feih thin.

Buara chu Rsa chuan a la a, Hlutei chu buara chhungah chuan a thun ta mai a nih chu. Tichuan buara chu a pu lah nulh a, a zo pap pap khawp mai. Street light lam ava pan a, chutah electric ban ah chuan buara chhunga awm, Hlutei chu a buara nen chawp chuan a vaw ta siah siah mai a nih chu.

Hlutei chu a rawn rum leh that that thin, mahse a rum rei lo. A rum ri nilovn, a ruh tlaik ri rawp rawp ri chauh chu hriat tur a awm tawh. Vawi 10 vel a vuak hnu chuan Rsa chuan a duhtawk ta a, kawngsira side drain ah chuan buara chawp chuan a paih a, Hlutei chu a thi chiang kher mai.

****************************

TO BE CONTINUE