SICHANGNEII : 2 (ALICE IN DEVILS' LAND) [MIZO FICTION SUPERNATURAL FANTASY STORY] Written by : Aaron Malsawmdawngzuala Chapter : 6

 SICHANGNEII : 2

(ALICE IN DEVILS' LAND)

[MIZO FICTION SUPERNATURAL FANTASY STORY]

Written by : Aaron Malsawmdawngzuala

Chapter : 6

(LAST)

**************************

Seraphina chuan Lailah-i a zawnna lamah chuan a rin loh tak maiin Iblis ber chu a hmu fuh ta thut mai a, mahse Iblis chuan hnung lam a lo hawi a. Seraphina chuan a vantirhkoh thla ken lai chu thuktru nghalin bang phen ah chuan a biru a, Iblis chu a lo tei nulh nulh mai.

VA hmachhawn tawp mai chu a tih chi viau chuan a hre chiah bik si lo, Alice-i thla chu a la keng ran mai bawk si. A nghah deuh vang vang hnu chuan Iblis-a chu a kal sawn ta a, Seraphina pawh chu a thaw huai mai. Chutih lai tak chuan hnunglam atang chuan tu emaw hian a hmui a rawn hup thut mai a, Seraphina chu a phu nasa ngei mai.

Mahse a tal vak hma chuan, "Unaunu, keimah...keimah Laila." a tih takah chuan Seraphina pawh chuan lehlam chu a hawi nghal a, mahse LAila-i hmel nilovin Alice-i hmel zawk a put avang chuan a hrethiam lo hle mai. Chuta karah a bulah chuan ramhuai hmelchhe tak tak, Khuavang ho chu an lo ding tlar thap mai bawk si nen.

Mak ti tak hian, "Tu....tunge i nih?" a han ti bah nuai a. Chutah Alice-i ken lai ngunhnam chu a en a, "Kha kha..kha kha ka unaunu ngunhnam a nih kha." amah bawk chuan a han ti leh a. Alice-i chu ava kal hnai a, "Unaunu, keimah Laila ka nih hi. Min awih lo em ni? Onoskelis anchhia avang khan ti hian hmel dang ka pu ta a nih hi, i hrethiam lo em ni?" zaidam tak chuan a han ti a.

Mahse Seraphina chuan a awih thei mai lo, a chhan chu Alice-i hmel kha a hma in ala hmuh ve loh vang a ni. Alice-i chuan tihngaihna a hre vak bik lo, mahse chhuat a ama thla ngei mai lo let reng chu a hmu a. Chutah a va bana , "Min awih tawh mai ang ti hian.." tiin a thla chu a vuah a.

Chutah a thla chu a duh duh dan chuan a han control a, a han thlawk kual vel a. Khuavang ho chuan hmuhnawm tih hmel tak hian an en dauh dauh hlawm a, Seraphina pawh chuan a unaunu Laila-i ngei mai a ni tih a hrechiang ta. Alice-i chu a t(r)um a, chuveleh Seraphina chuan a rawn kuah nghal.

"I tha em? Hliam i nei em? Ka hmu che chu ka va lawm em, Laila.." tiin a kuah vawng vawng mai. Alice-i chuan a biangah chuan dawm sak in, "Unaunu, kan kal vat angai. Tuna i hmuh kha Iblis-a chu a ni, VAntirhkoh Azazel ni thin kha...a chak lutuk. Min hmuh vaih chuan min that dun mai ang." tiin a hrilh a.

Seraphina chuan Khuavang ho chu a han en hu hlawm a, "Heng ho hi tute nge?" tiin a zawt a. Alice-i chuan nui sang hian, "Min chhanchhuak tute an nih hi...an Lalnu ber hian ka ngunhnam min rawn ruk chhuah sak a.." tiin a chhang a. Khuavang Lalnu chuan Seraphina chu en vang vangin, "Sichangneii ve tho ami i nih?" a han ti deuh hu a.

Mahse a chhang lem lo, "Engtin nge ka thla hi i rawn neih theih a? Chuan nangmahin em ni i lo kal?" tiin Alice-i chuan a lo zawt ve leh a. Seraphina chuan a lu thingin, "Ni lo, Raphael, Uriel, Malakai leh Raziel te pawh an lo tel ve a. Chuan LAl CAesar-a pawh a rawn tel ve, engtia rawn tel nge a nih erawh ka hre chiang vak lo." tiin a chhang a.

Mak ti tak hian Alice-i chuan, "Engmaw? Caesar-a a? NAVIA Khawpui Lal Caesar-a maw?" a ti hu mai. Seraphina chuan a lu bu nghauhvin, "Aw ni e, kan lamah a tang e." a lo ti leh a. Chutih lai chuan Ifrit jinn, thlarau sual panga rual vel chu an rawn lang thut mai a.

Hmanrua an la nei vek zui, chem, hreipui, talhtum leh hmanraw hriam tak tak an hum far hlawm a. Chuveleh Khuavang Lalnu chuan, "IfRITS...iFRITS HO an nih hi.." tiin a hlau kher mai. Alice-i chuan mak ti tak hian, "Ifrtis a?" a ti hu mai a. Chuveleh jinn ho chu an rawn tlan phei a, "Laila...Khuavang ho hi hmun him lamah kal pui rawh." Seraphina chuan a han ti a.

Alice-i chuan hrethiam lo tak hian, "Mahse Unaunu, nangmah chauhvin maw?" a ti hu mai a. "Laila, hun a awm tawh lo. Min ngaihtuah suh, ka rawn umzui ve nghal ang che u." a han ti vin deuh thak a, Alice-i pawh chuan thu awih in Khuavang ho chu a tlanchhiat pui a, chu veleh jinn zinga pakhat chuan Seraphina chu a rawn su thal tawp mai a.

Rang takin a tho leh nghal vat, chung jinn ho chuan an hual thup a. Chutah sang takah a thlawk a, a thla paruk lai mai chu a ti chhuak leh ta. An chung zawna chhum chu a dum nguk mai a, ring tak hian boruak a kang reng chung chuan Seraphina chu chung lam hawiin a au vak mai a.

Chuveleh khawpui a rawn ri dur dur a, kawl a phe nghal zawk zawk bawk. Seraphina chuan a ban a phar a, jinn ho chuan tihngaihna reng an hre lo, an vai mai chuan Seraphina chu enin an hawi chho thup ringawt mai a. Chutah van atang chuan thil eng lian tak, bial pup mai hia  rawn tla a.

Seraphina chuan a lo dawng chak mai, chutah a taksa pupui mai chu a rawn eng vak mai a. A mit te chu a eng vek a, jinn ho chuan an hmu tha hleithei lova, a hlauh pawh an hlau kher mai. Chutah a eng bial ken lai chu jinn ho awmna lamah chuan a vawm thla a, chuveleh jinn ho chu an kang eng ta hluah hluah hlawm mai a.

Rapthlak tak takin an rak a, khawpui lah chu a ri dur dur reng mai bawk a. Chutah zawi muang hian meihu ah an chang a, an ral ta riai riai a. Seraphina chu a rawn t(r)um chat a, chuveleh boruak chu a reh nghal diak mai. Seraphina pawh chu a mit pawh a rawn pangngai leh tawh a, Alice-i te lam pan chuan a tlan phei ve leh ta nghal a ni.

************************************

Caesar-a leh Khuavang Lalpa te pahnih chuan hliam tuar der mek, Zeros-a chu hmun him lam an panpui mek a. Bang lian leh sang tak phenah chuan an thut chawlh pui a, Zeros-a lah chu na ber ni awm fahran chuan a han chek vel tlawk tlawk a. Khuavang chuan a han en leh vang vang thin a, "Mi tang maw i nih?" tiin a han zawt leh hu a.

Zeros-a chuan a han en rum deuh hlek a, "Enge maw mi zawh chhen le? Nangmah ang deuh deuh hian chaw min rawn pe thin, ka rawn tlan chhuak ve thei hram a nih hi." a han ti deuh hlur a. Khuavang pawh chu a inthlahrung angreng kher mai, "Ka hmu ve ngai lo riau che a ka hriat vang a nia." a han ti zawi sap a.

"Anih leh engtin maw i tlan chhuah a?" tiin CAesar-a chuan a han zawt ve thung a. Thawk deuh hluai pah chuan, "Vantirhkoh pakhatin min rawn chhanchhuak ka tih kha, mi tang ve tho ania. A hming ka zawt a, Laila-i tiin a sawi a." tiin Zeros-a chuan a chhang a. 

"Anih chuan tunah khawnge Lailah chu a awm?" tiin CAesar-a chuan a zawt leh a.An han kai tho leh a, "I kal thei ang tiraw?" tiin CAesar-a chuan a han zawt leh a. "Midang ka puih a ngai, Khuavang ho ka puih angai tiin min kalsan leh a, helai hmun thleng hian min hruai phei ta a ni." tiin Zeros-a chuan a chhang leh a. Zeros-a chu an kai tho va, "I kal thei angem?" tiin CAesar-a chuan a han zawt leh a.

Zeros-a chu a han bai der leh vel a, "Aw..ka kal thei ang." a han ti leh vel a. Tichuan an kal leh a, "Chhuahna lam kawng hi i hre reng reng em?" tiin Caesar-a chuan Khuavang Lalpa chu a zawt a. An vai chuan an ding a, "GAte pui ber chu kan pel tawh ngei a, mahse khawi lam nge pan tur erawh ka hre lo." tiin Khuavnag Lalpa chuan a chhang a.

Chutih lai chuan Zeros-a chu a han hawi kual zeuh zeuh va, an hma zawn chu van chung zawl ang mai a thim ni mahse arsi tam tak engin planet hran hran chu a lang thei bawk a, Devil's LAnd chhung nen chuan a in ang tawh lo kher mai. Kalkawng te chu a awm ve tho va, mahse khawvel pawn a ni tih a hriat em em tho mai bawk si.

Kawng sirah te pawh hnim a t(r)o ve tho va, thingkung a awm ve teuh tho bawk a. Phaizawl hnim te pawh a sirah te chuan awmin dil te tak te pawh a lo awm ve bawk a, mahse khawi a kal tur nge an rhe der si lo. an han ngawih vang vang hnu chuan, "Lal Caesar, heta in rawn kal lai khan engtin nge in lo kal, a kalkawng engtin nge in hriat theih?" tiin Khuavang bawk chuan a rawn zawt hlawl mai.

 Caesar-a chu a thaw hak a, "Khang Vantirhkoh te puihna hmang khan a ni a, kei chu ka thlawk ve thei hleinem. Lungngai suh, anmahni lo nghah a ngai tho tho alawm." tiin CAesar-a chuan a chhang a. Zeros-a chuan arsi pakhat, lo eng vet vet mai chu a hmu fuh a.

A han enchiang a, planet danga chhuah theihna, DEvil's Land planet pawn lam panna a ni tih a hre thei nghal a, a chhan chu Iblis-a hnen atangin a hre vek tawh a ni. A rilru chuan, "Ka hmu fuh ta hlauh ve." tiin a nui khi suk a. Chutia a khi suk lai chu Khuavang Lalpa chuan a lo hmu fuh a, a ringhlelhna a ti zual kher mai.

Zeros-a lah chuan a la hrilh ve duh mai lo lehnghal a, plan engemaw tak chu a nei a ni ngei ang. Khuavang chu a han inngaihtuah chiang leh deuh va, Zeros-a chuan dawt a sawi tih a manchhuak ta. A han en vang vang a, "Nang hi mitang i ni lo." a ti ta hmak mai a, Caesar-a pawh a rawn hawi hu mai.

Zeros-a chuan a melh rum kher mai, "Enge ka nih lohna?" a ti vin hlur mai a. Chutah chiang kek kawk hian Khuavang Lalpa chuan a en a, "Vantirhkohvin min rawn chhanchhuak i ti a, a hming chu Laila-i i ti bawk. Mahse a tan lai khan Laila-i khan thla a nei lo, Iblis-a'n a lak thlak sak a ni. Tin a thla chu nei let lehin lo vuah leh hman pawh nise, thil theih a ni lo. A chhan chua thla kha keiman ka kawl char char a, nang kan hmuh hma lawk che khan Vantirhkoh Seraphina hnenah ka hlan chhawng leh chauh a ni. Tin, keimahni ang deuh deuhvin chaw an rawn pek thin thu che i sawi leh bawk a, Khuavang ho hi Purtagory ah kan kal ve ngai lo, phal a ni lo." a ti ta zat zat mai a.

Zeros-a chuan a tawng a lo chhep sual zauh a ni tih chu a inhre fuh nghal a, mahse a tlai zo tawh. A tihngaihna hre lo chu a ha a rawn ti hriam vak a, CAesara-a inring lo lai chu a awmah a hnek siah mai. Caesar-a pawh a leng dawrh mai a, Khauvang chuan ava pan phei nghal.

Chuveleh Zeros-a hmel chu a rawn dang leh vek a, "Ni e..kei hi Zeros-a, kum 1000 tam tak liam ta a mi, London vampire ka nih hi." tih pah chuan bak ah bawk chuan a intichang leh a, planet chhuahna lam kua ah chuan a thlawk lut ta daih mai. Caesar-a chu thinrim tak hian a rawn tho chhuak a, "Mai mai chuan le.." tiin a chem pai chu a phawrh nghal a.

Um zui a tum a, mahse Khuavang Lalpa chuan a lo dang a. CAesar-a pawh chu a ding ve mai bawk, "Nilo...Lal Caesar, ani kha chu a thlawk thei a. MAhse nang chu i thei lo, a kalna chi a ni lo." inthlahrung tak hian Khauvang Lalpa chuan a han ti a. CAesar-a chuan a chhang lem lo, a chem chu a pai ah chuan a thun lut leh a.

*******************************

Vantirhkoh Malakai pawh chu Laila-i zawng chuan a thlawk kual ve mek bawk a, chutah Iblis-a ber mai chu a zu hmu fuh ta. Rang takin a zu t(r)um khu luih a, Iblis0-a chu a hnungchhawn zawng hian a lo ding ran mai a. Malakai chuan thinrim tak hian, "Hello unaupa Azazel...inhmuhlohna a va rei ta ve.." a han ti deuh kher a, Malakai hian Iblis-a hi Vantirhkoh Azazel a nih lai kha a hre pha ve a ni.

Iblis chu muangchang hian a rawn hawi let a, "Malakai, naupang te kha i ni thin asin. Thla tereuhte nei khan i thlawk kual ve vak vak thin kha ania, i lo lian ve ta hle mai." hmuhsit hmel tak chuan a han ti a. Malakai chuan thui tak hian a thla chu a kap parh vak mai a, "Azazel, khawiah nge Laila a awm?" a han ti khur khur a.

Iblis chu rum tak hian a meng a, "Azazel ka ni tawh lo, ka hming chu Iblis a ni." tiin a taksa pum mai chu a alh leh ta hluah hluah mai. Malakai chuan ring tak hian, "Anih chuan thi turin inpuahchah ang che, Iblis." tih leh tlan phei a rual nghal a. Mahse rei pawh a tlan hman lo, a hma zawna thil dum, diak kawi em em mai leh ban chup mai chu a rap fuh a.

A ding ta chat mai, a thla chu zap vak vakin thlawh sawn a han tum a. Mahse a thei tlat lo mai, Iblis lah chu a lo nui huah huah mai a. A va pan hnai a, "A pawi ka ti khawp mai, paradise ah chuan i let tawh ngai lovang. Kumkhua in, chatuanin Devils LAnd Purgatory ah i awm tawh ang." a ti ta mai a.

Malakai chu a tal vak vak a, mahse a tal sawn thei ngang lo. Chutah Iblis-a bawk chuan, "Pu Vana hnena thu thlen thin tu ber i ni tih te ka lo hria a, i dinhmun a lo sang tawh khawp mai. Tunah chuan tu hnenah mah thu i thlen tawh ngai lovang, mangtha le." tiin a chem chu a phawrh a, lei chu a chhun vak a.

Chuveleh Malakai dinna lei chu a rawn kaw huau a, lei hnuaiah chuan a tla thla ta daih mai. Thuk takah chuan atla thla a, hmun thim ruih mai ah chuan a tla thum dawt mai. A han tho leh a, mak tak maiin a bulah chuan a unaupa Raziel a lo awm ve reng mai a, thi ang der hian a lo let reng mai.

Va pan vatin, "Unaupa, RAziel..Raziel harh teh." tiin a sawi vak vak a. Chutah an chung zawn atang chuan aw a rawn ri a, Iblis-a aw a ni. A rawn nui khawk ruah ruah a, "Lo nghak phawt rawh u, i unau dangte pawh in an rawn tel pui vat ang che u." tiin an awmna hmun chu a thim nghal hmak a, meikhu niawm tak a rawn khu vak a.

A khu rim chu vantirhkoh meuh pawhin an tuar zo lo, Malakai pawh chu a lu a hai a, a thal ve ta tawp mai. Purgatory hi hremhmun tihna tho a ni a, mahse he hremhmun hi chu a dang bik a, Iblis-a siam a ni. Belzebula te hremhmun erawh a dang thung a, a hming pawh Inferno a ni.

**************************

Seraphina chuan Alice-i te chu rei lo teah ava um phak vat a, Alice-i nen chuan an inkuah leh nghal a. "Seraphina, i tha maw...khawnge khang jinn ho kha an awm?" tiin a lo zawt nghal a. Seraphina chuan nui sang chung hian, "An thi tawh, ka that vek tawh." tiin a chhang a.

Chutih lai tak chuan an hma takah chuan Iblis-a a rawn t(r)um thum ta dut mai, khuavang ho chuan an hlau takzet. Seraphina chuan rum zet hian a en a, "Kan intawng ve ta maw? Khawnge...kan pahnih in aw, i inbei ang hmiang.." tiin a cho nghal kher mai.

Mahse Alice-i erawh chuan a lo hlauhthawn pui em em thung a, a chhan pawh a chak zia hretu kha a ni miau va. Chutah Iblis-a chuan a ban a phar a, chuveleh khuavang ho chu an Lalnu chawp chuan boruak ah an kang vek a, an t(r)e ring hlawm ngang mai. Iblis-a bawk chuan a kut lehlam chu a han vai vir kual vak vak a.

Chutah chhuatah chuan Malakai-a tanna ang bawk, dim dum nguk mai chu chhuat khi atang chuan a rawn so chhuak bawrh bawrh mai. Iblis-a chuan a ban chu a dahthla thut a, chutah Khuavang ho zawng zawng chu an pil ta vek a, a awmzia chu Purgatory ah a thawn thla vek tihna a ni.

Seraphina chuan vin zet hian, "Engthil nge i tih? Khawiah nge i dah? Khawnge an awm?" a ti hrep hrep mai a. Iblis-a chu a khi suk a, "Tun atang hun reilo teah i kal ve thuai dawn....i hre mai ang." tiin a chhang a. Seraphina chu a thinrim kher mai, sang takah chuan a zuang vak a.

Chutah a thla paruk lai mai chu a tiparh leh ta, a chem hriam tak mai, a la hman ngai miah loh chu a rawn phawrh chhuak ve ta a. Chu chem hming chu Seraph Blade a ni. Tichuan a inthuamna zawng zawngte pawh chu rawn inthlakin vantirhkoh sipai inthuamna ah a rawn inthlak vek a, a chem chuan Iblis-a chu a han tin ran a.

Chutah Iblis-a pawh chu a rawn alh ve ta hluah hluah mai a, a inti lian amaw tih mai tur chuan a hma ai zawng hian a rawn lian a. A hmel pawh a rawh inthlak danglam vek a, ramsa hmel an mai niin a rapawm takzet. A chem chu a phawrh a, mahse chua  chem pawh chu a pianzia a rawn danglam a.

Tridet, fei ki pathum nei ah a rawn chang a, a sei em em mai lehgnhal. Seraphina chuan a va bei ta, an inbeit a chiam chiam mai a. Mahse Iblis chu a che tha zawk tlat mai, Alice-i pawh chuan pui ve in a ngunhnam chuan va saha  tum ve thin a. Mahse an pahnih tang kawp pawh chuan an hneh tlat lo, Seraphina pawh a hliam nasa tawh takzet.

Iblis-a chu ala chau ve eih lo amaw tih mai tur a ni, chutah Seraphina chu chain lian tak mai, alh hluah hluah hian Iblis-a chuan a phuar bet a, a che thei ta reng reng lo mai. Chutah leia thil dum, Purtagory luhna ah chuan a vawm hian a vawm lut a, Seraphina pawh chu a pil ve ta riai riai mai.

Mahse a pil kim hma chuan Alice-i chu a rawn en a, "Laila...tlanchhe rawh. Damchhuak ngei ang che, i unaupa te an awm ania." a la rawn ti hram a, a pil fel ve ta a ni. Chutah Iblis-a chu zawi zawi hian a rawn te a, a hma a mihring hmel, rapawm tak si ang chuan a rawn awm leh a.

Alice-i chu ava melh leh dawn a, mahse a lo awm tawh hauh lo. A thinrim lutu chu a lu zawng zawng a sen vek a, a alh leh ta hluah hluah mai. Khur dar dar chung hian, "Khawiah mah i tlan chhe lovang, Laila...ka that ngei ang che." tiin a thla a ti parh a, a thlawk bo ve nghal a.

*****************************

Khuavang Lalpa leh Caesar-a te chu an awmna ngai ah chuan an la awm reng a, an thu ngawi dun vung vung mai. Chutih lai tak chuan ramhuai tam em em mai hi an hnung thim ruih atang chuan an rawn chhuak hlawm a, Iblis-a'n hma a la rawn hruai zui. Khauvang Lalpa hlau lutuk chu a zuang tho nghal a, "Iblis...Iblis." tiin Caesar-a phenah chuan a biru nghal vat a.

Caesar-a chuan a han enchiang a, "Saw saw maw, Iblis-a chu ni a?" tiin a khi suk mai. Iblis-a leh a hote chu an rawn thleng phei ta, Caesar-a chuan rum zet hian lo melhin a khandaih hriam tak mai, Crocea Mors (KHRAW-SI-A MAWRS tia lam tur) chu  a phawrh chhuak a.

Iblis-a leh a hote chu an rawn thleng ta, CAesar-a a hmuh veleh chuan a dign chat a. A khi deuh suk mai a, "Ehe...hei chu...Gaius CAesar-a fapa Julius CAesar a ni ngei ang, ka rin sual loh chuan.." a han ti vel a. Caesar-a pawh chu a lo khi let ve suka , "Ni e...kan planet NAVIA pawh i rawn run tawh a ni lawm ni?" a lo ti let ve sak mai.

Nui var var chung hian Iblis-a chuan a lu a bu nghauh nghauh va, "Indona Pathian, mi huaisen Julius CAesar...ni e a dik alawm. I pian hma a ni zawk mah ang chu...khatih lai khan ka rawn run a. Hnehna pawh ka chang thei reng tawh, in vannei ta hlauh a nih kha. Ka ram chhung, ka thliarkar zauh ka tumna lamah hremhmun lamin buaina min rawn siamsak hlauh va. Nilo se chu a pian pawh i piang nang, i vanneih zia hi i hre em?" a han ti deuh hrep a.

Caesar-a chua  thinrim takzet, "Sawi tam vak angai lo, i ngam anih chuan min rawn bei ta che." a han ti khur khur mai. Chutah Iblis-a chuan a ban a han phar leh a, Khuavang Lalpa pawh chu boruak ah chuan a kang leh dawrh mai. A hma ang bawk khan a kut lehlam chu a tuai vir leh a, lei ah chuan thil dum bawk kha  arawn insiam leh ta t(r)uam t(r)uam mai.

Khauvang Lalpa pawh chu a vawm lut leh ta a, Purgatory ah chuan a tang ve leh ta. Caesar-a chuan mak a ti kher mai, mahse engmaha  sawi hman tawh lo. Ramhuai sipai rual te chu an rawn tlan phei a, CAesar-a chu an rawn bei ta. A theih tawp chhuah chuan Cesar-a chuan a bei let a, a hneh hlawm kher mai. A lo sat bung hmiah hmiah hlawm a, mahse an tam em avang chuan a che tha rei thei hauh lo.

Rei fe hnuah phei chuan a chau ve ta der mai a, an khawih fu ve ta nual hlawm mai. Mahse chutih lai tak chuan mei alh hlawm lian zet mai hi a rawn thlawk fua fua hlawm a, ramhuai sipaite chu a rualin 10 vel te chu a rawn hlawi phei hmiah hmiah mai a. An kang ral chak em em lehnghal, chutah Vantirhkoh pakhat hi a rawn t(r)um ve leh a, chu chu Uriel-a a ni.

Iblis-a chu a lo ner sak mai, a hnung lam atang chuan eng emaw hian a rawn su leh pawp a, a leng lawp mai. Rang takin Iblis-a chu a tho chhuak nghal, ava en chu vantirhkoh Raphael a lo ni. CAesar-a pawh chu a rawn ding chhuak leh vat a, "Iblis, khawiah nge Laila-i a awm?" a han ti vin tuar a.

Iblis-a chu a nui leh ta huah huah mai, "Ava ropui thin em, CAesar leh...heng Vantirhkoh ho hi i lo pui lek a nimaw, in lal ram ka rawn run vanga phuba turah ka lo ngai a, ka hrethiam chiah e." tiin a han nui leh nghek nghek a. Chutah a hmel chu thinrimna-i'n a rawn thlak leh nghal vat a, "Sipaite u..heng vantirhkoh ho hi that chimit vek rawh u." tiin a han vin tuar a.

Chutah ramhuai sipate chu an rawn ding khawm leh ta a, CAesara, Uriel leh RAphael te chuan theih tawp chhuah chuan an bei leh ta a, reiloteah chung ramhuai ho zawng zawng te chu an that fai ta vek mai. Mahse a inrin loh lai chuan Iblis chuan a chem hmang chuan CAesar-a chu hnunglam atang chuan a vit ta thut mai a.

A thingthi hnawk mai, dim basak lo chuan Iblis-a chuan a chem chu a han phawi leh hrawk a. Caesar-a chu a tlu bawk thlawp a, a thaw hrawk hrawk mai. Chutah ring tak hian Uriel-a chuan, "Caesar.." a rawn ti vak a, a rawn thlawk phei nghal a. A kut atang chuan mei alh ti chhuakin Iblis-a chu a rawn kap a, Iblis-a awmah tak chuan fuh in a leng lawp mai.

Mahse rang taka rawn tho lehnghal in Ureil-a'n Caesar-a a buaipui hma chuan a mit atang chuan mei alh ti chhuak ve in Uriel chu ava kap ve nghal a, Uriel pawh a tlu thal tawp mai. Raphael chu rawn thlawk phei ve leh in a rawn thlawh phei pah chuan eng nasa tak mai hi a rawn kap chhuak a, Iblis-a chu rawn fuh ani pawh chu a thal leh ta tual mai.

Uriel pawh chu a rawn tho chhuak ve a, a khandaih chu a phawrh ve ta. Raphael pawh chuan Hreipui lian tak, a tawn tawn a hriam ve ve chu a rawn phawrh chhuak ve bawk. Iblis-a pawh chuan a chem chu a phawrh chhuak ve a, an inbei ta chiam mai le. Mahse Iblis-a tan chuan VAntirhkoh pasalthate pahnih tangkawp chu a hneh vak bik lo, inhneh tawk viau mahse a chan chhe zawk a ni tlat.

Chutah ring tak hian, "Tawp rawh u..." a han ti vak a. Uriel-a leh  Raphael te pawh chu an tawp ve a, an thaw hrawk hrawk hlawm mai. Iblis-a chu a thaw hluam hluama , "Nang ni hi ka hmelma in ni lo, ka mi duh pawh in ni lo. Ka duh chu Laila a ni, Vantirhkoh Laila.." a han ti vin vak vak a.

Chutah a ban a phar a, van atang chuan bawm lian tak, kil li nei, langtlagn vek thei chu a muang chagn hian a rawn tla thla riai riai a. Chu bawm chhungah chuan Vantirhkoh Seraphina, Raziel leh Malakai te chu an lo awm a, an lo harh chuak vek tawh thung a, Khuavang ho pawh an lo awm ve bawk.

Uriel-a leh Raphael te chu an in en hu a, mak an ti ngang mai. An chetsawn hma chuan Iblis-a chuan, "Che hlek suh u, anihloh vaih chuan....dawi pakhat lek ka chham a nih vaih chuan he bawm hi a puak darh anga, heng mitang ho hi an thi vek ang." a ti ta mai a, Ureile-a te pahnih pawh chu an che ngam ta der lo mai.

Iblis-a chu intithei tak chuan a nui ta huah huah mai a, "He bawm hi kum 100 chuang zet ka buaipui a, Devil's Land a ramhuai chak zual ho leh jinn chak zual ho te nena kan siam a ni. Nangni Vantirhkoh meuh pawhin in thlak danglam thei lovang, min fiah tum reng reng suh ang che u." a han ti vel ham ham a.

Thinrim tak hian Raphael chuan, "Engthil nge i duh?" a han ti vin tuar a. Iblis-a chu a han thaw hak a, a kut chu vaivir leh vut vut in thil dum bawk chu leiah chuan a siam leh ta. Uriel-a leh RAphael chu a han en a, "Hetah hian ding rawh u...anih loh chuan ka that tak tak ang heng mi tang ho hi." a ti ta mai a.

Bawm chhung atang chuan Seraphina chuan, "Nilo...rap suh u. Min that vek dawn tho tho, chu ai chuan amah kha that zawk rawh u." tiin a lo au nasa mai a. MAhse Raphael chuan a ngai ngam thlawt lo, uriel-a chu rap turin a hrilh ,a an rap dun ta a. Chuveleh an pil nghal hmak a, bawm chhungah chuan an awm ve ta.

Iblis-a chu a nui vak vak a, a intithei kher mai. A hawi kual vel a, "Tunah chuan mamawh pakhat chiah ka nei ta, Laila-i a ni." a han ti vel a. Chutah ring tak hian, "LAILA..ALICE...SICHANGNEI, i hming chu engpawh ni rawh se. Lo chhuak rawh, helai hnaiah hian i awm tih ka hria a nia. A nih loh chuan ka that vek ang, Lal Caesar-a pawh tiamin ka that vek ang." tiin a au vak vak a.

Chutah a hma zawnah chuan Alice-i chu a rawn tum ta ngei mai, a ngunhnam chu a lo la keng reng bawk a. Zawi muang hian a rawn tho chhuak a, Iblis-a lam chu a rawn hawi a. A ding ran mai a, "I lo kal amaw? Tunah chuan heng i unaute mit hmuh lai ngei hian ka that dawn che, i hria em?" Iblis-a chuan a lo ti leh khur khur mai.

Alice-i chuan a chhang lo, a en reng ringawt. Iblis-a chuan a khandaih chu hum nghet sauh sauh vin ava tlan phei ta a, Alice-i chu a la ding ngawi reng ringawt. Bawm chhunga lo awm, vantirhkoh dangte chu an lo hlauthawng em em a. CAesar-a pawh thei leh thei lo hian a lo che ve tual tual a, a thaw ri lah chu a zawi tial tial lehnghal, a hliam chu na a ti takzet.

Alice-i chu a maimitchhing a, "Pu Van, ka pa...ka tawngtaina i hria e. Khawngaihin min pui rawh...i fate hi  chhan kan ngai a ni." tiin a phun sap a. Iblis-a lah chua  rawn thleng hnai tawh em em a, a chem chu a lek kang vu tawh mai. A zuang vak a, zu vih a tum ta mai a.

Chuveleh Alice-i chuan a thla chu a aia zau hian a kap parh a, mahse mak tak maiin a thla chu a rawn sen leh ta vek mai. Amah pawh chu a hmel a inthlak nghal a, Laila-i hmel tak tak a rawn ni leh ta. Iblis-a chu a lo rek chat mai, chutah boruakah chuan rek reng chung chuan a thlawh kan pui a.

Iblis-a chu a che thei der lo, an awmna lai vel chu meikhu sen chuai hian a rawn hual vel a. Rum zet hian hnai set sawt ah Laila chuan Iblis chu chiang taka en in, "Tunge i beih hi i hre lo a ni, Iblis. Vanchung nula, SICHANGNEII ka nih hi." tih pah chuan leiah chuan a paih pawp mai a.

A tla khu luih mai, chuveleh a ngunhnam chu a la chhuak leh a. Sang takah a thlawk chho vang vang phawt a, chutah a chhuk zawng chuan a thlawk thla leh char char mai. A ngunhnam chu a rawn lah var vek a, Iblisa awmah tak chuan a zu vin tlum ta thawi mai a.

Laila chuan phawi leh nghal in a ngunhnam atang chuan eng var tak mai chu a ti chhuak a, a unaute leh Khuavang ho tanna bawm chu a va kap a, a darh ta vek mai a, midang ho chu an zalen ta. Iblis-a chu thei leh thei lo hian a rawn tho chhuak leh a, mahse a thingthi hnawk mai.

A taksa pum chu a dum hian a dum vek a, a khu ral riai riai bawk. Mahse engmah a sawi hleithei lo, Laila-i chu a hma takah a ding a, a hnungah chuan a unaute, a vantirhkoh pui te chu an ding ve thap bawk. An vai mai chuan Iblis-a chu an en thup a, "A tawp ta e, i chak lo, Iblis." tiin Laila chu a phun sap a.

Chutih lai chuan Raphael chuan CAesar-a chu a thiltihtheihna hmangin a lo ti dam ve bawk a, Laila-i chuan a thinah chuan Iblis-a chu a han vit leh siah mai. A bawk thlawp a, tho leh tur a awm tawh lo. Vantirhkoh ho leh Khuavang te, Caesar-a te chuan chu lai hmun chu an thlawh bo san ta a.

ZAwimuang chuan Iblis-a chu a ral tial tial a, mahse a lo la thi fel hauh lo. A thaw tawk tawk a, "He Ramhuaite chenna thliarkar a, jinn la bang ho zawng zawngte khawvel lama kal thei turin ka thlah zalen e, chu chu ka anchhe hnuhnung ber a ni." tiin a phun sap a, a khu ral ta riai riai a.

***************************************

Caesar-a pawh NAVIA lamah a kir leh tawh a, Khauvang ho pawh an duh duhna hmuna kal tuar thlah zalen an ni ta. Laila-i te pawh chu Paradise ah chuan an haw ve ta a, Pu Vana pawh a lawm kher mai. A vawihnihna atan Laila-i chu chawimawi a ni leh ta a, "Ka fanu, kha anchhia kha ka laksak loh luih che avangin min ngaidam dawnnia." tiin Pu Vana chuan ngaihdam a dil a.

Laila-i chu a ngawi vang vang a, "Min puih avangin ka lawm e, Lalpa. Mahse, thil pakhat ka duh a ni." a han ti a. Pu VAna chuan zaidam tak hian, "Engthil nge i duh, i duh apiang ka ti hlawhtling ang." a lo ti vat a. Laila-i chu a ngawi vang vang a, "Khawvelah reilote chhung ka awm min phalsak rawh." a ti ta mai a.

Pu Vana chu a han ngawi deuh va, "Mahse Laila, i anchhia kha ka laksak che a nih chuan mihring angin i awm thei ve tawh dawn lo ania." a han ti a. Laila-i chu a nui suk a, "He Onoskelis-i anchhia hi ti reh suh, chu chu ka duh bawk." a ti leh tlat mai. Pu VAna pawh chuan a lu a bu nghauh nghauh va, "A tha e, phalsak i ni e." tiin a chhang ta a.

**************************************

Iblis-a anchhia chu a thleng dik ta reng bawk a, jinn thlarau sual la awm ang ang te chu khawvel lam pan chuan an thlawk ta sup sup mai. Chung zingah chuan thlarau sual pakhat a tel ve a, a hming chu KHAWHRING a ni. Chu KHAWHRING THLARAU chuan khawvel a thleng a, a awmna hmun chu MIZORAM ngei a ni bawk.

*************************************

THE END