SICHANGNEII : 2 (ALICE IN DEVILS' LAND) [MIZO FICTION SUPERNATURAL FANTASY STORY] Written by : Aaron Malsawmdawngzuala Chapter - 2

 SICHANGNEII : 2 (ALICE IN DEVILS' LAND)

[MIZO FICTION SUPERNATURAL FANTASY STORY]

Written by : Aaron Malsawmdawngzuala

Chapter - 2

*******************************

Ni chu a sat hian a sa vur mai a, ram lian leh zau tak pakhat, khawvel dang daih ami ah chuan khaw mipui ho zawng zawng chuan intihlimna an lo nei mek a. Chu chu ennawm chhuahna hmun, an khel mual, 105m X 68m vel laia zau chu mipui sing 7 chuang chuan an hual khat thup mai, chu khawpui hming chu NAVIA a ni.

Field lai takah chuan bawng chal ki lian tak nei, kawlh hmel em em mai panga vel chu an ding run hlawm mai a, an vei kual ang thuak thuak a. Mipui chu an haw haw nasa kher mai, mahse an inthuam dan erawh hmanlai Rome hunlaia an inthuam dan vek a ni thung. "Caesar...caesar.." (Mizo tawng chuan KAISAR-A) tiin mipui ho chu an au rual thup thup mai.

Chutah field luhna kawngka, thir atanga siam chu a rawn inhawng a, chuta tang chuan mi pakhat palian em em mai leh sek zet mai hi a rawn chhuak a. Mipui chu an thawm a ring ngei mai, field sirah chuan sipai an ding tlar thap bawk. Chupa chuan kawr a ha lova, a pian mawi tak chu a lang chiang kher mai.

Rum zet hian chung bawngpa chal ho chu a en ran mai a, a mitmengah chuan hlauhna chhete mah a awm lo. Chutah bawngpa chal ho chuan an rawn hmu ta, an rawn veh nghal tham tham hlawm a. Chu pachak chu tudang nilovin mipui ten an auh mek, Caesar-a ngei chu a ni.

Zam hauh lo chuan Caesar chuan ava pan phei zel a, bawngpa chal te pawh chuan a hual in an hual thap mai. Mipui lam atang lah chuan thawm a ring nasa em em mai a, chutah bawng pakhat chu a rawn tlan a, a ki zum tak chuan Caesar-a chu rawn sut a tum ta. Mahse Caesar-a chuan a lo man chat mai.

Vaivut khu rum rum khawp chuan Caesar-a chu a hnung tawlh zel a, bawngpa chal lah chuan a theih tawpin a nawr zel mai bawk si. Chutah bawngpa dang ho chu an lo kal leh a, pakhat chuan hnung lam atang chuan rawn sut a tum ve a. Mahse Caesar-a chuan lo bumin a zuang thut a, a beih lai mek bawngpa chungah chuan a chuang ta daih mai.

Bawng pakhat zawk lah chu a rawn tlan chak tawh si a, Caesar-a bawng beih lai nen chuan an chaldarah tak an in tauh ta chawrh mai a. An zal dun nghal chiang kher mai, bawngpa chal dang, pathum lai an la awm. PAhnih chu a rualin an rawn tlan leh a, Caesar-a chuan a va pan ve leh bawk a.

Sang em em maiah hian a zuang vak a, a kiu zum chuan bawngpa chal pakhat zawk chu a chal darah tak a chhun hian a va chhun a ni ber mai. Chu bawng pawh chu a zal leh rawih rawih a, mahse vanduaithlak takin bawngpa chal pakhat lo la awm ve chuan Caesar-a chu a hnunglam atang chuan a rawn si ta chawrh mai a.

A leng lawp a, vaivutah chuan a lum khu phei tual tual mai. Chuveleh mipui ho haw haw pawh chu a reh deuh thuap a, a sira sipai lo awm ho chuan rawn puih an tum a. Mahse Caesar-a chuan a ban a phar a, sipai ho pawh chu an che zui ta lo. A awmzia chu, "Puih ka ngai lo, keimahin ka ti thei." a tihna a ni.

A rawn tho leh a, mipui ho pawh chuan an lo au phur leh nghal bawk. A hma a bawng lo tlu zal der ho pawh chu an rawn tho leh vek a, a hma aiin an thinrim hmel hle bawk. CAesar-a chuan a kut chu a han elh ri thak thak a, a va tlanphei leh ta. Bawngpa chal zinga pakhat chuan ava pan leh a, a ngai te ang bawk chuan CAesar-a chuan a ki chu a lo man leh chat mai.

Theihpatawp chuan an inchei dun a, chutah Caesar-a chu vir thutin bawngpa lu chu a kuai ta ngat ngat mai a. Second 4 vel lek hnuah chuan bawng chal chu a zawi tial tial a, Caesar-a chu a au va a, a elh ri ta thawk mai. Chu bawngpa chal chu a thi chiang ngang mai a, bawngpa dang pahnih chu an rawn tlan phei leh nghal.

A lo tlan hmasa zawk chu Caesar-a chuan zuang chung hian a khupin a chalah tak chuan a lo do pawp mai, bawngpa chu a thlep hnawk a. A hnuhnung zawk chu a lo thleng ve leh a, Caesar-a chuan lo zuan lehin a inher thut a, a chunga chuan a bawk vang mai a. BAWngpa chal lian em em mai chu a kuah a, a vun thap em em mai ah chuan Caesar-a chuan a th(r)am ta vak mai a nih chu.

A chak zia lanna turin a kut khinghnih chuan chu bawngpa chal, kg 1000 dawna rit chu a chawikhang ta mai a nih chu. Tichuan leiah chuan a deng chawrh mai a, a khu luih mai. Ala duh tawk mai lo, bawngpa lu ah chuan dim baksak lo hian a chum zui chawrh chawrh mai. Bawngpa hnar atang chuan thi a rawn chhuak hial a, a thi chiang ngei mai.

Pakhat zawk chu ava en a, alo la tho hleithei lo. Ava pan a, a kephah hlai tha tak mai chuan a lu chu a rah chilh leh siah siah mai a, chu bawng chal pawh chu a thi ve leh ta. PAthum an la awm, CAesar-a chuan hah hmel pawh a la pu eih lo, a phur tulh tulh emaw tih mai tur zawk a ni.

BAwng pathumte chuan CAesar-a chu an melh ran hlawm mai a, an ke te chu an phiat khu luih luih a. Caesar-a chuan a ban a phar a, "Lo kal ru...lo kal ta che u." tiin a au vak vak a, Latin tawng a hmang a ni. BAwngpa thum ho chu a rual chuan an rawn tlan a, Caesar-a chuan a bum zak zak hlawm mai.

A bum kawi hneh hlawm lutuk chu bawng chal ho pawh a tawlh thlu leh tual thin a, field pum mai chuan vaivut a khu chum chum mai a, hmuh that hleihtheih pawh a ni lo. Chutia a bum kawi mek lai chuan a mal te te chuan an chaldar ah chuan a kiu te, a khup te leh a kuttum te chuan a han pe ri leh deuh chawrh chawrh zel a.

Kg sangkhat chuanga rit bawng chal ho pawh chu a hah zawkah an tang thei hial mai, Caesar-a lah a la fit tha zawk zawk ropui mai si. Chutah bawngchal pathum zinga pakhat chungah chuan Caesar-a chu a han chuang leh a, a thlukvum chu a chum siah siah mai a, bawngpa chal pawh chua  thlep hnawk mai.

Chutah a ki chu a vuan ang ren rawn a, a theh vir ta lawp lawp mai a nih chu. Chu mai ala ni lo, lei den nan a hmang nghal bawk. A thi ve leh ta a, pahnih chiah an awm ta. Ding lam leh vei lamah chuan chung bawng pa chal la dam pahnihte chuan Caesar-a chu an veh leh ta them them mai le.

AWlsam lutuk hian pakhat zawk chu Caesar-a chuan a kut tum lian leh hrawl zet mai chuan a chal ah tak chuan a han hnek leh pawp a, bawng chal lian lutuk e tilo chuan a phei khut khut a, a let der mai. Ala duh tawk lo, a hnar atanga thisen tam tak rawn baw chhuak hawk khawp chuan a la t(r)um zui a, a thi ve leh ta.

Pakhat la dam awmchhun nen chuan an han inchei leh ta tak tak mai a, a lu ah chuan Caesar-a chuan a kuai leh ta. Mipui thawm lah chu a ring tha hem hem khawp mai, ring taka au vak vak chung chuan a theih tawp chuan bawng pa lu chu a kuai vak a. Chutah le, bawngpa hrawk chu a rawn thler tan ta.

Thisen a rawn baw zawih zawih a, a tawp a tawpah chuan a bung lo chauh hial mai. Chu bawng pa chal la dam awmchhun pawh chu Caesar-a chuan a that leh ta a, hnehna a chang ta. Mipui chu an au nasa mai a, "CAESAR CAESAR." tiin an au rual thup thup mai. Bawngpa ruang chungah chuan a lawn a, a ban a han phar a, mipui chu an ngawi thap mai.

Ring tak hian Caesar-a chuan, "Kei hi Pathian ka ni, tuma hneh theih ka ni lo. Indona PAthian, hlauhna hre ve ngai lo, Juluis Caesar ka ni. He ram, he khawpui NAVIA hi ka hnuaia awm a ni." tiin a han au vak vak a. Mipui ho lah chuan an lawm kher mai, "Kum tamtak chhung indonaah ka tel tawh a, hneh loh ka la nei lo. Sipai hruaitu ropui tak ka ni bawk a, Navia khawpui Lal ka ni bawk." tiin Caesar-a chuan a sawi chhunzawm zel a.

A awmzia chu CAesar-a hi NAVIA rama an Lalpa ber a ni a, amah hi mihring pangngai nilovin PAthian tamtak zinga pakhat, Indona Pathian an tih thin chu a ni. Khatia amah ber, Lalpa berin bawngpa chal panga lai mai a insualpui chhan pawh mipuite mit hmuh a, Pathian chak tak a nih zia lantir a tumna mai chauh niin, a ram mipuite tan ennawm a chhuahsak tihna a nih ber chu.

Mipui ho chu a han enkual a, "Tikhan zawhna in la nei em? Kei hian hneh loh ka nei lo tih hi inla awih lo cheu em? Hnehtu Pathian diktak chu ka ni, ka Lalram hi tuman min chhuhsak ngai lovang." tiin a han au leh a, mipui ho chuan, "Lal Caesar-a, dam reng rawh se." tiin an lo au ve bawk.

***************************

Alice-i chu a chau kher mai, chain chuan hlin beh reng a la ni a. Zeros-a chu a bulah chuan a lo tei kual reng a, Alice-i chuan a han en vang vang a. "Ka tui a hal, tui in tur min pe rawh." tiin a han dil a. Zeros-a chu a ding a, Alice-i chu enin a nui ver ver mai. Alice-i chuan vin zet hian, "Ka tui a hal ka tih chu....tui in tur min pe rawh." a han ti leh deuh hlur a.

ZEros-a chuan ngaihnep hmel tak hian a en a, "Nang hi ani maw...Sichangneii chu? Haha...Vantirhkoh Laila, Hremhmun Lalfanu Onoskelis tlawmtu...i chanchin hi Iblis hian min hrilh vek tawh alawm. Chuan..tuna i hmel kha, i vantirhkoh hmel nilovin i khawvel hmel zawk tiraw?" a han ti vel a.

Thinrim tak hian Alice-i chuan, "Chutiang zawhna ka chhang peih lo, ka tui a hal...tui chu min pe vat rawh." a han ti vin leh hlur a. Zeros-a chu a khi suk a, a kal daih mai. Ring tak hian Alice-i chuan, "Hey...lo let rawh. Tui chu min pe rawh ka tih chu, khawnge i kal dawn?" tiin a au zui a.

Mahse a lo let mai lo tlat, "Engtin nge ka tih ang? Helai hmun atang hian ka chhuah ngei a ngai, Ka pa...Ka Lalpa, khawngaihin min pui teh u." tiin a mangang kher mai. Chutah Zeros-a chu bel dum lian tak nen hian a lo let leh a, Alice-i hmaiah chuan bel chhunga tui chuan ava theh a, Alice-i chu a huh vek mai.

Zeros-a chuan nui chung hian, "Tikhan ala hal em? Min vin ve khanglang animaw? Kei hi Zeros-a ka nih hi....i hria em? London Vampire, kum sang tamtaka upa ka ni hi." a han ti vei pung pung a. Ngaihnep hmel tak hian Alice-i chuan a lo nuih suk a, "Chu chu enge ka tan a tangkaina?" a lo ti hmak mai.

Zeros-a chuan rum zet hian a melh a, "Helai hmuna ka awm chhan hi i hre duh em? Ni e...nangmah nen tak hi chuan buaina kan nei hauh lo. Ka hmelma i ni lova, ka pawi i sawi hek lo. Mahse ka phuba lak na tur atan i tangkai em a, ka hmang tangkai ta che a ni." a han ti leh a.

Alice-i chuan hriatthiamloh hmel tak hian, "Eng a? Eng phuba maw?" a ti hu mai a. Zeros-a chuan Alice-i mitah tak chuan enin, "Pu Vana kawrkilh, kha lunghlu thiltihtheihna ngah tak mai kha...kha kah Belzebula'n a duh avangin kei hi la turin min tir a. Keimi khua ah kum 100 chuang liam ta khan ka ru chhuak a ni, mahse ka chetsual avangin hnehna ka chang lova. Kha sakei, Daniel Lalhriathlua kha ka hneh ta lo a ni." tiin a chhang a.

Daniel-a hming a hriat chuan Alice-i pawh a phu zawk mai, "Da..DAniel-a a?" a ti leh hu mai a. Zeros-a chuan a lu a bu nghauh nghauh va, "Aw ni e, nangpawn i hria. Amah zawng tur leh kawrkilh chhuhsak turin khawvelah i kal kha. Kha sakei mihring kha ka hneh ta lova, chuvang chuan Belzebula chuan min hrem a, Hremhmuna dinhmun pawimawh tak neih tum kha, hrem ka nih zawk phah ta a nih kha. Mahse Iblis-a hnenah ka tiam a, nang hi a duh che a. Helai hmuna a man theih nan che ka pui a ni, Laila...a chhan chu kha keimi lakah khan phuba lak ka duh a ni." tiin a chhang leh a.

"Tunah planet dangah i awm daih alawm, engtin nge khawvelah chuan i kal leh ang? Hetah DAneil-a chu a awm hleinem, khawvelah a awm daiha lawm."

"Haha..i hmanhmawh a nih kha, Vanchung nula hmelthate...dinhmun sang ka chang anga, Iblis-a hnen atang hian thiltihtheihna leh chakna tamtak ka nei phawt anga, tichuan khawvelah ka let leh ang."

"Iblis-a hi i ring em ni? Bum hmang, phatsan hmang a nih hi. Keimah ang thova vantirhkoh a ni ve thin a, Pu Vana hnuai chiah a awm a ni. Mahse a phatsan a, a chhan chu roreltu nih a duh vang chauh a ni. Nang pawh a bum vat ang che, a that ngei bawk ang che."

Zeros-a chu a nui ta huah huah mai, "Bum hmang a? Laila..kei tluka bum hmang hi an awm reng reng hleinem. Belzebula pawh kha bum ka tum reng zawk alawm, mahse ka hlawhtling ta lo mai zawk a nih kha. Kei hi lei leh vana mi thiltithei ber, chak ber ka la ni ngei ang tih hre rawh." tih pah chuan a kalsan leh ta daih mai.

Alice-i chuan tih ngaihna reng a hre lo, a inngaihtuah vung vung ringawt a. Chutih lai chuan Iblis chu a rawn lang ve leh hlawl mai, "Ngaihtuahna kan lo seng mek ava ang ve aw....Alice, enge chanchin ni ta?" a rawn ti vel ham ham a. Alice-i chuan rum zet hian a lo melh a, "Theihnghilh rawh, eng ang pawhin min hremin min vau mah la, i lamah ka tang ngai lovang." a lo tih khum leh hmak mai.

Iblis-a chu a han thaw deuh hak a, "A tha e...hun ala tam alawm. Engpawh nise, tunah hian vantirhkoh i ni lova, thla pawh i nei tawh hek lo. Mihring ang chauh i ni tawh, Laila nilovin Alice Lalrintluangi i nih kha. Mihring chuan enge in mamawh, chaw a ni. Chaw i ei angai, alo thleng vat ang....lo inngaihtuah tha leh ang che." tiin a kalsan ve leh ta a.

*******************************

A lalthutthlengah chuan CAesar-a chu a thu a, khawnbawl upate nen chuan an titi a, ro an rel mek lai chuan sipai pakhat a rawn lut a. Hmanhmawh hmel tak hian, "Lalpa, Lalpa....mikhual kan nei tlat mai." a rawn ti a. Caesar-a chu a han thu tha sauh sauh va, "NAVIA khaw lalram chhungah tu phiangsen nge rawn lut ngam a? Gate vengtute pawh in awm ve ani lawm ni, enge in lo tih a?" tiin a lo vin hrep mai.

Sipai chuan a chuil a lem dawk a, "Lalpa, gate atanga lo lut an ni lo. An rawn thlawk lut zawk a ni....vantirhkohte an ni e." a ti ta mai a. Chuveleh Caesar-a chu a tho chhuak nghal a, "Vantirhkoh a? Tunah khawnge an awm? Buaina an siam em ni?" a han ti leh pung pung a.

"Nilove Lalpa, tha takin nangmah hmuh an duh thu che min hrilh zawk a ni." tiin sipai chuan a lo chhang leh a. CAesar-a chu a ngawi vang vang a, "Lo luh tir rawh." a ti ta nge nge a. Chutah Lal In chhungah chuan Vantirhkoh pasaltha pali, Raphael, Raziel, Uriel leh Malakai-te chu an rawn inzui lut ta a.

Lal In chhunga lo awm ve midang ho chuan an lo thlir thap mai, Lal thutthleng hma ah tak chuan an pali chuan an ding tlar a. Sipai pakhat chuan, "Kan Lal Caesar-a hi thingthu in chibai buk rawh u." a lo ti nghal vat a. Mahse an che eih lo, "Kan Lalpa, Pu Vana leh engkim neitu, SIAMTU PATHIAN hmaah lo chuan kan thingthi ngai lo." Raphael-a chuan a lo ti hmak mai.

Chuveleh sipai ho chuan an ngunhnam chu an phawrh nghal a, mahse zaizir chuan Caesar-a chuan tilo turin a hrilh a. A lalthutthleng atang chuan a rawn chhuk a, "In hming ka hre thei angem?" tiin a han zawt hlawm a. Raphael-a chu lo pen chhuakin, "Kei hi vantirhkoh Raphael-a ka ni a, hei hi ka unaute, Uriel, Raziel leh Malakai te an ni." tiin a han inhmelhriat tir a.

Caesar chuan a lu a bu nghauh nghauh mai, "A tha e, engpawh chu nise....dan phal loh angin in rawn thlawk lut a, min hmuh in duh thu in sawi bawk a. Enge ka lak atang hian in duh le....han sawi ta che u, eng ti tura lo kal nge in nih?" tiin a han zawt leh a. "Kan Lalpa Pu Vana tirh kan ni a, mahse helai hmuna lo kal tur erawh chuan min tir lo." tiin Uriel-a chuan a lo chhang a.

Mak tih hmel tak hian CAesar-a chuan, "Eng a? Anih chuan ka Lalramah engvanga lo kal nge in nih?" a han ti vin deuh khur khur a. "Lal Caesar, Pathian nunrawng tam tak an awm a, mahse chung zinga mi chu i ni ve lo tih kan hria. Chuvang chuan i puihna kan mamawh a ni e, kan unaunu chhanchhuak turin." tiin Raziel-a chuan a lo chhang ve leh a.

CAesar-a chuan a han en deuh haw a, "Unaunu a? Tu in unaunu maw?" tiin a han zawt leh a. Raphael-a chuan, "Laila...Vantirhkoh Laila-i." tiin a lo chhang a. "Vantirhkoh lo ni ve tawh thin, Azazel chu Paradise-ah rawn lut ru in kan unaunu Laila-i chu a man a, tichuan tunah hian chhanchhuak turin kan zawng mek a ni." tiin Uriel-a chuan a lo tuihnih ve leh a.

Caesar-a chuan a la hrethiam chiah lo, "Azazel a? Chu chuan a rawn ru chhuak thei amaw?" a ti leh hu mai a. Malakai chuan lo sawifiah ve in, "Aw ni e, a chhan chu Azazel hi vantirhkoh thiltithei tak, Pu Vana hnuai chiah a awm a ni thin. Mahse thuneihna a duh avangin HRemhmun lam mite nen an tangrual a, tichuan Pu Vana chu an bei ta a ni. Mahse hnehna a chang lova, tichuan Pu Vana chuan Paradise atangin a paih thla a, a hming pawh Azazel nilovin Iblis tia thlak a ni tawh thung." tiin a rawn tawngchhuak ve bawk a.

Caesar-a chu a meng deuh kawk mai, "Iblis...Iblis..ka hre tawh. He hming hi ka hre tawh a ni, Iblis..." a ti nuah nuah mai. Vantirhkoh pasalthate pawh chu an in en deuh hrek hrek hlawm a, "Lal CAesar, Iblis chu i hre ve maw?" tiin Malakai chuan a han zawt ve leh nghal a.

"Aw....ka pa in min hrilh thin a ni. Ramhuai chak tak mai a ni a, Pathian tluk zeta thiltithei a ni bawk. KA nu hming chu Aurelia Cotta a ni a, ka pa hming chu Gaius Caesar a ni. Ka nu leh pa ten kei min hrin chhuah hma khan, ka pa hian Iblis hi a lo bei tawh a, hnehna a chang lo teuh khawp mai." tiin CAesar-a chuan a sawi a.

"Hnehna a chang lo teuh khawp mai a? Enge awmzia, Caesar?" tiin Raphael chuan a lo zawt leh vat a. "Ka pa sawi thin dan chuan...Iblis hian awmna dang, planet pakhat tawp a siam chawp a. Chu chu Devils Land tiin a hming a vuah a, chu a lalna ram chu zauh zel a tum a ni. Chuvang chuan he NAVIA khawpui zawng zawng pawh hi neih vek tumin min rawn run a, mahse a zawhfel hma in amah zawk chu tlawm zawkah tangin a let leh a ni." tiin Caesar-a chuan a lo chhang ve leh a.

Malakai chu rawn tawng chhuak ve lehin, "A let leh maw? Engvangin, enge awmzia?" tiin a lo zawt ve leh a. "Ka hre bik lo, ka pa pawh khan a chhan a hre bik lo. Mahse a sawi dan chuan, let lovin zo fel ngat se chu engtikah mah hnehna kan chang lovang a ti a ni." tiin CAesar-a chuan a chhang leh a.

Raphael-a chu a ngawi vang vang a, "Lal Caesar, i puihna kan mamawh a ni. NAVIA Lalram hi chuti taka i hmangaih a nih chuan lo tihchhiat tum tawh Iblis chu a chungah phuba i la ngei duh dawn lawm ni?" tiin a sawm ta a. "Ni e, Lal CAesar....kan unaunu Lailah hi kan chhanchhuah ngei angai, min pui rawh." tiin Raziel-a chuan a lo sawm ve bawk.

Caesar-a chu a ngawi vang vang a, "Engvangin nge ka puih ang che u?" a ti hmuk mai. Ureil-a chu a rawn pen chhuak a, "A chhan chu Lal nunrawng leh Pathian sual i ni lova...Iblis hi misual a ni a, kan beih a, kan tan ho a ngai a ni. Lawmman pawh tha tak kan pe ngei ang che, min pui rawh." tiin a chhang a.

Caesar-a chu a la ngawi reng a, "Kan tan rual phawt chuan kan hneh em em ang, sipai tha tak tak i nei bawk a, kan hlawhtling ngei ang." Raziel chuan a lo ti ve leh a. Caesar-a chu a han thaw deuh hak a, "A tha e, ka pui ang che u." tiin an sawmna chu a pawm ta nge nge a.

***********************************

Alice-i chu mangang tak chuan lung in thim ruih mai ah chuan kun ngal hian a awm a, reiloteah chuan thawm a hre ta. A hma a alo biak, Khuavang Lalpa chu a rawn kal a. Eitur a rawn keng a, "VAnchung nula, hei hi i ei angai.." tiin chaw tuihnai loh hmel zet chu a rawn dah a.

Alice-i chuan a lo en a, "Khuavang, nang hian min puih angai a ni." a han ti nghal a. Mahse Khuavang chuan a lu a thing a, "Nilo...kei ve tehlul hian engmah ka ti thei lo a ni. Min ngaidam rawh, puih che chu duh viau mah ila chakna reng ka nei ve lo." tiin a chhang tlat mai.

"Enteh, ramhuai ve tho i nih kha. Ramhuai chuan thiltihtheihna in nei vek, min pui a nih phawt chuan helai hmun atang hian ka hruai chhuak ngei ang che."

"Ni e, thiltihtheihna chu kan nei ve alawm. Mahse keini thiltihtheihna te chu Iblis-a lakah chuan engmah a ni lo, min nuai sawm vek a nimai."

"KA awm alawm, keimah pawn ka pui dawn che alawm. NAngmah chauh nilovin, i chhungkua, i mite zawng zawng nen hian ka hruai chhuak vek ang che u."

Khuavang chu a ngawi ta vang vang a, "Anih leh engtia puih nge i duh?" tiin a zawt let ve ta a. Alice-i chuan beiseina tlem chu a nei ve ta, "HE ka tana lung in hi, heta tang hian ka chhuah phawt angai. Chumi tur chuan min pui rawh...ka thiltihtheihna awmchhun ka thla lah an dah bo daih bawk si." tiin a chhang a.

"I thla chu i mamawh tihna em ni?"

"Aw ka mamawh a ni...an dahna i hria em?"

"Aih hre lo, engmah kan hriat ve a thiang lo tiang lam hi chu."

"I zawng chawp thei reng alawm, zawng la.....hetah min rawn pe dawnnia, a rukin."

Khuavang chuan a hreh hmel kher mai, "Vanchung nula, engtia zawn tan tur nge ka hre lo. Mahse ka theihtawp ka lo chhuah dawn ania, engpawh chu nise tlemte tal chaw hi ei rawh." tiin chaw thleng chu a han hung hnai a. Chutih lai chuan Iblis chu a rawn kal leh ta thut mai a, Khuavang chuan hlauh hmel tak hian a lo en a.

Rum zet hian Iblis chuan Khuavang chu a rawn melh a, "Hetah enge i la din reng, i hna va thawk rawh." tiin a vin hrep mai. Hlau tak hian Khuavang chuan, "AWle, ka Lalpa." tiin a let nghal nal nal a. Iblis-a chuan Alice-i chu a han en leh a, a ban chu a vai zeuh va.

Chuveleh Alice-i an hlinna chain chu a rawn bo vek mai, "Mihring chuan chakna atan chaw in mamawh kha...chaw kha ei teuh rawh. Tunah chuan mihring i ni rih tih kha hria la, i chakna ber i thla pawh ka kutah him takin a awm e. Mahse luhlul i chhuah a, min beih let i tum a nih vaih chuan ka hal ral vek ang tih hria ang che." tiin Iblis chuan a han vau khur khur a, a kalsan ta a.

Chutia a kut hlin a nih tak loh avang chuan Alice-i chuan an khungna thir ban chu a han khawih chhin a, "Thir pangngai a ni lo, he thil hi....paradise gate ai pawha chak zawk a ni. Engtin nge a nih theih, eng ang chiah a chak nge maw a nih a, hetiang te a siamchhuah theih le?" tiin a rilru chuan a inbe mawlh mawlh mai.

Tihchhiat tumin kuai kau a han tum a, a chakna zawng zawng sawm khawmin a han kuai vak vak a. Mahse a thei lo mai nilovin chhete pawhin a kau eih lo, "Tihdan dang ka zawn angai a ni....ka chhuak ngei tur a ni." tiin a han inbe leh mawlh mawlh a. Rei fe a beih hnu pawh chuan chhuah ngaihna ngang a awm lo, a ril a lo tam ve tawh bawk si nen, chaw chu a ei ve ta nge nge a.

Tui lo a la ti em em zui, khawvela a awm laia BEna te pafa nena chaw an ei te chu a hrechhuak zawk zawk mai. A mitthla chuan an awmho lai te, vantirhkoh a nih zia a lantir laite leh an nuih dun laite chu a ngaihtuah chhuak a, a mittui a tla zawih zawih mai.

Chutih lai tak chuan Zeros-a bawk chu a rawn lang leh ta, "Kan vanchung nula chu...kha, i lo tha zel maw?" a rawn ti vel ham ham a. Rum zet hian Alice-i chuan a lo melh a, "Chhuah theih dan kawng a awm lo, Iblis-a lamah chuan tang ve mai rawh." Zeros-a bawk chuan a han ti leh a.

Mahse Alice-i chuan a chhang lo, a thil ei lai chu ngawi reng chuan a ei mial mial a. Zeros-a bawk chuan, "Enteh Lailah, kan lamah hian rawn tang mai rawh. Pu Vana khian nangmah a awm, Onoskelis anchhia kha a duhthu ngeiin a laksak lo che tih pawh i hria. A hmangaih lo che, hmangaih che sela chu Paradise-a i let leh rual rual khan a laksak ang che chu...han ngaihtuah teh, enge a lakah hian i la rinawm em em a?" tiin a han thlem vel a.

Mahse Alice-i chuan ala chhang chuang lo, "Kan lamah lo tang rawh, kei...nang... leh Iblis. Tuin nge min hneh thei ang? Min hneh theitu tur tumah an awm lo, lei leh vana chak ber leh thiltithei ber kan ni ang a, engkim hi kan ta a ni mai dawn alawm." tiin Zeros-a bawk chuan a han thlem leh a.

Alice-i chuan a thil ei lai chu a dah a, a ding chhuak a. Zeros-a lam chu ava pan a, "Engtin nge Hremhmun atang khan hetah i rawn awm daih theih? Engtin tak nge Iblis chuan a chhanchhuah che a?" tiin a zawt daih mai a, Zeros-a pawh chuan mak a ti angreng khawp mai.

"Engvangin nge i hriat duh a?"

"Ka zawhna chu chhang phawt la, tichuan ka thuthlukna chu ka hrilh ang che."

"Awle a tha e, nangmah ang chiah kha a nimai."

"Eng a? Enge awmzia? Engtia keimah ang chiahin maw?"

"Hremhmunah a rawn kal, Iblis hi. Nangmah a duh avangin Belzebula puihna a rawn dil phawt a, mahse BElzebula chuan a lo pui duh lo a ni. Tichuan hremhmun chu fankual a dil a, BElzebula pawhin a lo phalsak a. Tichuan a fankualna lamah kei min hmu ta a, tichuan kei hian pui turin ka lo tiam a, tichuan a thiltihtheihna hmangin helai hmunah hian min dah ta a ni."

Alice-i chu a han ngawi vang vang a, "Chupawh chu nise, enge nang hian Iblis chu i puihna? Amahin alawm alo kal, Paradise ah vantirhkoh anga inti danglamin min rawn man zawk a nih kha.." a lo ti a. Chu veleh Zeros-a chu a nui tiah tiah mai, "Vantirhkoh anga inchei, nangmah rawn la tu kha Iblis a nilo..keimah ka ni." a ti ta mai a.

Alice-i chuan mak a ti hle mai, "Eng a? Engtin nge a nih theih? Pu Vana meuh pawhin khatia PAradise a arawn lut ru thei kha mak a ti ania, nang vampire satliah mai mai hi i rawn lut thei amaw?" a ti hu mai a. "AW ni e...Iblis khan thiltihtheihna chak tak...khami chhung leka a hman tur kha min pe alawm." tiin Zeros-a chuan a chhang a, a kalsan ta daih a.

Alice-i chuan mak a ti kher mai a, "Anih chuan...anih chuan Iblis hi thiltithei tak a ni tih a chiang reng mai." a ti nuah nuah a. A thiltihtheihna in Zeros-a mai mai pawh Paradise ah a rawn tir chho thei chu ania, Iblis hian thiltihtheihna namen lo a nei tih chu a chiang ta reng mai.

*****************************

TO BE CONTINUE