SICHANGNEII : 2 (ALICE IN DEVILS' LAND) [MIZO FICTION SUPERNATURAL FANTASY STORY] Written by : Aaron Malsawmdawngzuala Chapter : 3

 SICHANGNEII : 2

(ALICE IN DEVILS' LAND)

[MIZO FICTION SUPERNATURAL FANTASY STORY]

Written by : Aaron Malsawmdawngzuala

Chapter : 3

****************************

Khuavangte chu an pûkah chuan an tawm kar hlawm a, an Lalpa ber chu a inngaihtuah nasa kher mai. Chutih lai chuan a nupui, Khuavang Lalnu chu a bulah chuan a rawn kal a. "Engthil nge i ngaihtuah a?" tiin a rawn zawt a.

Khuavang Lalpa chu a han thaw hak a, "Kha vanchung nula kha ka rilru ah a awm reng mai." tiin a chhang a. Khuavang Lalnu pawh chuan a lu bu nghauh2vin, "Ni e....enteh pa-a, Sichangneii diktak hi a ni mai lo mawle ani saw?" a han ti deuh hu a.

"Ni e, nu-i....i sawi takah chuan mizo ten Sichangneii, vanchung nula ti a an sawi kha ani ngei saw a nih ka ring." tiin a pasal chuan a lo chhang a. An han ngawih leh vang vang hnuah chuan, "Kan puihna a mamawh a ni...Sichangneii sawn kan puihna a mamawh a ni." Khuavang Lalpa bawk chuan a rawn ti chhuak hlawl mai.

Phawk hru hian a nupui chuan a en a, "I â em ni? Keini ve tehlul hian engtin nge Iblis-a kut ata kan chhanchhuah theih ang? Min phing darh vek dawn asin, a hlauhawm zia leh kan hneh loh zia chu heta min khungkhawm atang hian i hre chiang daih tawh zawk hial ang chu..." tiin a khak deuh hrep mai.

"Ka hria alawm, ni e....Iblis chu keini ang tan chuan hneh theih zia zang a ni lo. Mahse keini pawh heta tâng reng tur kan ni bik lo, chutiang bawkin Sichangneii pawh." Khuavang Lalpa chuan a han ti deuh charh charh a. Khuavang Lalnu erawh chuan a hrethiam lo kher mai, "Pa-a, engtak nge maw sawi i tum le?" tiin a han zawt leh deuh hu mai a.

"Sichangneii sawn min tanpui dawn alawm."

"Ani sawn maw?"

"Aw ni e....kan tangrual chuan engvangin nge kan tlanchhuah theih loh bik tehlul ang ni?"

"Ngawiteh pa-a, i â zo tawh em ni? Sichangneii saw ka khawngaih lo, chhanchhuah ka duh lo tih lampang a ni hauh lo. Mahse mi tâng ve tho a nih saw.....sawtiang khawpa mi thiltithei leh vantirhkoh ni bawk, Iblis-a'n a duh duh danin a sawp kawi thei ania. Engtin nge keini teh lul hian kan hneh theih ang...han ngaihtuah chiang teh."

"Anih heta tàn reng hi i duh em ni?"

"Duh bik love."

"Anih chuan engemaw tal kan tih ve chu a ngai dawn alawm, kumkhua a heta tan reng hi tuman an duh bik lo."

"Ka hria alawm, mahse pa-a...engtin nge kan tih vak chuan anga?"

Khuavang Lalpa chu a han ding deuh hluai a, "Nichin deuh lawk khan kan inbia a, kan tanpuina min dil a ni. A mamawh ber chu a thla kha a ni a, an dahthatna erawh ka hre lo. A zawna kan zawn chawp angai ang, a chakna leh a thiltihtheihna ber a nih thu a sawi a..." a han ti a.

Chutia a sawi lai chuan a nupui, Khuavang Lalnu chuan lo pawt chatin, "Ngawiteh....thil pakhat ka hrechhuak zawk mai. A vantirhkoh thla kha chu khawiah tak nge an thuhruk sak chu ka hre lo nangin, a ngunhnam kha chu pindan pakhatah khan ka hmu chiang a ni." a ti ta mai a. Khuavang Lalpa pawh chu a meng kawk mai, "Khawilaiah khan nge...khawi pindan berah?" a lo ti nghal vato a.

"Hmeichhia chauh kal an phalna ah khan a nia, nichin lawk khan ka hmu alawm." tiin Khuavang Lalnu chuan a lo chhang a. Khuavang Lalpa chu a phur nghal kher mai, "Nu-i, i ruk chhuah a ngai ang. Kha ngunhnam hmang tal kha chuan eng emaw tal chu kan ti thei ngei ngei ang, i lak ngei a ngai." a ti nghal deuh chung chung a.

Mahse Lalnu chuan a hreh hmel kher mai, "Min manchhuak ta se...ka chunga thil thleng tur hi a ngaihtuah pawh ka ngaihtuah ngam lo." tiin ruk chhuah hma hauh chuan a zam chhe nghal der mai. A pasal chuan a kutah a vawn sak a, "Nu-i, ka tiam a che. An manchhuah meuh che chuan helai hmun atanga hla takah kan awm tawh ang....nangin ngunhnam ilo buaipui anga, keiin a vantirhkoh thla ka lo zawng ve thung ang." tiin a fuih hram hram a.

Tap deuh pur chung chuan, "Um..ka hria e." tiin Khuavang Lalnu chuan a chhang a, a huphurh hmel takzet. Chutah Khuavang Lalpa bawk chuan, "Ramhuai ve tho kan ni a, thiltihtheihna tamtak kan nei ve tih kha hria la. Heng Iblis-a leh a sipaite ai hian kan chaklo a ni mai, mahse kan thiltihtheihna hman hun hi a awm ve ania. Ramhuai theuh theuh, kan theihtawp kan chhuah dawn alawm." tiin a han fuih leh a.

Chutih lai tak chuan Iblis-a sipaite zinga mi, ramhuai pakhat chu a lo kal a. Khuavang nupa chuan an hmuh veleh chuan an ngawi hmak mai, ramhuai chu Khuavang Lalpa hmaah chuan a rawn ding a. Rum zet hian a en a, "Sichangneii chaw ei thleng saw va seng rawh le..." a han ti khur khur a. "Awle ka pu." tiin rang takin Khuavang Lalpa chu a kal nghal vat a. Ramhuai bawk chuan, "Midang ho pawh kha in hna va thawk leh tawh rawh u...rang tak khan che rawh u." tiin a han vin leh thak thak a, an kal darh ta hlawm a.

*********

Paradise-a awm Vantirhkoh ho pawh thlamuang takin an awm thei mawlh lo, an unaunu Laila-i chu an ngaihtuah em em mai a. Chutah an pasaltha tirh chhuah pali, Raphael, Uriel, Malakai leh Raziel te lah chu an la reh hmak mai bawk si. Pu Vana meuh pawh Paradise chhuahsan a, a fanu Laila chu zawn mai a tum rum rum tawh. Vantirhkohte zinga a mangang ber leh Laila-i ngaihtuah bertu chu Vantirhkoh Seraphina, Pu Vana hnuai chiah a awm kha a ni.

Lal In tual zawlah chuan a tei kual a tei kual ringawt mai a, a awm hle hle thei lo a ni ber mai. Vantirhkoh dangte pawh an rilru chu hah ve viau mahse, Seraphina chu a mangang fâl lutuk tlat. Paradise Lal In sira tui hawk luanna bul ah chuan a han thlawk thla vang vang a, "Ka awm hle hle thei tawh lo ....ka kal angai, ka kal ve mai a ngai ang." tiin a phun sap a. Mahse Pu Vana thu lova Paradise lo chhuahsan ve ringawt chu Paradise dan kalh a ni bawk si, Pu Vana hnenah dil ta se a phal dawn lo chiang em em mai bawk si a, a rileu chu a insual buai nasa kher mai.

A hawi kual deuh zuk zuk a, a tawp a tawpah chuan Paradise pawn lamah a thlawk chhuak ta daih mai, Pu Vana thu ni miah lo chuan Paradise chu a chhuahsan ta. Van chungzawl, khawvel pawn mai nilo, van hmun sâng takah chuan a thlawk kual a thlawk kual a. Khawvel hrang hrang a fankual a ngai tih pawh a hria, mahse bul han tanna mai tur erawh a hre mai hrih lo. Chutia a thlawh kual lai chuan a hnunglam atang chuan engemaw hian a rawn man thut mai a, eng thil chiah nge a nih a hre bik lo. Tal chhuah tumin an inbei chiam a, mahse Seraphina chuan a hneh ta tlat lo mai le.

Chu chu tudang nilovin, Hremhmun ramhuai hotute zinga mi Belial-a a ni. Seraphina chu a rek bet a, hremhmun lamah a thlawk luh pui ta daih mai le. Hremhmun kawngka chu amah in a lo inhawng a, Seraphina chuan tih theih reng a nei lo. Gate chhungah chuan a thlawk luh pui a, tlang kang sen ruam sang tak maiah chuan a thlawh chhoh pui leh vang vang mai. Tlang chhipah chuan thutthleng lian tak mai, zum fer fur, sen vek mai hi a lo awm a. A sir veve ah chuan ramhuai lian tak tak hi an lo awm teuh mai a, chu lalthutthleng niawm takah chuan Belzebula a lo thu bawk.

Belial-a chuan Seraphina chu a thlak thla thut a, Belzebula hma takah chuan a tla thum dawt mai. Rang takin a dingchhuak nghal a, a bulah chuan Belial-a pawh a rawn t(r)um ve nghal chat bawk. A chet hma hma chuan Belzebula chuan thu chung reng si chuan a ban chu Seraphina-i lamah chuan a lek kang a, chu veleh thutthleng hnung lam atang chuan hrui hrawl zel mai, kang sen hluah hluah mai chu a rawn chhuak a, hrui chu amahin a che vek a ni.

A vantirhkoh thla nen lam chuan hruai chuan Seraphina chu nghet tak hian a phuar hlawm a, "Nilo...min chhuah hram teh u...Belzebul, hna tam tak ka la nei ania." tiin a rak nghal chul mai a. Belzebula chuan rum tak hian a en a, "Hrehmun rûn tura lo thlawk kual em ni i nih?" a han ti khur khur mai a. A chhan hma hma chuan Belial-a chu rawn tawngchhuakin, "Unaupa, he vantirhkoh hi Pu Vana hnuai chiah a awm, i dinhmun luahlantu kha a nih hi. A hming chu Seraphina a ni, Vantirhkoh Seraphina." a lo ti zuah zuah mai.

Belial-a pawh hi Vantirhkoh ni ve thin, Pu Vana sipaite zinga mi a ni ve thin a, a dinhmun pawh a sang thawkhat thin hle. Pu Vana'n a hrem te zingah, Paradise atanga a hnawhchhuahte zingah khan a tel ve a. Hremhmunah pawh hian a thuneitu pawl a ni. Belzebula chuan Seraphina chu a han en vang vang a, "Ka hria che alawm, paradise-a kan awm ve lai kha chuan vantirhkoh naupang tak ila ni. Tunah chuan i dinhmun pawh a lo sang ta khawp mai, engvanga Paradise atanga rawn chhuak nge i nih han sawi teh le." a han ti leh khur khur a.

Seraphina chuan a chil a han lem dawk a, "Laila...ka unaunu Laila ka zawng a ni." tiin a chhang a. Chuveleh a bula lei chu zau tak hian a rawn khi thawt thawt a, lei khi kar atang chuan ramhuai lian em em mai hi a rawn vak chhuak ta mai a nih chu. Vantirhkoh thla ang chiah a la nei ve zui, mahse a dum vek thung. Chu chu tudang nilovin Lailah-i hmelma hlui, Hremhmun lalfanu ti a an sawi thin, Onoskelis ngei kha a ni. Thinrim tak hian Seraphina chu a rawm melh ta khur mai a, "Laila maw? Khanu kha khawnge a awm?" tiin a rawn thinrim  kher mai. 

"Onoskelis insum rawh." tiin Belzebula chuan a lo khap vat a. Seraphina chuan Onoskelis chu a han en deuh vang vang a, "O....Onoskelis.." a ti bah nuai mai. Rapthlak tak hian Onoskelis chu a nui huah huah a, "Ni e, Unaunu....Onoskelis ngei kha ka ni e." tiin a thlawh hual pup pup mai. Chutah Belzebula bawk chuan, "Khawiah nge tunah Lailah chu a awm?" tiin Seraphina chu a han zawt leh a.

Seraphina chuan a chil lem dawkin, "Devils Land ah .....Iblis-a bulah." tiin a chhang a. Iblis-a hming a hriat rual rual chuan Belzebula chu a Lal thutthleng atang chuan a rawn ding chhuak nghal a, "Iblis a? Kha ramhuai kha.....ka mi tâng pakhat Zeros-a a rawn ru chhuak asin." tiin a thinrim hmel hle mai. Seraphina pawh chuan mak tih hmel tak hian, "Iblis chu i hre ve maw?" a lo ti hu mai. Mahse Belzebula chuan a chhang lo, "Seraphina hi kan mamawh lo, kal tir leh nghal rawh u." tiin Belial-a te bulah chuan a hrilh ta daih mai. Mahse tumah chuan an hnial ngam lo, Seraphina pawh chu an kal tir ve ta mai bawk a.

A kal hnu lawk chuan lungawilo tak hian Onoskelis chuan, "Unaupa, engvangin nge i kal tir? Ani kha kan hmelma lian ber te zinga mi a ni asin, chubakah Lailah kha....ka hmelma lian ber a ni. A lakah ka tlawm a, phuba lak ngei ka duh ania." tiin a phun nasa mai. Belzebula chu a khi suk a, "I hmelma lian ber Lailah-i chu tunah Iblis-a kutah a awm. Chuan tun hun atana ka hmelma chu amah, Iblis ngei chu a ni." a han ti chang fak fak a. Belial-a chu rawn inrawlhin, "Anih chuan eng ber nge kan tih dawn a, engtia hmalak nge i tum?" tiin a lo zawt ve bawk. Belzebula chuan Onoskelis chu a han en a, "Laila-i i hneh loh chhan kha chu Pu Vana kawrkilh thiltihtheihna a hman vang chauh a ni a, chuvang chuan hmelmate bei tur hian ka ring tawk takzet che a ni." a han ti tete a.

Tichuan midang chu a enkual leh a, "In vai hian, helai hmuna awm lo ka sipai dang zawng zawng te pawh ka ring tawk vek che u. Chuvang chuan kei kher hi Devils Land-a ka kal a ngai lo, kan unau zinga pakhat lek pawh hi kal se Zeros-a chu a rawn hruai let leh thei nghal tih ka hria." a han ti leh deuh charh charh a. Chu veleh Onoskelis chuan, "Unaupa, keimah ka kal duh. Min tir rawh, ka ti hlawhchham nawn leh tawh hauh lovang che." a lo ti nghal vat a. Mahse Belial-a chuan, "Nilove....keimah ka kal ve thung tawh zawk ange." a lo ti ve bawk. Belzebula chuan a lu thingin, "Nilove....in kal lo ve ve ang. Nangmahni ai awh theitu tur midang an awm alawm...." tiin chunglam chu a hawi chho va, "ASMODEUS." ring zet chuan a han ti vak a.

Chutah an chung zawn chhum dum reih ruih kar atang chuan ramhuai lian em em mai, hmel rapawm tak mai hi a rawn thlawk thla thuak mai. A rawn t(r)um nghing luih mai a, "Ka inpeih e, Unaupa." tiin a rawn ding kang ta ur ur mai. Belzebula chuan chhuan hmel tak hian a han en a, "Zeros-a rawn hruai kir ringawt kha ka duhtawk lo ania, Iblis-a lu rawn hawn tel ngei ang che." tiin a chah a. Chu ramhuai hming chu Asmodeous a ni a, Pu Vana vantirhkohte zinga tel ve thin, Hremhmun lama paih thlakte zinga mi ve tho, Belzebulate unau zinga mi ve tho a ni.

Asmodeus chuan a lu a han bu deuh nghauh nghauh va, "Awle, Unaupa..." tiin a chhang a. Van lam chu hawi chhovin a thlawk bo leh ta daih mai, "A thu hrimin, Asmodeus khan Devils Land awmna pawh a hre dawn bik em ni?" Belial-a chuan a lo ti deuh bul bul a. "Hre lo, keipawn ka hre lo. Mahse a zawng mai dawn alawm, ka ring tawk alawm." tiin Belzebula chuan a lo chhang a. "Anih leh Seraphina kha engvanga kaltir nge i nih? Asmodeus nen chuan Devils Land ah an inhmu khawm leh tho awm si a, kan hmelma tho ania, indona lian tham tak thleng thei a ni asin." Belial-a bawk chuan a han ti leh a. Onoskelis pawh chuan, "Laila pawh kha....kei hi min tir la chu ka that ve ve ang. Iblis-a lu mai nilovin Laila-i lu nen lam ka rawn hawn ang mawle." tiin a lo inhrosa nasa kher mai.

Muangchanga a lalthutthlenga thut pah chuan, "Anni kha kan buaina tur a ni lo, Iblis ber hi a ni. Tin Zeros-a pawh kan mi tâng lai mek a ni a, kan hruai kir leh ngei tur a ni. Chumi thawk tur chuan kan unaupa Asmodeous ka tir tawh, a bak chu tul ka tih hunah ka sawi leh mai ang." a ti deuh tlat mai. Belial-a leh Onoskelis te pawh chu an kal sawn ta daih a, Belzebula erawh a ngaihtuahnaah chuan thil tha tak a awm a ni toh hriat tak hian a thu nui deuh var var mai.

********

Khuavang Lalpa chu Alice-i an dahna lung in lam pan chuan ava kal leh a, a chaw ei thleng ruak chu a va seng sak a. Alice-i chu a lo thu ngui bur mai, Kuavang Lalpa pawh chu a mit sir hian a lo melh peih t(r)awk a, hmundang a hawisan leh nghal daih a. Khuavang Lalpa chuan inthlahrung tak hian, "Sichangnei, i ngunhnam kha an dahthatna ka hria a ni." a han ti chu Alice-i pawh a rawn meng phawk hru mai. A rawn ding chhuak a, "Engmaw? Khawiah nge a awm, khawnge an dah?" a ti nghal chul mai. Khuavang chuan bengchheg lo tur chuan zaizirin a han hrilh a, "Kan nu in min hrilh a, mahse an dahna roomah chuan hmeichhia chauh luh an phal a ni." tiin a chhang a.

Mak ti tak hian Alice-i chuan, "Eng a? Hmeichhia chiah kal phalna te a awm ve thlap a maw? Heng ramhuai ho hi a pa(male) vek amaw ka lo ti asin..." a han ti deuh hu mai a. "Nilo ve, helai hmuna awm a chanve deuhthaw hi hmeichhia alawm an nih." tiin Khuavang Lalpa chuan a chhang a. Alice-i chu a han ngawi deuh vang vang a, "Anih leh helai hmun, Ramhuaite chenna thliarkar ah hian hmeichhia ah tunge thu ber?" tiin a han zawt leh a. Khuavang Lalpa chu a han hawi kual zeuh zeuh phawt a, "A hming chu Lilith a nia, Iblis-a nupui a ni." a ti ta mai a. Alice-i chuan mak a ti kher mai, "Nu...nupui a nei maw? Iblis-a'n nupui  a nei maw?" a ti hu mai. "Aw nei e....Lilith hi ramhuai Lalnu tih a hriat a ni thin a, mahse a chanchin ka hre ve em em lo." tiin Khuavang Lalpa chuan a lo chhang leh a.

Alice-i chu a ngawi vang vang a, "Anih ka ngunhnam chu engtin nge min laksak theih ang?" tiin a han zawt leh a. Khuavang chu a han inngaihtuah vang vang a, "Kan nu chu ka hrilh tawh a, theih tawp chu a rawn chuah ve ngei chuan ka ring. A thu hrimin, i ngunhnam chu laksak thei ta che ila helai hmun atanga chhuah theihna turin ka pui thei che angem?" tiin a han zawt leh phawt a. Alice-i chuan a lu chu a han bu nghauh nghauh va, "He tan in atang hi chuan min la chhuak lo anga, a chhan chu ka vantirhkoh thla kha ka mamawh ber zawk chu ania. Mahse ngunhnam chu ka kawl a nih phawt chuan, kawng tam takah min pui thei dawn a ni." tiin a chhang a.

Chuveleh phur tak hian Khuavang Lalpa chuan, "A nih chuan kan nu chu ka lo hrilh tha leh ange, chuan i thla pawh chu ruk chhuah dan ka lo ngaihtuah ang." a han ti chu Alice-i pawh a lawm ngei mai. Chutah Khuavang Lalpa bawk chuan, "I hriat tur chu....keini ang Khuavang te hi chu kan thiltihtheihna a tlemin a beitham em em a, heng ramhuai ho lakah hi chuan nep tak kan ni. Mahse heng ramhuai hote zinga a tam zawk, a thunei ho hi chu Jinn ti a hriat an ni a, mihring anchhe lawhtute ber an ni. Mihringah hian an thiltihtheihna an tilang hlur ringawt a, tunah hian chhuah zalen thei ngat che ila chu....i lakah chuan nep tak an ni ang. A pawimawh ber chu helai tan in atanga i chhuah hi a ni, chutiang tur chuan theih tawp chhuahin keini Khuavang ho hian kan pui ve ngei ang che." a han ti leh a.

Chutih lai chuan pen thawm an hria a, thawm lo chhuahna lam chu Khuavang chuan a va en vat a. A hlauh hmel kher mai, "A lo kal....a lo kal...ka kal vat angai." a han ti khur dar dar a. "Tumaw lo kal?" tiin Alice-i chuan a lo zawt vat a. Khuavang chuan kal sawn pah hian, "Lilith....a thin ti rim suh ang che." tiin a kal bo daih mai. Alice-i chu a hrilhhai angreng hle a, chutih lai chuan Lilith pawh chu a rawn thleng ve nghal. A hmel chu a tha in a pian pawh a nalh em em a, thawmhnaw dum lam vek a inbel bawk. Alice-i chu hmuhsit hmel tak hian a han thlek deuh vang vang a, "Nang hi maw Iblis-a duh em em chu....engvak i va nih hmel silo ve..." tiin a han  nuih vel a. Alice chuan thinrim tak hian, "Ka nep nge nep lo chu kan en chhin dawn em ni? Min chhuah la, inbei ang hmiang." tiin a lo chho ve nasa mai.

Lilith chu a nui huah huah a, "Nang ang mai mai beih nan hian ka hun ka khawhral phal lo, tih tur dang, hna dang ka ngah lutuk, Bawihi." tih pah chuan a kut chu a han lek kang a, a vai zeuh va. Chu veleh Alice-i ban lehlam lehlam chu amahin, chain bawk chuan a rawn inhling leh ta mai a nih chu. Chutah Lilith bawk chuan, "Kan planet hi ka chhuahsan rih a ngai dawn a, khawvel lamah....mihringte chenna khawvel lamah ka kal a ngai a ni. Chutah chuan hna tamtak thawh tur ka la  nei, chuvang ania ka rawn tlawh ve hrim hrim che ni. An sawi ang ngeiin ilo hmeltha kher mai, ka kal phawt ange." tiin Lilith chuan a kalsan daih mai a, rum zet hian Alice-i chuan a en zui vawng vawng ringawt mai a ni.

********

Khawvel hrang hrang, planet hrang hrang leh van hmun hrang hrang a fang kual hrep hnuah chuan Devils Land ngei mai chu Seraphina chuan a thleng ta a, mahse gate pawnah a la awm rih a. Chhum a zing chuai chuai mai a, thingkung kang bang, bung rem rum chu sang tam tak a awm bawk a, ram hal zawh hlim ni awm tak hian a boruak chu a hrisel lovin a khu rum rum hi a ni ber mai. Seraphina chu a hawi kual a, "Helai hmun hi a ni thei mai angem le?" a han ti nuah nuah a. Chutih lai tak chuan thawm a hria a, chhum zing ruai ruai kar atang chuan palian tak mai hi a rawn tlan phei thut a, Seraphina inrin hma hma chuan a rawn zuan thut mai. Chu palian chuan Seraphina chu a rek a, a paih leng ta dawr mai a.

Chupa chu tudang nilovin Laila-i zawng tu zinga mi ve tho, Indona Pathian, Lal Caesar-a kha a ni. Thinrim tak hian Seraphina chu a rawn tho chhuak a, rum zet hian Caesar-a chu a en a. Caesar-a chuan a ngunhnam chu a la chhuak a, a tin ran mai. Chutah le... Seraphina chu boruakah a thlawk kang a, a thla chu a rawn ti parh ta. Chumai ala ni lo, vantirhkoh dangte angin thla pahnih chauh a nei ve hauh lo. A thla a han kap parh ve chu thla paruk lai a lo nei a, a mit pawh a var pup mai. Mahse Caesar-a chuan a hlau hauh lo, chutah Seraphina chuan a kut chu a han vaivir vak vak a. Mak tak maiin mei alh hlawm lian tak mai hi a siam chhuak a, chu mei alh hlawm chuan Caesar-a chu a zu vawm ta.

A ngunhnam chuan mei alh chu a lo sat a, a laiah tak a sat bung a. A bul vel chu a alh ta hluah hluah mai, mahse a force a nat em avang chuan amah Caesar-a chu a thal tawp mai a, rang em em hian a rawn tho chhuak lehnghal vat a. A thinrim ngang mai, "Nang ramhuai mai mai chuh, i chak dawn lo khawp." tiin a ngunhnam chu a hum ruh sauh sauh va. Mahse chutih lai chuan vantirhkoh pali hi an bulah chuan an rawn t(r)um a, anni chu tudang mah nilovin Raphael, Raziel, Malakai leh Uriel te kha an ni. Caesar-a leh Seraphina te inkarah chuan an rawn ding thap a, "Caesar, duhtawk rawh. Hei hi kan unaunu, Seraphina a nih hi." Malakai chuan a han ti a. Caesar-a pawh chuan a ngunhnam chu a dahthla nghal a, Seraphina pawh chu a t(r)um ve nghal a, a thla pawh chu a khup ve vat bawk.

Raphael chuan a han en deuh hu a, "Seraphina, hetah enge i rawn tih?" tiin a zawt a. Seraphina chuan inthiamloh hmel tak hian, "Raphael, Laila-i ka ngaihtuah em a, ka lo kal a ni." tiin a chhang a. "Mahse, Pu Vana'n i kal ve a pha loh kha. I dil em ni....a phalna i la em?" tiin Malakai chuan a lo zawt ve bawk a. Seraphina chu a kun deuh ngal a, "Aih ....a rukin ka lo kal." a ti zawi sap mai. A unaute pali chuan mak ti tak hian an en thap a, "Unaunu Seraphina, dan i bawhchhe der ania. Engtin nge i theih zawk, Pu Vana thinurna i hmachhawn ngam dawn em ni?" tiin pawi tih hmel tak hian Raziel chuan a zawt a. Mahse Raphael chu lo inrawlh vatin, "Chutiang sawi a hun hrih lo, kan hna hi kan zawh fel vat angai. Hei tunah Devils Land chu kan thleng tawh a, min pui tu tur pakhat kan tawng leh tihna a nimai a, a lawmawm lamah i ngai phawt mai teh ang u." a han ti a.

Caesar-a pawh chuan, "Ni e ...tunah chuan kan hmelma ber chu Iblis a ni. Tunah gate pawnah kan awm a, a chhunglamah kan luh vat angai." a lo ti ve bawk a. "Gate vengtu an awm dawn tih kha chiang phawt ula, eng ang thiltihtheihna nge helai ramhuai ho hian an neih kan hre lo. Chuvang chuan inring tawk taka kan awm angai ania, kan theihtawp a kan beih a ngai bawk ang." Uriel chuan a lo ti ve bawk. "Ni e, kan unaunu Laila tan....van indona aia rapthlak pawh ni se, he indonaah hian a chak zawk kan ni ngei tur a ni." Raphael chuan a han ti leh a. Tichuan an paruk chuan Devils Land gate lam chu an en thap a, Laila-i chhanchhuak tur chuan gate lam chu an pan phei ta tham tham hlawm a.

An kal hnu deuhvah chuan ramhuai lian tak mai pakhat hi a rawn t(r)um ve nghal a, chu chu Belzebula tirh, hremhmun lalfapate unau zing ami, Asmodeous kha a ni. A han hawikual a, "Hei hi a ni maw Devils Land chu...." tiin a han phun zawi deuh sap a. Gate lam pan chuan a va phei ve nghal a, a thla lian tak mai chu a zap hluau hluau pah bawk.

*******

Khuavang Lalnu chuan pindan chu ava thleng ta a, Alice-i ngunhnam an dahthatna pindan ngei mai kha a ni. Ngunhnam chu a en vang vang a, a bul takah chuan ramhuai pakhat hian a thutchilh ran mai bawk si. Chu ramhuai chu a muthlu lawp lawp leh ta nghal a, chu tluka hun remchang chu a awm mai mai tawh dawn lo tih chu hre ve reng mahse a huphurh takzet a ni. Fimkhur leh zawi muang chuan ava pan phei a, a vengtu ramhuai lah chu a hnar ring em em mai bawk. Ngunhnam chu fimkhur tak chuan a han chawi kang a, thawm tlem a nei tlat mai. Vengtu ramhuai muhil chu a rawn che deuh hrut a, Khuavang Lalnu pawh chu a tawp nghal chat. Mahse ramhuai chu a harh lo hlauh mai, tichuan ngunhnam chu Khuavang Lalnu chuan a la kang ta a.

Lehlam a hawi chiah chu ramhuai muhil chu a rawn harh ta thut mai le, "Nang kha ...enge kha kha i lak ngawt a?" a rawn ri thum ta chhur chhur mai. Khuavang Lalnu pawh chu a ding chat a, a hawilet nghal. Ramhuai chuan thinrim tak hian a en a, "I va han chak dawn lo rua em, ruk chhuah i lo tum amaw?" tiin a vin khur khur a. Chutah Khuavang Lalnu chuan a thiltihtheihna a hmang ve ta, ramhuai mitah chuan a en vang vang a. Chutah ramhuai chu a ni deuh nghulh mai a, a muhil leh ta daih mai. Khuavang Lalnu pawh chu a thaw huai a, ngunhnam keng chung chuan pindan chu a chhuahsan ta a ni. A chhuah rual chiah chuan ramhuai chu a rawn harh leh lawi a, ngunhnam a lo awm ta miah lo mai chu mak a tiin a hlauhthawng nghal kher mai.

Rang takin a tho va, "Khawnge....tunge la ang? Eng vanga awmlo nge...enge awmzia?" a ti nghal vak vak a. Khuavang Lalnu khan a lo dawi hman ni ngei tur a ni, nichin lawk a thil thleng te kha a theihnghilh nghal vek mai. A mangang em em a, "Nilo ...ka tih bo a ni lo. Mahse a vengtu ka ni si, Iblis-a'n a hriat vaih chuan min that ngei ngei ang. Ka zawn a ngai, a bo tur a ni lo." tiin a mah leh amah chu a inbe vak vak a, he ramhuai hi ramhuai nu(female) a ni. Chutih lai chuan Khuavang Lalnu chu Alice-i tan na lam pan chuan ngunhnam keng chung chuan a tlan phei nghal nal nal a, reiloteah chuan a va thleng ta a. Alice-i muhil pawh a lo harh zawk mai, a kut erawh chain a hlin reng ala ni thung.

Khuavang Lalnu in a ngunhnam a lo keng reng a hmuh chuan a hrethiam nghal mai, kha Khuavang Lalpa nupui kha a ni tih a hria a, a ngunhnam chu a rawn ruk chhuah sak a ni tih a hrethiam nghal bawk. Engmah sawi lo chuan ngunhnam chu Khuavang Lalnu chuan a rawlh lut a, a kal lehnghal nal nal. Mahse Alice-i chuan ngunhnam chu a ban mai thei lo, a kut chu chain a hlin beh tlat a la ni si. A han maimitchhing vang vang a, tichuan a rawn meng leh a. A ngunhnam chu a han en vang vang a, ngunhnam chu a mahin a rawn che ta. Boruakah chuan a rawn kang a, an hlinna chain chu a sat chhum hmawk mai. Alice-i chuan ngunhnam chu a la nghal a, a theih patawp chuan a hungna thir chu a han sat leh pawp mai a.

A bung rum mai, Alice-i chu a chhuak thei ta. A thinrim a ni tih hriat tak hian a meng sen rum mai a, a ngunhnam chu nghet tak hian a hum a. A thaw deuh halh halh a, "Iblis....khawiah nge i awm? Ka that dawn che, ka that khawp ang che." tiin a phun sap mai. Phuba lak chu a inring ren rawn tawh khawp mai, ramhuai ho bengchheng nuai nuai awmna lam chu a pan phei ta a.

*******

TO BE CONTINUE