SICHANGNEII : 2 (ALICE IN DEVILS' LAND) [MIZO FICTION SUPERNATURAL FANTASY STORY] Written by : Aaron Malsawmdawngzuala Chapter : 4

SICHANGNEII : 2

(ALICE IN DEVILS' LAND)

[MIZO FICTION SUPERNATURAL FANTASY STORY]

Written by : Aaron Malsawmdawngzuala

Chapter : 4

***********************************

Gate bul chu vantirhkoh Seraphina, Raphael, Raziel, Uriel, Malakai leh Lal Caesar-a te chuan an va thleng ta, gate bulah chuan ramhuai lian em em mai, tam tak hi an lo awm a. An thawm an lo hriat veleh chuan rang takin an ding nghal thup hlawm a, Seraphina te lam chu an va hawi ta thap mai.

An zinga lian ber chu a lo pen hnai a, "Tute nge i nih?" tiin a han vin deuh thak a. Seraphina chu pen chhuak ve in, "Hei bak hi ka sawi nawn dawn lo ania, kan unaunu Vantirhkoh Laila-i khawnge a awm? Amah chhanchhuak turin kan lo kal, tha te te a kan sawi lai hian tunah min rawn pe mai rawh u." a han ti chang deuh fak a.

Caesar-a pawh chu lo tawng chhuak ve in, "Buaina kan duh lo, mahse kan kawng in dal a nih vaih chuan indona lian tham tak tunah hian, helai hmun ngei ah hian a chhuak ang." a lo ti ve khur khur bawk. Chutah ramhuai ho chu rapthlak tak mai hian an nui ta vak vak hlawm mai a, "Khawngaihin....khawngaih takin tih in sawi tel lo tlat mai." an zinga lian ber bawk chuan a rawn ti leh a.

Caesar-a thinrim insum zo lo chuan a ngunhnam chu a phawrh chhuak thut a, va zuang phei vakin chu ramhuai lu chu a chhawk bung ta hmawk mai. Chu veleh ramhuai dang ho chuan Caesar-a chu an rawn bei ve nghal a, mahse a lo sat phel phawk phawk hlawm mai.

Vantirhkoh dangte pawh chuan Caesar-a chu an lo pui ve bawk a, chung ramhuai 10 rual vel zet mai chu minute khat pawh tling lovah an that fai nghal ta vek mai a, tichuan gate chhung chu an lut thei ta hlauh mai, "Hei hi DEvil's Land ngei chu a nih hi, indona ropui tak a chhuak ngei dawn e." tiin Caesar-a chu a han khi deuh suk a.

********************************

Khuavang Lalnu chu an puk lam pan chuan a kal phei a, chutih lai chuan hnunglam atang chuan thawm a hria a. A han hawilet chu kha ramhuainu, a dawi nu, Alice-i ngunhnam lo vengtu nu kha a lo ni. Thinrim hmel tak hian, "Lo ding teh nang Khuavang kha.." a rawn ti khur khur mai a.

Khuavang Lalnu pawh chu a hlauthawng angreng kher mai, "Enge ni, ka pi?" tiin khur dar dar chung chuan a lo chhawn vat a. Ramhuainu chuan a rawn pan phei a, "Nang hian min dawi chiang mai, pindan chhungah khan i rawn lut tiraw?" tiin a han zawt leh khur khur a.

Khuavang Lalnu chuan a chil a han lem dawk a, "Khaw..khawi pindan maw?" a ti bah deuh nuai mai. Ramhuainu thinrim chu a mit a sen vek tawh, "Ngunhnam kan dahthatna, vantirhkoh ngunhnam kha, hre lo der reng reng suh.....i rawn ru chhuak a ni lawm  ni?" tiin a vin leh hrep mai.

Hlauh avanga khur dar dar chung chuan, "Nilo..kha pindan ah kha chuan ka lut ve ngam lo hrim hrim alawm, kan luh ve pawh a thiang hleinem." a han ti dek dek chu vin zet hian ramhuainu chuan, "Chungte chu ka hre ve bawk, min hrilh ka ngai lo. Mahse nichin lawk kha ania, tinge a bo dan zawng zawng pawh engmah ka hriat loh? Nang hian min dawi ve khanglang em ni....khawiah nge ngunhnam chu i dahthat sawi rawh..." tiin a vau ta khur khur mai a.

Khuavang Lalnu chuan a hlau kher mai, "Ka..ka pi..ka ti tak tak, ka la lo." a han ti zawi sap a, a hlauh em avang chuan a mittui chu a tla thei hial bawk. Chutah ramhuainu chuan a ki(horn) chu a chhip atang chuan a rawn ti chhuak a, "Min hrilh dawn nge, ka that dawn che?" a ti ta chhur chhur mai.

Khuavang Lalnu chuan a hlau takzet, "Ka pi...ka la lo, khawnge a awm ka hre lo. Engtin mah min ti lo hram rawh, ka fate, ka unaute hi ka kalsan thei lo, min la mamawh asin. Min that suh, engmah ka hre lo tak tak." tiin a ngen lawm lawm a. MAhse ramhuainu chuan a panhnai zel a, khawih tumin a ban chu a rawn lek kang ta mai a.

Chuveleh a hnute kar atang chuan ngunhnam hriam tak, a hmawr zum em em mai chu a rawn lawr zawk mai. A ding chat a, thawm nei miah lo chuan a ngawi nghal hmak. Khuavang Lalnu ber pawh chuan a hrethiam lo, a phu nasa kher mai. Chutah ramhuainu chu zawimuang hian a zal riai riai a, meivap ah changin a khu ral ta vek mai.

Amah chhantu chu Khuavang Lalnu chuan a han enchiang a, tudang nilovin ngunhnam neitu, Vantirhkoh Laila-i, Alice-i ngei mah kha a lo ni. Khauvang Lalnu chu a lawm ngang mai, "Ka lawm e, Vanchung nula..ka nunna i chhan avangin ka lawm e." a lo ti deuh nghal chiam chiam a.

Rang takin Khuavang Lalnu chu Alice-i chuan a kai a, "Khawiah nge in puk a awm?" tiin a zawt a. "Saw lai lawk saw a ni tawh, ngatinge min zawh?" tiin Khuavang Lalnu chuan a lo zawt let ve a. Tlan pui pah chuan, "Ka hruai chhuak dawn che u, helai hmun atang hian ka hovin in chhuak vek ang." tiin Alice-i chuan a chhang a.

Mahse Khuavang Lalnu chu a ding ta daih mai, "Ngatinge? Tinge i la din khawmuan a?" tiin hrethiam lo tak chuan Alice-i chuan a zawt hu mai a. Hlauh hmel tak hian Khuavang Lalnu chuan, "Kan puk bulah hian engtik lai pawhin jinn ramhuaiten min veng a ni." tiin a chhang a.

Alice-i chu a thaw hak a, "Hlau suh, ka awm alawm. Keimah ka chhanchhuak dawn che u alawm, min ring rawh. Vanchung nula Sichangneii ka nih hi, him dam takin ka hruai chhuak vek ang che u tih ka tiam e." a han tih takah chuan Khuavang Lalnu pawh chu a ngaih a ngam ve deuh ta, an puk lam pan chuan an tlan dun leh ta a.

*****************************

Devil's Land gate vengtu ramhuaite chu reiloteah chuan an rawn tho leh tham tham hlawm a, an taksa bung nei nuai mai te pawh chu a rawn inzawmkhawm leh vek a. An boss deuh ber chuan thinrim tak hian, "Hun khawralna chi a ni tawh lo, vantirhkoh khati zat kha kan ramchhungah an rawn lut a, engkim a buai vek dawn. Rang taka kan Lalpa, Iblis hnenah kan hriat tir angai." a han ti chhur chhur a.

Chutia kal an tum lai chuan gate pawn atang chuan thawm an hre leh ta, thil rit tak rawn tla thla ri bur ang mai hian an awmna lei chu a rawn nghing dawt mai. Ramhuaiho chu an ding nghal thap a, gate lam chu an va melh thap hlawm a. Mu(eagle) lian tak mai ina a thla a zap ri hlup hlup ang mai hian thla zap ri an hria a, mahse chhum a zin nasa em avang chuan chu thil chu eng tak nge a nih an la hmu chiang thei mai lo.

Pen ri an hriat chhunzawm nghal bawk a, "Inring ru...hmelma dang an ni ngei ang." tiin ramhuai boss ber chuan a naute chu inring turin a han chah nghal bawk a. In ralring reng chuan thawm chu an ngaichang thap a, pen ri chu a rawn hnai zel a. Chutah chhum zing kar atang chuan mihring pianzia ni si, lian em em mai leh bak thla ang tak nei hi an va hmu a, amah chu a la alh deuh hluah hluah lenghal.

A rawn hnai zel a, a lian tulh tulh mai. A rawn thlen hnai zel a, a rawn lang chiang tulh tulh bawk. Mei alh pawh chu a kal pah chuan a rawn mit ve tial tial zel bawk a, an bul hnai a rawn thlen meuh chuan meialh chu a mit vek tawh. Chu chu ramhuai ve tho niin, tudang nilovin Asmodeus kha a ni.

Hreipui ni awm tak, lian em em mai leh hriam hmel em em mai hi a keng a. Rang takin ramhuai ho chuan gate chu an kalh tha nghal a, Asmodeus chuan a rawn pan zel a. Gate zawnah tak chuan a ding a, "Tunge i nih? Enge hetah i rawn tih dawn?" tiin ramhuai boss ber chuan a lo zawt a.

Asmodeus chuan a hmanraw ken lai, INFERNO MACE tia a hming a vuah chu a han lek kang a. Mace chu kan hriatthiam dan tur chuan indona a sipaite hman thin, talhtum a hmawra hling emaw, hrepui anga thil hriam tak an vuah ang chi kha a ni a, hmanraw hlauhawm tak a ni.

Mahse chu a talhtum erawh chu talhtum pangngai ang a ni ve lo, a sei tha in a hriam em ema , thiltitheihna tam tak neiin Hremhmun a siam a ni bawk a, mihring chu sawi loh, khawvel mai ni lo, planet pakhat tawp tichhe thei khawpa chakna ngah leh hlauhawm a ni.

Chutah Asmodeus chuan a talhtum chu leiah chuan a hmawr, a vawnna lam zawk chu na lo te hian a han chhun det a. Chu veleh Devils Land gate chu chawp leh chilh hian a inhawng pawp mai a, a alh nghal hluah hluah bawk. A force lah chu a na em em a, chung ramhuai ho pawh chu an lo thal nghal tawp tawp hlawm mai.

Mahse rang tak chuan an rawn tho leh nghal a, Asmodeus bei tur chuan an zavai chuan an rawn tlan phei a. Mahse Asmodeus chuan a talhtum chu a han lek kang leh a, lei bawk chu a han chek/vua leh ta pawp mai a, mitkhap kar lekin chung ramhuai ho zawng zawng chu meivap ah an chang nghal vek a, an thi nghal vek tihna a ni.

Asmodeus chuan a ban a phar a, van lam hawiin a nui tiah tiah mai. A nui ri lah chu a rapthlakin a khawk hian a khawk rum rum mai a, "Ka lo kal e, Iblis....nangmah that tur che leh i lu la turin ka lo kal e, kei Hremhnun Lalfapa, ASMODEUS hian ka that dawn che." tiin a inhrosa khur khur mai a, a awmna lai vel chu a nghin hian a nghing dur dur thei hial mai.

*****************************

Khauvang Lalpa chuan Alice-i thla chu a zawng zel a, a tawp a tawpah chuan a hmu ta. Mahse lak chu a har khawp ang le, bangah hian ft 7 vela sangah chuan tar a lo ni a. A hnuaiah chuan Jinn thlarau sual rual, 20 vel zet hi an lo thu bial a, a lai takah chuan Iblis-a chhinchhiahna, sign lian tak mai hi chhuatah chuan a lo inziak bawk a, chu chu an thut hual a ni.

Eng eng emaw an chham bul bul hlawm bawk a, Khuavang Lalpa tan chuan han ruk chhuah mai ngaihna a awm lo kher mai. Tihngaihna hre lo chuan a ding vung vung a, chutah Jinn ho chu an tho chhuak a. An zinga mi, Iblis-a hnuai deuh chiah a awm, Jinn thlarau sual zinga a thuneitu ber, Afarit chuan Khuavang Lalpa chu a rawn hmu fuh a.

Afarit hi Iblis-a ang mai a chak leh thiltihtheihna ngah a ni a, IFRIT Jinn thlarau sual te hotu lu ber a ni. Ki(horn) sei tak neiin a chak em em a, a duh hun hun ah vantirhkoh ang mai hian thla(wings) a kap parh chhuak ve thei bawk a ni. Afarit chuan Khuavang Lalpa chu a rawn pan a, "Enge hetah i rawn tih dawn?" tiin a han zawt a.

Hlauh hmel tak hian Khuavang Lalpa chuan, "Ihh..Lal Iblis-a'n pindan chhungah hian ka hna hmabak zawng ti turin min rawn tir a." tiin dawt a sawi a, a zam chhe ngei mai. Afarit pawh chuan, "A tha e...rang takin che la, kan lo let leh vat ang." a ti ve mai bawk a, tichuan jinn thlarau dangte nen chuan  pindan chu an chhuahsan ta a ni.

Chuveleh Khauvang Lalpa chuan a ngaihtuahna chu a han seng ve ta tak tak a, Alice-i thla mawi nalh tak, var sar mai chu a han en vang vang a. A awmna lah chu a sangin, ft 7 vel laia sangah an dah bawk si, amah lah ft 3-4 vel bak a ni si lo. Tihdan tur a ngaihtuah vang vang hnuah chuan a thiltihtheihna, a power chu hman ve mai a tha in a hre ta a.

Khuavang ho hian thil hrim hrim hi an ngaihtuahna hmangin a awmna hmun an sawn ve thei a, mahse thunun(control) har an ti hle thung a ni. Khuavang Lalpa chu a han maimitchhing vang vang a, uluk tak chuan a han insawrbing a. Chutah a rawn meng kawk a, a ban phar chhuakin Alice-i thla chu lak sawn a tum ta.

REi ngial a beih hnuah chuan Alice-i thla chu a rawn che ve thei ta, an tar-na atang chuan a la sawn thei ta a. Muangchang hian a rawn tla thla riai riai a, rang takin Khuavang Lalpa chuan a lo la vat a. Tichuan rang takin pindan atang chuan a chhuak a, Alice-i tanna hmun lam pan chuan a tlan nghal vang vang mai a, mahse Alice-i erawh a lo tlan chhuak daih tawh tih a hre hauh lo.

*********************************

Khuavang ho awmna puk chu Alice-i leh Khuavang Lalnu chuan an thleng a, a hma a Khuavang Lalnu-i'n a lo sawi lawk ang ngeiin ramhuai pahnih hi puk luhna bulah chuan an lo ding khur mai a, an lian em em leh ta nghal a. Alice-i leh Khuavang Lalnu chu an rawn hmu, "Ehe saw chu Vantirhkoh Laila-i a nih saw.." tiin a kawk nghal a.

A bula mi pawh chuan, "A tlanchhuak amaw? Mai mai chuan...." tih pah chuan a va pan nghal a, pakhat zawk pawh chuan a zui phei ve nghal bawk. Chuveleh Alice-i chuan, "Biru rawh." tiin Khuavang Lalnu chu a namsawn nghal a, ani pawh chu  lungpui phenah chuan a biru nghal bawk.

Ramhuai pakhat zawk chuan a fei ken lai chu a va khawh pawp a, a ngunhnam hmang chuan Alice-i chuan a lo sat bung hmawk mai. Rawn tlan pheiin chu ramhuai pakhat zawk chuan a rawn zuan vat a, mahse Alice-i chuan a lo bum thei hlauh mai. FEi la keng zawk, ramhuai pakhat chuan Alice-i chu a rawn bei ve leh nghal bawk a.

Mahse Alice-i chu lo kun hniamin, ramhuai ke dinglam zawk chu a sat chhum hmawk mai. Chutah a lu a han chhawk leh hmawk a, meivap ah changin a ral riai riai a. Pakhat zawk chu a rawn tho leh a, a ka(mouth) atang chuan mei alh hi a rawn phuh chhuak ta mai a.

Alice-i chuan a ngunhnam hmang chuan mei alh chu a lo dang a, indang chung reng chuan ava pan hnai zel a. Ramhuai pawh chu a chau hnawk thei, mei alh a reh ve leh chuan Alice-i chu a zuang vak a. Chu ramhuai chu a chhip ah chuan a han sat vak a, a chanvel ah a phel phawk mai.

Tichuan chu ramhuai pawh chu mei vap ah a chang a, a khu ral ve ta riai riai a. Puk chhung atang chuan Khuavang ramhuai dangte pawh chuan an lo thlir thap mai a, Alice-i chu chak an tiin an ngaihsan hmel hlawm kher mai. Tichuan Khuavang Lalnu pawh chu a bihrukna hmun, lungpui phen atang chuan a rawn chhuak ve ta a.

Puk chhungah chuan Alice-i nen chuan an lut dun a, "Mipuite u, ngaithla teh u. Hei hi vanchung nula, Sichangneii a ni a. Helai hmun atang hian min chhuah pui dawn a, kan vaia kan tan rual a ngai a ni." Khuavang Lalnu chuan a han ti a. Khuavang te chuan ngawi reng hian an ngaithla thap mai, Alice-i chuan a han en vang vang hlawm a.

"Ngaithla rawh u, kei hi Vantirhkoh Lailah ka ni a...helai hmun atang hian ka hruai chhuak dawn che u a ni. Tumah kal hrang lo ula, ka hnungah zel in awm dawn nia. Ramhuai ve tho in nih kha hre reng rawh u, thiltihtheihna pawh in nei ve. Helai hmuna an sal, an chhiahhlawh ni reng tur in ni bik lo. Chuvang chuan in beihlet ve a ngai, huaisen takin awm ang che u." tiin a han fuih a.

Khuavang Lalnu chuan, "Ka pasal, ka pasal a awm ve lo." a rawn ti chhuak thut mai. Alice-i chuan a en nghal hru mai a, "Khawnge i pasal chu a awm?" tiin a zawt nghal bawk. Khuavang Lalnu chu a hlauthawng nghal hle mai, "I thla...i thla zawng tur khan a chhuak phei a. Khawnge...khawnge tunah a awm ang ka hre hauh lo." tiin a tap nghal tuau mai.

Alice-i chuan a darah vuanin, "Lungngai suh, kan zawng dawn alawm. I pasal tello chuan helai hmun hi kan chhuahsan hauh lovang, kan hmu anga, kan hruai chhuak tel ve ngei ang tih ka tiam a che." tiin a hnem a. Tichuan chhuak tur chuan an inpuahchah ta hlawm a, puk atang chuan an chhuak ta a.

******************************

Khuavang Lalpa chu Alice-i thla keng chuan a kal kual a kal kual a, rei fe hnu ah chuan Alice-i tanna hmun chu a thleng ta. Mahse mak a ti lutuk chu a ding chat a, Alice-i awmna tan in chu a lo ruak vek a, a thir ban te pawh chu chhuatah chuan bung rem rum hian a lo let nuai mai.

"Ni lo..khawnge, khawnge Sichangneii..khawnge a awm ang?" tiin a mangang nghal em em a, a tihngaihna hre lo chu a tlan leh ta vak ringawt mai a. Mahse rei pawh a tlan hman lo, ramhuai 20 rual vel zet mai lo ding khawm chu a tawk thut mai. An zinga pakhat chu rawn kal hnaiin, "Khawiah nge kha thil kha i kal pui dawn? Tu thu in nge i lak? Kha vantirhkoh kha i pui em ni?" tiin a vin khur khur mai a.

Chung ramhuai ho chuan a hma lawk khan Alice-i a tlan chhuak tih an lo hria a, an Lal Iblis-a hnena an thlen hma in meeting an lo nei mek ni ngei tur a ni. Khuavang Lalpa chuan sawi tur reng a hre lo, a hlauh em avang chuan a thlan a tla zawih zawih mai a.

Ramhuai ho lah chuan an rawn pan hnai zel a, Khuavang Lalpa chu Alice-i thla pawm reng chung chuan a tawlh hnung hret hret mai. Ramhuai zinga pakhat chu rawn tawng chhuak ve leh in, "Phatsantu, hmelmate a ruk a lo pui thintute chunga thil thleng thin i hria a ni lawm ni? Thah i ni dawn asin, chu chu i duh em ni?" tiin a lo vau ve khur khur bawk a.

Khuavang Lalpa chuan tih ngaihna reng a hre tawh lo, a thi ngei dawn niin a hre tawh. Ramhuai pakhat chuan a rawn pan hnai leh zual bik a, chutah zau tak hian a ka a ang, a mei alh a rawn phuh chhuak ta vak mai. Khuavang Lalpa hlau lutuk chu a maimitchhing tawp, mahse chu meialh chuan Khuavang Lalpa a va tawh hma chuan a hma takah tu emaw hi a rawn t(r)um thum dut mai.

Mei alh chu hnugnchhawn zawnga dingin a rawn dang a, ring em em hian a au vak vak bawk. Khuavang chuan mak ti tak hian chupa, amah rawn chhantupa hmel chu a han en a. Caesar-a a lo ni reng mai, "Tlanchhe rawh." tiin a hrilh a. Chu veleh Khuavang Lalpa chu a tlanchhe nghal a, mahse a tlanchhe rei lo.

Lungpui phenah chuan biru-i'n a han dak dek dek a, Caesar-a chuan mei alh chu a lo la dang reng a. Ramhuai ber pawh chuan mak a ti kher mai, a tawp nghal vat a. Caesar-a chu a rawn hawi let a, a vun chu a lo kang nasa ngang mai. Mahse chung a hliam  zawng zawng chu zawi muang hian a rawn dam leh nghal vek a, mak ti tak hian chung ramhuai ho chuan an en thap ringawt mai.

Chutah Caesar-a bulah chuan vantirhkoh pangate kha an rawn t(r)um ve nghal bawk a, an awmna lai chu a nghing luih luih mai. Tichuan le, chung ramhuaite leh vantirhkohte chu an inbei ta chiam mai a, pui mep mep tak a ni. MAhse reiloteah thiltihtheihna nei ngah zawk, vantirhkohte chu awlsam takin an chak a, mahse Caesar-a erawh a hliam deuh nual thung.

Hliam na tak a nih loh avang chuan buaipui ngai a ni em ta lova, ramhuai zinga la dam awm chhun, chhuata lo mu mek, thi tep tawh chu Seraphina chuan a rek kang a. Bangah chuan a nam chilh a, "Khawiah nge Laila-i a awm? Khawiah nge in dah, sawi rawh.." tiin a han vau khur khur a.

Ramhuai chuan thei leh thei lo hian, "A...a tlanchhuak, kan hre bik lo." tiin a chhang ta mai a. Seraphina pawh chuan mak ti tak hian, "A tlanchhuak a?" a ti hu mai. Chutah ramhuai bawk chuan, "Mahse ala chhuahsan lovang, he Devils LAnd hi a chhuahsan thei mai mai lovang. Kan Lalpa Iblis-a'n a man leh anga, a that ngei ang." tiin a la nui huah huah mai a nih chu.

Seraphina thinrim lutuk chuan a aia na chuan a rek vak mai a, a lu chu a rek chhum hmawk thei hial a. Lungpui phen atang chuan Khuavang Lalpa pawh chu Alice-i thla la keng reng chung chuan a rawn chhuak a, midang ho chuan an lo en thap hlawm a. Vantirhkoh Raphael-a chuan va pan hnaiin, "Tunge i nih? Chuan i thil ken lai kha enge? Khawiah nge Vantirhkoh Laila-i a awm i hria em?" tiin a han zawt nghal mawlh mawlh a.

Khuavang Lalpa chuan a chil a han lem dawk a, "Nang..nangni hi, vantirhkoh vek in ni tihna em ni?" tiin a han zawt hu a, a en vung vung hlawm a. Chutah Caesar-a chuan, "Ka ni ve lo." a rawn ti deuh hram a. Malakai chu lo tawng chhuak ve in, "Nang hi tunge i nih? Chuan...Iblis-a lam tang i ni ve em? Engvangin nge nichin khan thah an lo tum che, engthil chiah nge i nih ve?" tiin a lo zawt ve bawk a.

Khuavang Lalpa chuan inthlahrun hmel tak hian, "Khuavang Lalpa ka ni a, hming hran ka nei lem lo. Helai hmun hi Ramhuaite chenna thliarkar niin planet pakhat tawp a ni a, Iblis-a siam a ni." tiin a chhang a. Caesar-a chuan a hliam dawm vawng vawng pah chuan, "Anih chuan i thil ken lai kha enge?" tiin a rawn zawt ve a.

Khuavang chuan Alice-i thla a nih thu te leh chhanchhuah an nupa a chhanchhuah an tum dan zawng zawngte, Alice-i thla a ruk chhuah avanga thah tum an nih thu zawng zawngte chu engkim a hrilh ta vek a. Uriel-a chu rawn tawng chhuak ve leh in, "Anih chuan khawiah nge in awmna puk chu a awm...chutah chuan min hruai rawh." a rawn ti ve leh a.

"Ni e, i mipuite chu kan chhanchhuak ang. Lailah-i pawh kan hmu ngei ang, pukah chuan min hruai phawt rawh." CAesar-a chuan a lo ti ve leh a. Tichuan an vai chuan Khuavang puk lam panin Khuavang Lalpa chu an zui a, chutia an kal liam chiah chu bang kila bak lian zet pakhat, a letling zawnga lo inkhai mek chu a rawn t(r)um thla a.

Chutah mihring ang takah hian intichangin, Zeros-a a lo ni. A nui var var a, "Heng vantirhkoh ho pawh hi ka hmang tangkai thei dawn e." tiin a lu a bu nghauh nghauh mai. Raziel, Raphael, Uriel, Malakai leh Seraphina te hi Lailah-i anga, khawvel dang an kal apianga an hmel a dan ve loh chhan leh, mihring anga an awm ve theih loh nachhan chu Onoskelis-i anchhia an dawn ve loh vang a ni.

Lailah-i erawh chu Pu Vana kawrkilh tel lo chuan khawvel danga a awm apiangin a hmel chu Alice-i hmelah a inthlak zel a, a chhan pawh Onoskelis anchhia kha Pu Vana khan a la paih bo sak lo a ni kan tih tawh kha. Devil's Land-a a tlak chiah khan, Lailah-i chu a hma a khawvela a awm lai ang mai khan Alice-i ni tawhin, mihring pangngai nihna a neih nghal avangin a thla pawh kha an pawh thlak sak thei hial a nih kha.

***********************************

Chhuahna tur zawng chuan Alice-i leh Khuavang ho chu an kal zel a, Alice-i chuan hma a hruai a ni. Chutia an kal mek lai chuan an hma takah chuan ramhuai tam em em mai chu an rawn lang thut mai, "Laila...tlanchhuah i lo tum amaw..chuan nangni Khuavang ho pawh kha min phatsan amaw...in thi vek dawn hria ang che u." tiin  ramhuai zinga pakhat chu a han vin khur khur a.

Alice-i chuan a ngunhnam chu a han hum nghet sauh sauh va, "Tawlh hnung rawh u.." tiin Khuavang ho chu a hrilh a, an ni ho pawh chu an tawlh hnung a. Chutah chung ramhuai ho leh Alice-i te chu an inbei ta, Alice-i chuan a chhawk hmawk hmawk hlawm mai a.

Mahse sawi tawh ang khan a thla ber a awm bawk si lo, amah lah mihirng nihna nei a ni tawh bawk si nen chuan chuti mai a awlsam chuan a hneh thei bik hauh lo. hliam nasa tak a tuar a, Khuavang ho lah chuan han puih ngaihna reng reng an hre der mai si lo.

Mahse Alice-i chu a tlawm duh hauh lo, vantirhkoh thiltihtheihna nei rih lo mahse a ngunhnam, paradise-a siam ngat chuan a pui em em a, a bei let hram hram a. Chutih rual erawh chuan ramhuai ho lah chu an rawn pung zel amaw tih mai tur hian an rawn kal belh ta zel mai, Alice-i pawh a hah tawh takzet a ni.

Thawk pawh thaw tha hleithei lo khawpa a beih hnuah pawh chuan a hneh zo ngang lo, ramhuai ho chuan an sawisa let ta hial mai a. Chhuatah chuan a bawk thlawp mai, thisen tam tak a hloh tawh bawk. Mahse a ngunhnam erawh ala hum reng thung, thawk hrawk hrawk pah chuan a rawn ding chhuak leh a.

Ramhuai ho chu a han enkual a, a hma kha chuan 30 vel lek kha an ni a. Engemaw zat a that tawh bawk, mahse a han en kual leh chu 70 rual vel zet an lo ni tawh, a hual hian an hual thup mai. Khuavang Lalnu chu a lo mangang nasa mai a, "Sichangnei, duhtawk tawh mai rawh. Min ngaihtuah suh keini chu kan tha mai ang. Tlawm tawh mai rawh, keini vanga i thih hi kan duh bik miah lo ania." tiin a lo au vak vak a.

Mahse Alice-i chuan tlawm a la tum lo nasa mai, theih leh thei lo hian din ngil a han tum a. Mahse a pai deuh chhuih chhuih mai, "Engtin mah in awm lovang, ka hruai chhuak ngei ang che u." a la ti tang tang mai a, a thaw hlawih hlawih bawk. A ngunhnam chu a han lek kang leh a, "Lo kal ta che u...ka that vek dawn che u." a la ti khur khur mai.

Chuveleh an awmna vel chu lirnghing ang mai hian a rawn in sawi vak vak a, a nghing dur dur mai. Chutah le, van lam atang chuan chhum chhah em em mai hi a rawn invial tup tup mai a, chhum chu a dum hian a dum nguk mai bawk a, rapawm tak a ni.

Van thim ruih mai atang chuan tu emaw hi a rawn t(r)um thla ri dum mai a, chu chu tudang nilovin Asmodeus a ni. A rawn ding chhuak ur ur a, a lian takzet. A talhtum, Inferno Mace chu a la hum ran bawk. Alice-i chuan a en deuh hru a, tunge a nih a hre thei nghal.

Thaw hlawp hlawp hian, "As...Asmodeus?" a ti thawp sat a. Asmodeus lah chuan a rawn melh a, "I dam thin maw, unaunu Lailah? I la naupan tehreng nen, engtin nge min la hriat ve zawk a?" tiin a la nuih vur vur zui. Alice-i chuan chhan ngaihna reng a hre lo, chutia Asmodeus ber a hmu thut mai chu mak a ti takzet.

Chutih lai chuan ramhuai zigna pakhat chuan Asmodeus chu rawn beih a tum a, a rawn zuan vak mai. MAhse Asmodeus-a taksa a sik rual rual chuan meivap ah a chang nghal vek a, a thi chiang ngei mai, a khu ral nghal vek. Ramhuai dang, 70 vel zeta tam chuan Asmodeus-a chu an hual thap mai a.

An veh den den hlawm a, "Nang kha..eng ramhuai nge i nih ve a? Vantirhkoh tho em ni i nih?" tiin ramhuai ho zinga pakhat chuan a han vin deuh thak a. Asmodeus chuan rum taka melh hian, "Aw..ka ni thin..mahse tunah chuan ka ni tawh lo. Asmodeus, hremhmun Lalfapa ka nih hi." tiin a mitmeng te chu a sen vek a, chumai pawh a ni lo, a alh hian a alh hluah hluah a ni ber mai.

Ramhuai ho chuan a huho chuan rawn beih an tum a, mahse Asmodeus chuan a talhtum chu a lek kang leh a, leiah chuan a chek ri leh bur mai. Chu veleh ramhuai ho zawng zawng chu thawk leh khatah an bo diak mai a, thawm lah chu a ring em em mai lehnghal.

An bo fel hnu chuan boruak chu a reh hian a reh diak mai a, Asmodeus chuan Alice-i lam chu ava hawi leh a. Rum zeta melh chung chuan a rawn pan ta, mahse Alice-i chuan zam hmel a pu hauh lo. Rum taka lo melh let ve in a ngunhnam chu a hum nghet sauh sauh va, bei let tur chuan a inring ran mai.

Asmodeus chuan a va pan ta, "Laila...Vantirhkoh Laila...ilo lian tawh hle mai." tiin a han nuih vur vur a. Mahse Alice-i chuan a chhang lo, a ngunhnam a tin reng chung chuan a melhr an a, a inveng reng bawk. Asmodeus-a pawh chuan chutih a khawih nghal mai duh lo a ni chek ang chu, "Nangmah ang chiah a vantirhkoh ka nih ve lai kha chuan nausen i la ni a, kei ngei pawh hian ka enkawl thin che asin." tih pah chuan a han kal hual vel a.

Alice-i chu za lo tih hriat tak hian a khi suk a, "Min lo enkawl tawh naah ka lawm e, mahse Pu Vana phatsantu hi engtikah mah...a hmaah hian ka tlawm ngai lovang." tiin a lo chhanglet ve sak mai. Asmodeus chu a nui huah huah a, "Unaunu Lailah, min beih chu i ngam tak tak amaw?" a han ti khur khur a.

Zam hauh lo hian Alice-i chuan, "Eng atan nge min duh ka hre lo, mahse kei hian ka thawk tawp thlengin ka bei ang che. Ka that che ang a, Meidilah kumkhua in ka thawn liam ang che." tiin a lo chhang a. Asmodeus chu a thinrim kher mai, "A nih chuan han inbei chiajh ila.." tiin a talhtum chuan a tin a, an inveh ta den den mai le.

*****************************

TO BE CONTINUE