SICHANGNEII : 2 (ALICE IN DEVILS' LAND) [MIZO FICTION SUPERNATURAL FANTASY STORY] Written by : Aaron Malsawmdawngzuala Chapter : 5

 SICHANGNEII : 2

(ALICE IN DEVILS' LAND)

[MIZO FICTION SUPERNATURAL FANTASY STORY]

Written by : Aaron Malsawmdawngzuala

Chapter : 5

**********************************

Iblis-a chu a lal thutthlengah chuan thu in a lo awm hahdam bik vang vang hle mai, chutih lai chuan ramhuai pakhat, a sipaite zinga mi chu a rawn lut thut mai. Iblis-a pawh chu rawn mengin, "Engthil nge ni ta?" tiin a lo zawt nghal a. Chu ramhuai chuan chibai a han buk te te phawt a, "Lalpa, Vantirhkoh Laila a tlan chhuak a ni." a rawn ti ta mai a.

A lal thutthleng atang chuan Iblis chu a ding chhuak zawk mai, "Eng a? Engtin nge a tlanchhuah theih? In va veng tha awm lo ve...tunah khawnge a awm?" a ti vin nghal khur khur mai. Ramhuai chuan inthlahrung tak hian, "Kan hre lo, Lalpa." tiin a chhang a. Chutih lai chuan ramhuai dang pakhat rawn lut ve leh in, "Lalpa, kan gate pui ber tihchhiat vek a ni." a rawn ti ve leh a.

Iblis-a chu a thinrim tawh ngang mai, "Engthil nge thleng a? Enge awmzia? Tu phiangsenin nge kan gate pui ber chu rawn ti chhe ngam a?" a han ti leh khur khur a. Chu ramhuai chuan hlauh hmel tak hian, "Asmodeus...Asmodeus a ni." tiin a chhang ta mai a.

Iblis-a chu a meng sen nghal vek a, a thinrim hmel kher mai. A taksa pum chu a rawn alh chhuak pup a, a ki(horn) pawh a alh sen hluah hluah bawk. Ring tak hian, "Afirit.." a ti vak a. Chuveleh rang lutukin Afirit chu a rawn phe lut zawk mai, Iblis-a hma takah chuan a ding a.

Zah taka chibai bukin, "Enge ni, Ka U.." a han ti a. Iblis-a chuan chiang kelh kawlh hian a en a, "Afirit, nang bhi Ifrit Jinn te zinga a chak ber leh thunei ber i ni a, ka ring tawk che a ni. Tunah hian Laila-i a tlan chhuak a, ka zawn hmuh ngei a ngai. Mahse buaina dang a awm, chu chu Asmodeus a ni." a han ti chu Afirit pawh a meng kawk mai.

Mak tih hmel tak hian, "Asmodeus, hremhmun Lal fapa maw?" a ti hu mai a. "Aw ni e, helai hmunah hian a awm. Kan ram chhungah a rawn lut a, kan gate pui ber a ti chhia a ni. Va zawng hmu la, va that ngei ang che. Keiin Laila ka lo buaipui ang, hlawhchham hauh suh ang che aw.." tiin a chah ta a.

Afirit pawh chuan a lu a han bu nghauh nghauh va, "Awle Unaupa.." tiin ani pawh chu Iblis-a ang mai chuan a rawn alh ve pup pup mai a, a phe chhuak leh ta zeuh mai. Iblis-a chuan thinrim tak hian, "Ka that ngei ang che, Laila.." tiin lalthutthleng chu a kalsan a, a chhuak ve ta a ni.

*************************************

Asmodeus leh Alice-i te chu an inhmachhawn ran mai a, Khuavang ho lah chuan a kilah an lo en thap ringawt a, an pui ngam der mai si lo. Alice-i chuan chet la hmasa in a ngunhnam chu a va khawh phei pawp a, mahse Asmodeus chuan a lo man chat mai.

Alice-i lamah chuan ava khawh let ve leh thung a, Alice-i chuan a lo bum a, lung bang ah chuan a bur chat mai. Chuveleh Asmodeus chuan a talhtum chu a han vai vir vut vut a, a rawn alh pup pup a. Alice-i chu a va tin a, a talhtum hmawr atang chuan mein alh hi a rawn chhuak a, hrui ang mai hian a invial phei tual tual lehnghal.

Alice-i chu rang takin a tlan let thut a, banga a ngunhnam bur vu mai chu a han pawt phawi a, meialh chu a lo sat t(r)ek chuai chuai mai a. Asmodeus-a chu a rawn tlan phei a, a talhtum hmaw zum chuan Alice-i chu rawn sah a tum a. A ngunhnam hmang bawk chuan a lo indang leh a, an inbei dun ta chiam mai.

Mahse Asmodeus-a thiltihtheihna leh a chakna chu a nasa zawk tlat mai, vanram-a siam ngunhnam nen meuh pawh Alice-i chu a che tha hleithei lo. A hma lawkin hliam a lo tuar tawh bawk si nen, rei fe an inbeih hnuah phei chuan a chau tawh lutuk chu a tho tha hleithei tawh der lo mai.

Asmodeus lah chu chhe te pawhin a la hliam ve lo, Alice-i chu ava pan hnai a. Alice-i chuan a lo la melh rum ngang mai, "Laila...ka duh phawt chuan tunah hian ka that thei che asin. Ka thu hi awih la, hremhmunah min lo zui rawh. Dinhmun sang takah ka hlangkai thei che ania, anih loh chuan helai hmun hi damin i chhuak hauh lovang." tiin a han vau khur khur a.

Alice-i chuan thawk hrawk hrawk pah hian, "Helai hmun atang hian..damin..damin ka chhuak lo a nih chuan, nangpawh i chhuak bik lovang." a ti ve deuh sak mai. Asmodeus chuan thawk a han la te te a, "Ka pawi i sawi hran lo, mahse ka hmelma i ni. Pu Vana mi leh sa hrim hrim chu ka hmelma an ni, a pawi ka ti khawp mai....mangtha le Laila." tiin a talhtum hmang chuan vuak a tum ta mai a.

Alice-i pawh tih theih nei hek lo le, a maimitchhing ta tawp mai a, Khuavang ho pawh chu an mang a lo ang kher mai. Mahse chutih lai tak chuan enge maw hi a rawn t(r)ek phei zawk a, Asmodeus-a talhtum chu chu thil t(r)ek chuan a rawn tawk fuh a, Asmodeus-a pawh chuan a talhtum chu a thlauh nghal.

A hnung lam a va hawi phei chu Afirit kha a lo ni reng mai, "Helai hi i awmna hmun tur a ni lo, Asmodeus." tiin a vin hrep mai a. Asmodeus chuan a talhtum chu a chhar lehnghal, "NAng hi Afarit i ni tiraw? KA hria che alawm, min rawn bei ve ngam amaw?" a lo ti let ve deuh hrep mai a.

Afirit chu a khi suk a, "Hei hi ka chenna hmun a ni a, helai hmuna awm ve lo tur midang chu ka bei let ngam khawp mai." tiin a chhang a. Asmodeus chuan thinrim tak hian ava pan phei a, "Nangni ang Jinn thlarau mai mai ka hlau lo, Hremhmun LAlfapa ka nih hi.." tih pah chuan ava tlan phei a.

Afirit pawh chuan a hmanrua chu a la chhuak ve ta a, chu chu hreite(axe) niin a lian em em a, hreite pangngai tiat lek chu a ni lo khawp mai. Chutah chu a hreite pawh chu a alh hluah hluah a, lunghlu(lunghlu satliah a ni lo) sen atanga siam niin a hriam takzet bawk.

Asmodeus chuan a mit atang chuan meialh sen, force na em em mai hi tichhuakin Afirit chu a kap a, mahse Afirit chu a hreite hmangin a lo indang a, a zuang vak a, Asmodeus chu a bawh thlu tawp mai. Lei chu a khi thawt thawt mai a, an inpaih thal leh thuai thuai zel a.

Inhneh tawk tak an ni, Afirit chuan a hreite chu a han vaivir a, Asmodeus-a lamah chuan a vawm phei pawp mai a. Asmodues-a awm ah tak chuan a bur va mai, ani pawh chu a thingthi hnawk a. Mahse a na rei lo, awlsam takin a rawn tho leh nghal. Chutih lai chuan Afirit chu a rawn tlan phei ve leh a, a rawn zuang leh ta vak mai.

Chutah a awm a hreite bur chu Asmodeus chuan a phawi chhuak a, a hreite neitu ber, Afirit lo zuang mek chu a vawm ve ta, a awmah chuan a bur ve ta chat mai. A zuang sang tawh viau na a chu, a tla thla thum dawt mai. Thei leh thei lo hian a rawn thingthi a, rum tak hian Asmodeus chu a la rawn melh tawk tawk a.

Asmodeus pawh chuan a va pan hnai a, "Ib..Iblis-a'n a that tho tho ang che." Afirit chuan ala rawn ti talh mai. Asmodeus-a chu a khi suk a, "I hun a tawp tawh....meidil-ah chatuanin hun i hmang tawh ang." tiin a talhtum hmawr zum a thil hriam tak hmang chuan Afirit-a lu chu a chhawk bung ta hmawk mai.

Afirit chu a tlu tawp a, a taksa chu meikhu ah a chang a. Chu meikhu dum nguk mai chuan vanlam a pan chho a, meikhu kar atang chuan Afirit-a hmel chu a la rawn lang thei hram a, rapthlak tak hian a rawn au vak vak leh nghal a. Asmodeus-a chuan hnunglam a han hawi a, mahse Alice-i leh Khuanvang rual ho chu an lo bo daih tawh.

**********************************

Vantirhkoh pangate leh Caesar-a te chu Khuavang Lalpa chuan Khuavang puk chu a thlen pui ta, mahse tumah reng an lo awm lo. Khuavang Lalpa chu a mangang nghal hle mai, "Nilo..khawnge ka mipuite, khawnge ka nupui...a ni thei lo." tiin a rak nghal chel chul mai a.

Vantirhkoh leh Caesar-a te pawh chu an in melh hrek hrek ringawt, "Hemi lo hmundang awmna in nei thin em?" tiin CAesar-a chuan a han zawt a. Tap lek lek hian Khuavang Lalpa chuan, "Nei lo...helai hi kan puk, kan awmna ber a ni." tiin a hnit feih feih a.

Vantirhkoh RAphael chuan zaidam tak hian, "Lungngai suh, him takin an awm ang tih ka hria. KAn unaunu Laila-i chuan a hruai chhuak hlawm tawh a ni ngei ang, kan kal leh vat angai." tiin a lo hnem a. Chuveleh thil hriat chhuah thut nei niawm tak hian Khuavang Lalpa chu a meng kawk mai, "Vengtu...min vengtu ramhuaite an awm miah lo." a ti ta nuah nuah mai a.

Hrethiam lo tak hian CAesar-a chuan, "Eng a? Enge i sawi awmzia?" tiin a lo zawt nghal vat a. Khuavang chuan CAesar-a te chu a han melh kual hlawm a, "He kan puk bul chiah ah hian engtik lai pawhin ramhuai ten min veng thin, mahse an awm miah lo." a han ti leh a.

Vantirhkoh Uriel-a chu a rawn tawng chhuak ve a, "Ehe...anih chuan Laila-i chuan a hruai chhuak tawh a ni ngei ang." a lo ti a. "Khuavang Lalpa, gate lam hi khawiah nge a awm hrim hrim?" tiin Vantirhkoh Malakai chuan a han zawt veleh a. Khuavang Lalpa chuan a mittui chu hru in, "Min lo zui ru." tih pah chuan a kal a, midang ho chuan an zui ve nghal bawk.

***********************************

Alice-i leh Khuavang ho te chu an lo tlanchhe leh mek a, mahse Alice-i chu a hliam nasa lutuk tlat. Na a tih em avang chuan a tlan hleithei tawh lova, a tlu bawk leh thlawp zel mai a. Khuavang Lalnu meuh pawh a inthlahrung tawh nge ni, "Sichangnei, khawngaihin nangmahin chhuak zawk mai rawh. Helai chu kan awmna hmun tura ruat pawh a ni mahna, nang tal chu inchhanhim hram teh." tiin a ngen in a ngen tawp mai.

Mahse chuti mai mai a tlawm chu Alice-i chuan a tum hauh lo, "Ni love...ka tha alawm. VAntirhkoh ka nih hi...reilote kan hahchawl anga, i pasal pawh kan zawn ala ngaih kha...lungngai reng reng suh u, kan chhuak em em ang." a la ti fan mai a. Khuavang Lalnu chu a tap tuau tawh, "Tunah hian ramhuai dangten min zawng mek asin, engtik hunah pawh an lo kal thei..." tiin a mangang tak zet.

Alice-i chu a han thaw deuh hrawk hrawk a, "Ka awm alawm, ka chhanhim ang che u." a la ti fan mai a. Mittui tla zawih zawih chung chuan Khuavang Lalnu chuan, "Sichangnei, hliam na tak i tuar. Chu chu keini pawn kan hmuh pui che a, nang phei chuan i hre chiang ber ang. Duhtawk tawh rawh, nangmahin kal tawh zawk mai rawh." a han ti leh a.

Thei leh thei lo hian Alice-i chu a ding tawk tawk a, "Ka bei thei vek ang, eng anga chak pawh ni rawh se...ka bei thei ang, ka hneh vek bawk ang." tiin a insehruh a, amah lah chu a thi phung tawh mai a, hliam a ngah hle bawk. A sawi zawh rual rual chuan hlauh ang ngei ngei in ramhuain ho an rawn lang leh ta a, an chung zawnah chuan an rawn thlawk fua fua hlawm mai.

Chutah a rual chuan an rawn t(r)um a, "Laila...i tlanchhuah thu hi kan Lalpa, Iblis-a'n a hre tawh. I tlan chhuak hlen thei chuang lovang, inpe mai rawh." tiin an zinga pakhat chuan a han ti a. Mahse Alice-i chuan a ngunhnam hmang chuan tin nghal in, "Thih in duh loh chuan min rawn hnaih tawh suh u, a nih loh chuan ka that vek ang che u." a la ti fan mai.

Chutah ramhuai ho chuan an rawn bei leh ta, Alice-i chuan a ngunhnam hmang chuan a lo sat chhum hmawk hmawk hlawm mai a. Mahse sawi tak ang khan a lo hliam nasa tawh nen, a chau tawh bawk nen. Harsa tak chung chuan a bei hram hram a, han hneh mai lah chu an har phian lehnghal a.

REi fe an inbeih hnu chuan vanneih thlak takin Alice-i chuan a hneh thei leh ta vek mai, mahse amah ber chu a hliam na takzet. Thawk pawh a thaw tha hlei thei tawh lo, thisen a hloh nasa tawh bawk si nen. Khuavang Lalnu chuan a buaipui nghal a, "I tha em? Tih theih engmah kan nei bawk si lo, engtin nge maw kan han puih ve ang che le?" tiin a inthlahrung em em a.

Alice-i chuan a hliam te chu a thiltihtheihna hmang chuan tihdam a han tum a, mahse mihring a nihna a tam zawk tawh tlat nge maw ni, a thei tlat lo. A maimitchhing vang vang a, "Ka tha alawm, ka tha mai ang. Lungngai suh u, hawh teh u, i tlan leh phawt ang u." tiin harsa ti tak chung chuan a tho va, Khuavang ho chu a tlan chhiat pui leh ta a, mahse an hnungah chuan bak lian tak pakhat, Zeros-a chuan a zui zel tih erawh an hre der si lo.

**************************************

VAntirhkoh Raphael-a te leh CAesar-a te chuan Khuavang Lalpa chu an zui zel a, chutia an tlan mek lai chuan an sira bang khuar atang chuan kut dum vek hian Khuavang Lalpa chu a rawn man thut mai. Bang kua ah chuan pawh luh a tum a, Malakai chuan Khuavang Lalpa chu a lo pawt let hman hlauh va.

Chutah bang kua chu an en thap hlawm a, chuta tang chuan ramhuai dum lian zet hi a rawn chhuak a. Caesar-a te chuan ngawi reng hian an en thap ringawt, a hnung atang chuan amah ang chiah chiah ramhuai dum vek dangte chu lung bang khi kar atang chuan an rawn vak chhuak ve sup sup mai a.

An zinga pakhat chuan rang zet hian Khuavang Lalpa chu a rawn man leh nghal ta chat mai, vantirhkoh dangte leh CAesar-a te chuan lo chhan an tum a, mahse ramhuai dum nguk mai te chuan an lo dang a, an inbei ta chiam mai. Awlsam takin CAesar-a leh vantirhkoh panga te chuan chung ramhuai ho chu hneh mahse Khuavang Lalpa ber chu an chhan hman ta lo, lei khi karah chuan ramhuai dumte zinga mi pakhat chuan a hnuk lut ta daih mai.

Lei hnuaiah chuan meialh hlir a awm a, ramhuai chuan Khuavang Lalpa chu a pawt lut ta vang vang mai a. Khuavang Lalpa lah chuan a thil ken lai, Alice-i thla chu a la thlauh daih zui. A mangang em em a, a thi ve ngei tawh dawn niin a hre bawk. Tih ngaihna dang a hre tawh lo, a thih hun chu nghakin a maimitchhingta tawp mai a ni.

Mahse chutia a maimitchhing chiah chu a mitthla ah chuan Alice-i a lo lang nghal a, "Ramhuai ve tho in ni a, thiltihtheihna tam tak in nei ve tih pawh i hria. Theih tawp chhuah in tang la, i hneh em em ang." tia a hrilh lai chu a hre chhuak zawk mai. Chutah a rawn meng kawk a, a mah hnuk thla mek tu ramhuai chu a zu melh a.

A kut a ti pharh a, chutah ramhuai chu a ding chat mai. Ramhuai ber pawh chuan mak ti tak hian Khuavang Lalpa chu a chhoh en hu ringawt a, a hrethiam lo kher mai. 

Hnuh thlak leh tum chuan a pawt vak vak a, mahse a thei bik ta hauh lo mai. Khuavang Lalpa chu a mitmeng a var pup a, a thinrim hmel takzet.

Ramhuai lah chuan a han hram khum vak ringawt a, mahse a hma zawnga dawih em em thin Khuavang Lalpa chuan hlau hmel a pu tawh ta hauh lo. Chutah le, Khauvang Lalpa chuan a thiltihtheihna chu a hmang ve ta, ramhuai chu a dawi ve ta mai a nih chu.

Ramhuai chu dawi at in a awm ta a, zawi muang hian Khuavang LAlpa ke a vawnna chu a thlah riai riai a. Mei alh hluah hluah karah chuan a tla thla a, Khuavang Lalpa chu a en zui vawng vawng ringawt. Khuavang Lalpa lah chuan ring zet hian, "Kei hi i chhiahhlawh, i sal ka ni lo. He hmuna awm tur pawh ka ni lo, mizo ramhuaite zinga mi, Khuavang ka nih hi...an Lalpa ber ka ni." a han ti ve deuh khur khur a.

Chutah chunglam a en leh a, lei khi kaw hung mai chu a han hmu thei a. A vah in a vak chho ta zat zat mai, rei lo teah chuan a vak thleng ve mai bawk. A vak chho chiah chu mak ti tak hian Vantirhkoh te leh cAesar-a te pawh chuan an lo en hu mai a. Amah Khuavang Lalpa ber pawh chuan sawi tur a hre lo, "Kan kal thei em?" a han ti deuh hu ringawt a.

Caesar-a chu a han khuh lui vel ta ringawt a, "Aw..nia..i kal ang u hmiang." a han ti bah deuh nuai a. Mahse vantirhkoh dang, Raziel, RAphael, Malakai leh Uriel-a te chuan engmah an sawi ve lem lo, hma lam pan chuan an kal leh ta daih a. Caesar-a leh Khuavang Lalpa pawh chu an in en vung vung a, vantirhkoh te chu an zui ve leh a.

******************************

Iblis-a chuan ama ram chhung ngei, a hriat chian em em ah chuan Alice-i chu a zawng ngat ngat a. A sipaite chu a khat tawkin thu a pe reng bawk a, a vin hrep hrep zel mai. A thinrim takzet a, a taksa pum mai chu a so hian a so bulh bulh hi a ni ber mai. Chutia a zawn mek lai chuan a nupui, Lilith-i a tawng fuh thut mai a.

Lilith chuan rum tak hian a melh a, "Laila-i i tlanchhuah tir thei amaw? Engthil nge thleng hi? Khang kan tan in bang te kha tha tawk taka i siam amaw ka tia, ani vantirhkoh naupang lutukin a tichhe thei kha enge awmzia?" tiin a vin khur khur a. Iblis-a chu a thaw hak a, "Puitu a nei a nimai, kha vanram ngunhnam hmang kha chuan a tichhiat theih ngei dawn tih chu ka chiang...mahse kha ngunhnam kha chu kan veng tha reng bawk sia." tiin a lo chhang a.

Lilith-i chuan thinrim hmel tak hian, "Nilo...ngunhnam kha a la a ni." a ti ta mai a. Iblis-a chuan mak a ti kher mai, "Enga? A la maw? Laila-i khan a la maw? Engtin nge a nih theih?" a ti hu mai a. Lilith-i chuan a lu a han bu nghauh nghauh va, "Puitu chu a nei chiang alawm, rin pawh ka nei nghal. Khuavang..khang Khuavang dawihzep ho khan an pui chiang a ni, midang puitu tur an awm lo." tiin a chhang a.

Iblis-a chu a thinrim hmel kher mai, "Khang khuavang ho kha,....ka that dawn. KA that chimit vek dawn, phatsanna hi keichuan ka hua." a han ti khur khur a. Chutah Lilith-i chu a nui huah huah mai, "Iblis, phatsanna i hua maw? Nangmah hi ani lawm ni Pu Vana phatsantu kha?" a lo ti zek mai.

Iblis-a pawh chuan a nupui, Lilith-i chu a en hu ringawt a. Chutah Lilith-i bawk chuan, "Pu Vana bumin, i phatsan a. Chapona a khat ramhuai i lo ni ta a, chuvang a ni lawm ni hetia Devils Land i siam chawp ni? Hrehmunah i awm duh lova, a chhan pawh Belzebula thuhnuai a i awm peih loh vang a ni. I hming hmasa kha i la hria em, han sawi teh." a han ti leh deuh zek a.

Iblis pawh chuan zawin sap hian, "Vantirhkoh Azazel." tiin a chhang ve mai bawk. "Aw ni e, Pu Vana hnuai chiah i ni. Mahse i phatsan a, i bum a ni. Hei vang hi alawm tunah pawh Azazel awmzia chu phatsantu, bumtu tih a lo nih tak ni. Mahse keichu ka danglam, Siamtu in a hmeichhia min siam hmasak ber ka ni, Pu Vana ai pawh hian ka awm hmasa zawk asin." a han ti leh deuh hrep a.

Chutia a nupui ang reng mai chu Iblis-a pawh chuan a hne ve deuh tawh ani ngei ang, "Awle a tha e, tunah Laila-i zawngin ka buai em em a, enge i duh a?" a han ti vin ve hlur a. Lilith-i chu a han thaw leh deuh hak a, "Khawvelah ka kal dawn...mihringte chenna hmunah. Ka hrilh lawk tawh che kha, a hma pawn." tiin a chhang a.

Chutah Iblis-a lah chuan, “Aw ka hria, min hrilh tawh...ka hria.” a lo ti vin leh hlur mai a. Lilith-i pawh a khi suk ringawt, “Anih chuan engkim lo chingfel ang che, ka lo let leh vaat ang.” tiin a kalsan ta a. Iblis-a ai hian Lilith-i hi a chak zawkin thiltihtheihna a ngah zawk a, Pu Vana meuh pawh in a hlau a ni.

********************************

VAntirhkoh RAphael, RAziel, Malakai, Ureil leh Caesar-a te chuan Alice-i chu an la zawng mek a, “Ding lawk teh ang u.” RAphael chuan a rawn ti deuh thut mai, an zavai chuan an ding ta a. Ureil-a chuan, “Enge ni ta?” tiin a lo zawt vat a. Raphael-a chu a han ngawi vang vang a, “hetiang zat vantirhkoh kan aw a, kan zinga pakhat phei chu Pathian a inti lehnghal.” a han ti deuh kher chu Caesar-a a rawn meng deuh hrawk mai.

Vin lek lek hian, “Enge i sawi tum chu ni a?” a lo ti nghal hlur mai. Vantirhkoh Raphael-a chu a han thaw deuh hak a, “Heng ramhuai ho, DEvil’s Land an tih ami ho hi tamtak kan thlen hnu pawhin kan bei tawh. Hneh loh kan la nei lo, chumai ni lovin awlsam tak tak in kan la hneh deuh vek a. Engvangin nge a huhova kan kal dual dual reng ni, kan inthen hran angai.” a han ti a.

Uriel-a pawh chuan a lu a lo bu nghat nghat mai, “Ni e, keiman ruahmanna ka’n siam ange. Vantirhkoh ho hi a mal te te in a hrang theuhvin kal ila, CAesar-a erawh chuan Khuavang Lalpa hi a awmpui thung ang, chuti chuan tha kan ti tlang em?” a han ti chu CAesar-a a lo mengrum kher mai.

Vin deuh tak hian, “Enge kei kherin ka awmpui bik ang, mi venghimtu vantirhkoh in ni a ni lawm ni?” a han ti deuh hlur a, Lhuavang Lalpa lah chu a lo inthlahrung nasa mai. MAhse Vantirhkoh Raphael chuan rawn sawi fiah in, “Lal Caesar, nang chu PAthian hmingpu thei khawpa chak leh huaisen i ni. Helai hmuna kan kalna chhan ber chu kan unaunu Laila-i chhanchhuak turin a ni, chuvang chuan amah kan hmuh hma chu helai hmun hi kan chhuahsan thei lo.” tiin a lo chhang a.

Malakai pawh chu rawn tawng chhuak ve in, “In pahnihin chhuahna lam ah min lo nghak ula, Laila-i kan hmuh veleh kan rawn kal ve dawnnia.” a han ti a. Caesar-a chu a ngawi vang vang a, “A tha e...in thu ang chuan ni rawh se.” a ti ve ta nge nge a. An kal darh hma chuan Khuavang Lalpa chuan, “NGawi lawk teh u.” a rawn ti a.

Midang zawng chuan Khuavang Lalpa cnhu an en thap mai, Alice-i thla a ken lai mek chu Khuavang Lalpa chuan Seraphina chu pe in, “Ka lo dam chhuak ta lo a nih pawhin vanchung nula, Sichangneii kha chu dam takin helai hmun tihbaiawm leh rapthlak tak atang hian hruai chhuak ngei ang che u.” tiin a hlan chhawng a.

Seraphina pawh chuan Alice-i thla chu lo ban nghalin, “Awle, lungngai suh. Kan unaunu...Sichangneii chu kan chhanchhuak ngei anga, helai hmun atang hian kan hruai chhuak em em ang. Tin, ani chauh nilovin nangni Khuavang ho zawng zawng pawh kan hruai chhuak ang che u.” tiin a lo chhang a.

Khuavang Lalpa pawh chu hlauthawng rilru hle mahse chhe te chuan a thla a muang ve deuh ta, “Ka lawm ngawt ang.” a han ti leh a. Tichuan vantirhkoh ho zawng chu an unaunu Lailah-i chhanchhuak tur chuan an inthen darh a, Caesar-a leh Khuavang Lalpa pawh chu an kal hrang ve ta a.

******************************

Asmodeus pawh Devils Land ah chuan ala awm reng a, Alice-i chu ala zawng buai nasa kher mai. A kalkawng lo daltu, ramhuai te chu a that phei nghal hmiah hmiah a. A chak bawk a, tumah chuan an ngam lo hi a ni ber mai. A kal thui zel a, a tawpah chuan Iblis-a nen an inhmu fuh hlauh mai.

A ding chat a, “Kan intawng ta maw...Iblis?” tiin a han nui var var a. Iblis-a mitmengah chuan thinrimna leh phuba lakna hlir hi a lang thei, “Afirit i that amaw? Nang hian Afirit i that amaw?” a ti khur khur mai a, a mitmeng te chu a sen hian a sen vek mai.

Chutah Asmodeus chu a nui huah huah a, “A ruang i hmu em ni? Engtin nge i lo hriat zawk a? Engpawh chu nise...i sawi dik chiah alawm. KA thah a ni, Afirit kha ka thah a ni.” tiin a lo chhang let sak sak mai. Za lo tih hriat tak hian Iblis chu a khi lui deuh suk a, “A tha alawm, tunah chuan i hun a thleng ve ta. Ka that che anga, meidilah ka thawn liam ve dawn che. Chutah chuan Afirit chuan a lo hmu ngei che anga, i lu a la ngei ang.” tiin a vin khur khur a.

A talhtum chu hum ngheh sauh sauh pah chuan Asmodeus chuan, “A ni maw? Ka lu a la ang maw? Kan en ang chu, kei hian i lu ka la anga, ka unaupa Belzebula hnenah ka hlan ang. Chumi ti tur chuan ka lo kal, nanga vantirhkoh man Laila-i kha ngatan mah ka ti ve lo.” a lo ti let ve leh a.

Chutah Iblis-a chuan a va bei ta thut mai, a hmanrua chu a la chhuak a. Iblis-a hian chem lian tak, rangkachak hlang hi a nei a, chu chu hmanraw thil ti thei tak a ni. Chem chu a la chhuak a, a alh nghal hluah hluah mai. Asmodeus pawh chuan a talhtum sei tha zet mai chu a la chhuak ve bawk a, an inbei ta chiam chiam mai a.

An thawm a ring dun bawk a, an awmna lai pawh chu lirnghing ang mai hian a nghing dur dur a. Meialh chu a vir hian a vir deuh pup pup zel bawk, an inbeihna chu rapthlak tak a ni. MAhse mak tak maiin nge rinloh tak maiin kan ti zawk dawn ni, Iblis-a chem chu Asmodeus-a talhtum chuan a ngam lo ta tlat mai le.

REi fe an inbeih hnuah chuan Asmodeus chu a che tha hleithei ta tlat lo mai, chu chu remchangah la in Iblis chuan a chem hmang chuan a sat ta siah siah mai a. Asmodeus-a taksa chu a hek hawk hawk mai, a tawp a tawpah Iblis chuan vanlamah chuan Asmodeus chu a vawrh vak a.

A chem chu lek kangin a hmawr atang chuan eng mak tak mai hi a ti chhuak a, Asmodeus chu a kang ral ta vek mai. Mahse Asmodeus hi a thi tihna a ni lo, Iblis hian eng ang pawhin hneh mahse chuti maia thi thei a ni bik lo, hremhmun Lal fapa kha a ni ve tlat.

A that nilovin a awmna ngai, hremhnunah a thawn let leh tihna a ni. A hma a Alice-i’n Pu Vana kawrkilh hmanga Onoskelis hremhmuna a thawn let leh ang deuh chiah chiah kha  ani a, danglamna chu tlem te a ni. Alice-i kha chuan Onoskelis kha  aduh vang rengin leh a thah duh loh avangin hremhmunah a thawn let leh kha a ni a, mahse Iblis-a erawh hi chuan a that fel der amaw a inti tihna a ni.

Mahse a that mai bik lo, Asmodeus hi sawi tak ang khan hremhnun Lal fapa a ni a. Chuti maia thah theih a ni lo, mahse Iblis erawh a hneh ngang lova, a tlanchhia ti ila a dik zawk mah ang chu. Chutia Asmodeus ber a awm tawh tak lovah chuan Iblis chu a nui var var a, “Laila...i hun a thleng ve ta.” tiin a hma zawnah chuan athlawk phei fua mai.

*******************************

CAesar-a leh Khuavang Lalpa chuan gate chu an thleng ta, an kalkawngah chuan ramhuai tamtak chu tawk mahse Caesar-a chuan a that phei vek a. Gate pui ber lo tlu bung rem rum an hmuh chuan an ding chat mai, “Ehe...keini kah chuan kan ti chhe miah lo asin.” tiin CAesar-a chuan mak ti tak hian a en hu mai a.

Khuavang Lalpa pawh chuan mak a ti kher mai, “Saw gate pui ber saw...vawi tam tihchhiat tum in kan bei tawh, tlan chhuah kan tum zing tawh lutuk. MAhse a thir saw a chak that em avangin kan ti chhe zo ngai lo, tu tihchhiat nge mawni le?” a lo ti ve nuah nuah bawk a.

Caesar-a chu a ngawi vang vang a, “Engpawh chu nise, hetah hian midang ho kha kan lo nghah angai ang...” tia a sawi lai chuan mipakhat, mihring pian zia ang tak mai hi a rawn phei a, chuveleh CAesar-a chuan a chem chu a la chhuak nghal. Chupa chu a rawn kal hnai a, Zeros-a lek chu lo niin.

Mahse Khuavang Lalpa chuan tunge a nih a hre hauh lo, a chhan chu Zeros-a chuan a hmel a thlak danglam vang a ni. “Tunge i nih?” tiin CAesar-a chuan a chem chuan a tin a. Zeros-a chu a rawn kal pai deuh chhut chhut a, mahse a ti lui vek a ni. Caesar-a hmaah chuan rawn bawk thlawpin, “Ka..ka pu, min...min pui rawh. Min pui hram rawh, helai hmunah hian ka awm duh tawh lo.” tiin a han tap vel a.

Chutia a rawn tap vel ta mai chu Caesar-a tan pawh lo vin zui vak chi ni hek suh, tha tak chuan a kai tho ve mai a. A hmel chu a han en chiang a, “Tunge i nih?” tiin a han zawt a. Zeros-a chuan thawk hluam hluam pah hian, “Mi tang..he DEvils Land-a mi tang hi ka nia..ka rawn tlan chhuak a ni.” tiin a chhang a.

Khuavang Lalpa chuan mak tih hmel tak hian a lo en a, “Mi tang maw i nih a...ka van hmu ngai lo che.” a lo ti hu mai. Zeros-a lah chuan, “Ni e..min hmu ngai lovang. Devils Land Purgatory-ah min dah a, chuvang chuan min hmu ngai lovang.” tiin a lo chhang leh a.

Khuavang Lalpa chu a hawi deuh hu ringawt, “Purgatory a awm amaw? Anih...tu in gne chulai hmun atang chuan la chhuak thei reng reng che a? Engtia lo chhuak thei nge i nih?” tiin a han zawt leh a. Zeros-a chuan a chil a lem dawk a, “Van..vantirhkoh...vantirhkoh Laila-i’n min chhanchhuak a ni.” tiina  chhang ta mai a.

***********************

TO BE CONTINUE