SICHANGNEII : 2 (ALICE IN DEVILS' LAND) [MIZO FICTION SUPERNATURAL FANTASY STORY] Written by : Aaron Malsawmdawngzuala Chapter - 1

 SICHANGNEII : 2 (ALICE IN DEVILS' LAND)

[MIZO FICTION SUPERNATURAL FANTASY STORY]

Written by : Aaron Malsawmdawngzuala

Chapter - 1

********************************

(Chhiar a nawm leh zual nan pic ho hi chu mit tih tlei na atana dah mai mai a ni e.)

***********************************

(THIS STORY IS A SEQUEL TO SICHANGNEII : THE GUARDIAN ANGEL)

Pu Vana kawrkilh bo zawng tura tirh, Vantirkoh Laila chuan a hna hlena kawrkilh chu a neitu Pu Vana hnenah ngei a thlen leh theih avang chuan chawimawina nasa tak a dawng a. Vantirhkoh sipaite zinga hotu berah Pu Vana chuan hlangkai nghal bawk a ni. Lailah-i pawh a lawm hle a, mahse a ruk tak chuan Bena a ngai hle thung.

Rei vak lo hnu chuan Lailah chu kal hrangin Vanchung Lal In bang, lunghlu vek atanga siam ah chuan a thla chu a han en vang vang a. Chutah a hmel chu rawn danglam riai riai in khawvela a awm laia a hmel put thin, Alice-i hmel chu a rawn lang ta daih mai. A ngawi vang vang a, za lo tih hriat tak cnhuan a khi lui suk a.

Chutih lai chuan a hnung lam atang chuan Vantirhkoh pakhat chuan a darah a rawn vuan a, Lailah chu a hawi let vat a. Chu Vantirhkoh chuan zaidam tak hian, "I tha maw, Lailah?" tiin a rawn zawt a. Lailah chuan nui sang hian, "Aw ka tha alawm." tiin a lo chhang a. A han en vang vang a, "Ihh..nang hi tunge i hming? Ka hmuh ngai awm che pawh ka hre lo reng reng." Lailah chuan a han ti deuh nuah nuah a.

Chu Vantirhkoh chuan Lailah-i chu a en vang vang a, "Min hre tawh lo em ni? Vantirhkoh Azazel ka nih hi." tiin a chhang a. Lailah-i chuan mak a ti kher mai, "Engmaw? Aza..Azazel a?" a ti hu mai a. Chuveleh Chu Vantirhkoh, Azazel ni a inchhal chu a hmel rawn danglamin a inthuamna var mawi tak mai leh a thla hmul var buk chhup, nem no nalh tak mai te chu a rawn dum ta vek mai a, tichuan Lailah-i chu a rek thut mai a, Paradise atang chuan rang mang kheng hian an bo dun ta daih mai.

Chutia an bo dun lai tak chu Vantirhkoh Seraphina chuan a rawn hmu hman hlauh mai, "Lailah..nilo.." tiin a au tuar a, an thawm chu hria in Vantirhkoh dangte pawh chu an rawn thlawk phei ve nghal bawk.  Thil awmzia chu Seraphina chuan a sawi a, rang takin Pu Vana bulah chuan thu an thlen nghal a.

Pu Vana chuan chu Vantirhkoh sual chu tunge a ni tih a hrechiang khawp mai, "Azazel....ka hnuai chiah a awm thin a ni, Vantirhkoh ropui tak a ni thin. Mahse thuneihna a duh avangin min phatsan a, tichuan Paradise atang hian ka paih thla ta a ni." tih pah chuan a Vantirhkoh sipaite chu a han enkual a.

"Nangni zinga a tam zawk hi chu siam in la ni lo, SIAMTU-i'n kei hi Paradise enkawltu tura min thlan, Pathian tamtakte zinga mi kei hi min thlang a. Tichuan ka rorelna hnuaiah he Paradise hi ka enkawl ta a, tichuan ka hnuai chiah ah Azazel hi a awm thin a ni. Chutih rual chuan hmelma tamtak kan nei ve a, chung ho awmkhawmna chu Hremhmun a ni." a han ti leh a.

Vantirhkoh Dara chu rawn tawngchhuak ve in, "Ka Lalpa, Azazel chu engtin nge helai hmunah hian a rawn luh theih? Chuan eng thiltihtheihna nge a neih bik a, khatia a hruai bo tawp theih?" tiin a lo zawt ve a. "Azazel hian ka thil tih theih chanve hi a ti ve thei a, chakna tamtak a nei ve dawn tih chu hre hmasa phawt ula. A dawt leh ah chuan bumtu, phatsantu a nih avangin a hlauhawm hle a, chutihrual chuan mi thuhnuaia awm hi a duh lo bawk." tiin Pu Vana chuan a chhang a.

Vantirhkoh ho chuan an ngaithla thap mai, "Khatih hunlai khan hmelma hlauhawm tak kan nei a, chung ho chu Hremhmuna awm mek te hi an ni. An Lalpa ber hi Belzebula a ni a, chu chuan ka Lallukhum leh Paradise hi min chhuhsak a, min luahlan a tum a ni. Azazel nen chuan kan beidun thin a, Van indona a chhuah pawh khan chakna kan chan theih phah nghe nghe a ni. Mahse a ni pawh chu ahma a Belzebula te tih ang bawkin thuneihna neih duhin min phatsan a tum a, tichuan Van atangin ka paihthla ta a ni." tiin a sawi chhunzawm leh a.

Vantirhkoh Seraphina chu rawn pen chhuakin, "Ka Lalpa, keihi i hnuai chiah a awm chu ka ni ve tawh a, chuvang chuan Lailah-i chhanchhuak tur hian HRehmunah chuan min tir rawh, ka lo hruai haw leh ngei ang." a rawn ti ta mai a. Mahse Pu Vana chuan a remti tlat lo, "Nilove, kal lovang." a ti ta tlat mai.

Chu veleh Vantirhkoh dangte pawh chuan, "Ka Lalpa keimah min tir rawh." tiin Pu Vana chu an dil nghal sap sap bawk a. Pu Vana chuan chiang fek fawk hian, "Ngaithla rawh u, tunah hian Azazel hi HRemhmunah a awm lo." a ti ta daih mai. "Khawnge a awm, ka Lalpa?" tiin Seraphina chuan a lo zawt nghal vat a.

"Thiltihtheihna tam tak a nei tih a chian em em na chu kei tak ngial pawh ina ka hriat lohvin nangmahni angin, Vantirhkoh angin a rawn insiam a, Vantirhkoh a nih laia a hming ang chiahin a la rawn insawi bawk a. Van atanga paih thlak a nih khan Hremhmunah a kal lo, khawvel hran, hmun hran a siam a, chutah chuan sipai dangte siam veleh in ramhuai lalna hmun, Devil's Land ah a awm a ni. Tichuan a hming pawh Azazel ni tawh lovin, Iblis a ni tawh." tiin Pu Vana chuan a chhang a.

*****************************

Hmun mak tak mai, rimchhe em em leh bal em em mai ah chuan Laila-i chu a tla thla tawp mai a. A khu rum rum mai lehnghal a, chhum a zing chuai chuai bawk. Kil tinah mai chuan meikhu dum zet mai hi a khu vut vut reng bawk a, thli a thaw vuk vuk bawk. Choak dum tam tak mai hi an rawn thlawk kual leh dul dul thin a, a hmun chu nelawm loh tak a ni.

Lailah-i chu a tho vat a, a hawikual a. Mak a ti kher mai, "Khawnge...khawnge ka awm?" a ti hu mai a. Chutah hnunglam atang chuan thawm a hria a, rang takin a hawi let a. Thingkung kang bang niawm tak, ut ruam mai phenah chuan eng nungcha nge pawh hriatloh, zawng ang tak pian nei si, mihring hmel pu chiah silo, hnar lian zet mai, ft 3 vel leka sang hian hlauh hmel tak hian a lo bih ker mai.

Lailah-i chuan ava pan hnai a, mahse rang takin thingkung phenah chuan chu thil chu a biru lehnghal. "Tunge i nih? Helai hmun hi khawilai nge?" tiin lailah-i chuan a zawt a. Mahse chu thilnung chu a ngawi reng a, hlauh hmel em em hian Lailah-i chu a en reng ringawt. Chuveleh lai khura tui tling chu Laila-i chuan a han bih a, a thla chu a zu hmu ta.

Lailah-i ni tawh lovin, khawvela a awm laia a hmel, Alice-i hmel zawk a lo lang daih mai. Zawi sap hian, "A..Alice-i, Alice-i ka ni leh tawh." a han ti chu a bula lo awm, nungchan mak tak mai chu a rawn chhuak a, mak tih hmel tak hian Lailah-i, Alice-i ni ta chu a rawn en ta hu mai a. Alice-i pawh chuan a va en a, "Tunge in nih? Enge i hming?" tiin a zawt leh a.

Chu nungcha chuan mak a tih em em nachhan chu Alice-i chuan Mizo tawng ngei a hman vang a ni a, a hma kha chuan tawng dang daih a hmang a ni. Chu thil mak tak mai chu muangchang chuan a rawn penchhuak a, "Mizo tawng i thiam maw?" a rawn ti a. Alice-i chuan mak a ti kher mai, "Engthil nge i nih a?" tiin ava pan phei a.

Mahse ani erawh chuan a lo hlau leh a, a tawlh hnung leh hrut hrut mai. Alice-i chu a ding a, "Hlau suh, ka tina dawn miah lo che ania. HElai hmun hi enge a nih? Engtin nge hetah ka awm theih? Enge thil awmzia min han hrilh teh?" tiin a han zawt leh a. Chu thilnung chuan inthlahrun hmel tak hian, "Hming pawh ka nei hran lo, mihring ka ni miau lova. MAhse mihringte chuan Khuavang tiin min sawi thin, nang..tunge i hming ve?" tiin a lo zawt let ve ta a.

Alice-i chu a han ngawi vang vang a, "Khuavang a? Engthil chiah nge i nih le?" tiin a han zawt nawn leh a. Khuavang chuan a chil a han lem dak a, "Ramhuai chikhat ka ni." a han ti leh a. Alice-i chu a meng phawk nasa ngei mai, "Ramhuai a? Anih helai hmun hi eng hmun nge?" tiin a lo zawt ve leh.

"Helai hmun hi khawvel pawn a ni a, planet pakhat tawp a ni. Ramhuaite chenna thliarkar riin a hming vuah a ni a, helai hmunah hian ramhuai chi hrang hrangte an cheng thin a ni. Chuan keini erawh hi chu kan duhvang nilovin, sal(slave) ni tura helai hmuna tih luihna a awmtir kan ni." tiin Khuavang chuan a lo chhang leh a.

Alice-i chuan a han en deuh hu a, "Kan a? NAngmah chauh i ni lo maw?" tiin a han zawt leh a. Khuavang chuan a lu lo bu nghatin, "Aw ni love...tamtak kan awm alawm." a han ti chiah chu kil tin atang chuan khuavang ramhuai te tak te te an rawn chhuak niah niah hlawm a, a then chu bang phen atang te chuan an rawn dak a, an dawih hmel em em mai lehnghal.

Khuavang chuan sawi zawm leh in, "Kei hi Khuangvang zinga roreltu ber ka ni a, helai hmunah pawh hian kan awm ngai lo hrim hrim. Ramhnuaia awm thin kan ni a, a tul fe lovah chuan kan hmel hi mihring mit hmuh ah kan lan ngai lo. Kan bul hnaih a mihring an awm a nih chuan kan bibo vat zel a, an hriatrengna te kan tibo thin a ni. Mahse helai hmunah hian ramhuai chak tak pakhatin an sal ni tur leh an chhiahhlawh ni turin keini hi min man a, ramhuai kan nih ve tho avangin min awm luih tir a ni." a han ti leh a.

Alice-i chu a ngawi vang vang a, "Anih chu chu tunge?" a tih lai chuan hnunglam ah chuan thawm a rawn awm a, chuveleh khuavang ho chu hlauvin an biru nghal sap sap mai. Alice-i chu a hawi let a, chhum zing ruai ruai atang chuan mihring pian zia, lian em em mai hi a rawn lang dum thul mai a.

A rawn hnai zel a, a kalna chin hmun tin mai chu a rawn alh ta pup pup mai lehnghal a, lei khi kar atang te chuan mei alh a rawn zo khu luih luih mai. A rawn lang chiang zel a, a hmel chu rapawm tak a ni. A mit ko vel te chu a dum hian a dum kuk mai a, a hmui a dum vek bawk. Alice-i chu a rawn pan zel a, chutah a hnung atang chuan thla sei tak mai hi a rawn parh chhuak bawk a, bak thla ang mai hian a zum fer fur mai a, a dum vek bawk.

Alice-i bul chu a rawn thleng a, an inhmachhawn ta ran mai. Vantirhkoh huaisen tak a nih avang chuan Alice-i chuan hlau hmel a pu duh bik hauh lo, rum tak hian a lo melh ve ran mai a. Khuavang ho chu an biru fai vek tawh, chutah chu ramhuai hnung atang chuan ramhuai dang, hmel rapawm tak tak te chuan an rawn zui bawk a.

An awmna zawng zawng chu meidil ni awm ang mai hian a kang hluah hluah mai a, mahse Alice-i erawh chuan engmah sa a hre lo thung, a thiltihtheihna a hmang ve mek pawh a ni mahna. Alice-i chuan chaing fek fawk hian, "Tunge i nih? Nang hi vantirhkoh anga insiam a, helai hmuna min hruaitu, Azazel tia insawi kha i ni em?" tiin a zawt a.

Chu ramhuai chu a khi suk a, "Aw ni e, Lailah. Keimah ngei hi ka ni, ka hming chu Iblis a ni." tiin a chhang a. Thinrim tak hian Alice-i chuan, "Engthil nge ka lakah hian i duh?" tiin a han vin deuh thak a. Iblis chu a nui ta huah huah a, a ban a phar zeuh va. Chu veleh mei alh zawng zawng chu a rawn mit ta vek mai a, a hma ang bawk chuan a khu leh ta rum rum mai.

Amah leh ramhuai dangte pawh chu an taksa alh hluah hluah leh an vun rawng sen vek te pawh chu rawn reh in an vun chu a dum nguk ta vek mai a, "Lailah, i chanchin hi ka lo hre ve alawm. Chuan, helai hmun...Ramhuaite chenna thliarkar, ka lalram ah hian ka lo lawm a che." a han ti vel ham ham a.

Alice-i chuan a kut a hum ruh a, "Paradise ah khan min dah let leh vat rawh, ka lakah hian enge i duh a?" tiin a han vin leh hrep a. Iblis chuan a han en deuh vang vang a, "Ka hrilh ang che, i lakah hian duh chu ka nei ngei alawm. Onoskelis i hneh thute pawh ka lo hre ve alawm, vantirhkoh huaisen tak i ni. Keimah ang chiah, keimah ang chiah a vantirhkoh huaisen i ni." a han ti leh a.

Mak ti tak hian Alice-i chuan a en hu mai a, "Eng a? Van...vantirhkoh i ni ve tak tak amaw?" tiin a zawt a. Iblis-a chu a khi sak a, "Ni e, kei hi Pu Vana hnuai chiah ami? Vantirhkoh Azazel ka ni. Pu Vana nen hian Van indona tam tak kan hmachhawn dun tawh a, hnehna pawh kan chang ziah a ni. Mahse kei hi Pu Vana khian hmanrua mai mai ah min hmang a, a thu ka zawm reng nachhan tur hi ka hre tawh bik lo. Chuvang chuan ka phatsan a, Belzebula te lamah ka tang ta a nih kha." thinrim hmel tak chuan a han ti pung pung a.

Mahse Alice-i erawh chuan a chhang lo, mak ti tak hian a en vung vung ringawt. Iblis chuan sawi chhunzawm zelin, "Mahse hnehna ka chang ta lova, chuvang chuan Paradise atangin min paihthla a, ka hming pawh Iblis a lo ni ta a ni. Mahse ka tlawm dawn lo, thiltihtheihna nei ve tho alawm ka nih. Chuvang chuan planet dang ka siam a, tichuan he hmun hi ka din ta a ni. Khawvel dang tam tak ka sipaite nen kan run tawh , tumah hneh loh ka la nei lo. Hrehmun takngial pawh khian min ngam dawn bik lo. Chuvang chuan Lailah, ka sipaite zingah hian rawn tang rawh. Nang hi Sipai hotu ber ni turin ka duh che a ni, Laila..." tiin a sawm ta mai a.

Alice-i chu a khi suk mai, "Min sawm nge ni a min thlem zawk?" tiin a han zawt let deuh kher a. Iblis pawh chu a khi suk a, "Ka thlem che a ni lo, i tana tha zawk tur a ni ka sawi ni." tiin a lo chhang let a. Alice-i chuan a lu a thing a, "Nang anga vantirhkoh rinawmloh ka ni ve lo, ka Lalpa hi engtikah mah ka phatsan ngai lovang." tiin a chhang ve ta sak mai.

Iblis nui hmel chu thinrimna hlir hian a rawn khat a, "Anih chuan he ka Lal ram ngei ah hian min beih i cho tihna animaw?" a ti ta khur khur mai a, a chal atang chuan ki sei tak rawn chhuakin a vun te chu a rawn sen leh ta vek mai a, a thinrim ngei mai. Chutah an awmna hnum pawh chu a hma ang bawk khan a rawn kang leh ta hluah hluah hlawm mai a, mahse Alice-i erawh ala zam hauh chuang lo.

A tawlh hnung hret a, "Ka thawk tawp thleng ka bei ang che." tih pah chuan a hnung atang chuan a thla chu a ti chhuak ve ta a. "Lailah, tunah hian eng kawrkilh mah i kawl lo. Chubakah Lailah-i nilovin Alice-i i nih kha, khawvela vantirhkoh tla mai mai i nih kha hre rawh." tiin Iblis chuan a vau zui a.

Alice-i chuan thinrim tak hian, "Angel ka nih chhung chuan angel ka ni reng ang, Iblis. Engtikah mah Paradise khi i nei ngai lo anga, engtikah mah Pu Vana, Ka Lalpa khi i hneh ngai lo bawk ang." tiin a lo chhang let ve siah siah mai. Iblis chu zawi muang chuan a han thle kual vel a, "I duh tlat chuan le.." tih pah chuan a thla chu a han ti chhuak ve leh ta a.

Ramhuai dang ho chuan Alice-i chu an rawn bei tan ta, pakhat chu a rawn zuang vak a. Mahse Alice-i chuan a thla hmawr zum tak mai chuan a awmah tak a lo vin tlang hrawih mai a, leikhi kara meiling per chhuai khawp chuan lei den nan a la hmang zui. Pakhat chuan a rawn zuan ve leh a, Alice-i chu lo vir kualin a thla hria tak mai chuan a hem leh pawp a.

Chu ramhuai chu a chanve ah chuan a bung hmawk mai, ramhuai dangte chuan an bawh rawn leh nghal. Mahse Alice-i chu a thla chuan a inkhuhphui leh a, thawngaleivir ang mai chuan na em em hian a vir kual leh ta pup pup mai. Ramhuai tam tak chu thli vir nasa lutuk chuan a la tel hlawm a, an rak nuai nuai mai.

Ramhuai tamtak a hneh zawh hnu chuan Alice-i chu a tum leh chat a, a rawn hawi chhuak leh a. Mahse ramhuai dang 20 rual vel chu an lo ding leh thap tawh, a rual chuan Alice-i bei tur chuan an va tlan phei ri leh hum hum a. Alice-i chuan a thiltihtheihna dang a hamng ve leh thung ta, a thla hmul chu pakhat te te chuan a thlawk chhuak a, ramhuai ho chu a fuh pawp pawp mai a, a darh hian an darh chuai chuai mai.

An la thih kim mai loh avang chuan a ngunhnam, van atanga siam ngei mai ngunhnam chu a phawrh ta a. Chung ramhuai la bang ho chu a sat hlum nghal siah siah hlawm mai, a tawp a tawpah chuan a hneh kim ta. Rum tak hian Iblis chu ava melh a, "Kha zawng kha em ni? A dang an la awm em? Nge kan inbei tawh dawn, lo kal ta che...DAwihzep pa?" a han ti khur khur a.

Hlau lo tih hriat tak hian Iblis chu a nui huah huah mai, "Laila, Alice...i hming chu engpawh ni rawh se. Thil thleng tur ka hre lawk a ni, Vanchung nula duhawmnu. Ka hrilh ang che, engtik ni ah emaw chuan Van-indona a chhuak leh ang. Chutah chuan nang hi Pu Vana lam tang ni tawh lovin, ka lamtang i ni tawh zawk ang." tiin a nui leh huah huah mai.

Thinrim tak hian Alice-i chuan, "Chumi hun a thlen hma chuan nang hi ka dah tha ang che." tih pah chuan a ngunhnam chu van lam hawi zawng chuan a lek chho va, a t(r)ek var pup pup mai, ti chuan na em em hian leiah chuan a han chhun leh siah a. Lei chu a khi thawt maia , a khi kar atang chuan meialh hlawm lian tak mai hi a rawn chhuak a.

Chu meialh hlawm chu Alice-i chuan a chho zawng chuan a ngunhnam hmang chuan a han vai pawp mai a. Mei alh hlawm chu Iblis lamah chuan a lum pheit a pup pup mai le, a force a nat em avang chuan a bula thing tang lo awm te chu an kang chhe sawr phei nghal vek a. Mahse Iblis zawn a thlen chiah chuan meialh hlawm chu a darh chuai a, a khu dum nghal chum chum mai.

Alice-i chuan mak a ti takzet, "Nilo..thil theih a ni lo." a ti vawng vawng mai a. Iblis lah chu a nui vak vak a, "Thil theih ni e, thil theih ni e. Alice, ngaithla teh. Kei hian Pu Vana thiltihtheihna chanve chuang ka nei ve tih i hre ve lo. Amah ngei ina min pek a ni a, lak let leh theih a ni tawh lo." a ti ham ham mai.

Chutah Alice-i chuan a ngunhnam chu a va khawh ta pawp mai a, mahse awlsam tak chuan Iblis chuan a lo man chat a, a hriam lamah chuan ala cuan zui. Alice-i lam bawkah chuan a va khawh let leh a, Alice-i awm zawnah chuan a tlang ta pawp mai. A thingthi hnawk a, thisen a chhuak nghal bawk.

Chutia Vantirhkoh ve meuh si, thisen a nei ta mai chu amah Alice-i ngei pawh chuan hrethiam lovin mak a ti em em a. Iblis chuan a rawn pan hnai a, maimitchhing chung chuan sang takah a ban a phar a. Chuveleh Alice-i'n a thah tak ramhuaite chu an rawn tho leh ta vek hlawm mai.

An rawn hual leh ta thup mai a, Iblis chuan a ban dah thla in Alice-i chu a en a. Nui chung hian, "Mak i va ti awm ve, thisen i nei kha mak i ti viau a nimaw?" tiin a han deuh sawh vel a. Alice-i chuan thei leh thei lo hian a han melh a, mahse engmah a sawi thei lo. Iblis bawk chuan, "Onoskelis anchhia kha ala reh hleinem, Alice. Nangmah ah khan ala awm reng, Pu Vana khan a laksak lo lui che a ni." a ti ta mai a.

Alice-i chuan mak a ti takzet, "Nilo...a ti lovang. Chutiangin ka Lalpa in a ti lul lovang, dawt...dawt i sawi." a ti tawk tawk a. "Nilo, dawt a ni lo. A duh thu ngeiin kha anchhia kha ti tawp thei reng chung siin, a ti tawp lo lui a ni." tiin Iblis chuan a lo chhang leh a. Alice-i chu a ngawi reng a, a dul a ngunhnam bur vu mai chu a han pawt chhuak a, na a ti kher mai.

Chutah Iblis bawk chuan, "Paradise atanga hmun dang, khawvel danga i awm apiangin mihring i ni zel tawh dawn, i thiltihtheihna a san em avang chauhvin mihrign ni chung reng siin hmun tinah, planet dangah pawh i awm theih phah mai chauh a ni." a lo ti leh a. A lice-i chuan a dul a hliam chu a han hmet vang vang a, reiloteah a rawn dam nghal a.

Mahse ala chau tak zet, a la tho thei tlat lo. Iblis chu a hma zawn takah chuan a rawn ding a, "Tun chiah ka sawm tawh ang che, ka sipaite hotu ah chuan lo tang mai rawh. A nih loh chuan man i ni ang a, he thliarkar tan inah hian chatuan atan khung beh i ni tawh ang." a ti leh ta khur khur mai.

Alice-i chu muang chang chuan a tho va, "Eng..engtikah mah i lamah ka tang ngai lovang." tih pah chuan Iblis chu a hnek hawi sawk mai. Inlis thinrim chu a khu vut vut thei hial a, "Hruai bo nghal rawh u." a ti vin tuar a. Ramhuai dangte chuan Alice-i chu an man a, tan in thim takah chuan a thla zawng zawng te chu hlih luih sak niin an khung ta a ni.

********************************

Vantirhkoh Seraphina chu thinrim tak hian a insehruh a, "Ka Lalpa, kei leh ka sipaite hi chulai hmunah chuan...Lailah-i an dahna ah chuan kan kal dawn. Kan rawn hruai haw ngei ang, kan rawn chhanchhuak ngei ang. Thu min pe rawh, tichuan kan kal nghal ang." tiin a inring nghal hle mai.

Vantirhkoh Dara pawh chu rawn tawngchhuak ve in, "Keipawn ka rawn zui ang che, Seraphina." a rawn ti ve bawk a. Chutiang bawkin midang chuan a mal te te in an rawn ti ve zel bawk a. Pu Vana chu a ngawi vang vang a, "Chuti mai chuan thuthlukna siam chi a la ni lo, a chhan chu he Devil's Land hi a awmna tak ka hre lo a ni. Iblis khan kan awmna a hriat nachhan chu a hma pawh a, a chenna ngei a lo ni ve tawh avangin a rawn hre mai mai a ni. Khati khawpa a rawn chet vat theih danah thiltihtheihna tam tak a nei tih a chiagn reng bawk." a han ti deuh charh charh a.

Vantirhkoh Sipai hruaitute zinga an chhuanvar ber ber te chu Pu Vana chuan a ko khawm a, an hming chu Vantirhkoh RAphael, Malakai, Raziel leh Uriel te an ni. "Heng mite ho hian hma hruai ula, sipai tha hnem tak in hruai bawk tur a ni ang." tiin thu chu a pe ta hlawm a. Chung Vantirhkoh pasalthate pawh chu rawn pen chhuakin an ralthuam an la a, "Kan inring reng e, ka Lalpa." tiin Vantirhkoh Raphael-a, an zinga upa ber chuan a han ti a.

Mahse Seraphina lung chu a awi thei mawlh lo, "Ka Lalpa, tigne kei i hnuai chiah a awm hi min tirh theihr eng laia heng pasalthate zawk hi i tirh mai le?" a lo ti a. Pu Vana chuan Seraphina chu chiang tak hian a en a, "Ka fanu, i unaunu Lailah-i hi ka ring tawk a, amah pawhin a do hneh theih hial ka ring a ni. Chuvang chuan Onoskelis-i anchhia pawh kha ka la laklet sak lo a, ka duh thu ngei a laklet sak lo ka ni bawk." a han ti mai chu vantirhkoh ho zawng zawng chuan mak an tiin an Lalpa, Pu Vana chu an en thap mai.

Vantirhkoh Dara (Dara hi hmeichhia a ni.) chuan, "Engmaw LAlpa, enge awmzia?" a lo ti nghal hu mai a. Pu Vana chuan a lu bu nghauh nghauhvin, "Aw ni e, a chhan chu amah ah hian inrintawkna ka hmu a, beiseina sang tak ka nei a ni. He anchhia hi amah hian a ti tawp thei a, tunah Iblis-a awmna humun Devil's Land atang pawh hian a tum tak tak a nih chuan a theihna zawng zawng sawmkhawmin a rawn let leh theih hi ka ring tlat a ni. Mahse tun atan chuan ka puih ve rih a ngai a ni, chuvang chuan kan pasalthate hi kal hmasa phawt se, a hnuah rorel chu kan chhunzawm dawnnia." tiin a chhang let a.

Tichuan Pasaltha pali te chu ral bei tur chuan an inring ta, "Planet tin hel kual ula, khawi hmun emaw berah chuan a awm ngei ang. Ka sawi tawh ang khan mi thiltithei lutuk mai a ni a, Iblis hi...pawng beih ngawt chi a ni lo tih hre bawk ang che u. Fimkhur takin in kal dawn nia, ka awmpui reng che u tih hre bawk ula, dam takin ka fanu Lailah hi rawn hruai kir leh ang che u." tiin Pu Vana chuan a chah hlawm a, vantirhkoh pasaltha pali te leh sipai dang tamtak te chuan Paradise chu an chhuahsan ta a ni.

*******************************

Alice-i chu a harhchhuak thut mai, lung in thim tak leh bal tawp em em mai ah hian a lo awm a. Saruak veka awmin a vantirhkoh thla pawh chu a lo bnei tawh hauh lo. A hnungzang chu a pilh hrup mai a, a thla an lakthlak na hnuhma a ni. A chau em em a, a taksa zawng zawng pawh chu a dang var pup mai.

A kut pahnih ah chuan chain lian tak mai hi thlun a ni a, a sir lam ve ve ah chuan banga lung ah chuan inphumin han talchhuah mai mai na chi pawh niin a lang lo. A hrawlin a lian em em a, chain namai a ni lo tih a hriat hle bawk. A han tal vak vak a, mahse chakna reng a nei lo. Chutah a hma ah chuan Iblis a rawn lang thut mai a, Alice-i pawh chu a phu nsa kher mai.

Iblis chuan a rawn pan hnai a, "I lo harh tawh maw..Sichangnei?" a rawn ti vel a. Chu veleh Alice-i chuan phawk hru hian, "Eng a? Sichangnei a? Engtin nge chu hming te chu i hriat ve theih zawk a?" tiin a han vin deuh hlur a. Iblis chu a nui leh huah huah mai. Chutah a hmel chu rawn inthlak thutin thinrimna hlir hian a rawn khat nghal a, "I hming a ni lawm ni? Sichangneii...engkim ka hre vek alawm. Alice, ka duh em che avang hian chance ka pe ang che. Helai hmunah hian mitang anga chatuana tawrh nge i duh, ka hnuaia sipai hotua awm? I duh chu ila thlang thei anai, mahse ka tilui lo che...i hmabak chu i hriat kha.." a han ti leh a.

Mahse Alice-i chu ala luhlul tlat, a lu a thing leh a. Rum tak hian Iblis chu enin, "Engtikah mah i lam ka tang ngai lovang." tih pah chuan chil a chhak khum a. Iblis chuan a hmai chu tuai faiin, "Vantirhkoh i va ang ta lo ve..ni e, khawvel mi i ni hman miau alawm tiraw?" tiin a han khi deuh suk a, Alice-i chuan a melh rum ngang mai.

Thawk a han la te te a, "A tha e, i rilru i thlak hun ala awm ngei ang. Keichuan engtik lai pawhin ka pawm che tih hria la, lo inngaihtuah chiang ang che." tiin a hnung tawlh a. Chutah a sira bang kil, thimk mup mai chu a va en a, "I thutiam chu hlen ngei ang che, ka ring che a, min phatsan a nih vaih chuan i chak lo viau ang tih hre rawh. Min tiamna ang ngeiin Hremhmun atangin ka la chhuak che a, hetah chuan min bum tum ve hlek suh ang che." tiin a han vau khur khur a.

Chutah le, thim zing atang chuan mipa pakhat hi a rawn chhuak a. a vun lah chu a dang var pup mai a, thawmhnaw dum vek ala inbel zui, a mit lah chu a dum kuk mai a, a ha a hriam hle bawk. Cbhupa chu tudang nilovin London Vampire, Zeros-a ngei kha a ni. A awmzia chu Zeros-a hi ala thi hauh lova, Belzebula khan hremna pe in Hremhmunah a tan tir ringawt tihna a ni.

Chu chu Iblis hian a thiltihtheihna hmangin a la chhuaka , tichuan ama puihna leh thluak finna hmangin Sichangneii, Lailah-i, Alice-i ni bawk hi Paradise atangin an ru chhuak thei ta a lo ni. Zeros-a chu a eng laiah chuan a rawn chhuak a, "Awle Ka Lalpa." tiin a chhang a, a ha hriam tak lang chuan a nui khi var var mai.

(TO BE CONTINUE)